Oqaluuserisassani immikkoortoq 54 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 19.maj 1998 nal.
18.52
Oqaluuserisassani immikkortoq 54.
Inatsisartut Takornariaqarnermut
Ataatsimiititaliaata isumaliutissiissutaa:
(Ataatsimiititaliap siulittaasua)
Ataatsimiinnermik aqutsisoq: Hans Enoksen, Siulittaasoqarfimmi
ilaasortaq, Siumut.
Ruth Heilmann, Ataatsimiititaliap siulittaasua,
Siumut:
Qujanaq.
Naalisarniakujukkaluarakku kisianni imminut ataqatigiissaarnermik
naalisaruminaatsikkakku tamaat atuaannassavara.
Inatsisartut Takornariaqarnermut
Ataatsimiititaliaata oqallisiginninnermini inuttarai: Inatsisartunut
ilaasortaq Ruth Heilmann, siulittaasoq, Siumut, Inatsisartunut ilaasortaq
Anders Andreassen, Siumut, Inatsisartunut ilaasortaq Finn Karlsen, Atassut
aamma Inatsisartunut ilaasortaq Jakob Sivertsen, Atassut, Inatsisartunut
ilaasortaq Maliinannguaq Markussen Mĝlgaard, Inuit Ataqatigiit.
Inatsisartut Takornariaqarnermut
Ataatsimiititaliaat kingullermik isumaliutissiissuteqareernermi kingorna
l997-imi decemberimi Takornariaqarnermut, Angallannermut, Niuernermut Attaveqaatinullu
Naalakkersuisumik ataatsimeeqateqarpoq ilisimatitsiffiusumik;
ataatsimiititaliaq 1998-imi martsimi Danmarkimut Islandimullu paasissarsiorluni
angalavoq; aammalu 1998-imi Inatsisartut Upernaakkut ataatsimiinneranni
ataatsimiititaliaq aprilip 29-iani majillu 12-iani ataatsimiippoq, soorluttaaq
ataatsimiititaliaq Naalakkersuisunut ilaasortamik 5. maj 1998
isumasioqateqartoq. Ilanngullugulu ataatsimiititaliaq Naalakkersuisunut
ilaasortamit takornariaqarnermut tunngasunik assigiinngitsunik allakkatigut
ilisimatinneqarpoq. Tamakkunuunatigullu ataatsimiititaliap paasisai
tunngavigalugit ataatsimiititaliaq Inatsisartunut
isumaliutissiissuteqarusuppoq.
Takornariartitsinermik
suliffeqarfiit sulisoqartarnerat ilinniartitaanernillu atuisarnerat pillugu
nassuiaammut Inatsisartut Ukiuunerani ataatsimiinneranni Naalakkersuisunit
saqqummiunneqartumut ilassutitut ataatsimiititaliap Naalakkersuisunut
ilaasortaq qinnuigaa pikkorissartitsinerit ilinniartitaanerillu assigiinngitsut
takornariaqarnermut tunngasut takornariartitsinermik inuussutissarsiornikkut
suliassaqartitsinermut qanoq sunniuteqartiginerat nassuiaqqullugu. Tamatuma
kingorna ataatsimiititaliaq allaganngorlugu ilisimatinneqarpoq tamanna
ullumikkut erseqqissumik oqaatigineqarsinnaanngitsoq, ataatsimiititaliallu
tamanna tusaatissatut tigugallarpaa; Naalakkersuisulli apeqqummik tamatuminnga
sukumiinerusumik misissueqqullugit kaammattorneqarput. Ataatsimiititaliaq
isumaqarpoq ilinniartitaanermut tunngasut ataatsimut isigalugit
takornariartitsinermik inuussutissarsiuteqarnerup ineriartornissaanut
pingaarutilipilorujussuusut; minnerunngitsumillu takornartat oqaasiinik
piginnaassutsit ineriartortinneqarnissaat takornarianik sullissinermut
pingaaruteqarpoq.
Sanaluttarnermullu
tunngasunik Ataatsimiititaliaq
isumaqarpoq takornarianut tuniniaasalernissaq siunertaralugu sanalukkanik
tunisassiulernissaq periarfissaqarluartoq. Tamatuma ineriartortinneqartariaqarneranik
ataatsimiititaliaq isumaqarmat Naalakkersuisut aperineqarput sanaluttarnermut
tunngasunik siunnersortimik 1998-imut aningaasaliissutit aqqutigalugit
Naalakkersuisut atorfinitsitsinerata kingorna tamatumani pissutsit qanoq
innersut. Ataatsimiititaliaq ilisimatinneqarpoq sulinikkut angusat erseqqissut
suli pigineqanngitsut, tamannali pillugu ukiup ilaani kingusinnerusukkut
Naalakkersuinit ilisimatinneqarnissani ataatsimiititaliap qilanaaraa.
1998-imut Aningaasanut Inatsisip
akuersissutigineqarneratigut aningaasaliissutit Santa Claus of Greenland
Foundationimiit Greenland Tourism A/S-ip susassaqarfianut nuunneqarnerata
kingorna juullip inuanik suliniutip qanoq ingerlanera ataatsimiititaliap aamma
Naalakkersuisumut apeqqutigaa. Suliaq pillugu erseqqinnerusumik
ataatsimiititaliaq Naalakkersuisumit ilisimatinneqarumaarpoq pilersaarutit
aalajangersimasut pigineqarleriarpata, tamannalu qilanaarineqarpoq.
Greenland
Tourismip Danmarkimi allaffia ataatsimiititaliap pulaarpaa. Tassani paasisat
tunngavigalugit ataatsimiititaliaq ataatsimut isigalugu isumaqarpoq nunatta
takornariagassatut nunani allani takoqqusaarutigineqarnerani Greenland Tourism
sulilluarsimasoq. Ataatsimiititalialli maluginiarpaa nunatsinni sumiiffiit
ikittuinnaat takoqqusaarutigineqartut. Ataatsimiititaliap ilisimavaa
suliniarfiit amerlanaarpallaarnissaat mianersuutigisariaqartoq, isumaqarlunili
nunat immikkoortuisa immikkut alutornassusaat maannarnit
takoqqusaarutigineqarnerusariaqartut. Taamalu ataatsimiititaliaq isumaqarpoq
nunatta takornariagassatut takoqqussaarutigineqarnera
nukittorsarneqartariaqartoq. Naalakkersuisut Greenland Tourismimik
suleqateqarnerminni tamakkuninnga eqqumaffiginninnissaannik kaammattorneqarput.
Tassunga
ilanngullugu oqaatigineqassaaq Greenland Tourismip sulinera pingaaruteqarmat
tamaammallu isumaqartoqarluni Inatsisartut tamarmiullutik suliamut tamatumunnga
ilisimasaqarnerulernissaat. Taamaalillunilu Naalakkersuisut
kajumissaarneqarput Greenland Tourismip suliffeqarfittut nunatsinnut tamarmut
takornariaqarneq pillugu pingaarnerusutigut pilersaarusiortutut atorneqarnera
pillugu ulloq manna tikillugu misilitagarineqartut pillugit Inatsisartunut
nassuiaateqaqqullugit.
Tassunga
atatillugu Naalakkersuisut Greenland Tourismillu ataatsimiititaliamut
paasissutissiisarsimanerat ataatsimiititaliap nuannaarutigigamiuk
oqaatigerusuppaa, tamanna soorlu pisimavoq 1997-imi decemberimi Kangerlussuarmi
paasissutissiiffiusumik ataatsimiittoqarnerani. Ataatsimiititaliap
Naalakkersuisut Greenland Tourismilu kaammattorniarpai aamma siunissami takornariaqarnermut
tunngassutilinnik ataatsimiititaliamut paasissutissiisaqqullugit.
Ataatsimiititaliap
nukinnik atuiffiunerusariaqartutut isigisaa tassaavoq ukiuunerani
takornariartitsisarneq. Ataatsimiititaliap Islandimiinnermini Islandimiut
sermertani takornariartitsisarnermik iluatsitsilluarsimanerat paasivaat.
Ataatsimiititaliaq isumaqarpoq sermertani aputeqarluarfiusartunilu
takornariartitsinissamut nunatsinni aamma periarfissaqarluartoq, soorluttaaq
tamanna piffissamik takornariaqarfiusartumik sivitsuissasoq. Ataatsimiititaliap
ilisimavaa tamanna Greenland Tourismip susassaqarfiani
sulissutigineqalereersoq, Naalakkersuisullu kaammattorneqassapput Greenland
Tourismimik suleqateqarnerminni tamatuma ineriartortinneqarnissaa
sulissutigiuaqqullugu. Tassunga atatillugu ataatsimiititaliaq isumaqarpoq
Islandimiut iluaqutissarsiffiusumik suleqatigineqarsinnaasut
ilinniarfigineqarsinnaasullu. Ataatsimiititaliap ilisimavaa takornariaqarnikkut
Island suleqatigineqalereersoq Naalakkersuisullu kaammattuinnarsinnaallugit
Island takornariaqarnikkut allatigullu takornariartitsinermut
tunngassuteqartutigut, soorlu angallannikkut, suleqatigeqqullugu.
Qulaani
taaneqareersutut ilanngullugu ataatsimiititaliaq aamma isumaqarpoq piffissap
takornariaqarfiusartup sivitsorneqarnissaa ataatsimut isigalugu
sulissutigineqarnissaa pingaaruteqartoq. Tassalu taamaalilluni
ataatsimiititaliap angalanermini paasivaa timmisartuussinermi akunnittarfeqarnermilu
ullumikkut pisinnaasatigut aasaanerani takornariaqaruttulernerani takornarianik
amerlanerusunik sumiiffiit ilaanni tigusisoqarsinnaanaviarunanngitsoq.
Tamakkununnga
ilanngullugit ataatsimiititaliap malugeqqussavai takornariartitsinerit
piffissamik takornariaqarfiusartumik sivitsuisinnaasut Greenland Tourism
A/S-illu maanna nunatta takoqqusaarutiginerani sulissutigisai. Tassaapput
suliaminnut atatillugu takornariartartut, taakkununngalu nunarput ataatsimeersuariarfissatut
takoqqusaarutigineqarpoq. Taama takornariartarneq nunani tamalaani
annertusiartuinnarpoq, taama takornariarnermi ataatsimeersuarnerit
sunngiffimmilu sammisassaqartitsinerit kattunneqartarput. Taamaattunik
takornariartitsineq iluanaarfiusinnaalluarpoq takornariammi tamakku
sivikitsuinnarmik angalasarmata aningaasarpassuarnilli atuisarlutik.
Ataatsimiititaliarlu isumaqarpoq takorannersunik takornariagassaqarnini
pissutigalugu nunarput tamatumuunakkut periarfissarissaartoq. Suliaminnut
atatillugu takornariartoqartalissappat akunnittarfiit ataatsimeersuarnissamut
pitsaasunik atortorissaarutillit pisariaqartinneqarput. Akunnittarfiit
taamaattut nunatsinni suli amerlanngillat, taamalu ataatsimiititaliap
neriuutigaa akunnittarfeqarnermut aningaasalersuinikkut tapersiisarneq
aqqutigalugu akunnittarfiit amerlineqarnissaannik
pitsanngorsarneqarnissaannillu sulinermi naalakkersuisut tamanna eqqumaffigilluarumaaraat.
Naggasiullugu
ataatsimiititaliap malugeqqussavaa takornariaqarnerup ineriartortinneqarnerani
angallanneq qanoq pingaaruteqartigisoq. Ataatsimiititaliap angalanermini
paasivaa nunatta iluani timmisartuussinissamik pilersaarutit kingusissumik
suliarineqartarnerat allanngortiterneqartuartarnerallu ajornartorsiutaasoq
taamalu nunat allamiut angalanernik aaqqissuussisartut nunatsinnut angalanernik
saqqummiuteriikkaminnik suliaqarnerminni angalanermik pilersaarutit ilanngullugit
eqqarsaatigisinnaasanngimmatigit. Nunat
allamiut aaqqissuisartut pilersaarusiornerminni assersuutigalugu illoqarfimmut
aalajangersimasumut angalanissamik tuniniaarusukkunik ilisimaneq ajorpaat
illoqarfimmut tassunga qaqugukkut timmisartuussisoqarumaarnersoq.
Taamaalillutillu tassa angalanissamik aaqqissuusisartut nunatsinnut
angalanissanik neqerooruteqarnerminni pisussanut piareersimasariaqartarput,
ataatsimiititaliallu isumaa malillugu tamanna takornariaqarnerup
ineriartornissaanut aporfeqartitsisarpoq nunammi allamiut angalanissanik
aaqqissuisartut nunatsinnut angalanissanik neqerooruteqarnissaannik nangaatitsilersinnaammat.
Takornariaqarnerup
nunatsinni inuussutissarsiutit pingaarnerit pingasuusut ilagilersinniarneqarnerannit
isigalugu ataatsimiititaliaq isumaqarpoq ajornartorsiut tamanna
iluarsineqartariaqartoq. Ilisimaneqartutut takornariaqarneq pilersuinikkut
attaveqaatitigullu atortunik annertusaaqataasinnaavoq, soorluttaaq
pilersuinikkut attaveqaatitigullu atortut takornariaqarnermik inuussutissarsiuteqarnerup
ineriartornissaanut tunngavisseeqataasartut. Taamaammat ataatsimiititaliap
pingaartippaa taakku marluk imminnut killilersussanngitsut, imminnulli
ineriartorteqatigiittariaqartut. Ataatsimiititaliap ilisimavaa
timmisartuussinissanik pilersaarusiornermi Aningaasanut Inatsisikkut
aningaasaliissutaasartut apeqqutaasinnaasartut, tamannalu timmisartortitseqatigiiffiit
angalanissamik siusinnaarlutik pilersaarusiornissaannut
ajornartorsiortitsisinnaasartoq, ataatsimiititaliarli isumaqarpoq apeqqut
tamanna takornariaqarnerup ineriartortittuarneqarnissaanut
pingaaruteqarluinnartoq. Ataatsimiititaliaq Angallannermut Ataatsimiititaliaq
peqatigalugu Naalakkersuisumik isumasioqateqarpoq ilaatigut ajornartorsiutit
taaneqareersut oqallisigalugit, tamatumalu saniatigut ataatsimiititaliap
Naalakkersuisut kaammattorniarpai ajornartorsiutit oqaatigineqareersut eqqumaffigilluaqqullugit
Naalakkersuisummi kaammattorneqarmata angallannikkut takornariaqarnikkullu
sinniisuutitaqarfigisamikkut sunniuteqarniaqqullugit.
Taama
oqaasertaqartillugu Takornariaqarnermut Ataatsimiititaliap isumaliutissiissutaa
Inatsisartunut isumaqatigiinniutigisassanngortinneqarpoq.
Peter
Grĝnvold Samuelsen, Takornariaqarnermut, Angallannermut,
Niuernermut Attaveqaatinullu Naalakkersuisoq:
Takornariaqarnermut
Ataatsimiititaliap ilaatigut kingullermik isumaliutissiissuteqarnermi kingorna
suliaminik ilisimatitsissuteqarluni, isumaliutissiissutaanut naalakkersuisut
qujavugut. Tamakkua saniatigut Takornariaqarnermut Ataatsimiititaliaq
Naalakkersuisunut arlalinnik kaammattuuteqarpoq, Naalakkersuisut matumuuna
oqaaseqarfigisassatsinnik.
Takornariaqarnermut
Ataatsimiititaliap takornariartitsinermik suliffeqarfiit sulisoqartarnerat
aammalu ilinniartitaanermik atuisarnerat pillugu killiffimmik nassuiaammut,
Naalakkersuisut Inatsisartut 1998-imi ukiuunerani katersuunneranni saqqummiussaannut,
uiggiullugu tikkuarpaa, ataatsimiititaliap Takornariaqarnermut,
Angallannermut, Niuernermut Attaveqaatinullu Naalakkersuisoqarfik
apeqquteqarfigisimagaa, pikkorissarnerit takornariartitsinermut attuumassuteqartut
takornariartitsinerup iluani suliassaqartitsinermut qanoq annertutigisumik
iluaqutaasimanersut. Naalakkersuisut allakkatigut ataatsimiititaliamut
ilisimatitsissutigaat ATakornariartitsinermik suliffeqarfiit
sulisoqartarnerat aammalu ilinniartitaanermik atuisarnerat pillugu nassuiaat@,
saqqummiussinermi paasissutissiissutigineqartutut, tassaasoq suliffeqarfiit
attuumassuteqartut suliamut tunngatillugu suliaqarfimmi isumaannik
misilittagaannillu killiffimmik nassuiaat. Taamaattumik misissuineq
paasissutissiivoq sulianut ilinniakkanut tunngatillugu sorliit ullumikkut
sulisussanik avataaneersunik immikkut sulisussarsiorfiusarnerannik. Kiisalu
killiffimmik nassuiaat tikkuussivoq suliassaqarfinni suni siunissami
atorfininnissamut periarfissaginnerunersoq.
Illuatungaatigut
nassuiaat inuusuttut qanoq amerlatigisut ullumikkut takornariartitsinermut
attuumassutilinnik ilinniartarnerannik, kingornatigullu takornariartitsinermi
suliffissarsisarnerannik misissuisoqarsimaneranik imaqanngilaq. Killiffimmik
nassuiaat taaneqartoq piffissami 1993-imiit 1997-imut pikkorissartut
amerlassusiinik naatsorsukkanik imaqarpoq, taakkulu katillugit 836-iusimapput.
Aammattaaq killiffimmik nassuiaammi takuneqarsinnaavoq, assersuutigalugu 88-it
aallarnisaanermut pikkorissarneq ingerlassimagaat, taakkualu ilaat 26-it
outfitteritut allagartartaarsimasut. Kiisalu killiffimmik nassuiaammi
takuneqarsinnaavoq aqqaneq marluk EVU-mi takornariartitsinermik ilinniarnermik
naammassinnissimasut, aammalu taakkua ilaat marluk Danmarkimi Turistakademimi
ilinniarnerminnik nangitsisimasut. Kiisalu Qaqortumi Niuernermik Ilinniarfik
nalunaarpoq, taakkua aqqaneq marluk, EVU-mi takornariartitsinermik
ilinniarnerminnik naammassinnissimasut ilaat tallimat, takornariartitsinermi
suliffeqartut, sinnerilu tallimat sumik peqquteqarnersumik
takornariartitsinermut attuumassutilimmik suliffeqanngitsut. Immikkoortumut
tassunga naggataarutigalugu oqaaseqaatitut tikkuarneqarsinnaavoq, inuit
assersuutigalugu EVU-mi takornariartitsinermik ilinniarnermik naammassinnissimasut
taama amerlanngitsigitillugit, ataasiakkaat inuussutissarsiornikkut
ingerlaqqinnerat ajornanngitsumik malinnaavigineqarsinnaammat .
Illuatungaatigut aqutsinikkut sulisussatigullu annertuumik piumasaqarfiusumik
piareersimatitaqarnissaq aallartisarneqartariaqarpoq, takornariartitsinermi
ilinniarnermik naammassinnissimasut inuussutissarsiornikkut ingerlariaqqinnerat
aaqqissuussaasumik malitseqartinneqartassappat. Siusinnerusukkut
Takornariaqarnermut Ataatsimiititaliamut allakkatigut oqaatigineqartutut
taamatut malitseqartitsineq ullumikkut takornariaqarnerup iluani
ilinniartitsinerni ingerlanneqanngilaq.
Takornariaqarnermut
Ataatsimiititaliaq aammattaaq sanalunnermut atasumik angusarineqarsimasunik
erseqqissunik apeqquteqaateqarpoq. Naalakkersuisoqarfiup
ilisimatitsissutigisimavaa, Takornariaqarnermut, Angallannermut, Niuernermut
Attaveqaatinullu Naalakkersuisoqarfik ukiumut aningaasaliiffiusumut 1998-imut
kusanartuliorluni sanaluttarnerup iluani ineriartortitsinermut siunnersortimik
atorfinitsitsisoq. Tassunga atatillugu nunatsinni kommunit tamarmik
attavigineqarsimapput, kusanartuliorluni sanaluttarnermi siunnersortimik qanoq
atorfissaqartitsisoqartiginera paasiniarlugu, soorlumi aamma piffissami
matumani pikkorissarnerit arlallit ingerlanneqareersimasut. Suliassaq taanna
suli naammassinngimmat Naalakkersuisut ilimagaat ukioq manna kingusinnerusukkut
Takornariaqarnermut Ataatsimiititaliamut erseqqinnerusumik
paasissutissiiumaarlutik, tamatumani naammassisat erseqqinnerusut
pigineqaleriarpata.
Takornariaqarnermut
Ataatsimiititaliaq Santa Claus of Greenland Foundation pillugu killiffimmik
apeqquteqaateqarsimavoq. Tassunga atatillugu Naalakkersuisoqarfiup
ataatsimiititaliaq ilisimatippaa, inatsisartut 1998-imut Aningaasanut inatsisip
akuersissutigineranut atatillugu akuersaarmassuk Santa Claus of Greenland
Foundationip atorunnaarsinneqarnissaa, aningaasaliissutillu Greenland Tourism
A/S-imut nuunneqassasut.
Peqqutit
assigiinngitsut peqqutaallutik Santa Claus of Greenland Foundationip
atorunnaarsinniarnera sivitsorussimavoq, taamaattumillu maannakkut,
suliariniakkap qanoq iliorluni ingerlateqqinneqarsinnaaneranik imaluunniit
atorunnaarsinnissaanik misissueqqissaarnerit arlallit suliarinissaannut
suliniartoqalerluni. Naliliinerit taakku siunissami qaninnerpaami
Naalakkersuisunut saqqummiunneqassapput, kingornatigullu Naalakkersuisut
qularnaarniarpaat Ataatsimiititaliap ineriartortitsinissamik pilersaarutit
erseqqissut pillugit ilisimatinneqarnissaa.
Takornariaqarnermut
Ataatsimiititaliap taamatuttaaq ilisimatitsissutigaa Ataatsimiititaliap
Greenland Tourism A/S-ip Kĝbenhavnimi allaffia pulaarsimagaa. Allaffiup
pingaartumik takoqqusaarinerit tamakkuninngalu suliaqartartunik attaviginninneq
suliarisarpai. Takornariaqarnermut Ataatsimiititaliap isumaliutissiissummini
oqaatigaa nunatsinnik takornariarfissatut pilerisaarineq nunatsinni
sumiiffinnut ikittuinnarnut sammitinneqartoq, aammalu Naalakkersuisut
kajumissaarlugit maluginiaqqullugu nunatsinnik takoriarfissatut pilerisaarineq
nukittorsarneqartariaqarmat. Peqatigisaanik Takornariaqarnermut
Ataatsimiititaliap Naalakkersuisut kajumissaarpai Greenland Tourism A/S-ip
suliffeqarfittut nunatsinnut tamarmut takornariaqarneq pillugu
pingaarnerusutigut pilersaarusiortutut atorneqarnera pillugu ulloq manna
tikillugu misilittagarineqartut pillugit Inatsisartunut nassuiaateqaqqullugit.
Piffissaq
manna iluatsillugu Naalakkersuisut ilisimatitsissutigissavaat
Takornariaqarnermut, Angallannermut, Niuernermut Attaveqaatinullu Naalakkersuisoqarfik
takornariaqarnermut atasumik aningaasarsiornikkut misissueqqissaarnermik
aallartitsereermat, tassunga Greenland Tourism A/S-ip takornariartitsinikkut
ineriartortitsinermi maannakkut aallartinneqarsimasumi pingaaruteqarnera
ilanngullugu. Taamatuttaaq Naalakkersuisut Greenland Tourism A/S-ip
nunatsinnilu tamarmi kommunit akornanni suleqatigiinnerup
pitsanngorsarneqarnissaa sulissutigaat, taamaalilluni nunatsinnik
takornariarfissatut pilerisaarineq nukittorsarumallugu. Naalakkersuisut
nassuiaatip eqqartorneqartup taassuma 1998-imi ukiakkut katersuunnermi
Inatsisartunut saqqummiunnissaa pilersaarutigaat.
Takornariaqarnermut
Ataatsimiititaliap Naalakkersuisut kajumissaarpai Islandimik suleqateqarneq
nukittorsaqqullugu ukiuunerani takornariartitsisarnerup
ineriartorteqqinneqarnissaa piffissallu nalinginnaasumik
takornariartitsiffiusartup sivitsorneqarnissaa eqqarsaatigalugu. Naalakkersuisut
tassunga uiggiullugu erseqqissassavaat, nunatta Islandillu akornanni
takornariartitsinikkut suleqatigiinnissaq pillugu isumaqatigiissuteqarmat -
SAMIK-imik taaneqartoq - tassani nunat tamarmik isumaqatigiissutip imarisaasa
piviusunngortinneqarnissaannut 500.000 kr.-inik atugassiisarlutik. Kiisalu
Naalakkersuisut ilisimatitsissutigisinnaavaat, Greenland Tourism A/S-imi
aammalumi nunatsinni suliaqareersut akornanni takornarianut neqeroorutinik,
ukiuunerani takornariartitsinermut aammalumi piffissap nalinginnaasumik
takornariartitsiffiusartup sivitsornissaanut iluaqutaasinnaasunik
ineriartortitsineq siunertaralugu suliniartoqalereermat.
Takornariaqarnermut
Ataatsimiititaliap pingaartutut tikkuarpaa unnuiffiusartut amerlisarlugillu
ineriartorteqqinneqarnissaata, minnerunngitsumik ataatsimeersuartitsisarnerit
eqqarsaatigalugit, pingaaruteqassuia. Naalakkersuisut maluginiaqqussavaat ATakornariartitsinermik
inuussutissarsiuteqarnermut aningaasalersunikkut tapersiisarneq pillugu
inatsisip@ ilaa, hotelinik aningaasalersuinermut tunngasup
siunertarerpiarmagu unnuisarfinnut tunngatillugu unnuiffiusinnaasunik
amerlisaanissaq, taamaattumillu tamanna eqqarsaatigineqareerluni.
Takornariaqarnermut
Ataatsimiititaliap angalanissanut pilersaarutit ukiup ilaatigut taama kingusitsigisukkut
saqqummertarneratigut takornariartitsinermik suliaqartut nunatta ornigassatut
pilerisaaruteqartarnerannut killiliisarnerat ajornartorsiutaanerat
naggataatigut tikkuarpaa.
Naalakkersuisut
angalanissanut pilersaarutit ukiup ilaatigut taama kingusitsigisukkut saqqummertarnerata
takornariartitsinermik sulinermut naleqquttuunnginnera arajutsisimanngilaat.
Taamaattumik ajornartorsiut qaangerniarlugu assigiinngitsunik
suliniuteqartoqalerpoq. Assersuutitut taaneqarsinnaavoq Grĝnlandsfly A/S-ip
angallannermut pilersaarusiortarnermik ingerlatsinerminik nukittorsaanissani
iliuuseqarfigilereersimavaa, aallaqqaatigalugu suliamik taassuminngarpiaq
suliaqartussamik atorfinitsitsinikkut.
Taamaattorli
pissutsinik allanik, Grĝnlandsfly A/S-ip kissaatigineqartutut piffissaq
eqqarsaatigalugu taama ungasitsigisumut isigisumik pilersaarusiorsinnaasimannginneranut
sunniuteqartunik peqarpoq.
Assersuutigalugu
Grĝnlandsfly A/S 1998-imi januarip qiteqqunnerani nunatta Danmarkillu akornanni
timmisartuussisarnissamut akuersissummik tunineqarpoq, taamaattumillu aatsaat
tamatuma kingorna ingerlatseqatigiiffiup timmisartuussisarnerani
inniminniisinnaanermik aaqqissuussinissamut periarfissaqalerluni. Tamanna
takornariartitsinermik suliallit suliaminnik annerpaamik
pilersaarusiorsinnaanerannut ajoraluartumik kingusippallaaqaaq. Maanna Grĝnlandsfly
A/S 31. marts 2003 tikillugu nunatta Danmarkillu akornanni
timmisartuussisarnissamut akuerineqarsimavoq, taannalu Grĝnlandsfly A/S-ip
eqqissilluni siunissaq ungasinnerusoq isigalugu angallassisarnissaminut
pilersaarutiminik piareersaasinnaaneranut periarfissiivoq.
Tamakkua
saniatigut Grĝnlandsfly A/S nunatta iluani amigartooruteqarfiulluni
timmisartuussisarnermik ingerlataqartarpoq, Namminersornerullutik Oqartussat
Aningaasanut inatsit aqqutigalugu ilaatigut akilertagaannik. Ukiumut ataatsimut
Aningaasanut inatsit naluneqanngitsutut ukiumi siuliani Inatsisartut ukiakkut
katersuunneranni akuersissutigineqartarpoq. Grĝnlandsfly A/S-ip Namminersornerullutillu Oqartussat
isumaqatigiissutaat maannakkut atuuttoq tunngaveqarpoq, Grĝnlandsfly A/S-ip
Dash-7-it atorlugit timmisartuussinerini sinneqartoorutit ilaat helikopterit
atorlugit timmisartuussinermi amigartoorutit akilerneqartarnerannut
atorneqartassasut. Ingerlatat assigiinngitsut imminnut kaputartuuttumik
tapiiffigeqatigiittarnernerat taamaattoq atuutsillugu Grĝnlandsfly A/S
Aningaasanut inatsisip akuersissutigineqarnerata kingorna aatsaat
qularnaatsumik timmisartuussisarnissat pillugit pilersaarusiorsinnaavoq,
pilersaarutigineqartutut timmisartuussisinnaajumalluni.
Taamaakkaluartoq
Naalakkersuisoqarfiup paasisimavaa, Grĝnlandsfly A/S julip qaammataata
aallartinnerani 1999-ip aasaanerani timmisartuussinissaminut pilersaarut
qularnaapajaariigaq saqqummiussinnaagaa, taamaalilluni soqutiginnissinnaasut
tamarmik - tassunga takornariartitsinermik suliallit ilanngullugit -
suliariniakkaminnik piffissaalluarallartillugu pilersaarusiornissamut
periarfissaqalerlutik.
Anguniakkat
tamakku angujumallugit Naalakkersuisoqarfik Grĝnlandsfly A/S suleqatigalugu
siunissami angalanissanut pilersaarutit pillugit missingersuusianik nunatsinni
kommuninut saqqummiussillunilu tusarniaanermik aaqqissuussisimavoq
Taamatut
oqaaseqarluta Naalakkersuisut matumuuna Takornariaqarnermut Ataatsimiititaliap
isumaliutissiissutaanut qujavugut.
Anders
Andreassen, Siumup oqaaseqartua:
Siumumiit
Takornariaqarnermut Ataatsimiititaliap isumaliutissiissutaa tunngaviusumik
tamaat isumaqatigaarput.
Taamaakkaluartoq
Siumumiit ersarissumik makku Naalakkersuisunut kajumissaarutigissavagut, naak
akissuteqaammi ersereeraluartoq kammattuutiginiakkatta amerlanersai suliatut
aallar-tereersimagaluartut.
Siullermik:
Takornariartitsinermik
inuutissarsiuuteqarnerup ineriartortitaanerani sulisunik ataavartumik
pikkorissartitsisarnerit minnerunngitsumillu oqaatsisigut ineriartortitsinerit
alaatsinaalluaqqullugit.
Aappassaanik:
Nunatta
takornariagassatut nunani allani takoqqusaarutigineqarnerata suli
siammasinnerulersinneqarnissaa matumani Greenland Tourismi suleqatigalugu
minnerunngitsumillu piffinni tamaniinnuttaasut suleqatigalugit, taammaalilluni
nunatsinni piffiit ataasiakkaat kisiisa pinnagit nunarpulli tamaat
assigiiaarnerusumik takoqqusaarutigineqarsinaammat.
Pingajussaannik:
Nunanik
allanik takornariaqarnermik annertuumik suliaqartunik soorlu Islandimiunik
suleqateqarnerup annertusarneqarnissaanik minnerunngitsumillu ukiuunerani
takornariaqartitsisarneq eqqarsaatigalugu.
Sisamassaanik:
Nunatta
akunnittarfitsigut piorsaaffigineqarnerata annertusarneqarnissaa
pingaaruteqarluinnartoq sorluttaaq Ataatsimiititaliap angalanermini paasisami
ilaattut eqqaagaa, tassa nunani allani ataatsimeersuartitsisarnerit
takornaqariaqarnerup iluani annertoorujussuarmik sunniuteqalersimanerat
iluatinnarluinnartutut aamma siunissami nunatsinni tamatuma
ineriartortittuarnissaa pisariaqarluinnartoq.
Siumumiit
Naalakkersuisut aamma kajumissaassavagut takornariaqarnerup ineriartortinneqarnerani
Nunatsinni timmisartortitseqatigiit suleqatigalugit takornarissanik
sullissinerup pit-saanerusumik iluarsartuunneqarnissaa sulissutigeqqullugu.
Ullumikkummi Nunatsinnut takornariartartorpassuugaluit Nunatta iluani
angallannermut nalinginnaasumik
akulerunneqarnermikkut takornariatut angalanertik ilaatigut
naatsorsuutiginngilluinnakkamik sivisunerutittarmassuk nunatta iluani
angallannerit ullormiit ullormut allanngoriasaartarneri pissutigalugit taamalu
takornarissat piffissanik eqquisoqanngikkaangat takornariaqqinnissamut
piumassuseeruttarmata.
Siumuumiit
misissoqqussavarput nunatsinni timmisartortitseqatigit aammalu Greenland
Tourismi suleqatigalugit immikkut timmisartunik attartornikkut
takornariaqartarneq aaqqiivigi-neqarsinnaannginnersoq aammataaq nunatta iluani.
Siumuumiit
taamatut oqaaseqarluta takornariaqarnermut ataatsimiititaliap
isumaliutissiissutaa akueraarput ukiamullu Naalakkersuisut angallannermut
takornariaqarnermullu tamakkiinerusu-mik nalunaaruteqarnissaat qilanaaralugu
suleqataaffigiumaarlugu.
Jakob
Sivertsen, Atassutip oqaaseqartua:
Inatsisartut
Takornariaqarnermut Ataatsimiititaliaata isumaliutissiissutaanut Atassummiit
imaattumik oqaaseqassaagut:
Ukiuni
makkunani takornariaqarnerup nuatsinnut qanoq pingaaruteqartiginera tamatta
arajutsisimanngilarput, oqaatigisarlugulumi nunatsinni
inuutissarsiutitta pingaarnerpaat pingajuattut inissisimalersimammat.
Taamaattumik pingaarutilerujussuuvoq naalakkersuinikkut annertuumik
tapersersussallugu, tamatumunngalu tunngatillugu
aningaasaliissutigisartakkatsinnut ullumikkumut angusarianeqartartut naleqquttuunersut
paasissalugu Atassummiit soqutiginartipparput.
Ataatsimiititaliap
isumaliutissiissumini taakkartugai assigiinngitsut tamaasa tikinngikkaluarlugit
ilai oqaasiqarfigilaassavagut.
Soorlu
takornarissanut sulisussanik ilinniartitsinerit ataatsimiititaliamit
pingaartinneqarmata isumaqatigaarput, takornarissammi sullinneqarneranni nunat
allamiut oqaasiinik piginnaaneqarnissaq pingaartorujussuummat. Naalakkersuisup
akissuteqaammini oqaatigaa EVU-mi atuartut 12-it ilinniarnerminnik naammassinnissimasut,
taakkunannga marluk Qallunaat Nunaanni turistakadimimi ilinniarnerminnik
nangitsisimasut tallimallu takornariartitsinermi suliffeqalersimasut, kisianni
sinneri tallimat sumi atorfeqarnersut ilisimaneqanngitsoq oqaatigineqarluni.
Tamanna ajuusaarnartutut oqaatigisariaqarpoq, ilinniarsimasunimmi
sulisoqarnissatsinnik pingaartitilluta ilinniartsigaangatta ilinniarlutik
naammasisut atorluartariaqarpavut. Ajoraluartumik ilnniartitagut
ilinniarsimanngisaminnut suliffissarsiortut suli nunatsinni amerlavallaarput.
Takornariaqarnermut
Ataatsimiititaliap angalaarnermi ilaatigut paasisimavaa nunatsinni sumiiffiit
ikittuinnaat takoqqusaarutigineqartut. Atassummiit siusinnerusukkulli
oqaatigeersimavarput nunarput takornariaqarnikkut tamakkiinerusumik sullinneqartariaqartoq.
Inassutigeqqissavarput nunarput tamaat assigiinnerusumik takornariaqarnikkut
qullersaqarfimmiit sullissunneqaqqullugu.
Isumaliutissiissummi
eqqaaneqarpoq angallannikkut pissutsit assut ajornartorsiutaasut kingusippallaamik
pilersaarusiortarnerat allanngortitserneqartarnerallu eqqarsaatigalugit.
Ataatsimiititaliamit uparuaaneq Atassummiit paasilluarparput, kisiannili
naalakkersuisup akissuteqaammini pissutsit erseqqissumik
nassuiaateqarfigimmagit ajornartorsiutaasunut peqqutaasut paasilluarlugit
akissuteqaat naammagisimaarparput.
Aammattaaq
Takornariaqarnermut Ataatsimiititaliap inassutigaa Island annerusumik
takornariaqarnikkut suleqatigineqaqqullugu, tamanna Atassummiit
pingaarluinnartutut isigaarput, Islandimiummi takornariartitsinikkut
siuarsimasorujusuupput aammalu Island nunatsinnut qanittuunera ullumikkornit
iluaqutiginiarnerusariaqarparput. Tassunga tunngatillugu naalakkaersuisup
akissuteqaataa suliniarneq aallartereersimasoq oqaatigimmagu iluarisimaarparput.
Takornarissat
amerlanerujartortillugit unnuiffiusinnaasut amigaataalersinnaanerat
aarlerinartutut oqaatigisariaqarpoq, taamaattumik unnuisarfiliornernut
aningaasaliissutaasartut atorluarnissaat kajummissaatigeqqunaqaaq,
pisariaqarpallu amerlisinneqarnissaat aammma Atassummiit
suleqaattaaffigiumavarput.
Naggataatigut
oqaatigissavarput Grĝnlandsfly ukioq manna januarimiit imarpik qulaallugu
timmisartuussisinnaanissaminik akuersissummik tunineqarnera assut Atassummiit
tulluusimaarutitigatsigu. Tamatuma kingunerisaanik Grĝnlandsfly imarpik
qulaallugu timmisartuussisaalernissaminut atugassaminik timmisartorsuarmik
nammineq pigisassaminik pissarsiismavoq, taamaasilluni ullumikkornit
pitsaanerusumik angallannikkut pilersaarusiornissaminut periarfissarissaarnerulerluni.
Taamatut
oqaaseqarluta ukiamut tamakkiinerusumik saqqummiisoqarnissaa Atassummiit
qilanaaralugu utaqqissavarput.
Maliinannguaq
Markussen Mĝlgċrd, Inuit Ataqatigiit oqaaseqartuat:
Qujanaq.
Takornariaqarnermut Ataatsimiititap angalanermini isumaliutissiissutaa Inuit
Ataqatigiinni taperserlugu ataasiakkaanik imatut oqaasissaqarpugut:
Nunat
ukiorpassuanngortuni takornariaqarnermik ingerlatsisimasut, tassalu Qallunaat
Nunaat, Islandilu ukiuni makkuna suliniutaat Islandillu ulluni makkunani
suliniutaat malunnaqisumik tupinnanngitsumillu nunatsinnit siuarsimaneroqaat.
Nunarput
ataatsimut isigalugu takornariaqarup oqaluttuarisaanerani aatsaat
aallarnisalernera malunnarpoq,
siunissamilu annertusarneqassappat suliniutissat mianersuutassallu amerlaqaat.
Ineriartortitsineq
nunatsinnut naleqqussagaq ingerlanneqartariaqarpoq, imaanngitsoq takornariaqarpassuit
tikisinniarnissaat pimoorunneqassasoq, aammalu minnerunngitsumik pingaaruteqarluinnarpoq
nunat illoqarfiillu takornarianik ingerlatsisisussat inuiisa qanimut
suleqataanissaat, ineriartortitsinermilu peqataatinneqarnissaat.
Malunnarluartummi
ilagaat, aamma soorlu Takornariaqarnermut Ataatsimiititap oqaatigigaa
ilinniartitsinerup pingaaruteqarluinnarnera. Takornariaqarnermut
ingerlatserusuttut aningaasarsiornikkut, oqaatsitigut, nunap sumiiffiup
oqaluttuarisaaneratigut periarfissaasinnaasunillu eqqaatsumik
suleriarsinnaanikkut pikkorissarneqartuarnissaat pinngitsoorneqarsinnaanngilaq.
Ullutsinni
naammakkunnaarsimavoq takornariat tikisiinnarnissaat aammali pisariaqarpoq
inussiarnisaarfiginissaat, tikilluaqqusaassutullu misigisimatinnissaat. Aamma
naammanngilaq umiarsuit tikittartut amerliartorneri, illua tungaannimi
annertunerusumik aningaasanik isaatitsissutaannissaat
ujartuiffiginerusariaqarpoq, imaattariaqanngilarmi nunamut ikaarunik
assiliigunik - tassa.
Tikittut
sapinngisamik nunaqaravissunik oqaluttuunneqartariaqarput sumut tikinnersut,
kulturikkut ilisarnaatit oqaluttuarineqartariaqarput, takutitassallu
illoqarfiup nunaqarfiulluunniit tikisap immikkut ilisarnaatai
nittarsaanneqartariaqarlutik. Sumiiffiit ilaanni immaqa taamaattoqaraluarpoq,
imaqalu aamma tamakkulererusuttunik piareersimasoqaraluarluni qanorli aallarteriarnissamik
ilisimanninneq annikippallaartarpoq.
Taamaattumik
siunissami nunap immikkoortuini tamani ukiut tamaasa pikkorissaasarnerit
ingerlanneqartarnissaat anguniartariaqarpoq. Takornariaqarnermut pikkorissaaneq sumiiffinni
takornarianik sullissinissamik soqutiginnittunik, soorlu ingerlatsisunik
kultur-imik tunngassuteqartunik peqatigiiffinnut inunnullu
soqutiginnissinnaasunut.
Taakku saniatigut
ingerlaqqerusuttunut ataavarnerusumik ilinniarnertalimmik. Tamatumani IA-niik
isumaqarpugut takorloorneqarsinnaasoq STI takornariaqarnermi ingerlatsinermik
immikkoortortaqalersinnaanissaa. Ullumikkummi EVU aqqutigalugu
takornariaqarnermut tunngasumik ilinniarsinnaaneq ajunngikkaluartoq, taanna
annermik amerlasuut inorsillugit ilinniarfiusinnaavoq. Taamaattumik
takornariaqarnermut ilinniarnerup ilinniartitsisarnerullu nalilersoqqinnissaa
pingaaruteqarpoq, soorlu aamma tamatumap ukioq eqqartornerani IA-niik
oqaatigisimagipput.
Sanaluttartut assassortartullu
aaqqissuussaanerusumik nunarput tamakkerlugu pimoorussamik
ingerlanneqalernissaa IA-niik siunnersuutigisimasarput aamma
siunnersortilerlugu ingerlanneqarmat isumalluarfigaarput, pissangagaarpullu
tamatumap kinguneqarumaarnissaa. pikkorissaanerillu suli
angusaqarfiulluarnissaa anguniarlugu nukiit suulluunniit atorluarnissaat
kaammattuutigaarput.
Siunnersuuteqarnitsinnilu
Inatsisartut tapersersugaannik aaqqissuussaanerusumik ingerlalernissamut
aqqutissiuussinissat suli nukiit annerusut atorlugit ingerlasariaqartut IA-niik
isumaqarpugut.
Nunatta nunarsuup Juullip inuata
najugaqarfittut isigineqarnerata allatut aaqqissuullugu ukiuunerani
takornarianut atorluarneqarnerusinnaanissaa periarfissiuunneqartariaqarpoq.
Juullip inuatami illoqarfissuarmi inissinneqarsimanera tulluanngilaq, tamatumalumi
ingerlalluarsimannginnerata takutippaa. Nunarsuarmiut takorloortagaat
piviusunngortissagutsigu Juullip inua sermersuarmiippoq, tamannalumi aamma
eqqarsaatersuutigineqartariaqarpoq. Illoqarfinni nunaqarfinniluunniimmi
takornariaqarnermi ingerlatsiffiusuni assigiinngitsuni nissiaqqat pilersitsiortoqarsinnaagaluarpoq.
Uummannamilu najugaqaraluarluni aasaanerani soorlu qimusserfiusinnaasumi
sermersuarmi aamma illuliortoqarsinnaalluni. IA-niik isumaqarpugut periarfissanik
ulikkaartoq, nutaamilli eqqarsarnermi nunaqavissut pissutinillu ilisimannittut
isumassarsiullaqqittaqimmata atorluarneqarnissaat pisariaqavissorpoq. Tassami
misilittakkavut malillugit allamiut immikkut ilisimasallit
siunnersutigigaluaraangatsigit aningaasarpassuit atulussinnaannartarpagut.
Akissaqanngilagummi asuli maangaannaq aningaasalersuiuassalluta.
Greenland Tourism A/S qallunaat
nunaanni immikkoortortanut pulaarnermi ajoraluartumik IA-ni nunatsinni aqqutit
ajornakusoorneri pisuullutik ulloq siulleq peqataasinnaasimanngilagut.
Matumanilu paasissutissat tunniunneqartut toqqammavigalugit takornariaqarmut
ataatsimiititaq isumaqatigaarput oqarmat nunatta avammut nittarsaannerata
siammasinnerusumik ingerlanneqarnissaanik.
Aammalu matumani apeqqutigerusullugu
ilumut qallunaat nunaaniinnaq nittarsaassisussatut nukiit kisimik
inissinneqarsimassappat? Tassami nukiit ilaasa nunani allani, soorlu
takornariarfiginerusartakkatsinni inissinneqarsinnaaneri
ammaffigineqartariaqartut IA-niit isumaqarpugut. Aammalu takornariaqarnerup
tungaatigut Island-imi suli annertunerusumik suleqateqarsinnaaneq
eqqarsaatigalugu nunatsinnut nittarsaassinerup nunani qanigisatsinniit, soorlu
Island-imiit Canada-miillu aamma ingerlanneqarsinnaanissaa siunissami
periarfissiuunneqartariaqarpoq. Aammalu tamatumani Naalakkersuisup
akissuteqaatimini ersersippaa, SAMIK taamatut taallugu Island-imiunik
suleqateqalersimallutik, taannalu isumaqatigivarput.
Takornariaqarnermi ingerlatsinermi neqeroorutigineqartartut
soqutigineqarnerusullu malunnaatillit annersaat, assersuutigalugu Island-imut
takornariartartut amerlanerpaartaat ataatsimeersuariaatigalutik
takornariartarneri. Tassami maanna nunarsuarmi suliffeqarfippassuit
periuserilersimavaat ataatsimeersuarnermi isumasioqatigiinnermi allanillu
aaqqissuussinerminni takornariaatigalutik nunat allat ornittarlugit.
Tamannalumi nunatsinnut piukkunnarluinnartuuvoq. Tassami nunarput annerusumik
nunarsuup sinneraniik ilisimaneqanngilaq, takornariaqartitsinerullu iluani
nutaarluinnartut isigineqartariaqarluni. Taamaattumik siunissami suli
aningaasanik amerlanerusunik takornariaqarnikkut isertitsissagutta
ataatsimiigiartartut isiginerusariaqarpagut. IA-niillu isumaqarpugut ukiuni
makkunani nammineq akissaqanngiffitsinni nunani allamiut aningaasaleqataaffigisinnaasaanik
periarfissiussisariaqartugut.
Aammali eqqaamasassaq
pingaaruteqaqisoq aana, nunarsuarput angigaluaqisoq pinngortitap
aserfallatsaalinissaa minguitsuunissaalu qulakkeersimasariaqarparput.
Sunaluunniimmi atupilunneqaraangami nungullartarpoq tamannalu
eqqumaffigisariaqarparput, soorlu Island-imi aamma tamanna annertuumik
eqeersimaarfigineqartoq aningaasarpassuillu atorlugit akiorniarneqartartoq
paasigipput.
Takornariaqarneq inuussutissarsiutitut
pingaarnerit pingajuattut ingerlanneqassappat qulakkiigassat pingaartut
ilagaat nunatsinni angallaneq. Tamatumanilu takornariaqarnermut angallatsiviit
qallunaat nunaanni Island-imilu oqaatigaat nunatsinnut
takornariarusuttorpassuaqaraluartoq angallannikkullu pilersaarusiortarnerup
kingussippallaartarnera aporfiusartoq. Tamatumalu siunissami
aaqqiivigineqarnissaa, angalatitsiviillu allat nunatsinni
periarfissiunneqarnissaat ammaffigineqartariaqartoq IA-niik isumaqarpugut.
Angallanneq akikinnerusoq maannakkorniillu pilersaarutitigut siusinnerusoq
pisariaqarpoq.
Ukiuni makkunani aasaanerani
takornariartitsineq aallunneqarpoq, siunissamilu ukiuunerani
aallunneqarnerunissaa anguniartariaqarpoq. Ilami maluginiakkatta ilagaat
Island-imi perluk silapilullu soqutigineqaqisumik nittarsaallugit immikkut
misigisassatut takornariagassatullu ingerlanneqartartut. Avatangiisitta
kusanarsinnaallunilu peqqarniissinnaanera nittarsaannerusariaqarparput,
inuiattullu issittorsuarmi ukiorpassuarni napaniallaqqissuserput
takutittariaqarlugu, taakkuuppummi nunarsuarmi allami ilisimaneqaratillu
paasineqanngisaannartut.
Ukiorsuaq issersuaq inuiaat
nukittuut atortorissaaruterpassuaqanngikkaluarlutik inuuniartarsimanerat
siulitsinnut ataqqinaatitut takornarianut nittarsaattariaqarparput.
Nunatsinnimi aamma suliffissaqartitsiniarnikkut ajornartorsiutit, ingammik
sikusartut eqqarsaatigalugu, ukiuunerani pisarput. Tamakkulu suli ingammik
piniarnermik amiinnarnillu isumalluutilinnut annerusumik tapertarisinnaanissaat
periarfissiuunneqartariartut IA-niit isumaqarpugut.
Tamakkulu ineriartortinneqassappata
Greenland Tourism A/S avannaani kujataanilu immaqalu aamma tunumi
immikkoortortaqaleraluarpat taamaalillutik kommunit aamma qanimut suleqatigiissinnaanissaat
ataatsimoorussamillu iliuuseqarsinnaanissaat ammaanneqarnerussagaluartoq
IA-niit isumaqarpugut.
Taamatut oqaaseqarluta
takornariaqarnermut ataatsimiititap isumaliutissiissutaa tapersersorparput,
qulaanilu taasatta ingerlateqqinnissaat innersuussutigalugit.
Bjarne Kreutzmann, AP:
Takornariaqarnermut ataatsimiititaliap
Inatsisartunut isumaliutissiissutaa assut soqutigalugulu misissuataarsimavara,
takornariaqarnermi angallernermullu tunngasumik apeqqut qitiusoq
isumaliutissiissutip uppernarsarpaa. Apeqqut nalunngeriigarput nunatsinni
takornariaqarnermi akornusersuutaasoq, tassa angallannissamut pilersaarutit
kingusinaartumik saqqummertarnerat taamaalillunilu periarfissanik
killiliisarnera. Tamatumanilu pissutaalluni aningaasanut inatsisissamut siunnersuutip
ima kingusitsigisumik akuersissutigineqartarnera, tassa Grĝnlandsfly A/S
piffissaq eqqarsaatigalugu kissaatiginartinneqartutut ungasitsigisumut
pilersaarusiorsinnaasarnani.
Taamaattumik nuannaajallannarpoq
paasillugu pissuseq taanna aaqqinniarneqartoq Namminersornerullutik Oqartussat
assigiinngitsunik suliniuteqarnerisigut, soorlu suli ataatsimik atorfinitsitsinikkut
tamatuminnga suliaqartussamik, taamaalilluni Grĝnlandsfly A/S-ip juli-p
aallartinnerani 1999, aasaanerani timmisartuussinissaminut pilersaarut
qularnaapajaariigaq saqqummiussinnaassammagu. Takornariaqarnermi siunissaq
qaamanerulerpoq, taamaattumillu neriussaanga taama suliniuteqarneq
iluatsilluarumaartoq.
Aammattaaq sulianik takornarianermut
tunngasunik misissueqqissaarnissamik taakkualu inerneranik
saqqummiussinissamik Naalakkersuisut neriorsuuteqarnerat nuannaarutigaara
taamaallillungalu isumaliutissiissut tusaatissatut tigullugu.
Anthon Frederiksen, Kattusseqatigiit:
Takornariaqarnermut ataatsimiititaliap
isumaliutissiissutaani oqaatigineqartut piviusunngortinneqassappata,
pisariaqarluinnartutut Kattusseqatigiinniik isigaarput kalaallinik
takornariaqartitsinermi sullissisussanik ilinniartitsinissap atorluaanissallu
pimoorullugu ingerlanneqarnissaat.
Soorlu assersuutigalugu ukioq kalaaleq
inuusuttunnguaq Danmark-imi ilinniarnermini soraarummeernerminut atatillugu
nunatsinni takornariaqarnermut annertuumik sammisaqarsimasoq, ilaatigullu
quppernerit 100-it angullugit allaaserisaqartoq soqutiginarluinnartumik.
Tamakkua atorluarsinnaasariaqarput.
GU-mimi EVU-milu ilinniartut aasaanerani
atuanngiffeqarnerup nalaani atorneqarsinnaanerat qanoq
misissuiffigineqarsimava?
Tassami piffissap takornariarfiusartut annertusitinneqannginnerani
siullertut kalaallinik ilinniarluarsimasunik sulisoqarnissaq
qulakkeertariaqarpoq. Aappaattullu akunnittarfeqarnikkut pissutsit aamma
ilanngullugit soorunami piorsaaffigineqartariaqarlutik.
Kiisalu minnerunngitsumik aalisartut
piniartullu, soorunami perusuttut, aalisarnerminnut piniarnerminnullu
atatillugu takornarissamik ataatsimik marlunnilluunniit ilaasoqartarsinnaanerat
saqquminerusumik pilersaarutigineqarlunilu aallunneqarnerusariaqarpoq.
Taamatut naatsumik oqaaseqarlunga
Takornariaqarnermut ataatsimiititaliap isumaliutissiissutaa akuersaarlugulu
tusaatissatut tiguara.
Peter G. Samuelsen, Takornariaqarnermut Naalakkersuisoq:
Tassa siullermik oqaaserineqartunut partiit tamaasa qutsavigissavakka, Kattusseqatigiit qutsavigissavakka. Soorunamilu aamma ataatsimiititaliaq qutsavigereerparput, qutsavigeqqissavaralu. Aammalu ingerlaavartumik soqutiginninneq takornariaqartitsinerup ineriartortinneranut maannakkut kingumut takuteqqinneqartoq Inatsisartuninngaaniik taanna qutsatigissallugu.
Tassa ilumoorpoq Inatsisartut takornariaqaneq pillugu ataatsimiititaliaa ukioq kingulleq manna tikillugu qanittumik suleqatigiilluta takornariartitsineq imak ineriartornera, taavalu malinnaavigisassat assigiinngitsut malinnaavigeqqissaarsimavagut peqatigiilluta. Soorlu december-imi sukumiisumik takornariartitsinermi ataatsimiititaliaq Kangerlussuarmi ataatsimeeqatigalugu ilisimatinneqarsimasoq ingerlatat assigiinngitsut pillugit. Taamatuttaarlu aamma takornariartitsinermi sulisorisagut peqatigalugit Island-imi taavalu Danmark-imi ataatsimiititaliaq angalasimavoq paasisassarsiorluni suliaminut atasumik.
Malunnarpoq aamma partiit oqaaseqaataat, malugisinnaasakka najoqqutaralugit ilisimasaqarnerulerneq sulianut ataasiakkaanut aamma oqaaserisatsigut ersersinneqartoq. Ppppingaartumik IA tungaaninngaaniik aamma siusinnerusukkut eqqarsaatigalugit maannakkut IA tungaaninngaaniik oqaatigineqartut ersarissumik aammalu tapersersuerpalaarnerusumik nipeqarlutik.
Ataatsimut eqikkarlugu oqaatigerusutara tassaavoq siorna ukiakkut Naalakkersuisut nutaamik, nikinnitsigut Naalakkersuisooqatigiit isumaqatigiissutaanni kommunit sumiiffiillu nunatsinni suleqatigineqarnerigisigut takornariartitsinerup ineriartortitsinera ersarissarneqassasoq. Tamanna suliniarneq maannakkut kinguneqaraluttuarpoq, tassa sap. ak. tulliani maj-ip naalernerani Greenland Tourism A/S ataatsimeersuarnissaani sukumiisumik tamanna sammineqassammat. Tassa sumiiffinni ataasiakkaani suliniartut, namminersortut, kommunit suliffeqarfiillu tamatumani suleqatiginissaat ersarinnerusumik GT-imminngaaniik isumagineqalissasoq Naalakkersuisunit aamma ataatsimeersuarnermi aamma oqariartuutissarigatsigu.
Aamma Atassut-minngaaniik Jakob Sivertsen-ip tikkuagaa. Tassalu takornariartitsinermut aningaasaliissutitta malunnaateqartumik kinguneqarnera sukumiisumik malittarissagipput, tamanna pissusissamisoorpoq. Aammalu taamaattumik Naalakkersuisut pilersaarutigaat ukiaru takornariaqartitsinerup aningaasatigut nunatsinnut sunniutaata sukumiisumik misissuisoqareerneratigut nalilersuisoqareerneratigullu Inatsisartunut nassuiaatiginissaa.
Aamma ataatsimiititaliaminngaaniik partiinillu oqariartuutigineqartoq. Tassa aasaaneraniinaanngitsoq kisianni aamma ukiup kaajallakkiartornerani sivisunerusumik nunatta takornariarfittut aallunneqarnissaa taamatullu nittarsaanneqarnissaa pisariaqartillugu. Tamatumunnga tunngatillugu, aap aamma ilisimasagut najoqqutaralugit GT kisimi pinnani kisiannili aamma kommunini takornariartitsisartullu ataasiakkaat eqqarsaatigalugit suliniarneq tassani annertuumik ingerlanneqarpoq. Sisorartitsinerit, qimussertitsinerit taaneqaannarsinnaapput. Kisianni aamma alutornartunik ilaqarput ilaatigut ukioq manna siullermeerutaasumik misilinneqarpoq Kangerlussuarmi, tassa japanimiut arlallit Kangerlussualiarput. Ukiullu nikinnera, tassa ukiutoqaq ukiortaarlu Kangerlussuarmiiffigalugu. Tassagooq japanimiut upperimmassuk arsarnerit ataanni meerartaarnissamut qaninnerulersitsisartoq. Tassa tamakkua periarfissat assigiinngitsut avatitsinnut nittarsaassutigisinnaasagut akiliisinnaalluartunillu aamma qammaassutaasinnaasut amerliartorput.
Taakkua oqaatigeriarlugit aamma ilinniartitsinermut tunngasut tikissavakka. Tassa pikkorissartitsinerit arlalissuit ingerlanneqartarput, aamma Qaqortumi taamaallaat ingerlanneqanngillat. Tassa pikkorissartitsinermut Qaqortumi allaffeqarpugut Niuernermi ilinniarfimmi, kisiannili tassanngaaniik aamma sineriammut angalasoqarluni pikkorissartitsisartut orniguttarput nunap immikkoortuini assigiinngitsuni pikkorissartitsinermik ingerlatsillutik.
Sanalunnermik suliniuteqarneq, taanna aallarteruttorpoq. Tassa ukioq manna Inatsisartut anigaasaliissuteqarnerisigut pikkorissartitsinerit atortunillu nutaaliaasunik nittarsaassinerit ingerlanneqarput. Manna tikillugu pikkorissartitsinerit 56-inik sanaluttartunik peqataaffigineqareersimapput, sulilu pikkorissartitsinerit ingerlaqqissapput sumiiffinni arlaqartuni.
Aamma
IA oqaluttua Maliinannguaq M. Mĝlgċrd ilumoornerassavara, tassa oqarmat
ullutsinni naammakkunnaartoq takornariat tikisiinnarnissaa. Kisiannili aamma
tikilluaqqusaasutut misigitinnissaat kiffartuussilluarnikkut ajunngitsumik
pinninnerat tamakkua tamarmik takornariartitsinerup
aningaasarsiutigineqarsinnaaneranut qaatuussaqaleriartornitsigut taassumap
tungaatigut ineriartortitsinissarput, qaffassaanissarput tamatta
suliniutigisariaqarparput. Qitiusumik suliniarneq tassani kisimi pissanngilaq,
kisianni takornariartitsinermut suliniuteqartut tamarmik kommunit
suliffeqarfiillu suliassaraat. Tamattalu
suliassaq taanna tamakkiullugu kivinniagassaraarput.
Pikkorissartitsinerit
qimannginnerini aamma IA-ninngaaniik tikkuarneqarpoq EVU qaffasinnera. Tassa
taanna aningaasarsiornikkut qaffasissumik ilinniarnertut oqaatigisariaqarpoq,
taamaattumik aamma tassunga isertartut amerlassutsimikkut killeqarput. Aammalu
naammassigaangamik atorfinnut soqutiginartunut aammalu akilerneqarnermikkut
qaffasissunut atorfinikkajupput ilaatigut takornariartitsinermut
sammisaqarfiunngikkaluartuni allaat. Taamaammat ilinniarfinni allani aamma
takornariaqartitsinerup saqqummilaartinneqarnerunissaa, immaqa fag-itut
pinngikkaluarlugu kisianni sammisaqarnerit ilaanni sammineqartarnissaa. Taavalu
aamma qitiusuminngaanniik tamakkua tungaatigut pikkorissartitsisinnaasunik
ornigutsitsisarnerit aqqutigalugit tassuunakkut aallussisoqarsinnaanera
eqqarsaatigineqarsinnaavoq.
Juullip inuanut tunngatillugu
Naalakkersuisuni akissuterput innersuussutigeqqiinnassavara. Tassa maannakkut
nalunaarusiortoqarsimavoq, taavalu nalunaarusiap taassumap innersuussutigisai
assigiinngitsut Naalakkersuisuni nalilersoqqaarallarumavagut
alloriartoqannginnerani.
Aamma IA-ninngaaniit
oqaatigineqarpoq umiarsuit amerliartortut nunatsinni sineriassorlutik
illoqarfinni nunnittartut, taakkua ilaasorpassui aningaasarsiorfigineqarnissaat
taanna aaqqissuussaanerusumik pisariaqartoq. Aamma tamatumunnga
Naalakkersuisut isumaqataanertik oqaatigiinnassavaat. Oqaatigissallugulu aamma
Greenland Tourism-ip tungaaninngaaniik suliniarneq tassunga tunngasoq aamma
aallunneqarluarmat. Ilaatigut suliat tamakkua siusissorujussuakkulli
aallartereersarput. Soorlu assersuutigalugu una naqitaq upernaaq manna
kommuninut takornariartitsinermilu suliaqartunut tamanut siammarneqarsimavoq,
tassalu 1999-imi pisussat eqqarsaatigalugit, aappaagu aasakkut. Taamaammat
tamatumuunakkut aamma pilersaarusiornermi naammassiniakkat ilumut
malinnaaviginiarneqarnerat aamma GT tungaaninngaaniik, Naalakkersuisuniit
suliniartutsinni tamaninngaaniik aamma naammassiniarneqarpoq sapinngisaq
najoqqutaralugu.
Qallunaat nunaaninngaaniik GT-ip
immikkoortortaqarfia ingammik nunanut allanut sammisumik nunatsinnik
ilisarititsiniaanermik suliffiusoq taassumap nunanut allanut inissinneqarsinnaaneranik
IA tikkuagaat, taanna tusaatissatut tigussavarput kisianni erseqqissassallugu
taamaaliorneq imaaliallaannagassaanngimmat. Assersuutitut oqaatigerusuppara
nunat avannarliit, tassa naalagaaffiit avannarliit tallimaasut, taakkua
suleqatigiinnermikkut kangiani sulisoqarmata ataatsimik. Tassa kangiani inuit
milliard-it arlallit takornariarnissamullu aamma aningaasaateqarluartartut
akornanni nunat avannarliit ataatsimik sulisoqarmata. Taamaalilluni apeqqutaasorujussuuvoq
sumi qammaanissaq takornarianik. Taavalu pingaarnerpaavoq nunatta ilisarilerneqarnissaanut
suliniarneq pitsaasumik ingerlanneqarpat.
Ukiuunerani aamma
ataatsimeersuarnerit eqqarsaatigalugit Island-imilu misilittakka teqqartorneqaranni
aamma oqaatigineqarsinnaasoq nunatsinninngaaniik ilagaat, immaqa qujanartumik
oqarsinnaavugut nunatsinni atorfeqarsimasut nunatsinnillu ilisarisamannittut
inuit nunani allaniittut ilaatigut atorfikkaat eqqarsaatigalugit taakkua aamma
nunatsinnut asanninnerminnik nunarpulluunniit qimareeraluarlugu
suliniartarnerat aamma takussutissaqarmat. Assersuutigalugu qallunaat nunaanni
suliffeqarfissuaq nakorsaasiorfik, Lundbĉk. Taanna ukiuni arlaqalersuni inuit
70-90 ataatsimiinnermi ataatsimiinnermi nunatsinnut tikisittarmagit, ilaatigut
piffissaq sivisulaartukasik atorlugu nunatsinni ataatsimiinnertik iluatsillugu
takornariartitsinermik malitseqartinneqartumik. Qularnanngilaq aamma
taamaattut aaqqissuussinerit amerliartortinneqarpata aamma unnuisarfiit
angallassinermilu aaqqissuussisimanitta atorluarneqarnerulersinnaanera aamma
malitseqartinneqarsinnaasoq.
Ilaana puigunngeqaarput, soorlu
aamma IA oqartut eqqaamassagipput pinngortitap avatangiisittalu sapinngisaq
naapertorlugu innarlitsaalineqarnissaat aamma takornariatitsinerup ingerlanneqarnerani.
Tassungalu atatillugu aamma Anthon
Frederiksen-ip apeqqutigisaa ilinniartut ilaatigut ilinniarluarsimasut
tungaasigut nalunaarusiarisartagaasa atorluarneqarsinnaanerat apeqqutigimmagu.
Tassunga atatillugu oqaatigissavara taannaannguatsiarpoq
nalunaarusiarineqarsimasoq tikkuarneqartoq, tassalu ilaatigut annertuumik
imaqarmat takornariaqartitsinerup ineriartortinneqarnerani taava suut
aaqqissuussinermi ilagitillugit avatangiisit innarlitsaalineqarnissaat aaqqissuussisoqarsinnaanersoq
pisortatigoortumik eqqumaffigisassat assigiinngitsut tikkuartorlugit.
Taamaattut apeqqutit tiguneqaannarneq ajorput, kisianni aamma
aaqqissuuseqqinnermi takornariartitsinermilu suliaqartutta akornanni aamma
tigulluarneqartartut ilisimavakka. Tassunga erseqqissaatitut oqaatigiinnarpara. Aamma ilinniagaqartut
ilaatigut aasaanerani atuanngiffeqarnermi nalaani GU-rtut, EVU-rtut taakkua
atorluarneqarsinnaanerat misissuiffigineqarsimanersoq. Tassa nalunngisakka
naapertorlugit maani nunatsinni takornariartitsinermi suliaqartuninngaaniik
taamaallaat pinnani, kisianni aamma allaat Danmark-ikkuni
angalatitsisartuninngaaniik ujartorneqartarput apeqqutigineqarlutillu
ilinniarfiit ilinniartunik perusuttunik piumasoqartillugu aamma
neqeroortartunik ilisimasaqarpugut. Isumaqarpunga kikkulluunniit
ilinniartuugunik, aalisartuugunik sulisartuugunik aamma saniatigooralugu
ilaatigut takornariartitsinerup aningaasarsiorfissatut
tunniussaqarsinnaaneranik maluginnittut amerliartortillugit tassani peqataasut
nunatsinni amerliartussasut.
Oqaaserineqartunut qujaqqissuunga, taavalu
ataatsimiititaliap suleqatigiilluarnera nangissaaq. Uagut tungitsinniik
isigalugu aammalu ukiamut takornariartitsinerup aningaasatigut nunatsinnut
inuiaqatigiinnut sunniutai maannakkut misissoqqissaarlugit
nalunaarusiarineqartut taava ukiaru Inatsisartunut apuunnissaat
Naalakkersuisuninngaaniit pilersaarutigaarput.
Hans Enoksen, Ataatsimiinnermik aqutsisoq:
Siullermik una erseqqissaatigissavara
Inatsisartut suleriaasiat malillugu kap. 4-mi, ' 19 imak allassimammat: Inatsisartunut ilaasortat
ikinnerpaamik affai najuuppata Inatsisartut aalajangiisinnaassuseqarput.
Ilaasortaq taaseqataasinnaaniassaguni inimi ataatsimiiffimmi nammineq
najuutissaaq. Takusinnaasakkalu malillugit maani Inatsisartunut ilaasortat
arlalialunnguit taamaallaat isersimapput. Taava nalilertariaqarparput ilumut
ataatsimiinneq ingerlatiinnassaneripput. Ataatsimeeqataassagunik inimi maani,
takusinnaagatsigu najuuttut ikittuarannguusut, ilumut ingerlaannassanerlugu
taanna. Taavalu inimi maani isersimasoqarpat Inatsisartunut ilaasortat
qinnuivigissavakka ataatsimiiffimmut majuaqqullugit, ataatsimiinneq naammassineqassappat
imaluunniit unitsiinnassaneripput.
Ruth Heilmann, Takornariaqarnermut ataatsimiititaliap
siulittaasua:
Tassa uggornalaarpoq inuussutissarsiutitut
takornariaqarneq taamatut aallarunnialeruttorfiani tusarnaarneqarata maani
soqutigineqarpiarata immaqa oqallinnerput ingerlammat. Kisiat tassa
ingerlaqqissaagut.
Qujavunga aamma uanga ataatsimiititaliaq
sinnerlugu Naalakkersuisut isumaliutissiissummik sukumiisumik
akissuteqarnerannut. Aammalu partiit Kattusseqatigiillu aamma isumaliutissiissummut
ilassinnilluarnerat aamma qujassutigissavara.
Makkua siuarsarneqaqqullugit
kaammattuutigineqartut pingaaruteqartutut isumaqarfiginarput, tassa aamma
allanik isumaqataaffigineqartut. Tassa ilinniartitaanerup aammalu kiffartuussinerup
annertusarneqarnissaa qularnanngilaq aamma STI aqqutigalugu taamatut
ilinniartitaanerup takornariaqarnikkut EVU kisiat aqqutiginngikkaluarlugu
aamma annertusarneqarsinnaanerannik, tassani aamma periarfissaqarpoq.
Sanalunnermik nioqqusiornikkut
siuarsaanissat aamma nunatsinni juullip inoqarnerata erseqqarissunngortinneqarnissaa.
Taavalu aamma danmarkskontoret-imi
Greenland Tourism-ip nunarput pillugu suliniuteqarnerata
sakkortusarneqarnissaa, tassani aamma takusavut angalanitsinni
iluarisimaakkavut suliniutigineqartut eqqarsaatigalugit nunarput avammut nittarsaanneqarpoq annertuumik.
Kisiannili uani aamma soorunami
takornariarpassuit aggerusukkaluartut ilaatigut angallannikkut aporfeqarlutik
agginngitsoortarnerat, taanna iluarserusunnartut ilagimmassuk. Tassa takornariat
nunarput soqutigivaat, kisiannili angallannikkut pissutsit taakkua
aaqqinneroriarpata qularnanngitsumik takornariaqarneq annertuumik aamma
soqutigineqartup amerlasuunik tikeraarneqalertussaavoq nunarput. Taannalu
anguniagaasoq, 60.000-inik siunertaqartoq ukioq 2000, neriuppunga qanillattorneqarumaartoq.
Uani Island-ip
suleqatigineqarnerulernissaanut tunngatillugu aamma tallimanngormat ataatsimiititaliaq
Greenland Tourism-imi maani immikkoortortaqarfimmi alakkarterisimavoq. Tassanilu
Benedikte Thorsteinsson-imiik inulluaqqutissavassi, tassani Leif Iluanaarajooq
pillugu suliniuteqartoq oqaluttuuppaatigut assigiinngitsunit suliniutaasunik
assorsuaq soqutiginaateqartunik. Uani Naalakkersuisut akissuteqarnerminni
Island-imik suleqateqarneq erseqqarissarpaat. Tassa SAMIK tassani suleqatigineqartoq,
aningaasaliissutigineqartoq aningaasaliiffigineqartarlunilu allaat kr.
500.000-it angullugit. Taamaattumik SAMIK-up saqqumilaarnerusumik suliniutaasunik
paasisitsinissaa isumaqarpunga aamma ataatsimiititaliamiit
pisariaqartinneqassasoq.
Unnuiffiusartut amerlasarneqarnissaat
aamma ataatsimeersuarnernik aaqqissuussinerit annertusarneqarnissaat. Aammalu
oqaatigeriikkattut angallannikkut nunap iluani ataqatigiissaarnerusumik
pilersaarusiortoqarnissaa silaannakkut imakkullu.
Aammalu qujavugut Naalakkersuisumik
paasisinneqaratta, tassa 1999-imi angallannissat eqqarsaatigalugit
Grĝnlandsfly-p juli-mi saqqummiussinialersaartoq. Taanna isumaqarpugut siuariarnerusoq
isumalluarnartoqartorlu.
Kiisalu aamma sermersuup
takornariaqarnikkut atorluarneqarnerulernissaa eqqarsaatigalugu,
tallimanngormat tassa Greenland Tourism-imiilluta aamma takutinneqarpugut
allaat samungarsuaq apparterluni sermersuaq takornariarfigineqartalersimasoq.
Uagut ulorianartuutitaraluatsinni, kisianni tassa pissanganartutut isumaqarluni
taanna ingerlanneqalereersimavoq assorsuaq soqutiginartoq. Tassani malunnarpoq
sermersuarput annertuumik periarfissaqartoq aamma Island-imiunik
suleqataaffigineqarusulluni soqutigineqartoq aamma Greenland Tourism-ip
eqqumaffigillualereeraa tassani malugaarput.
Kiisalu nunatsinni aputip aamma
sisorarnikkut, apummilu allatigut pinnguarnerpassuit ipiitsumi aammalu
silaannarissumi ingerlanneqarsinnaanerat misigisaasussaasoq allanut misigisanut
naleqqiullugu. Uagut immaqa taamaattussaannartut isigisarput kisiat allamiut
soqutigilluinnarlugu soqutigisaat, annertunerusumik atorluarneqarnissaat
taanna isumaqarpunga suliniutigisariaqartoq.
Aamma oqaatigineqarpoq IA-minngaaniik
pinngortitap inuisalu sernersorneqarnissaanik immaqa sakkortunerusumik
maleruagassiornissaq, taanna isumaqarpunga aamma eqqartorneqarusariaqartoq.
Tassani umiarsuit amerlasoorpassuit ataatsikkut, allaat ukioq manna
76-ioqqooqaat, nunarput niuffigisussaavaat. Tassuunakkullu qanoq aningaasatigut
sunniuteqartumik nunaqarfinnut allanullu iluanaarutaanera tassani
assorujussuaq takorusunnassaaq.
Tassa inuutissarsiutip nutaap aammalu
aningaasarsiut aningaasarsiutigillualaalertussap ineriartortinnissaa
eqqarsaatigalugu malunnarpoq aningaasaliissutit amerlanerusut pisariaqartinneqartut.
Tamakkulu aamma ukiamut uterfigineqarpata neriuppunga
nalilersorneqarluarumaartut.
Hans Enoksen, Ataatsimiinnermik aqutsisoq:
Taamaalilluni imm. 54, Takornariaqarnermut
Ataatsimiititaliap isumaliutissiissutaa naammassivoq.
Oqaluuserisaq naammassivoq.