Oqaluuserisassani immikkoortoq 55 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat, Anders Andreassen.
Manasse Berthelsen, Inuit Ataqatigiit:
Siorna ukiakkut siunnersuuteqarpunga nunatsinni sanaluttartut aaqqissuussaanerusumik pikkorissartitsisoqartalernissaanut kiisalu sanaluttartut sakkussaminnik piniarneranut tapiiffigineqartalernissaannik. Kultureqarnermi ataatsimiititaliamiit naalakkersuisoq piumaffigineqarpoq 1998-mi upernaakkut iliuusissatut siunnersuummik saqqummiissasoq. Uanili ataatsimiinnermi tamanna ilanngunneqarsimanngilaq, taamaammat naalakkersuisoq aperissavara sanaluttartut pillugit suliniutit maannamut sumut killinnersut.
Peter Gr. Samuelsen, Takornariaqarnermut, Angallannermut, Niuernermullu Naalakkersuisoq:
Inatsisartuni ilaasortap Kultureqarnermut, Ilinniartitaanermut Ilageeqarnermullu Naalakkersuisumut sanaluttarnermut tunngasuteqartumut apeqquteqaataa uannut akissuteqarfigineqartussatut ingerlateqqinneqarsimavoq. Naalisarlugu saqqummiutissavara akissut naatsorsuutigaluguli imaqarniliami tamakkiisumik ilanngunneqarumaartoq.
1998-mi aningasaliinermi siunniunneqarpoq nunatsinni sanaluttarnerup piorsarneqarnissaanut pimoorullugu piviusumik suliniuteqarnissaq. Suliassamut katillugit 1,5 mio. koruunit aningaasaliunneqarput aningaasaliussat inatsisartut akuersinerat tunngavigalugu atorneqartussaapput pilersaarusiortut akissarsiaqartinneqarnerannut, pilersaarusiortut sinerissami angalaartinneqarnerannut kiisalu sanaluttartut sannaviinut atortorissaarutinik kommunit pisinerannut tapiissutitut. Taamaaliornikkut qulakkeerumaneqarluni pingaartumik illoqarfinni nunaqarfinnilu kusanartuliorluni sanaluttarnerup ineriartortinneqarneragut suliassaqartitsinissap aningaasarsiornissallu periarfissinnissaat.
Suliaq januar-imili aallartittoq ingerlalluarpoq ullu manna tikillugu kommunit illoqarfiit arfineq pingasut ilitsersuiffigineqarlutik tikinneqareerput, naatsorsuutigaaralugu ukioq manna kommunit aqqaneq marluk angullugit tikinneqarsinnaajumaartut. Manna tikillugu illoqarfiit Kangaatsiaq, Aasiaat, Sisimiut, Alluitsup Paa, Paamiut, Ivittuut aamma Arsuk pikkorissartitsivigereerput pilersaarutigineqarlunilu Uummannaq, Qaanaaq, Illoqqortoormiut aamma Qaqortoq ukioq manna pikkorissartitsivigineqassasut. Pikkorissartitsinermut atatillugu ingerlatsisuusup aamma suliassaraa ukiup naanerani tamakkiisumik nalunaarusiornissaq siunissaq pillugu siunnersuusiornissaq kiisalu kusanartuliorluni sanaluttarnerup piorsaavigineqarnissaanut tunngassuteqartunik suliniuteqarnissaq soorlu sanaassatut atortussanik najugaqarfinni peqartuaannarnissap tuniniaasarfiit aqqutigalugit aaqqissuussivigineqarnissaa.
Tassunga tunngatillugu KNI iliuuseqarluni aallartereerpoq kusanartuliorluni sanaluttartut sanaassaqartuarnissaat qularnaarumallugu. Sanalukkat tuniniarneqarnerisa qanoq annertutigisumik isaatitsissutaanerisa misissorneqarnissaat siunertaralugu nunatsinni naatsorsueqqissaartarfik suleqatiserineqarsimavortaaq. Ukioq manna suliakkiissut pilersaarut malillugu ingerlasoq pikkorissaqataasartunit iluarisimaaneqartoq malugisarpara nuannaarutigalugulu. Taamatut oqaaseqarlunga neriuutigaara inatsisartuni ilaasortap Manasse Berthelsen-ip apeqquteqaataa erseqqissumik akissuteqarfigisimassallugu.
Oqaluuserisaq naammassivoq.