Oqaluuserisassani immikkoortoq 23-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 20. maj l997 nal. 13.11
Ataatsimiinnermik
aqutsisoq: Inatsisartut Siulittaasuat Jonathan Motzfeldt.
Peter Grĝnvold Samuelsen, Inuussutissarsiornermut, Angallannermut Pilersuinermullu Naalakkersuisoq:
Qaammatit arlallit matuma siornatigut naalakkersuisut sinnerlugit nunarsuaq tamakkerlugu niueqatigiiffinngortup, WTO-p, nunanit tamanit peqataaffigineqartumik ataatsimeeqqaarnerani peqataagama, sammisassaatitaasut amerlagaluaqisut, ingerlaannaq maluginiarpara, peqataasut tamarmik pingaartikkaat, teknikkikkut atortulersuutit atorlugit, inuiaqatigiit paasissutisseeqatigiittarnikkut attaveqaqatigiittarnerisa ineriartortinneqarnera tamatumalu ineriartornerup inuiaqatigiit ineriartortinneqarnerannut nunarsuatsinnilu niueqatigiinnerup siuarsarneqarnissaanut sunniutai. Ilaatigut tamanna erserpoq USA sinnerlugu oqalugiartup ammaalluni oqalugiarnermini oqaatigimmagu, USA-p sunniuteqarsinnaanera tamaat sakkugalugu qularnaarniarlugu teknikkikkut atortulersuutit atorlugit paasissutisseeqatigiittarnerup tungaatigut nioqqutissanik sullissinernillu akornusersoqatigiigani niueqatigiinnerup siuarsarneqarnissaa, nunarsuarmioqatigiit ataatsimeersuarneranni pingaarnerpaatinneqassasoq.
Tamanna tupinnarpallaanngilaq, tassami ullumikkut kikkulluunniit tamarmik akuersaarlugu nassuerutigereersimalermassuk teknikkikkut atortulersuutit atorlugit passissutisseeqatigiittarlunilu attaveqaqatigiinneq, nuarsuarlu tamakkerlugu pissusiviusut qiviaraanni, ullumikkut siuarsarniarneqartut annersarimmassuk. Teknikki atorlugu paasissutisseeriaaseeq nutaaq tamatumalu iluani periarfissat atorlugit sullissinerit iluanaarutaasinnaasut ineriartortinneqarsinnaanerat ullumikkut ima sukkatigisumik siuariartorpilooreersimapput, nunarsuaq tamakkerlugu aningaasatigut ingerlatsinermut qaffakkiartornermullu periarfissat allat tamaasa akimorlugit inissisimalersimalluni.
Tamatuma peqatigisaanik teknologi kikkut tamarmik inuunerata pitsaanerulernissaanut periar-fissanik arlalinnik ammaassivoq, tamatumanili malugisariaqarluni eqqortumik atorneqarpat aatsaat tamanna anguneqarsinnaammat. Nunarsuarput tamakkerlugu qanoq sunillu pisoqarneranik paasisaqarnissamut taamalu nunarsuarput tamakkerlugu paasissutissatigut ineriartornermut tamatta peqataaffigisinnaasatsinnik ineriartortitsineq ullumikkut periarfissaalersimavoq piviusoq. Innuttaasut ataasiakkaat pisortallu sullissiviisa akornanni sukkanerusumik tateqarnerusumillu attaveqatigiinnissamut periarfissaqarnissaq qulakkeerneqarsimalerpoq.
Nunat nunarsuatta ungalliunerusuni inissisimasut annertunerusumik pitsaanerusumillu sullin-neqarsinnaanerat qulakkeerneqareersimalerpoq. Inuit ataasiakkaat najugaqarfigisaminni piffissap nikinganera pissutigalugu avissaaruteqaraluartut tamakkiisumik imminnut attaveqatigiissin-naanerat qulakkeerneqareersimalerpoq. Inuiaqatigiit pisussaaffigaat qulakkiissallugu inuit ataasiakkaat ineriartornermik tamatuminnga iluaquteqalernissaat, akornuteqanngitsumillu paasissutissanik pissarsisinnaanissaat, paasissutisseeqatigiissinnaanissaallu.
Taamaattumik nunatsinni teknikkikkut atortulersuutit atorlugit paasissutissiisarnikkut anguniagassarput pingaarnerpaaq tassaasariaqarpoq ineriartornermik tamatuminnga atorluaanissarput innuttaasullu sumiluunnit najugaqarsinnaanerannik naalakkersuinikkut anguniakkanik ikorfartuutaanissaa. Teknologi nutaaq tamanna soorunami teknologimut tunngasut allat assigalugit aamma arlalinnik aarlerinarsinnaasunik mianersorfissartaqarpoq, qarsupiinnarlugit qaangiin-nartariaqanngitsunik tassami teknikkikkut atortulersuutit atorlugit paasissutissiisarnerup inoqutigiit ataasiakkaat allaat ilanngullugit siammarneqarsinnaalerneratigut inatsisit inunnut ataasiakkaanut illersuutissat inuiaqatigiit ukiut ingerlanerini suliarisarsimasaat saneqquataarnissaannut periarfissaqalersussaavoq.
Niuernermi atuisartut ataasiakkaat inatsisaatsuliorfigineqarsinnaanerat aarlerigineqarsinnaavoq, aammalu naalagaaffiup innuttaasunik ataasiakkaanik killeqanngitsumik nakkutiginnissinnaalernissaa aarleqqutigineqarsinnaalluni. Tamatumanissaaq inuiaqatigiit pisussaaffigaat, nakkuti-ginnilluarnissaq innuttaasullu inatsisit paasissutisseeqatigiittarnikkuttaaq aqutsissutaasut atorlugit illersorneqarnissaat. Teknikkikkut atortulersuutit atorlugit paasissutisseeqatigiittarneq demokratimut innuttaasullu sunniuteqaqataanissaannut ikorfartuutaassaaq tamatumalu peqati-gisaanik teknikkikkut atortulersuutit atorlugit paasissutisseeqatigiittarnerup ineriartornerani innuttaasut illersorneqarnissaat qulakkeertariaqarpoq.
Kiisalu teknikkikkut atortulersuutit atorlugit paasissutisseeqatigiittarnermut tunngatillugu teknologip sallinngoriartuinnarnerata nassataasa aarlerinartut ilagaat inuiaqatigiit nuimanernut tassa A-holdinut suunnginnerusunullu B-holdinut avissaartoortinneqarsinnaanerat. Tassalu nuimanerit teknologimik nutaamik atuilluarsinnaasut taamalu tamatuma iluaqutissartaasa atorluarnerisigut imminnut sallinngortissinnaasut taavalu suunnginnerusut taamaqataanik peqataanissamut periarfissaqaratik teknologip tamatuma ineriartornerani isiginnaartuuinnalersinnaasut. Tamatumanissaaq inuiaqatigiit akisussaaffigaat qulakkiissallugu innuttaasut tamarmik ineriartornermut nutaamut peqataanissaat ilaatigut teknikkikkut atortulersuutit atorlugit paasis-sutisseeqatigiittarnerup atornissaanut inuit ataasiakkaat ikorfartornerisigut ilinniartitaanermi sullivinni sunngiffimmilu.
Tamatuma peqatigisaanik teknologi taanna ineriartortinneqartariaqarpoq inuiaqatigiit sanngiinnerusut ikorfartorneqarnissaat ilinniartitaanerisalu nukittorsarneqarnissaat siunertaralugit. Inuussutissarsiutinik ingerlatsinerup tungaatigut ineriartortitsinermi qangali paasineqarlunilu nassuerutigineqareersimalerpoq pisariaqarluinnartoq teknikkikkut atortulersuutit atorlugit paasissutisseeqatigiittarnerup ineriartornermik atuinissamut ilisimasaqarluarnissaq iluaqutiginiarlugulu atorluarneqarnissaa nammineq nunagisamiinnaanngitsoq aammali nunarsuaq tamakkerlugu niuernikkut unammillersinnaassagaanni.
Tamatuma peqatigisaanik teknologi taanna atorlugu inuussutissarsiutinik ingerlatsisut piaarnerpaamik sukkasuumillu nunarsuaq tamakkerlugu paasissutissarsinissamut nioqqutissanillu tuniniaanissamut imaannaanngilluinnartunik periarfissaqalerput siornatigut takorloorneqarsinnaasimanngitsunilluunniit. Aammattaaq teknologi tamanna periarfissaqalersitsivoq nunat kil-leqarfii aporfiginagit nutaarluinnarmik suleqatigiilernissamut, taamaalilluni suliffeqarfiup ilaani paasisimaqqissaakkat ineriartortinneqarsimasut imaaliallaannaq immikkoortortanut allanut tamanut nuunneqarsinnaalerlutik sumi najugarneq aporfiginagu. Assilissat manissuinnaanatik annertussuseq tamaat ilanngullugu takutitsisinnaasut ineriartortinneqarneranni paasissutissanik allanut ingerlatitseqqinnissamut, siulersuinermi ilitsersuinissamut teknikkilu atorlugu takussutissiinissamut maanna periarfissanngoreersimasunut aporfituanngorpoq takorluuisinnaasutsip qanoq inerisimatiginera.
Kalaallit Nunarput immikkut eqqarsaatigalugu imaattariaqassaaq pasissutisseeqatigiittarnikkut teknologi aaqqissuuneqartariaqartoq annikillisarniarlugit inuussutissarsiutinik ineriartortitsiniarnermi aporfiugajunnerpaasut nunap ilaani sumiinnermut, sulinermut nalinginnaasumillu niuernermut tunngasut. Tamatuma pissuseqataanik paasissutisseeqatigiittarnikkut teknologi pisortat ingerlatsiviini ilaatinneqalersariaqarpoq, assersuutigalugu peqqinnissaqarfimmi, taamaaliornikkut sumi najugaqarfeqarnerup kingunerusaanik aporfiusarsimasut nungusarniarlugit.
Teknikkikkut atortulersuutit atorlugit paasissutisseeqatigiittarnikkut ineriartoneq nunarsuarput tamakkerlugu ingerlasuuvoq tuluit oqaasii aallaavigalugit. Aammalu piorsarsimassutsikkut tunngavigisaa qiviassagaanni manna tikillugu nunat killiit tunngavigisaannit simersimaneqarnerpaajuvoq. Kisiannili paasissutisseeqatigiittarnermut tunngatillugu teknikkip pitsaaqutigilluinnagaasa ilagaat kikkut tamarmik ilanngukkusutatik namminneq pisariaqartitsinertik naapertorlugu ilanngussorsinnaagamikkit qanoq iliussallutik nalunngikkunikku. Aammattaaq suliffeqarfiup nammineq iluani allanullumi avataaniittunut oqariartuutit pitsaanerusumik kimeqarnerusumillu ingerlateqqinneqarsinnaapput.
Pingaaruteqarluinnartuuvoq nunatsinni allamiut oqaasiinit nunallu allat piorsarsimassutsikkut isiginneriaasiaannit teknologi aqqutigalugu ipitinneqannginnissarput. Ineriartortittariaqarlerpagut immiullugillu nammineq atugassatsitut suliariniakkagut nalunaarsorlugit nammineq naliliisarnerput kissaatigisagullu aallaavigalugit. Qulakkeertariaqarparput tamakkua paasissutisseeqatigiittarnermut tamarmiusumut ilanngunneqarnissaat maani nunatsinni nunanilu allani takoriaannan-ngorlugit. Tassalu naatsumik oqaatigalugu teknikkikkut atortulersuutit atorlugit paasissutisseeqatigiittarneq piorsarsimassutsikkut politikkitsinnut akuliutivittariaqarparput piorsarsimassutsikkut oqaatsitigullu nammineerluta pingaartitatta nukittorsarnissaannut sakkussatut kimittuutut.
Tamatumunnga atatillugu pingaarluinnartuuvoq teknikkikkut atortulersuutit atorlugit paasissutisseeqatigiittarnerup ineriartornerata nunatsinni atuartitsinermi sapinngisamik piaarnerpaamik tamakkiisumik akuulersinneqarnissaa. Taamatulli pingaartigaartaaq nunatsinni maani innuttaasut tamarmik teknologimik tamatuminnga paasisimasaqalernissaata periarfissiuunissaa. Ineriartonermi tamatumanik pisariaqartut ilaannanngiuluuniit taassagutsigit makku taasinnaavagut, nutaamik ilinniartitseqqinnissaq, teknoligimi atugassanik pisiortornissaq, teknologimik aqutsinissaq, ilinniartitsisussanik teknikerinillu ingerlatsisussanik ilinnartitsinissaq, atortorissaarutinik nutaanik pisaartornissaq, suliniutiginiakkat ineriartortinneqarnissaat, Tele atorlugu nunarsuarmut tamarmut attaveqarsinnaalernissaa, Ineriartornissamut periarfissat nutarteriuarnissallu tapiffigiuarneqarnissaat.
Tamakkua tamarmik ingerlattariaqarput naatsorsuutigisassat eqqarsaatigilluareerlugit aningaasatigullu qulaajagassat qulaajarluareerlugit.
Tassami teknologi nutaaq taanna politikkikkut kukkuluttorfigineqarsinnaasut annerpaat ilagaat. Taamaattumik pingaarluinnartuuvoq teknikkikkut atortulersuutit atorlugit paasissutisseeqatigiittarnerup ineriartorneranut ilanngutinnginnissarput nuannaartorinermit peqataarusuinnarluta. Ilisimareertariaqarparput suniarnerluta, tamatumalu kingorna misissortariaqarpagut teknikkikkut periarfissat aningaasalersuinissamullu pisariaqartitsineq. Tamatumanilu pingaaruteqarpoq pisortat suliffeqarfiisa ataasiaakkaat namminiiginnavillutik aallarteqattaannginnissaat, taamaattumik qitiusumik ineriartornerup sumiiffinnilu assigiinngitsuni ineriartornerup ataqatigiinnerat ataatsimut isiginiarneqartariaqarpoq. Naalakkersuinikkumi suut aningaasaliiffigissallugit aala-jangerniarnitsinni kukkuluttuutaasinnaasut sipaarutaasinnaasullu milliunnerpassuarnik naleqarsinnaammata.
Taamaattumik Naalakkersuisut 1995-mi immikkut nunatsinni suleqatigiissitaliorsimapput teknikkikkut atortulersuutit atorlugit paasissutisseeqatigiittarnikkut siunissami periarfissat sumullu killeqarumaarneri qulaajarneqarnissaat siunertaralugu. Tamatumani siunertaasimavoq teknikkikkut atortulersuutit atorlugit paasissutisseeqatigiittarneq pillugu naalakkersuinikkut ukiuni qaninnerpaani suliniutissanut tamakkiisunut pilersaarusionissap ataatsimoortumik takus-sutissiornissaa.
Nassuiaat saqqummiunneqartoq tassaavoq ingerlatsinerup marlunnik immikkoortortaqartup immikkoortua siulleq. Tassalu nassuiaat tassaanerpaavoq nalunaarummut annertoqisumut - Kalaallit Nunaat inuiaqatigiillu paasissutisseeqatigiinnermik tunngaveqartut - Naalakkersuisut december 1996-mi suleqatigiissitamiit tigusimasaannut pulariarfissaq. Nalunaarutip taassuma kalaallisuunngorlugu suliarineqarnera maanna ingerlanneqarpoq.
Nassuiaammi saqqummiunneqarput teknikkikkut periarfissat ataatsimut isigalugit, tamatumalu kingunerisaanik nutaamik ineriartornissamut periarfissarpaassuit suleqartigiissitap nalunaarutaanni takuneqarsinnaasut. Nalunaarusiami inassutigineqartunut atatillugu nassuiaammi aalaja-ngersarniarneqanngilaq naalakkersuinikkut qanoq suleriarnissamut tulleriaarisoqarnissaanik.
Tamatumunnga patsisaavoq Naalakkersuisut pingaartimmassuk matumani pineqartoq pingaaruteqaqisoq imaannangitsorlu ineriartornermi ingerlaqqinnissami tunngavissat ilaattut isigisariaqartoq, tamatumanilu Inatsartut tamarmiusut periarfissaartariaqartut sammineqartumut tamatumun-nga tunngasut misissorluarnissaannut siunissamilu teknikkimut allaffitsigullu aqutsinermut tunngasutigut aallarnerneqartussat pillugit naalakkersuinikkut kissaatigisat sukumiisumik nalilersuilluarnissamut. Tamatuma peqatigisaanik Inatsisartuni ilaasortaasugut naammattumik piriarfissaqartaraqarpugut ataatsimut isigalugu ineriartorneq maani pineqartoq sanilliutissallu- gu siunnersuutinut paasissutisseeqatigiittarneq ilinniartitaanerlu pillugit Kultureqarnermut, Ilinniartitaanermut Ilageeqarnermullu Pisortaqarfimmiit Inatsisartut ataatsimiinneranni matumani saqqummiunneqartussanut.
Taamaattumik Naalakkersuisut suliap immikkoortuatut tullertut pilersaarutigaat ukiamut Inatsisartut ataatsimiinissaannut nutaamik nuassuiaasiornissartik tassani naalakkersuinikkut tulleriiaarinissat imarisassaat timitalimmillu suliniutissat sammineqarnerussallutik aningaasatigut kungunerisassai pillugit qulaajaanerit ilanngullugit.
Tamatuma saniatigut Naalakkersuisut pilersaarutigaat ukiamut Inatsisartut ataatsimiinnissaat sioqqullugu teknikkikkut atortulersuutit atorlugit paasissutisseeqatigiittarnikkut ineriartorneq pillugu immikkut isumasioqatigiissitsinissaq, tassa tassani nalunaarummi inerniliinerit oqaluuserineqarsinnaassammata aammalu pingaarneriuilluni tulleriiaarinissaq pillugu naalakkersuinikkut eqqarsaatit oqaluuserineqarsinnaassallutik, taamaalilluni tamakku tunngavigalugit Naalakkersuisut paasissutisseeqatigiittarneq pillugu siunissami anguniagassanik siunnersuuteqarnissa-minnut pitsaanerpaamik tunngavissaqaleqqullugit.
Teknikkikkut atortulersuutit atorlugit paasissutisseeqatigiittarnerup ineriartorneranut tunngatillugu uagut naalakkersuinikkut suliaqartugut immaqa qangarnit sakkortunerusumik qulakkeertariaqarunarparput suna akueriumaarnerlugu sunillu kinguneqarumaarnersoq. Taamaattumik aalaja-ngiussaqartinnata tunngavissagut eqqortuusariaqarput sukumiisuullutillu.
Tamanna imatut paasineqassanngilaq Naalakkersuisut isumaqartut suleqatigiissitap nalunaarutaata inernerisa ilaannaalluunniit maannarpiaq suiniuteqalernissamut tunngaviussanngitsut. Nalunaarutip immikkoortua teknikkikkut atortulersuutit atorlugit paasissutisseeqatigiittarnerup ineriartortinneqarneranut innuttaasullu inatsisitigut illersorneqarnissaannut tunngasoq tunngavigalugu Naalakkersuisut aalajangereersimapput - Danmark-imi ministereqarfiit tamakkuninnga suliallit piumappata suleqatigigalugit - innuttaasut inatsisitigut illersorneqarnissaat qulaajarneqarluni ingerlaannaq aallartinneqassinnaasoq. Tassami teknikkikkut atortulersuutit atorlugit paasissutisseeqatigiittarneq nunatsinnuttaaq anngutereersimavoq qulakkeertariaqarparpullu inatsisitta tamatumunnga naleqqussagaanissaat.
Pilersaarutigaara tamanna Ilisimatusarnermut ministerimut Jytte Hilden- mut oqaloqatiginnissutiginiarlugu qaammammi tullermi pisortatigoortumik tikeraarnera iluatsillugu.
Tamatuma saniatigut Naalakkersuisut aalajangiuppaat teknikkikkut atortulersuutit atorlugit paasissutisseeqatigiittarnerup tungaatigut nunatsinni ineriartoqqinnissamut tunngatillugu immikkut ilisimasallit pissarsiarisinnaasagut tamaasa atortariaqarigut, taamaattumillu Naalakkersuisut misissorpaat siunnersuisussamik suleqatigiisitaliornissaq. Taassuma suliarissavaa qulaajaaqataassalluni makkunatigut, Ineriartortitsinissamut eqqarsaatit, ineriartortitsinissamut periarfissat ineriartotitsinerullu nunatsinnut kingunerisassaasa nalilersornissaat suleqatigiisitap qulakkeerniartussaassaavai. Naalakkersuisut kissaatigaat teknikkikkut atortulersuutit atorlugit paasissutisseeqatigiittarneq pillugu immikkut nunatsinni ilisimasaqaqqissaartunik inuttalimmik pilersitsorqarnissaa, taamaalilluni aamma pisariaqarnera naapertorlugu nunani allani immikkut paasisimalersimasat misilittagarilersimasallu iluaqutigineqarsinnaaqqullugit.
Siunissami teknikkikkut atortulersuutit atorlugit paasissutisseeqatigiittarnermut anguniagassat ineriartortitsuarnissaat immikkoortortaqarfiillu ataasiakkaat ineriartortsitsinissamut kissaatigisaasa ataqatigiissuunissaat anguniarlugu Naalakkersuisut kissaatiginartippaat Namminersornerullutik Oqartussat Pisortaqarfii piginnaassuseqarnerulernissaat teknikkikkut atortulersuutit atorlugit paasissutisseeqatigiittarnikkut ineriartortitsinermik ingerlatsisinnaanngortillugit tamatumunngalu ilanngullugu suleqatigiinnut siunnersuisussanut siusinnerusukkut taaneqareersunut allaffeqarffiusinnaanissaat. Tamatumunnga atatillugu Naalakkersuisut teknikkikkut atortulersuutit atorlugit paasissutisseeqatigiittarnermut tunngasutigut ataqatigiiaarisussamik atorfinitsitsiniarput Inuussutissarsiornermut, Angallannermut Pilersuinermullu Naalakkersuisoqarfimmi sulisussamik. Atorfik taanna aamma atorneqarsinnaassaaq teknikkikkut ineriartornerup nalilersornissaanut, aammalu nalilersussallugu sukkut iluaqutaassuseqassanersoq nunatsinnissaaq Tele-mut tunngasut namminersortunut ingerlatassangortinneqassagaluarpata.
Kiisalu Naalakkersuisut tikkuareerumavaat siunissami, nunatsinni ilisimatusarnerup ilinniartitaanerullu ineriartortinneqarneranut atatillugu, teknikkikkut atortulersuutit atorlugit paasissuteqatigiittarneq pillugu ilisimasanut tamatumalu ineriartorinneqarnissaanut qitiusumik inerisaavimmik pilersitsinissaq pisariaqalissaammat. Namminerisatsinnik qitiusumik teknikkikkut atortulersuutit atorlugit paasissutissiisarnermut inerisavimmik pilersititsinikkut qulakkeersinnaassavarput nunatta nunarsuaq tamakkerlugu ineriartupiloornermut malinnaatinneqartuarnissaa aammalu tamatuma tungaatigut kalaallit namminneq sanaaminnik ilisimallualikkaminnillu ineriartortitsinissaat, pisortat namminersortullu suliffeqarfiisa iluaqutigisinnaasaannik. Tassami saneqqunneqarsinnaanngivissumik pisariaqarpoq nunatta ineriartonermi tamatumani katataanngilluinnarnissaa.
Tamatuma peqatigisaanik aamma paasissutisseeqatigiittarnikkut teknologi-ip nukittoqutaasa ilagaat nunat ataasiakkaat tamarmik immikkut ataasiakkaarlutik suut tamaasa naqqaniit nassaariniartariaqanngimmatigit. Nunarsuaq tamakkerlugu seqernup qinngornerisa sukkaqataannik paasissutissanik ingerlatitseqqissinnaaneq ajornarunnaareersimalerpoq, uagullu qulakkeertariaqarparput maani nunatsinni paasissutissanik tamakkuninnga tigooraaveqarnissaq, immikkoortiteriveqarnissaq avammullu ingerlatitseqqitsiveqarnissaq. Taamaattumik Naalakkersuisut qu-laajartinniarpaat taamatut qitiusumik inerisaavimmik pilersitsisoqarnissaa ingerlatsisoqarsinnaanissaalu.
Naalakkersuisut immini anguniakkatut isigaat teknikkikkut atortulersuutit atorlugit paasissutisseeqatigiittarnerup ineriartornera ikorfartuutaasinnaassasoq Naalakkersuisut kissaatigisaannut, tassalu pisortatigut ingerlassinerup ammasumik paasilersotuminarnerusumillu ingerlalernissaanut.
Suliassaq tamanna aalartinneqareerpoq sulilu ineriartortinneqartuarluni Naalakkersuisut ataatsimut isigaluguanguniangarimmassuk innuttaasut pitsaanerusumik paasissutissinneqartarnissaat. Naa-lakkersuisut ineriartortitsineq tamanna kippunngagu ingerlappaat, tamatumuunalu naqissuserumallugu teknikkikkut atortulersuutit atorlugit paasissutisseeqatigiittarneq pillugu anguniakkat kingusinnerusukkut sumulluunniit sammivilissagaluartutsigit teknologi nutaaq tamanna atorneqassammat innutaasunut ataasiakkaanut iluaqutaalernissaa salliutillugu, taamaalilluta tamatta teknikkikkut atortulersuutit atorlugit paasissutissarsiornissamut paasissutisseeqatigiittarnissamullu akornuteqanngitsumik periarfissaqarlersilluta.
Taamatut oqaaseqarlunga paasissutisseeqatigiittarnikkut pillugu nassuiaat Naalakersuisut sinnerlugit Inatsisartunut saqqummiuppara kamagittartumik oqasuuserillaqullugu.
Karl Lyberth, Siumup oqaaseqartua:
Kalaallit inuiaat ikittunnguulluta
nunami taamak angitigisumi najugaqartuulluta teknikkikkut atorulersuutit
atorlugit paasissutissiisarnissamik nunarsuarmi pisariaqartitsinerpaanut
ilaavugut.
Nunatta annertussusia
eqqarsaatigalugu, inuillu sinerissami qanoq siuarsimatiginerput eqqarsaatigalugu
teknikkikkut atortulersuutit atorlugit immitsinnut paasissutissittarnissarput
naleqqulluinnartuuvoq pinngitsoorneqarsinnaananilu.
Atortulersuutinut nutaanut
takkuttunut malinnaajuarnissarput pinngaaruteqartuuvoq pisariaqarluinnarlunilu.
Uanili pingaaruteqarnerpaaq eqqaammajuagassarpullu unaavoq, ineriartornermut
sukkaqisumut aqunneqalissannginnatta, kisiannili uagut nammineq aqussagatsigu
teknikkikkut atortulersuutit suut atussanerlugit - sumut atussanerlugit - qanorlu atussanerlugit.
Atortorissaarutit nutaat
takkussortut eqqortumik atorluarutsigit tamatsinnut annertuumik iluaqutaanissaat
qularutissaanngilaq. Uanili ineriartornermi sukkaqisumi alaatsinaatassatta
ilagivaat periarfissat nutaat, atorulersuutillu nutaat tamaasa nunatsinnut
naleqquttuunersut annerusumik nalilersoqqaanngivillugit, sunillu
nassataqarnissaat misissorlugaqqaangivillugit nunatsinnut
eqqunnenaveersaassagatsigit.
Taamatuttaaq atortulersuutinik
nutaanik pisissatilluta kukkulluta pisinaveersaarnissarput eqqumaffigilluinnartariaqarparput,
taamaattumik IT pillugu siunnersuisoqatigiiffimmik pilersitsiniissaq
Siumut-miit tapersersorluinnarparput.
Siumumiit pingaartilluinnarlugu
oqaatigissavarput nunatsinni inuup kinaagaluartulluunniit sinerissami
najugaqarfimmi sorlermi najugaqarnissani nammineq aalajangissammagu. Inuup
nammineq aalajangissavaa nunaqarfimmi najugaqassanerluni imaluunniit
illoqarfimmi najugaqassanerluni. Qaqugumulluunniit inuk kinaagaluartorluunniit
pinngatisaalineqanngisaannassaaq, imaluunniit pinngitsaalisaasutut misiginngisaannassaq
najugaqarfimminiit nuuttariaqarlernissamik.
Taamaattumik Siumut-mit
pingaartilluinnarparput inuk sinerissami najugaqarfimmi sumiikkaluartorluunniit
teknikkikkut atortulersuutit atorlugit paasissutissiisarnermik
periarfissinneqarnissaa.
Tassani suliassami Tele Greenland
annertuumik akisissaaffeqarpoq. Periarfissarlu una iluatsillugu Tele Greenland
nersualaanngistoorusunngilarput ersarissumik siunertaqarluni ukiuni qaangiuttuni
suliniuteqarsimaneranik. Tele Greenland-ip pilersaarutai tutsuiginartut
malillugit ukioq 2000 nallertinnagu nunatta inuisa 99 %-ii teknikkikkut
atorulersuutit atorlugit attavigineqarsinnaanissaminnut, imaluunniit nunatta
sinneranut attaveqarsinnaalernissaminnut periarfissinneqarumaarput.
Pilersaarut tamanna Inatsisartut Naalakkersuisullu anguniagaannut
naapertuulluinnartoq iluarisimaarnarpoq nersortariaqarlunilu.
Nunatsinni attaveqaatit pillugit
Inatsisartut Naalakkersuisullu anguniagaasa ilagisamavaat suliffeqarfik Tele naatsorsuutiminik
sinneqartooruteqassagaluaruni sinneqartoorutit attaveqaatini akinut
apparsaatitut atorneqarnissaat.
Anguniagaq tamanna iluatsissimavoq,
allaallumi 1990-ip kingorna akit qaffakkiartorsimanngillat, akerlianillu,
pingaartumik ukiuni kingullerni, malunnaatilimmik appariartorsimallutik.
Uani Siumut-miit pingaartillugu
tassavarput teknikkikkut atortulersuutit atorlugit paasissutissiisarneq
nunatsinni suliffeqarfinnut inunnullu sapinngisamik amerlanerpaanut
iluaqutaassappat, aammalu atorneqalissappat, pingaaruteqarluinnarpoq akit
sapinngisamik appasissut, atuerusuttunut artukkiinngitsut
anguniarneqarnissaat.
Siumut-miit pingaartilluguttaaq
taarusupparput teknikkikkut atortulersuutit atorlugit paasissutissiisarnermi
akit sumiikkaluaraannillunniit assigiittariaqarnerat - imatut paasillugu
isorliusuneruniinneq pissutigiinnarlugu paasissutissiinermut atatillugu
teknikkikkut atortulersuutit atorneri nunatsinni allanut atuisunut
sanilliullugu akisunerussangitsut.
Akit tungaasigut inuiaat kalaaliusugut
ikioqatigiilluta nammaqatigiittariaqarpugut - aamma teknikkikkut
atortulersuutit atorlugit paasissutissiisarneq eqqarsaatigalugu.
Nunatsinni suliffeqarfiit
assigiinngitsut paasissutissiinermut teknikkikkut atortulersuutinik annertuumik
atuisut eqqarsaatigialugit Siumut-miit Naalakkersuisunut nalinersullaqquarput
tamakkua suliffeqarfiit suli ineriartornissaat eqqarsaatigalugu arlaatigut
aningaasartuutimikkut oqilisaaffigineqarnissaat.
Miserratissaanngitsumimmi
suliffeqarfiit amerlasuut pisariaqartitsinertik naapertorulgu attaveqaatinik
assigiinngitsunik, soorlu oqarasuaatinik allakkasuaatinillu, annertuumik
atuisuupput. Suliffeqarfiit tamakkua oqilisaafiiginissaat Siumut-miit
pingaartikkatsigu matumuuna siunnersuutigissavarput suliffeqarfiit pineqartut
qanoq atuitigineri aallaavigalugu akilillisaafigineqalissasut.
Suliffinnik amerlanernik
kissaateqartuarnitsinni nunatsinniitttut suliffeqarfiit pioreersut, nunatta
karsia artukkinngikkaluarlugu, arlaatigut oqilisaaffiginerisigut suliffinnik
amerlanernik pilersitsinissaannut aqqutissiuussinissaq Siumut-miit
periarfissat ilaattut tukkuarusupparput.
Ukioq 2004 nallertinnagu
suliffissaaleqineq annikinnerpaaffissaanut inissinniassagutsigu maan-nangaaq
iliuuseqarnissatsinnik sapiissuseqartariaqarpugut, iliuuserisinnaasattalu
ilagaat nunatsinni suliffiit pioreersut oqilisaaffiginerisigut suli
alliartornissaannik periarfissitsineq.
Qarasaasiat atornerisa
nalinginnaaleraluttuinnarnerisigut, qarasaasiallu atorlugit nunanut allanut
attaveqarnitta annertusiartoruarnerani nunatsinni mianersuutigilluinnagassatta
ilagivaat uagut nammineq kalaallisut oqaatsitta tunulliukkiartuaarneqarnissaa.
Nunatsinni pisortaniit suliassatta pingaarnerit ilagivaat qarasaasiat
aqqutigalugit paasissutissiisarnerni paasissutissat sapinngisamik
amerlanerpaat kalaallisut allassimasut piginissaat, tamannami
eqqumaffiginngikkutsigu kalaallisut oqaatsitta ineriartornerat
unittuuinnararani aamma atorneqarnerisa annikilliartornissaannik
kinguneqarsinnaammat.
Qarasaasiat atorlugit
paasissutissiisarnermi aamma taamatuttaaq pingaaruteqartigaaq qarasaasiatigut
paasissutissani nunatsinnut tunngasut sapinngisamik amerlanerpaat
ilaatinneqarnissaat.
Allarpassuit
taagorneqarsinnaagaluartut uani assersuutitut taaneqarsinnaapput nunatsinni
pisuussutitta ilagilluinnagaat Groenlandica aamma ilanngullugu qarasaasiat
atorlugit misissuataarneqarsinnaanngortinnissaa. Uani nunatsinni najugaqartut
kisimik eqqarsaatigineqanngillat, kisiannili inuit allat nunani allani
najugaqartut aamma soqutiginnissinnaasut periarfissinneqarnissaat aamma
eqqarsaatigineqarpoq.
Qarasaasiat atorlugit avammut
attaveqaatit sukkasoorujussuarmik ullutsinni ineriartortinneqarput,
qularnanngilluinnartumillu piffissami ungaserujussuanngitsumi sineriassuatsinni
inuit ikittuunngitsut, allaammi meeqqat atuartut ilanngullutik, qarasaasiaq
atorlugu nunatta avataanut paasissutissanik pissarsiniartarnerat
nalinginnaasunngorumaarpoq.
Paasissutissat nunatta avataaneersut
qarasaasiat atorlugit pissarsiarineqarsinnaasut amerlanertigut tuliut oqaasii
atorlugit allataagajupput, taamaattumik pingaaruteqarluinnartuuvoq meerartatta
tuluit oqaasiinik atuinissaannik suli annersumik piginnaanngorsarneqarnissaat.
Uanilu periarfissat ilagisinnaavaat meeqqat atuarnerminni tuluit oqaasiinik
ilinniarlutik aallartittarnerisa ukiumik ataatsimik siuartinnissaat, tassa 7.
klasse-miit 6. klasse-mut.
Meeqqat atuarfiini qarasaasiaqarneq
aammalu ungasissumut atuartitsineq immikkoortoq 38, 39-milu imikkut
sammineqartussaammata uani annerusumik saqqummiinianngilagut. Taamaakkaluartorli
pingaartillugu taanngitsoorusunngilarput ungasissumut atuartitsinermut
atatillugu atortut allanit pisariaqartitsisunit aamma atorneqarsinnaaneri
soorunami ammaffigilluinnartariaqaratsigu. Ammassallup kommuneani
misilittaanerup takutippaa nappaateqarlutik peqqiilliortunut misissuinermut
aamma atorneqarsinnaasut, allaallumi aamma sanasunit allanillu inunnit sulinerminni
atortussaminnik nalornisaarfigisaminnik ilitsersuussiffigineqarnissaminnut
piukkunnarluinnartoq atorluarneqarsinnaasarlu paasineqarsismavoq.
Inuit amerlanerpaat
periarfissinnissaat eqqarsaatigalugu Siumut-miit piukkunnartutut taarusupparput
inoqarfinni atuakkanik atorniartarfilinni atorniartarfiit qarasaasianik tamanit
atorneqarsinnaasunik pilersuinissaq. Inoqarfinni atuakkanik
atorniartarfeqanngitsuni atuarfiit atorneqarsinnaanerat aamma
tikkuarusuppparput. Tamakkunani attaveqarnermi qitiuffiusuni inunnik ilitsersuisinnaasumik
pisariaqartitsisoqassammat atorfinitsitsisinissat aamma eqqumaffigalugit
piareersimaffigisariaqarpavut.
Tele-ip kisermaassisutut
ingerlataasa ilaannik namminersortut ingerlatsilersinnaanerat eqqarsaataavoq
soqutiginarlunilu pissanganartoq. Taamaakkaluartorli Siumut-iit
mianersuutigeqqussavarput namminersortunngorsaaneq piinnavillugu
namminersortunngorsaasoqassanngimmat. Nunarput isorartoqaaq, inuillu
ikittunnguuvugut, taamaattumik suliffeqarfinnut ataasiakkaanut, inuillu
ilaannut namminersortunngorsaaneq iluaqutaasinnaagaluartoq annilaanganalaanngitsuunngilaq
inuit ilaasa, pingaartumik isorliunerusut nunaqarfimmiullu
namminersortunngorsaanermi eqqornerliorneqarnissaat, ilaatigut akit
qaffassinnaaneri kiffartuussinerillu ajorseriarsinnaaneri eqqarsaatigalugit.
Taamakkaluartoq Siumut-miit
Naalakkersuisunut inassutigissavarput misissoqqullugu Tele-ip ingerlatai
sorliit tamanut iluaqutaasumik namminersortunik tiguneqarsinnaanersut.
Teknikkikkut atortulersuutit
atorlugit paasissutissiisarnerup ineriartortinnerata kingunerisaanik inuit amerliartuinnartut
pasissutissiisarfinnut assingiinngitsunut isersinnaaneri nalinginnaaleraluttuinnartussaavoq.
Taamaattumik Siumut-miit matumuuna erseqqissaatigissavarput pingaaruteqarluinnarmat,
ilaatigut inuit ataasiakkaat illersorneqarnissaat eqqarsaatigalugu,
qarasaasiatigut ineriartortitsinerup malitsigisaanik inatsisit assigiinngitsut,
soorlu pinerluttoqarnermut inatsit nalunaarsuinermullu inatsit,
nutartertuarnissaat. Taamaaliunngikkuttami qarasaasiatigut periarfissat
aqqutigalugit atornerluisut killilersimaaruminaatsorujussuussammata.
Teknikkikkut atortulersuutit
atorlugit paasissutissiisarneq sammitillugu tusagassiutit eqqaaneqanngitsoorsinnaanngillat.
Uanilu Siumut-miit immikkut taalaarusupparput siunissami ungasissorsuunngistumi
nuna tamakkerlugu aallakaatitsisartut radio-ut marlunngorsinnaaneri.
Tamatta nalunngilarput sinerissami
illoqarfinni radio-ut qujanartumik amerliartorneri. Qularnanngitsumillu
ineriartornerup nassatarissavaa tamakkua suleqatigiillutik nuna tamakkerlugu
aallakaatitsisalerneri. Siumut-mi isumaqarpugut tamanna
ilassilluarneqartariaqartoq, pisariaqassappallu aallarnisarnerini ikiornissaat
ammaffigisariaqarparput, aamma aningaasatigut.
Teknikkikkut atortulersuutit ikiortigalugit
napparsimasut najunngikkaluartlugit nakorsat misissuisinnaanerat (telemedicin)
periarfissaavoq pissanganartoq, ajunngistumillu ineriartortinneqaruni
nunatsinnut naleqqulluartoq. Maannakkullu misilittagaagallartut takutippaat
tamanna nunatsinni iluatsittumik atorluarneqarsinnaasoq siunissaqartorlu,
taamaattumik Siumut-miit pissagalluta aamma malinnaaffigissavarput.
Telemedicin iluaqutaalluassappat pisariaqarluinnarpoq sulisut atuisussat
pitsaanerpaamik atugaqartillugit ilinniartinneqarnissaat, taamaattumik
Siumut-miit ammaffigaarput ilinniartitsinissamut aningaasat naammattut
immikkoortinneqarnissaat.
Pingaartilluguttaaq
oqaatigissavarput pisariaqarluinnarmat teknikkikkut atortuleruutit atorlugit
paasissutissiisarnermi inuit atuisussat atuisartullu ilinniartilluarnissaat
pikkorissartittuarnissaallu. Tamatumani atuarfiit assigiinngitsut ilinnarfiillu
qaffasinnerusut annertuumik akisussaaffeqarput.
Ineriartornerup ilutigisaanik
pikkorissartitsinissamut neqeroorutit pilersittuarnissaat ullutisnni
pingaaruteqarleraluttuinnarput, pingaartumik qarasaasiatigut periarfissat
atornissaat eqqarsaatigalugit. Taamaattumik uagut politikeriusugut
pisussaaffeqarpugut atuarfiit allallu ilinniarfiit, kiisalu
pikkorissartitsiffiit sapinngisamik pitsaanerpaanik atugaqartinnissaat
sulissutgissallugu.
Naggataatigut Siumut-miit
oqaatigissavarput innutaasut suliffeqarfiillu eqqarsaatigalugit
paasissutissiisarneq tamakkuninngalu atuinerup sapingisamik pitsaanerpaamik
ineriartortinnissaa pingaaruteqarluinnartoq, taamaattumik paasissutissiisarneq
atuinerlu pillugit ineriartoritseqataasussamik immikuullarissumik
naalakkersuisoqarfimmik pisortaqarfimmiilluunniit pilersitsinissaq
Naalakkersuisut nalilersullaquarput, isumaqaratta ineriartornerup nunatsinnut
siunissami pingaaruteqalersussap politikkikkut aqunneqarnissaa taamaalilluni
qulakkeerneqarsinnaasoq.
Naggaterpiaatigut Siumut-miit
oqaatigissavarput teknikkikkut atortulersuutit atorlugit paasissutissiisarneq
pillugu nassuiaat assorujussuaq naammagisimaaratsigu. Suliaq annertusimavoq,
qularnanngitsumillu suliarinissaa imaannaasimassanani, taamakkaluartorli
peqqissaarullugu kusartumik suliarineqarsimavoq, siunissamullu sapinngisamik
eqqortumik pilersaarusiornissamut sakkussaalluni pitsaasoq.
Anders Nilsson, Atassutip oqaaseqartua:
Teknikkikkut atortulersuutit
atorlugit paasissutissiisarneq ukiuni makkunaniinnaanngitsoq - qaammatinili
makkunani pilertortumik ineriartorpoq. Qaammatit tamaasa nutaanik pingaaruteqartunik
pilersitsisoqartarpoq. Imaassinnaavoq atortulersuut mikisuararsuaq (microchip)
sukkanerusoq, naqitsineq atorlugu tamanut naleqqussaaneq
(komprimeringsstandard), attaveqaatit sakkortunerusut imaluunniit tamarmik
qanoq ateqaraluarnersut.
Maani Kalaallit Nunnanni Tele
Greenland radio-kkut atassuteqaammik (radiokĉde) digital-inngotitsisimavoq,
tamatuma nassataralugu ineriartornermi uagut siuarsimangaatsialersinerput. Tele
Greenland maanna piareersimavoq - aningaasaliinerit
annertunerpaajunngikkaluartut atorlugit - Tele atorlugu aallakaatitsinermi
piumasaqaatissatut ilimagineqartut qanoq annertuti-ginissaannut
naleqqussaassalluni.
Tele Greenland-ip Naalakkersuisut
suleqatigalugit suliassaasa ilaat tassaavoq akiliisitseriaatsit minutsimut
naatsorsorneqartarneranninngaanniit data-kkut atukkanik naatsorsuisarnermut
allanngortitsinissaq. Tassalu imaappoq - takussaasumik assersuusiorlugu -
siunissami erngup qipisaataaniit imeq maqitaq qanoq annertutigisoq
naapertorlugu akiliisoqartalissalluni, imaan-ngitsoq erngup qipisaataa qanoq
sivisutigisumik ammatinneqarsimanersoq naapertorlugu.
Eqqarsariaallannarpoq ineriartorneq
peqataaffigisarput, tassami IT pillugu suleqatigiissiitap ukioq ataaseq affarlu
matuma siornatigut suliassarititaasut aqqutissiuummagilli qarasaasiat nammineq
pigisat akii affaannanngorsimammata. PC Internet-mut atassuserneqarsinnaasoq
ullumikkut fjernsyn-mit pitsaasumit assiliivimmilluunniit video-liuummit
akisunerunngilaq.
Ukiualunnguit qaangiuppata
inuiaqatigiinni paasissutisseeqatigiittarneq nutaaq imatut sungiunneqarsimatigilissaaq,
ukiuni makkunani paatsiveqanngitsumik tulluusimaarutiginninneq paasineqarsinnaajunnaarsimassalluni.
Tulluusimaarutiginninnerup
ilarujussua aammalu paatsiveerusimaarnerup tamatuma ilamernga IT pillugu
nassuiaammi saqqummiunneqartumi matumani naneqqinneqarsinnaavoq. Oqaatigigasuassavarali
nassuiaat aammattaaq pitsaalluinnartuummat.
Eqqarsariaallannarportaaq
ineriartorneq peqataaffigisarput, tassami maani Kalaallit Nunaanni Internet 1.
januar 1996-mi ammaanneqarmat - IT pillugu suleqatigiissitaq pilersinneqarmalli
qaammatit pingasut qaangiuttut.
Ullumikkut ukioq ataaseq affarlu
qaangiutinngitsiartut inuinnaat 700-it Internet-mut atassusertereersimapput, aammalu
taamatut amerlatigisut suliffeqarfiit anginerusut assigiinngitsut aqqutigalugit
atassusertissimallutik. Kalaallit Nunaat ullumikkut inuiaqatigiinni
paasissutisseeqatigiittarnermi nunarsuaq tamaat eqqarsaatigalugu
sunniuteqarluartunut ilaalereersimavoq.
Ineriartorneq tamanna IT pillugu politikkeqarani pilersimavoq. Ineriartornerullu annertunersaa siunissamissaaq politikkikkut aqunneqanngitsumik ingerlasussaavoq. Aammalumi taamaattussaavoq - suliffeqarfiit amerlanersaat inuinnaallu nammineerusunnerupput aammalumi pitsaanerpaalluni nammineersinnaagunik.
Uagut Inatsisartuni politikkikkut suliassarissavarput suliassaqarfiit killeqarfii, aammalu teknikkikkut oqariataaseq atorlugu maskiinat tigooraaviit, ledning-it atorlugit attaveqarneq, station-it tigusigallartarfiit, qaammataasatigut atassuteqaatit ilaallu ilanngullugit isumannaarniassallugit.
IT pillugu nassuiaammi saqqummiunneqartumi kingullermi nunarsuarmi tamarmi nalunaarasuartarnikkut sullissinerit namminersortunit tigujarttuaarneqarnerat, nalunaarasuartanikkut sullissinermi akit apparnerannik kinguneqarsimasoq. Pissusissamisoorpoq manna matumuuna erseqqissassallugu, nalunaarasuartarnikkut atassuteqaatit sumiifinni arlaqanngitsuinnarni tamakkiisumik namminersortunut isumagisassanngortinneqarsimammata.
Danmark-mi sullissinerit namminersortunit tunniunneqarnissaannut atatillugu akitsuut atulersinneqarpoq nalunaarasuartaatileqatigiiffinnit tamanit akilerneqartartussaq. Akitsuut taanna Tele Danmark-mut akilerneqartarpoq, tamatumalu peqatigisaanik Tele Danmark-ip nalunaarasuartarnermi atassuteqaatit akiisa dansk-it qeqertaararpassuini aammalu sumiiffinni inukinnerusuni naleqquttuunissaat nalinginnaasunnissaallu isumannaarniartussaallugu.
Danmark-mi qeqertararpassuit sumiiffiillu inukinnerusut tamakkua nalunaarasuartaateqarnikkut niuernermut tamarmiusumut naleqqiullugit suunngitsoralannguupput, taamaattumillu akitsuut annertugisassaanani.
Maanili Kalaallit Nunaanni tamanna paarlattorluinnaavoq. Maani nalunaarasuartaaateqarnikkut niuernerup 80 %-ia anguniarneq ajornakusoortutut atuutsinniarneralu akisuutut oqaatigisariaqarpoq. Kalaallit Nunaanni namminersortunut tunniussisinnaagaluarpugut, akitsuulli annertoorujussuannngortussaavoq. Allaat namminersortunut tunniussinissaq pineqalissappat immaqa soqutigineqanngivissalluni.
IT pillugu nassuiaammi takuneqarsinnaasututtaaq Kalaallit Nunaanni nalunaarasuartaateqarnermi maskiinat tigooraaviit siuariartortinneqarluarsimapput atorluarsinnaallutillu. Allilerinissamuttaaq pilersaaruteqartoqarpoq, taamaalilluta nalunaarasuartaateqarnikkut tigooraanerup ukiuni aggersuni annertuserujussuarnissaa akuersaarsinnaallutigu.
Taamaaallat suliassarilissavavut suliassaqarfiit sinaakkutaasa isumannaallisarnissat, siullermik qarasaasialerineq aammalu IT meeqqat atuarfianni klasse-ni minnerpaaninngaanniilli ABD-t peqatigalugit inissineqassapput.
Aappassaattut Namminersornerullutik Oqartussat inatsisinik paasissutissarsiuviffigeqatigiittarneq aammalu Internet-mi atuakkanik atorniartarimmut isersinnaaneq ineriartoqtissavaat.
Pingajussaattut pisortattaaq allagaannarniit fax-niillu elektronik atorlugu allagaqariaatsimut allanngortiterineq ilimagineqartoq malinnaaffigissavaat.
Sisamassaattut, kiisalu suliassamut tunngatillugu inatsiseqarneq naleqqussagaajuassaaq.
Aammalu soorlu suliffeqarfiit namminersortut pinerattut, peqqinnissaqarfimmi pisortallu sulif-feqarfiutaanni allani ineriartorneq kiisalu periarfissaasinnaasut tamatuma nassatarisai eqqummaffigisussaavavut.
Nalunaarasuartaatitigut attaveqaatit atorlugit katsorsaaneq eqqarsaatigissagaanni Norge-ip avannaanisut sumiiffinnilu arlaqanngitsunisut siuarsimatiginngilagut, kisiannili nalunaarasuartaatitigut attaveqaatit atorlugit katsorsaanermi periarfissanik misiligaanermi Danmark-mingarnit siuarsimanerulereersimavugut.
Nalunaarasuartaatitigut attaveqaatit atorlugit katsorsaanerup eqqunneqarnissaani kikkulluunniit sumi najugaqarneq apeqqutaatinnagu peqqinnissakkut sullinneqarnissat periarfissikkumarvarput. Tamanna tassaavoq suliaqarfiit ineriartortitassat Atassut-ip assorsuaq pingaatitaasa ilaat.
Naggasiutigalugu Atassut-minngaanniit mianersoqqussutigissarvarput paasinarmat IT atorlugu ineriartortitsineq, ukiuni makkunani miluuffigigaluttuinnargarput, akisoorujussuummat. Oqaatigineqarpoq million-nik pingasunik kisitsisitalinnik akeqartoq.
Atassut-mi
qularutiginngilarput, siunnersorterpaasuit million-passuit taakkua ilaannit
akissarserusussasut. Inuiaqatigiinnili paasissutisseeqatigiittarneq
nioqqutissatut akikitsutut nioqqutissanut ilisivinniitutut, soorlu
pinngussatut iliorartakkatut Lego-tulli ajornanngitsigisumik katiterneqarsinnaagaluarpoq.
Taavalu akimigut
appariartuinnavilluni.
Uatsinnullu maani Kalaalit
Nunaaniittunut immikkut nuannaarutissaavoq teknikkikkut atortulersuutit
atorlugit paasissutissiisarnerup Kalaallit Nunaat nunarsuanngortikkumaarmagu
elektronik atorlugu nunanut allanut qanittoq.
Taamatut oqaaseqarluta nassuiaat
saqqummiunneqartoq Atassut-miit tapersersussavarput.
Mannasse Berthelsen, Inuit Ataqatigiit oqaaseqartuat:
Teknikkikkut atortulersuutit
atorlugit paasissutissiisarnerup eqqartornerqarnerani eqqaanngitsoorneqarsinnaanngilaq
ATeknikkikkut
atorulersuutit atorlugit paasissutissiisarnerup aqqusinersua@ taanna taaseqarnerartarpoq Ainformationsmotorvejen@ ukiuni makkunani paasissutissat
ingerlaaginnarfianni imaluuniit imaaginnarfianni.
Nalunaarasuartaaateqarfiimmi
siulliit pilersinneqarmatali ineriartorneq sukkaqisumik ingerlasimavoq,
maannakkullu Aaqqusinersuanngorsimalluni@ paasissutissanik sukkaqisumik
ingerlaartitsiviusoq. Taassuuna Aaqqusinersuaq@
illoqarfiit akornanni sulinermi pisariillisaataaginnanngilaq,
pinngitsoorneqarsinnaajunnarsimallunili ullumikkut inuunitsinni,
qularutissaanngilarlu atorneqarnera annertusiartuinnartussaasoq.
Ineriartornerlu maannakkut ima
inissisimalersimavoq, inuit ataasiakkaat aalajangersinnaanngorsimallugu suut
paasissutissat Aaqqusinersuaq@ atorlugu aasinnaanerlugut.
Nunatsinniinnaanngitsoq, aammali nunarsuarmi sumiikkaluartunilluunnit
aallersinnaalersimapput. Paasissutissallu imaaginnarfianni paasissutissanik
pigisaqartoq pissaanermik annertuumik pigisaqalersitsisartoq ullumikkut
qularutissaajuunnaareerpoq.
AAqqusinersuullu@atorneqarnerulernissaanut uani
ataatsimiinnitsinni eqqartortussaavagut meeqqat atuarfianni qarasaasiat
atorneqarlernissaat, ungasissumut atuartitsineq kiisalu ataatsimiittarnerit,
nakorsiartarneq ungasianit aqutaq allalu. Internet-llu atorneqarnerani
nunatsinni pisiassanik allatsitsisinnaalereerpugut, naatsorsuutigissavarpullu
nunatsinni internet-i atorlugu pisiniarfiit saqqummeraluerumaartut, tassanilu
apeqqutaassanngilaq illoqarfimmi sumiinneq. Ungasissorsuunngitsukkut
ilimagissavarput internet-i atorlugu kilaalimernik pisiniartalernissarput.
AAqqusinerup@ atornissaanut periarfissat killeqanngitsutut
oqaatigineqarsinnaapput, taamaallaat isumassariullaqqinneq aningaasallu
killiliisuujumaarput.
Aalajangiisartullu tassa politikerit aalajangiiffigisassaraat qanoq annertutigisumik inuit ataasiakkaat paasissutissanut pissarsisinnaanerat. Inuit Ataqatigiit-niit pingaartitaraarput inuit ataasiakkaat paasissutissanik pissarsisinnaanerat ammaanneqaannarani, aammali inuit tamarmik ilinniartinneqarnissaat qanoq ilillutik paasissutissanik aallersinnaanerisa isumannaarneqarnissaa, kiisalu minnerungitsumik pisortaqarfiit allallu paasissutissiisartut sapinngisamik annertunerpaamik paasissutissanik tamanut iluaqutissanik aariaannakkanik ilisisarnissaasa isumannarneqarnissaa.
Tamanna qularnaarneqassaaq qarasaasianik atuisinnaaneq tunngaviusumik pinngitsoorata ilikkartariaqakkatsinnut ilaatilerneratigut, oqaatitsinnik allamiullu oqaasiinik atuartitsisarnigut assigalugit atuartitsissutigneqarneratigut.
Ilinniartitaanermi ilinniartunut paasissutissanik siammarterineq aalajangiisuusarpoq qanoq pitsaatigisumik ilinniartitsinerup ingerlanneqarneranut, nassuiaammilu ilisimatitsissutigineqarpoq nunatsinni ilinnarfiit qarasaasiat atorluarlereersimagaluaraat, amingaataallunili akunnerminni paasissutissanik paarlaateqatigiinnissamut periarfissat, tassa Aaqqusinersuaq@ atorneqanngitsoq. Ilinniarfiit imminnut attavilersornerat pitsanngorsaavigineqaraluarpat ilinniartitsisuniit ilinniartunut paasissutissanik tunioraaneq annertusineqarsinnaavoq, ilinniartoq ilinniartitsisorlu sumiinneri apeqqutaatinnagit. Tassa ungasissumik ilinniartitsineq. Nassuiaammi ilinnartitaanermi iliuusissatut siunnersuutigineqarpoq tulleriiaarinissami ilinnartitaanermi ineriartortitsinissaq salliutinneqassasoq, tamanna Inuit Ataqatigiit-niit isumaqatigaarput, piviusunngortinnissaalu sulissutigeqqullugu.
Paasissutissat imaaginnarfianni aamma pingaaruteqarpoq paasissutissat inunnut ataasiakkaanut tunngassuteqartut isumannaatsumik paarineqarnissaat, tassa isumannaassallugu inunnut apuuffissarinngisaminnut apuutinnginnissaat. Soorlumi siuliani eqqaagipput paasissutissat pissaanermik tunissartut, susassarisat susassarinngisallu pigigaaluaraanni.
Nassuiaammi oqaatigineqarpoq inatsisitigut suliassat annertuujusut paasissutissanik mianernartunik illersuinissamut tunngasut. Taamaammat pingaaruteqarpoq Danmark-mi ungasissorsuungitsukkut inunnut ataasiakkaanut paasissutissiisarnermut inatsisiliassaq malinnaaffigeqqissaarneqassasoq, ajornangippallu nunatsinnut atuutilernissaa piaartumik Inuit Ataqatigiit kaammattuutigissavarput. Kiisalu Internet-kut pisinniartarnerup aningaasanillu nuussisarnerup isumannaannerusumik ingerlalertornissaa, tassunga ilanngullugu maliginiarquarput.
Inuit Ataqatigiit-niit nuannaarutigaarput kiisami Namminersornerullu Oqartussat-ningaanniit teknikkikkut atortulersuutit atorlugit paasissutissiisarnermut siunnerfeqarnialerneq, naalakkersuisullu eqqartukkatsinnut attuumassuteqartut piviusunngortinnissaannut sulilluaqquagut.
Bjarne Kreutzmann, Akulliit Partiiat:
Aallaqqaammut oqassaanga qujallunga
sammisamut taama pissanganartigisumut nassuiaat soqutiginartoq pillugu.
Teknikkikkut atortorissaarutit atorlugit paasissutissiisarneq siunissami
aqqutissaavoq.
Upernaaq manna ataatsimiinnermi
siusinnerusukkut allanilu ataatsiliittarnerni oqaluusserisarsimavagut
namminersortunngorsaaneq aamma suliffeqarfiit assigiinngitsut pisortanik
pigineqarnerat. Matumani nalunaarasuartaateqarnikkut periaatsit nutaat
aallarnisarneqarnerannut atatillugu, Akulliit Partiiata isumaa naapertorlugu
erseqqissumik pisariaqartinneqarpoq pisortat peqataasariaqarnerat.
Nalunaarasuartaateqarnikkut periaatsit
nutaat niuernerpalaartumik tuniniarneqassappata, taava akit
assigiinngitsorujussuit naammattuugassaapput - imaangitsoq tamanna
eqqortuunngimmat - tassami taama akitigut assigiinngitsigineq ersiutaammat
aningaasartuutaasisamsut qanoq annertussuseqarnerannut, akit
aningaasartutivinnik aallaaveqartariaqarput.
Kisianni akit taama assigiinngitsiginerisa
malunniutigissavaat, kikkut atortorissaarutinut ta-makkununnga
periarfissaqarnersut annertuumik apeqqutaanissaa, tamannalu inuiaqatigiit
ataatsimut isigalugit naammanginanngilaq, imaluunniit naammaginarsinnaanngilaq.
Inuiaqatigiit soqutigisarilluinnassavaat, kikkulluunniit tamarmik
atortorissaarutinik tamakkuninnga sungiussiartonissaat, tassami tamakku
sakkussaammata nunatsinni attaveqaqatigiinnerup nukittorsarnissaanut,
siunissarlu ungasinnerusoq eqqarsaatigalugu aqqutissaasinnaallutik
sineriassuarmi taama siammasitsigisumik inissisimanitta
apeqqutaajunnaarnissaanulluunniit.
Tassani pingaarnerpaaq tassa
periarfissaqartitaaneq. Atortorissaarutit tamakku kikkunnut tamanut
ammarneqartariaqarput, aamma akii naammaginartuusariaqarlutik. Nunatsinni
Tele-kkut attaveqarneq nunanut allanut naleqqiukkaanni takuneqarsinnaavoq
nunatsinniit avammut atassuteqarneq akisunerujussuusoq, kikkullu tamarmik
periarfissaqassappata taava akit paarlattuanik
appasinneralaarakasiusariaqarput.
Teknikkikkut atortorissaarutit atorlugit
paasissutissiisarneq assut qujaruttariaqarparput sapinngisarpullu tamaat
ineriartortittariaqarlugu, taamaalilluta allanut tunngasutigut maanna ajornartorsiutaasut
qaangersinnaaniassagatsigit.
Teknikkikkut atortorissaarutit atorlugit
paasissutissiisarneq sakkugissagutsigu pisariaqarpoq tamatta
ilinnartitaanissarput, aamma meeqqat atuarfianni ilinniarnissamut
periarfissiinissaq, ilinniaqqinnissamullu periarfissat allat aqqutigalugit
ilinniarsinnaanissaq (ikittuunngilagummi meeqqat atuarfianni
atuarunnarsimasut). Tunaartaqartumik suliniuteqarnissamut maanna
piffissanngorpoq, taamaalilluta teknikkikkut atortorissaarutitigut
kinguaattooqqanerput qaangersinnaaniassagatsigu, ineriartornemullu
malinnaasinnaaniassagatta.
Taama oqaaseqarlunga nassuiaat tusaatitut
tiguarput, oqaatigeriikkattullu naammagisimaaqalugu.
Anthon Frederiksen, Kattusseqatigiit:
Teknikkikkut atortulersuutit atorlugit
paasissutissiisarneq pillugu nassuiaat, Kattuseqatigiinniit soqutigalugu
misissosimavara.
Ullumikkut nunatsinni ingerlatsinermi
ingerlanneqartut arlalitsigut, nunami allamiut ingerlatseriaasiat,
pingaartunik danskit iingerlatseriaatsiat malillugu ilaatigullu issuaannarlugu
amerlasuutigut atorneqarpoq, naak ilaatigut nunatsinni atuutsissallugit ilaat
naleqqutinngikkaluartut.
Taamaakkaluartorli nunani allanisuulli
teknikki atorlugu atortulersuutit atorlugit nunatsinni ingerlatsineq
siuarsimasutut, atorluarneqarlersimasutullu oqaatigisariaqarpoq. Taamaattumik
nunani allamiunut sutigut tamatigut nallersuutissangutta ullutsinni
teknikkikkut atortulersuutit atorlugit ingerlatsineq
pinngitsoorsinnaanngilarput, taakkununnnatigullu siuarsaanissaq naleqqussaanisarlu
pisariaqarluni.
Taamaattumik teknikkikkut atortulersuutit
atorlugit paasissutissiisarnerup nunatsinni, nunarsuarnullu allanut
sammitinneqarluni atorneqarlernissaa pisariaqarluinnarpoq, pisariillisaanerit
piffissarlu sivikitsoq atorlugu siunissami ingerlaaseqalernissaq
piviusunngortinneqassappat.
Aammami nunani allamiut siuariartornertik
ilutigalugu annertoorujussuarmik atugarilereersimavaat, pingaartumik
attaveqaqatigiinnerit minnerunngitsumillu niuernermik ingerlatsinerit
eqqarsaatigalugit, taammaattumik kingusinaartinnata nunatsinni nunatsinniillu
teknikkikkut atortulersusutit atorlugit iluaquteqarnerulernissarput
naammassinarneqartariaqarpoq.
Tassami inuiaqatigiinnut sukkasuumik
ineriartorfiusumi pitsaasumik ajunngitsumillu paasissutissiisarneq
pingaaruteqarluinnarpoq.
Taamatumillu atortorissaarusersuinermi
pisariaqarluinnarpoq naallakersuinikkut kukkuluttortoqannginnissaa
qulakkiissallugu, tassami qulakkiingassat ilagilluinnartariaqarpaat,
atortulersuutit atorlugit atornerluisoqatannginnissaata inatsisitigut
qularnaatsumik iluarsiivigineqarnissaa. Taamaattumik pisariaqarluinnarpoq
inatsisartunut paasissutissat eqqortut sukumiisumillu suliarineqarsimasut
saqqumiunneqarnissaat. Taamaammat suleqatigiisitap nalunaarusiaata
saqqummiunneqarnissaa, aammalu nutaamik nassuiaasiortoqarnissaa, kiisalu
immikkut isumasioqatigiisitsinissami saqqummiisoqarnissaa qilanaarluta
utaqqissuarput.
Aarlerissutigineqartut ilaattut
oqaatigineqarpoq teknologip sallinngoriartornerata nassataasa ilagisinnaagaat
inuiaqatigiinnut nuimanernut, nuimannginnerusullu akornanni avissaartortinneqarsinnaanerat.
Taamatut pisoqalinnginnissaa
Naalakkersuinikkut eqqumaffigilluinnartariaqarpoq, pinaveersimatinneqarluinnartariaqarluni.
Taamaattumik tamanna pinngitsoortinneqassappat pisariaqarluinnarpoq innuttaasut
amerlanerpaat teknikkikkut ineriartortitsinermi peqataatinneqarnissaat,
ilinniartitaanerit pikkorissarnerillu sukkulluunniit ingerlanneqartussat
peqataaffigisarnerisigut, tamannalu Naalakkersuinermik suliaqartuusugut tamatta
eqqumaffigisariaqarparput peqataaffigalugu.
Teknikkikkut atortulersuutit atorlugit
paasissutisseeqatigiittarnerup ineriartornerata nunatsinni atuartitsinermi
sapinngisamik piaarnerpaamik tamakkiisumik akuulersinneqarnissaa pinngitsoorneqarsinnaanngilaq,
taamaattumillu oqaluuserisassami tullermi eqqartorneqartut tapersersorneqarnissaat
pisariaqarpoq, tassami Kalaallit Nunatsinni teknikkikkut siuarsaanermi
sukumiisumik malinnaatinneqartariaqarpugut, tamannalu atuartitaanikkut
pisariaqarpoq.
Aammalu siunissami sungiussilluarsimasunik
pikkorissunillu nunatsinneersunik sulisoqassagutta
pinngitsoorneqarsinnaanngilaq ilinniartitsisussanik teknikerinillu
pikkorissunik peqarnissarput, taamaattumik Kattusseqatigiinniit
pilersaarutigineqartut piviusunngortinneqarnissaat naatsorsuutigilluinnarlugu
tapersersornartippakka.
Suliaq ingerlanneqalersoq
imaannaanngitsuuvoq pisariusuullunilu, nunatsinni inuiaqatigiinnullu
annertuumik sunniuteqartussaanera qularutigisariaqanngilaq, taamaattumik
suleqatigiisitamik pilersitsisimaneq pissusissamisoorpoq.
Suleqatigiisitap sulilluarnissaanik
kissaallugu, qilanaaraarput ukiamut Inatsisartunut ataatsimiinnissamut
nutaamik nassuiaasiortoqarnissaa, tassanimi aamma ilanngunneqartussaammata,
aningaasatigut kingunerisassai pillugit qulaajaanissat.
Aammalu soorunami ukiamut Inatsisartut
ataatsimiinnissaat sioqqullugu isumasioqatigiissitsinissap ingerlanneqarnissaa
tapersersornarpoq, naatsorsuutigaarpullu suliamut pingaaruteqartumut
attuumassuteqartut susassaqartullu tamarmik peqataatinneqarumaartut.
Kiisalu Naalakkersuisut siunnersuisussamik
suleqatigiisitaliornissamut tunngatillugu misissuinerat pissusissamisoorpoq
tapersertariaqarlunilu, suliassarmi imaannaanngitsuummat pisariaqarpoq
immikkut paasisimasalinnik pilersitsinissaq.
Aammalu Naalakkersuisut teknikkikkut
atortulersuutit atorlugit paasissutisseeqatigiittarnermut tunngasutigut
ataqatigiiaarisussamik atorfinitsitsiniarnerat, isumaqatiginarpoq
tapersertariaqarlunilu.
Naggataatigut oqaatigisariaqarpoq
ilumoormat Naalakkersuisup oqaatigisaa, tassalu teknologi nutaaq taanna
politikkikkut kukkuluttorfigineqarsinnaasut annerpaat ilagaat - aammalu naalakkersuinikkut
suut aningaasaliiffigissallugit aalajangerniarnitsinni kukkuluttuutaasinnaasut
sipaarutaasinnaasullu milliunerpassuarnik naleqarsinnaammata. Tassami
eqqaaginnarsinnaavagut nioqqutissiorfiit taamanikkut KTU aammalu KNI
allanngortiteriffigineqarneri inuiaqatigiinnut aningaasarpassuarnik
suliffippassuarnillu naleqartut.
Taamatut oqaaseqarlunga nassuiaat
pissanganartoq tusaatissatut tiguara, qilanaaralugulu ukiamut
saqqummiussisoqaqqinnissaa.
Peter Grĝnvold Samuelsen, Inuussutissarsiornermut, Angallannermut
Pilersuinermullu Naa-lakkersuisoq:
Naalakkersuisut sinnerlugit partiit
tamaasa, Kattusseqatigiillu, qutsavigigaarpakka. Teknikkikkut atortulersuutit
pillugit nassuiaatip ullumikkut ilassilluarneqarneranut Inatsisartuni aammalu
oqaatsit isumaqatiginartorpassuit aninneqartut pillugit, aammalu
nuannarinninnerit qujaniarnerillu takkua Naalakkersuisut IT pillugu suleqatigiisitaliarisimasaanut
sulilluarsimaqisumut aamma apississallugit neriorsuutigissavara.
Silinnerusumik
oqaaseqarusunnartorujussuugaluarpoq kisianni saqqummiussarput ersarimmat,
ersarissumillu oqaaseqarfigineqarmat tamanna pisariaqassanngilaq. Ataasiakkaat
partiininngaanniit oqaatigineqartut taakku oqaaseqarfigillatsiaannassavakka.
Oqareernittut nuannaarutigeqaara nassuiaat
taama pitsaatigisumik ilassilluarneqarmat aammalu ukiaru nangittumik, soorunami
aamma ullumikkut oqaluuserisassatta tulliit marluk aamma taakkua
oqaaseqarfigineqarumaarput. Taavalu pingaarnersiuinissaq oqaatsitta ullumikkut
anitatta timitsersornissaat tullinnguukkumaarmat aamma
eqqaasitsissutigissavara, taakkua aningaasakasiit piumassusermut
sanilliullugit ilaatigut amikkitsoornartartut aamma oqaloqutaajumaarmata ukiaru
ukiunilu aggersuni.
Siumuminngaanniit oqaaseqartup Karl
Lyberth-ip oqaasii ilaatigut ikittunnguulluta nunarujussuarmik atueqatigiinneq
pisariaqartikkipput, taanna ilumoorluinnarpoq aammalu taamatut teknikkikkut
atortulersuutit suut, sumut qanorlu atussanerlutigit tassaasariaqaratta
kalaallit inuiaqati-giit aalajangiisuusut teknikkip aalajangigassarinngisai.
Tele nersortariaqarpoq, ilumoorpoq, tassami
aningaasatigut ingerlalluarnera atortulersuutinillu nutaanik
ineriartortitsinera nersortariaqarpoq. Kisianni taamatut oqareerlunga
oqarusuppunga aamma imatut uunga killissannginnatta Tele-minngaanniit
oqariartuutigineqartut tamarmik taamaallaat kisimik ilumoortutut
uniffigisariaqannginnatsigu. Tassami silarsuarmi periarfissat allat tamarmik
ima sukkatigisumik ineriartorfianni ilumoortut arlaqarmata. Soorunami Tele-p
illersornissaanut inatsisitigut tunngavissaqarpugut, tassalu nunatta
isorartunerata aammalu innuttaasut sumut nunassissimarnerata naalakkersuinikkut
pingaartikkatsigu. Kisiannili suut kisermaanneqassanersut suliassallu sorliit
namminersortunit ingerlanneqarsinnaanersut tamatumunngalu tunngatillugu
inatsisitigut aalajangersakkatigullu periarfissiissutigisariaqarsorisagut
eqiiganeruffigalugit ilusilersortariaqarpagut piffissap ingerlanerani.
Aamma attaveqaatit internet-ilu
eqqartortillugit, Inuit Ataqatigiinnersup Manasse-p oqarneratut,
paasissutissigaasarnerup aqqusinersuani, oqagajappunga tassuunaqqunnerit
tamaasa, innuttaasut kalaallit tamatta kĝrekortitaartariaqaraluarpugut
aqqusinersuarmi tassani. Tassalu kĝrekorti taanna tassaassaaq atuisinnaanermut
periarfissinneqarnerput nunatsinni kikkuugaluaruttaluunniit. Tassalu taanna
oqaluuserisarput aammalu periarfissaqarnerput najoqqutaralugu periarfissittariaqagarput.
Kalaallit oqaatsitta kulturikkullu
eriagisavut eqqarsaatigalugit aqqusinersuaq taanna atorlugu
atuilluarsinnaanerput avammullu pitsaasumik kiinnersinnaanerput, ilumoorpoq
periarfissittariaqarpoq, avataaneersut kisiisa eqqarsaatiginngikkaluarlugit
immitsinnut qiviarutta kalaaleqatigiit qassimmitaava nunatta atuagaateqarfiani
Groenlandica isersimanngilaat. Kalaallit qassimmitaava nunatsinni
katersugaasivik Nunatta Katersugaasivia isersimavaat, imaluunniit
isinngisaannartussaavaat. Sumiiffinni ataasiakkaani katersugaasiviit kalaallit
eriagisaatitsinnik katersuiffigisavut iluaqutiginerussagutsigit
nuannaarutiginerussagutsigillu nunatsinni sumiikkaluaruttaluunniit aamma
internet aqqutigalugu aamma pulaarsinnaasariaqarpugut.
Groenlandica-mi oqaluttuaatitoqqavut
immiunneqarsimasut, allanneqarsimasut, kalattuut nipilersuutit nalunaaquttap
akunnerpassuinik sivisussusilimmik immiunneqarsimasut immiuteqqaarnerinut
allaat tusarsimanngisaannakkavulluunniit qanormitaava nuannertigissava internet
aqqutigalugu pulaffigisinnaagutsigit takullugillu tusarnaarlugillu. Aatsaat
immaqa taamaasippat
suliffeqarfiit taakkua
perruualaarutiginerpaanngussagaluarpagut.
Karl Lyberth-ip Siumumeersup oqaatsini
naggaserpai ilaatigut noqqaassutigalugu pisortaqarfimmik IT pillugu
pisortaqarfimmik pilersitsisoqarnissaa nalilersullaqqullugu. Tassa
Inuussutissarsiornermut, Angallannermut Pilersuinermullu attaveqaatit pillugit
suliaqarpugut aammalu Naalakkersuisuni isummerpugu IT pillugu
ataqatigiissaarisumik tassani atorfinitsitsinissarput, tassalu aamma taanna
oqaluttunit taperserneqartoq tusaasinnaasoraara. Taamaattumik ataqatigiissaarineq
taanna pingaaruteqaqimmat aammalu siunnersuisartussanik pilersitsisoqarnissaa
eqqarsaatigalugu Namminersornerullutik Oqartussat tassuunakkut
nukitsorsarneqartussaammata isumaqarpunga tamanna aallarniutigissallugu
ajussanngitsoq.
Atassummiit Anders Nilsson-ip
oqaaserisaanut qujassaanga. Oqaasi ersarilluinnarput ilaatigut aamma IT
politikkeqarnissami suut politikerit isumagisariaqaraat aammalu suut
akuleruffigisariaqanngikkaat erseqqissumik oqaatigimmagu, aammalu
maluginiarlugu Tele Naalakkersuisut peqatigalugit pilersaaruteqartoq
pingaartumik paasissutissat annertuut eqqarsaatigalugit akigitinneqartut,
tassalu matumani pingaartutut taasariaqarluni inuussutissarsiortut, Tele-mik
atuinerisa akitigut pitsanngorsaaffigineqarnissaannik malitseqartussamik
eqqarsaatersortoqartoq. Taanna Naalakkersuisuninngaannit ilassilluarusupparput,
Naalakkersuisuni oqaluuserisimagatsigu ilaatigut Tele-p, aqagu
generalforsamlingeqarnerani, erseqqissumik oqaatigerusullutigu akigititat
eqqarsaatigalugit namminersorluni suliffiuteqartut inuussutissarsiornermut
atatillugu pitsaanerusumik periarfissinneqarnissaat tikkuarusukkatsigu.
Malugisinnaavaralu taanna taama naapertuuttumik Atassut oqariartuuteqartoq.
Inuit ataasiakkaat illersorneqarnissaat
Inuit Ataqatigiinninngaanniit ersarissumik oqaluttunillumi aallanit aamma
oqariartuutigineqartoq isumaqatigilluinnarparput, aammalu taanna oqareernittut
inatsisit tungaasigut naleqquttunngorsaanissaq Naalakkersuisut tungaanit
sulissutigalugu aallartereeratsigu pisariaqarmat, tassami paasissutissat
mianernartut aqqusinersuarmi tassani siumugassaasartussaammata
siumugassaalereersimallutillu, taavalu pinaveersaartariaqarluinnarluni
apuuffissarinngisaminnut apuunneqarnissaat, taanna
eqqumaffigilluinnarneqarnissaa soorunami isumaqqatigaarput.
Bjarne Kreutzmann-ip Akulliit
Partiianinngaannit oqaasii tigulluarpakka. Tassani Bjarne Kreutzmann-imit
tikkuartorneqarpoq kikkut tamarmik periarfissinneqarnissaat akit naammaginarnerusut
angujartorneqarnissaat, ilinniartitsisussat tamattalu ilinniartariaqarnerput IT
pillugu atuinissamut, qujanaq tapersiinermut. Taamatuttaaq Anthon
Frederiksen-imut Kattusseqatigiinniit.
Anthon Frederiksen-ip ilaatigut oqaatigaa,
oqaaseq uani nutserneqarnerani nuimanernut nuimannginnerusunullu
oqaatigineqartoq tassa A amma B-hold-inut, tassunga magguttuunnginnissarput, tassalu
pingaarpoq paasissutissiinermi periarfissat kikkunnut tamanut ammaakkiartorneqarnissaat
- taanna ornittariaqarparput.
Ukiaru aggustusimi imaluunnit septemberimi
IT pillugu isumasioqatigiisitsinissami susassaqartut aap, peqataatissavagut
aammalu nammineerluta Naalakkersuisuninngaanniit pingaartikkatsigu Inatsisartut
Attaveqaatit pillugit Ataatsimiititaliaani ilaasortat aammalu tassani
ilaasortaariinngippata Attaveqaatit pillugit partiit oqaaseqartartuisa
isumasioqatigiinnermi tassani peqataatinnissaat siunniussimavarput.
Siunnersuutit soorlu
siunnersuisoqatigiinnik pilersitsisoqarnissaanik, ataqatigiissaarisumik
atorfinitsitsisoqarnissaanik sinerissamilu attaveqaatitigut iseriarfissanik
pilersitsisoqarnissaanik tunngaviusumik tapersiinerit qutsatigaakka,
timitsersorneqalerpata ilusilerlugit kingusinnerusukkut
saqqummiunneqarumaarput.
Taamaalillunga qujaqqillunga
neriorsuutigissavara Inatsisartut Attaveqaateqarneq pillugu Suleqatigiisitaliaa
Naalakkersuisuni suleqatigissagatsigu uumap suliap suliassartaqarnarunaqisup
ingerlateqqinnissaanut. Taavalu partiininngaaniit oqaaserineqartut
ilanngullugit suleriarnissatsinni eqqaamassallutigit tunngavigissallugillu.
Oqaluuserisaq naammassivoq.