Oqaluuserisassani immikkoortoq 56 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders Andreassen.
Manasse Berthelsen, Inuit Ataqatigiit:
Tusarsaagaluttuinnarpoq avannaani qaleralinniarfiusuni ingammik Upernaviup kommuniani qamuteralaat annertuumik atugaajartuinnalersimasut, allaallu sikumi aalisarnermi atugaalersimallutik. Taamaattumik naalakkersuisunut apeqquteqaatiginiarpara qanoq annertutigisumik atugaanersut ilisimaneraat, kiisalu sikumi angalasarnermi qamuteralaat atugaanerat ilisimasaqarfigineraat. Taamaattoqassappallu qanoq iliuuseqarniarnersut. Ilanngullugu apeqquteqaatigissavara qamuteralannik immikkut akuersissuteqarluni qassit aalisarnersut.
Paaviaaraq Heilmann, Aalisarnermut, Piniarnermut, Inuutissarsiornermut Nunalerinermullu Naalakkersuisoq:
Inatsisartuni ilaasortap Manasse Berthelsen-ip apeqqutigaa ukiukkut qaleralinniarnermut atatillugu naalakkersuisut snescooterinik atuisarnermik ilisimasaqarnersut kiisalu inatsisartuni ilaasortap Manasse Berthelsen-ip apeqqutigaa aalisarnermi snescooterit atugaanerannut qassinik immikkut akuersissuteqartoqarsimanersoq.
Naalakkersuisut ilisimasaqarfigaat ukiukkut qaleralinniarnermut snescooterit assartuutitut atorneqartarmata. Naalakkersuisut nalunngilaat snescooterit Upernaviup kommuniani annertuumik atugaasut. Sinerissami qanittumik qaleralinniarneq pillugu nalunaarutissap suliarineqarnerani aallaqqaataaniit snescooterit atugaasarnerat pillugu aalajangersagassamut missiungiuummut suliarineqarpoq aalajangerisakkami siunertarineqarluni ataatsimut isigalugu snescooterit atoqqusaassanngitsut. Kisiannili kommunimi ileqqoreqqusaliornissamut periarfissaqassapput aalisarnermut atatillugu snescooterit atugaanerannik aqutsissutaasussanik. Naalakkersuisulli aalajangiipput maleruagassat taakku aatsaat kingusinnerusukkut atuutilersinneqassasut makku pissutigalugit. Naalakkersuisut maannakkut najugaqarfiit avataani angallassissutit motorillit atugaanerat pillugu nalunaarusiorput. Taakku kommunit suleqatigalugit suliarineqarput. Naalakkersuisut pissusissamisoortippaat aalisarnermut atatillugu snescooterit atugaanerat pillugu maleruagassat atuutilersinneqarpata nalunaarutissat siuliini taaneqartut atuutilersinneqarnerat peqatigalugu. Taamaaliornikkut snescooterinik atuisut assigiinngitsut assigiimmik pineqarnissaat anguneqassaaq. Naggataatigut oqaatigissavara aalisarnermut snescooterit atugaanissaannut naalakkersuisut immikkut akuersissuteqarsimanngimmata. Tassami aalisarnermut atatillugu snescooteriet atugaanerannut aqutsissutigineqarsinnaasunik nalunaaruteqanngimmat.
Manasse Berthelsen, Inuit Ataqatigiit:
Naalakkersuisup oqaatigaa nalunagu snescooterit assartuutitut atorneqartartut kiisalu Upernavik kommuniani annertuumik atugaasut kisiannili oqaatiginngilaa aalisarnermi atugaanersut. Upper???? naalakkersuisunit ilisimaneqanngippat Upernaviup eqqaani snescooterit atorneqarnerannik. Taamaattumik naalakkersuisoq qinnuigisinnaavara misissuinerit assigiinngitsut immaqa aallartissinnaagai.
Oqaluuserisaq naammassivoq.