Oqaluuserisassani immikkoortoq 13-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Jonathan Motzfeldt, Siumut.
Jonathan Motzfeldt, Inatsisartut Siulittaasuat, Siumut.
Ataatsimiinneq nangippoq. Ataatsimiinnerup ullumi nangeqqinnerani Aningaasaqarnermut Ataatsimiititaliaq siullermeerneqarnera tunngavigalugu suliaqarsimasoq isumaliutissiissummik saqqummiussissaaq. Ataatsimiititaliap siulittaasua qinnuigissavara isumaliutissiissummik saqqummiusseqqullugu.
Per Rosing-Petersen, Siumut.
Qujanaq. Tassa ullumi
Naalakkersuisut siunnersuutaat ukiumut aningaasanut inatsiseqarfiusumut
2003-mut Inatsisartut aningaasaliissutinut inatsisigiligallagaat pillugu
Inatsisartut inatsisaata allangortinneqarneranik Inatsisartut inatsisissaat
pillugu Inatsisartut Aningaasaqarnermut Ataatsimiititaliaat
isumaliutissiissuteqarpoq imaattumik aappassaannerinninnissamut
saqqummiunneqartussamik:
Inatsisartuni ilaasortat Per
Rosing-Petersen, Jakob Sivertsen, Ole Thorleifsen, Josef Motzfeldt taavalu Per
Skaaning Aningaasaqarnermut Ataatsimiititaliami ilaaosrtaapput tassanilu
Inatsisartut Aningaasaqarnermut Ataatsimiititaliaani amerlanerussuteqartut
tassalu Siumut Atassullu siunnersuut Inatsisartuni akuersissutigineqaqqullugu
inassutigaat.
Inatsisartut Aningaasaqarnermut
Ataatsimiititaliaani ikinnerussuteqartut tassaasut Inuit Ataqatigiit Demokraatillu
siunnesuutip Inatsisartunut saqqummiunneqaqqaarnermini iluserisaanut
isumaqataanngillat oqaatigalugulu ataatsimiititaliaq siunnersuummik
suliarinninnissamut piffissaliunneqartut iluani Ataatsimiititaliaq
periarfissaqarsimanngitsoq siunnersuutit siullermeerlugu oqaluuserineqarnerani
ajornatorsiuteqarfittut ilaatinneqartut erserqqinnerusumik
naliliiviginissaannut.
Tamanna tunngavigalugu
ikinnerussuteqartut illersorneqarnerpaasinaasutut isigisimavaat allannguutissatut
siunnersuummik saqqmmiussisoqarnissaa tamatumalu kingorna Aningaasaqarnermut
Ataatsimiititaliaq akuersineratigut aatsaat aningaasaliineq
piviusunngortinneqassalluni. Taamaalilluni Ataatsimiititaliap ajornartorsiutit
qulaani taaneqartut sukumiisumik pisariaqarneratut nalilersuiffiginissaanut
periarfissinneqassaaq.
Tamatuma peqatigisaanik
ikinnerussuteqartut Naalakkersuisut kaammattussavai kingusinnerpaamik 2003-mut
Aningaasanut Inatsissatut siunnersuutip siullermeerlugu suliarineqarneranut
atatillugu Inatsisartunut nassuiaammik saqqummiusseqqullugit. Nassuiaammut
ilaatinneqassapput: Sinerissamut qanittumi aalisarnerup akilersinnaasumik
ingerlanneqarnissaanut ajornartorsitaasut qanoq iluarsiivigineqarnissaannut Naalakkersuisut suliniutissaat,
tassunga ilanngullugu sinerissamut qanittumi aalisarnerup
ilusiliivigineqarnerata naleqqussarneraqarneranut suliaq sumut killinnersoq.
Taamatut oqaaseqarlunga Inatsisartut
Aningaasaqarnermut Ataatsimiititaliaata suliassaq aappassaaniigassanngortippaa.
Atsiorlutik Per Rosing Petersen, siulittaasoq, Jakob Sivertsen siulittaasup
tullia, Ole Thorleifsen Siumut, Josef Motzfeldt Inuit Ataqatigit Per Skaaning
Demokraatit.
Tassunga ilanngunneqarpoq aamma
allannguutissatut siunnersuutigineqarnera ikinnerussuteqartunit. Qujanaq.
Jonathan Motzfeldt, Inatsisartut Siulittaasuat, Siumut.
Taamaalilluni siunnersuutip
aappassaanneerneqarnerani suliassaq aallartippoq. Taava aamma malugeqqussavara
ikinnerussuteqarluni aamma oqariartuummik saqqummiussiniartoqarmat tassalu
Josef Motzfeldt Inuit Ataqatigiit oqaaseqarnissamik kissaateqarpoq.
Josef Motzfeldt, Inuit Ataqatigiit oqaaseqartuat.
Inuit Ataqatigiinnut
pingaaruteqarpoq pisariaqartitsinermik paasinnilluta inatsimmut allannguutissatut
siunnersuutigineqartumut isumaqataanerput erseqqissassallugu. Taamatut
oqareerluta pissutsit siunnersuuteqarnermut tunngavilersuutigineqartut
tamakkiisumik paasissutissiissutigineqarsinnaatinnagit sattaaserlutalusooq
Naalakkersuisunut piginnaatitsiinnarnissaq siunnersuutigineqartut ilutsimigut
iluseqarluni akuerseqataaffiginissaa pissusissamisoortuusorinngilarput.
Tunngaviusumik isumarput
aalajangiusimavarput tassaasoq Inatsisartut katersuussimanerisa avataasigut
Inatsisartut Aningaasaqarnermut Ataatsimiititaliaata Inatsisartut sinnerlugit
inuiaqatigiit aningaasaataasa torersumik aqunneqarlutik atorneqarnerinik
isumannaarinnittumik nakkutilliisussaanera, soorlu missingersuutit pillugit
Inatsisartut inatsisaanni taama allassimasoq.
Taamaattumik inatsisissatut
siunnresuummut allannguutissatut siunnersuuteqarpugut Siulittaasumut
tunniussassanik aningaasaliissutissat aatsaat atugassanngortinneqaqqullugit
Inatsisartut Anigaasaqarnermut Ataatsimiititaliaanut qinnuteqaateqarnikkut.
Aamma Inatsisartut taama iliorput
decemberip 17-ani 2002-mi, 2003-mut aningaasanut inatsisaagallartoq
akuerigamikku. Taamanikkut aningaasaliiffigineqartussatut siunnesuutit
arlaqartut Aningaasaqarnermut Ataatsimiititaliakkooqqaarlutik
atugassanngortinneqarnissaat Inatsisartunit tamarmiusunit
akuersissutigineqarput.
Inuit Ataqatigiit taamatut
oqaaseqarluta inatsimmut allannguutissatut siunnersuummut allannguutissatut
ikinnerussuteqartut siunnersuutaat ilanngullugu akuerineqassasoq
inassutigaarput.
Jonathan Motzfeldt, Inatsisartut Siulittaasuat, Siumut.
Allannguutissatut siunnersuut taanna
manna allaganngorluni maannga tunniunneqarpoq aammalu aappassaaneernermi
taasinissamut ilanngunneqarluni. Tulliulluni oqaaseqassaaq Ole Thorleifsen,
Siumut.
Ole Thorleifsen, Siumup oqaaseqartua.
Aningaasanut inatsimmut
allannguinissamut uagut Siumuminngaanniit allannguinissaq aammalu taamaalilluni
Naalakkersuisut pisinnaatinneqanrissaat akuersaarparput. Taamaalillungalu
innersuussutigallugu uumap allannguutissap aappassaaneerneqarnissaa
pingajussaaneerneqarnissaalu ingerlaannartumik. Qujanaq.
Jakob Sivertsen, Atassutip oqaaseqartua.
Qujanaq. Siullermeerinninnermi
oqaaserisagut innersuussutigalugit erseqqissaatigeqqissavarput solaroliamut tapiissuteqarnissaq
taamaallaat 22. januarimiit aprilip 30-anut atuutussaammat. Kiisalu
Naalakkersuisunngortut tapiissuteqarnissamut siunnersuummik Inatsisartunut
saqqummiussaqarnerminnut ilanngullugu tunngavilersuummik oqaatigaat
Inatsisartut upernaamut aprilimi ataatsimiinnissaannut raajanut tunisinermi
akinut tapiissuteqartarneq aamma solaroliamut tapiissutit taakkununngalu
aningaasartuutaasartut aningaasalersorneqartarnerannut tunngasut
nalilersoqqissaarneqarnissaat Naalakkersuisunngortut nutaat sulissutiginiaritsik
oqaatigaat.
Taakku tunngavigalugit Atassummiit
siunnersuut pisariaqartutut nalilerlugu aningaasat 2,1 mio.-it kr.-it
Inatsisartut immikkut ataatsimiinnerat iluatsillugu naammatsillugit
suliarineqarlutik akuerineqarnissaat Atassummiit isumaqatigigatigu matumuuna
oqaatigaaarput.
Taamatut Atassummiit oqaaseqarluta
siunnersuummut akuersilluta taaseqataassaagut Qujanaq.
Anthon Frederiksen, Kattusseqatigiit oqaaseqartuat.
2003-mi sinerissamut qanittumi
raajat akiisa minnerpaaffissalerneqarnissaat pillugu KNAPK-p ullumikut
Inatsisartunut agguaassaanni allakkani takuneqarsinnaasutuut ilaatigut KNAPK-p
orsussamut tapiinissaq isumaqatiginngikkaa ersarissumik takuneqarsinnaavoq.
Taamaattumik Kattusseqatigiit
sinnerlugit ullumi oqaaseqarninni tapiissuteqarnissaq tamakkiisumik
tapersersimavara paasinnilluarlunga aalaisarnermi ajornartorsiutigineqartut
pillugit aammalu tamanna tunngaviatigut isumaqatigivara.
Kisianni Aningaasaqarnermut
Ataatsimiititaliap ataatsimeereernermini aammalu isumaliutissiissummik
saqqummiinnermi ikinnerussuteqartut piumasaqaataat aammalu Inatsisartut
inatsisaat missingersuusiortarneq pillugu inatsisaat naapertorlugu
aalajangiunneqarsimasut, tassa Inatsisartut Aningaasaqarnermut
Ataatsimiititaliaq pisinnaatissagaat akuesisinnaanngorlugu paasissutissat
sukumiisut tamakkiisusut pissarsiarineqareerpata.
Taanna Demokraatiimik ataqqinninneq
pissusissamisoorluinnartutut uanga
takorloorpara isumaqarfigalugulu, taamaattumik Kattusseqatigiit
sinnerlugit ikinnerussuteqatut Aningaasaqarnermut Ataatsimiititaliami
ilaasortat isumaqatigalugit uanga taaseqataaffigissavakka.
Tassa isumaqarpunga
tapiissuteqarnissaq arlaatigut pinngitsoorani pisariaqartoq tamannalu
pisariaqarpoq Naalakkersuiust Aningaasqarnermut Ataatsimiititaliamut
qinuteqarneratigut paasissutissat erseqqarissut sukumiisullu
tunniutereerneqarnerisigut.
Nalunngilarput maani oqaluttarfimmi
pipallatanik tassanngaannaq aalajangiisarnerit ilaatigut kingunerluttartut
taamaammat pisariaqarpoq suliasast taamaattut inuiaqatigiinnut pingaaruteqaqisut
peqqissaartumik paasissutissanillu tamakkiisunik pissarsiffioreernerisa
kingorna aalajangiiffiginissaat.
Taamaammat Naalakkersuisunut aamma
uanga inassutigerusuppara Naalakkersuisut Aningaasaqarnermut
Ataatsimiititaliamut qinnuteqaateqassasut Aningaasaqarnermullu
Ataatsimiititaliaq Inatsisartuninngaanniit pisinnaatinneqassasoq taamatut
tapiinissamut aalajangiinissamut. Qujanaq.
Augusta Salling, Aningaasaqarnermut Naalakkersuisoq,
Atassut.
Naalakkersuisut sinnerlugit
qujavunga Aningaasaqarnermut Ataatsimiititaliap isumaliutissiissutaanut. Tassa
siullermeerneqarnerani oqaatsigut aammalu nassuiaataasut uteqqissanngilakka,
kisianni uani qujassutiginiarpara amerlanerussuteqartuninngaanngiit
nassuiaatigineqartut naammagisimaarneqarlutik aamma Inatsisartuni
pisinnaatitaaffik taanna nammineq ataatsimiititaliaq suliakkinngikkaluarlugu
aalajnagiisinnaaneq, taanna atorniarneqartoq takusinnaagakku. Suliassaq una
nukinginnarpoq taamaattumik taamatut aalajangertoqarnissaa assut
qujassutigaarput.
Uani ikinnerussuteqartut
oqaaseqarnerminni piumasarivaat aningaasanut inatsisissatut siunnersuutip
siullermeerlugu suliarineqarneranut atatillugu Inatsisartunut nassuiaammik
saqqummiussisoqassasoq. Oqaatigisinnaavara Naalakkersuisuni ataatsimiinnitsinni
nassuiaammik suliaqartoqarnissaa taanna isumaqatigiissutigereeratsigu. Tassalu
taanna naammasineqarumaarpoq. Qujanaq.
Ole Thorleifsen, Siumup oqaaseqartua.
Kattusseqatigiinniit
oqaaseqartuminngaanniit oqaatigineqarmat KNAPK orsussamik tapit
akuerinngikkaat, tassa oqaatigerusuppara allakkami uani ersimmat orsussamik
tapiisarnerit peerneqarsimanerat akuerinngikkaat, taannaana
aaqqiissutigilaarniarlugu taamaalilluni tunngavilersuineq uanga
akuerisinnaannginnakku. Qujanaq,
Jonathan Motzfeldt, Inatsisartut Siulittaasuat, Siumut.
Tassa allanik oqaaseqarumasueruppoq
taavalu aappassaanerinermi taasinissarput tulliuppoq. Tassa uani taaneqarpoq
allannguutissatut siunnersuut ikinnerussuteqartut Aningaasaqarnermi
Ataatsimiititaliami tassaasut Inuit Ataqatigiit aamma Demokraatit siunnersuutip
aappassaaneerneqarnissaanut allannguutissatut siunnersuutaat imaqarpoq § 1-imut
tunngatillugu nr. 13, § 1, imm. 2-mut ilanngunneqartoqima
oqaasertalerneqassaaq: 13, oliamut tapiissutinut aningaasartuutit Inatsisartut
Aningaasaqarnermut Ataatsimiititaliaanit akuersissutigineqartut piffissami
22-ani januar 2003-mit 30. april 2003-p tungaanut 2,1 mio. kr.-it tikillugit.
Taanna tassa allannguutissatut siunnersuutigineqartoq. Nassuiaatigaa
allannguutissatut siunnersuutip kingunerissavaa oliamik tapiissutinut
aningaasartuutit akilerneqarnissaat Aningaasaqarnermut Ataatsimiititaliap
akuersissuteqarneranik tunngaveqartinneqassasoq.
Tamatumunnga iusmaqataasut
qinnuigissavakka nikueqqulugit.
13-it.
Tamatumunnga akerliusut
qinnuigissavakka nikueqqullugit.
17-it.
Taavalu maannakkut
aappassaaneerneqarnerani Naalakkersuisut siunnesuutaat taama isikkoqarluni
tassa ataatsimiititaliami amerlanerussuteqartut tassalu Siumup Atassutillu
innesuussutaat tunngavigalugu akuerineqarnissaanut. Innersuussummut isumaqataasut
qinnuigissavakka nikueqqullugit.
17-it.
Tamatumunnga akerliusut
qinnuigissavakka nikueqqullugit.
13-it.
13-it akerliuppat?
Aap. Taamaaliluni Naalakkersuisut
siunnersuutaat amerlanerusunit tapersersorneqarluni maannakkut
pingajussaaneerneqarnissaminut ingerlaqqissaaq.
Oqaatigilaassavara ingerlaqqitsinnata pingajussaneerneqarneranut saqqummiunneqartut ukua Naalakkersuisut saqqummiussaat malugequssagakku tassalu Aningaasaqarnermut Naalakkersuisoq nalunaaruteqarmat maani aamma uagut malugaarput. Naalakkersuisut nalunaarusiornissaminnut, nassuiaateqarnissaminnut suliaqarnissaminnut piareersimasut finanslovip suliarineqarneranut atatillugu, taanna nalunaarutigineqartoq maani aamma illuatungiliuttuningaanniit noqqaassutiginninnermut naaperiarnertut oqaatigissariaqarpoq. Itigartitaagaluarpalluunniit taasinikkut, taanna maani oqaatigineqareersoq, taanna neriorsuutigineqarmat maluginiassavarput.