Oqaluuserisassani immikkoortoq 118 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 1. november 1999
nal. 16.30
Ataatsimiinnermik
aqutsisoq: Johan
Lund Olsen, Inatsisartut Siulittaasuat:
Siullermik suleriaasitsinni
aalajangersagaq ullumi siusinnerusukkut oqaatigereersimasara aamma
uteqqilaassavara, tassa suleriaasitsinni § 16, imm. 1 taanna naammasseqqaariarlugu
immikkoortoq 118-imi suliassarput taava naammassisinnaanngussavarput.
Tassa Inatsisartunut imaluunniit
Naalakkersuisunut ilaasortaq tunuarumalluni qinnuteqaateqarpat Inatsisartut
aalajangissavaat qinnuteqaat akuerineqarsinnaanersoq.
Taamaammat siullermik
apeqqutigeqqaassavara ulloq mannamut Isumaginninnermut Suliffeqarnermullu
Naalakkersuisuusimasoq Mikael Petersenip tunuarniarumalluni qinnuteqaataa
qassit akuersaarumavaat? 31, tassa Inatsisartuni ilaasortat tamarmik maani
najuuttut.
Taava maannakkut suleriaasitsinni
§ 4, imm. 2 malillugu, Isumaginninnermut Suliffeqarnermullu Naalakkersuisumik
nutaamik qinersisoqassaaq, tassanilu Naalakkersuisut Siulittaasuat
saqqummiussassaqarpoq, tassa uani immikkoortoq 118-imi.
Jonathan Motzfeldt, Naalakkersuisut Siulittaasuat:
Naalakkersuisunut ilaasortap
Mikael Petersenip Isumaginninnermut Naalakkersuisup tunuarniarnera
Inatsisartunit akuersissutaareermat, taava matumuuna Inatsisartunut
akuersissutigeqqullugu innersuussutigissavara Isumaginninnermut Naalakkersuisumut
nutaamut siunnersuutigigakku Inatsisartunut ilaasortaq Jørgen Wæver Johansen,
maannakkut Mikael Petersenip atorfigisaanut ikkunneqassasoq.
Johan Lund Olsen, Inatsisartut Siulittaasuat:
Tassa maannakkut Inatsisartut
inatsisaanni § 5, imm. 3 naapertorlugu tassa siunnersuutigineqartoq Jørgen
Wæver Johansen Inatsisartut qinigaaffiata sinnerani, tassa Isumaginninnermut
Suliffeqarnermullu Naalakkersuisutut ingerlassasoq, tamatumunnga isumaqataasut
qinnuigissavakka nikueqqullugit: 31, tassa Inatsisartut tamarmik najuuttut.
Taavalu maangaanniit Inatsisartut
Siulittaasuata aqutsisoqarfianinngaanniit Naalakkersuisun-ngortoq Jørgen Wæver
Johansen, pilluarit qanortoruna aamma illit sulilluarina, taanna pisarnertut ingerlatissagit
taanna qularutissaagunanngilaq.
Oqaluuserisaq naammassivoq.