Oqaluuserisassani immikkoortoq 45 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders Andreassen, Inatsisartut
Siulittaasuat.
Mikael Petersen, Isumaginninnermut, Suliffeqarnermut
Pisortallu Suliassaqarfiutaannut Naalakkersuisoq, Siumut:
Naalakkersuisut
matumuuna suliffeqarnikkut ingerlatsineq pillugu nassuiaat saqqummiutissavaat.
Nassuiaat suliffeqarnikkut ingerlatsinerup pingaartinneqarnerulerneranik ukioq
kingulleq september-imi Naalakkersuisunngortut aalajangiussaannik
aallaaveqarpoq. Ukiuni kingullerni suliffeqarnermi illuatungeriit kommunit
Naalakkeruisoqarfiillu allat pimoorullugu isumaqatigiinniarfigineqartarsimapput
nunami maani suliffeqarneq qanoq eqaannerulersinneqarsinnaanersoq
suliniuteqarnerlu sunniuteqarnerulersinnaanersoq, sulisinnaasut maani
najugaqartut pitsaanerusumik atorneqalersinnaaqqullugit taamaalillunilu
suliffissaaleqineq akiorneqarsinnaaqqullugu.
Isumaqatigiinniartarnerit
tamakku kinguneraat. junip qaammataani Qaqortumi suliffeqarneq pillugu
isumasioqatigiittoqarnera. Naalakkersuisut sinnerlugit piginnaatippunga
peqataasut soqutiginninnerannut siunnerfilimmillu isummersornerannut aasaq
Qaqortumi Sulisartut Hĝjskolianni ulluni ulapaarfioqisuni pitsaasunut
qutsavigissallugit. Oqallittarnerit suleqatigiikkusussuseq
nammaqatigiikkumanerlu puigugassaanngitsunik misigititsipput. Suliffeqarnikkut
ingerlatsinermik ineriartortitsineq ataatsimoorluta tamatta
suleqataaffigisariaqaripput aamma ukiut 1000-illit tulliit aallartinnissaannut
Namminersornerullutik Oqartussat ineriartortinneqarneranni pingaaruteqarluni
inissisimassasoq.
Qutsaviginiarpakka
kommunit, Kanukoka, Nunatsinni sulisitsisut sulinermillu inuussutissarsiuteqartut
kattuffii, namminersortut peqataatitaat Naalakkersuisoqarfinniillu
assigiinngitsuniit peqataatinneqartut.
Immikkut
nuannaarutissaavoq Qallunaat Nunaanni Suliffeqarnermut minsterimit Ole
Hygom-imit aamma qallunaat soqutigisaqaqatigiiffiinit kiisalu Island-imiut
peqataatitaannit isummersorneqarsimagatta.
Nassuiaatip saqqummiunneqartup
imarai Nunatsinni suliffeqarnermi pissutinik sukumiisumik naliliisarluni
misissuinerit aamma suliffeqarnermi illuatungeriinnut
isumaqatiginninniartarnernit kiisalu Qaqortumi isumasioqatigiinnermit
inerniliinerit.
Pissutsit tamakkut
nassuiaammi Naalakkersuisut Nunatsinni suliffeqarneq ataatsimut isigalugu
ineriartortitsiniarlutik suliassatut pilersaarutaannut siunissamullu
tunngatillugu eqqarsaatersuutaannut sanilliunneqarput. Suliffeqarnermut
tunngasutigut iluarsartuussinissamut Naalakkersuisut siunnersuutaata siunertaa
pingaarneq tassaasoq suliffisaaleqisut suliffeqarnermit peersitaasut
piumasaqaatitaqanngitsumik pisortanit isumagineqalertarnerisa
unitsinneqarnissaa aamma sulisinnaasut piginnaasaasa
pitsaanerulersinneqarnissaat, inuussutissarsiorneq sulisinnaasunik naammattunik
piginnaasalinnillu sulisoqarsinnaaqqullugu. Suliffeqarnermut tungatillugu
suliniutit annertusineqarneranni makku pingaartinneqarput:
Siullermik sulisinnaasut
ilaannut suliffeqareersunut ilinniartitseqqittarnerit annertusillugit.
Aappassannik
suliffeqarnermi pissutsinik ilisimasat pitsanngorsarlugit ullutsinnut
naleqquttumnik suliffeqarnermik kisitsisitigut takussutissat
annertusarnerisigut aamma suliffeqarnerup ilusaasa pissusaanik ingerlaavartumik
nakkutilliinikkut.
Pingajussaanik
paasissutissiisarnermik teknologi nutaaliaasoq atorlugu
suliffissarsiuussisarnernerup nukittorsarneqarnissaa.
Sisamassaanik
suliffeqarnermi inuusuttut suliffeqanngitsullu sulilersitsiniutinik nutaanik
neqerooruteqartarluni taamaalillutik taakka suliffinnut ataavartunut
piginnaaneqalersinnaaqqullugit.
Kiisalu tallimassaanik
suliffeqarnermut tunngatillugu suliniutigineqartut pillugit aalajangiiniartarnerit
suliniuteqarfigineqalernissaat, suliffeqarnermi illuatungeriit nuna
tamakkerlugu suliffeqarnermut siunnersuisoqatigiinnut
peqataatinneqalernerisigut.
Suliassarpassuit tamakku
tamarmik imaaliallaannaq naammassineqarsinnaanngillat siunertamullu
naleqquttumik pilersaarusiorneqartariaqarput. Kisiannili suliffeqarneq pillugu
suliniutaasussat annertuumik pisariaqartinneqartut
aallartinneqarsinnaaqqullugit siunnersuutigineqarpoq ukiumi
aningaasaliiffiusumi tullermi misiliilluni aaqqissuussinissanut
aningaasartuuteqartoqassasoq.
Misiliilluni
aaqqissuussinernut ilaassapput paasisitsiniaanermut teknologi nutaaq,
suliffissarsiuussisarneq kiisalu ilinniaqqinnissamut neqeroorutit nutaat
il.il. Misiliilluni aaqqissuussinerit kommunini suliffeqarnermut allaffiit,
suliffissarsiuussisarfiit, Kanukoka aamma Kultureqarnermut,
Ilinniartitaanermut Ilageeqarnermullu Pisortaqarfik suleqatigilluinnarlugit
ingerlanneqassapput. Tamatumani pineqarput ingerlaavartumik
pilersitsisoqassasoq, suliassaqarfiit tamarmik ataasiakkaarlutik
ingerlaavartumik sulinermi suliffeqarnermi oqimaaqatigiilersitsinermut
aalajangiisuussallutik. Taamaalilluni suliffeqarfinnik allanngortiterinermik
pissuteqartumik suliffissaarusimaneq ukiut amerlanngitsut ingerlaneranni
atorneerutissammat.
Pisariaqarluinnarpoq
suliffeqarnermi iliuusissat qanoq imminnut ataqatigiinnerat eqqarsaatigalugu
illuinnaasiunngitsumik paasinnittoqartarnissaa. Taamatut paasinninnikkut
isumannaarneqassaaq ataatsimut isiginnilluni aaqqissutissanik
piviusunngortitsinnaalernerput. Tassa aqqutitoqqatigut nungallareersimasutigut
ingerlaniarsariunnaarluni.
Misilittaanerit
saniatigut suliffeqarnermik misissueqqissaariaaseq suliaq
ineriartortinneqassaaq, suliniut taanna ilisimasatigut tunngavinnik
pitsaanerulersitanik ineriartortitsinermut qitiutinneqartussaavoq.
Taamaaliornikkut Naalakkersuisut nuna tamakkerlugu suliffeqarnermut siunnersuisoqatigiit
peqatigalugit sunniutilimmik tulleriiaarisinnaanngussapput, ataatsimut
isigalugu inuiaqatigiinni suliffeqartitsiniarluni suliniutinut
atorneqarsinnaasumik, taamaalilluni suliniutinik ingerlatseqqinneq aningaasaliissutaareersut
iluanni allatut tulleriiaarinikkut eqaallisaanikkullu
aningaasalersorneqarsinnaassallutik.
Suliffeqarnerup nutaamik
iluarsaateqqinneqarnissaanut tunngavigineqartussaavoq paarlagaassinnaanermik
tunngaveqarneq, tamatumani sulisorisat suliassaqalerfiup nalaani
ilinniartitaaqqittarnissaat imaluunniit akissarsianut tapiissuteqartarluni
suliffeqartitsiniutinut suliffeqanngitsunik peqataatitsinermut atatillugu
isumannaarneqassalluni. Taamaaliornikkut sulisorisat suliffissanut ullumikkut annertunerusutigut
tikisitanit suliffigineqartunut sulilernissaannut periarfissiinissaat
qulakkeerneqassaaq, peqatigitillugulu suliffeqanngitsut sulinermut
sungiusartinneqarnerisugut suliffinni ataavartuni sulisinnaanngorlutik
piginnaaneqalernissaat qulakkeerneqassalluni.
Peqatigitillugu
ilinniartitaanissamik neqeroorutit annertusineqassapput taamaalilluni
suliffeqanngitsut suliffeqarnermi pikkorissartinnerisigut allatigullu
ilinniartitaanikkut maannakkumit annertunerusumik suliffeqarnermi
sulilernissaannik neqeroorfigineqarsinnaalissallutik. Kiisalu suliffiit
oqinnerisut il.il. pilersinnerisigut qulakkeerneqassaaq suliffeqanngitsut
sulilersikkuminaannerit - suliffeqaratik pisortanit pilersugaasut -
suliffeqarnermut pulajartuaartinneqarnissaannik neqeroorfigineqarsinnaalernerat.
Naalakkersuisuttaat
eqqarsaatiginiarpaat suliffeqarnermi illuatungeriit suliffinnik avitsisarnissamut
piffissalluunniit ilaannaani sulisarnissamut sulisitsisut
kajumissaarneqarsinnaanerat kisimiillutik pilersuisut mikisunik qitornallit
il.il. iluaquserniarlugit. Naalakkersuisut naatsorsuutigaat
inuussutissarsiornikkut ingerlatsineq ukiuni aggersuni inuussutissarsiutinik
ineriartorneq nutaanik kinguneqassasoq assersuutigalugu aatsitassarsiormut
ikummatissarsiornermullu sanaartornermut aamma takornariaqarnermut
tunngassuteqartuni suliassaqartitsineq qaffariartussaalluni. Tamannami aamma
pisariaqarluinnarpoq inuusuttut ukioqatigiiaat amerlaqisut suliffeqarnermut
appakaattussanngulernerat pisussanngulermat. Inussuttut tamakkut aallaqqaataanniit
suliffeqarnermik patajaatsumik tunngavissinneqartariaqarput.
Aalisarnermik
inuussutissarsiuteqarnerup naammassisaqarfiulerneratigut
pisariillisaaffigineqarneratigullu taakkununngalu atatillugu nutaanik
suliniuteqartoqarpoq, tamanna taakkununnga tunngassutilinni sulisinnaasunik
nutaamik piumasaqaatinik nassataqarpoq. Aalisarnermik inuussutissarsiuteqarneq
suli ukiorpassuarni Nunatsinni tunngaviulluni inuussutissarsiutaasussaavoq.
Naalakkersuisullu pingaartilluinnarpaat inuussutissarsiutip taassuma nunanut
allanut tuniniaanermik nassataqartup pitsaanerpaamik periarfissinneqarnissaa
isumannaassallugu. Tassa taamaaliortoqassaaq tamatumunnga atatillugu
sullissinikkut inuussutissarsiutit suliniuteqarfiginerisigut tamakkunani ukiuni
aggersuni nutaanik suliffissaqarnissamut periarsarissaartoqalernissaa
naatsorsuutigineqarluni.
Aalisarnermik
inuussutissarsiuteqarnermi inuussutissarsiutinilu allani suliassaqartitsineq
piffissami aalajangersimasumi suli sunnersimaneqartoq. Tamanna sulisinnaasut
ilaannut suliffissaaruttarnermik kinguneqartarpoq, sunniutaasartulli
annikillisinniarlugit pikkorissaratitsinerit allallu piffissanut tamakkununnga
inissinneqartarsinnaannginnersut eqqarsaatigineqartariaqarpoq.
Suliffeqarnermulli
tunngassuteqartuni suliniutaasutigut nutaatigut suliassaqartitsineq annertunerulinngikkaluartoq
suliffinnik allanngortiterinermik pissuteqartumik suliffissaarusimaneq
malunnaatilimmik annikillisinneqarsinnaavoq. Tamanna imatut paasineqassaaq
sulisinnaasunut maanimiunut suliffissat amerlanerusut isumannaarneqarnissaat
kissaatigigipput, suliffiit ullumikkut tikisitanit periarfissaqartillugu
sulisinnaasunik maanimiunik inuttalerneqartassapput. Suliffinni tamakkunani
piginnaassutsit pisariaqartinneqarnersut ilisimanerusariaqarpavut, taamatuttaaq
ilinniartitaanerit pikkorissartitaanerillu suut sulisinnaasunut maanimiunut
neqeroorutigineqartariaqarnersut ilimasariaqarlutigit.
Tamakku
ilisimaneqalernissaat isumannaassavarput ullutsinnut naleqquttunik
suliffissarsiuussisarnermik ineriartortitsinikkut suliffeqarneq pillugu
kisitsisitigut takussutissat ineriartortinnerisigut aamma nuna takkerlugu
suliffeqarnermut siunnersuisoqatigiittut sulilersussat atugassaannik
ingerlaavartumik naliliisaarluni misissuinertigut. Naalakkersuisuni
eqqarsaatigaarput imatut ingerlaaseqassasoq kisitsisitigut takussutissanik
aamma toqqarlugit naliliisarluni misissuinernik ullutsinnut naleqquttunik
ilisimasat nuna tamakkerlugu suliffeqarnermut siunnersuisoqatigiinnut
atugassanngortinneqartassasut, taamaalilluni siunnersuisoqatigiit taakku
kipissanatik suliffeqarnermi ineriartorneq nakkutigisinnaassammassuk.
Taamaalillutillu ataatsimut suliffeqarnermut tunngatillugu suliniutaasut
annertussusissaannut kiisalu tulleriiaarinermut eqqoqqissaartumik anguniagassat
suliarisinnaalissammatigit.
Sulisinnaasut maanimiut
pingaaruteqarlutik isumalluutaapput sapinngisamik pitsaanerpaamik
atorneqartussat ineriartortinneqartussallu. Sulisinnaasut tassaasut inuit
nammineerluinnarlutik eqqarsarsinnaasut kiffaanngissuseqartulllu, namminneq
aalajangiisussat kikkunnut qanorlu annertutigisumik namminneq
sulisinnaassusertik tunniukkumanerlugu. Sulisinnaasut isumatuumik
atorneqarsinnaassappata tamanna tamatsinnut iluaqutaasussaavoq. Taamaammat una
sulisinnaasut annertunerpaamik akuliusimasut najukkami innuttaasut
suliffeqarfiullu sulisinnaasut suliffigisaasa ineriartortinneqarnerannut
soqutiginnittut najukkami innuttaasut taamatullu suliffeqarfiit periarfissaanut
aalajangiisuusartut.
Ukiormanna junimi
suliffeqarneq pillugu isumasioqatigiinnermi oqaatsit kulturilu sulinermi
pingaaruteqassusiat pillugu oqallittarnerit oqallittarnerpassuarnit
pingaarnerpaatillugit suliarineqartarput. Kalaallisut oqaatsivut
pingaarnerullutik oqaasiupput amerlaqisunit ajornartorsiutitut oqaatigineqarpoq
suliffeqarfinni kattuffinnilu pisortat kalaallisut kulturitsinnik
oqaatsitsinnillu aallaaveqannginnerat. Eqqarsaatigineqaqqikkunaqaaq ileqqunik
oqaluttuarisaanermik naleqassutsimik paasinnittarnermik ataatsimooqatigeeriaatsinilluunniit
ilisimasaqannginneq aaqqiagiinnginnermik paatsooqatigiinermillu
pilersitsisarmat, tassa inuit allanik ileqqullit naleqassutsimillu
paasinnittaasillit inooriaaseq allaanerusumik naliliiffigisarmassuk.
Isumasioqatigiinnermissaaq
amerlaqisunit isumaqatigiissutigineqarpoq pisortanit pimoorunnerullugu
ineriartortitsinikkut suliffeqarfinni kattuffinnilu allassartarnernik
aaqqiagiinngissuteqartarnernillu ajornartorsiutit amerlaqisut
qaangerneqarsinnaasut. Ukiuni aggersuni suliffeqarneq pillugu suliniutinut
aammattaaq ilannguneqassapput suliniuteqarfissat nutaat, tamatumani
eqqarsaatigaakka isumaqatigiinniartarneq, isumaqatigiissitsiniartarneq
aaqqiagiinngissutillu qaangiarniarneqartarnissaannut malittarisassat,
suliffinni avatangiisit pillugit inatsisit aamma sulisilluni ajoqusertarnernut
tunngasuni ajornartorsiutit ilaat oqallisigisariaqakkallu. Tamatumunnga
tunngatillugu suliarineqartussat maannakkut suliffeqarnermut
immikkoortortaqarfimmi eqqarsaatersuutigineqarput.
Immikkut taaneqassaaq
Naalakkersuisut piffissami aggersumi inuussutissarsiutigalugu piniartunut
aningaasaqarnikkut isumannaallisaatissatut atuutilersinneqarnissaannut
periarfissanik misissuinerat.
Suliffeqarneq
ingerlaavaratumik ineriartortuarpoq aamma nunani allanisut suliffeqarnikkut
ingerlatsineq ingerlaavartumik ataatsimut isigalugu ineriartornermut
naleqqiuttarlugu naleqqussarneqartussaavoq aammalu naleqqussarneqartuassaaq.
Qaqortumi
isumasioqatigiinnermi isumaqatigiissutigineqarpoq siunissami suliffeqarnikkut
ingerlatsinissami inuk qitiutinneqassasoq. Suliffissarsiuussisarfiit
maannaminngarnit annertunerusumik suliffeqarfiit suliffeqanngitsullu
ataasiakkaat sullittariaqarpaat tamatumani aqqutissat nuna tamakkerlugu
suliffeqarnermut siunnersuisoqatigiinnit ilusilersorneqassapput kommunini
ataatsimiititaliat suleqatigalugit piviusunngortinneqartussat.
Nunani tamalaani
misissuinerit takutippaat suliffeqannginneq inummut naalliuutaasartoq,
suliffissaaleqisut toqusarnerat sulinikkut inuussutissarsiortut akornanni
toqusarnermit marloriaammik pingasoriaammilluunniit annertuneruvoq. Kalaallit
1994-imi peqqissuseq pillugu misissuinermi inunnit apersorneqartunit qulinit
qulingiluat isumaqarput ataatsimut isigalugu peqqissuussagaanni
suliffeqarnissaq pingaaruteqarluinnartoq, tamanna paatsuugassaanngilaq.
Suliffeqarnermut
pissutsit pillugit nassuiaatip matuma saniatigut Naalakkersuisut aammattaaq
Inatsisartut ataatsimiinneranni matumani isumaginninnikkut ingerlatsineq
pillugu nassuiaat saqqummiutissavaat. Ingerlaqqinnissatsinni isumaginninnikkut
ingerlatsineq aamma suliffeqarnikkut ingerlatsineq imatut imminnut
naleqqussarneqassapput piumasaqaatitaqanngitsumik pisortanit pilersugaasarnerit
sapinngisamik pinngitsoortinneqartussanngorlugit.
Atugarissaarnermik
pilersitsisimavugut innuttaasut isumaginninnikuut pitsaasumik isumannaallisaavigalugit,
kisianni aamma tamanna atugarissaartitsinerusinnaavoq tamatuminnga atuisunik
piumassuseerutsitsisinnaasoq aamma kinguaariinnik innuttaasunillu
avissaartortitsisinnaasoq. Inuiaqatigiinni inooqataaffigisatsinni inui imminnut
ilaquttaminnullu isumaginerunissaat ilisarnaataasariaqarpoq.
Naalakkersuisut immikkut
inuusuit sullinneqarnissaat pingaartitaraat, pingaaruteqarpormi inuusuit
sulinikkut aallartilluartarnissaat tamanna meeqqat aturfiat ilinniarfiillu
allat isumannaagassaraat. Kommuninit arlaqartunit kissaatigineqarsimavoq
inatsisitigut tunngavissanik pitsaanerusunik pilersitsisoqassasoq. Tassa
inuusuttunut meeqqat atuarfiannit anereersunut aamma inuussutissarsiutinut
ilinniartitaanermut piginnaaneqalersitsisutut tigutinnissamut inuttut
suliamulluunniit suliamulluunniit tunngatillugu amigaateqartunut suliniutit
tamatigoortumik tunngavilersukkat pilersinneqarnissaat siunertarallugu.
Inatsisilianik piareersaalluni
sulineq Naalakkersuisut aallartisareerpaaat. Siunissami suliffeqarnermut
tunngatillugu sillimmataarissutitut pingaartumik siunertarineqarput
sulisinnaasut taamatullu suliffeqarfiit sulisinnaasut suliffigisaasa
sapinngisamik pitsaanerpaamik atugassarqarnissaasa isumannaarneqarnissaat.
Inuussutissarsiutinik ingerlatsisut inuillu ataasiakkaat namminneq
kissaatigisaaat pisariaqartitaallu malillugit suliffeqarnermut tunngatillugu
suliniutit ingerlanneqarpata atugassarititaasut sapinngisamik pitsaanerpaat
isumannaarneqassapput.
Qaqortumi
isumasioqatigiittut siunissami suliffeqarnikkut ingerlatsinissamik inuk
qitiutillugu inissippaat. Tamanna Naalakkersuisut piffissami aggersumi
suliffeqarnermik iluarsartuusseqqinnikkut isumannaarniarpaat. Tassa
suliffissaaleqinermik eqqorneqartunut tamanut ataasiakkaaraluni
suleriaasissanik pilersaarutinik piviusunngortitsinermikkut. Taamatut
ingerlatsinermi namminersortut sulinermillu inuussutissarsiuteqartut qitiusumik
inissisimanissaat qulakkeerneqassaaq, assersuutigalugu sulisitsisut
sulinermillu inuussutissarsiuteqartut kommunit peqatigalugit nuna tamakkerlugu
suliffeqarnermut siunnersuisoqatigiiffimmi ilaasortaatitaqartinnerisigut.
Najukkami
suliniutissanut sunniuteqaqataanissamullu periarfissat kommunit
suleqatigalugit isumannaarneqassapput.
Atugassarititaasut tamakku piviusunngortinneqarnissaat siunertaralugu
Naalakkersuisut pimoorullugu siunnerfeqarlutillu suliniarput.
Taamatut oqaaseqarlunga
nassuiaat Inatsisartunut suliassanngortippara.
Karl Lyberth, Siumup oqaaseqartua:
Naalakkersuisut
suliffeqarneq pillugu saqqummiussaat Siumumiit tikilluaqquarput, tassani
nassuiaammi tikkuartorneqarmata, maani najugaqartuusugut, pikkorissarnikkut
ilinniarnikkullu iliuuseqarnitsigut nammineerluta suliffissaqarnissarput qanoq
pitsanngorsarsinnaagipput.
Tassami suliffeqarnikkut
ingerlatsineq pillugu Naalakkersuisut nassuiaataannut atatillugu Siumumiit
siullerpaajutillugu oqaatigissavarput ukiuni qaangiuttuni
neriuutigiuarsimasaraluarput, tassa tikisitat nunaqavissunik annerungaartumik
taarseriartuaarneqarnissaat uggornaraluartumik piviusunngorsimanngimmat.
Miserratiginagu
oqaatigissavarput Kalaallit Nunatsinni tikisitatut sulisugut, pingaartumik
pisortat nammineq suliffeqarfiutitsinni, suli amerlasoorujussuuneri.
Nunatsinnut
suliartorlutik tikisitat taamatut amerlatiginerinut patsisinut
annersaasorinarpoq ilinniartitaaneq suli amigartumik aallunneqarsimagunarmat.
Taamaattumik nunatsinni pisuussutitta annersaasa, tassa innuttaasut najugaqavissut,
meeraappata, inuusuttuuppata inersimasuuppataluunniit suli annertunerusumik
piukkunnarsarlugit naammattumik pikkorissartittarnissaat
pingaaruteqarluinnartuuvoq.
Oqartoqarsinnaagaluarpoq
ilami nunatsinni innuttaasut najugaqavissut ikittunnguugatta suliffiit tamaasa
nammineq inuttalersorsinnaanngikkigut. Tamanna soorunami
assortorneqarsinnaanngilaq, kisianni tikisitat taamatut
amerlatigisariaqanngikkaluartut aamma tamatta miserratiginagu
oqaatigisariaqarparput.
Taamaattumik Siumumiit
matumuuna oqaatigissavarput siunissami Siumup politikkiani pingaarnersat
pingasuusut ukuussasut: Ilinniartitsineq - ilinniartitsineq -
ilinniartitseqqinnerlu.
Taamatut
aallarniutaasumik oqaaseqareerluta suliffeqarnikkut ingerlatsineq pillugu
nassuiaammi saqqummiunneqartut tamarmik assortoruminaatsuummata ataasiakkaat
takisuuliorfiginngikkaluarlugit, Siumumiit pingaartutut naqissuserusutagut,
erseqqissaavigilaassavagut.
Nunap suulluunniit
pitsaasumik ineriartorneranut pingaaruteqartut ilagiuaannarpaat suliffeqarneq
pillugu ersarissumik, siumut isigisumik politikkeqarnissaq. Taamaattumik
Naalakkersuisut nutaat siorna 97-imi aallartinnermi kingorna tamatuminnga
siusinnerusumut sanilliullugu, iluarsaaqqinneq siunertaralugu,
aallussiniarnerunerat Siumumiit tapersinngitsoorusunngilarput.
Taamatuttaaq
pingaartigaaq suliffeqarneq pillugu politikkeqarnermi nunatta tunniussinnaasai
tunngavigalugit ineriartortitsiuarnissaq, imaluunniit
pilersaaruteqartuarnissaq, innuttaasullu sapinngisaq malillugu pissutsinut
allanngorarsinnaasunut piareersimatinniartuarnissaat.
Aalisartut
piareersimajuartussaapput suna piniagaq tammakassagaluarpat allanik
piniagassarsiornissamik. Saarulliit tammakarmata nersortariaqartumik
aalisartortagut periarfissanut allanut, soorlu raajanut, saattussanut
qaleralinnullu saattariaqarsimapput.
Piniarnerinnavimmik
ingerlatsisimasut maannakkut aalisarnermut saakkiartortut suli arlaqarput.
Soorlu Avanersuarmi Tunumilu tamanna ingerlanneqaleriartortoq. Siumumiit
nunaqqatigut taakkua iluatsitsilluarnissaannik periarfissaq manna iluatsillugu
qamannga pisumik kissaakkumavagut.
Taamatuttaaq nunami
suliffillit sapinngisaq malilllugu piareersimasariaqarput pisariaqalertillugu
suliffimmut allamut nuuttariaqarsinnaanermut.
Inuusuttut ilinniartut
siunissami pisussaajumaartunik sillimmartaarlutik ilinniagaqarnissaat, aammalu
ilinniarfigisinnaasaannik periarfissaqartinissaat pingaaruteqarluinnartuuvoq.
Uani pingaarnersaassanngilaq ilinniarfiit pinngitsoornatik
nunatsinniittariaqarnerat. Inuusuttut nunanut allanut aallarlutik
ilinniarusussuseqartut tapersersortariaqarput, tamannami inuup ineriartorneranut,
minnerunngitsumillu oqaatsinik allanik ilikkarluarnissamut, iluaqutaasartoq
qularutissaanngimmat.
Siunissami
neriuutigisagut aatsitassarsiornermut takornariartitsinermullu tunngasut
iluatsissagaluarpata sulisoqarnerup tungaatigut sapinngisarput malillugu
piareersimaffiginissaat pingaaruteqarluinnartuuvortaaq. Taamaattumik
ilinniartitsinerit, ilinniartitseqqinnerillu maannakkut ingerlareersut, minnerunngitsumik
takornariartitsinermut attuumassuteqartut, suli annertusarneqarnissaat
Siumumiit kajumissaarutigissavarput.
Pisortat
suliffeqarfiutaat anginerit eqqarsaatigalugit Siumumiit piumasarissavarput
sulisunik ilinniartitseqqinnerit, pingaartumik nunaqavissut eqqarsaatigalugit,
suli annertunerungaartumik pilersaarutaalluarnerusumillu, tikisitat
sukkanerusumik taarseriartuaarnissaat siunertarerpiarlugu,
ingerlatsilertariaqartut. Aatsaammi taamatut ersarissumik politikkeqarutta
sulisut nunaqavissut qaffasinnerusumik atorfinitsikkiartuaarnissaat
qulakkeersinnaassavarput. Taamatuttaaq ilinniagaqarsimagaluarlutik maannakkut
suliffissaaleqisut, inuusuttullu ilinniakkaminnik naammassinnikkumaartut
suliffissaqartittuarnissaat qulakkeernerussallutigu. Tamatumani KNI-p
sulisuminik ilinniartitseqqinnissamut suliniutai Siumumiit
tapersersorluinnarpagut, suliffeqarfissuillu allat taamaaliorniarnerat
soorunami aamma tapersersorlugu.
Ilinniartitseqqittarnermut
atatillugu Siumumiit kajumissaatigissavarputtaaq Naalakkersuisunut
misissorluaqqullugu aningaasat suliffissaaleqisunut ikiorsiissutitut atortakkat
ikigisassaanngeqisut, suliffissaqartitsiniarnermut aningaasat
tapiissutaasartut ilanngullugit, soorlu mandetiminut atortakkat, allatut
aaqqissuussilluni suliffissaaleqisunut iluaqutaanerusumik, soorlu sulileqqinnissaq
siunertaralugu ilinniartitseqqinnernut, atorneqarsinnaannginnersut.
Nassuiaammi tamanna taallatsiarneqartoq
Siumumiit arajutsisimanngilarput, pingaartutulli immikkut kajumissaatigerusupparput,
isumaqarluinnaratta suliffissaaleqisut uninngatiinnarnagit
aallarteqqinnissaannut piareersartinneqarpata tamanna tamanut
iluaqutaanerpaassasoq, aamma suliffissaaleqisup suliffissaqanngikkallarnermi
nalaani ulluinnarni inuuneranut annertuumik immersuutaalluni iluaqutaassammat.
Oqareernitsituut
inuusuttut ilinniagaqarluarnissaat tamanit pingaarnertanut ilaavoq.
Ilaqartarpulli ilinniarnerminnik ukiormi ataatsimiluunniit
unitsitsikkallarusuttartunik.
Inuusuttunnguit tamakkua ilaatigut eqqarsaatigalugit
Qaqortumi ataatsimeersuarnermi ilaatigut siunniunneqarsimasoq, tassa nuna
tamakkerlugu inuusuttut kiffartuussisarnerisa kingumut atulerteqqinneqarnissaa,
Siumumiit taperserusupparput. Tamannami ilaatigut aqqutigalugu inuusuttut
sulinermik sungiusarnissaannik periarfissinneqassapput, qularnanngitsumik
kingusinnerusukkut suliffivittaarneranni iluaqutaasussamik.
Taamaammat periarfissap tamatuma
siusinnerusukkut iluaqutaasumik ingerlanneqarsimasup kingumut
atuleqqissinnaaneranik siunertaqartumik Naalakkersuisut
misissuilluaqqussavagut.
Sulisussat nunatsinni nunaqavissut
atorfinitsinneqartarnissaat annertusaaviginiarlugu ilaatigut
suliariumannittussarsiuussinerni assigiinngitsuni nunaqavissut maannakkorniit
annerusumik sulisorineqartarnissaannik piumasaqartalernissamik Qaqortumi
ataatsimeersuarnermi ujartorneqartoq matumuuna Siumumiit taperserlugu
nalunaarutigissavarputtaaq.
Naggataatigut Siumumiit oqaatigissavarput Nuna
Tamakkerlugu Suliffeqarnermut Siunnersuisoqaatigiinnik Naalakkersuisut pilersitsiniarnerat
isumassarsialattut isigalugu tamakkiisiumik taperseratsigu. Naalakkersuisut
saqqummiinerminni nassuiaataattut siunnersuisoqatigiit taakkua,
suliffeqarnermut attuumassuteqartunik tamanit ilaaffigineqartussap,
suliassarisussaavaat ataavartumik suliffeqarnermi ineriartornerup
malinnaavigiuarnissaa, tamannalu aallaavigalugu qinikkanut suliffeqarneq
pillugu siunnersuisartuusussaallutik.
Naggaterpiaatigut Siumumiit nunatsinni
nunaqavissut, minnerunngitsumik meeqqat inuusuttullu, sakkortuumik kajumissaassavagut
nangaanaatik periarfissat assigiinngitsut atorlugit ilinniartuaqqullugit
pikkorissartuaqqullugillu. Aatsaammi ilinniarnitsigut, pikkorissarnitsigut
suliffimmullu tunniusimalluta sulerusussuseqarnitsigut nunarput pitsaasumik
siumut aallartilluarsinnaagatsigu. - Aamma kalaaliusugut immitsinnut
naakkigisutut isigiinnarnata ilikkartariaqarparput atorfinnut qaffasinnerusunut
inissinniarluta sassartaarnerulernissarput. Tikisitat kisiisa
pisuutiinnartuarsinnaanngilagut, taakkua taarserniassagutsigut
ilinniarluartariaqarpugut, aammalu ajukkunnata nangaanatalu qaffassarluta
sassartaarnerusariaqarluta.
Finn Karlsen, Atassutip oqaaseqartua:
Suliffeqarnermik
ingerlatsineq pillugu nassuiaat
Naalakkersuisumit saqqummiunneqartoq
ATASSUT-miit naatsunnguamik oqaaseqarfigissavarput.
Siullermik ukioq
qaamatit arfinneq pingasut matuma siorna Kalaallit Nunaanni sulisoqarneq
pillugu nassuiaat saqqummiunneqarmat oqaaserisavut ilaatigut
uteqqittariaqassavagut.
Soorlu Inatsisartut Inatsisaata
1992-meersup nunatsinnut suliffissarsiortut kil-lilersimaarniartussaavai,
taamaakkaluartorli ukiuni kingullerni nunatsinni nunaqavissut suliffinni sulerusukkaluarlutik qaangiinnagaasarnertik qatsulluinnaraat ersarissigaluttuinnartoq
oqaatigigipput.
Unalu
erseqqissaqissavaput avataaniit atorfissaqartitattinnik tikisitsisarneq
minnerpaamilluunnit ajorisassarinngilluinnaratsigu akerlianilli ATASSUT-miit
oqaatigissavarput sulisinnaasunik atorfissaqartitatsinnik avataaniit
tikisitsisinnaanerput aammalu piumassuseqartoqartarnera qujanarluinnartuumat.
Nalunngilarpummmi ullumikkut suli annertuumik tikisitsisarneq pisariaqartittorujussuugipput.
Kisiannili una
ATASSUT-miit akuersaarsinnaangilluinnargarput suli ullumikkut aqunneqanngitsumik
sukkulluunniit sulisunik suliartortunik tikisitsiuvartoqartarnera maani
nammineq suliffissaaleqisuutittinik inuttalersinnaagalukkatsinnik. Aali inatsimmik ersarissumik
allassimasoqaraluartoq tikisitsisoqarniartillugu kommunalbestyrelsi
akuersisisinneqaqqaassasoq taamatut oqarnerput uteqqiineruvoq ukioq
oqaaserisatsinnut pisariaqarluinnartutut isumaqarfigigatsigu.
Aamma una kalaallit
qangali tusareernikuusaat oqaaseq, tikisitat kalaallinik
ilinniartitaqartassasut tikisitaanermi piffissaq naappat atorfimmik
tigisisussamik.
Taamanna oqarsimaneq
Atassut-miit Naalakkersuisunut kaammattuutigissvarput piviusunngortinniarnera
pimoorunneroqqullugu taamatut ukioq oqaaserisagut eqqaasitsissuti-geriarlugit
nassuiaammi nassuiaatitut saqqummiunneqartut tusaatissatut tigussavavut.
Nassuiaatillu naggataata
tungaani inassuteqaatitut saqqummiunneqartut oqaaseqarfigilaassavagut.
Atassut-miit
inassuteqaatigissavarput Namminersornerullutik oqartussat suliffeqarfiutaanni
tamani sulisunik ataasiakkaanik pikkorissartitsisarnermut neqerooruteqartarnissaq
tamakkiisumik pimoorullugu ingerlanneqassasoq, soorlu tamanna
naalakkersuinikkut pingaartinneqartoq.
Innusuttut
inuiaqatigiinni sullissisaqqilersinnaanerat isumasioqatigiinnermi
inassutigineqartoq Atassut-mit taperserparput tamatumanilu qanga ingerlasimaneq
ilinniarfigalugu pilersaarusiorluagaanerusumik pisortanillu pikkorissunik
pisortaqartitsinikkut aqunneqarnissaa pisariaqarpoq Atassut-miit tamatuma
atuleqqissinnaanera Nalakkersuisunut nalilersoqqissaarneqarnissaa piumasaqaatiginiarparput
soorunami aningaasatigut kingunerisassai ilanngullugit.
Meeqqat atuarfianni
atuartut aninnginnerminni sulinermik misilittagaqalersinneqanissaat
Atassut-miit pingaartilluinnarparput tamatumani eqqarsaatigaarput periuseq Island-imi
atorneqartoq aamma nunatsinnut eqqunneqartariaqavissutut isumaqarfigaarput
tamanna qularnanngivissumik siunissami inuusuttunut iluaqutaasussaavoq, meeqqat
atuarfimminniit anitinnatik ilikkartariaqavippaat inersimalernermi
sulisussaanertik aammalu suligunik akissarsisussaanertik.
Naggataatigut
suliffissaaleqinerujussuup ajornartorsiutaanera akiorniarneranut
suliniutigineqar-tunut Atassut-miit peqataaffigerusupparput.
Kisiannili Atassut-miit
oqaatiginngitsoorsinnaanngilarput qulaajartariaqarluinnartutut
isumaqarfigisarput tassalu, nalunngilarput suliffissaleqisut amerlaqisut
naalliuuteqartullu, taamaakkalurtorli tamatta nalunngilarput
suliffeqarfippassuit sulisussaminnik ajornartorsiuteqartartut tamanna
ajornartorsiut annertooq imaannaangitsorlu pinngitsoorani qanoq
iliuuseqarfigisariaqarpoq. Suliffissaaleqisummi taama amerlatigitillugit
kialuunniit takorloorsinnaagunarpaa suliffiit sulisussaaleqilerpata
suliffissaaleqisunit pagganneqartassasut kisiannili taamaattoqanngilaq tamatuma
peqqutaa Atassut-miit Naalakkersuisunit nassuiaatigineqarsinnaassappat
nassuiaatigeqqunaraluaqaaq.
Imaassinnaavormi
suliffissaaleqisut sivisuallaamik sulinnginnertik ima sanngiillissutigisaraat
allaat sulinissamut kajumissuseerutivittarlutik tamanna nappaataalersimanera
takorloorlugu nassuiaammi Naalakkersuisunit oqaatigineqartut
suliumassuseqalersitseqqinnissamut suliniut Atassut-miit taperserparput.
Aammattaaq Qaqortumi
aasaq isumasioqatigiinnermi ersarissumik peqataasut anguniaqqusaat tassalu kalaallit
atorfillit qaffasinnerusumik ilinniarteqqinneqartarnissaat suliffinnilu
pisortassanngortikkiartuaarnissaat Atassut-miit sakkortuumik taperserparput.
Aammami tamannarpiaq upernaaq Inatsisartut ataatsimiinneranni Atassut-miit
oqaluuserisassatut siunnersuutiginikuugatsigu.
Taamatut oqaaseqarluta
nassuiaat ataatsimut isigalugu tusaatissatut tiguarput, oqaaseqaatigullu
innersuussutigalugit.
Johan Lund Olsen, Inuit Ataqatigiit oqaaseqartua:
Inuit Ataqatigiit tungaannit
Nunatsinni sulisoqarnikkut pissutsit pingaaruteqarluinnartutut taamatullu
nunatta ineriartornerani qitiulluinnartutut isigaavut. Taamaattumikaasaq
Qaqortumi sulisoqarneq pillugu isumasioqatigiissitsineq soqutigalugu
malinnaavigalugulu peqataaffigisimavarput, massakkullu sulisoqarneq pillugu
nassuiaat saqqummiunneqartoq sukumiisumik qimerluuataarsimallutigu.Inuit
Ataqatigiit siullermik oqaatiginngitsoor-nianngilarput, meeqqanik aammalu
inussuttunik atuartitsineq ilinniartitsinerlu pingaaruteqarluinnartutut
isigigatsigu - taamatullu siunissami aamma isigiuassagatsigu. Taamaattumik
Nunatta siunissamut isumalluutai iluamik aallartilluassagunik pitsaasumik
ullutsinnullu naleqquttumik meeqqat atuarfianni
atuartinneqareersimasariaqarmata Inuit Ataqatigiit qangaaniilli Inatsisartuni
suleqataanitsinni erseqqissartuartarsimavarput - taama periarfissiinitsigummi
meerartavut sulinermik inuussutissarsiulernissamut ikaarsaarialin-nginnerini
aamma upalungaarsassagatsigit.
Nunatta ineriartornerani
naluneqanngitsutut kalaallit - tassalu nunap inuii, ineriartornermi
isiginnaartuinnaavallaartutut inissisimasarsimapput. Tamanna sineriassuatsinni
sumi tamani inuiaqatigiinni misillerfigineqarsimaqaaq inuiaqatigiinnut
tamarmiusunut aamma toqqissisimanngitsitsinermik annertumik suli
pilersitsisartumik. Taamaattumik sukumiisumik tamanna ukiuni tullinnguuttuni
sakkortunerusumik suliffeqarnikkut ingerlatsiniarnitsinni
ilungersuuteqarnerulernitsigut allanngortinniartariaqaratsigu Inuit Ataqatigiit
isumaqarluinnarpugut. Tamanna sanioqqussinnaajunnarparput ulloq mannami
tikillugu suli avataaniit sulisussanik tikisitsisoqartuartarpoq, naak tamatigut
taama iliortoqartariaqarnera arlalitsigut aamma pisariaqavinngikkaluartoq.
Taamaattumimmiuna aamma Nunatsinnut suliartortussat killilersimaarniarumallugit
1979-imi Namminersuleqqaarattali immikkut inatsiseqartitsisugut - inatsit
imminik ajoquteqanngikkaluartoq aqqutigalugu. Taamaakkaluartorli
ilisimaqqissarparputtaaq inatsit taanna suli ulloq mannamut
malitsikkuminaatsinneqartaqimmat - tamannavorlumi ukiuni aggersuni pimoorullugu
aamma aaqqinniagassarput.
Inuiaqatigiit
ingerlanneqarneranni Inuit Ataqatigiit pingaaruteqartutut isigivaat, nunatta
namminiileriartornerani aamma kalaallit, nunaqavissullu allat sulisutut suli
annertusigaluttuinnartumik misilittagaqaleriartortuarnissaat. Taamaattumik
akueriinnarneqarsin-naanngilaq manna tikillugu suliffissaaleqisut,
inuiaqatigiit tungaanniit sumik annertunerusumik piumaffigineqaratik
isumaginninnikkut asuli perlernaveeqqutaanerusunik taasariaqarnerusunik
maannakkutuut tunioraannarneqartarmata.
Taamaattumik siullermik
meeqqat atuarfiini ajornartorsiutit sukumiisumik aammalu meeqqat sulisutut
inissisimalerumaarnissaat siunertaralugu atuartitsinerup pitsaasup
aaqqissuunneqarlunilu ineriartortittuarneqarnissaa
aqqutissiuunneqartariaqarpoq. Tamatumani Inuit Ataqatigiit
pingaartilluinnarpaat, meeqqat inuusuttullu sumi najugaqarnertik
apeqqutaatinnagu pitsaasumik atuartinneqartarnissat, taamaaliornikkummi
qulakkerneqarsinnaassammat najugaqarfiit arlaanni suminngaannersuuneq
apeqqutaatinnagu naligiimmik ilinniarnissamut periarfisssaqartoqarnissaa.
Taammaattumik aamma
anguniagassat pingaarnerit ilagivaat, nunatta inuusuttoqassusianut
naapertuuttumik ilinniarfissanik periarfissiisoqartarnissaa. Soorunalumi
ilinniarneqarsinnasut assigiinngitsut eqqarsaatigalugit, allatut ajornartumik
nunatta inuttussusaa tunngavigalugu amerlassutsimikkut killeqartariaqartut
arajutsisimanngilarput. Pingaaruteqarluinnarsorivarpullu manna oqaatigissallugu:
tassalu nunatsinni sumiluunniit najugaqaraluaraanni aammalu
kinaagaluaraanniluunniit ilinniarnissamut periarfissat imatut
amerlassuseqartariaqarmata, anguniarneqartariaqarluni ilinniarusuttut
sapinngisamik amerlanerpaat suli periarfis-saqartinneqartuarnissaat.
Nunatsinni
inuussutissarsiutitigut ilinniarnissamut periarfissat ilaatigut imak
killeqartigitillugit aammalu inuussutissarsiutitigut ilinniagaqarsimanngitsut
suli taamak amerlatigitillugit, taamaattumik ilinniartuarnissaq
qitiujuartariaqarpoq. Teknikkikkut atortorissaarutitigut ineriartorneq
iluatigalugu, taamaattumik Inuit Ataqatigiinnut pingaaruteqarluinnartuuvoq
kikkulluunniit inuussutissarsiutitigut ilinniagaqareersimagaluarunilluunniit
aamma pikkorissarnissamut ilinniaqqittuarnissamullu periarfissinneqartuartariaqarmata.
Atsaammi taamatut periarfissisoqarpat inuit ataavartumik suliffeqrtuarnissaat
suliffigisaminnilu qaffakkiartorsinnaanissaat aqqutissiuunneqarsinnaavoq. Inuit
Ataqatigiit tamatumani minnerunngitsumik suliffissaaleqisut periarfissinneqarnissaat
pingaaruteqarluinnartutut isigiuassuarput.
Taamaattumik sulisoqarneq
pillugu nassuiaammi iliuuseqaatigineqartariaqartutut tikku-arneqarsimasut
ilaat, tassalu inuk qitiutillugu siunissami sullissisarnissaq periarfissar-siuusseqatigiittarnissarlu,
siunissami isumaginninnermi suliffissarsiuussisarnermilu aallaviusalernissaa
isumaqatigilluinnarparput. Tassungalu tunnagtillugu
oqaatiginngitsoortariaqanngilaq suliffissarsiuussisarfinni maannakkut
sulisorineqartut aamma pikkorissarneqartuartariaqarmata - suliffissarsiuussineq
maannamit pitsaanerusoq inuusuttorpassuillu ilinniagaqalernissamut
pitsaanerpaamik siunnersorneqartuarsinnaanissaat maannamit aamma
angusaqarfiuneroqqullugu. Tamanna siunnersortinik pisariaqartinneqaqaaq tamannavorlumi
Inuit Ataqatigiit Qaqortumi isumasioqatigiittoqarmat immikkut aamma
malussarfiginiarsimasarput.
Tammattumik inuusuttut
arlaatigut pissuteqartumik ilinniarnerminnik unitsitsigaangata pilertortumik ikiorserneqarsinnasariaqarput,
periarfissinneqartuartariaqarpullumi siunnersorneqapallassinnaanissamut
sulinermik misilittagaqalernissaat aamma angulertorneqarsinnaaqqullugu.
Tamananrpiaq pissutigalugu taamaattumik Inuit Ataqatigiit isumaqarpugut meeqqat
atuarfiini, inuussutissarsiutitigut ilinniarfinni kiisalu komminini
suliffissarsiuussisarfiit akornanni siunissami annertunerusumik
suleqatigiissitsiniarto-qartariaqartoq, inuusuttut piginnaasaat aammalu
sapinngisamik soqutigisaat tunngavigalugit ilinniarsinnaanissaat aamma
aqqutissiuunneqarsinnaaqqullugu. Tamannali tamanut pitsaanerpaamik
angusaqarfiussappat oqaatigineqareersutut pisariaqarluinnarpoq
pikkorissartitsiuartariaqaratta aamma suliffissarsiuussisarfimmi
sulisorineqartunut immikkut sammitinneqartumik. Suliffissarsiuussisarfiit
taamaattumik nukittorsarneqartariaqarnerisa saniatigut, maangaannaq
isumaliutersuutigineqalereertariaqarpoq qitiusumit akisussaaffik aamma
nuunneqalereersinnaannginnersoq, soorlu Ilinniartitaanermut Pisortaqarfiup
ataanut - taamaaliornitsigut suliffissaaleqinermit ilinniartitseqqittuarnissaq
pisariaqaqisoq mannamiit pitsaanerusumik
ataqatigiissaarineqarfigineqarsinnaaniassammat.
Sulisunik
suliffissaaleqisunillu pikkorissaasarnissap annerutsarneqarnerani Inuit
Ataqatigiit innersuussutigerusupparput, sinerissami ilinniarfiit pioreersut
sapinngisamik atorluarneqartaqqullugit. Nalunngilarput assersuutigalugu STI-mi
ilinniarfiit maannamiit suli atorluarneqarnerusinnaasut, soorluttaaq aamma
qaffasinnerusumik ilinniarfiit aamma taamatut periarfissaareersut.
Isumaginninnermik
Siunnersortinngorniat Ilinniarfiat maani Nuummiittoq kiisalu
Perorsaasunngorniat Ilinniarfiat Ilulissaniittoq, pikkorissaqqiffissatut
inunnut isumaginninnermik sullissisunut ilinniareersimasunut
ilinniareersimanngitsunullu pikkorissarneqartuarnissaminulli aamma
pisariaqartitseqisunut periarfissaareerput.
Pissutsilli maannakkut
atorneqartut aallavigalugit ilinniarfiit tamakku aamma
pikkorissartitsiuarnissamut naammattumik aningaasaliiffigineqartannginnertik
pissutigalugu annertunerusumik pikkorissartitsisarnissanik ullumikkut
nukissaqanngillaq, naak ilinniartitaanerit pineqartut pillugit peqqussutit
malillugit aamma sulisooreersunik pikkorissaasarnissamik
pisussaaffilerneqareeraluartut. Taamaattumik Naalakkersuisut
piumaffigerusuppagut taamatut atorluaanissaq siunertaralugu
aaqqissuussinialeqqullugit, minnerunngitsumilli aningaasaliisaqqullugit
aningaasanut inatsisit aqqutigalugit imaluunniit sulisitsisut AEB-inut
aningaasaliissutigisartagaaq aqqutigalugit.
Inuussutissarsiornikkut
naalakkersuinikkut aqqutissiuussiniarnermi nuanarput tamaat ataatsimut
isigalugu aammalu sumiluunniit najugaqaraluarluni
periarfissaqartitsisoqarnissaa Inuit Ataqatigiit piorsaaniarnitsinni
pingaartillugu tunngavigiuassavaat. Taamaattumik sulisoqarneq pillugu
nassuiaammi nuna tamakkerlugu pikkorissarnissamut periarfissiisoqarnissaanik
tikkuussisoqarnera isumaqatigilluinnarparput sulisummi inuttut
naleqassutsimikkut misigisarnerat aatsaat ikorfartorneqarsinnaavoq pikkorissartuarnissamut
periarfissaqartitsi-simagaanni.
Isumaqatigilluinnarparput
Nunatsinni suliffissaaleqisut aammalu sulisut qanoq ilin-niagaqarsimaneranik
paasissutissat, manna tikillugu naammaginartumik
takussutissinneqar-tarsimannghinnerat nassuiaammi aamma tikkuarneqarmata.
Allatut ajornartumik suliffissaaleqisut sumiluunniit najugaqaraluarunik
naatsorsorneqarnissaat nalunaarsorne-qarnissaallu
pinngitsoorneqarsinnaanngilaq. Taamaattumik tamatuma nassatarisaanik
suliffissarsiuussisarnermi suleriaatsit ullutsinnut
naleqqissarneqartuartariaqarput tamatumani sulisitsisut
suliffissarsiussisarfiit aammalu suliffissaaleqilersartut
suleqatigiittsriaqarput anguniarneqartariaqarpormi sulisinnaasut
piginnaasamikkut ineriartortinneqartuarnissaat avataaniit pisariaqanngikkaluamik
sulisussarsiortariaqartarneq aamma pinaveersima-tinniarumallugu.
Sulisut
suliffissaaleqisullu pikkorissarnissamut periarfissaat sulisussanik
pisariaqartitsilerumaarnissaq isiginiarlugu aaqqissuunneqartariaqarpoq. Assersuutigalugu
sinerissami mittarfiliortitsernerit kalaallinut suli amerlanerusunut
suliffissaqartitsiniarnikkut periarfissiisimasinnaagaluarput
sanaartulinnginnermi sulisussat pikkorissartinneqarnissaat siusinnerusukkut
aamma sillimaffiginiarneqarsimasuugaluaruni. Taamaattumik sinerissami inissiat,
atuarfiit allallu aserfallassimaqisut suliarineqarnissaasa
eqqartorneqaleruttornerani Inuit Ataqatigiit tungaanninngaanniit
Naalakkersuisut piumaffigerusuppagut sanaartornikkut iluarsartuussinissap
aallartinnginnerani sulisuulerumaartussanik pikkorissaanissat aamma
aallartinnialereeqqullugit. Taamaaliornikkummi avataaniit
tikisitsisariaqarnissaq aamma pinaveersaartinneqarsinnaaniassammat.
Pikkorissaajuarnissat
Naalakkersuisup saqqummiussinerani annerttumik sammineqarpoq tamannaluni Inuit
Ataqatigiit matumani saqqummiussinitsinni oqaaserisagut
innersuussutigalugittaaq isumaqatigivarput. Apeqquterujussuarli annertooq
saqqummiunne-qanngitsoq taamaattumillu maqaasisarput uaniippoq:
iliuusissarpaasuit suminngaanniit aningaasalersorneqassappat? Inuit Ataqatigiit
erseqqissumik Naalakkersuisunit tamanna nassuiarneqaqquarput
ilisimaneqartutuummi aningaasanaasiit taakkuupput iliuusissanut aamma
killilersuutaagajuttartut neriuppugut tamanna akineqarsinnaassasoq.
Taamatullu apeqqiteqaateqaatigaluta
Inuit Ataqatigiit tungaanniit naggataarutigalugu oqaatiginngitsoornianngilarput
nunatsinni sulisoqarnikkut pilersaarusiugaalluarnerusumik aqutsilernissaq
maannakkut pisariaqaannarani aamma pingaaruteqarluinnartuummat. Taamaattumik neriuutigivarput
siunissami qanoq iliuuseqalerniarnissami siuliini oqaaserisavut
annertoqqutissaajumaarmata qinersereernerup kingornatigut Naalakkersuinikkut
aamma ingerlatseriaqqittoqarnissaanik.
Taamatullu
oqaaseqareerluta nassuiaat Inuit Ataqatigiit tusaatissatut tiguarput.
Anthon Frederiksen, Kattusseqatigiit oqaaseqartua:
Nassuiaat soqutiginartoq
Kattusseqatigiit sinnerlugit misissorsimavara paasissutissat ajortut
ajunngitsullu suleriaqqinnissamut annertuumik pingaaruteqartussaapput
atorluarneqartaria-qartuullutillu. Siullermik Kattusseqatigiiniit
erseqqissaatigissuara suliffissaqartitsiniarnermut aammalu suliffiit 7.000-it
ukioq 2005 nallertinnagu anguneqassappata ilinniartitaaneq suli annerusoq
kalaallillu nunaqavissut suli annerusumik tatigineqarnerullutik
pikkorissartinneqarlutillu ilinniartinneqarsinnaanissaat
pinngitsoorneqarsinnaanngimmat. Ukiunimi makkunani nunaqavissunik tatiginninneq
aammalu Aillit misilittagakippallaaqigavit
maannakkut atorneqarsinnaanngilatit!@ oqartarneq qaangerneqartariaqalerpoq.
Kinami misiliinngikkuni misilittagaqalersinnaagami.
Suullu tamarmik
amerlanertigut aallaaviat puigortariaqanngilaq. Tassalu meeqqat atuarfiat,
uangalu isumaqarpunga pissutsit meeqqat atuarfianni naammaginartumik
aaqqiviginngikkaanni nukippassuit suliniaraluarnermi maangaannartinneqartartut
amerlavallaartut. Ippassaani tamanna aamma inuussutissarsiutinut
ilinniartitaanernut ilitsersuisarneq ilaallu ilanngullugit pillugit nassuiaat
oqaluuserigatsigu uppernarsarneqarpoq. Tassami meeqqat atuarfianni
tunngaviusumik ilinniartitaanerup aaqqiivigineqarneratigut
ajornartorsiuterpassuit pinngitsoorneqarsinnaasut Kattusseqatigiinniit
ilisimavarput, soorunami ajornartorsiutit ilaat sukkulluunniit
pinngitsoorneqarsinnaanngitsut nalunngilarput, kisianni tamakku
minnerpaaffissaanii-tinniartariaqarput.
Suliffissaaleqineq
akiorniarlugu suliniartoqarnera tapersersortariaqarpoq, soorunami. Tassami
assersuutigalugu timmiaq erisariigaq erisaqqinneqarsinnaanngitsoq oqaatigineqartartoq
soorlu Inatsisartut ilaanni taamatut oqartoqartartoq. Tassami assersuutigalugu
iluarsaaqqinnermi suliniutigineqartartunut anningaasartuutissatut
naatsorsuutigineqarput ukioq siulleq kr. 17 millon-ingajaat ukiunilu
tulliuttuni kr. 28 million-ingajaat. Kisiannili erseqqarissumik
oqaatigineqan-ngilaq suliffissaaleqisorpassuit suleritinneqassanersut,
piginnanngorsarnerit pikkorissarnerit sulisitsisut sulisartullu kattuffii
suleqatiginiarneqarnerisa saniatigut. Tassa sumi sulissagamik. Suliffinnik
suliassaqarfiusunik aamma pilersitsisoqartariaqarpoq imaluunniit
produktionsskole-nut assingusunik pilersitsisoqartariaqarpoq.
Aap, tikisitat
sulisorineqarnerat annikillisarneqartariaqarpoq tamanna siunertaq ajunngilaq,
kisianni eqqaamasariaqarpoq suliffissaqanngitsut amerlanersaat sulinermik
ilinniagaqar-simanngimmata. Assersuut:
1996-imi
Namminersornerullutik oqartussat katillugit 3005-inik sulisoqarput taakkunannga
Nunatsinni inunngorsimasut 2111-unerarneqarput, sinneri tikisitat.
Nalunngilarpullu tikisitaq amerlanertigut pingaartumillu allaffissornermik
suliaqartoq suliamik ilinniagaqarsimanngitsumik imaaliallaannaq
taaerserneqarsinnaanngimmat. Taama oqarama imaanngilaq sulisussanik
tikisitsisarneq naassaanngitsumik atorneqarnissaa anguniariga kisianni
kisitsisit paasissutissaallu tunngavigalugit suliniarneq soorunami
ingerlanneqartariaqarpoq. Aammami ilismavarput maannakkut
suliffissaqanngitsunik naatsorsuisarneq tamakkiisuunngitsoq taamaammat
kisitsisit matumani saqqummiunneqartut tamakkiisuunatillu sukumiisuunngitsut
naatsorsuutigineqarsinnavoq. Tassami nalunaarusiami takuneqarsinnavoq
1989-imut naleqqiullugu 1996-imi suliffissaqanngitsut 880-inik
amerleriarsimasut.
Ukiuni makkunani suliffissaaleqisut amerlavallaarujussuartut oqaatigisariaqarpoq, taamaattumik ilaatigut apeqquserneqartariaqarpoq ilumut avataaniit suliffissarsiortut killilersimaarniarlugit inatsit tamakkiisumik atortinneqarnersoq. Tassami allaanngilaq Nunatta avataaniit suliartortartut amerligaluttuinnartut allaammi kangiamiut aamma Nunatsinnut anngussimapput amerligaluttuinnarlutillu. Taamaattumik ilinniartitaaneq pisariaqartitat aallaavigalugit aammalu Nunatsinni pilersinneqarsinnaasut isigalugit ingerlanneqartariaqarpoq. Soorlu assersuutigalugu Siku-Blok-i atorlugu illulioriaaseq ilinniartitsissutigineqarsinnaavoq taakkuninngalu sanaartorneq tunisassiorsinnaanerlu siunertaralugit. Taamaaliornikkut Nunatsinni anningaasat kaaviiaartinneqarnerat kialluunniit naatsorsuutigisinnaavaa pitsanngoriassasoq. Nunarput nammineq illuliornernut tunngasutigut pilersorsinnaanerulissooq tunisassiorsinnaalerlunililu ilaallu ilanngullugit, taamaallaat Naalakkersuinikkut piumassuseq amigaataavoq. Nunarpummi periarfissarpassuaqarpoq maannakkut atorluarneqanngitsunik, aamma suliffissanik pilersitsiviusinnaasunik.
Avataaniit isumalluuteqarnerujussuaq qimakkiartuaartariaqarpoq Nunattalu tunniussinnaasaanik atorluaaneq aallunnerusariaqarluni. Taamaaliussagaannilu politikkerit inuussutissarsiutigiinnarlugu politikkeriusut sarfarsiataaginnartullu atorsinnaanngillat, soorlu Naalakkersuisoq saqqummiinermini ilaatigut imatut oqartoq: Aaqqutitoqqatigut nungullareersimasutigut ingerlaniaasaarunnaarluta@ sumummi iluaqutaassua ukiukkut aput nivallugu allamiit allamut nooqattaarlugu suliffissaqartitsiniassagaanni. Soorunami aputaajagassat aputaajartariaqarput, kisianni suliassat taamaattut suliffissaqartitsiniutitut kisimik siunniussimasariaqanngillat. Tammanna assersuutigiinnarpara tassa ilaatigut mandetiimit atorlugut kommunit ilaanni taamatut sulisitsisoqartarmat.
Taamaattumik aaqqisssuusseqqinniarnermi inatsisitigut aamma iluarsaasseqqinnissaq pisariaqarpoq. Aammalu suliffissaqartitsiniarnermi suliniutit assigiinngitsut Naalakkersuisoqarfinnut assigiinngitsunut aggulussimanerat isumaqarpunga eqaannerusumik aaqqissuunneqartariaqartoq.
Misissueqqissaariaaseq suliamik taaneqartoq aamma pilersinneqartussaavoq, taavami Sulisa A/S atorsinnaannginnami? Matumanimi nassuiaammi pioreersunik atorluaanissaq aamma eqqartorneqaraluarpoq, Sulisa pioreerpoq immikkut annerusumik aningaasartuuteqarfiunngitsumik soormi suliniutit Sulisa-mit ingerlanneqarsinnaanngillat.
Taamatut naatsumik oqaaseqarlunga nassuiaat tusaatissatut tiguara suliniartullu sulilluarnissaanik angusaqarluarnissaannillu kissaallugit.
Mikael Petersen, Sulisoqanermut Naalakkersuisoq, Siumut:
Siullermik oqaatigissuara nuannaarutigigakku suliffeqarneq pillugu nassuiaat soqutigineqarluarmat. Immaqa aamma allatut oqaatigineqarsinnaavoq suliffeqarneq pillugu Nunatsinni Naalakkersuinikkut ingerlatsineq, ila nutaaqaaq inuiassuarnut allanut naleqqiulluta suliffeqarnikkut sulisoqarnikkullu politikkeqarnikkut suli kinguarsimaneroqaagut, isumqarpunga tamanna aamma takusinnaagiga maani Inatsisartut ataatsimiittarfianni ullumikkut.
Suliffeqarneq sulinerlu inuit inuiassuit nappatigaat, neriniutigaat sulinngikkaanni nerisassaqanngilaq, aamma sulinngikkutta Nunarput akissaqanngilaq. Uterriaqqilaarluta ila sulinngikkutta nerisassaqanngilagut ilaquttatta napatinnissaanut akissaqanngilagut, inissaqanngilagut taamaattumik sulineq pillugu politikkeqarneq partiinit tamanit itinerusariaqalerpoq, aamma inuiaqatigiinni.
Nuannaarutigaara ataatsimeersuarnermi aasaq soorlu saqqummiussatsinni oqaatigigipput Naalakkersuisuniit, suliffeqarneq pillugu soqutiginninneq taama annertutigisoq takugatsigu.
kattuffiit Nunatsinni assigiinngitsut sulisartut kattuffissui assigiinngitsut sulisitsisut kattuffiat uppernarsaapput aasaq ataatsimeersuarnermi taama annertutigisumik Nunatsinni suliffeqarnikkut soqutiginninnerminni.
Isumaqarpunga Nunatsinni suliffeqarnmikkut sulisoqarnikkullu Naalakkersuinikkut anguniakkat ataqatigiissaarnissaat imminnut atasuunissaat siunertaqaqatigiinnissaallu pillugu Naalakkersuisut saqqummiussaat una partiinit tamanit taperserneqartoq.
Ullumannamut Nunatta oqaluttuarisaanerani suliffeqarnikkut sulisoqarnikkullu Naalakkersuinikkut anguniakkatigut noqqoruuttutut pissuseqarluni ingerlaarneq unittariaqalerpoq. Siunnerfeqaqatigiilluni ingerlanissaq pisariaqalerpoq, pilersaarusiorluarnikkut. Tassalu tamannarpiaq aamma siunertaralugu Suliffeqarneq pillugu Nassuiaat suliarineqarpoq.
Taamaattumik nuannaarutiginngitsuunngilara partiit oqaaseqartuisa oqariartuutaat unaasoq Suliffeqarneq pillugu Nassuiaammi siunnerfiit assigiinngitsut taperserlugit aammalu naalakkersuisunit suliareqqinneqarnissaat inassutigalugu.
Isumaqarpunga oqariartuut Inatsisartuninngaanniit taamaattoq ersarissoq aammalu Naalakkersuisuni suleqqinnissatsinnut ilami Naalakkersuisoqarfimmi suleqqinnissamut Suliffeqarneq pillugu Naalakkersuisoqarfimmi qinersinissaq apeqqutaatinnagu suliaq ingerlaqqittariaqarpoq.
Inatsisartuni siunnerfigineqartut suliassaapput naammassiniarneqartussat aamma Naalakkersuinikkut suliaqartut sulisariaqarput qinersinissat apeqqutaatinnagit.Qinersinissat apeqqutaatittuarlugit sulissagutta angusassaqanngilagut. Qineqqusaarutissat suliarineqarneq ajorput Naalakkersuinikkut ulluinnarni ingerlatsinermi suliassat naammassiniarneqartarput, qineqqussaalerutta qineqqusaassaqaarpugut.
Taava partiit oqaaseqartuisa apeqqutigisaat akissuteqarfigissavakka.
Nuannaarutigaara partiit tamarmik inuusuttut pillugit suliniutissatut Naalakkersuisut eqqarsaasersuutaat taperserneqarmata. Aamma taakkua suliareqqinneqassapput, inuusuttut ullumikkut suliffissaaruttartut annertusiartorput ilinniarfinninngaanniit naammassillutik anisartut amerliartornerat ilutigalugu aamma suliffissaaruttarneq allatut ajornartumik takusalersimavarput, ajoraluartumik, taamaattumik Naalakkersuisuni immikkut inuusuttut pillugit suliniutissat aallartisarnissaannut isumaqarpunga taperserneqarnerput atorluassagipput, 1999-imilu misiliutit siulliit aallartisarumaarput inuusuttut pillugit suliniutissat.
Taakkua saniatigut tikisitanut tunngatillugu partiit tamermik oqariartuuteqarput. Nunatsinni tikisitanik sulisoqarneq annertuumik qapputaasarpoq uanilu Naalakkersuisuninngaanniit saqqummiussatsinni qangakkoornersuaq piunnaarlugu nutaamik tikisitanut politikkeqarnissaq saqqummiupparput. Uparuartorusaaginnarlugit taakkua pissutsit allanngortinneqarsinnaanngillat oqallattaannguaq suli amerlaqaat. Naamik pissutsit allat inatsisiliornerillu allat aqqutigalugit tamanna suliassaavoq, aamma inuiaqatigiittut inooqatigiittullu Nunatsinni uagutsinnut isiginissarput aallaaviulluinnarpoq, tikisitanut qanoq politikkeqarnermik tunngaviliisartoq.
Naalakkersuisuni uagut tulluartuutinngilarput tikisitap tikisitaanera tunngavigalugu politikkeqarfigissallugu, taamaattoqanngilaq inuiaqatigiinni taamannak immikkoortiterisoqassanngilaq. Inuiaqatigiinni taamatut ingerlassagutta kinaluunniit sulerusukkunnaassaaq.
Taamaattumik Naalakkersuisuni anguniarniarparput inatsisiliornertigut kattuffiit assigiinngitsut peqataaffigisinnaasaannik aaqqissuussinerit tikisitaqarnikkut nataamik aaqqissuussinissamik ilusiliisussat naammassiniassallugit. Aammalu tamakku pillugit ukioq 1999-i atorneqassasoq Nunatsinni inatsisitigut tunngavissat qanoq ittut aallaavigalugut tikisitaqartarnerup nutaamik aaqqiiviginissaanut pissuseqassanersugut.
Uanga nammineerlunga naatsorsuutigaara tikisitaqartarneq taanna imatut oqaasiulersimassasoq tassa suliartortut nalinginnaasumik piumasut suliartorsinnaalerumaartut Nunatsinnut taamaattumik aaqqissuussinerit siunertaqartariaqarput siunissami aamma oqariartuutigineqartut Inatsisartunit takusinnaasakka malillugit siunissami immaqa piffissami qanittumi anguneqarsinnaasoq inuit avataaninngaanniit pisariaqartinneqartut taakkua ikittuinnanngorsimassasut, allaat namminneq piumassutsiminnik Nunatsinneerusussuseq aallavigalugu aamma sulisimalissasut. Soorunami inuiaqatigiit ineriartornerani aatsaat taanna namminermi anguneqarsinnaavoq.
Taamaattumik tikisitat pillugit Naalakkersuinikkut anguniakkagut taakkua paatsoorneqassanngillat inuiaqatigiit tamatta ataatsimut isigalugit kinaassusersiortaqanngitsumik taakku aaqqiiviginissaat siunertaavoq.
Allat oqaatsit assigiinngitsut isumaqatigiiaat Inatsisartuninngaannit partiininngaanniit saqqummiussunneqartut oqaaseqarfigissanngilakka aamma nassuiaammi ersrilluinnareermata apersuinerullutillu, Inuit Ataqatigiilli oqariartuutaat apeqqutigisaallu una isumaqatigilluinnarpara, soorunami anguniakkat taakua angingaasassaqartinneqartariaqarput suliassallu naammassiniartariaqarlutik.
Taamaattumik Aningaasanik inatsisikkut matumuuna naammassilersukkut suliffeqarneq pillugu iluarsaaqqinnissamut kr. 1,5 million-it pisariaqartinneqartut taakkua aningaasaliissutigineqartussaassapput, taakkualu piolersinneqartussamut suliffeqarnikkut siunnersuisoqatigiit pilersinneqarnissaannut atorneqartussaassapput ilaat, kiisalu kisitsisitigut nalunaarsuinermut tamakkiisumik aaqqissuussinissamut suliffeqarnerup iluani ilaat aamma atorneqartussaassallutik.
Kiisalu Naalakkersuisuni siunertaraarput aamma isumaqatigiissutigineqareerpoq suliffeqarnerup iluani misileraassutissat misiliinerit assigiinngitsut 1999-imi ingerlanneqartussat taakkua ilinniarfiit assigiinngitsut suleqatigalugit aammalu sulisitsisut ilinniartitseqqittarnernut aningaasaliissutigisartagaat akilersuutigisartagatt AIP-nik taaneqartartut aqqutigalugit misileraanerit aningaasalersorneqarumaartut. Taannalu Ilinniartitaanermut Pisortaqarfik suleqatigilluinnarlugu aamma ingerlatissavarput.
Naalakkersuisuni soorlu nassuiaammi takuneqarsinnaasoq naatsorsuutigaarput ukioq 2000 aallarnersigalugu iluarsaaqqinnivik aallartissasoq tassa 1999 piareersarfiussaaq misileraanernut assigiinngitsunut aammalu inatsisit suliffeqarnermut tunngassuteqartut qulaajarnerinut taavalu ukioq 2000 aallarnerfiussasoq tassa iluarsaqqinnermut. Taamaattumik aningaasalersuinissat annertunerusut inunnik isumaginninnikkut ilaatigut aamma aaneqarsinnaasut aaqqissuusseqqinnerup kingunerisaanik aammali ilinniartitaanerup iluini, ataqatigiimmatami tamermik, neriuppunga aaqqissuusseqqinnerit taakku tamarmik aningaasassaqartinneri inissinneqarsinnaajumaartut ukioq 2000-i eqqarsaatigalugu.
Naalakkersuisoqarfiit qanoq suliffeqarnikkut ingerlatsineq pillugu aqutsineq eqqarsaatigalugu qitiusuminngaannit ingerlatsineq pillugu Inuit Ataqatigiinninngaannit oqaatigineqartoq, taanna soorunami Naalakkersuisutigut qanoq aaqqissuussineq aqqutigalugu taanna pisussaassaaq. Naalakkersuisoqarfiit qanoq suliakkersorneqarneri aallaavigalugu akisussaaffit sumut inissinneqartarumaarnissaat apeqqutaassaaq.
Inuiaqatigiit ineriartorneranni qularnanngilluinnarpoq tamakku tamarmik nikerartarumaartut, aamma inuiaqatigiit pisariinnerusutut isigippassuk qularnanngilaq suliffeqarnikkut qitiusumik aqutsineq ilinniartitaanermut aamma kapitartuunneqarsinnajumaartoq. Tamanna uanga maani akisassarinngilara, kisianni Naalakkersuinikkut akisusaasut akisussaasarumaartussallu ilusilersuinertik naapertorlugu tamanna inissitassaraat.
Naggataatigut qujassutigaara Suliffeqarneq pillugu nassuiaat partiinit tamanit aammalu kattusseqatigiinnit taperserneqarmat, siunnerfigineqartullu assigiinngitsut ilalerneqarlutik, naatsorsuutigilluinnarpara suliassat taakkua nuannaralugit aammalu kommunit Naalakkersuisoqarfiillu allat uagutsinnut suliffeqarnermut attuumassuteqartut suleqatigalugit taakkua ingerlanneqarumaartut.
Naggasiullugu erseqqissaatigilaarlara Naalakkersuisuni ukua pingaartikkatsigit suliffeqarnerup iluani, tassa suliffeqarfinni kinaassusersiornerit pisartut suleqatinit allaat ajattuinerit pisartut ilami ammit qalipaataanit immikkortitsiniarpalaartumik iliuusaasartut nunami maani akuerineqanngissaannassammata.
Nunami maani sulineq inuttut ineriartorfiujuartariaqarpoq, nunami maani sulineq ilinniarfiujuartariaqrapoq, nunami maani sulineq nuannerssujuartariaqarpoq, nunami maani sulineq imminut akilersinnaajuartariaqarpoq. Minnerunngitsumillu nunami maani sulineq kiffaanngissuseqarnermut aqqutaajuartariaqarpoq.
Taama oqaaseqarlunga partiinut tamanut Kattusseqatigiinnullu qujavunga.
Konrad Steenholdt, Kultureqarnermut Ilinniartitaanermullu Naalakkersuisoq, Atassut:
Nuannnerpoq tusaallugu ilinniarnerup aamma ilinniaqqinnerup aammali ilinniarnerup pisariaqassusianik erseqqissaatit. Ilumoorluinnarpoq taanna aammalu statistik, tassa imaappoq Nunatsinni Naatsorsueqqiissaartarfiup, Nunatsinni 1998-imi saqqummersitaa tassani qupperutsigu takusinnaavarput, Nunatsinni inuit 100-ut suliffissaarukkaangata taakkunani 82,5, tassa 83-it tassaasimasarput ilinniagaqarsimanngitsut. Kisianni isumaqarpunga uani taamatut oqareeratta erseqqissartariaqaripput ilinniagaqarsimannginneq qanoruna nalileripput. Soorunami tassaasimassapput meeqqat atuarfianni aturfimmi atursimasut kisianni tassanngaanniit inuussutissarsiutitaarniarlutik ilinniarnermi unittoorsimasuupput taakkua, tassa taannarpiaruna pigipput ullumiikut aamma uani oqallisigisatsinni. Inuit taakkua 83-it inuit suliffissaqanngitsut 100-uugaangata qanorukua iliuuseqarfiginiarigut ilinniartitaaneq aamma eqqarsaatigalugu.
Tassunga tunngatillugu aamma naatsorsueqqissaarnermi kisitsisit oqaluttuuppaatigut ullumikkut ajornartorsiutiginngilagut ilinniagaqarluarsimallutik Danmarkimi ilinniariareerlutik Nunatsinnut atorfinni qulliunerusunut ikkuttartut Nunatsinni maani inooqataasut taakkua suliffissaqartuarput, 100 %-imik taakkua sulipput. Tamanna aamma isiginiartariaqarparput taakkuuppullu aamma qangali uparuartorneqartuartunik Nunatsinni tikisitanik taarsiiartortut.
Nuannaarutissaqarpugut tassani, suna tamaat taartuinnarsuartut eqqartorneqartariaqanngilaq, amerliartuaarput taakkua taannalu aamma inuiattut perroorutigisariaqarparput.
Ilumoorpoq meeqqat atuarfiata inerititai aniasut meeqqat atuarnerminni naammassillutik aniasut taakkua piginnaassusiisa qaffassarnissaat pimooruttariaqalerparput. Upernaaq maj-imi ataatsimiikkatta maani paasivarput ilinniartitsisussaaleqineq qanoq annertutiginersoq.
Uani ilinniartitsinissaq ilinniarfinnillu atorluaanissaq eqqartorparput - aap ajunngilluinnarpoq, kisianni aamma uani eqqarsaatigisariqarparput ilinniarfiusut tamakku ilinniartitsisoqartariaqarput pikkorissunik, taamaattumik aamma nuannaarutigaara uparuartorneqarmat ilinniartitsisussatuut piareersimasut pikkorissaqqinnissaanik aamma taanna isumaginiartariaqarparput innuttaasut oqaluutiinnarnagit ilinniaqqullugit, tamarmik ilinniaqqittuarnissaat erseqqissumik maani kajumissaarutigineqarmat nuannaarutigaara. Massakkorpiarlu aamma Naalakkersuisuninngaanniit pilersaarutitta ilagaat meeqqat atuarfianni anguneqartartut pitsaanerulersinneqarnissaat anguniassallugit. Taamaattumik ilungersuutigaarput una: ilinniartitsisussaaleqineq avataaninngaanniit aaqqinneqartussatut isumalluarfigiunnaarlugu uagununa inuiaqatigiit nammineerluta aaqqitassarput ilinniartitsisullu taakkua pissarsiarigutsigit qularutissaanngitsoq unaavoq meeqqat meeqqat atuarfinninngaanniit anisartut angusarisartagaat aamma pitsaanerulissasut. Taannalu oqaaseqartuniit partiit oqaaseqartuisa ilaatigut erseqqissumik oqaatigimmassuk nuannaarutigaara. Isumaqarpunga ukiuni tulliuttani meeqqat atuarfianninngaanniit anisartut angusartagaasa pitsaanerulernissaat politikkikkut anguniartariaqaripput.
Ullumikkut ilinniartitsisut nunatsinni nersortariaqartumik sulipput meeqqat atuarfii eqqarsaatigalugit. - Naak qaangiuttoornerpassuit atorlugit sulisuaraluarlutik kisianni allaat uanga nuannaarutigaara august-ip aallartinneraninngaanniit meeqqat atuarfiat aallartimmat maannakkut ajornartorsiuteqaraluarlutik nipaattumik ingerlatsipput suliassaminnillu nakkutiginnillutik.
Ilinniartitsisut ajortuinnarmik eqqartorneqarsinnaanngilluinnarput isumaqarpungalu nersortarialimmik sulisuusut ajornartorsiutit annertugaluaqisut sorsuppaat, kisianni taassuma saniatigut suli ilinniartitsisunik amerlanerusunik pissarsiniarnissarput pisariaqarpoq, taannalu ukioq manna isumalluarnartumik aallartipparput, tassa najugaq qimannagu ilinniartitsisunngorniarnerup aallartinneratigut 60-it massakkut tassani atuarnermik ingerlataqarmata. Taanna suli aamma nukittorsaqqinnissaa Naalakkersuisoqatigiinninngaanniit anguniakkatta pingaarnerit ilagaat.
Qujavunga ilinniartitaaneq pillugu maani eqqartuilluartut oqaasii pillugit, isumaqarpunga taanna aamma kattunnikkut suleqatigiilluarnikkullu isumalluarnartunngorlugu aaqqiiffigisinnaagipput.
Oqaluuserisaq naammassivoq.