Oqaluuserisassani immikkoortoq 34-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 20. oktober 1999. nal. 20.10
Ataatsimiinnermi aqutsisoq: Johan Lund Olsen.
Olga Poulsen, Inuit Ataqatigiit:
Peqqissaasutut
ilinniartitaaneq pillugu Inatsisartut peqqussutissaattut siunnersuut pillugu
Kultureqarnermut Ilinniartitaanermullu Ataatsimiititaliap isumaliutissiissutaa.
Kultureqarnermut
Ilinniartitaanermullu Ataatsimiititaliaq suliarinninnermini ukuninnga inuttaqarpoq:
Inatsisartuni ilaasortaq,
Olga Poulsen, Inuit Ataqatigiit, Siulittaasoq
Inatsisartuni ilaasortaq,
Per Berthelsen, Siumut
Inatsisartuni ilaasortaq,
Augusta Salling, Atassut
Inatsisartuni ilaasortaq, Ruth
Heilmann, Siumut
Inatsisartuni ilaasortaq, Mogens
Kleist, Kattusseqatigiit
Inatsisartut Kultureqarnermut
Ilinniartitaaermullu Ataatsimiisitaliaat peqqussutissatut siunnersuutip
siullermeerneqarnerata kingorna siunnersuut nassuiaatitaalu misissuataarpai.
Peqqussutissatut siunnersuummik
suliarinninnerminik Kultureqarnermut Ilinniartitaaermullu Ataatsimiisitaliaaq
tusarniaanermi akissutigineqartut nuutinnerinik pissarsivoq, Ataatsimiisitaliap
aallarniutigalugu oqaatigissavaa siunnersuut matumani pineqartoq
Peqqinnissaqarfimmi ilinniartitaanertigut pisariaqartitat
misissuiffigineqarnerisa malitsigisaattut inernerunera Ataatsimiisitaliamit
iluarisimaarneqartoq. Ataatsimiisitaliap maluginiarpaa siunnersuummik
allannguutit pingarnersarigaat peqqinnissamut ikiortitut ilinniartitaanermut
tunngasoq peqqussutissamit peerneqarmat, aamma Peqqissaasutut
ilinniartunngorniarluni tiguneqarnissamut piumasaqaatit ilinniagaqarfiup
tamarmi pitsaassusia qaffatsikkumallugu sakkortusineqassasut.
Ataatsimiisitaliap pingaartutut isigaa peqqinnissamut tunngasutigut ilinniartitaanerit
pitsaassutsimikkut ippinnaateqartuusariaqanngitsut taamaammallu
Ataatsimiisitaliap isumaqatigiittup taamatut allanngortitsiniarneq tamakkiisoq
isumaqatigaa.
Siunnersuutip
siullermeerneqarnerani siunissami peqqinnissamut ikiortitut ilinniartitaaneq
ataatsimiisitaliap isumaa malillugu pingaartinneqarpallaarpoq taamaammallu
tamatuma malittaatut ataatsimiisitaliamit Kultureqarnermut,
Ilinniartitaaermullu Ilisimatusarnermullu Naalakkersuisumut tamanna
tunngavilersoqquneqarluni. Ulloq 13. oktober 1999 isumasioqatigiinnermi
Naalakkersuisup nassuiaatigaa Peqqinnissamut ikiortitut ilinniartitanerup
pingaartinneqarneranut pissutaasoq peqqussutissatut siunnersuutip suliarinera
ilaatigut aamma tikillugu Peqqinnissamut Ikiortitutt ilinniartitaanerup atorneqartup
atorunnaarsinneqarnissaa Peqqinnissamillu Ikiortitut ilinniartitaanerup nutaap
pilersinneqarnissaa siunertaralugu peqqusssutissatut siunnersuut
suliarineqartoq taamaaliornerlu inuussutissarsiutinut ilinniartitaanerit
inuussutissarsiutinillu pikkorissartitsisarnerit pillugit peqqussummik
tunngaveqarluni.
Ataatsimiisitaliap
isumaqatigiittup Naalakkersuisup nassuiaataa tusaatissatut tiguaa oqaatigalugu
Peqqinnissamut Ikiortitut ilinniartitaaneq pillugu nalunaarummik suliaqarneq
pillugu Ataatsimiisitaliap ingerlaavartumik ilisimatinneqartarnissaa
kissaatiginartoq. Siunnersuummik suliaqarnermini Ataatsimiisitaliap
ilanngullugu oqaluuseraa peqqinnissamut tunngasunik sulianut ilinniartitaanerit
peqqinnissaqarfimmi pisariaqartitavinnut sanilliullugit ingerlaavartumik
iluarsiivigineqartarnissaat naleqqussarneqartarnissaalu pisariaqassusiat.
Taamaammat ataatsimiisitaliap Inatsisartut Peqqinnissamut Ataatsimiisitaliaat
qinnuigaa peqqissaasut peqqinnissamut ikiortitut ilinniartitaanermut aammalu
isumaginninnermut peqqinnissamullu ikiortitut ilinniartitaanerit
ataasiakkaarlugit piareersaasiorneqarnerini Peqqinnissaqarfimmi
pisariaqartitavinnut qanoq naapertuutsiginersut misissoqqullugu.
Ataatsimiititaliattaaq Peqqinnissamut Ataatsimiititaliaq qinnuigaa peqqinnissamik
siammarsaasut ilinniartinneqarnerat atorunnaarsinneqarnerat napparsimavimmi
ajornartorsiutinik sunik pilersitsimanersoq misissoqqulugu.
Naggasiullugu ataatsimiisitaliap
isumaqatigiittup Kultureqarnermut, Ilinniartitaaermut Ilisimatusarnermullu
Naalakkersuisoq kaammattorumavaa oqaasileriffik peqqinnissaqarfimmilu
sulisorisat suleqatigalugit peqqinnissaqarfimmi atorfiit ilinniartitaanerillu
assigiinngitut erseqqissumik taaguuteqarlersinneqarnissaat siunertaralugu
taaguutinut nalunaarsuiffilioqqullugu.
Taamatut oqaaseqarluta
Kultureqarnermut Ilinniartitaaermullu Ataatsimiisitaliaaq isumaqatigiittoq
inassuteqarpoq peqqissaasutut ilinniartitaaneq pillugu Inatsisartut
peqqussutissaattut siunnersuut Inatsisartut akuersissutigissagaat.
Lise Skifte Lennert, Kultureqarnermut, Ilinniartitaanermut
Ilisimatusarnermullu Naalakkersuisoq, Siumut:
Kultureqarnermut
Ilinniartitaaermullu Ataatsimiisitaliap peqqissaasutut ilinniartitaaneq pillugu
Inatsisartut peqqussutissaattut siunnersuummik sukumiisumik suliaqarsiamanera
Naalakkersuisut iluarisimaarpaat.
Peqqinnissamut Ikiortitut
Iliniartitaaneq pillugu Nalunaarutip suliarineqarnera pillugu ingerlaavartumik
ilisimatinneqartarnissaminik Ataatsimiititaliap piumasaqarnera Naalakkersuisut
malinniarpaat.
Peqqinnissamut tunngasuni
atorfiit iliniartiaanerillu taaguutaasa assigiinngitsut
paasiuminarnerulersinneqarnissaat siunertaralugu taaguutit allattorsimaffiannik
pilersitsisoqarnissaannik ataatsimiititaliap kaammattuuteqarnera
Naalakkersuisut aamma malilersaarpaat.
Siunnersuutip Inatsisartunik
akuerineqarnisaa ataatsimiisitaliap inassuteqaatigimmagu annertunerusumik
oqaaseqaateqaratik siunnersuutip massakkutut isikkoqarluni
pingajussaaneerneqarnissaminut ingerlateqqinneqarnissaa Naalakkersuisut
inassutigaat.
Ruth Heilmann, Siumut:
siunnersuutip taamatut
isikkoqarluni pingajussaaneerneqarnissaa isumaqataaffigissavarput.
Augusta Salling, Atassut:
Peqqissaasutut ilinniartitaaneq
pillugu Inatsisartut peqqussutissaattut siunnersuut.
Siunnersuutip
siullermeerneqarnerani Atassutip assut maluginiarsimavaa Naalakkersuisup
Peqqissaasutut ilinniartitaaneq pillugu, peqqussutissatut siunnersuut
saqqummiukkamiuk Peqqinnissamut Ikiortit ilinniartitaanerat annerusumik
nassuiaateqarfigalugulu sammigaa. Taamaattumik Atassutip siullermeerinninnermi
napparsimaveqarfiup iluani sulisunik pisariaqartitanik iliniartitsinissamut
periarfissat naammaginarnersut annertuumik sammivai naggataagullu
qinnutigigaluarlugu peqqussutissap aappassaaneerneqannginnerani Peqqinnissamut
Ataatsimiitsitaliamut ingerlateqqinneqarnissaa. Ilinniartitsinissamut
periarfissat ilumut naammaginarnersut misissoqqullugit. Tamannali
amerlanerussuteqartunit itigartinneqarpoq, massakkullu paasivarput
Kultureqarnermut Ilinniartitaaermullu Ataatsimiisitaliaap Inatsisartuni
Peqqinnissamut Ataatsimiititaliaq qinnuigisimagaa apeqqut tamannarpiaq
sammeqqullugu, tamanna Atassummiit qamannga pisumik qutsatigaarput.
Kultureqarnermut
Ilinniartitaaermullu Ataatsimiisitaliaap isumaliutissiissutaatigut
takusinnaavarput Ataatsimiisitaliap peqqussutissaq sukumiisumik misissorlugulu
oqallisigisimagaa inassutigalugulu Inatsisartunik akuerineqassasoq.
Atassummiillu siullermeerinninnermi taperserlugu oqaaseqarnerput
innersuussutigalugu matumuunalu peqqussutissatut siunnersuutip massakkutut isikkoqarluni
pingajussaaneerneqarnissaminut ingerlateqqinneqarnissaa
taaseqataaffigissavarput.
Paninnguaq Olsen, Inuit Ataqatigiit oqaaseqartua:
Inuit Ataqatigiit
takisuuliunngikkaluarluta matumuuna nalunaarutigiinnassavarput Kultureqarnermut
Ilinniartitaaermullu Ataatsimiisitaliap isumaliutissiissutaa ersarissoq
Ataatsimiititaliamilu ataatsimoorfiusoq iluarisimaaratsigu. Taamatuttaarlu
Kultureqarnermut, Ilinniartitaaermut Ilisimatusarnermullu Naalakkersuisup
akuersaartumik akissuteqaqqinera tusaatissatut aamma iluarisimaaratsigu.
Taamaattumik oqaatigiinnassavara
siunnersuutip massakkutut isikkoqarluni pingajussaaneerneqarnissaminut
ingerlateqqinneqarnissaa akuersaarlugu taaseqataaffigissagatsigu.
Mogens Kleist, Kattusseqatigiit oqaaseqartua:
Peqqissaasutut ilinniartitaaneq
pillugu Inatsisartut Peqqussutissaattut siunnersuummut Kattusseqatigiinniit
imatut oqaaseqaateqassaagut pingajussaaneerneqannginnerani.
Kultureqarnermut,
Ilinniartitaanermut Ilisimatusarnermullu Ataatsimiisitaliap isumaliutissiissutaa
saqqummiunneqarnerani nuannaarutigaarput Peqqissaasunngorniarnermi
ilinniarnerup sukaternera. Kattusseqatigiinniillu Ataatsimiititaliap
innersuuteqarnera tamaat tapersersorlugu suliap pingajussaaneerneqarnissaanut
akuerssarpugut.
Olga Poulsen, Kultureqarnermut Ilinniartitaanermullu
Ataatsimiisitaliap Siulittaasua:
Atassutip oqaaseqartuanut
eqqaasitsissutigilaarniarlugu Kultureqarnermut Ilinniartitaanermullu
Ataatsimiisitaliami ataatsimiikkatta eqqartorparput Peqqinnissaqarfiup iluani
ilinniartitaanerit assigiinngitsut suuneri aammalu qanoq imaqarneri
annertungaatsiartumik eqqartorpagut. Taannalu aallavigalugu Peqqinnissamut
Ataatsimiisitaliamut allakkanik nassiussisimavugut taakkua qanoq
akissuteqarnissaat eqqarsaatigalugu, taannalu Atassutip uani amerlanerussuteqartuni
itigartinneqarsimanermik oqaaseqarnera isumaqarpunga taamaanngilaq
ingerlatitseqqikkatta Peqqinnissamut Ataatsimiisitaliamut Kultureqarnermut
Ilinniartitaanermullu Ataatsimiisitaliamiit.
Augusta Salling, Atassutip oqaaseqartua:
Assortunngilluinnarpara
Ataatsimiititaliami isumaqatigiilluinnarluni taassuma ingerlateqqinneqarnissaa
Peqqinnissami Ataatsimiisitaliami ingerlakkatsigu. Uanilu eqqartorpara
suliarineqarnerani siullermi uani inimi Atassumminngaanniit tamannarpiaq
kissaatigigaluaratsigu, kisisaani Peqqinnissamut Ataatsimiititaliamut
ingerlatinneqarnissaa kissaatigineqannginnami, taannaana Kultureqarnermut
Ilinniartitaanermullu Ataatsimiisitaliap taamatut kissaaterput ingerlatimmagu
qujassutigigipput.
Johan Lund Olsen, Ataatsimiinnermi aqutsisoq, Inuit
Ataqatigiit:
Allanik oqaaseqartussaqanngimmat
taasissaagut, matumani aappassaanerinnittoqarnerani.
Ataatsimiititaliap
inassuteqaatigimmagu siunnersuutip massakkutut isikkoqarluni
pingajussaaneerneqarnissaminut ingerlateqqinneqassasoq tassunga isumaqataasut
nikueqqullugit qinnuigissavakka: 27, najuuttut tamarmik.