Oqaluuserisassani immikkoortoq 23-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 28. september 1998 nal.
17.23
Ataatsimiinnermik aqutsisoq: Inatsisartut Siulittaasuat Anders
Andreassen.
Daniel Skifte, Aningaasaqarnermut Ineqarnermullu Naalakkersuisoq:
Raajanut akitsuutit pillugit Inatsisartut
inatsisaata allanngortinneqarnissaanut siunnersuut Naalakkersuisut sinnerlugit
matumuuna saqqummiuppara.
Pineqartoq tassaavoq raajanut akitsuutip 1
procentimiit 3 procentimut qaffanneqarnissaa. Ilutigitillugulu
siunnersuutigineqarpoq ilanngaatip atorunnaarsinneqarnissaa, tamakkulu tamarmik
1. januar 1999-imi tassanngaanniit aallarnerluni atuulissasoq
siunnersuutigineqarluni.
Siunnersuut Naalakkersuisut 1999-imut
aningaasanut inatsisissatut siunnersuutaanni ilaavoq, taamaattumillu
siunnersuutip aningaasartai tassani ilaatinneqarlutik.
Akileraarutinik akitsuutinillu
qaffaannginnissaq Naalakkersuisut siunertaralugu, aningaasaqarniarnermut
pisariaqartuusoraat isertitassat amerlissutissaannik siunnersuuteqarnissaq,
tassalu pingaartumik kilisaatit atorlugit raajarniarnermit.
Ilaatigut pissutaavoq taamatut
raajarniartut, 1990-ikkut aallartinneranni soorlu atorunnaarsitsinermut
atatillugu pisortanit annertuumik tapiiffigineqartareerlutik maanna ingerlalluartutut
isigisariaqarmata.
Ilaatigullu, aammalu pingaartumik taamatut
raajarniartut, namminneq pissutaanerullutik aalisarnermik
nakkutilliisoqarnermut pilersinneqarsimasumut aningaasartuutinik
aningaasalersuisuunissaat pissusissamisoormat.
Siunnersuummi takuneqarsinnaavoq tamanna
1999-imiit aallarnersumik isertitassat 14 mio. kr.-inik qaffannissaannik
kinguneqassasoq, taamaalillutillu raajanut akitsuutitigut ukiumut isertittakkat
katillutik 20,5 mio. kr.-iussallutik, tassa 1999-imi ukiunilu
missingersuusiorfiusuni.
Taamatut oqaaseqarlunga Naalakkersuisut
sinnerlugit, raajanut akitsuutit pillugit Inatsisartut inatsisaata
allanngortinneqarneranik Inatsisartut inatsisissaannut siunnersuut
Inatsisartunut oqaluuserisassanngortippara, aammalu Akileraartarnermut
Ataatsimiititaliami Aningaasaqarnermullu Ataatsimiititaliami
oqallisigineqareerpat aappassaaniigassanngortillugu.
Lars Karl Jensen, Siumup oqaaseqartua:
Nunatta imartaani raajarniarnerit
annertusarneqaleruttorfianni kilisaatit amerlaqisut pisassat tunitsivissallu
killeqalernerisa kingunerisaanik aalisarunnaarsinneqarput, nunatta
aningaasatigut ingerlatsinerani annertuumik nammakkerneqarnermik
kinguneqartumik.
Allatut aaqqissuussinikkut kilisaatit
kattunneqarnerisa nalaanni aningaasatigut ingerlatsinermi ilorraap tungaanut
aallariaqqinnissaat siunertaralugu taamanikkut raajanut akitsuut atuuttoq
annertuumik appartinneqarpoq, qularutissaanngitsumik kilisaatit
akilersinnaasumik ingerlaleqqinnerannut iluaqutaasumik.
Siumumiit aalisarnermi pissutsit
allanngornerat maluginiarparput kilisaatit amerlassutsimikkut pisassanut
akilersuisinnaassutikkullu naleqquttutut maannakkut nunatsinni
angerlarsimaffeqarmata.
Ukiut kilisaatinut pitsanngorsaanikkut Aanerteriffittut pitsaasutut@ inissisimalernerat isiginiarlugu 1999-imut
aningaasanut inatsisissap suliarinerani Naalakkersuisut raajanut akitsuutip
1%-imiit 3%-imut qaffatsinneqarnissaanik siunnersuutaat Siumumit
paasilluarparput.
Paasilluaraluarlutigu kilisaatit
maannakkut 15-iusut aningaasanik 14-15 mio. kr.-inik nalilinnik ataatsikkut
raajanut akileraarusiinikkut, nammakkerneqarnissaat annertuumik pisussatut
takorloorlugu, Siumumiit tamatuma ataatsimiititaliani susassaqartuni
misissorluarneqarnissaa inassutigaarput.
Siumumit taamatut oqaaseqarluta suliassap
aappassaaneerneqannginnerani Akileraartarnermi Aningaasaqarnermilu
Ataatsimiititaliami oqaluuserineqarnissaa inassutigaarput.
Siverth K. Heilmann, Atassutip oqaaseqartua:
Aallaqqaammut Atassummiit
oqaatigissavarput, Naalakkersuisut raajanut akitsuutip 1%-imiit 3%-imut
qaffannissaanik aammalu ilanngaammik atorunnaarsitsinissamik siunnersuutaat
imaaliinnarlugu akuersaarsinnaannginnatsigu.
Tassami oqaluttarfik manna atorlugu
aalisartut atugaat eqqartortuarpagut, pingaartumik ukiuni makkunani
aalisartortatta inuuniarnermikkut aningaasarsiornikkut akilersuiniarnermikkullu
ilungersunartorsiornerat utikulunneqartuartoq eqqarsaatigalugu.
Ullumikkummi qangamut sanilliullugu
kilisaatit ikilisimaqaat, ilai kattussuupput, raajat angissusai milliartorput
malitsigalugulu akii appariartorlutik. Avammut tuniniaaneq ajornartorsiorfioqaaq,
pisisartuttalu aningaasaataasa appariartornerat aalisartunut landskarsimullumi
sunniuteqartaqaaq.
Aalisarnermi siuarsaanermi annertuumik
nunarput aningaasatigut pilliuteqarsimanera silatusaarneruvoq, sulili
kilisaatit ikiliartuinnassanngippata ingerlatsinermi aningaasartuutaannik
artukkiinaveersaartariaqarpugut.
Atassummiit Akileraartarnermut
Ataatsimiititaliaq qinnuigissavarput akitsuummik qaffaanerup avataani
raajarniarnermut avammullu tuniniaanermut sunniutigisinnaasai
nalilersorluaqqullugit.
Taamatut naatsumik oqaaseqarlunga
Akileraartarnermut Ataatsimiititaliami Aningaasaqarnermullu
Ataatsimiititaliami aappassaaneerneqannginnermini oqallisigineqarnissaa
isumaqatigaarput.
Manasse Berthelsen, Inuit Ataqatigiit oqaaseqartuat:
Naalakkersuisut raajanut akitsuutip
qaffanneqarnissaat kiisalu akitsuutip naatsorsorneqartarneranut ukiumut
ilanngaataasartup 4 mio. kr.-iusup peerneqarnissaanut siunnersuutaat Inuit Ataqatigiinni nalilersorluareerlugu ima
oqaaseqarfigissavarput.
Inuit Ataqatigiinni sukumiisumik
siunnersuut nalilersoqqissaarsimavarput, ilaatigut Royal Greenlandi Polar Seafoodilu
sinniisaasa tusarniaarnermi isummat aninneqartut ilanngullugit.
Unali oqaatiginngitsoortariaqanngilaq,
tassa ukiuni kingullerni 100 mio. kr.-it atorlugit avataasiutinik
aalisariutikillisaanerup landskarsip aningaasalersorsimammagu. Aningaasaliussat
tamakku avataasiutaatillit aningaasartuutikinnerulernerannik
kinguneqanngitsoorsimassasut qularinngilarput, Naalakkersuisunummi ilaasortap
saqqummiinermini oqaatigaa, avataasiutit sinneruttut ingerlallualersutut
oqaatigineqarsinnaanngormata. Avataasiortullu siorna naatsorsuutaat
najoqqutaralugit tamatuma ilumut anguneqarsimanera
sinneqartooruteqarluarsimanerisigut takuneqarsinnaavoq.
Inuit Ataqatigiit soorunami
arajutsisimanngilarput ulluni makkunani Asiap kangiani aningaasarsiornikkut
ajornartorsiorfiunera. Aningaasarsiorneq taama ingerlavoq
iluatsisimaarfiusarluni aammali naammaginannginnerulersarluni. Kinali oqarpa
pissutsit ulluni makkunani atuuttut taamaaginnassasut?
Raajanullu avataani tunisassiarineqartunut
akitsuutip qaffanneqarnissaatigut inuttat eqqorneqannginnissaat
Naalakkersuisut pisortaqarfiini teknikkikkut isumannaarniarneqassasoq Inuit
Ataqatigiinnit ilanngullugu piumasarissavarput.
Raajanut akitsuummut qaffaanermut
tunngavilersuutigineqartut ilaat, tassa avataasiortut nakkutilliisoqarnermut
akileeqataasariaqarnermik, qanoq pissusissamisoortiginersoq soorunami
oqallisigineqarsinnaavoq. Nakkutilliisummi aalisariutini nunanit allaneersunik
kiisalu maannakkut qaleralinniarnermi atorneqartalerput, soorunalumi eqqorneqartussat,
tassa kilisaatit aperipput, sooq kisimik nakkutilliisoqarnermut
akilersuissanerlutik.
Inuit Ataqatigiinnit siunnersuut
tamakkiisumik isumaqatigaarput, innersuussutigissalluguli Akileraartarnermut
Ataatsimiititaliamut ingerlateqqinneqassasoq, tusarniaanermi kiisalu maani
oqaaserineqartut nalilersuiffigissammatigit.
Anthon Frederiksen, Kattusseqatigiit:
Nunatsinni aalisarnerup
aningaasarsiornikkut isumalluutigineqarnera pingaarnersaangallartillugu aammalu
ukiuni kingullerni raajartassat ikilingaluttuinnarnerat eqqarsaatigalugit
siunnersuut Kattusseqatigiinniit isumaqatiginngilluinnarpara, aammami
isumaqanngilanga aalisarnermik nakkutilliisut akissarsiaat aalisartunut
akiligassanngortinneqartariaqartut.
1998-imut Inatsisartut ilassutitut aningaasaliissutinut
inatsisissaasa aappaannut siunnersuummi takuneqarsinnaavoq, nuna tamakkerlugu
akileraarutitigut isertitassat 15 mio. kr.-inik amerlanerunissaat
naatsorsuutigineqartoq, tamannali 1999-imut aningaasanut inatsisissatut
siunnersuummi ilaatinneqarani, taamaattumik Kattusseqatigiit sinnerlugit
kaammattuutigissavara, aningaasat pineqartut 1999-imut aningaasanut inatsimmi
missingersuutit allanngortinneqarnerisigut iluarsineqassasut.
Taamatut naatsumik oqaaseqarlunga suliap
aappassaaneerneqannginnerani KNAPK-ip, APK-ip aamma Raajarniat Peqatigiiffiata
tusarniaaffigineqarnissaat piumasaraara, tamatumallu kingorna Inatsisartut
Akileraartarnermut Ataatsimiititaliaanni oqaluuserineqarnissaa inassutigalugu.
Daniel Skifte, Aningaasaqarnermut
Ineqarnermullu Naalakkersuisoq:
Siullermik ataatsimoortumik partiit
oqaaseqartuinut qujavunga. Oqaatigissavara akileraarnermut tunngasortaa uanga
oqaaseqarfigisassagakku, kisianni aalisarnermut tunngasortaa Aalisarnermut
Naalakkersuisup tamakkununnga tunngasortaa oqaaseqarfigissammagit.
Taamatut Naalakkersuisut sinnerlugit
partiit oqaaseqartuinut qujariarlunga aammalu Kattusseqatigiinnut.
Taalaassavara soorlu saqqummiussininni oqartunga
taamatut akitsuusiiniarneq Naalakkersuisut ataatsimut aningaasanut
inatsisissaannut 1999-imut tunngasumik attuumassuteqarmat. Soorunami
naatsorsuutigisimavarput taamatut isornartorsiuinerit imaluunniit
naammagittaalliornerit pingaartumik avataasiutilinnit qaffatsinneqarumaartut,
taamaakkaluartoq aningaasanut inatsisissap saqqummiunnerani erserpoq, aamma
isertitaasinnaasunik allanik pissarsiniartariaqartugut. Taamaattumillu taanna
siunnersuutit ilagaat, taannalu taamatut inerneqarteriarlugu partiit
ataasiakkaat oqaasiinut imatut oqassaanga:
Siumuminngaanniit tikkuarneqartoq tassa,
Siumumiit aalisarnermi pissutsit ullumikkut allanngorsimanerat
maluginiarsimammassuk tamanna assut isumaqatigaara, pissutsit qangaanerusuminngaanniit
ullumikkut allangorsimapput, aalisagartassat imaluunniit aaqqissuussineq
siornatigut allaagaluartoq ullumikkumut nuussimasoq aallaavigalugit.
Maluginiarpara Siumup
nalilersueqqissaarnissaq kissaatigigaa, taannalu suliassaq aamma
susassaqartunit ingerlateqqinneqassasoq naatsorsuutigaara.
Atassutip oqariartuutaa imatut paasivara,
Atassutip imaaliallaannaq akuersaarumanngilaa, kisiannili
oqaloqatigiinnertalimmik kinguneqartissinnaassagunarlugu. Taamatut
naliliininnut tunngaviuvoq Atassutip oqaaseqartua oqarmat; Akileraartarnermut
Ataatsimiititaliaq nalilersuilluaqqaartariaqartoq apeqqummi tassani,
taamaattumik taamatut oqariartuut Atassumminngaanniit nalilerpara,
qujassutigalugulu.
Inuit Ataqatigiit oqaasiat, inuttat
pillugit teknikkikkut aaqqiiniartariaqarnermik oqariartuut taanna
maluginiarpara kaammattuutaasoq. Aammali maluginiarpara Inuit Ataqatigiit
siunnersuummut tamakkiisumik isumaqataasut.
Kattusseqatigiinninngaanniit
erseqqissorujussuuvoq, Kattusseqatigiit siunnersuummut akerliusut, taanna tusaatissatut
tigussavarput. Kisianni aamma eqqartuinermini ilaatigut paatsuuinermik
aallaaveqartumik eqqartuinera maluginiarpara, tassami ilaatigut aningaasanut
inatsisissami ersereerpoq, kisianni aningaasanut ilassutissamut inatsimmiigani,
taamaattumik taamatut naatsorsuutigaara Kattusseqatigiit paatsuuinermik
aallaaveqartumik taamatut oqaaseqassasut.
Annertunerusumik
oqaaseqarfigissanngilakka, qujassutigeqqilluguli siullermeerinermi partiit
oqaaseqaataat aallaavigalugit suliassaq ingerlaqqissinnaassammat.
Anders Andreassen, Inatsisartut Siulittaasuat:
Taamaalilluta ullumikkut oqaluuserisassap
immikkoortup 23-p siullermeernera naammassivarput, aappassaaneertinnagulu
Aningaasaqarnermut Ataatsimiititaliami suliarineqarallassaaq tamatumalu
kingorna aappassaaneerneqarumaarluni.
Oqaluuserisaq naammassivoq.