Oqaluuserisassani immikkoortoq 45 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Anders Nilsson, apeqquteqaateqartoq, Atassut:
Atassut sinnerlugu inatsisartut
aalajangersaanissaanut siunnersuut manna saqqummiunniarpara.
Namminersornerullutik aallarnisaaniartut, aningaasaliisartullu
aallarteriarnerminni nalorninartorsiortarnerat peerniarlugu Naalakkersuisut
pisortat suliassaqarfiini suliassat inatsisitigut allanngunngikkaluarlutik
namminersortunik isumagineqarsinnaasut pillugit takussutissanik nunap immikkoortuinut
agguakkanut suliaqarnissamik pisussaaffilerneqassapput.
Matumani pisortat suliassaqarfii
tassaapput allaffissornikkut ingerlatsiviit Namminersornerullutik Oqartussat
ataanniittut. Suliffeqarfiit namminersortitat aamma Namminersornerullutik Oqartussat
Aktieteqarluni ingerlatseqatigiiffiat kiisalu ingerlatseqatigiiffiit
Namminersornerullutik Oqartussanik annertuumik sunniuteqarfigineqartut.
Takussutissiaq tamanut saqqummiunneqartassaaq inuusutissarsiutillu pillugit
siunnersoqatigiinngorlaat suliassaannut ilaassalluni. Taamaalilluni
inuussutissarsiutit pillugit siunnersuisooqatigiit Namminersornerullutik
Oqartussat suliaat namminersorfiusut qulaani suussusaat taaneqartut
allanngortinneqannginnerini atorunnaarsinneqannginnerinilu allanngortinneqannginneriniluunniit
siunissami tusarniarneqartalissallutik.
Taamatuttaaq Naalakkersuisut
pisussaaffeqalissapput pisortat soorlu qulaani suussusaat taaneqartut
allaffissornikkut ingerlatsiviit Namminersornerullutik Oqartussat ataanniittut,
suliffeqarfiit namminersortitat, Namminersornerullutik Oqartussat
Aktieteqarluni ingerlatseqatigiiffiutaat, kiisalu ingerlatseqatigiiffiit
Namminersornerullutik Oqartussanit annertuumik sunniuteqarfigineqartut
kisermaassinissamik isumaqatigiissutaat allallu unammillernissamik
killiliisumik isumaqatigiissutaat pillugit takussusiornissaminnik
Takussutissiaq taanna
saqqummiunneqartassanngilaq kisianni inuussutissarsiutit pillugit siunnersuisoqatigiinngorlaat
suliassaannut ilaassalluni. Taamaalilluni taakku pillugit siunnersuisoqatigiit
pisortat soorlu qulaani suussusaat taaneqartut, allaffissornikkut
ingerlatsiviit assigisaallu kisermaassinissamik isumaqatigiissuteqannginnerani
allallu unammilleqatigiinnermik killiliisumik isumaqatigiissuteqannginnerini
tusarniarneqartassallutik.
Pisortat namminersortullu
suliffeqarfiisa akornanni suliassat akulersuunneqarfiata peerneqarnissaa
siunnersuutikkut siunertarineqarpoq suliassaqarfinni namminersorlutik
ingerlatsisunit suliarineqarsinnaasumik pisortat suliaasa anguniagaasa
nutaanillu iliuusaasa nalornisitsisarnerat annertooq suliniutinut nutaanut
aallartitsiniarnermut nukillaartaasarpoq. Suliffeqarfiillu ingerlareersut
ingerlaannartinniarnerinut akornutaasarluni.
Tamatuma kingunerisarpaa
kinguariartulerneq, suliffissat ikinnerusut aningaasallu pissusissamisoortumik
nunami maani aningaasaliissutigineqarsinnaagaluartut Danmarkimut
aallarussorneqalernerat.
Suliffeqarfiit pisortat pigisaasa
landskarsimit annaanniarneqartariaqartarneri amerliartortullu aamma
kingunerisarpai. Kiisalu ineriartortitsinikkut suliniutit qularnaateqartut
Namminersornerullutik Oqartussanit suliatigut pisariaqaraluartumik
ilisimasaqarfigineqartanngitsut anguniagaasa ilaannillu
ilisimasaqarfigilluarneqanngitsut peqataaffigineqartarnerat.
Siunissami pisortat
inuussutissarsiornikkut tunniussarisartagaat taasariaqarput pilersuinikkut
attaveqaateqarnikkullu naleqquttut ineriartortinneqarnerat.
Siunnersuut akuerineqarpat ilorraap
tungaanut ingerlaneqarnerulissaaq.
Jonathan Motzfeldt, Naalakkersuisut Siulittaasuat:
Anders Nilssonip parti Atassut
sinnerlugu kissaatigaa suliassat ullumikkut pisortanit akisussaaffigalugit
suliarineqartartut inatsisinik allanngortitsinani namminersortunit
suliarineqarsinnaasut kiisalu sulisitsisunit neriorsuutit isumaqatigiissutillu
allat unammilleqatigiinnermik killiliisut nunami sumiinnermut agguarlugit
takussutissiornissaannik Naalakkersuisut suliassinneqarnissaat pillugu
aalajangiussassamik siunnersuummik saqqummiussinissani. Anders Nilssonip
siunnersuutigaattaaq Inuussutissarsiorneq pillugu Siunnersuisoqatigiinnut
tamanna suliakkiissutigineqassasoq kiisalu Inuussutissarsiorneq pillugu
Siunnersuisoqatigiit Namminersornerullutik Oqartussat inuussutissarsiutinik
suliaasa allanngortinneqannginnerini tusarniaavigineqaqqaartassasut.
Naalakkersuisut ingerlatsinerminni
anguniagaraat namminersornerullutik oqartussat niuernermik
ingerlataqassanngitsut, suliassat nalinginnaasumik killilersugaanngitsumillu
unammilleqatigiilluni tuniniaanikkut aqunneqarsinnaappata aamma inuiaqatigiit
soqutigisaasa pingaarutillit suliarineqartarnerat pingaartillugu
ingerlanneqarsinnaassappat.
Taamaalillutik Naalakkersuisut
isummiuppaat suliffeqarfiit namminersornerullutik oqartussanit pigineqartut
namminersortunut pigisassanngortiortorneqassasut, tassa pisariaqartitat
siuliini taaneqartut naammassineqarsimappata. Taamaakkaluartoq Naalakkersuisut
kissaatigaat siunissami namminersortunut pigisassanngortitsiortornerit
eqqarsaatigilluakkanik tunngaveqarluni ingerlanneqassasut tassa tassanngaannaq
isummeriataarnernik tunngaveqaratik.
Suliffeqarfiit namminersornerullutik
oqartussanit pigineqartut namminersortunut pigisassanngortiortorneqarnissaannik
ilungersuuteqarnernut ilanngullugu suliffeqarfiit namminersortitat niuernikkut
periarfissallit aktiaateqarluni ingerlatseqatigiiffinngorlugit
allanngortinneqarput. Alloriarneq tulleq aktiaateqarluni
ingerlatseqatigiiffinni arlaqartuni ingerlanneqartussaq tassaavoq
ingerlatseqatigiiffiit tamakku ingerlanneqarnerata pitsanngorsarneqarlunilu
ineriartortinneqarnera, taamaalilluni ingerlatseqatigiiffiit
aaqqissuussaanermikkut aningaasaqarnermikkullu namminersortunit
tiguneqarnissaminnut piareersarneqarsinnaaqqullugit.
Siullermik Anders Nilssonip siunnersuutigaa
suliassat ullumikkut pisortanit akisussaaffigalugit imaluunniit suliffeqarfinni
pisortanit pigineqartuni suliarineqartartut aamma inatsisinik allanngortitsinani
namminersortunit suliarineqarsinnaasut nunami sumiinnermut agguarlugit Naalakkersuisut
takussutissiussasut tamanullu saqqummiussillutik.
Aallaqqaasiullugu oqaatigineqassaaq
namminersortunut pigisassanngortitsiortorneq apeqqutaanngimmat namminersortut
inatsisinik allanngortitsinani suliassanik aalajangersimasunik
sulisinnaanerannut taamaallaat tunngasoq.
Kalaallit Nunaanni
aningaasaqarnikkut aaqqissuussineq assigiimmik akeqartitsinermik taaneqartartumik
aqutaavoq tamatuma kingunerisarlugu nioqqutissaq aalajangersimasoq Kalaallit
Nunaanni sumiinneq apeqqutaatinnagu assigiimmik akeqartinneqartarluni.
Suliffeqarfimmi assigiimmik akeqartitsinermik allaffissornikkut aqutsisuusumi
inuussutissarsiutiminnik ingerlatsisinnaassagaanni pisariaqarpoq suliat
sinneqartooruteqarfiusartut amigartooruteqarfiusartullu akornanni
paarlakaattumik tapiissuteqartoqartarnissaa imaluunniit suliat
amigartooruteqarfiusartut suliarinissaannut Landskarsimit
tapiissuteqartoqartarnissaa. Suliffeqarfiup namminersortunit pigineqartup
suliassat amigartooruteqarfiusartut tapersersornissaat imaaliinnarlugu
piumassuseqarfigiunnanngilaa, kisiannili tamakku piiassallugit imaluunniit
suliassat amigartooruteqarfiusartut akit qaffassallugit isorliunerusuni
innuttaasunut ajoqutaasumik. Tassa periarfissai.
Tamatumunnga atatillugu
oqaatigineqarsinnaavoq Naalakkersuisut assersuutigalugu Tunumi
helekopterimik timmisartuussinermut
tunngatillugu suliassat namminersortunut suliakkiissutigisimammatigit
Namminersornerullutik Oqartussanit akilerneqartillugit kisiannili
Naalakkersuisut suliariumannittussarsiuussisarnerni annertunerusumik tamakku
atorneqalersinnagit tamakkununnga tunngasutigut misilittakkanik tigussaasunik
saqqummersoqarnissaat utaqqimaaqqaarniarallarpaat.
Naalakkersuisut imaappoq
pingaartippaat namminersortunut pigisassanngortitsiortornerit pillugit apeqqut
assigiimmik akeqartitsinerup iluarsartuussivigineqaqqinnissaanut atatillugu
isigineqassappat. Naalakkersuisut suleqatigiissitamik pilersitsipput
tamakkuninnga suliaqartumik, tamakku pillugit 1998-imi ukiakkut katersuunnermi
nassuiaammik saqqummiussinissaq naatsorsuutigalugu.
Aamma oqaatigineqassaaq
Namminersornerullutik Oqartussat ingerlatseriaaserinngimmassuk
ingerlatseqatigiiffiit namminersornerullutik oqartussanit pigineqartut angisuut
Kalaallit Nunaanni namminersortut suliumassuseqarnerannut unitsitsiortornermut
atussallugit, taamatummi ilaannikkut pisuutinneqartamata. Paarlattuanik
aallarnisaasartunik aaqqissuussinerit, inuussutissarsiutinut tapersiisarnernik
aaqqissuussinerit, kinguaariit paarlaattarneranni ajornartorsiutit pillugit 1998-imi
ukiuunerani katersuunnermi Inatsisartut oqallinnerata malitsigisaanik
paasiniaalluni sulineq aallartinneqarpoq. 1997-imi Inatsisartut ukiakkut
katersuunnerannut atatillugu ilaatigut inuussutissarsiutinut siunertanut
akileraarutitigut iluaqutissartalimmik ileqqaagaqarsinnaaneq taamatuttaaq
akuersissutigineqarpoq. Tamakku tamarmik pipput namminersorlutik
inuussutissarsiortut ikiorserniarlugit.
Aappaatut Anders Nilssonip
siunnersuutigaa sulisitsisut neriorsuutaannik isumaqatigiissutinillu allanik unammilleqatigiinnermik
killiliisunik, pisortaqarfinnut suliffeqarfinnulluunniit Namminersornerullutik
Oqartussanit pigineqartunut isumaqatigiissutaasimasut pillugit Naalakkersuisut
takussutissamik suliaqassasut.
Oqaatigineqarsinnaavoq Inatsisartut
ilaatigut suliassat taaneqartut suliarineqartarnissaannut
unammilleqatigiittarneq pillugu inatsit ulloq 30. oktober 1992-imi
akuersissutigisimammassuk.
Unammilleqatigiinneq pillugu
inatsisikkut siunertarineqarpoq unammilleqatigiittarnerup annertusarneqarnissaa
taamalu nioqqutissanik sullissinernillu il.il. tunisassiornerup tuniniaanerullu
eqaannerusumik nukittorsarneqarnissaat. Tamatuma saniatigut inatsisikkut
tuniniaavinni sallersaalluni inissisimanerup atornerlunneqarsinnaanera
pinngitsoortissavaa unammilleqatigiinnermi pissutsit pillugit sapinngisamik
annertunerpaamik paasiuminartuutitsinikkut aamma unammilleqatigiinnermik
killilersuutit ajoqutaasumik sunniutigisinnaasaannut akiuunniarnikkut.
Tamatumunnga atatillugu
Unammilleqatigiinneq pillugu Aalajangiisartuulluni Ataatsimiititaliaq
pilersinneqarsimavoq, inatsimmik allaffissornikkut ingerlatsisuusussaq.
Unammilleqatigiinneq pillugu Aalajangiisartuulluni Ataatsimiititaliap
naammagittaalliuutit suliarisassavai imaluunniit inatsimmik unioqqutitsinerusinnaasut
nammineerluni misissuiffigisassallugit. Inatsiseqalerneratigut
Unammilleqatigiinneq pillugu Aalajangiisartuulluni Ataatsimiititaliaq
piginnaatitaaffeqalerpoq suliffeqarfinnit isumaqatigiissutit tuniniaavinni
sallersaalluni sunniuteqarfigineqartut sunniuteqarfigineqarsinnaasulluunniit
pillugit suliffeqarfinnit paasissutissanik piumasaqaateqartarnissamut.
Pingajuattut Anders Nilssonip
siunnersuutigaa Inuussutissarsiorneq pillugu Siunnersuisoqatigiit
Namminersornerullutik Oqartussat, Namminersornerullutik Oqartussat
inuussutissarsiutitigut suliarisartagaannik allanngortitsinissaq pillugu
aalajangiinialersillugit tusarniaavigineqartassasut taamatullu
tusarniaavigineqartassallutik sulisitsisut neriorsuuteqalersinnagit aammalu
unammilleqatigiinnermik killiliisunik allanik isumaqatigiissuteqalersinnagit.
Inuussutissarsiorneq pillugu
Siunnersuisoqatigiinnik pinngitsoorani tusarniaasarnissaq isumassarsiatsialaasutut
isumaqarfigineqarsinnaavoq kisiannili aammattaaq aalajangiiniartarnerni annikitsuunngitsumik
kinguarsaataasinnaalluni. Inuussutissarsiorneq pillugu Siunnersuisoqatigiit
ilaasortaqarmata soqutigisaqaqatigiit nammineq piumassuseq malillugu
ilaasortaatitaannik peqataasarnerlu akissarsiaqaataasanngimmat
siunnersuisoqatigiinnut ilaasortat naammaginartumik akuttussusilinnik
ataatsimiittarnissaannik piumaffigineqarsinnaanngillat. Taamaalilluni
ajornartorsiutaalersinnaavoq niuernermut tunngassuteqartunik suliaqarnissaat
aatsaat akuersissutigineqarsinnaasoq piffissaq naapertuutissappat aamma
siunertaasut tamanit ilisimaneqalereersimappata.
Kiisalu Naalakkersuisut Anders
Nilsson isumaqatigaat unammilleqatigiinnermik killilersuineq pillugu
isumaqatigiissutit tamanut saqqummiunneqartaqqunngimmagit tassuunakkut.
Inuussutissarsiorneq pillugu Siunnersuisoqatigiinnut ilaasortaasut
unammilleqatigiinnermik killilersuinissaq pillugu isumaqatigiissutinik
tigusaqassappata tusarniaassutigineqartunik taava tamanut
saqqummiunneqannginnissaat isumannaarneqarsinnaassanngilaq, tassami
Inuussutissarsiorneq pillugu Siunnersuisoqatigiit, siunnersuisoqatigiit
sulinerat pillugu nipangiussisussaatitaallutik qilersugaasinnaanngimmata.
Ullumikkut inuussutissarsiutinut
tunngassuteqartunik misissuilluni sulisoqalereersimatillugu Naalakkersuisut
isumaqarput ukiakkut katersuunnissaq utaqqisariaqaripput oqallinnissatsinnut,
taamanikkummi tamatigoornerusunik tunngaveqarluta pissutsit aamma
oqallisigisinnaassagunaratsigit.
Naggasiullugu oqaatigineqassaaq
Naalakkersuisut Anders Nilssonip siunnersuutaata piviusunngortinneqarnissaa
kaammattuutigisinnaanngimmassuk, kisiannili Naalakkersuisut inuussutissarsiornikkut
ingerlatsineq pillugu sulianut ingerlareersunut aallartinneqartussanullu
isummat taamaattut ilanngullugit aamma eqqarsaatissaqqitsilluinnarpaat.
Ruth Heilmann, Siumup oqaaseqartua:
Siullermik oqaatigissavara
saqqummiutassatta assinga siumuminngaaniit erniinnaq agguaanneqassammat.
Inatsisartunut ilaasortap Anders Nilsonnip
atassut sinnerlugu siunnersuutigaa siullermik suliassat ullumikkut pisortanit
akisussaaffigalugit imaluunniit suliffeqarfinnit pisortanit pigineqartuni
suliarineqartartut aamma inatsisinik allanngortitsinani namminersortunik
suliarineqarsinnaasut nunami sumiinnermut agguarlugit Naalakkersuisut
takussutissiussasut tamanullu saqqummiussillutik.
Naalakkersuisut tassunga tunngatillugu
akissutaanni nassuiaatigineqartut Siumumiit isumaqatigaavut soorlu aatsaat
siullermeertumik tunumi qulimiguulimmik timmisartuussinikkut namminersortumik
isumaqatigiissuteqarnikkut immikkut ittumik tapiisariaqarnermik malitsinneqartumik
iliuuseqartoqartariaqarsimanera assersuutigineqarmat.
Tamakkunuunatigut misilittakkanik allanik
tigussaasunik saqqummersoqarnissaanik utaqqimaarinninnerit Naalakkersuisunit oqariartuutigineqartoq
Siumumiit isumaqatiginartuutipparput.
Siunnersuutip aappaattut
siunnersuuteqartup siunnersuutigaa sulisitsisut neriorsuutaannik
isumaqatigiissutinillu allanik unammilleqatigiinnermik killiliisunik
pisortaqarfinnut suliffeqarfinnulluunniit Namminersornerulluitk Oqartussanik
pigineqartunit isumaqatigiissutaasimasut pillugit Naalakkersuisut
takussutissamik suliaqassasut.
Naalakkersuisumit pineqartumut
akissutigineqartut Siumumiit isumaqatiginartikkatsigit annertunerusumik
oqaaseqarfigissanngilagut. Tamatumunngami atatillugu unammilleqatigiinneq
pillugu aalajangiisartuulluni ataatsimiititaliaq pilersinneqarsimammat.
Assigiinngitsutigullu unammilleqatigiinnikkut periuserineqartut suliassaralugit aammalu ingerlallugit,
paasissutissanillu siammarterineq ilanngullugu ingerlattussaallugu.
Siunnersuutit pingajuattut
siunnersuutigineqarpoq inuutissarsiorneq pillugu siunnersuisoqatigiit
namminersornerullutik oqartussat inuussuttissarsiutitigut suliarisartagaannik
allanngortitsinissaq pillugu aalajangiinialersillugit
tusarniaavigineqartassasut. Taamatullu tusarniaavigineqartassallutik
sulisitsisut neriorsuuteqalersinnagit.
Siumumiit Naalakkersuisut akissuteqaataat
tassani aamma isumaqatigaarpu. Ilaatigut taamatut tamatigut pinngitsooranilu
tusarniaasarnissaq pilissappat suliarineqartussap suli kinguartooruteqaannarsinnaaneranik
kinguneqarsinnaaneranik aarleqqutaasoq paasilluaratsigu.
Inuutissarsiutit
annertusartuaannarneqarnissaannik siunnersuutinik imaqartut Siumumiit pingaartitaraagut.
Taamaattumillu inuutissarsiornermik tapersiisarnikkut aaqqissuusseqqillunilu
nutarterinerit aallartereersut ingerlattuaannarneqarnissaat eqqarsaatigalugit
Naalakkersuisut suliniuteqartuarnerat iluarisimaarnartuuvoq. Soorlu aamma kinguaariit
paarlaattarnerannik ajornartorsiutaalersartut aaqqinneqaqqullugit
iliuuseqareersugut. Aammalu akileraarutitigut iluaqutissartaqartumik
ileqqaagaqarsinnaaneq eqqaaneqarnikuulluni.
Tamatigoortumik inuutissarsiuteqarnerup
annertusarneqarnissaa, eqaallisarneqarnissaa allatigullu
inuutissarsiuteqarnerup misissuiffigineqarnissaa tamakkiisoq eqqarsaatigalugu
Naalakkersuisut suleqatigiissitaliorlutik suliaqartitsinerat ukiamut
tamakkiisumik saqqummiunneqartussaammat pissanngatigaarput.
Siumumiit taanna qilanaarigipput
oqaatigissavarput. Tassanilu tamakkiinerusumik tunngavissaqarluartumillu
oqallinnerup pinissaa naatsorsuutigeriissallugu.
Taamatut oqaaseqarluta
siunnersuutigineqartut akissutaalu Siumumiit tusaatissatut tiguagut.
Otto Steenholdt, Atassutip oqaaseqartua:
Partii Atassut aallarteqqaarnerminiilli inunnik namminersorlutik suliffiuteqarlutillu sulerusuttunik tapersersuiuarnermigut ilisarineqalersimavoq. Nunatsinni qinersisartunut erseqqissaatigiuartarparput eqqortuliornerunngitsoq pisortat suliffiisa inuiaqatigiit aningaasaataannik tunuliaqutserlutik inuit ataasiakkaannguit suliffiutaannik unammillertinneqartarnerat.
Taamaattoqaleraangallu partiit Atassummiit eqqortumik assersuuttarparput soorlumi nukappiaraq tilluuteqqaartussaq tilluunnikkut ajugaajuartumut illuatungiulitsillugu tilluttarfimmut ungalusimasumut isertittarigut, kiap arlaata ajugaanissa qularutiginnguarnagu.
Ukiut makkua imaannaanngillat Atassutip naalakkersuinikkut piumasariuagaa tusaaniarneqalersimavoq. Isertuutissanngilarpulli Atassutip nammineq iluani soorunami isummat assigiinngitsut saqqummertarmata pingaartumik pisortat namminersortullu illuatungeriissillugit oqallisigineqaleraangata.
Partii Atassummi ilaqarpugut namminersortut naammaginanngitsumik ullumikkutut pineqartuarnerannik qatsussisunik. Periarfissarsiuinnartunillu tamatigut siulliutinneqartarnissaannik periarfissarsiuussisunik.
Ukiorpassuunngillat matuma siornatigut politikkerit ilaat taama ilimaginngeruttorlugu nunatsinni namminersortunut tusaruminaqqissaartumik suaarmat, issuarpara: "Namminersortut periarfissitsigit", isuuaaneq naavoq. Ajoraluartumilli namminersortunut nikalluallannaqisumik taamak oqarnerugaluaq malitseqartinneqarpoq qarngit taamatut oqartut malitsiinnarlugu oqarmata, KNI niuernerpalaartumik ingerlatinneqalissasoq. Taamanimiilli tilluuttarfimmi kikkut nukimmikkut assigiinngeqalutik unammissasut isiginnaassallugit nalujunnaareerpagut.
Nunatta inuisa sineriammi sumiikkaluarunilluunniit assigiimmik isumagineqartariaqarnerat politikkerit tamarmik pingaartippaat. Tamatumunngalu ilanngullugu siunertaraattaaq inuiaqatigiit ingerlataat ima ingerlanneqassasut aamma inuiaqatigiinnut ajunaarutaanngitsumik ingerlatinneqassallutik.
Taamaattumik inatsisit assigiinngitsut inimi maani akuersissutigineqarput. Soorlu peqqussutit inatsisillu aktieselskabeqarnermut atuuttussat. Tamakku tamarmik inatsisartunit akuersissutigineqarput politikkerinillu ilaasortaaffigineqarlutillu ilaatillu siulittaasulersorneqarput, sakkortuumik piumaffigineqarlutik selskabet ilaasortaaffimmik iluanaaruteqartumik ingerlannissaa eqqarsaatigalugu suliartik ingerlatissagaat.
Atassummiit politikkerertagut selskabenut ilaasortanngortillugillu siulittaasunngortissimasagut matumuunakkut pisuutinnianngilagut. Taakkunuunakkut landstinngip suliareqqusaa tunniussimagatsigu, taakkulu suliartik ingerlatissagaat inatsisit landstingimit namminermit allanngortinneqarnissaata tungaanut.
Hr. Anders Nilssonip siunnersuutaa Naalakkersuinikkut ingerlaatsimut liberalismemut taaneqartartumut eqqaanartorujussuuvoq. Piviusunngortinneqarsinnaagaluarlunilu, nunatsinni inoqarfiit Nuummisulli niuerfiusuuppata. Taamak oqarpugut Nuummi namminersorlutik ingerlataqartut amerlaqimmata sulilu amerliartorluarlutik.
Illoqarfimmi tassani pisortat namminersortullu isumaqatigiissuteqarsinnaapput pisisartunut naammaginartunik kinguneqarsinnaasunik. Ilami aamma maani namminersortut imminnut unammillerlutik niuerniarlersinnaanerat atuisut imaluunniit atuisunut akitigut oqilisaassisussaammat.
Nuulli avataaniittut illoqarfiit eqqarsaatigissagaanni allatut ajornartumik suli oqartariaqarpugut akinik appartitsisimaartussamik tassalu KNI-mit suli pisariaqartitsilluta.
Naalakkersuisut siulittaasuata akissuteqaataa ataatsimut isigalugu Atassummiit isumaqarpugut ineriartornermi, tassa Atassutip isumai imaannaanngitsumik naapikkiartuaarneqartut. Qujanaq Naalakkersuisut anguniagaat ersarissumik ima oqaatigineqarmat issuarlara: "Namminersornerullutik Oqartussat niuernermik ingerlataqassanngitsut suliassat killilersugaanngitsumik unammilleqatigiilluni tuniniarneqarsinnaappata, kiisalu inuiaqatigiit soqutigisaat pingaartillugit ingerlanneqarsinnaappata. Sulilu aamma Atassummiit qujarullugu manna tiguarput aatsaannguaq oqaatsit piumasaqaataasut naammassineqarsinnaappata imaluunniit naammassineqarsimappata. Naalakkersuisut isumaqartut suliffeqarfiit Namminersornerullutik Oqartussanik pigineqartut namminersortunut pigisassanngortiortorneqassasut.
Neriorsuut tamanna avammut nipikisaarunnagu oqaatigiortorneqartariaqarpoq. Avataanit selskabet kikkulluunniit nunatsinni ingerlataqarumallutik eqqarsartut periarfississagutsigit. Silarsuarmi sumiluunniit nunat naalagaaffimmit namminermit aqunneqarpallaartut avataanniit aningaasaliiffigissallugit namminersorlutik suliffiuteqartut nangaassutigisarmatigit.
Ukiuni makkunani oqarta qujanartumik KNI-p pisiarniarfini imannaannaq piorsarpai pisiassaataatigullu pisisartut naammagisimaarinnitsittuarlugit. Taamak pissusilersorneq takuinnarlugu namminersorlutik niuertarfiutilinnut annilaajallannanngitsoorunanngilaq. Niuertarfiummi kusassarnissaanut akissaqanngikkaanni unammillerneq, ila unammillerteq pitsanngorsaajuartoq paasinartumik pisisartut ornigartuartussaammassuk.
Akissuteqaammili ersarissoq Atassummiit Naalakkersuisut siulittaasuannit neriorsuutitut qaquguluunniit allanngortitassaanngitsutut manna qulakkeerumavarput. Oqarmat, taamak niuertarfinnik pisiassaataannillu pitsanngorsaanerit ima siunertaqartut qaquguluunniit namminersortut tamakkuninnga tigusisussaasut pisiassaat ima pitsaatigissasut ingerlateqqeeriarnissaat nalorninaatsumik tigoqqaarneranniilli qulakkeerneqareersimassalluni.
Taamak siunertaqarneq aamma aktiaateqarluni ingerlatseqatigiiffinnut tamanut tunngavoq. Tassa namminersortunut tiguneqarnissaminnut piareersarluareersimaqqullugit.
Sineriak tamakkerlugu assigiimmik akeqartitsineq akissuteqaammi tikitsiarneqartoq qularinngilarput siunissami assortorlugu illersorlugulu oqallisigilluarneqartussaasoq. Uaguttaaq paasilluarsimavarput namminersortunut pisassanngortitsiortornerit assigiimmik akeqartitsinerup iluarsartuussivigineqarnissaanut attuumassuteqartinneqassappat.
Tamannalu aamma pillugu ataatsimiititaliamik pilersitsisoqarsimanera Atassummiinngaaniit qujarupparput. Anders Nilsson-ip ujartorpaa suut isumaqatigiissutaasimasut unammilleqatigiinnermik killiliisuusimanersut qulaajarlugit Naalakkersuisut takussutissiissasut. Naalakkersuisut isumaqatigisinnaavagut tamakkorpiaat pillugit 1992-mi unammilleqatigiittarneq pillugu inatsisiliorsimagatta. Taassumunngalu malitsigitillugu aamma piginnaatitaaffilimmik ataatsimiititaliuussisimalluta.
Uaguttaaq Atassummiit inuussutissarsiorneq pillugu siunnersuisoqatigiit tusarniaavigineqarsinnaanerat isumaqatigigaluarlugu taamaattoq suliassanik kinguartinneqarsinnaanatik piaartumik aalajangiivigisariaqartunut kinguarsaatitut isikkoqalersinnaasoq takusinnavaput.
Inuutissarsiutinut tunngassuteqartunik misissuineq aallartinneqareersimasoq Atassumiit ingerlaannaqquarput suliaasalu inerneri ukiamut utaqqeqqaarumallugit. Soorunami Anders Nilsson-ip namminersorlutik inuutissarsiuteqartut atugaannik pitsanngorsaaniarluni isumaliutersuuteqarluni apeqquteqaateqarnera Atassummiit paasilluarparput.
Ilumoorpoq Namminersornerullutik Oqartussat suliffiutaasa namminersortullu akornanniittoqarmat suliassanik qanoq ilillugit attorneqarsinnaanerinik nalorninaateqartunik. Namminersortup suliaq iluanaarutaasinnaasoq siulliulluni iluanaarutitut aallartissinnaagaluarpaa. Iluanaarnartuusorli paasineqaraangat pisortat unammillerlutik suliamik tassanngarpiaq aallartitsisinnaasarput, namminersortumillu naggataagut ipititsillutik.
Saqqummiussinermi oqaatsit taakkua illuatungilerneqaraluarput. Kisianni maani taamak erseqqissumik akerlilerpagut. Suliat erseqqissumik ingerlareersut namminersortunit pisortanilluunniit ukiuni makkunani ingerlanneqartut siunissami sumut sammiveqartinneqalersimasut tassa namminersortunngorsaanermi ullumikkut ersarissumik paatsuugassaanngitsumillu Naalakkersuisut siulittaasuannit tusarparput. Assulliu Atassummiit qujassutigiumallugit. Taamaakkaluartorli suli nutaanik suliassaqassaaq isumaqatigiissutit atorlugit imminnut akornusersuutaanngitsunik. Tassaniipporlu apeqquteqaateqartup Hr. Anders Nilsson-ip paasiumasaasa qiterisaa.
Suliat ingerlareersut ilaasortat ilaannit apeqquteqaatigineqartarneri tamanik iluarineqaannarneq ajorput. Tamakkua ilagigajuppaat suliat inatsisiliuullugit inerniligassat suliluunnit ininngitsut ilaatigut allanngortikkumallugit siunnersuusiorfigineqartarneri.
Apeqquteqaammi matumani suliffeqarfiit assigiinngitsut pineqaraluarlutik taamaattoq KNI sammineqarnerusutuut immat naggasiullugu inassutigissavarput. Suliaq pitsanngorsarneqarluni ingerlasoq namminersortunullu kusanartunngorlugu pisiassatut takorloorneqalereersimasoq taamatut ilillugu ingerlatiinnarneqassasoq. Tassami taamatut inerisaallutik sulisitagut uagut namminerpiaq maani landstingimi naalakkerlugit suliassissimagatsigit.
Apeqquteqaat oqallisigitillugu paasivarput namminersortunngorsaanermik taallugu misissuisariaqarneq annertuujusoq. Tamannalu tunngavigalugu Atassummiit Naalakkersuisut inanniarpagut tamatuminnga sulissutiginnittussanik atorfilinnik inuttalinnik ataatsimiititalioqqullugit. Taakku misissuinerisa inerneri atorfissaqartinneqassaqimmata soorlu aktieselskabetut ingerlassat assigiinngitsunik toqqammaveqartut tamatumuunakkut assigiimmik toqqammavilerneqarsinnaammata.
Taamatut oqaaseqarluta apeqquteqaat taassumunngalu akissutaasoq atassummiit tusaatissatut ukiamulli aamma uterfigineqarnissaa Atassummiit ammaffigalugu nalunaarutigaarput.
Josef Motzfeldt, Inuit Ataqatigiit oqaaseqartuat:
Inatsisartunut ilaasortap Anders Nilsson-ip siunnersuutaanut Naalakkersuisut akissuteqaataat tunngavigalugu Inuit Ataqatigiit isumaqatigaat.
Siunnersuutip sunarpiaq siunertarineraa ersernerluppoq. Ilaatigut pisortat ingerlassiviutaasa inatsisartut aalajangigaat tunngavigalugit susassaqarfimminnik aallussiniarnerannut pasillerniutaanerusutut paasineqarsinnaasorinarluni.
Ingerlassiviillimiuna ataasiakkaat susassaqaarfiminni asersuutigalugu annerpaajunerinnartik tunngavigalugu atornerlueriarsinnaanerat pitsaaliorniarlugu inatsisartut unammilleqatigiinnermut naliliisartunik pilersitsisimasut.
Inuit Ataqatigiit isumaqarput unneqqarissaarnerullunilu nunami maani pissutsinut naleqqunnerusoq, siunnersuutigineqartumit siulliullugu inuussutissarsiutinik aallartinniartunut qanoq tapersersueriaaseqarnissamik kinguaariillu ingerlatatigut ingerlatseqqinnissaanni siunnerfinnik inatsisartut aalajangersaaqqaassappata.
Tamatuma naammassineqaqqaarneratigut nunaqavissut nutaavinnillu aallartitsiniartut siunissami inuussutissarsiutitigut ineriartortitseqqinnermi peqataanerunissaat qulakkeerneqassasoq qularnanngilaq.
Aamma Inuit Ataqatigiit aalajangiusimavaat namminersortunngorsaaniaannarluni naamminersortunngorsaaneq nammineq sinnerfeqanngitsoq.
Aammalu eqqaamasariaqarsoraarput Naalakkersuinikkut qulangerlugu pilersinneqartoq pisortanillu kissumissiullugulusooq aallartisarneqartoq unammeqatigiinnivittut oqaatigineqarsinnaanngimmat.
Aammami nunami maani ikeqaluta siammasissorujussuarmik nunaqartiternitta niuernikkut nukiit tamakkiisumik tunngavigineqarsinnaanerannut tamanna killiliisooreerpoq. Unammeqatigiinnerullu pisortanit naalakkiutitut pilersinneqartup arlaannaannulluunniiit iluaqutaanissaanut tamanna suli qularnarnerulersitsivoq.
Unammilleqatigiinnikkulli ingerlassiviusinnaasunik, taamaattoqarmammi, unammilleqatigiinnermi nukiit unamminermikkut angusarisinnaasaat tutsuviginarnerusut isumaqarpugut. Aammali tamakkunani pingaaruteqarluinnartutut Inatsisartut qulakkiigassaraarput inuiaqatigiit soqutigisaasa pingaarutillit isumannaatsumik ingerlanneqarnissaat, soorlumi naalakkersuisut akissuteqaamminni tamanna aamma oqaatigigaat.
Naggataatigut oqaatigiinnassavarput killilersuiffiunngilluinnartumik suni tamani niuernikkut nunatsinni ingerlatsisinnaanermik takorluukkamik piviusunngortitsiniarneq pisortanik ikiorneqarnikkut pilersinneqarsinnaasorinnginnatsigu, unammeqatigiittoqassappat unammissutissat unammeqataarusuttunit pikkorinneqqusaaffiusussaapput.
Bjarne Kreutzmann, Akulliit Partiiat:
Pisortat namminersortullu akornanni
ullumikkut suliassaritinneqartunut immikkoortitsinerup
nalornisoorutigineqartartup atorunnaarsinneqarnissaanik oqallisissiaq Akulliit
Partiiat sinnerlugu soqutigalugu misissuataarsimavara. Siullermillu
oqaatigilaassavara, tassa isumaqarnaraluarmat ukiassamut innersuunneqarmata
taakkua pineqartut tamarmik, tassa ukiassamut suliassap
kinguartinneqarsimasinnaanerigalua, kisianni oqaluuserisassatut ilaavoq,
taamaattumik Hr. Anders Nielsson -ip siunnersuutaanut pingasunut naatsumik ima
oqaaseqassaanga.
Siullermut: Nunatsinni aningaasaqarnikkut
aaqqissuussaaneq assigiimmik akeqartitsinermit sunnersimaneqarluinnarpoq,
taamaalilluni nunatsinni sumiluunniit najugaqaraluaraanni nioqqutissat
sunaluunniit assigiimmik akeqarluni. Akullit Partiiat partiinit siullersaalluni
suaarutigaa periaatsit taassuma allanngortittariaqarnera, tassa
ingerlalluarnerusinnaanerigaluaq periaatsimik taassuman-nga
pakkersimaarneqarmat, taamaalillunilu aningaasaaarsiornikkut ineriartorsinnaanerugaluaq
tamatta ujartortuagarput killilersimaarlugu.
Kisianni soorluna suut tamarmik
kinguarsarneqartuartut misissuiffigeqqaalaartinneqaannartarlutik, uanilu
pineqartumi suleqatigiissitaq naalakkersuisunit pilersinneqarsimasoq ukiarulu
nassuiaammik saqqummiussinissaa naatsorsuutigineqartoq, taanna assut
saneqqukkuminaappoq.
Aappaanut: Sulisitsisunut immikkut ittumik
isumaqatigiissutit isumaqatigiissutillu allat unammilleqatigiinnermik killiliisut
nalunaarsorneqarnissaannut tunngatillugu paasivara suliffeqarfiit
isumaqatigiissuteqarneq naapertorlugu niueqatigiinnikkut allanik
naqisimannittut, naqisimannissinnaasulluunniit paasissutissanik
piumasaqarfiginissaannut unammilleqatigiinneq pillugu ataatsimiititaliaq
inatsisiliornikkut piginnaatinneqartoq.
Pingajuannut: Namminersornerullutik
Oqartussat inuussutissarsiutitigut suliarisartagaannik il.il
allanngortitsinissaq pillugu Namminersornerullutik Oqartussat
aalajangiisinnagit Inuutissarsiorneq pillugu Siunnersuisoqatigiit
isumasiorneqartarnissaannut tunngatillugu paasivara tamatuma oqallisiginissaa
ukiaru ataatsimiinnissamut oqallisisigneqarnissaa Namminersornerullutik
Oqartussat inassutigigaat. Taamaalilluta oqallinnissamut tunngavissaqarneruniassagatta.
Inuussutissarsiornikkut politikki pillugu
suliamut aallartereersumut ingerlaqqittussamullu isumassarsiat
ilanngunneqarnissaannik isumammut isumaqataavunga.
Anthon Frederiksen, Kattusseqatigiit:
Inatsisartunut ilaasortap Anders Nielsson
-ip siunnersuutaa soqutiginartoq aammalu qularnanngitsumik namminersortunik
suli annerusumik periarfissiinissamut aqqutissiueqataasinnaasoq
annertunerusumik maannakkut oqaaseqarfiginagu naalakkersuisut akissuteqaamminni
oqallinnissap ukiamut Inatsartut ataatsimiinnissaannut paasissutissanik
annerusunik tunngaveqarluni oqallinnissaq ilimasaarutigereermassuk taamatut
saqqummiunneqartut tusaatissatut tigugallarlugit, ukiamut oqallinnissap
kinnguartinneqarnera Kattusseqatigiinniit akueriinnarallarpara.
Ullumikkummi naalakkersuinermi
namminersortunik periarfissiiniarnermik oqaluttarneq annertunerusumik
timitaqanngilaq, tassami naluneqanngitsutut namminersorlutik ingerlatsisorpassuit
pisortat ingerlataannik annertoorujussuarmik unammillerneqartarput. Assersuutigiinnarlugu
Video-erniarfiit, nunaqarfinni nammineerlutik pisiniarfiutillit, RoyalGreenland
-ip nioqquteqarnerani unammillernerit aammalu allat taagorneqarsinnaagaluartut
arlallit annertuumik pisortat ingerlataannik unammillerneqartut eqqarsaatigalugit.
Taamaattumik ukiamut annerusumik
tunngavissaqarluni oqallinnissaq qilanaaralugu utaqqissavara.
Anders Nielsson, Atassut:
Naalakkersuisut akissuteqaataanni
siunnersuutiga pisariaqarneranik annermik isumalersorpaat aamma oqaaseqartut
taamaaliorput. Allatut ajoraluartumik erseqqisaatigisariaqarpara siunnesuutinni
Namminersornerullutik Oqartussat suliffeqarfiutaasa
namminersortunngorsarneqarnissaat pineqanngimmat. Namminersornerullutik
Oqartussat naalakkersuinikkut ingerlatsinermut suliffeqarfiit
Namminersornerullutik Oqartussanit pigineqartut namminersorlutik
ingerlassaqartunik unitsitsiniartuunngimmata tamanna nalunngilluinnarpara.
Taamaakkaluartoq inuussutissarsiorfinni suliffeeqarfiit Namminersornerullutik
Oqartussanik pigineqartut sunik sammisaqarnerinik
sammisaqannginnerinilluunniit nalornissut, tassa taannarpiaavoq namminersortut
eqeersimaarniarnerinnik kigaallassaataasumik sunniuttartoq.
Uanga siunnersuutinni paasiuminaattut
peerneqarnissaat kisimi pineqarpoq, paasiuminnaattut inuussutissarsiornermi
sumi tamani malunniuttartut Namminersornerullutik Oqartussat suliffeqarfeqarfigilersimanngisaanni
aammalu suliassaqarfigilernavianngisaanniluunniit allaat.
Paasiuminnaatsut annikillilerniarlugit
peerneqaqqullugilluunniit paasisitsiniaanissaq pisariaqarpoq, inunnik tamanik
paasisitsiniaanissaq, suliffeqarfiit
Namminersornerullutik Oqartussanit pigineqartut imaluunniit aalajangersimasumik
aningaasaliiffigineqarlutik imminnut aquttut sunik suliassaqarnissaminnik akuerissaasimanersut
aammalu sorpianik suliaqartuunersut paasisitsiniuutigalugu. Ullumikkut
inuusukkaanni suliffimmillu aallartitsiniarluni apeqqutit marluupput
tunuartinneqarsinnaanngitsut isaarissamilusooq kiisortutut inissisimasut
apeqqullu siulleeeq imaappoq: Ingerlalluarpat Namminersornerullutik Oqartussat
unammillerlutik aallartinnialissanerlutik? Apeqqutit aappaat tassaavoq:
Aallartinniarnermi aningaasat aallarniutissat sumit pissarsiarissavakka?
Suliffeqarfinnut amerlanernut
tunngatillugu nammineq sipaagaqarsinnaanneq aallarniutitut naammanngilaq,
taarsigassarsineq pisariaqarpoq. Apeqqut siulleq aningaaserivinni apeqqutigineqartartoq
tamanna nalunngereerparput, ingerlalluarpat taava Namminersornerullutik
Oqartussat suliffeqarfimmik unammillertumik aallartitsissappat? Ullumikkut
namminersorlutik inuussutissarsiuteqartuni aallartitsisuni
aningaasaliisuniluunniit soqanngilaq ima oqarumasunik: Naamik, Namminersornerullutik Oqartussat suliffimmik
unammillertussamik aallartitsinavianngillat.
Taamatut nalornineq suliffissanut
namminersortunik anginngikkaluamik angisuunilluunniit allartitsiniarnermut
unittoorutaasarpoq. Aallartitsisartut isumassarsiaqartut ilinniarsimasut
allanut saattarput, immaqa pisortat ingerlatassaanik
toqqissisimanarnerorparsissuni sulisunngorniartarput, immaqa Danmarkimut
nuuttarlutik, immaqaluunniit kajumissuseerutiinnartarlutik. Aningaasaliisartut
nunatsinni aningaasaliinissamut nalornisoortut danskit obligation -iinik tassa
pappiaraataannik nalilinnik pisisarput aningaasanilluunniit aningaaserivimmut
ileqqaagassanngortittarlugit pappiaqqanik nalilinnik pisissutissanik.
Taamaappoq aningaasarpassuunngikkaluartunik ileqqaagaqarumagaanni, taamaappoq
suliamut tunngasunik peqatigiiffimmi ilisimasakkalu naapertorlugit aamma SIK
-mi taamaalluni.
Uanga siunnersuutiga suliaraara Kalaallit
Nunaanni sulisistsisut peqatigiiffianik aamma niuernermut sullissinermut
assartuinermullu peqatigiiffinnik oqaloqateqartarnera tunngavigalugu.Taakku siunnersuut
isu...nerarpaat, massa namminersorluni inuussutissarsiornermut
tunngavissarititaasut pitsanngoriaatissaattut ilorraap tungaanut annikitsumik
alloriarnertut isigigaluarlugu. Taamaattumik akissuteqaammi tunngavilersuutit
paasinngilakka, tassa Inuussutissarsiorneq pillugu Siunnersuisoqatigiinni
ilaasortat aalajangersimasumik ataatsimiittarnissaannik pisussaaffilerneqarsinnaanngitsut.
Inuussutissarsiorneq pillugu Siunnersuisoqatigiit aperineqarsimanerpat?
Assersuutigalugu siunnersuut una Inuussutissarsiorneq pillugu
Siunnersuisoqatigiinnut tusarniaatigineqarsimanerpa? Suliffeqarfinni
Namminersornerullutik Oqartussani pigineqartuni, niuernermut tunngaveqarnermut
tunngatillugu suunuku suliniutit akissuteqaammi eqqaaneqartut, suuppat,
suliniutit piviusunngoreernatik tamanit ilisimaneqarnissaminnut
naleqqutinngitsut?
Ukiualunnguit matuma siorna taamanikkut
naalakkersuisuni siulittaasoq Lars EmilJohansen oqarluartaarpoq namminersortut
periarfissinneqarlik, uanga isumaga malillugu tamanna pineqanngilaq,
oqarluartaarnermi Landskarsi periarfissinneqarli tulluarnerusimassagaluapoq.
Landskarsi qularnaveqqusiinnernik
uppernarsaasiinernik aammalu suliffeqarfinni aalajangersimasuni
aningaasaliiffigineqarlutik imminnut aquttuni, suliffeqarfinnilu Namminersornerullutik
Oqartussani pigineqartuni pisussaaffeqarsinnaasariaqarfippassuarnik
orsulipatsinneqarpoq. Tamakkorpassuit ataatsimut katillugit
saqqummiutissagalurutsigit allaat aningaasanik niuerfinnik
iluanaarniarpiluttutut qaannguusaanik tingititsisinnaasut. Landskarsi
atorfissaanut atussavarput tassaasut peqqinnissamilu ilinniartitaanermi
nunatsinnilu iluaqusersuutinut pisariaqartunut tamatta suliarisassatsinnut.
Aamma inatsisinik tunngaveqartumik
aningaasartuutissarpassuaqarpugut isumaginninnermut tunngasuni, ukiuni
aggersuni Landskarsimut piumasaqarfiujuartusanik, tamakuupput Landskarsip
aningaasanik atuiffissaasut naatsorsuussat, tamakkuupput akileraarutit
akitsuutillu allanillu Landskarsimut isertitaqaataasunik allanik
atuiffiusussat. Namminersortut sulisunik naalakkerneqassapput, suliniarnerit
akornusersorneqassanngillat.
Siunnersuut una paasiuminaatsunik
peersitsiniaaneq tunngavissamik pitsaanerusumik pilersitsiffiussaaq, imminik
pisortat namminersortullu suliassaataasa agguarsimanerinik massakkut ingerlasuni
allannguiffiussanngilaq, siunnersuut malugissallugu una pingaartoq tassa
Landskarsimut aningaasartuutaasussaanngilaq, tamanna taassallugu
pingaartuuvoq, siunnersuummi kissaat anneq tassaavoq Namminersornerullutik
Oqartussat namminersorluni ingerlassaqartunut killeqarfiata suuneranik inunnut
tamanut paasisitsiniaanissaq.
Oqallinneq ingerlanneqartoq immikulaaq
ippoq, tassa qanorluunniit inerneqaraluaruni inuiaqatigiinni
sunniuteqartussaagami assungaatsiaq. Paasiuminaatsut peerneqarnissaat isumaqatigiissutaassappat
nalornineq piissaaq, aammalu aallartisarneq siuarsarneqarlunilu Danmarkimit
aningaasalersuiumaneq anguneqassalluni.
Siunnersuut tapersersorneqassanngippat
maannamutut ingerlassaagut, inuillu namminersorlutik ingerlassaqartut
oqassapput, tassa namminersortunngorsaaneq taama suusupagineqartigaaq,
Inatsisartuni naalakkersuisunilu allaat Namminersornerullutik Oqartussat
nammineq suliffeqarfiutaat namminersorlutik ingerlassaqartut
unammillersinaanerun......sanilliullutik susariaqarnersut
susariaqannginnersulluunniit oqaatigiumanagu. Ullumikkut oqaatigineqartut
aallaavigalugit ukiamut oqaluuserinninnissamut utaqqinnerusunnerussaanga.
Jonathan Motzfeldt, Naalakkersuisut Siulittaasuat:
Qujassutigaara partiit oqaaseqartuinit
tamanit naalakkersuisut maani akissutigisaat isumaqatigineqarmat
annertunerusutigut aammalu kisiat malugisinnaavara partiit tamarmik aamma uani
siunnersuuteqartoq ilanngulluni Anders Nielsson oqaluuserisap ukiamut
annerusumik sammineqarnissaa tassani aamma piareersimaffigiiigaa.
Kisianni tassa qanorluunniit oqaraluaratta
naatsumik oqartariaqarpugut aajuna, KNI.-ip ullumikkut taanna annerusumik
pineqarpoq uani. Aamma Namminersornerusut allanik aamma ingerlataqarput.
KNI-ip Landskarsimut nagguaatsutut sorlussuarminik manngussisimanera
aningaasivimmut taanna qaangiunnikuuvoq, KNI Niuerfik niuerfittut allatut
ililluni aningaaserivinni attartorsimavoq, taakkulu akilersugassaralugit.
Taassuma saniatigut inimi maani servicekontraktit aqqutigalugit nunaqarfinnut
isorliunerusunullu pajuttuinissat, allallu ilanngullugit 140 milliuunit
missaanik tapiissutit tunniunneqartarput suliassaq taakkunaniittoq
naammaseqqullugu.
Piginneqatigiiffik alla Namminersornerusut
aamma akisussaaqataaffiat Royal Greenland taamatorluinnaq aamma ingerlavoq,
aamma attartornerit aqqutigalugit nammineq akisussaaffigisaminik aamma tassani
aningaasarsiornikkut annertoqisumik imminnut ingerlapput.
Nagguaatsup sorlussuatut Landskarsimut
suli attavimminik kipisinngitsoq tassaavoq Tele Greenland, taanna suli 360
milliuuninik Landskarsimut akiligassaqarpoq, tassanilu sorlussuaq ittoq
naalakkersuisut aamma kipitinnissaa eqqarsaatigaat, taamaalilluni aamma
nammineerluni ingerlalernissaaq aamma tassani siunnerfigineqarmat, taannalu
pisinnagu aamma Tele Greenland-ip maani annertoqisumik kapacitet-mik
pigisaqarmat, tassa nukimmik pigisaqarmat sinerissami atorneqarsinnaasumik,
taassumalu nukii ilaannaralanngua atorneqarluni, nunatsinni annertunerusumik
qaammarsaanikkut aammalu atuartitsinikkut atorneqarsinnaaneri periarfissat
naalakkersuisut misissoorlugit ingerlappaat, Inatsisartunut aamma
siunnersuuteqarsinnaanermut tunngavissarsiuutigalugit.
KNI-ip Inatsisartuninngaanniit peqquneqarluni
akuerineqarluni selskabinngornera maannakkut ukiualunnguit qaangiuppoq
ingerlasimammat, tassanilu maannakkut ukiut kingulliit marluk ingerlalluartutut
oqaatigisariaqarpoq, aammalu tassani ingerlalluartutut nalilerneqarnerani
imaaginnanngilaq naalakkersuinikkut anguniakkat tassani patsisaammata.
Niuernikkut ingerlavoq nammineq
pisisartut perusutaat nioqqutigalugit, inussiarnersumik pisisartunut
neqerooruteqarnikkut, sulliviit pitsanngorsarnerisigut, sulliviit pisoqalisut
pitsanngorsarneqarput, maannakkut KNI -ip sulisuminut ilinniartitsinissaminut
programmia allaat Danmarkikkunni malugineqartumik usorunneqarpoq, sulisuminut
taamatut ingerlatsinissaminut piareersarnera.
Qanorluunniit oqaraluarutta
suliffeqarfissuaq taanna inuiaqatigiit iluanni aningaasarsiornikkut,
ilinniartitsinikkut allatigullu kiffartuussinikkut ajunngitsumik pisisartunut
oqilisaassisuussimavoq, tassanilu namminersortut taama pitsaatigisumik
ingerlatsisinnaanerat qularinngilara, maannali innuttaasuninngaanniit ukiulerlugu
nalunaaaqutalerlugu tunniussinissaq qularnanngilaq tamatta
tunuarsimaarfiigaarput.
Taamaattumik oqaatigissavara KNI
siornatigut KGH suliffimmik aallartitsilluarnera ukiut kingullerni takusarput
tunngaveqarpoq, nammineq aamma uagut tassani suliaqarsimasugut, KNI-mi
malinnaalluaqqissaarluta suliaqarsimasugut takusinnaavarput, aamma
eqqaasitsissutigissavara Atassut KNI siulersuisunik marlunnik politikkerinik
aamma ilaasortaqarmat periarfissarlu qanittumut ammalu malinnaasut tassani,
tassani takusimavarput siulersuisuni takusimallugu sulisut sulliverujussuarmi
tassani peqatigalugit nutaamik aaqqissuussineq sulisunillu paasseqatiginnilluni
aallariarneq, ilinniartsitsinerillu aqqutigalugit paaseqatigiinniarneq
sulisunut assorujussuaq qiimmassaataasoq, aammalu sulisut tassani
qiimmaannaratik kisianni aamma nammineq iluanaarneratigut aamma
pissarseqataasinnaanerminnut periarfissaqartitaanerat aamma tassani tamarmi
aaqqissuusinermi ilaatinneqarpoq.
Ukiut 200-it sinnerlugit
kalaaleqaterpassuagut KGH-mi, ilaatigut imminnut inussiaatitut isigalutik,
ukiorpassuarni sulisimapput. Pisiniarfiit kiassarneqangitsut issersuup ataani
naneruut ataaseq ikillugu sulisarsimapput ukiorparujussuarni. Maannakkut
sullivittut allatulli ilillugit kiassarneqarsinnaasuni sulillutik aammalu
niuernikkut iluanaarutiminnik aviffigineqarsinnaallutik periarfissanit ukiut
200 qaangiunneranni periarfissinneqarnerat, taanna isumaqarpunga periarfissaq
atorluaqqaartariaqartoq, taavalu aamma periarfissaq taanna
nalilerluarneqareerpat kiffartuussinermullu maannakkut anguneqarsimasumik
ajornerulersitsinngitsumik angusaqarluni privatinut tunniunneqasinnaanera
nalliuppat, aap, taanna nalliuttoq taava akueriumaarparput.
Naggataatigut oqaatigilara una,
ippassaanerujooq Ċlborg-mi erhverskonference -mi inuussutissarsiornikkut
konference-mi najuukkama oqalugiariartortunut aamma ilaallunga, tassanilu
ilaatigut oqalugiartut tusarnaarlugit Kalaallit Nunaanni selskab-imut
isiginninnerat aammalu piginneqataasinnaanerminnik qallunaat selskab -iisa
nunatsnni periarfissaminnik noqqaanerat. Suleqatiginnikkumaneq tassaniittoq
aamma maluginiarsimavara, aammalu iluatinnartutut isigalugu, ilaatigut
nunatsinni qisunnik annertuunik atugaqarnitta nalaani neqeroorutit taagorneqartut
akornanni tamakkua illugissarnissatta tungaatigut pingaartumik iluarsaassinitta
nalaani niuerfigeqatigiissinnaanerit ammaanniarneqartut tusarnaarpakka. Soorlu
tamakkunatigut periarfissat tusarnaarneranni Anders Nielsson ilumoorpoq,
tassani Grċ Zone-mik taasaq qanoq kalaallisut taaguutissaqaraluarnerpoq,
kisianni ikaarsaariarfeqarpoq tassani, nalorninartut tullagassat tassaniipput,
niuertut akunnerminni ilisimateqatigiittarneq naliginnaasoq aqqutigalugu
paaseqatigiiffigisinnaasaat.
Aammalu qularnanngitsumik taassuma tungaatigut
imminnut oqaloqatigiinnerit paaseqatigiissutissat pilersaarutillu qanoq
innerannik. Aamma tassuunakkut KNI ikiorneqarsinnaavoq kaammatorlugu, kisianni
eqqaamassavarput aamma niuertutut allatulli maannakkut pisussaaffeqartitaavoq
illoqarfinni niuernermini. Privatillulli pitsaatigisumik niuissalluni,
kiffartuussissalluni ilinniartitsissalluni allatigullu, tamakkunatigut
periarfissamigut allatulli sakkortutigisumik aamma pisussaassusermik
tunisisimavoq.
Taamaattumik tassuunakkut aamma
ataqqisariaqartutut isumaqarfigaara, nammineq pitsaassusissaq anguniakkani
taanna tikippagu aamma siulersuisut tassani isummaminnik ersersitsippata,
siulersuisullu tunngavissaqartumik saqqummiussippata, aap, Naalakkersuisuni
uterfigineqarsinnaavoq.
Kisianni partiit allat oqaaseqartui,
Siumup oqaaseqartuata aammalu Anders Nielsson-imut akissuteqarnermini Ruthip
oqaatigisaa, tassa siunnersuuteqartup, tassa Anders Nielsonip siunnersuuteqartup
aappaatut siunnersuutigigaa sulisitsisut neriorsuutaannik isumaqatigiissutinillu
allanik unammilleqatigiinnermik killiliissunik pisortaqarfinni
suliffeqarfinnulluunniit Namminersornerullutik Oqartussanit pigineqartunut
isumaqatigiissutaasimasut pillugit Naalakkersuisut takussutissamik
suliaqassasut, tassuunakkut akissutigisakka Siumup oqaluttuata Ruth Heilmannip
annertunerusumik isumaqatiginartillugit oqaatigimmagit, aammalu tassani Otto
Steenholdtip oqaaseqarnermini aamma erseqqivissumik tunngavigisaasigut aamma
tapersermagit taakkua qujassutigaakka.
Atassutip oqaluttuani taanna erseqqissut
oqaatigineqartut Ottomingaanniit maluginiarpakka taanna skissutigisanni
namminersortut periarfissaatigut tunngaviatigut isummerneq una: Taamatut
suliffik ittoq tunniukkiartuaarnissaa maannakkut oqaatigineqartoq
utertinneqarsinnaajunnaarsimammat maanngaanniit aamma ilumoorpoq taanna.
Siunnerfik taanna akerlilersunngilarput.
Taamatullu aamma Inuit Ataqatigiit
oqaaseqaatigisaat, taamatullu aamma nuannaritigaara, immikkullu allaat Inuit
Ataqatigiinninngaanniit oqaaseqartoq Josef Motzfeldt oqaatigisai, naggataatigut
oqaatigineqartut isumaqatigilluinnakkakka aamma Inuit Ataqatigiinninngaanniit
ullumikkut tusaavakka, tassa oqaatsimi naggataatigut Josef Motzfeldt
oqaaseqarmat, naggataatigut oqaatigiinnassavarput killersuiffiunngilluinnartumik
niuernikkut ingerlatsisinnaannermik takorluukkanik piviusunngortitsiniarneq
pisortanik ikiorneqarnikkut pilersinneqarsorinnginnatsigu,
unammeqatigiittoqassappat unammissutissat unammeqataarusuttunit
pikkorinnequsaaffiusussaapput. Inuit Ataqatigiit tassuunnakkut oqaatigisaat
Otto Steenholdtillu ullumikkut oqaaserisai imminnut qanittuarakasiupput,
Siumullu tassuunnakkut taama oqartut akornanni oqarsinnaavugut tassuunakkut
paaseqatigiiffissamik angisuumik ataatsimut aallaaveqarpugut, ukiaru apeqqutit
itinerusumik aamma tunngavissaqarnerusumik uterfiginissaannut.
Tassalu taamaasilluni ullormut
oqaluuserisassaq immikkoortoq 45 Inatsisartut suleriaasianni paragraf 41
naapertorlugu apeqquteqaat toqqammavigalugu oqallinneq, Pisortat namminersortullu
ullumikkut suliassaritinneqartunik immikkoortitsinerup
nalornisoorugineqartartut atorunnaasinnissaannik siunnersuut
oqallisigineqarnera tamaannga killippoq, tassani ukiamut erseqinnerusumik
tamakku tikeqqinneqarnissaat isumaqatigiissutigineqartoq paasivara.
Oqaluuserisaq naammassivoq.