Oqaluuserisassani immikkoortoq 47 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Inatsisartut Siulittaasuat Anders Andreassen.
Maliinannguaq Markussen Mĝlgaard, Inuit Ataqatigiit:
Ukiuni makkunani aatsaat taamak ilinniarluarsimasunik nunaqavissunik pisariaqartitsitigaagut, taakkartortuarlugulu kalaallit ilinniarluarsimasut pisariaqarteqalugit. Kalaallinilli Qallunaat Nunaannut ilinniariaqqillutik aallartartunik oqaloqateqarninni paasisimavara, immikkut ilinniaqqinniarlutik aallartartut namminneq ilaquttaminnullu inissaminnik ujarlertariaqartartut.
Allaat Kĝbenhavn-imi ilinniartut ilaat atugarissaarpallaaratik inissaminnik ujarlertarsimapput, ininik attartornerminni ilungersunartorsiorsinnaasarlutik. Taamaassimappat tamakku ilinniaqqinnissamut ingerlalluarnissamullu toqqammavigissallugit kusananngilaq. Ilinniarsimasunimmi taama pisariaqartitsitigaluta ilinniariartitagut minnerpaamik toqqissisimasumik inissaqartittariaqarpagut.
Taamaattumik apeqqutigerusuppara nunatta avataanut ilinniariaqqittartunut inissaqartitsisarnerit qanoq aaqqissuunneqarsimappat? Kikkut inissaqartinneqareertarpat, kikkullu namminneq ujarlertariaqartarpat?
Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:
Ukiuni kingullerni Danmarkimi universitetini qaffasinnerusunillu ilinniarfinni ilinniartut aammalu tamanna ilinniartut inissarsiortartut amerlassusiisigut malugineqarluarsimavoq.
Pissutsit taamaalinerat aamma Danmarkimi Kalaallit Illuini ilinniagalinnik ilitsersuisartut kalaallinik ilinniagalinnik naammattunik inissaqartitsiniarnerannut ajornakusoortitsilersimavoq.
Taamaakkaluartorli erseqqissarneqassaaq kalaaleq ilinniagaqarniarluni Danmarkimut tikikkaangami tamatigut oqqiffissaqartinneqartarmat.
Inissarsiniartarnermi peeriaatsit imaapput: Ilinniagaqarniartup ilinniagaqarnissamut piumasaqaatinik naammassinnissimanera Kultureqarnermut, Ilinniartitaanermut Ilageeqarnermullu Pisortaqarfimmit nalunaarutigineqarniariaraangat ilinniagaqalersussaq Kalaallit Illuinit inissarsiuunneqalertarpoq.
Taama allaffissornikkut qitiusumit aqutsiviit ajunngisaartarnerisigut ilinniagaqarniartoq Danmarkimut tikinnermini amerlanertigut illoqarfimmi najugarisassamini ilinniartunut inissiaq piareersimareersoq nutserfigisinnaasarpaa, taamaattorli Odensemi Ċrhusimilu Kalaallit Illuini najugaqaqqaarsinnaasarluni.
Inissaqarniarneq ilinniagaqarniartunut Autoqaanerusunut@, tassa 30-nik ukioqalereersimasunut, ajornartorsiornarnerusarpoq, tassa malittarisassat naapertorlugit taakku ilinniartunut inissiani ineqartinneqarsinnaanngimmata. Ilinniartunut inissiani ilaqutariinnut inissiat ikippallaarnerat pissutigalugu aammattaaq ilaqutariit inissaqartinniarnerat ajornakusoortarpoq.
Taama pisoqartillugu - aammami ataasiakkaani allani - ilinniagaqarniartut Kalaallit Illuinit qinnuigineqartarput inissarsiorneqarnerminnut ikiuuteqqullugit, assersuutigalugu ilinniagaqarniartup inissarsiortut peqatigiiffiannut ataatsinut arlalinnulluuniit ilaasortanngorneratigut, tamannami piumasarineqartarmat pisortat namminersortulluunniit inissiaataani nutsersinnaalissagaanni.
Ilinniagaqarniartut ataasiakkaat tikeqqaarnerminni allatut ajornartumik akunnittarfimmi inissiamiluunniit nerisaqarfiutigisumi inissinneqartariaqartarsimapput. Taama pisoqartillugu ilinniagaqarniartoq aamma nammineerluni inissarsioqataaqquneqartarpoq, ineeqqat namminersortunit neqeroorutigineqartartut pitsaassutsimikkut akimikkullu assigiinngiiaaqimmata aammalu isumaqartoqarmat ineeqqap neqeroorutigineqartup akuerineqarsinnaanera taamaallaat ilinniartumit namminermit isummerfigissallugu naapertuuttoq.
Ilinniagalinnut utoqqaanerusunut atuagarsornermik sulinermillu nikerartunik ilinniagalinnut (assersuutigalugu imigassamik pinaveersaartitsiniarnermik ilinniagalinnut) immikkut illuinnartumik ajornartorsiuteqartoqartarpoq. Taamaattunik ilinniagalinnut atuagarsortarnerit sivikitsuinnaasartut nalaani naapertuuttunik akilinnik inissaqartitsiniartarneq ajornakusoortorujussuusinnaasarpoq.
Kiisalu Kalaallit Illuini ilinniartunut ilitsersuisartut kalaallit ilinniagaqarniartut naammaginartunik inissaqartinniarlugit sulilluartorujussuummata, taamaakkaluartorli ilinniagaqartut namminneq Danmarkimiinnerisa nalaani inissarsiniartarnernut soorunami annertunerpaamik peqataatinneqartarput.
Nunani allani aamma pissutsit allaanerulluinnarfigisinnaasaanni ilinniagaqartup aallartinnani inissarsereersimanissaa pinngitsoorneqarsinnasanngilaq.
Maliinannguaq Markussen Mĝlgaard, Inuit Ataqatigiit:
Akissutinnut erseqqissumut qujavunga. Kisianni tassa soorunami pissutsit taamaattut isumaqarpunga akuersaaginnarneqarsinnaanngitsut. Taamaattumillu ilimasaarutigissavara ukiamut ataatsimiinnissamut tassunga tunngasumik aaqqiissutaasinnaasumik ujartuillunga siunnersuuteqarumaarama.
Oqaluuserisaq naammassivoq.