Oqaluuserisassani immikkoortoq 24 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders Andreassen.
Daniel Skifte, Aningaasaqarnermut Ineqarnermullu Naalakkersuisoq:
Pisortani atorfinitsitseriaatsit pillugit nassuiaat Naalakkersuisut sinnerlugit matumuuna saq-qummiutissavara.
Tamanna pillugu Inatsisartuni marloriarluni oqallittoqareerpoq, nassuiaasiortoqarpoq. Oqallinnerit taakku tunngavigalugit nassuiaammi Pisortani atorfinitsitseriaatsit Pisortat ingerlatsiviisa suleriaasiinut naleqqiullugit, pingaarnerutillugit naliliiviginiarneqarput aamma tjenestimandinik atorfinitsitsisarneq immikkut eqqarsaatigaluguttaaq.
Nassuiaatip saqqummiunneqarneranut atatillugu imaa taamaatsillugu pingaarnersiuiffigissan-ngilara, tassa nassuiaat imartooq Naalakkersuisullu maannamut kaammattuutigisaat Inatsisartunut ilaasortanut innersuussutigissagakkit.
Taarsiullugu, Naalakkersuisut sinnerlugit pissutsit, Naalakkersuisut kaammattuutigisaannut tunngavigineqartut naatsumik erseqqissaateqarfigissavakka. Naalakkersuisut kaammattuuteqarnerannut siusinnerusukkut Inatsisartut oqallittarsimanerisa kingunerisaat, tamakkuninngalu inerniliinerit, nassuiaatip matuma kingunerisaanik misissuinikkut inerniliinernut naliliinernullu sanilliullugit tunngavigineqarput.
Nassuiaatissaq Kommunit Kattuffiannut Atorfillillu Kattuffissuannut ulluinnarni NAK-mik taaneqartartumut- tusarniaassutigineqarpoq. KANUKOKA-p oqaaseqaatai nassuiaammut ilanngunneqarput, kisianni NAK-o oqaaseqaatai tusarniaanermut akissutip tunngaviulluinnartumik imaqarnera pissutigalugu, tamakkerlugit ilanngussatut ilanngunneqarlutik. Pisariaqartippara-+li NAK-p oqaaseqaatai oqaaseqarfigilaassallugit.
Siulliullugu erseqqissassavara, Inatsisartut namminneq kissaateqarnerat tunngavigalugu nassuiaat ukiumik ataatsimik siuartinneqarmat. Erseqqippormi suli ukiumik ataatsimik piffissaqarsimagaluarutta nassuiaat sukumiinerusumik suliarineqarsinnassagaluarmat, taamatullu kattuffiit soqutigisaqaqatigiillu allat sulinermut toqqaannartumik peqataatissinnaassamagaluarlutigit. Taamaakkaluartoq Naalakkersuisuni isumaqarpugut nassuiaammi kaammattuutigineqartut sukumiisumik suliarilluakkamillu tunngaveqartut. Nassuiaammi inerniliinerit kaammattuutillu taamaalillutik Inatsisartut siusinnerusukkut inerniliisarnerinit allaanerunngillat, kisianni tamakkuninnga erseqqissaanerullutik.
Tassaana Pisortat ingerlatsiviisa suleriaasii atorfinitsitseriaatsit annertunerusumik minnerusumilluunniit eqaallisakkat pillugit eqqarsaatersuutit kiisalu innuttaasut katitigaanerat ilinniartitaanermullu tunngatillugu periarfissat eqqarsaatigalugit, atorfinitsitseriaatsit pillugit nassuiaammi pingaarnerutillugit eqqarsaatersuutit Naalakkersuisut kaammattuutaannut ersarissumut pissu-taasut.
Kiisalu Naalakkersuisut pissusissamisoortissimavaat, atorfinitsitseriaatsit taamatullu minnerunngitsumik taakku pillugit siusinnerusukkut eqqarsaatersuutigineqartarsimasut sukumiilluinnartumik oqaluttuarineqarnissaat. Taamaammat assersuutigalugu assersuutigalugu immitsinnut aperisariaqarpugut, assersuutigalugu ingerlatsiveqarfiit suleriaasianni sulisinnaasulluunniit ilinniartitaanikkut pissusiini pissutsit ukiut qulit 20-illuunniit matuma siornatigut atorfinitsitseriaatsimut aalajagiisuusaarsimasut suli maannakkut atugaanersut. Aalajagiinissat isumatuut siumullu sammititat pisinnaassappata, taamaalilluni pisariaqarpoq manna tikillugu ineriartorsimanerup ilisimanissaa paasineqarnissaalu.
Siullermik erseqqissarneqassaaq inuiaqatigiinni naqisimaneqaratik aalajangeeqataasinnaassuseqartuni sulisut namminneq aningaasarsiatigut atorfinitsitaasarnikkullu atugarisaminnut sunniuteqaqataanerusussaammata. Tamanna imatut paasineqassanngilaq, Namminersornerullutik Oqartussat Kommuninilu Pisortani sulisut 10.000-it missaaniittut, Naalakkersuisut isumaqatiginninniarfigisartagaanniittut tamarmik ataasiakkaarlutik akissarsiatik pillugit sulisitsisuminnut isumaqatiginninniartassasut, tmanna inuit ataasiakkaat inuiaqatigiilluunniit akuerisinnaanavianngilaat. Suliat assigiit assigiimmik akilersorneqarnissaat tamatta kissaatigaarput, sulisup suminnganneernera apeqqutaatinnagu aamma sulisup nunap suatungaani sulinera apeqqutaatinnagu.
Tamatumunnga peqatigitillugu akissarsianut aningaasartuutaasartut inuiaqatigiinnut akisoorujussuupput. Naalakkersuisut isumaqatiginninniarfigisartagaannaanni ukiumut 2 mia.-it akissarsianut akiliutigineqartarput. Tamanna isumaqarpoq maani nunami uagut tamatta innuttaasutut akileraartartutullu soqutigissagipput, akissarsianut aningaasartuutaasartut allanngoriartornerat nakkutigalugu ilisimaarineqassasoq. Akissarsianullu akiliutigineqartartut taakku sapinngisamik naapertuilluartumik agguaanneqartassasut.
Taamaammat inuit ataasiakkaat annertunerpaamik soqutigisamminnik ingerlatsinissaata inuiaqatigiillu aningaasaqarnerata pisariaqalersippaat, akissarsiat atorfinitsitsinermilu atugassarititaasut Pisortani sulisitsisut sulisullu kattuffiisa akisussaassuseqartut akornanni isumaqatigiinniarnikkut aalajangersarneqartarnissaat.
Ullumikkut marlunnik atorfinitsitseriaaseqarpugut. Atugassarititaasut Naalakkersuisut sulisullu kattuffiisa akornanni isumaqatigiinniutigineqartarlutik tassa:
-Isumaqatigiissutit tunngavigalugit atorfinitsitaasarnerit aamma
-Tjenestemanditut atorfinitsitaasarnerit.
Pisortat ingerlatsinerata qanoq ingerlanneqartarneranut naleqqiullugu, atorfinitsitseriaatsit taakku marluk, arlaata siunertamut tulluarneruneranik naliliinissamut, apeqqutit arlallit akissutissarsiniartariaqarput:
-Aaqqiagiinngissuteqartoqartillugu tamakkununnga tunngasut suliumajunnaartoqarner attassinnaavaat?
-Sulisumit immikkut ilumoorfiginnittoqarnissaa, taamaalillunilu sulisup immikkut illersorneqarnissaa pisariaqartinneqarpa?
-Atorfinitsitseriaatsimik toqqaanermut ilinniartitaanerup qanoq pissusia, qanoq pingaaru teqartigaa?
-Siunissami atorfinitsitseriaatsinik toqqaasarnissatsinnut ullumikkut isumaqatigiissutit tunngavigalugit, tujenestimanditulluunniit atorfillit taama amerlatiginerat qanoq sunniuteqassava?
Tamakku tunngavigalugit Naakakkersuisut kaammattuutigaat, pissutsit qanoq itsillugit, isumaqatigiissutit tunngavigalugit atorfinitsitseriiaseq aamma tjenestemanditut atorfinitsitseriaaseq atorneqartariaqarnersut.
Atorfinnut assigiimmilluunniit sulialinnut ullumikkut tjenestemandimut taarsiullugu isumaqatigiissuteqartartunut, isumaqatigiissutit tunngavigalugit atorfinitsitsisarneq pingaarnerutillugu atugaasariaqarpoq. Tamatumunnga atuuppoq sulisunut ullumikkut tjenestemanditut atorfeqartitaasunut, tamakkunani assigiiaartumik naliginnaasumik ilinniagaqarsimanissamik piumasaqaateqarfiusuni. Sulisunulli taakkununnga pisariaqartitaavoq, sulisut kattuffiata Kalaallit Nunaanni angerlarsimaffillip sulisunut taakkununnga pineqartunut isumaqatiginninniussitaanissaminik qinnuteqaateqarsimanissaa, tamatuminngalu pigisaqarnissaa. Tamatumani assersuutigalugu allaffissornermi atorfiit ilaat soorlu: assistentitut, overassistentitut, allafimmi fuldmĉgtigit, immikkoortortamilu pisortatut, meeqqat atuarfiini ilinniartitsisutut peqqissaasutullu atorfiit tikkuarneqarsinnaapput.
Tjenestemanditut atorfinitsitseriaaseq atorfinnut assigiinnilluunniit sulialinnut, sulisup immikkut sulisitsisumut ilumoorfiginninnissaanut piumasaqaateqarfiusunut, peqatigitillugu sulisup sulinerminik ingerlatsinera naalakkersuinikkut allatulluunniit pinngitsaaliiniartoqartinnagu immikkut isumannaarneqassasoq kissaatigineqartillugu naleqqunnerpaassaaq. Tamatumani immikkut pineqarput qullersaasut atorfii soorlu: Namminersornerullutik Oqartussani pisortat Kommunaldirektĝrillu.
Tjenestemandioreersunut allamik atorfininnikkut atorfik taamaattoq imaluunniit atorfik qaffariarfiusoq pineqartillugit, tjenestemanditut atorfeqaannarnissamut periarfissaqartariaqarpoq.
Nassuiaammi kingumut qiviarnermi takuneqarsinnaasutut manna tikillugu ilisimaaralugu pingaarnerusutigut atorfinitsitseriaatsitut toqqaasarnermi siunertap anguniarneranut iliuusissaqartoqartarsimanngitsoq isumaqarnarpoq. Nalaatsornikkut atuukkallartunillu pissutsit atorfinitsitseriaatsimik toqqaasarnerni aalajagiisuukkajunnerusarsimapput.
Naalakkersuisut neriuutigaat siunnerfigalugulu, atorfinitsitseriaatsinik atuisarneq maannakkumiit eqqarsaatigilluakkanik tunngavilersorluakkanillu oqimaalutaareernikkut pisalissasoq. Tamatumani eqqarsaatigineqassammat Namminersornerullutik Oqartussat Kommunillu pitsaanerpaamik innuttaasut sullissinnaajumallugit, sulisinnaasut pisariaqartinneqartut sulisussariniarlugillu sulisoriinnarniarlugillu ineriartortittussaammatigit. Tamatumunnga peqatigitillugu sulisinnaasunut taakkununnga akiliutigineqartartut inuiaqatigiit aningaasaqarnerat eqqarsaatigalugu aalajangersimasunik sulialinnut ataasiakkaanut tunngatillugu akisussaassusilimmik naapertuilluartumillu pissuseqassapput.
Taama naatsumik oqaaseqarlutik Naalakkersuisut nassuiaat Inatsisartunut oqallisigisassanngortippaat, Inatsisartullu qinnuigissavavut nassuiaammi allassimasutut atorfinitsitseriaatsimut aalajangiisarnermut tunngavissat isumaqatigisinnaneraat oqaatigeqqullugu.
Inatsisartut nassuiaammi kaammattuutaasut isumaqatigisinnaassappatsigit, Naalakkersuisut kaammattuutit piviusunngortinniarlugit pisariaqartinneqartunik sulissuteqalissapput.
Laannguaq Lynge, Siumup oqaaseqartua:
Pisortani atorfinitsitseriaatsit assigiinngitsut pillugit, nassuiaat saqqummiunneqartoq, siorna tjenesatemanditut atorfinitsitseriaatsip atorneqarnissaa pillugu, kiisalu Namminersornerullutik Oqartussani sulisoqarnerup katitigaanera, suliffissaqartitsinikkullu ingerlatsineq pillugit nassuiaatit 1997-imi ukiakkut saqqummiunneqartunut nangitsinertut Siumumiit isumaqarfigaarput.
Tjenestemandit atorfeqarnerat pillugu, 1996-imi taamanikkut Inatsisartunut ilaasortap maanna Naalakkersuisunut Siulittaasup hr. Jonathan Motzfeldtip, Siumut, siunnersuuteqarneratigut suliassaq tjenestemanditut atorfeqarnermut tunngasoq aallartippoq.
Nassuiaammi atorfinitsitseriaatsit assigiinngitsut maannamut atorneqartut sukumiisumik qulaajaaffigineqarsimapput. Siumumi taama sukumiitigisumik pisortani atorfeqartut, atorfinitsitseriaatsillu pillugit nassuiaasoqarnera nuannaarutigaarput.
Isumaqarpugut siunissami suliffeqarnerup iluani iluarsaaqqinnissami suliaqartussanut nassuiaat paasissutissarpassuarnik imaqartoq atorluarneqarumaartoq.
Atorfinitsitseriaatsit atorneqartut ataasiakkaarlugit oqaaseqarfiginngikkaluarlugit maluginiarparput, nassuiaammi aammattaaq pingaartillugu Namminersornerulluni Oqartussani atorfeqartut tjenestemanditut allatullu atorfeqartitaasut ilinniagaqarnermikkut tunuliaqutaat sukumiisumik ilanngullugu nassuiarneqarsimasoq.
Naalakkersuisut anguniakkaminnik ersitsumik piviusunngortitsiniarlutik atorfinitsitseriaatsinik eqaannerusunik siunissami anguniagaqarnerat Siumumit paasilluarlugu tapersersorparput. Tassungalu atatillugu suliat assigiit assigiimmik akissarsiatigut aaqqiiffigineqartassasut Siumumi suli anguniartuagassatut isumaqarfigaarput, naak sumi inunngorsimaneq naapertorlugu akissaasersorneqarneq qaangiutereeraluartoq, suliffimmi allatigut atugarisat pitsaanerulersinnissaanut anguniagaqartuarnissaq pisariaqarpoq. Tamanna aamma Naalakkersuisut siunissami isumaqatiginninniartarnissani anguneqartussatut siunnerfigereersimagaat nassuiaammi erseqqissarneqarpoq, Siumup sulisoqarnermut politikkikkut anguniagaanut naleqquttuummat taperserluarparput.
Naalakkersuisut isumaqatigaavut oqarmata siunissami ilinniarluarsimasut amerliartortuartut atorfinittartussaq eqqarsaatigalugit, tjenestemanditut atorfinitsitsisarnerup qimakkiartorneqarnissaa pipallattumik pissanngitsoq.
Siumumi isumaqarpugut Naalakkersuisut piginnaatinneqassasut ilinniagartusiartorneq ilutigalugu tjenestemanditut atorfinitsitsisarnerat atorunnaarsikkiartorneqarnissaata sukkassusissaa aalajagiiffigissallugu isumaqatigiinniarfigisassatik suleqatigalugit. Siumup kaammattuutigissavaa Naalakkersuisut ukioq 2001-imi sumut killissimaneq ilisimatitsissutigissagaat.
Siorna tjenestemandeqarneq pillugu nassuiaammut Siumumit oqaaseqarnitsinni inassuteqarpugut, tjenestemanditut atorfinitsitsisarneq siunissami qimakkiartorneqassasoq. Tamanna suli isumagaarput, kisianni peqqissaartumik torersumillu qimakkiartonissaa Siumup aamma kissaatigaa.
Taamaakkaluartoq kaammattuutigineqartoq, atorfiit Namminersornerullutik Oqartussat qitiusumik allaffeqarfiini qulliunerusutut atorfiusut kiisalu Kommunaldirektĝrit, tjenestemanditut suli atorfiussatut Siumumi eqqarsaatigisinnaavarput. Tassungalu ilanngullugu aamma isumaqatigaarput, tjenestemandioreersut allami atorfininnikkut imaluunniit atorfimmut qaffasinnerusumik atorfininnikkut suli tjenestemanditut atorfeqarnissaminnik periarfissinneqassasut.
Tjenestemanditut atorfeqarnerup qimakkiartorneqarnerani danskit aallartereerput. Ilinniartitsisut nunatsinni suli tjenestemanditut atorfeqartut Danmarkimi isumaqatigiissutit malillugit atorfeqartitilereerput. Taamaattoqarneralu nunatsinni ilinniartitsisunik atorfinitsitsiniarnermi ajornartorsiutaaleqqunagu, Siumumi isumaqarpugut Naalakkersuisut periarfissinneqartariaqartut, ilinniartitsisut atorfinittartussat Danmarkimi isumaqatigiissutit aqqutigalugit atorfeqareersimappata, nunatsinni atorfinitsinneqarneranni aamma taamatut atugaqartinnissaat anguniarlugit isumaqatigiinniutiginissaannut. Siumumi isumaqarpugut suli ukiorpaaluit ilinniatitsisunik tikisitanik pisariaqartitsisussaalluta, taamaattumik nunatsinni atorfinitsitaanermikkut Danmarkimi atorfeqarnerminni atatillugu ajornerusumik atugassaqannginnissaat isumannaartariaqarpoq. Tassani aamma pensionisiaqarnikkut atugassarititaasut annaasaqaataanngitsumik pisinnaanissaat ilanngullugu isumaqatigiissutigisariaqartoq Siumut isumaqarpoq.
Siunissami Kommunit ilinniartitsisunik atorfinitsitsisalertussaammata, tamakku tamarmik isumannaarneqarsimanissaat kissaatigaarput. Siumumi ilinniartitsisut kattuffiisa marluk kattunnerat, siunissami isumaqatigiinniartarnissamik ilaasortani sinnerlugit Naalakkersuinit isumaqatigiinniartartuunissaa isumalluarfigigipput oqaatigissavarput.
Naalagaaffimmi tjenestemandioreersumik kimilluunniit Naalagaaffimmit Aattartortoqartillugu@ taassumap aamma pensioniminut ajoqutaanngitsumik atugaqarnissaat isumannaarneqartassasoq Siumumi isumaqarpugut.
Tjenestemanditut atorfinitsitsisarnerup qimakkiartorneqarnerani atorfinitsitseriaatsit allat eqqunneqarnissaanni maanna tjenestemandisut atorfeqartut kattuffikkaarlugit, imaluunniit Nunatsinni Atorfillit Kattuffissuat ikaarsaariarnermi aammalu siunissami atorfinitsitseriaasiulersussani, sulisut suliaminni ingerlatsinerminni immikkut illersorneqarnissaannik qularnaarisunik aamma imaqartunik Naalakkersuisut isumaqatigiinniutigissagaat Siumumi isumaqarpugut. Ilanngullugu oqaatigissavarput Siumumi taama pisoqarnissaani inuiaqatigiit eqqornerlunneqannginnissaat pingaarteqigipput.
Siuliini oqaaserisavut tunngavigalugit erseqqissaatigissavarput, ilinniartitsisut, peqqinnissaqarfimmi, niuernermi allaffinnilu sulisut tjenestemandisut atorfeqartarumaarnissaannik, tassungalu taarsiullugu isumaqatigiissutit naapertorlugit atorfinittalernissaat Siumumit siunnerfigineqaqqullugu tapersersoratsigu, inassuteqaatigerusullutigulu Naalakkersuisut piginnaatinneqassasut inuit immikkut piginnaneqartut naleqquttumillu piumasaqaatitaqartunik ilinniagaqarsimanngikkaluartut, immikkut akuerineqarlutik tjenestemanditut atorfinitsinneqartarnissaat pigiinnarneqassasoq. Aammalu oqareernitsitut inuit amerlanerujartuinnartut ilinniagaqaleriartornerat ilutigalugu, tjenestemanditut atorfinitsitsisarnerit qimakkiartornissaat malittarissagaat aalajagiiffigisarlugulu.
Taama oqaaseqarluta Siumumi pisortani atorfinitsitseriaatsit pillugit nassuiaat tusaatissatut tiguarput.
Otto Steenholdt, Atassutip oqaaseqartua:
Nassuiaat takisooq immikkoortortarissaarluni ersarissumik nassuiaatinik imalik atuarlugu paasisaqaammernartutuut Atassummiit nalilerumavarput.
Tamannali sioqqullugu Inatsisartuni ukiakkut 1996-imi nassuiaat alla tassalu tjenestemandeqarnerup ullumikkut atugaanerata iluaqutai ajoqutaalu pillugit maani inimi oqallisigisimavarput. Taamanilu nassuiaatitut saqqummiunneqartoq Atassummiit pitsaasumik, sukumiisumik erseqqissumillu taallugu aamma nalilersimavarput.
Taamanikkut saqqummiussamik nalilersuiniarnitsinni annertuumik soqutiginninnitsinnut pissuterpiaasimavoq Atassummi arlaqaratta tjenestemanditut atorfeqarnerup atugassarititaanik timikkut tarnikkullu misilittagaqarluartunik, atorfiup piumasarisaanik oqimaatsunik nuannersunillu aqqusaagaqartarsimasunik.
Atorfinitsitseriaatsit aamma allatulli nutaanngorsarneqarfii ukiuni makkunani nalaatassanngorsimapput, Inatsisartullu aamma eqqaamassavaat taamani oqallinnermi kissaatigisimagatsigu tjenestemanditut atorfinitsitsisarneq kisiat pinnagu atorfinitsitsitseriaatsillu aamma allat ilanngullugut Naalakkersuisut nassuiaateqassasut. Tamanna piviusunngortinneqarsimavoq, Inatsisartunullu ukiuakkut 1997-imi oqallisigineqarmat partiit isumaqatigiissutaat nassuiaammi ersarissumik saqqummiunneqarsimasut Atassummiillu iluarisavut makku issuaaffigilaartigit:
Tjenestemanditut atorfinitsitseriaaseq siunissami atorfinitsitseriaatsinut allanut atugaa lerumaartussanut sanilliuttarlugu isiginiarneqassasoq.
Aalajangersakkat kaammattuutillu kattuffinnik oqaloqateqarluarnikkut kiisalu Naalak kersuisunik aamma Inatsisartunik atassuteqarluareernikkut pisassasoq.
Naligiimmik pineqartunut pissuseqartarnissaq, tassa atorfinitsitat assigiimmik sulisut assigiimmik akissarsiaqassasut. Najugaqavissut aggersitallu assigiimmik atugaqartinne qassasut, kiisalu aamma avinngarusimanerusunut atorfinitsitassat assigiimmik aamma atugarineqassasut.
Partiini tamanit taamanikkut isumaqatigiissutaasimasut ulloq manna tikillugu Atassummiit pitsaasutut nalilertuarpavut, taamaattorli aamma Atassuterpallannerluta nunap aningaasaqarnera puiunngilarput. Isumaqatigiissutillu qulaani taajukkavut ima ilagajuttarpavut, tassa Atassumi: soorunami nunap aningaasatigut nammassinnaasai aallaavigalugit tamakku piviusunngortinneqarsinnaassasut. Taamatullu aamma ilassisarnerput Atassummiit naatsorsuutigilluinnarparput, partiinit tamanit ilalersorneqassasut.
Ilinniartitsisussaaleqinerup nalaani paasisatta ilagigujaat, Danmarkimi ilinniartitsisut tjenestemanditut atorfinitsitsisarnerit qimallugit isumaqatigiissutilli atornerulerlugit ingerlanneqarnerulersimasut.
Nunatsinni ilinniartitsisut tjenestemanditut atorfillit suli amerlaqaat. Atassummiillu qujarupparput, Naalakkersuisut Kommunillu kattuffiata ilungersortumik suliniarnerat NAK-miit aamma paasineqarluni ima pitsaatigisumik tjenestemandit periarfissinneqarsimammata allaat namminneq aalaja ngersinnaallugu tjenestemanditut atorfeqarnertik piumagunik ingerlatiinnarsinnaagaat, isumaqatigiissutit malillugit atorfinitsitsisarnerup Danmarkimisulli nunatsinnut eqqukkiartuaarneqarnerani.
Atassummiit qularutiginngilarput ukiorpassuunngitsut qaangiunneranni ilinniartitsisut nunatsinniittut isumaqatigiissutit malillugit atorfinitsinneqartalissasut. Tamanna Ilinniartitsisut Kattuffiinut nunatsinniittunut danmarkimiittunullu suli ukiorpanni isumaqatigiinniartartussanut ilorfaallaataassaaq, tassami Atassummiit ilimagigatsigu ilinniartitsisunik Danmarkimeersunik suli ukiorpanni atorfissaqartitsiuarnissarput.
Saqqummiussinitta aallaqqaataani tjenestemanditut atorfinitsitsisarnermik nersorinnissupput oqaatigereerlugu, taava Atassummiit nalunaarutigissavarput, maannakkut nunatsinni tjenestemandisut atorfinitsitsisarneq siunissami atorfinitsitsisarnissanut taamaallaat ikaarsaariarfittut atugassattu naatsorsuutigisariaqassasoq. Isortussanngilarpulli ikaarsaariarneq taanna Atassummiit ukiuni ikittuinnarni atuuttussatut nalilinnginnatsigu, naak ilaatigut tusagaqartaraluarluta tjenestemanditut atorfeqartut ilaat pisinnaajunnaarnissartik allaat tikillugu atorfimminni sivisuallaamik issiauartartut, tusangiasaarneqarluartartullu inuusuttut piaartumik atorfininnissaraluannik mattussisutut taaneqartarlutik.
Ilinniartitsisussaaleqinerup nalaani Danmarkimilu ilinniartitsisunik aggersitserusunnerup nalaani, Atassummiit Naalakkersuisunut ilungersortumik qinnutigissavarput, Nunatsinni Danmarkimilu atorfinitsitseriaatsit marluk pingaartumik aamma ilinniartitsisut eqqarsaatigalugit maluginiarluaqqullugit, ilinniartitsisoq qallunaaq isumaqatigiissutit naapertorlugit atorfinitsinneqarsimasoq nunatsinnut suliartoruni nunamini isumaqatigiissutit atorlugit atorfeqarnera aamma nunatsinni atortiinnartaqqullugu. Taamatut inattuinitsinni aallaavigaarput, inuup pineqartup nunatsinniinnermini taamatut atorfinitsitaasimanini qimassagaluaruniuk nunaminut uteqqikkuni pensioneqalernissaminut ajoqutigisussaammagu. Tassa imatut paasillugu, nunatsinni ukiuni pingasuni tjenestemanditut sulisinneqarsimaguni maani nunatsinni periaatsit atorlugit, Danmarkimut uteruni ukiunik pingasunik pensioneqalernissaa ilanngaaserneqarsinnaammat.
Nunatsini illoqarfiit tamangajalluinnarmik Danmarkimi illoqarfinnik ikinnguteqartarput. Soorluuna Kommunit Atlandtikoq qulaallugu isumaqatigiissusiorsinnaasariaqalersut, illoqarfinnit ikinngutiminnit atorfilinnik attartoraangamik pensionisiassakkut ajunaarutaanngitsumik isumaqatigiissuteqartassallutik. Tamanna Naalakkersuisuinnarnut sammitinngilarput, aammali Kommuninut isumaginiallaqqullugu. Taamatut aporfissaqarpallaanngitsumik suliniuteqarluni isumaqatigiissusiorsinnaaneq Naalakkersuisunut Atassummiit sakkortuumik misissoqquarput.
Atorfinitsitsiniarnissani pinngitsoorneqarsinnaajunnaarpoq Kommunit Namminersornerullutillu Oqartussat suleqatigiilluinnarnissaat.
Uani nassuiaammi tjenestemandituinnaq atorfinitsitseriaatsit eqqartorneqanngillat, tassungali assigusut ilaatigut isumaqatigiissuteqarluni atorfinitsitsisarnerit aamma eqqartorneqarlutik. Tamakkuninnga nalilersuitilluta Atassummiit isumaqarluinnarpugut, qanorluunniit ililluni tjenestemanditut atorfinnik tassanngaannartumik atorunnaarsitsineqassangaluarpat, pisortat sulisussarsiortarnermikkut ajornartorsiutaat aaqqiivigineqarsinnaanngitsoq.
Qanorluunniit peqatigiiffiit piginnaatitaaffinnik inatsisitigullu illersorneqartunik ataqqinnitsigigaluaraanni, inuiaqatigiit aamma sulianik unitsitsinerit nalaanni isumannaatsumik ingerlaqqittariaqarnerat eqqarsaatigiuartariaqarmat. Tjenestemanditullu atorfinitsinneqarsimasut ulloq manna iluatinnaqutaasa aamma tamanna ilagaat, suliumajunnaarsinnaannginnamik.
Atassummiit isumaqartuarpugut, qanorluunniit aamma sumiluunniit tjenestemandinut tunngasunik pisoqartillugu, tjenestemandit kattuffii saneqqunneqarsinnaanngilluinnartut, tamatigullu taakku peqatigalugit suliniutit suulluunniit aamma nutaalerisut ingerlanneqartuartariaqartut.
Nassuiaammi takusinnaavarputtaaq tjenestemandit Namminersornerulluni Oqartussani Kommuninilu sulisut qanoq amerlalluinnartigisut. Suliaminnit katataalissanngippata tamatigut pikkorissartinneqartuarnissaat Naalakkersuisuniit isumagineqartuartariaqarpoq.
Atorfinitsitsiniartut assortorneqarsinnaanngilluinnartumik suliffiup akisussaassutsimik peqarfiup ingerlalluarnissaa eqqaamajuartariaqarpaa. Taamattaarlu atorfininniartup aamma atorfimmut ingiarneqarani iserniassaguni ilinniarluarsimaneq tamatigut sakkugisariaqarpaa, imaanngitsoq qullersami piumasaa kisiat kusanartumik naammassissallugu kisiannili aamma minnerunngitsumik inuit sullitassami naammagisinnaasaanik sullinneqarnissaat tamatigut eqqarsaatigiuassallugu.
Soorlu aallaqqaataani oqaatigereeripput nassuiaat soqutiginarluinnartuuvoq, tamaallu ataatsimut isigalugu inerniliinerit kaammattuutillu sulisoqarnermut Pisortaqarfimmit Inatsisartunik innersuunneqartut ataasiakkaarlugit nalilersoreerlugit Atassummiit oqaatigissavarput, Naalakkersuisut Pisortat suliassaqarfiini akissaatitigut atorfinitsitsisarnikkullu Naalakkersuinikkut ingerlatsinerminni anguniakkatut pingaarnertut Inatsisartunut nittagaat isumaqatigigatsigit, kiisalu atorfinitsitseriaatsit atugassarititallu taakkununnga tunngasut aallaavissatut oqaatigineqartut Atassummiit isumaqatigalugit.
Taama takisoorsualiorata Atassummiit nalunaarutigissavarput Pisortat atorfinitsitseriaatsit pillugit nassuiaat tusaatissatut Atassummiit tigugipput.
Johan Lund Olsen, Inuit Ataqatigiit oqaaseqartuat:
Pisortani atorfinitsitseriaatsit pillugit Naalakkersuisut nassuiaataat Inuit Ataqatigiinniit soqutigalugu misissorsimavarput imaattunillu oqaaseqarfigissallutigu:
Siullermilli ajuusaarutigalugu oqaatiginngitsoortariaqanngilarput uggornartuummat nassuiaaat Nunatsinni Atorfillit Kattuffissuat qanimut suleqatigineqarneratigut suleqatigineqarsimanngimmat. Tamanna Inatsisartut kissaatigisareersimasaannut naapertuutinngimmat, taamaattumik Naalakkersuisut tamanna Inatsisartunut nassuiaatigisariaqarpaat Namminersornerullutillu Oqartussat Kattuffissuillu akunnerminni pitsaasumik siunissami aamma oqaloqatigiittuarsinnaajuarnissaat ajornanngippallu suleqatigiissinnaanissaat Naalakkersuisut tungaanniit aamma pingaartinneqarpata.
Nassuiaammi Inatsisartut siusinnerusukkut peqqusereersimanerat malillugu aatsaat 1999-imi ukiakkut aamma saqqummiunneqartussaasimangaluarpoq, maannali saqqumiunneqarmat ima paasisariaqarnerpoq Naalakkersuisutta Atorfillit Kattuffissuannit suleqateqarluni suliaqarnissartik eqiagilluinnarsimagaat imaluunniit Naalakkersuisunukua allarluinnarmik siunertaqarlutik nassuiaat manna tuaviuuttariaqarsimanerpaat ? Apeqqutit taamaattut Naalakkersuisut akissutigisariaqarmatigitut Inuit Ataqatigiit isumaqarpugut neriuutigivarpullu maanna aamma pisinnaajumaartoq.
Taamatullu anersaaruluuteqareerluta oqartariaqarpugut siunissami suli isumaqatigiissutit tunngavigalugit atorfinitsitseriaatsit aammalu tjenestemanditut atorfinitsitseriaatsit atorneqarnissaat aamma uagut kaammattuutigerusussagatsigit, sorlerli atorneqartarumaassanersoq pisortanit maannakkumiit eqaatsumik eqqarsaatigilluagaanerusumik tunngavilersorluagaanerusumillu pisalissasoq Inuit Ataqatigiinniit kissaatigilluinnassagatsigu, kissaatiginngilarpummi Pisortani atorfinitsitseriaaseqarnitsinni qeratavallaamik ingerlatsisoqartarnissaa, pisariaqalersillugumi atorfinitsitseriaatsit taakku marluk suli siunissami periarfissaajuartariaqarsorivavut.
Taamaatuumik tjenestemanditut atorfinitsitseriaaseq atorunnaarsivinneqarsinnaanngimmat aamma erseqqissaatigerusussuarput, tamannaavorlumi aamma nassuiaammi tikkuarneqartortaaq. Maannamummi suli sulisorpassuaqarpoq, naak aalajangersimasumik ilinniagaqanngikkaluarlutik suliamik allatigut piginnaaneqarluarnermikkut maannamut atorfigisaminnik ingerlatsilluareersinnaasunik. Tamakku amerlanertigut isumaqatigiissutit tunngavingalugit atorfinitseriarneqarsinnanngimmata taamaammat tjenestemanditut ivertinneqarsinnaajuartariaqarsorivavut.
Nassuiaammi maluginiarneqarluni tikkuarneqarportaaq tjenestemanditut atorfinitsitseriaaseq annertunerusumik atorniarneqartartoq sulisunik nunaqavissunik imaluunniit inunnik immikkut attuumassuuteqartunik atorfinitsitsisarnerni. Taamaattumik nunaqavissunik nunatsinnilu pissutsinut pissusiviusunut paasisimanilluartunik peqartuarnissarput qulakkeerniartuassagutsigu, aamma eqqumaffigeqqissaartariaqarparput tjenestemanditut atorfinitsitseriaaseq sanninngaaginnarluta atorunnaarsinniarsinnaassannginnatsigu, sukkavallaamimmi taama iliulissagaluarutta inuiattut immitsinnut aamma aaginnarsinnaassagatta.
Nassuiaammi ilaatigut tjenestemanditut atorfinitsinneqartartussatut tikkuarneqarput faglĉreret allaffissornermilu atorfillit soorlu siunnersortit, Kommunini ingerlatsivinni pisortat, sulianik ingerlatsisarfiit assigiinngitsut (sagsbehandler), allaffiit pisortaat, immikkoortoqarfiit pisortaat allallu. Inuit Ataqatigiit tamanna annertunerpaatigut isumaqatigisinnaavarput kisiannili aamma oqaatigissallugu faglĉreret taakkuusinnaasarmata isumaqatigiissutit tunngavigalugit atorfiusinnaasunut aamma ivertinneqarsinnaajuartariaqartut, taakkumi amerlanertigut ilinniagaqartuugajuttarmata. Taamaattorli ilinniagaat aamma assigiinngisitaarsinnaasarput, ilinniarfinni sorlerni atuartitsisutut atorfeqarnerat aamma apeqqutaalluinnarluni. Taammaattumik pissutsini tamakkunani pisortat atorfinitsitsiniarnerminni eqaatsumik periuseqartarnissaat kaammattuutiginarpoq, faglĉrerimmi ilaat maannamut isumaqatigiissuteqarneq tunngavingalugu atorfinitsinneqartareerput ilaallu tjenestemanditut atorfeqartitaasarlutik.
Atorfiilli allat eqqarsaatigalugit tassa pingaarnerusutigut assigiimmik ilinniagaqarsimanissamik assigiimmillu suliaqarnissamik piumasaqaateqarfiusunut imaattariaqarsorivarput, isumaqatigiissutit tunngavigalugit atorfinitsitsisinnaaneq pingaarnerutillugu atugaalertariaqarmat ullumikkut tjenestemanditut atorfinitsitseriaatsimut taarsiullugu. Tamanna ullumikkut allaffissornermi atorfillit ilaannut atuutereerpoq soorlu, assistentinut, overassistentinut, allaffinni fuldmĉgtiginut, immik
koortortanilu pisortanut aammalu peqqissaasunut peqqinnissaqarfimmi sulisorineqartunut.
Maannakkut nutaarsiassatut Naalakkersuisunut meeqqat atuarfiini ilinniartitsisunut tjenestemanditut atorfinitsitseriaatsimut taarsiullugu isumaqatigiissutit tunngavingalugit atorfinitsinneqartalernissaat siunniunniarneqalerpoq. Inuit Ataqatigiit oqaatigerusupparput siunniussaq tamanna isumaqatiginarsinnaagatsigu siullermik, meeqqat atuarfianni matuma kingorna eqqissisoqarneranik tamanna kinguneqarsinnaappat, aappaattullu tamanna Nunatsinni Atorfillit Kattuffissuannit aamma ilalernartuutinneqarsinnaappat.
Taamaattumik Naalakkersuisut apererusuppavut maannakkut NAK-p tungaangut tamanna paaseqatigiinnissuteqartariaqarnera eqqarsaatigalugu aamma qulakkeerniarsimaneraat, aammalu Ilinniartitsisut Kattuffittaarsuat nutaaq AIMAK@ tamatumani qanimut aamma isumasiorsimaneraat? Tamannami nassuiaammi erseqqissumik naammassiniarneqaqqaarsimanersoq takuneqarsinnaan ngilaq, taamaattumillu maannakkut aamma akineqartariaqarluni Naalakkersuisut tungaanniit.
Ilinniartitsisut eqqartortillugit taamaattumik paaserusunnartoq uaniipportaaq Naalakkersuisut taava matuma kingorna naatsorsuutigineraat isorliunerusuni avinngarusimasunilu ilinniartitsisussaaleqiuarneq maanna aamma qaangerneqarsinnaalissasoq tjenestemanditut atorfinitsitseriaatsip taamatut qimanniarneqalernerani.
Pisortani atorfinitsitseriaatsit pillugit nassuiaammut tunngatillugu Inuit Ataqatigiinniit matumani pingaartillugu naggataarutaasumik oqaatigerusutarput aamma uaniippoq; tassa isumaqatigiissutit tunngavigalugit atorfinitsitseriaatsip siunissami annertunerujartuinnartumik atorneqaleriartornissaani pingaartilluinnaratsigu soraarnerussutisiaqalernissamut katersisarnerup pisortanit ajornerulersinniarsarineqannginnissaa. Taamaattumik tjenestemanditut atorfeqartitaanermit atorfinitsitseriaatsimut allamut nuuttoqarneratigut maannakkut sulisorisatsinnut atugassaritinneqartut ajornerulersinniarneqassanngilluginnarput.
Taamatullu oqaaseqareerluta nassuiaat manna naak amigaateqarnini pissutigalugu naammaginanngilluinnaraluartoq NAK-mi qanimut suleqaterineqarsimanngimmat Inuit Ataqatigiit taamatut oqaaseqarfigivarput.
Anthon Frederiksen, Kattusseqatigiit:
Atorfinitsitseriaaseq pillugu siusinnerusukkut Inatsisartunut nassuiaatit saqqummiunneqartarneranni oqaaseqaatikka ilaatigut imaattumik Kattusseqatigiit sinnerlugit oqaaseqaateqassaanga;
Pisortat suliffeqarfiutaanni atorfinitsitsisarneq pillugu oqallinneq sivittulersumi ingerlanneqarpoq, aammalu tusarniaanerit assigiinngitsut ingerlanneqartarsimallutik, kisianni paasiuminaatsippara suliaq kingullermik Inatsisartunit oqaluuserineqarnerata kingorna tusarniaanerit tamakkiisumik sooq ingerlanneqarsimannginnersut ?
Tassami Inatsisartut ukiukkulli 1997-imi suliap kingullermik oqaluuserineqarmat ilaatigut ilinniartitsisoqarniarnermut pissutsit najummatsisimanarnerat ilisimaneqareersimangaluarmat, taamaattumik Naalakkersuisut suliamik paamaarussisimanerat akueriuminaappoq minnerunngitsumik Inatsisartut aalajangernerat, tassalu nalunaarusiornissamut susassaqartut kattuffiit suleqatigalugit ingerlanneqartariaqartoq piumasaqaatigineqareersimammat.
Taamaammat ilaatigut NAK-p naammangittaalliornera paasilluarlugu aammalu suliap ingerlateqqinnerani ilisimatitsissutigineqarsimannginnera pakatsissutigalugu pissusissamisoortumik taamatut naammangittaalliorsimaneq oqaatigisariaqarpara.
Tjenestemanditut atorfinitsitsisarneq maannamut atuuttoq arlalitsigut ajunngitsunik aammalu ilaatigut naammanginavinngitsunik imaqarpoq, taamaattumik isumaqatigiissutit naapertorlugit atorfinitsitsisalersinnaaneq tunngavissiuunneqartariaqarpoq, soorunami illuatungeriinnut naammanginartumik atungassarititaasut eqqarsaatigalugit.
Matumani suliap nukingiunneqarnera aappaatigut akueriinnarneqarsinnaanngikkaluartoq, taamaattoq atorfeqarfinni pissutsit ilaatigut ilungersunartut eqqarsaatigalugit allatut ajornartumik suliap naammassineqarnissaa nukiginnarsisutut oqaatigisariaqarpoq. Taamaattumik Inatsisartut siusinnerusukkut isummiussimasaat ilaatigut tjenestemanditut atorfeqartitsinerup iluatinnaatai ilanngullugit aaqqiisoqarnissaa anguniarlugu Naalakkersuisut suliniuteqarnissaat Kattusseqatigiit sinnerlugit kaammattuutigissavara.
Naggataatigut ukiuni arlalinni ajornartorsiutaajuarsimasup tassalu nunaqavissut Pisortat suliffeqarfiutaanni qullersatut atorfinitsinneqartalernissaat anguniarlugu Pisortat suliffeqarfiini tikisitani qullersaqartut nunaqavissunik taakkua piaarnerusumik taarseriartuaarneqarnissaat siunertaralugu,soorunami ilinniagaqarsimaneq tunngavingalugu nunaqavissup periarfissani ilinniagaqarsimanerminut naapertuuttumik inissisimanera naapertorlugu pisortap tulliatut atorfinitsitsisoqartalernissaa, -tassa nunaqavissumik- ilanngullugu qulakkeerniarneqartariaqartoq Kattusseqatigiinniit aamma kaammattuutigissavarput, naassaanngitsumimmi pisortat suliffeqarfisa ilaat tikisitanik pisortaqartuaannarsinnaanngillat. Imaanngilaq tikisitaluarama, kisianni piffissaq ilaatigut qangali qaangiuppoq taamaaliornissamut.
Naalakkersuinikkummi anguniakkanut ilaavoq, tikisitat nunaqavissunik taarseriartuaarneqarnissaat taamaattumik taamatut aalajangiussinissaq pissusissamisuuginnartussaavoq.
Taamatut naatsumik oqaaseqarlunga nassuiaat tusaatissatut tinguara.
Daniel Skifte, Aningasaqarnermut Ineqarnermullu Naalakkersuisoq:
Siullermik partiit Kattusseqatigiillu oqaaseqaataannut qujavunga, ataatsimut katissagukku Naalakkersuisut nuannaarutigaat nalunaarusiaq tamakkiisumik taperserneqarmat. Suleriaqqinnissamummi taanna aallaaviginiagarput maanna partiit Kattusseqatigiillu tamarmik tunngaviatigut taperseraat maluginiarakku, tamanna nuannaarutigaarput aamma qutsatigaarput.
Kiisalu maannakkut partiit ataasiakkaat oqaaseqaataat oqaaseqarfigilaassavakka immaqa qalleqqiilaartassangaluarlunga.
Siumuminngaanniit tamakkiisumik isumaqatiginninneq nuannaarutigaarput. Ilumoorpoq Siumut oqarami 1997-imi ukiakkut saqqummiunneqartoq taanna nangillugulu-sooq maannakkut Naalakkersuisut saqqummiipput. Ajunngilaq. Taamaattumik nassuiaat, soorlu aamma partiit tamarmik oqaatigaat, kisianni pingaarnerusumik Siumukkut Atassutikkullu nassuiaat paasissutissarpassuarnik imaqarnerarnerarmagu, tamanna iluumoorpoq, aammalu pissusissamisoorluni taamatut oqarnissaq.
Aamma kaammattuutigineqarpoq tjenestemanditut atorfinitsitsisarnerup qimakkiartuaarnissaa. Taanna imatut oqaatigisariaqarpoq, Naalakkersuisut siunnersuutaat aamma Siumumit taperserneqarpoq.
Aamma maluginiarpara kissaatigineqarmat ukioq 2001-i, apeqqutip taassuma suleriaqqinnerup kingornatigut suleriaqqinnissaq kissaatigineqarmat. Isumaqarpunga maannangaaq oqaatigisariaqarlugu, aamma malugisinnaangakku partiit oqaaseqarnerminni tunngaviusumik isumaqatigigaat apeqqullu soqutigigaat, ilaatigut naak isorinnikkaluarlutik kisiannili apeqqutip pingaartinneqarnerat partiini takusinnaangakku, taanna Siumuminngaanniit siunnersuutaasoq aamma Naalakkersuisut Naalakkersuisunngorumaartussallu pingaartittariaqaraat, malitseqartumillu ataavartumik ilisimatitsisarnissaq Inatsisartunut pingaaruteqarmat, taanna isumaqarpunga pissusissamisoorluinnaqqissaartoq maannangaaq taperserlugu oqaaseqassagutta.
Ilaatigut aamma Kommunit siunissami ilinniartitsisunik atorfeqartitsisunngortartussaammata, taamaattumik taakkua suleqatiginissaat aamma kaammattuutigineqarpoq. Taanna aamma ajunngilaq, taamaattariaqarporlu. Kingusinnerulaartukkut Ilinniartitsisut Kattuffii marluk ataasiinnaan ngormata AImak@ ateqartumik, taanna oqaaseqarfigiumaarpara.
Taamaalillunga Siumup tapersiinera ataatsimut oqaatigalugu qutsatigaara. Atassumminngaanniit aamma oqaaseqaat nuannaarutigaara.
Atassut 1996-imi qanoq oqaaseqarsimanerminnik aammalu 1997-imi qanoq oqaaseqarsimanerminnik oqariartuuteqarpoq. Tamanna maluginiarluarpara, isumaqarpunga taamatut issuaaneq aamma tamatsinnut eqqaasitsisoq. Ilaatigut taamanerniit apeqqutit pingaaruteqartut pingasut naatsumik oqaatigissagukkit imaattut, aamma taakku Naalakkersuisut malinniarumammatigit tassaasut;
-tjenestemanditut atorfinitsitsisarneq ingerlanneqassappat, taava nutaamik iliussagutta sanilliussisarneq, taanna alaatsinaalluarneqartariaqartoq,
-aammalu Kattuffinnik oqaloqateqarluartariaqartoq
-aammalu assigiimmik akissarsiaqartitsineq, aamma taanna pingaartillugu Atassutip taammagu isumaqarpunga aamma taanna ilumoortoq, taannalu malinniartariaqartoq.
Aamma maluginiarpara Naalakkersuisut siunnersuutaat, ilaat tjenestemanditut ilai isumaqatigiissutit tunngavingalugit atorfinitsitsisarnissaq, taanna imaaliallaannaq anigornavianngitsoq. Taamaattumik aqagumut aningorneqartussatut isumaqarfigineqanngilaq, kisianni tassa ikaarsaariarfittut atorneqartariaqassaaq kisiannili ikaarsaariarfik sivisoratarsinnaammat, taamaattumik taassumap malinnaaffigilluarnissaa, soorlu Siumup oqaaseqarnerani taaneqartoq, imminnut taakku ataqatigiipput. Malinnaaffigilluariarutsigit taava qanoq ikaariartuaarneq sukkatiginersoq taanna angusinnaassavarput.
Taamaattumik oqaannassaanga Atassutip kaammattuutigimmagu, Kommunit suleqatiginissaat ilaatigullu allaat ajornartorsiornermi Kommunit namminneq illoqarfiit ikinngutitik suleqatiginiarnerulissagaat, soorlulimi aamma assersuutigiinnarlugu peqqinnissaqarfimmut ajornartorsiornermi taamatut pisoqartartoq. Taamaattumik taanna kaammattuut isumaqarpunga misissorluallaquneqarmat misissorluartariaqartoq, Kommunit ikinngutigiit imminnut suleqatigiillutik ajornartorsiuteqalerunik aamma tassannga kivitseqatigiissinnaanissaat. Tassami nalunnginnatsigu ukiuni aggersuni ilinniartitsisunik atorfinitsitsisarneq aamma Kommuninut tunniunneqartussaajumaassasoq. Taamaattumik taanna kaammattuut isumaqarpunga aamma taamatut ajunngitsumik tigusariaqaripput.
Naggataatigut oqaatigissavara, ilinniarluarsimaneq eqqartorneqarmat aammalu nassuiaat pitsaagineqarmat, tamanna soorunami nuannaarutigissagatsigu, aammalu taamatut tamakkiisumik tapersiimmata qutsatigeqqissavara.
Inuit Ataqatigiit oqaaseqaataat oqaaseqarfigilaassavara.
Oqareerpunga tunngaviusumik Inuit Ataqatigiit Naalakkersuisut suleriaqqinnissaat taperseraat, taanna qularnaappoq. Kisianni tassa aallartinnerat aallaavigalugu, oqaaseqarnissara immaqa ajuallaatigineqarsinnaangaluarpoq. Kisiannimi ilaatigut imatut oqarmata oqaaseqarfigisariaqarakku -oqatsit ilaatigut atorneqarput- Aeqiagilluinnarneqarsimagunartoq@ apeqqutinngortinneqarmat, tassa Naalakkersuisunit suliassat eqiagineqarsimasutullu-sooq nipeqartinneqarmat, imaluunniit apeqquserneqarluni. Immaqa Naalakkersuisut suminguna tunngaveqarnerlutik, immaqa allarluinnarminngooq, taava nassuiaat tuaviuuttariaqalersimagaat. Taanna apeqqutigineqarmat qularnaatsumik oqaatiginiaringa, soorunami Naalakkersuisut suliassartik eqiaginngilluinnarpaat.
Tupinnanngilaq 1996-imi 1997-imi maannakkullu suliarineqarmat, aamma takisuuliutiginagu oqaatigissavara, suliassaq inuiaqatigiinnut pingaartumik inerneqartariaqarmat, inuiaqatigiinnut pingaartinneqartariaqarmat ilinniartitaanerup meeqqallu atuarfiata ingerlaqqinnissaa, taava Naalakkersuisut nukipparujussuit atorlugit suliniuteqarsimammata. Siunertaq ataasiuvoq, meeqqat atuartinneqarnerata upernaaq inissisimaneraniit pitsaanerusumik angusaqarfiusumik, ilinniartitsisut pisariaqartipavut. Taamaattumillu apeqqut taanna Naalakkersuisut eqiasugatik siunnerfeqarlutilli aaqqinniarpaat. Taanna qularutigineqassanngilaq. Pingaartorujussuuvoq ilinniartitsisut aaqqiiviginissaat, upernaaq pisimasut uternagit, taanna mi siunertaarpiaarpoq taamatut suliassap nukingiullugu ukiumik ataatsimik siuartitsinermut Naalakkersuisut annertuumik suliniuteqarsimanerat. Ilaatigut ilinniartitsisut marloqiusamik nipeqarlutik oqaluttartut, assersuutigalugu Ilinniartitsisut Kattuffiat, -IK ulluinnarni taaneqartartoq- aappaalu GLF Grĝnlands Lĉrer Forening, taakkua qanoq pinerat uagut sussanngilarput, kisianni taakkua maannakkut katipput, taamaalillutillu nukiit nutaat periuseq nutaaq atorlugu Naalakkersuisut suliniarnissartik qilanaaraat.
Taamaattumik taanna IA-p oqaasia isumaqarpunga tunngavissaqanngitsoq.
Kisianni taamatut oqariarlunga oqaqqissaanga Inuit Ataqatigiit suleriaqqinnissamut tunngavissimmatigut , naak ilaatigut naammaginngikkaluaraat NAK-mik qanimut suleqateqarsimannginneq aammalu ilaatigut oqaatigalugu nassuiaat issuassagukkit oqaasii, naammaginanngilluinnarnerarmassuk. Taamaakkaluartoq innersuussutigissavakka ilaatigut IA-p 24.september 1997, tassa siorna ukioq ataaseq matuma siornatigut, oqaasiisa ilaani maannakkut oqaasiisa ilaani erseqqissumik oqaatigineqarmat, Inuit Ataqatigiit aamma peqataaffigissagaat tamakkua ajornartorsiutit qaangernissaannut ilaatigut assigiimmik akissarsiaqartitsineq, ilaatigut arnat angutillu naligiimmik pineqassasut aammalu maani nunaqavissut tikisitallu pineqarnermikkut aamma assigiissasut.
Ilaatigut taakkua issuaaffigilaaginnarlugit oqassaanga, inernilivissagukku ataatsimik, Inuit Ataqatigiit nalunaarusiaq akueraat, tamanna nnuannaarutigisariaqarparput.
Kattusseqatigiit aamma oqaaseqaateqarput. Kattusseqatigiit aamma tunngaviatigut siunnersuummut tapersiipput, tamanna nuannaarutigissavarput. Taamaattumik annertunerusumik oqaaseqarfigissanngilakka, tassami tassani innersuussutigissavakka aatsaannguaq IA-mut akissutikka. Taamatut innersuussininnut tunngavigaara ilaatigut Kattusseqatigiit oqarmata, Naalakkersuisut suliamik paamaarussisimanerat ilaatigut akueriuminaatsimmassuk. Suliaruna ukiumik ataatsimik siuartinneqartoq, inerniarneqapiloorlunilu paamaarussinertaqanngitsumik.
Maannakkullu ataatsimik inerniliissaguma Kattusseqatigiit aamma taanna isumaqatigimmassuk, taanna nuannaarutigaara.
Taamatut oqaaseqariarlunga oqassaanga, Naalakkersuisut suliniaqqinnissaminni Kattusseqatigiit kissaataat pisortap tulliatut atorfinitsitsisoqartalernissaanut tunngasumik aqaasertalik. Taanna soorunami misissussavarput nalilersorlugulu, kisianni tunngaviatigut allanngunngilaq aamma Kattusseqatigiit suleriaqqinnissamut tunngavissimmatigut. Taamatut qujavunga.
Naggaterpiaatigut partiinut tamanut tassani Siumut, Atassut, Inuit Ataqatigiit Kattusseqatigiillu oqaaseqarfigissavakka.
Isumaqarpunga imatut qularnaatsumik oqaatigisariaqarlugu; Kattuffissuaq NAK suleqatiginiarneqarsimavoq, aamma tusarniarneqarsimavoq. Taannarpiaq peqqutigalugu NAK-p akissutaa, nalunaarusiamut ilanngutiinnarnagu, Inatsisartunut tamakkiisumik allakkiaq tunniunneqarpoq, namminneq takusinnaaniassammassuk, namminneq nalilersinnaaniassammassuk NAK piffissap taamaalinerani qanoq isumaqarnersoq. Taamaattumik imatut oqartoqassappat NAK tusarniarneqarsimanngilaq, taava oqassaagut NAK tusarniarneqarsimavoq. Akissutaa qularnatsumik tamanut agguaanneqarpoq. Taanna pingaarpoq erseqqissassallugu.
Una soorlu oqaaseqaqqaarninni oqartunga, suli ukiumik ataatsimik piffissaqarsimasuugutta, isumaqatigiinniarnerit suleqatigiinnerit annertunerusut NAK-muinnaanngitsoq aamma Kommuninut KANUKOKA-mut ingerlanneqarsimassangaluarput, kisianni Naalakkersuisut pingaartinnerusimavaat, ilinniartitsisut ullumikkut inissisimanerat meeqqallu atuarfiata ullumikkut killiffia aallaavigalugu apeqqutip isumannaarnissaa. Oqaatigissavara maannakkorpiaq -partiit ilaannit apeqqutigineqarmat- Naalakkersuisut Ilinniartitsisut Kattuffittaavannut isumaqatigiinniarmata, suliaq taanna ingerlavoq, aqagu inernavianngilaq, kisianni ingerlanneqarpoq. Naalakkersuisunit pingaartinneqarpoq ilinniartitsisuni isumaqatigiinnginnerup aaqqiiviginissaa, taamaattumik maannakkut nalunaarusiami ilanngussorneqarsinnaanngilaq, assigiinngitsunillu qularnaatsunik oqaaseqartoqarluni, suliap ingerlanerani maani eqqartorsinnaanngilarput imatut imatullu iliussaagut. Maannakkut suliaq ingerlanneqartoq qularnaatsumik oqaatigissavara, neriuutigaarput taanna aamma piffissaq qanittunnguaq qaangiuteriarpat, piffissaq qaninnerpaaq qaangiuteriarpat taava tamanna naammaginartumik isumaqatigiissagunartoq.
Anginerusumilli maanngaanniit eqqartorsinnaanngilara maannakkut isumaqatigiinniarnerit ingerlatillugit.
Johan Lund Olsen, Inuit Ataqatigiit:
Aappassaanik oqaaseqarnissannut apeqqutit assigiinngitsut uanga Inuit Ataqatigiit sinnerlugit oqaaseqartutuut uterfigilaassavakka.
Siullermilli Aningaasaqarnermut Naalakkersuisumut Daniel Skifte-mut una oqaatigilaassavara, Inuit Ataqatigiit uagut pingaarteqigatsigu Kattuffissuarnik maani nunatsinniittunik suleqateqarluarnissaq. Taamaattuminguna aallarniinitsinni pakatsinartutut aamma oqaatigigipput, Nunatsinni Atorfillit Kattuffissuaq uani nassuiaammik suliaqarnermi peqataatinneqarsimannginnerat, taamaattumillu apeqqutitut saqqummiupparput. NAK-p peqataatinniarneqannginneranut sunaana patsisaasimasoq, taamaattumillu apeqqutitut una saqqummiupparput,@ la Naalakkersuisunukua Kattuffissuarnik suleqateqarnissartik eqiagisimaneramikku, taava massakkut nassuiaat imaaliinnaarlugu peqataatinnagit saqqummiutiinnaraat ?@
Kisianni tassa oqaatigeqqiinnassavara Kattuffissuit maani nunatsinni angerlarsimaffeqartut Naalakkersuitut tungaaninngaanniit pinngitsooratik qanimut suleqatisserineqartuartartussaapput. Atorfinitsitseriaatsimmi matumani eqqartukkavut pingaaruteqartorujussuupput inuiaqatigiinnut tamarmiusunut, tassanilu Kattuffissuit soorunami aamma sunniuteqarsinnaanissaat aammalu peqataajuartariaqarnissaat aamma pingaartinneqartuartariaqarluni.
Kattuffissuit eqqartortillugit Inuit Ataqatigiit aamma una erseqqilluinnartumik oqaatigisariaqarparput, Kattuffissuit maani nunatsinni angerlarsimaffeqartut kisimik isumaqatigiinniarfigineqartarnissaat taanna uagut aalajangiusimalluinnaratsigu, aammalu siunissami taamaattuartariaqarmat. Taamaattumik Atassutip oqaaseqartuata Otto Steenholdtip saqqummiussinerani imatut tamanna oqaatigimmagu paatsuungatitsivoq, isumaqarpungalu Atassumminngaanniit taanna arlaatigut nassuiarneqartariaqassasoq, tassami saqqummiussaminni quppernerup aappaanni ilaatigut oqatigivaat:
AAtassummit qularutiginngilarput ukiorpassuunngitsut qaangiunneranni ilinniartitsisut nunatsinniittut isumaqatigiissutit atorlugit atorfinitsinneqartalissasut, tamanna Ilinniartitsisut Kattuffiinut nunatsinniittunut Danmarkimiittunullu suli ukiorpanni isumaqatigiinniartartussanut ilorfaallaataassaaq.@
Tassa ima paasisariaqarnerpoq, Atassutip suli Kattuffissuarnik maani nunatsinni angerlarsimaffeqanngitsunik kisiannili Danmarkimiittunik taava isumaqatigiinniartarnerit taakkua ingerlattarumagaat. Taanna isumaqarpunga Atassutip erseqqissumik aamma akisariaqaraat, tassami Atassut Naalakkersooqatigiinnut aamma ilaapput, aammalu unani aatsaaginnaq aningaasaqarnermut Naalakkersuisoq Atassummeersoq, Atassummilu Siulittaasuusoq aamma saqqummeeqqammerpoq, taamaattumik paatsuugasoqaqqunagu kissaatiginassaaq Atassutip oqaaseqartuata aammalu ajornanngippat Atassutip Siulittaasuata taanna oqaaseqarfigisinnaassappassuk.
Taava aamma alla oqaatigerusutarput uaniippoq, soorunami suliat assigiit aamma assigiimmik akissaasersorneqartariaqarput. Tamanna annertunerusumik saqqummiussinitsinni uagut ilanngussimanngilarput. 1991-imili sumi inunngorsimaneq tunngavingalugu akissaasersuineq maani Inatsisartuni atorunnaarsinniarlugu aalajangereernikuugatta, 1991-imi isumaqatiginninniarnermi assigiinngitsuni. Taamaattumik suliat assigiit assigiimmik akissaasersorneqassasut aamma tunaartaralugu ilungersorluta Inuit Ataqatigiit taamani Naalakkersuisooqataagallaratta annertuumik suliaqarsimavugut. Taamaattumik tassunga tunngatillugu aamma pakatsinarluinnarpoq qanittukkut paasinarsimmat, suli tamanna pimoorussamik ingerlanneqanngitsoq. Tassami qanittukkut saqqummiunneqarpoq allaat Namminersornerullutik Oqartussaq suliffeqarfiini, tassa Inerisaavimmi naqiterisut eqqarsaatigalugit. Taanna 1991-imili, tassa sumi inunngorsimaneq tunngavingalugu akissaasersuisarnermik ingerlatsineq qimanneqarluinnassasoq oqareeraluartugut, suli ima annertutigisumik assigiinngisitsineqarmat, tassa tikisitaq naqiterisutut sulisinneqartoq nunaqavissup akissaataanit 3- 4.000 koruunit missaanik nikigassuteqarmata.
Taamaattumik Aningaasaqarnermut Naalakkersuisup tamanna aamma maani nassuiaatigisariaqarpaa, sumik patsiseqarnersoq. Tassa Inatsisartut 1991-imili aalajangiuteriingarput malikkumasimannginnerpaa. Taamaassimappammi taava aamma Naalakkersuisoq tassani aamma akisussaatinniarneqartariaqassaaq.
Taava aamma una oqaatiginngitsoorusunngilarput, soorunami aamma uagut Inuit Ataqatigiit pingaaruteqarluinnartutut una tikkuarusukkatsigu, tassa nunaqavissut pikkorissartuarneqarnissaat. Pingaartumik suliffeqarfinni pisortassatut pimoorutamik tamanna aamma ingerlanneqartuartariaqarmat. Tamanna pissusissamisuungaarmat soorunami ingerlanneqartuartariaqarpoq. Apeqqutigissavaralu Naalakkersuisut tungaaninngaanniit tamanna aamma maannakkut ilumut pimoorussamik ingerlanneqarnersoq.
Pakatsissutigilaaraluarparput saqqummiussinitsinni apeqquteqaatigisavut pingasut taakku erseqqissumik akissuteqarfigineqanngimmata Naalakkersuisut tungaaninngaanniit. Tassa pingaartumik ilinniartitsisut eqqartortillugit ilaatigut aamma apeqqutigivarput; taavami isorliunerusuni avinngarusimasunilu ilinnniartitsisussaaleqiuarneq, qanoruna taava takorloorneqartoq qaangerneqarsinnaalissasoq, tjenestemanditut atorfinitsitseriaaseq qimanneqalissappat aammalu qimanneqartussanngorpat. Takorloorneqarnerpa tassa taanna maannakkut aamma qaangerneqarsinnaalissasoq?
Isumaqarpunga Naalakkersuisup taanna akissuteqarfigisariaqaraa apeqqutitut uani saqqumminneqarami.
Otto Steenholdt, Atassut:
Johan Lund Olsen-ip apeqqutaa akitinnagu, unaana oqaaseqarfigilaarlara, Kattuffissuarnik suleqateqarluarnissaq, soorunami taanna oqaatigineqarsinnaavoq. Kisiannili aana eqqarsaatigisariaqartoq, kattuffiit tamatigut aningaasat amerlanerusut piumasarpaat, illuatungaanilu pisortat angingaasat minnerusut taakkununnga tunniukkumasarlugit. Taamaattumik aqqutissatuarisarpaat amerlanertigut isumaqatigiinniarnerit aqqutigalugit suleqatigeeriarnissartik. Pilersaarusiornissamini uanga taakkua ajornakusoortutut nalilertarpakka, anguniagaat imminnut assigiinngitsuummata. Kisiannimi oqaloqatigiinneq ajornarneq ajorpoq aamma isumaqatigiinniarnerup nalaani. Aamma uagut assortunngilarput, soorunami siunissami qanoq iliornissaq oqaloqatigiissutigalugu isumaqatigiinniassappata aningaasat sanimut ililaaqqaarlugit, taanna aqqutissaqarsoraara.
Paatsuungatitsisimagutta maana Atassumminngaanniit erseqqissaalaartariaqassaagut.
Assiigiinngitsut atorfinitsitseriaatsit marluk tikkuarpavut ullumikkut nunatsinni tjenestemanditut atorfeqartut amerlaqimmata. Danmarkimili atorfinitsitseriaaseq tassaalluuni isumaqatigiinniarniarnerit aqqutigalugit atorfinitsitsisarnerit, assigiinngipput taakku. Aammalu tassani tunngavilersuutigisarput aajuna, ajornartorsiut aamma nunatsinnukartitsiniarnermi, Danmarkimi ilinniartitsisunik maannga, ajornartorsiut uaniippoq, isumaqatiginninniarnerit aqqutigalugit atorfilik Danamarkimiittoq nunatsinnukassaguni, taanna immineerallarlugu tjenestemanditut nunatsinnissaguni, ukiunilu pingasuni pisarneq malillugu sulissaguni, taava taassumap naatsorsuutigisariaqassammagu pensionisiassani allaat ukiunik pingasunik qumartinneqassasut Danmarkimut uteruni. Tassa taanna ajornartorsiut, aammalu taamaaliorneqarusunngitsut nunatsinnukarnissaminnut taanna aporfiisa ilagissavaat, nangaassutaasut sakkortusaatigissavaat. Kisianni saqqumiussami ersarippoq tjenestemanditut atorfinitsitsisarneq, ukiuni ungasissuni qularnanngitsumik atorunnaariartuaarneqassasoq, taamaattumik Atassumminngaanniiit oqaatigaarput, tjenestemanditut atorfeqarneq nunatsinni amerlaqisut suli atorfigisaat, taanna ikaariarfiusoq nunatsinni atorfinitsitseriaaseq qularnanngivissumik Danmarkitulli isumaqatiginninniarnerit aqqutigalugit pilersussaassaaq siunissami.
Periaatsit marluk assigiilerpata, nunatsinni danmarkimilu, taanna aatsaannguaq eqqarsaatigisara piissaaq nunatsinnukartitsiniarnerlu ajornannginnerulissaaq, annaasaqarnani pensionisiassanik aamma nutsinniissinnaaneq pisinnaalerunikku. Kisianni taanna pisinnagu Atassumminnganniit aamma kissaatigaarput, illoqarfiit ikinngutigiit, taanna suli angutinnagu ajornanngippat taanna aqqutissiuuteqqullugu misissorluaqqullugu. Taakkuukku pillugit paatsuugatitsisimasutut oqaatigineqartugut, kisianni neriullunga IA-p oqaaseqartuata tunngavilersuutivut massakkut ersarissumik paasigai.
Daniel Skifte, Aningaasaqarnermut Ineqarnermullu Naalakkersuisoq:
Majuaqqinninnut peqqutigaara ilaatigut IA-p toqqavissumik aperimmanga, aamma qilanaarpunga akissuteqarfigissallugu.
Apeqquserneqassanngilaq Naalakkersuisut siunnerfiat, aamma oqaaseqarninni oqaatigaara Kattuffiit Kattuffissuilluunniit nunatsinni najugaqartut, nunatsinni angerlarsimaffeqartut tassaapput isumaqatiginiagassavut. Nunatsinni kattuffeqanngippat,sulisorisatta ilaat, danmarkiinnarmilu kattuffeqarluni, assersuutigalugu nakorsat, taava pisussaavugut nakorsaqarnissarput eqqarsaatigalugu qallunaat peqatigiiffiat nakorsaniittoq isumaqatiginiassallugu.
Nunatsinni ilinniartitsisut kattuffeqarpata, taava nunatsinniittoq ilinniartitsisut kattuffiat isumaqatiginiassavarput. Taamaattumik eqqumiitsoqaranilu qivittorsiorfiussanngilaq Naalakkersuisut apeqqummut tassunga isumaat, erseqqissorujorujussuaq tassaavoq, aamma oqaaseqarninni oqareernittuut taasara, nunatsinniittut kattuffiit nunatsinni angerlarsimaffeqartut tassaapput isumaqatiginninniarfissavut. Taamaattoqanngippat taava tullia tigussavarput. Taanna apeqquserneqassanngilaq aamma IA-minngaanniit Naalakkersuisut.
Tassunga tunngasumik oqaaseqarfigissavara, toqqavissumik Atassutip siulittaasuattut taallunga oqaaseqarfigillaqumagu ilaatigut Inerisaavimmi aviisit allagaat. Aap oqaaseqarfigerusuppara. Aviisini allakkiat tassaapput inuiaat kiffaanngissuseqarlutik qanorluunniit isumaqarsinnaanerminnik nalunaarutaat. Tamakkua tamatigut bibelinngortissanerivut, uanga taanna oqaaseqarfigissan ngilara.
Unali oqaaseqarfigerusuppara akisussaaffigalugulu. Dansk Typograf Forbund, tassa naqiterisut, taakkua tikisitatut pineqarsinnaanerat matuneqarpoq ukioq manna 1998 01.januar aallarnerfigalugu. Imaappoq, taamaalinerani nunatsinniittut naqiterisut SIK-mi isumaqatiginninniarneq aallaavigalugu akissaasersorneqarput ukioq manna 01.januar 1998. Aamma taamatut pisoqarpoq piffissami allami, assersuutigalugu HK. HK-mi atorfeqartut imaaliallaannaq tikisissinnaanngilavut, aamma taakku mattunneqarput nunatsinni tamakkuninnga ilinniarsimasunik naammattunik peqaratta.
Taamatut oqariarlunga sukkasuumik sanilliutissavara, isumaqatigiissutit aallaavigalugit akissaasersuineq pingaarpoq malinneqassasoq. Nutaamik isumaqatigiittoqarnerani ajunngitsorsiassatut anguneqarsimasut piffissami qaangiussimasumi, taakkua ataqqineqarnissaat aamma pingaarpoq. Taamaattumik SIK isumaqatigiinniarfigalugu isumaqatigalugulu inaareernerup kingornatigut allaanerusumik akissaateqartitaasoq, tikisitsiunnaarnerup kingornatigut allaanerusumik atugassaqarluni pisoq, tassaavoq oqaluttuassatta ingerlanerani piffissami qaangiuttumi anigugassaq. Paatsuualaarisoqaqqunagu una aamma erseqqissaatiginiarpara pingaartorujussuaq, maannakkut oqaluttarfimminngaanniit maanngaanniit oqartarpugut ataasiarata, assigiimmik imaluunniit assigiinngitsumik akissaateqartitsineq 1991-iminngaanniit qaangiuttoq. Naagga taamaanngilaq! Ukununnga qaangiuppoq 1991-imiit 1993-ip tungaanut, Dansk Magister Forening, Gymnasieskolernes Lĉrerforening, Dansk Psykolog Forening, Ingeniĝr Forbundet, Aktiske Forbundet taamanikkut taakkununnga qaangiuppoq. Tassa taamanikkut aamma IA akisussaaqataavoq.
1993-iminngaanniit 1995-imut ukununnga qaangiuppoq, aatsaat 1993-imiit Teknisk Lands Forbund, Dansk Konstruktĝr Forening.
Taava 1995-iminnganniit 1997-imut ukununnga qaangiuppoq: LO (Lands Organisation i Danmark), Fiskeri Kontrollĝr-inut, Aviisiliortunut, Radio Telegrafist-inut Pĉdagog-inullu.
Taamaattumik Inatsisartut kukkusumik paasitinneqassapput oqarutta, 1991-imiilli Inatsisartut imatut isummeramik tassa tamarmik ajorunnaartut. Taamaanngilaq aatsaat atit qallunaatut taagukkakka eqqortuupput, angujartuaarneqarsimasut.
Inerniliinera unaassaaq, maannakkut Naalakkersuisuusut tamaviaaruppaat aamma Siumup, Atassutip, Inuit Ataqatigiit Kattusseqatigiillu siunnerfiat ukiuni arlalissuarni assigiinngitsumik akissaateqartitsineq qimattariaqarpoq. Taannalu qimanneqassaaq isumaqatigiinniartarnerit aqqutigalugit. Tassalu tassaavoq Naalakkersuisut pingaartitaat, kattuffiit nunaqavissut isumaqatiginiassavavut apeqqutit taakkua isumannaarniarlugit. Suliassaq ukiuni taakkunani ingerlasimavoq.
Maannakkut naqiterinermut tunngatillugu oqareernittuut isumaqatigiissut SIK-p uagullu akunnitsinni isumaqatigiissut atorlugu ingerlanneqarpoq. Isumaqatigiissutit malinneqassapput.
Anthon Frederiksen, Kattusseqatigiit:
Nuannaarutigivara saqqummiussaqarninni ilaatigut oqaatigisakka tassalu nunaqavissut pisortatut suliffeqarfinni, pingaartumik pisortat suliffeqarfiutaanni anngukkiartuaarnissaat ilanngullugu suliniutigineqassammat.
Naalakkersuisullu massakkut akissuteqaammini ilaatigut assigiimmik akeqartitsinermut tunngatillugu saqqummiussai aamma uanga politikeriuniarsarisutut nutaatut paasillugit pakatsivunga. Tassami qangarsuarli assigiimmik akeqartitsinermut tunngasut eqqartorneqartuarput, aammalu innuttaasut qularnanngitsumik immaqa amerlanerapaat naatsorsuutigisimagunaraluarpaat, ilumut assigiimmik akeqartitsineq taamanikkulli aalajangiunneqarmat tamarmik qaangiutereersut. Taamaattumik pissutsit ilaatigut ilisimanngisavut tusarlugit aamma soorunami pakatsinartunik ilaqarput.
Soorunami ilaatigut aamma pissutsinut malinnaasimannginneq immaqa pissutaasinnaavoq, kisianni Naalakkersuisut sulinerminni innuttaasunik paasisitsinissaat, sumut killittoqarpa suliani assigiinngitsuni, isumaqarpunga aamma ilanngullugu pingaaruteqartoq innuttaasut iluamik tamakkiisumik paasissutissanik tuniorarneqartarnissaat, isumaqarpunga pissusissamisuussasoq piumasaqaatigissagaanni. Tassami inuppassuupput nunatsinni najugaqartut aamma pingaartumik Inatsisartut ataatsimiinnerisa nalaani tamaqqeqqinnaavimmik radiomut pullutik tusarnaarneq ajortut. Taamaattumik nunatsinni Naalakkersuinermik ingerlatsinermi paasissutissat sapinngisamik amerlanerpaat innuttaasunut tunniunneqartarnissaat, isumaqarpunga pissusissamisoortoq piumasaqaatigissallugu.
Uanga miserratigineq ajorpara pissutsinut arlaanulluunniit malinnaasimananga imaluunniit kukkusimangaangama kukkussutikka naqqinneqarpata, aamma tamanna isumaqarpunga ersissutiginagu oqaatigisariaqartoq. Uanga nalusakka amerlaqaat, ilisimanngisakka amerlaqaat imannak pikkoritsiginngilanga suna tamaat ilisimallugu. Isumaqarpunga aamma ilaqartugut aamma maani inimi isersimasunik pissutsinik tamanik ilisimanninngitsunik. Taamaattumik uanga ersissutiginngisaannarpara kukkullunga oqassanguma, nuannaartarpunga naqqinneqaraangama. Aamma paasissutissat amerlanerpaat tunniunneqarnissaat saqqummiunneqarnissaallu pingaartumik Naalakkersuinermik ingerlatsinermi, nunatsinnut pingaaruteqartut pissutsit sapinngisamik tamakkiisumik saqqummiunneqartarnissaat pissusissamisoortutut piumasaqaatigaara. Qujavunga.
Mikael Petersen, Isumaginninnermut Siliffeqarnermut Pisortallu Suliffeqarfiutaanut Naalakkersuisoq:
Isumaqarpunga pissusissamisoortoq akissuteqassallunga minnerunngitsumik Inuit Ataqatigiit oqaluttuata apeqqutigisaanut tunngatillugu, aamma tassunga Aningaasaqarnermut Naalakkersuisup akissuteqaatigisaanut ilanngussillunga akissuteqalaassaanga.
Nunarput ataatsimut isigalugu sulisoqarnikkut ingerlatsineq massakkut Naalakkersuisuni tamaat ataatsimut isugalugu nalunaarusiornera ingerlanneqarpoq. Tassani minnerunngitsumik kisitsisitigut nalunaarsuineq, atorfeqariaatsit assigiinngitsut eqqarsaatigalugit, soorlu aamma tamanna takuneqarsinnaasoq matumani, tjenestemanditut atorfeqartitseriaaseq pillugu suliamut tunngatillugu nassuiaammi annertuumi aamma tamakkua ilanngullugit taakkartorneqarsimasut, suliffeqarnermi uagut pisortaqarfitsinni nalunaarusiat assigiinngitsut pisarsimasut aamma aallaavigalugit.
Naalakkersuisuni siunertaraarput nunatsinni sulisoqarnikkut, nunarput tamakkerlugu atorfeqartitseriaatsit assigiinngitsut nalunaarsoqqissaartarnissaannut periarfissiisoqarnissaa, statistisk eqqarsaatigalugu. Taamaattumik tamanna naammassineqarpat qularnanngilluinnarpoq paatsuuganannginnerusumik ersarinnerusumik, suliffeqarnikkut sulisoqarnikkullu atorfeqartitseriaatsitigut atugassarititaasut aamma ersarinnerusumik Naalakkersuinikkut siunnerfigineqarsinnaasassapput.
Inuit Ataqatigiinninngaanniit apeqqutigineqartoq isorliunerusunut tunngatillugu, sulisussaaruttarneq ilinniarsimasunik. Tamanna ilumoorluinnarpoq. Nunarput tamaat ataatsimut isigalugu sulisoqarnikkut inissisimanerput isigigaanni, isorliunerusuni sutigut tamatigut ilinniarsimasunik sulisussaqarniarneq ajornakusoortorujussuanngorpoq ullumikkut. Ilinniartitsisut tungaannaatiguunngitsoq, kisianni aamma teknikkikkut suliffeqarfinni kiisalu niuernikkut suliffeqarfinni tamanna ajornartorsiutaavoq annertuumik. Taamaattumi Naalakkersuisuni arajutsisimanngilarput, soorlu assersuutigalugu KNI-p Pilersuisup A/S-ip sulisussaqarniarnermigut nammineq suliffeqarfiup iluani isumaqatigiissuteqarluni isorliunerusuni atorfeqartitsisarnermigut aaqqissuussinera, -ajunngitsorsiassaqartitsinikkut piffinni aalajangersimasuni ukiuni aalajangersimasuni.
Taassumalu saniatigut Naalakkersuisuni massakkut, ilanngullugu misissorparput teknikkikkut suliffeqarfinni, elvĉrkini sulisussatigut aamma ajornartorsioratta. Tassani aamma suliffeqarfiup iluani isumaqatigiissutit atorlugit qanoq aaqqissuussisoqarsinnaanera aamma misissorneqarmat.
Isumaqarpunga aamma taamaattoq soorlu Naalakkersuisuni aamma Inatsisartuni ilisimagipput, atuargeqarfiup iluani isorliunerusuni Qaanaami Ittoqqortoormiunilu immikkut ittumik aaqqiinikkut, aningaasatigullu aaqqiinikkut ilinniartitsisussaqarniarneq aamma aaqqiallatsinneqarsimasoq.
Isumaqarpunga tamakku suliffeqarfiit assigiinngitsut iluini isumaqatigiissutit atorlugit aningaasaqartitseriaatsitigut aamma periarfissiisoqarsinnaasoq, tjenestemanditut atorfeqartitseriaaseq atorunnaarsinneqassappat tamakkiisumik tamanna anillariarfissaasoq.
Kisianni
soorunami siusinnerusukkut Inatsisartuni oqallittarnivut eqqarsaatigalugit,
tjenestemandi aqqutigalugu atorfeqartitseriaaseq ingerlaannartumik
atorunnaarsinneqassanngitsoq aamma maani oqaatigineqarpoq, kisiannili
pitsaanerusumik aatsaat aaqqiisoqassappat aamma isorliunerusormiut
eqqarsaatigalugit tamanna aaqqiivigineqartariaqassaaq. Naatsumik oqaatigalugu suliffeqarneq pillugu suliniutivut
naalakkersuisuni annertuut taakkua aamma tunngaviliissapput
atorfeqartitseriaatsit assigiinngitsut qanoq aaqqissuussanerusumik
ilusilersorneqarnissaannut nunatsinni.
Jonathan Motzfeldt, Naalakkersuisut
Siulittaasuat:
Oqaatigiinnarniarpara maani
oqaatigineqartut nuannaarutigissagatsigit aammalu nuannaarutigigatsigit.
Naalakkersuisuninngaanniit
naluneqanngitsutut aamma ilinniartitsisut pillugit maannakkut
isumaqatiginniarnitsinni nalunngilarput naalaarneqartoq qanoq oqartoqarnissaa.
Taamaattumik ullumikkut oqaaserineqartut naalakkersuisunut suliassap
ingerlateqqinnissaanut pingaaruteqarput. Aamma paasinarpoq tapersersorneqartut
uani apeqqutit tikinneqartut. Taamaattumillu aamma Siumup oqaaseqartuani
soorunami aamma naalakkersuisut malinnaaffigilluinnassavaat tjenestemandit
tungaatigut atorunnaarsitsiartornerup sutigut aammalu qaqugu qanorlu
sukkatigisumik pinissaa, taavalu aamma kaammattuutigineqarpoq Siumumiit
naalakkersuisut ukioq 2001 apeqqut taanna qanoq sumut killissimaneranik
inatsisartunut nalunaaruteqarumaarluta. Imaalluarsinnaavoq
angumerineqarsinnaasoq kisianni aamma imaassinnaavoq kingusinnerulaartoq,
kisianni pinngitsoorani taamatut nassuiaateqarnissaq inatsisartuni pisariaqassaaq.
Otto Steenholdt=ip oqaaserisaanut maluginiarpara taanna
soraarnerussutisiaqarnermut tunngatillugu apeqqutit ajornartorsiutillu.
Taamaattumik tassa maannakkut ilinniartitsisut aammalu allat pineqartut
tjenestemanditut pinnagit kisiannili isumaqatigiissutit najoqqutaralugit aaqqiivigineqarpata
ajornartorsiut aamma uani pineqartoq Otto=p tikkuagaa taanna qaangerneqassaaq.
Kisianni taanna sioqqullugu maannamut atorfeqarata nunatsinnut
ingerlaniartarsinnaaneq eqqarsaatigalugu ajornartorsiutaassappat
ajornartorsiutaasimammallu alaatsinaannissa aamma pisariaqarpoq. Aamma
oqaatigineqartutut isorliunerusunut tunngatillugu tassani maannakkut
periuserineqartut atortinneqareersut iluani periarfissat aamma Sulisoqanermut
Naalakkersuisup taasaa, ilumoorpoq taakkua allannguuteqartinnissaat
siunertarineqanngimmat aammalu sulisumikkut ilinniartitsisumikkut allatigullu
ajornartorsiuteqarneranni aaqqissuussinerit immikkut ittut atorsinnaanerat
periarfissaq taanna ammatinneqartuassaaq.
Daniel Skifte, Aningaasaqarnermut
Ineqarnermullu Naalakkersuisoq:
Siullermik Anthon Frederiksen=ip oqaasiinut tassa paasissutissanut piumaneruninnut
taanna tusaatissatut tigugakku nuannaarutigaara, kisianni aamma
erseqqissassavara 1995-imiilli maannakkumut malinnaavutit maniinnermi qanoq
pisoqartartoq. Uani siusinnerusukkut nassuiaatikka tusaatissatut tigugakkit
nuannarutigaara.
Johan Lund Olsen=ip apeqqutaa akinnginnakku naak Naalakkersuisut
Siulittaasuata aammalu Suliffeqarnermut Naalakkersuisup akereeraluaraa
qularnaatsuuvoq una maannakkut isorliunerusuni atuuttoq naalakkersuisut
nalilersimavaat maannakkut soorlu Avanersuarmi aammalu tunumi Ittoqqortoormiini
tassani iliniartitsisussaaleqineq anigorneqassappat ilinniartitsisut
tassunngakartinniarneri aaqqiivigineqassappata taakkua immikkut pisariaqartut
taannalu aallaavigalugu nunatsinni kattuffiit
isumaqatiginninniarfigineqarsimapput taamaalillunilu taavani najugaqartut
immikkut pineqarput taanna isumaqatiginninniarnikkut anguneqarsimavoq. Soorluli
Naalakkersuisut siulittaasuat oqareersoq taavani ajornartorsiut
isumannaarniarneqartariaqarpoq taamaattumillu suleriaqqinnissatsinni taassumap
nalilersortuarnissaa pisariaqarluni taanna kingullermik
isumaqatiginninniarnermi 1997-imiilli isumannaarneqarsimavoq. Naggataatigut
oqaatigissavara nuannaarutigigakku tunngavissaqarluarsorigatta Inatsisartuni
ilaasortat partiit kattusseqatigiillu oqaaseqaataat aallavigalugit suliassap
ingerlateqqinnissaanut taanna qujassutigeqqissavara.
Anders Andreassen, ataatsimiinnermik
aqutsisoq:
Taamaasilluta ullumikkut
oqaluuserisassaq immikkoortoq 24 tassalu pisortani atorfinitsitseriaatsit
pillugit nassuiaat oqaluuserinera naammassivarput.
Oqaluuserisaq
naammassivoq.