Kalaallit Nunaanni Inatsisartut

Oqaluuserisassani immikkoortoq 60		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Marlunngorneq 19. Maj 1998 nal. 20.35

 

Oqaluuserisassani immikkoortoq 60

 

Akileraarnermut Ataatsimiititaliap isumaliutissiissutaa

(Akileraarnermut Ataatsimiititaliap siulittaasua)

 

 

 

Ataatsimiinnermik aqutsisoq: Inatsisartut Siulittaasuat Anders Andreassen.

 

Knud Sørensen, Ataatsimiititaliap siulittaasuata tullia, Atassut:

Ataatsimiititaliap siulittaasua, Karl Lyberth (S), maani najuussinnaanngikkallarmat akuersivu-nga Inatsisartut Akileraarnermut Ataatsimiititaliap isumaliutissiissutaa saqqummiutissallugu.

 

Ataatsimiititaliami ilaasortaapput Inatsisartunut ilaasortaq Karl Lyberth (S) siulittaasuusoq, Inatsisartunut ilaasortaq Laannguaq Lynge (S), Inatsisartunut ilaasortaq Siverth K. Heilmann (A), Inatsisartunut ilaasortaq Knud Sørensen (A) kiisalu Inatsisartunut ilaasortaq Manasse Berthelsen (IA).

 

Inatsisartut Akileraarnermut Ataatsimiititaliaata Inatsisartunut ilaasortap Karl Lyberth-ip, akileraarutit kommunit akornanni aguuaanneqartartut nutaamik nalilersorneqarnissaanik siun­nersuutaa suliaraa.

 

Ataatsimiititaliap sulineranik atugassanik Aningaasaqarnermut Ineqarnermullu Naalakkersuiso­qarfimmiit paasissutissanik pissarsiniartoqarpoq. Taakkunani takuneqarsinnaavoq suleqatigiisi­taliortoqarsimasoq KANUKOKA-meersunik Naalakkersuisoqarfimmeersunillu ilaasortalimmik. Kommunenut ataatsimoortumik tapiissutit pillugit maleruagassat kiisalu kommuneni akileraaru­tinik naligiissaasarneq pillugu maleruagassat iluarsartuuteqqinneqarnissaannut siunnersuusior­nissaq siunertaralugu.

 

Inatsisartut Akileraarnermut Ataatsimiititaliaata tamatumunnga iluarisimaarinninnini oqaatigisi­mavaa Naalakkersuisunullu inassutigissallugu Akileraarnermut Ataatsimiititaliaq suleqatigiissi­tap naammassisai pillugit ilisimatitsisuteqarfigineqartassasoq.

 

Kiisalu Inatsisartut Akileraarnermut Ataatsimiititaliaata Inatsisartunut ilaasortap Anders Nilsson-ip, nersutit timaasa ilivitsut eqqunneqarnerannik akitsuusiuttakkat peerneqarnissaanut siunnersuutaa suliaraa.

 

Inatsisartut Akileraarnermut Ataatsimiititaliaat suliassaqartitsiniarnermik pissuteqartumik siunnersuummik tunngaviatigut isumaqataavoq. Nunatsinnilu namminermi savaaqqanik tunisas­siornerup isiginiarneqarnissaa eqqarsaatigalugu isumaqarluni savaaqqat neqaannut akitsuut attatiinnartariaqartoq. Inatsisartut Akileraarnermut Ataatsimiititaliap isumaqarpoq nersutit timaannut ilivitsunut akitsuutit appartinneqarneratigut peerneqarneratigulluunniit tunisassiassa­nik tunisassiassanik ataavarnerusunik pissarsisoqarsinnaalerneranik.

 

Taamalu NEQI A/S-mi ataavarnerusumik suliassaqartitsisoqalernera qularnaarneqarsinnaasut. Ataatsimiititaliaq isumaqarportaaq siunnersuutikkut suliassaqartitsineq ataatsimut isigalugu siuarsarneqarsinnaassagunartoq.

 

Taamatuttaaq Aningaasaqarnermut Ineqarnermullu Naalakkersuisoqarfiup ataatsimiititaliamut erseqqissarpaa imaluunniit ersersippaa aammattaaq Naalakkersuisut siunnersuutip naammassi­neqarnissaanut peqataarusussinnaasut.

 

Taamaakkaluartoq Inatsisartut Akileraarnermut Ataatsimiititaliaa isumaqarpoq Inatsissartut aalajangivitsinnagit siunnersuutip sunniutigisinnaasai erseqqinnerusumik misissuiffigineqartari­aqartut.

 

Taamaammallu inassutigissallugu Inatsisartut 1998-imi ukiakkut ataatsimiinnissaanik Naalak­kersuisut Inatsisartut Akileraarnermut Ataatsimiititaliaannut siunnersuutip piviusunngortinne­qarsinnaaneranut periarfissat sunniutaasussallu pillugit nassuiaateqassasut.

 

Daniel Skifte, Aningaasaqarnermut Ineqarnermullu Naalakkersuisoq:

Kommunenut akileraarutinut naligiissaasarnermi maleruagassat nutaamik naliliiffigineqarnis­saannik Inatsisartunut ilaasortap Karl Lyberth-ip siunnersuutaanik, aammalu nersutit neqaasa ilivitsut eqqussuinermi akitsuutaasa peerneqarnissaannik Inatsisartunut ilaasortap Anders Nilsson-ip siunnersuutaanik, Akileraarnermut Ataatsimiititaliap saqqummiussinera pillugu soorlu tamanna ataatsimiititaliap isumaliutissiissutaani takuneqarsinnaasoq Naalakkersuisut sinnerlugit naammagisimaaginninnera oqaatigissavara.

 

Soorlu Akileraarnermut Ataatsimiititaliamut oqaatigineqareersoq Naalakkersuisut neriuutigaat ataatsimoorluni tapiissutit akileraarutinillu naligiissaarutit naatsorsorneqartarneranik periaasis­samut nutaamut siunnersuutissap 1998-imi september-ip qaamataani borgmester-it kommunaldirektør-illu ataatsimiinnissaanni oqalligisassanngorlugu naammassineqarsinissaa. Tassani oqallisigineqareeruni Naalakkersuisunit KANUKOKA-millu suliarineqarlunilu akuer­sissutigineqarnissaa siunertaralugu. Taamaalilluni nutaamik periaasissaq ukioq 2000-imi 1. Januar aallarnerfigalugu atuutilertussanngortilluni.

 

Suleqatigiisitaliap angusai pillugit Akileraarnermut Ataatsimiititaliap ilisimatinneqartarnissaa Naalakkersuisut isumagiumaarpaat.

 

Nunatsinni savaaqqanik tunisassiorneq illersorniarlugu, savaaqqat neqaasa eqqussorneqartut akitsuutaasa allanngortinnagit atortiinnarneqarnissaanik Akileraarnermut Ataatsimiititaliap isumaa Naalakkersuisunit isumaqatigineqarpoq. Aammattaaq soorlu Akileraarnermut Ataatsi­miititaliamut oqaatigineqareersoq nersussuit puulukit il. il. neqaasa ilivitsut suliffeqarfinnit neqinik agguinissamut akuerisaasunik atortorissaarutilinnit eqqussorneqartut akitsuutaasa peerneqarnerisigut suliffissanik ataavartunik pilersitsisinnaaneq, taamak iliornerullu niuertarfin­ni akit apparnissaannut sunniuteqaqataasinnaanera Naalakkresuisut misissoqqissaarniarpaat.

 

Taamaattumik misissuinissamut suleqatigiissitaliamik Aalisarnermut, Piniarnermut, Inuussutis­sarsiornermut Nunalerinermullu Pisortaqarfimmit aqunneqartumik Naalakkersuisut pilersitsini­arput, taassuma suliarissallugu nersutip neqaasa nunatsinni aggorneqartalernerisigut suliffissa­nik ataavartunik pilersitsilersinnaanermik kiisalu taamatut agguisarnissap kingunerisaanik neqit il. il. aggukkat niuertarfinni akiisa qanoq sunnerneqarsinnaanerinik nalilersuinissaq.

 

Aammattaaq suleqatigiisitap misissussavaa akitsuuteqartitsinnginnissaq neqinit tunisassianik nunatsinneersunik atuinermut akornutaasinnaasunik akitigut qanoq sunniuteqassanersoq.

 

Suleqatigiisitaliap paasisamigut tamanna ilalernartissappagu suliffeqarfiit neqinik agguisarnis­samut akuerisaasunik atortorissaarutillit nersutit neqaasa ilivitsut eqqussugaasa, savaaqqalli neqai ilivitsut pinnagit, akitsuuteqartinnginnissaannik 1998-imi ukiakkut ataatsimiinnissamut Naalakkersuisut siunnersuummik saqqummiussiniarput.

 

Laannguaq Lynge, Siumup oqaaseqartua:

Akileraartarnermi Ataatsimiititaliami Inatsisartuni ilaasortap Karl Lyberthip akileraarutit kom­munit akornanni agguaanneqartartut nutaamik nalilersorneqarnissaanik siunnersuuteqarsi­ma­neranut atatillugu ilisimatinneqarsimanera Siumumi tusaatissatut tiguarput. Suleqatigiiisi­taq sulitinneqalereersimasoq aamma KANUKOKA-mit peqataaffigineqartoq akileraarutinik nali­giissaarisarneq pillugu maleruagassanik iluarsartuussinissamik siunnersuuteqartussaq saqqum­miussereerpat Siumumiit suleqataaffigissallugu piareersimaffigaarput.

 

Inatsisartunut ilaasortap Anders Nilssonip nersutit timaasa ilivitsut eqqunneqarneranni akitsuu­siuttakkap peerneqarnissaanik siunnersuutaata Ataatsimiititaliami ilalerneqarnera Siumumiit taperserparput. Savaaqqap neqaanik tunisassiornerup immikkut isiginiarneqarluni akitsuutitigut allannguiffigineqannginnissaanik ataatsimiititaliap isummersimanera aammat­taaq isumaqati­gaarput.

 

Siumumi qularutiginngilarput siunnersuut suliffissaqartitsinerup ataavartuutinniarneqarnera­nut iluaqutaalluarsinnaassasoq.Taamaakkaluartoq Ataatsimiititaliap aalajangiivinnginnermi sunniu­tissaanik assigiinngitsunik misissueqqusinera aamma Siumumi paasilluarsinnaavarput. Ukia­mullu Inatsisartut ataatsimiinnissaannut Naalakkersuisut suleqatigiissitaliaata assiigiinn­gitsuti­gut sunniutigisinnaasaanik misissuereernerata kingorna Naalakkersuisut saqqummiussi­niarmata Siumumiit iluarisimaarparput.

 

Taama oqaaseqarluta Akileraartarnermut Ataatsimiititaliap isumaliutissiissutaa tassungalu Naalakkersuisut akissuteqaataat Siumumi tusaatissatut tiguavut.

 

Knud Sørensen, Atassutip oqaaseqartua:

Atassut-mit isumaliutissiissut peqataaffigisimavarput taamaattumik takisuuliorfigina­gu oqaati­gissavarput, Inatsisartunut ilaasortap Karl Lyberth-ip akileraarutit kommunit akornanni agguar­neqartarnerisa nutaamik nalilersorneqarnissaannik imaqartoq soqutigi­nartikkatsigu.

 

Atassut-mit ilisimavarput agguaariaaseq, maannakkut atuuttoq, ukiorpanni allanngortinnagu ingerlanneqar­mat, periarfissarlu atorlugu allanngortitsinissaq maannakkut piaarpallaanngitsutut oqaa-tigisariaqalermat.

 

Taamaattumik KANUKOKA-p Naalakkersuisullu akornanni suleqatigiissitamik agguaariaatsip allanngortinneqarnissaanik suliaqartussamik pilersitsisoqarsimanera ilalernar­luartutut Atassut-mit isigaarput. Tamatumuunakkut isumaqarpugut kommuninut assigiinngitsunut naammaginar­tumik agguaariaatsimik nassaartoqarumaartoq, takornartaanngimmammi kommunit akornanni pissutsit tamakku eqqartorneqartarnerat.

 

Inatsisartunut ilaasortap Anders Nilsson-ip siunnersuutaa pillugu Akileraartarnermut ataatsimii­titaliap oqaluuserinnissimanera, tassungalu tunngatillugu Aningaasaqarnermut Naalakkersuisup suliap naammassineqarnissaanut Naalakkersuisut peqataarusunnerat ersersitsinera pitsaasutut isigigaluartillugu Atassut-mit ataatsimiititaliaq isumaqati­gaarput tamatuma assigiinngitsutigut sunniutigisinnaasaasa qulaarneqarnissaat kissaatigimmagu, 1998-milu ukiakkut ataatsimiinner­mi tamanna pillugu saqqumiusseqqusim­mat.

Saqqummiussamut taamak nipeqarneranut pissutaavoq Naalakkersuisup akissutaa tigutinnagu allassimagakku, eqiasuinnermut.

 

Manasse Berthelsen, IA-p oqaaseqartua:

Akileraartarnermut Ataatsimiititaliap IA-niit imatut oqaaseqarfigissavarput.

 

Karl Lyberth-ip siunnersuutigisimasaanut Akileraartarnermut  Ataatsimiititaliap isumaliutissiis­summini akissutigisaa IA-niit naammattutut isigalugu annerusumik oqaaseqarsifigissanngilar­put.

 

Anders Nilsson-ip siunnersuutigivaa nersutit ilivitsuutillugit nunatsinnut eqqunneqartarnerini akitsuut peerneqassasoq. IA-niillu Ataatsimiititaliap tunngaviusumik isummersimanera isuma­qatigaarput.

 

IA-niittaaq Naalakkersuisup suleqatigiisitaliorniarnera ilassilluarlutigu. Suliaatalu naammasseri­arpat IA-niit suleqataassaagut, pissanganassaarmi suliffinnik imminut akilersinnaasunik pilersit­siffiusinnaassappat.

 

Naggasiullugu IA-niit oqaatigissavarput, nunatta savaaraanik avammut tunisaqartalersimaneq ingerlanneqalersimasoq nunatsinni akigitinneqartuniit qaffasinnerungaartumik akilersittarlugit. Taamaattumik IA-niit neriuutigaarput nunatsinni akitigut appaanikkut kinguneqartinneqaru­maartoq, nalunngilarpummi NEQI A/S avataaniit savaaqqanit tikisitsisarmat akitsuutitaqanngit­sunik.

 

Bjarne Kreutzmann, AP:

Siunnersuut isumaliutissiissullu misissuataareerlugit inassutigiinnassavara. Inatsisartut inaaru­taasumik aalajangiitinnagit siunnersuutip sunniutissai qulaajarneqaqqaassasut, taamatumillu inassutigissavara siunnersuut 1998-imi ukiakkut ataatsimiinnissatsinni nutaamik naliliiffigine­qassasoq.

 

Aamma taanna akissut takutinnagu sanaajuvoq.

 

Anthon Frederiksen, Kattusseqatigiit:

Inatsisartut Akileraartarnermut Ataatsimiititaliaata inassuteqaataa annerusumik oqaaseqarfigina­gu, aammalu Naalakkersuisut ukiamut saqqummiussiniarneranni tunngaveqartumik maannak­kut annerusumik oqaaseqarnanga saqqummiussat tusaatissatut tiguakka.

 

Daniel Skifte, Aningaasaqarnermut Ineqarnermullu Naalakkersuisoq:

Qujanaq, naatsunnguussaaq. Tassa Akileraartarnermut Ataatsimiititaliap inassuteqaatai aamma­lu Naalakkersuisunit isumaqatigineqartut tunngavigalugit partiit tamarmik isumaqataammata qujassutigalugu ukiaru saqqummiussinissarput siunnerfigaarput, qujanaq.

 

Anders Andreassen, Ataatsimiinnermi aqutsisoq:

Taamaalilluni ullumikkut oqaluuserisassaq imm. 60, Akileraarnermut Ataatsimiititaliap isuma­liutissiissutaa oqallisigineqarnera tamaanga killeqarpoq akuersaarneqarlunilu.

 

Oqaluuserisaq naammassivoq.