Oqaluuserisassani immikkoortoq 4 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ulloq ataatsimiiffik siulleq, arfininngorneq 14.
december 2002, nal. 11:06
Ataatsimiinnermik aqutsisoq: Jonathan Motzfeldt,
Inatsisartut Siulittaasuat, Siumut.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Taava immikkoortut sisamaat tikipparput, tassa
qinigaanerup misilinneqarnissaannut ataatsimiititaliap ilaasortat qinigaasut
qinigaasinnaassusiat pillugu inassuteqaataa.
Inatsisartut suleriaasianni §1, imm. 3, takuuk aamma §7,
imm. 2, Qinigaanerup Misilinneqarnissaanut Ataatsimiititaliaagallartumik
Inatsisartuni sivisunerpaamik ilaasortaasimasumik siulittaasoqartumik taassumap
toqqagaanik Inatsisartunut Ilaasortanik sisamanik ilaasortalimmik Inatsisartut
pilersitsissapput.
Uanga nammineq sivisunerpaamik ilaasortaasimasutut
ilaanerma saniatigut ataatsimiititaliami Inatsisartuni ilaasortat uku
ilaasortaapput:
Hans Enoksen, Siumut
Josef Motzfeldt, Inuit Ataqatigiit
Augusta Salling, Atassut
Per Berthelsen, Demokraatit
Inatsisartuni ilaasortatut qinigaasut tamaasa
Pinerluuteqarsimasunik Nalunaarsuiffiup nuutsinneqarnera tunngavigalugu
Qinigaasinnaanermut Ataatsimiititaliap misissorpaa. Tassani suleriaasissanik
suleriaatsimi § 2 naapertorlugu misissuineq ilaasortat arlaannaataluunniit
qinigaasinnaaneranik nalorninissamik pissutissaqalersitsinngilaq.
Taamaammat ilaasortat tamakkerlutik inatsisinik
piumasaqaatigineqartutut qinigaasinnaasutut eqquutsitsisutut isigineqassasut ataatsimiititaliaq
inassuteqarpoq.
Taamaalilluni ullormut oqaluuserisassani immikkoortut
sisamaat naammassillugu oqaluuserineqarpoq. Qujanaq.
Taava qinnuigissavassi nammineq nerrivissinni
tunniunneqarsimasoq maanna una atsiussagissi, taavalu maanga Inatsisartut
siulittaasoqarfianut maanga tunniukkiartussallugu tassa atermik atsiorlugu.
Tassani allassimavoq ataqqinassusera
nalunngeqatiginnissuseralu tunngavigalugit Namminersorneq pillugu inatsit
naalagaaffeqatigiinnermilu inatsisit tunngaviusut malikkumallugit matumuuna
neriorsuivunga, kiisalu Inatsisartuni Ilaasortatut sulininni inatsisartut
suleriaasiat ataqqillugu malikkumallugu. Taanna atsiorlugu maanga
inissinneqassaaq.
Taamatut periuseq Inatsisartuni sumiluunniit
atorneqartoq inatsisit tunngavigalugit sulinermut erseqqissaataasoq aamma uagut
maani atorparput, takussutissatut piinnanngikkaluarlugu, kisianni aamma
sulinitsinni najoqqutassarigatsigu.
Ilumut,
kalaallisut nutsernera iluarsilaarumaarpoq, „Namminersornerunermut inatsit
pillugu“ iluarsiumaarpoq taanna.