Oqaluuserisassani immikkoortoq 29-2-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 27. oktober 1998 nal.
14.08
Ataatsimiinnermik aqutsisoq: Anders Andreassen, Inatsisartut
Siulittaasuat.
Marianne Jensen, Peqqinnissamut Naalakkersuisoq:
Tupa avatangiisillu
tupatorfiunngitsunik isumannaarineq, kiisalu tupanik nioqqutissiat nalunaaqutserneqartarneri
pillugit Inatsisartut peqqussutaata allanngortinneqarnissaatut siunnersuutip
aappassaaneerneqarneranut atatillugu Inatsisartut Peqqinnissamut
Ataatsimiititaliaata qinnuteqarneranut atatillugu oqaaseqaatitik
Naalakkersuisut matumuuna saqqummiutissavaat.
Ukioq manna oktober-ip 20-ani
allakkatigut Inatsisartut Peqqinnissamut Ataatsimiititaliaata Naalakkersuisut
qinnuigai tupa avatangiisinillu tupatorfiunngitsunik isumannaarineq, kiisalu
tupanik nioqqutissiat nalunnaaqutserneqartarneri pillugit Inatsisartut
peqqussutissaannut siunersuut pillugu isumaliutissiissummini ataatsimiititaliap
allannguutissatut siunnersuutai pillugit tusarniaaneq sapinngisamik
piaarnerpaamik aallarteqqullugu.
Naalakkersuisut isumaqarput
ataatsimiinnermi matumani piffissaritinneqartut iluanni tusarniaaneq
tusarniaavigineqartut isumaliutigilluagaasunik akissuteqarnissaannut
periarfissakilliortitsisorujussuussasoq. Tamatumunnga tunngatillugu
eqqaasitsissutigineqassaaq assigiinngitsuniit tusarniaanernut piffissaliussat
sivikippallaartarneri isornartorsiorneqartarmata. Taamaammat
siunnersuutigineqarpoq allannguutissatut siunnersuutit siunnersuutip
aappassaanneerneqarneranujt atatillugu saqqummiunneqartut Inatsisartut
tullianik ataatsimiinnissaannut oqallisissanngorlugit kinguartinneqassasut.
Taamaalilluni sukumiinerusumik tusarniaasoqarnissaa naammassi-neqarsinnaassaaq.
Ilisimaneqartutulli
qinersisoqartussaavoq Inatsisartunullu ilaasortanngortussat tassaassappput
tullianik ataatsimiinnermi siunnersuummut isummertussat. Pissutsit
taamaatsillugit aappassaanneerinninneq pingajussaanneerinnernerlu
kinguartinneqarsinnaanngillat kisiannili siunnersuutip suliarineqarnera
aallaqqaataaniit aallartinneqartariaqassalluni.
Siullermeerinermut atatillugu tupa
pillugu peqqussummut allannguutissatut Naalakkersuisut siunnersuutaat
saqqummiunneqartut isumaqataaffigineqareermata, tamatuma ataatsimiinnermi
matumani akuerineqarnissaa Naalakkersuisut kaammattuutigaat. Sukaterinissat
allat kissaatigineqartut tusarniaaneq naammassereeriarpat ingerlaavartumik
inatsisit iluarsaateqqinneqartarnerannut ilanngunneqarsinnaassapput.
Taamatut oqaaseqarlutik
aalajangiiniarneq taanna Naalakkersuisut Inatsisartunut oqaluuserisassanngortippaat.
Kristine Raahauge, Siumup oqaaseqartua:
Tupa avatangiisillu tupatorfiunngitsunik
isumannaarineq il. il. pillugit Inatsisartut peqqussutaata
allanngortinneqarnissaanut tunngasoq siullermeerneqarluni Inatsisartunut
saqqummiunneqarnerani Siumumiit oqaaseqaativut innersuussutigaavut.
Taamanikkut Naalakkersuisut siunnersuutaat
tamakkiisumik taperseratsigu. Siullermik aappassaaneerneqarnerani Inatsisartut
Peqqinnissamut Ataatsimiititaliaannit isumaliutissiissut allannguutissamik
imalik Siumumiit tapersersimavarput innuttaasut peqqinnissaat eqqarsaatigalugu
assigiimmik periarfissinneqarnissaannik pingaartitsinerput tunngavigalugu.
Naalakkersuisullu ataatsimiititaliap
inassuteqaataanut tunngatillugu tusarniaanissaq ataatsimiinnermi uani naammassisinnaanagu
oqaatigimmagu, kisiannili inassutigineqartoq sulissutiginiarlugu
neriorsuinerat tunngavigalugu Siumumiit Naalakkersuisut siunnersuutaat
akuersaarlugu taaseqataassaagut.
Otto Steenholdt, Atassutip oqaaseqartua:
Inatsisartut saqqummiussaminni qanga ukiut arlaqalersut matuma siornagut siullerpaamik peqqussusiorniarlugu oqallinneranni Atassutip namminersorlutik suliffiuteqartut peqqussutikkut qulangersimaneqarnissaat Inatsisartunut nangaasaarutigisimagaluarpaa.
Atassutip taamanikkut ersarissumik oqaatigaa pisortat suliffiutaat Inatsisartunit peqqussusiorfigineqarlutillu inatsisiliunneqarsinnaasut, namminersorlutilli suliffiuteqartut sapinngisaq tamakkerlugu ilanngunnaveersaarneqassasut. Taamanikkut ikinnerussuteqarpugut peqqussutillu namminersorlutik suliffiutillit qulit sinnerlugit sulisoqartut Atassutip piumasaa akerlilerlugu peqqussummut ilanngunneqarput.
Ukiuni makkunani tupap takussaasumik akiorniarneqarnerani nappaammik krĉft-imik pujortarnerup inunnik amerlaqisunik nappaateqartitsisalernera ersarissumik oqaatigineqartalerpoq. Tamannalu Atassutip arajutsisimanngilaa.
Peqqussut manna namminersorlutik suliffiutilippassuarnut atuuppoq. Taamaallaat namminersorlutik suliffiuteqartut mikisut, tassalu qulit tikiinnarlugit sulisullit peqqussutikkut eqqorneqanngillat. Atassummiit kingullermik uparuaavugut namminersorlutik suliffiutillit assigiinngitsumik pineqarnerat unitsittariaqalersoq. Taamaattumik oqallinnermi kingullermi oqaatigaarput ataatsimiititaliap isumaliutissiissutaa, tassalu ' 4 imm. 2-p peerneqarnissaa isumaqatigalugu.
Atassuummiit qamuuna iluarinngilarput namminersorlutik suliffiutillit qulaanniit naalakkerneqartutut peqqussutikkut taamatut eqqorneqarmata. Atassut peqqussutip namminersorlutik suliffiuteqartunut atuuttuujuaannarnissaanik siunnersuuteqarsimanngilaq.
Peqqinnissarli ataatsimut tamaat isigalugu isummavut nalilersoqqissimavavut, nalunngilluinnaraluarparput namminersorlutik suliffiutillit qulit tikiinnarlugit sulisullit nammineerlutik peqqinnissap tungaa nammineerlutik nalilerluarsinnaagaat suliffimmilu pujortartoqannginnissaa aamma namminneq kusanartumik nalilersinnaallugu. Taamaattoq Atassummiit aalajangerpugut peqqussutip aamma angisuunik suliffiutilinnut atuuttup aamma taakkununnga ilanngutissagai.
Inini pujortartarfiunngitsunut pissarsiniarnissaat soorunamiaasiit akeqassaaq. Kisianni aamma pujortanngitsunik suleqateqaraanni taakkuninnga mianerinninnissaq pisariaqarpoq. Pingaartumik aamma nunatsinni astma-mik nappaatillit ukiuni kingullerni amerliartorfianni. Tamakkualu aamma qaavannut ilaliunniarparput ukiuni kingullerni paasineqarmat inuit pujortanngikkaluit tupap puguanik pujortartunit najuussuisitaanermikkut aamma krĉft-imik napaateqalersinneqartartut.
Atassummiit nassuiaatigisarput manna isumatsinnik allannguinertut nalilerneqariannguarli. Allannguinerit nunatsinni peqqinnissamik suliffimmi ataqqeqatigiinnissamik aallaaveqarmat isummamik allannguinermik pitsaasumik nalilerlugu Inatsisartunut sassaapparput. Ataatsimiititaliallu isumaliutissiissummini inassutaa Atassummiit nalilerlugu maanngaanniit Inatsisartut nalunaarutigaarput.
Maliinannguaq Markussen Mĝlgaard, Inuit Ataqatigiit oqaaseqartuat:
Tupa avatangiisinillu tupatorfiunngitsunik isumannaarinninneq il. il. Inatsisartut peqqussataata allanngortinneqarnissaanut siunnersuutip siullermeernerani taamatut isikkoqarluni saqqummiunneqarmat, Inuit Ataqatigiinninngaanniit tapersersorsimavarput aammalu matumuuna tapersersoqqillugu.
Peqqinnissamut ataatsimiititap allannguutissatut siunnersuutaata piffissaqarfigineqarluarluni tusarniaassutigineqarnissaa Inuit Ataqatigiinniit pingaartikkatsigu tusarniaasoqaqqaarnissaanik Naalakkersuisut kaammattuutaat isumaqatigaarput.
Taamatullu maannamut siullermeerinninnertut isikkoqarluni pingajussaaneerneqarnissaa akuerseqataaffigissallugu.
Anthon Frederiksen, Kattusseqatigiit:
Suliap siullermeerneqarnerani Kattusseqatigiinniit oqaaseqaatikka innersuussutigalugit maluginiarpara Naalakkersuisut saqqummiussaat siullerminngaanniit allannguuteqartoq. Tassa paragraf 4, imm. 2-mut tunngatillugu, aallaqqaammut aalajangiusimaneqaraluarmat taanna peerneqassasoq.
Taamaattumik aappaatigut paatsuungalaarlunga erseqqissaasoqarnissaa kissaatigaara taasisoqannginnerani. Nalornilaarama tamanna miserratigissanngilara. Taava nassuiaasoqareerpat taasinissannik aalajangerumaarpunga.
Anders Nilsson, (A) Peqqinnissamut
Ataatsimiititaliap siulittaasua:
Paatsuungasoqarsimagami. Peqqinnissap
Ataatsimiititaliaani siulittaasutut marlussunnik oqaasissaqarpunga.
Peqqinnissamut Ataatsimiititaliap peqqinnissamut naalakkersuisoq qinnuigaa
peqqussummi paragraf 4, imm. 2-p peerneqarnissaanut siunnersuutaanut atatillugu
sulisoqarniaqqullugu.
Immikkoortoq taanna suliffeqarfiit
qulinik ikinnerusunik sulisullit avatangiisit pujortarfiunngitsut
qulakkeerneqarnisaat pillugu maleruagassanut ilaatinneqannginnissaanut
tunngasuuvoq. Sulisitsisut peqatigiiffiisa saniatigut kissaatigaarput uku
apeqqummut pineqartumut atatillugu tusarniaavigineqassasut:
Krĉftimik akiuiniaqatigiit puatsigut
napaatinut tunngasunik peqatigiiffik astmap sapigallillu kattuffiat.
Tusarniaaneq taanna Inatsisartut ataatsimiinneranni matumani naammassineqarsinnaanngimmat,
Peqqinnissamut Ataatsimiititaliap isumaqatigiilluni inassutigissavaa tupa
avatangiisinullu tupatorfiunngitsunik isumannaarinninneq il.il. pillugit
Inatsisartut peqqussutaata allanngortinneqarnissaanut siunnersuut
Naalakkersuisunut ilaasortanut saqqummiunneqarnermisut isikkoqarluni
akuersissutigineqassasoq.
Peqqinnissamut Ataatsimiititaliap
ilanngukkusutani tusarniaasoqareerpat nutaamik siunnersuusiortoqarnissani
ilanngunneqartussatut naatsorsuutigaa.
Marianne Petersen, (S), Peqqinnissamut Avatangiisinullu
Nakkersuisoq:
Qujanaq. Massakkut paaseqagiittumik
Naalakkersuisut Peqqinnissamullu Ataatsimiititaliap akornanni
saqqummiussisoqarmat.
Aammalu Kattusseqatigiinninngaanniit
oqaluttup erseqqissaaqqusineranik erseqqissaatigissavara paragraf 4, imm. 2-p
peerneqarnissaa taanna Naalakkersuisut peqqussutissap allanguutissatut
siunnersuummini saqqummiusseqqaarnermini taanna siunnersuutiginngimmassuk,
kisiannili Peqqinnissamut Ataatsimiititaliap siunnersuutigimmagu taassumap
immikkoortup peerneqarnissaa.
Taassumalu kingunerisaanik
Naalakkersuisuni pingaartissimavarput tusarniaassutigineqaqqaarnissaa
inatsimmi taamatut allannguinissap aammalu tamanna massakkut Peqqinnissamut
Ataatsimiititaliarlu paaseqatigiissutigineqarpoq. Tamannalu pisinnaasimavoq
Naalakkersuisut neriorsuuteqarmata Peqqinnissamut Ataatsimiititaliap
allannguutissatut siunnersuutaa piffissaqarfigilluarlugu
tusarniaassutigineqassasoq, taavalu kingusinnerusukkut peqqussutissap allannguutissaatut
siunnersuutigineqarsinnaalluni.
Kisianni taassumap saniatigut tassa
Naalakkersuisut allannguutissatut siunnersuutaat saqqummiunneqarnikooreersimasut
tusarniaassutigineqareernikuusullu isumaqatigineqarput, taamaattumillu
Naalakkersuisuninngaannit inassutigissavarput peqqussutissatut allannguutissatut
siunnersuutip taamatut isikkoqarluni pingajussaaneerinninnissaminut
taasissutigineqarnissaa.
Otto Steenholdt, Atassutip oqaaseqartua:
Atassummiit ersarissumik oqaaseqareernitsinni uparualaarusuppavut aperineqarniartut Ataatsimiititaliap tungaaniit Naalakkersuisullu aamma taamatut isumaqarneranni tunngaviusut Krĉftens Bekĉmpelse tamatta naatsorsuutigisinnaavarput pujortarnermut inerteqqutaasumik piumasaqassasoq.
Taavalu Lungeforeningenimik taaneqartartoq qularnanngilluinnartumik aamma taanna oqassaaaq krĉftimik pilersitsisarneq pillugu pujortarneq naamik.
Taavalu anersaartornermik Astma- og allergiforbund taakku aperineqarunik ersarilluinnartumik aamma akissapput pujortarneq inerteqqutaasariaqartoq. Sunaana misissorniaripput aperineqarlutik akissutaat taakku akissutaat nalunngilarput.
Aamma eqqaamassavarsi peqqussutip suliffeqarfiit pisortanit pigineqartut tassa taakkorpiaat imaassaaq ersarissumik. Aammalu taassuma ilannguppai suliffeqarfiit qulit qaangerlugit sulisullit tamaasa. Sinnimininngua aajuna mikisoralaarsuaq: Qulit tikillugit sulisullit taakku qajassuunneqaraluarnerat. Isumaqarpunga imannarujussuaq apersuutissaanngitsoq.
Ippassaaninnguaq taamannak peqqinnissamut tunngasut oqallisigigatsigik sakkortutigisumik isumaqatigiilluta. Uku aperineqartussat nalunngereerlugit Atassummiit kissaatigissavarput kinguartitsisoqassanngitsoq. Tassalu taanna taasissutigineqartariaqassasoq peqqussut tamanut atuutsittariaqartoq. Tassa imannak suliffeqarfinnut privatinit pigineqartunut aammalu suliffeqarfinnut pisortanit pigineqartunut tamanut atuutissasoq.
Taannalu imatut tunngavilersorneqassasoq, siunissami peqqinnissaq imannak pingaartitsigaarput kikkut imaluunniit suliffeqarfiit tamarmik peqqussutip piumasaqarfigissagai.
Taama immaqa killormut saatsigisumik oqarsinnaagaluarpugut tamanikkut oqaraluaratta namminersorlutik suliffiuteqartut qajassuunneqassasut, kisiannili peqqinnissaq aallaavigalugu isummatsinnik taama annertutigisumik nikisitsilluta kissaatigaarput tamanna kinguartitsinissaq maani partiit kattusseqatigiillu nalilersorluariarlugu kinguartinneqarnissaa itigartissagaat.
Kristine Raahauge, Siumup oqaaseqartua:
Atassumminngaanniit oqaatigineqartut
aappassaaneerneqarnerani siullermik oqaaseqaatit ersarissut saqqummiunneqartut.
Kisiannili massakkut aappassaaneernissaanut
Naalakkersuisut ersarissumik nassuiaappaatigut unitsitsinermi tunngaviusut
naammassisinnaannginnamikkik kisianni suliaq taanna piumasarisarput
suliniutiginiarlugu ataatsimiinnissamullu tullermut peqqussummik
saqqummiussinissaminnut tusarniaaneq aallaavigalugu pilersaaruteqarnerat
tunngavigalugu Siumumiit aalajangerpugut siullermeerneqarnerani
akilerigatsigit Naalakkersuisut siunnersuutaasa '7
aaqqiissutissat taakku akuersaarlugit akuerineqarnissaa uanga unitsitsinissaq
kissaatiginngilarput.
Marianne Jensen, Peqqinnisaamut Naalakkersuisoq:
Tupaalaatiginngitsuunngilara massakkut
Naalakkersuisut akissuteqaamminni saqqummiussaat peqqinnissamut
ataatsimiititaliap paaseqatigalugu saqqqummiukkatsigu aamma tassani minnerunngitsumik
ataatsimiititaliap siulittaasua Anders Nilsson paaseqatigalugu massakkut
saqqummiunneqartoq pigatsigu.
Tassamiuna Naalakkersuisut taamatut
saqqummiussinitsinni aamma partiinit allanit Kattusseqatigiinnillu aamma
ilalerneqarluni peqqussutinik aammalu inatsisinik allannguiniartoqartillugu
pingaartipparput pineqartut imaluunniit tassunga attuumassuteqartut
periarfissinneqassasut oqaaseqaateqassallutik.
Qanorluunniit immaqa eqqoriarsinnaatigigaluarutsigik
qanoq oqaaseqaateqarumaartut tassani Naalakkersuisuni pingaartipparput taakkua
tusarniaqqaarnagit qulaatiinnarlugit aalajangiisoqannginnissaa. Taamaattumik
uteqqiinnassavara peqqinnissamut ataatsimiititaliarlu paaseqatigiilluta
Naalakkersuisuni massakkut taamatut siunnersuuteqarnitsinnut.
Maliinannguaq Markussen Mĝlgaard, Inuit Ataqatigiit oqaaseqartuat:
Uagut aamma tungitsinninngaanniit
kinguartitsinissaq imaluunniit unikkallarnissaq kisaatiginngilarput
pissutigalugu, siullermeerinninnermi partiit tamarmik taanna allannguutissaq
isumaqatigimmassuk.
Taamaattumik aamma peqqinnissamut
ataatsimiititaliami aamma Atassutikkut ilaasortaatitaqarfianni aamma
isumaqatigiillluta siullermeerinninneratut massakkut akuersissasugut oqaatigisimagatsigu
soorunalimi eqqumiigaarput Atassumminngaanniit aamma allatut isumaqartoqalersimasoralugu
uani allannguutissatut siunnersuutigisaraluarput alla aamma taasissutigeqqummassuk.
Taamaattumik Inuit Ataqatigiinninngaanniit Siumukkut
isumaqatigaavut unikkallarata ingerlaannassasugut
isumaqatigiinngissuteqannginnatta.
Anders Andreassen, ataatsimiinermik aqutsisoq.
Taavalu maannakkut taasissaagut.
Taasissutigissavarput saqqummiunneqarnermisut
isikkoqarluni pingajussaaneernissaanut ingerlaqqinnisaanut akuersisut
nikueqqussavakka: 30.
Tassalu isersimasut tamarmik akerliusoqaranilu
taasinngitsoortoqanngilaq.
Taamaalilluni pingajussaaneerneqarnissaminut
immikkoortoq 29 ingerlaqqissinnaanngorpoq qujanarlu.
Oqaluuserisaq naammassivoq.