Oqaluuserisassani immikkoortoq 40 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 21. februar 2000 nal. 13.33
Ataatsimiinnermik aqutsisoq: Inatsisartut Siulittaasuat Ole Lynge.
Olga Poulsen, siunnersuuteqartoq, Inuit Ataqatigiit:
Qujanaq.
Matumuuna Inatsisartuni Inuit Ataqatigiit sinnerlugit siunnersuutigaara
upernaamut ataatsimiinnissamut ilinniagaqartut aningaasarsiaasa
qaffanneqarnissaannut tunngaviusunik Naalakkersuisut misissueqqullugit.
Taamatut siunnersuuteqarninnut tunngavigaara ukiuni arlaqaqisuni
ilinniagaqartut aningaasarsiamikkut qaffaavigineqarsimanngimmata, naak allat
tamarmik qaffaavigineqaraluartut. Ilinniagaqartut aningaasarsiaat ullumikkut
aningaasat pisissutaasinnaanerat eqqarsaatigigaanni annikippoq. Tamanna
naalakkersuinikkut isigingitsuusaginnarsinnaanngilarput. Nunatsinni
ilinniagaqarnissamik piumaffiginnittuarneq eqqarsaatigigaanni.
Ullumikkut
aamma ilisimaneqarpoq ilinniagaqarlutik aallartittartut amerlaqisut
meeraqalereerlutik aallartittartut - ilaatigut arlariinnik meeraqarlutik.
Tamakkualu artukkerneqartarnermikkut ilinniangaqarnertik
uniitsiinnartariaqartarpaat inuiaqatigiinnut akisoqisumik
kinguneqarsinnaasartumik. Inuiaqatigiit sukkaqisumik ineriartorpugut. Tamatta
kissaatigaarput nunatsinni suliffeqarfiit nunaqavissunik inuttalerneqarnissaat.
Tamanna aatsaat pitsaasumik anguneqarsinnaavoq ilinniagaqartuutigut
inuiaqatigiit ineriartornerannut malinnaatikkutsigit. Qujanaq.
Lise Skifte Lennert, Ilinniartitaanermut Naalakkersuisoq:
Olga Poulsen-ip siunnersuutaa Inatsisartut
Siulittaasoqarfiannit apeqquteqaat tunngavigalugu
oqallisigisassanngortinneqarpoq. Ilinniartut aningaasarsiaasa
allanngortinneqarnissaannik siunnersuut. Ilinniangaqartut atugarisaat pillugit
misissuineq matuma siuliani Inatsisartut ataatsimiinneranni maannalumi
saqqumiunneqartarpoq - kingullermik Inatsisartut ataatsimiinneranni
ilinniagaqartut atugarisaannik misissuineq pillugu Anthon Frederiksen
apeqquteqaateqarluni. Taamaattumik akissutissakka ataatsimut isigalugit
siusinnerusukkut akissutigisannik uteqqiinerussapput.
Ilumoorpoq ukiuni arlaqalersuni
ilinniartut aningaasarsiaat qaffanneqarsimanngimata, ilinniarnermut
aningaasarsiat amerlassusiat aamma ilinniagaqartut atugaasa
isummerfiginissaannut tunngavissaqarniarluni ilinnigaqartut kattuffii KIK aamma
DKIK naatsorsueqqissaartarfik suleqatigalugu Kulturimut, Ilinniartitaanermut
Ilageeqarnermullu Naalakkersuisoqarfimmit aningaasatigut taperserneqarlutik
1997-mi ilinniagaqartut atugaannik misissuineq aallartippaat. 1999-ip
aallartinnerani misissuinerup tamanut saqqummiunneqarnerani taamani
Ilinniartitaanermut Naalakkersuisuusup nerorsuutigaa KIIP-p KIK aamma DKIK
suleqatigalugit ilinniarnermi aningaasarsiaqartitsinermi atukkanik
sukumiinerusumik misissueqqissaarnermut nutarterinermullu misissuineq
tunngavittut atorniaraat.
Naalakkersuisunngornerma
kingorna KIK-mut DKIK-mullu uppernarsarpara suliaq aallartinneqassasoq.
Tamatuma kingorna sulinermi suliassiissutit suliaraakka, paasissutissat
tunngaviusut atortussallu allat misissueqqissaarnermut taama ittumut atugassat
taamaallaat ilinniagaqartitsivimmi pissarsiarineqarsinnaammata.
Pissusissamisoorpoq ilinniagaqarnersiuteqartitsiviup aqutsineq
allatoqarnikkullu suliassat ingerlatissappagit. Ilisimaneqalersutut ilaatigut
tusagassiorfitsigut ilinniagaqarnersiuteqartitsivik qarasaasiaqarnermigut
ajornartorsiuteqartorujussuuvoq. Taamalilluni allanik atortoqarnissaq
ilaatigullu taarsigassarsitsisarnerup allaffissornikkut aqunneqarnerata
aningaaserivimmut nuunneqarnissaa pisariaqalersimalluni.
Sulinermi tassani
sulisorineqarsinnaasut tamarmik atortariaqarput, taamattumillu Inatsisartut
upernaakkut ataatsimiinnissaannut ilinniartut aningaasarsiaasa
qaffanneqarnissaannut tunngavilersuutinik suliarilluakkanik
saqqummiussisoqarnissaanik Naalakkersuisut neriorsuisinnaanngillat -
ilinniagaqarnersiuteqarfimmi ajornartorsiutit qaangerneqarniariarpata
misissueqqissaarnissamik pilersaarut ingerlaannaq aallartinneqassaaq.
Ilinniartut aningaasarsiaasa qaffanneqarnissaannik pisariaqartitsineq pillugu
ilanngullugu oqaatigineqassaaq inuuniarnikkut atugarisanik misissuineq
eqqartoneqartoq ilinniartut aningaasarsiaasa amerlineqartariaqarnerannik
erseqqissumik paasisaqarfiunngimmat. Apersorneqartut amerlanersaasa
aningaasarsiat appasippalaartutut isiginngilaat. Ilinniagaqartut meerallit
atugarisaat pillugit ilisimatitsissutigineqassaaq ilinniartut meerannut
tapiissuteqartoqartarmat maannakkut meeqqamut ataatsimut qaammammut 758
koruuniusunik. Qujanaq.
Per Berthelsen, Siumup oqaaseqartua:
Siullermik Siumumit
oqaatigiumavarput ilinniartorisatta atungaasa ataavartumik
malittarineqarlutillu nalilersuiffigineqartuarnissaat pisariaqarluinnartutut
isigigatsigu. Taamaammallu Siumumit pingaartipparput tassami nalunnginnatsigu
suleriarnissamut tunngavissiaq piareerneqarnikuusoq suleqatigiissitap
sulinissaata piaartumik aallartinneqarnissaa, tamatumami assigiinngitsutigut
kinguarsarneqarsimanera naammareeqimmat.
Tassanimi nalilersuinissat
nutaat pingaaruteqartussat ingerlanneqartussaassammata. Eqqortorli aamma
taasariaqarmat Siumumit oqaatigissavarput
tulluusimaarutiginngitsoorsinnaannginnatsigu nunarsuarmi tamarmiusumi pissutsit
qimerloorutsigit uagut nunatsinni ilinniartuutivut tassaammata
ilinniarnersiuteqartitaanikkut qaffasinnerpaanut ilaasut.
Taamaammallu nuannaarutigalugu
maluginiarparput misissuinermi akissuteqartut amerlanerpaat nalunaarsimammata
misigisimanatik ilinniarnersiutitik appasippallaartut. Siumumimmi
pingaartilluinnarparput inuiaqatigiinni aningaasaqarnikkut inissisimanerput
ataqqillugu tamatumunnga naapertuuttumik pilersaarusiorniartarnissarput.
Taamatut oqaaseqarluta Siumumit apeqquteqaammut naalakkersuisunit
akissutigineqartoq akuersaarlugu tusaatissatut tiguarput.
Anders Nilsson, Atassutip oqaaseqartua:
Olga Poulsen tunngavilersuutiminut ilagitippara taamannak qaffaaniarnermini
tassami ilinniartuunersiutit ukiorpassuarni allanngortinneqarsimammata aammalu
pisisinnaassusai appasissimammat. Kisiannili qaffaassutissaminnik
aalajangersimasumik siunnersuuteqanngilaq kisiannili Lise Lennerti
akissuteqarnermini oqaatigivaa tamatumap qaffasissusaa 1999-imi kingullermik
ukiakkut oqaluuserineqarmat aamma taamanikkut innersuussutigaara taamanikkut
nalilersuineq ilinniagaqartut ilinniagaqarnersiutaannut sammisitsisoq aammalu
taakkua atugarisaannut sammisaqartoq.
Taamatut sammisaqarnermi suliap naammassinissaa upernaamut
ilimagineqanngilaq tamannalu aamma Atassumminngaanniit paasilluarparput.
Ukiarmi ataatsimiinnerup kingorna ilami sapaatip akunnerata uuma siuliata
tungaanut paasissutissanik nutaanik kalaallit ilinniagaqartut aningaasarsiaasa
naleqassusianik tunngasumik saqqummersoqartarsimavoq. Paasissutissat Kalaallit
Nunaata aningaasaqarneranut tunngatillugu siunnersuisartut 1999-imi
nalunaarusiaanni qupperneq 77-imi takuneqarsinnaapput.
Imatummi allassimammat. Tassanngalu issuaavunga: Ataatsimut isigalugu
oqartoqarsinnaavoq aningaasaqarnikkut atukkat danskinut pingaartumillu
kalaallinut ilinniagaqartunut tunngatillugu avannaamioqatigiinnut allanut
naleqqiullugu pitsaasuusut. Aammalu kalaallinut ilinniagaqartunut aningaasaqarnikkut
pissutsit suli pitsaanerusut. Kalaallit ilinniagaqartut aningaasaqarnikkut
tapiissutisiaasa qaffasinnera nunanut avannaamioqatigiinneersunut sanilliullugu
pissuteqarpoq tapiissutip saniatigut aningaasartuutinut aalajangersimasunut
allanut matussusiisoqartarnera soorlu atuakkanut nassiussuineq imaluunniit
angalaneq ineqarnermut akiliummut ilaallu ilanngullugit. Tassa issuaaneq
naavoq.
Naliliineq taanna inuuniarnermut atugassarititanik misissuinermi soorlu
aamma naalakkersuisuni ilaasortamut Lise Lennertimut taaneqartoq aperineqartut
amerlanerit ilinniagaqartut aningaasarsiarisartagaannik appasinneraanatik
oqaatigisaanut tulluuppoq.
Atassut isumaqarpoq suliaq manna naammassillugu Kultur,
Ilinniartitaaneq, Ilisimatusarneq Ilageeqarnerlu pillugit naalakkersuisoqarfimmi
suliarineqassasoq KIK aamma DKIK suleqatigalugit. Tamatuma kingorna
inatsisartut Kultureqarneq Ilinniartitaanerlu pillugit ataatsimiitsitaliaannut
saqqummiunneqassaaq naliliiffigeqqullugu oqaaseqaateqarfigeqqullugulu.
Siunnersuummut aningaasaqarnermut inatsimmut ukioq 2001-imut iluarsiissutinik
suliaqartoqalernissaa sioqqullugu.
Maliinannguaq Markussen Mølgaard, Inuit
Ataqatigiit oqaaseqartuat:
Qujanaq. Ukiuni makkunani namminersulivinnissamut oqalliseruttornitsinni
ilinniarluarsimanikkut tikisittariaqakkatsinnut unammillerluarsinnaanissarput
Inuit Ataqatigiinniit anguniagassatut pingaartutut isigaarput.
Taamaattumik Inuit Ataqatigiinniit Olga Poulsenip inatsisartuni
apeqqummik matumani qaqitsinera nuannaarutigaarput. Taamatummi oqaluuserisassanngortitsineratigut
periarfissaqaleratta ullumikkut ilinniartitaanerup inissisimanera
oqallisigissallugu nalilersussallugulu. Siunissami tamatumap tungaatigut
pitsaanerpaamik angusaqassagutta qanoq iliuuseqartariaqarnitsinnik.
Inuit Ataqatigiinni nalunngilluinnarparput ullumikkut ilinniartut
atugaat pitsanngorsartuartariaqartut ilinniartut ineqarneranut
paaqqinnittarfinnullu tunngasut pitsanngorsartuartariaqarput tamakkulu
ilinniagaqartut peqatigalugit siunnerfeqartumik pilersaarusiorluakkamillu aaqqiivigineqartariaqarput.
Maluginiakkattalu ilagaat naalakkersuisup oqaatigimmagu ilinniartut
atugarisaanik misissuinerup erseqqissumik takutinngikkaa ilinniartut
akissarsiaasa amerlineqartariaqarnerat ilinniagaqartullu amerlanersaasa
aningaasarsiat appasippallaartutut isiginngikkaat.
Taamaattoq Inuit Ataqatigiinniit pingaartipparput misissuinerit
nalilersuinerillu ingerlaqqittariaqarnerat qarasaasiatigullu ajornartorsiutit
piinnarlugit suliat unittariaqanngitsut. Kaammattuutigissavarpullu
nalilersuinissat piaartumik ingerlanneqarnissaat. Maannami ukiut
arlalinngormata taamatut misissuinerit ingerlanneqarlutik.
Nunatsinni ilinniartitaaneq ima pingaartitsigaarput allaat
ilinniarusuttut nunarsuarmi allami asseqanngitsumik akissarsiaqartillugit.
Ilami naalagaaffeqatigisattaluunniit qallunaat ilinniartuutitik taama pineq
ajorpaat. Tapisiaqartinneqartarput ilaannillu attartortinneqarlutik. Allaammi
nunat akissalissuit soorlu norgemiut ilinniartuutitik ilaatigut attartugaannik
annikinnerusunik tapisiaqartippaat. Sverigemi tapisiaat inuusuttut
ilinniarfiinut qaammammut 536 koruuniupput attartugaat 4500 missaaniillutik.
Savalimmiuni tapisiaasartut ilaatigut aamma annikinnerupput attartukkanik
naleqqiullugit. Islandimi tapisiaqartinneqanngillat ilinniagaqarniartullu attartugaannarnik
inuussutissaqartinneqartarlutik. Taamaakkaluartorli nunat tamakku uagutsinnut
naleqqiullugit ilinniarsimanikkut siuarsimaneroqaat.
Maanna ilinniartorpassuit ingammik qaffasinnerusumi ilinniartut Qallunaat
Nunaanni ilinniartuupput minnerpaannguamilluunniit naammassigunik nunatsinni
sulinissaannik piumasaqarfigineqaratik. Qallunaat Nunaanni ilinniakkat ilaanni
ilinniagaqarniarlutik qinnuteqartartut amerlangaarmata nunarput immikkut
inissanik tunineqartarpoq ilinniartunik isertoqarsinnaanissaa
qulakkeerniarlugu. Illuatungaaniillu nalusarparput taakku ilinniartitagut
nunatsinni sulerusullutik ilinniartuunersut. Nunatsinnullumi aningaasaqarnikkut
siunnersuisoqatigiit oqaatigaat misissuinerit takutissimagaat Qallunaat
Nunaannut ilinniariartittakkatta 40 procentii nunatsinnut uterneq ajortut.
Tamatumanilumi Inuit Ataqatigiinniit siornaakkunni maani inimi
saqqummiukkaluarparput piumasaqaateqalernissarput taamanikkut partiimik allamik
itigartinneqartumik. Sutigut tamatigut inuiaqatigiinni imminut
piumaffiginerunissaq ujartoratsigu aamma tamatumap tungaatigut imminut
piumaffiginerunissaq avaqqunneqarsinnaajunnaarpoq. Soorlu aamma tamanna
inuusuttortatta ilaata 79-imi inunngortup tv-ikkut ersarilluinnartumik oqaatigigaa.
Inuit Ataqatigiinniillu isumaqarpugut ukiuni makkunani piumaffiginninnani
aaqqissuussineq kukkunerusoq aaqqittariaqartorlu. Tassami imaattariaqanngimmat
naak ilinniarsimasunik amigaateqarnitsigut akissarsiaqartitsinikkullu
aningaasarpassuit atoraluarlugit illuatungaanik taakkorpiaat ilinniagaannik
ilinniarsimasunik amigaateqartuarnitsigut anigaasarpassuit allat atorlugit
tikisitsiuartariaqassasugut. Tamatuma tungaatigut peqqussutip
allanngortinneqarnissaa pisariaqartoq Inuit Ataqatigiinniit isumaqarfigaarput.
Eqqarsarnanngitsuunngilaq ukiorpassuit akissarsiaqarluni
ilinniarsimalluni nunap aningaasaliisimasup sullinnissaa pisussaaffittut
isigineqanngippat. Siunissaq eqqarsaatigalugu nalilersorluartariaqalerparput
ullumikkut ingerlariaaseq atuinnassanerlugu. Tassalu ilinniagaqartunik
akissarsiaqartitsinermik aaqqissuussineq. Maannamummi takusinnaasagut
malillugit naak ilinniagaqarnissamik kissaateqangaaratta kisiartaalluta
tamakkiisumik akissarsiaqartitsigaluarluta ilinniartortatta affaata sinneri naammassinngitsoortarput.
Taassumaannaalluunniit takutippaa ullumikkut aaqqissuussineq
atorsinnaanngitsoq. Tamatumap nalilersornissaa tukiginnarsivoq taamaattumik
Inuit Ataqatigiinniit taarsigassarsitsisarnerup eqquteqqinnissaata
misissuiffiginissaa naalakkersunut kaammattuutigerusupparput. Tamatumanilu
aningaaseriviit suleqatiginissaat aqqutissat ilaattut misissullaqqullugu.
Nutaamillu aaqqissuussisoqassappat Ilinniagaqartut Kattuffiata qanimut
suleqatiginissaa imaluunniit Ilinniagaqartut Kattuffiisa qanimut
suleqatiginissaat pingaaruteqarluinnartutut isigaarput. Ilinniagaqartut
annerusumik aningaasaateqarnissartik kissaatigippassuk attartukkat
qaffannissaat aqqutit ilagaat.
Ullumernit taarsigassarsiat amerlinerisigut aningaasat ilinniagaqartut
inissaannut paaqqinnittarfinnut ilami ilinniagaqartut atungaannut
pitsanngorsaatitut atorneqarsinnaasut amerlissagaluarput. Ullumikkut
ilinniagaqartut maangaannaq unitsitsisartut aammalumi ilinniakkanik
qinnuteqartaraluartut isinngitsoortartulli amerlapput tassanilu meeqqat
atuarfiani ilinniarsimasaasa annikippallaarneri ilaatigut patsisaallutik.
Taamaattumik siunissami meeqqat atuarfiata suli ullumernit annertunerusumik
piorsarnissaa avaqqunneqarsinnaanngila. Tassami naammanngilaq
inuusutt...inuuttoortartut angummanniartillugit aningaasarpassuit
atortuarnissaat siunniussimajuassallugu isumalluutigiuassallugulu. Inuit
Ataqatigiinniillu pingaarnertut isigaarput pingaarnerutillugu sorlaata
aaqqiivigineqarnissaa. Tamannalumi Atuarfitsialak-mi anguniarneqarpoq
piviusunngortinneqarnissaalu aamma aningaasarpassuarnik naleqarumaarluni.
Inuit Ataqatigiinniit kattuffiit pisinnaatitaaffii ataqqivagut,
neriuutigalugulu Kalaallit Ilinniaqartut Kattuffiata kattuffittulli allatut
nukittulluni siunissami ingerlanissaa. Ilinniartummi nammineerlutik atukkatik
ilisimaneruvaat pissutsillu sukkut aaqqittariaqarneri
oqariartuutigisinnaanerullugit. Nunatsinni nammineq imminut aqulluta
napatinniassagutta imminut annertunerusumik piumaffigisinnaaneq piumaffigineq
avaqqunneqarsinnaanngilaq. Pisortanik isumalluuteqartuarneq
qimattariaqalerparput, pisortanimmi sunik tamanik isumalluuteqartuarnerup inuup
nammineq piumassusaa ipitinneqartarpoq. Anguniagaqassagaannilu ilungersorluni
pilliuteqaqataaneq inuup nammineq ataqqinaatigisarpaa. Nuannaarutigaarpullu
kalaaleqateqaratta ilinniarnerminni angusaqarusullutik ilungersortartunik
angusaqarluartartunillu.
Taamatut oqaaseqarluta Inuit Ataqatigiinniit kaammattuutigissavarput
ilinniagaqartut akissarsiaasa nalilersoqqinnissaat naalakkersuisut suliniutigissagaat.
Mogens Kleist, Kattusseqatigiit oqaaseqartuat:
Olga
Poulsenip siunnersuutaanut tassalu ilinniagaqartut ilinniarnersiutaasa
qaffanneqarnissaasa sukumiisumik misissorneqarnissaat Kattusseqatigiinniit
tamakkiisumik tapersersorparput.
Siusinnerusukkummi
Kattusseqatigiinniit 1997-imi inatsisartutigoorlugu Anthon Frederiksenip
ilinniartunut tunngatillugu siunnersuutiginikuusaanut tamatumalu kingorna
apeqquteqaatigisartagaanut naapertuummat taperserlugu oqaatigissavarput.
Aammalu
oqaatigissavarput siusinnerusukkut Kalaallit Ilinniagaqartut Kattuffiat KIK
misissuisitsisimammat ilinniartut atugarisaat pillugit taannalu
taaneqareersutut 1999-imi aallartilaarnerani saqqummiunneqarpoq Kalaallit
Nunaanni Naatsorsueqqissaartarfik aqqutigalugu. Tassanilu maluginiarsimavagut
ilinniagaqartut Kalaallit Nunaanniittut aammalu Qallunaat Nunaanniittut
misissuinermi ataatsimut kattunneqarsimammata. Nalunngereerparpummi
ilinniagaqartut nunatsinniittut aammalumi Qallunaat Nunaanniittut atugarisaat
annertuutigut assigiinngeqisut. Taamaattumik misissuinermi ilinniartunut
tunngasumi eqqaamaqqunarpoq immikkoortitsisoqarnissaa. Ersarinnerusumimmi
paasisinnaalissagatsigit ilinniagaqartut nunatsinni aammalu Qallunaat
Nunaanniittut qanoq assigiinngitsigisumik atugassaqartinneqarnersut.
Ullumikkut pissutsit imaapput ilinniartunut tunngatillugu. Ilinniartut
ataatsimut isigissagaanni ilinniagaqarneq toqqammavigalugu aningaasat
tunniunneqartartut assigiinngitsupilussuupput. Assersuutigitigu STI-mi
ilinniartup ukiup aappassaani atualernermini aningaasatigut tigusartagai
allanngortarput. Ilaatigummi oqaatigineqartartut imaapput: Ukiup aappassaani
tigusartakkat qaffatsinneqaraangamik naliginnaasumik skat-imut
ilanngaanneqartarlutik taamaasillunilu qaffaataasimagaluartut ilinniartunut ajorseriarnn...
piuartarsimalluni. Assersuutitut taasinnaavagut ilinniagaqartut ilaasa
atuakkanik pisisariaqartarmata tapiissutigineqartartullu 60 procentii
tikillugit annertussuseqartarmata tamanna tungitsinninngaanniit ajunngitsutut
taasariaqarpoq. Kisianni qaffasinnerusumik ilinniagaqartut ilaatigut atuakkat
600-nik quppernillit tikillugit pisiarisariaqartarpaat aammalimi atuakkat
ilaannikkooriarlutik arlalissuit pisiarisariaqartarlugit. Taakkualu saniatigut
ilaat kopeerutinik kopikortinik pisisariaqartarput taakkualu aamma aningaasanik
naleqartarput. Minnerunngitsumillu pappiaqqat atuarnermut atugassat,
assigiinngitsorpassuillu ilanngussuunneqarsinnaapput ilinniarnermi
pinngitsoorneqarsinnaanngitsunik.
Kattusseqatigiinniit anguniagassatut taakkartorusuppavut ilinniartut
assigiinngitsutigut akikilliiffigineqarsinnaaneri ujartorneqassasut.
Assersuutigalugu taasinnaavarput timmisartunut umiarsuarnulluunniit ilaanermi
akikilliliivigineqarsinnaanissaq aammalumi minnerunngitsumik pisortat
suliffeqarfiini. Assersuutitut taasinnaavarput KNI ilinniarnermut atortussanik
pisiniarnermut eqqarsaatigalugu. Ullumikkummi niuernermik ingerlatsisut
arlalissuit ilinniartunut akikilliliisarput tassalu naliginnaasumik 20
procentiusarlutik. Apererusunnarporlu sooq pisortat suliffeqarfiutaat
allatuulli ilinniartunut akikilliliisinnaannginnersut.
Ilanngullugu Kattusseqatigiinniit oqaatigissavarput Kalaallit
Ilinniagaqartut Kattuffiata qanittumi oqaatigisaat tassalu ilinniagaqartut
kattuffiullu Namminersornerullutik Oqartussanut isumaqatigiartaleqqissinnaanissaat
ilinniartunut tunngatillugu misissorneqartariaqartoq. Tassami 1990-ikkut
aallartilaarneranni isumaqatigiinniarsinnaaneq atorunnaarsinneqarsimavoq
taannalu suli allanngortinneqarnikuunani.
Ilinniartut piffissami 1990-ikkut aallartilaarneraniit maannakkumut
annaasaqaatigisimasaat aningaasanngorlugit soqutiginassagaluarpoq ilinniartut
kattuffiat misissuititsisimagaluarpat aningaasap nalinga 1992-imiit
maannakkumut qanoq issimanersoq taamaasillutillu Namminersornerullutik Oqartussanut
ersarissumik kisitsisinik najoqqutassaqarlutik takutitsisinnaalissagaluarmata
ilinniartut ilinniarnersiutaannut tunngatillugu. Ilami piffissami 1992-imiit
maannakkumut sulinermut inuussutissarsiutillit assigiinngitsorpassuit
Namminersornerullutik Oqartussanut isumaqatigiinniartarput akissarsiassat qanoq
qaffatsigisinnaanerannik.
Piffissami kingullermi Statsministerip aningaasaqarnermut
siunnersuisoqatigiiffiata tassalu Rådgivende Udvalgip taakkartorpai Kalaallit
Nunaanni qaffasinnerusumik ilinniagaqartartut nunanut allanut sanilliullugit
ikinneroqisut aammalu taakkartorneqartut ilagaat ilinniartut
ilinniarnersiutaannut tunngasut ersarissumillu takutinneqarpoq nunatsinni
ilinniagaqartut nunanut avannarlernut sanilliullugit ilinniarnermi
aningaasatigut qanoq inissisimanerat taakkununnga innersuutigissavarput
qupperneq 77-iminngaanniit kopiitut ilanngussimasarput.
Ilinniagaqartut kingullermik aningaasatigut qaffaaffigineqarput ukioq
1992-i maannamullu suli qaffaasoqaqqigani taamaattumik ilinniartut ilinniarnersiutaasa
qaffaavigineqarsinnaanerini sukumiisumik misissuiffigineqarnissaat
Kattusseqatigiinniit innersuussutigissagatsigu minnerunngitsumillu
aningaasartassaasa suminngaanniit aqqiivigineqarsinnaanissaannut tunngatillugu
ujartuisoqartariaqalersoq ullumikkummi ilinniartoq meeralik meeqqamut tapiissut
758 kruuniusoq tapiissutissatut tigusarpaat taannalu ullutsinnut naleqquttutut
taaneqarsinnaanani tassami naatsorsoraanni meeqqap ullormut nerisassanut
aammalumi atisassanut agguaqatigiisillugu 25 krone 25 øre tigusarmagit.
Meeqqamut tapip annertussusianut toqqammaviusut suminngaanneernersut
takusinnaavagut tassami ukiup affaanut meeqqamut akilersuinermut kisitsit 4.548
kruuni annertussuseqarmat ilinniartunullu taanna atuutsinneqarluni.
Arlaatigut ilinniagaqartunut aaqqiisinnaanerit neriuutigaagut
aaqqiivigineqarumaartut tassami piffissaasorilernarpoq ilinniartutta
atugarisaasa aaqqiivigineqarnissaat Naalakkersuisullu misis-suisitsinerat
kinguneqarluarumaartoq. Taamatut oqaaseqarluta siunnersuummut tapersersuinerput
oqaatigissavarput.
Olga Poulsen, siunnersuuteqartoq, Inuit Ataqatigiit:
Ja, qujanaq. Siullermik siunnersuutimma taamatut oqallisigineqarnera
qujassutigissavara. Taavalu uani akissuteqarnermi naalakkersuisut aamma
akissuteqarnermini ilinniagaqartunut misissuisimanermik misissuineq taanna
annertoorujussuarmik aallaavigivaa. Siullermik ilisimatitsissutigilaarusuppara
Ilinniagaqartut Kattuffianit ataatsimeeqateqarnitsinni tassani
ilisimatinneqarsimagatta ilinniagaqartunik Kattuffiup ataatsimmeeqateqarnerminik
naalakkersuisumik oqarfigineqarsimasut taanna misissuineq annertunerusumik
atorneqarsinnaanngitsoq. Taamaattumik isumaqarpunga taanna
naatsorsueqqissaartarfik peqatigalugu misissuisitsisimaneq
toqqammavigineqartussatut atorsinnaanngitsutut nalilerneqarsimappat uani
akissutigineqartumi taama sakkugineqartiginera pissusissamisuunngitsoq aammalu
taamatut akissuteqarsimanermut tassalu naalakkersuisoq ilinniagaqartunut
nalunaarsimaguni misissuineq atorsinnaanngitsoq sunik taanna aallaaveqarnersoq paaserusunnarpoq.
Uani misissuisimaneq una aningaasaqarnermut tunngatillugu
misissuisimaneq annertuumik partiit oqaaseqarnerminni eqqartorpaat tassa una
siunnersuut saqqummiukkakku imaluunniiit allaqqaarakku taanna nassuiaat suli
saqqummersimanngilaq. Taamattumik aamma massakkut ullumikkut
assigiinngitsorpassuit kisitsisit aamma ilinniagaqarnermut tunngassuteqartut
atorsinnaasagut tassani saqqummermata qujanarpoq aammalu taakkua
aallaavigalugit massakkut misissuisitsiniarnermi siunnersuutiga isumaqarpunga taamaasilluni
ingerlariaqqinnissaa qaamanerulersoq. Uani naatsorsueqqissaartarfimmi
misissuisitsisimaneq taanna immaqa taassumunnga pitsaanerujussuartut
inissisimalerluni.
Tassunga aamma atatillugu uani kingullermik aningaasanut inatsisissami
eqqartuinitsinni tassani tunngaviusumik inatsisartuni ilaasortat tamarmiullutik
isumaqatigiissutigivaat tulliani aningaasanut inatsimmi eqqartuilerutta
ilinniarnermut tunngassuteqartut annertuumik pingaartissagivut neriuppungalu
taanna aamma uagut tullissaani aningaasanut inatsisissami eqqartuilernitsinni
taanna eqqaajumaaripput. Taannalu aallaavigalugu ilinniagaqarnermut tamarmut
aammalu meeqqat atuarfiat eqqarsaatigalugu siunissami
ineriartortitseqqinnissatsinnut aningaasanik tassani piareersaasiorumaartugut.
Pingaarnersiuinermi tassa tassani eqqarsaatigalugu. Qujanaq.
Ole Lynge, Inatsisartut Siulittaasuat:
Partiit siunnersuuteqartullu oqaaseqartuisa avataatigut nappaasimavoq
Anthon Frederiksen. Oqaaseqartinnagu eqqaasitsissutigiinnassavara suleriaatsini
§35 naapertorlugu apeqquteqaatit tunngavigalugit oqallinnermi
piffissarititaasut atuummata. Partiillu oqaaseqartuisa avataatigut
oqaaseqarniartut annerpaamik 5 minutsit tunineqartarput. Takanna.
Anthon Frederiksen, Kattusseqatigiit:
Qujanaq. Siullermik eqqaasitsissutigerusuppara nunatsinni nunanilu
allani pissutsit imminnut sanilliunneqarsinnaanngilluinnarmata aamma
ilinniartoqarneq eqqarsaatigalugu. Tassami eqqaamasariaqarparput nunatsinni
sutigut tamatigut inuuniarnikkut akisunerujussuaq, inuuniarnerup akisunerujussua.
Nioqqutissat atisat angalaneq tamakkua qiviaannaraanni nunanut allanut
assersuussisoqarsinnaanngilluinnarpoq.
Uanga inatsisartut matuma ataatsimiinnissaat sioqqullugu
kingusinnerusukkut imaluunniit kingullerpaamik Ilulissani STI-mi atuartut
tusarniarlugit ataatsimiisippakka tassanilu ilinniartorpassuit peqataapput.
Oqariartuutaallu naatsorsueqqissaartarfiup nalunaarutaaniik
allaanerujorujussuuvoq.
Naatsorsueqqissaartarfiup nalunaarutaa qiviarutsigu
atorsinnaanngingajattutut aamma naalakkersuiniit nalilerneqareernikuuvoq.
Aammalu ilinniartut atugarisaat pillugit aningaasaqarnermut ataatsimiitsitaliap
ukiuinnaq saqqummiussaa aamma tusagassiutitigut nalunaarutigineqarpoq.
Suliassarlu taanna Kultureqarnermut Ilinniartitaanermullu ataatsimiitsitaliami
ingerlanneqartoq paasivarput taamaattumik uuma suliap aamma Kultureqarnermut
Ilinniartitaanermullu ataatsimiitsitaliamut ingerlateqqinneqarnissaa
misissorneqarnissaalu iternga tikillugu kissaatiginassooq.
Ilinniartut pingaartumik avannaani sikusartumiittut aamma atugaat aamma
allarujussuupput aamma tamanna eqqaamasariaqarparput. Tassa ukiukkut
sikusartumiitilluta ilaatigut naatitat ukiumi pissarsiarineqarsinnaanngittut
umiarsukkut tikisinneqartarput tamanna takornartaanngilaq. Aamma nalunngilarput
naatitat eqqarsaatigiinnarutsigit qanoq akisutigisartut. Aammalumi
nioqqutissat allat. Tamakkuupput ilinniartut maalaarutigisaat allaat
ilinniartut nammineerlutik oqalupput. Taakkua tapiissutit pisartakkatik imatut
annertusaartigisariaqartigisarpaat allaat akikinnersiugaaramik nioqqutissanik
nerisassanik peqqinnarpianngitsunik pisariaqartarlutik. Atisanik
oqorpallaanngitsunik immaqalu nungullajasunik akikinnersiorneq
pissutigiinnarlugu pisisariaqartarlutik. Aamma ilinniartut meeraqartut aamma
meeqqaminnut taamaaliortariaqartarsimapput. Nioqqutissat akikinnerpaat
pisiariniartariaqarsimavaat ilaatigut peqqinnarpianngikkaluartut uffa
illuatungaatigut oqalukkaluarluta ukioq 2000 tamatta peqqissuussuugut kisianni
peqqissuussagutta ilinniartut aamma atugaat isumaqarpunga iternga tikillugu
misissuiffigineqartariaqartut.
Taavalu
aamma ilinniartut eqqumiiginarsinnaagaluarpoq apeqqutigeqqusaat tassaasoq
inunnik isumaginnittunngorniartut STI-p ataani aammalu peqqinnissaqarfiup iluani
sullissiniarlutik misiliisut taakkua oqarfigineqartarsimanertik assorujussuaq
mamaagivaat tassa STI-nngooq ataani ilinniartut napparsimaveqarfinni
sulisinnaanngillat. Isumaqarpunga tamanna maani eqqortumik akineqassasoq
uppernarsarneqarlunilu taamaattariaqanngitsoq.
Taava
oqaaseqartutta aamma tikippaa STI-p iluani ilinniartut ukiup aappassaanneertut
aningaasarsiaat qaffanneqartaraluarput ilumut qaffanneqaraluarput 5800-nut
qaffanneqaraluarput 4000-iusinnarlutik angerlarsimasut eqqarsaatigalugit. Kisianni
tigusartagaat skati peereerlugu 3200-t missaannaani annertussuseqalertarnerat
taanna kialluunniit takunngitsoorsinnaanngilaa qaffaanermik oqalukkaluarluni
illuatungaatigut skat-ikkut aallerneq taanna ilinniartunut
ajorseriaaterujussuarmik kinguneqarpoq. Taamaattumik tamakkua neriuppunga
pimoorullugu aaqqiiffigineqartariaqartut.
Ole Lynge, Inatsisartut Siulittaasuat:
Tusarnaartut
aamma eqqarsaatigalugit eqqaasitsissutigilaassuara aamma aalajangiinermik
ilaqartinneqartussaanngillat aammalu apeqqut tassa ataasiaannarlugu
sammineqartussaavoq ataatsimiitsitalianullu suliakkiissutigineqartussaanani.
Tullinnguulluni nappaasimavoq Jonathan Motzfeldt, naalakkersuisut
siulittaasuat.
Jonathan Motzfeldt, Naalakkersuisut Siulittaasuat:
Naalakkersuisut
akissutaannut tapiliussatut ilanngussatut aamma oqaatigilaarusuppara uani inimi
ullumikkut oqallinnissaq assorujussuaq naalaarnerorusussimagatsigu aamma
partiinik tassani qanoq oqaariartuuteqarnersut naalaarnillugu.
Erseqqilluinnarpoq partiit tamarmik maannakkut killiffiusoq
misissoqqissaarumallugu aamma piumassuseqartut aamma taamaattoqassaaq. Siumumi
aamma taanna oqaatigaarput Siumup oqaluttuata aamma oqaaserisai taakku
ilisimavakka taamatut oqariartuuteqarnera. Immikkut nuannaarutigaara IA-p
oqaluttuata aamma tassani assersuutissat maani inimi erseqqinnerusunngorlugit
nalunaarutigimmagit allatut ajornartumik nunap aningaasarsiornera soorunami
qiviagassaavoq aammalu taanna tunngavigisarparput. Kisianni aamma
naalagaaffeqatigisatsinni Danmarkip iluani aaqqissuussisimanerilluunniit
qiviarutsigit malugisinnaavarput tassani ilisimavarpullu danskit
ilinniartuininngaanniit aamma pitsaanerusumik uagut ilinniartuutigut
piniarsimagigut. Aamma pingaartumik Islandimut Savalimmiunullu
sanilliutissagutsigit pineqarnerat qujanartumik maani qujanartumik periarfissaq
maani ajunnginnerusumik ilinniartuutitsinnut suli nammassinnaavarput.
Taamaattumik
taakku tamaasa ilanngullugit maannakkut nutaamik aaqqissuussinissami
ilinniartunut akissarsiaqartitsineq paasivarput iluaqutaanngitsoq ugguuna.
Ilinniartut amerlanerpaat taamaalillugit naammassinnissinnaanerannut
qularnaajusuunngilaq. Qularnaarlugit taanna angusinerunngilaq. Tassuuna
ajuusaarnarpoq tassami siunertarisimavarput namminersornerulernerup
eqqunneqarnerani sapinngisamik amerlanerpaat ilinniarnikkut tamakkunatigut
artorsaateqaratik periarfissaminnik atuilluarnissaat taanna iluatsissimanngilaq
tassuunakkut qimoriarsaaneq aningaasatigut oqittorsiortitsineq.
Taamaattumik
maannakkut periarfissaq una iluatsillugu oqaloqatiginnikkumaneq ilaatigut Inuit
Ataqatigiinninngaanniit saqqummiunneqartoq tulluarluinnarpoq naalakkersuisut
misissuisitsinerannut maannakkut. Misissuisitsinerlu taanna ilaatigut
takussutissanik peqarfigineqalereersoq aqqutigalugu nutaamik allannguutissamik
ilinniartunik suleqatiginnilluni Kattuffiat suleqatigalugu aammalu
ilinniarnikkut anguneqarsinnaasut qularnaarlugit angusaqarniarnermut ilalerlugu
akissarsiaqartitsineq oqallisigiumaneqartoq ilaatigut Inuit
Ataqatigiinninngaanniit nalunaarutaasoq aamma erseqqissoq malunnarpoq.
Atassutip oqaluttuata aamma tassuunakkut periarfissaq ammatikkaa
malugisinnaavara. Taamaattumik ilinniartortavut sapinngisamik amerlanerpaat
ajunngitsumik ingerlanissaat siunertaralugu taakkualu kattuffiat peqatigalugu
nutaamik aaqqissuussinissaq manna siunnerfigineqartoq isumalluarnartutut
oqaatigisariaqarpoq.
Lise Lennert, Ilinniartitaanermut Naalakkersuisoq:
Qujanaq.
Tassa uagattaaq maluginiarpara partiit tamarmik Kattusseqatigiillu nutaamik
aaqqissuussinissatsinnik kissaateqartut taavalu aamma suleqataarusussuseq
tamaninngaanniit aamma isumaqarama aamma erseqqissoq. Qujavunga, soorunalumi
aamma uani ataatsimiitsitaliami ingerlatitseqqittussami innersuutissat
arlalippassuit isumassarsiffigisinnaasavullu aamma pingaartumik soorunami
Siumup partiiata oqaluttuata aamma una kissaatigimmagu Siumumi pingaartillugu
inuiaqatigiinni aningaasaqarnikkut inissisimanerput ataqqillugu tamatumunnga
naapertuuttumik pilersaarusiortoqarnissaa kissaatigineqarmat. Suleqatigiinnut
suliassiissutima taanna ilagimmagu naammassinissaa soorunami anguniassavarput.
Kiisalu aamma Inuit Ataqatigiinninngaanniit ujartukkat kaammattuutillu
arlalippassuit, una immikkut maluginiarpara qupperneq siullermi kaammattuutaat
nalilersuinissat piaartumik ingerlateqqullugit. Aamma akissuteqarninni
oqaatigisara innersuussutigissavara ilinniagaqarnersiuteqarfimmi
ajornartorsiutit qaangerneqarniariarpata misissueqqinnissaq
ingerlateqqinneqarnissaata aallarteqqinnissaa sukkasuumik kissaatigigakku
aammalu isumagerusullugu.
Taamaammat
tassa taakkua kaammattuutit arlalippassuit tassa ingerlateqqissavagut
uparuartukkallu aamma taakkununnga suleqatigiinnut ingerlateqqissallugit. Aamma
immikkut eqqaalaarusuppara soorlu maani oqaluttut arlalippassuit aamma
oqaatigaat Statsministerip Rådgivende Udvalgia ilinniagaqarneq immikkut
qulequttatut sammisassatut toqqarsimammassuk taavalu massakkut nalunaarutaanni
aamma ilinniagaqarneq annertuumik sammineqarluni. Tassa tulleriiaarinissatsinni
soorunami taakkua qissimillattaaginnarnagit soorunami suliassatsinni
tunngavissatut tigussavagut.
Aamma
paasivarput soorlu oqareersunga partiinit Kattusseqatigiinnillu aamma taamatut
nalilersueqqinnissaq ilumut eqqortuunersoq aammalu ilumut tulluartuunersoq
ullumikkut ilinniagaqartutta taamatut isaasalerlugu ilinniagaqarnersiuteqarnerat
taamaaginnassanersoq imaluunniit allatorluinnaq eqqarsalissanersugut. Unaana
aamma tassunga atatillugu eqqaalaarusullugu ilinniagaqartut
atorniarsinnaanissaminnik periarfissaat soorluuna taassuma eqqumaffigineqarnera
ilaatigut naammanngitsoq. Aamma eqqaaneqartut ilagivaat ilinniagaqartartut
taamaatiinnartarnerat taavalu aningaasarpassuarnik taanna naleqarmat. Kisianni
aamma taamatut oqalunnitsinni puigussanngilarput ilinniagaqartut ilarpassui
taamaatiinnaraluaraangamilluunniit ilinniakkamik allamik nangeqqittarmata
taavalu ilinniakkamik allamik aallartitaqaraangata taakkua aningaasat immaqa
annaaneqartutut taaneqarsinnaanngillat. Aamma isumaqarpunga taamatut
ilinniagaqartut eqqartuinnarnagit imatut amerlavallaat taamaatittartut aamma
eqqumaffigisariaqaripput taamaatittut allamik aallartitseqqinneratigut annaaneq
ajoratsigit. Qujanaq.
Mogens Kleist, Kattusseqatigiit:
Ilumoorpoq
naliliisariaqarpugut massakkut ilinniartunut tunngatillugu ilinniartut
ilinniarnersiutaannut tunngatillugu. Massakkut nalunngilarput
Namminersornerullutik Oqartussat iluani qissimikkutsigu qaffasinnerusumut
atuartut allatut ajornaqimmat sulisarput inuuniutiginiarlugit taakku
qaammammusiatik naammanngimmata. Aamma naalakkersuisup oqaatigisaa
qaraasiaqarneq taanna pissutaasoq, isumaqarpunga taakku pisuunngillat
qarasaasiat pisuunngillat. Eqqartorigunukua ilinniarnermut aningaasat massakkut
siunnersuuteqartuminngaanniit siunnersuutigineqartut.
Isumaqarpunga
aamma Maliinannguup oqaatigisaanut 40 procenti tikillugu taamaatiinnartartut.
Taamaassimappammi taava ajortoqarsimassooq. Taamaattumik sukaterisariaqarpugut
ilinniartitaanerup iluani. Piumasaqaateqartariaqarpugut annertunerusunik.
Aammalu 92-iminngaanniit eqqaamasakka malillugit isumaqatigiinniarsinnaaneq
KIK-minngaanniit Namminersornerullutik Oqartussanut tiguneqarmat taamanikkulli
ilinniartut taakkartukkanik ilinniartut maanakkumut aningaasatigut qanoq
inissisimaneri aningaasap nalinga toqqammavingalugu qanoq
naatsorsuisinnaagaluarpata ersaritsigissagaluarpa piffissap taassuma iluani
ilinniartitsisut sulisartut assigiinngitsorpassuillu isumaqatigiinniartartut
Namminersornerullutik Oqartussanut. Taamaattorli Namminersornerullutik
Oqartussat iluani ilinniartut annertunerusumik taamatut
qaffaavigineqarsimanngillat. Aamma aningaasartuutaasartorparujussuarnut
ilaannguatsiarpoq avannaani atuartut branche-skoleriassapput Qaqortumut tamakku
aamma akisoqutaapput taamaattumik naliliiffigisariaqarpagut taamatut
ilinniartitsinerup iluani akikinnerpaat atorniarutsigu pitsaanerpaarlu taava
sukaterisariaqarpugut ataatsimoorluta tamatta.
Nalunngilara
ukiut siuliini Aasianni GU-rtunut imatut iliortarnikuusut Sisimiuni angajoqqaat
nammineq katersillutik meeqqatik bingortitsisarlutik juullisioriarniassammata
akisungaaarmat allatut ajornartumik taamatut iliortariaqartarsimapput. Aammalu
ilinniartunut massakkut eqqarsaatigissagutsigu meeqqamut taanna
taakkartungaavoq meeqqamut tapeq ullormut 25 kronit 25 øre-lu nerisassanut
atortussaavaat atisanullu taanna ullutsinnut isumaqarpunga naleqquttuunngitsoq
aamma naliliiffigisariaqartoq. Taamaattumik taamatut oqaaseqarluta neriuppugut
naalakkersuisut massakkut misissuatitsinerat inerneqarluarumaartoq. Qujanaq.
Lars Karl Jensen, Siumut:
Uani
oqaluuserineqartumi iluatinnartutut isigalugu naalakkersuisunut
apeqqutiginiarpara ippassaaninnguaq aviisitigut saqqummersutigut
ilanngunneqartoq imaassinnaasoq siunissami eqqarsaatigisariaqaleripput
ilinniagaqarnersiutit affaasa atukkatut naatsorsuunneqarnissaat. Tamanna
naalakkersuisut isummiussimaneraat imaluunniit partiit arlaata anguniagaannik
tunngaveqarnersoq taamatullu aamma naatsorsuutigisinnaaneripput
suleqatigiissitaliani ilanngullugu eqqarsaatigisassatut ingerlateqqitassatut
saqqummiussamaarneqarnersoq uani oqallinnermut ilanngullugu paasissutissiissutigineqarnissaa
kissaatigivara.
Godmand Rasmussen, Atassut:
Uanga
naatsuararsuarnik akuliussaqalaarniarpunga. Uani oqaaseqartaqattaartut
assorujussuaq soqutiginartunik oqaaseqarput aamma Naalakkersuisut
misissuiniarnerat taanna soorunami isumalluarfigissuarput aamma
apersuuserneqartariaqarpoq ilumoortoq uaniippoq aningaasaannaat pillugit
ilinniartut eqqartuiffigissagutsigit isumaqarpunga tulluanngilaq.
Siumup
oqaluttuanit oqaatigineqarpoq tassani Antuut taperserusuppara aningaasanik
tunngatillugu nunatsinni akissarsiaritinneqartut qaffasinnerpaasutut taammagit
kisianni puigortariaqanngilarput piniartunik angajoqqaaqarsimaguni ilinniartoq
avannaatungaani mattak kiilumut 120 kruuneqarpoq. Nerisassarsuit tungaanut
atuinissamut annikitsuararsuarnik kaasarfimmiussinneqartarput ilinniartut
akileereernermikkut ineqarnermikkut taanna annertunerusumik
pullaviginianngilara kisianni uani eqqartorneqaqattaartoq isumaqarpunga
puiugaqartugut. Ilinniartut tassani soorlu Maliinannguup eqqaavaa 40 procenti
angusinngitsoortartut. Ilinniakkanik allanik sangutitsiinnartoqartarnera
Naalakkersuisup oqaatigivaa aamma immaqa taamaalluarsimasinnaavormi. Taavalu
allanut saattarnermikkut qularnanngilaq pitsaanerusaminni
angusaqartitsisarlutik.
Kisianni
ippassaaninnguaq Atuagalliummi saqqummersumi atuagarput uanga atuagara immaqami
aamma atuarsimassuarsi. Quarsaarutigivara Aasianni ilinniartut ilaata
allagarimmagu ilinniarnerminni oqaatsit namminneq inunnguuseralutik atornagit
atuarnerminni ajornartorsiut annertooq pilersartoq tassanilu avataaninngaanniit
atuartut angusarissaarnerusarnerat tassani taasimavaa. Tassa oqaatsit nammineq
ajornartorsiortitsisimapput annertuumik tassani. Atuartut uniinnartarnerannut
tamakku aamma nipilersoqataasarsimannginnerlutik? Nunatsinni uagut inunnguutsitsinni
oqaatsivut ilinniarnitsinni sooq atussanngilagut? Immaqa tassami aamma
arlaatigut ajortoqarpoq pisooqataasoqarsimasinnaavoq. Aamma ilinniartut uani
oqallisigineqartinnitsinni soorlu uanga GU-ertumik qitornaqarlunga
eqqarsaatigissagukku oqarsinnasorivunga eqqortumik oqarsinnaasorivunga
angerlasimaffiit tungaatigut assorujorujussuaq atungaat ajorput ilinniartut.
Errorsiveqarnerup tungaatigut allatigullu ineqarniarnerup tungaatigut
pitsaanerpaajunngillat. Aningaasat taakku eqqartoqqinnianngilakka kisianni
qitornat pitsaasumik angerlasimaffinni peroriartorsimasut qassimmita aamma
ippigiatuuteqartarpat. Najukkat pitsaasuunera inummut ilinniartumut aamma
oqariartuuteqartassooq piumassutsimik angisuumik aamma tunniussaqarsinnaalluni.
Immaqa tujormilersoortittakkat allaqarsimasinnaapput. Neriuppunga taanna
misissueqqissaarnermi aamma arlaatigut puiorneqassanngitsoq. Taanna ilinniarneq
tassa ilinniarneq tamatta noqqaavigiuarparput uanga aamma nammineq
apersuusertarnikuuvara. Uagut qanga ilinniaarusarallaratta sapaatip akunneranut
73 koruuneqarluta aamma naammagalugu atornikuuvagut angusillutalu. Inuup aamma
piumassusia tassaniippoq qanoq ilungersorsinnaanera ersittarpoq.
Oqarsinnaanngilanga ilinniartut pilluartitaasut kisianni meerallit aamma
eqqarsaatigissagaanni Kattusseqatigiit oqaasiat taanna aamma
ilumoortortalerujussuuvoq. Inuumuna qanoq nammineq imminut piumaffigisinnaanera
tassaniittoq. Oqaatigeriikkattullu ineqarneq aamma tassani pinngitsoorani
aallaaviit ilagisimassuvaat.
Josef Motzfeldt, Aningaasaqarnermut Naalakkersuisoq:
Ilaatigut
oqallinneq soorunami tamaanga ilinniagaqartut atungasisaannut sangoqattaartut
malunnarpoq aamma taanna ajunngilaq. Tupinnartulli marlussuit
oqaaseqarfigerusukkakkit ilaatigut tassaavoq Kattusseqatigiit oqaaseqartuata
Mogens Kleistip maanngaanniit artornartorsuartut
naammassineqarsinnaanngiusattutut anersaaruluutai tupinnaqimmat
ilinniagaqartunngooq allaat maanni Namminersornerullutik Oqartussani tamani
sulisarput inuuniutissatik naammattusaarniarlugit. Tassa namminneq misilittakkat
atorlugit aamma peroriartortinneq aamma tassaniilluinnaqqissaarpoq.
Ajornartorsiutitut qaangigassaanngitsutut ilinniagaqartunullu ajortumik
pinninnertut isigineqanngilluinnartariaqartoq. Taavalu uani tigusartakkat
amerlassusaat siunnersuuteqartup siunnersuutaata qiteringaa uanga paasivara.
Ilinniagaqartut ilinniartuunersiutimikkut tigusagaasa qanoq annertutiginerat
tassani pineqarpoq.
Taamaammat
Lars Karl Jensenip apeqquteqaataa naalakkersuisut isumagineraat imaluuniit
inerteqqutaanersoq taamatut oqaaseqarsinnaaneq naalakkersuinikkut
suliaqartuulluni ippasigami ministeriunerup siunnersuisooqatigiivisa
nalunaarusiaat nunatsinni saqqummiunneqarneranut atatillugu naalakkersuisuniit
tusagassiorfiit arlaannik apersorneqarlunga isummersortariaqarama Aningaasaqarnermut
Naalakkersuisutut aammalu partiimi siulittaasutut. Isummersuutima ilagaat
ilisimagakku ukiumut ukioq manna 2000-imi ilinniartuunersiutinut 132 milliuunit
atugassarivagut Inatsisartut akuerivaat. Tamanna qujanaqaaq.
Saniatigulli
massakkut oqallinnerup aamma takutippaa ilinniagaqartut atugarisaannut
tunngasut immaqa pitsanngorsarneqarsinnaagaluit ineqartitsinikkut meeqqat
isumagineqarnerisigut allatigullu aamma inatsisartut nalunngilaat aningaasanut
inatsisissakkut nammineq akuerisamikkut qartorarnissaa tikillugu aningaasat
taakkua naatsorsoqqissaarlugit ukiarmi akuerigamikkit.
Taamaammat
isumassarsiatsialattut eqqarsaatigisassatut naalakkersuisut sinnerlugiunngitsoq
kisianni inuttut Aningaasaqarnermut Naalakkersuisut aammalu Inuit Ataqatigiinni
siulittaasutut eqqarsaatigaara, taakkuamita ilaat aningaasat taarsigassarsiatut
ilinniagaqarnersiutinut ilanngunneqartalersuuppata oqarutta 132 milliuunit
ilaat immaqa 40 milliuunit pingajorarterutaalluunniiit affaalluunniit
taarsigassarsiatut tunniunneqartaleraluarpata taava Inatsisartut
nukissaqalissagaluarput ilinniagaqartut atugaasigut qallikkut atugaasigut
allatigut oqilisaassinissamut. Siornatigut nalunngilarput
taarsigassarsititsisarneq taanna erloqissutaasimaqisoq taarsigassarsiaqartunut
aammalu pisortanut akilersinniarnerat ilungersunaqimmat. Taamaattumik
taamanikkut taarsigassarsititsisarneq piunnaarlugu ilinniarnertuunersiuteqarneq
tamakkiisumik atuutilerpoq. Kisianni ullumikkut qarasaasiani atuinitsinni
soorluuna sukkanerujussuarmik akiitsullit akiitsuminnik isumannaarinninnissaat
isumagisinnaassagaluaqigipput.
Taamaammat
tamakkua aappaagu aningaasanut inatsisissap ilaatigut ilinniagaqarnermut
tunngasunik aallussinissaa iluatsillugu eqqarsaatissatut saqqummiunneqarput.
Piaartumik naammassinnittarnissaq eqqarsaatigalugu ilumoorpoq aamma
tuppallersaataannaasinnaanngilaq ilinniagaqartut arlaannik unitsitsigaagamik
taava allamut ilinniakkamut nuunginnartartut. Tassani aamma soorunami
siunnersorneqarneq aamma apeqqutaassooq kisianni pingaaruteqartoq tassaavoq
sapinngisamik ilinniagaqartut ilinniarnerminni ilinniakkatik piaartumik
naammassissagaat inuiaqatigiinnut iluaqutaasussanngorlutik. Taamaattumik
naggataatigut isumaqarpunga ilinniagaqartut nunani allani naammassereerlutik
nunatsinnut utertartut uteraangata qujamasulluta tikilluaqqusartariaqarpavut.
Taamaattorpassuaqarpoq aamma.
Ole Lynge, Inatsisartut Siulittaasuat:
Ja,
tassalu taamaalilluni oqaluuserisaq immikkoortoq 40- Kalaallit Nunaanni ilinniartut
aningaasarsiaasa qaffaavigineqarnissaanut apeqquteqaat aallaavigalugu
oqallinneq naammassivoq.
Tulleraa
immikkoortut oqaluuserisassani 18-i, Inatsisartut peqqussutaata normu 8-p 30.
oktober 98-imeersup ilagiinni atorfinittitsisarnermut tunngasup
allannguutissaanik aalajangiiffigisassatut siunnersuut. Taanna Asii Chemnitz
Narup siunnersuuteqartoq qinnuigissavara saqqummiusseqqullugu.
Oqaluuserisaq
naammassivoq.