Oqaluuserisassani immikkoortoq 28 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinermik
aqutsisoq: Finn Karlsen, Siulittaasoqarfimmi ilaasortaq, Atassut.
Lars Karl Jensen, apeqquteqaateqartoq, Siumut:
Inatsisartut upernaakkut 1997-mi katersuunneranni taamanikkut Naalakkersuisut Siulittaasuat Royal Greenland A/S-ip nunami suliffissuini tunisassiornerup annertussusiata naapertuuttunngorsarneqarnissaanut pilersaarutit pillugit Inatsisartunut nassuiaateqarpoq. Tamatuma kingornagut taamanikkut Naalakkersuisut Siulittaasuata Royal Greenland A/S-ip nunami suliffissuini tunisassiornerup annertussusiata naapertuuttunngorsarneqarnissaa pillugit, Royal Greenland A/S isumaqatigiissuteqarfigalugu atsioqatigaa.
Tamatumallu kingunerisaanik Namminersornerullutik Oqartussat Royal Greenland A/S-ip ulloq 1. januar 1998-mi aallarnerfigalugu aningaasanik 269 mio. kr.-nik taarsigassarsineranik qularnaveeqqusiipput Inatsisartut akuersissuteqarneratigut. Taakkuli ukiuni tallimani taarsersugassaapput, tamatumunnga peqatigitillugu isumaqatigiissuteqarnerup nassataraa arlalinnik tunisassiorfeqalernissaa, Inatsisartullu akuersissuteqarneratigut landskarsimiit tapiissuteqartoqarpoq 269 mio. kr.-nit, ukiut tallimat ingerlaneranni tunniunneqartartussanik. naluneqanngitsutut tapiissuteqarnerup siunertaraa arlalinnik tunisassiorfeqalernissaa, sulisoqarnerullu ingerlaannarnissaa, Royal Greenland A/S-imik isumaqatigiissuteqarneq naapertorlugu.
Tunisassiorfinni arlalinni tunisassiornissamut siunissami pilersaarutit pillugit nassuiaammi saqqummiunneqarput, tunisassiornerup annertussusiata naapertuuttunngorsarneranit aammalu ulloq 1. januar 1998-mi atuutilersoq pillugu isumaqatigiissut, maannakkut atuutilereersoq suli naammassinngitsoq nassuiaammi pilersaarutit arlallit piviusunngortinneqarnissaat ajornartorsiutaalersimapput. Assersuutigalugu Qasigiannguani suliffissuarmut nutaamut pilersaarutigineqartumut imermik pilersuinissaq sillimaffigineqarsimanngilaq. Taamaammat pisariaqalersimavoq tunisassiornerup annertussusiata naapertuuttunngorsarneqarnissaanut aningaasaliissutaareersut qaavisigut, Namminersornerullutik Oqartussat aammaarlutik aningaasaliissuteqassasut 7,5 mio. kr.-nik annertussuseqartunik.
Assersuutit aappaattut taasinnaavara Royal Greenland A/S-ip ilisimatitsissutigimmagu Paamiu- ni Maniitsumilu assagiarsunnik nioqqutissiorneq pilersaarutigineqareersoq, maannakkut tunisassiassat pissutigalugit aallartinneqarsinnaanngitsoq. Tamatumunnga atatillugu oqaatigineqarpoq Nuummi assagiarsunnik nioqqutissiorneq Paamiunut nuunneqassasoq, Namminersornerullutik Oqartussat akiligaannik. Taamatut pisoqarnerata apeqqutigerusunnarsitippaa, qularnaallisinneqanngitsut tunngavigalugit Namminersornerullutik Oqartussat sinnerlugit Naalakkersuisut isumaqatigiissuteqarsimanersut. Kiisalu pisariaqartinneqarnersoq isumaqatigiissutit aammaarlugu isumaliutigineqaqqinnissaa. Inatsisartunut piviusunngortitsinissaq pillugu saqqummiunneqartup, tassalu tunisassiornerup annertussusiata naapertuuttunngorsarneqarnissaa Royal Greenlandimut aningaasaqarnikkut pingaarutilerujussuuvoq.
Kisiannili tunisassiornerup annertussusiata naapertuuttunngorsarneqarnissaanut pilersaarut, Naalakkersuisut Inatsisartunut saqqummiuteriigaat piffissami matumani atuuttumi, arlalitsigut naammassineqarnissaanut ajornartorsiutinik nassataqalereermat. Uani apeqqutigerusuppara Royal Greenland A/S-ip nunami suliffissuarnut tunisassiornerup annertussusiata naapertuuttunngorsarneqartup, tamatumallu Inatsisartuni 1997-mi upernaakkut katersuunnermi Naalakkersuisut Inatsisartunut saqqummiussaanni, qanoq annertutigisumik piviusunngortitsisoqassanersoq, kiisalu tunisassiornerup annertussusiata naapertuuttunngorsarnissaani pilersaarutit piviusunngortinneqassappata, tamakkua qanoq annertutigisumik aningaasaliiffigineqaqqinnissaat naatsorsuutigineqarnersoq.
Paaviaaraq Heilmann, Aalisarnermut, Piniarnermut, Inuussutissarsiornermut Nunalerinermullu Naalakkersuisoq:
Inatsisartunut ilaasortaq Lars Karl Jensen Royal Greenland A/S-ip nunami suliffissuini tunisassiornerup annertussusiata naapertuuttunngorsarneqarnissaa pilersaarutigineqartoq qanoq annertutigisumik piviusunngortitsisoqarsinnaanersoq, kiisalu tunisassiornerup annertussusiata naapertuuttunngorsarneqarnissaa piviusunngortinneqassappat, qanoq annertutigisumik aningaasaliiffigineqaqqinnissaa naatsorsuutigineqarnersoq apeqquteqaateqarpoq. Lars Karl Jensennip apeqquteqaateqarneranut tunngaviuvoq, tunisassiornerup annertussusiata naapertuuttunngorsarnissaata pilersaarutigineqarnerani, Qasigiannguani suliffissualiassap pilersaarusiorneqartup nutaap pilersinneqarnissaani, imermik pilersuineq sillimaffigineqarsimanngimmat, kiisalu Royal Greenland A/S-ip nalunaaruteqarnera, Paamiuni Maniitsumilu saattualeriffissanik imaluunniit assagiarsuleriffissanik pilersitsisoqarsinnaanngitsoq, maannakkut tunisassiassat pissarsiarineqartartut tunngavigissagaanni.
Assersuutit taakku tunngavigalugit Lars Karl Jensen apeqquteqaateqarpoq, pilersaarutit tamarmik piviusunngortinneqassanersut aammalu pilersaarutit piviusunngortinneqassappata aningaasaliiffigineqaqqinnissaannik pisariaqartitsisoqassanersoq. Isumaqatigiissuteqartoqarneranut tunngaviuvoq Royal Greenland A/S-ip ukiuni arlalinni nioqqutissiorfimmini naammassisinnaasai annertuallaarsimammata. Tunisasiornerup annertussusianik tunisassiassanik mannakkut tulaanneqartartunut naapertuuttunngorsaanissap nassatarissavaa, Royal Greenland A/S-ip aningaasartuutiminik ukiumut 50 mio. kr.-nit missaannik ikilisitsisinnaanissaa. Taamaattorli tunisassiornerup annertussusiata annikillisinnerata nassatarissavaa, illoqarfinni arlalinni suliassaqartitsinermik annikillilerinissaq.
Tamanna tunngavigalugu Namminersornerullutik Oqartussat aamma Royal Greenland A/S illuatungeriillutik pituttuisumik isumaqatigiissuteqarput. Isumaqatigiissut imaqarpoq Namminersornerullutik Oqartussat piffissap ukiunik tallimanik sivisussusillip ingerlanerani, Royal Greenland A/S-imut tapiissuteqartassasut, taamaalilluni Royal Greenland A/S illoqarfinni arlalinni suliffissanik pilersitsillunilu atatitsissasoq, nioqqutissianik allatut ittunik pilersitsinermigut. Tamanna isumaqatigiissummi qitiuvoq, tassalu suliffissanik pilersitsillunilu atatitsinissaq.
Tassa taamaalilluni illuatungeriilluni pituttuisumik isumaqatigiissuteqartoqarpoq, Naalakkersuisullu soorunami ilimagaat Royal Greenland A/S pisussaaffimmik eqqortitsiumaartoq. Naalakkersuisut aammattaaq oqaatigissavaat, isumaqatigiissummi ukiumoortumik nalunaarusiortarnissamik pisussaaffiliisoqarmat. Naalakkersuisut taamaalillutik pilersaarutit tamarmik piviusunngortinneqarnissaannut periarfissamik qularnaaripput. Qasigiannguani suliffissuarmik nutaamik pilersitsinissaq eqqarsaatigalugu, Naalakkersuisut aalajangersimapput imermut ataniliinermik pilersitsinissamut aningaasanik qinnuteqartoqassasoq. Naalakkersuisut isumaqarmata pilersuinikkut attaveqarnikkullu atortunik piorsaaneq pisortat suliassarigaat. Tunisassiornerup annertussusiata naapertuuttunngorsarnissaanut isumaqatigiissummi paatsuugassaanngitsumik allassimavoq, Royal Greenland A/S pisortat suliassaataannik suliaqarnissamut akisussaaffeqanngitsoq, tassunga ilanngullugit imermik innaallagissamillu pilersuinerit.
Paamiuni Maniitsumilu saattualerifissanik/assagiarsuleriffissanik pilersitsinissaq, tunisassiorsinnaanerup napertuuttunngornissaanik isumaqatigiissummut ilaanngilaq. Illua tungeriilli isumaqatigiipput naatsorsuutigisat arlallit eqquutissappata, Royal Greenland A/S illoqarfinni taakkunani saattualeriffinnut aningaasaliiumaartoq. Naatsorsuutigisat tassaapput naammattumik aalisarsinnaaneq aqqutissiuunneqassasoq, kiisalu pisassiissutinut naammattunik tunngavissaliisoqassalluni, taamaalilluni saattuanik nioqqutissiorneq niuernermut atugassarititaasut tunngavigalugit pilersinneqarsinnaaqqullugu. Royal Greenland A/S isumaqarpoq saattualeriffik iluanaarutaalluni ingerlassaguni, ukiumut saattuanik 2.000 tonsinik pilersorneqartariaqartoq. Oqaatigineqassaaq 1997-mi Sisimiuni saattualeriffimmut 1.040 tonsit, Aasiannut 1.323 tonsit, kiisalu Nuummut 41 tonsit tulaanneqarsimammata.
Taamaattumik Naalakkersuisut isumaqarput, tunisassiornerup annertussusiata naapertuuttunngorsarnissaanik isumaqatigiissut, pissutsini siusinnerusukkut annertuallaamik tunisassiorsinnaanermik pigisaqareersumi, pisassiissutit ikiliartortut saqqumilaarnerusunngornerisa suliarineranni, sakkuussasoq naleqquttuulluni pisariaqartinneqartoq. Isumaqatigiissummut tunngaviusoq erseqqilluinnarsimavoq, aammalu Naalakkersuisut maannakkut ilimagaat, tunisassiornerup annertussusiata naapertuuttunngorsarneqarnissaanik pilersaarummi immikkuualuttut piviusunngortinnissaannut akuersissuteqaqqinnissamik pisariaqartitsisoqanngitsoq. Naggataatigut oqaatigineqassaaq, isumaqatigiissut tunngavigalugu aalajangerneqarmat taanna, tassa ukioq 2000-tip affaata siulliup ingerlanerani nalilersorneqassasoq. Taamaattumik taamanikkussamut naleqqussaanissat pissusissamisoorsinnaapput, pissusiviusut isumaqatigiissutigineqartup nalaani naatsorsuutigisanit allatut ingerlalersimagaluarpata.
Laannguaq Lynge, Siumup oqaaseqartua:
Inatsisartunut ilaasortap Hr. Lars Karl Jensennip Royal Greenland A/S-ip nunami suliffissuaataani naapertuuttunngorsaanermi pilersaarutigneqartut, tamarmik piviusunngortinneqassanersumik apeqquteqaataa ilanngullugulu apeqquteqaataa, taamaattoqassappat aningaasaliisoqaqqittariaqassanersoq Siumumiit ima oqaaseqarfigissavarput. Inatsisartunut ilaasortap Hr. Lars Karl Jensennip apeqquteqarnermini tunngavilersuutai, Qasigiannguani nutaamik fabrikkiliornermi imilersorneqarnissaata siumut sillimaffigineqarsimannginnera, aammalu Paamiuni Maniitsumilu saattussanik tunisassiorfiliorsinnaanermik eqqarsaatit, Lars Karl Jensennip isumaa malillugu allanngortinneqarsimanngitsut.
Siorna tunisassiornermut naapertuuttunngorsaanermi anguniarneqartussanut nalunaarusiami saqqummiunneqartut ilagaat, naapertuuttunngorsaasariaqarnermut ilaatigut peqqutaasut tunngaviunerpaasullu tassaasut, suliffissuit rejeleriffiusut naammassisinnaasaasa annertussusaanik annikinnerulersunik tulaassuiffigineqareersut qaavatigut, TAC-ip rejenut tunngatillugu appartinneqarsimanera peqqutaalluni, aammalu tunisassiorfiit taama amerlatiguassappata, Royal Greenland A/S-ip teknologi-kkut malinnaaniarluni aningaasaliissuteqartarnissaata malinnaasinnaajunnaarnissaa. Allatut oqaatigalugu, pissutsit tamaanga killittut aaqqiiffigineqanngippata, unammillersinnaanerup annikillivallaarnissaa annilaangatigineqarmat, Royal Greenlandillu aningaasaqarniarnera taamaaliornikkut nakkaakkaluttuinnartinneqassammat. Tunisassiornermut naapertuuttunngorsaanermut tunngatillugu isumaqatigiissummittaaq illuatungeriit, tassa Namminersornerullutik Oqartussat Royal Greenland A/S-ilu pisussaaffitsigut imminnut pituttorput, isumaqatigiissut ilaatigut imaqartineqarmat, illoqarfinni rejenik tunisassiornerup unitsitsiffiusariaqalerfiini, imaluunniit tunisassiorfinnik matusivinnerni suliffissat allat pinngitsoornatik allatut aaqqissuussinikkut pigiuarneqassasut. Taamaaliornikkut Royal Greenland A/S inuiaqatigiinnut suliffissaqartitsiniarnissamut ataavartumik peqataanissaminut pituttorneqarporlusooq.
Naalakkersuisut akissuteqaataatigut erserpoq pilersaarutinik naapertuuttunngorsaaniarnermi isumaqatigiissut malillugu pilersinniagaasunik qanimut malinnaajumasut ukiumoortumik nalunaarusiortarneq aqqutigalugu. Tamanna Siumumiit iluarinarteqaarput, tassami taamaaliornikkut pilersaarutit piviusunngortinniarneqarnerat, nakkutigineqartumik malinnaavigineqartuassammat. Naalakkersuisut ukioq 2000-tip affaata siulliup ingerlanerani, isumaqatigiissutip nalilersoqqinnissaanik pilersaarutaat aamma Siumumiit ilalernartipparput. Taama oqaaseqarluta Inatsisartunut ilaasortap Hr. Lars Karl Jensennip apeqquteqaataanut Naalakkersuisut akissuteqaataat, Siumumi tusaatissatut tiguarput.
Otto Steenholdt, Atassutip oqaaseqartua:
Apeqqutigineqartumut Naalakkersuisup akissutaa Atassumminngaanniit oqaatigissavarput tunngavilersorluagaasoq, tassa taamatut nalilerparput. Akissutip imaa uaniippoq, taama iliorneq pissutsit pissusiviusut naapertorlugit allatut iliorneq ajornarsimasoq. Taamaattoq tupinnakuluppoq Qasigiannguani suliffissuassap pilersinneqarnissaa pilersaarusiorneqalermat, qanoq ililluni suliffissuassaq imilersorneqassanersoq pilersaarusiortunit sillimaffigineqarsimanngimmat. Tassa suliffissualiorneq pillugu oqarta ilisimatuut Quilimmi imeqanngitsoq aatsaat kingusinaarlutik paasisimammassuk. Ajornartorsiulli qaangerneqarsimavoq, qujanartumik Naalakkersuisut isumaqarmata suliassat taamaattut soorlu imilersuinissaq pisortat suliassarigaat. Paasinarluarpoq oqaatigineqarmat pilersaarutit piviusunngortinneqarsinnaanerat tunisassiassat qanoq tuttuvigineqartumik amerlassuseqarnerannik, kiisalu suliffiliortussap aningaasatigut ukiuni makkunani qanoq ingerlalluartigissusianik aallaaveqassasut. Assorsuaq ussernartorsiornarpoq qangali uteqattaarneqartartoq pingaartumik uannit, suliffissualiussagaanni pingaaruteqartut eqqaamasassat tassa, aalisagaqarpa qanoq amerlatigisunik aalisagaqarpa, umiarsualivia qanoq ippa, imeqarpa, sulisussaqarpa, taakkua sisamat tunngaviugajuttarput imaluunnit tunngaviginiarneqartarput suliffissuarmik aallartitsiniaraanni. Paasinarpoq Royal Greenland taakkua isigisimagai akissummi aamma taanna ersarippoq.
Taamatut nalilersuinermi ajoraluartumik illoqarfiit marluk tassa Maniitsoq Paamiullu neriulluaatigisaraluaminnik pakatsisinneqarput, saattualeriffissaagaluatut pilersaarutaagaluit illoqarfinni taakkunani tunisassiaasinnaasutut naatsorsukkat annikippallaarneri pissutigalugit. Ungasinngitsukkut ippassaaniinnannguaq 1998-mut TAC-t, taama taaneqartartut, pisassiissutillu pillugit Aalisarnermut, Piniarnermut, Inuussutissarsiornermut Nunalerinermullu Naalakkersuisup nassuiaataa maani Landstinngimi oqallisigigatsigu. Atassummiit uparuakkatta ilagaat, saattussat pillugit misissuinerit annikippallaarneri, ilaatigullu misissuisimanerit ikittuinnaat ilaallu allaat 1991-meersut aallaavigalugit saattuarniarneq ingerlanneqarmat. Ippassaaniinnaq Atassummiit oqarpugut misissuinerit pimoorussaanerusumik ingerlanneqartuuppata, immaqa tunisat suli amerlanerulissagaluartut suliffinnillu pilersitsissagaluarlutik. Maana erseqqissaatigissavarput saattussanik misissuinerit Paamiut eqqaani 1996-meersut tuttuviginartutuut nalileratsigit. Nassuiaammi naapertuuttunngorsaanissamik tassa Royal Greenlandip aningaasartuutissaminik 50 mio. kr.-nik ikilisitsinissaa taaneqarpoq. Tamannalu illoqarfinni arlalinni suliassaqartitsiniarnermik annikillisitsisussaavoq.
Namminersornerullutik Oqartussat Royal Greenlandilu isumaqatigiissuteqarsimapput Namminersornerullutik Oqartussat tapiissuteqartarnissaannik kingunilimmik. Tamanna pissusissamisoortutuut Atassummiit isigaarput, aningaasat tapiissutissat suna siunertarineraat isumaqatigiissutaanni ersarimmat. Uaguttaarmi aamma Atassummiit neriuutigilluinnarparput Royal Greenland neriorsuumminik eqqortitsiumaartoq, tamannalumi nakkutigineqarsinnaassaaq ukiumoortumik aamma nalunaarusiortarnissamik piumaffigineqareersimammat. Isumaqatigiissutip ukioq 2000-tip affaata ingerlanerani nalilersoqqinneqarnissaa atassummiit iluaraarput. Ingerlariaqqinnissami pissutsit taamanikkut paasisat qanoq aalajangernissamut aalajangiisuujumaarmata. Neriuutigilluinnarparput illoqarfiit saqqummiussami taaneqartut pakatsisinneqarsimasut, taamanikkut misissueqqinnermi imatut naliliiffigineqarumaartut, imannak aalisarneqartussanik peqartigisut, massakkut nangaaneq taamanikkut qaangersinnaallugu.
Johan Lund Olsen, Inuit Ataqatigiit oqaaseqartuat:
Siorna majip ulluisa 5-maanni, tassalu ullumikkumiit ukioq ataaseqqinnaaq qaangiuteriallartorli, Royal Greenland A/S-ip nunami tunisassiorfiutaasa tunisassiassaqassutsimut naapertuuttunngorsarneqarnera pillugu, Naalakkersuisut nassuiaatigisaat, partiinit aamma isummersorfigineqareerluni maani inimi siullermik saqqummiunneqaqqaarpoq, taamanilu Inatsisartut kissaateqarnerat malillugu Aalisarnermut Ataatsimiititaliamut innersuunneqareersimalluni, kingorna aamma junip 3-juani 1997-mi nangeqqinneqarluni. Taamaattumik taamanili eqqartoreersimasagut innersuussutigineqartullu ullumikkut qanoq kinguneqarsimanerinik paasissutissinneqarnissarput pisariaqarmat, Inuit Ataqatigiit pissusissamisoorsorivarput, soorlumi Inatsisartunut ilaasortap Lars Karl Jensennip apeqquteqaateqarneratigut tamanna aamma maanna siunertarineqartoq. Siornami Inatsisartut tamarmiusut pingaartumillu Aalisarnermut Ataatsimiititaliap immikkut taamaniilli ernumanartutut isigisimasaa tikkuassagaanni oqartariaqarpugut, ernumanerput maanna tunngavissaqarluarsimammat pingaartumik illoqarfiit marluk tassalu Maniitsup kiisalu Paamiut Kommuuniini suliassaqartitsiniarnerup tungaatigut, pissusiulersimasut annerusumik eqqarsaatigissagaanni. Taamanimi Inuit Ataqatigiinniit siullermik majip 5-maanni, kingornalu Aalisarnermut Ataatsimiititaliaq isumaqatigiissoq, aamma aqqutigalugu junip 3-juanni, isumaliutissiissuteqarsimavugut ima oqaasertaqartunik, ilaatigut illoqarfiit pineqartut taakku marluk eqqarsaatiginerullugit, issuaaneruvoq: Ataatsimiititaliap oqaluuseraa tassalu majip 21-ani aammalu majip 26-ani 1997-mi, tunisassiorfiit tunisassiassaqassutsimut naapertuuttunngorsarneranni tunisassiornertigut allanngortiterinerit pilersaarutigineqartut, Kommuunenut eqqugaasussanut qanoq kinguneqarumaarnersut, tassunga atatillugu Ataatsimiititaliap pingaartillugu Naalakkersuisunut kaammattuutigerusuppaa, Kommuunet tunisassiorfiit tunisassiassaqassutsimut naapertuussarnerisa kingunerisaanik suliffissanik annaasaqartussat, sapinngisamik annikinnerpaamik eqqugaanissaat suliniutigeqqullugu.
Ataatsimiititaliap tamatumunnga atatillugu naammagisimaarlugu maluginiarpaa, Naalakkersuisut siulittaasuata, tassalu taamani Lars Emil Johansennip, nassuiaatip saqqummiunnerani tassalu majip 5-maani tamanna suliniutigineqassasoq neriorsuutigimmagu, tassalu issuaaneq naavoq. Naak Aalisarnermut Naalakkersuisup matumani ilumoornerassagaluarlugu oqarmat, Paamiuni Maniitsumilu saattualeriffissanik pilersitsinissaq tunisassiorsinnaanerup naapertuuttunngorsarnissaanik Royal Greenlandimut isumaqatigiissutigineqarsimasumut ilaatinneqanngitsoq. Inuit Ataqatigiit sakkortuumik uparuartariaqarsorivarput Naalakkersuisut aatsaaginnaq issuakkatuut Inatsisartunut neriorsuutigereersimasartik maannamut ataatsimilluunniit eqqortinniarsimanngimmassuk. Ilisimaneqartutuummi Paamiut eqqaaginnaraanni suliffiit 50-sit missaat maannakkut annaaneqareersimapput, Royal Greenlandip Paamiuni qaleralinnik avaleqqerisitsisimanera maanna illoqarfimmut allamut nuunneqarnerinnaatigut.
Suliffiit Paamiut Kommuuneata aningaasarsiorneranut pingaaruteqarluinnaqisut, suliffissanilli allanik taamaaqataanik neriorsuutigineqareersutuut tarserneqarnissaannik takusinnaaleriikkatsituulli, maannamut aamma taarteqartinneqanngilluinnarsimasunik. Inuit Ataqatigiit pissutsit ullumikkut taamaalersimammata taamaattumik Naalakkersuisunut sakkortunerpaamik avoqqaarliutigerusuppagut, apeqqutigisariaqarparpullu sumiiffiit ilaannaat aamma suliffissat tungaatigut qaarsilaarluareersut kisimik piorsaavigineqaannarnissaat Naalakkersuisunit anguniarneqarnersoq, illoqarfiilli allat soorlu Paamiut Maniitsorlu illuatungaatigut perlersiarineqaannassanersut. Naak Paamiut eqqaat raajaqarfissuullunilu maanna aamma saattuaqarfiullualeraluartoq, aamma imaassimanerpa aatsaat piorsaavigineqarsinnaassasoq Aalisarnermut Naalakkersuisup qinersiviup allanngortinneqarneratigut aamma Paamiut qinersivigilertuuppagu.
Taamak eqqarsaqqajaanarpormi Naalakkersuisormi maannamut suli taqqavunnarsimanngilaq, naak aamma Naalakkersuisut siulittaasuannit minnerunngitsumillu pisortatigoortumik Paamiut Kommuuneanit arlaleriaqaluni aamma maannamut saaffigineqartareeraluarluni. Taamaattumik oqaluuserisap matuma pisariaqartup naggasernerani Inuit Ataqatigiinniit oqaatigeqqissavarput, Royal Greenlandimut tunngatillugu siornali maani inimi aammalu Aalisarnermi Ataatsimiititaliami noqqaassutigisareersimasagut, ulloq manna tikillugu aalajangiusimalluinnaratsigit. Allatut oqaatigalugu tassa imaattuarsinnarpoq, Royal Greenlandip tunisassiornermigut allanngortiteriffigineqarnerani Kommuunet suliffissatigut maannamut annaasaqalereersimasut, annikinnerpaamik eqqugaanissaat tunaartariuarlugu suliniuteqartuartariaqaratta, tamatumanili Naalakkersuisut annertuumik Inatsisartunut neriorsuutigeriikkaminnik eqqortitsiniarnermikkut tamatuminnga aamma pisussaaffeqarmata.
Bjarne Kreutzmann, Akulliit Partiiat:
Lars Karl Jensennip apeqquteqaataanut
tunuliaqutaasoq tassaavoq, tunisassiornerup annertussusiata
naapertuuttunngornissaanut pilersaarutini sillimaffigineqarsimanngimmata,
imermik pilersuinerit aamma innaallagissamik pilersuinerit. Akissuteqaammi
paasivara, sumaqatigiissuteqarnerup kingunerigaa, Namminersornerullutik
Oqartussat ukiut 5-mat ingerlaneranni, Royal Greenland A/S-imut
tapiissuteqartassasut, tamatumalu kingorna Royal Greenland pisussaassasoq,
tunisassiornernik assigiingitsunik pilersitsinikkut illoqarfinni arlalinni,
suliffinnik aalajangersimasunik amerlassusilinnik pilersitsinissamut
atatitsinissamullu.
Kisianni paasinarsisimavoq pilersaarutit
nassuiaammi eqqartorneqartut ilaasa piviusunngortinnissaat
ajornartorsiutaasimasoq, aammattaaq paasinarsisimavoq pissutsit assigiinngitsut
sillimaffigineqarsimanngitsut, tamatumalu kingunerisimallugu tunisassiornerup
annertussusia naapertuuttunngorsarneqarnissaannut aningaasaliissutaareersut
qaavisigut Namminersorullutik Oqartussat aammaarlutik
aningaasaliissuteqaqqinnissaat.
Tamanna toqqissisimananngilaq, aammattaaq
aperisariaqarsorinarpoq, fabrikkit aalajangersimasunik tusassiornissamut tassa
raajat eqqarsaatiginerullugit annertuallaamik aaqqissuussaannginnersut,
taamaalillutik tunisassianut allanut pisariitsumik nooriataarnissaminnut
periarfissaqaratik. Immaqa tamanna aamma patsisaavoq tunisassiornerit
allanngortinnerinut aalisakkanillu allanik tunisassiulernermut aningaasartuutit
qaffasippallaartarnerinut. Tamatumani
assersuutissaqqilluarpoq Qasigiannguani tunisassiat allanngortinnerat,
tassa aviisi sapaatip akunneranut saqqummersartoq naapertorlugu 38,3 mio.
koruuninik akeqarsimammat.
Tusassiorfeeqqat ullormiit ullormut
tusassianut allanut nuussinnaasut illoqarfinni assigiinngitsuni
pisariaqartinneqannginnerlutik, soorlu immikkoortortatsinni aamma
sammineqareersimasut siusinnerusukkut.
Aalisakkat nunatta imartaaniittut
tassaanerupput aalisakkat ukiup ilaani aalajangersimasumi aalisarneqartartut,
taamaattumik ukioq kaajallallugu aalisarneqarsinnaasanngillat, tassa raajat
qalerallillu eqqaassanngikkaanni. Fabrikkiliortoqarsinnaagami
assagiarsuinnarnik tunisassiortussamik? Aningaasatigut taanna
akilersinnaanaviarsimanngilaq fabrikki ukiumut qaammatini arlalinni
matoqqasassappat. Pitsaanerunngila aningaasat Royal Greenland-imut tunniunnagit
kommuuninut ataasiakkaanut tunniuttarutsigit, tassami kommuunini ataasiakkaani
inuussutissarsiornermi siunnersuisoqatigiit ilisimaneruvaat aningaasat sumut
atorneqassanersut.
Taamaalillugulu qulakkeersinnaallugu
suliffissaqarnissaq, taamaalilluni isumaga naapertorlugu Royal Greenland-ip
pikkorissumik pisortaqartoq Namminersornerullutik Oqartussanut sukkulluunniit
pituttorsimassanngilaq, niuernerpalaartumillu aqutsinissaq pimoorullugu
sammisinnaassallugu.
Anthon Frederiksen, Kattusseqatigiit:
Inatsisartunut ilaasortap, Lars Karl
Jensen-ip apeqquteqaammini assigiinngitsutigut aarloqquteqarnera,
Kattusseqatigiit, tungaanniit paasilluarsinnaavara. Tassami niuernermik
ingerlatalik ilinniarsimasorlu kinaluunniit oqarumajunnanngilaq; Anioqqutissiorfinni naammassisinnaasat
amerlavallaarnerarlugit@ -
niuertummi pikkorissut niuillaqqissullu nioqqutissiorfimmi naammassisinnaasat
amerlanerpaat perusuttarpaat !
Royal Greenland-ip naatsorsuutai,
nunanullu allanut akiitsui, aammalu nunani allani annertuunik ingerlataqarnera,
nunatsinnilu sulisunik
ikilisaasuannguarluni, suliffissuarnik matusingallartarnerpassui, aalisartunullu
sulisartunullu annertuumik erloqisitsisarlutillu erloqisitsiuartut eqqarsaatigingaanni,
suliffeqarfissuaq inuiaqatigiit kalaallit pigisaannik oqaatigineqartartoq,
ingerlatitaanermigut sulisoqarnermigullu torralataanngilluinnartumik
ingerlanneqalersimasoq Kattusseqatigiinniit sakkortuumik
uparuartariaqarsoraara.
Makku pissutigalugit: Suliffeqarfissuaq
inuiaqatigiit pigisaat, taama inuiaqatigiinnut annertutigisumik sunniutilik,
isumannaatsumik naalaaserlunnanngitsumillu ingerlanneqassappat, ilinniartitsisunik
aviisiliortunillu aqunneqarlunilu ingerlanneqartariaqanngilaq.
Taamaattumik piginnittut sinnerlugit
akisussaatut, tassalu Inatsisartut, eqqarsaatigeqqittariaqalerpaat,
suliffeqarfissuarmi (inuiaqatigiit pigisaanni pigisaat inuiaqatigiit piumasaat naapertorlugit,) aalisartunut sulisartunut
kalaallinullu inuaqatigiinnut iluaqutaasumik ingerlaqqilernissaa anguniarlugu,
pisortat taarserneqarnissaat piumasaqaatigisallugu.
Taamatut Kattusseqatigiinniit
piumasaqarnera, inunnik pineqartunik ajorinninnertut pissuteqanngilaq,
kisianni suliffeqarfissuaq inuiaqatigiit pigisarimmassuk, inuiaqatigiit
sinniisaasa ilaattut, pisussaaffeqarlunga akisussaaffeqarlungalu
nalunnginnakku, suliffeqarfissuup aningaasatigut niuernikkullu ingerlanneqarnermigut
isumannaatsumik ingerlanneqarnissaa qulakkeerneqartariaqartoq, taamatut
piumasaqaateqarpunga.
Nalunngilara, piginneqatigiilluni
ingerlatseqatigiiffiit, Namminersornerullutik Oqartussanit pigineqartut eqqartorneqaleraangata, Inatsisartut oqaasissaqanngitsutut,
susinnaassuseqanngitsutullu inissinneqartarnerat, tassagooq
piginneqartigiilluni ingerlatseqatigiilluni inatsit naapertorlugu akulerunnissaq mianernartoqarmat.
Apeqqutigisariaqarporlu: Kina
piginneqatigiilluni ingerlatseqatigiiffimmi piginneqataasoq,
qisuarianngitsoorsinnaava, suliffeqarfik piginneqataaffigisani
amingartooruteqarluni ajortumik ingerlalersimappat ?
Taamaattumik Kattusseqatigiinniit
inassutigissuara; pissutsit ajortut
iluarsineqarnissaat anguniarlugu Naalakkersuisut iliuuseqartariaqartut.
Taamatut naatsumik oqaaseqarlunga Inatsisartuni ilaasortap, Lars Karl Jensen-ip
oqaluuserisassanngortitaa paasilluarlugu taperserpara.
Paaviaaraq Heilmann, Aalisarnermut, Piniarnermut,
Inuussutissarsiornermut Nunalerinermullu Naalakkersuisoq:
Siullermik Siumup oqaaseqartua aammalu
Atassutip oqaaseqartua qutsavigissavakka, Naalakkersuisut akissuteqaataannut
paasinnillutik aammalu akisussaassuseqassusermik nipilimmik oqaaseqarmata.
Qasigiannguit eqqarsaatigalugu
Atassummiit, Otto Steenholdt-ip oqaatigisaanut aamma isumaqatiginngitsoorneqarsinnaanngilaq
soorunami imeqarnissaa eqqarsaatigalugu pilersaarutigineqaqqaarnerani
puigorneqarsimammat, taanna aamma tupinnalaarpoq, Naalakkersuisuulluni tassunga
akisussaasuulluni. Puigornikuulluni allanngortiterineq eqqaamaneqassammat
allanngortiterinissamut tunngatillugu suliaq Naalakkersuisup Siulittaasuata
siuliata akisussaaffigigalugu ingerlassimanngippagu, kisianni ulluinnarni
pilersaarusiorneq imerneqarnermut tunngasoq taanna qimanneqarsimanera
puigorneqarsimaneraluunniit tupinnalaarpoq.
Inuit Ataqatigiinniit, Johan Lund Olsen-ip
siullermik oqarfigissavara, isumakkeerfigaakkit taamatut kusanaatsigisumik pasinerlukkamma,
tassangooq qinersivik allanngorpaat aatsaat immaqa Paamiut immaqalu Maniitsoq
ornillugillu qanoq iliuuseqarfiginiarneqassasut, taamatut oqaatiginiarneqarpoq.
Soorunami Naalakkersuisut
eqqortinniassavaat, aamma Naalakkersuisut taamanikkut Siulittaassuata
oqaatigisaa minnerpaamik, Maniitsoq Paamiullu sapinngisamik
eqqortinniarneqassasut taanna suliffiit eqqarsaatigalugit, taanna soorunami
Naalakkersuisuni suli ulloq manna tikillugu sorsuutigaarput. Paamiut
eqqarsaatigalugu aamma Naalakkersuini peqataavunga aamma Amutsivik
eqqarsaatigiinnarlugu aamma suliffiup taassumap ingerlaqqilernissaa suliffinnik
umiatsiaaqqiorfimmik pilersitsoqarnissaa anguniarlugu sulineq massakkut
ingerlavoq, taanna Naalakkersuisuni suminngaanniit tassunga aamma
inuussutissarsiornermut tunngassuteqarmat peqataaffigivara.
Allatigut aamma periarfissanik
ujartuisoqarpoq, aamma oqaatigerusuppara Paamiut eqqarsaatigalugit aammalu
Maniitsoq, saattussat eqqarsaatigalugit Naalakkersuisunit periarfissaq
malersorsimavarput, Royal Greenland-ip tungaanniit saattussanik
tunisassiornerup pilersinneqarnissaa anguniarlugu, Paamiuni Maniitsumilu
sullivinnik pilersitsoqarnissaa, kisiannili pissutsit assigiinngitsut
pissutigalugit taanna angujuminaassimavoq.
Ilaatigut Aningaasaqarnermut
ataatsimiititaliap isumaqatigisimavaa Naalakkersuisut oqarmata akisuallaartoq
aamma Nuummi assagiarsuleriffik Nuumminngaanniit Paamiunut nuussallugu, tassami
13 mio. koruuniniit 30 mio. koruunit tungaanut akeqartussaammat, kisiannili
assagiarsunnik tunitsivik puttasoq Naalakkersuisunut saaffiginnissutaasimasoq
namminersortumit ingerlanniarneqartoq taanna innersuussutigisimavarput, tassani
aamma aalisartut kommuuni pingasuneersut aamma periarfissaqassammata
tunisisarsinnaanissaannut, taanna periarfissatut Inatsisartullu aningaasanut
inatsisaannut aattuinngitsumik taanna ingerlanneqartussaavoq.
Taamaattumik, Johan Lund Olsen-ip
pasilliutai, oqareernittut isumakkeerfigaara taamatut kusanaatsigisumik
Naalakkersuisutut uannut pasilliuteqarmat, periarfissat allat aamma suli
misissorpagut, Paamiut tikissimannginneranut pissutaasut arlaqarput, tassa
naammasseqqaarusussimavara qanoq isikkulimmik assigiinngitsutigut
aaqqiisinnaanersugut assagiarsunniarneq eqqarsaatigalugu aammalu Amutsivik
ilaatigut annertunerusumik atorneqanngitsoq taassuma aaqqigiviginissaat
utaqqillugit. Periarfissarsiuteqqaarusukkatsigit maani taakkua aaqqinnissaat.
Kisianni aamma Paamiut kisimi
kommuuniunngilaq allami aamma kommuneqarpoq. Kommuunit aamma allat
tikittussaavakka aamma tikissimanngisakka, taamaattumik neriuppunga Inatsisartuni
ilaasortat Naalakkersuisunut arlaannaanulluunniit pasilliiniarsarissanngitsut
qinersivittut isiginnginnamikku tikissanngikkaat, - akisussaaffeqarpugut
nunarput eqqarsaatigalugu.
Manittsoq eqqarsaatigalugu saattussanut
aamma akissutigisara Paamiunut tunngasoq tassunga attuumavoq, maannakkut
Maaniitsoq eqqarsaatigalugu taanna, Johan Lund Olsen-imut eqqaasissutigilaassavara
tassa qineqqusaassaguma aammami taanna oqaatigereerpara Maniitsoq kommuunia qinersiseriaaserlu
allanngortinneqanngippat aamma Maniitsoq uani eqqugaavoq,
eqqaasissutigiinnarpara.
Raajanut tungatillugu tunisassiorfik
Maniitsumi ingerlasoq eqqarsaatigineqarsimagaluarpoq, Royal
Greenland-iminngaanniit tassa ukioq mannaminngaanniit unitsinneqassasoq.
Kisianni Naalakkersuisunit kaammattuutigisimavarput aamma ajornanngippat
ingerlatiinnarneqassasoq, manna tikillugu ingerlavoq, kisianni matuma
kingornatigut namminersortut raajaleriffimmi maani Nuummi pilersitsissappata taava tunngavissai Maniitsumi
ilumoorpoq ingerlaannarsinnaaneranut aamma killinissapput. Taamaattumik una
Naalakkersuini ilungersuutigiginga aamma Sulisa iluaqutaasinnaappat, tassami
iluaqutaasussanngorlugu pilersinneqarmat, iluaqutaasinnaappat Sulisa taava
aamma raajartassat nunatta avataani pisarineqarsinnaasut nunatsinnut pisassiissutaasimasut
taakkua ilaasa qaqinnerisigut aalisarneqarnerisigut aamma Maniitsup allallu
fabrikkit raajaleriffii
ingerlaannarnissaannut periarfissiinissarput aqqutissiuunniarsarivarput
ilungersuullugu. Naak ilaatigut Sulisa-p soqutigerpianngikkaluaraa, kisianni
tassa tunngasoq annertuumik Naalakkersuisuniit uanga aqqutigalunga
malersungarivarput.
Ataatsimut isigalugu oqareernittut taanna
akissuteqaat apeqquteqaammut amerlanernit taperserneqarmat qutsavigissavakka.
Lars Karl Jensen, Siumut:
Naalakkersuisut akissuteqaataasigut
tunngaviat paatsuunngilara, aamma uani ilaatigut partiit
oqaaseqartuaninngaanniit Atassutip aamma tamanna aallavigalugu oqaaseqarnera
malugalugu.
Siullermik Bjarne Kreutsmann-ip oqaasia
una eqqarsarnartoqartikkakku oqaatigeqqilaassavara issuarlugu
fabrikkiliortoqarsinnaava assagiarsuinnarnik tunisassiortunik, taanna
sangutillugu oqarusunnassaaq fabrikkeqarsinnaavugut angisoorujussuarmik
suliffigineqarani napaannatumik taanna akilersinnaanngitsoraara uanga
inuiaqatigiit taamak ikitsigitillugit.
Soorunami taanna fabrikki allani aamma
suliaqarpoq, Paamiut tassani eqqarsaatigigaanni annikitsunnguanik kisiannili
suliffippassuit annaasimavagut. Taannartaa qiviallattaallugu immaqa
eqqarsartoqarsinnaagaluarpoq Paamiut piinnavillugit taamatut
oqaluuserisassanngortitsigunga, kisianni una tamakkerluni aningaasatigut
inissisimaneranik patajaallisaatigisatuagut imaappoq avammut nioqquteqarnermik
isumalluutituagut fabrikkit allanngortitilermata taamanikkut oqaatigineqarpoq,
TAC-p apparneratigut raajanut fabrikkit suliaqarsinnaassusiat annikereersoq
suli annikinninngortussaavoq.
Aamma Royal Greenland-ip saqqummiussaani
ilaatigut oqaatigineqarpoq, allatut ajornaqaaq Royal Greenland-i
akilersinnaasumik ingerlassappat, imaluunniit nakkartooruteqarpallaarani,
suliffiit amerlasuut matusariaqarpavut, taava Aalisarnermut ataatsimiititaliami
oqallisiginerani tamatumap ilanngullugu pingaartillutigu taavarput.
Suliffeqarfissuit taakkua allanngortiterneqarnerannut atasumik aamma fabrikkit
allat eqqorneqartussat uani assersuutigisakka Maniitsoq Paamiullu suliassaannik
arsaarsinnarlugit unitsiinnarneqarnissaat, Aalisarnermut ataatsimiititaliap
kissaatiginngikkaa taakkunanili suliarineqarsinnaasunik allanik
nassaarniartoqarnissaa aamma taamatut akuersinissatsinnut Aalisarnermut
ataatsimiititaliaminngaanniit soorlumi saqqummiussami aamma
takuneqarsinnaasoq.
Tamanna akuersinissamut
apeqqutaalluinnartuuvoq, taamaattumik ilaatigut taamanikkut Naalakkersuisuni
Siulittaasuusup neriorsuutigisai suliffeqarfissuit naammassiniagassaattut
aallaavigalugit uani ujartuinera immaqa
eqqumiigineqarpallaarsinnaanngikkaluarpoq, isumaqarama pilersaarutit taamak
aningaasartaqartigisut pisussaaffigalutigit qanoq ineriartortinneqarnersut,
aammalu pilersaarutaasut malikannerlugit malillugilluunniit
ineriartortinneqarnersut aamma akisussaasutut akuerseqataasimagutta
nakkutigisariaqarigut.
Suliffeqarfissuit killiffigisaat taamanikkut
saqqummiinermi qiviarutsigu oqaatigineqarput suliaqarsinnaasuutsiminnut
annertussusii sanilliukkaanni 50 (procentiinnai) taavalu aamma
isumalluarnartoqarpoq allanngortiterinerup nassatarisaanut 75 procentimik
taakkua qaffattussaasut. Taamaalilluni aamma nunatsinni suliffeqarsinnaasut
sulisinnaasut amerlinissaat aamma nassatarissallugu.
Uani assigiinngitsutigut partiit
oqaaseqaataat ilaatigut taamatut akuersiissuteqarnermut naammaginniinnarneq
ilaatigullu aamma partiit ilaanninngaanniit sakkortuumik qisuariarnerit
soorunami taakku uteqqiaaneqarsinnaagaluartut tikeqqissanngilakka,
pingaarnerutilluguli eqqaarusuppara Aalisarnermut Naalakkersuisup
akissuteqaataani maluginiarakku aalisakkanut suliffissuit
allanngortiterniarneranni tunisassiassanik naapertuuttunngorsaanermi
allaaviusut ilaasa suunerat torrallavillugu marlunnik ersersimmagu. Siullermik
Royal Greenland A/S-p aningaasartuutaannut ukiumut 50 mio. koruunit missaannik
akiliisitsinissaq tamatuma nassatarissagaa, taavalu aamma aappassaannik
ersersimmagu isumaqatigiissut illugiinnut pituttuisuusoq ukiut tallimat
ingerlaneranni illoqarfinni arlalinni Royal Greenland-ip suliffissuarni
nioqqutissanik allatut ittunik pilersitsinikkut suliffissanik
pilersitsisoqassasoq.
Taakkua isumalluarfigivakka aammalu
apeqquteqaatinni ujartukkama qiterisaa tassaavoq, maannakkumut ukiup affaata
aallarnernerani isumaqatigiissutit atuutilerneraninngaanniit soorunami
naatsorsuutiginngikkarluarpara tassanngaannarujussuaq suliffimmik pilersitsisoqassasoq.
Kisianni ukiukkaarlugit nalilersorneqartarnissaa aammalu maannakkut
isumaqatigiissutaasimasut suliffissaqartitsiniarnerup tungaatigut ima
amigartigippata taava sillimaffigisariaqarparput aningaasaleeqqinnissaq.
Oqareernittuummi fabrikki napaannartoq pigisinnaanngilagut atorluartariaqarpagut.
Inuit suliffissaaleqisut isiginnaaginnarsinnaanngilagut, arlaatigut
suliffissaqartinniartariaqarpagut.
Lars Sĝrensen, Inuit Ataqatigiit:
Siullermik Aalisarnermut Naalakkersuisoq
ilumoornerassavara ilumut Naalakkersuisut pisussaaffigaat nunarput tamaat
ataatsimut isigalugu ineriartortinnissaa. Taamaattumik Naalakkersuisup
saqqummiussaani ilaatigut allassimasoq illoqarfinni arlalinni ataasiakkaani
ineriartortitsineq siunertaralugu 269 mio. koruunit Royal Greenland-imut
qularnaveeqqusiissutigineqarsimapput, aammali oqaaseqarnera qujassutigigaa
soorlu Atassutikkormiunngooq Siumukkormiut akisussaaffeqarlutik oqaaseqarmata
qujavoq.
Isumaqarpunga taamatut oqarneq
eqqunngitsuusoq, inuiaqatigiit ingerlaneranni pingaaruteqarluinnarpoq
illoqarfiit ataasiakkaat kisiisa eqqarsaatiginagit sutigut tamatigut
aaqqiisoqartarnissaa, tamanna tunngavigalugu aammali siorna maajip tallimaanni
oqallinnitsinni ilaatigut, Inuit Ataqatigiinninngaanniit oqaatsigut
tunngavigalugit Maniitsumi Paamiunilu pissutsit ajornerulersussaasut taamanikkut malugereeratsigu taakku
(sior..) aaqqiiniarnissaq taanna pisariaqartutut oqaaseqarfigisarput,
uteqqillugu oqartariaqarpugut decemberip 19-anni Paamiut suliffissuani sulisut
50-t angerlartinneqarmata.
Atagu takorluulaariartigut sulisut 50-t
Paamiuni eqqarsaatigeriartigit Nuummi suliffinnik 350-inik naleqarpoq,
taamaattumik sanioqqunneqarsinnaasimanngilaq Naalakkersuisugut kommuuniminngaanniit
saaffiginnissutitta pimoorullugu tigunissaa, tamanna maannamut allakkatigut
ataasiinnavimmilluunniit akissuteqarfigineqarsimanngillat allagarisartakkagut.
Ilungersunartuuvoq aammali
oqaatigisariaqartoq uaniippoq, Lars Karl Jensen-ip eqqortumik oqaatigisaa
maannakkut siunniunneqarpoq, Qasigiannguani nutaarsuarmik
fabrikkiliortoqassasoq ilaatigut inuiaqatigiinnut 50 mio. koruuninik
nalilimmik. Illua`tungaatigullu suliffiit kommunit ataasiakkaat
naatsorsuutigisaanit arsaarinnissutigineqarpoq, taamaalilluni nunatsinni
aammali Skandinaviami suliffissuit annerpaartaasa ilaat
suliassaarutitinneqarlutik. Taamanikkut tamakkua pissutsit aaqqinneqarnissaat Inuit Ataqatigiinninngaanniit
ilungersuutigisimavarput, taamaattumillu Naalakkersuisut pisussaaffigivaat
suliffiit taakkua annaanneqarsimasut 50-t taarserneqarnissaat, tassanilu
kommunit qularinngilakka tassani suleqataasinnaasut.
Maniitsoq eqqarsaatigissagaanni taakkua
maannakkumut ilaatigut Naalakkersuisut aaqqiissuteqarnerisigut suliffinnik
annaasaqartussaajunnaarnikuupput, kisiannili uagut suliffiit annaasimasagut
arlaatigut aaqqiissuteqarfiginissaannut kaammattuutigivarput.
Naalakkersuisup taallatsiarpaa Amutsivik,
Amutsivik eqqarsaatigissagaanni allatut ajornartumik kommuniminngaanniit
tigunissaa siunniussimavarput, Naalakkersuisuninngaanniit annertunerusumik
pilersaarutigineqarsimanngimmat. Aamma uagut taamaaliortariaqarnerpugut Royal
Greenland-ip suliffissuanut taamaalilluta allanik suleqatissarsiornitsigut
suliffinnik amerlanerusunik pilersitsinnaanissaq anguniarlugu.
Saaffiginnissutigisimavarput
assagiarsunnik tunisassiorfiup Nuummiittup atorneqanngitsup Paamiunut
nuussinnaanissaa Naalakkersuinikkut anguniartariaqartoq. Kisitsisit
assigiinngitsut misissoraanni takuneqarsinnaavoq oqaatigineqarmat siullermik
nutaarooq 6 mio. koruunininngaanniit 8 mio. koruuninut naleqarpoq,
nuussinerooq 13 mio. koruunit sinnerlugit naleqartussaavoq, uagutsinnut
paasiuminaatsoq uaniippoq, nuussineriinnaq pisiaq atortussaq pisiarereerlugu
nuunnerinnaa marloriaammik qanoq ililluni akisuninngorsinnaava? Tamakkuupput
Naalakkersuisut, kommuunit Royal Greenland-illu
oqaloqatigiissutigisariaqangaat.
Uagut kommunimi tusatsiagaannaat
tunngavigalugit saaffiginnissutigut ukiortaami saaffiginnissutigut
tusatsiagaannaat tunngavigalugit malinnaatinneqarpugut. Pissutsit taamaatut
ingerlanneqarsinnaanngillat, taamaattumik Aalisarnermut Naalakkersuisoq
ilumoornerassavara ilumut pisussaaffigivarsi nunarput tamaat ataatsimut
isigalugu ineriartortitsinermi suleqataanissarsi.
Ilaatigut aamma oqallinnerni assigiinngitsuni
oqaatigineqartarpoq, ippassaq assersuutigiinnarlugu Sulisa-gooq Maniitsumut nuulerpoq, Inatsisartut taamatut
aalajangerpat? Taamatut pissusilersorneq qatsunnarsivoq periarfissat
pigeriikkagut atorluartariaqarpagut, nutaaliortinnata. Ineriartortitsineq
taamatut ingerlatissagussiuk illoqarfiit ilaat ulittoortussaapput,
tamannaavorlu aamma pinaveersaartitsinissassinnut pisussaaffissi.
Johan Lund Olsen, Inuit Ataqatigiit:
Aappassaannik oqaaseqarnissannut
maanngarama tassa patsisigivara paasigakku, Aalisarnermut Naalakkersuisoq,
ajuusaarnaraluaqisumik taama maani aamma attortiatigissappat, kisianni tassa
oqaatsit manngertut sakkortukuluut imaluunnit saattukuluut aamma
atorsinnaasariaqarpagut maani oqaluttarfimminngaanniit pingaartumik, Naalakkersuisut
Inatsisartuninngaanniit peqquneqareerlutik neriorsuutigisatik kommuninut
eqqorneqareertussanut ukiup ataatsip matuma siornali oqaluttarfik manna atorlugu kommunimut pineqartunut
neriorsuutigeriikkatik taakkuluunniit eqqortinniarsinnaanngippatigit. Ilami
saqqummiussinitsinni oqaatigivarput, maani Inatsisartuni siorna uani
eqqartugarput oqallisigigatsigu allaat marloriartariaqarsimavarput maani inimi,
naak nassuiaataannaagaluartoq.
Taanna ileqqorinngilarput qaqutigorujussuarlu
maani atortarlutigu. Taamani Inatsisartut siullermik maajip tallimaanni Royal
Greenland-ip taamatut aaqqissuussiffigineqarnissaa eqqartoqqaaratsigu
sivisuupilussarmik maani oqallippugut, sivisuupilussuarmik maani partiit
tamarmik aamma kommunit ukua marluk pingaartumik Paamiut Maniitsorlu
eqqorneqarumaartussat qanoq iliuuseqarfigineqarnissaat aamma
oqariartuutigivaat. Kisianni Inatsisartut taamani isumaqatigiissutigivaat
atagu, Aalisarnermut ataatsimiititaliamut innersuukkallartigu, tassani
aamma oqallisigineqarniassammat.
Aalisarnermut ataatsimiititaliaq
arlaleriaqaluni ataatsimiittareerluni taannaannavik aamma eqqartorlugu tassa
oqaatigivaat isumaliutissiissut aqqutigalugu juunip pingajuanni Paamiut
Maniitsorlu taakkua suliffissanik annaasaqartussaammata taartissaannik
nassaarunniarsigit, tassa nalunaarut erseqqilluinnartoq. Naalakkersuisut
taamanikkut siulittaasorisaata aamma oqaluttarfik manna atorlugu
eqqortinniassallugu aamma neriorsuutigisaa. Taamaattumik ajuusaarnarpoq,
tamakkuluunniit neriorsuutigineqaqattaartut Naalakkersuisut tungaaninngaanniit
naammassiniarneqanngimmata Naalakkersuisut taama attortiatigissappata
oqarfigineqarunik ila aajukumi neriorsuutisi!.
Aamma una oqaatigilaassavara,
Naalakkersuisoq oqarpoq Maniitsumi raajalerineq unereertussaagaluartoq
Naalakkersuisut sunniuteqarneratigut maannakkut suli
ingerlatinneqarsinnaasimasoq. Kisiannili aamma oqaatigineqarpoq, Sulisa
aqqutigalugu maannakkut iliuuseqalersaartoqartoq nuna tamalaat imartaanni
raajartassarineqartunik aalisanngitsoortakkatsinnik aalisartitsilernikkut
tamakkua aamma iluaqutigineqarsinnaassasut.
Ila
aamma taanna qangalili oqaatigineqartuarpoq, qaquguuna tamakkua
piviusunngorniartut, ila periarfissaqaraluarpugut allanik, ullut kingulliit
aamma sapaatip akunnera kingulleq imartatsinni raajartassiissutigineqartartut
oqallisigivagut. Ippassarlu aalisarnermut inatsit allanngortinneqarnissaa
aamma oqallisigigatsigu periarfissaq alla uteqqipparput, Inuit
Ataqatigiinninngaanniit, tassami aamma nalunnginnatsigu raajartassat maannakkut
ukioq mannaannaq qaammatit siulliit pingasut ingerlaneriinnaani ima
annertutigisut pisarineqalereersimasut tassa avataasiortut 25 procentit taavalu
sinerissap qanittuani raajarniartut 18,- 19 procentit pisarereersimaleraat.
Taamaattumik aarlerinarluinnarpoq, ukiamut
tamakku pisassat tamakkerneqareersimanissaat, taava raajaleriffippassuit qassit
unissappat? Aalisartorpassuit qassit unissappat? Ila amerlassaqaat.
Taamaattumik periarfissaq alla ippassaanikkunnili oqaatigisaqattaagarput, tassaavoq
ila atagumi misililaariartigu assersuutigiinnarlugu Royal Greenland-ip
kilisaassualuunniit ataasiinnarlunniit imaluunniit APK-p kilisaassua
ataasiinnarluunniit nunat allat imartaannut imaluunniit nunat tamalaat
imartarisaanni, aamma aalisariartinneqarnissaat atortorissaarput ungasiliarsinnaapput,
taavalu taamaaliortitsinikkut
raajartassat nunamut tulaanneqartalerlik, taamaalillutalu annerusumik
aamma suliffissaqartitsinissaq anguneqarsinnaaqqullugu.
Kisianni tassa aamma aajuna
oqaatigineqanngitsoorsinnanngitsoq, aajuna siorna Royal Greenland-i
eqqartoratsigu kingunissai illoqarfinnut ataasiakkaanut nalunaarsorneqarsimasoq
taanna aajuna tigummivarput. Taassuma erseqqilluinnartumik
oqaluttuutereerpaatigut tassa Maniitsumi suliffissat 66-it qanoq
iliuuseqartoqanngippat annaanneqassasut. Paamiuni qanoq iliuuseqartoqanngippat
suliffiit pioreersut 50-it annaaneqassasut, kisianni qinerluartaaraanni
illoqarfinni allani tamani suliffiit amerlisarneqartussaapput. Taamaattumik una
tassa ilungersortugut Paamiuni pissutsit pissusiulersimasut
suliffissaqartitsiniarnerup tungaatigut aammalu Maniitsumi pissutsit maannakkut
atorneqartut atorneqarumaartussallu qanoq iliuuseqanngikkutta, qaa taakkua
neriorsuutigereerpasi aqqinniarlugit taava maannakkut
timitalerniarsariniarsigit.
Ruth Heilmann, Siumut:
Nuannaarutigaarput maani oqallinneq aamma
inuussutissarsiornermut sammisoq, - aalisarnermut sammisoq Lars Karl
Jensen-iminngaanniit saqqummiunneqartoq. Tassami maannamut pissusiusut ernummatigineqarput, aamma kommunini
arlalinni, ilaatigut aamma suliffissuit matoorarniarneqarnerat.
Suliffissaaleqineq annertoorujussuaq massakkut atugaavoq, aamma oqaatigineqartutut
Paamiuni aammalu Maniitsumi.
Siusinnerukkut pisuussutit
eqqarsaatigalugit qalerallit raajat assagiarsuillu pingaartumik avannaani qalerallit sammineqannginnerugallarmata
imatut ikioqatigiinneq ingerlanneqartarpoq, raajat Maniitsup avataani allanilu
pisassat imaluunniit raajarniutit avaannaanukartarput taavalu ukiuunerani
suliassanik immersorlugit taakani suliffissuit ukiuunerani aamma
suliassaqarniassammata. Maannakkut qalerallit eqqarsaatigalugit avannaani
annertoorujussuarmik allaat sipporussanik massakkut piniartoqarpoq, ilaatigullu
ukiuunerani aamma suliffissuit immaqa suliarisinnaasaralui kujataani
aalisagaqanngiffiusuni aamma tassani ikioqatigiinnikkut immaqa
iliuuseqartoqarsinnaagaluarpoq. Taakkua aamma Naalakkersuisut
eqqarsaatigisariaqaraat.
Massakkut Naalakkersuisut
iliuuseqarniarnerat isumaqarpunga pitsaasutut oqaatigisariaqartoq, tassami
siusinnerusukkut Qasigiannguit eqqarsaatigissagaanni, Qasigiannguit
tassaasimavoq, raajanik suliffissuaqarfik aammalu Aasiaat maannakkut aamma
raajanik suliffissuaqarfinngortitaasimavoq allaallu aamma assagiarsunnik
tunitsiviulluni. Taamaattumik tassuunakkut Qasigiannguit arsaarneqarsimasutut
innerat politikkikkut immaqa pikkorliornermik
aamma taasariaqarpoq, massakkut Naalakkersuisut sioqqullugu
iliuusaasimasut eqqarsaatigissagaanni.
Taamaattumik ullumikkut killiffigisarput,
unaavoq immaqa pissakilliortut pissaqarnerusunut tunioraapput, taanna
isumaqarpunga akueriinnarneqarsinnaajunnaartoq. Aammalu maannakkumut
puttasumik tunitsiviliiniarneq isumaqarpunga namminersortup piumassuseqartup
iliuuseqarnera aamma tapersersortariaqartoq. Tassani eqaannerpaamik aalisartut
eqqarsaatigalugit Maniitsumiittut, Nuummiittut Paamiuniittullu
aaqqiiinerusussaammat, taamaattumik isumaqarpunga taanna annertuumik
tapersersortariaqartoq.
Aammalu Polar Seafood-i eqqaaneqatsiarmat
taanna aarlerinartuuvoq, ilumoorpoq Nuummi pilersitsissagaluarpat aasimmiaasiit
sulisussat amigaatigalugit, Maniitsuminngaanniit nutserneq Nuummi annertooq
pisussaalissaaq, taamaattumik kissaatigaara namminersortut Polar Seafood-ikkutut
ittut Royal Greenland-ilu siunissami suleqatigiinerullutik namminersortullu
piumassuseqartut nunatta ineriartortinnerat aamma suliffissaqarnikkut
aaqqinniarsarissavaat.
Anthon Frederiksen, Kattusseqatigiit:
Tupigusuutiginngilara saqqummiussininni
oqaaseqaatikka minnerpaamilluunniit Naalakkersuisuniit qisuariarfigineqanngimmata, aamma
nalunngilara qularnanngitsumik attornaveersaarneqassasut taakkua. Kisianni
qularutissaanngitsoq aajuna, ullumikkut suliffissuaqarfik eqqartorneqartoq
ajortumik ingerlavoq, ajortumillu ingerlappat suna pissutaava? Pissuteqarpoq
pinngitsoorani, taannalu Naalakkersuisut qularnanngitsumik...
Paaviaaraq
Heilmann, Aalisarnermut, Piniarnermut, Inuussutissarsiornermut
Nunalerinermul-lu Naalakkersuisoq:
..suliassanik
nunatsinneersunik, tikeraarnikuugakku taamanikkut malillugu, nunatsinneersunik
pilersorneqanngilaq, nunali allani aalisakkanik pissarsianik suliaqarluni.
Kisiat soorunami oqareernittut nunatsinneersunik tunisassiorneq Danmarkimi
pisimappat, assersuutigalugu taareerpakka namminersortut Danmarkimi
suliffiuteqartut arlalinnik suliffippaalussuarnik, taakkua aamma
assigiinngitsutigut aaqqissuussinitsigut immaqa inatsisiliornitsigulluunniit
maani tunisassiorsinnaanissaannik piumasaqarnissarput aamma tupinnartuunavianngilaq
aningaasanik annertuumik pissarsiaqaatigereermatigit, taava aamma maani immaqa
illuatingiliuutitullusoorluunniit piumasaqaatigineqarsinnaasariaqarpoq taakkua
aamma nunatsinni tunisassiornissaannik naalakkersuinikkut
piumasaqarsinnaanissarput. Taanna tupinnartuusinnaanngilaq. Isumaqarpunga
taanna tamatta malersortariaqaripput.
Lars
Sĝrensen-i naqiallalaarniarpara, tassa kujataanigooq sikumik
ataatsimiivilluunniit ajornartorsiuteqartoqarneq ajorpoq. Taamaattoqanngilaq.
Sikorsuaqartarpoq. Kisianni, taakku akornutaassanngillat. Ajornartorsiutit
uani suliffissanut tunngasut tamatta ikioqatigiilluta aaqqiiviginiartariaqarpagut
imaanngitsoq, naalakkersuisut kisimik kisiannili tassani qitiulluinnarpoq Royal
Greenland-imut, aalisakkanik tunisassiortut tamarmik Royal
Greenland-iinnaanngitsoq, soorlu aamma taareerikka allat tunisassiortut aamma
piumasaqarfigisariaqarpagut suliffinnik pilersitsinermi aamma peqataassasut.
Naalakkersuisut kommunillu ataasiakkaat akornanni taanna oqallinneq aammal
soorlu Lars Sĝrensen-ip ujartoraa aamma taanna pissaaq. Aamma pisariaqarpoq,
aammami pisussaaffigaarput aamma naalakkersuisuni piumassuseqarluinnarpugut
aammalu suliaqarluta taamaattunik suliallu ingerlateqqinnissaa aamma
qilanaarivarput soorunami.
Jonathan
Motzfeldt, Naalakkkersuisut Siulittaasuat:
Apeqquteqaammi
uani akissutigineqartut isumaqarnaraluarput naammattut. Kisianni aamma
oqartariaqarpunga allarpassuit oqallinnermut susassaqanngitsut
akulerussorneqarput maani. Apeqqutigineqartuni inatsisartut maani 269
mio.kr-nik qularnaveeqqusiipput siorna.Ilumut. Januarip aallaqqaataani ukioq
manna taanna atulerpoq. Aap! Taamaattumillu januarip aallaqqaataaninngannit
taanna atorlugu tunisassiorfiup naapertuuttunngornissaanik imaluunniit tunisassiornerup
naleqqussarnissaaanik, atuuttussaq taanna atulersinneqarpoq.
Tassanilu
ajornartorsiutit tikkuartorneqartut Paamiunut Maniitsumullu tunngasut
oqaatigineqartut, tassani arlaleriarluni oqaatigineqartoq aamma paasineqarpoq
Royal Greenland-ip tamakkuninnga paasisimasaqartutut siunnersortigalugulu
aamma maani inimi naalaartagarput, aammami uagut tassa piginnittuugatta
taakkunani. Oqaaseqarput saattualeriffik iluanaarutaalluni ingerlassaguni
ukiumut saattuanik 2000 tons-inik pilersorneqartariaqartoq. Akilersinnaanngitsumik
sunaluunniit aallartitsiuarneq aamma maani mianersuuttariaqarpoq. Oqaluttarfik
una atorneqartuartarpoq sunik tamanik tapiissutissanik qinnuuloornernut.
Inuiaqatigiit Sakiusikkut Biiniamiikkullu sumilluunniit saattuamik
ataatsimilluunniit qaqitsinngitsut tamarmik akileraartarput saattussat
naammattut tunisassiarineqanngippata. Taanna aamma naammagiinnanngilaat.
Naalakkersuisut
aammalu Inatsisartut aalajangigassatsinni inuiaat taamaattunik suliaqartut
taamaattunillu aamma aningaasaliisimasut namminneq soqutigigamikku
taamaaliortut naatsorsuutigissavagut. Iluanaarutaasumillu aamma avammut
tunisinnnaasaminnik niuissagamik taamaaaliortut aamma ilimagalugit.
Tunisassiorneq akilersinnaanngitsoq qaqugorsuarmullu inuiannit akileraarutinik
akilersorneqartuartussaq aallartinneqarsinnaanngilaq. Ilisimareerpavut
taamaaliornivut akisoorujussuusut. Taamaattumik tupiginngilara
akilersinnaasumik uani tunngavissaqartumik Royal Greenland-i
siunnersorniarpatigut Naalakkersuisut, Inatsisartut aningaasanik
nammakkersuutaanngitsumik kisiannili iluanaarutaasumik tunngavissaqartumik
siunnersuiniarunik tunuarsimaarsimassappata. Tupiginngilluinnarpara taanna.
Taamaattumik
nalunaarusiassat pitsaanerusut ujartorsinnaavagut. Aap, nalakkersuisuni taanna
suliarissavarput, apeqqutigeqqissavagut ullumikkut oqallineq najoqqutaralugu
kisitsisit tassani saqqummiunneqartut ilumoornersut ilumuunnginnersulluunniit.
Kisianni ilimagineqassanngilaq uagut piginnittutut akisussaatillutaa
ingerlatsivillu 157 mio.-nik amigartooruteqarsimatillugu amigartoorutissanik
allanik aallartitsinissamik imaaliinnarluta akuersissasugut. Naamik! Taamaalilluta
iliorsinnaanngilagut. Taamaattumik siunnersuissagussi Inatsisartunut
qaqugorsuarmut aningaasartuutaajuartussamik pinnata iluanaariartuutissaapppat
inuiaqatigiinnut aammalu suliffissaqartitsinikkut periarfissaalluarluni, taanna
maanga siunnersuusiorneqassaaq. Kisianni pissutsit uaniittut
misissorluarneqarnissaat, taanna aap naammassiniassavarput apersuuserneqarmata
ullumikkut.
Peter
Ostermann, Atassut:
Tunngaviusumik
oqallisigisarput ima ilungersunartigaaq, uagut Atassumi aallaqqaataaniilli
oqaatigalugu, Royal Greenland-imut suliassiissutigisarput aaliangiusimavarput.
Suliassitarput eqqissisimalluni suliseriartigu. Piffissaq qanoq sivisutigisumi
suliassikkatsiguli piffissaq qanoq sivikitsigisoq massakkut ingerlava.
Suliassamik taama ilungersunaritigisumik toqqissisimanartumik qaangiissagutta.
Kisianni soorunami isumaqatiginarpoq una taama ilungersunartigisumi inissisimatilluta
Naalakkersuisut ulluinnarni ingerlatsinermik suli pitsaanerusumik annertunerusumillu
malinnaasariaqarput nakutilliisariaqarlutillu. Akueraarput raajanik
suliffissuit ikilisarneqassasut, pisassat suliffissuarni naleqqiullugit
ikippallaaqimmata. Akueraarput raajanik suliffissuaasimasut allallu allanik
nassaarniarluni suliassaannik ujarliunneqassasut. Taanna nakkutigilluinnaqqissaartariaqarpoq.
Neriorsuutaasunik
arlaannik sumik equngasoqalerpat piaartumik eqqorneqartut kalerrittariaqarput,
ilisimatinneqartariaqarlutik. Kisianni uanga isumaqatiginngilakka oqaluttut
periarfissiiniartoqanngitsoq. Eqqunngilaq taanna. Aningaasaqarnermut
Ataatsimiititaliami ilaasortat tamarmik aamma IA-p sinniisuata Paamiuni
umiarsuarmik tunitsivimmik, saattussanik tunitsivimmik inissiinissaq
Naalakkersuisut siunniussaat akuersaarpaa. Tamarmik akuersaarpaat. Suna anguniarlugu?
Aalisartunik periarfissiigasuarnissaq, aningaasarsiornissamik
periarfissiigasuarnissaq. Tassa tunngaviusoq, aamma Naalakkersuisut tunngavigisaat.
Soorunami ussernartorsiornarsinnaagaluarpoq Paamiut fabrikkiani
atorneqarpianngitsumi tunitsivimmik pilersitsissalluni, kisianni
takusinnaavarput aningaasaartuutissat qanoq annertutigissasut, piffissarlu ima
sivisutigisoq ingerlassasoq tunisisoqarnissaata tungaanut.
Aamma
suliassat taama ilungersunartigisut qaangerniarneqarsinnaanngillat asuli
qangatakajaarluni timmikalaartutut, soorlu Johan Lund-i isumaqartoq,
kilisaassuit ilaat nunanut allanut aallartinniarsiuk. Suliassat tamakkua ukioq
ataaseq, ukiut marluk ukiut arlallit sioqqullugit ingerlanneqartarput
pisassiissuteqarnissaq anguneqaqqaartussaammat. Imaliinnarluni
aaqqinneqarsinnaanngillat.
Lars
Sĝrensen oqarfigisariaqarpara, equngasumik ingerlatsineq tassaavoq ukiuni
amerlavallaartuni, partiit amerlavallaat aalisarnerinnaavimmik
tunngaveqarniarsarisimammata aatsitassarsiornerit allallu pinnagit. Tassa
ullumi anniaatigisarput.
Oqaluuserisaq naammassivoq.