Oqaluuserisassani immikkoortoq 58 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 19. Maj 1998 nal. 20.00
Ataatsimiinnermik aqutsisoq: Hans Enoksen, Siulittaasoqarfimmi ilaasortaq aamma Inatsisartut Siulittaasuat Anders Andreassen.
Otto Steenholdt, Ataatsimiititaliap siulittaasua, Atassut:
Ataatsimiititaliap ilaasortarai Inatsisartunut ilaasortaq Otto Steenholdt (A), Inatsisartunut ilaasortaq Laannguaq Lynge (S), Inatsisartunut ilaasortaq Anders Nilsson (A), Inatsisartunut ilaasortaq Niels Mattaaq (S) aammalu Inatsisartunut ilaasortaq Johan Lund Olsen (IA).
Inatsisartut 1995-imi ukiakkut katersuunnermi aalajangiipput Inatsisartut Inatsiseqarnermut Ataatsimiititaliaat Inatsisartut Ombudsmandiannut suliassaqartuulluni ataatsimiititaliatut atuutissasoq. Taamaammat Inatsisartut Inatsiseqarnermut Ataatsimiititaliap Inatsisartut sinnerlugit aalajangiisimaneri kiisalu suliat pingaarutillit Inatsiseqarnermut Ataatsimiititaliamut ilisimatitsissutigineqarsimasut pillugit Inatsisartut ilisimatitsissuteqarfigissavai.
Inatsisartut Inatsiseqarnermut Ataatsimiititaliaata Inatsisartunut ilisimatitsissutigissavaa Inatsiseqarnermut Ataatsimiititaliaq Inatsisartut Ombudsmandineqarfiannut suleqatigiinnissamik isumaqatigiissuteqarsimammat suliassaqarfiit taakku marluk akornanni suleqatigiinnermut erseqqinnerusumik malittarisassaqartussatut.
Inatsisartut Ombudsmandiat pillugu inatsisartut inatsisaanni ' 12, imm. 2 naapertorlugu Inatsisartut Inatsiseqarnermut Ataatsimiititaliaata ulloq 12. Marts 1998 Inatsisartut Ombudsmandiata INUTEK-p siulersuisuinut ilaasortaalernissaa akuersissutigaa. Tassa Inatsisartut Inatsiseqarnermut Ataatsimiititaliaata aalajangiinermini pingaartippaa Inatsisartut Ombudsmandiat 1993-imiillu peqatigiiffimmut ilaasortaasimammat aamma INUTEK inuiaqatigiinnut tunngatillugu apeqqutinut tamatigoortumik suliaqartoq peqatigiiffiummat tamatigoortoq kikkunnilluunniit ilaasortaaffigineqarsinnaasoq.
Inatsisartut Ombudsmandiata suliassaminik ingerlatsisinnaanngikkallarnerani Ombudsmandiugallartussaq, Folketingip Ombudsmandia, ulloq 12. Marts 1998 Inatsisartut Inatsiseqarnermut Ataatsimiititaliaannut saaffiginnippoq, tassa Naalakkersuisut Ooooombudsmandiugallartup siullermik saaffiginninneraniit qaammatit arfineq pingasut qaangiuttut suli Ombudsmandiugallartup naammagittaalliuummik suliap aalajangersimasup suliarinissaanut atugassanik paasissutissarsiniarnera malissimanngimmassuk.
Tamanna tunngavigalugu Inatsisartut Inatsiseqarnermut Ataatsimiititaliaata naalakkersuisoq suliamut akisussaasoq Hr. Peter G. Samuelsen taamatullu naalakkersuisut siulittaasuat Hr. Jonathan Motzfeldt isumasioqatiginiarlugit ataatsimiigiaqquai. Tamatumuuna erserpoq suliamut akisussaasuulluni naalakkersuisunut ilaasortaq kinguarsaanani Naalakkersuisut Allattoqarfiannut suliami pissutsit pillugit oqaaseqaammik nassiussaqarsimavoq, taanna Naalakkersuisut Inatsisartut Ombudsmanderiugallartittagaannut attaveqaataasarmat saaffiginnissutaa malissimanngimmagu erseqqissarlugulu Ombudsmandiugallartup saaffiginnissutai tamarmik maannakkumiit ingerlaannartumik akineqartalissasut.
Inatsisartut Inatsiseqarnermut Ataatsimiititaliaata tamanna tusaatissatut tiguaa.
Inatsisartut Ombudsmandiat pillugu Inatsisartut inatsisaanni ' 11-imi allassimavoq Ombudsmandi, tassa inatsisartut inatsisaanni, inatsisartut peqqussutaanni imaluunniit allaffissornikkut aalajangersakkani atuuttuni amigaataasunik malugisaqaruni tamanna pillugu Inatsisartunut Naalakkersuisunullu nalunaaruteqartassasoq.
Aalajangersagaq taanna tunngavigalugu Inatsisartut Ombudsmandiat ulloq 18. December 1997 Inatsisartut Inatsiseqarnermut Ataatsimiititaliaannut saaffiginnippoq A/S Inissiaatileqatigiiffik Ini-mi suliassat suliarineqartarnerat paasitinneqarsinnaatitaanerlu pillugit Namminersornerullutik Oqartussat nalunaarutaat nr. 37, 19. December 1996-imeersoq pillugu.
Nalunaarutip taassuma atuutilersinneqarneratigut Ombudsmandip piginnaatitaaffii siullermeersumik annertusineqarput aammattaaq suliffeqarnermut pisortat ingerlatsinerannut ilaatinneqarsinnaanngitsumut atuuttussanngorlugit. Tamanna eqqarsaatigalugu ajuusaarutigisariaqarpoq Ombudsmandeqarfik kiisalu inissiaatileqatigiiffik nalunaarutip siuliani taaneqartup siuliani taaneqartup atuutilersinneqarnera pillugu toqqaannartumik ilisimatinneqarsimanngimmata.
Ombudsmandip oqaatigaa ombudsmandeqarfiup tamatuma kingornatigut nalunaarummik suliaqarnera qanoq paasinninnissamik ajornarsiuuteqartoqarneranik pilersitsisimasoq, tassami nalunaarummi erseqqissumik isummerfigineqarsimanngimmata ombudsmandip suliassaqarfinni amerlaqisuni piginnaatitaaffii. Siunissami ajornartorsiutit taamatut pinngitsoortinniarlugit Inatsiseqarnermut Ataatsimiititaliap taamaattumik inassutigisimavaa Ombudsmandeqarfik allaffissornikkut aalajangersakkanik ombudsmandeqarfiup sulineranut sunniuteqartussanik atuutsitsilersoqarneranut atatillugu tusarniaavigineqartassasoq taamaalilluni malittarisassatigut tunngavissani erseqqissumik Ombudsmandip piginnaatitaaffiisa annertussusii ersersinneqartassammata.
Taamatuttaaq Inatsisartut Ombudsmandiata Inatsisartut Ombudsmandiat pillugi Inatsisartut inatsisaanni ' 11 naapertorlugu isornartorsiunni nalunaarutigaa tassa Inuutissarsiornermut, Aalisarnermut, Piniarnermut Nunalerinermullu Naalakkersuisoqarfiup tuttut eqqissisimatitaanerat piniagaanerallu pillugit nalunaarur nr. 15, 27. Juni 1996-imeersumi maleruagassaliorsimammat atuutilersissallugu inatsisitigut tunngavissaqanngitsumik. Tamatuma kingornatigut naalakkersuisut Inatsiseqarnermut Ataatsimiititaliamut oqaatigaat naalakkersuisut Ombudsmandip isornartorsiuinera tussaatissatut tigugaat.
Nunanut allanut isumaqatigiissuteqartarnermut atatillugu Inatsisartut oqartussaaqataaffeqarnerat Inatsisartut Inatsiseqarnermut Ataatsimiititaliaata oqallisigaa.
Inatsiseqarnermut Ataatsimiititaliap oqallisiginninneranut pissutaavoq naalakkersuisut arlaleriarlutik suliaq Inatsisartunut saqqummiuteqqaarnagu inatsisartut nunanut allanut isumaqatigiissuteqarnikkut pisussaaffilertarsimammagit.
Namminersornerulerneq pillugu inatsimmi ' 13-imi piumasaqaataavoq nunanut allanut isumaqatigiissutit folketingip akuersisimanissaanik piumasaqaatitaqartut immikkullu nunatta soqutigisaanik attuisut namminersornerullutik oqartussanut isumaqatigiissuteqartinnagit saqqummiunneqartassasut.
Inatsimmi tassani '1, imm. 2-mi Namminersornerullutik Oqartussat tassaanerarneqarput Kalaallit nunaanni qinikkat Landstinnimik taaneqartut qullersaqarfiullu landstyrimit qullersaaffigineqartoq.
Inatsisartut Inatsiseqarnermut Ataatsimititaliaat isumaqarpoq namminersornerulerneq pillugu inatsit taamaallaat imatut paasineqarsinnaasoq Kalaallit Nunaata nunanut allanut isumaqatissutitigut pisussaaffinnik allanngortitsinerit Inatsisartunut tamarmiusunut oqaaseqarfigisassanngorlugit saqqummiunneqartassallutik.
Paasinneriaatsit allat suulluunniit tamarmik Inatsisartut Naalakkersuisullu avissaartinneqarnerat sioqqullugu periaatsinik atuuttunik tunngaveqarsimassapput.
Taamaammat Inatsisartut Inatsiseqarnermut Ataatsimiititaliaata inassutigissavaa Kalaallit Nunaata nunanut allanut isumaqatigiissutitigut pisussaaffinnik allanngortitsisoqartassanngitsoq suliaq Inatsisartunut tamarmiusunut saqqummiunneqaqqaartinnagu.
Taamatut oqaaseqarlunga Inatsisartut Inatsiseqarnermut Ataatsimiititaliaata isumaliuutissiissutaa maanna Inatsisartunut suliassanngortippara.
Jonathan Motzfeldt, Naalakkersuisut Siulittaasuat:
Naalakkersuisut sinnerlugit Inatsiseqarnermut Ataatsimiititaliaq isumaliutissiissutaanut taamatullu aamma pissutsit Ombudsmandip suliaanut tunngasut pillugit nalunaaruteqarneranut qutsavigerusuppara.
Aallarniutigalugu oqaatigissavara naalakkersuisut ukiup ingerlanerani Inatsisartut Ombudsmandiannit arlaleriarlutik saaffigineqartarsimammata. Ombudsmandi allaffissornikkut kukkunernik ersarivissunik imaluunniit suliassat sivisuallaamik suliarineqarnerinik uparuaagaangat, naalakkersuisut tamanna tusaatissatut tigusarpaat pissutsillu iluarsisarlugit.
Inissiaatileqatigiiffik INI pillugu nalunaarummut ataatsimiititaliap oqaaseqaatai pissutigalugit allaffeqarfiga qinnuigivara suliassaq misissoqqullugu, tamatumanilu Inissiaatileqatigiiffik INI Ombudsmandilu peqataatinneqaqqullugit.
Allaffissornikkut aalajangersakkanik aalajangersaasarnermut atatillugu Ombudsmandeqarfiup tusarniaavigineqartarnissaanik ataatsimiititaliap inassuteqaataanut tunngatillugu, nalunaarutigissavara taamatut tusarniaasarnissaq qularnaarniarneqarmat Inatsisitigut maleruaqqusaliornermut Ilitsersuummi, ukiap ingerlanerani saqqummersinneqartussami, pinngitsoorani tusarniaasarnissamik Inatsisileriffiup ilanngussineratigut.
Nunat assigiinngitsut akornanni isumaqatigiissutit, konventionit traktatilllu, pillugit ataatsimiititaliap oqaaseqaataanut tunngatillugu, oqaatigissavara ataatsimiitaliaq ilumoormat, suleriaaseq taamatut isumaqatigiissuteqarnerni ilaatigut atorneqartarsimasoq aallaaveqarmat Inatsisartut Naalakkersuisullu avissaartinneqanngikkallarmatali periaatsinik, taamaattumillu oqaluttuarisaanermik pissuteqarluni.
Erseqqissassavarali qaqutigorsuaannaq Naalakkersuisut Inatsisartut oqaaseqaqqaartinnagit nunarput isumaqatigiissummut ilaatinneqassanersoq saaffiginnissutinut akissuteqartarmata. Saaffiginnissutit nunatsinnut tunngasut tamarluinnangajammik Inatsisartunut saqqummiunneqartarput.
Piffissaq manna iluatsillugu suliassanik ataasiakkaanik, naalakkersuisunit Inatsisartunut saqqummiuteqqaarnagit akineqarsimasunik, taasaqalaassaanga.
Isumaqatigiissut suliassamut, sorsunneq nunalluunnit tamalaat akornanni aaqqiagiinngissuteqartoqarnera pissutigalugit tuaviortumik suliarineqartariaqartumut, tunngagaangat, nunarsuarmioqatigiillu aalajangersimagaangata nunamut pineqartumut arlaatigut akornusersuuteqarniarlutik, naalakkersuisut danskit naalakkersuisuisa saaffiginnissutaannut akissutigisarpaat nunarput immikkut oqaaseqaatissaqanngitsoq isumaqatigiissut aamma nunatsinnut atuutissappat.
Tamatumani suliassat makku pineqarput: 1992-imi Libeamut Liberiamullu, 1993-imi Serbiamut Montenegromullu, kiisalu 1994-imi Rwandamut Irakkimullu akornusersuutit.
Taakkunani tamani isumaqatigiissutit nunatsinnut toqqannartumik sunniuteqarsimanngillat.
Pisuni allani, soorlu isumaqatigiissummut ilanngussami allannguisoqartillugu, naalakkersuisut saaffiginnissutit akisarsimavaat, tamatumalu kingorna inatsisartut ataatsimiititaliaat susassaqartoq ilisimatillugu.
Suleriaaseq tamanna atoqqinniarneqanngilaq.
Naalakkersuisut soorunami ataatsimiititaliaq isumaqatigaat Namminersornerulerneq pillugu inatsimmi ' 13-imi allassimasup, tassa Anaalagaaffiit akunnerminni isumaqatigiissutaat folketingip akuersinissaannik piumasaqarfiusut kalaallillu soqutigisaannut attuumalluinnartut isumaqataaffigineqannginnerini namminersornerullutik oqartussanut oqaaseqarfigeqqullugit saqqummiunneqartassapput@ ima paasineqartariaqarneranik, taakku aamma Inatsisartunut oqaaseqarfigisassanngorlugit saqqummiunneqassasut.
Taamatut oqaaseqarlunga naalakkersuisut sinnerlugit Inatsiseqarnermut Ataatsimiititaliap isumaliutissiissutaa tusaatissatut tiguara.
Niels MátâK, Siumup oqaaseqartua:
Inatsisartut Inatsiseqarnermut ataatsimiititaliaata isumaliutissiissutaa Siumumiit misissuataarparput, imatullu oqaaseqarfiginiarparparput.
Inatsiseqarnermut ataatsimiititaliap inatsisartut Ombudsmandiannut suleqatigiinnissamik isumaqatigiissuteqarmat, suliassaqarfiit taakku marluk akornanni erseqqinnerusumik malittarineqartussamik Siumumiit iluarisimaarparput.
Inatsisartut Inatsiseqarnermut ataatsimiititaliaata isumaliutissiissummini ilanngullugu saqqummiuppaa, inatsisartut ombudsmandiata suliassaminik ingerlatsisinnaanngikkallarnerani Ombudsmandiugallartussaq, Folketingip ombudsmandia, ukioq ataatsimiititaliamut saaffiginittoq, suliakkerneqarnerminut tunngatillugu ajornartorsiutip suussusianik paasiniaanerminut tunngasunik Allakkatigut saaffiginnissuteqarsimavoq. Suliassap aalajangersimasup suliarinissaanut Ombudsmandiugallartup paasissutissanik atugassaminik pissarsiniarnera malinneqarsimanngitsoq.
Tamakku tunngavigalugit Naalakkersuisoq suliaminut akisussaasoq kiisalu Naalakkersuisut siulittaasuat, Inatsiseqarnermut ataatsimiititaliap isumasioqatigisimavai. Ataatsimiititaliap isumaliutissiissutaani oqaatigineqarpoq naalakkersuisut siulittaasuat pineqartunut suliassanik paamaarussisimanernut utoqqatsissuteqartoq erseqqissarsimallugulu Ombudsmandiugallartup saaffiginnissutai tamarmik maannakkumiit ingerlaannartumik akineqartassasut.
Siumumiit Inatsiseqarnermut ataatsimiititaliaq isumaqatigaarput oqarmat inatsisartut Ombudsmandiat pillugu inatsisartut inatsisaanni ' 11-mi allassimasoq malillugu Inatsisartunut Naalakkersuisunullu nalunaaruteqartassasoq.
Inatsiseqarnermut ataatsimiititaliap isumaliutissiissummini oqaatigivaa aalajangersagaq taanna tunngavigalugu inatsisartut Ombudsmandiat inatsisartut inatsiseqarnermut ataatsimiititaliaannut saaffiginnissuteqarsimasoq A/S Inissiaatileqatigiiffik, paasitinneqarsinnaatitaanerlu pillugit Namminersornerullutik Oqartussat nalunaarutaat nr. 37, 19. December 1996-meersoq pillugu. Inatsiseqarnermut ataatsimiititaliap erseqqissumik taava nalunaarut taanna tunngavigalugu Inatsisartut Ombudsmandiata piginnaatitaaffiisa annertusineqarnerat, suliffeqarfinnilu pisortat ingerlatsinerannut ilaatinneqarsinnaanngitsut atuuttussanngortillugit.
Siumumiit Inatsiseqarnermut ataatsimiititaliaq isumaqatigaarput ajuusaarutigimmagu Ombudsmandeqarfik kiisalu inissiaatileqatigiiffik nalunaarutip siuliani taaneqartup atuutilerneranik toqqaannartumik ilisimatinneqarsimanngimmata.
Inatsiseqarnermut ataatsimiititaliaq isumaqatigaarput inassuteqarmat Ombudsmandeqarfik allaffissornikkut aalajangersakkanik tusarniaavigineqartassasoq taamaalilluni piginnaatitaaffiisa annertussusii ersersinneqartassammata.
Siumumiit Inatsisartut Inatsiseqarnermut ataatsimiititaliaata naammagisimaarinninnera isumaqatigaarput.
Kiisalu Inatsiseqarnermut ataatsimiititaliap isumaliutissiissummini ilanngullugu taavaa nunanut allanut isumaqatigiissuteqartarnermut atatillugu Inatsisartut oqartussaaqataaffeqarnerat.
Inatsisartut Inatsiseqarnermut ataatsimiititaliaata oqallinnerannut pissutaasimasoq Naalakkersuisut arlaleriarlutik suliaq inatsisartunut saqqummiuteqqaarnagu Inatsisartut nunanut allanut isumaqatigiissuteqarnikkut pisussaafilertarsimammatigit.
Inatsiseqarnermut ataatsimiititaliap isumaliutissiissutaani aamma oqaatigineqartoq inatsisit malillugit ingerlaaseqarnissaq Siumumiit isumaqatigaarput. Tassami namminersornerulerneq pillugu inatsimmi ' 13-mi piumasaqaataavoq nunanut allanut isumaqatigiissut Folketingip akuersisimanissaanik piumasaqaatitaqarmat.
Siumumiit taama oqaaseqarluta Inatsiseqarnermut ataatsimiititaliap isumaliutissiissutaa tusaatissatut tiguarput.
Anders Nilsson, Atassutip
oqaaseqartua:
Tassa Atassumminngaaniit
isumaliutissiissut tusaatissatut tiguarput. Aammalu Naalakkersuisut
siulittaasuata akissutaa naammagisimaarlugu tusaatissatut tigullugu.
Johan Lund Olsen, IA-p oqaaseqartua:
IA Inatsiseqarnermut
ataatsimiititaliap isumaliutissiissutaa ersarissoq ataatsimut isigalugu
iluarisimaarparput taamaattumillu imaattunik pingaartitatsinnik aamma
oqaaseqarfigitsiarniarlutigu.
Sulianut Ombudsmandimut
suliassanngortinneqarsimasunut atattillugu Naalakkersuisut pisariaqanngitsumik
paamaarussivallaaleraangamik pissusissamisoorpoq Inatsiseqarnermut Ataatsimiititaliaq
pissutsit isorinartut iluarsineqaqqullugit Naalakkersuisunut
uparuaateqaraangamik. Tamanna isumaliutissiissut aqqutigalugu maanna
pisariaqalersimavoq, ukiup ingerlanerani Ombudsmanditta taartigisartagaaniit,
tassalu Folketingip Ombudsmandianit ilisimatinneqaratta, allaat
Naalakkersuisunut saaffiginnissutaasarsimasut akineqartarsimanngitsulluunniit,
aatsaalli Inatsiseqarnermut Ataatsimiititaliaq akulerutitinneqarmat
Naalakkersuisunit qisuariarfigineqarmata.
Innuttaasunut pisortanit
eqqunngitsumik pineqarsorisunut Ombudsmandeqarfiup tutsuiginartumik tatiginartumillu
sulisariaqarnissaa pingaaruteqarluinnartuummat taamaattunik IA neriutigilluinnarparput
matuma kingorna taamatut pisoqaqqissanngitsoq. Maluginiarparpullu Naalakkersuisut
tamanna eqqortinniassallugu maanna aamma neriorsuuteqarmata.
Nunat assigiinngitsut akornanni
isumaqatigiissutit, konventionit traktat-illu nunatsinnut attuumassuteqassagaangata
imaluunniit sunniuteqassangatinneqaraangata soorunalumi Inatsisartunut
tamarmiusunut isummersorfigisassanngorlugit saqqummiunneqaqqaartassammata IA
isumaqarpugut. Naammaginngilarput nunatta nunanut allanut
isumaqatigiissutikkut pituttorneqaatigisassaminik inatsisartut
ataatsimiititaliaat susassaqartoq arlaat aqqutigiinnarlugu Inatsisartut Naalakkersuisunit
ilisimatinneqaannartassappata, maluginiarparpullu periaaseq tamanna qimanniassallugu
Naalakkersuisunit maanna ammaffigineqarluinnarmat.
Soorunami Naalakkersuisut
siulittaasuata assersuuteqarluni taasaattut pisoqartillugu, tassalu
sorsuttoqaleriataartillugu tuaviortumik Naalakkersuisut qanoq
iliuuseqarsinnaatitaasariaqassapput. Taamatulli pisoqassatillugu suna
ajornarami Inatsisartut Nunanut Allanut Sillimaniarnermullu
Ataatsimiititaliaat aamma isumasiorneqaqqaartuuppat ukiuni makkunani
teknik-ikkut aamma stotorissaarfioreeqisuni avatangiiseqartilluta?
Suliassalli allat eqqarsaatigalugit
aalajangiusimalluinnartariaqarparput Inatsisartut tamarmiusut
isumasiorneqaqqaartassammata. Inatsiseqarnermut Ataatsimiititaliap
isumaliutissiissutimini uparuagaat nunat assigiinngitsut sorsuleqqajaanerannut
allatigulluunniit aaqqiagiinngissuteqarnerannut attuumassuteqanngivippoq,
Inatsisartulli tamarmiusut susassaqarfigisaannut tunngasuulluni.
Kingusiinnakkummi paasitinneqarpugut Naalakkersuisut Inatsissartut tamarmiusut
sinnerlugit Londonkonvention-imut peqataaffigeriikkatsinnut- tassalu imaani
eqqakkanik kiversaasarnermut, akuutissanik ulorianartunik eqqaasarnermut
imaanilu ikuallaasarnermut nunat tamalaat isumaqatigiissutigisaannut-
sukaterneqartussamili immikkut piumasaqaatitaqanngitsumik ilaaginnassasugut,
taamaalillunilu eqqaasarneq eqqarsaatigalugu imartatsinni
sukatiterinngitsoortoqalissalluni.
Ninatta imartaani kilisaassuarnit
umiarsuarniillu allanit eqqaasoqartarnera isumaqatiginanngeqisoq
eqqarsaatigiinnaraanni kialuunniit takusinnaareerpaa Inatsisartut apeqqutit
tamakkorpiaat aamma susassaqarfigilluinnarmatigit
isummersorfigisariaqarlugillu- asuli Naalakkersuisunit
ilisimatinneqapalaaginnaratik.
Isumaliutissiissummi
Inatsiseqarnermut Ataatsimiititaliap erseqqissarpaa Namminersornerulersimanerput
pillugu Inatsit aamma Naalakkersuisunit malinneqartassasoq. IA tamanna eqqaasitsissutigiutigalugu
taamaattumik uteqqissavarput Nunarput nunanut allanut isumaqatigiissutitigut
pisussaaffilersorneqarsinnaanngimmat Inatsisartut tamarmiusut
saqqummiussivigeqqaartinnagit aammalu isummersorteqqaartinnagit.
AMeeqqanik nuna
ineriartortinneqassaaq@
ataatsimiinnermi matumani eqqartorneqartut ilagivaat. Nunani demokrati
toqqammavigalugu ingerlatsiviusuni ANuna inatsisinik toqqammavilerneqassasoq@ tamanit akuerisaalluni aamma siunnerfiuvoq.
Maani Nunatsinni imaaleqqunanngeqaaq: AInatsisit inatsisaapput inatsisillu
unioqqutinneqassaapput@
!
Taamatullu oqaaseqarluta IA
Inatsiseqarnermut Ataatsimiititaliap isumaliutissiissutaa iluarisimaarparput.
Bjarne Kreutzmann, AP:
Inatsisartut Inatsiseqarnermut
Ataatsimitiitaliaata isumaliutissiissutaa misissuataareerlugu paasisinnaavara,
Namminersorneruneq pillugu inatsit taamaallaat imatut paasineqarsinnaasoq,
tassa Kalaallit Nunaata nunanut allanut isumaqatigiissutitigut pisussaaffiinik
allanngortitisoqartassanngitsoq suliaq Inatsisartunut tamarmiusunut
saqqummiunneqaqqaartinnagu.
Taamaalillunga sulaiq Inatsisartunut
tamarmiusunut saqqummiunneqaqqaartinnagu Kalaallit Nunaata nunanut allanut
isumaqatigiissutitigut pisussaaffiinik allanngortitsisoqartannginnissaanik
Inatsiseqarnermut Ataatsimiititaliap inassutaa tamakkiisumik taperserpara.
Taama naatsumik oqaaseqarlunga
Inatsiseqarnermut Ataatsimiititaliap isumaliutissiissutaa, taamatullu aamma
pissutsit allat isumaliutissiissummi eqqartorneqartut tusaatissatut tiguakka.
Anthon Frederiksen, Kattusseqatigiit:
Inatsiseqarnermut Ataatsimiititaliap
isumaliutissiissutaa soqutigalugu Kattusseqatigiit sinnerlugit misissorsimavara,
imatullu oqaaseqarfigissallugu.
Kattusseqatigiinniik pakatsissutigaara
Inatsisartut Ombudsmandiat suliassaminik ingerlatsisinnaanngikkarlarnerani
Ombudsmandiugallartussap, tassalu Folketingip Ombudsmandiata Naalakkersuisunut
qaammatit arfineq pingasulli 12. Marts 1998 sioqqullugu saaffiginnissutaa suli
akineqarsimanngimmat.
Suliat patsiseqanngiusattumik taamatut
kinguarsarneqarsinnaanerisa siunissami pinngitsoortinneqarnissaat siunertaralugu Kattusseqatigiinniit
kaammattuutigissavarput, suliat ingerlareersut kinguarsannginneqarnissaat
Naalakkersuisut eqqumaffiginerusariaqaraat.
Kattusseqatigiinniillu nuannaarutigaara
Inatsissartut Ombudsmandiata A/S Inissiaatileqatigiiffimmi INI-imi
suliarineqartut pillugit, Ombudsmandip piginnaatitaaffiisa annertusineqarsimanerat.
Kisiannili Ombudsmandip nammineerluni Inatsisartut Inatsiseqarnermut
Ataatsimiititaliamut tamanna pillugu saaffiginneqqaartariaqarsimanera
iluarinartinngilarput, tassami naatsorsuutigisariaqaraluarmat Naalakkersuisut
nalunaarusiornermikkut suliami susassaqartut tamaasa
ilisimatittariaqaraluaraat.
Aammalu nalunaarusiap pineqartup
Ombudsmandip suliassaqarfinni amerlaqisuni piginnaatitaaffiisa
ersarissarneqarsimannginnerat suliamik suusupaginninnertut Kattusseqatigiinniit
nalilertariaqarsoraara. Tassami nunatsinni Inatsisartut Ombudsmandiat
atulersinneqarmat, iInatsisartuni tamakkerluta aamma Naalakkersuisuniit
sulilluarnissaanik kissaassimavarput, taamaattumik sulinermini inatsisitigut
malittarisassatigullu pitsaasunik tunngaveqarluni sulinissaa
Naalakkersuisuniit aamma eqqumaffigineqarnerusariaqarpoq.
Kiisalu Kattusseqatigiinniit
apeqqutigerusuppara 1996-imi junip 27-ani Aalisarnermut, Piniarnermut
Nunalerinermullu Naalakkersuisoqarfiup tuttut eqqissisimatitaasarnerat
piniagaanerallu pillugit inatsisitigut tunngavissaqanngitsumik
nalunaarusiorsimanera, ilaatigut atuisunik aamma annertuumik
qisuariaateqarfiusoq, qanoq nalilertariaqarnersoq?
Naalakkersuisummi tamarmik immikkut
suliaminnut akisussaassuseqarput, tamannalu pillugu aamma Inatsisartut
inatsiseqarlutik.
Naggataatigullu nuannaarutigaara
Inatsisartut Inatsiseqarnermut Ataatsimiititaliaata, Naalakkersuisunut
piumasarimmagu Kalaallit Nunaata nunanut allanut isumaqatigiissutitigut
pisussaaffii pillugit suliassat tamarmik inatsisartunut
saqqummiunneqaqqaartarnissaat.
Taamatut oqaaseqarlunga isumaliutissiissut
akuersaarlugu tiguara.
Jonathan Motzfeldt, Naalakkersuisut
Siulittaasuat:
Partiinit oqaaserineqartut
qujassutigaakka, aammalu paasigakku maannamut ataatsimiititaliap
innersuussutigisimasagut suliarisimasagullu aamma paasilluarlugit aamma
tigugai.
Taavalu aamma oqaatigissavara
Ombudsmandimut allakkat, soorunami taakkua kinguartooruteqarsimanerat
nassuiaatissaqarpoq kisiannili taanna uanga paasigakku piaartumik suliassaq
aamma ingerlatissimavara. Tamannalu aamma pissusisamisut maannakkut
suliarineqarpoq.
Taavalu oqaatigissavara
Kattusseqatigiinnut tuttut pillugit iliuusaasoq. Taanna oqaatigineqarpoq
taamatut assuarlerneq angingaartoq tunngavigalugu, taava aaqqinniarneqarsimasoq
naleqqussarneqarlunilu naammagittaalliutit taakkua najoqqutaralugit
aaqqiissutissanik bekendtgĝrelse-kkut taanna aaqqinniarneqarluni.
Taama oqaaseqarlunga qujassutigaara maani oqaaserineqartut
tamaasa.
Otto Steenholdt, Ataatsimiititaliap siulittaasua:.
Inatsisartut Inatsiseqarnermut ataatsimiititaliaat sinnerlugu Inatsiseqarnermut ataatsimiititaliap isumaliutissiissutaanut partiit Naalakkersuisullu oqaaseqaataat pillugit qutsaviginiarpakka.
Nuannaarutigaara marloqiusamik piginnaatitsinermut atatillugu Kalaallit Nunaata nunanut allanut isumaqatigiissutitigut piginnaatitaanera pillugu Inatsiseqarnermut ataatsimiititaliap paasinninnera Naalakkersuisunit isumaqatigineqarmat. Taamaalilluni Kalaallit Nunaata isumaqatigiissutitigut pisussaaffii siunissami Inatsisartunut saqqummiunneqartalissapput oqaaseqarfigisassanngorlugit.
Ingerlatsinikkut aalajangersakkani atortuulersitsinermi pinngitsoorani Ombudsmandip tusarniarneqartarnissaa pillugu Naalakkersuisut oqaaseqaataasa apeqqut taanna pillugu Inatsiseqarnermut ataatsimiititaliap paasinninnera pillugu erseqqissaateqarnissara pisariaqalersippaa.
Inatsiseqarnermut ataatsimiititaliap pisariaqartuusorinngilaa Ombudsmandip ingerlatsinikkut malittarisassanik aalajangersaanermi pinngitsoorani tusarniaavigineqartarnissaa. Tamanna Ombudsmandip inatsisinik atortitsisunut, tassa Naalakkersuisunut qilersorsimanani, ingerlanissaanut naapertuutinngimmat.
Illuatungaatigulli
Namminersornerullutik Oqartussanik pigineqartunut A/S-inut allanullu atuuttussanik
allaffissornikkut ingerlatsinermi inatsisissap atortuulersinneqarnissaanut
tunngatillugu Ombudsmandeqarfiup tusarniarneqartarnissaa tulluartuuvoq.
Taamatut tusarniaaneq allaffissornikkut suliassat pillugit inatsisip aammalu
pisortat ingerlatsinerat pillugu inatsisip qanoq atortuulersinneqartussat
erseqqitsigisumik nassuiarneqarsimanerannut tunngassuteqartariaqarpoq.
Taamaalilluni suliffeqarfimmik Ombudsmandip nakkutilliisussaanera ingerlanneqarsinnaaniassammat.
Illuatungaatigulli Inatsiseqarnermut ataatsimiititaliaq isumaqarpoq
Ombudsmandip piginnaatinneqarnerata qanoq annertuginissaa pillugu Ombudsmandi
tusarniaavigisariaqanngitsoq. Tassa
A/S-it allallu suliarineqarnerannik pisortat ingerlatsinerat pillugu
inatsiseqarneq naapertorlugu sulissuteqarnermi.
Ataatsimiititaliap saqqummiussaanut
partiit Kattusseqatigiillu tapersersuillutik ersarissumik oqarnerat
ataatsimiititaliaq sinnerlugu qutsavigiumavakka.
Jonathan Motzfeldt, Naalakkersuisut
Siulittaasuat:
Ombudsmandip sulinera
Naalakkersuisuninngaaniit aatsaat akuleruffigineqarsinnaavoq suliassaq
Naalakkersuisunut annguttoq Ombudsmandimut attuumassuteqarpat. Taamaattumik taamaalillugu
aatsaat saaffigineqarsinnaavoq, kisianni Ombudsmandi sukkulluunniit qanoq
ilisukkulluunniit aamma sulinera Naalakkersuisuninngaaniit
akuleruffigisassarinngilarput. Aatsaat suliani uagutsinnut tunngasuni
attuumassuteqaraangat, taava saafigineqarsinnaavoq. Taamaattumik tassuuna aamma immikkut ataqqinninneq
atorfianut aammalu suliassaanut killiliisimaneq najoqqutaralugu maanaannakkut
sukkulluunniit akuleruffigisinnaanngilarput.
Anders Andreassen, Ataatsimiinnermik
aqutsisoq:
Taamaallilluni imm. 58,
Inatsiseqarnermut Ataatsimiititaliap isumaliutissiissutaa oqaluuserineqarnera
tamaanga killeqarpoq, aammalu akuerineqarluni.
Oqaluuserisaq naammassivoq.