Oqaluuserisassani immikkoortoq 30-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 21. maj 1997, nal. 15.05
Ataatsimiinnermik aqutsisoq: Hans Enoksen, Siulittaasoqarfik.
Marianne Jensen, Avatangiisinut, Pinngortitamut Ilisimatusarnermullu Naalakkersuisoq:
Ukiut kingulliit ingerlaneranni Kujataani tuttunik nujuitsunik toqoraanermi eqqagassat eqqarneqartarnerat ajornartorsiutaaleriartorsimavoq. Tamanna ilaatigut nunaminertanik eqqagassanik assaallugit matoorussiviusinnaasunik nassaarniarnermi ajornartorsiutinik, ilaatigullu ukiuunerani toqoraanermi eqqagassat matoorniarneqarneranni ajornartorsiutinik pissuteqarpoq. Taamatuttaaq Narsap illoqarfiani nersutinik toqoraavimmit perlukunik pinngortitami uumassulinnit pisunik annertoorujussuarmik assaassilluni matoorisoqartarpoq.
Avatangiisit eqqarsaatigalugit pingaarnerusutigut isigalugu perlukunik pinngortitami uumassusilinnit pisunik assaassilluni annertoorujussuarmik matooriuartarnissaq eqqarsarnartoqartipparput, tassami perlukut uumassusilinnit pisut asiujartuaartarnerat Kalaallit Nunaanni arriitsuinnarmik pisarmat. Tassani aamma ilaavoq toqoraanermi perlukut matoorussat teriannianit neriniarfigineqalersarmata, taamannalu perlerornermik nappaateqarnerisa akiorniagaanerannut atatillugu kissaatiginartuunngilaq.
Nunami matoorussisarnermut taarsiullugu imaanut kiversaasarneq periarfissaavoq, kisianni tamanna imaani avatangiisit pillugit inatsit tunngavigalugu massakkut inerteqqutaavoq. Taamaattumik allannguutissamik siunnersuuteqarnermi siunertaavoq aalisakkat perlukuinik imaanut kiversaasarnermi akuersissuteqartarnerup pissuseqataanik nersutinik toqoraanermi perlukunik imaanut kiversaasinnaanermut Naalakkersuisut akuersissuteqarsinnaanerannut inatsisitigut tunngavissiiniarneq.
Inatsimmut oqaaseqaatini erseqqissarneqarsimavoq kiversaanissamut akuersissuteqartoqannginnerani eqqagassat taakku allanut atorneqarnissaannut periarfissaqannginnersoq nassuiaatigineqartassasoq.
Naalakkersuisut isumaqarput imaani avatangiisit illersorneqarnissaat pillugu inatsisip allannguutissatut siunnersuummi avatangiisit pitsanngorsarneqarnissaannik pingaarnerutitat salliutinneqartut.
Allannguutissatut siunnersuut Allattoqarfimmi Inatsisileriffimmut, Piniarnermut, Aalisarnermut Nunalerinermullu Pisortaqarfimmut, Aningaasaqarnermut Pisortaqarfimmut, Inuussutissarsiornermut, Angallannermut Pilersuinermullu Pisortaqarfimmut, KANUKOKA-mut, KNAPK-mut RAL-imut aamma KNI-mut tusarniaatigineqarsimavoq. Ilanngullugu oqaatigineqarsinnaavoq allannguutissatut siunnersuut nunat tamat akornanni isumaqatigiissutinut akerliussanngimmat.
Tusarniaanermi oqaaseqaatigineqartut tamarmik malinneqarsinnaapput Naalakkersuisut akuersissuteqannginneranni kommunit KNAPK-lu akuliutsinneqartarpata.
KNAPK-p nalunaarutigaa tusarniaanermi akissutini 28. april sioqqullugu nassiussinnaanagu siulersuisut nutaat toqqarneqareernissaannut. KNAPK ilisimatinneqarpoq tusarniaanermut akissutaa utaqqineqarsinnaanngitsoq, allannguutissatut siunnersuut ataatsimiinnermi maana naammassillugu suliarineqarsinnaassappat.
Siunnersuut oqaaseqaatitaalu Naalakkersuisut sinnerlugit innersuussutigissavakka, siunnersuutigaaralu siunnersuut aappassaaneerneqannginnermini Inatsisartut Avatangiisit Eqqissisimatitsinerlu pillugit Ataatsimiititaliaannut oqaluuserisassanngortinneqassasoq.
Niels Mattaaq, Siumup oqaaseqartua:
Aallaqqaammut Siumumiit oqaatigissavarput, Kalaallit Nunatsinni pinngortitap eqqiluitsuutinneqarnissaa suliniutigiuaratsigu, taamaattumillu sukkulluunniit pinngortitamut mingutsitsinaveersaarnissaq tapersersorlugulu suliniutigiarniaratsigu.
Taamaattumik Avatangiisinut pinngortitamullu Naalakkersuisup Inatsisartut peqqussutaata allanngorinneqarnissaanik siunnersuuteqarnera Siumup isumaqatigaa.
Matumuunalu oqaatigineqartoq kujataani tuttunik nujuitsunik toqoraanermi eqqagassat nunamut matuuinnarneqartartut isumaqatiginngilluinnarpavut isumaqaratta taamaaliornikkut pingortitaq annertuumik mingutsinneqassasoq.
Kiisalu Naalakkersuisoq isumaqatigaarput oqarmat perlukut asiusut nersutinik, nerisassanik ujarisaqanngitsunik, tassalu teriannianit nerineqartartut, taakkulu nersutit nappaataannik, perlerornermik, nappaateqalersarnerat tamakkuninnga aallaaveqartarsinnaasoq qularineqanngimmat, nersutinummi nujuitsunut qimmit atorneqartartut tamatumuuna navianartorsiortinneqartarmata.
Kiisalu Naalakkersuisup peqqussutissamut siunnersuummi eqqaavaa perlukunik imaanut kiversaaneq periarfissaasoq, kisiannili tamanna avatangiisit pillugit inatsit tunngavigalugu inerteqqutaavoq.
Matumuunalu Siumup Naalakkersuisoq isumaqatigaa, oqarmat peqqussutissamut siunnersuummi tunngavigineqartoq aalisakkat perlukuinik imaanut kiversaasarnermi akuersissuteqartarnerup pissuseqataanik, nersutinik toqoraanermi perlukunik imaanut kiversaasinnaanermut Naalakkersuisut akuersissuteqarsinnaanerannut inatsisitigut tunngavissiiniarneq.
Kiisalu Naalakkersuisoq isumaqatigaarput erseqqissaateqarmat perlukunik kiversaanissamut akuersissuteqartoqannginnerani eqqagassat taakku allanut atorneqarsinnaanerat misissorneqaqqaartassasut.
Siumumiit Naalakkersuisut isumaqatigaavut oqarmata, avatangiisit illersorneqarnissaat pillugu inatsisit allannguutissaattut siunnersuummi avatangiisit mingutsaaliornissaannut illersuinissaq salliutinneqartuassasoq.
Allannguutissatut siunnersuut allattoqarfimmi inatsisileriffimmut, kiisalu pisortaqarfiit pinginneqatigiifissuillu, Naalakkersuisup saqqummiussinermini taakkartoriigaanut, tusarniaatigineqarsimasoq oqaatigimmagu. Aammattaaq Naalakkersuisoq Siumumiit isumaqatigaarput oqarmat, allannguutissatut siunnersuut nunat tamat akornanni isumaqatigiissutinut akornutaasaanngimmat.
Imaani avatangiisit illersorneqarnissaat pillugu Inatsisartut peqqussutaata allanngortinneqarnissaanik siunnersuut Siumumiit siullermeerneqarnera akuersaarparput.
Siumumiit taama oqaaseqarluta, inassutigissavarput aappassaaneerneqannginnermini Inatsisartut Avatangiisit Eqqissisimatitsinerlu pillugit Ataatsimiititaliami oqaluuserineqassasoq.
Jakob Sivertsen, Atassutip oqaaseqartua:
Siunnersuut Atassummit imatut oqaaseqarfiginiarparput. Nunami imaanilu uumasunik inuuniuteqarnerput aningaasarsiuteqarnerpullu tunngavigalugit pisariaqarluinnarpoq, illoqarfimmiikkutta nunaqarfimmiikkutta, immami imaluunniit nunami asimiikkutta pinngortitarsuup avatangiisitta mingutsinnaveersaarneqarnissaa tamatta ilungersorluta suleqataaffigisariaqaratsigu.
Nunatsinni takornariaqarnerup annertusarneqarnissaa tamatta ilungersorluta anguniarparput siunissami aningaasarsiornitsinnut annertuumik iluaqutaasussaammat. Nunatsinni takornarissat amerlanerulernissaannik suliniuteqarnitsinnut nunatta alianaassusersua, imartamigut silaannartamigullu, silarsuarmi minguinnerpaanera takornarissanut ussassaarutigalugu tusaqqusaarutigi-sarparput. Taamaattumik takornarissat nunatsinnut tikittartut allarluinnarmik naapitassaqartissanngikkutsigik nunatta alianaatsup eqqiluitsuutinnissaa pisariaqarluinnarpoq.
Naalakkersuisup imaani avatangiisit illersorneqarnissaat pillugu Inatsisartut peqqussutaata allanngortinneqarnissaani saqqummiussaqarnermini nunatta kujataani, tassalu Narsap illoqarfiani, savanik toqoraavimmi nersutit toqorakkat perlukuinik nunamut matoorisarnerup ajornartorsiutinngorsimasup, pinngortitamillu mingutsitsisinnaanera pinaveersaartinniarlugu pitsaanerusumik nersutit perlukuinik eqqaasarnissaq pisariaqalersoq oqaatigaa.
Atassmiit isumaqarpugut nersutit perlukuisa eqqaannarnagit allatut iluaqutigineqarnissaat pimoorullugit misissorneqartariaqartut soorlu qimminut nerukkaatissatut allatulluunniit iluaqutigineqarsinnaanersut. Soorunami iluaqutigineqarsinnaanngippata taava ullumikkornit isumannaannerusumik perlukut iginneqartarnissaat pinngitsoorneqarsinnaassanngilaq. Soorlu aalisakkat perlukuinik imaanut kiversaasarnermut periutsit pissuseqataanik periarfissiinikkut.
Taamatut oqaaseqarluta peqqussutip allannguutissaanik siunnersuut pisariaqavissutut paasillugu Atassummit akuersaarparput, aammalu pisariaqassappat aappassaaneerneqannginnerani ataatsimiititalimi sammineqarnissaa ajoriffissaqartinngilarput.
Evald Brĝnlund, Inuit Ataqatigiit oqaaseqartuat:
Inuit Ataqatigiit arajutsisimanngilaat nunami uumasut perlukuinik inatsit tunngavigalugu imaanut eqqaasoqarsinnaanera inerteqqutaasoq. Taamaattumik paasilluarsinnaavarput kujataani tuttunik nujuitsunik toqoraareernerup kingunerisaanik perlukut nunamut assaanneqartarnerat annertuumik ajornartorsiutaalersimammat.
Ilisimaneqareerpormi uumasut perlukuinik pisut Kalaallit Nunatsinni arriitsuararsuarmik asi-ujartuaartartut, taamaattumik siunissaq ungasinnerusoq eqqarsaatigalugu nunamut matooriuaannarnissaq eqqarsarnartoqalersimavoq.
Tamatumalu aamma ilaatigut ajoraluartumik kingunerisinnaasarlugu teriannissat perlerorsin-naasarnerannik, taakkulu perlerorneri aamma qimminut tuniluussinnaasartoq naluneqanngilaq.
Naalakkersuisut inatsisip allanngortinneqarnissaanut tunngatillugu susassaqartut saqqummiussamik taakkartorneqartut tusarniaavigineqaqqaarsimanerat Inuit Ataqatigiit pissusissamisoortutut isigaat.
Inuit Ataqatigiit pingaartitariuarparput nunatta pisuussutaanik sunilluunniit atorluaanissarput, taamaattumik innersuussutigerusupparput perlukut eqqagassat allanut atorneqarsinnaanngin-nersut nalilersuiffigineqaqqaartarnissaat. Taamatut nalilersuinermi aammattaaq uumasut amii ullumikkut tamakkiisumik atorneqanngitsut nalilersuinermissaaq ilaatinneqartarnissaat kis-saatigaarput.
Inatsisissamut allannguutissaq atortuulersinneqassappat Naalakkersuisut kaammatorusuppavut kommunit pineqartut KNAPK-lu akuliutinneqartarnissaat pisariaqartassasoq, tassani Namminersornerullutik Oqartusat kommunillu akunnerminni pitsaasumik suleqatigiissinnaanerat eqqarsaatigalugu.
Tamatta nalunngisatsitut nunatta sumi inissisimanera eqqarsaatigalugu upernaakkullu aputip sikullu aakkiiartulernerani sukujuppassuit saqqummeralersartut takornartaanngilaq, ullutsinni- lu takornarissat amerliartortinneqarnissaannik sulissuteqaleruttornerup nalaani nunatta tamarmi eqqiluitsuutinneqarnissaa qinikkat sulissutigiuartariaqarpaat innuttaasullu nunatta eqqiluitsuu-tinnissaanut peqataajuarnissaat pisariaqarluinnarpoq, angajoqqaallu meeqqaminnut maligassi-uillutik nunatta eqqiluitsuutinnissaanut pisussaaffeqarput.
Nunattami avataanit minguitsutut tusaamaneqarnera tamatta illersugaraarput, taamatut avatangiisinut tunngasut naggataatigut eqqaallatsiariarlugit imaani avatangiisit illersorneqarnissaat pil-lugu Inatsisartut peqqussutaata allanngortinneqarnissaannut siunnersuut, Inatsisartut Avatangiisit Eqqissisimatitsinerlu pillugit Ataatsimiititaliaanut oqaluuserineqaqqaarnissaa Inuit Ataqatigiit innersuussutigaat.
Bjarneq Kreutzmann, Akulliit Partiiat:
Akulliit Partiiata paasivaa, avatangiisit
illersorneqarnissaat ataatsimut isigalugu perlukut pin-ngortitami
uumassusilinnit pisut annertoorsuanngorlugit matoorunneqartarnerat nangaanartinneqartoq.
Taamaattumik aalisakkat perlukuinik
imaanut kiversaasarnerup pissuseqataanik nersutinik toqoraanermi perlukunik
imaanut kiversaasarnermut Naalakkersuisut akuersissuteqarsinnaanerannut
inatsisitigut tunngavissiinissamik siunnersuut Akulliit Partiiata taperserpaa.
Aamma pisortaqarfiit arlallit
isumasiorneqartut isummamut tapersersuimmata, Akulliit Partiiata
inassutigissavaa, siunnersuut aappassaaneerneqannginnermini Inatsisartut
Avatangiisit Eqqissisimatitsinerlu pillugit Ataatsimiititaliaanut
oqaluuserisassanngortinneqassasoq.
Anthon Frederiksen, Kattusseqatigiit:
Siunnersuut Kattusseqatigiinniit
akuerisinnaanngilara. Nunat tamat akornanniluunniit isumaqatigiissutinut
akerliussanngikkaluarpat. Tassami oqaluttuarpugut nunatta imartaa nunarsuarmi
minguinnerpaajusoq, tamannalu avammut niuernermut iluaqutigaarput. Taamaattumik
tamannaannarluunniit pissutigalugu imartattali, ajoraluartumik illoqarfinni
suliffissuaqarfiusuni, sissap kangerluillu illoqarfinnut qanittut tippaaffigisaligaannik
mingutsinneqartut eqqarsaatigalugit - mingutsitsineq sunaluunniit
naaggaartariaqarpoq.
Taamaattumik mingutsitsineq
akiorniarutsigu nersutinik toqoraanermi perlukunik immamut eqqaasinnaanerup
peqqussutikkut aammaanneqarsinnaanera itigartittariaqarpoq. Aammami kalaallit
qangaaniilli piniakkanik atorluaasut anersaavannut tamanna naapertuutinngilaq.
Tamannalu ataqqillugu eqqaamasariaqarpoq,
taamaattumik siunnersuutigerusuppara peqqussut allanngortinneqassanngitsoq,
kisiannili uumasunik toqoraavimmiit perlukut Sisimiut Food A/S-imi qimminut
nerukkaatissiorfimmut akuutissatut nassiunneqartarnissaat misissuiffigineqassasoq.
Taamatut oqaaseqarlunga siunnersuutip
aappassaaneerneqannginnermini Avatangiisinut Eqqissisimatitsinermullu
Ataatsimiititalimi suliarineqassasoq paasiniagassallu paasiniarneqassasut
innersuussutigerusuppara.
Marianne Jensen, Peqqinnissamut, Avatangiisinut
Ilisimatusarnermullu Naalakkersuisoq:
Qujassutigerusuppara partiit oqaluttui
Naalakkersuisut siunnersuutaannut akuersaarmata isumaqataallutillu, tassanilu
saqqummiunneqartut assigiinngitsut tamaasa eqqarsaatigalugit. Kisianni
soorunalimi malugivara aamma Kattusseqatigiinninngaanniit Anthon Frederiksen
siunnersuummut tassunga akerliusoq.
Nuannaarutigaara partiinit tamanit
isumaqatigineqarmat maluginiarneqarluni erseqqissarneqarlunilu perlukunik
kiversaanermut akuersissuteqartoqannginnerani eqqagassat taakku allanut
atorneqarsinnaanerat misissorneqaqqaartassasut, aammalu tamannarpiaq sapinngisamik
annertunerpaamik anguniarusullugu Namminersornerullutik Oqartussat, KANUKOKA
aammalu KNAPK suleqatigillutik isumasioqatigiillutillu Naalakkersuisut
siunnersuutigigatsigu. Tamannalu aamma malugivara isumaqatigineqartoq
neriuppugut taamaasiornikkut eqqanaarneqassasoq eqqumaffigineqartuassasorlu
ilumut eqqagassat atorluarneqarsinnaanerat isigiumaneqartuassasoq.
Taannalu aamma taamatut eqqarsartariaaseq
aatsaannguaq oqaluuserisatsinnut Aalisarnermut, Piniarnermut Nunalerinermullu
Naalakkersuisup saqqummiussaani aamma naapertuulluinnarpoq, tassanilu aamma
tusareerparput qanoq Inatsisartuni ilaasortanit pingaartinneqartigisoq
sapinngisamik annertunerpaarpaamik atorluaanissaq
sulissutiginiartuartariaqartoq.
Taassuma saniatigut maluginiarpara aamma
pinngortitap eqqiluitsuutinnissaa illersornissaalu oqaluttunit tamanit
pingaartinneqarluni erseqqissaavigineqartoq. Tassanilu aamma maluginiarlugu
Atassutip ilaatigut oqaluttuata oqaatigimmagu pisariaqarluinnartoq
illoqarfimmiikkutta nunaqarfimmiikkuttaluunniit immami imaluunniit nunami
asimiikkutta pinngortitarsuup alianaatsup avatangiisitta
mingutsinnaveersaarneqarnissaata tamatsinnit ilungersortumik suleqataaffiginissaa.
Taamatut oqaaseqarneq nuannaarutigivara
aammalu Inuit Ataqatigiit taanna erseqqissarlugulu-sooq aamma oqaatigisaa
ilanngullugu issualaarusuppakka ima ittut: ANunatta tamarmi eqqiluitsuutinneqarnissaa
qinikkat sulissutigiuartariaqarpaat innuttaasullu nunatta eqqiluitsuutinnissaanut
peqataajuarnissaat pisariaqarluinnarpoq, angajoqqaallu meeqqaminnut
maligassiuillutik nunatta eqqiluitsuutinnissaanut pisussaaffeqarput@.
Oqaatsit taakku imartuut
pingaaruteqartullu qujassutigivakka maluginiarlugulu aamma inuiaqa-tigiit
akornanni taamatut pingaartitsineq ersarinneruleriartuinnartoq aammalu
massakkut Ina-tsisartut, inuiaqatigiit sinniisaasa, oqariartuuteqarnerminni
tamannarpiaq aamma ersersippaat.
Ataatsimiinnermik aqutsisoq, Hans Enoksen, Siulittaasoqarfik:
Taamasilluni oqaluuserisassaq immikkoortoq
30, Imaani avatangiisit illersorneqarnissaat pillugu Inatsisartut peqqussutaata
allanngortinneqarnissaanik siunnersuut naammassivoq, taassanngaanniillu
Avatangiisinut Ataatsimiititaliamut ingerlateqqinneqassaaq.
Oqaluuserisaq naammassivoq.