Oqaluuserisassani immikkoortoq 31 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Finn Karlsen, Siulittaasoqarfik,
Atassut.
Ruth
Heilmann, siunnersuuteqartoq, Siumut:
Nipilersornermik
ilinniarfimmik pilersitsisoqarnissaanik siunnersuuteqarsimavunga.
Ukiakkut
Inatsisartut ataatsimiinneranni Kultureqarermut, Atuartitaanermi,
Ilageeqarnermilu Ataatsimiititaliami ilaasortatut saqqummiussimavara maannakkut
organitut soraarummeernikut oqaluffimmi pattattuunermik saniatigut soorlu
atuarfimmi, sunngiffimmi STI-milu erinarsornermi pattannermik allatigullu
nipilersornermik ilinniartitsisutut atorneqarsinnaanerisa ullorlu naallugu
suliffittut akissarsissutigalugu suliaminnik tamakkiisumik
inuutissarsiuteqarlersinnaannerat anguniarneqaqqullugu, aamma isumaqarlunga
nuna tamakkerlugu nipilersornermi ilinniarfimmik pilersitsisoqarnissaa
ullutsinni pisariaqarluinnartoq. Tamannalu aallarnisassagutsigu, tassa STI-ni
ilinniartitaaneq aallaavigalugu isumaqarpunga aallartittoqartariaqartoq,
assersuutigalugu STI-ni init atuartitsiviusut ilaat periarfissaqartoqarnera
aallaavigineqarsinnaammat, ingerlaqqiffittullu nipilersornermik ilinniarfik
soraarummeerfiusinnaasunngorlugu pilersittariaqarluni.
Taamaattumik
tunngaviusumik Inatsisartuni oqallisigineqarnissaa siunertaralugu taamatut
siunnersuuteqarpunga, naak nalunngikkaluarlugu siunnersuut nutaajunngitsoq,
nuannaarutigeqisatsinnimmi aamma Naalakkersuisut siulittaasuata Jonathan Motzfeldtip
ukiortaami oqaaseqarnermini nipilersornermi ilinniarfimmik nunatsinni
pilersitsisoqarnissaanik kissaateqarnera. ilungersuutigiumammagulu tamaattumik
tapersersorneqarnissaa neriuutigilluinnarpara.
Konrad
Steenholdt, Kultureqarnermut, Ilinniartitaanermut Ilageeqarnermullu
Naalakkersuisoq:
Inatsisartunut
ilaasortaq Ruth Heilmann Inatsisartut katersuunnissaannut uunga
nipilersornermik ilinniarfeqalernissaanik siunnersuut
oqaluuserisassanngorteqqissimavaa. Siunnersuut Inatsisartut ukiuunerani
katersuunneranni siullermik saqqummiunneqarpoq tassanilu allakkatigut
akisassan-ngortinneqarluni.
Siunnersuut
taamaalilluni allannguuteqanngimmat, aammalu ukiuunerani katersuunnerup
ki-ngorna suliami tassani allannguutaasumik pisoqarsimanngimmat,
Naaalakkersuisut ataatsimut isigalugu siusinnerusukkut allakkatigut
akissuteqaat najoqqutariinnassavaat. Inatsisartuni ilaasortat aammalu
innuttaasut ilaat, tassani soqutigisaqartut eqqarsaatigalugit, Naalakkersuisut
isumaqarput matumuuna akissutip oqaatigeqqinnissaa naleqquttuusoq. Tassunga
atatillugu oqaatigineqassaaq, aaqqissuunnerani ataasiakkaanik
iluarsiisoqarlunilu ilassuteqalaarmat suliaqarfinni, akissuteqarnerup kingorna
nutaanik paasisaqarfiusimasuni.
Inatsisartunut
ilaasortap Ruth Heilmannip siunnersuutaa pingasunik immikkoortortaqarpoq,
tulliuttuni immikkoortillugit akineqartussanik:
Siulleq:
Organistit
soraarummeersimasut kommunip sunngiffimmi atuartitsinerani STI-milu atorneqassasut.
Aappassaa:
Nipilersornermik
ilinniarfimmik nunamut tamarmut atuuttumik pilersitsisoqassasoq.
Pingajuallu:
Ilinniaqqinnissamut
periarfissat soraarummeernissamut periarfissartallit pilersinneqassasut.
Siullermut:
Siunnersuummi
oqaatigineqarpoq organistit soraarummeersimasut erinarsornermik noqartilissornermillu
kiisalu sunngiffimmi atuartitsinerup iluani atuartitsinerni allani STI-milu
atorneqarsinnaasut, ilaatigut inuussutissarsiummik iluanni ulloq naallugu
suliffeqarsinnaaqqullugit.
Nunatsinni
organistit ilinniartitaanerat pillugu nalunaarummi organistitut ilinniarsimasut
pisinnaasaasa ilaattut oqaatigineqarpoq - taanna issuarpara:
"Tamatuma
saniatigut ilinniartoq organistitut sulinissamini nipilersornerup
siuarsarneqarnissaanut suleqataanissaminut periarfissaqalissaaq." -
issuaaneq naavoq.
Kommunip
sunngiffimmut tunngasunik ingerlatsiviata ataani sunngiffimmi
sammisassaqartitsinermi nipilersornermik ilinniartitsineq sunngiffimmi
sammisassaqartitsineq pillugu peqqussut tunngavigalugu neqeroorutigissallugu
periarfissaqarpoq.
Organistitut
ilinniarsimasut pisinnaasaat neqeroorutigineqartunut naapertuuppata tamanna
pillugu isumaqatigiissutigineqarsinnaanera qularnanngilaq.
Nalunaarummi
imarisai pillugit ' 5-imi allassimavoq ilinniartitaanerup imarisaasigut
qularnaarneqassasoq - taannalu issuarpara: "ilinniartoq atuagarsorluni
ilinniagassartaasuni isumannaatsumik pikkorissuseqalersinniassallugu,
tassanissaaq pineqarput nuutinik atuarsinnaanissaq taakkualu nalinginik
paasisimanninnissaq, pattagiarsuarmik nipigissaasinnaalernissaq,
erinarsoqatigiinnik sungiusaasinnaanngornissaq allatigullu erinarsornermik
nipilersornermillu atuartitsisinnaanngornissaq." - issuaaneq naavoq.
Taamatut
isumaqatigiissuteqarnissaq kissaatigineqarpat suliniuteqarneq taamaattoq
kommunit ataasiakkaat sunngiffimmut tunngasunik ingerlatsiviinit
aallaaveqartariaqarpoq, taakkumi sunngiffimmi sammisassaqartitsineq pillugu
peqqussummik aqutsisuummata.
Organistit
ilinniaqqitsitaasarnerat eqqarsaatigalugu tamatuma ataasiakkaat soqutigisaat
pisinnaasaallu illoqarfinni organistinik atorfinitsitsiviusimasuni
soqutiginninnermut sanilliullugu piareersarneqartarnissaa
pissussissamisuussaaq.
Ilaat
eqqarsaatigalugit ilageeqarnerup iluani ilinniaqqitsitaanissaat aamma
pissusissamisuussaaq, allallu eqqarsaatigalugit nipilersornerup
nipilersornermillu ilinniartitsinerup iluani immikkut
piginnaanngorsarneqarnissaat pissusissamisoortussaalluni. Taakku ikippallaarput
ataatsimoortumik ilinniartitaanermik pilersitsinermut tunngaviginiassallugit.
Tassa
ukioq manna januarimi nunarput tamakkerlugu organistitut ilinniarsimasut qulit
missaanniipput, marluk ilinniarnerminnik ingerlatsipput aammalu
arfinillit-arfineq marluk ilinniarnissamut akuerineqartussaallutik.
Kultureqarnermut,
Ilinniartitaanermut Ilageeqarnermullu Pisortaqarfimmi ilageeqarnermut hĝjskolip
pilersinniarneqarnera massakkut suliarineqarpoq, tassanilu ajoqit
ilageeqarnermilu sulisut tassa sulisut
allat, ilinniarteqqinneqartarnerat
ingerlanneqassasoq eqqarsaatigineqarpoq. Tamatumunnga atatillugu organistit
ilageeqarnermi sulinerat eqqarsaatigalugu ilinniartitseqqittarnissaq aamma
eqqarsaatigineqarpoq.
Taavalu
aappaannut:
Assigiinngitsunut
arlalinnut atatillugu nuna tamakkerlugu nipilersornermik ilinniarfimmik
pilersitsinissamik eqqartuisoqartarsimavoq. Inatsisartunut ilaasortap Ruth
Heilmannip uani Naalakkersuisut Siulittaasuata ukiortaami oqaasii assersuutitut
taavai.
Kisianni
nipilersornermik ilinniarfimmik isumassarsiaq taanna marlunnik tunngaveqarpoq:
Siulleq
tassa meeqqanik atuartitsineq, ataasiakkaarluni nipilersoqatigiinnermilu
nipilersuutinik atuisinnaaneq, erinarsorneq erinarsoqatigiittullu erinarsorneq
eqqarsaatigalugit.
Meeqqat
nipilersornermik atuartinneqarnerat ataatsimut isigalugu nuna tamakkerlugu
immaqa siunertaqaraluarpoq, nunalu tamakkerlugu ataatsimoortumik
periuseqarnikkut siuarsarneqarsinnaasussaalluni; kisianni najukkani
ataasiakkaani suliuniutinit pissusissamisoortumik aallaaveqarluni, najukkanilu
ataasiakkaani ingerlanneqarsinnaassalluni. Taamaattumik meeqqanik nipilersornermik
atuartitsineq kommunini ulluunerani paaqqinniffinni, meeqqat atuarfianni
sunngiffimmilu atuartitsinermi ingerlatanut attuumassuteqarluinnarpoq.
Meeqqat
nipilersornermik atuartitaanerat 1998-imi ukiakkut Nuummi
ataatsimeersuaatigineqartussaavoq Savalimmiunit, Islandimit nunatsinniillu
peqataaffigineqartumik. Nunat pingasut taakku akornanni kulturikkut suleqatigiinnissamik
ukiuni pingasuni atuuttussamik isumaqatigiissuteqarsimanermut ilaatillugu.
Nutaatut oqaatigineqarsinnaavoq akissuteqaammi avannaamioqatigiit Nuummi
nipilersorneq pillugu ataatsimeersuarnissaat maannakkut ukioq manna septemberimi
pisussatut pilersaarusiorneqarmat.
Ataatsimeersuarnermi
peqataasut nipilersornermik atuartitseriaaseq nunatsinni pissutsinut
naleqquttoq qanoq iliorluni nunatsinni pilersinneqarsinnaanersoq
oqaluuserissavaat isumaqatigiissutigalugulu. Ataatsimeersuarnermi angusaasut
Kultureqarnermut Ilinniartitaanermut Ilageeqarnermullu Pisortaqarfimmit
suliarineqassapput, tamatumalu kingorna siunnersuut naammassillugu
suliarineqarsimasoq nunatsinni naalakkersuinikkut oqartussanut saqqummiunneqannginnerani
susassaqartunut attuumassuteqarfigineqartunut tusarniaassutigineqassalluni.
Nuna
tamakkerlugu nipilersornermik ilinniarfeqalernissamut tunngaviusup aappaa
tassaavoq inuusuttunik inersimasunilluunniit ilinniartitsineq, assersuutigalugu
Ilinniarnertuunngorniarfimmi, Perorsaanermik Ilinniarfimmi
ilinniartitsisunngorniarnermilu nipilersornermik ilinniartitsinerup
nangissutaatut, kiisalu siuliani taaneqareersup organistitut
ilinniarnertitaanermi.
Siunnersuummi
periuseq erseqqissoq innersuussutigineqarpoq, tassani nipilersornermik ilinniarfik
STI-p ataani aallarnisarneqartassalluni.
STI-p
imarisai - tassaasut suliassanut inuussutissarsiutinullu sammiveqartut -
nipilersornermik atuarfimmut imaluunniit nipilersornermik ilinniartitaanermut
aallaavigissallugit naleqqutinngillat.
STI-p
atuarfiisa, najukkani ataasiakkaani inuussutissarsiutinut atuarfiit, tassa
atuarfiisa illutaat najukkani ataasiakkaani nipilersornermik atuartitsinermi
ilumut atorneqarsinnaanerat assigiin-ngitsunik arlalinnik apeqqutitaqarpoq:
Siullermik:
Init
taakku kommunit pigisarai, tassa imaappoq pilersitsineq ingerlatsinerlu
kommunip isumagisassarai. Tamanna pillugu aalajangiineq najukkani
ataasiakkaani pisartussaassaaq.
Aappassaanik:
STI-mi
ilinniartitaanerit ingerlanneqarnerat pingaarnerpaatillugu init taakku
pilersinneqarsimapput, pikkorissartitsinerillu inuussutissarsiornermut
sammiveqartut najukkani arlalinni ingerlanneqartartut ingerlanneqartarnissaat
tulliutillugu siunertaralugu. Taamaattumik ingerlatat allat, assersuutigalugu
nipilersornermik ilinniartitsineq, taamaallaat ingerlanneqarsinnaallutik taakku
inuussutissarsiornermik ilinniartitsinerit pikkorissartitsinerillu
ingerlanneqarnerannut akornusiissanngippata. Taamaalillutik atuarfiit taakku
taamaallaat ikittuinnaat ukiup atuartitsiviusup nalinginnaasup
killissarititaasa iluanni ingerlatanut ininik taama pisariaqartitsiviutigisunik
inissaqartitsisinnaassapput.
Pingajussaannik:
Aammataaq
nipilersornermik atuartitsinerup immini imarisaa inuussutissarsiutinik ilinniartitaanerit
suliatigut ingerlatsiviunerannut ima ungasitsigissapput, allaat STI-t inaataat
siunertanut tassunga naleqqutinnginnerusutut oqaatigisariaqarlutik,
nalunaaqqutat akunnerisalu meeqqanik atuartitsiviusut avataanni
nipilersornermik atuartitsineq ingerlanneqarsinnaappat meeqqat atuarfiini init
erinarsortitsiviusartut atussallugit pitsaanerussagaluarlutik.
Nipilersornermik
atuartitsineq makku eqqarsaatigalugit inini namminerisamini pitsaanerusunik
angusaqarfiusinnaalluassaaq:
Siullermik:
Nipilersuutit
assigiinngitsorpassuit inissinneqarnissaat toqqortarineqarnissaallu.
Aappassaannik:
Pisut
ilaanni nipilersornermik ingerlatsinermi nipiliorneq atuartitsinernut allanut
akornusersuutaasartussaanera.
Tassunga
taarsiullugu nuna tamakkerlugu nipilersornermik ilinniarfiup qitiusumik
inissisimasup Oqaatsinik Pikkorissarfittut iluseqartup pilersinneqarnissaa
eqqarsaatigineqarsinnaavoq, tassanilu ingerlatassat ataasiakaat nuna
tamakkerlugu nipilersornermik ilinniarfimmit neqeroorutigineqarsinnaallutilluunniit inniminnerneqarsinnaassapput,
najukkani ataasiakkaani nunalluunniit immikkoortuini ingerlatassatut.
Ilinniarfiup taamaattup pitsaaqutigisussaavaa maani immikkut ilisimasalinnut
nunanilu allani immikkut ilisimasalinnut attaveqaateqarnerup sumiiffimmut
ataasiinnarmut katersorneqarsinnaanera.
Nipilersornermut
hĝjskolimik pilersitsinissaq pillugu hĝjskolit pioreersut
suleqatigineqarnissaat siusinnerusukkut eqqartorneqartareerpoq.
Aammattaaq
nipilersornermik ilinniartitsinermut atatillugu nipilersornermik
atuartitsinerup nipilersornermillu atuartitsinikkut perorsaanikkut
ingerlatsinerup ataatsimoortillugit ingerlanneqarnissaat
pissusissamisoortussaavoq, taamaalilluni ataasiakkaat nipilersornermik
atuagarsorlutik ingerlatsinikkut, nipilersuutinik atuinikkut
nipilersorsinnaanikkullu aamma nipilersorneq pillugu atuagarsornermik,
nipilersuutinik atuinermik erinarsornermillu pikkorissaasoqarsinnaallunilu
atuisoqarsinnaalersillugu. Taamatut ataqatigiissitsineq Ilinniarfissuup
Nuummilu Ilinniarnertuunngorniarfiup qanimut suleqatigiinnerisigut ilaatigut
pilersinneqarsinnaavoq.
Ilinniarnertuunngorniarfinni
nipilersornermik atuartitsineq nammineq qinerlugu atuartitsissutitut
ingerlanneqarsinnaavoq, taamaattumillu nipilersornermik atuartitsinermik
ilinniagaqarsimasunik peqartariaqarluni. Ilinniarfissuarmi nipilersornermik
atuartitsineq atuartitsissutitut pinngitsoorani ingerlanneqartussatut, nammineq
qinerneqartussatut atuartitsissutitullu pingaarnertut soraarummeerutigisassamik
ingerlanneqartussatut neqeroorutigineqarsinnaavoq, ilinniartut naammattumik
amerlassusillit ilinniartitsissummik taassuminnga ingerlatassatut toqqaappata.
Ilinniarfinnut
taakkununnga marlunnut atasumik nammineq ingerlatsisumik pilersitsineq
ingerlasinnaallunilu nipilersornermik ilinniartitsinermik nukittorsaasinnaavoq,
tamatumunngalu peqatigitillugu najukkani ataasiakkaani qitiusumilu
ilinniartitseqqittarnerit annertunerusumillu ilinniartitsinerit
ingerlanneqarsinnaassallutik.
Periutsit
arlaat sorleq toqqaraluaraanniluunniit nipilersuutinik pisinermut ininullu
atugassanut annertunik aningaasalersuisoqartariaqassaaq, siunertarpiaasoq
tassaassappat pisinnaasat assigiinngitsut tamaasa eqqarsaatigalugit
nipilersornermik atuartitsinerup pitsaassuseqarnissaata qulakkeerneqarnissaa.
Ilinniaqqinnissamut
periarfissat soraarummeeruteqarnissamut periarfissallit pilersinneqarnissaat:
Tassa
Ilinniarfissuarmut Ilinniarnertuunngorniarfimmullu qanimut atasumik
nipilersornermut atuarfimmut atatillugu ilinniaqqinnissamut periarfissat
soraarummeernissamut periarfissallit pilersikkiartuaarneqarsinnaassapput.
Taamaattorli
ilinniaqqinnissamut periarfissat ataasiakkaarluni aaqqiissuteqarnertut
iluseqassasut eqqarsaatigineqarsinnaavoq, Danmarkimi nunaniluunniit allani nipilersornermik
ilinniarfiit ilinniarfissuillu immikkut ittut ilanngullugit atorneqarnissaannik
periarfissallit.
Nipilersornerup
iluanni ilinniartitaanernik soraarummeernissamut periarfissalinnik pitsaasunik
pilersitsinissamut ilinniartussat ikippallaarput.
Aamma
qitiusumik nipilersornermik ilinniarfiup ilinniagaqartut ataasiakkaat
nipilersornermik ilinniartitaanernut annertunerusunut ingerlariaqqinnissaanni
ilitsersortarsinnaavai, najukkanilu ataasiakkaani ingerlatanut atatillugu nipilersornermik
atuartitsisunut pitsaasumik ilitsersuinermi peqataasinnaalluni.
Kisianni
ukiamut ataasimeersuarnermi isumassarsianik pissarsinissani Pisortaqarfiup
naatsorsuutigimmagu qitiusumik nipilersornermik ilinniarfimmik
pilersitsisinnaanermik isuma ataatsimeersuarnermi angusaasut
pissarsiarineqareersinnagit ingerlateqqinneqassanngikkallarpoq.
Kristine
Raahauge, Siumup oqaaseqartua:
Inatsartunut
ilaasortap Ruth Heilmannip nipilersornermik ilinniarfimmik
pilersistsisoqarnissaanik siunnersuutaa Siumup pingaartillugu
oqallisigisimavaa.
Nipilersornermut
ilinniarfimmik pilersitsisoqarnissaa tunngaviatigut taperserlugu Siumumiit ima
oqaaseqarfiginiarparput:
1996-imi
ukiakkut Inatsisartut Kultooreqanermut Ilinniartitaanermullu
Ataatsimiititaliaata isumaliutissiissutaani eqqartuineq Inatsisartuni
ilaasortap Jonathan Motzfeldtip siunnersuutaa aamma taamatut siunertalimmik
qulequtalik eqqartoqqissimavarput.
Taamanikkut
Siumup ataatsimiititaliap isumalitissiissutaa tamakkiisumik akuersaarpaa, isumaliutissiissummi
pineqarmat Naalakkersuisunut inassuteqaat, Kalaallit Nunaanni nipilersornermik
ilinniarfimmik pilersitsinissamut periarfissat misissorneqassasut,
tamatumanissaaq inatsisitigut tunngavissaqarnersoq misissuiffigineqassasortaaq.
Taamaattumik
Siumumiit assut ajuusaarutigaarput Naalakkersuisut qitiusumik nipilersornermik
ilinniarfimmik pilersitsisinnaanermik isuma aatsaat ukiamut
isummerfiginiarmassuk.
Siumup
nalunngilaa nuannaarutigalugulu nunatsinni peqatigiiffikkuutaarlutik
erinarsoqatigiittartut ullutsinni annertuumik ingerlatsisut,
tupinnanngitsumillu sulilluarnerisa malitsigisaanik ukiuni makkunani inuusuttut
meeqqallu aammattaaq ilaasalersut amerliartorlutillu. Aammalu nalunnginnatsigu
inuit amerlaqisunik ilaqartut nipilersuutinik atuinissaminnut assut
ilikkajasut, atuilluarsinnaannissaminullu ilinniarfissaminnut
periarfissaaleqiinnartunik.
Taamaattumik
Siumumiit Naalakkersuisunut inassutiginiarpagut nunatsinni nipilersornermik
ilinniarfimmik pilersitsinissaq siunertaralugu pimoorussamik
suliniuteqaqqullugit, aammalu sineriammi najugaqarfinni nipilersornikkut
ilinniarfeeqqanik pilersitsiortornissamut tunngavissat sulissutigeqqullugit,
ilaatigut kommunit suleqatigalugit atuarfeqarfinni, sunngiffimmi atuartitsisarnerit
periarfissarititaasa iluanni, soorlu massakkut kommunit arlariit taama
ingerlatsilereersimasut.
Nunatsinni
organistit soraarummeersimasut kommuninilu arlaqaqisuni sunngiffimmi atuartitsinermi
atorluarneqareersut Siumumi nalunngilavut, kisianni siunnersuuteqartup
saqqummiussaa paasilluarlugu, tassa organistit soraarummeersimasut ulloq
naallugu suliffeqarsinnaannerat pingaartillugu taakkartormagu.
Kommunit
Namminersornerullutik Oqartussallu Siumumiit kajumissaarusuppagutorganistitut soraarummeersimasut
siammisummik ilinniartitaaneq aqqutigalugu ilinniartitsisunngornissaannik
aqqutissiuuteqqullugit, taamaasillutik ulloq naallugu suliffeqalissagaluarput
organistillu ilinniarsimanertik meeqqat atuarfiannittaaq atorluarsinnaassallugu
ilinniartitsisissutinut faginut allanut aamma atuartitsisinnaalersillugit.
Naimanngitsoq
Petersen, Atassutip oqaaseqartua:
Inatsisartunut
ilaasortap Ruth Heilmann -ip siunnersuutaa aalajangiiffigisassaq pillugu Atassummiit soqutigalugu sammisimavarput.
Inatsisartuni siusinnersukkut inimi maani arlaleriarlugu
eqqartorneqartarsimavoq nunatsinni nipilersornermik ilinniarfeqalesinnaaneq
eqqarsaatigalugu.
Atassummiit
paasivarput suliassap ingerlanneqarsimaneranut tunngatillugu periarfissat allat
misissorneqarsimasut. Kommunit sunngiffimmut tunngasunut ingerlatsiviata ataani
sunngiffimmi sammisassaqartitsinermi nipilersornermik ilinniartitsineq
sunngiffimmi sammisassaqartitsinermi peqqussut tunngavigalugu
periarfissaqartoq Atassummiit ilisimavarput. Tamatumalu organistitt,
oqaluffinni pattattartut pikkorissut atorluarneqarsinnaasoraavut.
Taamatut
Atassummiit oqaaseqarluta Kultureqarnemi, Ilinniartitaanermut Ilageeqarnermullu
Naalakkersuisup saqqummiussaa nipilersornermi ilinniarfimmik
pilersitsisinnaaneq pillugu nassuiaataa tusaatissatut tiguarput.
Manasse
Berthelsen, Inuit Ataqatigiit oqaaseqartuat:
Uani
siunnersuutigineqartoq siullermik 1996-mi Jonathan Motzfeldt -ip
siunnersuutigereersimavaa, Inatsisartunillu tamarmiusunik taperserneqarluni.
Siunnersuuteqartup aamma ukioq taannarpiaq siunnersuutigisimavaa
allakkatigullu akineqarluni. Maannakkut siunnersuutigeqqinnerani ukioq
allakkatigut akissutaasimasoq naalakkersuisut siunnersuummut akissutigalugu.
Inuit Ataqatigiinniit tunngaviusumik nipilersornermik ilinniarfeqalernissaa
tapersersorparput
Jonathan
Motzfeldt -llu siunnersuutigimmagu tamakkiisumik tapersersimallugu maannakkullu
amma taamaalioqqissaagut. Jonathan Motzfeldt -ip siunnersuuteqarnerani
Savalimmiut nipilersornermik ilinniartitsinerat najoqqutaralugu
suliniartoqarnikuuvoq, tamannalu suliniut sumut killissimanersoq
apeqquteqaatigissavarput.
Taamatut
oqareerluta uagut Inatsisartunut ilaasortat siunnersuuteqartarnigut
qiviaqqilaassavavut. Nipilersornermik ilinniarfissaq nalunngilarput
tunngaviusumik aalajangiiffigineqareersoq anguniarneqassasorlu.
Anguniarneqareersut naluneqanngitsut siunnersuutigineqaqattaartarput
aperisariaqarporlu Inatsisartut sulineranni eqqartorneqareersut
aallaqqaataaniit eqqartoqqinneqartarnissaat apeqqusertariaqartoq. Aap,
kissaateqaqaagut taamaammat Inuit Ataqatigiinniit isumaqarpugut
piffissanngortoq kissaatigisarpassuatta tulleriiaarnissaannut piffissanngortoq.
Ilami kissaatigisagut amerlaqaat piumasartakkavut, soorlu nunatsinni
efterskole, timersornermut tunngasunut hĝjskole, nipilersornermut ilinniarfik,
GU timersuutigaluni ingerlatsiffiusinnaasoq, sanaluttartut ilinniarfiat,
mersornermik ammerinermik ilinniarfik, nunatta isiginnaartitsisartui
ilinniarfiutigisoq allallu suli maannakkut amigaatigaavut.
Taamaattumik
Inuit Ataqatigiinniit Kulturikkut ersarissumik politikkeqartoqarnissaa
ujartussavarput, tassa pilersaarusiorluakkat tulleriiaarisoqarnissaa
akissaqassuserput najoqqutaralugu.
Taama
Inuit Ataqatigiinniit taamatut oqaaseqarluta naalakkersuisut ukioq allakkatigut
akissutigimasaat maannakkullu akissutigeqqitaa tusaatissatut tiguarput
ukiamullu meeqqat nipilersornermik atuartitaanerat pillugu
ataatsimeersuartoqarnissaa neriuuteqarfigilluarlugu.
Bjarne
Kreutzmann, Akulliit Partiaat:
Siunnersuummut
soqutiginartumut, pissutsinullu akissuteqaammi eqqartorneqartunut oqaaseqarnissaq
ussernartorsiornaraluartoq, kisianni pisortaqarfiup siunnersuutigaa siunnersuut
ataatsimeersuareernissamut kinguartinneqassasoq, siunnersuullu
ataatsimeersuarneq pereersinnagu sukumiisumik oqallisigineqarnissaa
kissaatiginartinneqanngilaq, tamatumunngalu isumaqataavunga.
Anthon
Frederiksen, Kattusseqatigiit:
Inatsisartunut
Ilaasortap Ruth Heilmann-ip siunnersuutaa paasilluarlugu Kattusseqatigiinniit
tamakkiisumik taperserpara.
Naalakkersuisup
akissuteqaammini ilaatigut ataatsimoortumik ilinniartitaanermik pilersitsinissamut
tunngavissat ikippallaarnerarpai. Tamatumani Kattuseqatigiinniit isumaqataanngilanga,
tassami Ilinniarfissuaq qiviaannaraanni allaat ukiuni kingullerni ilaatigut
isornartorsiorneqartarpoq, ilinniartitsisunngorniarlutik naammassisartut
ilaalluunniit pattannermut piginnaassuseqarneq ajormata.
Taamaattumik
nipilersornermik ilinniarfimmik pilersitsisoqarsinnaanera, immaqa
ilinniarfissuamut atasumik, ingerlanneqarpat tulluassagaluarpoq. Soorunami
kommuneqarfinni STI-mi ilinniarfiit ilanngullugit eqqarsaatigineqarsinnaapput,
minnerunngitsumik nunaqarfinni ilaatigut ilagiit pattattusaaleqisarnerat aamma
eqqarsaatigalugu.
Ilanngullugu
oqaatigisariaqarpoq meeqqat atuarfianni ilinniarfinnilu nipilersornerup,
minnerunngitsumillu erinarsornerup, ukiunut siuliinut naleqqiullugu
aallunneqarnerata annikilliartorsimanera iluarinanngimmat, inuiaqatigiit
tarnimikkut peqqussuunissaannut nukittoqutitut ilagilluagaat taamaalillugu
aamma annikillisikkiartorneqarmat.
Taamaattumik
Naalakkersuisut akissutaat taassuma tungaatigut naammaginngilara, kisiannili
ukiamut ataatsimeersuarnissami anguniarumaagassat ilaatigut aalaavigalugit
isummap qaqeqqinneqarnissaa Kattusseqatigiinniit kaammattuutigissavara.
Ruth
Heilmann, siunnersuuteqartoq, Siumut:
Qujavunga
aamma Naalakkersuisut akissuteqarneranut takisuumut aammalu imartuumut kiisalu
aamma partiit taamatut tapersersuinerannut, tassami siunnersuut siullermik
allakkatigut akineqaannarnikuusoq maannakkut aalajangiiffigisassatut
saqqummiunneqarpoq. Immaqa oqartoqarsinnaavoq qujanartumik
saqqummiunneqaqqippoq, tassami 1996-imi maannamut killiffigisaq
paaserusunnartunik amerlasuunik ilaqarmat suliap sumorpiaq killissimaneranut
aammalu qaqugu pilersinneqarnissaannut, taamatut nipilersornermut
ilinniarfimmik nunatsinni pilersitsisoqarnissaa tamatta partiini aamma
Inatsisartuni pingaartikkatsigu, minnerunngitsumillu Naalakkersuisut akornanni.
Ukiamut
ataatsimeersuarnissaq qaqugorpiaq ullulerneqarsimanersoq apeqqutigerussussavara
Naalakkersuisumut, tassami kissaatiginarmat aamma ukiamut aningaasaqarnermut
inatsimmi ilanngunneqarnissaa, ilaatigut aamma uani Naalakkersuisup
nammineerluni aamma oqaatigisaani assigiinngitsutigut atuarfeqarfinni aammalu
ininut nipilersornermik annertuumik sammisaqassagutta init
atorfissaqartikkatigit, aammalu aalajangersimasumik periuseqarluni
ilinniartitaanermut aamma atuarfinni ingerlanneqarnissaa kiisalu immaqa aamma
periarfissaqarluni STI-ni ingerlanneqarsinnaanera.
Akulliit
oqarneratuullu oqassaanga, tamatta nipilersornermik piginnaaneqanngilavut,
kisianni inuit arlaqaqaat nipilersornermik piginnaaneqartut, kisiannilu immaqa
atuagarsornikkut piginnaanerat killeqartarluni. Taamaattumik tamakkiisumik
periarfissaqartitaanissaat anguneqassappat uani Ilinniarfissuaq GU-llu
aqqusaaqqaanngikkaluarlugit ilinniarfinni anginerni taamatut piginnaassusertik
nammineq atorlugu isersinnaanissaannut periarfissat, isumaqarpunga taakku aamma
ilanngullugit misissorneqartariaqartut.
Soorlu
aamma oqartoqarpoq ilagiit akornanni pisariaqartitsivugut oqaluffinni
pattattussaaleqineq anigorniarsaraarput, tassani ilaatigut oqaluffinguanut
iserluni arlalinni naalagiarluni nipaannarmik aamma tussiarneq
ajunngikkaluaqisoq, kisianni assorujussuaq amigaatiginartarpoq pattattoqartannginnera.
Tassami piginnaasaqartoqaraluarluni kisianni akilersorneqarnermikkut naammaginanngitsumik
iliorfigineqaramik, kajumissusaat tassuunakkut annertujunnaarsimammat.
Arlaqarput
erinarsoqatigiit sungiusaasussaaleqisarnerat, meeqqat piginnaaneqartut
annertunerusumik aamma periarfissaqartinneqanngillat ilinniarnissaminnut,
immaqa angajoqqaavi nammineq aamma tassuunakkut piginnaaneqanngikkaluartarput.
Kisianni meeqqat nammineq piginnaasatik atorusuttaraluarpaat atuarfillu
aqqutigalugu. Tassani amma atuarfiup siunertaanut naleqquttumik immaqa
piviusunngortitsinngilavut tassani. Taamaattumik tamakku tamaasa
eqqarsaatigalugit maannakkut iliuuseqalerniarneq iluarusimaarpara, kisiannilu
aalajangivissumik oqartoqanngimmat aasit ukiut marluk qaangiuteqqippata
siunnersuutigeqqissaneripput, taanna assut apeqquserusuppara. Taamaattumik
maannakkut oqartariaqarpugut aalajangiiffigisassanngorlugu siunnersuutigineqarmat
oqarsinnaalluta ukioq neriuppunga 2000 nallertinnagu piviusunngortinneqarumaartoq.
Tassani
eqqaaneqartut arlaqarput, aamma inuusuttut nipilersortartut
sungiusarfissaaleqisarnerat sungiusaasussaaleqisarnerallu. Aamma sunngiffimmi
nipilersornermik sammisaqartitsinermi nipilersuutinik amigaateqarneq kommunit
akissaqassusertik kajumissusertillu naapertorlugu iliuuseqartarput soorunami.
Kisianni iliuuserineqartartut inuusuttunit naammagineqarneq ajorput, tamatta
taanna nalunngilalarput. Aammalu STI uani taakkarsorneranut peqqutaavoq,
ilaatigut STI-qarfinni oqaloqateqalaareernikuungama tassanilu
periarfissaqarnerarlugu arlallit oqaatigalugu. Tamakku aamma periarfissat
ammatinneqartariaqarput, naak immaqa tamakkiisuunngikkaluamik
periarfissaqartoqaraluartoq, kisianni periarfissaqartoqarpoq, piumassuseqarunik
atorneqarsinnaasunik. Aamma nammineq ilinniakkami fagit ingerlatami saniatigut
nipilersorneq aamma tassani ingerlanneqarsinnaasariaqartutut aamma uagut
isumaqarfigivarput.
Konrad
Steenholdt; Kultureqarnermut, Ilinniartitaanermut Ilageeqarnermullu
Naalakkersuisoq:
Aallaqqaasiullugu
oqaatigilaarlara soqutigineqarsinnaammat ullumikkorpiaq inuusuttortavut
eqqarsaatigalugit, nipilersornermik tunngaveqarlutik ilinniarnerminnik
ingerlatsisut amerlassusiat oqaatigilaarusuppara.
Tassa
ullumimut ataaseq Musikkonservatoriamik taaneqartartumut anngussimavoq
Aalborgimi.
Taavalu
taassuma saniatigut Aalborgimi Universitetimi sisamat nipilersornermut
tunngasunik sammisaqarput. Taavalu aamma marluk taamatut angusaqarnissaminnut
piareersarlutik ingerlapput, ataaserlu gymnasiamut nipilersornermik
ingerlataqartumut aamma immikkut akuerineqarluni ullumikkut atuarpoq.
Ukiormanna marluk qinnuteqarsimapput, ataaseq Aarhusimi Musikkonservatoriamut
iserniarsaraluni, ataaserlu aamma nipilersornermut immikkut ilisimatusartutuut
aamma qinnuteqarsimalluni. Tassa maannamut inuit qulit, inuusuttut qulit
ilinniarnerminnik ingerlatsipput. Una aamma tassunga tunngatillugu
erseqqissumik oqaatigilaarlara, nunatsinni inuusuttut sumik arlaannik
nipilersornikkut soqutigisaqaraangata, ilinniartutuulli allatuut aningaasat
tungaasigut ilinniarnerannut tunngasutigut ilikorserneqartarput. Tassa imaappoq
allatorluinnaq periarfissaqarpoq tamakkuninnga ingerlatsiniarluni
soqutigisaqaraanni. Tassa taanna paatsooqqunngeqaanga tassani imaappoq
nipilersonermik ingerlataqarniartunut taamannak ilinniarminni ingerlataqarniartunut
akimmisaarutissaasunik pilersitsiortunngilavut, kisianni sapinngisamik
ikiorlugit ingerlanniartuarpavut.
Arlallit
taavaat ukiamut ataatsimeersuartoqarnissaa. Ukiaq aamma taatsiareerpara
Savalimmiut, Islandimiut nunarpullu ukiuni pingasuni suleqatigiinniarlutik
kulturikkut atsioqatigiissimapput. Ukiorlu manna atorneqartussaavoq
nipilersornerup ukiuanik taaneqartutuut. Taannalu Nuummi maani
ingerlanneqartussaavoq, tassani paaserusukkatsigit una, aap Islandimiut
nipilersortartorsuarnik symfoniorkesterinik peqarput, kisianni Savalimmiut
soqanngillat soormitaava? Tassani ukiamut ataatsimeersuarnissami tassani
katersuunnermi oqaluttuarineqassapput Islandimiut qanoq ilillutik
angujartuaarsimagaat ullumi inissisimanertik. Taavalu aamma Savalimmiuni ullumikkut,
tassa uatsinniit ikinnerusunik innuttaqartuni tassa 40 - 45 000 akornanni
inuttaqartuni, nipilersorneq qanoq inissisimanersoq aamma uagutsinnut
oqaluttuarissavaat. Pingaartumik taanna isigisimavarput nunatsinni
nipilersornermut tunngasunik siunnersuuteqartarnerit pissutigalugit,
paaserusussimagatsigit nunani allani qanoq aaqqissuisoqarsimanersut. Tassalu
taanna ukiamut pissaaq, imaanngilaq siunnersuuteqarnerit
tunngavigiinnarlugit,akuerineqareerpoq taassuma tungaata misissorlugu
pilersikkiartuaarneqarnissaa. Suliaq taanna ingerlapparput, aamma
taamaatinnavianngilarput pilersinneqareernissaata tungaanut.
Unali
naggasiullugu oqaatigilara, Inuit Ataqatigiit oqaluttuata erseqqissarmagu uani,
pisariaqalerpoq tulleriaarinissaq. Suut pingaarnerutillugit
aningaasalersorneqarnissaat, tassaavoq Inatsisartut aalajangingassaat
Naalakkersuisut siunnersuuteqarneratigut. Uani taagukkat erseqqilluinnartumik
Mannase Berthelsen-ip taammagit taanna qujassutigissavara.
Efterskoleqarnissaanut aalajangeereerpugut, nasuiaateqarfigigakku taanna
oqaatigaara efterskoliliorata aningaasat atorusunnerigivut inuusuttortatta
ullumikkut Danmarkimut pikkorissariarlutik angalasarnerannut, aningaasat
tassunga atorpavut maannakkut. Kisianni aamma oqarpunga tassani,
efterskolitaarnissaq taamaatinneqanngilaq, kisianni aningaasartassaasa
nassaarinissaat tullinnguupparput.
Taassuma
saniatigut tassa timersornermut tunngasumik hĝjskoli, aamma taanna
pingaartinneqarpoq aamma ingerlapparput misissorlugu qanoq iliorlugu
ingerlanneqarsinnaanersoq.
Nipilersornermik
Ilinniarfik ullumi oqallisingarput, GU-mi timersuutigalugu ingerlatsiffiusinnaasoq
misissorpagut aamma taakkua. Sanaluttartut, mersornermik, ammerinermik
ilinniarfiit, ilumoorluinnarput taakku. Isumaqarpunga qanoq pingaartitsineq
iluamik nalilersussangutsigu pisariaqalersoq tulleriiaarinissarput. Suna
inuiaqatigiinnut massakkut pilersissallugu pitsaanerua? Taanna
nalilersugassanut ilaasariaqassaaq.
Aamma
oqaluttut arlallit una tikkuatsiagaat isumaqatigilluinnangara unaavoq,
uangattaaq assut nuannaarutigaara sinerissami erinarsornikkut allatigullu
ukiuni kingullerni eqeeriartuaarneq, aammalu meeqqat ilaatigut tunngavigalugit
ingerlatsinerit. Maannakkumut aningaasaqarnermut inatsit qupperussiuk tassani
takusinnaavasi sinerissami erinersornermik ingerlataqartunut kattuffiannut 250
000-nik aningaasaliisarpugut. Imaaratarsinnaavoq taakku naammanngitsut,
qinnuteqartut amerlasaqaat. Ilaatigut qinnuteqaatit ullumi takkuttalerput
Israelip ukiut naalagaaffiunermini 50-inngortorsiornerani immikkut
qaaqqusaasimallutik aningaasanik tapiiffigeqqullutik qinnuteqartut.
Assigiinngitsorparujorujussuarnik qinnuteqarnerik takkuttarput erinarsorneq
eqqarsaatigalutigu. Taamaattumik tamakkua eqiigaffigalugit malinnaaffigaavut, pisinnaasatsinnillu
tapersersorniartarlutigit aningaasat tungaasigut. Taamaattumik ukiumi tullermi
aningaasanik inatsisissaq pilerpat, neriuutigaara aamma partiit tamakkua
isiginiarlugit amerlassutissanik qinnuteqassagutta
tapersersorniallarumaaraatigut. Tamakkua pisariaqartunut ilaapput, tassami
malunnarpoq uani aamma nipilersornermik atuarfeqalernissaq tamarmik
siunniussimaaraat tapersersorlugulu.
Mianersuutigeqqulaassavara
uani ajoqeqarnermut, pattattoqarnermut palasissaaleqinermullu tunngatillugu
nassuiaateqarnitsinni annertuumik sammisimavarput organistit amingaataanerat.
Taannarpiarlu tunngavigalugu massakkut pilersaarutigaarput Ilinniarfissuarmi
pikaniittumik palasinngorniarnermut tunngatillugu atuarfiup ilusilersornerani,
taakkua aamma pattattuusinnaasut oqaluffinni periarfissaat
isiginiarneqassasut, sulissutigisarpullu aamma tassani maannakkut
ingerlatilereerparput.
Puigutsiagara
aamma oqaatigilaarlara Nuummi septemberimi ,imaluunniit immaqa siusinnerusukkut,
sapaatip akunnera naammatsillugu ataatsimoornissaq. Taanna nunat avannarliit
suleqatigalugit, tassanilu aningaasaateqarfiit aqqutigalugit
angingaasalersorneqartussaavoq. Tassa nunat avannarliit suleqatigiinnerisa
iluanni aningaasanik pissarsisimavugut, taamaattumillu immikut qinnutigisimanngilarput,
finanslov-imut ilanngullugu tassuunaqquullugu iluatsinneqarsinnaammat.
Taamatut
ataatsimut akissuteqarfigigakku oqaaseqartut tassa paasillugulu taanna
siusinnerusukkut siunniunneqartoq, uagutsinnut suliassatut tunniunneqartoq,
ilusilernissaalu tikillugu piviusunngornissaata tungaanut soorunami
pisortaqarfinninngaanniit suleqataassaavut. Kisiannili una
ilimasaarutigeriissavara, pingaarnerpaanik tulleriiaarineq uani
oqalliseqqinnissami qanillingaluttuinnarparput. Ataatsimiinnerillu arlaanni
qularnanngilluinnarpoq piumasaqarfigineqarumaartut suut arlaat siulliullugit
aningaasalersorneqassanersoq.
Tassa
Siumup oqaaseqartuaninngaanniit kissaatigineqartoq neriorsuutigisimasarput
taanna assigiinngitsut misissorneqarnissaat pimoorullugu ingerlapparput,
ilaatigullu taannarpiaq tunngaviuvoq nunat taakkua pingasut Islandi,
Savalimmiut Kalaallillu Nunaat isumaqatiginniuteqalermata, taanna ilaatigut
aalajangersimasumik ullumimut ikkunnissaa kissaatigisimavarput, taassumalu
piviusunngornera assut nuannaarutigaarput, ingerlateqqissaqqaarparput.
Tassanilu soorlu neriorsuutigereeripput, nipilersornermut ilinniarfimmik
pilersitsinissamut, kikkulluunniit attuumassuteqartut tamaasa ukiamut
ataatsimeereernerup kingornatigut ilisimatitsissutinik tuniumaarpavut,
taamatullu aamma ippoq inatsisartut soorunami.
Qujavunga
partiit oqaluttuinut.
Otto
Steenholdt, Atassut, partiit oqaaseqartuisa avataasigut
oqaaseqartoq:
Tassami
nipilersornermik ilinniarfittaarlusilu suut tamaasa pissagussigit pilluareeritsi,
pilluareerikuttoorniaritsi.Aamma makkua oqaatsit aninneqartut allaat
sinerissami najugaqarfinni nipiersornikkut ilinniarfiit, organistit ulloq
tamaaviat pattarusaartussat. Tassami eqqarsaatersortoqarsinnaavoq taamatut.
Nipilersortarfeerartaarnialerpusi, ammeriveeraateqarpusi, Katuaaraateqarpusi,
timersortarfeeraateqarpusi, taamaattuaqqat taamaattuaqqat tassa
ingerlaannassapput, tulleriaarinermi ajussanngilaq.
Ulluni
ukiuni makkunani aatsaat taamak kalaallit nipilersortui amerlatigilerput.
Sukkut tusassavagut cd-liortut, ullut tamaasa cd-t nutaat tusarpavut, ilaat
tusarnerluinnassapput, ilarsuili paatsiveqanngilluinnassapput. Ullaakkut
iterutta radio ammanniassavarput akulikitsuunik qitinneq aallartereersimasoq,
taamaatsiartoq allarluinnaat amma takkuttaraat. Tamakkua ilinniarfinnik
ataatsimilluunniit pisariaqartitsinngillat, naamerluinnaq. Namminneq
ilikkareertarpaat. Allaat ippassaani tusarparput computer atorlugu inuk kisimi
nammineq kusanaavissumik nipilersorpaluttoq.
Siunnersuut
imannak nipeqartuuppat " ilagiinni organistit amigaatigaavut", uanga
piaarnerpaamik oqarfigissagaluarpassi "Qaa taakku tuaviunniarsigit
amerlanavianngillat, ilinniarferujussuarmik aamma
pilersortariaqanngilluinnarput". Uanga amigaatigisara aajuna, siullermik
oqaatigilaarlara, sianiitsorpallakkaluarnerlunga marluk immikkoortittarakkit?
Tamakkua nipilersuutikujuit cd-nngortut allallu tamaasa erinarsukujuttullu,
taakkua taasarpakka tassa ukioq ataaseq atasussat. Ukiup aappassaani tamaaviisa
puigortarpavut, Kalaallit Nunaanni kisimi taamaanngilat, nunani allani aamma
taamaapput tamakkua. Taakkua tassa nipilersuutaapput puigortagassat ukiut
marluk qaangiukkaangata.
Illuatungaaniittoruna
siunnersuuteqartup pisoralugu uanga nuannaajallakkaluarama nalunnginnakku
kisianni angusinnaanngisarput, nipilersuutinik toqujuitsunik Kalaallit Nunaanni
amigaateqarnerput aallaavigalugu qanoq ililluni
ilinniartitsisoqarsinnaanersoq? Qanortoruna inummik ataasiinnannguamilluunniit
maanga utertoqarli radiomilu atorfinilluni, kalaallillu uagut tamatta
oqaluttuulluta, makkua nipilersugassiarsuit uagut nammineq
nipilersortartutsinnik susinnaanngisavut, radiokkut oqaluttuaralugit kiap
sanasimanerai kikkut nipilersorneraat tulleerneraat allallu kalaallinut
oqaluttuaralugit.
Arnaq
ataaseq maanngaanniit aallalerpoq aasamut, tassa taassuma isumagisartangai
tamakkuninnga nuannersunik nipilersuutinik toqujuitsunik taasartakkatsinnik
tusartittarluta. Taanna aallarpat tusagassaaruttussaannguatsiarpugut. Tassa
amigaaterput, nipilersuutinik toqujuitsunik amigaateqarpallaarujussuaqaagut.
Makkua ullaat tamaasa qitigissanik aallartittarnerit qatsuttariaqalerpavut.
Taamaattunnguamilluunniit angusaqartuugutta ilinniartikkiartorlugu nunanut
allanut, tikillunilu oqaatsini atorlugit oqaluttuussinnaanngorpatigut, uumap
taalliarsuup sunaana pigaa, kikkunuku nipilersortut?
Ukiortaat
tamaasa kissaatigisarpara Wienimi nipilersortorsuit nytċrskoncertimik
taaneqartartut tusarnaassallugit, kisiannili taamaallutik aamma kipigaluaqaat
tassalu (..?qqinnata) . Allattuilluta pilluta pilluta pissarsiaraavut
tusarnaartalerlugillu. Ilorfaallassusia, tamakkuninnga amingaateqarnerput
ilungersuunnerulaarniartigu. Makkua guitarinik tigusillutik ingerlaartut,
taakkua ilinniarfinnik pisariaqartitsinngillat amerliartussaqqaarpullu.
Ruth
Heilmann, siunnersuuteqartoq, Siumut:
Naalakkersuisup
akissutaa imatut paasivara. Tassa ukiamut ataatsimeersuarneq pissasoq inatsisartut
ukiamut ataatsimiinnissaa sioqqullugu. Taamaattumik neriulluarpunga ukiamut
arlaatigut iliortoqarnissaanik, aammalu qujassutigalugu maannakkut
assigiinngitsuni ilinniarfinni nunani allani ilinniartut qulit tassani
naalakkersuisup oqaatigimmagit. Aamma arlalitsigut soqutiginninnertik
allaaseralugu maanga aamma agguaatsitissimavarput inatsisartunut. Tassa una
siunertaalugu, soorunami taamatut ilinniaraanni ilinniarfinni anginerni,
pingaartumik aamma nipilersornikkut, tassa siunertalimmik, aamma ilinniarneq ingerlanneqarsimassaaq una
siunertaralugu, naammassigunik aamma piginnaassusertik atorlugu aamma
atorusullugu aamma ilaatigut oqarlutik nunatsinni musikskoleqalerpat taava
aamma nammineq atorfissaqalerumaarnissartik tassani aamma kissaatigalugu.
Taamaattumik
isumaqarpunga maassakkut siunnerfiusoq pitsaasutut oqaatigisariaqartoq, tassa
neriullunga tapersersorneqassasoq, ukiamut uterfigeqqinnerani. Aamma uani
naalakkersuisup akissuteqarnermini maannakkut pilersitatsitut oqaatsinik
ilinniarfittut iluseqartumik immaqa ingerlanneqarsinnaanerata periarfissaqarnera
aamma oqaatigimmagu. Taamaattumik neriulluarnartoqarpoq. Tassami aamma
organist-it arlaqarput massakkut atuartissimasagut, imaluunniit
atuartinneqarsimasut soraarummeertinneqarsimasullu kisiannilu nalunngisattut
ilai fabrik-imi killalerlutik sulipput taanna soraarummeernertik
atorfeqarfigisinnaannginnamikku, taamaattumik tassuunakkut aamma
ilungersuuteqarput nammineq pikkoriffigisartik aamma atorluarusukkaluarlugu.
Isumaqarpungalu
tamakkua qaangiinnagassaanngitsut, asuli oqalukujulluni manna oqaluttarfik
atugassaanngimmat taakkua nipilersornerujussuarmik imaluunniit ingerlataqartut
massakkut amerlangaaramik pisariaqarunnaartoq allaat, uanga Ortu taama
paasigakku taamatut isumalimmik oqartoq.
Taamaattumik
qujasariaqarpugut massakkut erinarsoqatigiit Nipe-kkunnut assigisaannilu
allarpassuarnilu, nammineq piumassusertik atorlugu sungiusaasinnaammata, aamma
aqutsisinnaallutik.
Naatsorsuutigilluinnarpara nipilersornermik ilinniarfittaarutta
siuarsimassuserput tassuunakkut inerikkiartorteqqissagipput. Soorlu aamma
taanna Ortup maqaasisaa aamma tassani piviusunngortinneqarsinnaassammat,
erinniarsuit assigiinngitsut immaqa maannakkut ullutsinni
piginnaaneqarfigineqaraluarlutik immaqa soqutiginninneq periarfissaqannginnerlu
tassani peqqutaalluni annerusumik iliorfigineqanngitsut. Tamakkua isumaqarpunga
nipilersornermik annerusumik ilinniagaqarnikkut aamma tusarnaartitsisarnikkut
piginnaanitik meeqqat nammineq takutittalerpassuk, tassuunakkut aamma
siuarsimassuserput annertusarneqarumaartoq.
Uani
oqallinnermi pinngitsoorusunngilanga, tassa naalakkersuisut siulitaasuat 27.
Juli 1996 siunnersuuteqarsimagami imatut aamma nipilimmik: -
Issuaarusukkaluarpunga siulittaasup akuerissappanga.- Ilallugu. ANipilersornerup
erinarsornerup tussiaqattaarnerullu alianaatsup sorpassuit qamani pigisavut
uummartittarpai inuppassuit nipilersornermik erinarsornermillu piginnaaneqartut
imeruttutut ilinniarsinnaanerminnik noqqaapput aningaasanik atuinerpassuagut
nammineq inuttut inuiattullu nukittorsarnissatsinnut atussagutsigit,
taamaaliortussaavugullu nipilersornermik ilinniarfeqarnissat
periarfissittariaqarpavut.@ Siunnersuuteqarnermini aamma taamatut
kissaateqarnera matumuuna aamma taperseqalugu oqaatigaara.
Mannasse
Berthelsen, Inuit Ataqatigiit:
Siullermik
naalakkersuisumut Inuit Ataqatigiinninngaanniik tulleriiaarissaarnissap
tulluarnera qujassutigissavara. Aappaattullu Otto Steenholdt-ip toqujuitsuutini
maqaasilersimagunarlugit kalaallit nipilersortartut erinarsortartullu uumissorlugit
maanngaanniit oqalunnera ataatsimilluunniit akuerineqarsinnaanngitsoq. Ilami
erinniarsuit nunani toqujuitsut ullaakkut tusarusunnerugaluarlugit
akulikitsoortut kalaallit tusartarsimagamigit ullaakkut makinnerliorlunilu
immaqa.
Kisianni
ilumoorpoq nunatsinni nipilersorneq uummaarissorsuuvoq. Tassanilu kommune-ni
ataasiakkaat apeqqutaasorujussuupput illoqarfinni ataasiaakkaani
sungiusarfinnik tunniussisinnaanerat nipilersortartunut.
Tassaniipporlu
aamma aallarniivissaq pitsaanerpaaq tassa illoqarfikkaartumik sungiusarfinnik
pilersitsiortornikkut tassanngaanniillu aamma ingerlaqqilluni. Kisianni aamma
nipilersornermik ilinniarfimmik pilersitsiniarluta oqarutta aamma tassani
tulleriiaareqqissaaqqinnissaq pilertariaqassaaq. Suunukua ilinniutiginiarivut
nipilersortartutsinnut? Erinniarsuit sungiusaassutigissavavut? Imaluunniit
kalaallit uagut erinarsortaatitoqqavut puigulersimasavut taakkua
ilinniartitsissutigissavavut? Imalluunniit Ortup tusarniigisai
ilinniartitsissutigissavavut?
Tassaniippoq
aamma qanilleriarpat oqallinnissat annertuut aamma pisariaqarumaarput. Kisianni
itertittariaqarpoq Otto Steenholdt-ip kalaallit erinarsuutaannik imaluunniit
nipilersuutaannik ullaakkut itertinneqartarnermini uumissuinera taanna
akuersaarneqarsinnaanngilaq ataasinnguamilluunniit.
Otto Steenholdt, Atassut:
Oqaaseqartoq kingulleq
tupigilluinnarpara pisarnermisut oqartitsimmat, oqaatsimik ataatsimilluunniit
uumissuinermik ilalimmik maanngaanniit oqaaseqannginnama. Aammaana politikeriulluni
ilikkartariaqartoq taamatut illua=tungeq iluarisaannarmik pinaveersaassallugu. Uumissugaqanngilanga.
Kisianniuna aamma ataasiinnarmik pivallaaleraangatta inuit tamatta
qattussisartugut. Nerisaappat, tusaasaappat, silarluuppat,
taamaaginnaleraangatta oqartarpugut qatsuppara. Allannguamillu atagu
tusalaariarta. Pissusissamisoorluinnarpoq.
Uagut ilinniartitsisutut
ilinniarnitsinni aamma uatsinnut ilinniartitaapput oqaaseq taanna assuarisat. ALevende musik@, qanoq taanna
kalaallisuunngortissanerlugu nalugakku toqujuittumik taavara.
Immikkoortiterneri, erinarsuutit, nipilersorsinnaaneq, taavalu taakkua,
nunatsinni amigaatigilluinnarpavut. Assigiinngissuserput tassaniippoq immaqa
Mannarsip tamakkua imannarsuaq nuannarisarinngikkai. Kisianni
nunatsinniittoqarpoq tamakkuninnga nuannarisalinnik. Puigorpallaaqaagut
tamakkua.
Taamaattumik ilinniarfiliorniartut
ajunngilaq ilinniarfiliorlik, ataasiinnannguamilluunniit raatiukkulluunniit
oqaluttuarsinnaasumik tamakkuninngalu tusartilaartarluta. Tassa maqaasisara.
Kalaallit kultur-ikkut ineriartornerminni pinngitsooratik aamma ilinniagassaasa
ilagaat. Ukua, illit oqarnertut uumissunngilakka, oqaannarpunga
pikkoringaaramik ilinniaqqitsittariaqanngillalluunniit ullut tamajusaasa CD-t
nutaat tusarnivissunik naammaannartartunillu, taakkua tunioqqartuassavaatigut.
Ukiut marluk annerpaamik qaangiuppata, tammassapput.
Unali ilinniartitsissutissaq
toqujuitsumik taasagaat qangarsuarli uumajuartoq, nunatsinni amigaatigaarput
taanna. Uumissuinertut tunuliaqutaqarani kissaatitut oqaatigineqaannarpoq,
paasinarluarlunilu.
Ataatsimiinnermik aqutsisoq,
Inatsisartut Siulittaasoqarfianni ilaasortaq, Finn Karlsen:
Tassalu taamaasilluni immikkoortoq
31, Inatsisartuni ilaasortap Ruth Heilmann-ip siunnersuutaa aalajangiiffigisassaq
Nipilersornermik ilinniarfissamik siunnersuut oqaluuserineqarnera tamaanga
naavoq.
Oqaluuserisaq naammassivoq.