Pingasunngorneq 2. maj 2001, nal. 18.30.

Oqaluuserisassami immikkoortoq 80.

Ilinniagaqartunik paarlaateqatigiissitsisarnerni inuusuttut ilinniagaqartut aningaasatigut naligiissinneqarnissaata qulakkeerneqarnissaa pillugu aalajangiiffigisassatut siunnersuut.

(Inatsisartunut ilaasortaq Olga Poulsen)

 

 

 

Ataatsimiinnermi aqutsisoq: Augusta Salling, Siulittaasoqarfimmi ilaasortaq aamma Ole Lynge, Inatsisartut Siulittaasuat.

 

 

Olga Poulsen, Inuit Ataqatigiit:

Siullermik naqqiuteqalaassaanga, siunnersuutiga saqqummiutinnginnerani. Tassalu allakkanni qeqqata missaani allaqqissaarnerani allatseqarfimminngaannit paragraf pisara, nalunaarutit nr. 3, ulloq 6. februar 1998-imeersup paragraf-ertaa allaqqissaarneqarnerani 42-ruutinneqarsimammat, uffa 46-sussaasoq. Taanna ilisimatitsissutigilaassavara.

 

Inuusuttut ilinniagaqartut 16-iniit 20-t ilanngullugit ukiulli nunat tamat ilinniagaqartut paarlaate­qatigiissinneqartarnerinik aaqqissuuussisarfiinit aaqqissuunneqartumik qaammatit arfinillit sinnerlugit ilinniarnerminnut atasumik nunani allaniikkaangamik aningaasatigut naligiissitaasa­lernissaat pillugu sifunnersuummik Naalakkersuisut Inatsisartunit saqqummiusseqquneqarnis­saannik Inatsisartuni aalajangiiffigisassatut siunnersuut.

 

Inuusuttut ilinniagaqartariaqarnerat isumaavoq ullumikkut oqaluuserineqartariaqanngitsorluun­niit. Nalinginnaasumik nassuerutigisarparput inuiaqatigiit siunissami pisuussutigiligassaat innuttaasut ilinniagaqarnerisigut pilersinneqassasut.

 

Tamannarpiaq pissutigalugu ilinniagaqartunut atugassarititaasut sapinngisamik pitsaanerpaatin­neqarnissaat pingaartuuvoq.

Siunnersuut siuliani taaneqartoq ilinniagaqartut isertitakinnerit akornanniittunik angajoqqaaqar­tut atugarisaasa qanoq iliornikkut pitsanngorsarneqarsinnaanerinut assersuutissaavoq.

 

Ilinniagaqarnersiutit pillugit Namminersornerullutik Oqartussat nalunaarutaanni nr. 3-mi ulloq 6. februar 1998-imeersumi paragraf 46, imm. 2-mi ima allassimasoqarpoq.

 

Københavnip nunamilu allami ornigassap akornanni angalanermut aningaasartuutit aningaasar­tuutigisimasanut uppernarsaammik takutitsinikkut utertinneqarsinnaapput.

 

Aalajangersakkap taassuma kingerisaanik ilinniagaqartut isertitaqqortunerumaanik, taakkunann­galu isertitaqqortunerusunik, angajoqqaallit kisimik paarlaateqatigiillutik nunanut allanut ilinniariarnissaminnut periarfissaqarput.

 

Tamatumunnga pissutaavoq Københavnimiit ornigassamut aingaasartuutit inummit namminermit akilerneqaqqaartussaasarnerat.

 

Tamatuma kingunerissavaa ilinniagaqartut arlallit soqutiginnikkaluarlutik billettimut aningaasar­tuutinik taama amerlatigisunik akiliigallarnissaminnut akissaqannginnertik pissutigalugu aallarsinnaasannginnerat.

 

Taamaammat kikkut tamarmik aallarnissartik sioqqullugu angalanermut tapiissutisisinneqartar­nermikkut naligiimmik atugassaqartitaalersillugit nalunaarut allanngortinneqarpat pissusissami­suussaaq.

 

Taamaaliornikkut ilinniagaqartut paarlaateqatigiilluni ilinniariartornissamut soqutiginnittut tamarmik periarfissaqartitaalernissaat qulakkeerneqassaq, nammineq angajoqqaavisaluunniit akissaqarnerat apeqqutaatinnagu.

 

Lise Skifte Lennert, Kultureqarnermut, Ilinniartitaanermut, Ilisimatusarnermut Ilageeqarnermul­lu Naalakkersuisoq:

Siunnersuut nunat tamat akornanni ilinniagaqartut paarlaateqatigiissinneqartarnerat pillugu aaqqissuussisarfinnit siullermik salliutillugulu American Field Servicemiit aaqqissuunneqartu­mik qaammatit arfinillit sinnerlugit ilinniagaqartut paarlaateqatigiittarnerannut inuusuttunit kalaallinit ukiorpassuarni atorneqartareersumut tunngavoq.

 

Kalaallinut ilinniagaqartunut paarlaateqateqartunut imaappoq ilinniagaqartup Kalaallit Nunaanni najugaaniit nunani allani ornitassaanut uterlugulu billettinut aningaasaartuutit Namminersor­nerullutik Oqartussat akilertarlugit.

 

Tamannali ima aaqqissugaalluni ilinniagaqartup billettinut aningaasartuutit nammineq akileral­lartarlugit aatsaallu kingusinnerusukkut aningaasartuutit utertinneqartarlutik. Nunami allamiin­nermi aningaasartuutit ilinniartut paarlaateqateqartup nammineq akilertarpai.

 

Angalanermik aaqqissuussineq taanna Oqaatsinik Pikkorissarfimmi allaffissornikkut aqunneqar­poq, taannalu allaffissornikkut aqutsinermut tamatumunnga ukiumut 500.000 kr.-inik aningaasa­liiffigineqartarpoq.

 

Ukiumut kalaallit ilinniagaqartut paarlaateqateqartartut 50-it missaanniittut billittinut aningaasar­tuutiminnik aningaasaliissutitigut taakkunuuna utertitsisarput.

 

Kalaallit inuusuttaasa ilaquttamik aningaasaqarnikkut atugaat apeqqutaatinnagit taamatut paarlaateqateqartarnermik pissarsiaqarfiusaqisumik atuisinnaanerat Naalakkersuisut pingaartit­torujussuuaat.

 

Naalakkersuisut misilittagaat naapertorlugit nunat tamat akornanni paarlaateqatigiittarnerit tamakku inuusuttut inuttut, ilisimasaqassutsimikkut pissutsimikkullu ineriartornerannut pitsaasu­mik pingaarutilerujussuuvoq.

 

Aningaqasartuutinik utertitsisarnermik aaqqissuussineq maannakkut atuuttoq ilinniagaqarnersiu­tit pillugit Namminersornerullutik Oqartussat nalunaarutaanni nr. 3-mi, 6 februar 1998-imeersu­mi paragraf 45-mi, imm. 2-mi aalajangersarneqartoq aningaasaliissutigineqartut siunertamut atorneqarnissaasa qulakkeerneqarnissaat siunertaralugu aalajangersarneqarpoq. Tamannalu utertitsisarnermik aaqqissuussinikkut qulakkeerneqarsinnaanerusoq.

 

Naalakkersuisulli siunnersuuteqartoq isumaqatigaat oqarmat aningaasartuutinik utertitsisarner­mik aaqqissuussineq ilinniagaqartunut paarlaateqateqartunut taakkulu angajoqqaavinut akissaati­kinnerusunut aningaasaqarnikkut immikkoortitsinertut isigineqarsinnaammat, tassami nunani allaniinnermut aningaasartuutit akilernerisa saniatigut billettimut 10-15.000 kr.-it akilerallarne­qartussaammata.

 

Taamaattumik Naalakkersuisut akileeriaaseq taanna allanngorteqquniarpaat, taamaalilluni ilinniagaqartup nunani allaniinnermut aningaasartuutit akilerneqartussat nunat tamat akornanni ilinniagaqartut paarlaateqatigiissinneqartarnerannik aaqqissuussisarfinnut akilereeraangagit ilinniartup aallannginnerani ornitassamut utimullu billettit Oqaatsinik Pikkorissarfimmit tunniun­neqartalersillugit.

 

Tamatuma malitsigisaanik Naalakkersuisut Oqaatsinik Pikkorissarfik nalunaarfigissavaat periaaseq nutaaq naapertorlugu ingerlaannaq atuutilersumik allaffissornikkut aqutsisoqalissasoq, sapinngisamillu piaartuik periaatsip allanngortinneqarnera nalunaarummut ilanngunneqassasoq.

 

Johanne Olsen, Siumup oqaaseqartua:

Siumut siunnersuut pillugu imatut oqaaseqarniarpoq.

 

Nunanut allanut inuusuttut ilinniagaqariartorlutik aallartarut ukiut qulit kingulliit ingerlanerini annertuumik amerliartornikuupput. Taamatullu ingerlaneq Simumiit assut tapersersorparput. Kissaatigiuarparpummi suli amerlanerusut ilinniagaqalernissaat.

 

Ukiumut Nunatsinniit inuusuttut nunanut allanut AFS aammalu EF sprogrejser atorlugit atuariar­tortartut 50-it missarluinnaanik amerlassuseqarput, taakkunannga AFS aqqutigalugu atuariartor­tartut ukiumut 25-t missaanniillutik.

 

Taamatut ukiumik ataatsimik sivisussusilimmik atuariartortarneq akisuujuvoq. Tassami akueri­saagaanni ilaanissaannarmut akiliut 50.000 kr.-it missarluinnaani akeqartarmat.

 

Taassuma saniatigut nammineerluni kaasarfimmiussat, atuakkt atugassat kiisalu atisat nammineq aningaasartuutigineqartarput. Taamaattumik tupinnanngilaq akissaatikitsut meeraat ilaatigut akissaq pissutigalugu tunuarsimaartarmata.

 

Siumumiit isumaqarpugut kikkut tamarmik periarfissinneqassappata inuusuttut nunanut allanut atuariarniartut assigiinnerusumik periarfissinneqartariaqartut.

 

Maannakkut qinnuteqarnerup kingorna tapiutigineqartarotq tassaavoq Qallunaat Nunaannut uterlugulu billettip akiata nalinga. Taannalu Sisimiuni Oqaatsinik ilinniarfiup isumagisarisarlugu, angajoqqaat qinnuteqarnerat aallaavigalugu.

 

Akissaqannginneq pissutigalugu, naak piukkunnaateqaraluarluni, nunanut allanut atuariarsin­naannginneq unitsinniarutsigu taava siunnersuutigaaput atuariarniat tamarmik AFS-imiit EF-sprogrejssiniillu piukkunnaatilittut akuerisaasimasut tamarmik Namminersornerullutik Oqartus­sanik tapiiffigineqartalissasut.

 

Tamannalu Sisimiuni Oqaatsinik Ilinniarfiup aqutareriigaa aqqutigalugu ingerlatiinnarneqassa­soq, imaalilluguli atuariarniarluni akuerisaalluni uppernarsaat takkunniariarpat tapiiffigineqarneq pisinnaanngortillugu.

 

Tassalu nunap ornitassap tungaanut angalanerup uterlugulu akiata nalinga tapiissutigineqartassal­luni. Taamaasilluni atuarniarnermi akiliutaasartut annertuumik oqilisaaffigineqartassapput.

 

Taassuma saniatigut kommunit namminneq tapiisarnissaat innersuutigeqqunaqaaq, soorlu Ilulissani Narsamilu taamak iliortoqartartoq.

 

Edvardt Geisler, Atassutip oqaaseqartua:

Tassa akuerineqaratta immikkoortut 36 aammalu 80-ip ataatsimoortumik oqaaseqarfiginissaanut, taakku oqaaseqarfigissavarput.

 

Inatsisartuni ilaasortat Mads Peter Grønvold, Kattusseqatigiinneersup kiisalu Olga Poulsenip Inuit Ataqatigiinneersup oqallisigineqartussatut aammalu aalajangiiffigisassatut siunnersuutaan­nut tunngatillugu Atassummit ima oqaaseqassaagut.

 

Ilinniagaqartut atugaasa pitsaanerusumik aaqqiivigineqarsinnaanerat Atassummit tamatigut peqataaffigerusuttarparput. Taamattumik ilinniartut atugaasa pitsaanerusumik aaqqiivigineqarnis­saat siunnersuutigineqartunit oqariartuutigineqarmat Atassummit pissusissamisoortutut isigaar­put.

 

Siunnersuutaasulli pillugit Naalakkersuisut akissuteqaataat tunngavilersuutinik erseqqissunik imaqarmata Nalakkersuisut akissuteqaataat Atassummit isumaqataaffigaagut.

 

Ilinniartulli atugaasa pitsanngorsarneqarneranni Nunatsinni pissutsinik allannguisoqassappat, soorlu inigisanut ilinniartullu atugassarititaanut tunngassuteqartunik, taava Atassutip pingaartip­paa ilinniagaqarnersiuteqartut atugassaritaasa malinnaatitamik aaqqiivigineqartuartarnissaat.

 

Atassutip aamma pingaartippaa ilinniagaqartut kattuffiisa naqisimaneqaratik isumaqatigiinniar­nermi peqataatittuartarneqarnissaat.

 

Johan Lund Olsen, Inuit Ataqatigiit oqaaseqartuat:

Siullermillu immikkoortup sammineqareersoq aamma tikinneqartarmat aammalu akuerineqareer­mata siullermik oqaatigeqqaalaassavara qaqqaqqalaarneq, imaluunniit qaqqaqqaqalaannginneq siuliani oqaluuserisami atorneqartoq pillugu, oqaatigilaassagakku, aamm ami kamaammernartar­mat peqqussutit maleruagassallu malillugit periarfissaareersut pisinnaataaffiusullu taamaanngin­nerarlugit maanngaanniit oqaluttoqaleraangat. Kisianni tassa oqaatsit tamakku, aap, atorneqarnis­saat pisariaqalersinnaasarput, tassami pisariaqanngitsumik iliortusanngortinneqartaratta maani. Tassa oqallinnerup uummarissarneqarnissaanut aamma atorneqarsinnaammata eqqaamasariaqar­parput ajuallatsitsiniutaanngikkaluarlutik.

 

Uani immikkoortumi 84-imi siunnersuummut tunngatillugu imaattunik oqaaseqassaagut:

 

Inatsisartunut ilaasortaq Olga Poulsenip matumani aalajangiiffigisassatut siunnersuutaa Inuit Ataqatigiit tamakkiisumik taperserpaat, siunnersuutigineqartukkummi aqqutsissiuukkumaneqar­put inuusuttut ilinniagaqartut 16-iniit 20-t ilanngullugit ukiullit nunanut allanut paarlaateqatigiit­tarnerini namminneq angajoqqaavisaluunniit akissaqarnerat apeqqutaatikkunnaarlugu kikkut tamarmik aallarnissartik sioqqullugu angalanermut tapiissutisinneqartarnermikkut naligiimmik periarfissinneqartalissasut, tamatunili nalunaarut allanngortittariaqartoq.

 

Tamanna pisariaqarluinnavippoq maluginiaratsigulu tamatumani Naalakkersuisut nalunaarum­mik allanngortitserusullutik piareersimalluinnartut.

 

Taamatullu naatsumik oqaaseqaannarluta aalajangiiffigisassatut siunnersuut ilalersorparput kissaatigissalluguli aappassaaneerisoqartinnagu aalajangersakkap pineqartup '-itaa innersuussuti­gineqartorlu eqqortumik iluarsineqassasoq. Tassa marlussoriarluni innersuussiffigineqartoq taanna '-i kukkuneqarsimavoq, siunnersuuteqartup nammineq pappiliaataani taavalu aamma Naalakkersuisut akissuteqaataanni

 

Eqqortumimmi innersuussissagaanni allanngortinniagaq matumani pineqartoq tassaavoq ' 46 imm. 2, ilinniagaqarnersutit pillugit Namminersornerullutik Oqartussat nalunaarutaanni uani nr. 3-mi 6. februar 1998-meersumi maanna allassimaasoq.

 

Tassa taannaana allanngortinniarneqartoq.

 

Tom Ostermann, Kattusseqatatigiit oqaaseqartuat:

Siullermik kingumut ersseqissaatigissavarput taakku ataatsimoorussamik akissuteqarfigissagatsi­git.

 

Kalaallit nunani allani ilinnigaqartut atugarisaat aammalu illinniagaqartut paarlaateqatigiittarner­mi inuusuttut ilinnigaqartut aningaasatigut naligiisarneqarnissaannut imatut Kattusseqatigiinniit oqaaseqarniarpugut:

 

Siullermik Kattusseqatigiinniit qasseeriarluta inimi maani ilinnigaqartut atugarisaat pillugit oqariartuuteqareersimavugut aammaarlutalu ilinniartut tikillugit ataatsimeeqatigereernerisigut ajornartorsiutit qulaani ilisimaarineqartut pillugit kingumut saqqummiussissalluta.

 

Isertuunneqarsinngilaq Nunarput qimallugu ilinniariartortartut tassaanerusarmata qaffasinnersu­mik ilinniariartorlutik avalattartut aammalu ilinniartut ilaqutariinnguanngorsimappata assigiinn­gitsunik ajornartorsiutinik nassataqartarmata, soorlu aappaasup suliffissaa eqqarsaatigalugu aammalu meeqqat inissinniarnerinut tunngasut, ullumikkullu pissutsit piviusut suli imaattuarsin­narput ilinniartut ilinniarnerminnut tunngatillugu piumasaqaataasut aammalu pinngitsoorneqarsinnaan-ngitsut tassalu atuakkat ilaatigut akisoorsuusartut, naak studiekortertik atorlugu akikillisaanneqartaraluarlutik aammalu 60%-i angullugu tapiissuteqartoqarluartoq aamma makku saniatigut ulluinnarni inuuniarnerminni allallu akilersugassat tamaasa nammanni­artarmatigit, naak ilinniarnesiutit killeqaralluaqisut.

 

Tamakku ajornartorsiutigineqaleraangata inuup kialluunniit nalunngilaa ilinniartuulluni aningaa­sat tungaatigut atugarititaasut oqitsuinnaaneq ajormata, pingaartumik meerartallit eqqarsaatigalu­git aammalu inuit imaakkajuttarpugut akiitsoqaleraanngatta inuuniarnitsinnut tamakku tamarmik sunniuteqartarlutik, taamaammat pisariaqarpoq sukumiinerusumik aammalu ilinniartunut atugassarititaasut iluarsiissuteqarfigissallugit.

 

Danmarkimi iliniartut ilai Danmarkimi ilaqutaqarneq ajorput imaluunniit ilaqutaqaraluarlutik aningaasaatiminnik naammattusaaralutik aammalu sipaarlutik pisariaqaramik imaaliaallaannaq aallarsinnaannatik.

 

Oqartuartarpugut meerartavut Nunatta siunissarigai, tamannalu soorunami ilumoorluinnarpoq. Ilinniartortagut Nunatsinni imaluunniit nunani allani ilinniartunngoraangamik anguniagaqalerlu­tik aammalu siunertaqarlutik ilinniariartortarput amerlasuullu taamatut siunniussaqaraangamik siumut takorlooreertarpaat suna ilinniarneq pilerinarsinnaanersoq. Aammattaaq oqarsinnaagunar­pugut Nunatsinni ilinniartarnerit nunanut allanut sanilliutissagaanni atugassarititaasut assigiinn­gitsutigut pitsaanerugaluartut soorlu makkua eqqarsaatigalugit: ilinniarneq namminerisisamik akilersugassaananilu taarserugassaanngilaq, taamaakkaluartoq suli Nunatsinni iliniarfiit tamak­kiisut pigilersimannginnatsigit qaffasinnerusumik ilinniartut arlallit suli nunanut allanut avalallu­tik aallartariaqartarput.

 

Taamaakaluartoq aamma nalunngilarput ilinniarfiit tamaasa pigilersinnaanngikkallarlugit, akissarmi qiviaqqaartariaqaratsigu, taamaammat periarfissat pitsaanerusumik aammalu ilinniartut atugarisaannut naleqqunnerusut ilinniartut tusarniaavigalugit pilersaarusiorneqartariaqarput.

 

Ilinniartulli ilinniakkaminnik naammassinnikkaangamik Nunatsinni angerlarniartarnerat suli ullumikkut annertuumik ajornartorsiutaavoq. Ilumut piffissanngunnginnerpoq tamakku oqallisi­giinnarnagit pilitikkikkut akisussaasumut aammalu ilinniartut kattuffiisa KIK aammalu DKIK pilersaarusioqatigalugit aqqutissanik pitsaanerusunik pilersaarusiorlutalu nassaarniassalluta.

 

Qanoq, ililluta aappaasut suliffissaannik nassaarniartarnerit pitsanngorsarsinnaavagut aammalu meeqqat paaqqinnittarfiinut inissinniartarneri eqaannerusut qulakkeersinnaavagut.

 

Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisup akissummini eqqaavaa misissueqqissaartoqareerpat suleqatigiisitaliaq ilinniagaqarnersiutinik naapertuunnerusumik aaqqiinissamik siunniussaq ilaatigut immikkoortut sisamanngorlugut immikkoortinneqarsimasut tassani eqqaaneqarmata issuaalaarsinnaanerlunga:@ Inuusuttut ilinniakkaminnik naammassinnereersut piaarnerpaamik angerlarnissamut kajumissuseqalernis­saat@, issuaaneq naavoq. Naalakkersuisuttaaq akissummini oqaaseq una atorpaa, isuuaaneq:@ pinngitsaaliinneq tunngavigalugu aaqqiissuteqarnikkut pitsaasumik angusaqartoqarsinnaanavi­anngitsoq, tamatumunngali taarsiulllugu assigiinngitsunik soqutiginnilersitsisunik isumaliutigine­qarsinnaasoq@, issuaaneq naavoq.

 

Ila ilinniartut ukiorpanngortuni oqariartuutaat ersarissut tusaaneqarneq ajorneramik, ilami nunani allani ilinniarsimasut inuit arlalippassuanngorput Kalaallit Nunaanni akileraartartut akiliussima­saat Nunatsinni atorneqanngitsut, soorlu makku ilisimaneqarput: tikisitat ilaasa ukiuni arlaqartuni Nunatsinni sulisimasut taakkulu meerartaasa Nunarput qimallugu ilinniariartortarnerat Kalaallit Nunaanni akileraartartut akilertarpaat, naak Nunatsinnut uteqqinnissaminnik eqqarsaateqanngik­kaluartut. Qujanartumilli ilaqarput Nunatsinni nunaqarusuttunik, kisiannili siuliani taaneqareer­sut ajornartorsitinik aporfillit.

 

Aammattaaq qaffasinnerusumik ilinniagallit ilinniakkaminnik naammassinnereerlutik Nunatsin­nut angerlarniarlutik ilinniakkaminnut naapertuuttumik suliffissaminnik qinnuteqaraanngamik oqarfigineqartarnerat, misilittagaqannginnavit atorsinnaanngilatsigit. Oqaaseq taanna ukiuni arlaqalersuni tusaajuarlugu qaqugumitaavaana kalaaleqatigut ilinniarsimasut Nunatsinni periar­fissinniarigut.

 

Kattusseqatigiinniit akuersaarsinnaanngilarput Nunatsinni ajornartorsiutit tamakku qangali ajornartorsiutaasut isiginngitsuusaarneqarnerat aammalu piffissaq kinguarsaannarnagu qanoq iliuuseqartoqarnissaa ilungersortumik piaartumillu aaqqiiffigineqarnissaat kissaatigissallugu.

 

Kiisalu immikkoortoq 80-imut tunngatillugu Kattusseqatigiinniit nalunaarutigissavarput Inatsi­sartuni ilaasortap Olga Poulsenip siunnersuutaa isumaqatigilluinnaratsigu, ilami atugassarititaa­sut naligiilernissaat uagut pingaartilluinnaratsigit aammalu assersuutigalugu ilinniariartortartut kisimiillutik pilersorneqartut taamatut akiligassinneqarangaamik annertuumik artukkinneqartar­nerat akuersaarsinnaannginatsigu. Tamakku tamarmik qulaajarlugit KU-mi aamma KIIIP-imi misissuiffigineqarnissaat kissaatigalugu.

 

Taamatut oqaaseqarluta aalajangiiffigisassatut siunnersuutigineqartoq ' 46, imm. 2-p allanngor­tinnissaa tamakkiisumik tapersorlugu nalunaarutigaarput.

 

Olga Poulsen, Inuit Ataqatigiit:

Qujanaq. Siullermik Naalakkersuisut partiit ilaasortallu allat siunnersuummut tapersiinerat qujassutigaara. Uani Naalakkersuisut akissuteqarnemini ilisimatitsissutigivaa Oqaatsinik Pikkorissarfiup ingerlatarisaanut 500.000 kr.-it atorlugit taamatut ilinniariartortitsisarnermut aningaasalersuisoqartartoq, aammallu ilinniartut 50-it missaanni ukiumut ilinniariartortartut.

 

Uumap nalunaarutip allanngortinneqarneratigut takorloorsinnaasara unaavoq ilaatigut immaqa suli ullumikkornit amerlanerusunik qinnutigineqartalernissaa, taamaattumik taanna isigereerlugu pissusissamisuussaaq Naalakkersuisut aamma Inatsisartut, tassami akuersigamik uunga siunner­suummut, anigaasanik annertunerusunik aningaasanut inatsisissamut 2002-mut pilersaarusiorner­mut eqqarsalereertariaqartugut. Taanna isumaqarpunga piareersimaffigisariaqaripput.

 

Taavalu Siumup oqaaseqaataa aamma qujassutigaraa, ilisimatitsissutigiinnassalluguli taasarsi siunnersuutitullusooq nipilerlugu siunertaalluinnarmat uani aamma siunnersuummi.

 

Ole Lynge, Inatsisartut Siulittaasuat: