Oqaluuserisassani immikkoortoq 30-1_ |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aappaat,
pingasunngorneq 12. februar 2003, nal. 16:42
Ataatsimiinnermik aqutsisoq: Jonathan Motzfeldt, Inatsisartut
Siulittaasuat, Siumut.
Jonathan Motzfeldt, Inatsisartut Siulittaasuat, Siumut.
Tulliuppoq immikkortoq 30, atuarfitsialaap
siunertaata anguneqarnissaa siunertaralugu meeqqat atuarfiissa
iluarsaanneqarnissaat anguniarlugu suliniuteqaqqullugit Naalakkersuisut
peqquneqarnissaannik aalajangiiffigisassatut Inuusuttut Inatsisartuinut
siunnersuut.
Tassani saqqummiussissaaq Poul Olsen.
Poul Olsen, Naalakkersuisunut ilaasortaq; Siumup Inuusuttai,
Sisimiut.
Kalaallit Nunaanni meeqqat atuarfii ukiorpassuit
ingerlaneranni sumiginnarneqarsimapput, ull umilu sukumiisumik
iluarsaassinissaq pisariaqartinneqarluni. Atuarfitsialaap siunertaanut
atatillugu Naalakkersuisut anguniakkanik akuerineqarsimasunik piviusnngortitsinissaannut
piffissanngorpoq, taamaaliornikkut nunami maani inuusuttut
ilinniaqqinnissaannut tunngavissat pitsaa‑nerusut
pilersinneqarsinnaaqqullugit.
Kalaallit Nunaanni meeqqat atuarfianni
atuakkatigut killiffik ullumikkut appasippallaarpoq. Tamanna assigiinngorpassuarnik
pissuteqarpoq, minnerunngitsumik illuutit meerartatta atuartin‑neqartarfii
eqqarsaatigalugit. Atuarfiit ukiorpassuarni sumiginnarneqarsimapput, ul
lumikkullu aserfallassimarpaseqisunik initaqarlutik, pinnguartarfeqarlutik,
pequteqarlutik, nunap assiuteqarlutik, aap, suummi tamarmik taamatut
isikkoqarput. Avatangiisit tujorminartut taakku meerartatta inuusuttortattalu
ilisimasassaminnik kat ersiniarnerminni avatangiisigaat qiimmaallannanngeqisut.
Ilinniartitsinermi pitsaassuseq ataatsimut
isigalugu qaffanneqartariaqaarpoq, tamannalu meeqqat atuarfianni
annertoorujussuarmik suliniuteqartoqanngippat anguneqarsinnaanngilaq.
Suliniuteqarnerullu ilaa pingaaruteqartoq tassaasariarpoq meerartatta
ilisimasaqalerumallutik atuariartoraangamik avatangiisaasa
pitsaasuutinneqarnerat.
Jonathan Motzfeldt, Inatsisartut Siulittaasuat, Siumut.
Naalakkersuisut sinnerlugit akissuteqassaaq Naja
Stefani.
Naja Stefani, Naalakkersuisunut ilaasortaq, Atassutip
Inuusuttai, Sisimiut.
Akissuteqaat:
Siunnersuuteqartup tikkuagaatut meeqqat
atuarfippaalussui ullumikkut aserfallassimapput. Meeqqat atuarfiannik
iluarsaaqqinnerup Atuarfitsialaap atuarfiit arlallit sukumiisumik
iluarsaanneqarnissaannik allineqarnissaannillu pisariaqartitsineq aamma
nassataraa.
Meeqqat atuarfiat pillugu peqqussut 1. august
2003-mi atortuulersussaq pillugu oqaaseqaatini oqaatigineqarpoq:
Issuaaneq aallartippoq: „Atuarfinnut tunngasuni
allanngortiterinissamik, nutaamik sanaartorniss amik allilerinissamillu
pisariaqartitsineq Ineqarnermut, Attaveqarnermut Pilersuinermullu
Pisortaqarfiup misissu‑eqqissaarfigileruttorpaa. Illuutinik ilaatigut
iluarsaassineq, ilaatigullu pitsanngorsaaneq anguniarneqarpoq, taamaalillutik
taakku pitsaasumik atuartitsinermi illutigut avatangiisitigullu piumasaqaataasunik
naammassinnissinnaaqqullugit. Perorsaanikkut illutigut sinaakkkutassa‑nut
piumasaqaatit eqqarsaatigalugit KIIIP Inerisaavillu suleqatigineqarput.
Aammattaaq kommunit pineqartut suliani aalajangersimasuni peqataatinneqarput“,
issuaaneq naavoq.
Isumaliutissiissummi Inatsisartut Kultureqarnermut
Atuartitaanermullu Ataatsimiititaliaata peqqussutissatut siunnersuummut
atatillugu saqqummiussaanni makku ataatsimiititaliap oqaatigai:
Issuaaneq aallartippoq, Atuarfitsialak
iluatsissappat nunatsinni atuarfiit Atuarfitsialammi, illoqarfinni
ataasiakkaani nunaqarfinnilu pisariaqartitat siunertaasullu tunngavigalugit
allilerneqarnissaat iluarsaanneqarnissaallu ataatsimiititaliap pingaartutut
isigaa.
Atuarfiit sanaartorneqarnissaannik
iluarsaanneqarnissaannillu pilersaarutit qanoq iliorluni
piviusunngortinneqarnissaannut Naalakkersuisut pilersaarusiaat
ataatsimiititaliap arlaleriarluni ujartortarsimavaa.
Ataatsimiititaliaq isumaqarpoq atuarfiit
illutamikkut pissusaat avatangiisaallu atuartut ilikkagaqarusussuseqarnerannut
aalajangiisuusumik sunniuteqartut.
Ataatsimiititaliami ilaasortat tamarmiullutik
isumaqatigiissut Naalakkersuisunut ilaasortaq Kaj uumisaarpaat atuarfiit
sanaartorneqarnissaannut iluarsaanneqarnissaannullu pilersaarusiamik
saqqummiusseqqullugu, atuarfiit illutamikkut sinaakkutaat Atuarfitsialaap
siunertaanut naapertuuttunngortinneqarsinnaaqqullugit“, issuaaneq naammassivoq,
kisianni Kalaallit Nunaanni Inatsisartut sanaartornissamut
iluarsaassinissamullu pilersaarusiamik taamaattumik suli tigusaqarsimanngillat.
Naalakkersuisulli 2001-imi naalakkersuineq
aningaasaqarnerlu pillugit nalunaarutaani takuneqarsinnaavoq meeqqat
atuarfiinik iluarsaassineq ukiuni aggersuni sanaartugassanut atugassanik
tulleriiaarinermi sanaartornermut iluarsaassinermullu
atugassanngortitarpassuarnik atuiffiunissaa naatsorsuutigineqartariaqartoq.
Paasissutissat taakku paasissutissiissutigalugit
siunnersuut Naalakkersuisut taperserlugu ilalerpaat.
Jonathan Motzfeldt, Inatsisartut Siulittaasuat, Siumut.
Tulliulluni oqaaseqassaaq Elisabeth Lyberth.
Elisabeth Lyberth, Sulisartut Højskoliat, Qaqortoq.
Uagut oqaluuserivarput taanna aamma.
Atuarfitsialammut atatillugu eqqartorparput meeqqat atuarfiat ataatsimut
isigalugit aserfallassimaqisut iluarsartuunneqarnissaat, uku pinerullugit,
nunaqarfiit oqaluffiini atuartartut atuarfittaarnissaat pingaarnerpaasoq,
tassami toqqissisimanartinngilarput meeqqat oqaluffinni atuartinneqartarnerat,
soorlu una eqqaasinnaagipput, palasi illoqarfimmit nunaqarfimmut tikippat allatut
ajornartumik meeqqat atuartinneqarnissaraluar unitsiinnarneqartartoq.
Atuarfittaartinneqartuugunik aamma
immaqa meeqqat kajuminnerulissagaluarput atuarfimmut atuariartortarnissamin
nut, immaqalu aamma ilinniartitsisut kajuminnerulissagaluarput atuarfiit
suliffissarititaasut iluarsartuunneqaraluarpata.
Jonathan Motzfeldt, Inatsisartut Siulittaasuat, Siumut.
Allamik oqaasissaqartoqarpa?
Taamaanngippat taanna suliassaq
ingerlateqqinneqassaaq aamma Sanaartornermut aammalu Nukissiornermut Ataatsimiititaliamut
ingerlassalluni.