Kalaallit Nunaanni Inatsisartut

Oqaluuserisassani immikkoortoq 63		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Marlunngorneq 19. Maj 1998 nal. 20.53

 

Oqaluuserisassani immikkoortoq 63

 

Kultureqarnermut Ilinniartitaanermullu Ataatsimiititaliap isumaliutissiissutaa.

(Kultureqarnermut Ilinniartitaanermullu Ataatsimiititaliap siulittaasua)

 

 

 

Ataatsimiinnermik aqutsisoq: Inatsisartut Siulittaasuat Anders Andreassen.

 

Kristine Raahauge, Ataatsimiititaliap siulittaasua, Siumut:

Inatsissartut Kultureqarnermut Ilinniartitaanermullu Ataatsimiititaliaata naliginnaasumik isuma­liutissiissutaa.

 

Inatsissartut Kultureqarnermut Ilinniartitaanermullu Ataatsimiititaliaa ukunannga ilaasortaqar­poq. Inatsisartunut ilaasortaq Ruth Heilmann (S), Inatsisartunut ilaasortaq Knud Sørensen (A), Inatsisartunut ilaasortaq Naimanngitsoq Petersen (A), Inatsisartunut ilaasortaq Manasse Berthel­sen (IA) uangalu Inatsisartunut ilaasortaq Kristine Raahauge (S).

 

Inatsissartut Kultureqarnermut Ilinniartitaanermullu Ataatsimiititaliaa Inatsisartut 1998-imi upernaakkut ataatsimiinnerani matumani arlaleriarluni ataatsimiittarpoq. Ataatsimiititaliap Inatsisartunut ilaasortat siunnersuutaat Ataatsimiititaliamut innersuunneqarsimasut makku suliarisimavai.

 

Inatsisartunut ilaasortap Anthon Frederiksen-ip siunnersuutaa ilinniarnersiutit qaffanneqarnis­saaq pillugu siunnersuut. Inatsisartunut ilaasortap Manasse Berthelsen-ip siunnersuutaa sineris­samiit KNR-ip nutaarsiaasaqartitsinera pillugu siunnersuut.

 

Ilinniarnersiutit qaffanneqarnissaat pillugu Anthon Frederiksen-ip siunnersuutaa. Inatsissartut Kultureqarnermut Ilinniartitaanermullu Ataatsimiititaliaata siunnersuuteqartoq aggersarsimavaa, siunnersuutini pillugu annertunerusumik nassuiaateqartillugu. Tamatuma saniatigut Ataatsimii­titaliap siunnersuutigineqartup suliarineranut atatillugu Kultureqarnermut, Ilinniartitaanermut Ilageeqarnermullu Pisortaqarfimmut paasissutissanik pissarsisimavoq.

 

Pisortaqarfiup allakkatigut siunnersuutigineqartoq pillugu nassuiaateqarnerani erserpoq Kul­tureqarnermut, Ilinniartitaanermut Ilageeqarnermullu Pisortaqarfimmiit ilinniagaqartut kattuffii oqaloqatigineqalereersimasut. Taakkunannga isumaqatigiissutigineqarsimavoq inuuniarnermi atukkat pillugit misissuinerup KIK aamma DKIK aallartissimasaata inerneri utaqqineqarnissaa­nut.

 

Tamanna aamma Naalakkersuisut nalunaarutigisimavaat 1999-imut aningaasanut inatsisissatut siunnersuutip oqaluuserineqarnerani ilanngunniarlugu. Misissuineq taanna 1998-ip qiteqqun­nerani naammassineqassaaq. Ilaatigut ilinniagaqartut aningaasatigut atugarisaat pillugit misis­suineq aallaavigalugu Kultureqarnermut, Ilinniartitaanermut Ilageeqarnermullu Naalakkersuisup ilinniagaqartut kattuffiini oqaloqatiginnittarnini ingerlateqqinniarpaa. Ataatsimiititaliamit tamanna utaqqisimaarneqartussatuttaaq nalilerparput. Naalakkersuisut ilinniagaqartullu illuatun­geriittutut naammaginartumik angusaqarfiusumik oqaloqatigiinnissami matumani kissaallugit.

 

Sinerissamiit KNR nutaarsiassaqartitsinera pillugu Manasse Berthelsen-ip siunnersuutaanut Ataatsimiititaliami ilaasortaq siunnersuutaata suliarineranut atatillugu siunnersuuteqartumik Ataatsimiitaliami ilaasortamik annertunerusumik nassuiaateqartitsivoq. Tamatuma saniatigut siunnersuummut atatillugu Kultureqarnermut, Ilinniartitaanermut Ilageeqarnermullu Pisortaqar­fimmut paasissutissanik piniarsimavoq.

 

Pisortaqarfiup ilaatigut Ataatsimiititaliamut nalunaarutigaa KNR-ip najukkani radiokkut TV-kkullu aallakaatitassianik pisinissaminut aningaasat imak annertutigisut atugassarigai. 1998-imut KNR-ip TV-kkut aallakaatitassianik pisinissamut kr. 1.168.000,00-nit missingersuusiarisi­magai, taakkunanngalu ilaallutik najukkani TV-qarfinni pisineq. Aammalu kr. 400.000,00-it missaat najukkani radiokkut aallakaatitsivinnik pisinissamut, taakkunannga kr. 300.000,00-it KNR-imut namminermut aningaasaliissutaallutik sinnerilu 10%-it takoqqusaaruteqartitsinermik isertitassatut naatsorsuutigineqarlutik.

 

Nuna tamakkerlugu nutaarsiassanik assigiinngitsunik aallakaatitsisarneq eqarsaatigalu aningaa­saliissutaasimasut sapinngisamik ukioq naallugu agguataarlugit atorneqartarnissaat Ataatsimiiti­taliamit kissaatigineqarpoq. Ataatsimiititaliaq isumaqarpoq tamanna ilaatigut pisinnaasoq KNR-p sinerissamiit nutaarsiassanik aallakaatitsinissamik pilersaarusiorluarneratigut. Tamatuma saniatigut pisortaqarfiup aningaasaliissutinut immikkut nalunaaqutsersuinissap mianernartoqar­neranut erseqqissaateqarnera Ataatsimiititaliap isumaqataaffigaa. Taamaaliornikkut KNR-p aallakaatitassianik tamarmiusunik aaqqissuusisinnaaneranut akulerunnerussammat. Tamannalu tunngaviusumik isumaasunut nuna tamakkerlugu radiokkut TV-kkullu aallakaatitsisarnermi Namminersornerullutik Oqartussanit tapersersugaalluni kisermaassinermut akerliussaaq, tassa aallakaatitassiat aaqqissugaanerat Inatsisartunik Naalakkersuisunillu akuleruffiuneqartussaann­gimmata.

Ataatsimiititaliamik pisortaqarfiup nassuiaateqarnera naammagisimaarlugu naggataatigut kajumissaarutiginiarparput KNR-p eqqissilluni sulinissaanut periarfissiisoqassasoq.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Naalakkersuisut Kultureqarnermut Ilinniartitaanermullu Ataatsimiititaliap isumaliutissiissutaa­nut, ilaasortat siunnersuutaat ataasiakkaat isumaliutissiissummi pineqartut pillugit oqaatigine­qartunut imatut oqaaseqaateqassapput.

 

Aallaqqaasiullugu Ataatsimiititaliap isumaliutissiissutaanut oqaatigineqassaaq Naalakkersuisut naammagisimaarlugu paasisimammassuk ilaasortat siunnersuutaat marluk pillugit Kultureqar­nermut, Ilinniartitaanermut Ilageeqarnermullu Pisortaqarfiup allakkatigut nassuiaatai, nassiun­neqartut Ataatsimiititaliap naammagisimaarai.

 

Siunnersuummi siullermut. Ilinniagaqartut kattuffiinut, taakku inuuniarnermut atugarisanik misissuinertik naammassereerpassuk ilinniagaqarnersiutit annertussusii pillugit Naalakkersuisut apeqqut oqaloqatiginnissutigissamaarlugu siunniussaannut Ataatsimiititaliaq isumaqataammat. Naalakkersuisut tamatumunnga annertunerusumik oqaaseqaateqassanngillat.

 

Siunnersuuteqartup aappaanut. Aallakaatitassat aaqqissuunneqartarnerannut tunngatillugu KNR-p kiffaanngissuseqarnissaa ataqqineqassasoq isumaqatigalugu Ataatsimiititaliap oqaati­gereermagu, taamatuttaaq Naalakkersuisut Manasse Berthelsen-ip siunnersuutaa pillugu Ataat­simiitaliap oqaaseqaataanut allanik oqaaseqaateqarnissartik pissutissaqartinngilaat.

 

KNR suliffeqarfittut eqqissilluni sulinissaminut periarfissinneqassasoq Ataatsimiititaliap kaju­missaarutaanut tunngatillugu Naalakkersuisut tamatumunnga isumaqataapput. Tamatumunngali atatillugu Naalakkersuisut oqaatigissavaat suliffeqarfik KNR suliffeqarfittulli allatut landskarsi­mik aningaasalersorneqartutut soorunami pisussaaffeqarmat, maleruagassat atuuttut malillugit suliffeqarfik aamma killissarititaasut aningaasaqarnermut allaffissornikkullu ingerlatsinermut tunngasut Inatsissartut Naalakkersuisullu piumasaqaatigisaat aallaavigalugit ingerlatsinissami­nut. Naalakkersuisut isumaqarput KNR-p siulersuisortaavisa soorunami tamanna qulakkeernias­sagaat.

 

Naalakkersuisut taamatut naatsumik oqaaseqaateqarlutik KNR taamatullu najukkani radioqarfiit TV-qarfiillu kaammattussavai radiokkut TV-kkullu aallakaatitassiortarneq, aallakaatitassianillu siammarterisarneq pillugit inerititaqarfiusumik tatigeqatigiiffiusumillu suleqatigiinneq annertu­saqqullugu nunamut tamarmut nuannaarutissamik.

 

Ruth Heilmann, Siumup oqaaseqartua:

Inatsisartut Kultureqarnermut Ilinniartitaanermullu Ataatsimiititaliaata nalinginnaasumik isu­maliutissiissutaanut tunngatillugu ilinniarnersiutit qaffanneqarnissaat pillugu Inatsisartuni ilaasortap Anthon Frederiksen-ip siunnersuutaanut isumaliutissiissummi aamma Naalakkersui­sumit akissutigineqartut isumaqatigigatsigit annertunerusumik oqaaseqarfiginagit ukiamut ilinniartut atugarisaanik misissuinerit saqqummiunneqartussaanerat nalunnginnatsigu taamanik­kut nalilersueqataanissarput Siumumiit qilanaarigipput oqaatigissavarput.

 

Aappaattut Inatsisartuni ilaasortap Manasse Berthelsen-ip sinerissamiit KNR-ip nutaarsiassaqar­titsinera pillugu siunnersuutaanut tunngatillugu Siumumiit ataatsimiititaliap misissuilluarsima­nera iluarisimaaripput oqaatigissavara.

 

Oqaatigissavarpulli siunnersuutigineqartoq paasilluaratsigu tunngaviatigullu tapersersorlutigu. Siumumiit aamma isumaqaratta Aallakaatitsiviit sinerissamiittut kommuniniit tapersersorneqar­tumik peqatigiiffeqarnikkullu ingerlanneqartunit KNR-ip pitsaasumik agguaqatigiiffiusumillu aallakaatitassanik pissarsiniarfigisarnissaat pisariaqarluinnartutut isigigatsigu aamma taakkua aningaasaqarnerannut isumalerujussuummat.

 

Tamatigoortumik aammalu assigiinngiiaartunik tusagassaqartarnissarput tamatta pisariaqartik­katsigu pinngitsooratillu sinerissami tusarliunneqartartut tamatsinnut uummarissaataalluartar­mata.

 

Siumumiit pingaartipparput ukioq naallugu aasaaneranilu periarfissaqartinneqartumik tusagas­siisarnerit aliikkutaqartitsinerillu ingerlanneqartartuarnissaat annertusarneqartariaqartoq, tassani aamma aallarsimasut angerlarsimaannalernikuusullu utoqqaat aamma eqqarsaatigineqartariaqar­mata.

 

Taamaattumik KNR-imit sinerissami nutaarsiassaqartitsisut atorluarneqarnissaat siunnersuutigi­neqartoq KNR-imit atorluarneqarnerata annertusarneqartuarneqarnissaa Siumumiit aamma kissaatiginartikkipput oqaatigissavarput.

 

Taamatut oqaaseqarluta isumaliutissiissut tamakkiisumik taperserparput. Naalakkersuisut akissutaat tusaatissatut aamma ilanngullugit Siumumiit tiguavut.

 

Jakob Sivertsen, Atassutip oqaaseqartua:

Ataatsimiititaliap Inatsisartunut ilaasortat marluk siunnersuutaat suliarisimavaat, taakkulu immikkoortillugit oqaaseqarfigissavagut.

Ilinniarnersiutit qaffanneqarnissaannut Anthon Frederiksen-ip siunnersuutaa Atassut-mit oqaati­gissavarput Nunatsinni Danmarkimilu ilinniartut atugaat malinnaaffigigatsigik, amma paasivar­put Kultureqarnermut ilinniartitaanermut ilageeqarnermullu pisortaqarfim­miit Kalaallit Nunaan­ni Kiisalu Danmarkimi ilinniagaqartut kattuffii oqaloqatigineqarsi­masut.

 

Ilaatigut tamakkiisumik aaqqinissaq eqqarsaatigalugu ilinniartut ulluinnarni atugaasa misissor­neqarnerat utaqqineqassasoq paasissutissat pisariaqartinneqartut tunngaviliisus­saamata sutigut aaqqiissuteqarnissaq siunnerfigineqassanersoq, taamatut Ataatsimiititaliap siunnerfeqarneq Atassut-mit isumaqatigaarput. Kiisalu 1999-mut Inatsisartut aningaasanut inatsisissaa­ta suliari­neqarneranut aaqqiiniutissat oqaluuserineqalerpata Atassut-mit suleqataassaagut.

 

Sinerissamiit KNR-ata kiisalu KNR tv-ip nutaarsiassaqartitsinera pillugu Manasse Berthelsen-ip siunnersuutaa Atassut-mit soqutiginartipparput.

 

Nunatsinni Radio-kut TV-kullu nutaarsiassaqartitsineq innuttaasut tamarmik pinngitsoor­sin­naanngilaat, Atassut-mit isumaqarpugut nunatsinni nutaarsiassaqartitsinermi isorliunerusuniit nutaarsiassat aallakaatinneqartartut ikippallaartut.

 

Ataatsimiititaliap isumaliutissiissutaani oqaatigineqarpoq nuna tamakkerlugu nutaarsias­sanik aallakaatitsisarneq eqqarsaatigalugu aningaasaliissutaasut sapinngisamik aggua­taarlugit atorne­qartarnissaannik kaammattuutigineqartoq Atassut-mit isumaqatigaar­put.

 

Ullumikkut illoqarfinni arlalinni Lokal-radio-t pilersiortorneqarsimapput nunatsinni nutaarsiassa­qartitsinermi aningaasarpassuit atunngikkaluarlugit ikiuulluarsinnaasut suleqataalluarsin­naasullu nalunnginnatsigik.

 

Taamatut oqaaseqarluta ataatsimiititaliap isumaliutissiissutaa kiisalu Naalakkersuisut akissute­qaataat tusaatissa­tut tiguarput.

 

Evald Brønlund, IA-p oqaaseqartua:

Kultureqarnermut Ilinniartitaanermullu Ataatsimiititaliap nalinginnaasumik isumaliutissiissutaa IA-niit imatut oqaaseqarfigissavarput.

 

Anthon Frederiksen Kattuseqatigiinneersup siunnersuutigaa ilinniartut ilinniagaqarnersiutaat qaffanneqarnissaat

 

IA-niit siorna isumalluarsimagaluarpugut ilinniartut kattuffiata ilaasortamik atugaannik misis­suinerisimasaralua. Ajoraluartumilli misissuernermik peqataasimasut ikippallaarneri pissutaal­luni misissuineq iluatsinngitsoorsimalluni, isumaqatigiinniarnisamullu tunngavissaraluit pine­qanngitsoorlutik.

 

Taamaalilluni inatsisartunut ilaasortap Manasse Berthelsen-ip siunnersuutigisimasaa, tassa ilinniartut Namminersornerullutik Oqartussaniit aningaasanik erniakitsunik attartortarnissaannik qarasaasiarsinissaminnut unitsinneqarallarluni. Taamaammat IA-niit neriuutigaarput, ukiamut misissuinerit naammassisimaleriarpata Inatsisartunut ilaasortap Manasse Berthelsen-ip siunner­suutaa qaqeqqinneqarumaartoq.

 

Maannakkulli nutaamik misissuisitsineq ingerlanneqalersimavoq, IA-niillu neriuutigaarput ilinniagaqartut misissuinermut paasinnillutik peqataalluarumaartut, taamaalilluni ukiaru isuma­qatigiinniarnissat tunngavissaqarnerulluni ingerlanneqarsinnaassammata, maannakkullu ilinnia­gaqarnersiutit ullutsinnut naleqqussarsinnaanngortillugit.

 

Inatsisartunut ilaasortap Manasse Berthelsen-ip siunnersuutaanut tunngatillugu ataatsimiititaliap isumaliutissiissutaa akuerigallarparput.

 

Kisiannili naluneqanngitsutut maannakkut KNR aningaasatigut ajornartorsiuuteqarpoq, anin­gaasanillu taarsersuinissani unitsikkallaqqullugu qinnuteqarluni.

 

Taamaammat IA-niit ersissutigaarput KNR aningaasatigut sipaarnialeruni ileqquni malillugu sinerissami aallakaatitassanik pisissutissani sipaarniutigisussaammagit.

 

IA-niit taama naatsumik oqaaseqarluta naggataatigut oqaatigiinnassavarput, sinerissamiit aalla­kaatitassiat innarlerneqarnissaat alapernaassagatsigu, ataatsimiititaliallu isumaliutissiissutaa tusaatissatut tigullugu.

 

Bjarne Kreutzmann, AP:

Siunnersuutit taaneqartut arlallit qaqeqqinneqartussaammata, imatut oqaaseqaaminiarpunga.

 

Tassa siunnersuut isumaliutissiissullu misissuataareerlugit nalunaarutigiinnassavara, inutsialaat KNR-ip suliffeqarfittut eqqissilluni sulinissaminut periarfissinneqarnissaanik kaammattuuteqar­tut matumuuna taperserumagakkit. Neriussaagut namminersortunut periarfissiinitsinnit tamatu­muuna pitsaanerusumik ingerlasoqarumaartoq.

 

Anthon Frederiksen, Kattusseqatigiit:

Kattusseqatigiit sinnerlugit Inatsisartut ukiakkut 1997-imi ataatsimiinnitsinnut atatillugu siun­nersuutigaara. Ilinniarnersiutit 1991-imili kingullermik qaffanneqarsimasut, aammalu siusin­nerusukkut suli amerlanerusimagaluartut qaffanneqarnissaat.

 

Taamatut siunnersuuteqarninnut tunngaviuvoq uanga nammineerlunga ilinniartunik isumasiuil­lunga ataatsimiisitsisarninni ilinniartuniit, nalinginnaasumik ilinniartut atugaasa ukiuni kingul­lerni ajorsigaluttuinnarsimanerat.

 

Tassami naalakkersuinikkut ilinniagaqarnissamik piumasaqarniarluta, illuatungaatigut ilinniar­tut ilinniartuunersiuteqarnermikkut, ineqarnermikkut allatigullu atugaat ajorsigaluttuinnartut isiginngitsuusaaginnarsinnaanngilagut.

 

Akuersaaneqarsinnaanngilarmi ilinniartut ilaasa ilinniarnermik saniatigut aningaasarsiorniarlu­tik suliffissarsiortariaqarnerat ilinniagaqarnermut ilaatigut kinguarsaataasumik. minnerunngitsu­millu aamma inuusuttut ilinniagaqaqqinniarlutik, imaluunniit inuusuttut aammalumi inuusuk­kunnaareersimagaluartut ilinniagaqarniarlutik aallartittartut ilaatigut ilaqutariinnik pilersitsere­ersimallutik ilinniagaqalersimasut ilaqutariinni aningaasaqarniarnikkut annertuumik eqqugaa­sarmata. Matumani STI-imi aamma SPS-imi ilinniartut aamma eqqarsaatigalugit.

 

Ilanngullugu eqqaasitsissutigissavara ilinniartunik ataatsimiisitsinerma ilaanni ilinniartut ilaasa allaat oqaatigimmassuk imatut apeqqusaiillutik. Soormi nammineq ilungersorlutik ilinniagaqar­niassanerlutik, uffa inuit allat ilinniagaqarsimanngitsut sulerusunngitsulluunniit inunnik isuma­ginnittoqarfimmiit ilaatigut ilinniarnersiutinik amerlanerusunik aalliinnarsinnaasut.

 

Kattusseqatigiinniit aamma ilisimavarput maannakkut ilinniartuunersiutit annertussusaat aki­leraartussaatitaanermut aalajangersakkat killinganiimmat. Taamaattumik aaqqiiniarnermi ilinniartut akileraartussaatitaannginnerisa atuutsiinnarneqarnissaat ilanngullugu eqqaasissutigi­niarparput.

 

Taamaattumik ilinniartuunersiutit piaartumik iluarsiivigineqarnissaat Kattusseqatigiinniit aammaarlunga kaammattuutigissavara.

 

Ilanngullugu eqqaasissutigissavara siunnersuut ukiarmili siullermeerlugu saqqummiukkakkku Kultureqarnermut Ilinniartitaanermut Ilageeqarnermullu Naalakkersuisup taamanikkulli ilinni­artut atugaasa misissorneqarnerat oqaatigereermagu. Taamaattumik misissuinerup maannakkut ingerlanneqartup taagorneqartuartullu piaartumik naammassineqarnissaa Kattusseqatigiinniit kaammattuutigissavarput.

Kiisalu Inatsisartunut ilaasortap Manasse Berthelsen-ip siunnersuutaanut tunngatillugu Ataatsi­miititaliap inassuteqaataa isumaqatigigakku annerusumik oqaaseqarfiginagu tusaatissatut tigu­ara.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Soorlu siullermi oqaaseqarninni paasigiga Ataatsimiititaliap siunnersuutigineqartut suliarigami­git isumaqatigilluinnarluni oqaatigigaa, akuersaarlugit tassani pisortaqarfinninngaaniit paasissu­tissatut tunniunneqarsiamasut.

 

Aamma uani partiit oqaaseqartui ataatsimut isigalugit paasivakka paasinnilluarsimasut akissute­qaatinut taakkununnga, taamatullu akuersaartumik oqaaseqarneri qujassutigissavakka.

 

Siullermik IA-p oqaluttuata erseqqissumik oqaatigivaa ajuusaarnarpoq, aamma uagut naalakker­suisoqarfimminngaaniit assut ajuusaarutigaarput misissuinerup siulliup ilutsisimannginnera. Tassa ilinniartut ilinniartuunersiuteqarnerat pillugit atugaanut tunngasut misissuinermi immer­sugassaminnik immersuisut ikippallaarnerat pissutigalugit, taanna atorsinnaasimanngilarput. Taamaattumik massakkut suliaq ingerlateqqipparput, taannarpiarlu tunngavigalugu inernera soorunami nalunaarutigissaqqaarparput.

 

Kisianni oqaaseqartunut allanut oqaatigilaarlara. na qulaaninngaaniik naalakkiiginnarluni aaqqiisarneq, taanna qaangerparput. Aamma inuusuttortagut sungiusartariaqarpagut inuiaqati­giinni oqartussaaqataanerannut, tassanilu suleqatisiaraagut naqqaniit suut tamaasa misissorlugit toqqammaviginiaratsigit aaqqiinissamut. Aaqqiinissaq aamma taannarpiaq utaqqillugu taamani­li aningaasarsiat annertussusissaa aaqqinneqarmat, iniisa tungaasigut nerisaqarnermilu akiliutaa­sa tungaasigut akiliutaasartut qaffatsinnaveersaaeneqarsimapput maannakkumut. Taamaattumik paasivara imaalillugu utaqqimaarallarusunneqartoq taassuma saqqummernissaa.

 

Aamma oqaatigilara una aningaasalersuineq taamannak aallartimmat naatsorsuutigineqarsi­manngimmat ilaqutariinni atugassatuut aningaasartaasa qaffasissusissaaq aalajangersarneqarsi­malluni. Ilaqutariinnut naatsorsuussaanngillat, ilinniartumulli ataatsimut naatsorsuussaasimallu­tik. Kisianni soorunami massakkut misissuinermi ilagisariaqartussaassavaat ilinniagaqartut arlallit aappanereerlutik kollegium-ni najugaqarniarnerat, taanna uagut kisitta pisussaaffigi­neripput. Tassa ullumikkut meeralik nuukkaangami kr. 700,00-it sinnerlugit qaammammut pissarsisarpoq, kisianni taakkua naammannersut soorunami ilanngullugit misissortariaqassava­gut. Kisianni isumaqapunga uanga pisortaqarfimma kisimi akilersugassatuut taanna tigusin­naanngikkaa aamma meeraqarnermut tunngasut sociale-mut tunngasunut ilaatigut ilanngunne­qarsinnaammat.

Taavalu aamma paasivara Manasse Berthelsen-ip siunnersuutaanut oqaaseqartut tamarmik iluarisimaarinnittut taamatut akissuteqarsimaninnut. Kisianni una erseqqissumik oqaatigissavara ajuusaarutigeqigakku Ilulissani upernaaq manna ataatsimiissimaneq, seminar-eqarsimanerup nalunaarutigisimanissaa maani ilaasussaagaluarami KNR-mut tunngasut. Tassanilu soorlu tusassaanga siunnersuutigisamut tunngasut aamma sammineqartussaapput, taanna ukiamut kinguartipparput. Oqallinnermilu ukiamut aamma qularnanngilluinnarpoq taassuma tungaa annertuumik sammineqarumaartoq.

 

Taamaalillunga qujavunga akissuteqartunut tamanut. Radiomullu tunngasut nassuiaateqarfigi­lerukkit ukiamut oqallinneq annertooq piumaartoq qularinngilluinnarpara.

 

Taamak naatsumik oqaaseqarlunga saqqummiussanut tamanut qujaqqippunga.

 

Anders Andreassen, Ataatsimiinnermik aqutsisoq, Inatsisartut Siulittaasuat:

Taamaalilluni allanik oqaluttussaarummat, taava ullumikkut oqaluuserisassa imm. 63 Kulture­qarnermut Ilinniartitaanermullu Ataatsimiititaliap isumaliutissiissutaa tamaanga killeqarpoq akuersaarneqarlunilu.

 

Aammalu oqaatigissavara nalunaaqutaq tiimit aqqaneq aappaanut tungaanut aallartorlu ullumik­kut oqaluuserisassat naammassigatsigit.

 

Oqaluuserisaq naammassivoq.