Oqaluuserisassani immikkoortoq 44 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataatsimiinnermik
aqutsisoq: Inatsisartut Siulittaasuat Anders Andreassen.
Siverth K. Heilmann, Atassut, apeqquteqaateqartoq:
Biolog-it atorfeqartitagut qanoq suleriaaseqarnersut apeqqutigaara, taamatullu apeqquteqarninni pissutigaara, ukiarmi Canada-mut angalaqataaninni paasigakku tasamani biolog-it namminneq qanoq pingaartitsigigaat nunami immamilu piniakkanik suugaluartunilluunniit piniartut aalisartullu suleqatigilluinnarlugit tusaaniarlugillu suleriaaseqarnerat maligassaalluartutut ajasoornartutullu paasigakku.
Allatut oqaatigalugu piniartut aalisartuugaluarpataluunniit ilisimasaat biolog-init tusaaneqarniarluartarsimapput. Nunatsinni biolog-itut atorfeqartitagut piniartunik aalisartunilluunniit innuttaasunit uparuartorneqartarput, miserratissaanngitsumillu aamma ilaatigut uannit, pingaartitarilluinnarparali anguniartuassallugulu suleqatigiinneq paaseqatigiinnerlu annerusoq akunnitsinni nassaarineqartariaqartoq.
Naammaginanngitsunik aalajangiisarnerit annikillisarniarlugit politik-erit aamma illit Naalakkersuisoqarfiit inakkusuppakka, tusarniaanerit isummanillu imminnut qanillattorsinnaanerit anguniarlugit suleriaaseqaleqqullugit.
Biolog-it amerlanertigut inassutigisartagaat politik-erinut, upperineqartarneri allannguuteqartariaqarpoq, soorlu Canada-mi suleriaasiusimasoq ajasoornartoq ilaatigut assersuutaaginnarpoq.
Neriuppunga apeqqutiga kingulleq biolog-inut nikassaanertut isigineqassanngitsoq, suleqatigiinnissamilli annerusumik suaartarneruvoq taanna aamma nutaajunngitsoq.
Marianne Jensen, Peqqinnissamut, Avatangiisinut Pinngortitalerinermut Ilisimatusarnermullu Naalakkersuisoq:
Inatsisartut Kalaallit Nunaanni Pinngortitaleriffik pillugu inatsisaanni nr 6, 8. juni 1994-imeersumi pinngortitaleriffimmi sulinermut killissarititaasut aalajangersarneqarsimapput, tassani maluginiagassaq tassaavoq, Inatsisartut aalajangertassammassuk ilisimatuussutsikkut tunngavissat tassaammata biolog-it pissarsiariniartagassaat. Oqaatigisariaqarpoq isumalluutit ilaat annertuumik sulissutigineqartarsimammata, allat annikinnerusumik.
Biolog-it sulinerannik isornartorsiuineq marlunnut immikkoortinneqarsinnaavoq, siullermik biolog-it sulinerannik suleriaasiannillu isornartorsiuinermut, aappaattullu biolog-it angusarisartagaannik isornartorsiuinermut.
Assersuutigalugu raajat pillugit biolog-it sulinerat paasisagaalluunniit pillugit isornartorsiuisoqarpiartanngilaq, kisiannili assersuutigalugu tuttut qilalukkalluunniit qaqortat pineqaleraangata ajornartorsiutit allarluinnanngortarput.
Paasisat pisuussutilinnik isumalluuteqarniartut isumaannut naleqqutinngikkaangata biolog-it tassaatinneqalersarput kukkusunik sulisimasut.
Siunertatut aalajangersakkat malillugit Pinngortitaleriffiup sulinissaa isumannaarniarlugu, siulersuisunik aamma siunnersuisartuulluni ilisimatusarnermut ataatsimiititaliamik pilersitsisoqarsimavoq, siulersuisunut ilaasortaapput soqutigisaqaqatigiiffinnut attuumassuteqartunut sinniisut, taamaammat siulersuisut aqqutigalugit piniartut aalisartullu naammagittaalliutissaqarunik isornartorsiuisussaapput, imaluunniit isummanik siunnersuutinilluunniit saqqummiussillutik, tassa isumalluutit pillugit pitaanerusumik ilisimasaqartoqalernissaanut suleqataaarusussuseqassagunik.
Kisianni marlutigut Pinngortitaleriffiup nukissanik atuineruffissaatut maannakkut Naalakkersuisut siunniussaqarput, tassami Pinngortitaleriffik illorsuartaaminiilereermat, siulleq tassaavoq nunatsinni najukkani assigiinngitsuni najugallit ilisimasaannik katersinissaq, ilisimasat tamakku ilarpassui ilisimatuutut misissuinissat pilersaarusiorneqarnerinut tunngavissatut ilaasariaqarput, taamaalilluni misissuinerit tamakku sapinngisamik sukumiisumik ingerlanneqartartarsinnaaleqqullugit, aappaa tassaavoq paasissutissiisarnermut atortussat suugaluartulluunniit pisariaqartinneqarluinnarnerat, qujanartumillu Pinngortitaleriffiup pineqartut taakku ukiuni aggersuni pingaartilluinnarniarlugit aalajangiutereersimavaa.
Biolog-it isumalluutit amerlagaluarpata ikittuinnaagaluarpataluunniit akissarsiaat taakkuugin-narput, taamaammat biolog-it paasissutissanik kukkusunik saqqummiussisarnissaminnut pissutissaqanngillat.
Eqqaamasariaqarpoq biolog-it pisortat ingerlatsineranni aalajangiisartuunngimmata, Naalak-kersuinermik suliaqartut allaffissornermillu suliaqartut aalajangiisartuupput.
Naalakkersuisunit neriuutigaarput,
nunatsinni pisuussutit uumassusillit piujuartitsinissamik tunngaveqarluni iluaqutigineqarnissaat
pillugu isumasioqatigiittoqarnissaani oktober-imi ingerlanneqartussami
biolog-it, aalisartut piniartulllu akornanni suleqatigiittoqarnissamik
annertuumik paaseqatigiittoqalerumaartoq.
Naggataatigut oqaatigissavara Canada-mi
pissutsinut sanilliussinermut tunngatillugu oqaaatigisariaqarmat, Canada-mi
pissutsit nunatsinni pissutsinit allaanerulluinnarmata, tassami Canada-mi
piniartut piniarsinnaapput, tuniniaaqqusaanngillalli, taamaattumillu aamma
tassuunakkut aqutseqatigiinnerit allamik aallaaveqarput, nunatsinni
namminersorsuta ingerlanitsinni pissutsit allarluinnaat atuummata.
Siverth K. Heilmann, Atassut, apeqquteqaateqartoq:
Apeqquteqaatinnut akissutigineqartumut
qujavunga, aamma oqareernittut assammik isaassineruvoq, biolog-inut, taavalu
aalisartut piniartullu atugaat eqqarsaatiginerullugit, minnerunngitsumillu
politikerinut aamma isaassineruvoq, peqqutaalluni, peqqutaagajuttarmat
biolog-it suliamikkut assigiinngitsorpassuartigut sulinermikkut politikerinut
inassuteqartarput, taakkulu amerlanertigut ukiorpassuarni
malinnaaffigisimallugit, inassuteqaataat malikkajunneqartarput, taakkuuppullu
atuisunit ippigineqartuartartut, taamaattumik aamma suaarneruvoq taanna
suleqatigiinnissamik, unalu Canada-mi pissutsinik assersuuteqarninnut aamma
taanna paasisitsiniutaannavoq, pissuseq, tasamani pissutsit allaagaluartut,
nunatsinni oqaloqatigiissinnaaneq piniartut, atuisut biolog-illu
suleqatigiinnermikkut piffissani assigiinngitsuni misisuiffiginiarneqarluni,
suleqatigiissinnaanissamik ujartuineruvoq, kaammattuutaallunilu, taamaattumik
Pinngortitaleriffittaarnikuugatta aamma periarfissaq manna iluatsillugu
pilluaqquutigalugit sulilluarnissaanik kissaallugit, akissutigineqartunut
qujavunga.
Oqaluuserisaq naammassivoq.