Kalaallit Nunaanni Inatsisartut

Oqaluuserisassani immikkoortoq 17		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 20. Maj 1998 nal. 10.44

 

Oqaluuserisassani immikkoortoq 17

 

Amutsiviit allanngortinneqarnissaannik nassuiaat.

(Isumaginninnermut, Suliffeqarnermut Pisortallu Suliassaqarfiutaannut Naalakkersuisoq)

 

 

 

Ataatsimiinnermik aqutsisoq: Otto Steenholdt.

 

Mikael Petersen, Isumaginninnermut, Suliffeqarnermut Pisortallu Suliffeqarfiutaannut Naalak­kersuisoq:

Amutsiviit allanngortinneqarnissaat pillugu nassuiaat Naalakkersuisut sinnerlugit matumuuna saqqummiutissavara.

 

Inatsisartut arlaleriaqalutik nunatsinni inuussutissarsiornermut ingerlatsinikkut atugassarititaasut naleqqussarlugit pitsanngorsarnissaannut periarfissat oqaluuserisarsimavaat. Paasissutissarpassuit saqqummiunneqarsimapput, aaqqissuussinerit naleqqussarnissaannik pisariaqartitsinermi tikkuaassisuusut oqallisigineqartarsimallutik. Aammalu suliffeqarfiit namminersortunut ingerla­tassanngortittariaqarnerat ilanngullugu pisariaqartutut tikkuarneqarluni oqallisigineqartarsimallu­ni.

 

1994-imi ukiakkut katersuunnermi Inatsisartut nalunaarusiaq aalisarnermi pissutsit allanngorneri­nik paasisat tunngavigalugit nalunaarusiaasoq, aammalu Amutsiviit ingerlatsinerinut tunngaviu­sut allanngortinnissaata pisariaqarneranik tikkuaasoq oqaluuseraat. Aalisariutinut pigineqartunut kiffartuussinerup pitsaassusia suliassaqartitsiniarnerlu attatiinnassappata suliffeqarfiup allanngor­tinnissaa aammalu misilillugu namminersortunut ingerlatassanngortikkiartuaarnissaa pisariaqar­toq oqallisigineqarluni siunniunneqarpoq.

 

Taamaattumik Naalakkersuisut amutsiviit ataasiakkaat ingerlataat allanngortiterlugit aallartip­paat, amutsiviit niuernikkut tunngavissaqarluarnissaat pissutsinullu atuuttunut naleqqussarneqar­nissaat siunertaralugu aaqqissuussiffiginiarlugit.

 

Allanngortiterinermi namminersortut ingerlatsisorilernissaat siunertarineqarpoq. Tamannalu amutsiviit ataasiakkaat suliassaasa ineriartortinneqarnissaannut periarfissagissaarnerulersitsis­saaq.

 

1998-imut aningaasanut inatsimmi oqaasertaliussaq allanngortiterinermut pisortatigoortumik tunngaviusoq imatut oqaasertaqarpoq:

Naalakkersuit piginnaatinneqarput amutsiviit ataasiakkaat inuussutissarsiutinik assigiinngitsunik ingerlatsivinngortinneqarnissaannut pituttuisunik isumaqatigiissuteqartarnissamut. Amutsiviit suliffeqarfinnut namminersorlutik ingerlanneqartunut ilanngunneqarnissaannut, suliffeqarfittullu namminersortunit ingerlanneqartutut allatulli atugassaqarluni ingerlanneqarnissaa tunngavis­siorumallugu Naalakkersisut allanngortiterinissaq sammisimavaat.

 

Siunissaq ungasinnerulaartoq isigalugu tamanna Landskarsimit tapiissutinik pisariaqartitsiun­naarnermik kinguneqassaaq. Taamaaliornikkut amutsiviit umiatsialiortut aammalu amutsiviit iluarsaassisarfiusut nunatsinni tamani assigiimmik atugassaqalissapput. Ammalu aalisarnerup assartuinerup inuussutissarsiutillu allat ineriartornerat ilutigalugu, niuernikkut periarfissat amerlanerusut ineriartortinneqarnissaannut periarfissaqalissalluni.

 

Amutsiviit allanngortinneqarnerat piffissanut marlunnut avillugu ingerlanneqassaaq. Tassa siulleq Nuummi amutsivinnut tunngavoq aappaali sinerissami amutsiveqarfiit allanngorterneqar­nissaannut tunngalluni.

 

Nuummi amutsivimmut tunngatillugu suliffeqarfik aqutsinikkut sulianillu paasisimannilluartu­mik pilersorneqaqqullugu 1997-imi ukiakkut Aarhus Flydedok A/S-imit siunnersortissarsiorsi­mavoq, kiisalu isumaqatigiissutissamut tunngavissamut missingersuusiortoqarpoq Nuummi amutsivik aktieteqarluni ingerlatseqatigiiffinngortinneqassappat Aarhus Flydedok A/S-ip piginneqataarusuttunut allanut naleqqiullugu piginneqataanissamik sallinngortitsisussamik.

 

Nuummi amutsivik eqqarsaatigalugu, aktieteqarluni ingerlatseqatigiiffimmik pilersitsisoqassasoq suli siunertarineqarpoq, Aarhus Flydedok A/S-imit peqataaffigineqartumik. Aarhus Flydedok A/S-imik oqaloqateqartarnerit suleqatigiinnerlu suliffeqarfiup ingerlataanut tunngaviit naliler­sorumallugit suleqatigiinneq qanittukkut annertusineqarpoq.

 

Amutsiveqarfiit allanngorterneqarnissaannik suliassaq annertooq isumannaatsumik illersorneqar­sinnasumillu ingerlakkumallugu, Naalakkersuisut allanngortitsinissamut piffissamik iliuusissa­millu pilersaarummik suliaqarput, amutsiveqarfiit ataasiakkaat qanoq iliorluni allanngortiternis­saannut periarfissanut najoqqutassanik imalimmik. Pilersaarutaavoq misissueqqissaarnermut naliliutinik nalunaarusiornermut saqqummiussinernut ilaali ilanngullugit suliat ilarujussui 1998-ip ingerlanerani pissasut, taamaalillunilu 1999-imi upernaakkut inatsiseqarnermut tunngasut allallu nalunaarsuinerit ilaalu ilanngullugit kisimik suliarineqassallutik.

 

Nuummi amutsivik siulliuluni namminersortunit ingerlatassanngortinneqassappat, sinerissami amutsiviit ataasiakkaat ingerlateqqinneqarnerat Nuummi Amutsivik A/S-imik ingerlatsinissamik isumaqatigiissuteqarnikkut isumannaarniarneqassaaq. Taamaattumik Nuummi amutsivik aktieteqarluni ingerlatseqatigiiffinngortinneqassappat, tamanna amutsivinnut allanut sunniuteqar­tussaanngilaq. Ullumikutullu ingerlatinneqaannarnissaat ilimagisariaqarpoq aktieteqarfinngortin­neqarnissamik tungaannut.

 

Amutsiviit allanngortinneqarnissaat Naminersornerullutik Oqartussat pigisaannik tunisinermik maleruagassat atuuttut malillugit pissaaq, aammalu tamanut tunngatillugu piumasarineqarluni amusinermi singitsinermilu kiffartuussinerup pitsaassusiata sapinngisamik pigiinnarneqarnissaa. Taamaalilluni amutsivinni pigisat naligisat kiisalu sulisut ingerlatseqatigiiffimmut nuunneqarner­minni aningaasarsiamikkut atorfinitsitaanikkullu atugassarisitaasutigut allannguuffigineqanngin­nissaat isumannaarneqassallutik.

 

Paamiuni amutsivik allanngortinnissami siuarneqarpaajuvoq. Paamiut kommuneat amutsiviup ingerlateqqinneqarnissaannut soqutiginnittoq, ingerlatsinikkut naliginnaasumut atugassaqarluni amutsiviup ingerlanneranik nangitsiumanini tusarliutereerpaa. Kommune amutsiviup namminer­sortunit ingerlatassanngortinniarnerani suliatigut peqataavoq. Ulloq 14. april Naalakkersuisut aamma Paamiut kommuneata akornanni siunertamik nalunaarut atsiorneqarpoq. Tunniussinissa­mi piumasarineqarpoq kommunep ingerlaqqinnissami amutsiviup pigisaasa nalingi kiffartuusi­nerup ingerlareersup aammalu sulisut ingerlatseqatigiiffimmut nuunnerminni aningaasarsiamik­kut atorfinitsitaanermillu atugassarititaasutigut allannguuffigineqannginnissaa qularnaassagaa.

 

Piffissamik iliuusissamillu pilersaarut malillugu, pissutsit allanngortinnissaanut tunngasut 1998-imi ukiakkut katersuunnissamut paasinarsereersimajumaarput. Amutsiviit allanngortinneqarnis­saa pillugu Inatsisartut peqqussutissaattut siunnersuummi, amutsiviit iluanni, amutsiviit ataasiak­kaat tamakkerlugit pineqarnissaat ilimagineqarpoq. Aammalu ilimaginngisanik pisoqanngippat piffissamik iliuusissanillu pilersaarut malinneqassaaq, aammalu peqqussutissap Inatsisartut ukiakkut katersuunneranni saqqummiunneqarnissaa ilimanarluni.

 

Naalakkersuisut nassuiaassipput nunatsinni amutsiviit aalisarnikkut inuussutissarsiuteqarnermut aammalu inuussutissarsiutinut naliginnaasunut aaqqissuussaanikkut naleqqussarnissaat pillugu suleqqinnissami Inatsisartunit tapersersorneqarnissartik ujartorpaat. Amutsiviit iluanni amutsiviit ataasiakkaat namminersortunut ingerlatassanngortikkiartuaarneratigut naliliutit niuerfiit tunnga­vigalugit sulinermut atorneqarnerulissapput aammalu illoqarfinni ataasiakkaani niuerfigineqar­sinnaasut amerlanerusut ilanngussorneqarsinnaasut periarfissaqalissalluni.

 

Taamatut oqaaseqarlunga Inatsisartunut nassuiaat saqqummiuppara oqaluuserisassanngorlugu.

 

Karl Lyberth, Siumup oqaaseqartua:

Ukiuni arlalinngulersuni qinigaasugut, minnerunngitsumik Siumup tungaaniit, angorusutarput suli timitalerneqariartorluni erseqqissiiartorpoq - tassalu namminersortunik annerusumik pisortat suleqatiginninnissaat.

 

Namminersortut periarfissinneqarnissaannik oqalutsilluta , minnerunngitsumik pisortat suliffe­qarfissuisa namminersortunit tiguneqarnissaat eqqarsaatigalugu, nunatsinni najugaqartuusugut tamatta, pingaartumik qinigaasugut, paasilluinnartariaqarparput pisortat suliffeqarfissuisa namminersortunit tiguneqarnissaat imaaliallaannaq piviusunngortikuminaammat.

 

Anguniagaq tamatta isumaqatigiissutiginikuusarput utaqqikatannaveersaarluta, peqqissaarullugu soorunalumi inuiaqatigiinnut iluaqutissaq siunertarilluinnarlugu suliarisariaqarparput.

 

Qinikkat namminersortullu akunnitsinniittoqarpugut utaqqikatattunik. Tamanna paasinarsinnaa­galuartoq aammaarlunga oqaatigeqqittariaqarpara anguniagaq peqqissaarulluinnarlugu, kukkuna­veersaarluta piffissaqarluarlutalu angiartariaqarparput - politikikkummi kukkussutit sumiikkalu­araanniluunniit inuiaqatigiinnut akisusinnaasut tamatta nalunngilarput.

 

Namminersortut periarfissinneqarlik - oqaasinnaarilersimasatta - Naalakkersuisut tungaanit ilumut pimoorullugu ingerlanniarneqarnera uppernarsisinneqarpoq amutsiviit allanngortinnissaat pillugu nassuiaatip saqqummiunneqarneratigut.

 

Amutsiviit namminersortunit ilaatigut kommunenik suleqateqarlutik, soorlu uani Paamiut eqqaaneqarsinnaasoq, tiguneqarnissaat anguniakkatsinnut naleqqummat Siumup tungaaniit isumaqatigilluinnarparput, taamatullu Nuummi amutsiviup siulliulluni namminersortunit tiguneqarnissaa akornutissaqartinnagu.

 

Nuummi amutsiviup siulliulluni namminersortunit tiguneqassappat pingaarluinnartuuvoq amutsiviit illoqarfinni allaniittut allaffissornikkut ajornerusumik inissinneqannginnissaat qulakkiissallugu.

 

Sineriatsinni isoratoqisumi amutsiviit allaffissornikkut qarasaasiatigut atortorissaarutit iluaqu­siullugit, Nuummi amutsivimmiit qitiusumik aqunneqarput. Taamatut aqutsineq tamanit iluarisi­maarneqarpoq, allaffissornikkullu annikigisassaanngitsumik sipaarutaalluni. Taamaattumik Nuummi amutsiviup siulliulluni namminersortunit tiguneqassagaluarpat, arlaatigut iliorluni aaqqissuussisimanerup tamatumap ingerlatiinnarnissaa qulakkeerniartariaqarpoq.

 

Nuummi amutsiviup namminersortunit tiguneqarnissaanut atatillugu namminersortut nunanit allaneersut ilanngullugit, soorlu Aarhus Flydedok A/S ilaatigut taaneqarsinnaasoq, periarfissinne­qarnissaat Siumup tungaaniit taperserusupparput, tamatumani amutsivinnit ingerlatsinermut misilittagaqarluarlutik sungiussisimasnik ilaasortaqarnissaa qulakkiissammagu. Imaanngitsoq maannakkut ingerlatsisut nikagigatsigit, ilaatigulli aamma amutsiviit aningaasatigut patajaan­nerusumik ingerlanissaat angorusukkatsigu.

Amutsivinni sulisut eqqarsaatigalugit atorfeqarnerminni akissarsiatigullu ajornerusmik inissinne­qannginnissaat Siumup tungaaniit pingaartilluinnaratsigu Naalakkersuisunit tamanna eqqumaffi­giniarneqarmat iluarisimaarparput.

 

Amutsiviit namminersortunit tiguneqarpata ingerlalluarnissaa Siumup tungaaniit neriuutigilluin­narparput, tigusisussallu kikkuussagaluarnersut siunissami tamanit ajunngitsumik kissaallugit.

 

Taamatut oqaaseqarluta Naalakkersuisut suliamik ingerlatitseqqinissaannik tamakkiisumik Siumup tungaaniit taperserusuppagut, nassuiaammullu pitsaasumut anguniakkatsinnut naleqqut­tumut qutsavigalugit.

 

Peter Ostermann, Atassutip oqaaseqartua:

Ukiuni arlalinni amutsiviit pillugit oqallittarnerpassuit kingunerisaannik Naalakkersuisut maanna Atassutip isumaa malillugu nassuiaammik suliarilluagaasumik saqqummiussipput.

 

Atassummut ersarippoq nassuiaat tamaat ataatsimut isigalugu maani inimi oqallittarnerpassuarnit aallaaveqartoq.

 

Tamanna tunngavigalugu nassuiaammi piffissaliussaasut iliuuserisassatullu siunniunneqartut tamakkiisumik isumaqatigaavut. Paamiuni aaqqiisimaneq Atassummi pingaartillugu naammagi­simaarparput Naalakkersuisunullu inassutigissallugu, amutsivimmik tunisisoqassatillugu tunniussisoqassatilluguluunniit Paamiuni aaqqiisimaneq aallaavigisaqqullugu.

 

Arlalinni assersuutissaqarpoq amutsivik naliginnaasumik suliassat avataasigut tunisassiornermik ingerlataqartoq aningaasarsiornermini ingerlalluartarmat. Tassani soorlu Qaqortumi Maniitsumi­lu amutsiviit assersuutigineqarsinnaapput.

 

Taamaattumik Atassummiit Naalakkersuisunut inassutigissavarput, amutsivik tunineqassappat tunniunneqassappalluunniit tunisassiornermik ingerlataqarnissaa qulakkeerneqarassasoq, soorlu immaqa sanaartornermi, tassani nunap immikkoortortaani pisariaqartitat soorunami aallaavigalu­git.

 

Taama iliuuseqarnikkut suliassaqarnissaa, siunissaa ineriartortinnissaalu qulakkeerneqassapput, naammanngilaq aalisariutinik sullissinissap allanngunnginnissaa qulakkiiginnassallugu.

 

Taama oqaaseqarluta nassuiaat tusaatissatut tiguarput.

 

Evald Brønlund, Inuit Ataqatigiit oqaaseqartuat:

Inuit Ataqatigiit nuannaarutigalugu oqaatigissavarput uani ataatsimiinnermi amutsiviit pillugit nassuiaateqartoqarsinnaammat. Nassuiaat paasinnittaaserput naapertorlugu qulakkeerinnissinnaa­voq amutsiviit ingerlariaqqinnissaannut inuutissarsiutaasinnaanerannullu atorneqarsinnaasoq.

 

Nunatsinni amutsiviit siunissami piffissanut marlunnut avillugit ingerlanneqarnissaanut siun­niunneqarsimasoq ilalerparput, tassalu siullermik Nuummi amutsivinnut tunngasut, kiisalu aappaattut sinerissami amutsiveqarfiit allanngortiterneqarnissaannut tunngasut.

 

Inuit Ataqatigiit Nuummi amutsivik aktieteqarluni ingerlatseqatigiiffinngornissaannut taamatut­taaq Aarhus Flydedok A/S piginneqataanissaanut isumaqataanerput matumuuna nalunaarutigaar­put.

 

Aktieteqarluni ingerlatsinissat eqqarsaatigalugit Inuit Ataqatigiinniit ujartorusupparput suleqatis­sanik amerlanerusunik nassaarnissaq ammaffigineqartariaqartoq.

 

Nassuiaammi takuneqarsinnaavoq Namminersornerullutik Oqartussat Paamiullu kommuneat atsioqatigiissimasut, Paamiut amutsiviat kommunep nammineq siunissami ingerlatsilernissaanut tunngassuteqartoq. Tamannalu Inuit Ataqatigiinniit iluarisimaarparput.

 

Kommuneni suliffissaqartitsisarneq eqqarsaatigalugu isumaqarpugut kommunet pitsaanerusumik ingerlatsisinnaappata kommunet tunuarsimaartariaqanngitsut.

 

Taamaattumik Inuit Ataqatigiit paasisimavaat qujanartumik siunissami isumalluarnartoqartoq, isumaqaratta Inatsisartut peqataaneratigut kaammattuineratigullu siunissami nunatsinni amutsi­viit pitsaanerusumik ingerlalersinnaassasut.

 

Taamaammat naggataatigut Inuit Ataqatigiit Naalakkersuisut nassuiaataat tamakkiisumik tapersersoratsigu oqaatigiinnassavarput, nassuiaallu tusaatissatut tigullugu.

 

Bjarne Kreutzmann, Akulliit Partiiat:

Siunnersuutip nassuiaatilluunniit tullianik ataatsimiinnissamut kinguartinneqartup aappassaane­erlugu aallaqqaataaniit oqallisiginissaanut tapersersuisuunnginnama, matumuuna oqaatigiinnas­savara, piffissaliussat aamma iliuusissanik pilersaarutit naapertorlugit amutsiviit allanngortinne­qarnissaat piareersimanerussammat 1998-imi ukiakkut ataatsimiinnissatsinnut, taamaattumillu isumaqarlunga maanna annertunerusumik oqallisiginissaa pisariaqanngitsoq.

 

Taamaattumik nassuiaat tusaatissatut tiguara taperserlugulu.

 

Anthon Frederiksen, Kattusseqatigiit:

Nunatsinni amutsiviit namminersortutut ingerlanneqarsinnaanerat pillugu nassuiaat Kattusseqati­giinniit soqutigalugu misissorsimavara.

 

Siullermik erseqqissaassutigissavara Kattusseqatigiit pilersinneqarmatali namminersorlutik inuutissarsiutilimmik suli annerusumik periarfissiinissaq, pisortat ingerlataasa namminersortunut unammillinnginnissaat, suliffeqarfiillu ilaannik namminersortunik isumannaatsumik ingerlanne­qarsinnaasut namminersortunngortinnissaat ilisarnaatitta ilagilluinnarmassuk.

 

Taamaattumik amutsiviit namminersortunit ingerlanneqalersinnaanerat siunertaralugu suliniutit Kattusseqatigiinniit paasilluarlugit, minnerunngistumillu pisortat tamakkuninnga isumaginnik­kunnaarsinnaanerat iaumaqatigaarput. Tassami pisortat, tassalu Namminersornerullutik Oqartus­sat nammineerlutik pisortat ingerlataannik isumagisassanik naammareersunik peqarput. Taamaat­tumik ingerlatat namminersortunit isumannaatsumik ingerlanneqarsinnaasut namminersortunik periarfissiinikkut isumagineqarsinnaanerat anguniarlugu suliniutit tapersersortariaqarput.

 

Taamaammallu Nuummi amutsiviup siulliulluni namminersortunut ingerlatassanngortinneqarsin­naanera aallarniutitut pitsaasutut Kattusseqatigiinniit takorloorparput. Taamaaliornikkummi aamma nunani allaniik, suliffeqarfiit nunatsinnut ingerlatsinikkut aningaasaleeqataarusuttut ammaanneqassammaata, nunatsinni niuernikkut uummarissaataasumik.

 

Taamatut naatsumik oqaaseqarlunga nassuiaat taperserlugu tusaatissatut tiguara.

 

Mikael Petersen, Isumaginninnermut Suliffeqarnermullu Naalakkersuisoq:

Tassa Naalakkersuisut sinnerlugit qujassutigaara amutsiviit pillugit Naalakkersuisut nassuiaataat Inatsisartunut, tamanit ilassilluarneqarmat. Malugisinnaasakka naapertorlugit partiit tamavimmik nassuiaat aammalu tassani Naalakkersuisuninngaanniit ujartorneqartut tamavimmik taperserpaat. Suliaallu taamatut siunertaqartumik ingerlanneqarnissaat tamarmik kaammattuutigalugu. Taamaattumik annertoorsuarmik oqaasissaqanngilanga.

 

Ilanngulluguli oqaatigilaassavara, tassa Paamiunut amutsivinnut tunngatillugu, tassani kommu­nep  soqutiginnilluarnera aammalu ilungersuuteqarnera suliffeqarfissuup taassuma qanga allaat 50-it angusarlugit sulisoqartarsimasup ullumikkullu taamaallaat inunnik marlunnik oqaatigine­qartaarmat pingajussaa affarmik ukiumut sulisoqartoq. Tassa inuit marluk, aammalu ukiup affaani ataatsimik aamma sulisoqartarluni. Taamatut ingerlasoq, suli annertunerusumik atorluar­neqarsinnaanera suliffissatigut sulisitsinissamullu siunertaralugu kommune ilungersuuteqarnera, taanna assut Naalakkersuisunit nuannaarutigigatsigu.

 

Taamaattumik Inatsisartuninngaanniit kaammattuutigineqartut ilaat tamatumani kommunet aamma amutsiveqarfiusut tamatumani suleqatigineqarnissaat tamanna tunaartaralugu Naalakker­susuni ingerlajumaarpugut.

Aamma maluginiarpara Inuit Ataqatigiinninngaanniit kaammattuutigineqartoq, taamatut nutar­terinermi allaat suleqatissarsiornerup allanik aamma suli annertunerusumik ingerlanneqarnissaa. Tamanna ilanngullugu tiguarput. Aamma taamaalilluta immaqa allaat avataaninngaanniik tunisassioriaatsit, aammalu sanaartornerit nutaat periarfissaasinnaasut ilanngullugit nalilersorne­qarsinnaajumaarmata.

 

Nuummi amutsivimmut tunngatillugu tassani Naalakkersuisuninngaanniit pingaartilluinnarpar­put aalajangersimasumik paaseqatigiiffiusumillu piginneqatigiiffiup, tassa aktieselskabip, pilersinneqarnissaa. Aamma tamatumani pingaartillugu umiarsuarnik sullisisinnaanerup annertu­sarneqarnissaa siunertaralugu. Nalunngilarput ullumikkut immaqa umiarsuit anginngitsut suliarineqartarput, kisianni aamma umiarsuit anginerusut ilanngullugit sullinneqarsinnaanissaat neqeroorfigineqarsinnaanissaat siunertaralugu tamanna eqqarsaataavoq. Tassa puttasorsuarmik allaat amutsiviup peqalersinnaanera ilanngullugu nalilersuutini ilaammat.

 

Naggataatigut amutsiviit taamatut siunertaqartumik aaqqissuunniarneqarnera pillugu soqutigin­nittorpassuit qutsavigerusuppakka, aamma neriullunga taamatut soqutiginninneq annikilliartorani annertusisartussasoq. Tassami amutsiviit ingerlaqqinnissaat, inuiaqatigiinnut iluaqutaanerunis­saat, suliffissaqartitsinerunissaat siunertaralugu Naalakkersuisut anguniagaqalernerat tamanit maluginiarneqarsimasoq nuannaarutigaara. Tassami allaat Sulisa A/S-ip suleqataalersimanera soqutiginnilluni, aammalu SIK-p inuutissarsiutitigut aningaasaateqarfia, kommunet allallu namminersortut suleqataaniarlutik allaat tamatumani piareersimasut paasinarmat. Aammalu allaat aningaaserivik amutsiviit periarfissarititaat naapertorlugit ingerlatsisoqassappat aningaa­seriviup inussiarnersumik kiinnersimanera aammalu kiinnerusunnera malugisimasara tamanna aamma qujassutigissavara.

 

Taamatut oqaaseqarlunga nassuiaatip ilassilluarneqarnera qujassutigaara.

 

Knud Sørensen, Atassut:

Tassa ilisimagakku Aasianninngaanniit, Aasianni amutsiviup namminersortunik assigiinngitsunit assigiinngitsunut agguataarlugu tiguneqarsinnaaneranik apeqquteqartoqarsimasoq siusissukkulli, suliap taassuma sumut killissimanera aammalu qanoq eqqarsaatersortoqarnersoq tassunga tunngasumik paaserusukkaluarpara.

 

Mikael Petersen, Isumaginninnermik Sulisoqarnermillu Naalakkersuisoq:

Aasiaat amutsiviat pillugu sulineq massakkut aallartereerpoq, tassa aamma soorlu amutsiviit al-lat pillugit aamma taamaattoq. Ilumoorpoq Aasianni suliffeqarfiit assigiinngitsut aamma Aasian­ni angerlarsimaffeqartut annertuumik soqutiginnipput, aammalu kommune tamatumani soquti­ginnilluarluni, tamanna nalunngilarput. Taamaattumik suliassap taassuma ingerlanneqarnera pillugu qularnanngilaq ukiarpallaartinnagu alloriarnerit siulliit aallartereersimanissaat naatsor­suutigaara. Aamma kommunalbestyrelsip Aasianni ataatsimeeqatiginissaa naatsorsuutigaara piumaartoq ungasippallaanngistukkut. Soorluttaaq amutsiveqarfinni allani taamatut pisoqartus­saasoq. Tassa erseqqissaatigalugu, ukioq manna amutsiviit soorlu Aasianni allanilu amutsiviit qanoq pineqarnissaat ersarissumik aalajaaffigineqarsinnaassammat naatsorsuutigaara.

 

Oqaluuserisaq naammassivoq.