Oqaluuserisassani immikkoortoq 25 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Anders Andreassen, Inatsisartut Siulittaasuat:
Ataatsimiinneq
ammarpoq. Ullumikkut marlunngornermi 20. okt. oqaaluuserisassat makku
oqaluuserineqassapput.
Imm.
25, Takornariaqarneq pillugu nassuiaat.
Imm. 79,
Landskarsip 1997-imut naatsorsuutai pillugit isumaliutissiissut.
Imm.
26, Angallanneq pillugu nassuiaat.
Imm.
24, Pisortani atorfinitsitseriaatsit pillugit nassuiaat.
Imm.
76, Isumaginnittoqarfiup aqunneqarnera aaqqissuunneqarneralu pillugit Inatsisartut
peqqussutissaannut siunnersuut aappassaaneerneqarnera. Imm. 87,
Naatsorsueqqissaartarneq pillugu Inatsisartut inatsisaata
allanngortinneqarneranik Inatsisartut inatsisissaanut siunnersuut, taanna
aappassaaneerneqarnera kisiannili Naalakkersuisut kissaateqarnerat malillugu
piumasarineqarpoq tunuartinneqassasoq. Taavalu upernaamut nutaamik
inatsisissamut siunnersuumik nutaamik saqqummiussisoqarumaartoq.
Taavalu
oqaluuserisassat aallartitsinnagit oqaatigissavara tassa ippassaq 19. okt. 1998
ataatsimiinnermi imm. 49-p, tassalu Aalisarnermut, Piniarnermut
Nunalerinermullu tapersiisarneq pillugu Inatsisartut peqqussutissaannut
siunnersuut naammassineqalersoq Kattusseqatigiit allannguutissatut
siunnersuutaata paatsunganarsinnaasumik naammassineqarnera siulittaasoqarfimmiit
assut ajuusaarutigaarput.
Allannguutissatut
siunnersuut siulliullugu taasissutigineqartussaagaluartoq peqqussutissatut
siunnersuutip pingajussaaneernissaanut ingerlanissaa taasissutigineqarpoq.
Tassungalu inimi maani najuuttut tamarmik, aamma Kattusseqatigiit
isumaqataapput. Taamaalilluni paasinarsivoq amerlanerussuteqarluartut
allannguutissatut siunnersuut akuersaanngikkaat.
Oqaatigissavaralu
siulittaasoqarfimmiit siunissami taamatut pisoqaqqinnginnissaa
pinaveeer-saartinniarneqassasoq.
Anthon Frederiksen, Kattusseqatigiit:
Taaseqataasariaqarsimaninnut soorunami
pissutissaqarsimavunga, imaanngittoq allannguutissatut siunnersuutigisimasara
akerlilerlugu taasisimagama. Kisiannili peqqussutissatut siunnersuummi
saqqummiunneqartut ilai isumaqatiginartissimagakkit soorunami
taasisariaqarsimavunga.
Tassa
imaappoq siunnersuutigisara pinngitsoorani
taasissutigineqaqqaartussaagaluarpoq. Eqqarsartaaserali naapertorlugu immaqa
partiit angisuut arlaanni ilaasortaasimagaluaruma, tamanna suleriaaseq
malillugu pissusissarlu eqqorlugu iliortoqarsimassagaluarpoq. Kisianni tassa
kisimiikkama aammalu partiit avataanniikkama immikkoortinneqartutut
misigisimavunga.
Anders Andreassen, Inatsisartut Siulittaasuat:
Oqaatigissavara maani immikkoortitsisoqarneq ajormat.
Aammalu kukkuneq, kukkuluttorneq ippassaq pisimasoq tassani
paatsooqatigiinnikkut pisimammat. Imaanngitsoq Anthon Frederiksen kisimiinnera
pissutigalugu. Tamanna Inatsisartut tamarmik kina ataasiugaluarpalluunniit
ataqqisassaraat.
Maannalu
tikissavarput imm. 25-i, tassalu takornariaqarneq pillugu nassuiaat. Tassani
saqqummiussissaaq Takornariaqarnermut, Angallannermut, Niuernermut
Attaveqaatinullu Naalakkersuisoq.
Peter G. Samuelsen, Takornariaqarnermut, Angallannermut,
Niuernermut Attaveqaatinullu Naalakkersuisoq:
Takornariaqarneq
pillugu nassuiaat Naalakkersuisut sinnerlugit saqqummiutissavara. M/S Disko
atorlugu sinersortitsilluni takornariartitsisarnerup pilersinneqarneratigut
iluatsitsilluarnermut ingerlalereersumut atatillugu suleqatigiinnerup
annertusineqarnissaa pillugu Norgemiut umiarsuaatileqatigiiffiannut OVDS-imut
sinaakkusiussatut isumaqatigiissutissaq nutaaq atsioriartorlugu qaammatit
arlallit matuma siornatigut Nuummiit Ilulissiarama timmisartoq pisarnermisut
Kangerlussuarmut akunnilluni mikkallarpoq.
Kangerlussuarmiitilluta
uannut oqaatigineqartut malillugit takornariat tuusintit missaat Kangerlussuarmi
umiarsualivimmi umiarsuarnit takornariartitsissutinit timmisartunut
attartukkanut paarlaapput. Takornariat taakku ima amerlatigaat pisiniarfinni
akunnittarfimmilu allanilumi siuleriiaartunik utaqqisorpassuaqalerluni.
Ilulissanut
tikeriarama isumaqatigiissut M/S Diskomi atsiorpara, taassuma Kitaata Qeqqani
takornarianik inissaasinnaasut tamaasaa ulikkaarlugit sapaatip akunnera
angallassereerluni umiarsualivississimatsiarnerani.
Angerlamut
ingerlaarlunga Ilulissani Hotel Arcticiliarpunga akunnittarfimmi tassanissaaq
allilerineq aallartinneqareersoq paasiniaavigiartorlugu. Oqaluttuuppaannga
akunnittarfimmi aatsaat taama amerlatigisunik unnuisoqartalerlutik aamma
illoqarfimmi takornariat ornittagaanni allani tamani taamaattoq - sulilu
soqutiginarnerusumik paasitinneqarpunga - aamma tikerartoqarnerpaaffigisartagaata
avataani taamaattoqalersimasoq.
Nuummut
tikikkama ullut arlaqanngitsut qaangiuttut allaffimma igalaavisigut silami
takusinnaavara Nuummi aqqusernit ullaamiit takornariarpassuanik ujameriattut,
tassa nunani allamiut takornariartitsinermut umiarsuaataannit naatsorsuutiginngisatsinnik
ingerlaarnissaminnut pilersaarumminni nunatsinnukarnissaminnik
ilanngussisalersimasunik.
Tamatuma
kinguninnguatigut timmisartumik attartorluni takornariartitsisarneq immikkut
illuinnartoq maani nunatsinni ingerlanneqartartoq nammineerlunga
misilikkiartoqqullugu qaaqquneqarpunga, tassa Tuluit Nunaanniit timmisartumut
nipimit sukkaneraluni ingerlaartartumut
Concordimut ilaallunga timmisartorlunga, taakku ukiumut marloriarlutik
maannakkut timmisartuussisalersimapput. Taama pisoqarpoq ingerlatseqatigiiffiup
naalakkersuisunut takutikkusummagu iluatsilluartumik ingerlataq ilimagisatut
neriulluarnartunik periarfissalik.
Qanittukkut
septemberimi Vestnorden Travel Martimi Islandimi ingerlanneqartumi peqataavunga
taamanilu paasillugu ukioq manna nunatsinniit peqataasut aatsaat taama
amerlatigisut, nunatsinneersut suliffeqarfiutaat 35-t tuniniaalluni
takutitsinermut inunnik 50-t sinnilinnik peqataatitaqarlutik.
Inuttut
nammineq misigisakka tamakku oqaatigerusuppakka nunatsinni takornariaqarnikkut
ingerlatsinerup siunissaa pillugu naalakkersuisut nassuiaataannik
saqqummiussininnut aallaqqaasiullugit, tassami takornariaqarnermik
inuussutissariuteqarnerup nunatsinni qanoq inissisimalersimaneranik uanga
namminneerlutik takunnissimasut ilagimmannga, naak nunatsinni
takornariaqarnerup taamaatut
inissisimalernissaa ukiualunnguit matuma siornatigut amerlanerpaartatta
eqqarsaatigisinnaanngikkaalluunniit.
Naalakkersuisuni
aalajangiisuutillugu qulakkeerniarparput ineriartortitsinermi tunngaviusumi
aalisarnermut atortussiassaqarnermullu ilanngullugu nunatta siunissami
aningaasaqarnikkut ineriartortinneqarneranik qulakkeeriniartussami,
Inatsisartut oqallittarnissatsinnut aalajangiisarnissatsinnullu pitsaasunik
tunngavissinneqartarnissaat.
Naalakkersuisuni
isumaqarpugut nassuiaatikkut saqqummiunneqartukkut suliniutaareersimasut
pillugit ajunngitumik pitsaasuseqartumik misissueqissaartoqarsimasoq, aamma
pissanganartunik tunitsiviusinnaasut pillugit misissuisoqarsimasoq maannakkut
suliarineqartussanut tunngavissiusussanik.
Isumaqarpunga
pingaaruteqarluinnartoq aalajangiutissallugu massakkut qulakkeerlugu oqarsinnaaleratta nunatsinni takornarianik angalatitsisarnerit
killeqanngiusartumik qaffariartornissaannut periarfissaqartoq. Misissuinivut
ima naleqqiuneqassapput soorlu aalisakkanik misissusoqarfiup
paatsuugassaanngitsumik nalunaaruteqarneranut raajaqarfissuarmik
annertulluinnartumik nassaartoqartoq Kalaallit Nunaallu tassani
killeqanngitsumik aalisarsinnaasoq.
Pissutsit
taamaalissagaluarpata soorunalimi tamatta ilisimassavarput raajat
namminneerlutik kilisaatinut orniguttarnavianngitsut suliffissuarnulluunniit
suliarineqariartorlutik namminneq ornigutissanatik.
Pisat nunamut
tulaassinnaassagaanni aalisarnermut atortussat pisariaqartinneqartut
pissarsiarisariaqarput atorneqarlutillu. Pisat aningaasarsissutigerusukkaanni
tunisassiorluni suliarinnittarfissat pisariaqartinneqartut sulisussallu
tunisassiortussat pilersinneqartariaqarput.
Matumani
takornariaqarneq suliffissuartigut sullissinernit allanit allaanerungaanngilaq.
Taamaammallu suliffissuaqarnermi allatorluinnarli aatsaat
pissarsiviusinnaalissaaq pisariaqartinneqartunik
aningaasalersuisoqareerneratigut.
Ullumikkumut
takornariaqarnermik ineriartortitsinermi inissanik atorneqanngitsunik pigeriikkatsinik
isumalluuteqarnerput tunngavigalugu ingerlasimavugut, takornarianik
amerlanerusunik tikisitsisarnissarput sulissutigalugu aallartinnginnerani.
Massakkut
takornariaqarnerpaaffiata nalaani takornarianut unnuiffissatut inissat
takornariaqartitsisartunit pigineqartut tamakkerneqartalereerput, tamannalu
nutaarsiassaavoq pitsaasoq. Peqatigitilluguli inissat sullissisinnaasullu
killeqarnerat isertitaqartarfiusinnaasut tamakku annertusineqarnissaannut
annertuumik aporfiulersimapput.
Taamaammat
pingaaruteqarluinnarpoq akunnittarfinni inissat amerlisarneqarnerat
sanaartornernut UNNUISA-mit aningaasaateqarfikkut tapersiisoqartarnissaanut
periarfissiinikkut pilersinneqartoq ilorraap tungaanut ingerlasoq
ingerlateqqissallugu. UNNUISA ukiuni marlunni ingerlanermini akunnittarfinni
unnuiffiusinnaasut init 150-t missaannik amerlineqarnerinut sulissuteqaqataalluni
peqataavoq. UNNUISA-p nalunaarusiamini saqqummersinneqaqqammersumi angusat
siulliit saqqummiuppai. Peqatigitillugu aningaasaateqarfiup periarfissat nutaat
arlallit tikkuarpai isumaqarluni akunnittarfinni inissat amerlisarneqarneranni
aningaasalersorneqarnerannut pilersiortorneqarnerannullu allatorluinnaq
aallartitsissutaasinnaasut. Naalakkersuisut UNNUISA isumaqatigaat, UNNUISA
oqarmat, massakkut aningaasaliisartut nunani allamiut akunnittarfinnik
sanaartornernut aningaasaliisinniartariaqalersut, taamaammallu siunnersuutigalugu
1999-imi aningaasanut inatsimmut atatillugu aningaasaliisussarsiornissamut
immikkut aningaasanik atugassanngortitsisoqartariaqartoq.
Angallannikkut
aaqqissuussinermi angallassissutit ilaasoqarsinnaasusaat tamakkerlugit suli
atorneqartanngillat. Arlalinnik periarfissaqarpugut qulakkiissallugu
angallannikkut aaqqissuussinermi angallassissutini inissat suli
atorneqanngitsut takornariaqarnikkut ingerlatsinerup ineriartortinneqarneranut
iluaqutigalugit atulernissaannut. Taamaassappalli paasisariaqarparput siunissami
takornariat nunatsinnukartissinnaasariaqassagatsigit uagut angalanitsinnut
akiliutigisartakkatsinnit allaanerusunik akiliisillugit.
Pingaaruteqarluinnarpoq timmisartutigut angallassinermi inissat
atorneqartanngitsut isertitassarsiornikkut - tassalu nutaanik
takornariartussarsiornikkut - iluaqutiginiarneqarnissaat,
ingerlatseqatigiiffiit isertitarisariigaat innarlernagit, siumut utimullu
aqqutinut tamanut naligiimik atuutsitseqqusinikkut akornusersuinnarani.
Nunatsinni nutaanik isertitaqartalernissarput isumannaarniassagutsigu
timmisartortitseqatigiiffiit nunatsinnukarniartunut kissaatigisatsitut
angalajumallertitsisinnaanngorlutik akeqartitsinissaannut
periarfissittariaqarpavut.
Tamanna
ima paasineqassanngilaq tamatta maanimioqatitsinnut angalasunut nunanullu
allanukarlutik takornariartartunut billetsit akikinnerulernissaat
kissaatiginngikkipput sulissutigalugulu, kisiannili tamanna
takornariaqarnermik ingerlatsinerup naalakkersuinikkut ineriartortinneqarneranut
atatillugu isigineqartariaqanngilaq, taamaassappammi oqaatigisakka taakku
taamaasa aserortussaagatsigit.
Aatsaammiuna
- soorlumi aamma nassuiaatikkut uppernarsarneqartoq - takornariat naammattumik
amerlassusillit timmisartuunneqartalerpata angallassineq ima annertutigisoq
pilersinneqarsinnaasoq ataatsimut isigalugu akit
appartinneqarsinnaalissallutik timmisartuussinerillu akulikinnerulersinneqarsinnaallutik.
Tamatumunnga
tunngatillugu naalakkersuisunit tikkuanngitsoorusunngilarput takornariaqarneq
tassammat angalasunut nunatsinneersunut marlunnik pitsanngoriaatinik
nassatareersoq - Arctic Umiaq Line A/S-imut ilaalluni Danmarkimut aqqutaata
ilaanni umiarsuarmut ilaalluni nutaamik billittinut akiliuteqartalerneq - aamma
unnukkut timmisartuussisarnertigut aasaanerani akulikinnerulernerat sapaatip
akunneranut Danmarkiliartarnerit
marlunnik amerlanerulersillugit. Taakku arlaannaalluunniit
piviusunngorsimassanngikkaluarpoq takornariaqarneq annertuseriarsimanngikkaluarpat
ingerlatseqatigiiffit imminut akilersinnaasumik taamatut ingerlassisinnaanngortillugit.
Erseqqissassavarattaaq
takornariaqarnerup ineriartortinneqarnerata angallassinerullu pilersaarusiorneqarnerata
qanittumik ataqatigiissaarneqarnissaannik takornariaqarnermik suliallit oqariartuutaat
naalakkersuisunit paasineqaarmata. Greenland Tourism A/S-p siulersuisuinut
angallasseqatigiiffiit ilaasortaatitassaannik naalakkersuisut toqqaareerput
aammalu ajornartorsiutip taassuma aaqqiivigineqarnissaa qulakkeerniarlugu
pilersaaruteqarluta - maani oqallisereerutta - angallasseqatigiiffiit aamma
Greenland Tourism A/S-p pisortaasa akornanni Pisortaqarfitsigoortumik
ataqatigiissaarisartussanik pilersitsinissatsinnik.
Ullumikkuttaaq
nalunngilarput takornarianik sullissisussanik nutaanik annerusunillu pisinnaasalinnik
atorfissaqartitsigatta. Outfittereqarneq pillugu aaqqissuussinikkut
angallassisartoqalernitsigut takornariaqarnermillu suliaqartut
suliniuteqarnerisigut kiisalu ilinniartitaanerit pilersitavut aqqutigalugit
angusaqangaatsiareerpugut. Tamakkuli naammanngillat, naalakkersuisullu
siunertaraat takornariaqarnermik suliaqartut ilinniarfiillu eqqarsaatigalugit
ataqatigiissaarinermik suliat annertusitinniarlugit, tamatumani tikisitanik
isumalluuteqannginnissarput qulakkeerniarlugu.
Taamatuttaaq
nassuiaatitsinni takuneqarsinnaavoq massakkut arlalitsigut
inatsisiliornissarput pisariaqarluinnarlersimammat, takornariat
amerliartuinnartillugit avatangiisitsinnut kulturitsinnillu illersuutitut
qulakkeerutigisinnaasatsinnik. Umiarsuit takornariartitsissutit tikittartut maleruagassiuuttariaqarpavut,
gummibċditik ilulissanut ulorianaqisunut atangersuutigiuartassanngimmatigit
imaluunniit takornariat alapernaaqqisut untritilikkaat eriagisariaqartunut
ilisimannittunik angallassisoqartinnagit nunaliartinneqartassanngimmata -
assersuutigalugu iliveqarfinnut oqalut-tuarisaanermut pingaaruteqartunut.
Qulakkeertariaqarparput takornariat angallaffiini pinngortitap
nungullarsarneqannginnissaa.
Naatsumik
oqaatigalugu naalakkersuisut takornariaqarnerup ineriartortinneqarnerani siumut
piareersimajuarniarput takornariaqarnermik ineriartortitsineq eqqarsaatigalugu
avatangiisit kulturerpullu siunnerfeqartumik qulakkeerumallugit. Maani
oqallisereerutta suliat taakku annertusitinneqassapputtaaq, taamaalilluni
aqutsineq pillugu malittarisassaqartitsinissamik pisariaqartitaasut suuneri
piaartumik paasineqarsinnaaqqullugit.
Taamaattumik
takornariaqarnermik ineriartortitsinerup isumannaallisarneqarnissaa pimoorukkutsigu
suliassarpassuaqarpugut, qularutigineerutereermammi nunatsinni pingaarnertut
nutaatut inuussutissarsiutigissallugu periarfissaasoq.
Naalakkersuisut
nassuiaataata suliallu tassunga tunngaviliisut erseqqilluinnartumik takutippaat
nunatsinni nunani allanisut annertussusilimmik takornariartitsivittut
ineriartortitsinissatsinnut apeqqutaaginnartoq taama siunissaqalernissatsinnut
naalakkersuinikkut piumassuseqartoqarnersoq.
Sulisariaqarpugulli
- aammattaaq pisariaqarpoq maannamutut ineriartortitsinerup annertusiartortitsinerullu
aamma isertitaaasareersut apeqqusernagit tatigineqarluinnarnissaat.
Takornariaqarnermik ingerlatsineq pillugu ineriartortitsinikkut anguniagaavoq
tamatuminnga suliaqartut kaaviiaartitaasa amerleriarnissaat, takornarianit
namminernit pissarsiarinerisigut taamatullu aamma takornariat nunatsinnut
tikeraartartut amerleriarnerisa kingunerisaanik sunniutit aqqutigalugit.
Taamaattumik
naalakkersuisut pisariaqartinneqartutut nunatsinnut takornariat tikerartartut
kisitsisitigut uppernarsaasersorneqarnissaat pitsaanerulersinniarlugu
maannangaaq suliniuteqalereerput. Takornariat tikerartut allanngorarnerat
ingerlaavartumik paasisarsinnaanissa pisariaqarpoq, tamanna malillugu
sulinermi iliuusissat naleqqussarneqartarnissaat naalakkersuinermik suliaqartut
inuussutissarsiummillu ingerlataqartut pisariaqartillugulu
atorfissaqartimmassuk. Taamatut suliniuteqarneq Seychellerinut
pisortatigoortumik tikeraarninni paasivara naalakkersuinikkut
takornariaqarnikkullu pingaartinneqarluinnartoq, tamannami takornariat
tikerartut amerlassusiannut pitsaalluinnartunik eqqortunillu kisitsisitigut
takutitsivoq, soorunalumi ilisimasat taakku pigissallugit pisariaqarput
siunnerfilimmik aningaasalersuinernik ilinniartitaanerullu tungassigut
pitsaanerpaamik angusaqarnissaq siunertaralugu suliniuteqarnissaami.
Kisitsisitigut
paasissutissat ullumikkut atukkavut naatsorsugaaput periuseq mianersornerpaaq
aamma uuttuinerit tunngavigalugit, soorlu assersuutigalugu takornariat
umiarsuarnik takornariartitsissutinut ilaallutik tikerartut imaluunniit
aaqqissuussinernut allanut atatillugu tikittartut kisitsisinut
ilatinneqanngillat. Tamatuma saniatigut nunatsinni takornariat nunatsinneersut
kisitsisini taakkunani ilanngunneqanngillat.
Takornariaqarnermik
inuussutissarsiuteqartut peqatigalugit massakkut Pisortaqarfiup iliuusissamik
pilersaarusiorneq ingerlappaa, Kalaallit Nunaanni Naatsorsueqqissaartarfiup
paasissutissanik pisariaqartinneqartunik tamanik naatsorsueqqissaarnermut
atugassanik pissarsisalernissaamik kinguneqartussaq, takornariaqarnerup
annertusiartornera periutsit assigiingitsut atorlugit naatsorsorneqarsinnaasunngortillugu. Suliassaq taanna
pingaartinneqarluinnarpoq, taamaalilluta siunissami uppernarsaasernagit
pitsaangitsumik aammalu kukkusumik oqallinnissamut tunngavissiisarnerit
ullumikkut oqallisigalugit piffissaajaatigisaqisavut
isummerfigilluarnerusinnaassagatsigit.
Kiisalu
naalakkersuisut pingaartipaat takornariaqarnermut tunngassuteqartuni
suliniutivut annertusitissallugit, nammineq nunatsinni innuttaaqatitsinnut
neqeerooruteqartoqartalersinnaaqqullugu. Apussuit Kalaallit Nunanni
sisorartartunut katersuuttarfinngortinniarnerannut atatillugu pilersaarut
suliarineqartoq tamatumunnga assersuutissaavoq. Amerlanerusut pilersinneqarsinnaapput,
taamaalilluni takornariat nunatsinneersut nammineq nunamik
periarfissarpassuinik misigisaqartarnissaat qitiutinneqarlutik. Tamakku
sulissutigeqqinniarpavut.
Naalakkersuisut
takornariaqarneq pillugu takorluugaannarnik atorfissaqartitsinngillat. Ilaat
taama isumaqannguatsiaraluartut tamanna kikkunnulluunniit
iluaqutaanavianngillat - aamma uatsinnut qinikkanut. Tunitsivissanik
misissuinerit suliniuteqarfissallu piviusorsiortut atorfissaqartippavut,
taamaalilluta periarfissaqartillugu suliassavut siunnerfilersinnaassagatsigit
ineriartortitsillutalu. Tamatumani kommunit nunattalu immikkoortui
eqqarsaatigaakka.
Nassuiaat
manna taama ineriartortitsinissamut sakkussaavoq naalakkersuisullu
isumaqarput sakkussatut
piviusorsiorluinnartuusoq.
Naalakkersuisut
alloriarnerit siulliit tigoreerpaat Greenland Tourism A/S-p siunnerfiata allanngortinneratigut
aamma ingerlatseqatigiiffiup suliniutaasa nunap immikkoortuini kommuninilu
pisariaqartitanut saatinnerisigut. Greenland Tourism A/S sakkussaavoq
nunatsinni pisariaqartitat malinneqarnissaasa isumannaarneqarnissaannut
aalajangiisuulluinnartoq - peqatigitillugulu nunap immikkoortuini
ineriartortitsinissamut pisariaqartitat tapersersorneqarnerannut. Ingerlatseqatigiiffik
taakku siunnerfigalugit aaqqissuussaanermigut allanngortiterileruttorpoq,
pingaaruteqarluinnarpolu ingerlatseqatigiiffiup ajornerusunik
periarfissinneratigut taamatut allanngortiterinerup aserorne-qannginnissaa.
Taamaaliornikkummi uagut qinikkatut takornariaqarnerup ineriartortinneqarnerani
nunatta periarfissaanut taamatullu nunap immikkoortuini ataasiakkaani
siunissami ineriartortitsinissamut periarfissanut
akornusersuisunngussagaluaratta. Taamaattumik Greenland Tourism A/S-imut
tapersersuineq aalajangiusimaneqassaaq - soorlumi taamatulli Danmarkimi
Danmarks Turistrċd pingaartinneqarluinnartoq - aap, ima pingaartinneqartigaluni
massakkut siunnersuisoqatigiit taakku ukiunut pingasunut
aningaasaliivigineqartalerlutik suliniuteqarnissaminullu periarfissai
nukittorsarneqarlutik.
Kisiannili
nassuiaammi aammattaaq erseqqilluinnartumik takutinneqarpoq Greenland Tourism
A/S-ip kissaatigisatsitut ineriartortitsinissamik kisimiilluni ingerlatsinissaa
isumalluutigineqaannarsinnaajunnaartoq.
Pisortat
suliassaqarfinni assigiinngitsuni suliniuteqarnertik annertusitittariaqarpaat,
tassa takornariaqarnikkut ingerlatsiviit nunarsuarmi tunitsivissat
sukkanerpaamik annertusiartorfiat nunatsinnut iluaqutissanngorlugu
atorsinnaassappassuk.
Nutaanik
atugassarititat pillugit piumasaqaatinik sinaakkusersukkanik
pilersitsisoqartariaqarpoq - ilinniartitaanerniit avatangiisit pillugit
maleruagassanut, angallassinermi periarfissanut inissaqartitsinermilu
pissutsinut - pisortat malittarisassaqartitsinerat, tapersersuinerat
aningaasaleeqataasarnerallu aqutigalugit pisinnaasunik.
Naalakkersuisuni
paasivarput aallarnisaasartunut akunnittarfinnullu tapersiisarnernik aaqqissuussinerit
iluatsitsiviulereersimasut. Taakku aaqqissuussinerupput naleqassutsiminnik
takutitsisut ingerlaqqittariaqartullu.
Peqatigitillugu
naalakkersuisuni paasivarput takornariaqarnermik inuussutissarsiutilinnut tunngatillugu
tapersiisarnissamik aningaasaleeqataasarnissamillu periarfissat
annertusitinneqarnissaat atorfissaqartinneqartoq, taakku alliartussappata
aamma nunani allamiut aningaasaliiumassuseqalersinneqassappata.
Taamaattumik
naalakkersuisut pilersaarutigaat takornariartitsinermik
inuussutissarsiuteqartunut aningaasalersuinikkut tapersiisarneq pillugu
inatsisip allanngortinneqarnissaanut siunnersuusiornissartik, taamaalilluni
inatsimmi aningaasaateqarfik UNNUISA pillugu immikkoortoq siunissami
takornariaqarnermik nalinginnaasumik ineriartortitsinermut
aningaasaateqarfinngorsinnaassammat. Aningaasaateqarfimmit tassannga
massakkutut akunnittarfiit allilerneqarnerinut tapersiisoqartaannassaaq.
Kisiannili aamma takornariaqarnermik annertusaanermut atatillugu sanaartukkanut
allanut tamanut pisariaqartinneqartunut tapersiisoqartarnissaanut periarfissaqalertariaqarpoq
aamma sanaartugassanut nutaanut annertunerusunut aningaasaleeqataasarsinnaasoqartariaqarpoq,
pilersaarutit aningaasanik iluanaarfiusinnaasut piviusunngortinnissaannut
aningaasaliisartunut nunani allamiunut nunatsinneersut
aningaasaleeqataasarnissaat piginneqataasarnissaalluunniit
piumasaqaataasassalluni. Taamatuttaaq periarfissiisoqartariaqarpoq aningaasaateqarfik
misissueqqaarnernik ingerlatsisinnaalersillugu, tuniniakkanik pisisussarsiorsinnaanngortillugu
taamaalilluni nammineq sulinermigut nunani allamiut nunatsinni aningaasaliiumallersillugit.
Maannakkorpiaq
tunitsivissavut uaneralaannguamiipput. Immitsinnut sianiinaasaagut uungaannaq
isigaluta aningaasanik pissuteqartumik - tamanna qanoq
pisariaqartinneqartigisutut isumaqarfigigaluarutsigilluunniit -
pisariaqartinneqartunik aningaasaliisuteqanngikkutta atortussanillu
pisariaqartinneqartunik pilersitsinngikkutta. Takornariaqarnerup
Ineriartortinneqarneranut Aningaasaateqarfik pilersittariaqarparput, nunap
karsianut illersorneqarsinnaasumik namminersortut
aningaasaliissuteqarnissaannut ineriartortitsinermullu tamatta
kissaatigisatsinnut qularnaarisussaq.
UNNUISA
aqqutigalugu ilusiliinerup takutippaa periaatsimik ilusiliussamillu
namminersortut suliniarnerannut tapertaasinnaasumik silatusaartumik nassaarsimasugut
- namminersorlutik inuussutissarsiortut ingerlatap ajutooriataarsinaanerata
akisussaaffigineqarneranik arsaanngikkaluarlugit - tamannaammammi
namminersortup sulinermigut pinngitsoortitassaat.
Naalakkersuisuni
qularutiginngilarput ilusiliussaq taamaattoq annertusarneqarsinnaasoq iluaqutigineqarsinnaallunilu
aallarnisarnerup nalaani pisariaqartinneqartumik suliniutaasussat qulakkeerniarlugit,
taamaaliornikkummi takornariaqarneq annertusarneqarsinnaammat taamaaliornikkullu
taama inuussutissarsiut imminnut napatissinnaalerluni.
Islandip
ukiut 40-innaat ingerlaneranni takutippaa siunnerfilimmik suliniuteqarnikkut
takornariat 5.000-iniit 200.000-inut amerlisinneqarsinnaasut. Nunat allat
uatsinnut sanilliullugit assersuunneqarsinnaasut taamaaliorputtaaq.
Peqatigitillugu
soorunalimi erseqqippoq siunissami aalajangersimasunik tunaartaqarluni ineriartortitsisoqanngippat,
taava inuussutissarsiutit ineriartortinneqarnissaat qularnaanerpaamik
alliartortitsinissamut aqqutissatuarisinnaasarput suli
pilersikkallarnavianngikkipput - immaqami pilersinnavianngikkipput.
Nunatsinni
takornariaqarnikkut ingerlasineq inuussutissarsiutit pingaarnersaasa ilaatut
ineriartortinneqarnissaannut tunngatillugu tamatumunnga kisimi
apeqqutaaginnassaaq naalakkersuinikut piumassuseqartoqarnersoq. Taamaammat
naalakkersuisut takornariaqarneq pillugu nassuiaat manna massakkorpiaq
saqqummiuppaat tikkuarniarlugu takornariaqarnermik ineriartortitsinermi
apeqqutaaginnartoq soqutigisaqarlutik suleqataasut suliassanik ataatsimoorlutik
kivitseqataarusunnersut.
Taamatut
oqaaseqarlunga nassuiaat Inatsisartunut suliassanngortippara.
Bjarne
Kreutzmann, Siumup oqaaseqartua:
Siumumi
isumaqarpugut pingaarnerusutigut naliliineq tassaasariaqartoq,
inuiaqatigiittut kiisalu sumiiffinni ataasiakkaani anguniakkat imminnut
naapertuussarnissaata ilungersuullugu sulissutiginissaat. Taamaaliornikkut
aatsaat takornariaqarnerup ineriartortinneranut aningaasartuutigut
atorluarneqarsinnaalissapput. Isumaqarpugut tamanna takornariaqarneq pillugu
nassuiaammi erseqqilluartoq. Taamaattumik Takornariaqarnermut, Angallannermut,
Niuernermut Attaveqaatinullu Naalakkersuisoq qutsavigerusupparput taamatut
saqqummiussineranut, tamatumuuna suliap
ingerlaqqinnissaanut tunngavissiuussisoqarsimammat.
Siumup
soqutigalugit misissuataarsimavai takornariaqarneq pillugu nassuiaat annertooq
taassumunngalu ilanngussat. Nassuiaatip minnerunngitsumillu ilanngussat
atuarneranni pisariaqartipparput assigiinngitsut oqaaseqarfiginissaat.
Siumut
erseqqissumik isumaqartuarpoq, takornariaqarnerup ineriartortinnera eqqortumik
periaaseqarfigineqarpat taava takornariaqarneq aningaasarsiornitsinnut
malunnaatilimmik iluaqutaalersinnaasoq. Tamanna aamma 1992-imi takornariaqarneq
pillugu anguniagassatut saqqummiunneqareersoq inuussutissarsiut nutaajoqisoq
upperaarput eqqarsaatinik anguniagassanillu nutaanik
saqqummiiffigiuarneqartassasoq siunissami.
Takornariaqarnermut
tunngatillugu misilittakkat ilinniarfigisinnaavagut, ineriartorneq maani Inatsisartuni
malinnaaffiginissaa Siumumi pingaarteqaarput, taamaalilluta aamma siornatigut
aalajangiisimanernut tunngavigisaq naatsorsuutigisatut sukkassusilimmik
piviusunngortin-neqarsinnaanngitsoq paasinarsigaangat, sapinngisamik
piaartumik aaqqiiniartarniassagatta.
Inatsisartunut
nassuiaateqarlutik Naalakkersuisut Takornariaqarnermi ineriartornerup
killiffianik ukiumoortumik nalunaaruteqatarnissaat Siumumit pingaartuutipparput pisariaqartuutillugulu, tassanilu
aamma Inatsisartut takornariaqarnermut ataatsimiititaliaata qanimut
malinnaa-tilluarneqarnissaa pisariaqartuummat nalilersueqataanissaalu
periarfissaalluartutut isumaqarfigisarput atorluarneqallaqqunarlunilu.
Nassuiaat
pingaartumillu nunatsinni takornariaqarneq pillugu misissueqqissaarnermut suleqatigiissitap nalunaarusiaa naapertorlugit
Danmarkimi, Tysklandimi aamma Tuluit Nunaanni nunatsinnut suli
takornariassaqarluarpoq. Anguniagassaq annerpaaq tassaavoq nunarput
takornarianut tikikkuminarsassallugu, tulliullugulu nunarput takornariartarfittut
nittarsaatissallugu, tassami nunarput takornariartarfittut ilisimaneqarnerulerpat
taava takornariarumasut aamma amerlanerulissammata.
Takornariartitsisartut
isumaqarsorinarput, nunatta takornariartarfittut avammut nittarsaanneranut
aningaasaliissutit ikippallaartut, aamma
61.000-inik takornariartitsisarnissamut nunatsinni massakkut
naammattunik hotel-issaqanngitsugut timmisartussaqarnatalu. Tassani
erseqqippoq, nunatsinni takornariartitsisarnerup ineriartortinnerani
Inatsisartut aamma Greenland Tourism-ip anguniagassatut siunniussaannut
nunatsinni takornariartitsisartut ataatsimut isigalugit siunertaat tusaaniartariaqartut. Aamma Siumup isumaa naapertorlugu tamanna
kinguneqartariaqarpoq pingaartumik
Greenland Tourism-ip nunatsinnilu takornariartitsisartut allat akornanni
siunertat imminnut naapisinniarnerinut.
Takornariaqarneq
ineriartortissagutsigu pisariaqarpoq sumiiffinni ataasiakkaani
takornariaqarnermik ingerlatsisut taavalu takornariaqarnermi qitiusumik
ingerlatsisut akornanni suleqatigiinnissaq. Aamma pisariaqarpoq Greenland
Tourism-ip nunalu tamakkerlugu suliffeqarfiit ataasiakkaat, soorlu Arctic Umiaq
Line A/S aamma Grĝnlandsfly A/S, suleqatigiinnissaat, kiisalu Greenland
Tourism-ip timmisartortitseqatigiiffiillu nunatsinni timmisartuussisartut SAS,
Grĝnlandsfly A/S, Icelandair/Air Iceland, First Air, Islandsflug immaqalu allat
suleqatigiinnissaat.
Angallassinermik
ingerlatseqatigiiffinnut kiffartuussinissamik
isumaqatigiissuteqar-figineqarsimasunut tunngatillugu, maanna tassaasut Arctic
Umiaq Line A/S aamma Grĝnlandsfly A/S, inassutigissavarput,
Namminersornerullutik Oqartussat angallassinermillu ingerlatseqatigiiffiit
ataasiakkaat akornanni kiffartuussinissamik ukiumoortumik isumaqatigiinniarnerit
tamaasa takornariaqarnermut tunngassutillit assigiinngitsut naliliiffigisaqqullugit.
Tamatumuuna qulakkeerneqassaaq takornariaqarnerup ineriartortinnerani
immikoortut ilaata taassuma illuatungeriinnut taakkununnga niueqatigiinnermi
soqutiginarnerulernissaa.
Naatsorsuinerit
nassuiaammi saqqummiunneqartut tamarmik inuiaqatigiit aningaasarsiornerannut
tunngassuteqarput. Siornatigut misissueqqissaarsimanerit takutippaat, hotelini
inissat amerlisarnissaannut immikkut aningaasaliissuteqarnissaq ingerlatsinermi
aningaasaqarnerup tungaatigut isigalugu ullumikkut imminut
akilersinnaanngitsoq. Taamaattumik UNNUISA pilersissimavarput. Siumumit
pisariaqarluinnartutut iluaqutaasutullu isigisarput UNNUISA
aningaasaliissutaasartullu pisariaqartitsinermut naleqquttuusariaqarnerat uani
eqqaasitsissutigissavarput aningaasaliissutissani pingaartinneqaqqullugu.
Angallassinermik
ingerlatseqatigiiffiit Greenland Tourism-imut
qularpasinngillat siunissami takornarissat naatsorsuutigineqartutut
amerlassusillit takkunnissaanut. Aammattaaq niuffassisut, takornariaqarnermilu
tuniniaasut isumalluartuupput kisiannilu qulakkeerumaneqarpoq angallassinikkut
ataqatigiissaartumik pitsaasumillu periarfissiisoqarnissaanik. Soorunami
apersuisimanerit taakku kisiisa tunngavigalugit takornarissanik amerlassusiliisarnerit
aallaavigalugit isummernaveersaartariaqarpugut. Taamaattorli
apersorneqarsimasut inuit arlaliupput, naatsorsuutigisariaqarparpullu
siunissami eqqukannernerusumik naatsorsueriaatsimik najoqqutas-siuisoqassasoq,
tamannalu naalakkersuisumut kaammattuutigissavarput qulakkeerniarneqaqqullugu.
Ataatsimut
isigalugu Siumumiit isumaqarpugut isummertoqarsinnaasoq, takornariaqarnerup
ineriartortinnera pingaarneq tassaasoq takornariaqarnermik suliaqartut
akornanni pitsaanerusumik suleqatigiinnissaq. Tamatumunnga ilaatigut
patsisaavoq soqutigisallit ataasiakkaat assigiimmik anguniagaqartariaqarmata
ilaatigullu inuiaqatigiit ataatsimut isigalugit anguniakkat
angujartuaarnissaannut aningaasaqarnikkut assigiimmik kajumissaateqartinneqarnissaat.
Taamaattumik Siumut isumaqarpoq Kalaallit Nunaanni takornariaqarnermik
inuussutissarsiutilinnut ataatsimut pilersaarusiortoqartariaqartoq, tamatumuuna
qulakkeerniarlugu nunatsinni takornariaqarnermik suliaqartut pingaarnerit,
tassaasut Greenland Tourism, tassa inuiaqatigiit soqutigisaannut sinniisutut,
angallassisut, hotelit aamma tunisassiortut, tassa angallassinernik
ingerlatsisut aamma misigisaqarnermut tunngasortaa, paaseqatigiinnissaat
siunertat suut suleqatigiilluni anguniarneqassanersut. Tamanna soorlu
pisinnaavoq Greenland Tourism-imi siulersuisut inuttalersornerisigut
takornariaqarnermik suliaqartut pingaarnerit tamarmik immikkut peqataatitaqarfiannik.
Greenland
Tourism uummaarissumik sulisoq aqqutigalugu takornariaqarnerup
ineriartortinnerani inuiaqatigiittut anguniakkavut ingerlatsisunut
pingaarnernut soqutiginarnerulersinniarlugit suliniutit
ingerlaqqittariaqarput.
Takornariaqarnerup
ineriartortinnerani siunissami anguniagassat. Takornariaqarnerup ineriartortinnerani
inuiaqatigiit anguniagassaattut aalajangiussat Siumup tunngaviatigut
isumaqatigai, taakkulu tassaapput.
Siullermik
aningaasarsiornikkut ukiumut isertitat amerliartornissaat. Aapassaanik
suliffissaqartitsinikkut iluaqutaanissaata qulakkeernissaa. Pingajussaanik
atortorissaarutitigut pitsanngorsaaneq. Sisamassaanik nunatsinnik
nalinginnaasumik ilisimasaqarnerup annertusarnissaa. Tallimassaanik
sumiiffinni ataasiakkaani innuttaasut misigisaqarnikkut
periarfissiuutissallugit. Kiisalu pinngortitami aamma kulturikkut eriagisat
illersussallugit.
Taamaattoq
inassutigissavarput, Greenland Tourism immaqalu pisortaqarfiit tamatumunnga
attuumassuteqartut nunatsinni ingerlatsisunik pingaarnernik suleqateqarnertik sapinngisamik
piaarnerpaamik annertusassagaat, taamaalilluni inuiaqatigiittut anguniakkat
aallaavigalugit takornariaqarnerup ineriartortinnerani peqatigiilluni
pilersaarusiortoqarsinnaaqqullugu.
Tassani
Siumuminngaanniit isumaqartuarpugut
Takornariaqarnermut, Angallannermut, Niuernermut Attaveqaatinullu
Pisortaqarfik piffissami
piukkunnarsassasoq suliniummi tassani kaammattuuteqarnissaminut.
Pingaartillugu
Naalakkersuisunut uparuarusupparput, pisariaqartoq tutsuviginartumik
kisitsisit atorlugit nassuiaasiortoqartalernissaa anguniarneqaqqullugu.
Immikkut
maluginiarsimavarput, WTO-p nassuiaataata iluatsitaarneratigut oqartoqartoq,
takornariat 16.000-iinnaanatik 25.000-iusut, tassa WTO-p kisitsisit atorlugit
nassuiaasiaa oqarmat angalasut 60%-ii takornariaasut - kisianni taamatut
naatsorsueriaaseq nunatsinni aamma
atuuttoq qularnaartariaqarpoq. Timmisartortitseqatigiit tamanna qanoq
isumaqarfigaat - tassami taamatut assersuusiornerup takutippaa kisitsisit
atorlugit nassuiaasiortarnerup qularnaatsunngornissaa pisariaqartoq.,
taamaalilluta takornariaqarnerup ineriartortinnerata qanoq
annertusiartortiginera qanorlu
pitsaatiginera oqallisigisinnaalerniassagatsigit.
Periarfissat
assigiinngitsut akornanni taarusutagut aamma tassaapput inoqarfitoqqat
katersugaasivinni nalunaarusiorfigineqarsimasut innimigineqarlutillu
soqutiginartinneqaqisut minnerunngitsumillu Leif Iluanaarajuup nunaqarfia
najugaqarfigisarsimasaalu takusassatut nutaatut pilersoq. Aammalu ukioq
naallugu takornariaqarnermik suliniuteqarnermik iliuuserisassat
annertusarneqartuarnissaat, soorlu Arctic Circle Race allanillu suliniutit
annertusarneqartuarnissaat Siumumiit kaammattuutigissavarput.
Greenland
Tourismip suleriaaserisamini kommunit nunaqarfiillu sumiikkaluartut
ornillugillu siunnersorneqartarnissaannik annerusumik suliniuteqarnera Siumumit
malugisarput iluarisimaarparput ingerlalluarnissaalu kissaatigalugu.
Qutsavigerujussuassavavut
Turistfagligdag-inik taaneqarlutik niuffattarnerit, kommunet, peqatigiiffiit,
eqqumiitsuliortut, sanaluttartut katersugaasiviit, Peqatigiiffik Qajaq allallu
takornarianik alutorsartitsisartut. Takornariaqarnerup siuarsarneqarnissaani
nunarput inuilu qitiupput, taamaammat kulturi takornariaqarnerlu imminnut
ataqatigiilluinnartuupput.
Naggataatigut
Siumumit erseqqissaatigissavarput isumaqaratta takornariaqarnikkut nunatsinni
ineriartortitsineq pilersaarutit malillugit ingerlaqqittariaqartoq. Inuussutissarsiut nutaajugaluaqisoq
takuneqarsinnaasut ersarilluartut tassaapput.
Nunatta
avataaniit takornariarfissatut pissanganartutut isigineqarnera angeqaaq.
Takornariartitsineq ineriartortinneqarpoq qitiusumit piinnarani, kisianni
aamma piffinni assigiinngitsuni suliniarluarnikkut, aammalu
takornariaqarnikkut kiffartuussinermi ilinniartitsinerit avataanilu
ingerlatsivinnik suleqateqarnerit attaveqarfigalugit suleqatigalugillu
ingerlatsiniarneq siunertarineqarmat. Tamannalu Siumup siunertaanut
naleqquppoq.
Siumumiit qujassutigeqqissavarput taamatut annertuumik nalunaarusiortoqarsimammat,
nalunaarusiornermullu atuumassuteqartut tamaasa qutsavigalugit siunissami
ingerlaqqinnissamut tunngavilersueqataalluarsimammata.
Anders Nilsson, Atassutip oqaaseqartua:
1992-miilli takornariaqarnerup siuarsarneqarnissaa aningaasanut
inatsimmi immikkut aningaasaliiffigineqartalermat, Greenland Tourism-imut
takornariaqarnerup siuarsarnissaanut 166 mill. koruunit
aningaasaliissutigineqarsimapput.
Taakkunannga 166 mill. koruuninit 35 mill. koruunit piffinni, tassalu Kujataani,
Kitaani, Qeqertarsuup tunuani, Tunumi, nunarpullu tamaat ataatsimut isigalugu,
takornariaqarnerup siuarsarnissaanut atorneqarsimapput. Aningaasaliissutit
sinneruttut 131 mill. koruuniusut ilaannit aningaasarsiat aningaasartuutillu allat Greenland
Tourism-ip iluani atorneqarsimapput, sinneruttullu avammut
nittarsaassinermi, piseqqusaarinermi, nunatta avataani
atorneqarsimallutik. Aningaasanik avammut annissuineq 100 mill. koruunit
pallillugit, imaluunniit ukiumut 17 mill. koruunit.
Aningaasaliissutinit suna pissarsiaraarput. Oqarutta 1991-imi
takornarissat - Greenland Tourism-i aallartinneqanngikkallarmat - ukiumut 4.000-tiusimasut, ukiorlu manna
16.000-it angussappatigit, taava takornariaq ataaseq landskarsimiit
Greenland Tourism-ip ingerlanneqarneranut 3.080 koruuninik
tapiissutaasarsimassaaq.
Tassalu 3.080 koruunit takornarissamiit iluanaarniutigineqassapput,
amigartoo-ruteqarfigissanngikkaanni.
Takornarissap nalinginnaalluinnartup nunatsinniinnermini aningaasat
qanoq amerlatigisut atortarpai.
Takornariaq nalinginnaasumik sapaatip akunnerani nunatsinniissaguni,
angalanermut hotel-imilu unnuisarnissaminut aningaasartuutissai ataatsimut
tuniniarneqartarput iluanaarutaanngitsumik. Aningaasanilli
iluanaarniarfissatuaq tassaalluni, takornarissap sapaatip akunnerani
nunatsinniinnermini tammajuitsunik pisiortornissaa aammalu
kiffartuunneqarnera. Takornarissap nalinginnaalluinnartup ullormut 1.000
koruunit qaangingaarlugit atortarnavianngilai - tassalu annnerpaamik 7.000
koruunit. Isertitarineqartunit minnerpaamik 3.080 koruunit
iluanaarutaasariaqarput, Greenland Tourism-ip ingerlanneqarnera
amigaartooru-taassanngippat.
Kisitsisit maannakkut kaaviiaartitakka eqqorpat. Taamaassorivippara.
Kisitsiserpassuilli, takornariaqarneq pillugu nalunaarusiami
aallaavigineqartut nalunaarusiallu ilassutaani, tapiliussanilu, ilanngunneqarsimasut
eqqoriaanerinnaapput.
Qanoq kaaviiaartitaqartigisariaqarpa soorlu suliffimmik ataatsimik
pilersitsissagaanni. 1992-mut
utersaaqqeriarutta, aallartiffitsinnut, neriorsorneqarpugut suliffiit 2.000-it pilersinneqassasut
aningaasallu 500 mill. koruunit avataaniit isertinneqarumaartut. Tassalu
suliffimmut ataatsimut 250.000 koruunit.
Naalakkersuisut, naalakkersuinikkut aningaasarsiornikkullu nalunaarusiaat
inner-suussutigalugu 1996-mi Inatsisartut upernaakkut ataatsimiinneranni
saqqummiunneqartumi takornariaqarnerup suliffissaqarniarnikkut sunniutissai
pillugit imatut allaqqasoqarpoq.
Issuaavunga. Takornariaqarnermik suliffiit ingerlatsisut suliffissaqartitsiniarnermut
qanoq iluaqutaatiginersut nalileruminaalluinnarput. Nunani allani
misissuisimanerit takutippaat, 1 mill. koruunit nalinginut takornariaqarnermi
kaaviiaartitsisimagaanni taava minnerpaamik suliffik ataaseq tamakkiisumik
suliaqartitsisoq pilersinneqassaaq, takornariaqarnerup iluani.
Takornariaqarnermi naalakkersuinikkut siunniunneqarsimasut 500 mill. koruuninik
isertitsissutaasalernissaat ukiumut 2005-miik kingunerissavaat, suna tamaat
tapitartuutereerlugu, suliffiit toqqaannartumik 500-it missaaniittut ukiumut
pilersinneqassasut. Taassumalu saniatigut toqqaannanngikkaluamik suliffissaqartitsinerup
sunniutissai, takornariaqartitsinerup iluani nalinginnaasumik
nalilersorneqartarnermikkut annertoorujussuugajuttut.
Tassa suliffiup ataatsip nalinga, 1 mill. koruunit - taassumalu
saniatigut toq-qaannanngikkaluamik suliffissaqartitsinerup sunniutai
kisitsisitalerneqarsimanngitsoq, nalilerneqarnerali annertuutut
taaneqarsinnaasoq.
Uani nalunaarusiami saqqummiunneqartumi Greenland Tourism-ip
oqarneratuut, aningaasat 550.000 koruunit kaaviiaartikkaanni suliffimmik
ataatsimik pilersitsisoqassasoq.
Suna upperissavarput. Takornarissattaaq amerliartornerisa kisitsisitaat
assigiinngitsut atorneqarput. 1992-mi naleqqersuutigineqarpoq ukiumi siuliani
1991-mi takornarissat 4.000-tiusimasut.
Taamaalilluni 1998-mi takornariarsimasut annertugisassaanngitsumik
sisamariaatiinnanngorsimapput.
Nalunaarusiami uani 50-ikkunni ukiumut 500-nik takornariaqartarsimanera assersuutigineqarpoq.
Taamaalilluni 1998-mi inernera 32-riaammik annertunerulerpoq
aallartiffiusumiit. Kisiannili pissusissamisoornerluni 50-ikkunnut
naleqqersuussissalluni. Naamik, taamaattorli kisitsisitagissaarneroqaaq.
Takornarissat qanoq amerlatigerpiarpat. Takornariaqarneq pillugu
nalunaarusiami oqaatigineqarpoq 1996-mi takarnarissat 16.000-tiusimasut.
Kisitsisilli taakkua naammagineqarsimanngillat, taamaattumik nunatta
avataaniik ikiortissarsiortoqarpoq. World Tourism Organisation-ip naatsorsueriaasia
naapertorlugu, nalinginnaasuusorineqarpoq, timmisartumut ilaasut 60%-ii
takornariaasartut. Nunatsinnut nunatsinniillu timmisartuunneqarsimasut 1996-mi
42.000-tiusimammata taava takornarissat 16.000-niik 25.000-inut 1996-mi
qaffanneqarsinnaasimapput.
Tamatta, akuttunngitsumik Nunatta Qallunaallu Nunaannut timmisartumik
angalasartugut nalunngilluinnarparput ilaasut 60%-ii takornariaanngitsut.
Immaqa tallimat qulilluunniit takornariaaratarsinnaapput, kisiannili
illoqarfimmiit allameersooratarsinnaallutik uagut nammineq illoqarfigisatsinneersuunngitsut.
Tassa nalornissutigineqarsinnaasut annikigisassaanngillat ataani
pineqartut eqqarsaatigalugit.
Siullermik ukiumut takornarissat qassit nunatsinnukartarpat.
Aappassaanik aningaasat qanoq amerlatigisut atortarpaat, aammalu pingajussaanik
suliffiit qassit aningaasanik kaaviiaartitsinermi pilersinneqartarpat.
Aap, allaat nalornissutaalluinnarpoq takornariaqartitsinerup suna
siunertarinera. 1992-mi siunniunneqarpoq takornarissat ukiumut
35.000-tiussasut aningaasallu isertitsissutigineqartussat 500 mill.
koruuniussasut ukioq 2002-mi. 1995-mi takornarissat ukiumut
61.000-tinngortinneqarput - paasinarsimmat takornarissap ataatsip 14.000
koruunit nunatsinniinnermini atortanngikkai. Aningaasat isertitarineqartussat
suli 500 mill. koruuniupput, ukiorli taamatut isaatitsiffiusussaasoq
kinguartinneqarluni 2005-mut.
Maannakkulli nalunaarusiami uani taamatut aningaasanik
isaatitsiffiusussaq 2008-mut kinguartinneqarsimalluni. Takornarissat
qassiussanersut eqqoriarneqarumajunnaarsimavoq, aningaasanillu
isaatitsinissaagaluaq 500 mill. koruuninik kaaviiaartitsinermut
ta-arsiunneqarsimalluni. Aningaasanik taama kaaviiaartitaqartiginerup
suliffissat qassit pilersissinnaanerai eqqoriarnissaanut taamaatiinnarpunga.
Nalunaarusiap ilaani atuarneqarsinnaavoq aningaasat 550.000 kr-it
kaaviiaartikkaanni ukiumut suliffimmik ataatsimik pilersitsissasut,
taamaalilluni takornariaqarnerup toqqaannartumik ukiumut suliffissat 963-it
pilersissagai, aammalu takornariaqarnermut at-tuumassuteqartut allat
toqqaannanngitsumik 483-nik pilersitsiviussasut. Tassa
katillugit suliffiit ukiumut 1500-t missaat. Eqqoqqinnaartumik
kisitsisitalerlugu tassaapput 1446. Naatsorsuisinnaaneralu naapertorlugu
imaappoq ukiumut kaaviiaartitat 550.000 koruunit gangerlugit 1446-mik
inernerissavaa 795 mill. koruunit. Uanga naatsorsoriarfissaaruppara qanoq
ililluni takornariartitsinerup suliffiit "1500-t missarluinnaat"
pilersissanerai. Siullermik atuaaninni isumaliuleraluarpunga tassa massakkorluinnaq
killiffitsinniik. Tamatumali kingorna tassaasorilerlugu ukioq
siunniuffigineqarsimasuussasoq tassalu 2008-mi. Aningaasalli
kaaviiaartinniakkatut piumasarineqartut 795 mill. koruuniussappata, tassa
imaattussaassaq siunissami qaqugu pinerpoq aatsaat suliffissatut siunniussat
anguneqarumaarput.
Kisiartaanngilanga kisitsisit paasinialuusaaraluartillugit
tunniutiinnarsimasoq. Ta-kornariaqarnerup siuarsarnissaanut qitiusoqarfimmiit
naatsorsuusiortoqarsimavoq nunatsinni takornariartitsinerup qanoq
ingerlanneqarneranik. Nalunaarusiaanni quppernermi 37-mi atuarneqarsinnaavoq
imatut allaaserineqartoq. Issuaaneq. "Angallassisut
angalatitseqatigiiffiillu oqaatigaat, Greenland Tourism-ip kisitsisit atugai
naapertuutinngitsut angallassisut kisitsisaataannut, aammalu qallunaat
angalatitseqatigiivisa ukiumut eqimattakkuutaarlugit takornariartittagaasa
nunatsinnut amerlassusiinik naatsorsuinikkut. Tamatumalu kingunerisimallugu,
Greenland Tourism-ip aaqqissuussisartut akornanni, pingaartumik angallassisut
tungaanniit tatigeqqalaarneqarneranik." Issuaaneq naavoq.
Tamaaniipporlu ajornartorsiut imaannaanngitsoq
toqqortarineqarluarsimalluni. 166 mill. koruunit takornariartitsinerup
siuarsarnissaanut atorsimavagut. Sukumiisumilli qanoq sukkatigisumik
ineriartortitsineq ingerlanersoq sumullu killinnersoq ilisimanngilarput.
Tamatigorluinnaq - 1992-mi, 1996-mi maannakkullu aamma 1998-mi ukioq
siunnerfiusoq ukiunik pingasunik siumut kaaminneqartarsimavoq.
Aningaasaliissutinit 166 mill. koruuniusunit ataatsimilluunniit tatiginartumik
ataavartumillu misissuisoqarsimanngilaq suliat sumut qanorlu angusaqartoqarsimaneranik
takussutissiisumik.
Takornariaqarnerup siuarsarneqarnissaanut qitiusoqarfiup nalunaarusiaani
atuar-neqarsinnaavoq. Issuaavunga. "Naatsorsueriaasissami tunngaviusussat
suli pilersinneqarsimannginnerinut pissutaaqataalluinnarsorinarpoq, Kalaallit
Nunaanni Naatsorsueqqissaartarfiup aammalu Greenland Tourism-ip
Takornariaqarnermut, Angallannermut, Niuernermut aammalu Attaveqaatinut Pisortaqarfiup
akunneranni suleqatigiinngippallaarneq." Issuaaneq naavoq.
Akuersaarneqarsinnaanngilluinnarpoq kisitsisit
pisariaqartilluinnarneqartut sulia-rineqarsinnaanngippata -
suleqatigiittoqarsinnaannginnera pissutaaginnarluni. Sutigut tamatigut nunatsinni
Naatsorsueqqissaartarfik
ilisimaarivarput suliaminut
pikkorilluinnarluni suliffeqarfiusoq. Kisitsisimmi
assortuussutigineqarsinnaanngissorinarput, katersuinnagassaapput
misissorlugillu.
Naalakkersuisoq saqqummiussinermini
erseqqissaavoq, Pisortaqarfik takornariaqarnermik suliaqartut peqatigalugit
iliuusissat aallarnisarneqarsimasut, nunatsinni Naatsorsueqqissaartarfimmut
paasissutissanik pisariaqartitaanik ingerlatitseqqiisarnissaq siunertaralugu,
taamaalilluni takornariaqarnerup ineriartornera naatsorsortarniassammassuk.
Atassutip paasinninnera malillugu tassaaginnarpoq hiisti qamutit kingornanut
pitutaq - imaluunniit qimuttut qamutit narpariaannut pitutat. Nunatsinni
Naatsorsueqqissaartarfiup nammineq aalajangertussaavaa paasissutissat sorliit
pisariaqartinnerlugit, taakkualu takornariaqarnermik suliaqartut
tunniussuutissallugit pisussaapput. Naatsorsueqqissaarnermut inatsisit
taamaapput, tamannalu kikkunnit tamanit malinneqartariaqarpoq.
Naalakkersuisoq tapersersorparput
takornariaqarnerup siuarsarniarnerata nakkutigineqarnerulluni
ingerlanneqarnissaanik kissaateqarnerani. Tassami takornariaqarneq nunatta
aningaasarsiorniarnerani pingaaruteqarluinnalersussaammat.
Saqqummiussuunneqartutuut annertutigigunanngikkaluamik, susaarnaveeqqutaalluinnarsinnaammammi,
tassami suut suliffinnik pilersitsisinnaasut tamaasa
pisariaqartilluinnaratsigit.
Naalakkersuisoq saqqummiussinermini
naggasiilluni oqarpoq: Atakornariartitsinerup siuarsaavigineqarluni
inuussutissarsiutitut toqqammaviullualersinnaanera naalakkersuinikkut
piumassuseqarneq kisimi apeqqutaaginnartoq.@
Ilumullimi taamaattuusuugaluarpat!
Tassami tatiginassuseqarneq suliamullu
pikkorissuuneq apeqqutaaqataalluinnarpoq. Tamatumanilu Greenland Tourism
pissartaanngilluinnarpoq. Anguniagaasut angunialuusaarnerini ukiunik kaamissuiinnavittoqarpoq,
suliffeqarfillu takornariaqartitsinermik suliaqartut akornanni
tatigisaanngilluinnarpoq.
Taavalu takornariaqartitsineq
naatsorsuiffigisariaqalerpoq. Utipajaartutut pissuseqalissanngilagut.
Inussiarnersumik avataaniit tikittunut tikilluaqqusisarnerup
illuatungerisariaqarpaa aningaasannanniallaqqissuseq. Imminut
akilersinnaasariaqarpoq. Avammut nittarsaassinermi aningaasaliissutit, hotelinik
sanaartornerit, ilinniartitsineq ilaalu ilanngullugit nunatsinnut
aningaasarsiutaalluartariaqarput. Assersuutigalugu - nalunaarusiami
takuneqarsinnaavoq - 180 mio. kr.-it atorlugit ukiut tamaasa hotelinik
sanaartornermut aningaasaliisoqartariaqarpoq ukioq 2008 nallertinnagu. Takornarissat
qanoq amerlatigisut tikittassappat aningaasaliissutit matussuserniaraanni?
166 mio. kr.-iugallartunik
naatsorsuutitigut kinguaattooqqavugut. Ukiullu tullissaanut aningaasaliissutissatut
Greenland Tourismimut qinnutigineqarsimapput 24 mio. kr.-it.
Atassummiit nalunaarusiaq tusaatissatut
tigussavarput. Ilutigaluguli anersaaruluutigaluta kissaatigissavarput nutaamik
nalunaarusiortoqarnissaa, naatsorsuinermi kisitsisit pisariaqartinneqartut
takussutissaqartinneqaleriarpata, aammalu eqqornerusumik Aimminut akilersinnaassusiannut naatsorsuinerit@ ersarinnerusut iluarsiivigineqariarpata.
Takornariartitsineq nunatsinnut periarfissaavoq pingaaruteqarpallaartoq ulloq
manna tikillugu iluarisaarsorfigineqarpallaarsimasoq - minnerunngitsumik
Greenland Tourism A/S-ip tungaaniit.
Malînánguaq Markussen Mĝlgaard, Inuit Ataqatigiit oqaaseqartuat:
Takornariaqarneq pillugu ukioq
nalunaarummut Inuit Ataqatigiinniit annertuumik oqaaseqarsimavugut. Mannalu
nalunaarut annertunerusumik taassuma malitsigigaa maluginiarparput, tassanilu
suliat pilersaarutillu ingerlateqinneqarsimasut. Maluginiarparputtaaq
nalunaarummi matumani, kiisami nunap immikkoortuini sumiiffiit
pisariaqartitsinerat eqqumaffiginiarneqartoq.
Naalakkersuisut 1992-imi takornariaqarneq
pillugu pilersaarusiorneraniit maannamut killiffik qiviassagaanni
takornariaqarnermi suliassat suli amerlaqaat. Naallu nalunaarummi qupp. 4-mi
oqaatigineqaraluartoq taamanimut naleqqiullugu maanna najugaqarfinni
ataasiakkaani annertuumik piareersimasoqartoq, kiisalu ilinniartitaanikkut
pilersaarutit pilersinneqarsimasut, timmisartuussinermi akit
pitsaanerulersimasut, Inuit Ataqatigiinniit isumaqarpugut taakkunani suli
annertoqisumik aaqqiisoqartariaqartoq. Soorlumi aamma tamanna takornariaqarnermi
sullissisut nalunaarummi erseqqissumik oqaatigisimagaat.
Takornariaqarnermik ingerlatsisunit
tamanit erseqqissarneqartuarpoq, siunissami nunarsuarmi takornariaqarneq annertusigaluttuinnassasoq,
nunarpullu ineriartortitsivigissallugu piukkunnarluartoq. Tassunga atatillugu
maanna inissisimanerput ineriartortitsinerpullu eqqarsaatigalugu pingaarluinnartutut
isigaarput, nunaqavissut ineriartornermut peqataalluinnartinneqarnissaat.
Taamaaliunngikkutta avataaninngaaniingaasiit ingerlatsisunut
isiginnaartuuinnassagatta.
Tamannalumi maanna
malunnarsilereersimavoq, ilami maanna aasaanerani takornarianik ingerlatsisartut
ilarpassui avataaniit tikisinneqartartuupput, aali takornariaqarnerup
pimoorullugu ineriartortinnera namminersornerulerneq aallartikatareersoq
ingerlanneqartoq. Uagununa nunarput, nalunnginneruarput tulluarnerpaallutalu
nunarput pillugu oqaluttuassalluta nittarsaassissallutalu. Taamaattumik ukioq
ilinniartitaanerit pillugit saqqummiinitsinni oqaatigisagut
innersuussutigalugit Takornariaqarnermut Naalakkersuisumut
apeqqutigerusupparput ilinniartitaanermut tunngasut sumut maanna killinnersut?
Nalunaarummi maluginiakkatta ersarissut
ilagaat takornariat nunatsinni mingutsitsineq suli uparuartaraat, taamaattumik
manna iluatsillugu upernaaq Iginniarfimmi Nunaqarfimmi Aqutsisut siunnersuutaat
apuunniarparput, tassami taakku siunnersuutigimmassuk nuna tamakkerlugu ulloq
aalajangersimasoq atorlugu sissani saleersuarneqartassasoq, tamakkumigooq
tipinikut igitakullu angallataatilinnut akornutaasaqimmata.
Tassungalu iluatsillugu isuma kusanaqimmat
sissamiinnaanngitsoq nunamilu ataatsimoorussamik saleersuartarsinnaanissaq
aqqutissiuunneqartariaqartoq Inuit Ataqatigiinniit isumaqarpugut. Nunattami
eqqiluitsuunissaa tamatta akisussaaqataaffigisariaqarparput.
Takornariat takorusuttagaat tassaapput
kalaallit kulturiannut attuumassuteqarluinnartut. Tamakkulu sumiiffinni
ataasiakkaani aaqqissuussamik ingerlaluaraluartut, nuna tamakkerlugu
aaqqissuussamik ineriartortitsinissaq suli pisariaqaqaaq. Kulturerput
periarfissanik nutaanik ujartuijuarnikkut piorsartariaqarpoq, sumiiffinnilu tamani isiginnaartitsinikkut
ineriartortitsineq pilersaarusiukkamik ingerlassappat isiginnaartitsisartutut
ilinniarsimasut atorluarnerullugit pikkorissaasarnerit ingerlanneqartuartariaqarput.
Tamatumanilu tipsernermi lottornermilu
aningaasat ilaasa atorluarnerunissaat misissortariaqarpoq. Tassami sunngiffiup
peqqinnartumik tamanullu iluaqutaasumik atorsinnaanissaa pisariaqaqaaq,
inuiaqatigiit peqqissut anersaakkut kulturimikkullu nakuusut
pilersissagutsigit.
Taakku saniatigut Inuit Ataqatigiinniit
siunnersuutigisimasarput sinerissami sanalunnermik ingerlataqartut aaqqissuussaanerusumik
ineriartortitsivigineqarnissaanik imalik sumut killinnersoq
apeqqutigerusupparput. Nalunaaruteqartoqarsimappallu Inatsisartunit
ingerlateqqinnissaa matumuuna kissaatigalutigu.
Takornariaqarneq eqqaassagaanni
pingaarnerpaanut ilaavoq angallannikkut periarfissaqarluarneq. Taamaattumik
tassuunatigut ullumikkornit pitsaanerungaartumik periarfissaqartitsinissaq
anguniartuartariaqarpoq. Angallannikkut pilersaarusiornerit
periarfissarititaasullu ullumikkornit eqaannerusumik aaqqissuunneqartariaqarput,
imminuinnaq isiginata avataaniilli immersorneqarsinnaanerput
suleqateqarsinnaanerpullu anguniarlugu.
Takornariat tikilluaqqusaasutut
misigisariaqarput, nunaqavissut takornarissallu tamarmik pissarsiffigisaannik
misigitinniartariaqarput. Taamaaliunngikkuttami nunatsinni takornariaqarnerup
nunaqavissunut takornartaajuarnissaa takorloorneqarsinnaammat. Taamaattumik
oqaatsitigut, kulturikkut suliniarnermi, inuussutissarsiummillu
ingerlatsisinnaanermik pikkorissaanerit saniatigut qaammarsaanerit annertunerusut
ingerlanneqartariaqarput.
Matumanilu nunatsinni maluginiakkatta
maanna ilagaat aasaanerani sinersorlutik angalasartorpassuit. Taakku
imartatsinni nunatsinnilu takornariarlutik niutsiartarneri qanoq
annertutigisumik iluaqutigisarnerpagut? Inuppassuusarmata suli annertunerusumik
isertitatigut aaqqissuulluakkamillu isertitsiviusinnaanissaat,
suliniarfiusariaqarpoq. Ilaatigummi maluginiarneqartarmat aqqusinerni
angalaarusaaginnartartut. Tamatumani tikittagaasa qanoq iliuuseqarsinnaanerinik
siunnersorluarnissaat pisariaqarpoq.
Takornariaqarnerup ineriartortinniarnerani
pingaaruteqarluartut pimoorussamillu ineriartortitassat pingaarnerit ilagaat
ukiuunerani takornariaqarnermik ingerlatsisinnaaneq. Aasaaneranimi piniartut
annermik piliniarneq ingerlatarisarpaat, suliffissuit ammasarput inuillu
piffissaq taanna feeriarumasarlutik.
Taamaattumik ukiuunerani suut tamarmik
unittutut inneranni kaperlaap ataani imaluunniit seqernup nuisalernerani
takornariartitsinerup ineriartortinnissaa pissusissamisoorluinnarpoq.
Tamatumammi missaanni pinngortitarsuaq peqqarniissinnaasaraluarluni aamma
kusarnarluinnartarmat, arsarnerpassuaqartarlunilu. Matumuunalu tamatumap
pimoorussamik ineriartortinnissaa anguniarlugu suleqatigiissitamik
pilersitsisoqarnissaa Inuit Ataqatigiinniit kaammattuutigerusupparput.
Naalakkersuinikkut anguniakkat Greenland
Tourismillu suliassaasa eqaannerusumik suleqatigiiffiullutillu
ingerlanneqassasut tikkuarneqarputtaaq. Tamanna maanna annerusumik periarfissaqarsimanngitsoq
nalunaarummi oqaatigineqarmat Inuit Ataqatigiinniit tupaallaatigaarput,
isumaqarsimagaluarattami Naalakkersuisoqarfik Greenland Tourismilu
suleqatigiilluartut.
Tamatumap takutiinnarpaa
uppernarsarlugulu, anguniakkat, sullissisut, inuiaqatigiillu imminnut
ungasittutut inissisimanerat. Tamannalu piaartumik aaqqiivigisariaqarpoq,
inuiaqatigiimmi ukiut tamaasa aningaasarpassuit Greenland Tourismimut
aningaasaliissutigisarmatigit.
Taamaattumik aamma Greenland Tourismip
maanna nutaamik aaqqissuunneqarnissaa pisariaqavissorput. Sumiiffiit
tikillugit annertunerusumik siunnersortitut atortariaqarpoq. Tamatumanilu
kommunit, nunallu immikkoortuini kommunit suleqatigiiffiisa
suleqatigilluarnissaat pisariaqarluinnarpoq.
Nalunngilarpummi nunat immikkoortuini
kommunit suleqatigiiffii pilersinneqarsimasut, taakkulu takornariaqarnermik
ineriartortitsinermi ingerlatsilluassagunik siunnersorneqarluarnissaat pisariaqarpoq.
Tassuunakkullu Greenland Tourismip suleqataanerunissaa avaqqunneqarsinnaanngilaq.
Nalunngilarpullu tamatumani kommunit
suleqataarusuttut. Inuit Ataqatigiinniillu matumuuna kaammattuutigissavarput
siunissaq eqqarsaatigalugu pilersaarusiornerit kommunit peqatigalugit
maannangaaq aallartinneqarnissaat.
Nunarsuarput angigaluaqisoq
takornariarpassuarnik tikisitsisarnissamik eqqarsarnermi mingutsitsinaveersaarnissaq
pisariaqavissorpoq. Angigaluaqalunimi issittumiikkami mingutsinneqaruni allanit
sivisuneroqisumik mingutsinneqarnini qaangeriartorsinnaagaa ilisimatuut
oqaatigiuarpaat. Nalunaarummissaaq Inuit Ataqatigiinniit nuannaarutigaarput
mingutsaaliuiniarnermi erngup sermersuullu mianerinissaat taakkartorneqarmata.
Taamaattumik manna iluatsillugu
Namminersornerullutik Oqartussat avoqqaariniarpagut assersuutigalugu,
Qeqertarsuarmi sermersuup aappaani maanna qimussertitsisarnermik
takornariartitsinermik ingerlatsivioreersup saniatigut sermimi tassani
illulioqqinnissamik kommunalbestyrelsip itigartitsinera soqutiginngivillugu
Namminersornerullutik Oqartussat akuersissuteqarsimammata.
Tassami kommunalbestyrelsip
paasilluaqqaarusussimagaluarpaa Qeqertarsuup ernga puilasoq
suminngaanneernersoq, sermillu aatsitaanik puilasimappat siunissaq
ungasinnerusoq eqqarsaatigalugu erngullu nioqqitiginiarnissaa pillugu tamanna
mianernartoqarmat. Uffalumi aamma sermersuup aappaa Qeqertarsuup tunua tamaat
qulaaniit isikkivigalugu qanorsuaq takornariaqarnermut ineriartortitsiviussasoq
kommunalbestyrelsimit aalajangiiffigineqareersoq.
Tamatumanili kommunalbestyrelsip maanna
atuuttup, siuliatalu itigartitsissutigeriigaa soqutiginagu aalajangiisimaneq
assorsuaq ajuusaarnarpoq. Taamaattumik Inuit Ataqatigiinniit illoqarfiit
avataani ineriartortitsinermi kommunalbestyrelsip isumaa pingaartillugit
tusaaniarneqartarnissaat piumasaraarput, taakkuummatami inuit najugallit
qinigaat sumiiffinni pissutsinik qanimut ilisimasaqarluartut.
Ulluni kingullerni takornariat
qasiuneranik nalunaarsuisarnerit uparuartorneqarput. Tamatumanilu
kisitseriaatsit nalorninartortaqarmata, siunissamilu ersarissunik
paatsooruminaatsumillu Inatsisartut toqqammavisaqarnissaat anguniartariaqarmat
Inuit Ataqatigiinniit kaammattuutigissavarput, kisitseriaatsit nunatsinnut
naleqquttut paatsooruminaattut ersarissullu atorneqartalernissaat anguniartariaqartoq.
Tassami ilimagisaannaat toqqammavigalugit siunissami aalajangiisassagutta
tamanna toqqissisimananngimmat.
Ilanngullugu nunatsinni
inuussutissarsiornikkut takornariaqarnikkullu ineriartortitsinerit ingiaqatigiissut
suleqatigiissullu ingerlanneqassappata, aallartitsiniartunik tapersiisarfiit
ataatsimoornerullutik ingerlanneqarnissaat Inuit Ataqatigiinniit
kaammattuutigissavarput. Tassami inuussutissarsiutit suugaluartulluunniit
ingiaqatigiisillugit ikorfartoqatigiissillugillu ingerlanneqartuartariaqarmata.
Tassanilu tikkuanngitsoorusunngilarput
ajuusaarutigalugu takornariaqarnerup siuarsarnissaanik oqaluttuannguarluta
aappaagumut unnuisarfinnut aningaasaliissutaasut ikililerneqarsimammata.
Takornarianik angallassisartut akikinnerusumik
angalatitsisinnaanerminnik periarfissanik atorluaanissaat pisariaqarpoq,
tamannalu aamma nunatsinni angalatitsiviup nunaqavissunut angalasussanut
eqqumaffiginerusariaqaraa Inuit Ataqatigiinniit isumaqarpugut.
Tassami nunatsinni angallanneq
takornarianuinnaanngitsut nunaqavissunut nunap ilaanut takornariarusuttunut
tikeraarusuttunulluunniit akinik akikillisaalluni aaqqissuussisinnaanera aamma
periarfissaassammat atorluarneqartariaqarlunilu, tassani pivagut
angalatitsiviit nunaqavissunut akikillisaallutik
periarfissarsiuussinerunissaat takornariat kisiisa eqqarsaatiginagit.
Inuit Ataqatigiinniit nalunaarummi
uparuarneqarsimasoq Greenland Tourismip sinerissami sumiiffinnut
ungasippallaarnera erseqqissarneqarmat iluarisimaarparput.
Soorlu aamma aappaagumut
aningaasaliissutissanut inatsimmi allassimasoq: ANajukkani
takornariaqarnermut ingerlatseqatigiiffiit, kommunit aamma Greenland Tourism
A/S-ip akornanni aaqqissuussamik qanittumik suleqatigiinnerup
pilersinneqarnissaa, aningaasaliinermut toqqammavinnut ilaammat.@ Tamannami aamma Inuit Ataqatigiinniit ukiualuilli
qaangiuttut uparuartortuaratsigu, sinerissamilu immikkoortortaqarfeqalernissaa
Inatsisartunut siunnersuutigisarsimallugu.
Tamannali ornigineqanngitsoq taamani
oqaatigineqaraluartoq, taamaattoq isuma manna allanngorsimammat tamanna
allaqqunneqarsinnaanngitsutut alloriarfissatullu kusanartutut isigaarput.
Sunami tamarmi qulaaniit aqunneqarlunilu naalakkiutaannartut ingerlasarniarpat
inuiaqatigiillu peqataatinnagit, ineriartorneq arriissaqimmat, katataasullu
amerlassaqalutik.
Tassunga ilanngullugu oqaatigineqartoq
isumaqatigilluinnangarput tassaavoq, maanna piffissanngortoq anguniakkat
piviusunngortinnissaallu pillugit sukumiisumik inuiaqatigiit peqataaffigisaannik
oqallinnissaq. Tamannami takornariaqarnermut ingerlatsisut tikkuarsimagaat
aamma Inuit Ataqatigiit maluginiarparput.
Taama oqaaseqarluta suleqatigiissitap
suliaanut annertuumut qujavugut.
Anthon Frederiksen, Kattusseqatigiit:
Kalaallit Nunatsinni takornariartitsineq
pillugu nassuiaat soqutiginartoq, kisianni aamma ilaatigut paasiuminaatsunik
arlalinnik imalik Kattusseqatigiit sinnerlugit misissorsimavara.
Paasissutissat suliniutillu
ikigisassaanngeqaat.
Takornariartitsineq nunatsinnut
iluaqutaanerusumik sunniuteqassappat kalaallit nunaqavissut takornarissanik
sullissisinnaanngorlugit ilinniartinneqarnissaat ataavartumik suliassanut
sallernut ilanngunneqartariaqartoq Kattusseqatigiit sinnerlugit matumuuna
sakkortuumik kaammattuutigeqqippara.
Aamma takornarissamik oqarutta aningaasaq
kisiat eqqaaqqaagassarinnginnatsigu ilanngullugu ilisimasariaqarparput. Aap
aningaasat ilaatigut mittarfeqarfiit ingerlanneqarnissaannut annertuumik
amigaatigaagut, kisianni aamma puigortariaqanngilarput inuiaqatigiinnguungatta
ikittuinnaat.
Taamaattumik takornarissat 35.000-it
imaluunniit 60.- 61.000-it tikisinnginnerini piareersagassat amerlaqaat.
Maluginiarparalu aningaasat
milliardit affai takornariaqarnikkut isertinneqartussatut naatsorsuutigineqartut
aatsaat ukioq 2008 kingusinnerpaamik isertinneqartarnissaat
naatsorsuutigineqalersimasoq, suna tamatumunnga pissuterpiaanersoq soorunami
paaserusunnarpoq.
Siullermilli kalaallit kulturitta
avatangiisillu innarlitsaalineqarnissaat uatsinnut pingaaruteqarluinnartut
eriagineqarlutillu innarlitsaalineqarnissaat eqqaamalluinnartariaqarpavut.
Takornarissat tikisinniaannarlugit
tikisinneqarsinnaanngitsut qularnanngilaq tamatta ilisimalersimavarput.
Tassami kiffartuunneqartariaqarput, inissaqartinneqartariaqarput
allarpassuarnillu sammisassaqartinneqarlutillu paaqqutarineqartariaqarput,
taamaattumik ilinniartitaaneq suli annerusoq aallunneqartariaqartoq
Kattusseqatigiinniit kaammattuutigeqqissavara.
Aamma aasaanerani ilinniartortatta
atuanngiffeqarnerminni, soorlu GU-mi atuartut, EVU-mi Ilisimatusarfimmi il.il.
ilinniartut takornariartitsiviit suleqatigalugit atorluarnerulernissaat
anguniarlugu iliuuseqartoqarnissaa Kattusseqatigiit tungaanniit sakkortuumik
kaammattuutigissavarput.
Tassami paasinnissinnaaneq
naapertorlugu paasinartarpoq, takornarissat ilaatigut kalaaliunngitsunik
sullinneqartarnertik piviusorsiortutut isigineq ajoraat, taamaattumik
ilinniartitaaneq aammalu. Nunarpummi neqeroorutigisinnaanngilarput nammineq
annerusumik suleqataanngikkutta.
Nassuerutigisariaqarpara nassuiaat manna ilaatigut uannut paasiuminaatsortaqarmat, soorlu assersuutigalugu imatut allassimasoq: ANassuiaat tamanna aallaavigalugu Kalaallit Nunaanni takornariat 1996-imi 16.000-inik amerlassuseqarput. Taakku aningaasanik kaaviiaartitanik 152 mio. kr.-inik pilersitsipput. Taakkunannga nioqqutissat nunanit allanit eqqussukkat Kalaallit Nunaannut eqqussorneqartut tamarmiusut 30%-ii takornariaqarnikkut ingerlatsinermit atorneqarnerat aallaavigigaanni tamanna nunat allamiut aningaasaannik iluanaarfiuvoq 92 mio. kr.-inik, ingerlaqqikkaannilu Kalaallit Nunaata aningaasanik kaaviiaartunik 286 mio. kr.-inik pilersitsisunik@. Taanna atuaraluarakku paasisaqarpallaanngilanga.
1997-imut Greenland Tourism A/S-ip nalunaarusiaani takuneqarsinnaavoq takornarissat 17.000-iusimasut. Nunatsinnilu aningaasat takornariaqarnermi 170 mio. kr.-it kaaviiaartinneqarsimasut.
Siuliani kisitsisit taariikkakka maannakkullu kisitsisit taagorneqartut qanoq naatsorsorneqarsimaneri soqutigalugu soorunami paaserusuppara aammalu neriuutigalugu akineqarsinnaajumaassasut.
Aamma
ilaatigut nassuiaammi imatut allassimasoqarpoq: A1960-imi
Kalaallit Nunaanni 500-nik takornariaqarsimasoq, kisitsillu taanna 1972-imi
qaffariarsimasoq 6.500-ingoorluni. Tamanna ilutigalugu ataatsimiititaliaq
inerniliivoq, Kalaallit Nunaanni takornariat 1980-imi 35.000-inut
amerlineqarsinnaanerat periarfissaqartoq@.
Aamma taanna
paasigaluanngilara.
Kisitsisit tamakku qanoq-uku
paasisariaqartut? Asuli isumalluarsaarinerusimappat imaluunniit
salloqittaaneruppat? Tassami 1980-ikkunni takornarissanik 35.000-inik soorluuna
tikittoqarsimagunanngitsoq?
Ila sorleq upperissallugu
nalunaasappoq, tassami ilaatigut Paldamip atuakkiaani oqaatigineqarpoq
takornarissat 100.000-it aatsaat 500 mio. kr.-inik isertitsissutaasinnaasut -
paasiuminaappoq, taamaattumik eqqarsaatit assut kaavisitsipput.
Taamaattumik nassuiaatit
nalornisoornanngitsut ersarissut paasiuminartullu saqqummiunneqartarnissaat
quppernerpassuit oqaaserpassuillu ilaatigut imminnut assortuussinnaasunik
nipillit atunngikkaluarlugit ersarissunik paatsoorneqarsinnaanngitsunillu
Inatsisartunut paasissutissiissutigineqartarnissaat pingaaruteqarpoq.
Siunertat pilersaarutillu ilaatigut
ajunngeqaat tapersersortariaqarlutillu. Taamaammat anguniakkat anguneqassappata
siunertat aalajangiusimaneqarnissaat pinngitsoorneqarsinnaanngilaq, soorlu
assersuutigalugu Greenland Tourismip 1995-imi periusissamut pilersaarummini
ilaatigut erseqqissaatigaa; anguniakkat ukioq 2005-imi anguneqassappata
akunnittarfinni init 770-inik ilaneqartariaqartut.
Taamaattumik ilaatigut
tupinanngitsumik anguniagassatut aalajangiunneqarsimasut pissutsinut piviusunut
naapertuutinnginnerat pissutigalugu ilaatigut anguniakkat ungavariartorput.
Pilersaarutimmi anguniakkallu tamarmik naammassineqassappata pinngitsooratik
naammattunik aningaasaliiffigineqartariaqarput. Aningaasartuuteqaqqaaranimi
suna tamarmi imaaliallaannarlugu pineq ajornartarmat!
Taamaammat aamma angallannikkut
sanaartupiloornermut aningaasartuutit matussuserneqarnissaat pimoorullugu
anguniassagaanni, pinngitsoorneqarsinnaanngilaq naalakkersuinikkut aamma
aningaasaliissutit tungaasigut suli annerusumik tapersersuinissaq.
Kattusseqatigiinniillu
piareersimavugut aamma tapersersuilluta suleqataaqqinnissatsinnut nunatsinni
aningaasarsiornerup ilorraap tungaanut saatinniarneqarnerani. Aningaasanimmi
isaatititsivigineqarsinnaasut sapinngisamik annertusiniarneqartariaqarput
mianerisassallu mianeralugit.
Taamatut naatsumik oqaaseqarlunga
nassuiaat tusaatissatut tiguara.
Peter Grĝnvold Samuelsen, Takornariaqarnermut,
Angallannermut, Niuernermut Attaveqaatinullu Naalakkersuisoq:
Siullermik aallaqqaasiutigalugu
qujassuunga maani partiinut tamanut, Naalakkersuisut nassuiaammik
saqqummiussinerannut soqutiginnilluarlutik oqaaseqarnerinut, partiinut
Kattusseqatigiinnullu.
Aamma qutsavigissavakka piffissami
kingullermi tusagassiutitigut oqallinnermi saqqummiunneqarsimasut,
saqqummiussisullu tamaasa qanorluunniit allassimagaluarpata, tassami oqallinneq
aatsaat aqqutigalugu paaseqatigiissinnaagatta, naalakkersuinermik
suliaqartuugutta aammalu takornariartitsinermi suliaqartuugutta, taanna
pingaaruteqarluinnarpoq aamma isumaqarpunga taamatut oqallissaarisimasut
iluatsitsisimasut, tassami tusagassiorfiit aqqutigalugit takornariartitsineq
pillugu oqallinneq annertummat oqaatigineqartullu soqutiginartorpassuaqarlutik.
Kisitsisit assigiinngitsut saqqummiussuunneqarput,
kisitsisillu assigiinngitsut assigiinngitsunik tunngaveqartut
sanilliussuukkaanni taava soorunami eqqarsarluartariaqarpoq, taanna aamma
piumasaqarsimavoq tamatsinnut kisitsisit assigiinngitsut assigiinngitsunik
tunngaveqarluni sanilliussuunneqartut paasiniarnerini.
Naalakkersuisut saqqummiussaasa
saniatigut suleqatigiissitaq suliaqarsimavoq, nalunaarusiorsimavoq inuillu
tassani sulisimasut, soorlu Inuit Ataqatigiit oqaluttuata oqarneratut
uangattaaq manna periarfissaq iluatsillugu qutsavigerusutakka sulisimaqaat.
Ersarissisinniarlugu kisitsisit paasissutissat maannakkuugallartoq
pissarsiarisinnaasagut aallaavigalugit takornariartitsinikkut ineriartortitsinitta
ukioq manna sumut killinnera ersarissisinniarlugu. Taanna iluatsissimanngippat
ersarissaaniarneq, taava pitsaanerulersittariaqarparput. Aamma maluginiakkama
tusaasamalu tamanna oqariartuutigaat,
oqaaseqartut tamarmik oqaaseqarfigimmassuk kissaatigalugulu kisitsisinik
sapinngisaq naapertorlugu pissusiviusunut qanillattorneqarsinnaasut taakkua
aallaavigalugit, ukiumiit ukiumut takornariartitsinerup ineriartortinnerata
malinnaaviginissaanik periarfissinneqassasugut, minnerunngitsumik maani
Inatsisartut piorsaanermi aningaasalersuisuusut eqqarsaatigalugit.
Taamatut aallaqqaasiilaariarlunga
Siumut, Inuit Ataqatigiit aamma Kattusseqatigiit annermik qutsavigissavakka
maanna nalorninaatsumik ingerlariaqqittoqarnissaa killiffiusullu ersarissumik
iluarisimaarlugillu oqaatiginninnerannut tunngatillugu.
Atassut sinnerlugu Anders Nilsson
oqalunnermini assigiinngitsunik kussartitsisaqattaarlunilu
kaaviiaartitsineranik kisitsiserpassuarnik imatut oqaaseqarfigiinnassavara;
nuannaarutigigakku Atassutip oqaaseqaatini ima naggasermagit: AAtassummiit nalunaarusiaq tusaatissatut tigussavarput,
ilutigaluguli anersaaruluutigalugu kissaatigissavarput nutaamik
nalunaarusiortoqarnissaa naatsorsuinermi kisitsisit pisariaqartinneqartut
takussutissaqartinneqaleriarpata.@ Qujavunga taamatut naggasiinermut
Atassummut, naak assigiinngitsutigut sakkortungaatsiartunik ilaatigut
tikkuartuigaluarluni nassuiaat tusaatissatut tigummagu.
Kisianni oqareernittut oqaaseqartut
allat Siumumiit, Inuit Ataqatigiinniit Kattusseqatigiinnillu
takornariartitsinerup aningaasarsiorfissatut ilimanarluinnartutut
oqaatiginninnerat, taanna angisuumik qujassuteqarfigissavara.
Ataasiakkaat, neriuppunga
takisuuliorpallaassanaga, kisianni ataasiakkaat oqaaserineqartut imatut
ataatsimut oqaaserineqarsinnaapput; takornariartitsineq silittumik
Inatsisartunit tapersersorneqarpoq, ineriartortitsineq ingerlaqqissaaq.
Ineriartortitsisoqassappat aningaasaliinerit taakkua pisariaqartut aamma
isummerfigineqartassapput, Inatsisartut malinnaatinneqarnissaat
kissaatigineqarpoq nalunaarusiortoqartarneratigut ataatsimiititaliap takornariartitsinermik
suliaqartup malinnaatittuarneratigut, nalilersuinerit, paasissutissat
nalunaarsuinerillu sapinngisaq naapertorlugu piviusunut sanilliunneqarsinnaasut
atorneqaleriartornissaat taanna kissaatigineqartoq.
Taavalu aaqqiissutissatut tikkuartukkat
assigiinngitsut partiit oqaaseqartuininngaanniit saqqummiussuunneqartut
taakkua ataasiakkaarlugit akissuteqarfiginngikkaluarlugit, suleriaqqinnissami
taakkua atorneqarnissaat ammaffigalugu Naalakkersuisuninngaanniit
suleqqinnissatsinni najoqqutassatut tigussavagut.
Soorlu Siumuminngaanniit Bjarne Kreutzmannip oqaaseqarnermini
oqaatigigaa, Inatsisartut ataatsimiititaliaata suleqatigilluarneqarnissaa
kissaatigalugu, Greenland Tourismip takornariartitsisartunik sineriammik sulisunik
suleqateqarnissaa angerusumik taanna pisariaqartoq, taakkua tamaasa
isumaqatigalugit oqarsinnaavugut. Kiisalu aamma angallannermik suliaqartut
takornariartitsinermilu suliaqartut akunnerminni qaninnerusumik
ataqatigiissaarinerusumillu sulinissaat taanna kissaatigineqartoq, taanna
arlalinnit oqaatigineqarmat aamma soorunami aatsaat oqaatigineqanngimmat
Inatsisartunili takornariartitsineq angallannerlu pillugit oqallittarnitsinni
taanna tikkuartoqarneqartuaannarmat aamma taamaaliornissarput pisussaaffigaarput,
aamma tamatumunnga qanillattorneq pereersimavoq. Tassa ilaatigut majip
qaammataani Greenland Tourismip ataatsimeersuarnerani siulersuisullu nutaat
inississorneqarnerini nunatsinni angallassinermik suliaqartut ilaatigut tassani
issiatitaqalersimanerat eqqarsaatigalugu.
Kiisalu aamma soorlu Malînánguaq
Marcussen-Mĝlgaardip Inuit Ataqatigiinniit oqaaseqarnermini ersarissaasoq.
Takornariartitsinermik selskabitta
Greenland Tourismip nunatsinni takornariartitsinermik suliaqartunut
qaninnerusumik suleqatiginnilluni ingerlatsinissaa taanna anguniarlugu
ataatsimeersuarnermi, aatsaannguaq taasanni siunnerfia Greenland Tourismip
suleriaqqinnissamini siunnerfia nutaamik Naalakkersuisuninngaanniit
siunnerfissamik tunisimavarput, taannalu najoqqutaralugu maannakkut sulineq
aallartereerpoq.
Tassunga uiggiullugu Greenland
Tourismip sakkortungaatsiartorsuarmik Atassutip tungaaninngaanniit
oqaaseqarfigineqarnera, taanna ajuusaarutigaara. Imaanngitsoq tamakkiisumik
tunuartikkusukkakku, qularnanngilaq tamanna pissutissaqarsimasinnaavoq,
tamannali peqataaffigissagukku uanga taama sakkortutiginavianngilaq
assuarinninnissara.
Tutsuiginassuseq amigaataasimappat
Greenland Tourismimi tamanna aaqqinniarlugu sulineq 1998-imi majip qaammataani
aallartittoq periarfissinneqartariaqarpoq. Greenland Tourismip pisariaqartinneqarnera,
taanna kimilluunniit apersuuserneqarsinnaanngilaq aamma takornariartitsinermik
suliaqartut tamanna ilisimagaat uppernarsarsinnaallugulu ilisimavara.
Taamaattumik siulersuisut nutaat Greenland Tourismimi uppernassuseqarluni
suleqqinnissaa suliarigaat ilisimagakku, neriuppunga tamanna
periarfissinneqassasoq.
Qitiusumik aqutsineq taamatut
sakkortutigisumik assuarinninnermut tunngaviusimappat taava oqaatigissavara
maannakkut strategi nutaaq, siunnerfik nutaaq, suleriarnissami periusissaq
nutaaq aallartimmat ilaatigut imaqartussaq Nuummi qitiusumik allaffeqarfiup
avataatigut kujataani avannaanilu immikkoortortaqarluni sulinissaq maannakkut
ilusilersorlugu piareersaatigineqartoq aallartereermat.
Neriuppunga taamatut
takornariartitsinermi ulluinnarni suliaqartut taavalu Namminersornerullutik
Oqartussat pisortatigoortumik suliffeqarfiat Greenland Tourismi imminnut
nassaarinerujumaartut manna tikillugu suleqatigiinnerup pitsanngoriaatissaanik
malitseqartumik.
Oqaaserineqartunut ilaatigut tamakku
apeqqutaammata taamaalillunga oqaaseqarninni apeqqutillu ataasiakkaat akinerini
ilanngutereerakkit taamatut silittumik oqaaseqarfigaakka.
Naggataatungaatigut
erseqqissassavara kisitsisit suut eqqortuunerat, oqallinnermut
ersarissaataalaarsinnaasutut neriullunga tiguneqassasut, tassa nunatsinni
akunnittarfinni unnuisarnerit nalunaarsorneqarnerat 1994-imi aallartippoq.
Januarimi 1997-imi nunatsinniit
nunatsinnullu timmisartuussinermi statistikit atorneqalerput, taakkulu aamma
annertusiartortillugit paasisimasagut sapinngisamik eqqortumik paasisitsisinnaanerput
soorunami alliartussasoq tamanna qularnanngilaq.
Takornariap nunatsinnut aningaasat
ilisagai nunatsinniinnermini, taakkua aamma silaannarmiit tigusaanngillat.
Apersuisoqarsimavoq apersuinerillu taakkua tunngavigalugit
naliliiniartoqarsimalluni.
Kiisalu aamma takornariat qassit
nunatsinnullu qassinik aningaasanik ilisimappata suliffinnik qassinik pilersitsisoqartarnera
qanoq kisitsisitalerneqassanersoq, aamma suliffeqarfinnik angallassisartunik
apersuinertigut tagginneqarsimapput, taakkulu nalunaarusiap tunuliaqutaani
naqitarparssuarniittut innersuussutigissavakka.
Ajuusaarutigiinnassavara Atassumminngaanniit
taakkua oqaaserineqartut kisitsisit assigiinngitsut taggissuunneqarmata,
ilaatigut ukiumiit ukiumut kisitsisit assigiinngitsut sanilliuttarlugit. Aamma
ajuusaarpunga Takornariartitsinermi Ataatsimiititaliap apeqqutit taakku
pillugit paasiniaalluni qaaqqummaga Atassumminngaanniit peqataasoqanngimmat.
Kisitsisit pisoqqat 1950-60-ikkunni
uani taggissuunneqartut, tassaapput nalunaarusiortut oqaluttuarnerat
nalunaarusiortut ilaatigut misissuinerminni qanga nalunaarusiaasarsimasut
imaannik saqqummiineri, taanna Kattusseqatigiinnut Anthon Frederiksenimut
oqaatigaara akissutitut.
Taamatut oqaaseqarlunga
Naalakkersuisut sinnerlugit oqaatsit Inuit Ataqatigiinninngaanniit,
Kattusseqatigiinniit Siumumiit tusaatissatullu Atassummiit tigusinninnerit
qutsatigaakka, qujanaq, takornariartortitsinermi ineriartortitsineq
ingerlateqqissavarput, amigaatigineqartut piumasarineqartullu taakkua
naammassiniarneqassapput, qujanaq suleqatigiissitaq sulilluarsimanissinnut,
qujanaq takornariartitsinermi suliaqartorpassuarnut, naapittakkatsinnut
tusartakkatsinnut, tassami taakkua aamma takutippaat ilumut takornariartitsineq
aningaasartaqartoq aamma aningaasarsiorfigineqarsinnaasoq.
Bjarne Kreutzmann, Siumup oqaaseqartua:
Siullermik Naalakkersuisup oqaatsitsinnut
tunngatillugu oqaaserisai qutsatigaakka.
Taavalu nalunaarutigisariaqarlugu
matumuuna nuannaaqigama, isumaqarpunga Siumut sinnerlugu oqarsinnallunga maani
oqaatigineqartut tamarmik nuannaarutigisariaqartut. Tassami naak aperisoqaraluartoq
imatut nipilimmik: Asooruna, sooruna tamaattoq, sooruna uku
taamaattut@. Kisianni amerlanerusut erseqqivissumik
oqaaseqarput aqagu, siunissami qanoq iliornissarput innersuussutigalugu, tassa
siumut ingerlaqqinnissaq innersuutigineqarmat, taanna nuannersortaraa annertooq
isumaga malillugu.
Taavalu nuannaarutigisama aappaa
oqaatigerusuppara, tassa isumaqatigiissutaalluinnartut oqaaseqarnerni maani,
tassa siullermik tikkuarneqarpoq soorlu Naalakkersuisup oqaatigereeraa,
tikkuarneqarpoq erseqqissumik takornarianut tunngasunut suleqatigiit akornanni
suleqatigiinneq naammanngitsoq, taanna Siumuminngaanniit aamma
taakkartoratsigu allanik aamma taama isumaqartoqartoq paasivarput.
Aammalu isumaqatigiissutaalluinnartutut
allatut taasariaqarsorisara taaneqartoq, tassaavoq naatsorsueriaaseq
erseqqissoq ujartorneqarmat, taannalu aamma uagut Siumuminngaannit
ujartoratsigu nuannaarutigaara aamma allaninngaanniit takkummat.
Kiisalu paasinninnera malillugu, tassami
tamarmik eqikkaanertut oqaatigisaattut paasisorisara tassaavoq
ineriartortitsineq takornariartitsinerup iluani ingerlaqqittariaqarpoq, taanna
isumaqarpunga oqariartuut isumaqatigiinnermik takutitsisoq, naak allanik aamma
allat taanngisaannik tikkuartuisoqaraluartoq, taakkua isumaqatigiinnginnertut
taasassaasorinnginnakkit.
Oqaatigineqarpoq politikkikkut piumassuseq
aamma tikinneqarpoq Atassumminngaanniit eqqaamanerlunngikkukku, taanna
isumaqarpunga pingaarluinnaqqeqqissaartoq, tassami uagut kisitta
aalajangertussaavarput takornariartitsinermik ingerlatsinerup ingerlanerata
qanoq siuneqarnissaa, uagut kisitta aalajangertussaavarput maani inersuarmi.
Taakkua saniatigut ajuusaarutigalugu aamma
taalaarusuppara nalunaarusiami qup. 16-imi taaneqartoq, tassa suleqatigiiffik
pilersinneqarsimasoq Islandilu Samimik taaneqarsimasoq, tassani periarfissaq
taanna erseqqissumik annertoorujussuarmik atorneqarniarsimanngitsoq
oqaatigineqarmat, kisianni tassa isumaqarpunga siunissami
periarfissaalluassasoq taanna aamma
suleqatigiinnissami, tassalu taanna taavara pissutigalugu siunissami
aputip iluaqutiginiarneqarnerunissaa taarusukkakku, tassa imatut paasillugu
nalunngilarput aasakkut anorersuartuut sakkortutigisumik takornarianik ima
annertutigisumillu ulapititsitsisoqartartoq, kisianni ukiukkut nipaannersuartullusooq
susoqassanani annerusumik takornariat tungaatigut. Taamaattumik
pisariaqarsorinarpoq Inatsisartut Takornariaqarnermut
Ataatsimiititaliaataluunniit annerusumik sammisariaqaraa avatitsinni nunani
allani aputilinni, tassa ukiukkut apisartuni, takornarianut aputip qanoq
iluaqutiginiarneqartarnera annertutigineqarsoq imaluunniit qanoq ilillugu aput
pissanganartunngortillugu takornarianut iluaqutaaniartarnersoq. Isumaqarpunga
suliassaasoq pitsaasoq ataatsimiititaliamut, isinik nutaanik isilerluni avammut
paasisassarsiornikkut pisinnaasoq, tassa ukioq taanna kisiat sammivigalugu.
Oqaatsinut tunngasut aamma taaneqarmata
eqqorluinnarpoq tassani pingaartumik aallaqqaataanut nunatsinni suliniarnermik
ajornartorsiutaasut annerit tassaapput, oqaatsinik piginnaassuseqarnissaq,
isumaqarpungali ukiut ingerlanerini annertusiartuinnartumik nunatsinni
sulisussatsinnik patajaatsunik pikkorissunillu pilersitsiartortoqartoq,
tassani ilaatigut annertuumik iluaqutigalugu AFS-ip iluani nunarsuarmut
tamarmut aallartitsisarneq tassani piffissami aalajangersimasumi najugaqartitaalluni
oqaatsinik ilinniarneq siunnerfigalugu, tassanilu ilisimanerusarput
tassaagunarpoq, tassa USA-mi taamatut ilinniartitaasarnerit, American Field
Service-mik aallartissimasut.
Aamma pinngitsoornagu taarusuppara, tassa
takornarianut tunngatillugu periarfissaalluartut ilaattut isiginarmat ujaqqanik
sammisaqarneq, tassa Kalaallit Nunaanni ujaqqanik assigiinngitsunik,
pinnersaatissaannaanngitsunik mineralinik taaneqartartunik allanillu aamma
takornarianik soqutigineqartorujussuummata, isumaqarpunga tamakkua aamma
iluaqutaaniarsinnaasunut ilaasariaqartut.
Naalakkersuisup oqarneratuut aamma uanga
qutsatigaara piffissami kingullermi, ulluni kingullerni taamatut oqallinnerujussuaq
takornariaqarnerup tungaanut assigiinngitsunik taakkartorneqartunik, ilaatigut
isumalluarsaarivallaarujussuartuunngikkaluartunik, kisianni taanna
qularnanngivissumik takornariaqarnermut tunngasunik aamma soqutiginninnermik
aallarniisimassaaq inuiaqatigiit akunnitsinni. Taakkua naammagigallarpakka,
qujanaq.
Ruth Heilmann, Ataatsimiititaliap siulittaasua, Siumut:
Tassa uanga Takornariaqarnermut
Ataatsimiititaliami siulittaasutut oqaaseqalaarusuppunga, tassa
takornariaqarnermi Inatsisartuni ataatsimiititaliaq 1996-imi pilersinneqarpoq,
tassalu aallarutivillugu 1997-imi ataatsimiittarluni aallartilluni, ukiuni
taakkunani marlussunni Takornariaqarnermut Naalakkersuisorlu qanimut
suleqatigiilluarsimavugut aammalu ataatsimiititaliaq piumassuseqarluarsimaqaaq
takornariaqarnerup ineriartortinnissaa sammissallugu. Pingaartumillu
aningaasaliissutaasartut sumut atorneqarneri misissuiffigisimavagut, aamma
Greenland Tourism nunatsinni takornariartitseqatigiit qanoq ingerlaneri
qanimut. Aammalu Danmarkimi Greenland Tourismip immikkoortortaqarfia aamma
paasiniaaffigisimavarput qanoq takornariaqarnikkut ingerlatitsinera pillugu.
Taamaattumik oqaatigisinnaavarput uani
aningaasaliissutaasartut naak ikikkaluartut pitsaasumik atorneqarsimasut.
Aammalu uanga partiit oqaaseqartut
assorujussuaq nuannaraakka, takornariaqarneq pillugu isumalluarpalaallutik
taamatut siunissami aamma oqariartuuteqarlutik assigiinngitsunik
siunnersuuteqarmata, kisianni uani allatulli paasiuminaatsippara Atassut
taamatut kisitsiserpassuarnik taamaallaat annerusumik saqqummiilluni
tusarnaartuni qularnanngitsumik paasineqarsinnaanngitsunik taamatut
oqaaseqarnera assut uanga ajuusaarutigaara, tassami uani qup. 5-ianni aamma
oqaatigaa taakku 166 mio. kr.-it ukiuni taakkunani tulleriaani aningaasaliissutaasarsimasut,
sumunuku pisimasut - tassani tammaaneqartutut immata, kisianni uani
oqaatigissavara tamatigut Inatsisartuni aningaasaliissutissat akuersaartarpagut
nikuilluta, tassanilu aamma aningaasanut inatsisissap nassuiaatitaani allaqqasarput
sumorpiaq aningaasat atorneqassanersut. Taamaattumik taakkua qupperarunikkit
immaqa paasissavaat sumut killiffeqarnerusugut.
Naalakkersuisoq saqqummiinermini
oqaatigisaasa ilagivaat tikisitat isumalluutiginagit nunatsinni
takornariaqarneq ingerlatinniassagipput, taanna isumaqarpunga pingaaruteqartoq
oqaatigisaq.
Tassami
takornariaqarneq tassaavoq - aamma upperaarput - Nunatsinni tassaassasoq
inuutissarsiutit pingaarnissaattut isigisinnaasassarput siunissami. Aamma
aningaasaliissutissat tassat eqqarsaatigigaanni 25 mill. kr.-nik massakkut
aningaasaliissutaasalersut naammanngillat , taamatut inuutissarsiutitut
Nunatsinni siunissami takorluussagutsigu. Taamaattumik ilinniartitaaneq
annertooq pissagutsigu tikisitallu isumalluutiginagit ingerlassagutta,
aningaasat annerujussuit ilinniartitaanermut aamma atorneqartariaqarput.
Taannalu erseqqarippoq aamma uani partiit aamma allat oqaaseqarneranni taanna
pingaartillugu oqaatigimmassut.
Kiisalu
aamma kiffartuussineq eqqarsaatigalugu pitsaanerpaaq angussagutsigu innuttaasut
takornariaqarneq akueralugu ingerlattariaqarparput. Ajornaqaaq
takornariaqarneq akuersaarnagu inuup ataasinnguulluunniit akuersaanngippagu
ilaatigut iluatsinngitsoortoqartassaaq pinngitsoorani. Taamaattumik Nunarput tamaat
isigalugu takornariartarneq inuutissartitut aammalu aningaasarsiutitut
isigilissagutsigu akursaartariaqarparput. Maannakkut nalunngereerparput
aningaasarsiutaalereersoq, sanaluttartut assigiinngitsut tikittartut
aningaasarsiutigaat. Tassani kaasarfitik immertarpaat, tassuunakkut nammineq
sanaaminnik takornarissanut nioqquteqartarnermikkut. Taamaattumik suli
annertunerusumik iluanaarutigissagutsigit tamakku aaqqissuussamik
ingerlanneqarnissaat aamma massakkut, suliaralugu aallartinneqartut isumalluutigaagut.
Taanna avaqqunneqarsinnaanngilaq.
Aamma
UNNUISA-mut aningaasaliissutaasartut maannakkkumut killeqaqisut -
qinnuteqartartut amerlaqaat - kisianni tunniutassaq annikitsuararsuulluni.
Tassuunakkullu aarleqqutiginarpoq maannakkut mittarfittaarnitsinni, Aasianni,
Sisimiuni aammalu allat mittarfittaartussaapput, takornariat taamarsuaq
takkussuutilernissaat piareersimaffigissagutsigu isumaqarpunga kingusinaarata
aningaasaliissutit tassani qaffanneqartariaqartut. Periarfissamik
ammaassereerpoq takornariaqarneq avammut aammalu tikittussat
eqqarsaatigalugit.
Assersuutigiinnarlugu
aalisarnikkut aningaasaliisarpugut allaat 300 mill.-kkaanik. Taanna inuutissarsiutaavoq
pingaartoq, aap, kisianni tullia aamma taamatut annertutigisumik pinngikkaluarlugu,
kisianni annertunerusunik amiganngitsunik aningaasaliiffigisariaqarparput.
Uani
ukioq tamaat Nunarput tassaavoq issittarluni,
Bjarne - aamma aputeqarpoq
tassani aput iluaqutiginiassagutsigu, aap, assigiinngitsutigut - oqarpoq
ataatsimiititaliaq paasiniaasariaqartoq . Paasiniaareerpugut aamma
Island-imiippugut paasiniaalluta, ukioq naallugu qanoq ittumik takornariaqarnikkut
pilersaarusiortarnerit, taanna paasisassarsiorfigalugu. Tupinnaannartumik
neqerooruteqartarput allaat silarlummi misigisassat tassa
neqeroorutigineqartarput. Taamaattumik ilinniarfissaalluarpoq Island-i, ukioq
tamaat assigiinngitsutigut misigisassatigut aammalu sisorariartarfeqarnikkut
iluaquteqarsimanerat iluaquteqarnerallu taanna Nunatsinni aamma iluaqutiginiarneqarsinnaammat.
Taamaattumik
Apussuit isumaqarpunga tassani eqqaasariaqarlugu, eqqaamagakku aamma 1995-imi
Apussuit inuusuttorpassuit soqutigalugu maani oqaluuserineqarmat, maani
najuuttut. Ullumikkullu suli annerusumik Apussuit aningaasaliiffigineqarani. Kisianni uani paasinarpoq 1,5
mill. kr. Naalakkersuisut tassani aaqqissutissaminik aningaasaqarnermut
inatsimmi siunnersuuteqartoq, neriuppungalu aamma tamanna partiinit allanit
tapersersorneqarumaartoq.
Maliinannguaq Markussen Mĝlgaard, Inuit Ataqatigiit:
Qujanaq. Tassa suleqatigiissitap
suliarisimasaa annertoqaaq aammalu isumassarsiassarpassuarnik imaqarpoq.
Ilaatigut Inuit Ataqatigiinninngaanniit nuanaarutigisatta ilagivaat uani
saqqummiussatsinni taanngikkaluarlugu matumuuna oqaatigineqarmat, taamatut
Nunatsinni takornariaqarnermik ilisimasaqarnerulernissarput anguniarlugu aamma
atuartut - meeqat atuarfiat - aamma ilanngunneqartariaqartoq, tassani
erseqqissumik oqaatigineqarmat. Eqqaamaneqarunnarsivoq ukiut immaqa marluk
matuma siorna Inuit Ataqatigiinninngaannit siunnersuuteqarsimagaluaratta
ilaatigut meqqaaq atuarfiat allaat tassani ilanngunneqartariaqartoq. Aammalu
pinngitsoorani arlaatigut takornariaqarnermut sammisaqarsinnaanissaq tassani
ilanngunneqartariaqartoq. Kisiat tassani Inatsisartut amerlanerussuteqartut
ilaatigut oqaatigivaat massakkut periarfissaqareerpoq piumasuni. Kisiat taanna
piumasuni, ilaa?, atortussaqaranilu meqqanik atuartitsiniaraanni
takornariaqarnermut tunngasunik, taava piumassuseq sumiissua?
Taamaattumik siunissaq
eqqarsaatigalugu aamma takornariqarnermut tunngasut atuarfimmi
sammineqartassappata ilinniutissanik immaqa inuutissarsiutinut tunngatillugu
sammisaqarnermi, atuakkanik aamma taakkununnga tunngasinnaasunik
sanaartornissaq avaqqunneqarsinnaanngilaq. Taamaaliunngikkutta aamma
siunissamut meqqat aammalu inuusuttunngortussat takornariaqarnermut
ineriartortitsinermut peqataanerulernissaannik kaammattuinissarput
killeqassaqimmat.
Taavalu ilaatigut
suleqatigiissitamit aamma oqaatigineqartoq unaavoq Nunap immikkoortuini
ilinniartitaanermut tunngatillugu, immaqa Nunap immiikkortuini
ingerlatsisoqarsinnaasoq Qaqortumi massakkut taamaattoqareerpoq. Aammalu
immaqa Avannaani taamatut pilersitsinissaq takorloorneqarsinnaasoq. Tassani
suleqatigiissitap taanna kaammattuutaa assut tusarluarnarpoq, kisianni
soorunami soorlu sumiinnissannik aammalu pilersaarusiornissamik,
ilinniartitaanermut tunngasumik, taakku apeqqutigisavut ilanngullugit
Naalakkersuisup akissuteqarfigiumaarmagit kingusinnerusukkut
naatsorsuutigalugu, saqqummiussatsinni apeqquteqaatitsinni sumut
killissimaneranik ukioq ilinniartitaanermut tunngasoq eqqartukkavut.
Neriuppunga aamma siunissami ersarissumik taakkua
pilersaarusiorneqarluarumaarput, tassami naammanngilaq - soorlu Bjarne-p
oqarneratuut - nuannaaqaagut, nuannaaqaanga. Suliassat amerlaqaat suli aammalu
ilinniartitaanikkut, angallannikkut sannaartunnikkut taavalu kulturikkut
ineriartortitsinikkut ataqatigiissumik ingerlatsitsinissaq pisariqarpoq
arlaannaat katataassanngippat.
Takornariaqarnermut
ataatsimiititaliami siulittaasoq oqarpoq, sumut iluaqutaassua mittarfippassuit
sanagutsitit inissaqartinnagillu takornariat tikittussat. Taamaatuumik
ataqatigiissaarluakkamik siunissami ingerlanissaq avaqqunneqarsinnaanngilaq,
pisariqarluinnarpoq. Aammalu tassunga tunngatillugu oqaatigerusuppara tassa
oqareernitsituut tamatumani pineqartut tikillugit aammalu Nunap immikkoortuini
suleqatigiiffiit tikillugit sulinissaq pisariqarluinnarpoq.
Naggasiutigallugu nuannaarutigaara
taamatut kisitsisit ilaatigut paatsuungassutigineqartut pillugit
Naalakkersuisup oqaatigimmagu suliniutigineqartoq siunissami aamma
toqqammavissaqartariaqaratta aammalu toqqissisimasumik sulinissaq,
Inatsisartut, pissutigalugu toqqammavissaqarluartariaqaratta kisitsisit
eqqortut saqqummiuttarnissaat maannakkut ilungersuullugu suliniutigineqartoq.
Naalakkersuisut akissuteqaataanut qujavugut aammalu siunnersuutitta maani
uteqqinngikkaluarlugit suliareqqinneqarnissaanut oqariartuutaa
nuannaarutigaarput.
Peter
Ostermann, Atassut:
Tupigillaarpara
sakkorttuumik iliornerput ilaatigut immaqa ajuallaatigineqalaarmat.
Sunaluunniit suliaq ingerlatarput sumut killinnera pillugu
nassuiaassiortoqartarpoq, soorlu massakkut taama iliortoqartoq.
Isertussanngilarput takornariartitsinerup piorsagaanerani killiffigisimasarput
assut pakatsissutigigatsigu. Naak soorunami pitsaasunik takusassaqaraluarluta,
kisianni tamaat ataatsimut isigalugu aningaasarpassuit atoraluarlugit
annertunerusumik angusaqartutut oqarsinnaannginnatta. Taamaatumik
sakkortuuliorpugut.
Sakkortuuliorpugut
siulersuisunngortut nutaat tusartikkumallugit, angusarput naammaginngikkipput
pitsaanerusumik angusaqartariaqalersugut, takornariartitsineq tamaat ataatsimut
isigalugu. Maani aalajangiisartuulluni aningaasartuutissanillu
akuersisartuulluni nuanninngilaq paasilerlugu kisitsisit qanoq
assigiinngitsigisut amerlatigisullu saqqummiussuunneqartut tusaallugit.
Eqqortunik kisitsisinik takusaqarusuppugut, tassa piumasarput. Allatulli
isumalluarfigisorujussuuarput takornariartitsine, taamaattumik
sakkortuuliornitsigut ersersinniarsimavarput, angusamik killiffimmik naammagisaqannginnerput.
Uagut
allanut allaassutigisarparput saqqummiussat issuaqattaaginnarlugit
oqaaseqarata, kisiannili isorisaqarniaraangatta ersarissumik
isorisaqarniartarluta. Taanna uani ersarippoq. Sorpassuit oqaaseqartunit
tamanit oqaatigineqartut tassaapput ukiuni qaangiuttuni eqqartorneqartartut;
ilinniartitsinerunissaq, takornariartitsineq avammut samminerusoq, sinerissami
takornariartitsiviit, peqatigiiffiit allallu ingerlatsisut
suleqatiginerullugit ingerlatsinissat. Tassa eqqartortuartakkavut ullumikkut
aatsaat ersarinnerusumik aalajangersimanerusumillu
iliuuseqarfiginiarneqalersut. Taamaatumik pakatsivugut.
Kisianni
taamaakkaluartoq oqaatigisariaqarparput suleriaqqinnissami peqataassaagut.
Peqataassaagut takornariartitsinerup pissutsinik eqqortunik tunngaveqarluni
ingerlaqqeriarnissaanut, Nunatsinni pissutsit aallavigalugit;
ilinniartitsinerunikkut, sinerissamik suleqateqarnerunikkut allarpassuartigullu
suleqataassaagut. Kisianni isertussanngilarput pakatsinerput.
Ruth
Heilmann, Siumut.
Atassumminngaannit
oqaatigineqartut, Peter Ostermann-iminngaanniit, uani oqarmat saqqummiussat
issuaqattaaginnarnik oqaaseqartarpugut, kisiannili annerusumik qanoq siunissami
takornariaqarnikkut tikkuussinatik uani quppernerit qassit - tallimat immaqa -
kisitsisit paatsuunganartut uani saqqummiussuuppaat aammalu pingaartumik immaqa
radiukkut naalaartut paasin-ngilaat Atassutip suna pineraa. Taamaattumik
nuannaarutigaara nassuerutigimmassuk aamma takornariaqarneq pillugu siunissami
suleqataaniarlutik uani oqaluttarfimmi aamma massakkut oqaatigisaat, kisianni
aamma uanga ajuusaarutigalugu oqaatigissavara uagut ataatsimiititaliamin-ngaanniit
Naalakkersuisut qanimut paasiniaaffigisimavarput tusagassiutini kisitsisit
saqqummiunneqartut qanoq uppernassuseqartiginersut nassuiaatigeqqullugu.
Taanna qanimut oqaloqatigiissutigisimavarput soorlu oqarneratuulli
Naalakkersuisup. Atassumminngaanniit peqataasoqanngit-soorpoq, taamaatumik
tassani angiluttorsimapput kisitsisitigut qanoq paasisassaraluaminnik,
taamaattumik akissuteqaataat iliissinnut Atassummut ingerlateqqikkumaarpakka,
tassani oqaloqatigiinnitsinni paasivavut. Aammalu tassani kissaatigisimavarput
ilissituulli soorunami siunissami kisitsisit eqqornerusut
nassuiaatigineqartarumaartut siunissami. Taannalu massakkorpiaq
pisinnaanngitsoq paasinarpoq aammalu allarpassuarnik tunngaveqarpoq,
takornariaqarneq inuussutissarsiutaammat nutaaq. Imaalilluta 1,2,3-erluta
isertut maannakkut suli kisissinnannginnatsigit.
Jonathan
Motzfeldt, Naalakkersuisut Siulittaasuat, Siumut:
Inuit
Ataqatigiit apeqqutigivaat, apostelfjeld qallunaatut taama taaguuteqarpoq,
Navaranaani, kalaallisut taaguuteqarsoraara, Turist-inut kommunalbestyrelse-llu akornanni
isumaqagiissutigineqarsimasoq, aap, taamaattoqarsimasoq paasisinnaavara
1996-imi suliassaq taanna aalartinneqarmat. Takusinnaavara assingiinngitsumik
isumaqarfigineqarsimasoq aamma ukioq manna kommunalbestyrelse-minngaanniit.
Kisianni paasiniarneqarsimasut ilaatigut avatangiisit pillugit oqartussaasut
aammalu kommunit tungaatigut oqartussaasut missualaarnerisigut, ammasumik
unammilleqatigiinnikkut takornariaqarneq aamma ingerlasussaammat, taava
periarfissaq taanna ajornartitaasimanngitsoq matumuuna
ilisimatisissutigineqarsimavoq.
Taanna
oqaatigilaassavara tassa ajornartutut avatangiisit tungaanniinngaannit
isigineqarsiman-ngimmat aammalu takornariaqarnerup unammilleqatigiiffittut
ingerlasussaanera killilerneqarsinnaanngimmat.
Oqallinneq
una ataatsimut oqaaseqarfiginngikkaluarlugu oqaatigilaarlara aamma Atassutip
oqaaseqartuinut aammalu oqaaseqartunut allanut aamma paasigakku. Nassuiaat una
tamatta naammaginngilarput assigiinngitsutigut aamma taanna Naalakkersuisut
oqaatigisaanni erseqqippoq, naammaginartoqanngilaq aamma uagut suliffeqarfitta
suleqatigiissimannginneri aamma ajorput, taamaatussaanngilaq.
Namminersornerusut suliffeqarfii Greenland Tourism allallu
suleqatigiittussaapput, taamaattumik taama ittut aamma uagut namminneq
akornatsinni pisut akuersaaruminaapput aamma isumagissavarput tamakkua
tungaatigut nakkutilliinissaq.
Maannakkut
Greenland Tourism-ip aallartinnera/ingerlaqqilernera Naalakkersuisuninngaanniit
tutsuigaarput, tatigaaarput. Aammalu ugguuna Nunap immikkoortortaanut
sammisumik suleqatiginninnissamik ammaassiniarneq isumaqarpugut
pissusissamisoortoq. Aamma ilaatigut Naalakkersuisut namminneerlutik
saqqummiuppaat maani uagut nammineq aaqqissuussatsinnik aaqqissuusseqataanitsigullu
takornariarneq ingerlatsissappat, assersuutigalugu Naalakkersuisut
taasaalluunnit gummibċd-inik namminneq ikaartussanngillat takornariat,
umiarsuarminninngaanniit namminneerlutik nunamullu uteqattaarneri uagut
isumagissavarput. Maani sulisutta akisussaaffigissavarput tamarmi
ingerlanissaa. Tamakkunatigut aamma aaqqissuussisinnaanerit eqaannerusumik
suliarinissaat nammineerluta aamma saqqummiussatsinni aamma tikkuarpavut
aaqqiissuteqarfiginiarlugit.
Imaappoq
assigiinngitsut piffinniit piffinnut aaqqissuisartut saniatigut aamma
tamakkiisumik aaqqitassat, maani tikkuartorneqartut arlalippassuupput. Kisianni
tassa soorlu Siumut oqaluttua-ta , aamma allat, oqaatigigaat
Naalakkersuisuninngaanniit inuussutissarsiornermut ineriartortitassanut ilaalluinnartutut
isigaarput. Aammalu takornariaqarneq pilersaarusiukkamik nakkutigisamillu
ingerlasoq Nunatsinni atorfissaqartipparput, ingerlalluarnissaalu aamma
suliarissavarput.
Peter Grĝnvold Samuelsen, Takornariaqarnermut
Naalakkersuisoq, Siumut:
Oqaaseqaqqinninni assigiinngitsut
tikinngisakka taakku apeqqutigeqqinneqarmata oqassuunga Ailinniartitaaneq sumut killippa?@ Inuit Ataqatigiinninngaannit
taanna apeqqutigineqartoq, tassa nutaamik ilinniarfiliortoqarnissaanik uani
saqqummiussinataluunniit oqariartuuteqarnngilagut, kisianni
pikkorissartitsinerit aqqutigalugit maannakkut ingerlanneqartut
assigiinngitsorpassuit taakkua tikkuassavavut, Narsami INUILI-mi, Qaqortumi,
Niuernermi Ilinniarfimmi Sisimiunilu Oqaatsinik Ilinniarfimmi ingerlanneqartut,
taavalu sumiiffinni ataasiakkaani qimussersussanik, guide-nik
pikkorssartsitsisarnerit oqaatsitigut allatigullugu, taakkua ingerlanneqartut
tikkuassavakka. Aamma outfitter-it aamma pikkorissartinneqartuarnerat aamma
torrallatanut ilaapput.
Kisianni soorunami oqareernittuut
tikkuartorneqartut taakkua tamaasa suleriaqqinnissami ilanngullugit
nalilersorneqassaput isumaginiarneqarlutillu. Nuannaarutigaara
Atassumminngaanniit Peter Ostermann-i nassuitsumik oqarmat Atassut
pakatsisimasoq, taanna nassuitsumik oqarneruvoq aamma tamanna ataqqissavarput.
Aamma taamatut oqarnermini oqarnera suli una nuanaarutiginerusara tassaavoq
aamma ajunngitsumik aamma takusassaqarmat, maannamut ineriartortitsinermi.
Ajuallattoqanngilaq uanga
ajuallanngilanga, kisitsinik eqqornerusunik ujarlersunut ajuusaarutigiinnarpara
nipi taama taartinneqartigimmat, kisianni tassa ataqqivara taamatut
oqariartortoqarnera. Aamma siulersuisut GT-mi taakkuninnga
suleriaqqinnissaminnik maani aamma peqataatitaqarnerat ilutigalugu partiit
nassuitsumik taamatut iluarisimaarinnilllutillu tikkuagassanillu
tikkuartuillutik oqariartuuteqarnerat pissusissamisuuginnarpoq
pissusissamisoorlunilu.
Taamatut oqaaseqarlunga tamaasa oqaaseqartut
qutsavigeqqissavakka. Suleriaqqinnissaq imassaqarluartoq nalunanngilluinnarpoq
aamma suliassaqarpassuaqartoq nalunanngilaq, taakkulu aamma suliarineqassapput.
Anders
Nielsson, Atassut:
Takornariartitsineq
oqalliserivarput imaanngikkaluarpoq tallisaariniartunga. Kisianni tassa pappialarpassuit
atorneqarput saqqummiussinermi. Immaqa akunnerit qulit 20 tiimilluunniit
tikillugit taakkua atuarniarneranni atorsimavakka paasiniarlugit, aamma Anthon
Frederiksen-ip isornartorsiutigisai paasisinnaalluarpakka, tassa kisitsisit
paasiuminaaqaat, taamaattumik tunineqarluni iluanngilluinnarpoq.
Ukiorpassuit tusagassiortutut
aamma politik-eritut ukiualunni misilittagaqarpunga aamma naalaartartut
eqqarsaatigalugit eqqasuuteqanngilanga paasissaqqaarpaat sunarpiaq pineripput.
Aamma naammanngilaq sulianut tunngasunik ataatsimiititaliaqarpat taakkuninnga
erseqqissaasusanik, taakkua nammineq paasinnikkumasut paasissaqqaarpaat.
Oqarluaannartariaqarpunga turist-udvalg-imi imaluunniit Takornariaqarneq
pillugu ataatsimiititaliami ilaasortaannginnama.
Finn Karlsen, Inatsisartut siulittaasuata
tullia, Atassut:
Tassalu taamaasilluni ullormut
oqaluuserisassat immikkoortoq 25, takornariaqarneq pillugu nassuiaat
oqallisigineqarnera tamaanga naammassivoq.
Oqaluuserisaq naammassivoq.