Oqaluuserisassani immikkoortoq 06 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq ataatsimiiffik siulleq, arfininngorneq 14.
december 2002, nal. 11:09
Ataatsimiinnermik aqutsisoq: Jonathan Motzfeldt,
Inatsisartut Siulittaasuat, Siumut.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Taava maannakkut tikipparput Inatsisartut
Siulittaasussaanik qinersineq. Inatsisartut suleriaasianni §3 naapertorlugu
Inatsisartut ilaasortamik akornanni Inatsisartut Siulittaasuannik
Siulittaasullu tulliinik sisamanik inissitsiterluni ataatsimiinnermi qinersissapput.
Ullormut oqaluuserisassani immikkoortut arfernanni Inatsisartut
siulittaasussaanik qinersinissamut killippugut.
Taamaammat Inatsisartut
Siulittaasuattut atuuffimmut qinigassanngortitsisoqarnissaa qinnutigissavara.
Maannalu apeqqutigissavara partiit
qinigassanngortitsinissamik siunnersuutissaqarnersut? Jørgen Wæver-Johansen,
Siumut.
Jørgen Wæver-Johansen, Siumup oqaaseqartua.
Qujanaq. Ataqqinartoq Inatsisartuni sivisunerpaamik
ilaasortaasimasoq, Inatsisartut nestoriat, Qujanaq tikilluaqqusininnut
ammaanermilu oqaaserisannut.
Ataqqinartut Inatsisartoqativut, Siumup Inatsisartuni
gruppea sinnerlugu matumuuna tamassi qinigaanissinni qamannga pisumik
pilluaqqorusuppassi. Neriuutigeqaarput peqataaffigissallugulu qinigaaffiup
matumani suleqatigiinnerup anersaavata iluani nunatsinni pitsaasumik
angusaqarfiusumik ilungersorluta suleqataanissarput.
Piumassuseq nukiummat qularinngeqaarput innuttaasut
qinigaat Inatsisartut pisussaaffipput ataqqillugu tamaginnut pitsaanerusussaq
ujartorlugu suleqatigiinnissarput. Tamannami nunatta pisariaqartimmagu.
Suleqatigiinneq eqaatsoq katersuuffiusinnaasoq
angusaqarfiunerpaasartoq Siumumi isumaqarpugut. Taamaammat Inatsisartut
Siulittaasuminni piginnaanerit tamakku katersuuffigalugit nassaarisinnaasariaqarpaat.
Siulittaasorput katersuuffiussaaq tamanut unneqqarissumik misilittakkat
piginnaasaqarluarnerlu tunngavigalugit tamatigoortumik
illuinnaasiortuunngitsumillu sullissisinnaasoq.
Qinigaaffinni kingullerni
misilittakkagut tunngavigalugit Siumumi pingaartissimavarput
Naalakkersuisunngortitsiniarnermi isumaqatigiissummut pituttugaanngitsumik
Inatsisartut akunnerminni piukkunnerpaasaminnik toqqaanissaminnut
periarfissinneqarnissaat. Akunnitsinniittoqarpoq inummik innuttaasunik
tatigineqarluni 1971-imili qinigaasarsimasumit.
Namminersornerulernitsinniit piffissaq tamaat
Inatsisartunut ilaasortaasimasumit Inatsisartuni ukiut arlallit
siulittaasooreernikuusumit Naalakkersuisunilu aamma ukiut 17-it
siulittaasuusimalluni.
Naalakkersuisuusarsimasut pinngitsoqaratik tamarmik
ilisimaaraat naapititseriaaneq isummanik assigiinngikkaluanik
katerisitsisinnaaneq immikkuullarissumik piginnaaneqarfigimmagit,
angusaqarfiusumillu kikkut tamat katersuuffigisinnaasaanik sullissineq pingaartitarimmagu.
Siumumiit nalorninata
isumaqatigiilluinnarluta Inatsisartunut innersuussutigerusupparput Siumut
sinnerlugu Inatsisartuni ilaasortaq Jonathan Motzfeldt Inatsisartut
Siulittaasussaattut qineqqullugu. Qujanaq.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Qujanaq. Tulliulluni oqaaseqassaaq
Inatsisartuni ilaasortaq Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit oqaaseqartuat.
Inuit Ataqatigiit Inatsisartuni ilaasortaatitaat
sinnerlugit aamma uagut tikilluaqqusinermut qujavugut. Kiisalu aamma
Inatsisartuni ilaasortanngortut tamaasa partiinit tamaneersut aamma
pilluaqqujumallugit.
Inatsisartut siulittaasussaannik toqqaanissaq immikkut pingaaruteqarluinnarpoq.
Inuit Ataqatigiinninngaaniit neriuppugut siusinnerusukkut pisimasut
qaangerlugit ukiuni sisamani Inatsisartut tamarmiusumik attassinnaasaannik
tatigisaannillu toqqaasinnaassasugut.
Aamma Inuit Ataqatigiinninngaaniit naatsorsuutigaarput
Inatsisartut Siulittaasussaannik qinigaasussaq tassaassasoq Inatsisartunut
tamanut Inatsisartunullu ilaasortanut ataasiakkaanut sullissisoq. Aammalu
partiikkuutaanngitsumik inissisimasariaqartoq.
Taamaalilluni Inatsisartuni sulineq toqqissisimasoq
aamma ingerlassinnaajumallutigu ukiuni aggersuni sisamani.
Inuit Ataqatigiinni Inatsisartuni ilaasortat
tamarmiullutik aamma naatsorsuutigaat Inatsisartunut siulittaasuuffik
atorneqassasoq maani Inatsisartut ataqqinassusiannik aammalu suleqatigiissinnaassusiannik
annertuumik periarfissiissalluni.
Inatsisartunut siulittaasoq tassaasariaqarpoq
tamatsinnut sullissisoq aammalu apeqqutinut politikkimut tunngasunik
ataasiakkaanut akuunissaminik aamma soorunalimi
nangartorneqarsinnaanngikkaluarluni taamaattoq sullissinerit naapertuuttumik
ingerlassinnaajumaarai.
Inuit Ataqatigiinninngaaniit aamma uagut
oqaatigissavarput Siumup siunnersuutaa tassalu Inatsisartunut ilaasortaq
Jonathan Motzfeldt tassunga ivertinneqaqqullugu, aamma uagut
tapersersussagatsigu. Neriuppugullu aamma tamanit tamanna
tapersersorneqarsinnaajumaartoq. Qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Aqqaluk Lyngemut qujavugut. Taava
tulliulluni oqaaseqassaaq Inatsisartunut ilaasortaq Finn Karlsen, Atassut.
Finn Karlsen, Atassutip oqaaseqartua.
Uaguttaaq Atassumminngaanniit tikilluaqquneqarnitsinnut
pilluaqquneqarnitsinnullu qujavugut. Aamma soorunami Atassumminngaanniit
Inatsisartunut ilaasortanngortut tamaasa qamannga pisumik pilluaqquavut suleqatigiilluarnissatsinnillu
neriuuteqarluta.
Atassumminngaanniit pingaartipparput Inatsisartuni
ataatsimoortumik suleqatigiiffigineqarsinnaasumik siulittaasoqarnissaq. Tamanna
pingaartilluinnaqqissaarparput. Taamaattumik annerusumik oqaaseqarnanga
siunnersuutigineqartoq Jonathan Motzfeldt aamma Atassumminngaaniit
akuersaarlugu siulittaasussatut taaseqataaffigissagatsigu.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Finn Karlsenimut qujavugut. Tulliulluni oqaaseqassaaq Inatsisartuni
ilaasortaq Per Berthelsen, Demokraatit.
Per Berthelsen, Demokraatit oqaaseqartuat.
Qujanaq. Demokraatit sinnerlugit uaguttaaq
ataatsimiittarfimmut maanga tikilluaqqulluarneqarnerput nuannaarutigalugu
tiguarput.
Inatsisartuni Siulittaasussatut pingaartipparput
siulittaasussap katersuuffissatut piginnaassuseqarnissaa, aammalu
pingaartillugu misilittagaqartuunissaa.
Tungitsinninngaanniillu pingaartilluinnarparput
Inatsisartuni Siulittaasuusup tamanut Inatsisartuni ilaasortanut
siulittaasututut inissisimanissaminik ataqqinnilluinnartuunissaa, Demokraatillu
tungaaninngaanniit aamma pingaartillugu qanoq oqaaseqarneq apeqqusernagu
ataqqilluguli ingerlatsinissamik piumassuseqartumik siulittaasoqarnissaq.
Taakkua Demokraatit tungaaninngaaniit pingaartinneqartut
nuannaarutigaagut maanna inassutigineqartumit avammut
nalunaarutigineqareernikuummata.
Taamaattumik Demokraatit tungaaninngaaniit nuannaarluta
siulittaasussatut inassutigineqartoq Hr. Jonathan Motzfeldt uagut tungitsinninngaaniit
aamma uummammit tikilluaqqullugu ataqqingaarlugulu siulittaasussatut
inassutigineqarnera ilalerumavarput.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Per Berthelsenimut qujavugut. Taavalu
tulliuppoq Inatsisartuni ilaasortaq Anthon Frederiksen, Kattusseqatigiit.
Anthon Frederiksen, Kattusseqatigiit.
Ataqqinartut Inatsisartut aammalu Inatsisartunut
qinigaasimasut tamassi pilluaritsi. Nuannaarutigaara Kattusseqatigiit
sinnerlugit aamma maanga tikilluaqqusaanera.
Inatsisartuni sulinermi pingaaruteqarluinnartarpoq
Inatsisartut katersuuffigisinnaasaminnik Siulittaasoqarnissaat aammalu
taamatuttaaq pingaaruteqarluinnarpoq ikinnerussuteqartut oqaasiinik
tusaaniarsinnaasumik siulittaasoqarnissaq.
Taamaattumik Jonathan Motzfeldtip inassutigineqarnera
aammalu ilisarisimaneqarnera tunngavigalugu minnerunngitsumillu aamma
siammasissumik ikinnerussuteqartunillu tusaaniarsinnaanera
naatsorsuutigilluinnarlugu Kattusseqatigiinniit akuersaarumavara.
Tikilluaqqusaanitsinnut qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Anthon Frederiksen qutsavigaarput.
Taavalu allamik siunnersuuteqartoqanngimmat siunnersuutigissavara isumaqataasut
nikuillutik taasisarmata aamma nutaamik taanna isumagissavara. Jonathan
Motzfeldtip siunnersuutigineqarneranut isumaqataasut qinnuigissavakka
nikueqqullugit.
31.
Qujanarujussuaq taamatut
qinerneqarninnut. Kingusinnerulaartukkut qujassuteqarumaarama uani suliassat ingerlateqqissavagut.