Oqaluuserisassani immokkoortoq 21-22-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 13. oktober 1997 nal. 16.20
Karl Lyberth, Inatsisartut Nukissiuuteqarnermut
Nalunaarasuartaatitigullu Attaveqarnermut Ataatsimiititaliaata siulittaasua:
Uani siulittaasup oqaatigigaluaraa imm. 21
uagut imatut paasisimavarput imm. 21 aamma 22 ataatsikkut maani
saqqummiunneqassasut.
Nalunaarasuartaatitigut attaveqarneq
sullissinerillu pillugit Inatsisartut peqqussutaata allanngortinneqarneranik
Inatsisartut peqqussutissaattut siunnersuutip aamma TELE Attaveqaatit aktiaateqarluni
ingerlatseqatigiiffinngortinneqarnera pillugu Inatsisartut peqqussutaata
allanngortinneqarneranik Inatsisartut peqqussutissaattut siunnersuutip
aappassaaneerneqarnerannut Inatsisartut Nukissiuuteqarnermut
Nalunaarasuartaatitigullu Attaveqarnermut Ataatsimiititaliaata Isumaliutissiissutaa
maanna saqqummiutissavara.
Ataatsimiititaliami ilaasortaapput
siulittaasoq Karl Lyberth (S), Kristine Raahauge (S), Finn Karlsen (A), Peter
Ostermann (A), Manasse Berthelsen (IA).
Ukuali suliat suliarinerini Kristine
Raahaugep aallaqqanera pissutaalluni sinniisussaa Laannguaq Lynge
peqataasimavoq. Finn Karlsenip aallaqqanera pissutigalugu sinniisussaa Jakob
Sivertsen peqataasimavoq uanilu aamma Peter Ostermann aallaqqanini
pissutigalugu ataatsimeeqataasimanngilaq.
Inatsisartut Nukissiuuteqarnermut
Nalunaarasuartaatitigullu Attaveqarnermut Ataatsimiititaliaata oktoberip pingajuani
1997 ataatsimiinnermini Nalunaarasuartaatitigut attaveqarneq sullissinerillu
pillugit Inatsisartut peqqussutissaattut siunnersuut, kiisalu TELE Attaveqaatit
aktiaateqarluni ingerlatseqatigiiffinngortinneqarneranik Inatsisartut
peqqussutaata allanngortinneqarneranik Inatsisartut peqqussutissaattut
siunnersuut oqaaseqaatitallit saqqummiussissutitallillu oqallisigai.
Nunatsinniit nunanullu allanut
nalunaarasuartaatitigut attaveqarnermut inatsisiliortussaatitaanermik
oqartussaanermillu Namminersornerullutik Oqartussat tigusinissaat
ataatsimiititaliap tapersersorluinnarpaa.
Nunatsinniit nunanullu allanut
nalunaarasuartaatitigut attaveqarnermut inatsisiliortussaatitaanermik
oqartussaanermillu Namminersornerullutik Oqartussat tigusinissaannut ataatsimiititaliap
tapersersuineranut ilassutitut ataatsimiititaliap aamma nunatsinniit nunanullu
allanut nalunaarasuartaatitigut
attaveqarnerup TELE Attaveqaatinit suliassarineqalernissaa tapersersorpaa,
taamaammallu TELE Atttaveqaatip nunatta iluani nalunaarasuartaatitigut
attaveqarnermik isumaginninnissamut kisermaassinissamik
akuersissuteqarfigineqarsimanerata saniatigut nunatsinniit nunanullu allanut
nalunaarasuartaatitigut attaveqarnermut allineqarnissaa tapersersorlugu.
Siunnersuutip siullermeerneqarnerani
ataatsimiititaliaq qinnuigineqarpoq Nalunaarasuartaatitigut attaveqarneq
pillugu Kalaallit Nunaannut inatsisip Folketingimi
akuersissutigineqannginnerani peqqussutip akuersissutigineqarnissaa
oqaaseqaateqarfigeqqullugu.
Nalunaarasuartaatitigut attaveqarneq
pillugu Kalaallit Nunaannut inatsisip Folketingimi akuersissutigineqannginnerani
peqqussutip akuersissutigineqarnissaa ataatsimiititaliap ajornartorsiutitaqarsorinngilaa
peqqussutissatummi siunnersuummi ' 2-mi erseqqissumik allassimammat
Nalunaarasuartaatitigut attaveqarneq pillugu Kalaallit Nunaannut inatsit
Folketingip akuersissutigippagu peqqussut atuutilissasoq.
Taamaalilluni ataatsimiititaliaq
isumaqatigiissoq siunnersuummut allannguutissanik siunnersuu0tissaqanngilaq,
peqqussutissatullu siunnersuutit taamatut isikkoqarlutik pingajussaaneerneqarnissaminnut
ingerlateqqinneqarnissaat inassutigalugu.
Peter Grĝnvold Samuelsen, Takornariaqarnermut, Angallannermut,
Niuernermut Attaveqaqatigiinnermullu Naalakkersuisoq:
Nukissiuuteqarnermut
Nalunaarasuartaatitigullu Attaveqarnermut Ataatsimiititaliaq Nalunaarasuartaatitigut
attaveqarneq sullissinerillu pillugit Inatsisartut peqqussutissaattut
siunnersuummik aamma TELE Attaveqaatit aktiaateqarluni
ingerlatseqatigiiffinngortinneqarnerat pillugu Inatsisartut peqqussutaata
allangortinneqarneranik Inatsisartut peqqussutissaattut siunnersuummik
akuersaartumik oqallisiginnissimaneranut tapersersuineranullu Naalakkersuisunit
qutsavigaarput.
Naalakkersuisut ilisimatitsissutigissavaat
TELE Attaveqaatit nalilermassuk Danmarkimi immikkoortortaqalernissaq
annikitsuinnarmik suliffeqarfimmut isertitsissutaasinnaasoq. TELE-p ukiumut 600
mio. kr. miss. kaaviiaartittarpai, immikkoortortamillu pilersitsinerup
annerpaamik 4 mio. kr.-nik qaavatigut kaaviiaartitsissutaanissaa
naatsorsuutigineqarpoq. Illuatungaatigulli immikkoortortamik, tassa
qaammataasat atorlugit nalunaarasuartaatitigut attaveqarnermik tigooraavimmik
pilersitsinikkut nunatta silarsuullu sinnerata akornanni nalunaarasuartaatitigut
attaveqarnikkut akiusut appartinnissaannut suli periarfissaqarumalluta TELE
Danmarkimut sullissisunullu allanut isumaqatigiinniartarnissani
nukittunerusumik inissisimanissamik pisariaqartitsisoqarnera.
Taama oqaaseqarluta Naalakkersuisut
peqqussutissatut siunnersuutit marluk pingajussaaneerneqarnissaat
siunertaralugu Inatsisartunut oqallisissanngortippaat.
Cecilie Vahl, Siumup
oqaaseqartua:
Siumumiit nuannaarutigaarput
Nalunaarasuartaatitigut attaveqarneq sullissinerillu pillugit kiisalu TELE
Ataveqaatit aktiaateqarluni ingerlatseqatigiiffinngortinneqarnerannik
Inatsisartut peqqussutaata allanngortinneqarnerannut tunngatillugu
Nukissiuuteqarnermut Nalunaarasuartaatitigullu Attaveqarnermut
Ataatsimiititaliamiit akuersaartumik isummersorsimammata. Naalakkersuisut
siunertaat Siumumiit tapersersorluinnarparput maluginiaratsigu
allannguuteqarnikkut aammattaaq siunissami nunatsinniit nunanullu allanut
nalunaarasuartaatinut akiusut appartinneqarnissaanut TELE Danmarkimut kiisalu
sullissisunut allanut isumaqatiginninniartarnissamut nukittunerusumik
inissisimanissaq annertuumik pingaaruteqartussaq tassuunakkut anguneqassasoq.
Minnerunngitsumik aamma akit apparsarneqarnissaat eqqarsaatigalugu.
Ullumikkummi nuannaarutigeqisatsinnik
malugisimalersimavarput nalunaarasuartaatitigut akit appariartornerat, aammalu
qulakkeeqqajuartariaqarparput siunissami tamatumap sulissutigineqarnerata
ajornerulinnginnissaa. Akimmi apparneqarnerisigut aamma innuttaasut
amerlanerusut, soorlu piniartut, aalisartut, sulisartut, savaatillit minnerunngitsumillu utoqqaat
periarfissagissaarnerulermata nalunaarasuartaatinik atuinissaminnut.
Taamaasillutik aamma ilaquttamik ungasissorsuarmiikkaluartulluunniit
attaveqarfiginissaannut ajornannginnerusumik inissisimalersimallutik.
Minnerunngitsumillu aamma ilaqutariit iluanni napparsimallutik ilaatigut
sivisuumik qimagusimasariaqartartut ilaquttaminnit pitsaanerusumik
attavigineqartarnissaat tassuunakkuttaaq oqilisaanneqartussaammat.
Ilami ullumikkut inuiaqatigiit ineriartorneranni
attaveqaateqarneq pinngitsoorneqarsinnaajunnaarluni inissisimalersimavoq.
Taamaattumillu aamma suliffeqarfippassuit assigiinngitsut, soorlu
peqqinnissaqarfik, atuarfeqarfiit ilinniagaqarfiit assigiinngitsut,
suliffissuit allaffeqarfippassuit il.il. ineriartortinneqarnerat
eqqarsaatigalugu akit appariartortinneqarnerat pingaarutilerujussuuvoq.
Taamaasillutimmi eqaannerusumik sukkanerusumillu sulinissaminnut
akimmisaaruteqannginnerussammata.
Taamaatut Siumup tungaaniit oqaaseqaateqarluta
Naalakkersuisut peqqussutissatut siunnersuutaat marluk akuersaarpavut,
taamatullu isikkoqarlutik pingajussaaneerneqarnissaminnut ingerlateqqinneqarnissaat
innersuussutigaavut.
Anders Nilsson, Atassutip oqaaseqartua:
Naatsunnguamik Atassummiit
oqaatigissavarput siunnersuutip taamatut isikkoqarluni pingajussaaneerneqarnissaminut
ingerlateqqinneqarnissaanik Ataatsimiititaliap innersuussutaa isumaqataaffigigatsigu.
Manasse Berthelsen, Inuit Ataqatigiit oqaaseqartuat:
Inuit Ataqatigiinniit
tapersersorparput nunatta nammineq oqartussaaffigilissagaa nunatta nunallu
allat akornanni atortorissaarutitsigut attaveqarneq, taassumalu suliassap TELE
Greenland A/S-imut tunniunneqarnissaa.
Inuit Ataqatigiinniit
neriuutigilluinnarparput TELE Greenland-ip pikkoriffigalugu ingerlakkumaaraa,
taamaalilluni nunatta nunallu allat akornanni attaveqaqatigiinneq
akikinnerulersinnaalluni.
Inuit Ataqatigiinniit
Nukissiuuteqarnermut Nalunaarasuartaatitigullu Attaveqarnermut isumaliutissiissutaa
isumaqatigaarput, innersuussutigissallugulu peqqussutinut allannguutissat
naqqiutissat ilanngullugit taamatut isikkoqarlutik pingajussaaneernissaannut
ingerlateqqinneqassasut.
Bjarne Kreutzmann, Akulliit Partiiat:
Akulliit Partiianninngaannit
siullermeerinninnermi oqaatsivut innersuussutigalugit maani suliassap
pingajussaaneerneqarnissaminut taamatut isikkoqarluni ingerlanissaa
inassutigaara.
Anthon Frederiksen, Kattusseqatigiit:
Peqqussutissatut siunnersuutit
siullermeerneqarneranni Kattusseqatigiinniit oqaaseqaatikka
innersuussutigalugit inatsisartunut nalunaarutigissavara peqqussutissatut
siunnersuutit, inatsimmik nunatsinnut suli atortussanngortinneqanngitsumik
tunngaveqarluni peqqussutissatut siunnersuutit siunissami
atortussanngortinniarneqarnerat akuerseqataaffiginiannginnakku, taamaattumik
taaseqataaffigissanngilara.
Karl Lyberth, Ataatsimiititaliami siulittaasoq:
Kingullermik oqaaseqartumut Anthon
Frederiksen-imut tunngatillugu Ataatsimiititaliaq qinnuigineqarsimavoq
siullermeerinninnermi Anthon Frederiksenip oqaaseqaataa misissoqqullugu ilumut
eqqarsarnartoqarnersoq imaluunniit ajornartoqarnersoq Folketingip suli
akuerinngikkaa maani akuerineqarsinnaanersoq.
Taanna asuliinnaanngitsoq
Ataatsimiititaliap misissorsimavaa aammalu paasisimallugu taamatut Folketingi
suli akuersinngikkaluartoq maani inatsimmik akuersisinnaanerput, inatsisissatut
siunnersuummi ' 2-mi allaqqammat taanna aatsaat
Folketingimi akuerineqarpat atuutilissasoq.
Taamaattumik naluara qanoq iliorluta
Anthon Frederiksenimut uppernarsisinnaassaneripput ilumut misissuisimagatta
pimoorullugu. Paasinartorujussuugaluarpoq taanna misissuisimanitsigut
ajornanngitsutut nalilerneqarsimanera oqaatigigaluarpara.
Anthon Frederiksen, Kattusseqatigiit:
Ilisimatitsissutigilaassavara
soorunami Inatsisartuni sulinermi uanga pingaartikkakku inatsisinik
tunngaveqarluni aalajangiisarnissaq. Tamannarpiarlu pissutaavoq
aalajangiinissami matumani peqataarusunnginninnut. Assersuutigeriartigu, naak
qularnanngikkaluartoq Folketingip akuersinissaa, nalaatsornerinnakkut
Folketingi akuersinngeriasaassagaluarpat taava una peqqussutissaq
atortinneqarsinnaanngilaq.
Ataatsimiinnermik aqutsisoq, Finn Karlsen:
Taamaasillutik imm. 21, 22-lu
Nalunaarasuartaatitigut attaveqarneq sullissinerillu pillugit Inatsisartut
peqqussutaata allanngortinneqarneranik Inatsisartut peqqussutissaattut
siunnersuutip aammalu TELE Attaveqaatit aktiaateqarluni
ingerlatseqatigiiffinngortinneqarnera pillugu Inatsisartut peqqussutaata
allangortinneqarneranik Inatsisartut peqqussutissaattut siunnersuut
aappassaaneerneqarluni saqqummiunneqarnerani taamatut isikkoqarluni
pingajussaaneerneqarnissaanut isumaqataasut nikuissapput.
Isumaqataasut: 28
Akerliusut: 0
Taaseqataanngitsut: 1
Taamaasilluni taamatut isikkoqarluni
pingajussaaneerneqarnissaa akuersissutigineqarpoq.
Ataatsimiinneq ullumikkut tamaanga
killeqarpoq.
Oqaluuserisaq naammassivoq.