Oqaluuserisassani immikkoortoq 82 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 1. november 1999, nal. 14. 34
Ataatsimiinnermik aqutsisoq: Inatsisartut Siulittaasuat Johan Lund Olsen.
Loritha Henriksen, Kattusseqatigiit, apeqquteqartoq:
Qujanaq - soorlu partiit tamarmik allagarsisimasut, Arnat Ilinniarfiannut atatillugu apeqquteqaammik, allakkatigut erserpoq arlaleriarlutik allagaqartarsimagaluarlutik akineqaneq ajorsimasut. Taamatta nalunngilarput Arnat Ilinniarfiat, qanoq kalaallinut arnanut angutinullu pingaaruteqartigalunilu ataqqinaataatigisoq.
Taamaattumik tupiginngilara allagaqartoq, ernummateqarmat tapiissutaasut Arnat Ilinniarfiannut, Knud Rasmussen Højskoleanullu ataatsimut nakkartinneqartalersimappata. Taamaalillutimmi namminneq, qilersorsimanngitsumik pilersaarusiortarneq aamma pikkorissaasarneq, killilerneqartussaammat. Nalunngilarpummi ukiuni 22-ni nunarput tamaat siammasissumi pikkorissaanerit oqallitsitsinerillu Arnallu Ilinniarfianut ajunngitsumik sunniuteqartarsimasut.
Minnerunngitsumillu kalaallisuut ammerineq, akaallinut nerisassat mamartuliallu, saniatigullu aamma nunatta tunniussinnaasaat atorluarneqartarlutik. Taamaattumik piaartumik aaqqiivigineqarnissaat akissuteqarfigineqarnissaallu piumasarivarput, kiisalu paaserusupparput suna tunngaviunersoq, taamatut ataatsimut tapiiffigineqartalernerannut. Neriuppunga sipaarniutit taakuninnga aallaveqassanngitsut.
Lise Skifte Lennert (S), Kultureqarnermut Ilinniartitaanermut Ilisimatusarnermullu Naalakkersuisoq, akissuteqarpoq:
Inatsisartunut Ilaasortap Loritha Henriksen-ip Arnat Ilinniarfiat pillugu apeqqutigisaanut, tunngatillugu makku ilisimatitsissutigisinnaavakka:
Arnat Ilinniarfiat aaqqissuussaanikkut missingersuusiortarnikkullu Knud Rasmussen-ip Højskoleata imminut pigisup ilagaa, taamaattuaannarsimavorlu Arnat Ilinniarfiata pilersinneqarnera-niilli.
Knud Rasmussen Højskolea imminut pigisoq, Namminersornerullutik Oqattussanit 5 million kroonit missaani ukiumut ingerlatsineranut tapiiffigineqartarpoq, højskolep nammineq suliarisartakkaminut assigiinngitsunut agguartagaanik, taamatuttaaq Arnat Ilinniarfiani suliarineqartartunut.
Suliffeqarfik imminut pigisoq, tamatumani pineqarmat Namminersornerullutik Oqartussat højskolep aningaasaataasa, højskolemi qanoq agguaanneqartarnissaat aaliangiiffigisinnaanngilaa. Arnat Ilinniarfiat toqaannartumik sunut atorneqanissaat, aaliangeriikkanik Namminersornerullutik Oqartussanik tapiissuteqarfigineqartassappat, Arnat Ilinniarfiat Knud Rasmussen-ip Ilinniarfianit avissaartinneqartariaqassaaq.
Naalakkersuisut ilisimatitsissutigisinnaavaat maannakkut KIIP-mi pilersaarusiortumik sulisoqarmat, nunatsinni kusanartuliorluni eqqumiitsuliortut ilinniarfiannik pilersitsinissamut periarfissanik misissuinermik.
Pilersaarusiorneq ukioq manna december-ip aallartisimalernerani nalunaarusamik naggaserneqassasoq naatsorsuutigineqarpoq. Nalunaarusiami takkuttussami kaammattuutaajumaartussat siorngereernianngikkaluarlugit naatsorsuutigineqarpoq, Arnat Ilinniarfiat nunatsinni kusarnartuliorlutik eqqumiitsuliortut ilinniartitaalernissaanni pingaaruteqarluinnarluni inissisimassasoq, tamatumalu Arnat Ilinniarfiata aaqqissuussaanikkut missingersuusiortannikkullu allatut inissisimalernissaa kingunerilersinnaalluarpaa.
Arnat Ilinniarfiannit saaffiginnissutit akineqartarsimannginnerannik apeqquteqartup oqaatigisaanut tunngatillugu oqaatigissavara Kultureqarnermut Ilinniartitaanermut Ilisimatusarnermullu Naalakkersuisoqarfik, Arnat Ilinniarfiannit saaffiginnissutinik akineqanngitsunik tigummiaqanngimmat, qujanaq.
Loritha Henriksen, Kattusseqatigiit:
Akissutigineqartut erseqqissut, assorsuaq nuannaarutigaakka aamma taanna allattoq, ukiuni arlalissuarni Arnat Peqatigiinni aallartitsisuulluni, aallartitsisuusimavoq. Taavalu allagaatigut tassa ersersimavoq, nammineerlutik aamma suleqataagaluarlutik allattaraluarlutik akineqarneq ajorsimallutik, taakkulu allagaqarninnut tunngaviusimapput. Kisianni qujanaq taama erseqqitsigisunik akissuteqaravit.
Immikkoortoq 82 naammassivoq.