Kalaallit Nunaanni Inatsisartut

Oqaluuserisassani immikkoortoq 42		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunnngorneq 6. maj 1998 nal. 16.39

 

Oqaluuserisassani immikkoortoq 42

 

Inatsisartunut ilaasortap Siverth K. Heilmann-ip apeqquteqaatigaa kilisallluni raajarniar­nermi marlunnik qalorsuaqarnerup siunissami atorneqartuaannarnissaa aalajangiusima-neqarnersoq.

 

 

 

Ataatsimiinnermik aqutsisoq: Lars Sørensen, Siulittaasoqarfimmi ilaasortaq, IA.

 

Siverth K. Heilmann, Atassut, apeqquteqaateqartoq:

Aalisarnermut, Piniarnermut, Inuussutissarsiornermut Nunalerinermullu Naalakkersuisumut apeqqutigerusuppara kilisalluni raajarniarnermi marlunnik qalorsuarsorneq siunissami atorneqar­tuaannarnissaa aalajangiusimaannarneqassanersoq.

 

Taamatut apeqquteqarninni pissutigaara pingaartumik sinerissamut qanittumi raajarniartunik aammalumi kilisaatini angisuuni inuttasartunit tusartaleraluttuinnarakku marlunnik qalorsuarsor­luni atuisunut pisaqalertortitsisaraluarlutik piniutit oqimaatsuuneri pissutaagunarlutik immap naqqanik aserorterisuuneri oqaatiginiarneqartarmata.

 

Mannalu periarfissaq iluatsillugu naalakkersuisoqarfik kaammattorusuppara, ukiup ingerlanerani aalisarneq pillugu isumasioqatigiissitsisoqarniartoqarunarmat, apeqquteqaatigisara tunngavigalu­gu sinerissami qanittumi avataasiorlutillu raajarniartartunut una apeqqut oqallisigineqarnissaa isummersorfigineqarnissaalu kaammattuutigissavara.

 

Paaviaaaraq Heilmann, Aalisarnermut, Piniarnermut, Inuussutissarsiuteqarnermut Nunaleriner­mullu Naalakkersuisoq:

Naalakkersuisut Atassut sinnerlugu Inatsisartunut ilaasortamit Siverth K. Heilmann-imit kilisal­luni raajarniarnermi qalorsuit illugiit siunissami atorneqartuaannarneqarnissaat aalajangiusima­neqarnersoq pillugu pingasunngornermi apeqquteqaammik tigusaqarsimapput.

 

Naalakkersuisut paasivaat apeqqummi, pingaartumik sinerissami qanittumi raajarniartartunit aammalumi kilisaatini angisuuni inuttaasartunit tusartaleraluttuinnarneqartoq marlunnik qalorsu­arsorluni piniutit oqimaatsuuneri pissutaagunarlutik immap naqqanik aserorterisuunerarneqartar­neri aallaavigineqartoq.

Sivert K. Heilmann-ip inassutigaa apeqqut aalisarneq pillugu isumasioqatigiinnissami sinerissa­mut qanittumi avataasiorlunilu raajarniartartut akornanni eqqartorneqartariaqartoq isummerfigi­neqartariaqartorlu.

 

Ulloq manna tikillugu marlunnik qalorsuarsorluni kilisannissamut Naalakkersuisut akuersaarsi­manerat 1995-imi tusarniaasimanermik aallaaveqarpoq, tamatumanilu DEFTA-mit naliliineq qitiusutut naliliineq qitiusutut aallaavigineqarsimavoq, taamani ilaatigut DEFTA-mit ima naliliisoqarsimavoq: Marloqiusanik qalorsuarsorluni aalisariaaseq ingerlanneqartarpoq qalorsuit nalinginnaasut marluk sanileriissillugit pingasunik noqaruserlugit kalillugit, DEFTA taamatut aalisariaatsimik Danmark-imut eqqussisuuvoq, atuleqqaarneranni qaleruallit peqquit ilaannik jomfruhummer-inik  kilisannermi atorneqarsimapput, ullumikkut Nordsø-mi raajarniarnermi aalisakkkanik immap naqqani aammalu ikerinnarmi uumasunik aalisarnermi, taamatullu Østersø-mi saaarullinniarnermi atorneqartalersimapput.

 

Qalorsuit ataatsit imaluunniit arlariit atorneqartarneranni nikingassutsit tassaaginnarput pisaqa­lertorsinnaaneq, pisassiissutit killeqartillugit pisarineqartartut annertuneruneq ajorput, piffissaq atorneqartoq annikinnerulertarpoq, ingerlatsinikkullu aningaasartuutit annikinnerulersarlutik, ileqqaarneqartartut 20 procent-it missaaniipput.

 

Naalakkersuisut eqqumaffigaat paasissutissat aatsaat taaneqartut ukiunik pingasunik pisoqaassu­seqalereerneri, taamaattumik Aalisarnermut naalakkersuisoqarfik nutaamik pinngortitaleriffim­mut DEFTA-mut katttuffinnullu tusarniaatinneqarsimavoq, tusarniaanermilu immikkut nalileq­quneqarsimavoq qalorsuit marloqiusat immap naqqani qanoq annertutigisumik innarliisarnersut, DEFTA-mit toqqammavilersuutit aatsaat taaneqartut aallaavigalugit Naalakkersuisut isumaqar­put illugiinnik qalorsuarsorluni kilisattarneq sutigut immap naqqanik innarliisarnersoq pillugu suli apeqqutinik qulaartariaqartunik peqarnera Naalakkersuisut, aalisarneq pillugu siunnersuiso­qatigiit qanimut suleqatigalugit ukiaru aalisarneq pillugu isumasioqatigiissitsinissamik piler­saaruteqarput, taamatut isumasioqatigiinnissaq ukiuni aggersuni aalisarneq pillugu Naalakkersui­sunit nutaamik toqqammavissatut isigineqarpoq, isumasioqatigiinnissami pineqartup nutaamik eqqartorneqarnissaa Naalakkersuisunit qulakkeerneqarnissaa neriorsuutigissavara.

 

Sivert K. Heilmann, Atassut, apeqquteqaateqartoq:

Qujavunga Naalakkersuisunut ilaasortap akissutaanut naalisagaangaatsiartumut, akissutaalu allaganngorlugu pigigakku.

 

Taanna kaammattuutiga aalisartortatta maani Kalaallit Nunaanni misilittagaat tunnngavigalugit aalisarnermut isumasioqatigiissitsinissami pisussami neriuppunga taanna oqallisigilluarneqaru­maartoq.