Oqaluuserisassani immikkoortoq 19-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 26. oktober 1998 nal. 15.46
Ataatsimiinnermik aqutsisoq: Anders
Andreassen, Inatsisartut Siulittaasuat.
Hans Enoksen, Ineqarnermut Ataatsimiititaliap siulittaasua:
Inatsisartut Ineqarnermut
Ataatsimiititaliaat 28. september, 14. aamma 22. oktober 1998 ataatsimiittarpoq
Inissialiornermut tapersiissuteqartarneq pillugu Inatsisartut peqqussutaata
allanngortinneqarneranik Inatsisartut peqqussutissaattut siunnersuutit
oqaluuseralugit. Siunnersuutit suliarineqarannut atugassanik ataatsimiititaliaq
Aningaasaqarnermut Ineqarnermullu Naalakkersuisumit paasissutissanik piniarpoq
aamma Kalaallit Nunaanni Kommuneqarfiit Kattuffiat, KANUKOKA kiisalu Ineqartut
Peqatigiiffiisa Kattuffiat, IPK ataatsimiititamik ataatsimeeqatigineqarsimallutik.
Inatsisartut Ineqarnermut
Ataatsimiititaliaata aallarniutigalugu oqaatigissavaa ataatsimiititaliap Aningaasaqarnermut
Ineqarnermullu Naalakkersuisoq isumaqatigigaa aaqqissuussineq 1953-imi
pinngortoq nutartissallugu ajornakusoortuusoq.
Taamaammat Inatsisartut Ineqarnermut
Ataatsimiititaliaata Naalakkersuisuni ilaasortaq kaammattussavaa,
inissialiortiternermut inatsiseqarnerup annertuumik
iluarsartussivigineqarneranik inerneqartumik, suliamik aallartitseqqullugu,
taamaaliornikkut inatsisissat pisariaqarnerattut pisariillisaavigineqarnissaat
anguneqarsinnaaqqullugu.
Peqqussutissatut siunnersuut pissutsinik
assigiinngitsunik attuisuuvoq.
Inatsisartut Ineqarnermut
Ataatsimiititaliaata inatsisissatut siunnersuummi immikkuualuttut
suliarissavai.
Soorlu inissialiortiternermut
taarsigassarsianut akiligassanik kinguaattoorutit allanngortitsivigineqarnissaannut
tunngasut:
Ataatsimiititaliap paasinninnera malillugu
siunnersuutip kingunerisaanik iluanaarniartoqarsinnaanerata
ammaanneqqarsinnaanera pissutigalugu siunnersuutip ' 10, imm. 3-at imatut oqaasertalerneqassasoq
ataatsimiititaliap siunnersuutigaa:
AImm. 3 aammattaaq imm. 1 aamma 2 naapertorlugit
taarsigassarsiarineqarsimasut allanngortinneqarnissaannut
taarsigassarsisitsisoqarsinnaavoq. Allanngortitsinissamullu taarsigassarsiat
angissusissaasa aalajangerneqarneranni taarsigassarsiarisanit sinneruttut aamma
ukiup affakkaartumik akilersuutissat akilerneqarsimanngitsut, pillaammik
erniat ilanngullugit imm. 1 aamma 2
malillugit siusinnerusukkut taarsigassarsiarisimasanut akiliutissat
il.il. ilanngunneqartassapput. Allanngortitsinissamut taarsigassarsiat
taamaallaat 1. november 1998 sioqqullugu akilersukkanut kinguaattoorutitut
pilersunut tunngasumik taarsigassarsiarineqarsinnaapput.@
Siunnersuutip ' 10, imm. 3-anut taamatut ilassuteqarnikkut,
ataatsimiititaliap isumaa malillugu, pinngitsoortinneqassaaq boligstøttip
illuutaanik piginnittut ineqarnermut akiliutinik akiliinaveersaarnissaat,
taamaaliorunimmi akiligassanik kinguaattoorutitit kingusinnerusukkut
allanngortitsinermut taarsigassarsianut nuussisinnaammata.
Inatsisartut Ineqarnermut
Ataatsimiititaliaannit naatsorsuutigineqarpoq Naalakkersuisunut ilaasortap
isumagissagaa akiligassanik kinguaattoorutit pillugit
taarsigassarsiarineqarsimasut allanngortinneqarnissaannut
taarsigassarsisitsisoqarnera sukkasoorujussuarmik naammassinneqassasoq, tassa
imaappoq 1999 naatinnagu.
Inatsisartut Ineqarnermut
Ataatsimiititaliaata nuussinermi taarsigassarsiat ernialiivigineqarnissaat
sukumiisumik oqaluuseraa. Siunnersuut naapertorlugu taarsigassarsiamut
erniaritinneqartussaq 6%-iuvoq, ukiup affakkaartumik akilersuutinut
ataatsimoortumik tapiissutit taakkununnga tunngasut 30%-iullutik.
Ataatsimiititaliap paasinninnera malillugu
taamatut ernialiinissaq annertuginarpoq, minnerunngitsumik akiligassanit
kinguaattoorutit taarsigassarsianut nuunneqartussat matumani pineqarmata.
Tassa imaappoq, inuit ukiup affakkaartumik akilersuiniarnerminni
ajornartorsioreersimasut pineqarlutik.
Aningaasaqarnermut Ineqarnermullu
Naalakkersuisuni ilaasortaq ataatsimiititaliamut ilisimatitsivoq,
ilumoortuusoq nuussinermi taarsigassarsianut ernialiussaq 6%-iusoq, ernialli
akilerneqarnissaannut ataatsimoortumik tapiissuteqartoqartassaaq,
taamaalillunilu taanna 4,2%-erpiaavoq. Tamatuma saniatigut akiliummut 7,5%-imik
ineqarnermut meeqqanut tapiissuteqartoqartarpoq, tamanna erniat suli
appasinnerunerannik kinguneqartoq. Assersuutigalugu marlunnik meeraqartunut
ernialiussavik 3,3%-iussaaq.
Aammattaaq Naalakkersuisuni ilaasortamit peqqussutissatut
siunnersuummut oqaaserisat innersuussutigineqarput, ilaatigut makku
takuneqarsinnaallutik:
ATaarsigassarsiarineqarsimasut
allanngortinneqarnissaannut taarsigassarsiat isigineqassapput peqqussutip
kapitali 4-anni nalinginnaasumik taarsigassarsiatut, taakku 6%-imik
ernialerneqartarput taarsigassarsisorlu 30%-imik tapiiffigineqartarluni
aammalu ukiup affaanut akilersuutissanut 7,5%-it meeqqanut
tapiutigineqartarlutik. Taamaattoq piumasaqaataavoq taarsigassarsiarineqarsimasut
allanngortinneqarnissaannut taarsigassarsianut akilersuuti qaammatikkaartumik
akilerneqartarnissaat. Tamatuma saniatigut sulissutigineqassaaq
taarsigassarsisup isumaginninnikkut pissarsiarineqarsinnaasunik
pissarsiarisinnaasanik, soorlu ineqarnermut tapiissutit, qinnuteqarnissaminut
qularnaarunneqarnissaa.@
Inatsisartut Ineqarnermut
Ataatsimiititaliaata Naalakkersuisut kaammattussavai akiligassanit
kinguaattoorutit taarsigassarsianut nuunneqarnerannik aaqqissuussinerup
atortinneqarnera malittarilluaqqissaaqqullugu, taamaaliornikkut
qulakkeerumallugu nutaamik akiligassatigut
kinguaattoorutinik pilersoqaqqinnginnissaa, aammalu akiligassanit
kinguaattoorutit taarsigassarsianut nuunneqarnerannik suliaqarnermi
inatsisitigut periarfissat atorneqarsinnaasut tamaasa atorlugit tapiissutinik
pissarsiniunneqassasut.
Aammattaaq Inatsisartut Ineqarnermut
Ataatsimiititaliaata oqaluuseraa pissusissamisoornersoq akiligassanit
kinguaattoorutit taarsigassarsianut nuunneqarnissaat peqqussummi kapitali 4
malillugu, tapiissutit tassunga atasut ilanngullugit, nalinginnaasumik
taarsigassarsiatut isigisariaqarnersut.
Inatsisartulli Ineqarnermut
Ataatsimiititaliaat isumaqarpoq, Ineqarnermut Ataatsimiitititaliap ' 10, imm. 3-p, oqaasertalernerata kingunerisaanik
akiligassanik kinguaattoorutit nungusarneqarnissaat pingaartuusoq,
pissusissamisoortuussanngitsorlu allaffissornikkut isigalugu illumut ataatsimut
taarsigassarsiat assigiinngitsut marluk atorneqarnissaat.
Inissialiortiternermut
taarsigassarsisitsisarnermik aaqqissuussakkut illunik piginnittut inerteqqutinit
eqqugaasannginnissaannik periarfissamut tunngasumik:
Inatsisartut Ineqarnermut
Ataatsimiititaliaata pitsaasutut isigaa boligstøttip illuutaannik piginnittut
illut nammineerluni niuerutiginissaat tigusinnaalissagaat, taamaaliorneq
toqqammaveqartinneqarpat aningaasanut tunngasutigut piginnittup nutaap
namminersornerusunit akuerineqarsimasuunissaa, aamma piumasaqaatit,
Naalakkersuisunit aalajangersarneqartut malillugit pippat aamma
taarsigassarsisut boligstøttimit taarsigassarsiaminni akiitsut sinneruttut,
nalunaarsukkanik suliaqartoqanngikkaluartoq akitigut iluanaarutinik
agguaasoqanngikkaluartoq, akilernissaannut periarfissinneqarpata.
Tamanna ataatsimiititaliap isumaa
naapertorlugu boligstøttip illutaannik piginnittunut landskarsimullu
iluaqutissartaqassaaq.
Illoqarfinni nammineerluni illulianik
sanasoqarsinnaaneranut periarfissaq pillugu:
Inatsisartut Ineqarnermut
Ataatsimiititaliaata pitsaasutut isigaa illoqarfinni nammineerluni illulianik
sanasoqarsinnaaneranut periarfissiinissamik siunnersuuteqartoqarnera,
ataatsimiititaliamilli erseqqissarneqassalluni taamatut periarfissiineq
nunaqarfinni nammineerluni illuliassanut aningaasaliissutit
appartinneqarnerannik kinguneqassanngitsoq. Taamaattoqassagaluarpammi
ataatsimiititaliap akuersaarsinnaanngimmagu.
Taamaammat Inatsisartut Ineqarnermut
Ataatsimiititaliaata Naalakkersuisuni ilaasortaq kaammattorumavaa
Inatsisartunut qularnaaqqullugu illoqarfinni nammineerluni illuliorsinnaanerup
periarfissiissutigineqarnera tunngavigalugu nunaqarfinni nammineerluni
illuliortiternerit ikinnerulersinneqassanngitsut.
Aammattaaq Inatsisartut Ineqarnermut
Ataatsimiititaliaata sukumiisumik oqaluuseraa illoqarfinni nammineerluni
illuliornermi tigutsisissanut tunngasut.
Inatsisartut Ineqarnermut
Ataatsimiititaliaat isumaqarpoq illoqarfinni nammineerluni illulianut
tigutsisissat nunaqarfimmisulli 5%-iusariaqartut, tigutsisissallu isertitat
qanoq innerannik tunngaveqartinneqassanngitsut.
Ineqarnermut Ataatsimiititaliaq isumaqatigiittoq
inassuteqarpoq inissialiornermut tapersiissuteqartarneq pillugu Inatsisartut
peqqussutaata allanngortinneqarneranik Inatsisartut peqqussutissaattut
siunnersuut Inatsisartunit akuerineqaqqullugu.
Tassanilu ataatsimiititaliami
ilaasortaapput:
Jakob Sivertsen aamma Anders Nilsson
Atassumminngaanniit
Malînánguaq Marcussen-Mølgaard Inuit
Ataqatigiit taavalu
Bjarne Kreutzmann Hans Enoksenilu
Siumumiit.
Daniel Skifte, Aningaasaqarnermut Ineqarnermullu
Naalakkersuisoq:
Inissialiornermut tapersiissuteqartarneq
pillugu Inatsisartut peqqussutaata allanngortinneqarneranik Inatsisartut
peqqussutissaannut siunnersuut pillugu isumaliutissiissutini Inatsisartut
Ineqarnermut Ataatsimiititaliaata saqqummiuteqqammerpaa.
Isumaliutissiissut soqutigalugu
Naalakkersuisut misissuataarpaat, nuannaarutigalugulu paasillugu Ineqarnermut
Ataatsimiititaliaq isumaqatigiilluni isumaliutissiissuteqartoq.
Ataatsimiititaliap isumaliutissiissutaatigut erserpoq, peqqussutissatut
siunnersuummi immikkoortut ataasiakkaat ataatsimiititaliap sukumiisumik
oqallisigisimagai.
Ineqarnermut Ataatsimiititaliaq ' 10, imm. 3-p oqaasertaliorneqarnerata
allanngortinneqarnissaanik siunnersuuteqarpoq. Ataatsimiititaliap
siunnersuumminut tunngavilersuutigaa, taamaaliornikkut boligstøttip illutaanik
piginnittut akilersuutissat akilinngitsoornerisigut unneqqaserluttumik
iluanaarniuteqarsinnaanerat pinngitsoortinneqarsinnaasoq.
Periarfissap tamatuma
mattuttariaqarneranik Naalakkersuisut ataatsimiiititaliaq isumaqatigaat,
taamalu ' 10, imm. 3-mut ataatsimiititaliap
allannguutissatut siunnersuutaa isumaqatigalugu. Naalakkersuisut aamma
isumaqatigaat taarsigassarsiat allanngortinneqarnissaat sukkanerpaamik
naammassiniarneqartariaqartoq, ajornanngippat 1999-ip ingerlanerani.
Naalakkersuisulli pissutissaqarsoraat
oqaatigissallugu, aamma illoqarmat akiitsoqarfiunngitsunik, kisiannili
arlaleriarluni taarsigassarsiarivigineqarsimasunik, tassa aallaqqaammut
taarsigassarsianik iluarsaassinernullu taarsigassarsianik arlalinnik.
Peqqussutissatut siunnersuut malillugu aamma illuni arlalinnik
taarsigassarsialinni taamaattuni taarsigassarsiat pioreersut ataatsimut
nutaatut taarsigassarsianngortinneqarsinnaapput.
Naalakkersuisut iluarisimaarpaat
taarsigassarsiat allanngortinneqarneranni atugassarititaasut inissialiornermut
tapersiissuteqartarneq pillugu peqqussummi kapitali 4 malillugu taarsigassarsianut
atugassarititat assigissagaat Ineqarnermut Ataatsimiititaliap ilalermagu.
Naalakkersuisut iluarisimaarpaattaaq
inissialiornermut tapersiissuteqartarneq pillugu peqqussummi killilersuutinit
kaanngartinneqarnissamut illuutillit periarfissaat pillugu peqqussutissatut
siunnersuummi aalajangersakkat Ineqarnermut Ataatsimiititaliap ilalermagit.
Illoqarfinni nammineerluni
illuliorsinnaanermut periarfissat pillugit ataatsimiititaliap oqaaseqaatai
aamma tamatuma nunaqarfinni nammineerluni illuliassanut aningaasaliissutit
ikilisinneqarnerinik kinguneqannginnissaanik ataatsimiititaliap erseqqissaanera
Naalakkersuisut maluginiarpaat.
Naalakkersuisut uppernarsassavaat
siunertarineqanngimmat nunaqarfinni nammineerluni illulianut aningaasaliissutit
akigalugit illoqarfinni nammineerluni illuliortoqartalissasoq. Tamatumunnga
atatillugu peqqussutissamut siunnersuummut oqaaseqaatini allassimasut uku
Naalakkersuisut innersuussutigissavaat:
AIlloqarfinni nammineq illuliornissamut
taarsigassarsisinnaalerneq eqqarsaatigalugu tunngavissaatinneqarpoq tamatutma
aningaasalersuiffigineqarnissaata nunaqarfinni isorliunerusunilu nammineq
illuliorniartunut taarsigassarsiassaritinneqartunut sunniuteqannginnissaat.
Illoqarfinni nammineq illuliassanut aningaasalersuutissat
pissarsiarineqarsinnapput ineqarnermut tunngasuni aningaasaliissutit allat
akornanni nuussuinikkut.@
Inatsisartut namminneq aningaasanut
inatsisitigut nakkutigisinnaavaat illoqarfinni nammineerluni illuliorsinnaaneq
ammaanneqarpat nunaqarfinni nammineerluni illuliassanut aningaasaliissutini
ikililerisoqannginnissaa.
Nammineerluni illuliassamut nammineq
akileeqataassutissat nunaqarfinni illoqarfinnilu assigiimmik 5%-iunissaanik
Ineqarnermut Ataatsimiititaliap isumaqarnera Naalakkersuisut tusaatissatut
tiguaat.
Taarsigassarsiat allanngortinneqarnerinut
atatillugu sulineq, siunissamilu allaffissornikkut qanoq aqutsisoqarnersoq
sukumiisumik malinnaaviginiarlugu Naalakkersuisut Ineqarnermut Ataatsimiititaliamut
neriorsuutigisinnaavaat.
Sakkussat tamaasa atorlugit nutaanik
akiitsoqalersarnerup pinngitsoortinniarnissaa Naalakkersuisut Ineqarnermut
Ataatsimiititaliatulli pingaartitsigaat. Tassunga atatillugu peqqissaartumik
qularnaarniartariaqarpoq kikkut tamarmik tapiissutinik inatsisit malillugit
pisinnaasaminnik qinnuteqartarnissaat. Tamatumani ineqarnermut tapiissutit
minnerunngitsumik eqqarsaatigineqarput.
Inatsisinik ineqarnermut tunngasunik
pisariillisaanermik aallartitsisoqassasoq Inatsisartut Ineqarnermut
Ataatsimiititaliaata kaammattuutigaa. Ineqarnermut Ataatsimiititaliap
kaammattuutaa Naalakkersuisut maluginiarpaat, isumaqarlutillu tamanna
tullianik naalakkersuisunngortussat suliassarissagaat.
Taamaalillutik Naalakkersuisut
siunnersuutigaat inissialiornermut tapersiissuteqartarneq pillugu Inatsisartut
peqqussutaata allanngortinneqarneranik Inatsisartut peqqussutissaattut
siunnersuut pingajussaaniigassanngortinneqassasoq Inatsisartut Ineqarnermut
Ataatsimiititaliaannit siunnersuutigineqartutut '
10, imm. 3 ima allanngortillugu, oqaaseqatigiili kingulliit iluarsilaarlugit:
AImm. 3. Aammattaaq imm. 1 aamma 2 naapertorlugit
taarsigassarsiarineqarsimasut allanngortinneqarnissaannut
taarsigassarsisitsisoqarsinnaavoq. Allanngortitsinissamut taarsigassarsiat
angissusissaasa aalajangerneqarneranni taarsigassarsiarisanit sinneruttut aamma
ukiup affakkaartumik akilersuutissat akilerneqarsimanngitsut, pillaammik
erniat ilanngullugit, imm. 1 aamma 2 malillugit siusinnerusukkut
taarsigassarsiarisimasanut akiliutissat il.il. ilanngunneqartassapput.
Taamaallaat akiitsunut 1. november 1998 sioqqullugu pilersunut
allanngortitsinermi taarsigassarsisitsisoqarsinnaavoq.@
Taamatut oqaaseqarlutik Ineqarnermut
Ataatsimiititaliap isumaliutissiissutaa Naalakkersuisut ilalerpaat.
Bjarne Kreutzmann, Siumup oqaaseqartua:
Inissialiornermut tapiissuteqartarneq
pillugu Inatsisartut peqqussutaata allanngortinneqarneranik Inatsisartut
peqqussutissaannut siunnersuut pillugu Siumut ima oqaaseqassaaq:
Siumup immikkoortut 17, 18, 19 aamma 20-p
suliarinerani Inatsisartut Ineqarnermut Ataatsimiititaliaani sulinermini KANUKOKA-miit
paasivaa ullunik marluinnarnik períarfissiilluni tusarniaasoqarsimasoq IPK-lu
paasisitsilluni tusarniaasoqarsimanngivissoq. Tamanna Siumup Ineqarnermut
Ataatsimiititaliaaniititaanit tupannarsimaqaaq KANUKOKA, Namminersornerullutik
Oqartussat kommunillu akornanni sulinermi qilerutaasutullusooq
atuuttussaagaluaq eqqortumik oqaatigalugu isummaminik
saqquummiisinnaanissaminut periarfissinneqarsimanngimmat.
Tamanna Siumuminngaanniit
ilungersornartorujussuartut ajuusaarnaqisutullu isigaarput.
Tassunga atatillugu Ineqarnermut
Naalakkersuisoq nassuiaaqquarput tusarniaariaaseq taamaattoq pillugu.
Takusinnaannginnatsigu KANUKOKA-p saniatigut allat tusarniaaffigineqareersimanesut
Siumup tungaaninngaanniit nassuiaammik erseqqissumik matumuuna piumaffigaarput
kikkut tusarniaaffigineqarsimanersut, imaassinnaammammi
tusarniaaffigineqartartut allat, soorlu SIK imaluunniit Kalaallit Nunaanni
Sulisitsisut Peqatigiiffiat aamma tusarniaaffigineqarsimanngitsut.
Qularutissaanngilluinnarpoq immikkoortut
18, 19 aamma 20 imminnut atasut, isumaqarpugullu inuiaqatigiit ataatsimut
isigalugit illersorneqarsinnaanngilluinnartoq uani pisimasut inatsisissatut
siunnersuut taama amigaateqartigisumik tusarniaassutigineqarsimammat.
Immikkoortoq 20 aningaasanut tunngassuteqarmat pisariaqartuusorinarpoq
ingerlateqqitamut 19-imut aappiussinnaasariaqaraluartoq. 17 aamma 18 atuisunut
tunngasuunerummata kinguartinneqarnissaat akuerisinnaavarput.
Taamaattumik Siumup Inatsisartut
Ineqarnermut Ataatsimiititaliaa isumaqatigaa immikkoortut pineqartut tullianik
ataatsimiinnissamut kinguartinneqassasut, taamatullu piivillutik arlaleriarlunilu
ujartorneqartartumut ineqarnerup iluani iluarsaaqqinnissamut, soorlu
siullermeerinninnermi iluarsaaqqinnissaq taasimagipput ilanngunneqarlutik.
Misissueqqinnerup kingorna Inatsisartut
Ineqarnermut Ataatsimiititaliaata paasivaa immikkoortumi 19-imi
eqqartorneqartut ilaat ingerlaqqissinnaasut, taamaattumik immikkoortoq taanna
matumuuna sammissavarput.
Siumup tungaaninngaanniit
nuannaarutigaarput malugalugu siullermeerinninnermi Inatsisartut Ineqarnermut
Ataatsimiititaliaata oqaaseqaatigut malissimammagit. Nammineerlunili
illuliortarnermut tunngatillugu ataatsimik oqaluusereqqillaqusaqarpugut,
tassalu illoqarfinni nammineerluni illuliorsinnaanissat ammaanneqarnissaat
qanorlu akeqassasoq.
Nammineerluni illuliassat pilersinneqarput
piniartut inuusuttullu ilaqutariinngorlaat namminneq
illuliorsinnaanngorniassammata. Aallaqqaataani illup angissusia
aalajangersimasoq pineqarsimavoq kingornatigulli anagissutsit assigiinngitsut
pingasut periarfissanngorsimallutik. Siullermeerinninnermi Siumuminngaannit
siunnersuutigaarput sumiiffimmi siullermi nammineerluni illuliortoqassatillugu
håndværkerinit ilinniarsimasunit sanasoqartassasoq kingornatigut nammineerlutik
illuliortussat nalornisaqalerunik sanariikkanik malitassaqarsinnaaniassammata,
tamannali maani aappassaaneerinninnermut Inatsisartut Ineqarnermut
Ataatsimiititaliaata isumaliutissiissutaani ilanngunneqarsimanngilaq, kisianni
Inatsisartut Ineqarnermut Ataatsimiititaliaani pingajussaaneerinninnginnermi
Siumumit eqqaaneqaqqissaaq.
Siumumit qularnartuutipparput piffissap
matumap eqqortuunera nammineerluni illoqarfinni illuliornerup eqqunnissaanut
nunaqarfinni avinngarusimasunilu atuutsitaasut malillugit - nammineerluni
illuliortitsisinnaanerminngaanniit ilaatigut inissiap pitsaassusissaa
eqqarsaatigalugu - aammalu inuiaqatigiinni aningaasarsiorneq eqqarsaatigalugu.
Nammineerluni illuliortumut ataatsimut 20. aamma 30.000 kr.-inik akilik
pisortanut 400. aamma 600.000 kr.-inik naleqarpoq. Illoqarfinnilu nammineerluni
illuliortiternissamut ammaassiniassagaanni aningaasaqarnermut inatsimmi
aningaasartuutissanik immikkoortitsineqanngitsumik inunnik illaruaatissanngortitsinerussaaq.
Taamaattumik Inatsisartut
ataatsimiititaliaanut 5%-imik aalajangersagartaa oqaluusereqqillaquarput.
Illulioriaatsit suut atorneqassanersut
naneqqaartariaqassavagut, pisortanit aningaasartuutit attartortitassanik
inissialiornermi aammalu nammineerluni illuliornermut aningaasartuutit
sanilliullugit assigiinngissutaat annertoorujussuunngimmat. Suna piumavarput?
Tassani apeqqutaavoq innuttaasut suna kissaatigineraat aammalu suna
akissaqarfigigipput, peqqinnissaqarnerup tungaanut illuliat assigiinngitsut
qanoq issanersut. Ineqarnermut Naalakkersuisoq ataatsimoortumik
inissaqarniarnermut iluarsaaqqinnissamut tunngasumik - sapinngisamik erniinnaq
piviusunngorteqqullugu inassutigisatsinnut - illulioriaatsinut
assigiinngitsunut aningaasartuutissanut naatsorsuutinik saqqummiisariaqarpoq
illoqarfinnut tunngasuinnaanngitsunik aammali illoqarfinnut isorliunerusunut
tunngasunik.
Taamatut oqaaseqarluta aammalu
siullermeerinermi oqaatsigut innersuutigalugit inassutigaarput siunnersuut
pingajussaaneerneqannginnermini ataatsimiititaliami suliarineqassasoq,
qilanaaralugulu Ineqarnermut Naalakkersuisup paasissutissatut ujartorneqartut
Inatsisartut ataatsimiititaliaannut sapinngisamik erniinnaq nassiukkumaarai.
Qujanaq.
Jakob Sivertsen, Atassutip oqaaseqartua:
Siullermik oqaatigissavarput Ineqarnermut
Ataatsimiititaliami inissialiornermut tapiissuteqartarneq pillugu Inatsisartut
peqqussutaata allanngortinneqarneranik Inatsisartut peqqussutissaannut siunnersuut
Atassummiit tamakkiisumik peqataaffigigatsigu.
Aamma isumaliutissiissut
saqqummiunneqartoq pillugu partiinit arlaannaanulluunniit akerliusumik
isumaqartoqanngilaq.
Aamma siullermeerneqarnerani
peqqussutissap siunnersuut tamakkiisumik oqaaseqarfigisimavarput, taamaattumik
oqaaserisagut nangeqqissanngilagut, taamaallaat marluk immikkut
erseqqissaaffigissavagut.
Tassa nammineerluni illuliortarneq
nunaqarfinni pingaartumik avalliunerusuni atorluarneqartorujussuuvoq. Aammami
tunngavimmigut eqqunneqarneranut peqqutaavoq avalliunerusuni inissialiortiternikkut
periarfissat illoqarfinni allani naleqqiullugit pitsaannginnerunerat
peqqutigalugit. Taamaattumik Atassummit isumaqarpugut illoqarfinni
nammineerluni illuliorsinnaanerup eqqunneratigut nunaqarfinni nammineerluni
illuliortarneq arlaatigut ajoquserneqassanngitsoq.
BSU-mi aqqutigalugu illoqartitaaneq
ukiorpassuarni ingerlanneqarpoq, aamma Inatsisartuni pingaartumik aamma
landsrådimi Inatsisartuni aaqqiiniutissat arlaleriarlutik sammineqartarsimapput.
Matumani Atassummit
nuannaarutigissavarput, qangalili eqqartorneqartartut kiisami maannakkut
aaqqinniarlugit suliniutit aallartinneqarsimammata.
Kiisalu aamma Atassummit assut
ajuusaarutigisarparput nunaqarfinni nammineerluni illuliat inerneqanngitsut
takullugit, taamaattumik Atassummit kaammattuutigissavarput nammineerluni
illuliornermi aningaasat immikkoortinneqartartut ilai 20.000 kr.-it
nakkutilliinermut atorneqartussat ullumikkut nunarput tamaat ataatsimut
eqqarsaatigalugu naammaginartumik atortinneqanngitsut Ineqarnermut
Naalakkersuisumiit aaqqinniaqqullugit Atassummit kissaatigigatsigit. Taakku
eqqortumik nakkutilliisoqarnermut aaqqinneqanngippata, taamaalilluni aamma
nammineerluni illuliat taama aningaasanik naleqartigisut ukiuni aggersuni
naammaginartumik naammassineqartarnissaat anguneqarsinnaanngimmat.
Taamatut naatsumik oqaaseqarluta
isumaliutissiissut ataatsimiititaliami suleqataaffigisimagatsigu kiisalu
siullermeerinninnermi oqaaserisagut nangeqqinnagit taamatut naatsumik
oqaaseqarluta isumaliutissiissut akuersaarlugu oqaaseqarfigaarput.
Malînánguaq Marcussen-Mølgaard, Inuit Ataqatigiit oqaaseqartuat:
Tassa siullermeerinninnerup kingorna Inuit
Ataqatigiinninngaanniit immikkut uani siuliani aamma kinguartinneqartut
eqqarsaatigalugit annertuumik ineqartunut attuisussaammata kissaatigisimavarput
Ineqartut Peqatigiiffiisa Kattuffiat aamma KANUKOKA attorneqartussaammat
tusarniartariaqaripput, qujanartumik ataatsimiititaliami tamanna isumaqatigiissutigineqarsimavoq,
kisianni tassa piffissaq kingulleq ajoraluartumik paasisimavarput, soorlu aamma
Siumup oqaluttuata oqaatigigaa, KANUKOKA ullunik marluinnarnik
periarfissinneqarsimavoq. Taavalu Ineqarnermut Naalakkersuisup nassuiaanermini
oqaatigivaa, Ineqartut Peqatigiiffiata Kattuffiat aamma augustip naalernerani
tusarniarneqarsimasoq, kisianni tassa taakku siulittaasuata aammalu pisortaata
qanimut ornilluta nassuiaateqarfigivaatigut ajuusaarlutik '-i ataaserluunniit takusimannginnamikku.
Taamaattumik suliap torersumik
ingerlanissaa aamma uagut Ineqarnermut Ataatsimiititaliami torersumik
sulinissarput pingaartissimagatsigu taamaattumik soorunami
ajuusaarnaraluartumik kinguartitsisariaqarnerup pisariaqarsimanera matumuuna
kissaatigisarput malillugu ingerlanneqarmat qujassutigissavarput.
Taava una immikkoortoq boligstøttimut
tunngasoq oqaaseqarfigissavarput.
Ukiuni makkunani boligstøtte aqqutigalugu
illuutillit akiligassarpassuaqalersimaneri oqallisaajuarpoq. Tamannalu pillugu
Naalakkersuisut siunnersuuteqarput manna tikillugu akiligassanngorsimasut
nutaamik nalilerneqassasut.
Tamannalumi pisimasoq Inuit
Ataqatigiinniit maluginiarparput, akiligassallillu akiligassaminnik
isumakkeerneqanngikkaluartik akiligassamik illuminnut atatillugu attartukkaminnut
ilanngunneqaannarnissaannik maanna periarfissiuunneqartussanngorput.
Ukiuni kingulliunerusuni Inuit
Ataqatigiinniit boligstøtte aqqutigalugu illuutillit erniat qaffasippallaarujussuarnerannik
oqariartuuteqartarnerat oqaatigiuarsimavarput. Matumanilu aamma erniat %-ii
appartinniarneqanngitsoq maluginiarparput. Tamannalu ajuusaarnarpoq, tassami
taamatut illuutillit naatsorsuisimanerat malillugu ukiut 33-t akilersuinermi
illut marluk nalingi akilerneqartartut oqaatigineqartarmat.
Matumanilu Inuit Ataqatigiinniit
oqaaserisatsinni siunnersuutigisimagaluarparput, taakku 6%-it ilaasa illumut
namminermut nakkartussanngorlugit toqqorterneqarnissaat. Tassami ilisimaneqartoq
unaavoq illut qanorluunniit paarilluarneqartigigaluaraangamik aserfallatsaalinissaat
ilaatigullu ukiut ingerlanerini oqorsaqqinnissaat pisariaqartarmat.
Ilumullimi aningaasat taakku, illu
kingusinnerusukkut suliassanngorpat nutaamik attartoqqqaajusaarani
suliarineranut atorsinnaanerani periarfissiuunneqarsinnaagaluarpat aserfallatsaalinermut
aningaasarpassuit ujartortuarnissaat pisariaqassanngikkaluarpoq. Maannami
ingammik utoqqaat ukiorpassuarni illuminni akilersorsimasaminni
iluarsaassititsinissamulluunniit akissaqarneq ajorput, kommunillu
akissaqassusaat qiviaraanni ikiorserneqarsinnaannerat killeqartaqaluni.
Ilaatigullumi aamma
forsikringeqarsimagaluarlutik annertuumik akimmisaartinneqartarlutik.
Taamaattumik taakku qanoq iliuuseqarfiginissaat Inuit Ataqatigiinniit
pingaartutut isigaagut.
Pillaammik erniaritinneqartartut
peerneqarnissaat isumaqatigiissutaammat nuannaarutigaarputtaaq,
ilisimaneqassaarli akiligassanik akiliinngitsooraanni inissiani allani
attartortutulli akiligassat qaavitigut akiligassat aalajangersimasumik
ilaneqartassammata. Taamaattumik illuutilinnut pingaaruteqarluinnartoq unaavoq
assigiinngitsunik peqquteqarluni akiliisinnaanngikkaanni
piffissaangallartillugu A/S Inimut isumaqatigiissuteqartarnissaq, akiligassat
taakku qanoq ilillugit akilerniarnerlugit.
Nammineerluni illuliaasartut illoqarfinni
nunaqarfinnisulli sananeqarsinnaanerinik periarfissarsiuussineq Inuit
Ataqatigiinniit isumaqatigisimavarput. Matumanili kissaatiginartoq unaavoq
taakku pillugit illoqarfinni ersarissunik maleruagassiornissaq, ingammik
aarlerinarsinnaammat ukiuni makkuni illoqarfinni annerni inissaaleqiffioqisuni
illulioriarluni akisunaarlugit attartortitsisinnaanerit.
Taamaattumik Inuit Ataqatigiinniit taakku
malittaannik immikkut ittunik ileqqoreqqusaliornissaq pisariaqartutut
isigaarput, pingaartilluinnarlugulu nunaqarfimmiut illuliassaminnik
piiaaffigineqannginnissaat.
Taamatut oqaaseqarluta Inuit
Ataqatigiinniit erseqqissassavarput boligstøtte aqqutigalugit
illuliarineqartartut pillugit allannguiniarneq una alloriarnertut siullertut
isigigatsigu, siunissamili nutaamik eqqarsartuarnissaq pisariaqarmat, matuma
kingorna oqaasereriikkagut malersoqqikkumaarigut ilimasaarutigeriissavarput.
Inuit Ataqatigiinniit
kaammattuutigissavarput manna iluatsillugu boligstøtte aqqutigalugu illuutillit
illoqarfikkaartumik peqatigiiffiliortiternissaat, taamaalillutik pisortanut
kissaateqaatiminnik tusarniarneqarnerunissaminnut
periarfissaqarnerulissammata.
Anthon Frederiksen, Kattusseqatigiit:
Suliap siullermeerneqarnerani
Kattusseqatigiinniit oqaaseqaatikka innersuussutigalugit, siullermik
nuannaarutigaara saqqummiunneqartut tunngavigalugit boligstøttimi
taarsigassarsiat, taarsigassarsianut ernialiunneqartartut, tassalu 6%-iusoq
4,2%-imut appartinneqartussanngormat.
Tassami naluneqanngitsutut
siusinnerusukkulli ineqarnermut akiligassat aamma boligstøttimi ineqarnermut
tunngatillugu saqqummiunneqartartut annertuallaarujussuarneri pissutigalugit
ilaatigut Kattusseqatigiit tungaanniit oqaatigiuartarsimavarput
akiliisinnaassuseq ineqarnermut tunngatillugu aaqqissuunneqartariaqartoq,
kiisalu pillaammik ernialiunneqartartut atorunnaarsinneqartariaqartut,
tamannalumi aamma paasivara piviusunngortinneqassasoq. Taamaattumik
nuannaarutigaara minnerunngitsumik pillaammik erniat atorunnaarsinneqarnissaat
aamma ilanngullugu saqqummiunneqarmat.
Nammineerluni illuliortarnermut
tunngatillugu paasivara Ineqarnermut Ataatsimiititaliap inassutigigaa
ullumikkut periuseq, tassa nunaqarfinni isorliunerusunilu periuseq attatiinnarneqassasoq.
Kisiannili suliap siullermeerneqarnerani
Kattusseqatigiit sinnerlugit oqaaseqaatikka, neriuppunga ilanngullugit aamma
ataatsimiititaliami eqqartorneqarsimassasut, tassa inissaaleqineq nunaqavissut
akornanni siullillugu aaqqiiffiginiartariaqartoq, taamatut nammineerluni
illuliortarnermi atornerluisoqannginnissaa qulakkeerniarlugu.
Kiisalu boligstøtte aqqutigalugu
illutaarsimasut aammalu illumik iluarsaateqqinnissaannik
iluarsaatseqqinnissaannut periarfissaqalertussat, taakkua ilanngullugit
qutsattariaqarpagut aamma tassani pineqarmat boligstøtte aqqutigalugu illullit
illuminnik akilereersimagaluartut periarfissaqartussaammata
iluarsaassinissamut, aaqqissuussinissamut atorniaqqissinnaanissaminnik.
Eqqaanngitsoorusunngilaralu aamma
boligstøtte aqqutigalugu illutaarsimasut, pingaartumik 1960-ikkunni immaqalu
siusinnerusumi illut tankilersorneqartarnerannut tunngatillugu, taakkua
ilaatigut ajornartorsiutigilersimammassuk, soorlu assersuutigalugu imermut
tankip illup sananeqarnerani taamanikkulli atuuttut naapertorlugit
taarserneqarnissaa ajornakusoortinneqartalersimammat, tassa assersuutitut
oqaatigineqarsinnaavoq tanki 300 literimik imaqarsinnaasoq, maannakkut
peqqussutit imaluunniit maleruagassat malillugit 1000
literiusariaqalersimaneranik piumasaqaatit pissutigalugit ilaatigut
ajornartorsiortitsilersimammat illumik aaqqeerujussuaqqaarluni
aningaasartuuteqaqqaarluni aatsaat iluarsaassisoqalersinnaanera atulersimammat.
Kiisalu eqqaanngitsoortariaqanngilaq aamma
ullumikkut ajornartorsiut, tassalu sillimmasiisarnermut tunngasoq nunatsinnut
naleqqussarneqartariaqarmat, tassa ilaatigut oqartoqarsinnaammat
sillimmasiisarnermut tunngatillugu danskit pissusai maliinnangajallugit
boligstøttimi illutaarniaraanni sillimmatit qaffasissorujussuarmik
inissinneqartarmata, uffa massa immaqa ikuallattoornissamik sillimmateqaraanni
naammakkaluartoq.
Taamatut naakkaluartumik oqaaseqarlunga
aammalu illutaarsimasut illutaartussallu oqilisaanneqarnissaat ataatsimut
isigalugu isumaqataaffigigakkit nalunaarutigissavara.
Daniel Skifte, Aningaasaqarnermut Ineqarnermullu
Naalakkersuisoq:
Siullermik partiit Kattusseqatigiillu
oqaasiinut qujavunga.
Ingerlaannaasartumik partiit ataasiakkaat
oqaaseqaataat oqaaseqarfigissavakka.
Siullermik Siumup oqaaseqaammini
immikkoortoq ullumikkut eqqartugarput immikkoortoq 19, tassani kaputartuuppaa
17, 18, 19 20-lu, taamaattumillu aallaqqaataaninngaanniit assigiinngitsut
qaffatsitai, ilaatigut maannakkut Inatsisartuni eqqartorneqareersut, taakkua
uterfiginianngilakka isumaqarlunga taakkua pereeratsigit annertunerusumik
oqaaseqarfigisariaqarnagit eqqortoreerpagut.
Kisianni malugeqqussavara maluginiarlugulu
oqaaseqaammini Siumup ilaatigut eqqaammagit, nammineerluni illuliat allaat
qularnartutut apeqquserlugit illoqarfinni taamatut itsillugit atorneqarnissaat
tunuarsimaarfigalugu, taannami qupperneq 3-mi erseqqissumik allassimavaat,
taanna paasiuminaatsilaarlugu oqaatigissavara, tassami siullermik
oqaaseqarnerminni siullermeerneqarmat, tassa 23. septemberip ilaatigut oqaatigaat
apeqqut taanna pillugu nammineerluni illulianut tunngasut Siumup
tungaaninngaanniit ingerlariaqqinnissaa taanna taperserlugu, kisianni paatsuunganinnut
peqqutaasut anginerpaartaraat illoqarfinni atorneqassagunik nunaqarfinninngaanniit
suli pitsaanerusariaqarneri qaffatsinneqarmata, imaappoq tassa taanna
assigiinngisitsineq. Taamatut nipeqarnera 23. septemberimi qupperneq 4-miippoq,
kisianni allat naaperiarfiit soorlu 5%-imik akiliisarneq Ineqarnermut
Ataatsimiititaliap saqqummiussaa taanna Siumup qularnaatsumik oqaaseqarfigaa.
Aamma Siumumut tunngatiinnarnagu
partiinilli aamma allanit taaneqarmat erseqqissaatigilaarusuppara una
pingaartorujussuaq, pingaartumik nipituumik annertuumillu isorisatut
oqaatigineqarmat. Isorinninneq uanga isorissanngilara, kisianni una
immikkoortitsisinnaanissaq tunngavigalugu oqaatigerusuppara, soorlu
siusinnerusukkut oqaaseqareerninni oqaatigiga KANUKOKA tusarniarneqarsimavoq
aamma akissuteqarsimavoq, akissutit taakku pigaagut. Piffissaq sivikitsoq
qaangeraluarlugu tamatuma kingorna akissuteqarpoq, taakkua akissutit
saqqummiupput.
Taavalu aana aamma maluginiagassaq,
qularnaanngitsumik oqaatigisinnaasoraara oqassaguma, aningaasaliisussat tassungalu
attuumassuteqartut tusarniaaffigineqarmata, boligstøttimik illuliorneq
tassaavoq Namminersornerullutik Oqartussat 100%-imik akilertagaat. Taamaattumik
akiliisussaq tusarniarneqartarpoq, aamma taamaappoq IPK-mut tunngatillugu, IPK
tassaavoq Ineqartut Kattuffiat naliginnaasumik inissiat assigiinngitsut
attartortinneqartarnerannut peqatigiiffik. Taakkua aningaasaleeqataaneq
ajorput boligstøttinut imaluunniit inissialianut, taamaattumik
nunatsinniinnaanngitsoq aamma nunani allani periaaseq taanna atorneqartarpoq.
Aningaasaleeqataassagunik sumiittulluunniit peqatigiiffiit taava
tusarniarneqassapput, kisiannili aningaasaliisoq Namminersornerullutik
Oqartussaaguni kommuniniluunniit taava aningaasaliisut aqqutissani
aqqutigalugit tusarniaasarmat, taamatut ingerlanneqarsimavoq ukiorparujussuarni
boligstøttilli aallarteqqaarnerani, taanna erseqqissaatigaara isumaqarlunga
taanna assigiinngissuteqartorujussuusoq, aammalu taassumap saniatigut
oqaqqissaanga IPK tusarniarneqarami aalajangersimasumik oqaaseqarmat, taakkua
oqaaseqaataat naatsunnguaq pigineqarpoq takutinneqarsinnaallunilu.
Taamatut ataatsimut oqariarlunga taava
Inuit Ataqatigiit oqaaseqarfigilaassavakka. Tassa Inuit Ataqatigiit oqarput,
suliap ingerlaqqinnissaa kissaatigigaat ukuli allat siusinnerusukkut periikkagut
kinguartinneqassammata taanna kaammattuutigigaat, taanna ilumoorpoq.
Tusarniaaneq eqqartoreerpara, kinguartitat arlaliupput.
Kisiannili boligstøttimut tunngasumik
oqaatsit imatut oqaatigisariaqassavakka, boligstøttimik aaqqiiniarnermi
taamaattumik Naalakkersuisut kissaatigaat inatsisiliaq nutaaq immikkoortoq 20,
maannakkorpiaq piffissaq una uagut qanoq ilioriarsinnaanngisatsinnik
kinguartinneqarallartoq kingullerpaanngorlugu oqaluuserisassanngorlugu.
Taassumap ilagaa boligstøttimi illuliat aamma nutarternissaannut,
oqorsarnissaannut alliallatsinnissaannut allanullu periarfissaq nutaaq,
kisianni taanna eqqartugassaq immikkoortoq 20-miippoq maannakkut
kinguartinneqarallartoq, suli tikinngisarput. Taanna uagut qanoq ilioriuseqarfigisinnaanngisimanngilarput
ataatsimiinnerup aaqqissuussaanera ataqqisara peqqutigalugu. Taamaattumik
taanna naatsorsuutigaara tikeqqissasoq, boligstøttimut tunngasoq taamatut
akissuteqarfigaara immikkoortoq 20-mi aamma tikinneqarsinnaassammat.
Atassummut tunngatillugu malugaara Atassut
tamakkiisumik tapersiisoq aammali namminerisamik illuliat inerneqanngitsut
aaqqeqqullugit kaammattuinera, isumaqarpunga aamma tusaatissatut
tigusariaqarlugu, qanoq iliuuseqarniarpugut taanna piffissami allami
eqqartorsimavara, neriorsuutigisariaqarpagut tamakkua pitsaanerusumik
aaqqissuutissallugit asuli inerneqaratik uninngaannartut ilai imaluunniit
piaarnerusumik inerneqarsinnaagaluit ilai maaniinnarmiittut
amerlavallaaqimmata, tassa 1990-ikkut aallartilaarneraninngaanniit
ullumikkumut. Assersuutigalugu 1993-imi illuliat ilai immaqa
ukiorpaalorujussuarni atorneqaraluartut ilumut atorneqarnersut atornissaannut
uppernarsaammik suli naammassisaqanngi.....???
Tassani aaqqiniartoqartariaqarpoq
Naalakkersuisut, kommunit aammalu maannakkut INI A/S suleqatigalugu, taanna
neriorsuutigalugulu isumaqarpunga naammassiniarnissaa pingaartittariaqartoq.
Kattusseqatigiit, maluginiarpara
pillaammik ernialiisarnerup maannakkut peerneqarnera, soorlu li aamma partiit
allat, soorlu Siumukkut allallu Atassutikkullu taanna iluarimmassuk, taanna
uaguttaaq nuannaarutigaarput. Namminerisamut illuliat illoqarfimmisulli
piumasaqaateqarfiginerat Kattusseqatigiit iluarisimaarpaat, taanna aamma
maluginiarpara. Boligstøttimut tunngasut aatsaannguaq eqqartoreerakkit
annerusumik eqqartoqqissanngilakka immikkoortoq 20-mi tikinneqaqqissinnaapput.
Kisianni maannakkut nikuiinnarlunga 300
literit 1000 literillu imermik immertarneqartut assigiinngitsut taamaattut
oqaatigisinnaanngilakka nikuiinnarlunga, taamaattumik maannakkorpiaq taanna
oqaaseqarfigissanngilara.
Partiit oqaaseqartuinut qujavunga.
Bjarne Kreutzmann, Siumup oqaaseqartua:
Sivitsorsaanianngilanga, kisianniuna
taaneqartut marlussuit oqaaseqarfigilaaginnarniarikka.
Siullermik Naalakkersuisoq qutsavigaara
oqaaseqaataanut, oqaatsitsinnullu tunngasut pillugit.
Aappassaanik Atassumminngaanniit
oqaatigineqartoq nuannerpallaaqimmat aamma taaginnarusullugu, tassa
nammineerluni illuliat inerneqanngitsut taamaatiinnarneqartartut amerlasuut,
taakkua aamma Siumuminngaanniit arajutsisimannginnatsigit.
Taamaattumillu siullermeerinninnermi
siunnersuutigisarput maani aappassaaneerinninnermi eqqaasitsissutigalugu
ujartorlugulu taassuma aamma ilaanissaa Siumumi ataatsimiititaliami ilaatitatsinni
uterfigeqqinneqartussaq, tassa sumiiffinni aatsaat siullermeerluni
nammineerluni illulianik sanaffiusuni håndværkerinik paasisimasaqarluartunik
sananeqartarnissaa, taanna siunnersuutigigatsigu taamaalilluni nammineerluni
illuliortussat tullii nalornissuteqaratik takusassaqarlutillu aamma
pisinnaaniassammata, tassani taamatut unitsinneqaannartartut
assigiinngitsorpassuit nalunngisagut pissutigalugit. Isumaqaratta taamaalilluni
taanna kusanartumik naammassineqarsinnaagaluartoq.
Akiliisinnaanngitsunut tunngatillugu aamma
oqaqqikkusunnarpoq, tassa tassani akiligassallit aammalu qitiusumik allaffiusup
uani immaqa INI A/S-imik taalluaannaraanni assigaa, taakkua imminnut ataqatigiinnissaat
pisariaqarluinnartoq aamma taareernikuuarput, tassami akiliisinnaanngikkaanni
sunalu pissutaasoq atuisuminngaanniit qitiusumut allaffimmut nalunaarutigisariaqarpoq.
Paarlattuanillu qitiusumik allaffik saaffiginnittunut ataqqinninnerusariaqarpoq,
ilarpassuisigut paasinartarmat akiligassallit nammineq soqutigisatsaannerminik
pissuteqartumik akiligassani amerlisitsoorsimappagit akiligassallip taassuma
kisimi pisuussutigisanngikkaa paasinartarmat, tassani aamma qitiusumik
allaffeqarfik pisooqataasartoq ilisimaneqarmat.
Tassami oqartarput aamma ilaat angut
nujaqanngitsorooq nujaajarneqarsinnaanngilaq, tassa aningaasaateqanngitsoq
aningaasaajarneqarsinnaanngilaq, taamaattumik qitiusumik allaffiup
akiligassallillu imminnut attaveqatigiinnerat pingaartorujussuuvoq, aamma
illuatungaaninngaanniit akiligassallip saaffiginninneranut ataqqinninnissaq
pingaartuuvoq assut.
IPK KANUKOKA-lu taakkua taaneqartut
oqaaseqarfigineqarput Naalakkersuisuminngaanniit tusarneqarsimasut, kisianni
tassa ataatsimiititaliami uagut soorlu Inuit Ataqatigiinniit Malînánguaq
Marcussen-Mølgaardimiit taaneqartoq aamma, taakkua tassa IPK aamma KANUKOKA
tikillugit oqaloqatigisimavagut, taakkualu oqaatigisaat tunngavigalugit
oqaaseqarnigut oqaaseqarnitsinnut aallaqqaataasut tunngavigaarput.
Malînánguaq Marcussen-Mølgaard, Inuit Ataqatigiit:
Uani oqaaseqartoq oqaatigisaanut una
oqaatigerusullugu, tassa ilaatigut aamma uagut apeqqusiinitsinni taanna
nammineerluni illuliaasartut illoqarfinni sananeqartarsinnaaneranut tunngasoq,
aap akuerisimavarput, kisianni taakkununnga maleruagassat ersarinnerusut aamma
takussutissaalernissaat aamma isumaqarpunga pisariaqartoq.
Tassa aamma maluginiakkatta ilagivaat
Siumuminngaanniit oqaaseqartup taanna tikkuarsimagaa, ilaatigut Inatsisartut
ataatsimiititaliaani 5%-imik aalajangersagartaa oqaluusereqqeqquaat taavalu
aamma illulioriaatsit suut atorneqassanersut naneqqaartariaqassagigut
oqaatigineqarluni, pisortani aningaasartuutit attartortitassani
inissialiornermi aammalu nammineerluni illuliornermi aningaasartuutit
sanillillugit assigiinngissutaat annertoorujussuunngimmanngooq, taava tassa
suna piumavarput. Ilaatigut uani eqqarsarnartoqartissimavarput aammalu
oqaluuserisimallugu ilumut taamatut illuliortitsinerni illuliat 5%-iinnarmik
tigutsiseqarluni sanasinnaaneranut tunngatillugu aalajangiisimaneq taamanikkut
Inatsisartuni uagut siulitsinni, taama annikitsigisumik tigutsiseqarnissamut
tunngaviusut eqqaasagut malillugit nunaqarfimmiut illoqarfimmiutulli
aningaasanik isertitaqarsinnaanerat killeqarnerujussuummat. Taamaattumik
5%-iinnarmik tigutsiseqarnissaat tassani immikkut
akuersissutigineqarnikuusimavoq. Kisianni uani taamatut akuersiniarnitsinni -
taamatut iliornissami - pisariaqartut tassaapput, aalajangersakkat ersarissut soorlu uagut tungitsinninngaanniit
oqareernitsituut atornerluinnginnissaq illoqarfinni, soorlu maani Nuummi
inissaaleqqiffioqisumi taamattunik illuliorniaraanni qaammammut immaqa ilaasa
allaat 24.000 kr.-ilerlugit attartortittalersimagaat tusaamagatsigit.
Atornerluinnginnissaq isumaqarpunga
tamatumani isumannaartariaqartoq, aammalu uani naggasiullugu
oqaatigiinnassavara IPK aningaasaleeqataaneq ajortutut oqaatigineqarmat, aap
illuliornermi aningaasaleeqataaneq ajorpoq, kisianni illuliat akilertarpaat
ukiorpassuarni najugarinermikkut akilersuiuartaramik, ilaatigut immaqa akia
qaangerujussuarlugu akilersuisarsimapput. Taamaattumik pisariaqarluinnarpoq
sutigut tamatigut atuisut tusarniartuarnissaa.
Hans Enoksen, ataatsimiititaliap siulittaasua:
Uani isumaliutissiissummi malunnarpoq isumaqatigiilluartut aamma akerleriittoqanngilaq, kisiannili nammineerluni illuliortarneq taanna uteqqiaffigineqarmat, erseqqissaatigilaarniarpara INI A/S-ip siulersuisui maani ataatsimiimmata, taava uanga Ineqarnermut Ataatsimiititaliami siulittaasutut sinniisoqarfimmi ilaasortaanikkut aamma taakku annertuumik eqqartorpagut, tassalu illuliat inerneqanngitsut ullumikkornit sakkortunerusumik nakkutigineqarnissaat aamma INI-p namminneerluni sulissutigilereernikuummagu, taamaammat ernumanartoqanngilaq suliaq aallartinneqareermat.
Aammalu nammineerluni illuliat illoqarfinni soorlu maani atorneqarsinnaanerat uanga pitsaasutut isigivara, tassami aamma illoqarfimmiorpassuit ilaatigut oqitsuinnaanngitsumik inuuniarsaripput, pingaartumik inuusuttut, ineqarnermut akiliutit annertoqisut akilertarpaat allamut aallarteriarnissaminnut ilaatigut periarfissaarutiivittarlutik, taakku uanga iluatinnartutut isigaakka inuusuttut eqqarsaatigalugit.
Akerleriittoqanngimmat taama naatsunnguamik oqaaseqarlunga qujassutigivara ataatsimiititaliaq isumaqatigiissup isumaliutissiissutaa maani akuersaarneqarmat, taamatullu isikkoqarluni pingajussaaneerneqarnissaa innersuussutigissallugu.
Daniel Skifte, Aningaasaqarnermut Ineqarnermullu Naalakkersuisoq:
Naatsunnguussaaq, tassaana una erseqqissarniaannarlugu illoqarfinni nammineerluni illuliortarneq eqqunneqarnissaa Inatsisartut siusinnerusukkulli tunngaviatigut tamarmik isumaqatigaat, taavalu taanna aallaavigalugu Naalakkersuisut suligamik oqarput, nunaqarfinni 5%-i atuuttoq illoqarfinni periarfissaginnerusuni 10%-iusariaqartoq. Taannalu siunnersuutigigatsigut taava Ineqarnermut Ataatsimiititaliap ilaatigut Malînánguaq Marcussen-Mølgaardip nalornerpasissappagu eqqaasitsissutigiinnassavara, tassa Naalakkersuisut siunnersuutigigaluarpaat 10%-iussasoq, kisiannili aamma ullumikkut oqaaseqarninni oqarpunga, Ineqarnermut Ataatsimiititaliap suliaa ataqqillugu siunnersuutaa 5%-iunissaa Naalakkersuisut inooqataaffigisinnaavaat.
Taamaattuminguna erseqqissumik paasilluanngikkiga nalornisoqarnersoq, nalornisoqanngilaq uagutsinniit, 10%-imik eqqartuineq taamaattumik paasilluanngilara, taanna aallaqqaataanili siunnerfiugaluarmat. Kisiannili Ineqarnermut Ataatsimiititaliaq oqarpoq 5%-iussaaq assigiinngisitsineqarani, tassalu taanna periaaseq uagut ataqqiumavarput.
Anders Andreassen, Inatsisartut Siulittaasuat:
Taavalu maannakkut taasinialissaagut, tassa taasissutigissavarput Ineqarnermut Ataatsimiititaliap isumaliutissiissutaatut iluseqarluni pingajussaaneernissaanut akuersisut nikueqqussavakka: 30, tassa isersimasut tamarmik. Akerliusoqaranilu taasinngitsoortoqanngilaq, taamaalilluni immikkoortoq 19 pingajussaaneernissaminut ingerlaqqissinnaanngorpoq.