Oqaluuserisassani immikkoortoq 33 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Peter Ostermann, siunnersuuteqartoq, Atassut:
Meeqqanik, inuusuttunik inersimasunillu
sunngiffimmi ulluinnarnilu assigiinngitsuni sullissiniarnermi atugarisaasut
arlalitsigut ilungersunarsiartorput, ilaatigut naammaginarsinnaapput arlaqartunili
ilungersunarlutik. Illoqarfinni ilinniarfeqarfiusuni annertunerusumik
sullissinissaq assut pisariaqartinneqartoq malunnarpoq. Ilinniartorpassuit
amerlaqaat imerniartarfinnut ingerlaannartariaqartartut.
Meeqqanik inuusuttuaqqanillu
sumiginnagaasunik annertunerusumilluunniit sullittariaqartunik sullissinissaq
annertusiartorpoq. Kinguaassiutitigut meeqqanik atornerluinerit annertussusiat
qulaajarneqarpoq. Tunngavilersuutigineqarsinnaasullu amerlagaluaqisut taasakka
ersiutaapput meeqqanik, inuusuttuaqqanik inersimasunillu pimoorussamik
annertunerusumillu sullissinerunissarput pisariaqarluinnalersoq.
Isumaqarluinnarpunga allarluinnarmik
eqqarsarluta suliassaq annertooq suliarisariaqaleripput. Suliassaq kommunit
kisimik amerlanertigut artorpaat, taamaattumik siunnersuutigaara meeqqanik,
inuusuttuaqqanik inersimasunillu sullissinermi periusissaq nutaaq
oqallisigineqassasoq, uangalu isumaqarpunga kommuni Inatsisartullu
utaqqiinnarnagit kommuni, ilinniarfiit allallu qitiusumik sullissivissamik
pilersitsinissamut suleqatigiiffiliorsinnaasariaqartut ingerlatsiviusussamik.
Taama iliuuseqarsinnaalernikkut
sanaartugassanut pilersaarutit utaqqiinnartariaarutissapput, aqqutissanilli
allanik nassaarniarnikkut suleqatigiinnikkullu meeqqanik, inuusuttuaqqanik
inersimasunillu assigiinngitsorpassuarnik qitiusumik sullissinissaq pitsaasumik
periarfissinneqassaaq.
Konrad Steenholdt, Kultureqarnermut, Ilinniartitaanermut
Ilageeqarnermut Naalakkersuisoq:
Siullermik naalakkersuisut
siunnersuuteqartoq isumaqatigaat meeqqat, inuusuttut inersimasullu sunngiffimmi
sammisassaqartitaanissaat sukkulluunniit pisariaqartitsineq mianeralugu suli
salliutikkiartortariaqarmat.
Taamaattoq naalakkersuisut isumaqarput
tamanna pissasoq kommuninik iluarsaaqqinnermi kommissionip isumaliutissiissummini
inassutigisai imaluunniit kaammattuutai naapertorlugit. Kaammattuutit tamakku
aallaavigaat sunngiffimmi sammisassatut neqeroorutit suunissaannut atuisut
sunniuteqarsinnaanissaat. Sunniuteqarsinnaanissaq pisariaqarluinnarpoq
neqeroorutit pitsaanerpaamik atorneqarsinnaassappata inuillu ataasiakkaat
akisussaaqataassappata.
Kulturi sunngiffillu pillugit
suleqatigiissitaq kommuninik iluarsaaqqinnermut kommissionip
isumaliutissiissutaata malitseqartinneqarnissaa pillugu pilersinneqarsimasoq
naalakkersuisunut inassuteqaatinik tunniusseqqammerpoq. Inassuteqaatit
kommuninik iluarsaaqqinnermi kommissionip isumaliutissiissutaani
kaammattuutinut pingaarnernut naapertuummata suleqatigiissitap inassutigisai
naalakkersuisut akuersissutigaat, taakkununnga ilanngullugu inatsisiliat
iluarsartuunneqalissasut kaammattuutit tunngavigalugit.
Suleqatigiissitap inassutigisai
akissuteqaammut matumunnga ilanngullugit inatsisartunut ilaasortanut tamanut ilisimatitsissutitut
tunniunneqareermata akissuteqaammi matumani naalakkersuisut itisilerissanngillat. Taamaattoq
naalakkersuisut malugeqqussavaat suliassaqarfiup ataatsip kommuninik
iluarsaaqqinnermut atatillugu immikkoortillugu, kommuninik iluarsaaqqinnerup
tamarmiusup aallartinneqannginnerani, qitiusumit
aqutsivigineqalersinneqarnissaa isumakulunnartoqarmat.
Peqatigitillugu naalakkersuisut upperaat
kommunini assigiinngitsunik suliallit suleqatigiinnerulersinneqarnissaat
peqatigalugu kaammattuutit naapertorlugit kulturip sunngiffiullu salliunerutilerneqarnissaanni
suliassat pitsaanerpaamik naammassineqarsinnaasut najukkani, taakkunani
pissusiviusut aallaavigineqarsinnaammata. Tamanna akornutaassanngilaq kommunimi
ilinniarfiusinnaasut suleqatigineqarnissaannut. Ilinniarfiit kommuninit
ingerlanneqanngikkaluartut kommunit soqutigisarisariaqarpaat kommunimi
innuttaasut tamarmik pitsaasumik sunngiffimminni sammisassaqartitaanissaat.
Naalakkersuisut kaammaattuutigissaat
suleqatigiissitap kaammattuutai naapertorlugit inatsisinik iluarsaassineq
ingerlatiinnarneqassasoq.
Ruth Heilmann, Siumup oqaaseqartua:
Siumuminngaanniit
utoqqatsissutigissavarput suli agguaanneqarunanngimmat saqqummiutassarput.
Takkutissaaq erngiinnaq.
Inatsisartuni ilaassortap Peter
Ostermann-ip sunngiffimmi susassaqartitsiniarnermi periarfissiissutit
maannakkut atugaasut ilungersunartuuneri Inatsisartuni
isummersorfigillaqqullugit oqaluusrisassangortitaanut naalakkersuisunit
akissutigineqartuni erseqqissarneqarpoq kommunimi iluarsaaqqinnermi
kaammatuutigineqartut aallaavigalugit naalakkersuisut suleqatigiisitaliamik
pilersitsisoqareerneratigut kulturi sunngiffiillu pillugit suleqatigiisitaliap
kaammatuutigisai akissuteqarnermi ilannguneqarmata, taakkua soqutigalugit
Siumumiit misissuataarsimagatsigit imatut oqaaseqarfigilaassavavut.
Kaammatuutigineqartuni aamma
Isumaginnermut Iluarsaaqinnermi meeqqat inuusuttullu atugarisaannut tunngasut
ilanngullugit sammineqarsimasut ataatsimiititaliamit nassuiaatigineqarpoq.
Isumaginninnermi Ataatsimiititaliarsuup kaammattuutaasa
malitseqartinneqarnissaannik suliaqarnerup naammasineqarnissaa malittaralugu
saqqummiunneqarunik tulluarneqarnpaasoq oqaatigineqartoq Siumumiit
isumaqatigaarput, pisariaqartuummat ataatsimoortitsillugit isummersorfigineqarnissaat.
Kaammatuugineqartunut ilaatigut
assingusunik kommunit arlaqaqisut periarfissaqarnertik allanguisalereerput,
soorlu Atuartitaanermit, kulturi, sunngiffik pinaveersaartitsinerlu ataqatigiissunngorlugit
kommuninut nuunneqartalerput, meeqqeriveqarnerit kulturimut atuartitaanermullu
atalersinneqartalerlutik allatigullu kommunit namminneq aamma pingaartitaminnik
allannguisalernerat takornartaajunnaapoq.
Kommunit namminneerlutik allaffissornikkut
aaqqissuussinikkullu eqaallisaanissamik periarfissaqarput tamakkulu kommunit
arlallit eqqumaffigileraluttuinnartussaavaat aamma KANUKOKA-p periarfissanik
pikkorissaatitsisarnera ilutigalugu qularnanngitsumik annertusiartuaartinneqartussamik
Peter Ostermann-p anersaaruluutaasa ilagaat
inuusuttut ilinniarfinniittut aamma imerniartarfinnukarnissaannut
unammilertumik kajungernartunik peqqinnarnerusumillu susassaqartinneqarnissaminnut
periarfissaqarnissaata suliniutigineqarnissaa. Siumup aamma inuusuttut
anersaakkut timikkullu pissarsinartumik susassaqartinneqarnissaat anguniarlugu
iliuusissanik annertusaaqataajuarpoq.
Inuusuttuinnaat pinnagit inuiaqatigiillu
ataatsimut isigalugit annertuumik periarfissaqartinneqarnissaat aamma
annertusaavigiuarusuppaa. Soorlu aamma suleqatigiisitaliap kaammattuuteqarnerani
maluginiagassaasoq kikkut tamarmik assigiimmik periarfissaqartinneqarnissaat
anguniagaasoq aammalu annertusisamik atuartitaanermit anillatsillugu kulturi
sunngiffiullu aqunneqarnera ersarissunngortinniarneqarmat Siumumiit
isumaqatigilluinnarparput.
Ilanngullugu Siumumi isumaqarpugut klubbit
atugaanerat nalilersoqqitariaqartoq, tassani ukiunik killiliisimaneq
isummersorfigeqqittariaqarsorinarmat ukiut apparlugillu qaffanneqartarnissaat
aamma inuusuit namminneq piumasarisarmassut. Maannakkut periarfissarpassuit
ammatinneqarput peqatigiiffinni qanorsuaq suliniuteqarumasunut, soorlu aamma
ilinniarfiit neqeroorfigineqartarput timersortarfinnik atuarfinnillu
atuisinnaanerminnut.
Ullumikkuttaaq qangarnit annertunerujartuinnartumik
pinaveersaartitsinikkut sammissassaqartitsinikkullu annertusaanerit
suliniutigineqaleruttorput. Tamakku tamaasa kommuninit Namminersornerusunillu
tapersorneqarnertaaq annertusiartuinnartoq malunniukkaluttuinnartussaasoq
Siumumiit suleqataaffiginiarparput. Minnerunngitsumillu peqatigiiffinnut
tapiissuteqartarnerup nuna tamakkerlugu assigiissumik
maleruaqqusaliorneqarnissaa najoqqutassiortoqarnissaalu nalilersoqqinnissaalu
kaammattuutinuttaaq ilaatinneqarmat iluarisimaarparput.
Allat aamma oqaaseqarfigerusunnaraluartut
suliaq ukiamut isummersorfigineqartussaammat uterfiginissaa qilanaaralugu
Siumumiit oqaaseriniakkavut tassunga killeqartinniarallarpavut aammami
iluarsaaqinnerup ingerlanerani isummersuutigisartagarpassuavut amerlaqisut
piviusunngortinneqarnissaannut suliat ingerlanneqarmata ukiamullu sunngiffimmi
peqqussut tamakkiisoq saqqummiunneqartussaammat.
Taamatut Siumumi oqaaseqarluta
naalakkersuisut akissutaat isumaqataaffigisarput qujassutigaarput,
uterfigeqqinneqarnissaalu qilanaaralugu.
Finn Karlsen, Atassutip oqaaseqartua:
Inatsisartunut ilaasortap Peter
Ostermann-ip siunnersuuteqarnermini meeqqat, inuusuttut inersimasullu
assigiinngitsunik sullissinerup ilungersunarnerata aaqqivigeqqullugu
siunnersuuteqarpoq. Atassummiit siunnersuuteqartoq
ilumoorluinnarnerassavarput. Ullumikkut imaappugut aningaasartuutissanik
inatsisilioraangatta aamma arlaatigut sipaarnialeraangatta tamatigut
eqqorneqartartut tassangajunnerusarput meerartavut inuusuttortavullu.
Ullumikkut Nuup avataani illoqarfiit
qiviaraanni periarfissarititaagajuttarput timersortarfiit klubbillu
taakkuninnga peqarfiusut, sunngiffimmi ullumikkut ilaatigut meeqqanit
inuusuttunillu orninneqarsinnaasut, unnukkullu klubbit inuusuttuaqqanut ukiui
qummut killilerlugit, taavami sinneri tassa angajulliunerulaartut tassani
eqqarsaatigalugit. Kisianni klubbit illoqarfiit meeraqqortussusiannut
tamatigorluinnaq mikivallaartarput, aammalu ullutsinnut ineriartornermut
sukkaqisumut malinnaaniarnissaminnut akissaqartitaanngilluinnartarlutik.
Ilaatigulluunniimmi pisoqalisimaqisut iluarsaannissaannut kommuniniit
erliguunneqartarput. Kisianni kina oqarpa kikkut tamarmik taakkununnga
ornigunnissaminnut kajumissuseqartartut. Uagut inersimasuusugut soqutigisagut
assigiinngeqaat aamma taamaalluinnarpoq meerartavut, inuusuttuarartavut
inuusuttortavullu, taamaattumik ullumikkut neqeroorutigineqartut
naammanngilluinnarput.
Meeqqat alliartornerminni
toqqissisimasumik sunngiffimmilu pitsaasumik periarfissaqartitaagunik
siunissaat qaamanerungaassaaq. Soorunami akisussaaffik annerpaaq
angajoqqaaniippoq, kisiannili nalunngilluinnarparput angajoqqaat
inuussutissaqarumallutik sulisariaqartarput, assigiinngitsunillu
peqquteqarnikkut meeqqat piffissaqarfigineqarnerat ullormut annikitsuarakasiuvoq.
Atassummiit isumaqarpugut ullumikkut pissutsit allanngortinnagit
atuinnarutsigit meeqqanut, inuusuttuaqqanut
inuusuttunullu ajornartorsiutit allanngornavianngimmata
anner-tusiartuinnassallutillu.
Illoqarfiit Nuup avataaniittut
pingaartumik aasakkut atuarunnaarfiup nalaani timersortarfiit matoqqasarput
ilaatigut aamma klubbit matoqqasarlutik, taamaasinerata nalaani timersortartuunngitsorpassuit
periarfissaaruttarput, ajoraluartumillu suffissaaleqivallaalernerminni tupinnanngitsumik
pissanganartorsiorniarlutik ujaaserusaalersarlutik ulloq atortarpaat. Tamakkulu
nalunngilluinnarparput amerlasuutigut qanoq kinguneqartartut, tassalu
naamaarniarnerit, aserorterinerit, tillinnialunnerit tamakkulu milliartoratik
alliartuinnalersarput, ilaatigut allaat allamut nuutsitsernermik
kinguneqartarlutik.
Siunnersuummut tunngatillugu
naalakkersuisup akissuteqaatimini tassaanerupput kommunini iluarsaaqqinnermi
kommissionip isumaliutissiissummi kaammattuutai. Atasssummiit oqaatigissavarput
nalunngiluinnaratsigu kommuninut ataatsimoortumik tapiissutit
ilaqartinneqartarmat sunngiffimmi sammisassanut tunngassuteqartunut, kisianni
aningaasat tamakkununnga atugassaritinneqartut annikitsuaraannaasarmata
ullutsinnut naleqqutinngilluinnarput, taamaattumik Atassummiit
naalakkersuisunut inassutigissavarput sunngiffimmi inatsisip erseqqissarlugu
sakkortusarneqassasoq ullutsinnut naleqquttunngorsarneqassasoq. Ilutigalugu
kommunit piumaffigineqassasut sunngiffimmi sammisassat pitsanngorsarneqarnissaannut.
Taamatullu oqaannarneq naammanngilaq.
Ullutsinnut naleqqussaanermi pitsanngorsaassagaannilu aamma tamanna
aningaasatigut malitseqartinneqartariaqarpoq. Soorunalumiaasiit oqartoqassaaq
aningaasat suminngaaniit tigussagatsigit. Soorunami qaninnerusoq isigalugu
aningaasanik naleqassaaq kisianni aperisariaqarpugut ullumikkut meeqqat
inuusuttuaqqallu allamut nuutsitsisarnerit inissiisarnerit qanoq
inuiaqatigiinnut naleqarpat meeqqat inuusuttuaqqallu namminneq
pisuusssutiginngisaat? Taamaattumik ungasinnerusoq isigalugu imminut
akilersinnaavoq maannangaaq aningaasanik amerlanerusunik aningaasaliissalluni
aaqqissuussaanerusumillu pilersaarusiortoqarluni.
Aammattaaq Atassummiit kissaatigissavarput
fritidsklubbit ungdomsklubbillu pisortaasa sulisuisalu ullutsinnut
malinnaajumallutik pikkorissartinneqartarnerat nangeqqinneqartariaqartoq,
imaanngitsoq nalummata. Aammalu Atassummiit naalakkersuisut
inassuteqarfigissavavut meeqqanut, inuusuttuaqqanut inersimasunullu
kommunikkuutaartuni siunnersortinik atorfinitsitsinissaq anguniaqqullugu.
Atassummiit taamatuy oqaaseqarluta
Inatsisartunut ilaasortap Peter Ostermann -ip siunnersuutaa tamakkiisumik
taperserparput, oqartarpugummi meerartavut siunissaraavut.
Manasse Berthelsen, Inuit Ataqatigiit oqaaseqartuat:
Inatsisartuni ilaasortap Peter Ostermann
-ip sunngiffimmi sammisassaqartitsinerup pitsanngorsarnissaanut siunnersuutaa
Inuit Ataqatigiinniit soqutigalugu suliarisimavarput, naalakkersuisullu
suleqatigiisitaliaata 1995-meersup kulturimi sunngiffimmilu iliuusissatut
siunnersuutai soqutigalugit qimerloorsimavavut, taakkulu imatut
oqaaseqarfigissallugit.
Kommuninik Iluarsaaqinnermi
isumasioqatigiisitarsuup inassutai aallavigalugit suleqatigiissitap 1995-meersup
inatsisiliornissamik toqqammaviusinnaasunik kaammattuutai Inuit Ataqatigiinniit
piviusunngortinnissaat tullinnguummat assorsuaq ilassilluarpavut.
Ilumoorpoq sunngiffimmi kulturimilu
sammisassaqartitsiniarneq sutigut tamatigut kingullliunneqartuarmat
sulisutigut aningaasalersuisarnikkullu. Taamaammat Inuit Ataqatigiininngaanniit
nuannaaruutigilluinnarparput taakkorpiaat, tassa kultureqarnermut
sunngiffimmilu sammisassaqartitsiniarnerit immikkoortunngorlugit
inissinniarneqarmata, taamaaliornikkumi siunertarineqartut
erseqqinnerulersussapput imminullu saalliutinnissaminnut
periarfissaqarnerulissallutik, kingunerissallugu tassa kulturimi sunngiffimmilu
sammisassaqartitsiniarnerup tamakkiisumik sullinneqarsinnaaanissaa.
Sunngiffimmi sammisassaqartitsiniarnermut
ataatsimiititaliaq atorunnaarlugu kulturimut sunngiffimmilu
sammissassaqartitsiniarnermik suliniuteqartussanik siulersuisunngortitsinissaq
siunnerfigineqartoq Inuit Ataqatigiinninngaanniit iluarisimaarparput,
maannamummi sunngiffimmi ataatsimiititaliat annertunerusumik
suliniuteqarsinnaasarsimanngillat oqartussaaffii annikkippallaarsimammata
aningaasanillu suliniutaasinnaasunik atugassaminnik annertunerusumik
peqassanatik.
Kommunip iluani allaffissornikkut kulturi
sunngiffimmilu sammisasassaqartitsiniarnerup atuarfeqarfimmiit
immikkoortinneqarnissaa Inuit Ataqatigiinniit isumaqatigaarput. Immikkoortitsinermilu
aamma pinngitsoorani qularnaartariaqarpoq aningaasat naammatunik
nassataqarnissaa.
Maannakkut sunngiffimmi
sammisasssaqartitsinermi pisortap atuarfeqarfimmut atassuteqarpallaarnera
pissutaaqataanngitsuunngilaq kulturimut sunnguffimmilu
sammisassaqartitsiniarnermut suliniutaasinnaasunik tamakkiisumik
sullisisinnaannginneranut. Sunngiffimmi
sammisassaqartitsiniarnermi pisortaq tamatigungajak saniatigut meeqqat
atuarfianni atuartitsisuusarpoq, taamaalilluni sunngiffimmi sammisassat
sammissallugit piffissaq killeqartarluni.
Inuit Ataqatigiinniit isumaqarpugut
sunngiffimmi pisortaq pinngitsoorani ilinniartitsisuusariaqanngitsoq,
tassaasiinnaallunilu illoqarfimmi iluani peqatigiiffeqarnermut,
kultureqarnermut imaluunniit kulturikkut sunngiffimmilu
samisaqartitsiniarnermut ilisimasaqarluartoq. Inuit Ataqatigiinniit kulturimi
sunngiffimmilu sammisassaqartitsiniarnermi sulisoq ataasiinnaasariaqanngitsoq
isigaarput, sunngiffimmimi pisortap ukiup ingerlanerani aaqqissuinerpassuit
ingerlatarisarpai saniatigullu illoqarfimmi peqatigiiffilerinerit,
taakkuninnga pikkorissaanerit, sammisassaqartitsiniarnermi illuutigineqartut
nakkutiginissaat allarpassuillu.
Kulturimi sunngiffimmilu
sammisassaqartitsiniarnermi inuit arlallit sulisinneqaleraluarpata Inuit
Ataqatigiinni qularinngilarput illoqarfinni ataasiakkaani eqeersaataallutillu
kulturikkut ingerlatsinerit ersarinnerulerumaartut, tamannami
ataatsimiititaliap 1995-meersup kaammattuutigaa aamma.
Ataatsimiititaliap 1995-meersup uparuagaa
Inuit Ataqatigiinniit aamma isumaqatigilluinnarparput, tassa sunngiffik
pillugu Inatsisartut peqqussutaat nr. 5. april -ip 9-aneersoq 1992-meersup
Kommunit Iluarsaaqqinnermi Ataatsimiititaliarsuanit inassutigineqartut
naammassineqarsinnaasutut oqaatigineqarmat, taamaallaalli taassuma piviusunngortinneqarnissaanut
nalunaarusiornissaq amigaataaginnarluni, kiisalu inuiaqatigiinni ineriartornermut
malinnaatinneqarnissaa nalunaarutitigut aamma amigaataalluinnarluni.
Ersarissunimmi toqqammaveqarani sunngiffimmi sammisassaqartitsiniarnerup
tamakkiisumik ingerlanniarnissaa killeqarpoq, taamaammallu Inuit
Ataqatigiinniit isumaqatigilluinnarparput ataatsimiititaliap 1995-meersup
inassutigisaa tassaasoq peqqussutip nalunaarutinik malitseqartinnissaa
aallartisarneqartariaqartoq annertuumillu pingaartinneqarluni. Taamaattumik
Inuit Ataqatigiinninngaanniit naalakkersuisoq kaammatussavarput tamanna
suliassaq piaartumik aallarteqqullugu.
Inuit Ataqatigiinniit
nuannarutiginngitsuunngilarput ataatsimiititaliap 1995-meersup peqatigiiffnnut
aningaasat tapiissutigineqartartut aamma misissuataarsimammagit. Pisaariaqarpoq
Landskarsimiit peqatigiiffiit , soqutigisaqaqatigiit kattuffiillu pisartagaat
ukiut tamaasa nalilersortarnissaat ullumikkut pisariaqartinneqartunut
naleqqussarlugit. Kattuffiit soqutigisaqaqatigiillu ukiut ingerlaneranni
taakkuinnaaneq ajorput, ukiullu ingerlanerini ilaartortarlutik soorlu
isiginnaartisisartut suleqatiigiiffeqarput, nipilersortartut avannaani
suleqatiiffeqarput, ilisimavarpullu nuna tamakkerlugu kattuffiliorniartut.
Inuit Ataqatigiinniit pisariaqartutut
isigaarput kattuffinnut soqutigisaqaqatigiinnullu tapiissutit
nalilersoqqinneqartariaqartut, aperisoqarsinnaavormi tapiissutit
tulleriissaarneranni peqatigiinniat kattuffiat ukiumut 84.000,00 koruuninik
tuneqartartut, nunatsinni spejderit ukiumut milliuunit. Affaat tunineqartartut,
Blċ Korsinut ukiumut milliuuninik tunniunneqartartut qanoq iluaqutiginerigut
nipilersortartut isiginnaartitsisartullu suliniutaannut sanillullugit.
Ataatsimiititaliallu 1995-meersup kattuffinnut soqutigisaqaqatigiinnullu
tapiisarnerat maleruagassiuunnisaannut kaammatuuteqarnera Inuit Atqatigiinniit
ilassilluarparput, tassungalu ilanngullugu kommunit ataasiakkaat
illoqarfimminni peqatigiiffinnut qanoq pisussaaffeqarneri
ersarissarneqarnissaasa, taamaasiornikkummi neriuutigigatsigu
naapertuilluarnerusumik tapiissutinik agguaassisoqartalernissaa.
Kaammattuugineqartut sinneri annerusumik
Inuit Ataqatigiinniit oqaaseqarfigissanngilavut, qularutiginnginnatsigumi
kulturimut sunngiffimmilu sammisassaqartitsiniarnerup nukittorsarnerata
malitsigiumaaraa suliassat allat annertuut pitsaasumik
naammassineqarsinnaalernissaat.
Kulturimut sunngiffimmilu
sammisassaqartitsiniarnermi suliutit tassaasariaqarput illoqarfiit ataasiakkaat
suli uummaarinnerulersinnaanerannut tunngaviliisussat, peqatigiiffinnut
suliniuteqartunullu allanut siunnersuisarnermikkut, suliutinik nutaanik
aallartitsinermikkut, illoqarfiullu iluani suliniuterpassuarnut
ataqatigiissaarisuunermikkut.
Taamatut Inuit Ataqatigiit oqaaseqarluta
neriuutigissavarput ataatsimiititaliap 1995-meersup kaammattuutigisai
naalakkersuisup ilungersuutigiumaarai, taamaalillutalu Peter Ostermann-ip
siunnersuutaa taamatut naammassineqartut isigalugu.
Bjarne Kreutzmann, Akulliit Partiaat:
Nuannaarutigalugu maluginiarpara naalakkersuisut
siunnersuuteqartoq isumaqatigimmassut, tassa sunngiffimmi sammisassaqartitsineq
suli salliutikkiartorneqartariaqartoq. Aammattaaq sunngiffimmi sammisassatut
neqeroorutit suunissaannut atuisut ataasiakkaat sunniuteqaqataanissaannut
isumaqataavunga.Taamatut sunniuteqarsinnaaneq pisariaqarpoq neqeroorutit
pitsaanerpaamik iluaqutiginiarneqarnissaannutt aamma akisussaaqataanissamut.
Taamatuttaarlu aamma pisariaqarpoq
kommunini Iluarsaaqqiinermi Ataatsimiititaliarsuup kaammattutai aallavigalugit
inatsisit nutarteneqarnissaat, tassa inassutigineqarsimammat kulturi
sunngiffillu pillugit suleqatigiisitaaliaasimasukkut.
Sunngiffiup salliutikkiartorneqarnissaa
isumaqatigaara inatsisit nutarneqarnissaannik suliap ingerlaqqinnissaannik
naalakkersuisut inassutaat isumaqatigaara, taamaalilluta akisussaaffik allanut
ingerlateqqeqattaarunnaarniassagatsigu.
Anthon Frederiksen, Kattusseqatigiit:
Inatsisartut suleriaasiat ' 41 naapertorlugu Inatsisartunut
ilaasortap Peter Ostermann-ip meeqqanik inuusuttunillu sullissinermi
atugassaritinneqartut pitsaanerulersinneqarnissaat pillugit siunnersuutaat
toqqammavigalugu oqallinnermi, imatut oqaaseqassuunga:
Siunnersuuteqartoq ilumoorpoq meeqqanik
inuusuttunik inersimasunillu sunngiffimmi ulluinnarnilu assigiinngitsunik
sullissiniarnermi atugassarititaasut arlalitsigut ilungersunarsiartormata.
Eqqaaginnarsinnaavarput kultuurimi
sunngiffimmilu suleqatigiissitap Naalakkersuisunut kaammattuutaani ilaatigut
uppernarsarneqarmat sumiiffinni ataasiakkaani sunngiffimmi sammisassaqartitsiniarnermut
ataatsimiititaliat maannakkut atuuttut atorluarneqarsinnaanngitsutut
ingerlasimanerat nalilerneqarsimasoq, ilaatigut ataatsimiititaliat
oqartussaassuseqannginnerat aammalu sulinerup akissarsiaqaataanginnera
patsisigalugit.
Taamaattumik ilaatigut suleqatigiissitap
1995-imi pilersinneqarsimasup kaammattuutai qularnanngitsumik meeqqanik
inuusuttunik inersimasunillu sunngiffimmi sullissiniarnermi pitsaanerulersitsisinnaasut
naatsorsuutigineqarsinaammaat tapersertariqarpoq. Tassami kaammattuutigineqartunut
ilaammat sunngiffimmi sammisassaqartitsiniarnermi aqutsineq atuarfimmiit
avissaartinneqassasoq, taamaalillunilu sullissineq aqutsinerlu eqaannerusumik
peqqussumi ataatsimi aallaaveqartumik ingerlanneqalissalluni. Taamatut
iluarsiinissamut kaammattuuteqarnermi kommunit nammineersinnaatitaanerat
ataqqineqassasoq, taamalu kommunit namminerminni pissutsit tunngavigalugit
aallaavigalugillu aalajangiisinnaallutillu aaqqissuussisinnaanermik
ilusiliisinnaatitaasariaqarnerat Kattusseqatigiinniit pingaartikkatsigu
erseqqissarumavarput.
Taamatut iluarsaaqqinneq aningaasanik
naleqassaaq, taakkulu kommunit amerlanerit nammineerlutik akissaqartinngilaat,
taamaattumik Namminersornerullutik Oqartussat akileeqataanissaat
kaammattuutigissavarput.
Soorunami suliassat suulluunniit
aningaasassaqartinneqanngikkunik piviusunngortunneqarsinnaannerat
qulornarluinnartarpoq, qujanartumillu qinersinissaq tulleq qanilliartortillugu
inunnik sullisserusunnerup inimi maani aamma malunnarsiartornera ersippoq,
aammami 1995-imili qinersereernerup kingorna taamaassimasariaqaraluarpoq.
Timmisartoqarfiit atortorissarutillu allat annerusumik salliutippallaarnagit,
inulli salliutinnerusariaqarluni.
Aningaasarpassuit pisariqartinneqarput
inuit atugaasa oqilisarnissaannut, pingaartumik meeqqat atuarfinni pissutsit
ajorluinnartut iluarsaanneqarnissaannut, ilinniartitsisut naammattut pissarsiarineqarnissaannut,
utoqqaat innarluutillit sulisinnaajunnaarnersiutillillu atugaasa aaqqiiviginissaannut,
meeqqat tamarmik 18-inik ukioqalersimanngitsut tapisitineqartalernissaannut,
peqqinnissaqarfimmi kiffartuussinermut, sulisussaqarniarnermullu
ajornartorsiutaasunut qaangiiniarnissamut, maannalu aamma
siunnersuutigineqartup aaqqiivigineqarnissaannut, ilarpassuinullu allanut.
Taamaattumik aammaarlunga ilungersortumik
Inatsisartunut kaammattuutigissavara suliassat inunnut tunngassuteqartut
annertuumik pisariaqartinneqartut aningaasassaqartinniarlugit timmisartoqarfiit
maannakkut sanaartorneqartut kinguartinneqarnissaat ujaraaqqanillu
aallaqqaammut qallerneqarnissaat saniatigullu timmisartoqarfinnik
sanaartornermi sipaarneqarsinnaasut allat tamaasa sipaarniutigeqqullugit.
Taamaaliornikkummi inuttut ajornartorsiutit meeqqat aturfinni,
peqqinnissaqarfinni ilaallu ilanngullugit ajornartorsiutaasut aatsaat
pimoorullugit salliutillugillu suliniutigineqarsinnaanissaannut
aningaasaliiffigineqarsinnaalissammata.
Suleqatigiissitap suliaminik naammassinnereersimanera
tunngavigalugu aammalu arlalinnik aamma Naalakkersuisut akuereriigaannik
kaammaattutigineqartarnera tunngavigalugu Kattusseqatigiinniit
pissusissamisoorsorinngilara suliap kinguartinneqarnissaa. Taamaattumik meeqqat
inuusuttut inersimasullu sunngiffimmi pisariaqartitseqisut periarfissanik
atorluaasinnaasut annertuumik pisariqartitsisut piaartumik
salliutinnerullugillu sullinneqartariaqarnerat Kattuseqatigiinnit
tamakkiisumik taperserpara, soorlumi aamma siunnersuuteqartup aamma tamanna
ilungersunartutut oqaatigereeraa.
Taamaattumik peqqussutinik
allanngortitsinissaq Naalakkersuisut piaartumik sulissutigisariaqaraat
ilanngullugu kaammattuutigisariaqarpoq, taamaalillungalu siunnersuuteqartup
Inatsisartuni ilaasortap Peter Ostermannip siunnersuutaa tamakkiisumik
taperserpara.
Konrad Steenholdt, Kultureqarnermut Ilinniartitaanermut
Ilageeqarnermullu Naalakkersuisoq:
Qujanaq. Aallaqqaasiullugu
oqaatigilaarlara suliassaq sunngiffiup nalaani sunngiffimmi peqqussutip
allanngortiterneqarnissaannut tunngasoq sukkulluunniit
kinguarsarniarneqanngimmat. Inatsisissaq sunaluunniit peqqissaarullugu
suliarigaanngatsigu allatut ajornartumik ulluinnarni tamakkuninnga
sammisaqartut tusarniaqqaartariaqartarsimavagut, soorlu assersuutigalugu ukiaq manna
novemberimi nunarput tamakkerlugu fritidsinspektĝrit katersortissimavagut,
ajornartosiutaasut assigiinngitsut, tassa kommunal
reformkommissioniminngaanniilli uparuartorneqarsimasut sulissutigineqartullu
inuiaqatigiinnut aammalu sumiiffinnut assigiinngitsunut naleqqussarnissaat
pisariaqarluinnartutut isigigatsigu.
Tassa nalunngilarput aamma neriorsuutigereerparput ukiamut ataatsimiinnermut inatsisissaq taanna imaluunniit peqqussutissaq taanna allannguutissaa suliarissavarput pingasoriarlugu. Kisianni soorunami taamatulluunniit oqaraluaruma una eqqaammallaaqquara, oqallinnissaq taanna imaluunniit inatsisissaq peqqussummik allanngortiterinissaq taanna utaqqiinnarlugu oqallinneq taanna unittariaqartoq, taamaattariaqanngilaq, taamaattumik qujassutigaara aamma siunnersuuteqartup ullumikkut killiffitsinnik ajornartorsiutit assigiinngitsut tikkuarmagit. Isumaqarpugullu aamma nalilersuilluarnitsinni taakku ilaasariaqartut, ilaatigut soorlu illoqarfinni ilinniartoqarfiusuni sunngiffiup nalaani sammisassaaleqineq pissutigalugu imerniartarfiliartariaqarnerit aammalu meeqqat ilaatigut sammisassaaleqineq pissutigalugu ullumikkut atugaat uani tikkuartorneqarput. Soorunami tamakku tamarmik ilaassapput.
Unani oqallinniaraluarluni immaqa kipiluttunassaqaaq oqarfigineqartuaannarluni, aa ukiamut inatsisiliuutilereerparput, ajunngilaq utaqqilaarallarniaritsi. Soorunami suliaq annertuvoq, aamma naammassissaqqaarparput, naammassillugu suliarissavarput, soorlu atuarfeqarfimmut tunngatillugu suliasiissutaasimasut ukiuni taakkunanerpiaq 94-ikkunni 95-ikkunnilu piareersimasut. Piareerpagut taakkua, massakkut tullinnguuttoq tassaavoq sunngiffiup nalaani allanngortiterinissaq, tassalu suleqatigiissitaliap taassuma innersuussutai ilanngullugit uani agguaatereerpagut, takuneqarsinnaaqqullugu eqqarsaatigut sumut sammiveqarnersut.
Uani paasivara partiit oqaaseqartuininngaanniit assortuuttoqanngitsoq, tikkuartugaat tapersiipput Naalakkersuisut maannamut qanoq iliuuseqarnerannik, qanorlu iliussamaarnerannik tapersiinnerullutik. Taamaattumik annertunerusumik imannarsuaq oqaaseqartut akissuteqarfigissanngilakka, kisiannili qujassutigissallugu isumaqatigiinnermik taama atsigisumik aamma takutitsimmata sunngiffimmi ullumikkut peqqussutaasup naleqqukkunnaarsimanera aammalu kommuninut taakkununnga isumagisassanngorlugu tunniukkiartuaarnera aamma siunnerfigineqareerpoq. Soorunami tamakku tamaasa kommuninut tunniutissagutsigit aamma isumagisariaqassavarput aningaasartaasa ilanngullugit aaqqiifiginiarnissaat.
Taanna ukiamut ukiumut tullermiit aningaasartuutissat pilersaarusiorneranni pinngitsoorani aamma eqqaammaniarneqarnissaa inassutigissavara, aamma uagut soorunami pisortaqarfimminngaanniit taamaaliussaagut.
Uani aamma Atassutip oqaaseqartuata naggataarutimini inassuteqaatai assigiinngitsut taakkua aamma ukiamut eqqarsaataasunut ilaasariaqarput, soorlu ilaatigut inassuteqarfigineqarpugut siunnersortinik atofinitsitsisinnaannissat anguniarneqaqqullugit, soorunami aamma pisariaqassappat suliaq ingerlanneqassappat, kisianni soorunami nalilersuinermi aamma ilanngutissavagut.
Aamma Inuit Ataqatigiit oqaaseqartuanut aamma qujassaanga, tassani aamma tikkuartormagit ullumikkut pissutsit ilaatigut naleqqukkunnaavissimasut, soorlu isumaqatigilluinnarpara kattuffeqarneq nunatsinni tikkuarmagu, ilaatigut aningaasat immikkoortinneqarsimasut assigiinngitsunik tunngaveqarluni agguaanneqartartut, taakkua aamma nalilersortariaqarput, ilumoorpoq.
Nipilersortartut taagakkit, tassa utaqqivarput maannakkut nipilersortartut kattuffeqalernissaat. Kattuffeqalernikkut finanslovikkoorlugit, aningaasat inatsisaatigoorlugu, anngussinnaasarpugut Inatsisartut akuerisassaannik, soorlulu assersuutigalugu taasinnaavara Uummannamiippunga qimussinik sukkaniuttut nalaani, taakkulu massakkut nuna tamakkerlugu kattuffiliorput, imaappoq sikusartumi, sikusartumik soorunami qimussertartut kattuffiliorput, kattuffiliornermikkullu anguniarsimasaat tassa taannarpiaavoq, kattutereernikkut aamma aningaasanik tamakkiisumik tapiiffigineqarsinnaanertik anguniarlugu.
Nipilersortartut suliniutaat nalunngilagut aamma tapersersorpagut, taakkulu aamma takkuppata ilanngutinngitsoornavianngilagut uani soorunami apeqqutaajumaarluni aningaasanut inatsisip ilusilersornerani Inatsisartuninngaanniit qanoq atsigisumik tapiiffigineqarusunnersut. Taakkua tikissaqqaarpagut nalilersorlugillu.
Oqaaseqartut sinnerisa tamarmik naammagisimaarmassuk qujaruppara, tassa kisianni Antuup oqaaseqarneranut, Anthon Frederiksen, Kattuseqatigiinninngaannit, punktit maanngaanniit akissuteqarfigisassakka tamarmik inassuteqarfigineqartartut, mittarfiit ukua unitsilaariarlugit una isumaginialaarsiuk. Pilersaarusioreerpugut mittarfiit taakkua akuerineqarlutik suliassaq ingerlavoq. Soorunami uani tikkuartorneqartut tamakkua assigiingitsorpassuit aningaasanik naleqarput, taannalu aamma uagut arajutsisimanngilarput, soorlulu oqareersunga, inatsisinik imaluunniit peqqussutinik allanngortiterinitsinni maanngaanniit kommuninut tunniussinitsinni soorunami isumaqatigiinniutitigut aningaasartassai aamma kommunit isumaqatigalugit nuunneqartarmata. Taanna aamma suliap taamatut ingerlannissaa isumaginiassaqqaarparput.
Naggataatigut oqaannassaannga uani kigaatsumik angujartuaarnissaa siunniutinngilarput, kisianni neriorsuutigereerparput ukiamut inatsit tassunga tunngasoq imaluunniit peqqussut taanna allanngortinnissaa Naalakkersuisuninngaanniit siunniutereerparput.
Oqaaseqartunut taamaasillunga qujavunga.
Peter Ostermann, Atassut:
Qujanaq. Siullermik ersarissumik
tapersiisut Kattusseqatigiit Atassullu assut qutsavigaakka, allalli soorlu
siunnersuutiga paatsuulaarsimannguatsiarunaraat.
Uanga siunnersuutiginngilara sulinermik
aaqqissuussinermik tunngavissanik allanillu nutaaliornissamik
aallartitsinissaq. Nalunngilara Naalakkersuisut suliniutigigaat kommuninik
aaqqissuusseqqinnissamik ataatsimiititaliarsuup inassutai naapertorlugit. Uanga taanna pinngilara. Aningaasanik
inatsit qivialaarsiuk, ukiunullu missingersuusiorfiusunut. Atammimmi sanaassaq
eqqaasanngikkaanni sumi allami meeqqanik inuusuttunik inersimasunillu
assigiingitsunik sullissinissamut atasumik aningaasaliisoqarpa? Nul.
Tassalu taanna uanga killiffigisara.
Ulloq manna tikillugu akuerseqataasarpunga mittarfiliornernut,
uuliasiorniarsarinermut aatsitassarsiorniarnermut allarpassuarnullu,
nalunngiivillugu siunnersuutittut ittunik pilersitsinissamut taamaalilluta
aningaasassaarutissasugut. Taanna aalajangiussimavara taamatut
aalajangeeqqataasarnera, kisianni massakkut misigisimavara killiffipput ima ilungersunarsitigisoq
allatut iliortariaqarluta, aningaasaleeriaatsinik allanik ujarlertariaqarluta,
tassa uanga siunnersuutiga.
Aningaasaleriaatsit allat -
Landskarsi utaqqiinnarnagu, kommuni utaqqiinnarnagu.
Ukioq radiukkut aallakaatitsinikkut
ersarissumik sammineqarput meeqqat inuusuttuaqqallu ajornartorsiutaat
assigiingitsorpassuit, aammalu qulaajarneqarput qanoq annertutigisut. Peqataasut
ilaat oqartoq tusaavara, meeraq ajornartorsiuteqarnermini inersimasumik
oqaloqatissaminik ujarlersinnaavoq. Qanoq taama oqartoqarsinnaava? Taamaattumik
akissutaasunut, pingaartumik Naalakkersuisut akissutigisaannut
pakatsikujuppunga, siunnersuutiga pivallaarnagu, qujanaraluartumik massakkumut
suliniutaasut malittarisassanik assigiingitsunillu nutarteriniarnerit aaqqissuussinermik
nutarteriniarnerit saqqummiussormatigit, qujanarpoq taanna, kisianni uanga
taanna pinngilara oqareernittut.
Oqaasissarpassuaqarsinnaagaaluarpunga,
kisianni una tikkualaarlara, sumik torrallatamik pilersitsigaanngatta, taava
aamma ingerlateqqittassavarput. Katuaq assersuutigilaariarsiuk, pilersitaq
pitsak, maani isigivarput meerarpassuit ullaarnganiit, inuusuttut inersimasut
utoqqaat isaaffigigaat, sammisassaqarfigalugulu. Sooq Katuaaqqanik
pilersitsiniarnermik tunngaviliinnianngilagut? Aningaasalersueriaatsit allat
atorlugit, soorlu Katuamik pilersitsinermik tamakku tunngavigineqartut?
Suleqatigiilluni pilersitaq pitsaasoq pilersinneqarpoq, ilaasa init ilaat
pequsersoraat, ilai issiavinnik pisisut. Taku= torrak! Sooq allami aamma atornianngilarput
taamaattunik pilersitsiniarnermi?
Naggataatigut una
oqaatigilaaginnassavara, Naalakkersuisunut ilungersortumik qinnutigaara
siunnersuutima tunngavigisai aamma nalilersueqqinnermi ilaateqqullugit,
kisiannili neriorsuutigisinnaavara ukiamut peqqussutit tamakkua
eqqartulerutsigit uanga una uterfigeqqikkumaarakku.
Anthon Frederiksen, Kattusseqatigiit:
Inatsisartut inatsiliornermikkut
aalajangiigaanngamik soorunami aamma ullut ukiullu ingerlanerini
allangortitsisinnaannissaminnik pissutsit piviusut tunngavigalugit
periarfissaqartarput, taamaattuminguna aamma massakkut ataasiarunnaarlunga
oqaatigisariga timmisartoqarfissuit nunatta aningaasaqarniarneranut annertuumik
sunniuteqartut taakkua allanngortinneqarsinnaannerat periarfissatut
ilanngullugu eqqarsaatigeqqitariaqalerpoq, ilumut oqalupput meqqat siunissaraagut.
Akissaqartinngikkutigit
erloqinassaqaaq siunissaralugillu oqalunniannguarluta. Suna pingaarneruva? Pingaarnersiuisariaqarpugut,
unaga isumaqarpunga meeqqat pingaarnerpaajusut, inuiaqatigiinni
aningaasaliiffigissallugit siulliullugit. Taamaattumik aammaarlunga kaammattuutigissavara
timmisartoqarfinnik sanaartorneq allangortillugu aaqqissuuteqqittariaqarpoq,
aningaasat tassunga atugassat ilaat siunertamut maani siunertaasumut
ajunngilluinnartumut atorneqarnissaat eqqarsaatigalugu.
Konrad Steenholdt, Kultureqarnermut Ilinniartitaanermut
Ilageeqarnermullu Naalakkersuisoq:
Qujanaq. Tassa siunersuuteqartumut
oqaatigiinnassavara uani apeqqutit assigiinngitsut taaneqartut soorunami
ukiamut aamma oqallinnissamut ilaatissavagut ilaatissaqqaarpagut, kisianni una
iluamik akuersaarsinnaanngilara, oqarusuppunga imannak: Ukiorpassuarni
Katuaraaliornerit ingerlassimavagut, tassa Illut Sulliviit nunaqarfinni
pilersiortorsimavagut, aamma sunngiffimmi assigiinngitsumi
sammisassaqartitsiniarnerit eqqarsaatigalugitigit. Aamma timersortarfiit
illoqarfinni anginerusuni arlalissuarni nappareerput maannakkut aammalu taassuma
saniatigut massakkut misissuivugut allanik miniminihalinik taagorneqartunik
pilersitsiortorniarluta, soorunami tamakkuta tamaasa aamma
qujaruttariaqarpagut, imatut naliliinata, tamakku tamaasa imminiiginnarlugit
sunngiffik immineersimagipput. Isumaqarpunga ingasappallaatsiartoq taamatut
nalilissallugu.
Aamma massakkut kommunit
suleqatigilluinnaqqinnaarlugit sunngiffiup nalaani sammisassat piorsarniarlugit
peqqussutinik nutarterilerpugut. Tamaattuminguna oqartugut, ajunngilaq,
peqqussutinik allanngortitsinissarput sioqqutilaarlugu oqallinnerit ajunngilaq
piniarlik, ajunngilluinnarpoq immersussavaatigut tamakkuninnga. Kisianni
ingasagitsiaannarigigaana taanna soorlu Atammimmi sooruna taanna
timersortarfeerassaq nunaqarfinnut naleqqussarlugu massakkut ilusilerniarneqartoq
pissangalluinnaavilluta maannakkut aamma malittaaffigaarput, neriuppugullu
aamma taassuma nappareernerata kingornatigut sukkanerusumik taamaattunik, uanga
taarusutannik Katuaaqqanik, pilersitsiortornerput nangeqqissagipput.
Soorlulu oqareersunga uani
oqaatigineqartut assigiinngitsut ukiamut allanngortiterinissamut ilanngullugit
nalilersorneqarumaarput.
Oqaaseqartunut taamaalillunga
qujavunga, paasigakku peqqussumik allanngortitsiniarnitsinni suliniarnerput
tapersersorluarneqartoq.
Manasse Berthelsen, Inuit Ataqatigiit:
Aap, siunnersuuteqartup pakatsinera
oqaaseqarfigilaasavarput Inuit Ataqatigiinninngaanniit. Siunnersuutiginerarpaa
aningaasalersueriaatsit nutaat, kisiannili qulequtsiinermini meqqanik
inuusuttunik inersimasunillu sunngiffimmi sammisassaqartitsinerit
pitsanngorsarneqarnissaat, taanna aallaavigalugu akisimavarput.
Aningaasalersuinermik
eqqarsaatigalugu tikkuarsimavarput soorunami sammisassaqartitsiniarneq
kulturimullu suliniuteqarnerup allanngorsarneqarneratigut aamma
qularnaartariaqartoq aningaasartai aamma ilaasariaqarmata.
Paaseqquallaaqqimmagu
siunnersuuteqartup siunnersuutini naqinnikkaarlugit taava paasiniarsarissavara.
Imatut siunnersuuteqarnermini
oqarpoq: Sullissinermi periusissaq nutaaq oqallisigineqassasoq, uanga
isumaqarpunga kommunit Inatsisartullu utaqqiinnarnagit kommunini ilinniarfiit
allallu qitsiusumit sullivinnit. Inatsisatut utaqqiinnarnagit
siunnersuuteqaravit sooq aamma maannga Inatsisartunut siunnersuuteqartoqassava
utaqqiinnarniarnagillu, kisiannili Inuit Ataqatigiinnin-ngaanniit
oqaaseqarnitsinni tassa Naalakkersuit suliniutigigaat erserpoq nutaamik
aaqqissuussisoqarniartoq aamma taanna qangarsuarli utaqqisimavarput, nutaamik
aaqqissuussisoqarnissaa. Taamaammat siunnersuutigisat naammassineqartutut Inuit
Ataqatigiinninngaanniit isigaarput.
Peter
Ostermann, Atassut:
Siunnersuuteqarninni oqanngilanga ulloq
manna tikillugu sosoqaavissimanngitsoq. Oqaaseqaqqinninni erseqqissumik
oqaatigaara ulloq manna tikillugu allarpassuarnik pisariaqartunut annertuunik
aningaasaliisariaqartarsimavugut, nalunagu sunngiffimmi susassaqartitsinermi
assigiinnngitsunik aningaasaliissutissagut millissasut.
Aamma Manasse Berthelsenimut una
oqaatigilaarlara, assersuutigiinnarlugu Sisimiuni sanaartornermik atuarfik
sunngiffimmi sammisassaqartitsivinnik nutaamik pilersitsiniarnermut aningaasaleeqataasinnaanngilaq,
aningaasanut inatsimmi allassimasoqanngippat. Taannaanna uanga peeqqugiga,
erseqqippoq siunnersuutinni, taannaanna uanga allanngorteqqugiga. Aningaasanut
inatsit maani sanasartagarput kommunit budgetiliornerat utaqqiinnarnagit,
illoqarfimmi sulliviit assigiinngitsut, ilinniarfiit, fabrikkit allalluunniit
peqatigiillutik aningaasaleeqatigiillutik allanillu aningaasaliisussanik
ujarlerlutik, pilersitsiniarsinnaannerat - tassa siunnersuutima qitigisaa.
Paasinarnerpoq?
Anders Andreassen, Inatsisartut Siulittaasuat:
Tassani oqaaseqartussaarummat siunnersuut
imaluunniit oqallisigisaq ullumikkut
immikkoortoq 33 taamaalillugu naammassivarput,
taavalu tullianut ingerlaqqissaagut.
Oqaluuserisaq naammassivoq.