Oqaluuserisassani immikkoortoq 29-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 22. september 1998 nal. 14.08
Ataatsimiinnermik aqutsisoq: Inatsisartut Siulittaasuat Anders Andreassen.
Marianne Jensen, Peqqinnissamut, Ilisimatusarnermut, Avatangiisinut Pinngortitalerinermullu Naalakkersuisoq:
Tupa avatangiisinillu tupatorfiunngitsunikisumannaarineq il.il. pillugit Inatsisartut peqqussutaata nr. 5-ip 3. november 1994-imeersup allanngortinneqarnissaanut siunnersuut Naalakkersuisut matumuuna saqqummiuppaat.
Tupa avatangiisinillu tupatorfiunngitsunik isumannaarineq il.il. pillugit Inatsisartut peqqussutaat nr. 5, 3. november 1994-imeersoq tupap sunniutaata navianartup annikillisinnissaanut peqqinnissaqarfiup suliniuteqarneranut maannamut inatsisitigut tunngaviusimavoq. Tupamut tunngatillugu pinaveersaartitsinermik suliniuteqarnissaq suli pisariaqartinneqarmat, tupamullu tunngatillugu malittarisassat ilaasa sakkortusineqarnissaat pisariaqartinneqarmat peqqussutip maannamut atuuttup allanngortinnissaanut siunnersuut matumuuna saqqummiunneqarpoq.
Taamaasilluni siunnersuut pinaveersaartitsiniarluni suliniutit aqqutigalugit innuttaasut nalinginnaasumik peqqissusaannik pitsaanerulersitsiniarnermik Naalakkersuisut suliniuteqarnerannut ilaavoq.
Peqqussummi ' 7, imm. 1 siunnersuutigineqarpoq allanngortinneqassasoq sukannernerulersillugu. Massakkut malittarisassaq malillugu inimi suliffiusumi inummit ataasiinnaanngitsumit suliffiusumi pujortartoqarsinnaavoq inimiittut tamarmik pujortartoqarsinnaaneranik akuersisimappata.
' 7, imm. 1-ip nutaamik oqaasertalerneratigut siunnersuutigineqarpoq inini suliffiusuni ataasiinnanngitsumik suliffiusumi pujortarneq inerteqqutaalluinnalissasoq.
' 7, imm. 2 maannamut atuuttoq malillugu ataatsimiinnermi pujortartoqarsinnaavoq inimiittut tamarmik pujortartoqarsinnaaneranut akuersippata. Allannguutissatut siunnersuutip atuutilerneratigut ataatsimiinnermi pujortarneq inerteqqutaalluinnalissaaq.
Taamaasilluni inatsimmik allannguinerup siunertaraa pujortartarnerup peqqissutsimut sunniutipiluisa annikillisinniarnissaat. Malittarisassanik sakkortunerulersitsineq aamma pisariillisaataassaaq taamaasillunilu malittarisassat malikkuminarnerulissallutik.
' 13-imi "Kalaallit Nunaanni Sullivinnik Nakkutilliisoqarfik"-up "oqartussaasunut allanut" allanngortinneqarnissaa siunnersuutigineqarpoq Kalaallit Nunaanni Sullivinnik Nakkutilliisoqarfiup allanngueqqusinera malillugu, taassuma Namminersornerullutik Oqartussani oqartussaasut erseqqissaaffigimmagit Sullivinnik Nakkutilliisoqarfik naalagaaffimmi oqartussaaffiusoq pillugu Namminersornerullutik Oqartussat inatsisiliorsinnaatitaanngitsut.
' 11, imm. 4 " Peqqinnissamut Avatangiisinullu Pisortaqarfik" Naalakkersuisut suliassaqarfiisa maannakkut agguataarneqarneri malillugit "Peqqinnissamut Ilisimatusarnermullu Pisortaqarfik"-mut allanngortinneqarpoq.
Siunnersuutip aningaasatigut sulisoqarnikkullu kingunerisassai.
Siunnersuut peqqinnissaqarfimmut aningaasaliissutaasunut tamarmiusunut sanilliullugu aningaasartuutaassanngilaq. Siunnersuutip sulisoqarnikkut sunniuteqarnissaa naatsorsuutigineqanngilartaaq.
Siunnersuut susassaqartunut tusarniaassutigineqarsimavoq, tamatumalu kingorna tusarniaanermi akissutit siunnersuutip suliarineqarnerani ilanngunneqarlutik.
Naalakkersuisut kaammattuutigaat tupa avatangiisinillu tupatorfiunngitsunik isumannaarineq il.il. pillugit peqqussutip allannguutaa atuutsinneqalissasoq.
Taamaattumik taamatut oqaaseqarlutik Naalakkersuisut Inatsisartunut ilaleqquaat Naalakkersuisut allannguutissatut siunnersuummik atortussanngortitsinissaat.
Kristine Raahauge, Siumup oqaaseqartua:
Naalakkersuisut siunnersuutaat Tupa
avatangiisinillu tupatorfiunngitsunik isumannaarineq il.il. pillugit
Inatsisartut peqqussutaata allanngortinneqarnissaanut tunngasoq Siumumit taperserparput.
Inatsisartut 1997-mi ukiakkut ataatsimiinneranni
Inatsisartut Peqqinnissamut Ataatsimiititaliaanit isumaliutissiissut Siumumit
suleqataaffigisimasarput oqaaseqarfigigatsigu ataatsimiititaliap isumaqatigiissup
Naalakkersuisunut inassuteqaataa immikkuullaritsitaarlutik pujortartarfiit
pillugit inatsisip ' 7-iata allanngortinneqarnissaanik imalik
isumaqataaffigalugu nalunaarutigisimavarput.
Siumup pingaartimmagu tupa avatangiisinillu
tupatorfiunngitsunik isumannaarineq pillugu Inatsisartut Peqqussutaanit ersarissaanissaq,
taamaasilluni pujortartanngitsunut pujortartartunullu akornusersuutaanngitsumik
aaqqiinissaq anguneqassammat.
Massakkullu Inatsisartut Peqqussutaanni nr.
tallimaani novemberip pingajuani 1994-imeersumi allanngortinneqarniartut,
ininik inunnik ataasinnaanngitsumit suliffiusuni aammalu ataatsimiinnerni
pujortarnerup inerteqqutaalernissaa Siumup isumaqatigilluinnarpaa.
Aammalu Peqqussutip eqquutsinneqarnissaa pillugu
nakkutiginninissaq kikkunnit akisussaaffigineqarnissaata qulakkeerniarneqarnera
pissusissamisoorluinnartutut isigalutigu.
Siumumiit nuannaarutigaarput peqqussutip
atuutilerneraniilli kommuuniniit pingaartinneqarluni malinniarneqarsimanera,
soorlu meeqqerivinni, atuarfinni allaffeqarfinnilu immikkut pujortarfiusinnaasunik
ininik pilersitsiortorsimaneq kusanartumik aaqqiisimanertut isumaqarfigaarput.
Taamak oqaaseqarluta Peqqussutip
allanngortinneqarneranik Inatsisartut peqqussutissaatta oqallisigineqarnerata
aappassaaneerneqannginnerani Iantsisartut Peqqinnissamut Ataatsimiititaliaanut
ingerlateqqaarneqarnissaa Siumumit inassutigissavarput.
Anders Nilsson, Atassutip oqaaseqartua:
Inatsisartut peqqussutaanut
allannguutissatut siunnersuut Atassutip tapersersorpaa.
Allannguuteqartitsinerup inimi
sulliviusumi imaluunniit ataatsimiinnermi pujortarsinnaatitaanerup
pujortartanngitsunut ikinnerussuteqartunut pinngitsaaliiusarnikkut
tutsinneqartarnera peersissavaa, inini inuit arlaqartut suliniarlutik ataatsimiillutilluunniit
isersimaarfigisaanni pujortartarnerup ajornanngeqisumik
inerteqqutigineqalerneratigut.
Maliinannguaq M. Mĝlgaard, Inuit Ataqatigiit oqaaseqartuat:
Nunatsinni tupatorpallaarnerup kinguneranik
krĉftimik nappaateqalersartut peqqinnissaqarfimmut aningaasarpassuarnik
atuinermik kinguneqartarput. Naak inuiaqatigiit tamarmiulluta nalunngikkaluarlugu
tupa qanoq ulorianartigisoq, ullut tamaasa cigaritserpassuit
nungunneqartarput, naallu nunatsinnut akitsuutitigut isertitsissutaasarneri
utoqqatsissutinut ilaasaraluartoq, illuatungaatigut aamma aningaasarpassuit
nunatsinniit aniasarnerat isertuunneqarsinnaanngilaq.
Tupatorneq akisoqaaq, inummut
pujortartumut, peqqinnissaqarfimmut inuiaqatigiillu kalaallit aningaasaataasa
aniaannaratik nunatsinni kaaviiaartinnissaraluanut. Nalunngilluinnarparpullu
ukiut tamaasa ilami ukiutoqqat tamaasa qassimmita ukiortaami
pujortarunnaarniarlutik oqartaraluarpat. Pikkorittaqaat oqaallaatigalutik taamaatissinnaasartut.
Ilarpassuaqarpulli aallartikkaluaannarlutik tunniutiinnartartunik.
Killilersuineq namminermi
ajunngikkaluartoq, pujortarunnaarusuttunut ikiorsiissutaasinnaasunik
annertunerusumik sulissuteqartoqartariaqarpoq Inuit Ataqatigiinniit isumaqarpugut.
Imerajuttut
katsorsarneqarsinnaappata, sooq pujortarajuttut periarfissinneqassanngillat?
Katsorsaavinnik akisoorsuarnik
pilersitinngikkaluarluta pinaveersaartitsineq aqqutigalugu pujortarunnaarnissamik
suliniuteqartunik pilerisitsisoqarsinnaagaluarpoq, pujortarunnaarusuttullu
ikioqatigiillutik pujortarrunnaarsinnaanerat anguneqarsinnaagaluarluni.
Tupatorneq akiorniarlugu
pinaveersaartitsinerlu tunaaralugusiunnersuut inatsisissatut siunnersuut
allannguutissaq saqqummiunneqartoq Inuit Ataqatigiinniit paasivarput
tunngaviatigullu isumaqatigalugulu.
Tupatorneq pillugu Inatsisartut
inatsisaat 1994-imi pilersinneqarsimavoq. Taannalu inatsit pujortarneq
ajortuulluni iluaqutaaqisoq qularutissaanngilaq. Paaserusunnarporli uumap
inatsisip atuutilernerata kingorna pujortarneq annikillisimanersoq?
Tassunga ilanngullugu aamma uani
inatsimmi oqaatsigineqarpoq, inimi inummik ataasiinnaanngitsumik sulliviusumi
pujortarneq inerteqqutaalissasoq, apeqqutigerusupparput tamatumani neriniartarfiit
imerniartarfiillu aamma pineqarnersut. Nalunngilarpummi aamma taakku
arlalinnik sulisoqarsinnaasartut pujortarfiusaqisullu.
Taamatut oqareerluta Inuit
Ataqatigiinniit isumaqarpugut tusasagassiutit atuarfiillu aqqutigalugit
pujortartarnerup akornutai nipiliutigineqartariaqalersut. Taama oqaaseqarluta
apeqqutitta akineqarnissaat kissaatigalugu peqqussutissatut siunnersuutip
Peqqinnissamut Ataatsimiititami oqaluuserineqarnissaa innersuussutigaarput.
Anthon Frederiksen, Kattusseqatigiit:
Inatsisartuni suliniarsarinitsinni
ilaatigut kipiluttunarsinnaasartumi nunatsinni peqqissuseq pillugu
nassuiaatigineqartartut tunngavigalugit ilisimavarput; nunatsinni tupatorneq
pissutigalugu puatsigut, toqqussaakkut il.il. krĉftimik nappaateqalertartut
nunanut allanut naleqqiullugit amerlanerujussuusut, taamaattumik
ajornartorsiutip taama annertutigisup millisinneqarnissaa anguniarlugu,
peqqussutip sukateriffigineqarnissaa tamakkiisumik taperserpara.
Uagummi inersimasut uatsinnut
nalligiinnaraluarutta, meerartatta pitsaanerusumik siunissaqarnerat
angujuminaatsissaqaarput, taamaattumik suliap aappassaaneerneqannginnrani
Inatsisartut Peqqinnissamut Ataatsimiititaliaani akuersaartumik oqaluuserineqarnissaa
innersuussutigaara.
Marianne Jensen, Peqqinnissamut Naalakkersuisoq:
Malunnarpoq Naalakkersuisut siunnersuutaat Inatsisartunit oqaluttunit tamanit ilalerserneqartoq, kisiannilu aamma Peqqinnissamut Ataatsimiititaliami eqqartorneqarnissaa kissaatigineqarluni, tassanilu oqaluuserineqartussat arlallit aamma saqqummereerlutit.
Tamanna Naalakkersuisuniit soorunami ilalerusupparput, aammalu paasissutissanik ilisileerisinnaanerput tassani ammaakkusullugu, ilaatigut oqaatigisinnaavara Inuit Ataqatigiinni oqaluttup Maliinannguaq M. Mĝlgaard-ip apeqqutigivaa ukiuni kingullerni tupatorsinnaanermut inatsisiqalereernitta kingorna tupatorneq nunatsinni annikilliallassimanersoq qanoq malinnaaffigineqartiginersoq.
Tassunga tunngatillugu oqaatigissavara ukiut matuma tallimat missaata siornatigut, tassa peqqinnermut misissuineq annertoorujussuaq ingerlanneqarsimavoq, tassanilu aamma takussutissaqarpoq nunatsinni inuit qanoq amerlatigisut pujortartuusut, tassanilu oqaatigineqarluni kalaallit 80 % missaat inersimasut pujortartuusut.
Tamatuma kingorna ukioq manna Paarisap pilerseqqereerneratigut aamma taamak annertutiginngikkaluamik, kisiannilu paasisarput naapertorlugu aamma takussutissaalluartumik inuiaqatigiinni qanoq pujortartoqartiginersoq, aamma taanna ilanngullugu misissuataartissimavarput tassanilu paasissutissat kingulliit aamma Ataatsimiititaliamut tunniutissallugit piareersimavugut.
Naatsumik oqaatigalugu paasiniaanerit kingulliit tunngavigalugit inersimasut pujortartartut ajoraluartumik malunnaatilimmik ikiliallassimanngillat. Kisiannilu una neriunartut ilaattut oqaatigineqarsinnaavoq, taakkunannga pujortartuniit 70 %-it oqarsimammata pujortarunnaarusukkaluarlutik, taamaattumik paasissutissat ilaat tassaniipput, aammalu allat Ataatsimiititaliamut tunniussinnaasagut isummersuinermi ilapittuutaasinnaasut tunniukkusussavagut.
Malunnarpoq kaammattuineq pujortarunnaarnissamut pisariaqartoq, tassami nalunngilarput pujortartalereersimalluni qanoq ajornartigisoq taamaatikkusukkaluarluni taamaatissinnaaneq. Taamaattumik kajumissaarutissaavoq una annertooq, suli pujortartalersimanngitsut aallartinnaveersaaqqullugit, nalunanngimmat ajornakusoortartoq taamaatinniarnissaq.
Taamaakkaluartoq aamma soorunami pujortarlereersimasut taamaatinniarnissaannik kaammattortuartariaqarput, tassunga atatillugu oqaatigisinnaavara danmarkimi pualluutinik akiuiniaqatigiiffik peqatigiiffik suleqatigilluarlugu aammalu aningaasanik ikiorsiimmaat ukioq mannamiit pujortartarneq akiorniarlugu suliniutinut assigiinngitsunut, tassani Peqqinnissamut Pisortaqarfimmi Paarisamilu salliutillugit suliniutissatut aallarniutigisimavagut naartusut angajoqqaanngortussat aammalu tassani meeraaqqat eqqarsaatigisimallutigit, soorunami kikkut tamarmik ataatsikkut suliffigerusunnaraluaqaat, kisianni aamma aallaavissaqartariaqaratta taakkua pingaartillugit aallarniutiginiarsimavagut, taamaalilluta taakkununnga suliniutit assigiinngitsut aallartisarneqarnikuupput taakkualua aamma Ataatsimiititaliamut tusarliussutigissallugit piareersimassuugut.
Taakkununnga suliniutit ilagivaat pujortalereersimasunut pujortarunnaarusullutik ikiorneqarusuttunut aamma ilitsorserneqarusuttunut pikkorissartitsinerit ilitsersuussisinnaanermut, tassanilu angajoqqaanngortussat siullermik taakkua neqoroorfigineqartarput pujortarunnaarusukkunik ilitsersorneqarsinnaasut ikiorneqarlutillu, qanoq iliornikkut taamaaliornissaq ajornannginnerpaassasoq, aammalu taamatut pujortarunnaarusunnerminnik ikiorneqarusuppata tamakkua nipputtartut allallu eqqarsaatigalugit, tassuunakkut aamma akikillisaavigineqarsinnaanerinik taakkua aamma suleqatigut ikiorsiullugit neqeroorfigisinnaalersimavagut. Aallartittoqarsimavoq, soorunami suli suliniutit annertusartariaqassapput.
Taamatut oqaaseqarallarlunga malunnarmat tamanit tapersersorneqartoq, tassani oqallisigeqqinnissaanik oqallilluarnissassinnut kissaallusi qujagallarpunga.
Maliinannguaq M. Mĝlgaard, Inuit Ataqatigiit:
Apeqqutigisarpununa ataaseq akineqanngimmat neriniartarfinnut imerniartarfinnullu tunngasoq. Tassami inatsit atuutilertussaq malillugu 17 november 1998 atuutilertussatut allanneqarsimavoq.
Aammalu tassani imak paasisariaqarnerluni ulloq taanna, tassani neriniartarfinni pujortarneq inerteqqutaalissasoq tassami nalunnginnatsigu sulisoqarpoq arlalinnik aammalu inuit katersuuttarfigivaat neriniartarfiit imerniartarfiillu.
Taavalu uunga ilanngullugu oqaatigissavara, tassa soorunami nuannaarutissaavoq naartusut aamma angajoqqaanngortussat taamatut kaammattorneqarnerat. Uanilu ukiualuit qaangiuttut nalunngilarput TV-kut aallakaatitsisoqarsimasoq qanoq kinguneqarsinnaaneranut tunngasunik, taakkua isumaqarpunga ullumikkut nangeqqittariaqartut, soorunami makkua assilissat plakatit allallu atorluarneqarsinnaapput, kisianni aamma nalunngilarput sunniuteqarnerpaarpaarsartut inunnut tassaavoq TV-kut aallakaatitassiorneq aammalu immaqa Radio-kut, tamatigut qaammarsaaneq aammalu navianaqutaanik aallakaatitassiorneq.
Tassungalu ilanngullugu una pujortarunnaarlutik eqqarsartut taamak amerlatigisimappata, tassa 70%-tiusimappata isumaqarpunga pimoorussamik taakkua ikiorserneqarnissaat qanoq iliuuseqarfigineqartariaqartoq. Tassami arlaatigut ilaat eqqarsartarialuarpoq immaqa kaammattoqatissaaruttarlutik, immaqa illoqarfikkaartumik pinaveersaartitsinermik suliaqartunut ilanngullugu pikkorissaatitsisoqarsinnaagaluarpoq qanoq ililluni ataatsimoorussamik pujortarnaveersaaqatigiinnissamik pikkorissaasoqarsinnaanersoq. Tassami nalunngisatsituut aningaasarpassuit atorneqartarput aammalu peqqinnissamut minnerunngitsumik tamatuma kinguneranik aningaasarpassuit atorneqartarlutik.
Marianne Jensen, Peqqinnissamut Naalakkersuisoq:
Soorlu naluneqanngitsoq Peqqinnissamut Ataatsimiititaliap tupatortarneq pillugu arlaleriarluni oqallittarsimavoq aammalu inassuteqartarsimalluni maanga aammalu Inatsisartuni ataasiakaani taamaaliortoqartarsimalluni. Tassani aaamma soorunami innuttaasut akornganni oqallinneq pisarsimalluni.
Tassunga tunngatillugu uani Naalakkersuisut siunnersuuteqarnissatsinni aamma eqqarsaatersuutigineqarsimaqaaq qanoq annertutigisumik qanorlu ikitsigisunik allannguuteqartoqarnissaa massakkut inassutigissagipput.
Una siuariarnertut isigalugu massakkut siunnersuutigigallarparput, tassanilu aamma allat sukaammiisinnaanerat eqqartorsimagaluarpagut ingammi pisortaqarfimmi, kisiannili ilaatigut aningaasatigut suliffeqarfinnut sumiittarfinnullu kingunerisinnaasai qulaajarneqartinnagit aammalu tamakkiisumik takusinnaanngikkallartillugit tamakku allannguiffiginissaanik massakkut siunnersuuteqarnissarput tunuarsimaarfigisimavarput.
Taamaattumik massakkut inatsisissap peqqussummut atuutereersumut allannguutissatut siunnersuutit tassa ukutuaapput saqqummersut, taamaattumillu atuutereersup saniatigut aningaasanik annertuumik naleqarsinnaasunik allannguuinissamik uuma kingunerisaanik naatsorsuuteqanngikkallarpugut.
Erseqqarinnerusumik taassuma oqaaseqarfiginissaa pisariaqartinneqarpat utaqqilaartariaqassaanga, massakkut erseqqarinnerusumik oqaaseqarfigisinnaanngikkallarpara.
Pujortarunnaarusuttunut aammalu pujortarnaveersaarnermut paasissutissat assigiinngitsut atoqqinneqarsinnaasut Maliinannguaq M. Mĝlgaard-imit kaammattuutigineqarpoq. Aap nunatsinni pigineqareersut paasissutissat assigiinngitsut pigivagut assigiinngitsorpassuit, aammalu danmarkimi krĉftimut akiuiniaqatigiiffik Krĉftens Bekĉmpelse siorna oqaloqatigineranik aamma isumaqatigisimavakka paasissutissaataat assigiinngitsorpassuit taakkua uagut pisinnaagigut, tamannalu piviusunngortippaat, tassa siorna kassingaatsiarsuarmik nassiussarsivugut, video-it assigiinngitsutigullu takussutissat paasissutissat tassani katersorneqarsimallutik.
Taakkua nammineq pigisagut aamma avataaninngaanniit nassiussarsiagut, pissarsiagut ataavartumillu pissarsiarisartakkagut massakkut piffissani kingullerni paasillugit allattorlugillu qanorlu imaqarnersut sunut piukkunnarnersut misissuataarpagut, taanna suli naammassivinngilaq, kisianni iluatinnartorpassuaqartoq malunnarpoq, aammalu tassa taannarpiaq siunertaavoq suut nunatsinni atorluarsinnaagigut piureersunit nutaarsuarnik sananngikkaluarluta, aammalu immaqa suut pisariuallaanngitsunik atornissaat akisuallaanngitsumillu nunatsinnut naleqqussinnaasut, suliat tamakkua massakkut ingerlapput.
Aamma pinaveersartitsinermik siunnersortinik nunatsinni piorsaasoqarnerani nalunngilara tupatorpallaarnermik apeqqut aamma taakkunani soqutigineqarluarlunilu pingaartinneqartoq, taamaattumik taakkua aamma qanimut suleqatiginissaat piukkunnarluartuuvoq.
Anders Andreassen, Inatsisartut Siulittaasuat:
Erseqqissaatigissavara partiit, taavalu aamma Kattusseqatigiit kissaatigimmassuk Peqqinnissamut Ataatsimiititaliami suliassaq suliarineqaqqaarallassasoq taavalu soorunami taanna aamma isumaliutissiissummik saqqummiussiumaarpoq aappassaaneerneqarnerata nalaani. Aammalu qulornanngitsumik tassani eqqartorneqartut ilagisussaassavaat qaqugu atuutilernissaanik siunnersuutaasimasoq.
Kristine Raahauge, Siumut:
Uani Inuit Ataqatigiinninngaanniit ersarissumik
apeqqutigineqarmat pujortarnerup taamatut sukuteriffigineqarnerata tamanut
atuussanersoq imaluunniit immikkut aamma soorlu sutorniartarfiit
neriniartarfiit pineqassanersut, uagut isumaqarpugut suliffinni tamani
atuuttussatut saqqummiunneqartoq, tassalu tamani aamma atuuttariaqarluni,
imaqaluunniit aamma allanut naleqqiullugu sutorniartarfiit neriartaarfiit,
nerisassiortup inuit kikkulluunniit nerisassaannik piserusuttut sulisut
pingaartinnerpaavaat immikkut pujortartarfeqarnissartik.
Johan Lund Olsen, Inuit Ataqatigiit:
uanga naatsuarannguamit taammaallaat
oqaaseqalaaginnassaanga partiimi oqaaseqartutta saniatigut, tassa isumaqarama
aamma inatsisiliortutut maani inatsisartuni eqqaamaqqissaartuartariaqaratsigu
inatsisilioraangatta aamma inatsisiliaq una unalu malitsinniarneqassanersoq.
Isumaqarpunga taanna eqqaamajuartariaqaripput,
uani siunnersuummi ' 7-i imm. 1, ima tassa
oqaaseqartussatut siunnersuutigineqarpoq, ini inummik ataasiinnanngitsumik
suliffiuppat pujortarneq inerteqqutaavoq. Ersarilluinnartoq inerteqqussut.
Tassa imatut paasineqassanerluni aamma oqaaseqartutta assersuutitut
oqaatigivaa, sutorniartarfinni taava qanoq iliortoqassava, imerniartarfinni
inuit katersuuffigisaani assigiinngitsuni.
Taamatut inerteqqussummik
eqqortitsiniareernissamik piareersimanngitsunut, taava qanoq aaqqissuussiniartoqassava?
Uani siunnersuummi oqaatigineqarpoq Inatsisartut peqqussutaat manna
atuutilissasoq november 15-aninngaanniit ukioq manna. Tassa aqaguani 16.
november 1998 sutorniartarfimmut arlaannut maani Nuummi, sineriatsinni
arlaaniluunniit neriartussaguluarutta taava kikkut kisimik neriartoqqusaasinnaassappat?
Pujortarsinnaanngitsut.
Taamaattumik malitsitsiniarneq
inatsisilioraangatta aamma taanna eqqaamasassagipput uani ujartorpara, aammalu
Peqqinnissamut Ataatsimiititaliamut aamma nalilersorneqarnissaa kissaatigissallugu.
Anders Andreassen, Inatsisartut Siulittaasuat:
Erseqqissaatigissavara una pineqartoq
oqallisigineqartoq ullumikkut, tassa allannguutissatut siunnersuutitut
saqqummiunneqarmat, taamaattumillu Peqqinnissamut Ataatsimiititaliap iluani
sukumiinerusumik eqqartorneqassaq, qanoq qaqugulu atuutilernissaa, kiisalu
qanoq isumaqartinneqassanersut oqaaserineqartut maani.
Maani oqaaserineqartut ilanngullugit
Peqqinnissamut Ataatsimiititaliap tamanna suliarissavaa, taavalu aamma
isumaliutissiissummi aappassaaneerneqartinnagu saqqummiussiumaarluni.
Allamik oqaaseqartussaarummat taamaalilluta
ullumikkut oqaluuserisassap immikkoortup 29-ip siullermeerlugu oqaluuserineqarnera
naammassivarput. Aappassaaneerneqartinnagulu Peqqinnissamut
Ataatsimiititaliamit suliarineqarallassaaq, tamatumalu kingornatigut
aappassaaneerneqarumaarluni.
Oqaluuserisaq naammassivoq.