Oqaluuserisassani immikkoortoq 30 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Manasse Berthelsen, apeqquteqartoq Inuit
Ataqatigiit:
1997-mi upernaakkut Inatsisartut
ataatsimiinneranni KNI-p aggulunneqarnissaa akuersissutigineqarpoq.
Allanngortiterinerillu kingunerisassaat inuiaqatigiinnut annertuumik
eqquisussaammata matumuuna siunnersuutigissavara Naalakkersuisut Inatsisartunut
nassuiaateqarnissaat allanngortiterineq qanoq inerneqarsimanersut. Nassuiaammi
ilanngunneqarsinnaasutut ilaapput; atorfiit qassit atorunnaarsinneqarsimasut
qassillu pilersinneqarsimasut. Nunaqarfinnut inunnik nassiussanillu
assartuinerup qanoq isumannarsimaneqartiginera. Allakkeriviup Tele
Greenland-mit tiguneqarnerani allannguutit, nunaqarfinni aningaasiveqarnerit
allallu.
Qularugitinngilara allannguinerit
annertummata Inatsisartunut nassuiaatigineqarsinnaasut arlaqarnissaat.
Peter Grĝnvold Samuelsen, Takornariaqarnermut,
Angallannermut, Niuernermut Attaveqaatinullu Naalakkersuisoq:
Qujanaq. Inatsisartunut ilaasortaq
Manasse Berthelsen KNI-p allangortiterneqarneranut tunngasunik arlalinnik
apeqquteqaateqarpoq. Inuiaqatigiinnik sullissinerup, nioqqutissanik nunaqarfinnut
isorliunerusunullu pilersuinermi sullissinerup pitsanngorsarnissaa
ilanngullugu, pitsanngorsarnissaa ineriartortinnissaalu qularnaarumallugit
1997-mi upernaakkut KNI-mi ingerlatseqatigiiffiit allanngortinneqarnissaannut
pilersaarummik annertuumik Naalakkersuisut saqqummiussaqarput. Inatsisartut
isumaqatigiillutik allanngortiterinissaq akuersissutigaat. Allanngortiterineq
KNI-mi ingerlatseqatigiiffiit nioqqutissanik pilersuinerisa aammalu KNI
Pilersuisoq A/S-ip uuliamik pilersuinermik suliaasa ataatsimoortumik
erseqqissumik aaqqissuussamik aqunneqalernerannik kinguneqarpoq.
Ingerlatseqatigiiffik aqutsisoq KNI A/S pilersinneqarpoq ingerlatanik
ataatsimoorussamik soorlu ingerlatseqatigiiffissuup siulersorneqarnerani,
pisiortornermik, naatsorsuuserinermik, aningaasaqarnermik il.il
isumaginnittussamik.
Nioqqutissanik pilersuinerit
siunissami ingerlatseqatigiiffinnit aqutanit KNI Pisiffik A/S-mit aamma KNI
Pilersuisoq A/S-mit suliarineqassapput. Tamakkua saniatigut aalajangiunneqarpoq
KNI-iip ingerlatsinermini qitiutillugit pingaarnertut isumagisassai,
suliffeqarfiup iluani niuernikkut nioqqutissanillu pilersuinermut
tunngasortai.
Taamaalilluni suliffeqarfik
1997-ip sinnerani allanngortitsinerup taasumap piviusunngortinnissaani suliaqarsimavoq.
Ilaasunik imaatigut angallassineq
bilittileriffiillu ingerlanneqarnerat taamaalilluni ullumikkut
ingerlatseqatigiiffimmit namminersortumit Artic Umiaq Line A/S-mit
isumagineqarput. Usinillu nunaqarfinnut assartuineq ingerlatteqatigiiffimmut Royal
Artic Line A/S-mit aqunneqartumit nutaamut Royal Artic Bygdeservice A/S-mut
nuunneqarluni. Kiisalu kalaallit allakkerivianni allakkerinermit il.il suliat
KNI Pilersuisoq A/S-miit Tele Greenland A/S-mut nuunneqarput.
KNI-mi ingerlatseqatigiiffiit ingerlatsinerminni
tunngaviisa allanngortinnerat aammalu suliat Tele Greenland A/S-mut, Royal
Artic A/S-mut il.il nuunneqarnerini tunngaviit pingaarnerit sisamat
aallaavigalugit piviusunngortinneqarput.
Siullermik allanngortitsinerit
aktie-teqarluni ingerlatseqatigiiffiit pillugit inatsimmi sinaakkusiussat
iluanni piviusunngortinneqarput. Pingajussaanik KNI A/S-ip aamma Royal Artic
Line A/S-ip aaqqissuusaanikkut aningaasaqarnikkullu namminersornerat
qularnaarneqarpoq. Taamaalilluni ingerlatseqatigiiffiit annerusumik niuernikkut
aningaasarsiornermik tunngaveqarluni ingerlatsinissamut atugassarititaasut
atorlugit ingerlanneqarsinnaalerlutik. Sisamaatut naggataatullu KNI A/S-ip
aamma Royal Artic Line A/S-ip Namminersornerullutik Oqartussat suliassaataannik
ingerlatsinerannut atatillugu, kiffartuussinerup qaffasissusianut nukissanullu
atuinermut tunngatillugu, Namminersornerullutik Oqatussat akisussaanerat
aalajangiisinnaatitaanerallu erseqqinnerulerpoq.
Naalakkersuisut isumaat malillugu
allanngortitsinerup nalilernissaata 1998-ip naanissaa sioqqullugu isumatuumik
ingerlanneqarsinnaanera ajornakusuussaaq, tassami ingerlatseqatigiiffiit
tamarmik aatsaat januarip aallaqqaataani 1998-imi naatsorsuusserinikkut
imminiit avissaartinneqarmata, naak ingerlatseqatigiiffinnik
allanngortitsinerit siulliit julip aallaqqaataa 1997-imi atuutsilersumik
pigaluartut.
Takornariaqarnermut,
Angallannermut, Niuernermut Attaveqaatinullu Naalakkersuisoqarfiup ullumikkut
KNI-ip suliffeqarfii Namminersornerullutik Oqartussanit ingerlatsinermut
tapiiffigineqartartut, tassalu KNI Pilersuisoq A/S, Artic Umiaq Line A/S-lu
pisortat sinnerlugit oqartussaasutut akissussaaffigai. Taakkua saniatigut
Naalakkersuisoqarfik Rolyal Artic Bygdeservice A/S-mut oqartussaasutut
akissussaavoq. Ingerlatseqatigiiffinnut tamakkiisumik ilaannakuusumilluunniit
Namminersornerullutik Oqartussanit pigineqartunut piginnittutut sinnerlugit
Naalakkersuisut Allattoqarfiat Naalakkersuisut siulersuisuini ilaasortaatitat
pillugit allattoqarfiat allattoqarfiuvoq. Matumanilu
ingerlatseqatigiiffissuarmi KNI A/S-mi allanngortitserinermut akisussaalluni.
Inatsisartuni ilaasortap Manasse
Berthelsenip paaserusuppaa atorfiit qassit atorunnaasinneqarsimanersut qasillu
pilersinneqarsimanersut. Nunaqarfinnut ilaasunik ingerlassineq nassiussanillu
assartuineq qanoq isumannaartigineqarsimanersoq, allakkeriviup Tele
Greenland-mit tiguneqarnerani allannguutit nunaqarfinni aningaaseriveqarnerup
allallu.
Naalakkersuisut isumaqarput,
allanngortitserinermut atatillugu, sulisunik annertunerusumik
taarsersuisoqarsimanngitsoq. Tele Greenland A/S-ip ilisimatitsissutigaa
Kalaallit Allakkeriviata Tele Greenland A/S-mut nuunneqarnera sulisunik
soraarsitsinernik ikililerinermilluunniit kinguneqassanngitsoq. Allakkerinermik
sulersuinerup Qasigiannguaniit Nuummut nuutsinneqarnera 1997-ip naalernerani
aallartippoq aammalu 1998-mi aasartinnagu naammassinissaa iligineqarluni.
Aasami sulinngiffeqarnerup
kingorna Qasigiannguani attaveqartnermik sullissinermut allaffimmik
pilersitsisoqassaaq, ilaatigut pingaarnertut attaveqaatinut tunngasunik
ajoqutit pillugit nalunaarutinik isumaginninnermik, normunik
paasissutissiisarnermik, nunanut allanut oqaluussiniarnermik sullissinernik
aamma oqarasuaatikkut ataatsimiinnernik inniminniisarnernik suliaqartussamik.
Siunissaq ungasinnerusoq isigalugu kiffartuussiviup ungasissumi suliffinnik
pilersitsinermik misilittakkanik katersuinissaa pilersaarutaavoq,
taamaallilluni suliffinnik taamaanngajattunik aaqqissuusserusuttunut siunnersuisoqartalersinnaaniassammat.
Attaveqarnermi sullissinermik allaffik 13-nit 15-nillu missaanni
sulisoqassaaq, siunissaq isigalugu Qasigiannguarmiunissaat
naatsorsuutigineqarluni.
Ingerlatseqatigiiffissuarmik KNI A/S-mik pilersitsinerup
nassataraa sulisut aqqanillit soraarnerat, sulisullu nutaat qulit
atorfinitsinneqarsimallutik. Soraartunit aqqaniliusunit atorfiit sisamat
qullersat atorfigaat inuttaleqqinneqanngitsut. Suliffeqarfiup ingerlanerata
pisariillisaaffigiuarneranut aamma allanngortitserinernut siunertat
pingaarnerit ilaannut atatillugu ukiuni aggersuni sulisut arlaqarnerusut
atorfimminnit tunuarumaarnissaat avaqqunneqarsinnaagunanngilaq.
Royal Artic Bygdeservice A/S januarip
aallaqqaataa 1998 aallarnerfigalugu nunaqarfinnut usinik assartuinermut
tigusivoq. Sulisut ANK-mut ilaasortaasut tamarmik siusinnerusukkut KNI Rederi
A/S-mi sulisuusut, nunaqarfinnut usinik assartuinermut atatillugu
suliinnarnissamik neqoroorfigineqarput. Taamaalilluni angalatit inuttat
umiarsuarni qulinnguluani 1998-mi angallassisussatut pilersaarutaasunut
naammassinninnissaq qularnaarumallugu inuttatut atorfinitsinneqarput, kisianni
angallatit nunaqarfinnut usinik assartuutit 15-it missaanniit qulinngiluat
qulit missaannut amerlassusilerlugit ikilisinneqarput.
Umiarsuaaqqat angalasut
ikilisinneqarnerat inuttat atorfeqartitat amerlassusaannik annikitsumik
naleqqussaanermik kinguneqarpoq. Katillugit inuit 36-it immikkut
isumaqatigiissuteqarneq tunngavigalugu atorfinitsinneqarput. Tassunga
ilanngunneqassapput inuttat nalinginnaasut 26-it angallaffiunerata nalaannaanni
atorfeqartussat atorfinitsinneqarnerat.
Royal Artic Bygdeservice A/S-ip
qullersaqarfiani Nuummiittumi sulisut qulinnguluat allaffissorluni aqutsisutut
atorfinitsinneqarput. Aammalu Qaqortumi Aasiannilu nunaqarfinnut tunngatillugu
ataqatigiissaarisartussat marluk atorfinitsinneqarlutik. Artic Umiaq Line A/S-ip ilaasortaataani inuttat
allanngortitserinermit kalluarneqanngillat, ilaasortaatini inuttat
qaamammusiallit katillugit 80-upput, taakkunanngalu 32-it tjenestemanditut
atorfeqarlutik.
Umiarsuartigut angallassinermik
ilaasunik nassiussanillu assartuussanik avissaartinneqarput, taamaalilluni
Royal Artic Bygdeservice A/S annerusumik nassiussanik assartuilerluni
aammalu Artic Umiaq Line A/S-ip
ilaasunik angallassilerluni. Taamaattorli 1998-mut Royal Artic Bygdeservice
A/S-ip aammalu Artic Umiaq Line A/S-ip akornanni isumaqatigiissutigineqarpoq,
kujataa kisiat pinnagu, Royal Artic
Bygdeservice A/S-ip nunaqarfinnut nunaqarfinniillu assartuineranut atasumik
ilaasunik angallassisoqartassasoq.
Artic Umiaq Line A/S-ip nunap
immikkoortuinik 1998-mi angallaviginninnissamik pilersaarusiorneqarneranut
sikuusartunik angalasarnerup aallartinneraniit aasap qaammataani Taateraap
Tuulliullu taartissaqartinniarnerisa ajornartorsiutaanerat sunniuteqarsimavoq.
Umiarsuaateqarfiup angallatit sukkasuut akuersissutigitinniarlugit
suliniuteqarsimagaluarpoq, kisiannili Danmarkimi imarsiornermik aqutsisoqarfik
Sĝfartsstyrelse isumaqarsimavoq, angallatit immikkoortiternerat pillugit
Kalaallit Nunaanni aasaanerani immakkut
angallassinermik sakkukinnerpaamik sikusiornissamut piumasarisaanik, angallatit
pineqartut naammassinnissimanngitsut. Angallatit taakku marluk
umiarsuaateqarfiup nutaanik sanaartortitsinermik pilersaarutaanut
ilaasimagaluarput.
Taamaattumik nutaanik
sanaartortitsinissaq imarsiornermik aqutsisoqarfiup aalajangiinerata
kingunerisaanik naleqqussarneqarpoq. Umiarsuaateqarfik aammattaaq sinerissami
angallataatillit namminersortut 1998-mi angallassisarnissamik pilersaarutit
eqqortinneqarnissaat siunertaralugu, naammattunik angallatissaqarnissaq
angujumallugu, angallassisartutut ilaatinneqarnissaat pillugu suliniuteqarpoq.
Angallassisartut namminersortut
angallataateqarput, ataasiakkaat kisimik pinnatik, aqqaneq marluk qaangernagit
ilaasoqarsinnaasunik. Angallataatillit ilaatigut ullumikkornit ingerlatsinermikkut
isumannaannerulernissaannut aammalu ingerlatamikkut patajaannerulernissaannut
periarfissinniarlugit, angallataatillit namminersortut aammalu Artic Umiaq Line
A/S-ip akornanni isumaqatigiinniarnerit ingerlanneqarsimapput.
Isumaqatigiinniarnerit kingunerisimavaat suliassanik katilugit 26 mio. kr-nik
nalilinnik suliariumannittussarsiussineq.
Taamaaliornikkut Naalakkersuisut
qularnaarpaat namminersortut siunissami ingerlatsinerminnut
tapertassaqalernerat. Tassuunakkullu siunissami ilaassunik angallassinermi
tamarmiusumi atortussaqarnerup eqaatsumik ingerlattuarnissaa qularnaarlugu.
Naalakkersuisut isumaqarput,
Namminersornerullutik Oqartussat Artic Umiaq Line A/S-mut aamma Royal Artic
Bygdeservice A/S-mut suliassiissutaasa aamma akiligaasa, naammassineqarnissaanut
naammattunik ilaasoqarsinnaasunik pissarsisoqartoq.
Kalaallit Allakkeriviat januarip
aallaqqaataa 1998 Tele Greenland A/S-mut nuunneqarpoq aammalu Kalaallit
Allakkeriviat januarip aallaqqaataa 1998 ateqalerpoq Post Greenland. Tele
Greenland A/S-ip tigusinerup kingorna misissueqqissaarnermik
paasissutissiinermillu peqqissaartumik suliaqarsimavoq, Tele-p aamma Post-ip
ataatsimuulernissaata pitsaanerpaamik eqaannerpaamillu pinissaa
qularnaarumallugu. Taamaaliortoqarpoq siunissaq ungasinnerusoq isigalugu,
periusissat pilersaarummik suliaqarnikkut, kingusinnerusukkut Post-ip Tele-p
periusissat pillugit pilersaarutaannut pilersaarutit marluutillugit
ataqatigiissumik ataatsimuulersinneqarnissaat siunertaralugu.
Suliffeqarfiup pisortaasa
nalunaarasuartaaserisoqarfiit allakkeriviillu tamaasa angallavigaat,
ataatsimuulersitsinissamik suliaq namminneerlutik ilisimasitsissutigiumallugu.
Taamaaliornermut atatillugu kommunit aamma pulaarlugit ilisimatinneqarput.
Sulisut tamarmik ataatsimuulersitsinissaq ilassilluarpaat.
Post Greenland pingaartumik
nunaqarfinni allakkerinermik aningaaserivitsigullu ingerlatsineq pillugu KNI
Pilersuisoq A/S-mik arlalitsigut isumaqatigiissuteqarsimavoq.
Tunngavigineqartoq tassaavoq, kiffartuussinerup Tele Greenland A/S-p Kalaallit
Allakkeriviannik tigusinngikkallarneratut minnerpaamik pitsaassuseqarnissaa.
KNI Pilersuisoq A/S-ip Post Greenland sinnerlugu nunaqarfinnik
aningaaserivitsigut ingerlatat, ukiumut 5,8 mio. kr-nik akilersilluni
suliarisarpai.
Nunaqarfinni aningaaaserivitsigut
sullissineq Post Greenland-imut isertitatigut matussuserneqarneq ajorpoq,
taamaattumillu allakkanik ingerlatsinermik isertitat, tassa allakkat
poortukkallu akiisigut nalinginnaasutigut isertitat, tassaallutik KNI
Pilersuisoq A/S-ip nunaqarfinnik aningaaserivinni sullissineranni aningaasartuutinut
matusssutissiisussat.
Nunaqarfinni qarasaassiat
kuponsystem atortorissaarutaasa ikkussorneqarnerat kinguaattoorsimavoq,
naatsorsuutigineqarlunilu nunaqarfiit sinnerutttut 20-it Knit atorlugu sullissinermik
suli ingerlatsiffiugallassasut, 1998-ip ingerlanerani PBS-inik
atortorissaarusersorneqarumaartut.
KNI A/S allanngortitsinermut
atatillugu Pilersuisup ingerlataanik niuertunut ilinniartitsinermik
ineriartortitsinermillu annertuumillu suliniuteqarluni aallartitsivoq.
Taamaaliorneq pissuteqarpoq, paasinnittoqarmat sulianik assigiingitsunik
qaffasissulinnik tamanik isumaginninnermik siunissami isertitat
amerliartornissaannut pitsaassutsip sullissinerup ineriartornerullu pitsanngorsartuarnissaanut sulisut
ilinniarluarsimasuunissaasa tunngaviunera.
Taamaattumik KNI Pilersuisoq
aggersuni sulisunik ilinniartitseqqinnermut ilinniagaqaqqitsitsinermullu
aningaasanik amerlasuunik aningaasaliisarniarpoq. Pilersaarut taaguuteqartoq:
Niuerfissanngorpoq, aallartinneqarpoq. Anguniagaavorlu sulisut pisortallu
anguniakkat siuliini taaneqartut angunissaannut tunngatillugu
qularnaarneqassasoq piginnaassutsip pisariaqartut pigilerumallugit
ilinniartitsissutigisinnaalernissaat.
Naalakkersuisut qularutiginngilaat
allanngortiterineq kingulleq aqqutigalugu ingerlatseqatigiiffiit tapiissutinik
pisariaqartitsisut tapiissutinik pisariaqartitsinngitsunit avissaartinneqartut.
Taamaalilluni suliffeqarfiup naatsorsuutaasa erseqqinnerulernerat
paasiuminarnerulernerallu anguneqassaaq aammalu siunissami angallanikkut,
pilersuinikkut niuernikkullu aaqqissuussaanerat siunissami aningaasaqarnikkut
atorfissaqartitat erseqqissut aallaavigalugit ingerlanneqarsinnaalissallutik.
Paasissutissat pisariaqartinneqartut pigineqaleriarpata Naalakkersuisut 1999-mi
KNI-mi allanngortiterinerup qanoq ingerlanera pillugu nassuiaammik
sukumiinerusumik saqqummiussinissaq siunertaraat.
Peter
Ostermann, Atassutip oqaaseqartua:
Qujanaq.
Aallaqqaatigalugu Atassummiit oqaatigissavarput Inatsisartunut ilaasortap
Manasse Berthelsen-ip siunnersuuteqarnera periarfissiilluarmat Inatsisartut
peqqussutaata nr. 4-ata 1997-mi juni 6-neersup Inatsisartuni tamanit
isumaqatigineqartup pilersinneqarnerata eqqortuunera uppernarsassallugu.
Aaliangersakkap
piviusunngortinniarnera sulisunut tamanut annertuumik suliakkiisimavoq, naallu
aaqqitassat kingulliit inissereeraluartut suliassat agguataarnerisa ulluinnarni
sulinermut inissilluarnissaannut suliassat suli annertupput. Taamaattumik
Atassummiit Naalakkersuisunut ilaasortap KNI-p eqqissilluni
allangortiterinerminik eqqissilluni aaqqiiniarnissaanik periarfisseeqqusinera
isumaqatigilluinnarparput, pingaartumik ulluinnarni sulineq eqqarsaatigalugu.
Takussutissat siulliit pingaartumik KNI-mi ingerlatsiviit 1997-mi
naatsorsuutaat eqqarsaatigalugit takutippaat ingerlatsineq ilorraap tungaanut
ingerlasoq, tamakkulu takutippaat Inatsisartut siorna upernaakkut
ataatsimiinnerminni eqqortumik aaliangiisimasut.
Naalakkersuisunut
ilaasortap saqqummiussaanut aalajangersimasunik makkuninnga taasassaqarpugut:
Allanngortiterinerit
sulisoqarnermut kingunerisimasai pillugit Naalakkersuisunut ilaasortap
saqqummiussaanut Atassut isumaqataavoq, tassami ersarimmat allangortiterineq
sulisoqarnermut annertunerusumik kingunerlussimanngitsoq. Taamaakkaluartorli
oqaatiginngitsoortariaqanngilaq nunaqarfinnik pilersuinermi angallatit
ikilisinneqarnerat umiartortunik sulisoqarnermut sunniuteqassammat.
Naalakkkersuisup
saqqummiussaani takusinnaanngilara sulisut qanoq amerlatigisut pineqarnersut,
taamaattumik Naalakkersuisunut ilaasortaq aperissavara nunap immikkoortortaani
nunaqarfinni pilersuinerup Royal Arctic Bygdeservice A/S-ip
ingerlanneqarneratigut ukiumut sulisut qanoq amerlatigisut sulisorineqartalissanersut
naatsorsuutigineqarnersoq.
Naalakkersuisunut ilaasortap aamma oqaatigaa
KNI-mi ingerlaqqittumi ulloq manna tikillugu suli annertunerusumik sulisut
ikileriarsimanngitsut, kisiannili ilimagineqarsinnaasoq taamatut
pisoqarsinnaanera. Tassunga tunngatillugu Atassummiit oqaatigissavarput maani
Inatsisartuni eqqaamasariaqaripput annertoorsuunngikkaluartumik taamatut
pisoqarsinnaanera. Uagummi maani Inatsisartuni aalajangernikuuvarput KNI
naliginnaasumik niuernermi pissusiusut tunngavigalugit ingerlanneqassasoq.
Nioqqutissanik
atortussanillu nunaqarfinnut assartorneq eqqarsaatigalugu Naalakkersuisunut
ilaasortaq oqarpoq, angallatinik nutaanik sanatitsiniarneq
eqqarsaatigissanngikkaanni annertunerusumik ajornartorsiuteqartoqanngitsoq.
Nunaqarfinnut atortussanik assartorneq maannakkut Royal Arctic Bygdeservice
A/S-mit ingerlanneqartoq pillugu Naalakkersuisunut ilaasortap oqaatigisai
erseqqarlupput. Uanga ilisimasaqarpunga ajornartorsiuteqartoqartoq. Nunatta
qeqqani Aqqaluk Ittuk, Anders Olsen-imit taarserneqarnera naammassimanngilaq
amigaateqarlunilu. Atassummiit inassutigaarput nunatta qeqqani nunaqarfinnik
pilersuineq ataavartumik aaqqiivigineqassasoq.
Nioqqutissanik
asiujasunik nunaqarfinni pilersuineq aaamma taamaappoq. Ulluni internet-ip
naliginnaalerfiani naatitanik asiusimasunik nunaqarfinni pilersiuineq
pisariaqanngilaq. Ingerlataareersut atorluarnissannut naammattunik
nunaqarfinnut asiujasunik pilersuinissamut periarfissaqareerpugut.
Kujataani
aserortoorneq kinguaattoornernik nunguutsisoornernillu kinguneqarsimavoq.
Pajuttaatip atorunnaarsinneqarnissaanik aalajangersimaneq tusarsimasara aamma
eqqarsarnartoqarpoq. Pajuttaat KNI-p
angallataanit tassatuaavoq atortunik oqimaatsunik nunaqarfinnut assartorsinnaasoq.
Tamakku
tunngavigalugit Atassummiit Naalakkersuisunut ilaasortaq inassavarput
nunaqarfinnut assartorneq malinnaaffigilluaqqullugu, qulakkeeqqullugulu
annikillilerisoqaranilu aserortoornermi angallatissaruttoqassanngitsoq,
tamannalu qulakkeerniarlugu namminersortunik suleqateqarnissaq
eqqumaffigineqassasoq.
Nunaqarfinni
bankeqarneq eqqarsaatigalugu paasivarput annikillilerisoqarani PBS-mik piorsaaneq
ukioq manna naammassiniarneqartoq. Tamanna Atassummiit naammagisimaarparput.
Pisortat
ingerlataannik namminersortunngorsaanermi Atassut sallersaavoq aamma KNI
eqqarsaatigalugu, kisianni tamanna silatusaartumik ingerlanneqassaaq.
Pilersaarusiorluarluni, tuaviupilugani ingerlanneqassaaq.
Naggasiilernermi
oqaatigilara Atassummi isumaqaratta ingerlatsineq ajunngitsumik ingerlalersoq
taamaakkaluartorli allanngortiterinerit inissilluarnissaannut ingerlatsiviigut
periarfissittariaqarivut peqqussutip aalajangersimasatta kingunerisai tamakkiisumik
nalilersulersinnagit.
Naggataagit
KNI-mi tassalu Pisiffimmi Pilersuisumilu sulisunut tamanut qujanarsuaq
suliluarsimanissinnut. >97-mi pitsaasumik angusaqarnissaq
aqqutissiuussimagassiuk. Sulisorisammi sulilluarsimanngippata taama pitsaatigisumik
angusaqartoqarnavianngikkaluarmat.
Laannguaq
Lynge, Siumup oqaaseqartua:
Siullermik
utoqqatsissutigissavara siulliullunga oqaaseqartussagaluarlunga
peqquteqavissumik maaniinngitsoorama.
Siumumiit
Naalakkersuisut KNI pillugu nassuiaataat pitsaasoq erseqqissorlu
qujassutigaarput. Tassami tusaaneqarsinnavoq KNI-p aaqqissuuteqinnera maanna
siunnerfimmut ajunngitsumut aallarsimasoq, tamannalu takussutissaavoq KNI-p
siulersuisuisa Naalakkersuisullu Inatsisartut piumasarisaat naapertorlugit
KNI-mik ingerlatsineq sammiveqartilersimagaat. Tamannalu KNI-p annertuumik
allanngortiterneqarnermigut sammivilerneqarnera siorna pisoq pitsaasutut
ingerlatiinnarneqartariaqartutullu Siumiit isumaqarfigaarput.
Ingerlatsivik
KNI-tut ittoq aningaasarsiornikkut innuttaasunik kiffartuussinikkut ullutsinnullu naleqquttunik
ilinniartitsinikkut pitsanngoriaatsinik ingerlatseqqikkumasoq erseqqippoq.
Tamanna Siumumi tapersersorluinnarparput. Aammattaaq KNI ullumikkut
iluarsartuuteqqinnermini killiffigisaani eqqissilluni ilumini imminullusooq
naniniarnissaanut Siumumiit periarfissikkumavarput.
Isumaqarpugut
annertuumik ukiuni kingullerni iluarsaaqqiffigineqareernermigut ikaarsaaarianermini
sulisuminut pikkorissaajuarniarnera nersortariaqartoq aammalu piffissaqartariaqartoq
suli patajaatsumik aningaasaarsiornerlu eqqarsaatigalugit ingerlaqqinnissaminut
avataaniit akuliussuuffigineqarpallaanngitsumik.
Tamatuma
saniatigut Siumut pingaartitaraa, nunaqarfinnut nassiussanik ilaasunillu
angallassinerup aammalu inoqarfiini taakkunani innuttaasunik kiffartuusinerup
pitsaasumik qularnaarsimajuarnissaa. Tamannalu anguniarlugu nunaqarfinni niuertut pikkorissarnerisigut
allanillu pisortanik ilaasunillu kiffartuussinermik isumagisaqartunik
ilinniartitseqqittarnertigut anguniarneqartariaqartoq Siumut isumaqarpoq.
Tamanna maana siunertaasunut ajunngitsunut ilaatittariaqarpoq. Tassami KNI-p
saniatigut kommuni allaffeqarnera, napparsimavik atuarfeqarfillu
suleqatigalugit pissutsinik pisariillisaasinnaammata. KNI-imi pissutsit taamak
pitsaasutut nalilerlugit Siumut tungaanniit KNI-mi sulisut qutsavigalugit,
kaammattorusuppavut taamak ingerlaaseqalernermi takutitsilluarnerat
ingerlateqqeqqullugu, tamannami ingerlalluarneq Siumut tungaanniit qularinngilarput
sulisut peqatigalugit nangeqqissinnaasoq.
Taamatut
Siumut-miit oqaaseqarluta 1999 KNI pillugu Naalakkersuisut tamakkiisumik
nassuiaateqarnissaat qilanaaralugu suleqataaffigissavarput.
Manasse
Berthelsen, Inuit Ataqatigiit oqaaseqartuat:
Aap, Inuit
Ataqatigiit sinnerlugit saqqummiussissaanga. Inatsisartunut ilaasortap Manasse
Berthelsenip siunnersuutigisimasaata tunngavigalugu KNI-p allanngortiternera
pillugu nassuiaammik Naalakkersuisut saqqummiussinerat Inuit Ataqatigiinniit
ilassilluarparput, annertunerusumillu nassuiaat oqaaseqarfigilugu makku
Naalakkersuisumut apeqqutigerusuppavut.
Siullermik ukioq tusagassiuutitsigut
tusarparput Tasiilami Uummannamilu KNI-mi assartuutinik
usilersuisartut/usingiaasartut ikinngitsut soraarsinneqartut. KNI-p
allangortitserneqarnera pillugu Niuernermi Ataatsimiititaliami sulinitsinni
ataatsimilluunniit eqqaaneqarsimanngillat sissami sulisunik
soraarsitsiortornissaq. Taamaammat paaserusunnassagaluarpoq suna tunngavigalugu
soraarsitsiortortoqarsimanersoq, qanorlu kommuneni taakkunani eqqorneqartuni
suliffinnik nutaanik pilersitsiniarluni iliuuseqartoqarsimanersoq.
Allanngortitserinerummi suliarineqarnerani oqariartuutigineqarpoq, illoqarfiit
eqqorneqartut suliffinnik allanik taarsiiffigineqartariaqartut sapinngisaq
tamaat atorlugu.
Ungasinngitsukkullu qeqqani nunaqarfinni
pilersuineq pissusissamisuunngilluinnartoq aamma takuarput,
sivisungaatsiarsuarmillu nunaqarfiit ataasiakkaat tikinneqartarsimanngitsut.
Sapaatip akunnerami allortarlugu nunaqarfiit tikinneqartarput, tassa
assartuullu ataatsip Maniitsup Nuullu kommuneni nunaqarfiit assartuiffigisarpa,
taamaalilluni silap ajornerani kommunep aappaaniittut
tikinneqanngitsoortarsimallutik.
KNI allanngortitserneqarniarnerata
suliarinerani aalisakkanik assartuineq Royal Greenland-mit isumagineqassasoq
oqaatigineqarpoq. Taamaammat Naalakkersuisoq aperissavakka, aasarluarnerani aalisarneq aalartilluarpat nunaqarfinniit
aalisakkanik assartuisarnissat suut pilersaarutaanersut. Ingammik nunaqarfinni
tunitsiviinnalinni.
Inuit Ataqatigiit-niit naggataatigut
oqaatigiinnassavarput, Naalakkersuisut paasissutissat naammattut
pigilerunikkut 1999-mi nassiaammik sukumiisumik saqqummiussiniarnerat
qilanaaralugu utaqqissavarput, Inuit Ataqatigiit-nilu piumasarissavarput,
sulisorisat qanoq katitsigaanerat ilannguteqqullugit, maannakkummi KNI-p
pisiniarfiini ulluinnarni sivisunerusumik ammasalernerisigut meeqqat
atuarfianni atuartut sulisutut atorneqartarneri takornartaajunnaarmata.
Bjarne Kreutzmann, Akulliit Partiiat:
KNI-p allanngortiterneqarnissaa
Inatsiartuni 1997-mi upernaakkut akuersissutigaarput. Allanngortiterinissaq
ilaasortat tamarmiulluta akuersissutigaarput, tamatumalu naluneqanngitsutut
makkua pilersinneqarnissaat kingunerisimallugu:
Siullermik ingerlatseqatigiiffik aqutsisoq
KNI A/S, taassuma isumagissallugit ingerlatat ataatsimoorussat, soorlu
ingerlatseqatigiiffissuup siulersorneqarnera, pisiortortarneq,
naatsorsuuserineq, aningaasaqarneq il. il.
Kiisalu ingerlatseqatigiiffiit aqutat, tassaasut
KNI Pisiffik A/S aamma KNI Pilersuisoq A/S, taakkua isumagissallugu
nioqqutissanik pilersuineq.
Aappassaanillu ilaasunik imaatigut
angallassineq bilitsileriffiillu ingerlanneqarnerat isumagineqassalluni Arctic
Umiaq Line A/S-mit.
Kiisalu usinik nunaqarfinnut assartuineq
nuunneqarluni Royal Arctic Line-mut.
Allanngortiterinerup nalilernissaata
1998-ip naanissaa sioqqullugu isumatuumik ingerlanneqarsinnaanerata ajornakusoornissaanik
Naalakkersuisut isumaqarnerat tusaatissatut tiguara - tassa
ingerlatseqatigiiffiit tamarmik aatsaat 1998-mi januar-ip aallaqqaataani
naatsorsuuserinikkut imminnit avissaartinneqarmata.
Manasse Berthelsen-ip apeqquteqaataanut
akissutit aamma tusaatissatut tiguakka - taamatuttaaq ingerlaseqatigiiffiit
tapiissutinik pisariaqartitsisut tapiissutinik pisariaqartitsinngitsunit
avissaartinneqarnerannik ilisimatitsissut.
Taamaalillunga nassuiaat akueraara
tusaatissatullu tigullugu.
Anthon Frederiksen, Kattusseqatigiit:
Kattusseqatigiinniit
pissusissamisoorluinnartutut isigaara, Inatsisartunut ilaasortap Manasse
Berthelsen-ip KNI-ip allanngortiterneqarnera pillugu paasisaqarusummat.
Taamaaliornikkummi paasissutissat, aamma uvagut inatsisartuni
ilaasortaangaluartutaluunniit ulluinnarni naliginnaasumik
pissarsiarisinnaanngisagut, pissarsiarisarpagut.
Inatsisartunut ilaasortap Manasse
Berthelsen-ip apeqquteqaataanut akissutigineqartut ilaasa, apeqquteqarnissannut
pissutissaqalersippaannga, tassalu KNI A/S-mik pilersitsinerup kingunerisaanik
inuit isikkanillit soraarsinneqarnerat, taakkunanngalu pisortat sisamat,
tassalu soqutiginartua uvaniissoraara, soraarsitsinermi pingaartumik
pisortaasimasunik, aammalu allanik qulinik atorfinititsinermi qanoq
inuiaqatigiinnut naleqarsimanersoq - tassami ilaqutariit atorfinititsinermut
atatillugu nuuttarnerat, pingaartumik inissaaleqineq aamma ilanngullugu
eqqarsaatigissangaani akikitsuinnaanngimmata. Pisortaasimasut sisamat
soraarsitsinermut atatillugu immikkut aningaasartuuteqarfigineqarpaat?
Taamatut paasisaqarusunninnut soorunami
pissutaavoq, Inatsisartut sunilluunniit suliffeqarfinnik Namminersornerullutik
Oqartussat pigisaannik allanngortitseriniarlutik aaliangeraangamik
allanngortitserinerup kingunerisaanik inuiaqatigiit amerlanertigut
akiliiseqqinneqartarmata.
Allanngortitserinerup kingunerisaanik
umiartortut arlalissuit suliffissaarutinneqarput, aammalu ilai taamaallaat
angallaffiup nalaani atorneqartussaallutik, piffissammi sinnerani? - umiarsuarni,
kilisaatinilu Namminersornerullutik Oqartussanit pigineqartuni allani,
suliffissaaruttinneqartut ilaasa atorfinitsinneqarnissaat, tikisitat ilaannik
paarlaallutik anguniartariaqartoq Kattusseqatigiinniit kaammattuutigissuara.
Aammalu allaffissornerujussuup
millisarneqarnissaanik oqaluttuannguarluta, paasilinnguarparput Bygdeservice
A/S-ip qullersaqarfiani Nuummiittumi sulisut qulaaluat allaffissornermi
aqutsisutut atorfinitsinneqartut.
Ilumut allanngortiterinersuaq ingasaanneqarlerpoq,
inuiaqatigiinnullu akisuallaaqaaq. Aammalu allanngortiterinermut atatillugu
Inatsisartut, sulisoqarnerup tungaatigut, allaffissornermut, ilaqutariit
nutsertinneqarnerannut allarpassuarnullu aningaasartuutitsigut
kingunerisinnaasai pillugit erseqqinnerusunik
paasitinneqarsimasariaqaraluarput.
Kalaalinngorsaanerup aqqani nunaqarfinnut
usinik assartuinermik ingerlatsivik kalaallisut
atserneqarsimasinnaanngikkaluarnerluni?
Naggataatigut Naalakkersuisunut
kaammattuutigissavara nunaqarfinni nioqqutissanik ilaasunillu kiffartuussinerup
ajorseriannginnissaata aaliangiussimaneqarnissaa.
Taamatut naatsumik oqaaseqarlunga
oqallissaarummut akissuteqaatinullu qujavunga, qilanaarpungalu KNI-mik
allanngortiterinerup qanoq ingerlanera pillugu sukumiinerusumik nassuiaammik
saqqummiisoqarnissaanut.
Peter G. Samuelsen, Takornariaqarnermut, Angallannermut,
Niuernermut Attaveqaatinullu Naalakkersuisoq, Siumut:
Inatsisartunut Ilaasortap Manasse
Berthelsen-ip apeqquteqarnera tunngavigalugu Naalakkersuisut akissuteqarnitsinnut
partiininngaaniit oqaaserineqartunut qujassuunga, ataatsimut asigalugu
malugisinnaavara maannakkut Inatsisartuni partiinit oqariartuutigineqartoq
ersarissoq, tassalu siorna aasakkut Inatsisartut aaliangernerat tunngavigalugu
KNI-ip nutaamik aaqqeriarneqarnerata maannakkut ingerlasup tamalikaartumik
sammivilersornagu maannakkut inissikkiartornissaa taanna
periarfissaqaqquneqartoq.Tamannalu inuiaqatigiinnut Inatsisartunut piinnarani
aamma minnerunngitsumik KNI-mi sulisunut 2.000-it pallillugit sulisuusunut
taanna pingaaruteqaqaaq.
Ukiut tallimat ingerlanerani maani
Inatsisartuni assigiinngitsutigut aaliangertarsimanigut ilaqutariippassuarnut
sunniuteqarsimapput, taamaammat soorunami nuannaarutiginngitsuunngilara
maannakkut aaqqissuussinerup allarparujussuarnut ilaaqqunnagu maannakkut
inissiffissaanut inissikkiartornerata ingerlanera aaliangiussimaneqassasoq.
Aamma qujarutigingilara KNI-mi siulersuisut piginnittut sinnerlugit ulluinnarni
sulinerminni tamanna pisariaqartikkaat.
Ukiut kingullerpiaat eqqarsaatigalugit
tassami aamma 1997-ip ilaa maanalu 1998-mi siullermeerutaasumik KNI-ip
suliassaqarfii assigiinngitsut eqqarsaatigalugit ersarilluinnartumik isumaqatigiissusiortoqarluni
aningaasaliissutit Inatsisartuninngaanniit tunniunneqarlutik atugassanngortitaasimapput.
Tassa servicekontrakt-it atorlugit
suliassat KNI-ip ilaata aaliangersimasup inuiaqatigiinik kiffarsuussineranut
atugassat, imatut imatullu atorneqarnissaat immikkuualuttortanngui tamaasa
ilanngullugit isumaqatigiissutigineqarsimapput. Taakkulu ukiumoortumik
isumaqatigiissutigineqartarput Inatsisartut aningaasaateqarneri
aallaamavigalugit.
Tassalu akissuteqarninni naggasiussanni
ersersinniangara KNI-ip suliffeqarfiisa immikkoortui imminut akilersinnaasumik
ingerlanneqartut, taakkua imminnut ingerlassapput. Kisiannili
Inatsisartuninngaanniit aaliangikkat tunngavigalugit suliassaqarfinnut
aningaasaliissutigineqartut, taakkua servicekontrakt-it atorlugit
ilusilerneqarsimasut taava ukiumoortumik misilittakkat tunngavigalugit
nalileqqinneqartarsinnaapput aningaasaliissutit atorfissaqartitsippata,
imaluunniit sullissineq ingerlanneqartoq taanna naammaginanngittortaqarpat
taava uterfigalugu Inatsisartuni aningaasaliissutit aqqutigalugit
servicekontrakt-llu, taakkua isumaqatigiissutit aqqutigalugit
iluarsiivigineqartarsinnaapput. Tassa isumaa, isumaqarpunga taamaalilluta aamma
qinikkat tungaaninngaanniit
aningaasaliissutitsigut sunniuteqarsinnaanerput erserissarneqarsimasoq.
Taamaammat apeqqutigineqartut aammalu
maannangaaq iluarsiivigineqarsinnaasutut oqaatigineqartut, taakkua
Naalakkersuisunut tusaatissatut tigussuagut aammalu suliffeqarfinnut taakkununnga
pineqartunut apuullugit.
Partiininngaanniit apeqqutit
aaliangersimasut immaqa tamakkerlugit toqqaannartumik maangaanniit
akisinnaanngikkaluarlugit ilai oqaaseqarfigillatsiassuakka. Inatsisartunut
ilaasortamit apeqqutigineqartut taakkua akiniarsimavagut kisiannili apeqqutit
maannakkut arlallit saqqummertut akisinnaanngikkukkit
isumakkeerfigineqarnissara taanna qinnutigissuara. Aamma kisianni
aaliangersimasut eqqarsaatigalugit maannakkut akingikkaluarukkilluunniit
taakkua allakkatigut akineqarsinnaaneri imaluunniit inummut aperisumut
apuullugit eqqarsaatigisinnaagakkit.
Siullermik Atassut-ip oqaluttuanut Peter
Ostermann-ni aperimmat arlalinnik, taakkua siulliutissavakka. Tassa siullermik
nuannaarutigaara Atassut-minngaanniit aamma Naalakkersuisuni akissuteqaaterput
ilassilluarneqarmat aamma nunaqarfinnik pilersuineq eqqarsaatigalugu ilaatigut
oqallinnermi tutsiuttartut aammalu partiininngaannit allanit tikkuarneqartut,
taakkua soorunami suliffeqarfiit pineqartut peqatigalugit eqqumalluinnarlugit
malinnaaffigineqarput.
Sulisoqarnermut tunngasut taakkua
soorunami nutaamik aaqqissuusseqqinnermi aammalu angallatinik taakkuninnga
piginnittut nikinnerisigut soorunami atorfinititsinermi isumaqatigiissutit
nikisinneqarsimassapput, soorunami aamma taamaanngippat eqqumiippallaassaqaat,
taamaattumik suliassat ataatsiakkat eqqarsaatigalugit allanit
isumagineqartussaanngoraangata taava sulisut nikisinneqartarput, tassanilu
atorfinititsinermi allagartat soorunami nikisinneqartarlutik. Taakkuppullu
aamma annerpaamik oqallinnermi tutsiuttarsimasut, tassa neqoroorifigineqartut
sulisorineqarsimasut KNI Rederi-mi, Arctic Umiaq-mi atorfininnermut taavalu
aamma Royal Arctic Bygdeservice-mi atorfininnermut.
Taavalu aamma Peter Ostermann-ip
apeqqutigaa Bygdeservice-mi sulisut qassiunersut, taassuma suliffeqarfiup
angallatit qulaaluat ingerlappai ukioq manna, taakkulu sulisoqarput
Skibsfĝrer-nik 13-nik, aquttunik 9-nik, maskinist-nik 14-nik taavalu
umiartortunik 26-nik sulisoqarluni.
Taavalu aamma Atassut-ip oqaluttuata Peter
Ostermann-ip oqaatigaa pingaartumik nunatta qeqqa eqqarsaatigalugu AAqqaluk Ittuk@ aamma AAnders Olsen@, taakkua
angalasuusut naammagineqarsimanngitsut, tamannalu aamma pissutigalugu
Naalakkersuisuni Maniitsoq Kommunea ataatsimeeqatigisarneratigut
namminersortumik angallammik ikkussisimavugut pingaartumik ilaasut
eqqarsaatigalugit, ilaasunik angallassineq eqqarsaatigalugu. Taannalu aamma
soorunami naatsorsuutigaarput pitsanngoriaatsinut ilaassasoq, kisianni tassa
angallatit tassani pajuttuutigineqartut silap pissusia eqqarsaatigalugu
naleqqunnerpaajusutut taanna pingitsoq nassuerutigisariaqarpoq,
naatsorsuutigaaralu aamma naliliinissami aamma taanna isiginiarneqarumaartoq
umiarsuaatileqatigiiffik eqqarsaatigalugu aamma.
Aamma Internet-ip ukiuni inuuffitsinni naatitalik
asiuisunik nunaqarfinnut pajuttorneq taanna iluarsineqartariaqartoq
oqaatigineqarpoq ilumoorpoq aamma taamaattumik KNI-minngaanniit angallatinik
sukkasuunik pisisoqarsimavoq aasamullu angalatilerneqartussaallutik tassani
pineqarluni pingaatumik nioqqutissat asiuisut piaartumik nunaqarfinnut
annguttarnissaat pilerssarutigineqarluni. Naatsumik oqaatigalugu
oqaatigineqartut partiininngaanniit nunaqarfinnut pilersuinermut atatillugu
isumaqatigiilluinnarpugut aamma iluarinanngitsortai nunarterinerup soorunami
taakku iluarsiniartariaqarput.
Ilaatigut umiarsuaaqqanik pajuttorneq
angalasunillu tikittoqartuartarnera eqqarsaatigalugu ilaatigut nioqqutissanik
amigaateqartoqartarnera oqaatigissagaanni soorunami KNI-ip nutaamik
aaqqissuunneqarnera aallartimmalli pisuuteqattaarnerit tusagassiorfitsigut
tusarsaajuarsimapput, kina ilumoornerassallugu nalunarsilluni. Kikkunukua
pisuusut, angallatillu tikittarlutik.
Kisianni tassa KNI-ip angusai
eqqarsaatigalugit sisamanngorpat ataatsimeersuartussaavoq aamma tassani
siulersuisuninngaanniit oqariartuutigineqartoq piginnittunut noqqaassutigineqartoq
paasilluinnarlugu tapersersorparput tassalu sulissutigut pikkorissartitsinerit
piginnaanngorsartitsinerit taakkua annertuumik suliniutigineqarnissaat
pilersaarutigineqartoq Naalakkersuisunit sisamanngormat
ilassillualersaarparput. Taamaattumik suliniutit tassaniittut aamma
naatsorsuutigikkunnartariaqarpugut sullissinermut kiffartuussinermullu
pitsaasumik kinguneqarumaartut.
Soorumani silap ajornera pissutigalugu
angallatit pilersaarutaasumik allaasumik tikittassappata taanna uangaanniit
aaqqiivigisinnaanagu, taanna nassuerutigisariaqarpara, sila ajorpat ajussaaq,
taavalu angallannikkut piumasaqaataasut malillugit angallassisut sulisullu
imarsiortut taakkua sulisariaqarmata.
Siumut-minngaanniit oqaaserineqartut
taamatut aamma nassuiaatigineqarallartumut, taamatut oqaatigalugu,
qujassutigaakka.
Taavalu Inuit Ataqatigiit sinnerlugit
oqaaseqartumut, aperisumut, oqaatigissavara pingaartumik usilersuisartunik
usingiaasartunik soraarsitsiortorneq eqqaallugu imatut oqaatigilara nutaamilluunniit
aaqqissuussineq pinngikkallarmat pingaartumik sikusartumi ilaatigut sulisut
ukiuunera ikilisinneqartariaqartarput.Aamma nutaamik aaqqissuussinerulluunniit
nalaani aamma tamaattuartariaqarpoq. Kisianni tassa pingaartumik nalunaaquttap
akunnermusiaqartitaallutik sulisut, taakkua eqqarsaatigalugit, tassa taamatut
qanga naajaqarnerata nalaanisulli sulisorineqartarput, kisianni soorunami
sulisoqartuartarpoq aamma atorfeqartunik aaliangersumik.
Apeqqutinut allanik, Manasse-ip
apeqqutigisaanut oqaasereriikkakka innersuussutigijumavakka, soorlu qeqqani
pilersuinermut tunngatillugu oqaaserisakka innersuussutigerusullugit.
Taavalu kisianni ukiup ataatsip
ingerlareerneratigut nutaamik aaqqissuussinerup aallartinneraninngaanniit
tassa ukioq manna januar-ip allaqqaataaninngaanniit piffissaqalaariarluta taava
ersarinnerusunik misilittakkat tunngavigalugit aammalu sullissinermut
isumaqatigiissutit nutaat sananeqarnissaannut atatillugit maannakkut
uparuartorneqartut, aammalu tutsiuttarumaartussat, taakkua tunngavigalugit
iluarseeriarnissat piumaartut ilaatigut tunngavigalugit Naalakkersuisut
tamakkiinerusumik nassuiaateqarumaarnissaat taanna unnersuussutigalugu.
Sulisoqarnermut tunngasut taakkua
soqutigineqarmata oqaatigilaarsinnaavakka soorlu oqartunga suliffeqarfiit
taakkua eqqartukkatta iluini sulisut 2.000-it pallillugit sulisorineqarput.
Arctic Umiaq Line A/S eqqarsaatigalugu tassani sulisorineqarput 220-it,
taakkuninngalu 45-it tikisitatut oqaatigineqarlutik.
KNI A/S-mi sulisorineqarput 1.740-it
taakkunannga 984-it nalanaaquttap akunnermusiaqartinneqarlutik
atorfeqartitaallutik taassumalu saniatigut qaammammusiallit 756-it
sulisorineqarlutik. Aamma nalunaarutigineqarsimavoq KNI tamaat eqqarsaatigalugu
sulisut 5 %-ii tikisitaasut, taamaalilluni 95 %-it nunaqavissuullutik.
Tele Greenland eqqarsaatigalugu sulisut
553-put, tassa katillugit tassa Tele-mi 351-it Post-milu 152-it, tassani aamma
nunaqavissut sulisorineqarnerat annertuvoq.
Soorlu oqartunga annertunerusumik
sulisutigut siornaminngaanniit maannamut nikisitserisoqarsimanngilaq
erseqqissumik oqaatigineqarsinnaasoq tassaavoq KNI tamaat eqqarsaatigalugu
aaliangersumik atorfeqartitat eqqarsaatigalugit 11-it suliffittik
qimassimavaat, 10-llu nutaat atorfinitsinneqarsimallutik.
Qujavunga oqaaserineqartunut aamma soorlu
oqartunga toqqaannartumik maannakkut akisinnaanngisakka taakku
kingusinnerusukkut inuttaannut apuukkumaarlugit.
Manasse Berthelsen, Inuit Ataqatigiit:
Naalakkersuisumut qujassuteqassaanga
siunnersuutimma naammassiniarneranut siliniutigisimasai nassuiaammullu KNI-p
allanngortinniarneranut massakkut suliat qanoq ingerlanneqarneri.
Royal Bygdeservice, tassa qallunaat immaqa
selskab-at naluara, kisianni Namminersornerullutik Oqartussat pigigaluarpaat,
qallunaatut atserluagaq, qullersaqarfeqarnerarpoq maani illoqarfimmi Nuummi
qulingiluanik sulisoqarluni, tassani apererusuppunga suut akorngotaassanersut
sinerissamiinnissaanut. Tassami takusinnaangilanga toqqaannartumik imaluunniit
pingaarluinnartumik pissutaasumik maaniittariaqarneranut Nuummi.
Aamma nassuiaammi akisinnaanngisani
qujanartumik allakkatigut akissallugit neriorsuuteqarpoq, aamma tassani
paaserusunnassagaluarpoq, ingammik ilaasartaatit nunaqarfinnut, illoqarfinninngaanniit
nunaqarfiillu akornganni suut selskab-it imaluunniit suut firma-t, sunik
assigiingitsunik qanorlu pisimanerat paaserusunnassagaluarput, immaqa tassunga
atatillugu paasissutissiissutigineqarsinnaavoq.
Qeqqani angalaartutut oqaatigineqarpoq AAqqaluk Ittuk@ aamma Peter Ostermann-tut oqarneratuut aammalu AAnders Olsen@. Kisiannili tusatsiakkat imaluunniit tusakkat
najoqqutaralugit avannaani sikuverpat angalaartussatut naatsorsuutigineqarpoq.
Pilersaarutaanerluni qeqqaniiginnassasoq. Taavalu Uumannami angalaatussatut
naatsorsuutigineqartoq sumik taarserneqassanersoq apeqqutigerusunnarpoq.
Taavalu ukua ingammi Upernavimmi
sineriartoqquumi ilaasunik angallassineq aammalumi nunaqarfeqqortuuni soorlu
Uumannakkuni ilaasunik angallassinissaq isumannaarneqarnera
paaserusunnassagaluarpoq.
Anders Andreassen, Inatsisartut Siulittaasuat, Atassut:
Taamaalilluni oqaluttussaarummat
ullumikkut oqaluuserisassaq immikkoortoq 30, tassalu KNI-i allanngortitserneqarnerata
ingerlanneqarneranut tunngasoq tamaanga killeqarpoq aammalu ullumikkut
oqaluuserisassagut tamakkerpagut.
Oqaluuserisaq naammassivoq.