Oqaluuserisassani immikkoortoq 18-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 21. februar 2000 nal. 14.17
Ataatsimiinnermik aqutsisoq: Inatsisartut Siulittaasuat Ole Lynge.
Asii Chemnitz Narup, siunnersuuteqartoq, Inuit Ataqatigiit:
Siunnersuutigaara
Inatsisartut ilagiinni atorfinitsitsisarnerit pillugit peqqussutaata nr. 8-p
30. oktober 1998-imeersup allannguuteqartinneqarnissaa provstitut
atorfinitsitsisarnermi maleruagassat eqqarsaatigalugit. Ilagiinni
atorfinitsitsisarnerit pillugit peqqussut ilaatigut domprovstitut
provstitulluunniit atorfinitsitsisarneq pillugu malittarisassaqartitsivoq.
Maleruagassat maanna atuuttut tunngavigalugit ilagiit sinniisaat
pisinnaatitaaffeqarput palaseqarfimmi provstip palasitut suliffigiligassaani
provstimut qinnuteqartut ilaannut pingasunut oqaaseqaateqarnissaminnut.
Provstitut
suliassat akisussaaffiillu palaseqarfimmit palasitut suliffigisamit
siammasinnerusarput provsti sulinermini palaseqarfiit qassiit ilanngullugit
akisussaaffeqartarpoq taamaattumik tupigikulunnarpoq provsteqarfimmit
tamarmiusumi ilagiit sinniisaasa tamakkerlutik provstimut qinnuteqartut
pillugit oqaaseqartinneqarneq ajornerat.
Tulluarnerpaajussannginnerpa
ilagiit siniisaat provsteqarfiup ataatsip iluaniittut tamarmik naligiimmik
oqaaseqarsinnaatitaasuuppata? Tassami palaseqarfiup avataaniittut aamma
provstimik sullinneqarlutillu kiffartuunneqartussaasaramik
sunniuteqaqataanissaminnut periarfissaqartariaqarput. Inatsisartut apeqqut
siuliani taaneqartoq pillugu isummernissaat kissaatigaara taama oqaaseqarlunga
siunnersuut Inatsisartunut oqaluuserisassanngortippara neriuutigalugu
ilassilluarneqarumaartoq.
Lise Lennert, Kultureqarnermut Ilinniartitaanermut Ilageeqarnermullu
Naalakkersuisoq:
Qujanaq.
Inatsisartunut ilaasortaq Asii Chemnitz Narup matumani katersuunnermut
ilagiinni atorfinitsitsisarnerit pillugit Inatsisartut peqqussutaata normu 8
oktoberip 30-anni 1998-imeersup allanngortinneqarnissannik siunnersuuteqarpoq.
Siunnersuutigineqarpoq
ilagiit sinniisaat provsteqarfimmi palaseqarfinni tamani provstitut atorfimmut
qinnuteqaateqartartut pillugit oqaaseqaateqartissinnaasariaqartut
taamaalillutillu sunniuteqaqataanissaminnut periarfissinneqartariaqarlutik.
Maleruagassat
atuuttut malillugit taamaallaat palaseqarfimmi provstip palasitut
suliffigisassaani ilagiit sinniisaat qinnuteqaateqartut pingasut
pingaarnersiorlugit tulleriiaarlugit inissinneqartut pillugit
oqaaseqaateqartussaapput.
Peqqussummi
paragraf 10 immikkoortoq 1-mi, aaqqiissuteqarsimanermut pissutaavoq, provstitut
atorfiup marloqiusamik suliassaqarfiunera, provsti palaseqarfimmi, provstip
allaffiata sumiiffigisaani, palasitut sulisussaavoq taamatuttaaq provsti
provsteqarfiup allaffissornikkut qullersaatut sulisussaavoq, taamaalillunilu
biskop-ip provsteqarfiullu palasiisa ilagiillu sinniisasa akornanni
allaffissornikkut akunnertartussaalluni.
Palasitununa
suliffimmut atatillugu, ilagiit sinniisaat pineqartut, oqaaseqaateqarlutillu
inassuteqartussaasut, provsteqarfimmi allaffissornikkut pisortatut, suliffimmut
atatinnagu.
Tamanna
tunngavigalugu, qinnuteqaatit provsteqarfimmi, ilagiit sinniisaannut allanut,
saqqummiunneqartarnissaat pissutissaqanngilaq. Taamaammallu maleruagassat
maannakkut atuuttut, allanngortinnissaat pisariaqarsorinanngilaq, taamaammat
naalakkersuisut ilagiinni atorfinitsitsisarnerit pillugit, inatsisartut
peqqussutaata nr. 8, 30. oktober 1998-imeersup, siunnersuutigineqartut
allanngortinneqarnissaa kaammattuutigisinnaanngilaat,
siunnersuuti-gissalluguli; siunnersuut biskopimut provsteqarfinnullu
ataatsimiititalianut, pisariaqarpallu, qanittukkut palasit
ataatsimeersuarnissaannut tusarniaassutigineqassasoq.
Tamanna
pereerpat, peqqusutip siunnersuutigineqartutut, allanngortinneqarsinnaaneranik
apeqqut, naalakkersuisut uterfigeqqikkumaarpaat.
Ruth Heilmann, Siumup oqaaseqartua:
Naalakkersuisut,
inatsisartut ilagiinni atorfinitsitsisarnerat pillugit peqqussutaata nr. 8, 30.
oktober 1998-imeersup, allannguutissaanik siunnersuummik, inatsisartut 2000
upernaakkut ataatsimiinnissaanut, saqqummiussassanngortinnissaanut inatsisartut
aalajangiiffigisassaatut siunnersuuteqarpoq, inatsisartunut ilaasortaq Asii
Chemnitz Narup, Inuit Ataqatigiinniit, taannalu siunnersuutaa pillugu,
Siumumiit imatut oqaaseqarfigissavarput:
Siullermik,
Siumumiit oqaatigissavarput; ilagiinni suliniarneq, pingaaruteqarluinnartut
tapersersortuartariaqartutullu isumaqarfigigatsigu, aammalu pinngitsoornata
oqaatigissallugu, iluarisimaaratsigu, ilageeqarneq Ilinniartitaanermut,
Kultureqarnermut Ilisimatusarnermullu Naalakkersuisoqarfiup ataani
ingerlanneqalissammat, taamaattumillu akisussaaffimmik taassuminnga maanna
tunineqartut, naalakkersuisuni ilaasortap, Lise Skifte Lennert suliassamik
taassuminnga, pitsaasumik ingerlatsinissaanik kissaakkumavarput.
Domprovstitut
provstitulluunniit atorfinitsitsisarneq, nunatta immikkoortukkuutaavini
inissiffiusarpoq, kujataani Qaqortumi, qeqqani Nuummi avannaanilu Ilulissani.
Maannakkut Ilulissaniittut, ilagiit sinniisaat taasisussaatitaapput, tassani
peqqutaavoq, palasissatut toqqaaneq, kommunimi ilagiinni siulersuisunit
toqqarneqartarmata.
Siumumiit
erseqqissaatigissavarput, provstitut atorfeqarneq marloqiusaammat, tassalu
palasitut inissisimaatigaluni, saniatigut allaffissornikkut akisussaaffiit
aamma tigummineqartarmata.
Uunga
apeqqummut tunngatillugu, Siumumiit isumaqarpugut, ilagiit
paaseqatigilluinnarlugit, suliap ingerlanneqarnissaa pisariaqartoq,
taamaattumillu ilagiit sinniisuinut siulersuisuinullu
tusarniaassutigineqarnissaa pisariaqarluni, taamatut ingerlaaseqarneq Siumumiit
pingaartittuarparput, namminersornerulernittami aamma siunertarimmagu,
innuttaasut qanimut suleqatiginissaat, isummertinneqarnissaminnillu
periarfissaqartitaasarnissaat.
Taamatut
oqaaseqarluta Siumumiit naalakkersuisunut kissaatigaarput apeqqut taanna
ilagiinnut tusarniaassutigineqartariaqartoq.
Sivert K. Heilmann, Atassutip oqaaseqartua:
Inatsisartuni
ilaasortap, Asii Chemnitz Narup-ip, ilagiinni atorfinitsitsisarnerit pillugit,
inatsisartut peqqussutaata nr. 8, 30. oktober 1998-imeersup,
allanngortinneqarnissaanik aalajangiiffigisassatut siunnersuuteqarneranut,
Atassummiit imatut naatsunnguamik oqaaseqassaagut:
Atassummiit
Kultureqarnermut, Ilinniartitaanermut, Ilisimatusarnermut Ilageeqarnermullu
Naalakkersuisup inassuteqarnera isumaqatigaarput, tassalu
allannguisoqartinnagu, siunnersuutip biskopimut provsteqarfinnullu,
ataatsimiititalianut kiisalu palasit ataatsimeersuarnissaannut
tusarniaassutigineqassasoq, tamannalu pereerpat, apeqqut
uterfigeqqinneqarsinnaanera, Atassummiit assut tulluartutut isigaarput.
Olga Poulsen, Inuit Ataqatigiit oqaaseqartuat:
Inatsisartuni
ilaasortap, Asii Chemnitz Narup-ip, Inuit Ataqatigiinneersup, ilagiinni
atorfinitsitsisarnerit pillugit, siunnersuutaa tunngaviatigut tamakkiisumik isumaqatigivarput.
Taamaattumik
naalakkersuisut, inatsisartut upernaamut ataatsimiinnissannut
piumasaqarfigaavut, peqqusutip nr. 8, 30, oktober 1998-imeersup,
allannguutissaanik siunnersuuteqaqqullugit.
Inuit
Ataqatigiinniit pissusissamisoorsorivarput, provsteqarfiit pineqartut,
assigiimmik tamarmik inassuteqartarnissaminnut periarfissinneqarnerat
aammaanneqartariaqartoq.
Isumarput
tunngavigalugu, Asii Chemnitz Narup-ip siunnersuutaa
piviusunngortinneqassappat, illoqarfiit ataasiakkaat, nunap immikkoortuini,
provstissamik toqqaaniartoqartillugu, tamakkiinerusumik
aalajangiiqatigiissinnaanissaat anguneqarsinnaassagaluarpoq.
Assersuutigalugu;
ulluni makkunani, avannaani provstissamik toqqaaniartoqarpoq, qulaanilu
peqqussut, ullumikkut atuuttoq tunngavigalugu, Ilulissani ilagiit sinnersaat
kisimik pisussaatitaapput, nunatta avannaa tamaat sinnerlugu, provstissamik
innersuussuteqarnissaminnut.
Tamanna
qinikkat, ilagiit sinnersaat tamarmik, assigiimmik atorneqarnermikkut,
isummersinnaanerannut naligiissumik, periarfissinneqannginnerannik
ersersitsereerpoq, tamannalu Inuit Ataqatigiinniit,
oqartussaaqatigiittoqarneranut tunngatillugu, tulluarsorinnginnatsigut Asii
Chemnitz Narup-ip siunnersuutaa tamakkiisumik taperserparput.
Naggataatigut
Inuit Ataqatiginniit oqaatigissavarput; naalakkersuisup akissuteqarnermini
naggataatigut oqaatigisaa; tassalu peqqusutip allanngortinneqarnissaanut
atatillugu, biskopip, provsteqarfiit aammalu pisariaqassappat palasit,
tusarniaaffigineqarsinnaanerat pissusissamisoorluinnartutut isigigatsigu.
Taamatut
oqaaseqarluta, kissaatigaarput naalakkersuisut suliassaq pimoorullugu
suliariumaaraat.
Tom Ostermann, Kattusseqatigiit oqaaseqartuat:
Inatsisartuni
ilaasortap, Asii Chemnitz Narup-ip, inatsisartut peqqussutaata nr. 8, 30.
oktober 1998-imeersumut, siunnersuuteqarneranut tunngatillugu, imatut
Kattusseqatigiinniit oqaaseqaateqarusuppugut:
Ilageeqarnermut
naalakkersuisup akissutaa, naammagisimaarlugu Kattusseqatigiinniit
nalunaarutigissavarput.
Inatsisartunut
ilaasortap, Asii Chemnitz Narup-ip siunnersuutaanut tunngatillugu,
naalakkersuisullu akissuteqaataata misissoreerlugit, Kattusseqatigiinniit
maluginiarparput; peqqussut maannamut atuuttoq paasinerlussimagaa, taamaattorli
pissusissamisoortipparput, apeqqut pineqartoq, palasit ataatsimeersuarnissaannut
saqqummiunneqarnissaanik oqallisigineqarnissaanillu.
Asii Chemnizt Narup, Inuit Ataqatigiit:
Siunnersuut tigussaasoq naatsunnguarlu, taamatut ilassilluarneqarnera
qujassutigivara, qujassutigivara tusarniaassutigineqarnissaa akuersaarneqarmat.
Siumuminngaanniit oqaatigineqarpoq; Siumukkormiut pingaartikkaat,
ilagiit paaseqatigalugit, suliat taamaattut ingerlanneqarnissaat, soorunami
taanna assortunngilluinnarparput, aamma Inuit Ataqatigiinninngaanniit qinikkat
uagut, qanoq isumaqarluta erseqqissumik nalunaaruteqartarnissamik
pisussaaffeqarluta isumaqaratta, imaanngilaq ilagiinni oqartussat
qulangerniarlugit taamatut siunnersuuteqartugut.
Qujassutigivara taamaammat, aamma tusarniaassutigineqarnissaanut
naalakkersuisut akissutaani, siunnersuutigineqartoq ilassilluarneqarmat.
Maluginiarpara, naalakkersup akissuteqarnermini, provstitut atorfiup,
allaffissornermik imaqartinneqarnera pissutigalugu, provstimik
atorfinitsitsinermi, provsteqarfimmi palaseqarfiit tamakkerlugit, oqaaseqatinneqarnissaat
pisariaqartinngikkaa
Inuit Ataqatigiinni tunngaviusumik illersugarivarput, sutigut tamatigut
oqartussaaqataanerup siammasissuunissaa, aammattaaq ilagiit
aaqqissuussaanerannik.
Provstip suliaai akisussaaffiilu eqqarsaatigalugit, pissutissaqarsorinarpoq
oqartussaaqataanerup siammasissuutittariaqarneranut atatillugu makku
erseqqissalaassallugit:
Siullermik:
Provstip suliaai akisussaaffiilu, ilagiinni sullissinermi
pingaaruteqarluinnartuupput, tamakkulu pitsaasumik naammassineqarsinnaapput,
provsteqarfimmi tamarmi, ilagiit sinniisaannik qanimut suleqateqarnikkut.
Aappassaanik:
Provstip pisinnaatitaaffiisa ilaat, peqqussutitigut naqissusigaasoq,
assersuutitut tikkuarsinnaavarput, tassalu; provsteqarfimmi ilagiit sinniisaasa
sumiittulluunniit, ataatsimiinnerini peqataanissamut pisinnaatitaaffia.
Pingajussaanik:
Ilageeqarneq pillugu, peqqussummi oqaatigineqarpoq, biskopip ilagiit
anersaakkut siulersorlugit, sulinerani provstit ikiortaasartut, soorunami
biskopip peqqusineratigut.
Taamaattumik isumaqarpunga, provstimik atorfinitsitsisarnerni,
provsteqarfimmi ilagiit sinniisaannik tamanik, oqaaseqaateqartitsinissamut
periarfissiinianngikkaanni, apeqqut minnerpaamik, palaseqarfinni provstip
palasitut suliffigisassarinngisaani tusarniaassutigineqartariaqartoq.
Lise Skifte Lennert, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisoq:
Partiit Kattusseqatigiillu innersuussutigisaat, soorunami tusaatissatut
tiguakka, aammalu suliassartaa tassa; tusarniaanissaq aamma isumaginiassallugu,
kiisalu siunnersuuteqartumut, Asii Chemnitz Narup-imut, una akissutigisimasama
imaa uterfigimmagu erseqqissaannassavara, massakkut tassa, peqqussut nr. 8,
1998-imeersoq najoqqutaralugu taamaammat, tassa provstip suliarisaa marloqiusaammat,
allaffissorneq kiisalu palasitut sulinissaq, taavalu peqqussut najoqqutaralugu,
taamaallaat uani oqaaseqaatigineqartussaq pineqartoq tassaavoq, palasitut
tassani atuuffimmini illoqarfimmi sulinissaa, oqaaseqarfigineqassasoq.
Taamaammallu, tassa sooranami partiit kattusseqatigiillu, uunga
tunngatillugu saqqammiussaat tunngavigalugit, taamatut kissaateqartoqarnera
tusaavara, aammalu suliassartaa ingerlateqqissallugu.
Ole Lynge, Ataatsimiinnermik aqutsisoq:
Tassa nappaasut tassunga killeqarput, oqaaseqarumasut.
Immikkoortup 18-ip suliarineqarneranut atatillugu, tassa
aalajangiiffigisassatut una siunnersuutaammat, suleriaatsigut naapertorlugit,
paaseqatigiissutigisussaassavarput qanoq ingerlaqqissanersoq, malunnarpoq
naalakkersuisup akissuteqaatani, uani ataatsimiinnerup ingerlanerani,
aappassaaneerneqarnissaa pisinnaassanngitsoq, allannguutissatut siunnersuummik
saqqummiussisoqartinnagu.
Taamaattumik apeqqutigerusuppara; siunnersuut aappassaaneerneqartinnani
inatsisartut kultureqarnermut, ilageeqarnermullu ataatsimiititaliaanut
ingerlatinneqarnissaa pisariaqartinneqarnersoq?
Otto Steenholdt, Atassut:
Naalakkersuisup aatsaaqqisaaq
oqaasii aallaavigalugit, uanga isumaqarluinnarpunga suliassaminik innersuussinera
utaqqimaartariaqartoq, taanna uanga nuannaarutitut tiguara, allaat
ataatsimiititaliamukartariaqanngitsutut nalilerlugu, akissutissani,
neriorsuutigisani takutereerpagu, immaqa ajunnginnerussaaq tassannganniit
ingerlaqqikkuni.
Ruth Heilmann, Siumut:
Uaguttaaq
Siumuminngaanniit, soorunami partiit qanoq oqaaseqarnerat naapertolugu, aammami
kissaatigineqanngilaq partiini kattusseqatigiinnillu, ataatsimiititaliamut
innisersuussutigineqarluni, taamaattumik naalakkersuisup taamatut
suleriaqqinnissaminut massakkut ingerlatitseqqinniarnera aamma uagut
naammagisimaarparput.
Olga Poulsen, Inuit Ataqatigiit:
Uaguttaaq Inuit Ataqatigiinninngaanniit naggataatigut oqaatigivarput;
naalakkersuisut tusarniaanissaminnut suliumanerat taanna Inuit
Ataqatigiinninngaannit akuersaarlugu.
Ole Lynge, Ataatsimiinnermi aqutsisoq:
Tassalu taamaalilluni immikkoortoq 18 naammassivoq, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisup
suliassap killiffia najoqqutaralugu saqqummiussaqaqqikkumaarput matuma
kingorna.
Oqaluuserisaq naammassivoq.