Oqaluuserisassani immikkoortoq 19-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Finn Karlsen, Siulittaasoqarfimmi ilaasortaq.
Daniel
Skifte, Aningaasaqarnermut Ineqarnermullu Naalakkersuisoq:
Inissialiortiternermut
tapersiissuteqartarneq pillugu Inatsisartut peqqussutaata
allanngortinneqarneranik Inatsisartut peqqussutissaattut siunnersuut Naalakkersuisut
sinnerlugit saqqummiuppara.
Peqqussutissatut
siunnersuummik matuminnga saqqummiussineq 1997-imi ukiakkut ataatsimiinnermi
boligstøttimut tunngasut pillugit Naalakkersuisut nassuiaataannik
saqqummiussinermut atatillugu kaammattuutinik Inatsisartunit
saqqummiunneqartunik pissuteqarpoq.
Kisianni
aaqqissuussinerup tamatuma 1953-imeersup taamanimiillu arlaleriarujussuarluni
aaqqivigineqartarsimasup nutarterneqarnissaa ajornakusoortuusoq
paasinarsisimavoq. Malittarisassat atuuttut allanngortiterneqartuassappata
boligstøttimik aaqqissuussinerup massakkornit suli paasiuminaannerulernera
tamatuma kingunerisussaavaa. Ajornartorsiut taanna malittarisasat
nutarterneqarnissaannik kissaateqarnermut pissutaarpiarsimasut ilagaat.
Taamaattumik
malittarissani atuuttuni allanngortiteriuarnerup killilerneqarnissaa
Naalakkersuisut siunnersuutigaat. Taamaattumik malittarisassat massakkut
akiitsutigut ajornartorsiutaasunik aaqqeeqataasussat malittarisassallu
boligstøtti aqqutigalugu illuutillit boligstøttimut tapiissutinit
ajornannginnerusumik kaanngarsinnaalersitsisut suliarineqarnissaat
akuerineqarnissaallu siunnersuutigineqarpoq.
Taakku
saniatigut illuliortiternernut aningaasalersuineq pillugu Inatsisartut
peqqussutissaattut siunnersuut oqaluuserisassani immikkoortutut 20-tut
Naalakkersuisut saqqummiutereerpaat.
Illuliortiternernut
aningaasalersuineq pillugu malittarisassat nutaat taakku massakkut inissanik
pisariaqartitsinermut inuiaqatigiillu tunngavissarititaannut
naleqqussagaasussaapput.
Inissialiornermut
tapersiissuteqartarneq pillugu Inatsisartut peqqussutaata
allanngortinneqarneranik peqqussutissatut siunnersuut Naalakkersuisut matumuuna
saqqummiussaat boligstøtte aqqutigalugu taarsigassarsiatoqqat terminimullu akiligassat
akilerneqarsimanngitsut il.il. taarsigassarsianut nutaanut nuunneqarnissaannut
periarfissanik imaqarpoq. Tamatuma taarsigassarsianut taarsersorlugit
akilersorneqartunut akiitsut boligstøtte pillugu peqqussummi kapitali 4-mi
taarsigassarsisarnermut malittarisassat nalinginnaasut malillugit
taarsigassarsianngortinneqarsinnaalernerat kingunerissavaa.
Tamatumunnga
peqatigitillugu boligstøttimit taarsigassarsiani akiitsunut pillaammik
ernialiunneqartartut atorunnaarsinneqassasut siunnersuutigineqarpoq,
ineqarnermullu akiliutit pineqartarnerattut terminimut akiligassat
akilersinniarneqarnerannut atatillugu nukingisaarinermi akiliuteqartarnissaq
taanna atulersinneqassasoq siunnersuutigineqarluni.
Aammattaaq
peqqussutissatut siunnersuutip kinguneraa naatsorsuutit manna tikillugu
malittarisassat atuuttut malillugit boligstøtte aqqutigalugu illumik
tunniussinermut atatillugu suliarineqartartussat pillugit malittarisassat
allanngortinneqarnerat, tassa taarsigassarsiat tamakkerlugit akilerneqarnerini
aamma toqusoqarneranut atatillugu pigisanik agguaassinermi.
Siunnersuutigineqarpoq
boligstøtte aqqutigalugu illumik piginnittup illuni nalinginnaasumik
niueqatigiinnikkut allamut tunisinnaalissagaa, tassanilu aningaasaqarneq
eqqarsaatigalugu piginnittup nutaap Namminersornerullutik Oqartussanit
akuerineqarsinnaanera piumasaqaataassasoq, tunniussinermilu atugassarititaasut
Naalakkersuisunit aalajangersarneqartut malillugit tamanna pisassalluni.
Aammattaaq
siunnersuutigineqarpoq aningaasat nalingisa nikerarnerisigut iluanaarutaasartut
naatsorsorneqaratillu agguataarneqartassanngitsut boligstøttimit
taarsigassarsisup akiitsumi sinneri akilerumappagit, boligstøtte aqqutigalugu
illugisamini iliuuseqarsinnaanermut killilersuutaasunit kaanngarnissani
siunertaralugu.
Akiitsut
ajornartorsiutaanerannut akiitsullu piffissami sivisuumi taarsersugassatut
taarsigassarsianngortinneqarnissaannik siunnersuuteqarnermut tunuliaqutaasoq
pillugu immikkut ittunik oqaaseqaateqarnissaminnut Naalakkersuisut
pissutissaqarsoraat. 1997-ip naanerani bolistøttemut akiitsut tamarmiusut 99,9
mio. kr.-iupput, illunut 2.000-it missaanniittunut agguartaarsimasut. Tassani
erseqqereerpoq kinguartitsinerit naammassiniarnissaat illulluunniit taama
amerlatigisut utertinniarnissaat ajornavissussaallunilu
naleqquttuungilluinnassasoq.
Taamaattumik
peqqussutissatut siunnersuutip kingunerisaanik akiitsut piffissami sivisuumi
taarsigassarsianngortinneqarsinnaalernerannut periarfissaqalissaaq.
Taarsigassarsianut allanngortitanut tamakkununnga akilersuutit
taarsigassarsisup akiligassaraluitulli amerlatigigajuttartussaapput, kisianni
siunissami akiliutaasartussat immikkut
suliniuteqarfigineqartartussanngussapput, taamaalillutik siunissami akiitsut
pileqqinnaveersaartinneqarsinnaalissallutik. Ilaatigut taakku
qaammatikkuutaartumik akiliutinngortinneqartussaapput, ilaatigullu
taarsigassarsisup assersuutigalugu ineqarnermut tapiissutinik allatigullu
tapiissutaasinnaasunik qinnuteqaateqartinneqartarnissaa
suliniutigineqartalersussaalluni.
Siunissami
akiitsut aamma pilertarnissaat Naalakkersuisut nalunngilluinnarpaat, kisianni
ajornartorsiut ullumikkutut annertutigilernavianngilaq, tassa illut 2.000
missaasa akiitsoqarfigineqarnerattut. Siunissami akiitsut
pileriartorumaartussat ingerlaannaq suliarineqartartussanngussapput,
taamaalillutik akiitsut taarsigassarsisup akilii-sinnaassuseqarneranik
sippuisinnaajunnaarsinneqassallutik qaangigassaanngitsuu-saarunnaassallutillu.
Imaluunniit taamaaliorneq ima ilissaaq taamatut akiitsoqarneq sukkanerusumik alliartorani
kisianni (millisinneqarsinnaassalluni.)
Akiitsutigut
ajornartorsiutit nutaanik taarsigassarsisinikkut aatsaat
aaqqinneqarsinnaalerpata iluarsaassinissamut pitsanngoorsaanissamullu
atugassanik taarsigassarsiniartoqarsinnaalissaaq. Taarsigassarsiat taamaattut
siusinnerusukkut akuersissutigineqarsinnaasarsimanngillat taarsigassarsiaqartoq
akiitsoqalersimagaangat.
Peqqussutissatut
siunnersuut saqqummiunneqartoq Inatsisartunit akuerineqassappat suliassaq
annertoorujussuaq aallartinneqartussanngussaaq. Taarsigassarsinissamut
periarfissat nutaat pillugit paasisitsiniaasoqarnissaa Naalakkersuisut
takorloorpaat, ilaatigut quppersagaaraliortiternikkut, TV-kkut
aallakaatitassiaaqqatigut, aviisini allaaserisatigut il.il.. Aammattaaq A/S
Inissiaatileqatigiiffik INI boligstøttikkut aaqqissuussinermik aqutsisuusoq
taarsigassarsialinnut ikinnerpaamik 2.000-iusunut taarsigassarsiat
allanngortinneqarnerat pillugu atugassarititaasunik piumasaqaatinillu
ilitsersorneqartussanut attaveqarniartussaassaaq. Taamatuttaarlu
taarsigassarsiniarnerni tamani allakkiat uppernarsaataasut nutaat
suliarineqartariaqartus-saassallutik.
Pingaarnerpaatullu
siunissami piaarnerpaamik qisuariartoqartalissaaq, terminimut akiligassat
piffissaagallartillugu akilerneqarsimanngippata. Taarsigassarsiallit
akiitsullit taarsigassarsiat allanngortinneqarnerisigut nutaamik
periarfissinneqassapput. Taarsigassarsiallit siunissami ilisimasariaqarpaat
isumaginninnikkut tunniunneqartartunik pisinnaatitaaffeqarfigisaminnik
qinnuteqaateqartarnissaminnut eqqumasariaqaramik. Taakku nammineq aamma
ingerlaannavissumik qisuariaateqartariaqartassapput terminimut akiliutissatigut
ajornartorsiuteqarunik, taamaalilluni akilersuinissamut
isumaqatigiis-susiortoqartarsinnaaqqullugu. Akiitsoqalernarveersaarnissamut taakku
aamma suleqataasariaqarput. Taarsigassarsianik allanngortitsineq
ataasiaannarluni pisinnaasoq isumaqarpunga ajunngivissuuvoq.
Aammattaaq
Naalakkersuisut erseqqissarumavaat peqqussutissatut siunnersuutip
kingunerissammagu illoqarfinni anginerusuni nunaqarfinnut isorliunerusunullu
sanilliullutik inissiat pitsaaneruffiini nammineq illulianik sanaartornissamik
qinnuteqaateqarnissamut periarfissamik ammaassisoqarnera. Illoqarfinni
anginerusuni amerlanerpaani sanaartorfiit eqqarsaatigalugit toqqavilersuinermi,
imermut, innaallagissamut, kiassaatinut kuuffinnullu aqqusersuinermi
illoqarfiup iluani pilersaarusiaqarlunilu aalajangersagaqarpoq. Illup
atortorissaarusersor-neqarneranut il.il. kommunip piumasaqaataanut atatillugu
aningaasartuutit nammineerluni illuliortumit
aningaasartuutigineqartarnissaannik piumasaqaateqarneq siunnersuutip
kingunerissavaa.
Peqqussutissatut
siunnersuut malillugu illoqarfinni anginerusuni nammineerluni illulianut malittarisassat atuuttut malillugit taarsigassarsisitsisoqartassaaq,
tassalu 5%-it nammineq akiliutitut, 95%-illu atortussanut nammineerluni
illuliornermi atugassanut aningaasartuutinut uppernarsaasikkanut
taarsigassarsiaritinneqartussaallutik ernialersugaanatillu
taarsersugas-saanngitsut.
Nammineq
akiliutit 5%-iusut illoqarfinni anginerusuni ikippallaannginnersut aamma
amerlanerussanersut imaluunniit isertitaqqortussuseq tunngavigalugu
amerlassusilerneqar-tassanersut Naalakkersuisut isumaliutersuutigisimavaat.
Tamatumunnga atatillugu Inatsisartut tamakkununnga isumaat Naalakkersuisut
tusarusuppaat, apeqqutillu taassuma Ineqarnermut Ataatsimiititaliami
oqaluuserineqarnissaa siunnersuutigiumallugu.
Naalakkersuisut
sinnerlugit taamatut oqaaseqarlunga inissialiornermut tapersiissuteqartarneq pillugu
Inatsisartut peqqussutaata allanngortinneqarneranik Inatsisartut
peqqussutissaattut siunnersuut Inatsisartuni oqaluuserisassanngorlugu
saqqummiuppara, siunnersuutillu aappassaaneerneqannginnermini Inatsisartut
Ineqarnermut Ataatsimiititaliaanni oqaluuserineqarnissaa
siunnersuutigissallugu.
Bjarne
Kreutzmann, Siumut:
Inissialiornermut
tapersiissuteqartarneq pillugu Inatsisartut peqqussutaata
allanngor-tinneqarneranik Inatsisartut peqqussutissaannut siunnersuut pillugu
Siumumiit ima oqaaseqassaagut.
Siumumiit
ilumoorassavarput inatsit BSU-mut 1953-imeersoq
iluarsiissuteqarfigineqar-tarsimaqisoq paasiuminaallisimammat,
pitsaanerulissutiginngilaalu nunatsinni bekendtgørelsiliortoqarneq ajormat.
Boligstøtte-p
illuutaanik inissiat 2000-t katillutik 100 millioninik
akiligassaqarfigineqarmata tassa assigai ilaqutariit tamarmik immikkut 50.000
koruunit akilinngitsoorsimagaat. Amerlaqaat inuiaqatigiinni
akuerineqarsinnaanani akiligassaminnillu malinnaaniatuarsimasunut
suusupaginninnertut isikkoqarpoq inuit taamaattut qajassuunneqartarsimammata.
Tassami
inuiaqatigiit nutaajuvugut sungiutassagullu amerlaqaat ilaatigut illumut
imaluunniit inissiamut akiliutissat, kisianni assigiinngisitsineq
akiliisartunik akiliinerlu ajortunik innimiilliorneruvoq. Iluanngilarlu
akiliineq ajortut qanoq iliuuseqarfigineqarneq ajormata.
Kisianni
pingaaruteqarpoq immikkoortissallugit akiliiumanngitsut kiisalu arlaatigut
ajornartorsiuteqarnertik pissutigalugu akiliisinnaanngitsut.
Akiliiumanngitsut
sakkortuumik iliuuseqarfigineqartariaqarput, pineqaatissiinikkut aammattaarli
paasititsiniaanikkut, taamaalillutik paasiniassammassuk suut pisussaaffigigitik
suullu pisinnaatitaaffigigitik. Paasisitsiniaaneq A/S INI tamatumani
suliassersunngikkaluarlugu, alla sullivik taamaalioqqullugu
isumaqatiginiarneqarsinnaavoq.
Arlaatigut
ajornartorsiuteqarnertik pissutigalugu akiliisinnaanngitsut qajassuartumik
iliuuseqarfigineqassapput naafferartumillu akilersuinissaannut
isumaqatigiissutigineqarlutik. Aamma ilisimatinneqassapput suut
pisinnaatitaaffigineraat, suullu ineqarnermut tapiiffigineqartarnermut aamma
pisortanit ikiorsiiffigineqartarnermut tunngasut pillugit.
Maannakkut
pissusiviusut pillugit imaannaanngitsumik aaqqiisoqartariaqalermat
tupinnanngilaq, maannakkummi BSU-mut akiligassallit 2000-it anisitaagunik
sumiissappat? Siumumi isumaqarpugut (saligisoqartariaqartoq) nutaamik
aallartissinnaaniassagutta. Akiligassanut nutaamik atukkiinissamut
aaqqiiniarneq isumaavoq ajunngivissoq, kisianni eqqarsaatigisariaqarporli akiliutissat
qutsinnerulaarnissaat tassa siornatigut akiliinissaminnut
soqutigisaqarsimanngitsunut eqqarsaatigalugit soorlu aamma aningaaseriviit
qutsinnerulaartumik ernialiisarnerat pilersaarutit nalorninartortallit
aningaasaliiffiginiarneqaleraangata.
Siumumiit
erseqqissarusupparput, boligstøtte-p illuutaani imaluunniit inissiani pisortat
attartortittagaanni najugaqartunut paasisitsiniutigineqartariaqarmat suut
pisussaaffigigaat suullu pisinnaatitaaffigigaat. Inuiaqatigiiusugut
akornatsinni suut pisussaaffiunersut politikerit tungaaniit erseqqissumik
nalunaarnissarput pingaaruteqarluinnarpoq.
Pisinnaatitaaffeqaannanngilavut,
piumassuseqartuaannarneq qimattariaqalerparput inuiaqatigiittullu
akisussaaffigut paasilluarlugit.
Siumumiit
pingaartipparput illuatungeriit immikkut attaveqatigiinnissaat pingaartuusoq.
Ineqarnermut akiliutissaq imaluunniitterminimut akiligassaq
akilersinnaanngikkaanni taava akiligassaqarfiit attavigineqartariaqarput,
taamaalilluni oqaloqatigiinnikkut ajornartorsiutit qaangerneqarsinnaaqqullugu.
Taamatuttaaq aamma pingaartigaaq ineqarnermut akiligassamik imaluunniit
terminimut akiligassamik tigusaqarsimanngikkaanni akiligassalinnut
saaffiginninnissaq, taamaalilluni illunut 2000-inut ullumikkut BSU-mut akiligassaqartoqarnera
akuerineqarsinnaanngitsoq qaangerneqarsinnaaniassammat. Siumuminngaanniit aamma
isumaqataavugut terminimut akiliisarnerup qaammatikkuutaartumik akiliisarnermik
taarserneqarnissaanut, taamaalilluni akiliinissaq oqinnerulerniassammat.
Siumumiit
pingaartutut isigaarput, inuiaqatigiit pisussaaffimminnik ilumoorlutik
eqqortitsiuartartut kajumissaaserneqarnissaat, tassa terminimut
akiligassaminnik kinguaatsoorsimanngitsut. Taamaattumik siunnersuummi
aalajangersakkat uku tapersersorpagut, tassa inuit pineqartut illunut
oqartussaanermut killilersuutinik qaangiisinnaasut
taarsigassarsiareqqaarsimasanut akiligassat sinneruttut akilernerisigut, aamma
tunisaqanermi aningaasat nalingisa nikerarnerisigut iluanaarutaajunnaartut
tamaasa pigiinnarsinnaagaat, kiisalu aamma illut taakku kikkunnilluunniit
pisiarisassanngorlugit tuniniarneqarsinnaassasut.
Saqqummiussami
matumani akiliisinnaanngitsut annertuumik sammineqarmata Siumumiit
qinnutigissavarput boligstøtte-mi qangalili najugallit akilersuisimasullu periarfissinneqaqqullugit
illut namminneq pigisamittut tigusinissaannut.
Nammineerluni
illulianut tunngatillugu Siumumiit oqaatigissavarput kissaatiginartillugu illut
tamakkua pitsaassutsikkut pitsaanerunissaat. Tassani eqqarsaatigineqarput illup
sananerani siunnersorneqartarneq. Aammattaarli illup sananerani atortussanik
toqqaasarneq. Aamma eqqarsaatigineqarsinnaavoq sumiiffimmi siullerpaamik
nammineerluni illuliortoqartillugu illup håndværkerinit ilinniarsimasunit
sananeqartarnissaa, taamaalilluni 100%-imik eqqortumik
sananeqarsinnaaniassammat.
Illoqarfinni
annerusuni nammineerluni iluliornermi nammineerluni tigutsisissat 5%-unissaat
imaaliinnarluni annertuginanngeqaaq. Siumumi peqataaffigerusupparput
Ataatsimiititaliami tamatuma nalileeqqiffigineqaqqinnissaa, kisianni illuliat
allat pillugit aalajangersakkanut ataqatigiissinnagu isertitaqqortussutsip
maannangaaq aalajangiisuutinnissaa naleqqutinngitsutut isiginarpoq. Pillaalluni
ernialiisarnermik taaneqartartup peerneqarnera Siumumiit nuannaarutigaarput nukingisaaruteqartoqartillugulu
akiliisitsisarnissap eqqunneqarnissaa isumaqatigalugu.
Siumumiit
aamma isumaqarpugut piffissanngortoq inissaqarniarnerup tamakkiisumik
nutarteriffigineqarnissaanut, tassa isertitaqqortussuseq tunngavigalugu
ineqarnermut akiliutit, ineqarnermut tapiiffigineqartarneq ineqarnermut
meeqqanut tapiissutit aamma inissaqarniarnermut pisortat akuliusimanerisa
sukumiisumik iluarsaqqiigivigineqarnissaat. Tassunga atatillugu illunik
piginnittut peqatigiiffiannik pilersitsinissaq aamma eqqarsaatigineqarsorineqarpoq.
Aamma
pingaaruteqarluinnarpoq siunissami siuliini Siumumiit oqaatigineqartartutut
akiligassatigut kinguaattoornernik pisoqannginnissaata qulakkeernissaa.
Allaffissornikkut suleriaatsinik pilersitsisoqartariaqarpoq ineqarnermut
akiligassat terminimullu akiligassat ilumut akilerneqarnersut
malinnaaffigineqarsinnaasunngorlugu.
Naggataatigut
Siumumiit uparuassavarput ineqarneq pillugu ataqatigiissumik
inatsisiliorniarneq paamaarunneqarpallaaqimmat. Tassami Naalakkersuisuni
ilaasortap saqqummiussinermi nammineq ilumoornerarpaa inatsisit ataatsimut
isigalugit paasiuminaatsut, taamaattumik piffissanngorsorinarpoq suliap
tuaviuunneqalernissaa. Siumup tungaaniit qangali ujartorneqarsimavoq
illoqarnermi nutartereqqinnissaq aamma ataqatigiissumik paasiuminartumillu
inatsisiliornissaq, maannalu Naalakkersuisunut ilaasortamiit
saqqummiunneqartut ilaartuinerinnartut isigisariaqarput.
Taamatut
oqaaseqarluta Siumumiit inassutigissavarput siunnersuut aappassaaneerneqannginnermini
Inatsisartut Ineqarnermut Ataatsimiititaliaanni suliarineqassasoq.
Anders
Nielsson, Atassut:
Inissialiornerup
aningaasaliiffiginissaanut siunnersuutit marluk Inatsiartuni ullumi saqqummiunneqartut
inissianik tunngassuteqartunik immikkoortitsinermik pingaaruteqartussaassapput,
siunnersuutit siumut kingumullu sammisinneqarnerat pissutigalugu.
Inissialiornermut
tapissuteqartarneq pillugu Inatsisartut peqqussutaata allanngortinneqarnissaannik
siunnersuutikkut erseqqarissukkut matumuuna ajornartorsiutit sisamat tamarmik
Inatsisartuni maani ukiut kingullerpaat ingerlaneranni
saqqummiunneqartarsimasut suliniutigineqalissapput.
Boligstøtte-imut
akiitsut taarsigassarsianngortillugit allanngortinneqassapput.
Boligstøtte-mik
qangali taarsigassarsiarineqarsimasut akiitsorineqartut ilanngullugit
ataatsimoortumik nutaamik taarsigassarsiatut, maannakkutut
taarsigassarsiniarnerit akilersorneqartarneranni akiliutigineqartartut
taamaaqataannik akiliuteqartitsisalernissamut allanngortitsinissamut
periarfissiisoqassaaq.
Tamanna
ima paasisariaqassaaq akiitsut isumakkeerneqassanngitsut, naliginnaasumilli
taarsigassarsianut malinnaatinneqarlutik piffissarlu akilersuiffissaq
piffissap taamaaqataanik sivitsorneqarluni.
Atassutip
oqaaseqaatai:
Tamanut
atuuttussamik ataavartussamillu aaqqissuussinissaq saqqummiunneqassaaq,
tamatumalu kingornatigut taarsigassarsiarineqarsimasut
allanngortinneqassallutik, imaalillugit, akiitsut
taarsigassarsiarineqarsimasunut ilanngullugit naatsorsorneqarlutik
taarsigassarsialli akilerneqareerpata aatsaat akilerneqarlutik neqeroorut
assut iluatinnarpoq, iluanaarniuteqarnissamut eqqarsaatissiilluni. Siunnersuut
saqqummiunneqarnermisut akuersissutigineqassaguni, siunissami akiitsunik aallussiuartunit
paasineqariartinnagu, tamatumalu kingornatigut neqeroorutigineqartoq manna
aqqutigalugu akiitsut Aangakkuarneqartutut@ ilillutik
peerutissallutik- aatsaallu akilerneqassallutik naliginnaasumik
taarsigassarsiarineqartut akilerneqareerpata.
Aaqqissuussinissami
boligstøtte-imut akiitsorineqartut 100 million koruunit amerligaluttuinnarsimasut
isumannaarneqarnissaat siunertaavoq, tamatumalu kingornatigut akiitsut
taamarsuaq amerlatigileqqinngisaannassallutik, taamatullu
mersernartigiunnaarlutik.
Aaqqissuussinissami
iluanaarniuteqarnissaq pinngitsoorniarlugu Atassutip aaqqissuussineq
killilimmik piffissalerneqassasoq taamaallaallu torersaanissarsuarmut
siullermut atorneqassasoq siunnersuutigissavaa. Akiitsorineqartut siunissami
piffissaagallarnerani pissarsiariniarnissaannik siunertarineqartoq
naalanneqassappat, taava aamma aaqqissuussinissaq tamanna kingornamut
atorfissaarukkumaarpoq.
Pillaammik
ernialiuttakkat nukingisaarinerit akitsuutaannik taarserneqassapput.
Pillaammik
ernialiuttakkat nukingisaarinerit akitsuutaannik illumut attartornermi
akiitsunut naapertuuttunik taarserneqassapput.
Tamanna
Atassummiit imaaliallaannaq tapersersorsinnaavarput.
Piffissamik
sioqqutsilluni boligstøtte-mik taarsigassarsiat akilerneqarnissaat kiisalu
boligstøtte-p illuutaasa tunineqarnissaat.
Boligstøtte-p
illuutaannik piginnittut boligstøtte-mit illorisamik kimut tunisinnaanissaanut
sunniuteqarnerulissapput, tamanna ullut arlaanni soqutiginarsissapput.
Aammattaaq boligstøtte-mit taarsigassarsiniartarnerup realkredit-init
taarsigassarsiniartalernermik taarserneqarneratigut tamanna
pilerinarnerulersinneqassaaq.
Atassutip
oqaaseqaatai:
Siunnersuut
malillugu boligstøtte-mit illuutillit illortik oqaasissaqarfigilivissinnaavaat
akiligassatik sinneruttut akilerunikkit, taamalu aningaasat nalingisa
nikerarnerisigut pissarsiarisinnaasatik nammineq tigummiinnartassallugit, ullut
arlaanni illup tuninissaa pingaaruteqalissagaluarpat.
Tamanna
siunnersuutaavoq ajunngivissoq. Pisortalli ingerlataaninngaanniit boligstøtte-p
illuutai sapinngisamik amerlanerpaat pissarsiariniarneqartut,
siunertarineqarpat alloriarnermik ataatsimik siuariassaqqaarpugut.
Siunnersuutigineqartutut illumik piginnittoq akiligassaminik sinneruttunik
akiliiguni erniarnut akilersuutinullu tapiissutigineqarnissi annaasussaavaa,
taamaalillunilu terminimut akiligassami 43%-imik qaffanneqarnerat misigalugu.
Tassa imaappoq, aaqqissuussineq illumik tunisinngitsiarnermi taamaallaat
aningaasat nikerarnerisigut pissarsiassat akit qulakkeerniarlugit iluanaarniuteqarnissaq
kisiat siunertaralugu atorneqassaaq.
Siunnersuutigineqartartoq
imaalillugu allanngortikkutsigu illu iperarniarlugu akiitsut sinneruttut
70%-iisa taamaallaat akilerneqarnissaat piumasaqaatigalugu, taavalu Atapiissutit@ 30%-iusut
boligstøttemit taarsigassarsiat akilersorneqarfissaat sinneruttoq peqatigalugu
nalikilliliissutigineqartut illumiiginnarnissaat piumasaqaatigalugu, taava
tamanna taarsigassarsiniarsimasumut realkredit-imit taarsigassarsiniarnermut
allanngortitsinissaq imaaliallaannaq soqutiginarsissaaq, taavalu landskarsimut
akiligassat sinneruttut akilerneqarlutik, illorlu pisortat aningaasalersuinerannit
akisoqisumit peersillugu.
Allannguutissatut
siunnersuut manna landskarsimut boligstøtte-mut taarsigassarsuat amerlanerujussuat
akilerneqarnerannik kinguneqartussaavoq, tamannalu aammattaaq
aningaasartuutitigut sunniuteqartussaanngilaq.
Tamanna
siunnersuutaavoq Ineqarnermi Ataatsimiititaliami peqqissaartumik
misissuif-figineqarnissaa pillugu kinguartinneqarumaartutut Atassutip
ilimagaa.
Illoqarfinni
annerusuni nammineerluni illuliorsinnaanissaq aqqutissiuunneqassaaq.
Kiisami
illoqarfinni annerusuni nammineerluni illuliorsinnaanissaq
aqqutissiuunneqassaaq.
Atassutip
oqaaseqaataa:
Atassutip
illoqarfinni annerusuni nammineerluni illuliornissamut
taarsigassarsisitsisinnaanerup aqqutissiuunneqarnissaa taperserpaa.
Nammineq
akiliutit 5%-iunissaasa uppernarsarnissaat Naalakkersuisut erseqqivissumik
amigaatigaat. Tamatumani Atassut isumaqarpoq, nammineq akiliutit 5%-iussasut,
pissutigalugu -illuliorfissap piareersarnissaanut, toqqaviliornermut
kuuffilersuinermut, ukioq kaajallallugu atorsinnaasumik erngup
aqqusersuinermut innaallagissamullu saniatigut annertuunik aningaasartuuteqarnissi
naatsorsuutigisariaqassammagu, illoqarfinni annerni kommuunit sanaartornermi
piumasaqaataat maleruassagunigit.
Taamatut
oqaaseqarluta tamanna Ineqarnermut Ataatsimiititami nangillugu
oqaluuserisassatut ingerlatissavarput, ataatsimiittarfimmi maani
aappassaaneerneqannginnerani.
Evald
Brønlund, Inuit Ataqatigiit oqaaseqartuat:
Inuit
Ataqatigiinniit nuannaarutigaarput, ukiut arlallit nipiliutigisarsimasatta
boligstøtte-imut inatsisit 1953-imi suliaasimasut, qanganitsersimasullu
nutarterneqarnissaat kiisami ukioq manna Naalakkersuisunit
siunnersuutiginiarneqalermata. Tamatumuuna allannguutissatut siunnersuutit
alloriarnertut siullertut isigisariaqarsoralutigit.
Inatsisissatut
siunnersuummi Inuit Ataqatigiinniit maluginiakkavut erserissut makkuupput:
Ukiuni
kingullerni akiligassarpassuit amerligaluttuinnartut akiligassatut
allassimajunnaarlutik atukkatut ilanngunneqassasut, kiisalu pillaammik
erniaqartitsarneq atorunnaarsinneqassasoq. Soorlu Naalakkersuisuni
oqaatigineqartoq 1997-ip naanerani akiligassat 99,8 million-iupput, illunut
2000-inut. Taakku imaaliallaannaq akilerneqarsinnaannginnamik pillaammik
ernialerneqartarput, akiligassat qaffakkiortuinnarnerannut kinguneqartumik.
Taamaattumik Inuit Ataqatigiinninngaanniit isumaqartigaarput, akiligassat attartukkatut
inissinneqarnissaat, akilersuinerlu isumaqatigiissuteqarneq malillugu nutaamik
aallartinneqassasoq. Taamaalilluni akiligassaqartup nammagai annikillisutut
ilissapput, akilersuinerlu innuttaasunut tulluarnerusoq ingerlanneqalissalluni.
Nalunngisarpullu
unaavoq, attartukkat 6%-mik erniaqartarput, taakku erniaannaat eqqarsaatigalugit
assersuutitut siorna oqaatigisimavarput, illuutilik ataaseq illussarsiguni
million-it sinnerlugit akilimmik ukiut 33-t akilersoreernermi kingorna illut
marluk nalingi akilersimassagai, apeqqutip taanna Ineqarnermut
Ataatsimiititaliami qangali qaqilerneqarnissaa Inuit Ataqatigiinniit
piumasaraarput. Tamannami pissusissamisoortutut taameqarsinnaanngilaq,
pitsannerus-sannginnerpormi taakku erniat ilaasa illup taamaalilluni
nutartertariaqalernissaanut nakkartinneqartalerpata.
Inuit
Ataqatigiinniit aamma nuannaarutigaarput pillaammik erniaqartitsisarneq
unitsinniarneqalermat. Katatsivinneqartutulli taaneqarsinnaanngilaq inissanik attartortut
allat isigalugit akiliinngitsooraanni 50 koruuni akiligassallu 1000 koruuninik
anneruppata 2%-imik erniaqarnissaat siunnersuutigineqarmat.
Akilersuisarneq
eqqarsaatigalugu taamatut akiligassaminnik akiup affakkuutaartuunngitsumik
qaammatit tamaasa akilersuisarnissaat isumaqatigaarput. Taamaalilluni
akiligassarpassuit tassanngaannaq takkunnatik allatuulli agguaqatigiinerusumik
qaammatit tamaasa takkuttalissammata.
Tassunga
ilanngullugu nalunnginnatsigu inoqutigiit ilaatigut amerlisinnaasartut,
meeqqallu allillutik immikkut ineqarlerussussisartut pillugit matumuuna
nammineerlutik illuliat allisinnaanissaannut aningaasanik attortorsinnaanerup
periarfissiuunnissaa iluarisimaarparput. Soorlu oqaluuserisami immikkoortoq
20-mi taamatut nassuiaatigineqartoq.
Realkredit
ukiualuit matuma siorna annertuumik oqallisaasimavoq, uanilu allannguutissamut
attartorfigineqarsinnaasutut ammaaffigineqarluni. Tamatumani
misilittagapiluusimasut uteqqinngiinnannginnissaat Inuit Ataqatigiinniit
apeqqutigerusupparput.
Kiisalu
illoqarfinni anginerusuni nammineerluni illuliorsinnaanissaq ammaanneqassappat,
Naalakkersuisoq aperivoq illoqarfinni nammineq illuliorniartut nunaqarfimmiusut
5%-imik annermilluunniit tigutsiseqassanersut, imaluunniit isertitat
najoqqutaralugit tapiiffigineqassanersut?
Tassani
Inuit Ataqatigiit isumaqarpugut apeqqutit qulaajagassat arlaqartut, kikkut
illuliorsinnaassappat? Isertitaqarnerit
imaluunniit isertitakinnerit? Matumani nunaqarfinni nammineerluni illuliortitsisarnerup
eqqunneqarnerani anersaaq pigineqartoq qimanneqassanngitsoq Inuit
Ataqatigiinniit isumaqarpugut. Tassani taamatut oqarnitsinni isumagaarput
nunaqarfinni nammineq illuliortiternerup kalluarneqannginnissaa.
Taamatut oqaaseqarluta apeqqutit
assigiinngitsut saqqummiussagut innersuussutigalugit oqaluuserisap matuma
Ineqarnermut Ataatsimiititaliamut ingerlanneqarnissaa innersuussutigaarput.
Anthon Frederiksen, Kattusseqatigiit:
Inissialiortiternermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut ilaatigut Inatsisartut siusinnerusukkut oqallittarnitsinni ilisarnartorpassuarnik tunngaveqarlunilu imalik soqutigalugu misissorpara.
Inatsisartuni nalunngilarput
ilaatigut boligstøtte-mut tunngasut pillugit nassuiaat saqqummiunneqarmat
kisitsiserpassuit paasissutissallu assigiinngitsut saqqummiunneqartut ilaatigut
paasisatta ilagaat boligstøtte-mut akiitsut apriilip aallaqqaataani 1997-imi
ataatsimut katillugit 84.836.520 koruuninik amerlassuseqartut. Maannakkulli
Naalakkersuisup saqqummiussinermini oqaatigaa 1997-ip naanerani boligstøtte-mut
akiitsut 99,8 millioniusut, kisitsisit takutippaat boligstøtte-mut akiitsut
qaammatit qulaaluannaat ingerlaneranni 14.963.480 koruuninik amerleriarsimasut.
Nalunngilarpullu inuppassuit ilungersorlutik akilersuiniaraluartut,
taamaattumik akilersueriaaseq artornannginnerusoq nassaarineqartariaqarpoq.
Akiligassat amerligaluttuinnarnerisa
boligstøtte-mit atukkat erniaasa qaffanneqarsimanerat ilaatigut pissutaasunut
ilaavoq, minnerunngitsumillu ilaatigut inuit utoqqalinertik pissutigalugu
akiligassamut angummassinnaajunnaarsimasut allanilluunniit pissuteqarlutik
akilersuiniarnerminni erloqinartunik nalaataqarsimasut, minnerunngitsumillu
pillaammik ernialersuinikkut suli annerusumik artorsinneqarsimanerat, ilaatigut
pissutaaqataapput. Qujanartumilli peqqussutip matuma
allanngortinniarneqarneratigut tamanna qaangerneqartussanngorpoq.
Mannalu iluatsillugu Ineqarnermut
Ataatsimiititaliaq qujassuteqarfiginiarpara, tassa pillaammik ernialiisarnerup
atorunnaarsinneqarnissaa pillugu siunnersuutiga Inatsisartut upernaakkut
1997-imi ataatsimiinnitsinni isumaliutissiissuteqarnermigut tapersersimammagu.
Tassami aamma ilaatigut Inatsisartut
ukiuakkut 1997-imi ataatsimiinnitsinni ineqarnermut tapiissuteqartarneq pillugu nassuiaat saqqummiunneqarmat
paasivarput 1995-i sioqqullugu akiitsorineqartuniit 1997-imi apriilip
aallartinneranut akiitsut 55.375.567 koruuninnik amerleriarsimasut, massa
ilaatigut inunnik isumaginninnermi peqqussutit ilaanni imatut allassimasoqaraluartoq:
AKommuunimit nakkutigineqassaaq
sulisinnaajunnaarnersiutillit akiitsoqalinnginnissaat@. Taamaattoq ilaatigut
sulisinnaajunnaarnersiutilippassuit utoqqaallu ilaat akiligassanik nanerneqarsimapput,
masseqqittussaajunnaangajallugit. Tamannalu qaangerniarlugu Naalakkersuisut
ataqqinartusi suli kaammattortariaqarpusi ajornartorsiuterpassuit
anigorniarlugit aaqqiiniutit ingerlattuaqqullugit. Aammalumi maannamut qujanartumik
takusinnaalerparput Inatsisartuni oqallittarnerpassuit tunngavigalugit
arriikkaluartumik aaqqiiniarneq ingerlanneqalersoq.
Ilanngullugu eqqaasissutigeqqissavara
akiligassat ilaatigut akiitsorineqartut akilisarnissaat aamma siunertaralugu inuillu
akilersuinermikkut oqalisaanneqarnissaat ilanngullugu aammalu akiligassanut
angummannerulernissaat siunertaralu boligstøtte-mut atukkat
erniarlersorneqarnerisa appartinneqarnissaat Ineqarnermut Ataatsimiititalimi
ilanngullugu nalilersuiffigeqqullugu. Nassuerutigisariaqarparpummi ineqarnermut
akiitsut apriilimi 1997-imi naatsorsukkat naapertorlugit 156.477.900
koruuninik amerlassusillit imaaliallaannaq akilersinneqarsin-naanngimmata,
aammami boligstøttiinnarluunniit eqqarsaatigalugu akilogassat qaammatini
qulaaluaannarni 15 millioningajannanik amerlassuseqalersimanerisa
uppernarsaannarpaat akiitsut amerligaluttuinnassanngippata akilersueriaaseq
oqinnerusoq ujartariaqartoq.
Kinaluunniimmi tusarsinnaasunik
siutilik tusartarpoq, taamaattumik ilanngullugu eqqaasitsissutigisariaqarpoq
ilaatigut inunnik isumaginninnermut ataatsimiititaliarsuup kaammattuutai aamma
tusarniarlugit ineqarnermut tapiissuteqartarnerup iluarsiivigineqarnissaa
ilanngullugu eqqaamasariaqarmata, aammalu minnerunngitsumik ilaatigut
boligsikring-imut qinnuteqartitsisarnermik aningaasarsiat ukiup siuliani
aningaasarsiarineqarsimasut toqqammavigalugit aaqqissuussisoqartarmat.
Tassami ukiup siuliani aningaasarsiat
eqqarsaatigineqarsinnaajunnaareersullu tunngavigalugit taamatut pisoqartarmat,
kisianni pissutsit piviusut naleqquttullu atortariaqarmata ilanngullugu
eqqaasitsissutigerusuppara. Kiisalu nuannaarutigisariaqarpoq nunaqarfinni
illoqarfiillu ilaanni illuliaasartut kiisami illoqarfinni tamani
sananeqarsinnaalernissaat periarfissaqartussanngormat.
Kattusseqatigiillu sinnerlugit
akilersueriaatsimut tunngatillugu ilaqutariinnut atugassarititaasut
assigiinngiseqqunagit maannamut akilersueriaatsip misiligummik
ingerlatiinnarneqarallarnissaa kaammattuutigaara. Tassa nammineerluni illulioriaatsimut
tunngatillugu. Matumanilu periarfissap atornerlunneqannginnissaa aamma
siunertaralugu taamatut akilersueriaaseq taamaallaat ilaqutariit inuillu
ataasiakkaat illutaarniarneranni atorneqartalernissaa ilanngullugu kaammattuutigissallugu.
Naggataatungaatigut
innuttaaqataasugut tamatta nammaqatigiinnissarput eqqarsaatigaluga aammalu
siusinnerusukkut apeqquteqaatigisimasara uterfigeqqilaarniarpara. Tassalu
Naalakkersuisut Inatsisartullu siulittaasuisa ineqarnermut, kiassanermut
kallerullu inneranut akiliisinneqartannginnerisa atorunnaarsinneqarnissaat
Inatsisartut eqqarsaatigeqqittariaqaleraat Kattusseqatigiit sinnerulugit
kaammattuutiginiarlugu.
Taamatut oqaaseqarlunga suliap
aappassaaneerneqannginnerani Ineqarnermut Ataatsimiititaliamit sukumiisumik
oqaluuserineqarnissaa inassutigivara.
Daniel Skifte, Aningaasaqarnermut Ineqarnermullu
Naalakkersuisoq:
Siullermik qujassutigissavara partiit saqqummiussamut oqaaseqarnerat, tunngaviatigut malugaara taamatut siunnersuut iluarineqartoq kisiannili tassa arlallit oqaaseqarfigisariaqarput.
Una qularnaatsuuvoq, partiit tamarmik
isumaqatigaat qaammatikkuutaartumik akiliisalernissaq, termini allanngortillugu
taanna malugiarniarluarpara. Aamma pillaalluni erniarlersuisarneq pillugu
taassuma peerneqarnissaa aamma tamarmik iluaraat. Paatsuuisoqaqqunagu una
erseqqissaatigilaarniarpara, pillaalluni erniarlersuisarnerup
atorunnaarsinnissaa aamma upernaaq ineqarnermut tungasumik nassuiaammik
boligstøtte-mut tunngasumik nassuiaammik Inatsisartuni maani eqqartorneqarmat.
Kisianni aamma taassuma siuliavut 1993-imili, tassa Naalakkersuisut siulliit
siuliini Anhon Frederiksen-i maaniinngikkallarmalli taanna
eqqartorneqartarsimammat, taamaattumik nuannaarutigaara Inatsisartut oqallisereerneranni
upernaaq taanna siunnersuut Inatsisartut siunnersuutaat maannakkut tamanit
taperserneqarluni piviusunngortinneqartussanngormat, uanga nalinni.
Taamaalillunga taanna Anthon-i
inissilaarpara. Kisianni taanna siulliullugu oqaaseqarfiginian-ngilara,
Kattusseqatigiit oqaaseqaataat.
Siumuminngaanniit assigiinngitsut
tapersiissutit misissoqqitassallu oqaatigineqarput, assersuutigalugu
qaaammatikkuutaartumik akiliisarnermik tapersersuilerlutik erseqqossimik
oqaatigaat. Taanna maluginiarpara, kisiannili apeqquserusullugu imaluunniit
erseqqinnerusumik nalunaaruteqartoqaqqullugu Siumup kissaatigisaa tassaasoq
taamatut ilumoortumik eqqortitsillutik akiliiuartartut taamaattorpassiaqarmammi
taakkua kajumissaaserneqartalissaasut, taanna neriuppunga Ineqarnermut
Ataatsimiititaliami apeqqut misissorluarneqassasoq nalilersorluarneqarlunilu.
Assigiinngitsut aamma
taakkartorneqartit assersuutigalugu namminerisamik illuliorneq illup
håndværkerinit ilinniarsimasunit sananeqarnissaanut tunngasumik apeqqut maannakkumut
taanna aaqqissuussineq ukiorparujuaarsuarni atorneqarsimavoq, pingaartumik
nunaqarfinni nuannaarutigineqarpoq partiini tamani aamma illoqarfinni
ooqattaarneqarsinnaalermat, tamanna ajunngilaq.
Ilisimatitsissutigissavara neriullunga
itigartitsinertut paasineqassanngitsoq tassaasoq Illorput 2000 sananeqalermat
Inatsisartut kaammattuutaattut misiligummik Sisimiuni sanasoqarpoq, taanna
missiliorlugu 1,2 mio. koruuninik naleqarmat, Illorput 2000. taamaattumik una
oqaatiginiaannarpara nammineerluni illuliassat akii tiguneqarnermikkut
3-400.000 koruunit missaaniittarmata. Taamaattumik håndværkerinik
ilinniarsimasunik atuissagaluarutta (illoqarfinni taava) nunaqarfiit
immikkoortilissavagut, taanna ilimaginngilara Naalakkersuisut anguniassagaat.
Kisiannili una pingaarnerpaavoq aningaasat akuersissutit Inatsisartuni
akuersissutigineqartut taamannak amerlatigitillugit håndværkerinut atukkanut
akiliisalissagutta inigassat ikinnerulissapput, taamalu
illussaaleqineqatigitillugu aamma nunaqarfinni taanna Ineqarnermut
Ataatsimiititaliami nalilersuarluarneqarnissaa kaammattuutiginarpoq.
Aamma taamatut nipeqartillugu
oqaatigissavara Naalakkersuisunut ilaasortaq ataaseq eqqartorneqaqqajaammat,
malugigakku malugillaqquara saqqummiussininni oqarama Naalakkersiusut
oqaloqatigeereerlutik Naalakkersuisut sinnerlugit saqqummiigama siunnersuummut,
taamaalillunga paatsoorutaasinnaasut piilaarpakka.
Atassumminngaanniit aamma
oqaaserineqartut (qutsatisigaakka)taavalu nalilersullaqullugu isumaqarlunga
nalilersugassaasoq tassa taamatut aaqqissuussineq piffissalissanersoq piffissaq
aalajangersimasoq atorlugu taamaallaat atuutissanersut nalilersornissaa taanna
qularnanngilaq pisariaqassasoq. Nalilersuilluarnissamut ammassaagut. Aamma
malugiarniarpara Atassutip una siunnersuut boligstøtte-mut tunngasut akiitsut
imaaluunniit tunisinermi periarfissat eqqartoramigit oqaatigisaat tassaasoq
siunnersuutigineqartoq una naammaginagu ingerlariaqqikkusulluni pisoq. Ilumut
taamaaliussanersugut aamma nalilersorluarnissaa kissaatiginassaaq, tassami
Atassutip naatsorsuutigisaattullusooq Ineqarnermut Ataatsimiititaliap
misissuilluaqqissaarnissaa apeqqummut qaffatsinneqartumut uangattaaq
naatsorsuutigaara.
Taamatut tunngavisumik Atassutip
tapersiinera qujassutigaara.
Inuit Ataqatigiit qaffatsitaat aamma
erseqqippoq tunngaviusumik tapersiilluartut, kisiat tassani apeqqutaasa ilaat
oqaaseqarfigilaarusuppara minnerunngitsumik realkredit-it pillugit misilittagapilorisimasagut
uteqqiinnarneqassanersut, taanna apeqqutigimmasuk ilumoorpoq realkredit-it
80-ikkunni (eqqussorneqarmata) suliarpassuit ilai suli maannakkut maaniittut
ilai ajornartorsiuterujussuanngorsimapput akisuallaarneri pillugit,
taamaattumik taassuma nalilersoqqinnissaa uunga atanngitsumik pisariaqartoq ersippoq.
Kisianni uunga atasumik apeqqutigigassiuk uanga ilimaginngilara taamatut
kingullermisut pisoqarnissaa, tassami uani uusimasutullusooq ikkamik
realkredi-it taamaattumik oqarput taanna illoqarfiit ilaanni nalilersuinermi
eqqunneqarnissaa ilimagisariaqartoq. Kisiannili suliniarnermi aningaaseriviit
aamma akuunissaat sumulluunniit taanna uagut pisariaqartikkipput
qularnanngilaq.
Uagut qanoq oqaaseqarsinnaanngilavut
naalakkersinnaallugillu realkredit-i sumi kimullu attartortitsissanersut.
Kisianni Inuit Ataqatigiit siunnersuummut tapersiilluarnerannut qujavugut.
Kattusseqatigiit aamma taamatut
tunngaviatigut tapersiipput, oqaatigissavara kissitsiserparujussuit taagugaat
maannangaaq maanngaanniit ataasiukkaarlugit oqaaseqarfigerusunnginnakkit,
kisianni kaammattuutaat assigiinngitsut ingerlateqqittariaqartut taakkua
suliarineqarnissaat naatsorsuutigara. Aamma Ineqarnermut Ataatsimiititaliami.
Kisiani tassa uani oqarnerat ilaatigut nammineq siunnersuutigisartakkani
arriikkaluamik aaqqiiniarneq ingerlasimammat, maannakkut
piviusunngortussanngorluni, tamanna imatut oqaaseqarfigiinnassavara qujanaqaaq
Inatsisartut 1997-imi 1998-imi upernaakkut maannakkullu 1998-imi ukiakkut
taakua oqallittarsimanerit aallaavigalugit ullumikkut oqallimmata.
Inatsisiliorneruna aqagumiit aqagumut inigassaaneq ajortoq, taamaattumik
nuannaarutigaara piviusunngortussanngortut assigiinngitsut Kattusseqatigiit
taperserumammatigit.
Pillaalluni erniarlersuisarneq
pillugu oqaaseqareerama taanna oqaaseqarfigissanngilara, ataaserli
naggataatigut oqaaseqarfigissavara.Siulittaasoq uani issiasoq aqutsisoq
qinnuigissavara issuaasinnaanera akuerilaaqqullugu, ilaatigut Kattusseqatigiit
imatut oqarput:@Tassalu Naalakkersuisut
Inatsisartullu siulittaasuata ineqarnermut, kiassanermut kallerullu inneranut
akiliisinneqartannginnerisa atorunnaarsinneqarnissaat Inatsiartut
eqqarsaatigeqqittariaqaleraat Kattusseqatigiit sinnerlugit sinnerlugit
kaammattuutigaara@.
Ilaanna eqqormat eqqortumik
oqassaanga Naalakkersuisut allatulli akiliisarput, una eqqorpoq Inatsisartut
aalajangernikuuaat Naalakkersuisut siulittaasuat Inatsisartut siulittaasuat
illit eqqartukkannik aallaaveqartumik iliorfigineqassasut, uani illit
naalakkersuisut illit taagakkit, taamaalillunga erseqqissaavunga. Qujanaq.
Mikael Petersen, Isumaginninnermut,
Suliffeqarnermu Pisortallu Suliffeqarfiutaannut Naalakkersuisoq:
Ineqarnermut naalakkersuisup
akissutai ilassuteqarfigilaasavakka, Kattusseqatigiit oqaaseqartuata
ilanngullugu taammagu inunnik isumaginninnermut ataatsimiititaliarsuup
inassuteqataanut tunngatillugu suliassat tunngassuteqartut uanit oqaluuserisami
immaqa eqqartussallugit tulluarpallaanngikkalutut oqaaseqarfigimmagit.
Ineqarnermut tapiissuteqartarneq
kiisalu ineqarnermut tunngatillugu meeqqanut tapiissuteqartarnerit aammalu
naliginnaasumik meeqqanut tapiissuteqartarnerit allallu ikiorsiissutaasartut
soorlu annertussuseriikkamik ikiorsiissutit allallu inuit
aningaasarsiornermikkut ilungersunartumik inissittaraagata
ikiorsiissutigineqartartut pillugit inunnik isumaginninnermut
ataatsimiititaliarsuup innersuussutai malitseqartillugit Naalakkersuisut
sulinerminni suliassaasa tullerilersimagaat oqaatigissavara, taanna aamma
matumani ataatsimiinnermi tikikkumaarparput, tassa inunnik isumaginninnermi sullissineq
pillugu nassuiaateqartussaagatta.
Kisianni Ineqarneq pillugu
Ataatsimiititaliami paatsuugasoqaqqunagu erseqqissaatigaara ineqarnermut
tapiissutit naliginnaasut aammalu ineqarnermut meeqqanut
tapiissutigineqartartut pillugit sulineq taanna allamik
ingerlanneqartussaammat, taamaattumik suliat assigiimmik siunertaqartut
qaleriaallugit suliarineqannginnissaat taanna pisariaqarmat taamatut
ilassuteqalaarpunga.
Lars Karl Jensen, Siumut:
Peqqussutikkut uani oqallisigineqartukkut
akiligassallit imaluunniit akiligassaminnut kinguuaattoortut allatut
aaqqissuussiffigineqarnerat tutsuviginartillugu ilaatigut kisiat
maqaasinartitakka uani saqqummiutilaarniarpakka.
Oqarutta akiitsoqalersartut imaluunniit
akiligassaminnik kinguaatsortaartut kikkuuppat? Maani inimi isersimasut
Inatsisartuni ilaasortat amerlaqisut nalugunanngilaat sineriisami angalanermit
inuppassuarninngaanniit tamakkua pillugit saaffigineqartarneq. Tassami
ilaatigut oqaatigineqartarpoq akilersueriaatsimi allaffissornerup
atornerujussua peqqutigalugu aamma inuup nammineq pisuussutiginngisaraluanik
akiligassaqalertarneq pilertarpoq.
Nunaqarfimmiuniit maallutigineqartartoq tassavoq nunaqarfinni illut inissiallu INI A/S-iminngaaniit aqunneqalermatali maannakkumut atuuttumik ileqquusoq, tassa illu imaluunniit inissiaq qimanniaraanni matuersaat aatsaat illoqarfiliaallugu illoqarfimmi INI A/S-ip allaffianut tunniunneqaraangat akiligassat unittarnerat, ullut 14-iusinnaapput, illup qimanneraninngaaniit matuersaatip tuniunneranut, taamaakkaluartorli akiligassat inummut tassunga illumi najugaqarunnaareersumut ingerlasarput. Isumaqarpunga tamakkua aamma isiginiarneqartariaqartut uani peqqussutip sanarfeqinnerani.
Taavalu aamma illumik piginnittut imaluunniit inissiamik attartortoq toqukkut qimagutsillugu suliassat eqqartuussivinni suliarineqartussat, taakkua sivisuumik ingerlanneqarsinnaasarput, inuppassuit misigisimasarput ilaatigut taamatut qimataagaangamik, kisimiittunik ingammik inunnik taanna ini imaluunniit illugisaa kingornunneqarsinnaanngikkaangat, tassunga suliamut atatillugu eqqartuussivimmi akiligassat qimatsisumit aammalu qimataasut pissarsiasaraluannit akilersinneqartarput, akiligassat uani taakkartorneqartut inuiaqatigiinnut akisoorujussuupput, oqilisaassiffigineqarnerat taanna oqilisaaffiginiarneqarnerallu tutsuiginartippara.
Ippinnartulli aamma ilagivaat maannakktu uani aamma taaneqanngitsoq, isumaliuutissiissummilu ilaatinneqanngitsoq, inigisamik imaluunniit illumik allamut attartortitsisilluni attartortup attartortitsisullu akornanni isumaqatigiissut, imaannguatsiarpoq INI A/S-iminngaaniit suliarineqartarpoq, kisiannili akiliisitsiniarneq INI A/S-iminngaannit susassarineqassanani.
Attartortitsisuulluni erloqinassaqaaq inuk tatigalugu attartortitap akiliisinnaajunnaarnera pissutigalugu nammineq akiitsorilikkanik pilersoqassappat, isumaqarpunga peqqussutissamut uunga ilanngullugu eqqarsaatigigaanni aalajangersaasoqarsinnaasoq, INI A/S akunnermiliuttuuguni, taava aamma akunnermiliuttutut attartortup akiliinissaa pisussaaffimminik, aamma isumagineqassasoq.
Illoqarfimmummi allamut aallaqqalluni, inullu illoqarfimmi allanik illumini attartortoq akiliisinniarnera oqitsuinnaanavianngitsoq takorloorsinnaagakku.
Ukiut 33-it illumik akilersuisussaanermik peqqussutip imaqarnera ukiuni 45-ni maani nunatsinni atorsimavarput, 1953-ip kingornatigut, maannakkumut aaqqissuussinermi oqilisaassinerit ilagivaat inooqatigiinni illumut akilersugaqartuni iluaqutaasorujussuaq, meeqqat 18-it tikillugit ukioqalernissaannut oqilisaassiffigineqartarneq, taassuma kingornatigut angajoqqaat, imaluunniit angajoqqaat kiserngorussimagunik meeqqamillu tapiissutaarulluni akilersuiniarnerminnik ajornartorsiulertarput, taamaattumik illup pigisinnaaneranut akilersueriaatsit siaartinneqarluni inissinneqarsinnaanera aamma iluatinnartut ilagivaat.
Finn Karlsen, Ataatsimiinnermik aqutsisoq:
Erseqqissaatigilaassavara massakkut
pineqarmat inissialiornermut tapersiisarneq, aammalu partiit oqaaseqartuisa
Kattusseqatigiillu oqaaseqartuata tamarmik isumaqatigiillutik
ataatsimiititaliamut ingerlateqqinneqassasoq innersuussutigimmassuk.
Bjarne Kreutzmann, Siumut:
Nuannaarutigaara aamma matumuuna
annerusutigut partiit tamarmik isumaqatigiimmata, unaliuna erseqqissaatigilaarniariga,
Siumup tungaaninngaaniit boligreform eqqartoratsigu, tassa illoqarnermut
iluarsaaqqiinissaq.
Tassani taanna, uunga siunnersuummut
akornutaatinnianngivikkatsigu, erseqqissaannarlugu naak manna tikillugu
uparuarneqanngikkaluartoq, tassa siunnersuut una akuerineqaraluarpalluunniit
illoqarneq pillugu iluarsaaqqiinissamut tunngasunik aallartittoqariissasoq,
taanna isumagigatsigu.
Nammineerluni illuliassanut tunngatillugu oqarpugut
kissaatiginartillugu illut tamakkua pitsaassutsimikkut pitsaanerunissaat,
tassani eqqarsaatigineqarpoq, illup sananerani siunnersorneqartarneq,
aammattaarli illup sananerani atortussanik toqqaasarnermi.
Tassangaaniit nangikkatsigu aamma eqqarsaatigineqarsinnaavoq,
sumiiffimmi siullerpaamik nammineerluni illuliortoqartillugu illu
håndværker-init ilinniarsimasunit sananeqartarnissaa, taamaalilluni 100
procent-imik eqqortumik sananeqarsinnaaniassammat. Tasunga atatillugu aamma
paatsoortoqaqqunagu oqaatigiinnassavara illumik sananermi siunnersorteqartarneq
aamma immikkut akiliiffigineqartarmat, imalluunniit
akiligassiissutigineqartarmat, tassani aamma håndværker-it siunnersortitut
tiguneqartarnissaat ajoqutaanavianngivissoq oqaatigerusullugu.
5 procent-imut tunngatillugu, partiit
allat oqaasii tunngavigalugit oqaannassaanga tassani immikkut aamma
oqaaseqarsimagatta, kisiannili aamma innersuussutigalugu Siumumi suleqataaffigerusukkipput
udvalg-imi taassuma sammineqarnissaa, nalileqqinneqarnissaa.
Naalakkersuisup oqaaseqaatai
oqaatsitsinnut qutsavigaakka, apeqqutaalu akilaarusullugu, tassa Siumup
saqqummiussamini samminninnera, tassa akiligassaminnik pisussaaffimminnillu
akisussaaffitsik malillugu malinnaajuarsimasut paasinnissimasullu
kajumissaaserneqarnissaannik oqaratta, tassunga oqaatsitsinnut ilaliullugu
oqaatigaarput aamma, taanna issualaartariaqarpara: ASiumumiit pingaartutut isigaarput,
inuiaqatigiinnut pisussaaffimminnik ilumoorlutik eqqortitsiuartartut
kajumissaaserneqarnissaat@, tassa termin-imut akiligassaminnik
kinguaatoortarsimanngitsut, taava tassa akissutaasinnaasoq apeqqummut sinnera
aajuna: Ataamaattumik siunnersuummi
aalajangersakkat uku tapersersorpagut: tassa inuit pineqartut illumut
oqartussaanermut killilersuutinik qaangiisinnaasut,
taarsigassarsiareqqaarsimasanut akiligassat sinneruttut akilernerisigut, aamma
tunisaqarnermi aningaasat nalingisa nikerarnerisigut nuannaarutaajunnartut,
tamaasa pigiinnarsinnaagaat, kiisalu illut taakku kikkunnilluunniit pisiarisassanngorlugit
tuniniarneqarsinnaassasut.@
Oqaatigaarput isumaqartugut
akuersaarnermik taamatut akisussaassutsimik misigisimajuarnerup
akuersaarneranik takutitsisinnaasoq, aammattaarli allanik soorngunami
nassaartoqarsinnaavoq, qanoq ilillugit akisussaassutsimik misigisimallutik
malinnaaniartuartut allaat oqaatigilluaannarlugu ilaatigut
kaapajaaraluarlutilluunnit akisussaallutik misigisimallugu akiliiuarniartut,
malinnaajuarniartut, taakkua aamma allatut iliorluni
akissarsitinniarneqarsinnaapput, siunnersuutit suulluunniit tusaruminaqaat.
Finn Karlsen, Ataatsimiinnermik aqutsisoq:
Oqaluttussanut tullernut
eqqaasitsissutigeqqissavara uteqattaarisoqassanngimmat, aammalu
eqqaasitsissutigeqqissavara partiit tamarmik Kattusseqatigiillu
isumaqatigiillutik ataatsimiititaliamut ingerlateqitassanngortimmassuk,
aappassaaneertinnagu, taanna malinneqartariaqarpoq.
Anthon Frederiksen, Kattusseqatigiit:
Uani soorngunami eqqartorneqartut aamma
akiligassaqalertarnermut annertuumik attuumapput, qanoq uku akiligassat
pilersartut? Aappaatigut Isumaginninnermut Naalakkersuisup akissu-teqarnermini
oqaatigisai pakatsissutigilaarpakka, tassa isumaginninnermut
attuumassuteqartorujussuupput, aamma matumani eqqartukkagut.
Tassami kommune-t ullumikkut
pisussaaffeqareerput, inuit isumaginninneq pissutigalugu peqqussutikkut
akiligassaqalertalinnginnissaat isumagissallugu, ajornartorsiutinullu ilaasoq
tassaavoq inuit taamatut inissisimasut arlalipparujussuit akiligassanik
matoorneqaannarlutik isiginngitsuusaarneqarlutik ingerlanneqarmata, tassa
tamakkuupput ilaatigut Isumaginninnermut Naalakkersuisup
eqqumaffigilluinnartariaqaraluagai, akiligassat amerligaluttuinnassanngippata,
minnerunngitsumik inuit immikkut ikiortariallit eqqarsaatigalugit.
Naalakkersuisut Siulittaasuata
Inatsisartullu Siulittaasuata ineqartitaanerannut tunngatillugu saqqumiininni
kukkussutigisimasara isumaqarpunga annerusumik itisilertariaqanngitsorluunniit,
tassami naluneqanngilaq Naalakkersuisut Siulittaasuat aammalu Inatsisartut Siulittaasuat
akeqanngitsumik najugaqartinneqarput.
Naalakkersuinikkullu oqaluttuarpugut
tamatta naligiimmik nammaqatigiilluta ingerlaqatigiissasugut, aamma
ilisimaneqarpoq inuit eqqartukkakka nunatsinni akiliisinnaanermikkut piginnaaneqarnerpaat
ilagivaat, taamaattumik tupinnanngilaq Naalakkersuisut Siulittaasuat
Inatsisartullu Siulittaasuat piumasaqarfigineqalernissaat eqqunneqassappat,
oqarfigineqarlutik aamma ilissi uatsituulli ineqarnermut
akiliisinnaasariaqarpusi, isumaqarpunga tamanna annerisariaqanngitsoq,
ammasumik oqallisigisinnaasariaqaripput.
Peter Ostermann, Atassut:
Assorsuaq ajuusaarutigineqarpoq
akiligassat amerliartuinnarnerat, ukiuni arlalinni qasseriarlungamita
ineqarnermut tunngasut oqallisigigaangatsigit saqqummiuttarpara akiliisinnaanermut
tulluunnerusumik akiliisitsisarnissaq avaqqunneqarsinnaanngitsoq, maannakkut
malugilerpara, pingaartumik Inuit Ataqatigiinnit, Kattusseqatigiinnit immaqalu
aamma Siumumit paasineqalersimasoq taanna, tassami Siumup ineqarnermut
oqaluttortaava oqarpoq issuaqqissaanngikkaluarlugu, siunissami
kinguaattoortoqaqqissanngitsoq.
Ullumikkutut akilersueriaaseq uani
akuerineqarluni atuuttoq atuutsinneqartuassappat, tamanna
anguneqarsinnaanngilaq, innuttaasut amerlaqaat ima aningaasarsiallit, ineqarnermut
taperneqarnissamut allatigullu taperneqarnissamut killissarititaasut
qaangilaarlugit ukiumut aningaasarsiallit, sukkulluunniit
taperneqarsinnaanngitsut, taakkuuppullu tassa uagut artorsartitagut, akiliisinnaanerannut
naleqqunnerusumik maani amerlanerusut aaqqiinissamut piumassuseqanngimmata,
kisianni maluginiarsoraara maannakkut piumassuseq taanna amerlanerusut
pigilersimagaat, neriussaanga aamma iluaqutaassasoq, tassami pillaammik erniat
ila ukiut qassit eqqartorpagut, aatsaat massakkut aaqqinneqalerput,
ajuusaarnarporli artorsartitagut taamak amerlatigisut ukiut arlallit suli
utaqqeqqissappata.
Nammineerluni illuliat pillugit
arlaleriarluta aamma oqallittarsimavugut, kisianni soorngunami
nalilersoqqissaarnissaat tassani pisariaqarsimavoq, Atassummit una uagut
aalajangiusimavarput, aammalu ataatsimiititaliami suliarineqarnissaani
eqqaamaqqulaassavarput ilaasortanut: Nammineerluni illuliornerup
tunngavigisai, siunertaa anersaavalu qimanneqassanngippata, illoqarfimmi aamma
taanna atuunniartariaqarpoq, nammineq peqataalluni, sanaqataalluni, aammalu
siunnersorneqarluni, taamaalilluni aamma nammineq pigisaqarnermik
misigisimaneq, ilaatigullu aamma inigisamut akiliuteqarnissamut
sunniuteqarluartussaq taanna pigineqartuassammat, taanna aalajangiusimavarput.
Daniel Skifte, Aningaasaqarnermut Ineqarnermullu
Naalakkersuisoq:
Partiit Kattusseqatigiillu
oqaaseqaqqinnerminni aammalu partiit oqaaseqartuisa avataatigut ataasiakkaat
oqaaseqarnerisa ilaat oqaaseqarfigilaassavakka.
Siullermik Lars Karl Jensen, eqqartuininni
ilaatigut oqarputit akiitsoqalersartut, soorlu illoqarfimmiit aallarlutik
allamut nuunnerminni attartortitsinerminni taava akiitsoqalertarnerminnut
taanna suliassaq INI A/S-ip tigusinnaaneraa, taannarpiarnguna pissutigalugu
immikkoortoq 17 ullumikkut inatsisartut eqqartoraat, tassa eqqartugaq taanna
inissiat eqqartortinneqarnerannut tunngammat, tassani malunnarpoq Inatsisartut
kaammattuutigigaat qulakkeerinermik kinguneqartumik pisalernissaq, tassunga
eqqartukkannut taarsiullugu, taamaalippat taanna neriuutigineqarpoq
aaqqinneqarumaartoq.
Bjarne Kreutzmann-ip oqaasiinut aamma
qujaqqippunga, taamatununa apequteqarninnut tassa kajumissaasiisarneq pillugu
nassuiaqqulaarakku nuannaarutigaara, erseqqissineruvoq, kisianni taamatut
apeqquteqarninnut tunngaviga erseqqissalaarniariga, illit partiit sinnerlugu
oqaaseqaravit quppernerit aappaanni qulaani oqaaseqaravit akiliiumanngitsut
sakkortuumik iliuuseqarfigineqartariaqalernerat inassutigigakku taava
illuatungaatigut akiliiumanngitsut sakkortuumik iliuuseqarfigeriarlugit taava
akilersuisut kajumissaaserneqartalissappata, taava apeqqutinngussagami,
pisussaaffigeqatigiinneq sumiilerpa? Isumaqarama taanna imminut
assortuuttutullusooq isikkoqartoq, soorngunami isumaqatigiissut tunngavigalugu
akilersuisoqassaaq, taannalu tassa naammassineqaruni ajunngilaq, kisianni
akiliiumanngitsut sakkortunerusumik pisalerumagisi maluginiarakku, taamatut
erseqqissumik paasisaqarusunninnut tunngaviuvoq.
Anthon Frederiksen, Kattusseqatigiinneersoq
oqarfigissavara, qutsavigaakkit imminut naqqikkavit, uanga
naqqitsinniarsarinngilakkit, taamaallaat issuaanera aallaavigalugu
oqaaseqarfigaara, aamma soorngunami allatulli inatsisartunut ilaasortatut
periarfissaqarputit ineqarnermut aaqqissuussiniarneq aallaaviginagu
allaganngorlugit illit eqqartukkatit siunnersuutigisinnaagitit Inatsisartunut,
maani maanaannaq puttutitillugit pigaluarutta ullormut oqaluuserisassarput
sorpassuarnik ilaartorsinnaavarput, isumaqarpunga taanna Inatsisartut
piumanavianngikkaat, taamatut oqaaseqarlunga ineqarnermut ataatsimiititaliaq,
sulilluarnissaanik kissaateqqissavara.
Finn Karlsen, Ataatsimiinnermut aqutsisoq:
Taamaalilluni ullormut oqaluuserisassaq
immikkoortoq 19, Inissialiornermut tapersiissuteqartarneq pillugu inatsisartut
peqqussutaata allanngortinneqarneranik Inatsisartut peqqussutissaattut
siunnersuutip siullermeerneqarnera naammassivoq, aappassaaneerneqartinnanilu
Ineqarnermut Ataatsimiititaliami oqaluuserineqassalluni.
Taamaasilluta ullumikkut oqaluuserisassagut
immikkoortut tamarmik naammassipput, taavalu ataasinngorpat 28. september
ullormut oqaluuserisassat makkuupput: immikkoortoq 15, 1999-imi Inatsisartut
aningaasanut inatsisissaattut siunnersuut siullermeerneqarnera, taavalu immikkkoortoq
23, raajanut akitsuutit pillugit inatsisartut inatsisaata
allanngortinneqarneranik inatsisartut inatsisaannut siunnersuutip
siullermeerneqarnera.
Taavalu innersuussutigiinnassavakka
allassimasut ataatsimiititaliat ataatsimiiffissatik namminneq
nakkutigissagaat.
Taamaasilluni
ullumikkut ataatsimiinneq naammassivoq.