Oqaluuserisassani immikkoortoq 17-3 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Sisamanngorneq 28.oktober
1999 nal. 19.05
Ataatsimiinnermi
aqutsisoq, Johan
Lund Olsen, Inatsisartut Siulittaasuat:
Taavalu maannakkut
tullinnguuppoq immikkoortoq 17, aningaasarsianit akileraarutit pillugit
Inatsisartut inatsisaata allanngortinneqarneranik Inatsisartut inatsisissaannut
siunnersuut. Tassa aamma pingajussaanerinninneq, tassani Akileraarnermut Akitsuusiinermullu
Ataatsimiititaliaq isumaliutissiissuteqarpoq, tassanilu saqqummiisorissavaat
ataatsimiititaliap siulittaasuata tullia Lars Sørensen.
Lars Sørensen, Akileraarnermut Akitsuusiinermullu
Ataatsimiititaliap siulittaasuata tullia:
Aningaasarsianit
akileraarutit pillugit Inatsisartut inatsisaata allanngortinneqarneranik
Inatsisartut inatsisissaanut siunnersuut pillugu Inatsisartut
Akileraartarnermut Akitsuusiisarnermullu Ataatsimiititaliaata ilassutitut
isumaliutissiissutaa pingajussaannerinninnermi saqqummiunneqartoq.
Inatsisartut
Akileraartarnermut Akitsuusiisarnermullu Ataatsimiititaliaat suliarinninnermi
ukuninnga inuttaqarpoq:
Per Berthelsen, Siumut,
Siulitaasoq, Hans Enoksen, Siumut, Lars Sørensen, Inuit Ataqatigiit, Siulittaasup
tullia, Daniel Skifte, Atassut aamma Mads Peter Grønvold, Kattusseqatigiit.
Inatsisartut 18.oktober
1999 ataatimiinneranni Aningaasarsianit akileraarutit pillugit Inatsisartut
inatsisaata allanngortinneqarneranik Inatsisartut inatsisissaanut siunnersuutip
nutaamik suliarineqarnissaa ataatsimiititaliamut innersuunneqarpoq, taamaammat
ataatsimiititaliaq 21.oktober 1999 ataatsimiimmat siunnersuut
Akileraartarnermut Akitsuusiisarnermullu Ataatsimiititaliami
suliareqqinneqarpoq.
Inatsisartut Akileraartarnermut
Akitsuusiisarnermullu Ataatsimiititaliaat suli isumaqarpoq atorfimmut atasumut
biilerisap atugassiissutigineqartartup sukannernerusumik
akitsuusivigineqarnissaa eqqortuusoq. Inatsisartullu Akileraartarnermut
Akitsuusiissarnermullu Ataatsimiititaliaata siunnersuutip
aappassaanneerneqarnerani assersuutitut saqqummiunneqartut maluginiarpai,
taakkunatigut
erseqqissaatigineqarmat siunnersuutip matuma atorfimmut atasumik biilerisat
atugassiissutigineqartut akitsuusiivigineqarnerisigut akileraartartut ilaasa
eqqunngitsumik pineqartutut misigisimasinnaanerat kingunerisinnaagaa.
Inatsisartut
Akileraartarnermut Akitsuusiisarnermut Atatsimiititaliaata assersuutigineqartut
paasilluarpai, Ataatsimiititaliarli maannakkorpiaq allannguutissatut
siunnersuutinik allanik saqqummiussinissaminut naammattunik
pissutissaqarsorinani.
Ataatsimiititaliaq
aappassaannerinninnermut isumaliutissiissummigut oqareerpoq atorfimmut atasumik
biilerisap atugassiisutigineqartup akitsuusiivigineqartarneranik akiliinissamut
pisut ilaatigut akileraartartoq akiliingitsoortinneqarsinnaassasoq.
Ataatsimiititaliap naatsorsuutigaa akileraaaruseriffiit aappassaaneerinninnermi
isummanik saqqummiussat eqqarsaatigalugit akitsuusiineq eqqunngitsumik
pinninnertut immikkut isigineqartariqartillugu pisuni allani tamatuma
pisariaqartut kinguneqaatigisai eqqaamaffiginiartassagaat.
Inatsisartut
Akileraarnermut Akitsuusiissarnermullu Ataatsimiititaliaata aamma
naatsorsuutigaa atorfimmut atasumik biilerisap akitsuusiivigineqarneranut
tunngasut pillugit ineriartornerup qanoq ittuunera pillugu Aningaasaqarnermut
Niuernermullu Naalakkersuisup Akileraartarnermut Akitsuusiisarnermullu
Ataatsimiititaliaq ingerlaavartumik ilisimatittassagaa.
Nalakkersuisunut ilaasortaq
naalakkersuinikkut akileraarusivinnut qullersatut imaluunniit
Akileraartarnermut Pisortaqarfiup akileraarusivinnut allaffissornikkut
qullersaatut akisussaasutut kommuneni akileraruserinermut pisortat
nakkutilliisutut pisussaassuseqarnerminut atatillugu atorfimmut atasumik
biilerisap atugassiissutigineqartup akitsuusiivigineqartarnera tamanit
tunngatillugu immikkut eqqunngitsumik pineqarnerannik malussassagaluarpat
Inatsisartut Akileraartarnermut Akitsuusiisarnermut Ataatsimiititaliaata
naatsorsuutigigaa periarfissaq siulleq atorlugu aningaasarsianik akileraarutit
pillugit Inatsisartut inatsisaata allanngortinneqarnissaanik siunnersuumik
saqqummiussaqaqqissasoq.
Taamatut
oqaaseqarluniAkileraartarnermut Akitsuusisarnermut Ataatsimiititaliaq
isumaqatigiisoq inassuteqarpoq aningaasarsianit akileraarutit pillugit
Inatsisartut inatsisaata allanngortinneqarneranik Inatsisartut inatsisaannut
siunnersuut aappassaanerneqarnermini kingorna ilusileriikkani atorlugu
Inatsisartuni akuersissutigineqassasoq. Ataatsimiititaliap ilaasortai
taagoreerakkit taagoqqissanngilakka.
Josef Motzfeldt, Aningaasaqarnermut Niuernermulu
Naalakkersuisoq:
Akileraartarnermut
Akitsuutinullu Ataatsimiititaliap pingajussaaneerinninnisamut ilassutitut
isumaliutissiissummik suliaqarsimanera Naalakkeruisut sinnerlugit
qujassutigaara.
Naalakkersuisuniillu
naammagisimaarneqarpoq ilassutitut isumaliutissiissut Ataatsimiititaliap
isumaqatigiilluni suliarisimammagu.
Tamatumunnga tunngasut
malinnaafigeqqissarneqarnissaanik Ataatsimiititaliap inassuteqaataat
nalakkersuisut soorunami
malikkumavaat, akeqanngitsumillu biileqartitaanerup akileraaruserneqartarnerani
naleqqussorinanngitsunik ersertoqassappat, Naalakkersuisut inatsisitigut
allannguinissamik suliniuteqarumaarput.
Akeqanngitsumik
biileqatitaanerup akileraaruserneqartarnerannut maleruagassat nutaat aatsaat
ukiumi aningaasarsiorfiusumi 2000-imi atuutilersussaammata
ilimagineqarsinnaagunarpoq 2001-ip qiteqqunnerani aatsaat
akileraaarusiinissami, taassumalu kingorna akileraatarnermi Akileraartarnermi
Siunnersuisoqatigiinnut naammagittaaliortoqarneratigut misilittakkanik
toqqammavissaqalerumaartoq.
Naalakkersuisut
nalinginnaasumik isumaat tassaavoq akeqanngitsumik biileqartitaanerup
akileraaruserneqartarneratut ittuni maleruagassat ersarissuullutillu
pisariitsuunissaat pisariaqartuusoq, tassa illoqarfinni akileraartarnermi
oqartussaasunut maleruagassanik isumaginnittussanut aammali
akileraartussaatitaasunut, taakkumi biilinik akeqanngitsumik
atuisinnaatitaanerup akileraarutitigut kingunerisassai
ilisomareerniassammatigit.
Inatsisissatut siunnersuutip
suliarineqarnerani pissutsit tamakku aamma Naalakkersuisuni isiginiarneqarput
aammalu tamakku saniatigut pingaartumik isiginiarsimallugu ajunngitsorsiat,
soorlu akeqanngitsumik biileqarnerup akileraaruserneqartarnerata tamakkunannga
akileraarusiiffigineqartartut ilaannit akerliuffigineqangaatiartarnera
iluanaarniarfigineqartarneralu.
Taamatut oqaaseqarlunga
siunnersuutip aappassaaneerneqareernermisulli maannakkutut iluseqarluni aammalu
inatsisisatut siunnersuummi ilanngunneqartumi ilaatinneqarluni aalajangiivigitinneqarnissaa
Naalakkersuisut sinnerlugit inassutigaara.
Mads Peter Grønvold, Kattusseqatigiit oqaaseqartuat:
Kattusseqatigiinnit inatsisissap siullermeerneqarnerani aappassaannerneqarneranilu oqaaseqaatigut innersuussutigalugit inatsisissatut siunnersuummut akerliulluta taasinissarput Kattusseqatigiinnit nalunaarutigaarput.
Josef Motzfeldt, Aningaasaqarnermut Niuernermullu Naalakkersuisoq:
Qujanaq, tassalu Kattusseqatigiinniit eqqaamanerlunngikkukku siullermeerininnermi aappassaaneerinninnermiluunniit oqaatigisaat ilaatigut tassaapput namminesortuugaanni imaluunniit pisortani atorfeqaraanni imaluunniit suliffimmut tunngatillugu akiliisussaaneq, akileraartussaatitaaneq taanna immikkortinneqassasoq inatsisiliorsinnaanngilagut. Naalakkersuisut aalajangiussimavaat inatsisiliorsinnaanngitsugut namminersortunut pisortanut atofeqartunut immikkoortitsisumik, taamaattumik taanna erseqqissaatigalugu, aamma naggaterpiaatigut erseqqissaatigerusuppara ilaatigut taamatut biileqartitaasunut nalliginnittut isumaqartarmata 40.000-inik ukiumut akiliisassasut, taamaattoqanngilaq. Tassa 40.000-inik isertitatut nalilerneqarpoq, taakkulu soorlu assersuutigalugu Nuummi 40 procentiat akilerneqartussaavoq, tassalu 16.000-it ukiumut imaluunniit ilanngaat B, saniatigut isertitatut B-tut ilanngaat aappariuusimagaanni 10.000 ilanngarialugu ukiumut 12.000-it taamaallaat akilertartussaammatigik, tamaattumik isumaqanngilagut Naalakkersuisuningaanniit taamatut immikkut isumassuinissamut matumani pissutissaqarluta.
Johan Lund Olsen, Inatsisartut Siulittaasuat, ataatsimiinnermik aqutsisoq:
Taavalu tassa massakkut taasissaagut, tassa maannakkut inatsisissatut siunnersuutit taamatut pingajussaaneerneqarnerani taamatut isikkoqarluni akuesissutigineqarnissaanut isumaqataasut qinnuigissavakka nikueqqullugit.
24.
Taavalu aamma apeqqutigissavara taamatut isikkoqarluni pingajussaaneerneqarnerani akerliusut qinnuigissavakka nikueqqullugit.
4.
Tassalu maani Inatsisartuni ilasortat najuuttut tamarmik taasereerput. Tassalu taamaalilluta immikkoortoq 17 naammassivarput.
Oqaluuserisaq naammassivoq