Oqaluuserisassani immikkoortoq 13 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataatsimiinnermik
aqutsisoq: Jonathan Motzfeldt, Inatsisartut Siulittaasuat,
Siumut.
Jonathan
Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Qujanaq. Taava ingerlaqqissaagut;
oqaluuserisassani immikkoortoq 13; Inatsisartut Inatsisit
Atortinneqarnerannut Ataatsimiititaliaanni ilaasortassanik sinniisussanillu
qinersineq.
Jørgen Wæver-Johansen, Siumup oqaaseqartua.
Siumumiit ilaasortassatsitut
Inatsiseqarnermut Ataatsimiititaliami Ole Dorph aamma Enos Lyberth toqqarpavut,
sinniisussaralugit Jørgen Wæver-Johansen aamma Doris Jakobsen.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Qujanaq. Tulliuppoq Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit oqaaseqartuat.
Inuit Ataqatigiit Inatsisartut
Inatsisit Atortinneqarnerannut Ataatsimiititaliaannut Ane Hansen toqqarparput,
sinniisussaralugu Henriette Rasmussen.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Qujanaq. Taava Finn Karlsen, Atassut.
Finn Karlsen, Atassutip oqaaseqartua.
Inatsisartut Inatsisit Atortinneqarnerannut
Ataatsimiititaliaanut Atassumminngaanniit Isak Davidsen ilaasortassatut
toqqarparput, sinniisussaralugu Otto Jeremiassen.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Qujanaq. Tulliuppoq Per Berthelsen, Demokraatit.
Per Berthelsen, Demokraatit oqaaseqartuat.
Inatsisartut Inatsisit Atortinneqarnerannut
Ataatsimiititaliaanni Demokraatit sinnerlugit ilaasortassatut Astrid Fleischer
Rex inassutigaarput, sinniisussaralugu Palle Christiansen.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Qujanaq. Taamaalilluni Inatsisartut
Inatsisit Atortinneqarneranut Ataatsimiititaliaanni uku ilaasortanngorput:
Ole Dorph, Siumut, sinniisussaralugu
Jørgen Wæver-Johansen
Enos Lyberth, Siumut,
sinniisussaralugu Doris Jakobsen.
Ane Hansen, Inuit Ataqatigiit,
sinniisussaralugu Henriette Rasmussen.
Isak Davidsen, Atassut,
sinniisussaralugu Otto Jeremiassen
Astrid Fleischer Rex, Demokraatit,
sinniisussaralugu Palle Christiansen.
Taamaalilluni ataatsimiinneq ammasoq tamaanga
killeqarallarpoq. Taavalu siunnersuutigissavara matoqqasumik
ataatsimiisitaliani inissat sinneruttut naammassissagigut, kisianni tassa
oqaatigissavara aamma naammassinissaat qularnanngimmat, piareersareernikuummat
nalunaaqutaq ataatsiminngaanniit Naalakkersuisut taarseraannerat aallartissaaq.
Siulliulluni Naalakkersuisut Siulittaasuata
taarserneqarnissaa, tassa uanga allaffinni pissaaq. Taavalu tassunga
tulliullugu Naalakkersuisoqarfiit allat aamma taarsiisussat taamaalillutik
periarfissinneqarmata. Taavalu uanga arlalinnik taarsiisussaagama
kvarterikkaarlugu naatsorsuutigineqassaaq ataatsiminngaanniit takkuttarnissara.
Tassa ataatsimut nammineq allaffeqarfinni, taavalu aamma
Kulturimut Naalakkersuisoqarfimmi nal. 13:15, taavalu aamma 13:30
Suliffissaqartitsinermut Pisortaqarfimmut aamma ingerlajumaarpunga.
Tassa kvarterikkaarlugit taamatut naammassiniassavagut
piffissaq atorluarumallugu.
Naalakkersuisut Siulittaasuat oqaaseqarumavoq.
Hans Enoksen, Naalakkersuisut Siulittaasuat, Siumut.
Qujanaq. Siullermik Naalakkersuisunngortut pilluaritsi
aammalu Naalakkersuisunngortuni
tapersersuisut annertuumik qutsavigaakka, neriullunga suleqatigiinneq
pitsaasumik angusaqarfiusumillu siunissami ingerlanneqarumaartoq.
Naalakkersuisunngortitsiniarnermi malugivarput partiit
illuatungiliuttut taaseqataanngitsut. Taamaakkaluartoq taanna
aporfiginngilluinnaqqissaarlugu Naalakkersuisut piumassuseqarput pitsaasumik
ataqqeqatigiissumillu illuatungiuliuttunut suleqatiginninnissaminnut.
Tassami qineqqusaarnermi tunngaviit
oqariartuutigineqartut innuttaasunut apuunnneqartut tassaapput inuiaqatigiit
pitsaasumik siunnerfeqartumillu kiffartuunneqarnissaat ataatsimoorluta anguniagarigipput.
Taannalu timitalerneqassappat ataqqeqatigiilluta aammalu
siunnerfeqarluta paaseqatigiilluarlutalu maani ingerlatsisoqarnissaanut
annertuumik peqataarusullungalu piumassuseqarpunga.
1979-imi 23-nik ukioqarlunga ilagiit sinniisaanni
qinigaaqqarama takorloorsimanngisaannaraluarpara ukiut 23-t qaangiuppata
Naalakkersuisut Siulittaasuattut oqalugiarnissara. Inuunerup ingerlanera
tupinnaqaaq. Taamaammat mianeralugu atugassaasoq tassuuna aamma uppernarsillugu
oqaatigissavara.
Inuiaqatigiit ataatsimut isigalugit suleqatigiinnissaq
pingaartilluinnarlugu Naalakkersuisunngortut nutaat siunnerfigalugu
sulissapput, ilaatigut qineqqusaarnerup nalaani aammalu piffissaq sioqqullugu
annertuumik tusagassiuutitigut kalaallit qallunaallu akornanni pissutsit oqariartuutigineqaqattaarput
eqqunngitsumik. Taannalu uanga misigilluarpara.
Tassalu ilaatigut
oqariartuutigineqartarluni Hans Enokseni qallunaanik malersuisuusoq aammalu
qallunaanik aniatitsiniartuusoq.
Taanna
siunertarineqanngilluinnarpoq. Aamma uanga pisinnaatitaanngilanga qallunaanut
ajortumik pinninnissannut allatigulluunniit ajattuinissannut. Tusagassiortut
qinnuigissavakka pissuserissaartumik ataqqinnillutillu inuiaqatigiit iluanni
oqallinnermut peqataaqqullugit. Inuit ataqqinassusiat mianeralugu ingerlatseqqullugit.
Tatigeqatigiinneq aatsaat taamaaliornikkut pilersinneqarsinnaammat.
Inuit imminnut
ilinniarsimasorsuartut taagortut kaammattussavakka ataqqinninnermik
tunngaveqartumik sulinertik ingerlateqqullugu. Ataqqinninneq uanga
malugilluartarpara inunni ilinniarsimanngitsuni taaneqartartuni annnertuumik
anersaaqarfigineqarluni ingerlanneqartartoq. Ila, taakkua aamma
ilinniarfigisinnaaqaagut.
Taamaammat inuttut naleqassuserput
mianeralugu innuttaaqativut maani peqatigalugit ingerlanissarput pingaartillugu
aammalu qallunaat kalaallillu akornanni suleqatigiinnerup pitsaasumik
ingerlanissaa siunnerfigalugu inuiaqatigiinnut assaga isaappara. Nukittuumik
tatigeqatigiissumillu pinngortitaq manna najugaqarput imaannaanngitsuummat
suleqatigiittariaqaratta.
Inatsisartunut ilaasortat
akisussaaffik annertooq tiguarsi aammalu pisussaaffippassuit inuiaqatigiinnut
sunniuteqarluartumik ingerlanneqartussat pisussaaffigilerpasi
naatsorsuutigaaralu ilissi aamma piumassuseqarluarlusi suleqatiginnikkumaneq
aallaavigalugu suliumaartusi.
Qujavunga tuppallerlungalu
Inatsisartuni Naalakkersuisut Siulittaasussaattut toqqarneqarama pissaaneq
tunniunneqartoq neriorsuutigissavara mianeralugu atussagakku.
Pissaaneqarumassuseq aamma suleqatigiinnermut pitsanngorsaataanani ilaatigut
annertuumik kingunilimmik atornerlunneqartarmat. Uangalu neriorsuutigissavara
inuiaqatikka kalaallit qallunaallu ataqqillugit pissaaneq allat ikiortigalugit
pissarsiara mianeralugu atussagakku.
Qujavunga taamatut oqaaseqarsinnaagama neriuppungalu suleqatigiinneq
pitsaasumik kingunilimmik naammassisaqarfiujumaartoq, qujanarsuaq.