Oqaluuserisassani immikkoortoq 22-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders Andreassen, Inatsisartut
Siulittaasuat.
Karl Lyberth (S), Akileraarnermut ataatsimiititaliap siulittaasua:
Nioqqutissanik eqqussuinermi akitsuutit pillugit
Inatsisartut inatsisaata allanngortinneqarneranik Inatsisartut inatsisassaattut
siunnersuut pillugu Inatsisartut Akileraartarnermut ataatsimiititaanit
isumaliutissiissut. Siunnersuutip aappassaaneerlugu suliarineqarnissaanut
tunniunneqartoq.
Suliassamik
suliarinninnermi Inatsisartut Akileraartarnermut ataatsimiititaanit
peqataapput. Inatsisartuni ilaasortaq Karl Lyberth (S) siulittaasoq,
Inatsisartuni ilaasortaq Laannguaq Lynge (S), Inatsisartuni ilaasortaq Siverth
K. Heilmann (A), Inatsisartuni ilaasortaq Otto Storch (A), Knud Sĝrensenimut
sinniisussatut, Inatsisartuni ilaasortaq Manasse Berthelsen (IA).
Inatsisartut
Akileraartarnermut ataatsimiititaat 25. september aamma 7. oktober 1998 ataatsimiimmat
Nioqqutissanik eqqussuinermi akitsuutit pillugit Inatsisartut inatsisaata
allanngortinneqarneranik Inatsisartut inatsisassaattut siunnersuut
suliarineqarpoq. Suliarinninnerminut atugassatut paasissutissanik
Aningaasaqarnermut Ineqarnermullu Naalakkersuisumit paasissutissanik
ataatsimiititaq pissarsiniarsimavoq.
Aallaqqaasiutitut
Akileraartarnermut ataatsimiititamit oqaatigineqassaaq ataatsimiititamit
pingaartinneqartoq nioqqutissanik eqqussuinermi akitsuusiineq imatut pissasoq
nunatsinni namminermi tunisassiarineqarsinnaasut sapinngisamik
annertunerpaatinniarneqassallutik, taamaaliornikkut suliffissaqartitsineq
nunattalu avammut nioqquteqarnera iluaqusiivigineqarsinnaaqqullugit.
Taamaammat
nersutit ilivitsut affallu neqaasa, sullivinnit sullissivinnillu, neqit
aggorneqarnissaannut atortunik akuerisaasunik peqartunit, eqqussorneqartut
akitsuussivigineqartarnerisa peerneqarnissaa Akileraartarnermut ataatsimiititamit
tamakkiisumik isumaqatigineqarpoq.
Nersutit
ilivitsut affallu akitsuuserneqartarnerisa peerniarneqarnerata siunertaraa
Kalaallit Nunaanni suliffissaqartitsiniarnerup siuarsaavigineqarnissaa,
taamaaliornikkut neqinik Kalaallit Nunaanni agguisarnermik suliaqarneq
kajungernarnerulersinniarlugu.
Taamaammat
Akileraartarnermut ataatsimiititamit siunnersuutip suliffissaqartitsiniarnermut
sunniutigisinnaasai misissuiffigineqarput, siunnersuummut tusarniaanermi akissutitut
tiguneqartut naliliivigineqarnerisigut.
Tusarniaanermi
akissutigineqartut tunuliaqutaralugit siunnersuutip
suliffissaqartitsiniarnikkut sunniutissaviisa eqqoqqissaartumik
isummerfiginissaat ajornakusoortuuvoq. Ataatsimulli isigalugu naliliisoqarpoq
nersutit ilivitsut affallu neqaat eqqarsaatigalugit eqqussuineq annertusissasoq,
tamatumalu malittaanik suliffissaqartitsineq annertusissasoq.
Akileraartarnermut
ataatsimiititamittaaq misissuiffigineqarpoq suliffeqarfiit qassit, neqinik
agguinissamut atortussaateqareersut, taamaaliornissamut
akuerineqarsinnaanersut, aamma neqaarniat ilinniartitaanerannut
ilinniarteqqinneqartarnerannullu periarfissat pillugit.
Naalakkersuisunut
ilaasortamit ilisimatitsissutigineqarpoq, ilisimatinneqarsimalluni Kalaallit
Nunaanni sulliviit 20 missaannik amerlassusillit nersutit ilivitsut affallu
neqaannik agguisarnermik naammassinnissinnaassasut. Matumani pineqarput
neqaarniarfiit, pisiniarfiit angisuut neqaarniarfittallit sullissiviillu.
Ilinniartitaanermut ilinniarteqqiisarnermullu
periarfissat pillugit Naalakkersuisunut ilaasortaq ilisimatitsivoq neqinik
agguisarneq INUILI-p inuussutissalerinermut ikiortinik ukiunik marlunnik
sivisussusilimmik tunngaviusumik ilinniartitsisarneranut ilaasoq.
Ukiuni
marlunni tunngaviusumik ilinniartitaanermut nangissutitut neqaarniatut
ilinniarneq Danmark-imi pisarpoq. Naalakkersuisuni ilaasortaq
ilisimatinneqarsimavoq INUILI maannakkorpiaq allanngortiteriffigineqarlunilu
annertusaavigineqartoq neqaarniartutullu inimik nutaamik 1999-imi aasaanerani
atuilerumaartoq.
Taamaalilluni
ilinniarfik initigut sulisoqarnikkullu periarfissaqalersussaavoq
ilinniartitaanermik ilinniarteqqiisarnermillu nersutit neqaasa nunatsinnut
eqqussorneqartut annertusineqarsinnaanerannut atasumik pisariaqarnerasut
ingerlatsinissamut. Tamanna siunniulluinnarneqartoq.
Piffissamik
INUILI-p atuuffigisimasaani, tassalu 1990-ikkunni neqaarniatut ilinniartut
marluk ilinniagaqarnermik naammassinnissimapput. Sulilu tallimat
ilinniagaqarnermik ingerlataqarlutik.
Akileraartarnermut
ataatsimiititamik naatsorsuutigineqarpoq nersutit nassullit ilivitsut affallu
aamma puulukit nujuitsut neqaat eqqussorneqartut eqqussuinermut akitsuutit
atorunnaarsinneqarpat amerlissasut. Tamatuma peqatigisaanik akileraartarnermut
ataatsimiititaliamit naatsorsuutigineqarpoq neqit naammassillugit
suliarineqarsimasut taakkununnga ilanngullugit neqit aggukkat
eqqussorneqarnerat annikillissasoq.
Akileraartarnermut
ataatsimiititaq isumaqarpoq tamanna nunatta niuerneragut pitsaasumik
sunniuteqassasoq. Tunisassiammi naammassillugit suliarineqarsimasut kilo-mut
akiat nersut ilivitsut affallu neqaannit kilo-mut akiusumit anginerummata.
Akileraartarnermut
ataatsimiititaliaq isumaqatigiissoq matumuuna Inatsisartunut inassuteqarpoq
nioqqutissanik eqqussuinermi akitsuutit pillugit Inatsisartut inatsisaata
allanngortinneqarneranit Inatsisartut inatsisissaattut siunnersuut
akuereqqullugu.
Daniel
Skifte, Aningaasaqarnermut Ineqarnermullu Naalakkersuisoq:
Ataatsimiititaliap
isumaliutissiissutaani ersarilluarpoq inatsisissatut siunnersuut
peqqissaartumik misissorluarlugulu suliarineqarsimasoq.
Tamannalu
pillugu Naalakkersuisut sinnerlugit akileraartarnermut ataatsimiititaliaq
qutsavigaara. Oqaatigissavaralu akileraartarnermut ataatsimiititaliap
isumaqatigiilluni nioqqutissanik eqqussuinermi akitsuutit pillugit
Inatsisartut inatsisaata allanngortinneqarneranik Inatsisartut inatsisissaattut
siunnersuummut tunuliaqutaanera naammagisimaarakku.
Ataatsimiititaliaq
inatsisissamut siunnersuummut tunngatillugu apeqquteqaateqarmat sapinngisara
najoqqutaralugu apeqqutit akissuteqarfiginiarnikuuakka. Nuannaarutigaara
apeqqutit akissutillu pineqartut tunngavigalugit aammalu tamakkuninnga
suliallit paasisimasallillu oqaaseqaaataat tiguneqarsimasut tunngavigalugit
neqinik eqqussuinermi akitsuuteqartitsinerup allanngortitsivigineqarnissaa
taanna politikkikkut amerlasuunit isumaqatigineqarmat.
Naalakkersuisut
sinnerlugit inassutigissavara siunnersuutip taamatut iluseqarluni pingajussaaneerneqarnissaminut
ingerlateqqinneqarnissaa, tassanilu akuersissutigineqarnissaa.
Laannguaq
Lynge, Siumup oqaaseqartua:
Nioqqutissanik
eqqussuinermi akitsuutit pillugit Inatsisartut inatsisaata
allanngortinneqarneranut Inatsisartut inatsisissaattut siunnersuut pillugu
Siumumi siullermeerneqarnerani oqaaseqaativut innersuussutigalugit siunnersuut
taperserlugu, taama iluseqarluni pingajussaaneerneqarnissanut ingerlaqqinnissaa
taaseqataaffigissagatsigu nalunaarutigissavara.
Siverth
K. Heilmann, Atassutip oqaaseqartua:
Nioqqutissanik
eqqussuinermi akitsuutit pillugit Inatsisartut inatsisaata
allanngortinneqarneranut Inatsisartut inatsisissaattut siunnersuut
akileraartarnermut ataatsimiititaliap isumaliutissiissutaa Aningaasaqarnermut
Ineqarnermullu Naalakkersuisup akissutaatulli Atassummit nalilerumavarput.
Atassummit
suliap uumma siullermeerneqarnerani oqaaserisavut innersuussutigalugit iluarisimaarluinnarparput
nioqqutissanik eqqussuinermi akitsuusiinerup peerneqarnissaa imatut sunniuteqassammat
nunatsinni namminermi tunisassiarineqarsinnaasut annertussusaat aammalu
suliffissaqartitsinermut, nunattalu avammut nioqquteqarneranut
iluaqutaassammat.
Taamatut
naatsumik Atassummit oqaaseqarluta isumaliutissiissut oqaaseqarfigaarput,
pingajussaaneerneqarnissaminullu ingerlanneqarnissaa akuersissutigalugu.
Manasse
Berthelsen, Inuit Ataqatigiit oqaaseqartuat:
Puulukit
nersussuillu timaat affaatillugit ilivitsuutillugillu nunatsinnut
eqqunneqarneranni akitsuutaasa peerneqarnissaat Naalakkersuisut siunnersuutaat,
akileraartarnermullu ataatsimiititaliamit suliarineqarsimasup
isumaliutissiissummilu saqqummiunneqarnerat Inuit Ataqatigiinnit ima
oqaaseqarfigissavavut.
Siullermik
Inuit Ataqatigiit nuannaarutigalugu oqaatigissavarput ataatsimiititaliap
akileraarutit pillugit isummernerat. Tassa akitsuusiisarneq ima pissasoq
nunatsinni nammineq tunisassiarisinnaasavut annertunerpaatinniarlugit.
Inuit
Ataqatigiinnilu ima paasivarputtaaq, nunatsinni sanaartortakkatta assingi
tikisittakkavut akitsuusersornerisigut nunatsinni tunisassiorsinnaaneq
annerpaaffimminiitinniarneqassasoq. Tamannalu Naalakkersuisunit aamma
isumaqatigineqalersimasoq maluginiarparput.
Taamatut
naatsumik oqaaseqarluta neriuutigissavarput nersutinik agguinissamik periarfissallit
una inatsisissatut siunnersuut atorluarumaaraat, taamaalillunilu nunatsinni
suliaqarnerulersitsisumik. Inatsisissatullu siunnersuut taamatut isikkoqarluni
pingajussaaneerneqarnissaa aammattaaq innersuussutigissavarput.
Anthon
Frederiksen, Kattsusseqatigiit:
Suliaq
siullermeerneqarnerani Kattuseqatigiit sinnerlugit oqaaseqaatikka
innersuussutigalugit eqqaasitsissutigissavara Kattusseqatigiinniit
pingaartilluinnaratsigu kalaalimernit allallu nunatsinni pissarsiarineqarsinnaasut
tamakkiisumik atorluarneqarnissaat.
Taamaattumik
nioqqutissat nunatta avataanit tikisinneqartartut soorunami pisariaqartitsineq
naapertorlugu sapinngisamik annikinnerpaaffissaaniitinneqarnissaat pingaaruteqartoq
erseqqissaassutigisariaqarsoraara. Minnerunngitsumik nunatsinni aningaasat
kaaviiaartinneqarneranni isumaqarnerusumik ingerlatsineq anguneqassappat.
Taamaattumik
inatsimmut allannguutissatut siunnersuut neqinik avataaniit tikisinneqartartunik
annertunerulertitsissanngippat aammalu pisisartunut akikinnerulersitsinermut
kinguneqassappat siunnersuummut taaseqataasinnaallunga
nalunaarutigisinnaavara.Kisianni tamanna qulakkeerneqassangippat
taaseqataasinnaanera apeqqusertariaqarsoraara.
Daniel
Skifte, Aningaasaqarnermut Ineqarnermullu Naalakkersuisoq;
Anertunerusumik
oqaaseqaqqinnanga taamaallaat partiit Kattuseqatigiillu oqaasiinut qujavugut,
malunnarpoq siunnersuut tamakkiisumik illersorneqartoq.
Oqaaseqartoq
kingulleq qularpalulaannguaraluarpoq, taamaattoq tassa tamakku qulassutai
pisussaanngillat, taamaattumik nuannaarutigaara tamakkiisumik
tapersersorneqarmat Naalakkersuisut siunnersuutaat. Qujanaq.
Karl
Lyberth, Akileraarnermut Ataatsimiititami Siulittaasoq:
Saqqummiussisunut
uangattaaq qujavunga. Naatsuararsuarmik Kattusseqatigiinneersoq Anthon
Frederiksen-i akuerseqataaniassammat oqaatigissavara akileraartarnermut
ataatsimiititaliaminngaanniit naatsorsuutiginnginnatsigu qallunaamernit
tikisittakkat taamatut inatsisiliornitsinni amerlineqarnissaat, kalaalimernit
maani atortakkavut eqqorneqarlutik.
Taamaattumik
naatsorsuutigaara akuerseqataallutit taaseqataajumaartutit.
Anders
Andreassen, Ataatsimiinnermik aqutsisoq:
Taavalu
taasinialissaagut. Qinnuigissavassilu akuerseqataagussi, akerliugussi
taaseqataanngikkussiluunniit nikueqqullusi. Akuersisut: 30, akerliusut: 0,
taaseqataanngitsut: 0.
Taamaalilluni
ullumikkut oqaluuserisassaq immikkoortup 22-p, aappassaaneerneqarnera naammassivoq
pingajussaaneerneqarnissaminullu ingerlaqqissalluni.
Oqaluuserisaq
naammassivoq.