Oqaluuserisassani immikkoortoq 38 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartuut Siulittaasuat, Anders
Andreassen.
Finn Karlsen, siunnersuuteqartoq, Atassut:
Kalaallit sulisorineqarnerulernissaat
anguniagaqarnermut tapertassatut siunnersuut, tassa kalaalinngorsaaneq
kalaallit sulisorineqarnerulernissaat, kalaallit salliutinneqarnissaat.
Pisortat suliffeqarfiutaani tamani kalaallisuinnaq oqaaseqartut
saaffiginninnikkut oqaatsiminnik atuisunik akineqartarnissaat anguniagaqarnitta
nalaani. Siuliani taagukkakka eqaallugit isumaqartuaannarama tamakku
oqaasiinnaavallaartut. Nalunngikkaluarpara kalaallit ilinniagaqarsimasut
amerliartortut, kisiannili uanga imaassorisarpara ineriartornerup tamakku
nassatariinnarai oqarsimanngikkaluaruttaluunnit kalaalinngorsaasoqassasoq
ullummikkut kalaallit ilinniarsimasut taakkuusut pigisimassagaluarpagut. Ilumut
pimoorullugu kalaalinngorsaaneq anguniassagutsigu malunnaatilimmik
takussutissalimmillu, taava arlaatigut iliuuseqartariaqarpugut. Taamaattumik
ilaatigut tapertaasinnaasumik siunnersuuteqarpunga imaattumik.
Suliffeqarfinni pingaartumik pisortat
suliffeqarfiutaani ilinniagaqarsimallutik sulisuusut ilinniakkaminnik
qaffassaaniarlutik ilinniaqqinniartut inatsisitigut
illersorneqarsinnaanngornissaat siunnersuutigaara. Tassa imatut paasineqassaaq,
ilinniarsimasoq qaffasinnerusumik ilinniaqqinniaruni ilinniaqqinninilu
naammassiguniuk suliffigisimasaminut uteqqissinnaanissani pinngitsoorani
qulakkeersimassagaa. Imaassorinartarmat maannamut ilinniarnerminni
naammassigaangamik soorlulusooq naammagiinnartaraat ilinniarsimanertik.
Isumaqarpunga ilinniaqqinnissaminnut nangaasartut qaffasinnerusumik
illinniareerlutik naammassigunik suliffissaarunnissartik arlerigalugu.
Taamaattumik pisariaqalerpoq qaffasinnerusumik ilinniartut
suliffigisimasaminnut uteqqinnissaasa qulakkeerneqarnissaa. Tassa naatsumik
oqaatigalugu siunnersuut inatsisiliornissamik siunnersuuteqarpunga.
Jonathan Motzfeldt, Naalakkersuisut Siulittaasuat:
Namminersornerullutik Oqartussat
pimoorullugu sulissutigaat nunaqavissut sapinngisamik amerlanerpaat qitiusumik allaffissuarmi
sulisorineqarnissaat. 1996 naanerani Namminersornerullutik Oqartussani sulisut
tamarmiusut 3.000 missaaniittut maannakkut 96-mi akissarsiatigut
malinnaaqqissaarneq najoqqutarigaanni 2.950-iusut kisitsisit taakkorpiaat
iluarsissutigilaassavakka. Taakkulu amerlassutsimikkut amerliartorusaarput
nunaqavissut akornanni ilinniarluarsimasut amerliartuinnarmata. Aamma
ilassutigilaarlara tassani pineqarmata Namminersornerullutik Oqartussat
suliffiutaanni tamani, imaanngitsoq maaniinnaq allaffissornermi, kisianni aamma
immikkortortaqarfiini, napparsimavinni sulisut, ilinniartitaanermi sulisut
taavalu aamma allatigut meeqqanik utoqqarnillu isumaginninnermi ilaasut. Taakku
tamarmik ataatsimut taakku kisitsisit imarivaat.
Kalaallit Nunaanni suliffissarsiortut
killilersimaarnissaat pillugu inatsisartut inatsisaanni nr. 27 30. oktober
1997-meersumi oqaatigineqarpoq sulisinnaasut maani najugaqartut atorfinnut
siulliusussaatitaanerat qularnaarneqassasut, sulisinnaasut nunatsinniittut
naammattumik piginnaaneqartut pigineqarpata. Kalaallit Nunaanni sulisinnaasut
suliffeqarnissamut siulliusussaatitaanerat qularnaarneqarpoq sulisitsisup
sulisinnaasunik avataannersunik atorfinitsitsinissaminnut akuersissummik
qinnuteqaqqaartussaatitaaneranut aammalu akuersissut taanna tunniunneqarsinnaalluni
atorfimmut pineqartumut piginnaaneqartunik sulisinnnaasumik kalaallinik
imaluunniit inunnik immikkut ittumik nunatsinnut attuumassuteqartunik
innersuussisoqarsinnaasimanngikkaangat. Matumani pineqanngillat atorfiit
akademikeritut qaffasinnerusumilluunnit ilinniagaqarsimasut. Tassani taaku
inatsimmi pineqanngillat.
Suliffeqarfiup iluarsaateqqinneqarnissaa
sulissutigineqalerpoq suliffeqareersut suliffeqanngitsullu periarfissaannik
siunissami pitsaanerusumik pitsaanerulersitsisussamik. Ilinniagaqarnissamut
periarfissat amerlanerusut neqerooruteqalernerisigut sulisinnaassusillit
ataavartumik suliffeqarnissaminnut periarfissaat pitsaanerulersinneqassapput.
Pissutsit imaapput inuit sulisinnaassuseqaraluartut amerlaqisut atorneqaratik
suliassaqartinnagit angerlasimatiinnarneqartartut isumaginninnikkut ikiuutinik
tunineqaannartarlutik. Taamatut ilatsiinnalersitsisimaneq isumalluutaagaluartunik
turinnginneruvoq akuersaarneqarsinnaanngitsoq. Tassami kingunerimmagu
aningaasartuuteqarnerulerneq ilaatigut avataaneersunik sulisoqarnikkut
tamatuma saniatigut inuit suliffissaaleqinermi eqqugaasut iluaqutaanerminni
aamma tutsuvigineqartutut misigissusiat eqqorneqartarmat. Pissusiilersimasut
tamakku suliffeqarnikkut ingerlatsineq pillugu isumasioqatigiinnissami
pilersaarutaasumi oqaluuserineqassapput, tassami naalakkersuisut
pilersaarutigaat tamatuma kingorna suliffeqarnikkut ingerlatsineq pillugu
nassuiaatit ukiakkut katersuunnermi saqqummiunneqarnissaa.
Sulisut ilinniarteqqinneqarnissaanik
pisariaqartitsinerisa misissuiffigeqqissaarneqarnerat Namminersornerullutik
Oqartussat aallartissimavaat. Misissueqqissaarnerit taakku tunngavigalugit
Sulisoqarnermut Pisortaqarfiup aaqqissuussaanerminut ilinniartitseqqinnermullu
immikkoortortaa pikkorissaanermik aallartitsivoq. Sulisoqarnermut
Pisortaqarfiup aaqqissuussaanermut ilinniartitseqqinnermullu immikkoortortaa
qulakkeeqataassaaq assigiinngitsunik suliallit tamarmik, sulisut nunaqavissut
pingaarnerutillugit, siuneqarluartumik ilinniarteqqinneqarnissaasa
pinissaannut. 1998-mi aningaasanik inatsimmi ataatsimoortumik
ilinniarteqqinnissamut 2 mio. koruunit Namminersornerullutik Oqartussat
immikkoortippaat. Sulisussanik nunaqavissunik sulisussarsinissamut periarfissat
pitsaanerulersinniarlugit aammalu qitiusumik allaffissuarmi sulisut
sulisoriinnarneqarnissaat anguniarlugu, taakkununngalu atugassarititaasut
pitsaanerulersinniarlugit.
Aningaasat immikkoortinneqartut atorlugit
Namminersornerullutik Oqartussat sulisorisatik tamaasa, tassa SIK-mi
ilaasortat, Atorfillit Kattufianni ilaasortat, siunnersortillu aammalu AC-mi
ilaasortat siuneqarluartumik ilinniarteqqinneqarnissaat aallartippaat. Tamatuma
saniatigut pisortaaffeqartut siuneqarluartumik ilinniarteqqinneqarnerat aallartereerpoq.
Aningaasat immikkoortinneqartut pingaarnerusumik siunertaraa sulisut
piginnaanngorsarneqarnissaat, taamaalilluni nunaqavissut sulisorisat
suliassanik ullumikkumit pitsaanerusumik isumagisaqarsinnaalerniassammata
aammalu nunaqavissut suliassanik ullumikkut sulisunik avataaniit tikisitanik
isumagineqartunik isumaginninnissaminnut piginnaasaqarnerulernissaat
qulaarnaarniarlugu. Naalakkersuisut pimoorullugu sulissutigaat sulisut
tamarmik sulinerminni ineriartornissamut periarfissat eqqortut pissarsiarissagaat.
Taakkununnga ilanngullugu
ilinniartitseqqinnissamut suliniutit annertunerulersinneqassapput,
taamaalillutik sulisut ullumikkumit annerusumik Namminersornerullutik
Oqartussani suliffissat siunissami suliffigisassamittut annertunerusumik
isigilissammatigit. Ilinniartitseqqinnissami suliniuteqarnikkut naalakkersuisut
qularnaarniarpaat sulisut aalajangersimalernerulernissaat, tamatumuunalu
atamaannarnerulersitsinissat ulluinnarnilu sulinermi angusaqarnerunissap
pilersinneqarnissaa. Sulisut ilinniakkaminnik annertusitsiniarlutik
illinniaqqinniartut ilinniaqqinnerminni sulinngiffeqarallarsinnaanissaannik
inatsisartuni ilaasortap Finn Karlsen-ip siunnersuutaa naalakkersuisut
tapersersortariaqartutut isumaqarfigaat. Sulinngiffeqarallarsinnaaneq eqqarsaatigalugu
sulisitsisup aalajangissavaa sulisoq ilinniarnermini aningaasarsiaqarani
sulinngiffeqarnissamut akuerineqassanersoq.
Isummerneq pisussaavoq suliffimmi
suliassat mianeralugit, tassa sulisitsisoq sulisuminik killilimmik
amerlassusilinnik ataatsikkut sulinngiffeqarallartitsisinnaammat suliffiutini
ingerlaannarniarsinnaaqqullugu. Taavalu piffissami aalajangersimasumi
sulinngiffeqarallartoqartillugu sulisoq piumasaqaateqarsinnaavoq atorfigisami
uterfiginissaanut, tamatumalu kingunerisaani atorfik sulinngiffeqarallarnerup
nalaani taartaasumik tamaallaat inuttaqartinneqarsinnaavoq. Isi ilaanni
uternissamut pisinnaatitaaffeqarneq imaassinnaavoq taamaallaat
qularnaarneqarluni atorfigisamut naleqquttumut, tassa allamut, utertoqarsinnaalluni.
Tjenestemandit, tassa atorfillit, pillugit
inatsimmi tunngavissaqarpoq sulisitsisup najoqqutassat naalakkersuisuni
aalajangigaat najoqqutaralugit aningaasarsiaqartitsilluni
aningaasarsiaqartitsinaniluunniit sulinngiffeqartitsisinnaalluni.
Aningaasarsiaqarani sulinngiffeqarallarnerit tunngaviatigut sunulluunniit
sammisaqartitsinissanut atortinneqarsinnaapput. Aningaasarsiaqarluni sulinngiffeqarallarnerit
aatsaat akuerineqarsinnaapput tapertaasumik ilinniaqarnissamik siunertaqarunik.
Ilinniaqqinissamut aningaasarsiaqarluni sulinngiffeqarallartitsisoqarnerani
ilinniagaqarnermi piffissap ilaani atorfimmiiginnarnissami siumut
nalunaaruteqarnikkut imminut pisussaatitsinissamut naalakkersuisut
piumasaqaateqarnissamut tjenestemandit pillugit inatsimmi periarfissaqartinneqarput.
Tjenestemandit pillugit inatsimmi periarfissaatitaasut atorneqarnissaanut
aalajangersakkat suli naalakkersuisunit atorneqanngillat.
Aningaasarsiaqarluni imaluunniit
aningaasarsiaqarani ilinniaqarniarluni sulinngiffeqarnerit pillugit apeqqut
isumaqatiginninniarnermi pingaartumik tjenestemandit kattuffiini arlalinni
oqaluuserineqartarsimavoq. Periarfissat illuatungeriit tunngaviatigut
isumaqatigisassaat suliarineqarsimapput taamaammat
aningaasalersorneqarnissaanut tunngasut kisimik amigaataapput. Pingaartumik
aningaasarsiaqarluni sulinngiffeqarnerit sulisitsisumut annertuumik
aningaasartuutissaapput, tassami ilinniagaqartumut
aningaasarsiaqartitsiitigaluni taartaasumut aamma aningaasarsiaqartitsisoqartussaammat.
Isumaqatigiissut malillugu sulisut
eqqarsaatigalugit ilinniagaqarniarluni sivisunerusumik sulinngiffeqarsinnaaneq
pillugu isumaqatigiissusiortoqarsimanngilaq, taamaallaat isumaqatigiissusiorfigineqarsimavoq
piffissami sivikinnerusumi pikkorissarnermi aningaasarsianut taartisiaqarluni
taartisiaqaranilu sulinngiffeqarsinnaanerit. Aningaasarsiassanut tamakkiisumik
taartisiassaqartitsisoqarnissaa isumaqatigiissutigineqarsimatillugu sulisut
kattuffiit tamatumunnga aningaasalersueqataasarput siunertamik taamaattumik
isumaqatigiinniuteqarnikkut angusat aningaasartaat atorlugit.
Ilinniartitseqqinnermi suliniutit nutaat nassatarivaat avataaniit tikisitanut
aningaasartuutit ullumikkut aningaasartuuteqarfiusaqisut
annikillisinneqarnissaat, tamatuma peqatigisaannik il. il. sulisut
aalajaatsumik sulisorineqarnissaannut ilapittuutaassalluni.
Ilinniartitseqqinnerit
pikkorissartitsinerillu inunnut ataasiakkaanut immikkut aaqqissuussat
qularnaassavaat Namminersornerullutik Oqartussani sulisunut maannakkumiit
annertunerusumik aningaasalersuinissaat, tamatumuunalu qularnaarlugu sulisut
suliffimminnut ilumoornerulersinneqarnissaat. Tassami oqaatigineqarsinnaammat
sulisut amerlasuut pisortaqarfiit il.il. akornanni nuttartuusut Pisortaqarfiit
kommuni aammalu suliffiit allat ullumikkumiit annertunerusumik sulisuminnut
aningaasalersuinerulerpata tamanna sulisut suliffimminnut
ilumoornerulernissaanut aamma sunniuteqassaat. Ilanngullugu
oqaatigineqarsinnaavoq kommunit ilaatigut KANUKOKA aqqutigalugu aamma kommuni
sulisunik illinniartitseqqinninnernik pikkorissaqartitsinernillu
ingerlassaqarmata, taamaalillutik kommunit qularnaajaaqataapput sulisut
naleqquttunik neqerooruteqarfigineqarnissaannut, taamaalillutik atorfiit
sapinngisamik amerlanerpaat sulisussanik nunaqavissunit
inuttaqarsinnaaqqullugit.
Taamaak oqaaseqarluta manna saqqummiussaq
inatsisartunut apuunneqarpoq.
Laannguaq Lynge, Siumup oqaaseqartua:
Aallaqqaatigalugu Siumut ukioq 2002
tungaanut partiitut anguniagaanni ataatsimeersuarnissami pisussami
oqaluuserineqartussatut pingaaruteqartut allassimasut issuaavigilaassavakka
qulequttat imaattut: Ilinniagaqassutsikkut piumasaqaatit
naliliiffigineqassapput inuiaqatigiinnut pitsaasumik sullissinissamut
pisariaqartitsinermullu naapertuuttumik. Aamma: Suliffeqarnermi ilinniartitseqqittarnerit
piginnaanngorsaqqinnerillu periarfissiissutaajuassapput suliffeqarfinnut
pisariaqartinneqartunut naleqquttuarnissaq pisariaqarmat. Tassa qulequttani
ilaasussaapput Siumup oqallisigisassaanni.
Inatsisartuni ilaasortap Finn Karlsen
siunnersuutimini qitiutippaa kinaluunniit ilinniakkaminik qaffaaniarluni
ilinniaqqinniartoq suliffitoqqaminut uteqqissinnaajuartariaqartoq. Siunnersuut
taassuminnga qiteqartillugu oqaaseqarfigissagutsigu Siumut-mit tamaat
isumaqataaffigisinnaanngilarput. Tapersersortuarparput sukkulluunniit
sulinermi tunngatillugu kinaluunniit suliffeqartoq ilinniaqqinnissamut
periarfissaqartinneqartuartariaqartoq, kisiannili isumaqarpugut suliffeqarfik
sulisorisami pikkorissareerneragut atorfitoqaanut uterteqqissagaa inatsisitigut
piumasarisariaqanngitsoq. Tassami taamaaliornikkut killormut sulisoq
pikkorissarsimasoq qaffasinnerusumik atorfeqalernissaanut aallaat
killiliiffigineqaannarsinnaammat.
Siumut-mi isumagaarput kinaluunniit ilinniaqqittoq
suliffeqarfigisaminut pikkorissaqqereernermini uteqqinnissaminut
periarfissaqartinneqassasoq. Isumaqarpuguttaat suliffeqarfik sunaluunniit sunik
pisinnaasalinnik sulisoqarnissaminut nammineerluni aalajangiinissaminut
kiffanngissuseqartariaqartoq. Siumut-mi isumaqarpugut pikkorissartarnerit
akissaateqarnikkut pitsanngoriaatsinik aamma kinguneqartinneqartariaqartut,
massakkummi pissutsit ilaatigut imaapput suliffeqarfinni assigiinngitsuni
akissarsiatigut assigiinngitsunik atuisoqarluni, naak pikkorissutsikkut
akisussaaffitsigullu piumasarisaasut assigiittaraluartut. Taamaattoqarnera
Siumut-mit akuersaarsinnaanngilarput isumaqaratta suliat assigiit assigiimmik
akilerneqartariaqartut. Siunnersuutip qulequtaanut tunngatillugu Siumut-mi
nalunngilarput Kalaallit Nunaanni suliffissarsiortut killilersimaarnissaat
pillugit inatsisartut inatsisaat nr. 27 oktober 30-ningaanneersoq 1992-meersoq
nunaqavissut ilinniakkamikkut atorfimmut inuttassarsiuunneqartumut
naapertuuttumik ilinniagaqarsimasut siulliunneqarnissaanut imaqartoq atorlugu
kalaallit amerlanerpaat sulisorineqalernissaat qulakkeersimaneqarsinnaasoq.
Nalunngilarputtaaq inatsisip taassuma atuuttinniarnerani arlalitsigut aamma
ajornartorsiuteqartoqartoq.
Taamaattumik Siumup inatsik taanna toqqammavigalugu
immikkut akuerineqarnissamik periarfissaqarnerup sukateriffigineqarnissaa
pisariaqartippaa, ilaatigut immikkut akuersissuteqarnermik atatillugu
akiliutaasartut annertusineratigut. Siumut-mi pisariaqartutut isigalugu nuannaarutigaarput
sulisut ilinniarteqqinneqarnisaannut pisariaqartitsinera pillugu
Namminersornerullutik Oqartussat misissuititsilersimammata. Aammalu
erseqqissaatigineqartoq misissuinermi nunaqavissut pisariaqartitsinerat
pingaartillugu misissuiffigineqartoq paasillugu Siumut-miit missuinerup
takutikkumaagaai pissangalluta utaqqissavagut.
Naalakkersuisut ilinniartitseqqinissamik
pilersaarutaat ukioq manna aallartinneqareersimasup takussutissaasoraavut
naalakkersuisut aamma pimoorussamik sulisoqarnerup tungaa qanoq iliuuseqarfigigaat.
Taamaalillutik nunaqavissut ullumikkornit pitsaanerusumik isumagisaqarsinnaalernissaat
anguniarlugu kingunerissagaalu avataaniit tikisitanik suliassat isumagineqartut
tigujartuaarneqarnissaat. Taamaattumik siunnersuuteqartup kalaallit sulisorineqarnerulernissaannik
Aoqaasiinnaavallaartumik@ oqarnera naalakkersuisunik
pimoorussisunik oqaasiinnaangitsumillu qanoq iliuuseqarfigineqartoq
isumaqarfigaarput. Siumut-miit maluginiarparput ukiuni kingulliunerusuni
kommuninittaaq sulisorisat pikkorissartittuarnissaat assut pingaartinneqaleriartortoq,
tamannalu minnerunngitsumik kommunit kattuffiata KANUKOKA-p aamma ilinniartitseqqinnissamik
pingaartitsineranik neqerooruteqarnermillu tunngaveqartoq siunissami ingerlaannassasoq
Siumut-mi neriulluarfigaarput. Taamaalilluni kommuninittaaq takutinneqarpoq
kommuni sulisorisaminnik pikkorissartitsinerit aqqutigalugit aalajaatsunik
nunaqavissunik sulisoqarnissaminnik pimoorussamik pingaartitsinerat, tamannalu
Siumut-mi nuannaarutiginngitsuunngilarput.
Naalakkersuisut qaammat ataaseq
qaangiuppat sulisoqarnerup aaqqissuuteqqinneqarnissaanut suliaqarnermut
atatillugu Qaqortumi ataatsimeersuartitsinissaat Siumut-mit neriulluarfigaarput
peqatigissallugu immersueqataanissamut siunertaralugu.
Otto Steenholdt, Atassutip oqaaseqartua:
Maani issiasunit naluneqanngilaq ukioq ataaseq sioqqullugu aamma Atassutip qulequtaq taannarpiaq oqaluuseritikkumallugu saqqummiukkaluarsimammagu akissuteqaalli oqaluuseritinniakkamut tulluanngimmat oqaluusereqqusaq utertikkallarsimallugu. Taamanikkut naalakkersuisoq neriorsuimmat pineqartoq pillugu saqqummiussiumaarluni. Taamanikkut oqallisigineqartussaagaluaq allatut ajornatumik kinguartittariaqaleratsigu siunnersuummik saqqummiussisutut avataanit tapersersuingaartut oqaatigisimavagut, tamakkualu ilagaat Sulinermik Inuutissarsiuteqartut Kattuffiat taassumallu allagaai taamanikkut ersarissumik oqaluttarfik manna atorlugu tamanut saqqummiullugit atuarsimavakka.
Aamma ullumikkut allakkat tusagassiuutinut nalunaarutitut nassiunneqarsimasut Atassummut apuunneqarsimasut issuarlugit atuarniarakkit inatsisartuni siulittaasorput qinnuiginiarpara allakkanik atuaanissara akuereqqullugu. Ima allakkat qulequtaqarput: Kalaallinik pisortanngortitsisarneq kalaalinngorsaanermut aqqutissat pitsaanerpaat ilagaat. Tunngaviatigut taperserpagut inatsisartuni ilaasortap Finn Karlsen Qanorooq-kut 5. maj 1998 oqasii ilaatigut kalaallit pisortatut inissinneqartarnissaannik aqqutissiussinissamik imallit. Ataani atsiortugut sammineqartumut oqalliseqataanissamut qulaajaaqataanissamullu pimoorullugu akoorusuppugut siunertaralugu piffissami tulliuttumik pisortat atorfiisa amerlanerujartuinnartut kalaallinik inuttalerneqartalernissaat.
Atorfinitsitsisartut kajumissaarusuppagut atorfinitsitsiniarnermi periaaserisarsimasatik nalilersoqqeqqullugit. Taamattaaq aamma kalaallit ilinniarluarsimasut piukkunnaatillillu kajumissaarneqartariaqarput pisortatut atorfiit inuttassarsiuunneqaraangata qinnuteqartaqqullugit. Pisortanik atorfinitsitsisarnermi pingaarnerusutut isiginngilarput atorfinittussap atuagarsornikkut qanoq qullasitsigisumik angusaqarsimaneranik aalajangiisunngortitsisarneq. Periarfissatut isigaarput kalaallit aqutsinissamut sulisitsinissamullu piukkunnaraangata pisortassatut ikkunneqartarnissaat. Sulinermikkut misilittagaqalerlutik pikkorissartarnikkullu ilinniaqqittarlutik pisortanngortarumaarmata kalaallit anguniagaannut naapertuunnerusumik aqutsisussat. Allagartik naggaserpaat: Kalaallit ilinniarsimasut qallunaanik inangerneqarsimasut amerlavallaaleqaat. Siunertaasinnaanngilaq sulisussaaleqilerlunilu qallunaanik allamiunilluunnit tikisitsiinnartarneq. Atorfinitsitsisarnikkut periaatsit pillugit erseqqissumik politikkikkut aalajangersaasoqarnissaa kissaatigaarput. Ataatigut allassimasut maani atuanngiinnarpakka. Tassa taamatut allagarsivugut.
Akissuteqaat manna tunngavigalugu oqallinnissaq ilinniaqqitsitaalernissamik eqqarsaat tunngavigalugu ingerlanneqassaaq. Qularutissaanngilaq nunaqavissut ilinniaqqitsitaalernermikkut ikiorserneqarsinnaasut, ajunngilaq aamma taamaasiornissaq ajornartorsiummut imaannaanngitsumut iluaqusiisinnaavoq. Eqqumiigilaarlugu oqaatigissavara siunnersuut kalaallit sulisorineqarnerat pillugu apeqquteqaataammat, akissullulli imaanneruvoq kalaallit ilinniarteqqittalernissaannik imaqarluni.
Akissuteqaat oqaaseqarfigilersinnagu, Atassummit piffissaq atulaartigu aamma kalaallit ilinniarluarsimagaluit nunaminni atorluarneqanngitsut tusarsaajuarlutillu takussaajuarnerata Inatsisartuni eqqaamaneqartuarnissaa, Atassummit pingaartitariuaratsigu. Kalaallit inuusuttut politikerit piumasaannik ilinniagaqarluarnermik naammassinnissimallutik nunaminnut utertut atorfinitsitaannginnerminnik ajorusullutik oqaaseqaatigisartagaat tusarsaajuarput. Ilaat Danmarkimut utiinnartarput, ajornanngivissumillu tappavani atorfinittarlutik.
Taakkununnga erseqqissaatissaq uaniippoq, tamatta Danmarkimi ilinniarsimasugut naluneq ajoratsigu ilinniarnitsinnik iniinnavilluta atorfinnut qullerpaanut, aamma nunatsinni, atorfinitsitaasinnaannginnerput naatsorsuutigereertaratsigu, ukiunilu aamma makkunani illoqarfiit ilaanni inissaaleqinerujussuaq nunatsinni atorfinikkaluanut aamma pakatsissutaalluni Danmarkimut utiinnartartunut pisooqataanngitsuunngimmat. Ajornartorsiut ersarereersoq Naalakkersuisunit eqeersimaarfigisariaqarpoq.
Inuusuttatta ilinniarluarsimasut atorluarneqarnissaat, tamatta maani pingaarteqigatsigu ukiuni aalajangersimasuni tikisitanik atorfinitsitsisarneq annerusumik eqqarsaatigilerniartigu. Tamatumunngalu aamma ilanngullugu taakkua ilinniartitaqartuarnissaat ersarissumik aqqutissiullugu. (Isummat taakku marluk nutaajunngillat uagummi nutaajunngillat piviusunngortartussatut eqqarsaatiginiartigik.) Suliffiit suugaluartulluunniit kalaallit nunaminni sulisorineqarnerunissaat eqqaamajuassagaat innersuuttuarniartigu.
Isumagisimavarput, soorlumi aamma akissuteqaammi taaneqartoq, suliffiup suugaluartulluunniit sulisuni ilassagunigit nunatta sineriaani suliffissarsiortarfiit tamaasa saaffigissagai sulisussaq amigaataasoq sinerissami sumiluunniit nassaariniaqqaassallugu. Isuma tamanna ajunngeruttortoq ullumikkut nunatta iluani pissutsit pissutaallutik ilaatigut qarsupittuusaarneqartarpoq.
Sulisussaq sinerissami sumiluunniit nassaarineqaraangat nunaminit suliffittaassami tungaanut ingerlanera qujanartumik pisortanit kommuuninilluunniit akilerneqartartussaallunilu akilerneqartarpoq, tassa pisortat suliffeqarfiini tamanna atorneqarneruvoq, kisianni ajoraluartumik namminneq suliffiutilinnit ilaatigut tamatigut atorneqarani Danmarkimit tikisitsiinnarnissaq siulliunneqartarluni.
Inatsisartut erseqqivissumik oqaatigisariaqarpaat sulisussarsiap nunaminit nunamut allamut atorfinikkiartorluni nuunnini nammineerluni akiligassarinngikkaa, taama oqarpugut erseqqissarumallugu piumasaqaat aamma namminersorlutik suliffiuteqartunut atuummat, aalajangersagarmi ilaatigut qarsupinneqaraangat allaat tamakku suliffiutillit kammalaatiminnik atorfinitsitsiuartut isornartorsiorneqarlutik taakkarsorneqalersarmata. Taakkuulluni aamma taamatut pineqarneq nuannernavianngimmat.
Suliffiit ukiuni makkunani aalajangersakkanik unioqqutitsillutik iliorsimasut akiliisinneqartarput, isumaqarnarsivorli suliffissaaleqinerup nalaani taama aalajangersakkanik soqutigitsaalliorneq misinnarnerumik kinguneqartinneqartariaqalersoq.
Taavalu siunnersuummut akissuteqaat tikeriartigu. Aatsaat nunatsinni sulisussaqanngivippat tikisitseqqusineq siuliani taariigarput erseqqissarneqarpoq. Inuit sulisinnaassuseqaraluartut atorneqaratik socialimit aalliinnartartunngorsimasut, ilatsiinnartunngorsarneqartullu akissuteqaammi taakkarsorneqarput, soorunalumi akuersaarneqarsinnaanngitsutut oqaatigineqarlutik.
Sulisoqarnikkut ingerlatsineq pillugu isumasioqatigiinnissaq, Naalakkersuisullu pilersaarutaat ukiakkut katersuunnermi saqqummiussassaq taakkarsorneqarput. Ilinniaqqitsitsisarnissaq taakkarsorneqartoq allamut Atassummit assersuussinnaanngilarput, soorlu Danmark-imi suliffissaaruttut ilinniaqqitsitaasarnerat.Taaamatut Danmark-imi ilinniaqqitsitaasartut amerlanersaasa anniaatigiuarpaat, tamanna ilinniaqqitsitaaneq qaangiukkaangat ima ukioqalereersarlutik suliffinnit tamanit tigujumaneerutereersimasarlutik.Tamanna Naalakkersuisumut mianersuutigeqquarput. Ilinniaqqitsitsineq sulerusuttunut sinnassaatitut atorneqassanngilaq, ilinniagaqarsimanngivissunut suliamilluunniit nangitsisariaqartunut ajunngilaq, kisianni suliamut ilinniagaqareersimasut sineriammili suliaqaratik sanioqquataaginnarneqartut siulliullugit sulisorineqarnissaat sakkortuumik sulissutigineqalerniarli, landsrċditoqqap aalajangersagai allat kingumut qaqeqqillugit eqqarsaatigeqqissinnaassapput, sulisussallu suliffissarsiorfiit innersuutaat atorlualerlugit sinerissami sumiikkaluartuniluunniit taakkua akissaajaatiginngisaannik tamatigut illoqarfik suliffissaq ornitsittalerlugu.
Ilinniaqqinniartut pitsaasumik pineqarnissaannik Naalakkersuisup eqqarsaatai Atassummit ajoriffissaqartinngilagut. Suliffiit periaasii maani uagut attussanngilagut akissarsiat pigiinnarlugit, akissarsiaqaraniluunniit sulinngiffeqartarnerit annerusumik minnerusumilluunniit malittarisassaqareermata. Tamatumunngali tunngatillugu assut pingaartipparput suliffimmut pikkorissareernerup kingorna utersinnaaneq.
Assortunngilarput Naalakkersuisoq oqarmat ilinniaqqitsitsisarneq iluatsittumik inerneqalerpat tikisitat akisoqisut atorneqarnerat minnerulissasoq, kingumut paaseqquvarput uteqqillugulu: Ilinniartitseqqittalernissaq sapinngisaq tamakkerlugu sinnassaatitut atornaveersaaqqullugu.
Neriorsuutigikannerneqarpoq pisortat, kommuunit aammalu suliffiit allat annertunerusumik sulisuminnut aningaasalersuileratarsinnaasut, tamatumalu kinguneriumaaraa, sulisut suliffimminnut ilumoornerulernissaat. Naalakkersuisunut eqqaasitsissutiginiarparput, kalaaleqatitta suliffimminnik paarsinerlunnerarneqartarnerat Atassummit upperinngilluinnaqqissaaratsigu. Soorunami immaqa ilaatigut taamaattoqartarsimassaaq akisussaaffimmik ersarissumik tunineqarsimanngitsuni, tamannami inunni tamani pingaartinneqartaqimmat, aammalu Atassummit ersarissumik paatsuugassaanngitsumillu tamanut paaseqqusarput aajuna: Inuit silarsuup ilaani sumiluunniit inunngorsimasut manna tamarluinnarmik assigiissutigigaat tassalu: Namminneq nunaminni inuiannit allanit tamatigut sallersaatinneqarlutik suliffinni tamani sallersaatinneqarlutik sulisorineqarnissartik, tamannalu kimilluunniit assortorneqarsinnaangilaq!
Anders Andreassen, Inatsisartut Siulittaasuat:
Atassutip oqaaseqartuanut piumasarissavara allakkani issuarneqartoq piaartumik maani inimi aamma agguaanneqassasoq.
Mannasse Berthelsen, Inuit Ataqatigiit oqaaseqartartuat:
Lars Sĝrensen maaniissinnaasimanngimmat saqqummiussassaa saqqummiutissavara.
Inatsisartunut ilaasortap Finn Karlsen-ip siunnersuutaanut tunngatillugu Naalakkersuisut akissuteqaataat Inuit Ataqatigiinniit ataatsimut isigalugu naammagisimaarparput.
Isumaqarpugut siunnersuut allakkatigut akineqaannarsimasinnaagaluartoq, tamanimmi ilisimaneqarpoq, Inatsisartut ukiakkut ataatsimiinnerisa naalaani sulisoqarnermut Naalakkersuisup nassuiaatigimmagu aasaru Qaqortumi pisussami, Finn Karlsenip siunnersuutaatut ittut nangeqattartumik Inatsisartuni oqaluusigineqartuartut sulisoqarnikkut ingerlatsineq pillugu isumasioqatigiinnissami sulisoqarnermut attuumassutilinnit peqataaffigineqartumik nalilersorneqarumaartut. Tamatumalu kingorna Naalakkersuisut Inatsisartunut ukiakkut ataatsimiinnissaanni nassuiaammik saqqummiussaqarumaartut, tamanna Inuit ataqatigiinniit qilanaarilereerparput.
Inuit Ataqatigiinniit nuannaarutigaarput, Inatsisartut Siulittaasoqarfiata siunissami Inatsisartunit nangeqattaartumik siunnersuutigineqartut pillugit eqqumaffiginerullugit suliniuteqalermat.
Ilaatigut maluginiarparput Inatsisartuni ilaasortat ilaasa nangeqattaartumik siunnersuutitik allakkatigut akineqartariaqaraluartut Inatsisartut siulittaasoqarfiani ilaasortaanertik aqqutigalugu siunnersuutitik Inatsisartunut oqaluuseritinniarlugit immikkut ilungersuuteqartartut.
Tamanna Siulittaasoqarfimmiit qimanniarneqarmat pissusissamisoortutut pisariaqartutullu isigaarput. Inatsisartummi Siulittaasoqarfiata suliassaasa pingaarnersaraat Inatsisartut assigiimmik sullinneqarnissaat.
Naggataatigut Inuit Ataqatigiinniit oqaatigissavarput nuannaarutigigatsigu sulisitsisut sulisutik ilinniartitseqqinnernik pikkorissartitsinernillu neqerooruteqartarnertik ingerlannerulersimagaat.
Isumaqarpugut tamanna aqqutip ilagisariaqaraa kalaallit atorfinnut qaffasinnerusunut tigusiartuaarnerannik.
Bjarne Kreutzmann, Akulliit Partiiat:
Ilinniaqqittarneq ilinniarnermillu
nangitsisarneq ajunngitsoqutit ilagaat, tamatumunnga kinaluunniit
akerliussanngilaq. Nunatsinnilu pimoorullugu ilinniagaqarsimasut ajoraluartumik
amerlagisassaanngeqimmata taamatut ilinniaqqittarneq amerlasuunut
ikiorsiissutitsialaavoq pikkorissaqqinnissamut.
Ima isumaqanngikkaluarpinga
ilinniaqqikkaanni taava Aatorfik
pitsaanerusoq@ taamaalilluni
pissarsiarineqassasoq, ilinniaqqinnermili anguneqartussaq tassaavoq sulisut
pineqartut atorfitik pitsaanerungaartumik ingerlassinnaalertarmatigik. Aamma
ilinniarnerup nalaani ilinniartitseriaatsit allanngorarnerat taamaalillunilu
ilinniagassanik pilersaarutit nikerarnerat pissutigalugu
pissarsiarinngitsoorsimasat ilinniaqqinnikkut pissarsiarineqarsinnaasarput.
Ajoraluartumik taanna sillimaffigereerneqarajunngilaq. Tamanna kingullermik
takuarput, ataasinngormat isumaginninnermik perorsaasunut ilinniarnerup
oqallisiginerani, tassa ilinniarneq allanngortinneqarmat taamaallaallu
oqaatigineqarluni, taamatut ilinniagaqareersimasut ilinniaqqittariaqassagunartut,
tassa angusat pitsaanngissimappata.
Atorfik pitsaanerusoq anguniassagaanni
taava tassani ilinniaqqinneq pineqartussaanngilaq ilinniarnermilli nangitsineq,
tassunga atatillugu pisortatut ilinniarneq maanna ingerlanneqartoq piillugu
Naalakkersuisup oqaasii maluginiarpakka.
Aammattaaq maluginiarpakka sulisoqarnermik
politikki isumasioqatigiisitsinissamik Naalakkersuisup oqaasii ilaatigut tamanna
sukumiisumik oqallisigineqartussaassalluni.
Ilinniarnermik nangitsinermut atatillugu
sulinngiffeqartarneq pisortaqarnermik politikkiuvoq, matumuuna
inassutigiinnagassarput isumaqatigiinninniarnermi illua`tungeriit aappaagu
oqallisissagaat, taamaattorli Namminersornerullutik Oqartussani sulisunut
3000-it missaaniittunut sulisitsisutut erseqqissumik kaammattuutigerusuppara,
apeqqut taanna akuersaartumik oqallisigeqqullugu. Akissarsiat pigiinnarlugit
sulinngiffeqartoqassanersoq imaluunniit akissarsiaqaatiginagu
sulinngiffeqartoqassanersoq aamma AEB-mit aningaasat qanoq amerlatigisut
matusissutigineqassanersut, tassani ilaatigut apeqqutaassaaq
pisariaqartitsinerup qanoq annertutigineranik misissueqqissaarneq ilaatigullu
apeqqutaassalluni sulisoqarnermik politikki pillugu isumasioqatigiinnissamut
matumani siuliini taaneqartumit qanoq nalunaaruteqartoqarumaarnersoq.
Anthon Frederiksen, Kattusseqatigiit:
Inatsiarsartut suleriaasianni ' 41 naapertorlugu Inatsisartunut
ilaasortap, Finn Karlsen-ip, kalaallit sulisorineqarnerulernissaannut
aaqqissuussinerup siornatigornit annertunerusumik atorneqarnerulernissaanik
siunnersuutaanut imatut oqaaseqassaanga:
Ukiut 20-t sinnerlugit qaangiusimalerput,
nunatsinni namminersulernissaq oqallisigineqarluni aallartinneqarmat.
Taamanikkullu nunatsinni naalakkersuisumik aqutsisuusut, aammalu ullumikkut
suli aqutsisuusut ilaatigut oqarput:@ Kalaaleq nunamini naalagaassaaq, kalaallit salliutinneqarlutik
sulisorineqassapput@.
Ilarpassuilu allat isumalluarnartut ilanngullugit.
Kisianni namminersornerulersimaneq
ajunngitsorpassuarnik nassataqarsimagaluartoq aamma ajortorpassuarnik
nassataqarpoq, tamanna miserratissaanngilaq. Kalaallit inuiaat namminersornerulersimanertik
ilimagisamiit akisunaarsimaqaat. Allaat ilaatigut oqartoqartarpoq, namminersornerulerattagooq
aatsaat taamak tikisitat amerlatigisut nunatsinnut tikisinneqartalerput,
tamanna qanoq paasisariaqarlunilu qanoq isumaqarpa? Pereersut pisimasullu
uterfigineqarsinnaanngitsut takutereerlutalu oqaluttuuppaatigut
misiariartoqarsinnaajunnaarlugu.
Taamaattumik siunnersuuteqartoq,
Inatsisartunut Ilaasortaq, Finn Karlsen, ilumoorluinnarpoq ilaatigut oqarami,
kalaallit salliutinneqarnissaannik anguniagaqarluni oqalunneq oqaasiinnaavallaartoq.
Taamaammat Naalakkersuisut Kattusseqatigiinniit inakkusuppakka kukkussutit
nasserutigalugit ilinniarfiginerusariaqaraat, nassuernermi kanngunanngilaq.
Tassami naalakkersuinermik ingerlatsinermi
aqutsisut nassuerutigisariaqagaasa ilagimmassuk ukiuni 19-ini namminersornerulersimanermi
suliassanik pingaarnerit ilaat naammaginartumik suliniutigisimanngimmassuk,
tassalu kalaallinik sulisorisanik ilinniartitaanikkut, piginnaanngorsarnikkut
atorfeqartitsinikkullu tatiginninnermik salliutitsinissamillu annertuumik suusupaginnissimanertik
pissutigalugu maannamut tikisitat ilaat
pisariaqartivissorneqartussaanngikkaluartunik allaat suli taama amerlatigisunik
sulisoqarnermik kinguneqarmat.
Aap, tikisitsisarneq
killilersimaarniarlugu inatsiseqaraluarpoq, kisianni sumut iluaqutaassava
inatsit atuuffissaminut atortinneqarani assiliaataaguni? Tamannami ilaatigut
sulisoqarneq pillugu nassuiaat siusinnerusukkut inimi maani Naalakkersuisuniit
saqqummiunneqarmat uppernarsarneqarpoq.
Naggataatigut Kattusseqatigiinniit
taperserniarpara, sulisoqarneq pillugu kiisami kingusikkaluartumik
misissuinerit suliniutillu ingerlanneqarlermata, tamannami
siusinnerujussuakkulli ingerlanneqarsimasariaqaraluarmat.
Finn Karlsen, siunnersuuteqartoq, Atassut:
Siunnersuutigisara naatsuaqqamik oqaaseqarfigilaarniarpara. Tassa assortuussutigineqarlu- sinnaavoq, ilumoornersoq kalaalinngorsaanerit piviusumik ingerlanneqarneri(sut) imaluunniit oqaasiinnaavallaarnera(sut) uanga qanorluunniit oqartoqaraluarpat taanna isumagaara, oqaasiinnaavallaartoq. Soorlu Anthon Frederiksen-i oqartoq. (nalinginnaavallaarujussuarpoq?) ullumikkkut uanga isumaga malillugu, maani qaqisoqarpat aamma qanorluunniit oqartoqaraluarpat uanga tassa isumagivara taanna, taamaattumik Inuit Ataqatigiit oqarnerat, allakkatigut akiinnartariaqarsimagaluartoq taanna utikulunneqarmat, kisianni isumaqarpunga aatsaat taamaattumik saqqummertoqartoq. Kalaallit ilinniaqqillutik suliffimminnut uteqqinnissaat qulakkeerneqarnissaa siunnersuutigaara.
Isumaqarpunga aatsaat taamaattumik saqqummertoqartoq, taamaammat isumaqanngilanga uanga allakkatigut akineqaannartariaqartoq, ilaatigut pasillerneqarpunga siulittaasoqarfimmi ilaasortaanera iluaqutigalugu taanna qaqissimagiga, taamaattoqanngilaq. Kisianni tassa uani qitiuvoq, kikkulluunniit ilinniarlutik naammassigunik immaqa ukioq ataaseq marlulluunniit sulisimallutik suliffimminni sulereerlutik ilinniaqqinnissaminnut uteqqinnissaminnut qulakkiissagaat sumi suleqqinnissartik, soorlu maani assersuutigiinnarlugu Namminersornerullutik Oqartussani. Suleqqinnissartik qulakkiissagaat, tassa taanna pivara. Kisianni tassa paasivara tamanna annerusumik tapersersorneqanngitsoq, ajoraluartumik. Kisianni tassa partiit ilaasa paasivakka Atassutillu Kattusseqatigiillu tapersersoraat. Taakku qutsavigissavakka.
Paasinarpoq tapersersorneqanngitsoq tamanna, kisianni tassa isumaga malillugu maangaannaq killinnianngilanga, kalaallit sulisorineqarnerulernissaannut oqalunnerput timitalertariaqaratsigu.
Jonathan Motzfeldt, Naalakkersuisut Siulittaasuat:
Qujassutigaakka akissuteqataasut. Aammalu ilumoortumik oqassaguma akissuteqartuni isumaqatigilluinnaqqissaarpara, Mannasse Berthelsen-i oqarmat, allakkatigut taanna akisimaannartariaqaraluartoq. Inatsisartut nalunngimmassuk ilumut, Mannasse Berthelsen-i oqarneratut apeqqut taannarpiaq juunimi ataatsimeersuassutigineqarluni ukiarulu aamma saqqummiisoqassammat apeqqutit taakkua pillugit, kalaallit sulisorineqarnerannut tunngasunik apeqqutit.
Erseqqissaatigilaassavara aallaqqaasiininnut tunngatillugu oqaatigigakku inuit Namminersornerullutik Oqartussat ataani oqaatigissavara aamma pisortaqarfiit tungaani atorfeqartitsinerit kommunit Namminersornerusut taakkuupput uagut annertunerpaamik akisussaassuseqarfigisagut. Namminersortunik ingerlatsiviusut privat-imik ingerlatsiviusut inatsit aamma malitassaraat kisianni aamma taakkua malitassaqartarput, inimi maani akuerisanik illuliassat ukioq manna naammassisassat pilerngunneqarlutik ingerlanneqartut tamatigut inuttassaqarneq ajortut aamma maanngaanniit piffissaq eqqorlugu inissappata aningaasartuutissat taakku pineqartut iluani amerlaqisutigut aamma avataaninngaanniit sulisussaminnik suli aallertuartariaqartut.
Pissutsit taamaammata eqqaamassavagut inimi maanngaanniit aalajangikkat sanaartugassarparujussuit aasap ingerlanerani naammassisassat naammassissappata avataaninngaanniit amerlaqisunik aallertoqartariaqartarpoq suli. Taamaattumik tamakku ilanngullugit aamma eqqarsaatigisariaqarput, amerlaqisutigut uagut aamma inimi maani aammalu sinerissami innuttaasuut piumasaat naammassiniarlugit oqartaratta ima amerlatigisunik ukioq manna sanaartortoqassaaq, taakkulu piniarlugit avataaninngaanniit aamma tikittoqartariaqarluni. Oqaatigissavara qujanaqaaq avataaninngaanniit maanga aamma suliartortoqartarmat suli. Aamma taamaappat ininngitsuukkat amerlanerussagaluarmata.
Mianersuutigeqquara oqaasiinnaat atorlugit oqarluartaarnerujussuarnik kisimi taaneqartarmat maani manna tikillugu suliassat ingerlanneqarnerinik taarsiiartorneq, taamaattoqanngilaq: Namminersornerullutik Oqartussani akissarsisartut 2950-iusuni taakkunani uagut allaffeqarfitsinni sulipput, 1996-ip naanerani inuit 376-t taavalu taassuma ataani immikkut siulersuilluni sulisitaasut inuit 278-it, taavalu meeqqerivinni, napparsimavinni, atuarfinni allanilu sulisut 2296-it katillugit 2950-it taakkunanilu immikkoortiterissagaanni kikkunik qernertunik nuaqarnersut tungujortunillu iseqarnersut allallu misissuiumasut misissorsinnaavaat, kisianni tamarmik sulilluarput. Tamarmik suliassaminnik naammassinnilluarput, tassalu pingaarnerpaaq.
Aammalu taakkua sulisorisagut piginngikkutsigit amerlaqisut ingerlasinnanngillat. Taamaatumik qujassutigissavara qallunaajuppata kalaaliuppataluunniit inuit 2950-it suliassaminnik paarsilluarmata.
Siumukkut oqaaseqartuata oqaatigaa ilinniartitseqqittarnerni isumaqarpunga periusissaq ajunngitsoq tikkuarneqartoq, taamatut ilinniaqqittarnerit sullivinni pikkorissarnerit aamma ilaqartinneqartariaqarput akissarsiatigut aamma pitsannguallaatinik, tamanna aamma kinguneqareersussaammat suliffinnut annertuunerusunut aamma pilerngussinernut ilanngussinnaanermut. Taanna isumaqatigilluinnarpara taama eqqarsarneq, sunaluunniit aamma pikkorissartitsineq pisortaninngaanniit ingerlanneqarpat, kommuni imalunniit Namminersornerullutik Oqartussani taava aamma qallunaat oqartarnerattut gulerod-eqartariaqarpoq, pinngitsoorani aamma tassuunakkut inuup pikkorissartup aamma aningaasatigut pissarsiaqaatigisinnaasaanik soorunami aamma atorfimmigut pikkorissarnermigut iluaqutigalugu pilerngussinernut ammaanneqarnissani, tassuunakkut periarfigissagaa. Aamma taanna isumaqatiginarpoq, Siumukkut maani saqqummiussaminni oqaatigisai.
Atassutikkut oqaatigisai issuarneqartullu allakkat saqqummiuneqartut tusagassiuutitigut saqqummersut tamakku annertunerusumik oqaaseqarfigissanngilakka. Assortuussutaanngisaannarmat oqaluttarfimmi maanngaanniit, kalaallit sulisui sulisorineqarnerisa aammalu kalaallit nunatsinni amerlanerpaat suliffinnik tigusiartornissaat siunertaajuarmat.
Aamma apeqqutit maani piareersarnerani arlaleriarluta apeqqut tikissimasarput aamma misissorusutarput taalaarusuppara. Namminersornerulerneq atorlermalli aamma ajunngitsunik pisoqartarsimavoq ila! Tamarmik suut ajortuunngillat, aamma taanna Kattusseqatigiit oqaluttarfik atorpaa manna suut tamaaviat qernertumik qalipallugu isigisarput, uagut nunarput taamak isiginngilarput,- inuilu, inuit kalaallit inuiaat maannakkut ukiunit 19-ini namminersornerulersimasut ingerlavissaminnut ajunngitsumik ingerlapput.
Ullumikkut eqqartuinitsinni apeqqutit tikinneqalerneranni ajunngitsut angusimasatta ilaat maannakkut ilinniarnertuut nunatsinni nammineq inerarsimasut qularnanngilaq maannakkut 100-t arlalipparujussuit immaqa 2000-it tungaanut ingerlasut ilaatigut apeqqutigineqarput tamakku sumiippat maannakkut? Oqarpunga uanga neriuppunga aamma ilaatigut nalunngilara ilinniaqqinnerminni maannakkut suliaqartut ulappupput tamarmik. Ilinniarnertuutut angusaqarsimasut pikkorissarnerlu mannakkut aallarteruttorpaat, taamaattumik ullut arlaanni aamma inerlutik nunatsinnut aamma uterniartut, aamma taamaalillutik amerlanerusut pissarsiarissagigut qularinngilara.
Tatigilluinnarpara inuit inuusuttut maannakkut periarfissinneqarsimasut namminersornerulernerup kingornatigut namminneq nunaminni ilinniarnertuutut ilinniarsinnaanngorlutik aammalu taamatulli avatangiisimittut pitsaatigisumik ilinniarsimallutik, maannakkut uteralersut, pinngitsooratik aamma taakku isumalluutaapput annertoorujussuarmik. Tassaniippoq aamma periarfissaq tikkuagassaq ilinniartitaaneq aqqutigalugu tassuunakkut periarfissagut pitsanngorsassagatsigit.
Naggataatigut aamma oqaatigilaarusuppara qilanaarluta ataatsimeersuarnissaq ornittussaagatsigu juunip qaammataani, Naalakkersuisut aamma arlallit peqataasussaagatta apeqqummilu tassani neriukkama ammalluinnartumik Kalaallit Nunaanni apeqqutini ima ittuni sammineqartut oqalliffiujumaartut, ukiamullu siunnerfimmik erseqqinnerusumik aamma siunnerfeqarumaarluta. Tassani ataatsimeersuarnermi siunertaavoq ilaatigut tikkuarneqartoq suliffissaarunnermi inunnik isumagineqarnikkut kisiat isumagineqarnerit pinnagit kisianni pikkorissaqqinnertigut assigiinngitsutigut sullivinnut pulatinneqarnissaanerat aqqutissarsiussallugit. Aamma tamakkua periarfissat tikinneqarumaarput.
Immikkullu aamma ataaseq taarusullugu aamma puiguleraluagara oqaatigilaarlara. Uagut pisortaninngaanniit ilinniartitsiniarnigut maannakkut amerlaqisut inuusuttunut neqeroorutaapput, aatsaat taamak amerlatigisunik neqeroorutinik nunatsinni peqalersimavoq, inuusuttut ilinniarfissaannik. Uagulluunniit utoqqarsuunngitsugut nalugisatsinnut qiviassagutta ullumikkut ilinniarfissat tungaatigut usoruppagut inuusuttut isumalluarfigalugillu aamma taakkua atorluassagaat aamma taamaaliorput, atorluarpaat.
Maannakkut aamma nuannaarutigaara privatilluunniit maannakkut nammineerlutik ilinniartitsinissaminnut pilersaarusiorneri, takuinnarlugu KNI-p nalunaarusiamini aamma maani agguaanneqartuni niuertut pikkorissarnissaannut aningaasarpassuit atorlugit aamma pikkorissaanissaminut sulisuminut takutitaa nuannaajallannarpoq. Taamak ittut maannakkut malugilerpaat namminneq aamma peqataanissartik. Ippassaaniinnaq AG-kkut Sermitsiakkkutigullu takusinnaavarput Danmark-iminngaanniit allaat ussassaarisoqartoq, kalaallit uuliasiornermik ilinniarumasut neqeroorfissaanik namminersortut allat nammineq ikiuukkumallutik neqeroorutaat. Inuusuttuulluni pilerinat! Soqutiginat, neriuppunga aamma tigulluarneqarsimassasut tamakku.
Taamaattutigut aamma neqeroorutit kaammattuutigisariaqarput, atorluarniarlugit, ippassaq radiukkut tutsiuppoq ilaatigut atorniarneqarsimasut, tamakku. Qujanaq.
Aamma nuannaajallannartutut oqaatigissavara namminersornerusut allaffeqarfiini maannakkut neqeroorutit pikkorissartitsinissanut ullaaq tungaani misissoqqissaarneqarmata, paasineqarpoq nuannersumik sulisorparujussuagut pikkorissarnissamut nalunaarsimasut amerlaqisut, taamaattumik tamakkua tamarmik qiimmaallannertuupput.
Kattusseqatigiit, tujorminersi qaangerlugu nuannaaqatigisassavatsigut inuit tamakku tungaatigut aamma qiimallutik ilassinnittarmata ilinniarnermut neqeroorutinik, atuarfinni sullivinni allanilu, pikkorissarneq maani sakkussatta pitsaanerpaat ilagaat, aamma sulilluarnermut taanna tunngaviusarmat.
Otto Steenholdt, Atassut:
Siullermik Inuit Ataqatigiit oqaaseqartuata aammalumi Naalakkersuisut Siulittaasuata assut uggoraat manna oqallinneq taamatut iluseqarluni oqallinninngormat. Oqallinneqarani allakkatigut akineqaannarnissaanik eqqarsaataat isumaqatiginngilluinnarpagut. Nammineq oqartarsimagaanni sulisartoqarneq sulisullu eqqarsaatigalugit partiitut ingerlaarluni 1. maj-imi aappaluttunik erfalasulersarluni aqqusinikkut pisuttarsimagaanni suulluunniit sulisartoqarnermut sulisartullu pillugit oqallinnerit assupilorujussuaq ilaaffigerusunnassapput, allakkatigoornagit oqallisigalugit sunaana pineqartoq.
Inuit Ataqatigiit oqaluttua pakatsiffigikujuppara taamak oqarmat. Aamma siunnersuuteqartoq nammineq neriulluinnarlungalu aamma Inatsisartut Siulittaasuata pisuutitsinerit Siulittaasoqarfimmut anisitai akuersaarneqarsinnaanngitsut. Aamma uanga siulittaasoqarfimmi ilaasortatuut Inuit Ataqatigiit siulittaasoqarfimmi aallartitaat ilisimalluaqaara, inuk una pitsassuaq, taamatut nipilimmik oqartillugu tusarsimanngisaannarpara, ajoqaaq taamanikkut taanna aalajangeratsigu siulittaasoqarfimmi aallartitarisimasarsi taamatut kissaateqarsimanngimmat. Pitsaasuugami oqallinnermillu Inatsisartuni nuannersumik kajungerisaqartuugami tassa taama oqarpunga eqqortut pissusiviusut aallaavigalugit.
Tassa taamatut nuannaarutigaarput maani oqallisilaarsinnaagatta. Aamma taamatut sulisartoqarneq eqqaatsiaratsigu illuliornerit ataatsimeersuarnissaq assorsuaq uatsinninngaannit aamma taperserneqarpoq, illuliassat piffissaq eqqorlugu tunniutassat, ilumoorluinnarpoq tassa tamakkua suliarineqassapput illuliortut amigarpata tikisitsinissaq akerlerineqanngilaq. Kisiannili siulleq atoqqaarneqarnissaa eqqarsaatigaarput ujaarlilaaqqaaritsi! Ilumut nunatta sineriaani illuliorsinnaasunik aamma peqanngivinnersoq, atorfissaqartikkatsigit illuliassarpassuit inertariaqarmata. Ataatsimilluunniit amigartoorsimagaanni sulisussanik qanorsuaq amerlatigisunik tikisitsinissaq pissusissaq eqqorlugu atorneqarsimappat ataatsilluunniit uparuagassarinngilaa. Ilumut qujanaqaaq taamaattunik avataaniit aggeqqusisaratta, atugarineqartarlutalu.
Tassungali aamma ilanngullugu oqaaserisartakkagut Atassummiit uteqqitsigit, taamatut pisariaqartigimmat avataaniit tikitsisarnissaq iluamik pineqassapput tamakku. Nakorsat pillugit oqallitsiarnermi taanna eqqaasarput (Atassummit) erseqqissarlugu maangartiinnarlugit inilutsillugit meeraasa atuarsinnaanerat apeqquserneqartussanngortillugu imaluunniit allat iluarineqanngitsut tikisitanut takussutissanngorlugit nunatsinniitittarutsigit ataatsimilluunniit avataaniit orninneqarnissarput ilimagineqassanngilaq. Aamma illulioriartorniaraluartut taamatut pineqarunik utaqqineqassanngillat maani paggattorsuullutik maanngarnissaat.
Oqarluartaarnermik Atassumminngaannit oqaaseqarunannginnatta maani erseqqissaatigissavara, oqarluartaarnerunngillat, taamaallaalli ukiup uuma kingulliup ingerlanerani siornatigullumi radiukkut oqallinnipilorujussuaqarsimavoq ilaatigut Siumup ilaasortaata saqqummiutaa allaat qernaluttumik ameqarnermut tunngatillugumik saassutaarineqartoq uagut isumaqatigisimanngilluinnaratsigu. Taamatut uparuaallatsiarneq illua`tungaanut piaarnerpaamik saatinneqartarnerat pissusissamisuunngilaq, suliffiit pillugit Hans Enoksen-i saqqummiimmat oqallinnipilorujussuit tusarsimavagut, kikkut tamarmik oqalliseqataasimanerat uatsinnut ilinniutaasimaqaaq.
Atassummit oqaaseqarnitsinni oqarpugut upperinngilluinnarparput kalaaleqatitta suliatik paarinngilluinnaraat, nangillutali immaqami ilaatigut taamaattoqarsimassaaq. Taakku 2950-it paarsilluartut ataatsimilluunniit uatsinninngaanniit assuarnartoqanngillat, oqaaserput eqqormat kalaaleqatittaana aamma sullivik paarisaraat, naak ilaatigut immaqa taamaattoqartuarneq ajoraluartoq, kisianni oqaaseq taanna kingumut uteqqipparput.
Uagut aamma Atassumminngaanniit ajortortaannai oqallisigerusunngilavut, Naalakkersuisut Siulittaasuat ilumoorpoq, aamma ajunngitsoqaqaaq, utoqqatserpugut taakku ajunngitsortarpassui uagut iluarinermit (....?tilaaratsigit) kisianni iluarinngisavut erseqqissumik oqaaseqarfigalugit.
Aaamma oqaaseqarnitsinni ilinniarnertuut sukkulluunniit ajoriffissaqartinngilavut, atorfissaqarteqaavut. Oqaaseqarnitsinnili kisianni erseqqissaapput aana, ilinniarnertuujunngitsut sulinerinnarmilli inuussutissarsiuteqartut ilaatigut ilinniagaqanngitsut, tassa taakkuupput taamatut oqalunnitsinni ersersinniakkavut oqarluartaarutaanngitsut. Kisiannili nilliajuartut, unnerlulaartuartut, soorlu saqqummiussinitsinni aamma saaffiginnissutinnguaq ilanngutilaaripput.
Tassa ilinniarnertuujunngitsut aamma pinngitsoorata eqqarsaatigissagatsigit. Assorsuaq qujanarpoq ataatsimeersuarnissaq, tapersersoqaarput, tassani aamma oqallittoqarumaarpoq.
Pikkorissarnissat ilalersorpavut oqaaseqarnitsinni tassani neqeroorutit kalaaleqatitsinnut amerlaqaat, nuanneqaat, kisiannili pileritsakkaluarluni oqarfigineqarneq "allap taanna tigoreerpaa" imaluunniit "inissaqanngilatit", taama oqarfigineqarluni ajuallannassaaq, naak nammineq aamma angusaqarluni sulerusullunilu nunamini ikkaluartilluni.
Assorujussuaq KNI-p aamma ilinniartitsiniarnera nuannaraarput tamatta, privatillu aamma taamaaliorniarnerat. Tassami saqqummiussap akissutaani tamakkua tamarmik erseqqaarimmata.
Oliasiornermullu tunngatillugu aamma ataatsimiititaliaq ilaasortaaffigineqartoq partiinit anginernit pingasunit, tassani aamma inatsisartuni aallartitaaneq aallaavigalugu (?eqatigiillutik) oqartuarmata "Kalaallit sulisorineqarnissaat tassani ilumoorussiuk!" Qujanaqaaq tusarneqarsimagatta. Tassa Kalaallit Nunaanninngaanniit nipi tutsiuttoq, avataaniillu tusarneqartoq.
Aamma sulisorpassuit maani suliffinni pikkorissarusullutik nalunaareersimasut assupilorujussuaq nuannaajallaatigaavut. Qanortoruna aamma maani sulisuunngitsut avataanili ilinniarnikittunnguugaluit sulerusullutik suliffissaqanngitsut ilanngunneqarlit, taamaalippat maani oqallitsiarneq allagaannartigut akineqarnerminngaannit annipilopilorujussuarmik angusaqarfigaarput.
Lars Sĝrensen , Inuit Ataqatigiit:
Finn Karlsenip Inuit Ataqatigiit uparuarmagit ilaatigut Finn Karlsen uterfigitilaarniarpara, ilaatigut Finn Karlsen inatsisartuni Isumaginninnermut Suliffeqarnermilu Ataatsimiisitaliami siulittaasutut, ilisimasariaqaraluarpaa siunnersuutigisani ,siunnersuutimi qitia, aammalu siunnersuutini aallavigalugu eqqartuiniarnermi, tamakkua aasamut Qaqortumi sulisoqarneq pillugu ataatsimeersuarnissami eqqartorneqartussaammata.
Inuit Ataqatigiinninngaanniit ukiut ingerlanerini ataasianngeqaluta kalaalinngorsaanermut tunngatillugu aamma suliffeqarfinni amerlasoorparujussuarnik siunnersuuteqartarnikuuvugut. Tamakkulu pitsaanerpaamik piviusunngortinneqassappata saneqqunneqarsinnaanngitsoq unaa-voq, maannakkut iliuuseqarnissaq, taanna saneqqunneqarsinnaanngilaq. Taannaavorlu aasami kiisami susussanngortoq. Taamaattumik Inuit Ataqatigiinninngaanniit oqaatigivarput oqallinnerinnaat pinnagit kisiannili kiisami tamakkuninnga attuumassuteqartut peqatigalugit siunissami ingerlaqqinnissaq pisariaqarpoq.
Finn Karlsenimut aamma eqqaasissutigissavara 1992-miilli sulisoqarneq pillugu inatsit, inatsit maani inatsisartut akuerisaat, imatut oqarmat atorfiit appasinnerusut pinngitsoornani akademikeritut atorfii tikillugit inatsiliortoqarnikuuvoq. Maannakkulli naatsorsuutigivaa taakkua qulaallugit inatsisiliornissaq siunissami siunertaralugu aasamut ilaatigut isumasioqatigiittoqarnissaa. Taamaattumik oqaatigivarput suliat maani asuli oqaluuseriinnarnagit taava iliusissaq siunertaralugu maannakkut pisoqartariaqarpoq, taamaattumillu oqaatigaarput suliaq aallartereermat ingerlareermat siunnersuuteqartunut taanna allakkatigut nassuiaanissaq naammaannaraluarpoq.
Ilaatigut aamma Finn Karlsenip tikillatsiarpaa pikkorissaanermut atatillugu arlaatigut inatsisiliortoqartariaqartoq, uagut Inuit Ataqatigiinninngaanniit oqaatigissavarput pisariaqarsorinngikkipput pikkorissaareernerup kingornatigut uternissamut tunngatillugu inatsisiliortoqarnissaa. Massakkut KANUKOKA annertoorujorujussuarmik sulisuminik pikkorissaalluni aallartinnikuuvoq, aammalu taanna ukiut tallimat ingerlaneranni ilaatigut anguniarngartalimmik ilalerlugu ingerlanniarneqarnikuuvoq.
Tamatuma aamma saniatigut ilisimagaluarpat aamma soorlu Naalakkersuisut Siulittaasuata oqaatigereera, maani sulisut eqqarsaatigalugit iliuusissat annertuut massakkut aallartinneqarput. Tamatumalu pinngitsoornani kingunerisussaavaa siunissami kalaallit amerlanerusut sulisorineqarnerat. Isumaqarpugut inatsisiliornissaq taanna pisariaqanngitsoq, aatsaammi oqallinnerit assigiinngitsunik ilisimasalinnik peqataaffigineqartut aallartittussaapput, taanna erseqqissaatigiinnarparput.
Inuit qatsuppaat maani oqallisiinnartugut, assigiinngitsunilli piviusunngortitsissanata, kiisami taanna periarfissanngorpoq ilisimasallit assigiinngitsut oqallinnerisa kingornatigut taava ukiami nassuiaammik saqqummiussereernerup kingornatigut inatsisit assigiinngitsut maleruagassallu peqqussutillu assigiinngitsut suliarineqarlutik aallartittussaammata. Tamanna inatsisartut kingullermik sulisoqarneq pillugu ukiakkut ataatsimiinnermi tamarmik ilisimareerpaat taamaattumillu taamatut uagut oqarpugut suliaq ingerlareermat allakkatigut akineqaannartariaqarsimagaluarpoq aamma taanna isumarput allanngortinngilarput.
Laannguaq Lynge, Siumut:
Siunnersuuteqartup Finn Karlsenip oqaaserineqartunut naliliinermini una eqqaasaa isumaqarpu-nga akisariaqarlugu. Tassa oqarmat qulequtaq una, oqaluuserisatsinnut qulequtaasoq "Kalaallit sulisorineqarnerunissaannik aaqqissuussinerup siornatigornit annertunerusumik atorneqalernerunissaa" pillugu siunnersuut isumaqatigineqanngitsoq amerlanernit.
Tamaattoqanngimmat uanga taanna erseqqissaaffigerusuppara tassa Siumumi uagut aamma pingaarteqigatsigu kalaallit sulisorineqarnerulernissaat aamma uani eqqarusuppara siunnersuuteqartoq nammineq tunngavilersuinermini ilaatigut oqaatsit makkua atormagit, issuaavunga: "Tassa ilinniaqqinniartut inatsisitigut illersorneqarsinnaanngornissaat siunnersuutigaara, tassa imatut paasineqassaaq ilinniarsimasoq ilinniakkaminik qaffaaniarluni ilinniaqqinniartoq suliffigisaminut ajornartorsiuteqarnani uteqqissinnaanngorlugu".
Taanna oqaaseqarfigigatsigu siunnersuutip tunngavilersuutaata ilaa Siumuminngaanniit imatut oqaasertalerparput, taanna imatut paasigipput, ilaaqqilaarpara, issuaaqqilaarpunga Siumup oqaaseqaataata ilaaninngaanniit: "Inatsisartuni ilaasortap Finn Karlsenip siunnersuutimini qitiutippaa kinaluunniit ilinniakkamik qaffaaniarluni ilinnaqqinniartoq suliffitoqqaminut uteqqissinnaajuartariaqartoq" Taannalu siunnersuut qiteritillugu oqaaseqarfigissagutsigu Siumumit tamakkiisumik isumaqataaffigisinnaanngilarput. Tassani taava tunngavilersueqqippugut taamatut oqaasertalersimanera tunngavigalugu uagut siullermik oqaaseqaratta. Kisiannili taanna tunngavilersorlugu oqarpugut, taamaaliornikkut killormut sulisoq pikkorissarsimasoq qaffasinnerusumik atorfeqalernissaminut allaat killiliiffigineqaannarsinnaammat. Tassa inatsisiliorutta una ilinniaqqittoq pinngitsooruni atorfitoqqaminut utertariaqarpoq, soorlumi periarfissaarullugu qaffasinnerusumut inissittariaqaraluarluni uteqqittariaqartoq.
Kisiannili ingerlaqqippugut oqaaseqarnitsinni aamma Siumumi isumagaarput kinaluunniit ilinniaqqittoq suliffeqarfigisaminut tassa uumap suliffeqarfimmut atorfeqafimminut atorfimminuunngitsoq kisianni suliffeqarfimmut, pikkorissaqqereeruni pikkorissarnermi kingornatigut uteqqinnissaminut periarfissaqartinneqartuartariaqarpoq. Tassa tassani tunngavilersuutivut asigiinngitsut marluupput, soorunami Siumumi uagut aamma pingaarteqqarput kalaallit sulisorineqarnerata inatsisitigut aamma periarfissaqareersup suli annertunerusumik angujartuaarneqarnissaa, sukkanerusumillu aamma taassamu pinissaa soorunami tamatta taamatut neriuuteqarfigaarput.
Anthon Frederiksen, Kattusseqatigiit:
Isumaqartoqassanngilaq suna tamaat tamaviat ajortuinnarmik takorlooriga aamma suna tamaat qernertumik qalipanniariga. Naagga, oqaaseqarninni ilaatigut oqarpunga namminersornerulerneq
ajunngitsorpassuarnik kinguneqarsimavoq. Kisianni aamma ajortorpassuupput, Kattusseqatigiinniillu tamakkua ajortut ersissutiginagit ajunnginerusumik qaangerneqarnissaat anguniarlugu eqqartorneqartariaqartut isumaqarpugut. Ajortut kukkussutaasimasut nipangiutiinnaraluaraanni pitsaasumik kingunilimmik qaangerneqarsinnaanngimmata.
Tupigusuutiginngilluinnarpara Namminersornerullutik Oqartussani sulisut ukiormanna pikkorissartinneqartussat arlalipparpassuit nalunaarsimasut oqaatigineqarmata. Qanorlumi taakkuulluni utaqqikatannarsimatigaa ukiuni 19-ni pikkorissartitsisarnerit taama akuttusimatigippata, taannaana ilaatigut eqqarsaatigalugu tamakkua pikkorissartitsinerit ilinniartitseqqittarnerit, siusinnerusukkulli ingerlanneqarsimasariaqaraluarneri ilaatigut aamma oqaaseqarninni eqqaagikka.
Sulisussanik avataaneersunik tikisitsisarneq killilersimaarniarlugu inatsit qiviaannarutsigi aammalu inatsisartuni sulisoqarneq pillugu nassuiaat saqqummiunneqarmat, allaat saqqummiussami nassuiaammi tassani takuneqarsinnaavoq Namminersornerullutik Oqartussat nammineerlutik, nammineerlutik inatsimmi tassani tassannga inatsimmik unioqqutitsisut. Ilumut taamaappat pissutsit ajorput aaqqittariaqarlutillu. Oqaaseqarninnilu iluarisara aamma tassaavoq, maannakkut suliniartoqalermat, kiisami suliniartoqalermat pissutsit ajortut qaangerniarlugit. Taamaattumik suna tamaat qernertumik qalipannianngilluinnarpara, aamma suna tamaat ajortutut takorluunngilara. Suleqataaruukkatta ajortut ajunngitsunngortinnissaannut, tamakkua aamma eqqartornissaat isumaqarpunga pissusissamisoorluinnartoq.
Jonathan Motzfeldt, Naalakkersuisut Siulittaasuata akissutaa:
Kalaallinik sulisoqarneq "Grĝnlandsk arbejdskraft"-imik aamma taaneqartartoq, kalaallinik sulisoqarneq, taanna inatsisini aamma 1992-minngaanneersuni taanna tunngaveqartipparput.
Tassanilu aamma erseqqissaatigisimavarput kalaallinik sulisoqarneq tassaasoq Kalaallit Nunaanni inunngortut Kalaallit Nunaannilu najugaqartut inunngornerminnilu ukiut siulliit tallimat. Aammalu kalaallit inuit Kalaallit Nunaannut immikkut ittumik pitussimasutut aalajangersimasumik inooqataasut. Taavalu aamma ilanngunneqarsipput tassani aamma pineqarsinnaasut inuit ukiuni arfineq marlunni Kalaallit Nunaanni najugaqarsimasut. Aammalu taavalu aappariinnikkut allatigullu ukioq ataaseq minnerpaamik inooqateqarsimasut, inooqatigiinnermikkullu taava aamma immikkut Kalaallit Nunaannut attaveqarnertik tikissimagaat.
Tamakkua tikikkaangatsigit taavalu aamma uagut kalaallinit sulisoqarneq eqqartuleraangatsigu, erseqqiivissumik aamma naalakkersuisuninngaanniit isumaqarpunga maannakkut atuutereersut pisariaqassappallu nalornisoqassappat, kina kalaallinit sulisorineqartutut isigineqassanersoq, erseqqissumik maani suliarisariaqarparput inerlugu. Maani ammit qalipaataannik sumilluunniit tipissinnaasut tamaasa peerlugit, maani nunami najugaqarnini inunngornini najugaqarnini inuppassuupput aamma ilaatigut inuunermmi annersaani aamma maani najugaqartut, taamaalillutillu aamma qanorluunniit nujaqaraluarunik maani nuna inuusaasut akuerisimagaat, Nuuk sapaatit akunneri marluk pujuinnaraluarpalluunniit asallugu inuulersimasut uagutsitulli. Taama ittut inuit maanga nunamut tummaqataasut inooqataasullu eqqarsaatigalugit, taanna kallaallinik sulisunik taaneqarsinnaanerat.
Ataatsimeersuarnerup kingornatigut isumaqarpunga erseqqissumik nalorninaatsumillu tamanit paasisassanngorlugu Kalaallit Nunaanni innuttaaqataanermut taaguuserneqarnermik isikkoq taava naalisittariaqartoq. Una Inuit Ataqatigiit isumaqatigigakkit maannakkut oqallisigineqarnera, imaanngikkaluarpoq uanga aamma ajorigiga maannakkut aamma oqallinneq. Nassuiaatissagut tamakkerlugit tunniussinnaasimanngilagut maannakkut, apeqqutit inerneqatussat amerlaqimmata junimi oqallisereernermi, tassa taanna pivarput.
Maannakkulli kisianni aamma oqallinneq nuannarivara, taanna aamma oqaatigerusuppara, nuannariva, aamma taanna Kattusseqatigiinnut oqaatigerusuppara aamma nuannarivara, ajortuinnarnik isiginnittoqanngitsoq aamma ullumi paasigakku, taanna aamma nuannarivara. Tamaattumik oqallinneq aamma ullumikkut pissusissamisoorpoq.
Una aamma oqatigilaarlara junimi oqallisereernerup kingornatigullu maannakkut aamma naalakkersuisuninngaanniit suli ilusissaanik oqaloqatiginnissutigerusutarput, tassaavoq pisortanut atorfinitsittakkavut. Namminersornerulernitsinni allaffeqarfinnut, kommuninut, aamma suli ilaqarput inunnik maanga tikikkangamik atorfinillutillu taava aqaguinnannguaq pilissavarput allamut aamma suliffissarsiorsimasut, pisortaqarfiit iluini imaluunniit aamma immaqa ilaatigut namminersortunut aamma suliffissarsiortarlutik. Aalaakkaanerusumik sullivimmut atorfinitsitsisarnissat kommunimi taava qanoq sivisutigisumik avataaniiit taama suliortortaatsimut aamma uatsinni taamatut, tassunga aamma ilanngullugu oqaatigaakka maannakkorpiaq ukiuni qaninnerpaani qularnanngitsumik suli pisariaqassaaq avataaninngaanniit aamma tikisitsisariaqartarnissaq pingaartumik maani namminersornerusut allaffeqarfigisaani, suliffeqarfigisaanilu assigiinngitsuni.
Kisianni aamma taama tikisitsinermi pingaartumik pisortatigoortumik danskit naalakkersuisui paaseqatigalugit inunnik tappavani sungiussareersimasunik suliffinnut assersuutigalugu maani namminersornerusut immikkoortortaasa ilaaanni taava attartugaqarsinnaanermut periarfissavut oqaloqatiginnissutigigatsigit maannakkut, aamma taannaa periarfissatut oqaatigissavara atorniarserigatsigu maani.
Aamma isumaqatigaara oqaatigillatsiareerlugulu nuannaarutigalugu aamma Lars Sĝrensenip erseqqissaataa aamma Siumup oqaseqartuisa erseqqissaatat, kommunit annertoorujussuarmik kommunit aamma tassuunakkut peqataapput, KANUKONA-p kommunillu ataasiakkaat ilinniartitsineranik ingerlassinerit naammagisimaarnaqaat. Maannakkut aamma tamakkua maani najugaqavissunik uteqattaartuunngitsunik Atlantikoq ikaarlugu maani najugaqavissunik taamaalillutik ilinniartitsinerummata, sulisussanillu nutaanik avataanit tikisitsinngikkaluarni pikkorissartitsinerummata.
Taama oqarlunga aamma qujassutigeqqissavara oqaserineqartut, kisiannili oqassaanga ukiaru inersimanerusunik saqqummiinissaq qilanaarigatsigu oqallinnerlu tassani aamma peqataaffigisarput ullumi aamma nangeqqikkumagatsigu.
Knud Sĝrensen, Atassut:
Ullumikkut ullormut oqaluuserisassat pillugit nassuiaat aallartikattali pingajussaanik oqaluuseraarput. Sooq aallartikattali uparuarneqarsimanngila immikkortoq taanna allakkatigut akiinnartariaqarsimagaluartoq? Periarfissaqarsimapput inatsisartut pingasoriarlutik oqaluuserisassat assigiinngitsut uparuarneqarnissaannut, paasisariaqarpoq inatsisartut taanna oqaluusererusussimavaat, ullumikkullu oqaluuserineqarpoq.
Tamaattumik oqaannartoqarsinnaanngilaq allakkatigut akiinnartariaqarsimagaluartoq. Nammineq inatsisartut oqaluuserisassatik akuersissutigisarpaat. Taamaattumik taamatut pisuutitsiniartarnerit imaluunniit suunngitsutut isiginninniartarnerit oqaluuserisassanik pissusissamisuunngillat maanaannaq. Siulittaasoqarfiup siunnersuutigigaangangit taava inatsisartut nammineq oqaaseqarfigisussaavaat akuerissanerlugit imaluunniit allatut isummerfigissanerlugit. Taamaattumik siunissami isumaqarpunga tamakkua aamma eqqaamaniarneqartariaqartut.
Kisianni oqaluuserisaq nammineq ajoquteqanngilaq minnerpaamilluunniit. Upernaamut imaluunniit ukiamut ataatsimeersuartoqarniarpoq, taamaattumik sumut ajoqutaava ullumikkut pissutsit qulaajarneqarpata, taamanikkumut sakkussat amerlanerusut suli saqqummersillugit oqallisissaqaleqaat, toqqammavissaqaleqaat taamanikkut ataatsimeersuartussat. Paasissutissat assigiinngitsut tunniunneqarput ullumikkut, taamaattumik neriuutigissuarput akornutaasimanngitsoruna taamatut saqqummiussineq aamma akornutaanngilaq. Amerlaqaat immaqa siulittaasoqarfik piumasaraluarpat, inussiarnersorsuusanngikkaluarpat, allakkatigut akiinnagassaagaluartut.
Lars Sĝrensen, Inuit Ataqatigiit:
Tassani erseqqissaatigeqqiinnassavarput Inuit Ataqatigiinni isumaqaratta taanna allakkatigut akineqaannarsimasussaagaluaq, ilaatigut tassani aamma nalilerniarsimavarput siunnersuutigineqartut allat isumarput malillugu inatsisartuni oqaluuserineqartariaqarsimagaluit allakkatigut akiinarneqarsimasut. Taaanna tunngavigivarput, ilaatigut aamma ilisimagatsigu sulisoqarnermut taamatuttaaq aamma isumaginninnermut ataatsimiisitaliarsuup tamakkua aamma samminikuummagit. Maannakkullu taamatut inassuteqarnitsinni oqaaseqarnitsinnullu tunngavigivarput, ukiakkut ataatsimiinnermi Sulisoqarnermut Naalakkersuisup ersarilluinnartumik oqaatigimmagu sulisoqarnikkut ingerlatsineq pillugu Qaqortumi ataatsimeersuarnerit ingerlanneqassasut, ilaatigut siunnersuutit nangittaqattaartut piunnaarlugit maannakkut iliuuseqarnissaq siunertaralugu.
Taanna erseqqissaatigiinnarpara aamma oqaatigissavara siulittaasoqarfik tallimanik ilaasortaqarmat aammali suleriaaseq tunngavigalugu allatuulli udvalgitut ingerlammat, tassa imaappoq amerlanerussuteqarneq aallaavigalugu aalajangerneqartarput aamma siulittaasoqarfimmi apeqqutit sorliit allakkatigut akineqartariaqarnersut, taamatuttaaq aamma oqaluuserisitsineq kikkunnut ingerlattariaqarnersoq. Taamaattumik Sĝrensen oqarfigiinnassavara soorunami Inuit Ataqatigiinninngaanniit taamanikkut oqaatigisimavarput una siunnersuut aallartereermat, taava allakkatigut akineqartariaqartoq.
Finn Karlsen, Atassut:
Siullermik siulittaasoq isumaqatigaara
oqarmat paatsuuisoqassanngitsoq. Taava uanga
isumaqarpunga uanga siunnersuutinnut tunngatillugu allarparujorujussuit
(?illuiartiternerit) allallu saqqumiussuunneqarput. Uanga tassani siunnersuutigaara
uteqqissavara:
Sulisut ilinniarfinni naammassisimagunik
suliffimminni sulereerlutik ilinniaqqikkumagunik pikkorissarneq
eqqarsaatigalugu, kursus taanna eqqarsatiginngilara, ilinniaqqikkumagunik
ilinniaqqissinaasut qulakkeertariaqaraat suliffimmut uteqqinnissaminni. Tassani
aamma qaffasinnerusumik atorfittaarnissaminnut qulakkeerinnissinnaanngorlugit.
Kisiat tassa taakkua oqaluuserisat
pillugit ataatsimiinnitsinni uanga isumaga malillugu ataatsimilluunniit
akerliusoqanngilaq allakkatigut oqaluuserisassanngortinneqarnissaanut maanga.
Taamaattumik qanorluunniik oqaluttoqaraluarpat uanga isumanga
allanngortinnavianngilara tassa, kisianni nuannaaqaanga oqallisigineqalermat,
ilaat naak oqaraluartut allakkatigut akiinnarneqartariaqarsimagaluartoq,
kisianni paasivara qanoq oqaasissaqartigisoqartoq, qujanaqaaq.
Knud Sĝrensen, Atassut:
Nuannarinngikkaluarpara qaqeqqissallunga, kisianni Lars Sĝrensen-ilu aamma ukiut marluk suleqatigiissimavugut aamma nalunngilaa amerlanerussuteqartut ataqqineqartarnerat aamma uannit pingaartinneqartoq. Taamaattumik amerlanerussutertut oqarsimappata ullormut oqaluuserisassanut ilanngunneqassasoq taava ilanngunneqassooq. Inatsisartullu akuerisimappassuk ullormut oqaluuserisassaniissasoq taava tassaniissooq. Taamaattumik iluaqutaanngilaq ullumikkut oqassalluni allakkatigut akineqaannarsimasariaqaraluartoq.
Oqaluuserisaq naammassivoq.