Oqaluuserisassani immikkoortoq 1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Jonathan Motzfeldt,
Inatsisartut Siulittaasuat, Siumut.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tamassi tikilluaritsi.
Inatsisartunut qinigaarlaat Namminersornerunerup
1979-imi atuutileqqaarneranit Inatsisartut arfineq pingajussaanni
sivisunerpaamik ilaasortaasimasutut Inatsisartunut Ilaasortaq 2002-mi
inissitsiterluni ataatsimiinnissaannut uummammik pisumik tikilluaqquvakka.
Inatsisartut Naalakkersuisullu pillugit Inatsisartut
inatsisaanni §1 naapertorlugu Inatsisartunut Ilaasortaq sivisunerpaamik
ilaasortaasimasoq arlallillu assigiimmik sivisussusilimmik ilaasortaasimappata
taakkunannga angajulleq pisussaatitaavoq Inatsisartut inissitsiterlutik
ataatsimiinnisaannut Inatsisartut ataatsimiigiaqqussallugit.
Taamatut atuunnera naapertorlugu Inatsisartut
ataatsimiigiaqqusimavakka ulloq 3. december 2002-p qinersinerup ingerlanneqarnerata
qinersinerup inernerata qinersinermut ataatsimiititaliami naatsorsorneqarnera
tunngavigalugu ataatsimiigiaqqusineq pivoq.
Takusinnaavara ilaasortat tamarmiullutik matumani
inissitsiterluni ataatsimiinnissap aallartinnissaanut tikissimasut.
Taamaalilluni Inatsisartut qinigaarlaat tamakkiisumik
aalajangiisinnaassuseqartut.
Ulloq 3. december ukioq manna qinersinermi Inatsisartuni
siusinnerusukkut ilaasortaasimasunut ilaasortat affaanit amerlanerusut
ilaasortanit nutaanik 17-iusunik taarserneqarsimapput.
Taamaammat Inatsisartunut Ilaasortat nutaat taakku
immikkut tikilluaqqujumavakka. Aamma ilisimariikkat, ilisarisimariikkat
tikilluaqqungaarpakka. Tamassinnut atuuttumik oqaatigissavara qinigaaffimmi
aallartittumi pitsaasumik anguniagaqarfiusumillu suleqatigiinnissatsinnut
qilanaarama.
Aamma ilisimatitsissutigineqassaaq Inatsisartut
sinnerlugit ataqqinartorsuaq Dronning Magrethep aappaat, qallunaat
naalakkersuisui - Folketingi, Islandip Altingia Savalimmiullu Lavtingiat
inuulluaqqussummik nassikkakkit.
Taamaalillugu nalunaarutigaara Inatsisartut
inissitsiterlutik ataatsimiinnerat 2002 ammarneqartoq, tamassi tikilluaritsi.