Oqaluuserisassani immikkoortoq 14 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Anders Andreassen, Ataatsimiinnermik aqutsisoq,
Inatsisartut Siulittaasuat:
Immikkoortoq 14, tassalu
Qeqertarsuup Tunuani Peqqinnissaqarfiup eqiterneqarnissaa pillugu nassuiaat,
tassanilu siunnersuuteqartut siulliullutik saqqummiissapput.
Niels Màtâq, Siunnersuuteqartoq, Siumut:
Una siunnersuut saqqummiunneqarpoq
qitiusumik napparsimavissualiornissamut siunnersuutip saqqummeqqaarnerani
oqaaseqaat tunngavigalugu.
Inatsisartut Peqqinissamut
Ataatsimiititaliaata Norge-ip avannaanut paasisassarsiorluni angalasimanerata
kingunerisaanik nassuiaateqarnerit saqqummertut tunngavigalugit matumuuna
siunnersuuteqarniarpunga, qitiusumillu napparsimavissualeqarnissaata
oqallisigineqarnerani annilaangassuteqartut amerlaqisut saqqummertarmata aamma
uagut avinngarusimasumiittugut annilaanganartikkatsigu taamatut
aaqqissuunneqassappat annertuumik eqqorneqartussaagatta. Matumuuna
tunngavilimmik oqallisigilluarneqarnissaa siunnersuutigaara.
Taamatut oqareerlunga oqaatigissavara
qitiusumik napparsimavissuaqalernissaanik piviusorsiortumik saqqummiisarnerit
aaliangiiviisumik suli oqallisigineqanngimmata.
Kalaallit Nunarput isorartoqaaq
isorliunerusuni illoqarfiit imminnut ungasipput nunaqarfippassuaqarlutillu,
ilaatigut suli napparsimaviit piorsarneqarlutik aningaasarpassuit atorlugit,
ilaatigullu nutaanik atortorissaaruteqarluartunik napparsimaveqarluni,
assersuutaara Upernavik. Qitiusumik napparsimavittaassagutta ullumikummi suli
naleqquttuusorinngilara nunatta aningaasatigut inissisimanera tunngavigalugu.
Norge-ip avannaanut
paasisassarsiornermi ataatsimiinnerit ilaanni, tassa Peqqinissamut Ataatsimiititaliap
paasisassarsiornerani, apeqqutigivara taamatut qitiusumik napparsimaviliornerit
atuutilernerini qangatut ingerlassinermiit akikinnerunersoq. Tassami Norge-ip
avannaani qitiusumik napparsimavissuaqarnikkut ingerlatsineq maannakkut
atuummat.
Taakkunaniit akineqarpunga akikinnerunngitsoq,
tassa akisunerujussuusoq. Aammami saqqummiisarnerni ersarereerpoq annermi
Kalaallit Nunatsinni taamak angallanneq akisoreertigisoq. Malugineqarsinnaavoq
suli akissaqartinneqanngitsoq. Maanna akikilliliineq ingerlanneqassappat,
aaqqissuulluakkamillu isumaqarpunga ajunnginnerusumik toqqissisimanartumillu
suli ingerlasoqarallassasoq.
Ersarissumillu oqaatigissavara
uanga Kalaallit Nunatta immikkoortortaanik qitiusumillu napparsimaveqalernissaa
isumaqataaffiginginnakku, ajunnginnerutillugulu maannakkut napparsimaveqarfiit
nakorsaqartuarnissai, tamannami tamanut toqqissisimanarnerussammat.
Taamaattumik qitiusumik
napparsimavissualiornissaq kinguartittariaqartoq imaluunniit allatut
isummerfigisariaqartoq.
Taassuma malitsigisaanik peqqinnissaqarfiit
aningaasanik sipaarunnagit aningaasat nakorsanut pikkorissunut sulerusuttunullu
atorneqartariaqartut.
Naggataatigut oqaatigilara inuuneq
toqqissisimasoq inuunererusupparput nunatta suatunngaaniluunniit ikkaluarutta.
Illoqarfiit avingarusimasumiittut ullutsinni sutigut tamatigut pisariaqartitsigaluttuinnarneranni
soorlu meeqqat atuartitaaneranni ilinniartitsoqarnerit atorfiit qulliunerusut
inuttalersorneqarnerinik inuttassarsiornernilu atorfik peqqinnissakkut
pisinnaalluartunik sulisoqartoq orniginarnerutinneqartarmat.
Ruth
Heilmann, Siunnersuuteqartoq, Siumut:
Tassa
aamma uanga april-ip 3-ani allaaserisaqarsimavunga, taassumalu assinga aamma
Inatsisartut siulittaasoqarfikkoorlugu ingerlatissimallugu aammalu massakkut
uunga oqaluuserisassamut ilanngunneqarsimavoq immikkoortoq 14-mut.
Taamaatumillu aamma taamaaliorsimaneq qujassutigalugu maannakkut atuassavara.
Peqqinnissaqarfimmi
ajornartoriutit oqaluuserisigit, taamatut qulequtsersimallugu.
Regionaliseringi
aqqutigalugu napparsimaveqarfinni ajornartorsiutit aaqqinneqarnissaat ilimaginngilara,
akerlianilli ilimagaara ajornartorsiutit inuiaqatigiinni atukkavut
annertunerulernissaat.
Maannakkut
napparsimaveqarfiit piusut pigeriikkavut piorsartariaqarput, sulisussanillu
annertunerusumik immikkut iliuuseqarluni ilinniartitsinerit
ingerlanneqartariaqarlutik.
Napparsimaveqarfiit
pillugit maannakkut iliuuseriniagaalersut toqqissisimananngillat. Maniitsumi
nakorsaanerup Hans M. Johnson-ip nunatsinni sivisuumik sulillunilu misilittagartuup
oqaaserisartagai allaaserisartagaalu qaangiinnagassaanngitsutut
isumaqarfigiuaannarpakka.
Illuatungaatigullu
Inatsisartuni Peqqinnissamut Ataatsimiititaliap siulittaasuata Anders
Nilsson-ip saqqummiuttagai assut eqqarsarnartoqartittarlugit isumaqarnarmat
nunarput Norge-mut qallunaat nunaanulluunniit assersuunneqarsinaanngitsoq,
tassani pissusiusut nunatsinnut eqqutiinnarneqarsinnaanngimmata.
Nakorsassaaleqinerujussuaq
nalunngilarput, nakorsanngorniartarnerlu imaannaanngitsuusoq qanittukkullu
nakorsassanik naammatitsinavianngitsugut aammami nunarsuarmi similuunniit
nakorsat amigaataalluinnarmata. Kisiannilu annertuumik atugarissaasigut
pitsanngorsaavigineqartariaqarput, piusutuat ilaannaaluunniit
pissarsiarisassagutsigit. Taamaattumik sutigut pitsannguutaasinnaasunik
nakorsat ujartuinerminnik oqaatigisartagaat tusaalluarniartariaqarpagut.
Suliaritinnissaminnik
utaqqisut tupinnaannartumik amerliartorput amerlanerinullu tapertaaqaaq aamma allaat
naartusut amerlasuut Sana-mut erniartortinneqartalermata, tamanna kinguariarneq
peqqusiileqinartorujussuuvoq, unitsinneqartariaqarlunilu.
Erniartoritinneqartut
ilaquttatik nunagisartik qimallugu allamut erniartortinneqartalernerat
kinguariarneruvoq imaanaanngilluinnartoq.
Nunaqarfimmiut
illoqarfimmut erniartortinneqartarnerannut tunngatillugu arlaleriaqaluta
erniartortut ilaquttamik ilaginissaannulluunniit inissiigallartarfinnik
pilersitiniarneq sulissutigisaraluarlugu akissaqartinneqarneq ajorpoq.
Taamaattumik siunnerfigineqartariaqarpoq piffimmi sumiluunniit naartusup
anaanaasup toqqissisimalluni ernisarnissaa inooqatini, uini, qitornani allallu
ilaquttani ikinngutinilu ilagalugit. Meerannguup aamma toqqissisimalluni
silarsuarmut appakaattarnissaanik periarfissaqartinneqarnissaa tamanik allanik
pingaaruteqarnerpaatut isigisariaqarmat.
Tamanna
angussagutsigu juummuunik peqqissaasunik immikkut annertuumillu iliuuseqarluta
ilinniartitsineq aalluttariaqarparput. Siusinnerusukkut immikkut ilinniartitsinernik
iliuuseqaqqusillunga siunnersuutigisartagaraluakkakka allakkatigut
akineqaannartarput, soorluuna annerusumik iliuuseqartoqarnianngitsoq. Tamanna
qinikkatut akisussaaqataaffigalugu naammagiinnarneqarsinnaanngilaq.
Nalunngilara
soqtiginnillutik peqqissaasunngorniarlutik aallartittaraluartut ilarpassui
kalaallisut oqallorissut kisiannili qallunaatut inorsartoorlutik
malinnaaniarnertik ajornartorsiutigalugu ajoraluartumik amerlasuut
ilinniarnerminnik unititsiinnartartut taavalu kalaallisut oqalussinnaanngitsortaat
ingerlaqqittarlutik, tamanna assut ajuusaarnartuuvoq iliuuseqarfigisariaqartoq.
Juummuunik
peqqissaasunillu kalaallinik oqaasilinnik peqaratta tamakkunnguilluunniit qiimmassarlugit
atorfissaqarteqigatsigimmi, ilinniartinneqarnissaannik
aaqqissuussiffigineqarsinnaannginneramik. Isumaqarpunga nunatsinni
ineriartortumi qallunaat nunaanni iliuusaasut assiliinnarnagit allatut
iliuuseqarnikkut ajornartorsiutinik qaangiiniartoqartariaqartoq.
Peqqinnissaqarfik
pillugu maanaakkullu iliuuserineqartut naammaginanngitsut siunissamullu
toqqissisimananngitsortaqaqisut pillugit innuuttaasut
oqallitsinneqartariaqalerput.
Isumaqarpunga
regionaliseringiluunniit pillugu innuttaasut Inatsisartut kommunilluunniit
isummersoqataatinneqarsimanngilluinnartut, tamanna inuit
oqartussaaqataanerannik qaangiataarineruallaarsoraara akueriuminaalluinnartoq.
Inuit
55.000-iinnaagaluarluta suliaritinniarlutik utaqqilersut 3000-it allaat
angumaleriartorpaat.
Angalaqqaarluni
suliaritinniartarneq akisoorujussuusarpoq, inummut inuiaqatigiinnullu aningaasarpassuarnik
atuiffiusoq. Taamaattumik najugarisami suliaritissinnaaneq sapinngisamillu
nammineq kommunerisami ornitassaq qaninnerpaaq ornillugu suliaritissinnaaneq
anguniartariaqarluinnarpoq. Taamaalilluni angalanermut aningaasartuutit
annertuumik annikillisinneqarsinnaammata.
Isumaqarpungalu
pingaarnersiuisoqartariaqalersoq. Pingaarnersiuinermi ilinniartitaaneq pingaartinneqarnerpaasariaqarpoq.
Nakorsat pigisavut erligingaakkavullu sulisorissaarunik aamma angusassaat
annertunerungaartussaassammat, taamaalillunilu nakorsat nukinik atuinerat nalimmassarneqartussaalluni.
Juummuunik peqqissaasunik taakkulu ikiortaannik amerlanerusunik
annertunerusumillu iliuuseqarnikkut ilinniartitsisoqartariaqarlerpoq.
Oqareernittut
nammineq nunagisami ernisarneq ernumananilu ernisalernissaq allatigullu soorlu
inalugaaralukkaanni piaartumik aallarunneqanngikkaluarluni
suliaritissinnaalernissaq anguniartariaqarpoq, taamaalilluni aamma inuit
piffissaagallartillugu annaanneqartarnissaat aqqutissiuunneqartussaassammat.
Ullumikkut
suliffeqarfinnik siammarsaanerup aqqani apeqqutaatinneqartaqaaq ornitassaq
peqqinnissaqarnikkut periarfissiissutaai pitsaasuunersut, tamattami Nuummi
Aasianni Ilulissaniluunniit najugaqarsinnaanngilagut.
Taamaattumik
regionaliseringi peqqinnissaqarfinnilu pissutsit pillugit annertuumik inuit
peqataatillugit oqalliserineqartariaqalerput. Nunatsinnut tulluarnerusumik naammaginarnerusumillu
peqqinnissaqarnikkut aaqqiissuteqarnissarput anguniartariaqarmat.
Marianne
Jensen, Peqqinnissamut, Avatangiisinut Ilisimatusarnermullu
Naalakkersuisoq:
Inatsisartut
1996-imi upernaakkut ataatsimiinneranni peqqinnissaqarfiup nunap immikkoortukkuutaartumik
aaqqissuunneqarsinnaaneranut isumaliutissat suliarineqarnerat
ingerlateqqinneqassasoq Naalakkersuisut neriorsuutigaat. Inatsisartut 1996-imi
ukiakkut ataatsimiinneranni suleqatigiissitap paasiniagassanik
pisariaqartinneqartunik suliaqartussap sulinissaminut najoqqutassaatut
siunnersuut Peqqinnissamut Ataatsimiititaliamut saqqummiunneqarpoq. Peqqinnissamut
Ataatsimiititaliap naggataarutaasumik allakkiamini suliassap
ingerlateqqinneqarnissaa erseqqissumik tapersersorpaa.
Tamatuma
kingorna peqqinnissaqarfimmik nunap immikkoortukkuutaartumik aaqqissuussinissaq
peqqinnissaqarfimmi pisortatut suliallit Ilulissani 1996-imi
ataatsimeersuarneranni sammineqartut pingaarnerit ilagaat tamannalu
aqqutigalugu ilaatigut paasinarsivoq nunap immikkoortui taamatut
aaqqissuussivigineqarsinnaasutut piukkunnaateqartut marluusut, tassa
Qeqertarsuup Tunua nunattalu Kujataa. Kaammattuutigineqarpoq suliaqarnermi
aallaqqaammut Qeqertarsuup Tunua pineqassasoq. Nassuiaat manna suliarineqarpoq
suleqatigiissitap Peqqinnissamut Ilisimatusarnermullu Pisortaqarfiup aammalu
sulisut naleqquttunik suliaqartut najukkanilu peqqinnissaqarfiit
sinniisuutitaannik inuttaqartinneqartup inassuteqaatai tunngavigalugit.
Tassunga
atatillugu erseqqissarneqassaaq nunap immikkoortukkuutaartumik
aaqqissuussinissami, nassuiaat manna inatsisartunit akuerineqassappat,
aallartinneqarsinnaasumi innuttaasut kommunillu peqataatinneqarnissaasa
pisariaqartinneqarnera naalakkersuisut tamakkiisumik akuersaarmassuk.
Sinerissami
sumi inissisimaneq eqqarsaatigalugu nassuiaammi matumani Qeqertarsuup Tunuani,
tassa Kangaatsiap, Aasiaat, Ilulissat, Qeqertarsuup Qasigiannguillu
peqqinnissaqarfiini, napparsimmaveqarnerup allatut aaqqissuunneqarnissaa
pineqarpoq. Nassuiaatip imarai periaaseq siunnersuutillu arlallit,
tunngavimmikkut imarisamikkullu ingerlaannaq Kujataani aaqqissuussinissaq
pillugu suleqatigiissitassamut nuunneqarsinnaasut nuunneqartariaqartullu.
Tamanna
tunngavigalugu Naalakkersuisut kaammattuutigissavaat nunatta Kujataani nunap
immikkoortukkuutaartumik aaqqissuussinissaq pillugu suleqatigiissitaliamik
piaartumik pilersitsisoqassasoq.
Najukkani
nunaqarfinnilu peqqinnissakkut sullissineq marlunnut avinneqarsinnaavoq, tassa
toqqaannartumik peqqinnissakkut sullissinermut aamma peqqinnissakkut
sullissinermi uninnganertaqarsinnaasumi. Toqqaannartumik peqqinnissakkut
sullissinermut ilaapput nalinginnaasumik nakorsanit isumagineqarneq,
peqqissaaneq, angerlarsimaffinni napparsimasunik peqqissaaneq kigutilerinerlu.
Peqqissaanikkut sullissinermi uninnganertaqarsinnaasumi ilaapput najukkani
napparsimmavinniit sullinneqarnerit soorlu sumiiffinni napparsimmavinni,
Dronning Ingridip Napparsimmavissuani imaluunniit nunami allami
napparsimmavimmut peqqissagassatut unitsitaaneq. Nunap immikkoortukkuutaartumik
aaqqissuussinermi pineqartut siullermik tassaapput peqqissaanikkut
sullissinermi uninnganertaqarsinnaasumut tunngasumik suliassat.
Tunngaviulluinnartumik
pingaaruteqarpoq erseqqissassallugu nunap immikkoortukkuutaartumik
aaqqissuussinissamik oqallinnermut patsisaammat kalaallit nunatsinni
peqqinnissaqarfiup maannakkut aaqqissuussaanerata qanganitsersimanera.
Ullumikkut najukkani peqqinnissaqarfinnut agguataarisimaneq, amerlanersaat
eqqarsaatigalugit, 1925-mi pisimavoq. Taamaammat nunap immikkoortukkuutaartumik
aaqqissuussinissaq periarfissaannaajunnaarpoq pisariaqarluinnalerlunili
peqqinnissaqarfimmik pitsaassutsikkut qularnaariffiusumik
ingerlatsisoqassappat, naalakkersuinikkut, aningaasatigut ulluinnarnilu
periarfissanik ersersitsisumik.
Nunap
immikkoortukkuutaartumik aaqqissuussinerup naammassineqarnissaanut
pingaartuulluni tunngavissaavoq ukiuni makkunani nunatsinni peqqinnissaqarfimmi
sulisussanik pissarsiniarnerup aalajangersimatitsiniarnerullu
ajornartorsiutaalluinnarnerat, ilaatigut patsisaalluni nakorsat akornanni
immikkut ilinniagaqartartut amerliartornerat, aammali patsisaaqataasoq alla
pingaarutilik tassaavoq napparsimmavinni sullissinerit
pitsaanerulersinneqarnissaannik kissaateqarneq, matumani ilaatigut pineqarluni
pilattaasarnikkut sullissinerup pitsaassusaa.
Ilisimatuussutsikkut
sullissivinnit assigiinngitsunit siunnersuinerit tunngavigalugit, assersuutigalugu
Danmarkimi Peqqinnissamik Aqutsisoqarfiup, Sundhedsstyrelsip, inerniliussimavaa
innuttaasut 200.000-250.000 akornanni amerlassusillit ikinnerpaaffiusariaqartut
pilattaasarnikkut sullissinerup pitsaassusissaa qularnaassagaanni. Inuit taama
amerlatigisut nunatsinni tunngavigissallugit soorunami qanillinavianngilagut,
naalakkersuisulli isumaqarput nunatsinni innuttaasut aamma, pilattaasartunit
sungiussilluarsimasunit sapinngisamik suliarineqarsinnaasariaqartut.
Taamaattumik
nunap immikkoortukkuutaartumik aaqqissuussinissap piaarnerpaamik aallartinneqarnissaa
pingaaruteqarluinnarpoq, tassa imaappoq napparsimmavinni suliassat
annertunerusumik katersorlugit. Tamanna massakkut napparsimmaviusut
atorunnaarsinnissaattut paasineqassanngilaq, kisiannili taakku ilaasa
toqqaannartumik peqqinnissakkut
sullissinermi ulluinnarni pilertortumik pisariaqarluinnartunilu
katsorsaasinnaanissap isumagineqarnissaasa allanngortinnissaattut
paasineqassalluni.
Taaneqareersutuut
tamatumunnga minnerunngitsumik patsisaavoq maannakkut atorfinitsitsiniarnerup
ajornartorsiutaanera siunissami aamma naatsorsuutigineqarsinnaasoq. Nunatsinni
peqqinnissaqarfimmi atorfinitsitsiniarnermi ajornartorsiutit peqqinnissaqarfimmi sulisut akissaatitigut
atorfeqartitaanermilu atugassarisaannut taamaallaat tunngajunnaarsimapput.
Nakorsat eqqarsaatigalugit tamatumunnga ilanngullugu ullumikkut aamma
ajornartorsiuterpiaalersimavoq, peqqinnissaqarfiup ullumikkut
aaqqissuussaanerata pisariaqartimmagit nakorsat tamatigoortumik
piginnaanillit. Nakorsalli ilinniartitaanikkut immikkut ilinniagaqartarnerat
annertusiartorpoq, tamatumalu kinguneraa amerlasuut nunatsinni
peqqinnissaqarfiup maannakkut aaqqissuussaanerata kingunerisaanik annertuumik
akisussaaffeqarfiusumi atorfininnissaminnut tunuarsimaarnerat.
Tassunga
atatillugu ilisimatitsissutigineqarsinnaavoq Peqqinnissamut ministeriaqarfiup
apeqqutilliissuteqarfigineqarluni ilisimatitsissutigimmagu nakorsanik
tamatigoortunik ilinniartitsisarnerup aallarteqqinneqarnissaa ilimananngitsoq
atorluarsinnaasuussananilu, taamaattumik naatsorsuutigisariaqarpoq nakorsanik
atorfinitsitsiniartarneq aamma siunissami ajornakusoortorujussuussasoq. Aamma
teknikikkut ineriartorup pisariaqalersissavaa napparsimmavinni suliassat
eqiterneqarnerulernissaat.
Nunatsinni
peqqinnissaqarfik ukiorpassuit ingerlanerini najukkani pingaaruteqarluni
sulilluarfiullunilu inissisimasimavoq. Taamaattumik innuttaasut akornanni
oqallinnermi aaqqissuussaanerup allanngortinneqarnerata kingunerisassai
amerlasuunit ernummatigineqarmata paasinarpoq. Nunatsinni tamarmi
peqqinnissakkut sullissinerup nutarterneqarnissaa pitsaanerulersinneqarnissaalu
allannguinissatut eqqarsaatit siunertarigaat erseqqissassallugu Naalakkersuisut
pingaartippaat.
Taamaattumik
nassuiaammi kaammattuutitsigut siunertarineqanngilluinnarpoq peqqinnissakkut
sullissinerup ajornerulersinneqarnissaa, soorlu najukkani peqqinnissaqarfiit
ilaasa nakorsaarutsinneqarnerisigut - taamaanngilluinnarmammi.
Naluneqanngitsutut
ukiup matuma ingerlanerani najukkani peqqinnissaqarfiit ilaannut nakorsassarsiortarneq
piffissani sivikitsuni ajornartarsimavoq, naak Peqqinnissamut
Ilisimatusarnermullu Pisortaqarfik ilungersorsimagaluaqisoq. Pissutsit
taamaannerat nunap immikkoortukkuutaartumik aaqqissuussinissaq pillugu
suleqatigiissitap Ilulissani ataatsimiinnerani oqaluuserineqarpoq, tassani
pisinnaasutut eqqarsaatersuutigineqartut ilagalugu nakorsanik taamaallaat
Aasiannut Ilulissanullu pissarsisoqarsinnaalluni nunalli immikkoortuani
peqqinnissaqarfiit allat allanngortinneqartariaqarlutik peqqissaavinnut
peqqissaasunik sulisulittut. Tassami taama periuseqarneq Kangaatsiami ukiuni
arlaqartuni atuussimavoq taamaattumillu piviusunngorsinnaasutut isigineqarsinnaalluni.
Tamannali
suleqatigiissitap imaluunniit Naalakkersuisut Qeqertarsuup Tunuani nutaamik
aaqqissuussinissamut aaqqiissutissatut tikkuanngilaat. Naalakkersuisut
isumaqartuarput Qasigiannguani, Kangaatsiami Qeqertarsuarmilu
nakorsaqartitsisoqassasoq, apeqqutaavorli taakku annertunerusumik
pilattaanissamik, pilaallutik ernisitsinissamik il.il. aamma suliaqartinneqassanersut.
Taamaattumik siunertaavoq piffissami ungasinnerusumi Qasigiannguani,
Qeqertarsuarmi Kangaatsiamilu atorfinitsinneqassasut nakorsat assigiinngitsunik
suliaqarsinnaasut.
Taamaattumik
Naalakkersuisut isumaqarput pilattaalluni suliassat pitsaanerpaamik isumannaannerpaamillu
suliarineqarsinnaasut nakorsanit taama suliaqarnissamut sungiussisimasunit,
pilattaanermi sinilersitsinermilu periutsit nutaat atorlugit. Naatsumik
oqaatigalugu tamatuma kingunerissavaa inuit pilatsillutik suliaritittussat
najukkani peqqinnissaqarfinni pineqartuneersut Aasiannut Ilulissanulluunniit
nuunneqartassasut.
Nunap
immikkoortukkuutaartumik aaqqissuussineq immini sulisussanik pissarsiniarnermi
ajornartorsiutinik qaangiissutaasinnaanngilaq, tamatumunngami patsisaasut
amerlaqimmata, kisianni pilattaasariaqartarnissamik nakorsanut ataasiakkaanut
piumasaqarnerup annikillineqarnera ajornartorsiutip aaqqiivigineqarnissaanut
iluaqutaassaaq.
Suliarinnittarnermi
teknikkikkut siuariaatit peqqinnissakkullu sullissisut ilinniartitaanikkut
immikkut sammisaqaleriartornerat eqqarsaatigalugit nunani tamalaani
ineriartorneq tunngavigalugu, Qeqertarsuup Tunuani napparsimmavimmi suliassat
sumiiffimmi ataatsimi isumagineqalernissaasa anguniarneqartariaqarnera aammalu
pilattaasarnermi suliatigut suliamut tunngatillugu akisussaaffiup Dronning
Ingridip Napparsimmavissuanut inissinneqartariaqarnera nalorninartoqarsinnaanngilaq.
Suliaritinnerit sumiiffimmut ataatsimut eqiterneqarnerisa nassatarissavaa
napparsimasunik angallassisarnerup annertunerulernera, taamaattumik tamanna
inissinneqartariaqarluni nunap immikkoortuani angallannikkut qitiusumut.
Nunap
immikkoortuani aaqqissuussinerup tamarmiusup inerneriniartussaavaa nunap immikkoortuani
ataatsimik tunngaviusumik napparsimmaveqalernissaa tassanngaannartumik
pilattaasariaqarnermut upalungaarsimaffiusumik.
Tamatumani
aqqutissaavoq pilersaarusiornermiit peqqinnissakkut sullissinermi
ataatsimoortumik siulersuisoqarnerup aningaasaqarnerullu pilersinneqarnerat.
Periuseq taanna aallartinneqassaaq najukkani peqqinnissaqarfiit napparsimmaviit
anginerit marluk, Ilulissat Aasiaallu, ataannut piaarnerpaamik
katersorneqarnerisigut. Tassunga atatillugu Naalakkersuisut malugeqqussavaat
kaammattuutit ataatsimut isigalugu annerusumik maannakkut pissusiusunik
naqissusiinerinnaammata, assigiinngissutillu annersarimmassuk siulersuinikkut
eqaannerulersitsinissaq.
Assersuusiorlanga.
Pissutsit maannakkutut itsillugit, tassa immikkoortuullutik aqutsiveeqqat
namminerisaminnik aningaasanik aqutaqarlutik ingerlasut, aningaasaqarnikkut
kajuminnartoqanngilaq soorlu juumuup peqqinnissaqarfimmut sanilerisamut
juumooqanngitsumut attartortinnissaa. Akerlianik nunap immikkoortukkuutaartumik
aaqqissuussinikkut napparsimmaviup tunngaviusup juumooqarnikkut sullissineq
akisussaaffigisussaavaa.
Ernisoqartarnera
eqqarsaatigerpiarlugu siunertaavoq erninerit ulorianartorsiorfiusinnaasut
Ilulissani pinngikkunik Aasianni Nuummiluunniit juumuunik ilinniarluarsimasunik
sulisoqartuni aammalu ernumanartoqanngitsumik pilaanikkut
ernisitsiffiusinnaasumi pisarnissaat. Taamaammat Qeqertarsuarmi,
Qasigiannguani Kangaatsiamilu ernisoqassatillugu ajornartorsiutitaqanngitsumik
naartusimasut ernisinneqarsinnaassapput suliassamik tamatuminnga
isumaginninnissamut peqqinnissamik isumaginninnermi ikiortit
piginnaasaqarluartut naammattut aammalu nakorsaq tamatigoortoq erninerup
ingerlanerani akisussaasuusinnaasoq pigineqaraangata. Taamaattumik
Naalakkersuisut kissaatigaat ajornartorsiutitaqanngitsumik erninissat
illoqarfik angerlarsimaffigisaq qimanngikkaluarlugu sapinngisamik suli
piuarsinnaasassasut.
Nunap
immikkoortukkuutaartumik aaqqissuussineq Dronning Ingridip Napparsimmavissuani
nakorsat immikkut ilinniagallit suliassaasa tunngaviusut
pitsaanerulersinneqarnerannik, nunap immikkoortuani tunngaviusumik sulisut,
atortorissaarutit pisariaqartitat ungasissumiillu nakorsiartitsisarnerup,
avataaniit ilisimasalinnik tapertalerlugu, pigineqarnerannik, ilaqartinneqartoq,
peqqinnissaqarfiup suliarinninnissamut sullissinikkullu
neqeroorutigisinnaasaasa patajaallisarneqarnissaannik, peqatigitillugu
suliarinninnerup pitsaassusaata qaffasinnerulersinneqarnissaanik
qularnaarisumik, naalakkersuinikkut anguniakkatsinnik piviusunngortitsinissamut
aqqutaanissaat naatsorsuutigineqarpoq.
Qeqertarsuup
Tunuani napparsimmaviit akornanni suliassanik agguataarinerup allanngortinneqarneratigut
nakorsanik tamatigoortunik ilaatigut Kangaatsiamut, Qeqertarsuarmut
kingusinnerusukkullu Qasigiannguanut sulisussarsinissaq
ajornannginnerulersissavaa tamatumalu nassatarissallugu tunngaviusumik
peqqinnissakkut sullissinerup ullumikkornit pitsaanerulernera. Tamanna
aqqutigalugu innuttaasut nakorsamit ikiorserneqarnissamut periarfissaat ajornannginnerulersinneqassapput.
Taamaattorli
najukkani peqqinnissaqarfinni ataasiakkaani sulisut amerlassusiligaanerisa
allan- nguuteqarnerata aningaasatigut kingunerisassaat, tamatuma
malitsigisaanik angallassinikkut pisariaqartitsinerit, tamatumalu kingunerisaanik
sullissinerit assigiinngitsut iluani angallassinerup aningaasartai
misissoqqissaarnerusariaqarput naalakkersuinikkullu isummerfigisariaqarlutik.
Qeqertarsuup
Tunuani nutaamik aaqqissuussinissaq pillugu kaammattuutit allaaserineqartut
siunissaq ungasinnerusoq isigalugu Landskarsimut missingersuutitigut
sunniuteqannginnissaat anguniarneqarpoq. Allanngortitserinerulli nalaani
aningaasartuuteqarnerunissaq naatsorsuutigisariaqarpoq. Ilimagineqarpoq
aningaasartuutiginerusassat 1998-imi 1,2 mio. kr.-inik 1999-imilu 2 mio.
kr.-inik aningaasartaqarumaartut.
Nassuiaat
manna tunngavigalugu Naalakkersuisut kaammattuutigaat Inatsisartut
naalakkersuinikkut aalajangiiffigissagaat periuseq nassuiaammi
kaammattuutitigut siunnerfigineqartoq aallartinneqassasoq. Nassuiaatip imarai
nunap immikkoortukkuutaartumik aaqqissuussinissap pisariaqartinneqarneranut
tunngaviusut qulaajarneqarnerat, aammalu ilorraap tungaanut aallariarnissamut
periusissat aalajangiinissamullu tunngavissanik sukumiisunik suliaqarnissamut
tunngavisseeqataasut pillugit kaammattuutit.
Nassuiaat
tusarniaanermullu akissutit tiguneqarsimasut tunngavigalugit Naalakkersuisut
inassutigaat kinguliiniittut Inatsisartunit akuersissutigineqassasut:
Siullermik
peqqinnissaqarfiup nunap immikkoortukkuutaartumik aaqqissuunneqarnissaata
pisariulluinnarnera, kisiannili aamma pisariaqarluinnarnera
nukinginnarsilluinnarneralu, nassuerutigalugu kaammattuutigineqarpoq
Qeqertarsuup Tunuani peqqinnissaqarfimmi napparsimmaveqarnerup
eqiterneqarnissaanik siunertamik nalunaarut Inatsisartut akuersissutigissagaat.
Tamatumunnga
ilassutitut suliniummut pisortassamik toqqaasoqassaaq ikaarsaariarnerup nalaani
nunap immikkoortuani suleqatigiinnermik, immikkut suliaqarnermik/sulianik
agguataarinermik annertusaasussamik aammalu ataaniittunik
piviusunngortitsisussamik kiisalu pisortaqarfik suleqatigalugu nunap
immikkoortuani tamatumani siunissami aaqqissuussaanerup allannguutissaanik
pilersaarusiortussamik.
Aappaattut
kaammattuutigineqarpoq nunap immikkoortukkuutaartumik aaqqissuussinissamik
suliaq suleqatigiissitatigut ingerlaqqissasoq, Kujataani nunap immikkoortuatut
aaqqis-suussinissamut siunnersuusiortussamik kiisalu
suleqatigiissitaliortoqassaaq kigutigissaanerup nunap immikkoortukkuutaartumik
aaqqissuunneqarnissaanut siunnersuusiortussamik piaartumik Inatsisartunut
saqqummiunneqartussamik.
Pingajussaanik
Ilulissani napparsimmavik najukkami napparsimmaviujunnaarluni illoqarfinnut
Ilulissanut Qeqertarsuarmullu, Qasigiannguit ilanngunneqarumaarnerannik
pilersaarutitalerlugu, tunngaviusumik napparsimmavinngortinneqassasoq.
Sisamassaanik
Aasianni napparsimmavik najukkami napparsimmaviujunnaarluni illoqarfinnut
Aasiannut Kangaatsiamullu tunngaviusumik napparsimmavinngortinneqassasoq.
Tallimassaanik
Qeqertarsuaq peqqissaavinngussasoq nakorsalik napparsimasunut ulloq unnuarlu
paaqqutarineqartariaqartunut innanngavissartalerlugu, napparsimmaveqarnikkut
allaffissornikkullu sullissineq Ilulissaniit, missingersuutit katinnerisigut
atorfiit amerlassusiligaanerannik aningaasaliissutinillu
nuussivigineqartussamit, isumagineqartussanngorlugu.
Arferngat,
Kangaatsiaq peqqissaavinngussasoq nakorsalik napparsimasunut ulloq unnuarlu
paaqqutarineqartariaqartunut innanngavissartalerlugu, napparsimmaveqarnikkut
allaffissornikkullu sullissineq Aasiannit, missingersuutit katinnerisigut
atorfiit amerlassusiligaanerannik aningaasaliissutinillu
nuussivigineqartussamit, isumagineqartussanngorlugu.
Arfineq
aappaat, Qasigiannguit ulloq manna tikillugu ingerlanermisut ingerlaqqissaaq
ullumikkusut suliaqarfiulluni, napparsimmavilli allaffissornikkut Ilulissani
napparsimmavimmit tunngaviusumit, missingersuutit katinnerisigut atorfiit
amerlassusiligaanerannik aningaasaliissutinillu nuussivigineqartussamit,
isumagineqalissaaq. Siunissami Qasigiannguit aamma peqqissaavinngortinneqassaaq
nakorsalik napparsimasunut innanngavissalik.
Arfineq
pingajuat, Dronning Ingridip Napparsimmavissuani pilattaanermut
sinilersitsinermullu, arnat ilukkut napaataannut ernisussiornermullu nakorsat
immikkut ilinniarsimasut Ilulissani Aasiannilu tunngaviusumik napparsimmavinni
nakorsat pilattaasarnerinut pingaarnerusutigut immikkut suliaasartunut
akisussaasunngortinneqassasut, immikkut suliassat pineqartut sulisutigut
naleqqussaavigineqassasut Naalakkersuisoqarfiup 1999-imut aningaasaliissutit
amerlineqarnissaannik kissaataani allaaserineqartutut.
Qulaaluaat,
paaqqinnittarfeqarneq peqqissaaveqarnerlu kattunneqarsinnaanersut qulaajarumallugu
paaqqinnittarfeqarnikkut kommunini oqartussaasut aaqqissuussamik
suleqatigineqalissapput.
Qulinga,
peqqissaaviit, tunngaviusumik napparsimmaviit Dronning Ingridillu
Napparsimmavissuata akornanni ungasissumit nakorsiartitsisarnermut atortutigut
attaviliisoqassaaq.
Isikkarngat,
Uummannaq Upernavillu najukkami napparsimmavittut atuutiinnassapput. Juumuunik,
nakorsanik, aaviisartunik peqqissaasunillu sinitsitsisartunik
amigaateqartoqarnerani Ilulissat tunngaviusumik napparsimmavittut atuunnissaa
pilersaarutigineqarpoq.
Isikkaneq
aappaat, ataatsikkut annertuumik ingerlatsinerup iluaqutissartarisinnaasai,
soorlu illutatigut atortutigullu, atorluarniarlugit nunap immikkoortuani
suliassat agguataarneqarnerulernissaat kaammattuutigineqarpoq, taamaalilluni
tunngaviusumik napparsimmavik siunissami kisiartaalluni tunngaviusumik
napparsimmavinngortussaq immikkut pilersaarusiukkanik pilattaaviusassalluni, tunngaviusumillu napparsimaviup aappaa
angallannikkut periarfissaqalerpat peqqissaavinngortinneqassalluni
annertusisaq, assersuutigalugu tagiartuisarnerup pisinnaanngorsaaqqinnerullu
iluani suliaqartussaq.
13-niat: nunap immikkoortuani
aaqqissuussinerup tamarmiusup inerneriniagassaatut kaammattuutigineqarpoq
napparsimaveqarnikkut suliassat, nunap immikkoortuani tunngaviusumik
napparsimavimmut ataatsimut katersorneqassasut, napparsimavillu taanna
aallaavigalugu nunap immikkoortuanut ataatsimut aqutsiviliortoqassalluni. Taama
oqaaseqarlunga Qeqertarsuup tunuani peqqinnissaqarfiup eqiterneqarnissaa
pillugu nassuiaat, Naalakkersuisut sinnerlugit Inatsisartunit
aalajangiiffigisassanngortippara, aammalu oqallinneq kissaatigineqartoq
taamatut aallartillugu.
Kristine Raahauge, Siumup oqaaseqartua:
Qeqertarsuup tunuani peqqinnissaqarfiup
eqiterneqarnissaa pillugu nassuiaat Naalakkersuisut saqqummiussaat,
immikkoortunik 13-nik akuersissutigeqqusanik inassuteqaatertalik annertuumik
Siumumiit oqallisigereerlugu imatut oqaaseqarfiginiarparput.
Siumup suliniutigiuarpaa innuttaasut
peqqinnikkut inooqatigiinnikkullu pitsaanerpaamik atugaqarnissaat
anguniarneqartuassasoq. Peqqinnissaqarfiullu sullissinera Nunatsinni najugaqarfiit
tamarmik sapinngisamik assigiiaartumik sullinneqassasut. Aammalu nunaqarfiit
isorliunerusullu sullinneqarnerat pitsanngorsarneqartuartariaqartoq
eqaallisaavigineqartariaqartorlu. Passunneqarneq katsorsaanerlu ullumikkut
Danmarkimi pisartut, minnerpaamik pitsaaqataanik Nunatsinni
ingerlatsisoqalersinnaatillugu Nunatsinni periarfissat pilersinneqartassasut.
Katsorsaaneq sapinngisamik najugaqarfik qanillugu ingerlanneqartassasoq.
Periaatsit ilisimasanik pitsaanerpaanik tunngavillit atorneqartassasut.
Peqqinnissakkut sullissinermi inuup, ilaqutariit nunaqqatigiillu piginnaassusii
ilanngullugit iluaqutiginiarneqartassasut.
Peqqinnissaqarfiup aaqqissuunneqarnerani
nangittumik nalilerneqassasoq, Nunatta immikkoortuini, Avannaani, Qeqqani
Kujataanilu napparsimmaveqarnikkut isumannaallisaanerit annertunerusut
aqqutigalugit. Aammalu ilanngullugit nalilersorneqassasut akisussaaffiit
pisussaaffiillu peqqinnissaqarfimmi atuutsinneqartut, tamatumani ilaatigut
kigutilerinermi pissutsit, pisariillisaanerit, akikillisaanerit
kiffartuussinerillu pitsanngoriartinneqarnissaat aallaavigalugit naliliiffigineqassasut.
Siumumiit taakkartukkavut tunngavigalugit nalunaarusiaq imatut naliliiffiginiarparput.
Nunap immikkoortuini peqqinnissaqarfiup
eqiterneqarnissaa pillugu suleqatigiissitap oqaatigaa tassa, tamatuma
tuaviuuttariaqalerneranut pissutaasoq, ullumikkut ajoraluartumillu siunissami
naatsorsuutigineqarsinnaammat peqqinnissaqarfimmi nakorsat, juumuut,
peqqissaasut il.il., atorfiinik inuttaliisarnissani
ajornartorsiuteqartuarnissaq, tamanna Siumumiit tunngaviatigut paasilluarparput.
Siumumiillu anguniartuarusupparput peqqinnissaqarfiup suliarinninnissamut
sullissinikkullu neqeroorutigisinnaasaat patajaallisarnissaat, tassungalu
peqatigitillugu suliarinnittarnerup pitsaassusaata
qaffasinnerulersinneqarnissaanik qularnaarinninnissaq, Nunatsinnilu innuttaasut
aamma pilattaasartunit pikkorissunit sungiussilluarsimasunillu sapinngisamik
suliarineqarsinnaasarnissaat. Ullumikkut suliaritissallutik utaqqisut
ikiliartoratik amerliartornerat Siumumiit akuersaarsinnaannginnatsigu, neriuutigaarput
Nunap immikkoortukkaartunik aaqqissuussinerup siunertatut pingaarnertut
suliassatut anguniassagaa, pilattaasarnerit nakorsanik immikkut ilinniagalinnik
suliarineqartartut, ilaatigut atortorissaarutinik pisariaqartitanik pilersuinikkut
ataavartumik ingerlanneqalersillugit. Soorlu nalunngikkipput innuttaasunit
assut iluarisimaarneqartoq, ukiuni kingullerni nakorsat immikkut
ilisimasallit, Avannaani Kujataanilu isileritittussanik napparsimmaviit
arlaanni suliaritittussanik eqiterititsillutik passussisimasut aallaavigalugit.
Siumumiillu pingaartipparput, passunneqarnerup sapinngisamik Nunatsinni
ingerlanneqalernissaa, ingerlatsinerup qitiusumik Dronning Ingrid
Napparsimmavissuaniit aqunneqarnissaa, Naalakkersuisunit sulissutigneqarnissaa
Siumumiit kaammattuutigaarput. Passunneqartartussat Nunatsinni nunani
allanulluunniit plattikkiartortassagaluarpata.
Siumup siunertarimmagu, katsorsaaneq
sapinngisamik najugaqarfik qimannagu ingerlanneqartassasoq, taamaattumik
massakkut Nunatsinni peqqinnissaqarfiit 17-usut, qujanartumik amerlanersaat
atortorissaareeqisut, suli annertunerusumik atorluarneqarnissaat ilaatigut
nakorsat ilaatigut nakorsat immikkut ilisimasallit, passunneqarnissaminnut
utaqqisunik piffinnut assigiinngitsunut suliarinnikkiartortarnerat, ullutsinni
ingerlanneqareersoq, Siumumiit periarfissaqartillugu ingerlatiinnarneqarnissaa
kissaatigaarput. Napparsimasormi ilaquttani qanillugit passunneqarnissaminik
pisariaqartitsisarpoq, ilaqutaasullu aamma pisariaqartittarpaat qanigisamik
napparsimanerani najussallugu. Siumumiillu aamma siunertarinngilluinnarparput,
massakkut nakorsaqarfiit nakorsaarutsinneqarnissaat. Anguniartuarparput
innuttaasut peqqissut suleqataarusuttut, taamaattumik tamatigut
periarfissaqartariaqarput toqqissisimallutik najukkaminni inooqataanissaminnut.
Aammalu meeqqat, utoqqaat, innarluutillit, naartusut eqqarsaatitgalugit
periarfissaqartittuartariaqarput, anniaateqarlutik peqqinngillutilluunniit
misigunik nakorsiarnissaminnut, nakorsamillu misissorneqareerunik qanoq pineqarnissaminnik
paasitinneqajaartarnissaminnik.
Taamaattumik Siumumiit Naalakkersuisut
kaammattorusuppavut piaartumik sulissutigissagaat, peqqinnissaqarfinni 17-usuni
aammalu nunaqarfinni peqqissaasunik atorfeqartitsiffiusuni, ungasissumut
attaveqaatit atorlugit nakorsiartitsisinnaaneq siunertaralugu
atortorissaarutinik pilersuinissaq. Peqqinnissaqarfinni sulisut nakorsiartunik
sullissinermut sakkussatut atorfissaqartilluarmassuk, aammalu
nakorsaqarniarnermut kajumissaataasinnaammat atorfinittussap nalunngikkuniuk,
taamak ittunik sullissinermi atortoqartinneqassalluni, katsorsagassanilu
nalornisoornermi piaartumik nakorsaqatiminik allami najugalimmik, ilaatigut
immikkut ilisimasalimmik, attaveqapallassinnaalluni tamannalu sulisumut sullissamullu
toqqissisimanarluinnartuussaaq. Naalakkersuisut inassuteqaataannut 13-usunut
tunngatillugu Siumumiit isumaqarpugut, taakkartorneqartut
pilersikkiartuaarneranni peqqinnissaqarfinni sulisut, peqqinnissaqarfinni
ataatsimiititaliat aammalu Kommuunit paaseqatigeqqissaarlugit
suliarineqarnissaat. Suleqatigiissitat nassuiaammi aamma oqaatigaat, nassuiaat
uppernarsaaserluakkanik tunngaveqarluni Naalakkersuinikkut sukumiisumik
aalajangiinissamut periarfissiisunik, paasiniaanernik tamatumunnga pisariaqartinneqartunik
imaqanngitsoq. Aamma oqallisissiartaqartoq, sumiiffinni assigiinngitsuni nunalu
tamakkerlugu innuttaasut tamarmik peqataaffigisinnaasaannik,
oqallittoqartuarnissaanik periarfissiissutaasunik imaqartoq. KANUKOKAp
oqaaseqaatiminik aamma tamanna taasimavaa, pingaartillugulu innuttaasut
paasitilluarneqarnissaat. Kiisalu suli allanik paasiniaanissanik
pisariaqartitsineq, tamatumalu malitsigisaanik Naalakkersuinikkut
isummernissat, najukkani assigiinngitsuni ataasiakkaani atorfiit tamakkiisut atortussanngortinnissaasa
allanngortinnissaanni, aningaasatigut kingunerisassaannut tunngassuteqarput,
tamatuma kingunerisaanik assartuisarnernut pisariaqartitsineq, aamma tamatuma
kingunerisaanik sullissinikkut tunngavissani assigiinngitsuni assartuinikkut
tamakkiisumik aningaasaqarniarneq eqqarsaatigalugit.
KANUKOKAp aamma tamakkununnga tunngasut
aaqqinniarneqartussatut uparuarpai, aammalu eqitertitsinerup aningaasanik
atuinerulersinnaanermik kinguneqarsinnaanissaa, soorlu napparsimasunik
angallassinernut, suliaritittussat peruluttut qanigisanik ilaquttanik
ilaqarsinnaanerminnut qulakkeerinniffigineqarnissaat, aammalu angallannikkut
periarfissat, kiisalu sila pissutaalluni angallanniarnerup ajornartorsiutaasarneri
tikkuarsimallugit. Siumumiit Naalakkersuisut nalilersuilluarnissaat
kaammattuutigissavarput, tassami peqqinnissaqarfiup aaqqissuunneqarnissaa
aningaasartuutit amerlinerannit naleqarsinnaasoq piviusunngussagaluarpat,
kisiannili suli sulisussanik amigaateqarneq ajornartorsiutaajuaannassappat,
taava aperisariaqassaagut suna innuttaasunut sullissinermut naleqarnerunersoq.
Aamma ilaatigut eqqarsaatigalugu massakkut pioreersut atorlugit, sulisuttalu
sulisussattalu pinngitsoorata pisariaqartitatta, atugarisaasa atugarisassaasalu
pitsanngorsarnissaannut aningaasaliinikkut sullissinitta
pitsanngoriartinnissaa. Aammalumi nalunngereerparput peqqinnissaqarfimmi
sulisut immikkut ilinniarsimasut, nunani allani aammattaaq amigaatigineqaqisut,
uagullu aningaasarsiatigut unammillersinnaanngikkutta, piaartumik
aaqqiiviginissaa pisinnaagunanngilarput.
Qeqertarsuup Tunuani peqqinnissaqarfiup
eqiterneqarnissaa pillugu Naalakkersuisut inassuteqaataat Siumumiit
taperserpavut, paasigatsigu, sulisut akuerisaannik peqqinnissakkut sullissineq
pitsanngorsarniarneqartoq, siunissarlu eqqarsaatigalugu nakorsaqarniarnikkut
neriulersitsisoq. Aammalu Kujataani peqqinnissaqarfiup tulliulluni
eqiterneqarnissaa pillugu suliap aallartinnissaanut atatillugu, Siumumiit
Naalakkersuisunut kissaatigissavarput, piaartumik Kujataani Kommuunit
Suleqatigiit suleqataanissaannik kaammattuuteqarfigissagaat. Siumumiillu
pingaartillugu ersarissaqqikkusupparput, peqqinnissaqarfiup eqiterneqarnissaa
pillugu, piaartumik innuttaasunut tamanut paasititsiniaanerit
aallartinneqarnissaat. Kiisalu misiliinerup ingerlanneqarnerani
Naalakkersuisut Inatsisartunut ilisimatitsisarnissaat. Taamatut oqaaseqarluta
nassuiaat tusaatissatut tiguvarput.
Anders Nilsson, Atassutip oqaaseqartua:
Nuannaarutigalugu Atassutip paasivaa
peqqinnissaqarfiup eqiteruffeqalernissaata massakkumit
suliniutigineqalerniarnera. Aammalu nassuiaammi tunngavilersorluagaasumi maanna
saqqummiunneqartumi, peqqinnissaqarfiup ukiuni qaninnerni naleqqussarnissaa
iluatsiffiusussatut isikkoqarpoq. Peqqinnissaqarfiup sullissinermini
pitsaasumik innuttaasut piumasaqaataannut sakkortusiartuinnartunut
naleqqussarnissaa pisariaqarpoq. Ajornartorsiutini angeqisuni anguniagassat
tassaapput, utaqqisut allattorsimaffiini maanna allatsissimasut napparsimasut
3.000-tit missaanniilersut. Soorluuna utaqqisuni allatsissimasut ukiumut
400-nik amerleriartartut. Pisariaqalerpoq peqqinnissaqarfiup pissutsinut
allanngortunut, ingammik nakorsat ilinniartitaanerinut, ukiuni kingullerni
10-lini - 15-ni allanngorsimasumut naleqqussarnissaa.
Kiisalu aamma utaqqisuniittut
sulisunillu amigaatigineqartut ajornartorsiutaanerat, Peqqinnissamut
Ataatsimiititaliap nassuiaammini ullumi kingusinnerusumi saqqummiunneqartussami
tikippaa. Nassuiaat tunngavigalugu Naalakkersuisut immikkoortut 13-nit
Inatsisartuni akuerisassanngorlugit inassuteqaatigaat, Atassutip taakku
tunngaviusumik akuerissavai, tassami taakku nassuiaammi siunertarineqartunut
naapertuummata. Eqiterinermi sumiiffiit imminnut suleqatigiinnerulernissaat
siunertarineqarpoq. Immikkoortoq 11-tut siunnersuutigineqarpoq Uummannaq
Upernavillu, Qeqertarsuup Tunuata eqiteruffittut pilersaarusiornerani
ilaatitaanngikkaluarlutik, namminerisaminnik napparsimmaveqaannarnissaat.
Sulisussaaleqilersarnerinili Ilulissani napparsimmaviup taakkununnga
napparsimmavittut toqqammaviunissaa pilersaarusiorneqarpoq. Ilimagaarput
taamatut atuunnissaa ima annertutigiumaartoq, napparsimmaviit taakku marluk
Qeqertarsuup Tunuani eqiteruffimmut ilaalerumaarlutik.
Taamaattumik Atassummit
siunnersuutigissavarput Qeqertarsuup Tunuata immikkoortulersorneqarnissaa,
taamaalilluni Aasiaat Kangaatsiamut, Qeqertarsuarmut Qasigiannguanullu
tunngavittut napparsimmavinngorluni. Ilulissalli Uummannamut Upernavimmullu tunngavittut
napparsimmavinngorlutik. Aallaqqaataanit napparsimmavinni Uummannami
Upernavimmilu sulisut eqiteruffimmi pigaartutut piareersimanissamut
ilaatitaariissapput, pilersaarutaasumik nakorsiartitsinermi atortorissaarutit
(videokonferenceudstyr) pissarsiarineqarnerini.
Immikkoortoq 8-tut
siunnersuutigineqarpoq Dronning Ingridip Napparsimmavissua immikkut
pilaasartoqarfittut akisussaatitaalissasoq, Aasianni Ilulissanilu tunngavittut
napparsimmavinni. Atassut isumaqarpoq, Dronning Ingridip napparsimmavissua
taamaallaat pilaasarfittuinnaq ataavartinnissaa erniinnaq paasineqarumaartoq.
Tamatumani nassuiaammi oqaaserineqartut innersuunneqarput, tassa
pilattaasartunik piareersimasoqartarnermi, innuttaasuni inuit 250.000-tit
tunngaviusartut, sulianik sungiusimanninneq pitsaassuserlu
ataavartinneqassappata. Massakkut Dronning Ingridip Napparsimmavissuani,
sulisunik immikkut ilinniagaqartunik naammattunik sulisoqarniarnerup
isumannaarniarnera ajornartorsiuterpassuaqarfioreerpoq.
Eqqarsaatigigaanni Qeqertarsuup
Tunuani tamakkiisumik pilaasartunik piareersimasoqarnissaq - aammalumi
taamatulli Kujataani - tamanna takorluugarsornerinnaavoq. Najukkani napparsimmavinni
pilaasarfiit siunissami aalajangersimasunik suliassaqarfiusutut, tassalu immikkut
ilisimasallit, utaqqisut ikilisarniarlugit ornigullutik suliassaannuinnaq
atuuttarnissaat naatsorsuutigisariaqassavarput.
Ernisut ajornartorsiutinut ilaapput
puigorneqartariaqanngitsut. Danskit ernisut tungaasigut piumasaqaataat
malissagaluarutsigik, Kalaallit Nunaanni naammassineqarsinnaanngikkaluarpulluunniit.
Ernisussiortup saniatigut - erniniapiloortoqartillugu - pilaasinnaasumik
meeqqallu nakorsaannik aggersaagasuartitsisoqartussaasarpoq. Ajornartorsiut
taanna iluarsiniarlugu peqqinnissaqarfinni ataasiakkaani sulisut
pikkorissartinneqartariaqarput, pissusissamik ernisukkumaartut
erninerliorsinnaajumaartullu piaartumik paasineqarsinnaanissaat siunertaralugu.
Ernineq nappaataanngilaq,
ajornanngippallu angerlarsimaffimmi ilaquttat inigisaanni pisariaqarluni.
Aappaatigulli arnaq naalungiarsullu inoorlaaq erninermi pitsaanerpaamik
sullinneqartussaapput, tamannalu ilaanni aatsaat pisinnaasarpoq,
napparsimmavimmut qaninnermut aallarussigasuarnikkut, immaqaluunnit allaat
Nuummi Dronning Ingridip Napparsimmavissuanut ingerlassinikkut.
Taamatulli pisuni
nakorsiartitsinermi atortorissaarutit - videokonference aammalu telemedicinimik
atortorissaarutit - pissarsiariniagaasut, sulisunik ataavartumik
ilinniartitsinermut pitsanngoriartitsissutaasussaapput, aammalu
pisariaqalerfiani immikkut ilisimasalinnut tusarniaaneq ajornaallissalluni.
Taamatut oqaaseqarluta Atassummit nassuiaat pitsaalluartoq akueraarput.
Maliinannguaq Marcussen Mĝlgaard, Inuit Ataqatigiit oqaaseqartuat:
Nunap immikkoortuini qitiusumik
napparsimmaveqarfiit piorsarnissaannut atatillugu, Jonathan Motzfeldt
siunnersuuteqarmat, Inuit Ataqatigiinniit imaliinnarlugu
akueriumasimanngilarput, taamaaliortoqassappalli kingunissaasa suusinnaaneri
ersarissumik paaseqqaarnissaat kissaatigisimallutigit. Nassuiaammi
maluginiakkatta ersarissut ilagaat, ima ilaatigut allassimasoq: "nalunaarusiaq
manna uppernarsaaserluakkanik tunngaveqarluni naalakkersuinikkut sukumiisumik
aalajangiinissamut periarfissiisunik paasianiaanernik tamatumunnga
pisariaqartinneqartunik imaqanngimmat." Matumanilu maluginiarlutiguttaaq
manna oqallinneq suup tungaanut ingerlanissamut tikkuussinerussasoq, tamannalu
toqqammavigalugu pilersaarusiorneq sukumiinerusoq ingerlalerumaartoq, kiisalu
innuttaasut peqataaffigisaannik oqallittuarnissaq periarfissinniarneqartoq.
Tamannalumi pingaaruteqarluinnartoq Inuit Ataqatigiinniit isumaqarpugut.
Peqqinnissamut Ataatsimiititap
eqiterinissamut atatillugu siorna Norgemi angalanerani maluginiakkat
ersarissut ilagaat, aamma Norgemi sulisoqarniarnikkut
ajornartorsiuteqartoqartoq, taakkulu aningaasaqarnikkut
periarfissarissaarnerunertik toqqammavigalugu, napparsimmaveqarfinni
sulisuminnut annertunerusumik neqerooruteqarsinnaasut. Norgep nunatut
sananeqaataa eqqarsaatigalugu, illoqarfiillu avinngarusimaneri
eqqarsaatigalugit Nunatsinnut annertuumik assiguvoq, tassanilu
peqqinnissaqarnikkut ineriartortitsineq ukiorpassuit ingerlanneqarsimavoq
ingerlalluarlunilu. Napparsimmavissuaqarpoq qitiusumik, universitetimik nakorsanik
ilinniarfittalimmik. Oqaatigneqarporlu nakorsanngorniat ilinniarfiat Norgep
Kujataani Oslomi ataasiinnaangallarmat, tassani ilinniartartut Avannamut
uterumassuseeruttarsimasut, taamaalillunilu Norgep Avannaani annertuumik
nakorsassaaleqisoqartarsimalluni.
Maannali Norgep Avannaani
napparsimmavissuarmi Trĝmsĝmi nakorsanngorniartoqalersinnaalermat, tamanna
nakorsaqarniarnikkut pitsannguallaatigisimaqigaat. Taamaammat eqqarsarnanngitsuunngilaq
Nunatsinni nakorsassaaleqinerup atuuffiani, ajornartorsiut tamanna ilumut
qaangersinnaaneripput, ilinniarnerup tamakkiisup Qallunaat Nunaanni
ingerlattuarneratigut. Maannami qulakkeeqqaneq ajorparput Nunatsinniit
nakorsanngorniat, ilumut Nunatsinnut uternissaminnik pilersaarnersut.
Inuit Ataqatigiinniit isumaqarpugut,
naak nakorsanngorniartut Nunatsinni ilinniarnerminnut atatillugu,
nakorsaanermik peqartillugu praktikkernissamik periarfissaqaraluartut,
eqqarsaatigilertariaqannginnersoq siunissami nakorsanngorniarluni
ilinniarnerup, ilaata Nunatsinni ingerlanneqalersinnaannginnera. Aammami
kalaalerpassuaqartarmat nunarput sivisoorsuarmik qimaqqarusunnagu, Qallunaat
Nunaanni ilinniarnissamik tunuarsimaartartunik. Norgemi maluginiakkatta
ersarissut ilagaat, napparsimmaviit sulisuisalu qanoq atorluarneqartigineri.
Tassami napparsimmaviit utoqqaat illuinut atasut suliarineqarsimapput,
utoqqaallu sapertut ujallumikkullu nappaatillit isumagilluarneqarlutik.
Tagiartuisarfiit, napparsimmavissuarmilu
suliaritissimasut, sivisoorsuarmik illoqarfitsik qimannagu
nukittorsarsinnaanissaat anguniarlugu, illoqarfigisaminni imaluunniit taassuma
qanittuani uninngasinnaasarput nukittorsarneqarlutik. Aamma krĉftimik
nappaatillit qinnguartartittarnerisa inaarutaasup, tassani
ingerlanneqarsinnaanerat periarfissiuunneqarsimavoq. Tamannalumi aamma
napparsimallutik erloqissuteqartunut nukittoqutaasaqisoq oqaatigineqartarluni.
Ullumikkut uagut Nunatsinni utoqqaat
illuisa napparsimmaveqarfiillu, annertunerusumik suleqatigiinnerat
ingerlaneqanngilaq. Taamaattumik Nunatsinni napparsimmaviup tullinnguulluni
suliarineqartussap, utoqqaat illuanut atasumik suliarineqarsinnaanissaa,
periarfissiuunneqartariaqartoq Inuit Ataqatigiinniit isumaqarpugut.
Tamatumanimi sulisunik atorluaanerup saniatigut, innuttaasunut sullissineq
pitsaanerulersittussaammagu. Tamannalumi Naalakkersuisunit ilassilluarneqartoq
maluginiarparput. Tassanilu Qeqertarsuup Kommunalbestyrelsiata misiliutitut
atorneqarnissartik qinnutigisimavaat, piviusunngussappalli pisariaqavilluni
napparsimmavissaq, allamut inissinnagu utoqqaat illuata qanittuanut
inissinneqarnissaa.
Taamatut inissiinermi
tagiartuisartoqarfimmillu pilersitsinermi, utoqqaannaanngitsut aammali
innarluutilit sullinneqarnerat pitsanngoriartussaassavoq, taakkulu saniatigut
napparsimmavinnut allanut oqilisaatitut, Qeqertarsuup Tunuani
ikioqatigiilluarnikkut, immikkut tagiartuinermik pisariaqartitsisut
nukittorsarneqarsinnaanngussallutik. Soorunami taamatut aaqqissuussiniarnermi
Kommuuni, peqqinnissaqarfiup, innarluutilinnillu immikkoortortaqarfiup
ikioqatigiilluarnissaat pisariaqarpoq. Nassuiaammimi aamma soorlu
ersersinneqartoq, siunissami Nunatsinni utoqqaat amerligaluttuinnartussaapput,
taakkulu ukiorpassuarni suleroruloreerlutik toqqissisimallutik utoqqalinissaat
piareersimaffigalugulu qulakkeerniartariaqarparput. Pioreersut atorluarnerisigut
allanik nutaanik annertunngikkaluanik ilallugit.
Norgemiinnitsinni malugianiakkatta
ilagaat, Norgemiut pingaartilluainnaraat sapinngisamik najugaq qimannagu
ernisinnaanissaq, erninissaq ernumanartoqartinnagu. Tamatumammi
nassatarisarmagu ernisussap toqqissisimanerunera, avatangiisit ilaquttallu
takoriaannaallugit. Aammali tamatumani periarfissat sulisussallu qanoq
inissisimanerat isginiarneqartartoq, allatullu ajornartumik ernisussap
navianartorsiorsinnaanera aarleqqutigineqartillugu, napparsimmavissuarnut
ingerlanneqartartoq.
Inuit Ataqatigiinniit ungasissumut
attaveqaatit atorlugit nakorsiartitsisinnaalernissat tapersersorpagut, imaanngitsoq
nakorsaarunnissaq siunertaralugu. Ungasissumut attaveqaatit atorlugit taakkulu
iluaqutitut, nappaatit immaqa kingusinaarlutik ilisimaneqalertussaagaluit
qulakkeersinnaassammagit atorluarnerusariaqarparput, taamaalillunimi aamma
misissortikkiartorluni angalasarnerit ilaat pisariaarutissagaluarmata.
Norgemilu maluginiakkatta ilagaat,
Norgemiut napparsimmavii pilattaanissamut, assiliinissamut assigisaanullu
atortorissaaruteqannginneri. Uagulli Nunatsinni napparsimmavinni tamani tamakku
pigaavut, taamaattumillu siunissami atorluarnissaat aamma siunniuttariaqarluni.
Soorlu suliaritittussat tikillugit suliariartortarneratigut. Norgemiut
siuarsimanerannut ilaaqataalluinnarpoq napparsimmaveqarfiat, nammineq
arlalinnik piareersimajuartunik timmisartuuteqarmat qulimiguulimmik, allaallu
qulimiguulik nakorsiartarfiup qaanut missinnaalluni, tassa Trĝmsĝmi
napparsimmavissuarmi. Uagut tamakku piginngilagut, taakkulu saniatigut,
illoqarfinniit illoqarfinnut tassa Norgemi biilertoqarsinnaalluni.
Taamaattumik Norgemiut
angallannikkut uagutsinnit periarfissarissaarneroqaat, taamaattumillu
Nunatsinni qanorluunniit allanngortiteriniartigigaluarutta, Kommuuneqarfiit
tamarmik minnerpaamik ataatsimik nakorsaqartuarnissaat, siunnerfiusariaqartoq
Inuit Ataqatigiinniit isumaqarpugut. Aammalu qanoqluunniit
ilisimatuussutsikkut sullissivinnit, soorlu Danmarkimi Peqqinnissamik
Aqutsisoqarfiup, Sundhedsstyrelsip, oqaatigisimagaluarpagu pilattaasarnermik
sullissiniarnermi inuit 200.000 - 250.000-tiusariaqartut, qulaani taasatsitut
erseqqissaatigisariaqarpoq, Europamiunut uagut nallersuunneqarsinnaannginnatta,
avinngarusimanerput angallannikkullu pissutsit eqqarsaatigalugit.
Suleqatigiissitamit
innersuussutigineqartut periarfissat 3-ngasut nalunaarusiamiittut
tikitsinnagit, Inuit Ataqatigiinniit ajuusaarutigissavarput
ilimasaarutigineqarsimagaluartutut, Peqqinnissamut Ataatsimiititap matumani
ataatsimiinnerup ingerlanerani Qeqertarsuup Tunuanut angalasinnaannginnera.
Tamatumanimi sumiiffiit tikillugit
tusarniaanissat pisariaqavimmata, Inuit Ataqatigiinniilli neriuutigaarput
tamanna ukiamut ataatsimiitsinnata piumaartoq. Nunatsinni nappaatit ataatsimut
isigalugit maluginiakkatta ilagaat, ullutsinni nappaataasartut annertuumik
aamma qanoq inuuneqarnermik ulluinnarnilu atukkanik toqqammaveqartartut.
Inuutisssarsiutit artornarneri, inilunneq, anartarfeqarnikkut
eqqaaveqarnikkullu pissutsit, imeqarniarneq, suliffissaaleqinerit,
pujortarpallaarnerit imerpallaarnerit, eqqiluisaarnermullu attuumassuteqartut allat.
Inuit Ataqatigiinniillu
maluginiakkatta ersarissut ilagaat, oqaatigineqarmat sumiiffinniit sumiiffinnut
peqqinissakkut periarfissarititaasut assigiinnginnerujussui aamma tamatumani
patsisaaqataasut. Tassa imaappoq inuit peqqissusaat pitsanngortinniarutsigu
atugassarititaasut naligiissaarnerusariaqarput. Nalunaarummi aarlerinartut
ilagaat, Nunatsinni krĉftimik nappaateqalersartut amerliartuinnarneri.
Taamaattumik nappaaterpassuit assigiinngitsut akiorniarnerini, pisariaqarluinnarpoq
sumiiffinni Kommuunit peqqinnissaqarfiup innuttaasullu qanimut
suleqatigilluinnarnissaat.
Taamaattumik aammaarluta,
sumiiffinni Peqqinnissamut Ataatsimiititat isumasioqatigiisinneqarlutik
pikkorissartinneqarnissaat qaqugu pissanersoq apeqqutigerusupparput, tassami
tamanna 1996-mili Inuit Ataqatigiinniit Inatsisartunut siunnersuutigineqarmat,
Inatsisartunit tamanit akuersaarneqarluni. Ilami peqqinnissaqarfiup
innuttaasullu suleqatigiinnerunissaat anguniaraanni, tamakku
ingerlalluarnissaat aqqutissiuunnissaallu pisariaqavissormat. Ukiut 10-lit
qaangiuppata inuttussusissatut naatsorsuutinut atatillugu aamma
paaserusunnarpoq, suut toqqammavigalugit tamakku eqqoriarneqarsimanersut.
Tassami tassani ersersinneqarmat, Aasiaat, Qasigiannguit Qeqertarsuarlu
inukilligaluttuinnassasut, Ilulissat Kangaatsiarlu inuttusiartorlutik.
Suut napparsimmaviit sorlernut
atanissaannut tunngatillugu aamma apeqqutigerusupparput, suna patsisigalugu
Qeqertarsuaq Ilulissat napparsimmavianut atasussanngorlugu inissinneqarsimanersoq,
uffa massa Qeqertarsuaq Aasiannut qaninnerungaartoq. Maluginiakkatta ersarissut
ilagaat, taamatut pilersaarusiornermi aningaasaliissutit amerlinnginnissaat
aamma aallaavigineqarsimammat. Suleqatigiissitanit siunnersuutaasut 3-ngasut
qiviassagutsigit, tassani taaneqartoq pilersaarut annikinnerusoq,
ernisitsisinnaanerit pilattaagasuarsinnaanerillu pisussaaffiit Qasigiannguaniit
Qeqertarsuarmiillu peerniarneqarput,
ullumikkut inuttassaaleqinermi pissutsit erloqinartut
patsisaatinneqarlutik. Oqaatigneqarporlu taamatut iliorniaraanni,
eqiteruffiusuni atorfiit amerlineqartariaqartut.
Siunnersuutip aappaatut nunap
immikkoortuani eqiteruffiusussamik pilersaarummi oqaatigineqarpoq,
allaffissornikkut ingerlatsinerit ataatsimoorussamik eqiteruffiusuni
ingerlanneqalissasut. Tassalu tamatumani pineqarlutik Upernavik, Uummannaq
Qasigiannguit Qeqertarsuarlu. Tassanilu oqaatigineqarpoq, Qeqertarsuaq
Qasigiannguillu nakorsaarullutik sygeplejerskinik ingerlanneqalissasut. Tamanna
Inuit Ataqatigiinniit akuersaarsinnaanngilluinnarparput. Qanoq ilillutik
illoqarfiit 1000-tit sinnerlugit inullit nakorsaqanngilluinnarsinnaappat.
matumanilu Norgep Avannaa eqqaaneqarsimammat eqqaasitsissutigissavarput, taakku
napparsimmavii arlalinnik immikkut qulimiguuliuteqarlutillu, illoqarfiit
aqqusinertigut imminnut attaveqarfigisinnaammata. Taamaammat
nakorsaarutsitsiniarnermik siunnersuiniarneq akuersaarneqarsinnaanngilaq.
Silarsuup qanoq ittarnissaa naalagaaffigigaluaraanni immaqa, kisianni arlaannik
ajutoortoqartillugu nakorsamik piareersimasoqarnissaq, innuttaasut
toqqissisimanerannut apeqqutaaqataalluinnarpoq.
Siunnersuutip 3-juattut,
ineriartortitsinissamik pilersaarut Qeqertarsuup Tunuani nunap immikkoortuani
aqutsisoqarfimmik pilersitsinissaq, ullumikkutulli inuttalersorneqarnikkut
ingerlaannarnissaq innersuussutigineqarluni. Tassanilu Peqqinnissaqarfimmi
Iluarsaaqqinnermut Ataatsimiititaliarsuarmik pilersitsisoqarnissaa aamma
innersuussutigineqarpoq. Peqqinnissaqarfiup nutaamik aaqqissuunneqarnissaanut
atatillugu, suliffiit 10,3 tassa atorfiit nuunneqarnissaat takorloorneqartoq
oqaatigineqarpoq. Tamatumani atorfiit suut, suminngaanneersullu nuunniarneqalersaarpat.
Ukiuni kingullerni inuiaqatigiinni allanngortiterinerit, oqilisaanissamik
pitsanngorsaanissamillu siunertaqartut annertuumik illoqarfiit ilaannut
sunniuteqarnerluttarsimapput, ilaatigut illoqarfiit ilaasa
inuerukkaluttuinnarnerinik kinguneqartartumik. Suliffiit illoqarfinnut
ataasiakkaanut inissaaleqiffioqisunut, meeqqanullu
paaqqinniffissaaleqiffioqisunut nutserneqartarsimapput.
Matuma siunnersuutip
allaqqunneqarsinnaanngitsutut saqqummiunneqartup, aamma tamanna
kingunerisussaavaa. Taamaattumik innersuussutigineqartut, ullumikkut
nakorsaqarniarnermi sullissinikkut allannguuteqartussaanngikkaluartut,
nakorsalli akisussaaffiinik oqilisaanermik siunertaqartut paasilluarlugit,
Inuit Ataqatigiinniit akuersaassagutsigit isumaqarpugut, illoqarfiit
allaffissornikkut inuttakillisaavigineqartussat, soorlu Qasigiannguit
Qeqertarsuarlu, allatigut peqqinnissap iluani pitsanngorsaatinik
ineriartortitsiviusariaqartut. Soorlu misiliutissatut Qeqertarsuup Kommuuniata
kissaataatut ittumik. Tassami Inuit Ataaqatigiinnii isumaqarpugut, Norgemi
periuseq assileqqissanngikkaluarlugu, atorsinnaasagut nunatsinnut
naleqqussarlugit ingerlanniartariaqarigut. Taamatut allanngortiteriniarnerup
ullumikkut sinerissami tamarmi sulisussaaleqinerujussuaq aallaavigaa,
sulisunillu atorluaanissaq aallaavigineqartoq ilaatigut aamma oqaatigineqarpoq.
Soorunami tamanna Inuit
Ataqatigiinniit paasilluarparput, matumanili allannguiniarnermi
pingaarnerpaatut taasariaqarsoralugu uagut tungitsinniit nutarteriniaraanni,
allannguiniarneq innuttaasunik sullissinermik
ajornerulersitsisoq ujartortariaqanngitsoq, illuatungaaniilli pitsanngorsaatissanik
nassataqartariaqarluni. Immikkullu innersuussinermi Inuit Ataqatigiinniit nuannaarutigalugu
oqaatigissavarput, Kangaatsiap Kommuuniata aamma nakorsaqalernissaa matumani
siunniunneqarsimammat. Ataatsimut tmakku tamasa isigalugit Naalakkersuisunut
innersuussutaasuni, nakorsaarutinnginnissamik innersuussineq
tapersersorparput, maannamullu pissusiviusut toqqammavigalugit
innersuussutaasut, sumiiffiit pineqartut tikillugit oqallisigineqarlutillu
nalilersorneqarnissaat innersuussutigissuarput. matumanimi Kommuunit
eqqorneqartussat ernumaneri, Inuit Ataqatigiinniit paasilluaratsigit,
innuttaasut tamakku oqallisigilluarnissaat pisariaqartutut isigaagut.
Bjarne Kreutzmann, Akulliit Partiiat:
Qeqertarsuup Tunuani Peqqinnissaqarfiup
eqiterneqarnissaa pillugu nassuiaat soqutigalugu misissuataarsimavara.
Peqqinnissaqarfiup nunap immikkoortukkuutaartumik aaqqissuunneqarnissaanik,
suliap ingerlaqqinnissaanik Naalakkersuisut 1996-mi neriorsuutigisimasaat
matumuuna pisoq iluaralugu akuersaarpara. Paasivara, Ilulissat aamma Aasiaat
peqqinnissaqarfii toqqarneqarsimasut napparsimmaveqarnikkut eqiteruffissatut,
isumaqarpungalu tamanna pissusissamisuuginnartumik toqqaanerusoq, tassa
taamatut kaammattuuteqarnerit tassaammata pissutsinik ulluni makkunani
atuutunik aalajangersaanerit. Isumassarsiaq ajunngivissoq tamakkiisumik
taperserpara, tassa siunnersuutit isumassarsiallu arlaqartut tunngavigisamikkut
imarisamikkullu, Nunatta Kujataani nunap immikkoortukkuutaartumik
aaqqissuunneqarnissaanut nuunneqarsinnaassasut. Saqqummiussissummi
immikkoortuni 1-miit 13-mut akuersissutigineqartussatut inassutigineqartut,
tusarniaanermik tunulequtaqartut, saqqummiussissummi taagorneqareermata
immikkut taagornagit oqaatigiinnassavara, tamakkiisumik isumaqatigigakkit
taamaalillungalu nassuiaat tusaatissatut tigullugu.
Anthon Frederiksen, Kattusseqatigiit:
Qeqertarsuup Tunuani Peqqinnissaqarfiup
eqiterneqarnissaa pillugu nassuiaat soqutigalugu kattusseqatigiit sinnerlugit misissorsimavara
imatullu oqaaseqarfigissallugu:
Kattusseqatigiinniit ilisimavarput
Nunatsinni Peqqinnissaqarfiup iluani annertuumik ajornartorsiuteqartoqartoq,
ukiunilu makkunani aamma annertuumik nakorsassaaleqisoqarlunilu sygeplejerskinik,
juumuunillu aamma annertuumik amigaateqartoqartoq. Taamaattumik Kattusseqatigiinniit
isumaqarpugut, Peqqinnissaqarfimmi sulisussaaleqinermut patsisaasut
pingaarnerit ilagigaat akissarsianut tunngasut, nalinginnaasumillu Nunatsinni
atorfeqartitaanermut atatillugu atungassarititaasut, ilaatigut pitsaanerpaanut
ilaanngitsut, naalakkersuinikkullu iluarsisariaqartut siulliullugit
aaqqinniarneqartariaqartut.
Soorlu assersuutigalugu:
pikkorissartitseqqittarnerit, meeqqerivinniititsisarnernut tunngasut,
suleruluttitaasarnernut tunngasut, allallu peqqinnissaqarfiup iluani
ajornartorsiuterpassuarnut, imaannaanngitsut ullutsinni atuutilersimasunut
tunngasut. Kattusseqatigiinniillu aamma isumaqarpugut, Danmarkimi pissutsinut
assersuussiinnarluni Nunatsinni peqqinnissaqarfimmi pissutsinik
iluarsiiniartoqarsinnaanngitsoq. Tassami Naalakkersuisunit assersuutitut
ilaatigut atorniarneqarput, Danmarkimi Peqqinnissamik Aqutsisoqarfiup,
ilisimatuussutsikkut sullivinnit assigiinngitsunit siunnersuinerit
tunngavigalugit inerniliussimasaa, tassa Danamrkimi innuttaasut 200.000-tit
250.000-tit akornanni amerlassusillit ikinnerpaaffiusariaqartut,
pilattaasarnikkut sullissinerup pitsaassusissaa qularnaarneqassappat. Inuit
taama amerlatigisut Nunatsinni tunngavigissallugit qanillineqarsinnaanngikkaluarpataluunniit,
kisitsisinnaaneq naatsorsuisinnaanerlu pisariaqarput, tassami Danmarkimi inuit
pineqartut Danmarkip inuisa 3-4 %-terivaat, taamaattumillu taakku
assersuutigineqassappata Nunatta inuisa 3-4 %-terivaat, tassalu illoqarfiit
1700-jut 2200-llu akornanni inullit, pilattaasarnikkut sullissinerup
pitsaassusissaa qularnaatsumik tunaartaralugu, sullinneqarsinnaajuartariaqartut
Kattusseqatigiinniit kaammattuutigissuarput.
Tassami illoqarfiit minnerit,
nunaqarfiillu minnerpaamilluunniit kissaatiginngilaat, Peqqinnissaqarfimmit
ullumikkut kiffartuunneqarnermik naammanngereeqisup ajorseriaqqinnissaa. Taamaattumik
kattusseqatigiinniit paasilluarsinnaavara, illoqarfinni mikinerusuneersut
nunaqarfimmiullu ilaatigut, Peqqinnissaqarfimmiit kiffartuunneqarnissamikkut
ajorseriartoqarnissaa aarloqqutigimmassuk.
Uangalu Anthon Frederiksen isumaqarpunga,
peqqinnissaqarfimmi nakorsanik, peqqissaasunik, juumuunik il.il.
atorfinitsitsiniartarnerup ajornartorsiutaanera, peqqinnissaqarfiup
eqitertinneqarnerinnaatigut qanngerneqarsinnaanngitsoq. Tassa eqitertitsineq
ajornartorsiutinik qaangiiniarnermi qulakkeerinngimmat. Ilanngullugulu
eqqaasitsissutigissuara, qinersisartunik ataatsimiisitsisaqattaarlunga
angalaartarnerma ilaanni qinersisartut ilaasa, Naalakkersuisunut imatut
apuusseqqusimmannga: "allanngortiterivallaarunnaarniarlinngooq" -
tassa sulisitsisugut taama oqariartoqqusipput. Taamaattumik Kattusseqatigiit
ilungersortumik kaammattuutigissuara, Peqqinnissaqarfimmi sulisunut
atugassarititaasut, atorfinitsitsinermilu neqeroorutigineqartartut, nalinginnaasumillu sulisunut
atungassarititaasut siulliullugit pitsaanerulersinniarlugit naalakkersuinikkut
iliuuseqartoqassasoq.
Inuiaqatigiit suliffeqarfiutaanni
naalakkersuinikkut allanngortiterinikkut kukkussutaasimasut milliard-tit
pallillugit, kalaallinut inuiannguanut akeqartut ilinniarfigisariaqarpavut,
taamaattumik apeqqusertariaqarpoq: allanngortiterinissap qanoq
kinguneqarnissaa ilisimanngisarput, aamma qanoq akeqassanersoq ilisimanatigu
akueriinnassanersugut - imaluunniit nakorsat, peqqinnissaqarfimmilu sulisunut
atungassarititaasut pitsanngorsarneqarnissaat siulliutissuaguut. Uanga
miserratigissanngilara, Peqqinnissaqarfimmi sulisunut atungassarititaasut
siulliullugit iluarsineqarnissaat sulissutigisariaqartoq
kaammattuutigerusukkakku.
Nunaqarfinnimi, illoqarfinnilu
mikinerusuni peqqinnissaqarnikkut kiffartuussinerup ajornerulersinneqannginnissaa
sulissutigineqassappat, tamannami apeqqusertariaqanngilarluunniit, aammalu nakorsanik
tamatigoortunik piginnaanilinnik pisariaqartinneqaqisunillu pissarsiniassaguta
apeqqutit ikittuinaapput, tassalu aaqqiiniarnissamut aqqutissat siulliit
ilagisariaqarpaat akissarsiatigut, nalinginnaasumillu sulisunut
atungassarititaasut naalakkersuinikkut iluarsiiviginiassallugit.
Peqqinnissaqarfiup sullissinerata
eqaallisarneqarnissaa namminermini akornutissaqarsorinanngikkaluarpoq,
kisianni nakorsat isumasioqatigiisinneqarsimasut, sulisullu arlallit eqiterinissaq
isumaqatiginngikkaat malunnarpoq, allaammi nakorsaanerit ilaasa maannakkut
nakorsaqarfiusut nakorsaqarfittut inissisimajunnaarsinnaanerat, taamaallaalli
niviarsiaqarfittut inissisimalersinnaanerat annilaangassutigigaat paasinarpoq.
Taamaattumik Kattusseqatigiinniit
Qeqertarsuup Tunuani napparsimmaveqarfiit eqiterneqarnissaannik pilersaarusiaq
isumaqatiginanngilluinnarpoq, tassami taamatut akuersisoqassangaluarpat
Diskobugtimi illoqarfiit amerlanerit napparsimmaveqarfii
peqqissaasoqarfiinnanngortinneqarnissaat aarloqqutigisariaqarmat, tamatuamlu
kingunerisa qitiusumik napparsimmaveqarfimmiit nakorsatigut isumagineqarneq.
Tamannalu illoqarfinnut pineqartunut toqqissisimananngilluinnarpoq.
Qularnanngilarlu taamatut aaqqissuiniarneq illoqarfinnut, nunaqarfinnullu
pinngitsoorani eqquinerluttussaavoq,
kiammi illoqarfik najorumassuaa, ulloq unnuarlu nakorsaqarfiunngitsoq.
Taamaattumik Kattusseqatigiinniit paasisinnaalluarpara, ilaatigut
Qasigiannguani innuttaasut peqqinnissaqarfimmit sullinneqarnerup
ajorseriannginnissaa, illoqarfimmi nakorsaqartuaannarnissaa, illoqarfimmilu
nakorsiarsinnaajuarnissaq qulakkeerniarlugit atsiornerit 560-sit katersorsimammatigit.
Asuliinnarmi innuttaasut taamatut qisuariaateqarneq ajorput.
Kattusseqatigiinniillu aamma akuersaanngilarput, ernisarnerit tamatigut
eqiteruffiusumi pilersinnaanerat, tassami erninermi ilaqutaasut najuuttarnerat
erniniartumut aamma annertuumik pingaaruteqartarmat. Taamaattoqassangaluarpammi
erninermi, ilaqutaasut qanigisaasullu erninermi peqataasinnaanerat annertuumik
killilerneqassammat, aamma anaanaasumut ilaqutaasunullu toqqissisimanassanani,
taamaalillunilu pilersinneqassooq toqqissisimannginneq.
Taamaattumik tamakku tamaasa ilarpassuilu
eqqaaneqanngikkaluartut ilanngullugit eqqarsaatigalugit, ullumikkut pissutsit
ilaatigut ajoreeqisut ajornerulinnginnissaat qulakkeeqqaarnissaat
Kattusseqatigiinniit kaammattuutigaarput.
Siuliani taagukkakka
naammassineqarsinnaappata Kattusseqatigiinniit Qeqertarsuup Tunuani siunissami
peqqinnissaqarfiup qitiusumik nunap immikkoortuini, ullumikkorniit
pitsaanerusumik akikinnerusumillu sullissisinnaanera takorloorneqarsinnaasoq
ilimagaarput. Tassami taamatut iliuuseqarniarneq najukkami pissutsinik
ajornerulersitsissanngippat, aatsaat akuersaaqataasinnaavugut. Tamannalu
aatsaat anguneqarsinnaasoq Kattusseqatigiinniit takorloorsinnaavarput -
ullumikkut peqqinnissaqarfimmi ajornartorsiutit amerlanerit
aaqqiivigineqaqqaareerpata. Tassami aaqqissuussineq taamaattoq nakorsanik immikkut
ilisimasalinnik, allanillu peqqinnissaqarfimmi sulisussanik amerlanerusunik,
Qeqertarsuup tunuani sulisussanik pisariaqartitsisussaavoq.
Apeqqutaalluinnarumaarporlu aningaasat
suminngaanniit aaneqarumaarnersut, tassami ullumimut suluusalinnut
mittarfiliortiternernut, Namminersornerullutik Oqartussat suliffeqarfiutaasa
illoqarfinniit illoqarfinnut uteqattaartillugit
nooqattaartinneqaqattaarnerannut, naassaanngitumik allaffissornermut
aningaasarpassuarnik atorneqarnerinut allannguallatsikkumaneqanngillat, uffa
massa sunaluunniit alloriarneq aningaasatigut tamatigut naleqartartoq.
Qitiusumimmi Avannaani Kujataaniluunniit napparsimmaviliortoqarsinnaanngilaq
nakorsassaqanngippat, imaluunniit peqqinnissaqarfimmi sulisussaqartinnagu.
Ilimananngilarmi siunissami takornarissanik nakorsaqalersinnaanerput. Kiisalu
Qeqertarsuup Tunuani peqqinnissaqarfiup eqiterneqarnissaa pillugu
nalunaarusiami, ilaatigut Qasigiannguani nakorsaanerup uparuagai,
Kattusseqatigiinniit tamakkiisumik taperserpagut, taannami oqarmat
napparsimalereersunik katsorsaaneq eqqarsaatigalugu pitsaassuseq, kiisalu
ineriartornermut nukittuujunissamullu periarfissat siuariartissangai, kisianni
tunngaviusumik peqqinnissakkut sullissineq pilliutigalugu. Ilaatigut aamma taanna
oqarpoq, Qeqertarsuup Tunuani innuttaasut annerusumik oqallinnissamut
periarfissinneqarsimanngitsut, pingartumillu napparsimmaveqarfiup tungaaniit
oqariartuutigineqarsimanngillat suut allanngortinniarneqarnersut.
Taamaattumik Kattusseqatigiinniit kaammattuutigissuarput,
innuttaasut tikillugit annerusumik oqallinnermut peqataatinneqarnissaat
ingerlanneqaqqaartariaqartoq, immikkut allanngortiterinerit
aallartinneqannginnerini. Ilisimavarpummi Peqqinnissamut Naalakkersuisoq,
ukiarmi Qeqertarsuup Tunuani ataatsimiisitsisarsimasoq, kisianni oqallinnerup
annerusup ingerlanneqarnissaa kissaatigaarput. Naggataatigut Inatsisartunut
ilaasortat Ruth Heilmannip Niels Mátâllu siunnersuutaat
paatsuunngilluinnarlugit tamakkiisumik tamaasa taperserpakka.
Marianne Jensen, Peqqinnissamut,
Ilisimatusarnermut, Avatangiisinut Pinngortitamullu Naalakkersuisoq:
Siullermik qujassutigerusuppara taama
sukumiitigisumik, aammalu pitsaatigisumik tunniusimallunilu Inatsisartuni
oqaluttuni una sammineqarmat, aammalu malunnarluni peqqissaartumik
soqutigalugulu malinnaavigalugulu atuarneqarsimasoq. Maluginiarpara
tunngaviusumik isummat, tassa aallartisarnissamut kissaateqarneq
Naalakkersuisut kissaateqarnerat aammalu ineriartortitsiartuaarnissamut
aallartisaanissaq massakkut, partiit oqaluttuininngaanniit isumaqataaffigineqartoq,
aammalu paasilluarneqartoq tassunga suut taamaaliortariaqarnermut patsisaasut.
Kisiannili maluginiarlugu aamma Kattusseqatigiinninngaanniik tamanna
isumaqatigineqanngitsoq, kisianni tamanna kingusinnerusukkut
uterfigiumaarpara.
Massakkut siullermik partiit ataasiakkaat
oqaaseqartui oqaaseqarfigissavakka. Takisuuliorna-veersaarlunga
annertoorujussuarmik oqaaseqarfigerusunnaraluartut, sapinngisamik naatsumik
oqaaseqarfiginiarsarissavakka. Siumup oqaluttuaninngaannit ilaatigut
pingaartinneqarpoq, passunneqartarnerup sapinngisamik Nunatsinni
ingerlanneqarnissaa, aammalu ingerlatsinerup qitiusumik Dronning Ingridip
Napparsimmavissuaniik aqunneqarnissaa, tamannalu Naalakkersuisunut
kaammattuutigineqarpoq sulissutigeqqullugu. Tassa aamma naalakkrsuisut
oqariartuutaani tamannarpiaq siunertaavoq, taamaattumillu tassa tassuunakkut
aamma suliap ingerlateqqinnissaa uppernarsassavara, pilattarneqartussat
immikkullu suliarineqartussat ataatsimik aqutsisoqarfigineqarnissaat, taanna
Naalakkersuisuni aamma orniginartinneqarnerpaatut isigigatsigu, tamatumalu
piviusunngortikkiartuaarneqarnissaa aamma siunertaralugu.
Peqqinnissaqarfinni 17-usuni qujanartumik
atortorissaartuni, sapinngisamik passussisarnerit aammalu pilattaasarnerit
ingerlanneqaannartarsinnaanissaannik aamma Siumup oqaluttua oqariartuuteqarpoq.
tassanilu aamma kingusinnerusukkut oqaatigalugu, periarfissaqartillugu tamatuma
ingerlatiinnarneqarnissaa kissaatigineqarluni. Tassa taanna aamma
Naalakkersuisuni uppernarsarsinnaavarput tamanna aamma siunertarineqarmat.
Tassa kisianni tassani oqaatigissavara, ilaatigut
atortorissaartorsuugaluarlutik napparsimmaveqarfiit assigiingitsutigut
qinnguartaanikkut allatigullu, tassani paasineqartariaqarmat, aamma una
ilisimajunnaartitsisarnikkut atortorissaarutit massakkut atorneqartut, nunani
allani atorneqarunnaariartuinnarmata, aammalu assersuuttakkatsinni
sanilliuttakkatsinni, soorlu Danmarmikkunni massakkut tamakkua atorneqarunnaartutut
oqaatigineqarsinnaapput.
Taamaattumillu nunatsinni
napparsimmaveqarfiit tamaasa nutaanik ilisimajunnaartitsinikkut
atortorissaarutinik, pilersussanngikkutsigit taava tassuunakkut aamma
isummertariaqassaagut, suut allanik pielrsussallutigit aammalu suut immaqa
massakkut atuutereersut sapinngisamik atorlugit ingerlatsiviusinnaassanersut.
kisianni tamakkua aamma suleqqinnermi qulaajarneqassapput, kisiannili
naapertuuppoq Naalakkersuisut kissaatigisaannut, tassa passussinerit nakorsiarsinnaanerillu
sapinngisamik angerlarsimaffimmut qanittumi suliarineqarsinnaalernissaat,
tassanilu Dronning Ingridip Napparsimmavissuani aqunneqarlutik
aalajangerneqarsinnaassapput, suut najugaqarfinni ataasiakkaani
suliarineqarsinnaassappat, suut immikkoortortami napparsimmaveqarfimmi
suliarineqarsinnaassappat, suut Dronning Ingridip Napparsimmavianut ingerlanneqartassappat,
suullu Danmarkimut allaat ingerlanneqartariaqartassappat.
Tamanna nakorsatigut nalilersuinermik
aaqqissuussinikkullu ingerlanneqartarsinnaanissaa siunnerfigivarput. Siumup
oqaluttuata aama oqaatigivaa, meeqqat, utoqqaat, innarluutillit naartusullu
anniaateqarlutik peqqinngillutilluunniit misigisimagunik
nakorsiarsinnaanissaminnut periarfissaqartuarnissaat taanna pisariaqartoq.
Tassa oqaatigisariaqarpara taanna naatsorsuutigigatsigu, allaat
aaqqissuussinermi nutaami pitsanngorsaavigineqassasoq, tassami imaammat
napparsimmavinnut saaffiginnittarnerit amerlanerpaartai tassa 85 %-tiisa
missai, anniaateqarluni imannak unitsinneqanngikkaluarluni pilattartariaqanngikkaluarlunilu
saaffiginninnerupput, ikiorneqarnissamik saaffiginnissutit assigiinngitsut.
Tassalu taakkuupput
attatiinnarneqarusuttut aamma uani aaqqissuussinissami nutaami. Allaallu
annertusaavigineqartussatut takorloorneqartut, soorlu assersuutigalugu aamma
Inuit Ataqatigiit oqaluttuata oqaatigigaa, utoqqarneq paaqqutarinninneq
allatigullu suliaqarnerit Kommuunit suleqatigalugit, siunissami
aaqqissuussivigineqarsinnaanissaat tamakkua takorloorneqarlutik. Kisianni tassa
tassuunakkut annikillisaaniartoqannginnera erseqqissumik oqaatigisariaqarpara,
massakkullu allaat peqqinnissaqarfimmi sulisorpassuit ujartortagaat
piffissaaleqiffigisagaat, tassa pinaveersaartitsinermik annertunerusumik
sulinissaq innuttaasut qaninnerusumik attaveqarfigalugit sulinissaq. Taanna
aamma neriuutigaarput annertunerusumik allaat massakkut piffissaqarfiginerulerneqassasoq.
Makkua pilattaasarnerit unitsitsisarnerillu allanut suliakkiissutigineqarnerisigut.
Teknikkit nutaat atorlugit atortorissaarutinik
pilersuinissaq aamma partiinit tamanit ilalerneqarpoq. Ilaatigut aamma
soorunalimi apeqqutigneqarsinnaasoq naatsorsuutigaara, tamakku aamma qanoq
akeqassappat, soorunami akeqarput, kisianni oqaatigisinnaavara massakkut
misissorneqarmat Peqqinnissamut Pisortaqarfimminngaanniit, Landskarsimut
aningaasartuutaanngitsoq nanertuutaanngitsumik taamatut Nunatsinni
pilersitsiortortoqarsinnaanersoq. Tamannalu naatsorsuutigaarput
qaammatialunnguit qaangiunnerini erseqqarinnerusumik paasissallutigu.
Oqaluttunit tamanit aamma kissaatigineqarpoq innuttaasut Kommuunillu aamma
susassaqartut allat, paasititsiniaavigineqarnissaat taannalu aamma
Naalakkersuisut sinnerlugit neriorsuutigissavara. Tassani soorlu aamma
arlariinnit oqaatigineqartoq, Diskobugtimi Qeqertarsuup Tunuani novemberimi
angalaarsimavunga, tassani Kommunalbestyrelsit, Peqqinnissaqarfimmi sulisut,
ilaatigullu innuttaasut ataatsimiisinneqarnerisigut eqqarsaatersuutit
taamanikkut killiffii oqaloqatiginnissutigalugit.
Erseqqarinnerusumik innuttaasunik
oqallisissiamik aatsaat massakkut pissarsivugut, tassa Inatsisartut
oqallinnerisigut, taannalu aallaavigalugu paasititsiniaaneq oqallinnerillu
annertusarnissaat neriorsuutigissavara. Oqaaseqartunit tamaniit nakorsat
kisimik pinnatik, kisianni aamma peqqinnissaqarfimmi sulisut atugarisaat
eqqartorneqarput, tassanilu aamma oqaatigisariaqarpara nuannaarutigigakku
isumalluarfigalugulu partiinit maanna tamanit aammalu Kattusseqatigiinninngaanniit,
sulisut atugarisaat pingaartinneqarlutik erseqqissumik oqaaseqarfigineqarmata,
qularinngilara aamma peqqinnissaqarfimmi sulisut oqaatsit taama ittut,
nuannaajallaatigalugillu isumalluarfigissagaat. Suliassat taakkua qanoq
piviusunngortikkiartuaarneqarsinnaaneri pillugit aamma
suleqatigiilluarnissarput aamma neriuutigivara Naalakkersuisut sinnerlugit
piffissami aggersumi.
Tassami una ilumoortutut
oqaatigisariaqarpara, peqqinnissaqarfimmi sulisut aamma nakorsaannaanngitsut,
annertuumik ukiuni makkunani aamma suleqataapput eqqarsaqataallutillu, peqqinnissaqarfimmi
sullissineq qanoq pitsaanerusumik ineriartortikkiartuaarneqarsinnaanersoq.
Kisiannili aamma erseqqissumik oqaatigissavara ernumassutiginngitsuunnginnakku,
malunnaatilimmik sulisoqarnerup tungaatigut pitsannguuteqartoqanngippat
qanittumi, taava sulisut ilai qasullutik suliamik saniatigut taama
tunniusimatigalutik siuarsaaqataaniarlutik sulinerminnik
kajumissuseerukkiartuaalissappata. Taamaattumik nuannerpoq tusarlugu, sulisut
atugarisaatigut pitsanngorsaasoqartariaqarnermik paasinninneq annertooq maani
malugalugu. Taamatut oqaaseqarlunga qutsavigissavara aamma naggataatigut
Naalakkersuisut inassuteqaataat Siumumiit taperserneqarmata, kiisalu aamma
tassa Qeqertarsuup Tunua eqqarsaatigalugu kiisalu aamma Kujataa pillugu ataatsimiititaliortoqarnissaanik
aamma Naalakkersuisut kaammattuutaat aamma taperserneqarmat. Tassanilu aamma
neriorsuutigissavara Qeqertarsuup Tunua kisiat pinnagu aamma Kujataani
massakkut oqallisigineqartut tunngavigalugit, tikillugit aamma oqallinnissat paasititsiniaanissallu
ingerlakkumaaratsigit.
Atassutip oqaluttuata aamma
erseqqissarpaa, naleqqussaanissaq pisariaqarluinnartoq, aammalu ilanngulluni
suliffittut kajungernarnerusunngortinneqarnissaa peqqinnissaqarfiup aamma
Atassumminngaannit aamma oqariartuutigineqarpoq. Atassumminngaanniit
maluginiarpara ilaatigut sullugineqapajaaraluartorluunniit massakkut
Naalakkersuisut allannguutissatut siunnersuutaat, kisiannili aamma paasivara
inooqataaffigineqarsinnaasutut oqaatigneqartoq, tassami ineriartorneq taamatut
aallartisarneqarnissaanut Naalakkersuisut siunnersuutigaat, tassanilu aamma
innuttaasut malinnaatinneqarsinnaanissaat kiisalu aamma arlaatigut
kukkusoqartarsinnaassammat, kukkuiuitsuusoqanngimmat, aaqqittariallit
annertusivallaannginnerini aamma aaqqiisinnaanissat tassani Naalakkersuisuni
pingaartipparput, taamaattumillu tassanngaannarujussuaq suut tamarmik
allanngortiterujussuarnissaat tikkuarsimanatigu.
Kisiannili allanngortitsiartuaarnissanik
siunnerfeqarsimalluta. Kisiannili Atassummiit oqariartuutigineqartut aamma
immikkoortukkuutaami napparsimmaveqarfiit, akisussaaffinnik agguataariffigineqarsimanerannut
tunngasut, taakkua suleriaqqinnissami aamma soorunami eqqarsaatersuutinut
ilaanissaat oqaatigissuara. Atassumminngaannit aamma pingaartinneqarpoq,
ilaatigut sulisut pikkorissartittuarneqarnissaat tamannalu aamma qujaruppara
tusarlugu. Naalakkersuisuni sulisut aamma peqqinnissaqarfimmi
pikkorissartinneqartarnikkut periarfissarissaarnissaat pingaarteqaarput,
minnerunngitsumik ukiuni makkunani teknikkikkut allatigullu sukkaqisumik
ineriartorfiusumi. Atassut aamma qutsavigissavara inassuteqaatinut
tamakkiisumik tapersiimmat.
Inuit Ataqatigiit oqaluttuat Maliinannguaq
Marcussen Mĝlgaard aamma qutsavigissavara oqaaseqaataanut annertuumut, aammalu
eqqarsaatersuuterpassuarnik imaqartumut. Tassalu aamma una uteqqissallugu
massakkut iliuuseqarniarneq Naalakekersuisuninngaanniit, aallarniutaammat
aammalu soorunalimi sillimaniarnissaq ineriartortitsinermi, taanna
sapinngisamik kissaatigeqaarput, soorunalimi qanoq taamaalluni
inerneqarumaassanersoq nalunartarpoq. Uani oqaatigineqarmat issuarmangu
Maliinannguup Marcussen Mĝlgaardip aallaqqaataani: "sukumiisumik
aalajangiinissamut periarfissiisunik paasiniaanernik tamatumunnga pisariaqartinneqartunik
imaqanngimmat". Tassa suna tamaat inernilereerlugu ilumoorpoq una
suliaanngilaq, kisiannili suliap aallatinneqarnissaanut aqqutissiuussisussatut
innersuussutaalluni. Inuit Ataqatigiit oqaluttuaninngaanniit maluginiarpara,
aammaarlunga sulisut sulinerminni atugassaqarnerat allaat aningaasaqarnikkut
tunngasut taakkua eqqaaneqartut. Nakorsanngorniat nunatsinni ilaannakortumilluunniit
ilinniartinneqalersinnaanerannut tunngasumik oqaatigisariaqarpara, tassa taanna
ilaatigut piviusunngoreernikuuvoq, tassa massakkut nakorsassatut
naammassinerminni immikkut ilinniagaqarniarnerminni, ukiut siornaajunngikkuni
siornaak, Nunatsinni ilinniarnerisa ilaata ingerlanneqarsinnaalernera taanna
piviusunngorpoq, massakkullu nakorsaanernik ilitsersuisinnaasunik ilaatigut
peqarneq aallaavigalugu, amerlassusaat taakkua aalajangerneqartarput.
Soqutigineqarluarpoq tamanna Nunatsinninngaanniit ilinniarnersiuteqarlutik nakorsanngorniartuinnaanngitsunik, kisianni aamma Danmarkimi nakorsanngorniartunik, kisianni taamatut Nunatsinnukartitsiniarnermi Nunatsinninngaanneersut taakkua soorunami salliutinneqartarput. Apeqqutaaginnarpoq nakorsanerit Dronning Ingridip napparsimmavissuani amerlassusaat aammalu sulinermikkut atugarisaat, qanoq amerlatigisunik ilinniartuuteqarsinnaanitsinnut. Massakkut marluk, pingasut sisamat akornanni ingerlasarput. Nunatsinnullu taakkua uternissaannut kaammattuiuarnissaq aamma Peqqinnissaqarfimmi Pisortaqarfimminngaanniit malinnaavigaarput siunnerfigalugulu, taamatullu aamma taakkuninnga qanimut attaveqarnissaq attaveqarnerup ingerlatiinnarnissaa aamma tassuunakkut eqqanaariniarnermut aqqutissat ilaattut pingaartillutigu.
Norgemisuut utoqqaat illuanut atasumik suliarineqarsinnaanissaat periarfissiuunneqartariaqartoq, Inuit Ataqatigiinninngaanniit oqaatigineqarpoq aammalu Maliinannguaq Marcussen Mĝlgaardip eqqaavaa, Qeqertarsuarmi misiliummik ingerlatsisoqarniarnera, tassa taanna Peqqinnissaqarfimminngaanniit aamma Naalakkersuisuninngaanniit soqutigalugu siunnersuut tigusimavarput aammalu suleqataaffigerusullutigu, suliaq paasiniaaneq nalunngilara taanna aallartisareersoq, tassuunakkullu aamma qularinngilara massakkorninngaanniit suleqatigiinneq annertunerusoq pisinnaasoq. Pissanganassooq suleqatigiissitat tassunga suliaqartut suleqatigiinnerup qanoq annertutigisumik ingerlanneqarsinnaanissaanik nalunaaruteqarumaarnera.
Kisianni uani Maliinannguaq Marcussen Mĝlgaardip oqaaseqarnerani aamma maluginiarpara, Qeqertarsuup napparsimavissaata sananeqartussap allamut inissinnagu, utoqqaat illuata qanittuanut inissinneqarnissaa oqaatigimmagu. Tassa siullermik imminut atasumik suliarineqarnissaasa piumasaqaatigineqarnerat eqqaaneqartarmat. Kisianni taanna aamma Naalakkersuisuninngaanniit ammaffigilluinnarparput, kisiannili teknikkikkut qanoq periarfissaqartiginersoq massakkut misisorneqarpoq, kisiannili una oqaatigisinnaavara Naalakkersuisuniit utoqqaat illuanut minerpaamik qanittumik inissinneqarnissaa aamma taanna ammaffigilluinnaratsigu. Kommuuneqarfiit tamarmik minnerpaamik ataatsimik nakorsaqartuarnissaat siunnerfiusariaqartoq aamma Naalakkersuisuni isumaqatigaarput.
Peqqinnisamut Ataatsimiititaliap Qeqertarsuup Tunuanut angalaarsinnaaneranut tunngasoq, taanna soorunalimi Inatsisartut qullersaqarfiat Ataatsimiititaliallu akornanni aalajangerneqartussaavoq, kisianni tamanna piviusunngussappat oqaatigeriissavara, Peqqinnissamut Pisortaqarfimminngaanniit aamma sukkulluunniit ikiuussinnaanermik aamma piareersimassagatta. Naggataata tungaani maliinannguaq Marcussen Mĝlgaardip periarfissatut tikkuarneqarsimasut siunnersuutit assigiinngitsut 3-ngasut aamma sammingaatsiarpai. Tassani ataasiakkaarlugit taakkartoqqinngikkaluarlugit ataatsimut oqaatigiinnassavara, tassa siunnersuutit taakkua 3-ngasut suleqatigiissitaminngaanniit tikkuarneqarsimapput, kisiannili naggataarutaasumik siunnersuusiornermi Peqqinnissamut Pisortaqarfimminngaanniit aamma Naalakkersuisuninngaanniit, taakkua siunnersuutit arlaannaalluunniit ataaseq pineqanngimmat kisiannili taakkua qanoq pitsaanerpaamik, uagut isumagut naapertorlugit, aaqqissuunneqarsinnaanersut aallaaviusimalluni. Aammalu paasivara taakkua eqqarsaatigalugit innersuussutaasut taamatut paasillugit tapersersornartutut Inuit Ataqatigiinninngaanniit pisariaqartutullu oqaatigneqartoq.
Akulliit Partiianni Bjarneq Kreutzmann oqaaseqarnermini, immaqa oqartariaqarpunga, 100 %-timik tapersiinera taanna qujassutigaara.
Kattusseqatigiinniit Anthon Frederiksen tassa oqaluttunut allanut naleqqiullugu tapersersuinermik eqqarsaatersuutinut annertunerusumik takujuminaattoqarpoq. Tassanilu aallaavigineqarnerullutik sulisut massakkut aningaasatigut qaffaavigineqarnerisigut, sulisussarsiorneq aaqqittussatut nalilerneqartutut uanga tusarpara. Kisiannilu uanga oqaatigisariaqarpara, soorunalimi aningaasarsiat taakkua aamma sulerusussuseqarnermut ilapittuutaapput ilaapput, kisiannili aamma taakkuinnanngillat. Nakorsanik allanillu sulisussarsiornermi ajornartorsiuteqarnitsinni.
Tassani pikkorissartitsisinnaanerit ataasiakkaartumi ikittunnguakkuutaarluni assigiimmik ilinniagaqarsimasuulluni inissisimanerit, kiserliortutut misigisimanerit akisussaaffinnik annertuunik tunineqarluni, tamakkua aamma ilaapput Nunatsinni atorfinitsitsiniarnermi ajornartorsiutaasunut. Taamaattumik akissarsiat qaffaaviginerinnaasigut ajornartorsiutit qaangernavianngilagut, taamaattumillu assigiinngitsut sulisunut oqilisaataasinnaasut aammalu innuttaasunik sullissinermut pitsaanerpaamik eqqanaarinnissinnaasut, taakkua ujartortariaqarigut Naalakkersuisuni isumaqarpugut. Aamma tamanna isumaqatigilluinnarpakkit Anthon Frederiksen oqaravit, Peqqinnissaqarfiup eqiterneqarnerinnaatigut aamma qaangerneqarsinnaanngilaq, kisianni aamma aningaasat qaffaaviginerinnaasigut aamma qaangerneqarsinnaanngilaq. Tassani assigiinngitsut atorneqartariaqarput, sulisut pitsaanerusunik atugaqarnissaat anguniarlugu, innuttaasut patajaannerusumik nalorninannginnerusumillu sullinneqarnissaat anguniarlugu, pitsaassutsip sullinneqarnermi pitsaassutsip eqqanaarneqarnissaa aamma anguniarlugu.
Ilanngullugu
erseqqissaatigissavara tassa massakkut napparsimmavinni Diskobugtiinnarlunniit
eqqarsaatigalugu, Uummannaq Upernavillu ilanngullugit, siniffippassuit
atorneqanngimmata allaat pingajorarterutaat, ukiuni kingullerni atorneqaratik
uninngapput. Taamaattumik
aamma tassuunaannakkulluunniit, Anthon Frederiksenip oqaasia aningaasanik
atorluaaniarnissamik eqqarsaatersuuteqarneq, aamma tassani massakkut
atorluaanerunngilaq, taamatut annertutigisumik siniffeqartitsilluni
atorneqanngitsunik.
Naggataatigut Qasigiannguani
innuttaasut annilaangassutaat ernumassutaallu, taakkua aamma
paasilluarsimavagut Naalakkersuisunit isumaqatigalugillu, tassani ernumammata
nakorsaarutsinneqarnissaminnik. Kisiannili tassa oqaatigeqqissavara taanna Naalakkersuisut
siunnersuutiginngilaat. Aammalu oqaatigissavara nakorsaanermut allaat
ilanngullu uani Anthon Frederikseniminngaanniit taaneqarmat, tassani
nakorsaanerup tungaaninngaanniit eqqasuutigineqartut aamma
naaperiaaffigineqarsimasutut inuttaaniit isigineqarmata. Massakkullu taakkua
peerneqarnerisigut tapersersuinini uani allakkatigut aamma nalunaarutigivaa.
Taamaalillunga qujassutigeqqippara
matumani oqallinnermi tapersersuineq annertooq aallarteriarnissamut
oqaatigineqarmat, tassanilu sulinerup ingerlaqqinnissaanut paasititsiniaaneq
annertooq, oqallitsitsineq, aammalu minnerunngitsumik Peqqinnissamut
Ataatsimiititaliap ataavartumik ilisimatinneqartarnissaa tassani
neriorsuutigissavara.
Ruth
Heilmann, Siumut:
Maannakkut
oqaaserineqartut partinit tamanik annertuupput. Aamma tupinnanngitsumik
massakkut nunap immikkoortortukkaartumik peqqinnissaqarnikkut aaqqissuussineq
piviusunngortinngilaataani paaserusutat amerlasuut, aamma tassani
saqqummiunneqartunut ilaallutik. Kiisalu aamma tamanna pillugu Naalakkersuisoq
qujassutigissavara, takisuumik nassuiaateqarmat, naak nammineq oqarneratuut
piffissaq una sivikikkaluartoq aamma takinerusumik nassuiaateqarusukkaluarkuni.
Taamaattumik
malunnarpoq eqqarsaatigisassat amerlaqisut, aamma uani saqqummiunneqartumi
akineqarsinnaanngitsut aamma terfalapput, aammalu massakkut siullermeertumik
Qeqertarsuup tunuani, peqqinnissaqarfiup eqiterneqarnissaanut
akuersaartinniarluta massakkut taamatut saqqummiisoqarpoq. Taamaattumik
piviusunngortinnginnerani aamma neriuppunga iluarsisassat annertuut aamma iluarsaanneqarumaartut. Uani
innuttaasut toqqissisimanngillat malunnartumik. Tassami sunaluunniit
paasilluanngikkaanni aamma isummersorfigineq ajornartuummat, aammalu
toqqissisimanarani paasilluarnagu maannakkut aaqqissuusseqqinniarnerup qanoq
iluseqartumik ingerlanneqarnera, aammalu inunnut nakorsaqarfinnut
napparsimaveqarfinnullu ajorseriaataanngitsumik kinguneqassanersoq,
imaluunniit qanoq inuttut inuunermut kinguneqassanersoq assut
paaserusunnarsimalluni.
Uani
saqqummiunneqartuni aamma ajornartorsiutitaqanngitsumik aaqqiinissaq
ilimananngilaq. Ajornartorsiutit naapitassat amerlapput. Sulisussat
ajornannginnerulernissaat anguneqartussatut oqaatigineqaraluartoq, taamaattoq
ilimanarpoq aamma tassuunakkut pinngitsoorani ajornartorsiortoqassasoq.
Uani
oqallinnermi siusinnerusukkulli, nakorsat allallu napparsimaveqarfiup
nalusimanngilaa, taamatut aaqqissuusseqqittoqassamaartoq qangali
eqqarsaatersuuteqartoqarluni. Tassa 90-ip qaangilaarneranili tunngaviatigut
isummat taakku saqqummiunneqarsimammata. Kisiannili aappaatigut
tupiginalaarsinnaavoq innuttaasut peqataatinneqarsimannginnerat, taamaattumik
maannakkut uani saqqummiunneqartumi aamma isumaqatigisanni uanga, Lars
Muldsgaardip ikinnerussuteqarluni oqaaseqarnermini oqaatigimmagu, aamma
Peqqinnissakkut Iluarsaaqqinnissami Ataatsimiititaliarsuup assigisaataluunniit
pilersaarutip ingerlannerani, innuttaasut oqartussaaqataanissaat
qulakkeersinnaagaluarpaat. Taamatut aamma oqaseqarpoq, tassa pingaaqimmat
allannguinissarlu annertoqimmat, taamatut innuttaasut paasitilluarneqarnissaat
tassani pingaartimmagu. Uanilu naggataa=tungaatigut immikkoortuni marlunni
issuaalaarusuppunga a-b-mik tunngavilersuuteqarluni oqaaseqarmat imatut:
Tunngaviusumik
peqqinnissakkut sullissinerup assigiinngisitaartumik neqeroorfiusinnaasup,
aamma siunissami ingerlaannarsinnaanissaa qulakkeerniarlugu, maannangaaq
aallunneqarnerusariaqartoq. Soorlu inuaqatigiinni nutaaliaasuni
ineriartorluarsimasunilu tamanna ilimagisariaqartoq, inuiaqatigiit
atugarissaartuusut assigalugit.
B-tut:
Nunap immikkortuini eqiterinissami pilersaarutit ingerlanneqarneri innuttaasut
peqataatinneqarnissaat qulakkeerneqartariaqarpoq.
Tassani
isumaqatiginarluinnartunik oqariartuuteqarpoq, najukkami nakorsat qullersaata
ilaat. Taamaattumik massakkut oqallinneq ingerlatinneqartussaq
eqqarsaatigalugu, neriuutigaara aamma innuttaasut, aamma massakkut
oqaatigineqarmat nunatta kujataani aamma taamatut aaqqissuussiniartoqarnera,
aamma suleqatigiissitalianik pilersitsiffiuniarsarisoq, uangattaaq
tapersersorpara Naalakkersuisoq taamatut saqqummiutaqarmat.
Tassa
massakkut nakorsaqarnitsigut aammalu ilinniartitsisoqarnikkut ilinniarsimasunik
amigaateqarnitsigut killiffigisagut ilungersunartuupput, taamaattumik
neriuppunga aamma uanga ilinniartitaanerit maani aamma aallartinneqareersutut
ilaatigut oqaatigineqartut, nunatsinni annertusarneqartuarnissaa taanna
Naalakkersuisut suliniutigiuartariaqaraat. Uani assersuuteqatumik Maliinannguaq
Mĝlgaard Markussenip saqqummiussaqarnermini, Norgemi aammalu Islandimi
ilaatigut aaqqissuussinerit tassani angallannikkut imminnut attaveqarluarnerat
aqqusineqarlutik, kiisalu aamma inuttut immaqa atugaqarnermikkut uagutsinnit
pisuunerungaarlutik, timmisartuuteqarlutik ilaalu ilanngullugit, taamaattumik
uagut tassuunakkut inorsartorujussuussaagut. Massakkut angallannikkut taamatut
eqartigisumik periarfissaqartoqartillugu. Kisiannili soorunami
mittarfeqalernitsigut isumalluarnartoqarpoq, kisiat tassani aamma
eqqarsaatigisariaqarunarpoq, immaqa pisariaqassagunartoq kommunet tamarmik
immikkut timmisartoqarnissaat. Kisianni tamakku soorunami eqqarsaatissanik
ilaasussaassapput.
Kiisalu
uani aamma oqatigineqarpoq, piffinni nakorsaqartoqassasoq tamaginni ataatsimik
kommuneni, taanna pingitsoorani pigineqassasoq. Kisianni uanga isumaqarpunga
aamma inuttussuseq najoqqutaralugu nakorsaqarniarnikkut qassiussusissanik
eqqartueqqittoqartariaqartoq. Tassani annertuumik aamma Maniitsumi
Naalakkersuisup Maniitsumiinnermini innuttaasunik ataatsimiititsineranni,
taanna aamma ersarissumik paasineqartut ilagimmassuk.
Uani
issuaaqqilaarusuppunga, tassa nakorsaanerup uani oqaaserisai aamma Hans Martin Johnsenip
issualaarusukkakkit, iluaqutaassammata aamma suleriaqqinnissamut uani
saqqummiussat akornaniinngimmat. Tassa imatut oqarmat:
Siunissami
taamatut kukkusumik pinninnerit amerlasuut takuneqartarumaarput. Imaappoq
napparsimasut pisariaqanngitsumik angallanneqartut, tamanna ilisimaneqarpoq
akikitsuinnaangitsoq. Sulili ajornerusoq uaniippoq, ilaatigut
pisoqartarumaarmat napparsimasut nappaataannik naliliinerlunnikkut
kingusinaarlugit aallarunneqartunik. Tamannalu suli ajorneruvoq. Tamannalu
Qeqertarsuup tunuani misilittagaqarfigineqarpoq, immaqa tassani misilittakkat
naammassimanngillat. Tassami taamak pisoqartillugu nakorsaq tassaammat,
kingullerpaajulluni naliliinermi eqqortuuneranik eqqortuunnginneranilluunniit
aalajangiisuusoq. Eqqortumik misissuineq, pilattaanerup pitsaasumik
inerneqartinnissaatulli nalorninartigisarpoq.
Tamakkua
eqqarsaatigalugit, neruppunga aaqqiilluartoqarumaartoq, aammalu uani
erniartortitsisarnerit sapinngisamik minnerpaaffiat anguneqartariaqarsoraara
uanga aamma nammineq. Aammalu maannakkut napparsimaveqarfinni
suliaasartorpassuit eqqarsaatigalugit, pingaartumik aamma inuusuttuaqqat
aammalu inuusuttut naartuersittarnerat massakkut annertoorujussuaq, qanoq
taassumap iluseqartumik aamma siunissaq eqqarsaatigalugu aaqqiiviginarneqarnera,
aamma ilanngulluni eqqarsaatigineqartariaqarpoq. Tassanimi kingusinaaraanni
aamma inuusuttunut qanoq
kinguneqartarnera tamatta nalunnginnatsigu.
Niels
Mátâq, Siumut:
Siullermik
oqaatigissavara siunnersuutima saqqummiunnerani, oqarpunga qitiusumik napparsimavittaartoqarnissaanik
isumaq saqqummeqqaarmat, taamanikkut Inatsisartut Peqqinnissamik
Ataatsimiititaliaata siulittaasuata saqqummiussaata imarisaani
oqaatigineqarmat, qitiusumik napparsimavik atuutilerpat, illoqarfinni mikinerni
tassa avinngarusimasuni allanilu pineqartuni, maannakkut napparsimaviit
taamaallaat kilernernut poortuisarfittut atorneqassasut. Taamaammat
siunersuutinut taamanikkulli allanneqarsimasoq, maannakkut saqqummiussanni
oqaatigivara ersarissumik taamatut saqqummiinermi, illoqarfinni
napparsimavilinni aammalu nakorsalinni, napparsimasunillu paarsisulinni
annertuumik annilaangatigineqarsimammat.
kisiannili
maannakkut oqarpunga aamma allanngoriartortoqarsimavoq. Nassuiaatit
assigiinngitsut saqqummiussorneqarsimapput. Maannakkullu taassumap
Qeqertarsuup tunuani eqiterinissamut siunnersuummik saqqummertumi
oqaatigineqarluni allaat napparsimaveqarfiit, imaappoq maannamut
ingerlanneqartut, nakorsaqartuarnissaannik inatsiseqartoqarluni. Taanna uani immikkoortortat
aalajangiutarineqattoq Uummannaq Upernavillu najukkami napparsimavittut
atorneqaannassapput. Taavalu tassani ilaneqarsimalluni juumuunik, nakorsanik,
aaviisartunik peqqissaasunillu (...) amigaateqartoqarani, Ilulissat
tunngaviisumik napparsimavittut atuunnissaa pilersaarutigineqartoq.
Taanna
tunngavigalugu uanga piumasarerusukkaluariga, sapinngisamik
aalajangiiffigineqannginnerani, pineqartuni innuttaasut aammalu
napparsimaveqarfinnilu nakorsat sulisullu paasitinniarneqarnissaat aamma isumasiorneqarnissaat
tikillugit. Isumaqarpunga taamatut iliornerit pisariaqarluinnartuusut, aammalu
uani oqaluttut ilaatigut pisariaqartitaat tunngavigalugit, isumaqatigilluinnarpakka.
Tassami maannakkut saqqummiunneqartoq, aammalu nassuiaat Naalakkersuisup
saqqummiussaa, nalunanngitsumik partinit amerlanernit isumaqatigineqarmat.
Maanna uanga siunnersuutinnut atatillugu siunnersuutigerusukkiga, soorunami
isumaqataasariaqassagatta ersarinnerusumillu nassuiaaffigineqarnissai
innuttaasut piumasaralugu.
Tassani
taaneqartunut tamanut ornigulluni tusarniaanissaq pingaartillugu maanna
oqaatigerusukkiga. Tusarniaaqqaarnissaq aalajangiinnginermi.
Maliinannguaq
Markussen Mĝlgaard, Inuit Ataqatigiit:
Naalakkersuisup
akissuteqaataanut qujavunga. Uanili Inuit Ataqatigiinninngaanniit apeqqutigisimasagut
akinngittuugai, soorunami massakkut akisinnaanngippagit, immaqa
kingusinnerusukkut allakkatigulluunniit akisinnaappagit qujarutissavagut.
Tassa
ilaatigut tassani apeqqutigivarput, oqaatigineqarmat sulisunit 10,3 taamatut
nussuinissaq qitiusumik naleqartussaasoq. Taakku suminngaanniit sumut, aammalu
sulerisut nuunniarneqarnersut taanna apeqqutigisimavarput. Taavalu aamma
kommunet inukilliartornissaanik oqariartuut suminngaanneersuunersoq, kommunet
ilaasa, tassa Qasigiannguit, Aasiaat
Qeqertarsuillu inukilliartornissaannut tunngasut. Taavalu aamma
apeqquteqaatigisimasatta ilagivaat Peqqinnissamik Ataatsimiititaliat
sinerissamiittut pikkorissartinneqarnissaannik tunngatillugu, Inatsisartut
akuersissutigereersimasaattut pilersaarutit sumut killinnersut. Kiisalu
Qeqertarsuup sooq Ilulissanut atatinniarneqarnera, Aasiaat uffa qaninnerusoq.
Tassa taakku apeqqutigisagut Inuit Ataqatigiinninngaanniit akineqanngimmata
majuaqqippunga.
Unali
nakorsaqarniarnermut tunngatillugu, aammalu nakorsanik
ilinniartitsisinnaanermut tunngatillugu, aap, nalunngilarput immaqa
naammassereeraangamik immikkut ilinniarsinnaanerminnut atatillugu maani
praktikkersinnaasartut, imaluunniit ilinniaqqinnissaminnut atasumik ingerlatsisinnaasartut.
Kisianni unaana ilinniarniviup ingerlannerata ilaa, soorunami immaqa
ajornakusuussooq ullumikkut pissutsit imaaliallaannarluni taamatut
ingerlanneqarnissaa. Kisianni toqqammaviusumik atuagarsornertaata immaqa
ilaminarataluunniit maani ingerlanneqarsinnaanera, pilerisaarutitut aamma
nakorsanngorniarnermut pilerisaarutitut immaqa takorloorneqarsinnaasoq,
siunissaq ungasinnerusoq eqqarsaatigalugu.
Oqaatigineqartutuut,
aap, Inuit Ataqatigiinninngaannit tapersersuisutut oqaatigineqaratta. Tassa una
erseqqissaatigissavara, taamatut allannguiniarnermik aammalu
eqaallisaaniarnermik ingerlatsiniarnermik tapersersuiniarutta, erseqqissumik
oqaatigigatsigu uagut isumaqarluta, sumiiffiit eqqorneqartussat allatigut taava
pitsaanerusumik aammalu allatigut peqqinnissaqarfiup iluani sullissinermik
pitsaanerusumik ingerlatsinissaq aamma ujartuinissat tassani ingerlanneqartariaqartut.
Tassami sulisoqarnikkut ikilisaasoqassappat, immaqa allaffissornikkut matumani
pineqarsimanerput. Taava illu=tungaani innuttaasut sullinneqarnerata
tamatumani ajorseriannginnissaa, illua=tungaanillu immaqa pitsanngoriarnissaa
allatigut, immaqa kommunet suleqatigalugit ingerlanneqarsinnaanissaa, tassani
erseqqissumik taakkartoratsigu aammalu taakkartortuassallutigu.
Ullumi
maani aningaasaqarnermut ineriartornermut tunngasutigut nalunaarutit
eqqartorneqarnerani iserfigisakka naveersissutigisakkalu, uani
eqqaalaarusuppakka naatsunnguamik. Tassa oqareernittuut peqqinnissamik
ataatsimiititaliap isumaliutissiissutaata kinguartinneqarnera ullumi
oqaatigineqartoq assut ajuusaarutigigakku.
Tassani
uterfigilaarniarpara tassa ullumikkut peqqinnissaqarfimmi pissutsit
ajorluinnaqqissaarnerisa aammalu erloqinarnerisa. Tassa nalunngilarput
peqqinnissaqarfimmiit ilungersunartumik suliniartoqartoq aamma pissutsit
tamakku aaqqiviginiarlugit. Kisianni massakkut killiffigisimasarput
utaqqisorpassuit 2800-ngorsimaneri aammalu niviarsiat nammineerlutik
ajornartorsiutiminnik, annertuunik ajornartorsiutiminnik saqqummiinerat
isumaqarpunga tusaanngitsuusaaginnarsinnaanngikkipput.
Aammalu
innersuussutigineqartut ilaatigut peqqinnissamut ataatsimiititaliamut
innersuussutitta maannamut ingerlanneqarsimasut aammalu inatsisartunut
agguaanneqarsimasut arlaatigut qanoq ilillugit ingerlateqqinnissaat
isumaqarpunga pisariaqartoq.
Tassami
aarlerinarluinnartumik inissisimanerput niviarsiat nammineerlutik
oqariartuutigimmassuk allaat massakkut ilaatigut pilattaavimmi sulisut 24-mi
sulisariaqartarsimapput ingerlaannartumik. Aammalu sulisoreriikkat
peqqissaasut sulisoreriikkat aamma annertuumik ilaatigut utoqqalillutik
soraartitertussanngorsimapput.
Kisiat
aarlerinartut ilaat unaavoq naammasseqqammersut allaat soraarniarlutik
maannamut aalajangertalersimaneri. Taamaattumik tamakkua isumaqarpunga
erloqinarluinnartuusut aammalu aaqqiivigineqartariaqartut aammalu
eqqumaffigineqartariaqartut ilaatigut erseqqissumik taakkua akissarsiatigut
tunngasut kisimik aaqqiissutaasussaanngikkaluartut kisianni immaqa
alloriarnertut siullertut pitsanngorsaatitut ingerlanneqarsinnaaneri Inuit
Ataqatigiinninngaaniit oqaatigissavarput.
Anthon
Frederiksen, Kattusseqatigiit:
Peqqinnissamut
Naalakkersuisup akissuteqaataa pillugu oqaatigisariaqarpara 100 %-mik
toqqissiallakkama. Minnerunngitsumik aamma maani oqaluttut tamarmik aammalu
Kattusseqatigiinniit soorunami eqqartukkagut tassalu peqqinnissaqarfimmi
sulisut atugaasa ullumikkut atugaasa ajoqisut iluarsaanneqarnissaat aamma
ilanngullugu eqqaammagu.
Tassami
oqaaseqarninni ilaatigut oqarpunga ullumikkut pissutsit ajoqisut
iluarsaanneqareerpata, aammalu peqqinnissaqarfimmi sulisut atugaasa
oqilisarneqareernerisigut taamatut katitertitsiniarneq, eqitertitsiniarneq
peqataaffigisinnaallutigu. Aammalu nuannerpoq tusarlugu suli innuttaasunik
isumasiuineq annerusoq ingerlanneqassasoq peqqinnissamut Naalakkersuisup
neriorsuutigimmagu.
Taamaattumik
suliap ingerlariaqqinnissaanut aammalu qularnanngitsumik kingusinnerusukkut
isumasiuisitsereernerup kingorna naatsorsuutigissavarput paasissutissat immaqa
nutaartallit aamma kingusinnerusukkut saqqummiunneqarumaartut. Qujanaq.
Marianne
Jensen, Peqqinnissamut
Ilisimatusarnermullu Naalakkersuisoq akissuteqaqqissaaq:
Tassa
utaqqisorpassuit amerliartuinnartut aamma eqqaaqqajaaneqartarput. Ilumoorpoq
amerliartorput, kisianni utaqqisoqartuartussaavoq. Utaqqisorpassuaqarnera
taanna immini ajornerunngilaq. Apeqqutaavoq utaqqisut qanoq sivisutigisumik
utaqqisariaqarnersut, nappaat sunaanersoq apeqqutaatillugu. Taakkua
sapinngisamik sivikinnerpaamik utaqqisarnissaat taanna anguniartariaqarpoq.
Aammalu tassuunakkut massakkut aaqqissuussiniarnerup ilapittuutaasinnaanera
isumalluarfigivaput.
Aamma
taassumap tungaa peqqinnissamut ataatsimiititaliap isumaliutissiissutaa
sammilerutsigu uterfigeqqittissaagatsigu annertunerusumik
oqaaseqarfigeqqissanngikkallarpara.
Aamma
ilumoorpoq ilaatigut peqqissaasunik amigaateqaqigatta nakorsaannaanngitsut
kisianni aamma sulisut allat amigaatigineqaqaat. Tassanili aamma ilanngullugu
oqaatigissavara peqqissaasunik massakkut siornamut naleqqiullugu
atorfinitsitsisarpugut, atorfinitsitsisimavugut ataavartunik. Kisiannili aamma
suli aamma amerlanerusunik taartinik aamma pissarsisimalluta. Tassa
pissarsiornerput tassuunakkut oqiliallassimavoq. Amerlanerusunik aalajangersimasunik
atorfinitsitsinikkut aamma amerlanerusunik taartaasussanik pissarsinikkut.
Kisianni
taanna naammaginanngilaq amerlavallaarput suli taartaasartut. Taamaattumik taassumap tungaa
pitsanngorsaavigineqarnissaa taakkua aamma nukinginnarpoq.
Maliinannguaq
Markusseni Mĝlgaard-ip apeqqutigivaa inuttussusermut naatsorsuutit suminngaaniit
pineqarnersut tassa oqaatigissavara sulisunnit paasitinneqarama
naatsorsueqqissaartarfik Grĝnlands Statistik tassani ikiortigineqarsimasoq.
Qeqertarsuup
sooq Ilulissanut atasariaqarnera Aasiannuunngitsoq tanna massakkut angallannikkut
pissutsit minnerunngitsumik eqqarsaatigalugit taamatut taanna
naatsorsuutigaara. Kisianni tassa taanna suleqatigiit, una
eqqaasitsissutigisariaqarpara suleqatigiissitaq sulisimasoq inuttalersorneqarsimavoq
ilaatigut Qeqertarsuup tunuani peqqinnissaqarfinniinngaaniit tamanit peqataaffigineqartumik.
Nakorsaanernit napparsimaveqarfinninngaaniillu aamma Qeqertarsuarminngaaniit
Aasianniit Qasigiannguaniit.
Taakkua
suleqatigiissitami suleqataasimapput uuminngalu nalunaarusiami
suliarinneqataallutik. Tassalu taakkua nalilersuineri oqariartuutaallu
tunngavigalugit nalunaarusiaq suliarineqarsimavoq. Taamaattumik taakkortai
suut sumut, aammalu sooq sulinermut tunngassuteqartut taamatut oqariartuutigineqartut
uanga tatigalugit.
Aamma
Naalakkersuisuninngaaniit inassuteqaatit taakkua ingerlateqqissimavagut.
Kisianni oqareernittuut massakkut oqaatigineqartut suliap
ingerlateqqinnissaanut soorunami aamma ilanngullugit suliarineqassapput.
Sulisutigut
annikillisaasinnaneq 10,3-nik nuussisinnaanermut oqaatigissavara taanna
assersuutitut taaneqarsimammat tassa sulisoqarnikkut inissitsiterinissamut
siunnersuusiortoqarnikuuvoq ataatsimiititaliakkut ukiut marlussuit matuma
siornatigut tassanilu oqaatigineqartut malinneqassappata oqaatigineqarpoq
taava kinguneqarsinnaavoq.
Kisianni
taanna Naalakkersuisut inassuteqarnerminni uterfiginngilaat tassani
pisariaqarmat massakkut aaqqissuusseqqinnermi sulisutigut ilaatigut pilattaanermut
amerlanerusunik pisariaqartitsinerit eqqarsaatigalugut
ingerlattariaqarmata. Unalu
oqaatigeqqissavara sulisunik ikilisaaniarnermik siunertaqartoqanngimmat.
Qanimut innuttaasunik sullissineq taanna peqqinnissaqarfimi
napparsimaveqarfinni annertunerpaammik taanna suliarineqartoq. Taanna innarlerniarneqanngimmat.
Soorunami
oqarsinnaanngilagut immaqa allaffissornikkut allatigulluunniik ataasiakkaanik
nuussisoqarsinnaanera taanna massakkut nuussisoqanngivinnissaa taanna massakkut
neriorsuutigisinnaanngilara.Kisianni annertunerusumik taamatut pisoqarnissaa
takorluunngilara. Kisiannili erseqqinnerusumik taakku paasiniagassatta
ilagivaat.
Ataatsimiititaliat,
peqqinnissamut ataatsimiititaliat ataatsimeersuartinneqarnissaat taanna
aningaasaliiffigineqarnikuunngilaq aamma taamatut erseqqaritsigisumik
oqariartuuteqarneq uanga taamatut paasinikuunngilara. Kisianni
paatsoorsimagukku taanna utoqqatsissutigissavara. Kisianni oqareernittuut
aningaasaliissuteqarfigineqarnikuunngilaq.
Ukiut
marlussuit matuma siornatigut pinaveersaartitsinermik siunnersortinik aammalu
pitsaaliuinermut siunnersuisoqatigiit pilersinneqarnissaanut atatillugu
taakkua peqqinnissamut ataatsimiititalianinngaaniit tamanit toqqarneqartarput.
Taakkua eqqaamavara oqaluuserineqartut, taakkua toqqarneqarpata taava takkua
peqqinnissamut ataatsimiititaliaminngaaniit toqqarneqartut nuna tamakkerlugu
ataatsimiisinneqassasut. Taannalu massakkut ukiumoortumik pisarpoq.
Kisianni
taanna peqqinnissamut ataatsimiititaliap tungaa taanna misissoqqissavarput.
Naggataarutigalugu
oqaatigissavara tassa nakorsat nakorsaanerit aammalu allat sulianik ilisimaarinnittut
tusarniaanermilu nakorsat peqatigiiffiat ilaatigut suleqatigiissitaq
sulisimasoq. KANUKOKA taakkua naliliinerat pisariaqartitsinermik allannguinissamik
pisariaqartitsinermik paasinnillunilu aammalu pinngitsuuisinnaannginnermik
oqariartuuteqarnerat isumaqarpunga uagut tusaanngitsuusaarsinnaanngikkigut.
Aaamma Naalakkersuisuni isumaqatigigatsigit.
Taakkualu
peqqinnissaqarfiup Nunatsinnut nuunnerinnaanit pinngilaq kisiannili ilaatigut
ilinniartitaanerit allanngornerinik immikkuullarinnerusunit
suliaqarsinnaalernermit, aammalu
minnerunngitsumik innutaasut sullinneqarnissamik pitsaassusissamik
annertunerusumik kissaateqarnerannik aallaaveqarpoq. Aammalu teknikkikkut
ineriartornerup sukkaneranik.
Tamakkualu
tamarmik pisariaqartitsipput ilinniartitseqqittarnissanik,
pikkorissartitsiuarnissanik. Aammalu sulisut imminnut isumasioqatigiillutillu
qanimut suleqatigiittutut misigisimannissaanik pisariaqartitsivoq. Qanga
pissusiusimasut uninnga.. pissutsit massakkut allanngorsimaqaat, qanga
pissusiusimasut uninngaffigiinnarsinnaanngilagut.
Taamaaliorutta isumaqarpunga akisussaassuseqanngitsumik
pissusilersussasugut. Kisiannili sapinngisamik pitsaanerpaassaq anguniarlugu
ilisimaarinnittut isummersueqataasinnaasut suleqatigalugit
ingerlaqqeriarnissatsinnik oqariartuuteqarnerp.. pisinnaatinneqarnerput Naalakkersuisunit
taanna qujamasuutissavara.
Anders Andreassen, Ataatsimiinnermik aqutsisoq:
Taamaalilluni ullumikkut
oqaluuserisassaq immikkoortup 14-ip Qeqertarsuup tunuani peqqinnissaqarfiup
eqiterneqarnissaa pillugu nassuiaatip oqaluuserineqarnera tamaanga
killeqarallarpoq.
Oqaluuserisaq naammassivoq.