Oqaluuserisassani immikkoortoq 100-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aqqaneq pingajuat, ataasinngorneq 24. marts 2003, nal. 17:12.
Enos
Lyberth,
siunnersuuteqartoq, Siumut.
Utoqqaat Kattuffeqarneranni ukiorpaa1ussuarni siulittaasutuut
maqaasiuartarsimavarput qitiusumik Utoqqarnut siunnersorteqannginneq Namm.
Oqartussat allaffeqarfianni, taannalu assorsuaq kattuffimmi
amigaatigisarsimavarput, taamaattumik matumuuna Landstingip ataatsimeeqqaarnera
iluatsillugu saqqummiunniarpara neriuutigalugu partiinik paasineqar1uni
arlaatigut taperserneqarumaartoq.
Maannamut
kommunet arlaqartut siunnersortinik namminneq atorfeqartitaqarput, taakkuali
tamakkiisumik Namminersornerullutik Oqartussat sinnerlugit
paasissutissiisinnaasarsimanngillat.
Namminersornerullutik
Oqartussani maleruaqqusat, kaajallaasitat Landstingillu inatsisiliaat
maleruagassaallu, minnerunngitsumillu Utoqqaat Kattuffianiit Utoqqaat
Nipaanniit attaveqarfeqarniartarneq assorsuaq ilungersunartuartarsimavoq
saaffigineqartussat, Naalakkersuisut, pisortat i1.i1. suliartik pissutigalugu
naapikkuminnattarsimapput, taamaalillunilu aa1ajangersimasumik toqqaannartumil1u
atassuteqarfigiuminaattarsimallutik.
Namminersornerullutik
Oqartussat pisortaqarfiani qitiusumi utoqqarnut siunnersorteqalertariaqarpoq,
kommunenut, inunnut ataasiakkaanut minnerunngitsumillu utoqqaat kattuffiannut
Utoqqaat Nipaannut tamanna iluaqutaassammat.
Qujanaq.
Per Berthelsen, ataatsimiinnermi aqutsisoq,
sinnisussat sisamaat, Demokratit.
Siulliulluni oqaaseqassaaq Ilaqutariinnermut
Naalakkersuisoq, takanna.
Ruth
Heilmann,
Ilaqutariinnut Peqqissutsimullu Naalakkersuisoq, Siumut.
Qujanaq.
Utoqqarnut siunnersorteqarnissaq siusinnerusukkut saqqummiunneqartareersimavoq.
Naalakkersuisunit isumaqarpugut qitiusumik allaffeqarfimmi inissisimasumik
utoqqarnut siunnersorteqalernikkut ajornartorsiutit siunnersuuteqartup
saqqummiussai aaqqinneqarsinnaanngitsut.
Utoqqaat
atugaarisaat assigiinngisitaartorujussuupput, tamatumanili pissutaavoq utoqqarnut
tunngasut kommunet namminersortuunerisa iluanni annertuumik aqunneqarmat.
aamaattumik siunnersortip qitiusumik allaffeqarfimmi inissinneqartup
naammattoortuassavai ajornartorsiutit kommuneni ataasiakkaani siunnersortit
naapittuagaat, tassalu kommunet utoqqarnik sullissinerminni periuuserisartagaat
assigiinngisitaarmata, taamaattumillu kommuneni piumasaasut allanngorartillugit
assigiimmik siunnersuinissaq ilitsersuinissarlu ajornakusoorluni.
Utoqqarnik
kiffartuussineq, siunnersuineq ilitsersuinerlu kommunit suliassaqarfiisa
oqartussaaffiisalu iluaniippoq, taamaattumik kommunet pisariaqartitsinertik
naapertorlugu immikkut utoqqarnut siunnersortimik atorfinitsitsisimanerat
pisusissamisoorpoq.
Utoqqaat
innuttaasutut allatuulli piginnaatitaaffeqarput, soorlu ineqarnermut
tapiissutit, meqqanut tapiissutit, suliassaqartitsinerit, sunngiffimmi
sammisassat allallu innuttaasunut neqeroorutigineqartut eqqarsaatigalugit.
Utoqqaat
Nipaat kattuffinnut Nunatta Karsiat tapiiffigineqartartunut ilaavoq,
tapiissutit taakku paasititsiniaanernut siunnersuinernullu
siunertaqartuullutik. Utoqqaat Nipaat eqeersimaartuuvoq, minnerpaamillu ukiut
tamaasa naalakkersuisunik ataatsimeeqateqartartuulluni. Ataatsimeeqatigiinnerni
erseqqissaateqartarput utoqqaat atugarisaasa pitsanngorsaavigineqarnissaat
sutigut pisariaqartinneqarnersoq, aammalu paasitinneqartarlutik utoqqarnut
tunngasutigut suut Naalakkersuisunit suliniutigineqarnersut aammalu
suliniutigineqarniarnersut.
Taamaattumik
oqartoqarsinnaavoq utoqqaat peqatiiffiit kattuffiillu utoqqaat
ikiorserneqarnissaminnik periarfissaat pillugit aamma utoqqarnit aammalumi
kommunini ataasiakkaani utoqqarnut siunnersortinit atorneqarluarsinnaalluartoq.
Naalakkersuisoqarfiit
pisussaaffeqarnertik naapertorlugu kommunini sulisunik ilitsersuisarput aammalu
siunnersuisarlutik, taamatullu pisariaqarfiisigut pikkorissaasarlutik aammalu
innuttaasunik paasititsiniaanernik ingerlatsisarlutik, pingaartumik inatsisit
nutaat aallaavigalugit.
Naalakkersuisut
maannakkorpiaq utoqqarnut siunnersortimik atorfinitsitsinissamik
tunngaissaqarsorinngillat, taamaattumik utoqqarnut siunnersortimik nuna
tamakkerlugu atuuttussamik atorfinitsitsinissamik pilersaaruteqaratik.
Taamatut
oqaaseqarluta Naalakkersuinit inassutigaarput Inatsisartunut ilaasortarp Enos
Lyberth-ip siunnersuutaa akuerineqassanngitsoq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Taavalu maanna partiinit oqaaseqartussanut ikaarsaassaagut, tassani
siulliulluni oqaaseqassaaq Doris Jakobsen, Siumut takanna.
Doris
Jakobsen, Siumup
oqaaseqartua.
Namminersornerullutik
Oqartussat qitiusumik allaffeqarfiani utoqqarnut siunnesortimik
atorfinitsitsinissamik Inatsisartunut aalajangiiffigisassatut siunnersuut
Siumumiit imatut oqaaseqarfigissavarput.
Inatsisartuni
ilaasortap Enos Lyberth-ip saqqummiussaa Siumup soqutigalugu oqallisigisimavaa.
Siumumiit Naalakkersuisut akissutaat akuersaarpalunngitsutut niperaluartoq,
taamaattoq tapersersornartutut oqaatigineqartut kaammattuutiginiarpavut.
Siumumi ilisimaarivarput siunnersuut taamaattoq aatsaat
saqqummiunneqalinngimmat, paasilluarsinnaallugili Inatsisartunut ilaasortap
Enos Lyberth-ip taamatut siunnersuuteqarnera.
Oqariartuutaani erseqqimmat kommunini utoqqarnut siunnersortit pitsaanerusumik siunnersuisinnaanerat amigaatigineqartoq. Nuna tamakkerlugu ilisimasaasa killiqarnerat tunngavigalugu. Tassanittaaq pineqarpoq susassaqartut iluanni attaveqatigiinniarneq ajornartorsiutaasoq, pisortat il.il. suliaminnik suliaqartuarnerat tunngavigalugu.
Oqaatigineqartariaqarporli kommunini utoqqarnut siunnersuisarneq pitsaanerulissappat, Naalakkersuisoqarfiit suli maannamiit annertunerusumik kommunini sulisunik ilitsersuisarnerat siunnersuisarnerallu akulikinnerusariaqartoq pitsaanerusariaqartorlu, ajornanngippat ukiut tamaasa pisarnissaa kissaatiginarluni.
Siullermik oqaatigineqartutut siunnersuutigineqartumi Naalakkersuisunullu utoqqarnik sullissineq pitsaanerpaaq tassaavoq utoqqaat namminneq peqatigiillutik atukkaminnik oqilisaaniarnerat tamanna Siumut pingaarteqaa.
Kommunit utoqqarnik suleqatiginnillutik suliarisaat nukittorsarneqartariaqarput utoqqaat peqatigiiffii suleqatigalugit. Siumup Naalakkersuisunut innersuussutigaa Ilaqutariinnermut, Peqqinnissaqarfimmullu Naalakkersuisoq utoqqaat peqatigiifiata, kommunillu suleqatigiinnerat erseqqissumik Inatsisartunut nalunaarusioqqullugu.
Siumumiit siunnersuummut taamatut oqaaseqarluta siunnersuut paasilluaraluarlugu kommuni akisussaaffiisa ataaniittutut isigalugu, kommunillu ataanni atorfinitsitsisimaneq pissusissamisoortutut isigalugu qulaani taaneqartut innersuussutigalugit siunnersuut ilalernartinngilarput.
Per Berthelsen, ataatsimiinnermi aqutsisoq, sinniisussat sisamaat, Demokraatit.
Tullilluni oqaaseqassaaq Asii Chemnitz Narup, Inuit Ataqatigiit.
Asii Chemnitz Narup, Inuit Ataqatigiit oqaaseqartuat.
Qujanaq. Inatsisartunut ilaasortap Enos Lyberth-ip Siumumeersup, Namminersornerullutik Oqartussat qitiusumik allaffeqarfianni inissisimasumik utoqqarnut siunnersortimik atorfinitsitsinissamik siunnersuutaa, Inuit Ataqatigiinnit tamakkiisumik tapersersorparput.
Kommunit arlaqaqisut maanna immikkut utoqqarnut siunnersortinik atorfinitsitsisarput. Tamanna kommunit utoqqarnik kiffartuussinissamik sullissinissamillu pisussaaffeqarnermik kommunit pimoorullugu naammassinninniaanerannut takussutissaasoq Inuit Ataqatigiinni isumaqarpugut.
Qanorluunniit utoqqarnik sullissineq kommuninit akisussaaffigineqartigigaluarpat, tamanna tunngavilersuutaasinnaanngilaq Namminersornerullutik Oqartussani qitiusumik utoqqarnut siunnersortimik atorfinititsinissamik siunnersuummut itigartitsinissamut.
Enos Lyberth-ip siunnersuutaa Inuit Ataqatigiinni akuersaarnartuutipparput makku tunngavialugit:
Ukiuni makkunani utoqqaat pisortanit pilersorneqarnissamut isumassorneqarnissamullu pisariaqartitsisut amerliartorput, taamaalillunilu inoqarfinni ataasiakkaani utoqqarnik sullissinermi misilittakkat annertusiartorlutik. Utoqqarnik qanimut sullissisut taakkuuput ukiuni makkunanerpiaq utoqqartatta kissaataannik, takorluugaannik, pingaartitaannik, ajornartorsiutaannillu annertuumik ilisimasaqartut.
Tamakkunuunatigut ilisimasat tamarmik iluatinnarput, qitiusumillu tamakkiisumik malinnaaffigineqartariaqarlutillu katersorneqartariaqartut, Inuit Ataqatigiinni isumaqarpugut. Ilisimasat qitiusumik katersuuffeqarnissaat pingaaruteqarluinnarpoq. Namminersornerullutik Oqartussat Ilaqutariinnut Pisortaqarfianni utoqqarnut siunnersorteqalernikkut tamanna qulakkeerneqarsinnaavoq, tassuunakkullu utoqqaat silarsuaannut naapertuuttumik Inatsisartut peqqussusiortarnissaat qitiusumillu malittarisassiorneqartarnissaat qularnaarneqarsinnaalluni.
Maanna Ilaqutariinnut Peqqissutsimullu Naalakkersuisuusoq Ruth Heilmann, Enos Lyberth-ip siunnersuutaanut itigartitsimmat Inuit Ataqatigiit tupigusuutiginngitsuunngilarput, pissutigalugu:
1. Ruth Heilmann Isumaginninnermik Iluarsaaqqinnermut Ataatsimiititaliarsuarmi siulittaasuusimasutut Enos Lyberth-ip siunnersuutaanut assingusumik imaqartumik piviusunngortitsisoqartariaqartoq qasseeriarluni oqaaseqartarmat, Naalakkersuisup itigartitsinera ippigivarput peqqutigalugu,
2. Qinigaaffiup siuliani Ruth Heilmann Inatsisartunut Isumaginninnermut Ataatsimiititaliaanni ilaasortatut ? ataatsimiititaliami ilaasortat allat tamatta peqatigaluta apeqqut taannarpiaq pingaartillugu oqaluuserisassanngortittarsimammagu.
Siunnersuummik piviusunngortitsinissamut periarfissaqalerami Ruth Heilmann-ip akuereqqunagu Inatsiartunut inassuteqarnera tupinnarluinnarpoq.
Siuliani oqaatigeriikkagut tunngavigalugit Inuit Ataqatigiinni siunnersuut tapersersornartuutikkipput nalunaarutigeqqissavarput. Siunnersuutillu aappassaaneerneqannginnerani Ilaqutariinnut Peqqissutsimullu ataatsimiititaliami suliarineqassasoq kissaatigaarput. Naggasiutigalugu oqaatigissavarput aamma siunnersuutip ukiamut aappassaaneerneqarnissaa ilanngullugu akuersaaratsigu.
Per Berthelsen, ataatsimiinnermi aqutsisoq, sinniisussat sisamaat, Demokraatit.
Qujanaq.
Tulliupporlu Ellen Christoffersen, Atassut.
Ellen
Christoffersen, Atassutip
oqaaseqartua.
Qujanaq.
Matumuuna Enos Lyberthip Siumut sinnerlugu Namminersornerullutik Oqartussat
qitiusumik allaffeqarfianni utoqqarnut siunnersorteqalernissamik siunnersuutaa
ATASSUT-miit misissoreerlugu paasilluarparput.
ATASSUT-mili
utoqqarnut ulluinnarni kiffartuussinissamik akisussaaffiit pisussaaffiillu
annertuut kommuneniittut ilisimavarput, tamatumanilu aamma kiffartuusseriaatsit
kommuneni pissutsit assigiinnginneri aallaavigalugit assigiinngittarsinnaaneri
aamma ilisimaarilluarparput.
Oqartussaaffiit
siammarterneqarnerunissaat ATASSUT-mit pingaartilluinnarparput, tassuunakkut
eqaannerusumik pitsaanerusumillu innuttaasunut qanimut kiffartuussineq
anguneqarsinnaammat, taamaattumik Namminersornerullutik Oqartussat qitiusumik
allaffeqarfiup avataatigut utoqqarnut paasisitsiniaasarnissamut
siunnersuisarnissamulluunniit suliniartoqarnissaa ATASSUT-mit orniginartinneruarput.
Ilaqutariinnermut
Naalakkersuisup akissuteqarnermini ilanngullugu erseqqissaatigaa Utoqqaat
Nipaata Nunatta Karsianiit tapiiffigineqartarnera, tapiissutit taakku
paasititsiniaanernut siunnersuinernullu siunertaqartuullutik.
Taamaattumik
ATASSUT-mmi Ilaqutariinnermut Naalakkersuisup akissuteqaataa taperserlugu
Inatsisartuni ilaasortap Enos Lyberthip aalajangiiffigisassatut siunnersuutaa
akuerisinnaanngilarput. Taamaattorli assut kaammattuutigerusupparput Utoqqaat
Nipaata kommuneni utoqqaat siunnersortaasa qanimut suleqatiseriniarneqarnissaat
? tassuunakkut ilisimatitseqatigiittarneq immaqa annerusoq
pissarsiarineqarsinnaassagaluarmat.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq. Tulliupporlu
Astrid Fleischer Rex, Demokraatit, takanna.
Astrid
Fleischer Rex,
Demokraatit oqaaseqartuat.
Qujanaq.
Demokraatininngaanniit siunnersuuteqartoq misiginneqatigingajapparpulluunniit, tassami
utoqqartatta Namminersornerullutik Oqartussani attavigineqarnerisa utoqqarnut
siunnersortimik, taakkununnga immikkut atorfinitsitsinikkut
nakussassaavigineqarnissaa kissatigimmagu.
Kisiannili
takusinnaavarput Naalakkersuisut akissuteqattaannni allakkaat tassuunakkut
kiffartuussinerit allarpassuartigut ingerlanneqarmata, taamaattumik nuna
tamakkerlugu utoqqarnut siunnersortimik atorfinitsitsinissaq
naleqquttuusorinngilaat.
Demokraatiniilli
isumaqarpugut siunnersortimik, qitiusumik allaffeqarfimmi atorfinitsitsinissaq
naleqqulluinnartuusoq, taannaassammammi (taanna atorfinitsitaq) kommunini
utoqqarnik siunnersortinik katersuuffiusussaq, nunarput tamakkerlugu utoqqaat
pillugit arlaannik nikeriartoqaraangat malinnaatitsisussaq.
Demokraatinit
taamatut oqaaseqarluta siunnersuutip ataatsimiititaliamut
ingerlateqqinneqarnissaa siunnersuutiginiaraluaratsigu, maannamut paasisat
naapertorlugit oqaluuserineqartareersimaqimmat ukiamut
aappassaaneerneqarnissaanut ingerlateqqinneqarnissaa inassutigaarput.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Tulliupporlu Anthon Frederiksen, Kattusseqatigiit takanna.
Anthon
Frederiksen,
Kattusseqatigiit.
Qujanaq.
Inatsisartunut ilaasortap Enos Lyberth-ip sinnersuutaa Kattusseqatigiit
sinnerlugit imaattumik oqaaseqarfigissavara.
Siunnersuut
tunngaviatigut isumaqatiginarluinnartoq Inatsisartunut ilaasortamit Enos
Lyberth-imit aamma utoqqaat kattuffianni siulittaasuusumit saqqummiunneqartoq
soqutigalugu misissorpara, aammalu Naalakkersuisut akissuteqaataat
arajutsisaqarfiginaveersaarlugit atuareerlugit, maluginiarpara Utoqqaat Nipaat
minnerpaamik ukiut tamaasa Naalakkersuisunit ataatsimeeqatigineqartartoq
aammalu erseqqissaavigineqartarluni utoqqaat atugarisaasa pitsanngorsaavigineqarnissaat
sutigut pisariaqartinneqarnersoq pillugu. Minnerunngitsumillu aamma Utoqqaat
Nipaat Naalakkersuisuniit paasissutissinneqartartoq utoqqarnut tunngasutigut
suut Naalakkersuisuniit suliniutiginiarneqarsut, suliniutiginiarneqarnersullu
pillugit.
Taamaattumi
apeqqutaalluinnarpoq Utoqqaat Nipaata, Naalakkersuisunit
ataatsimeeqatigiinnittarnerni pilersaarutit il.il. Naalakkersuisunit
suliniutigineqartut suliniutiginiarneqartullu aamma paasissutissat
tamakkerlugit utoqqaat peqatiiffiinut naammaginartumik apuunneqartarsimanersut.
Tassami
Naalakkersuisut nassuiaateqarnerat naapertorlugu, Naalakkersuisut Utoqqaat
Nipaannut paasissutissiisarsimanerat amigaateqarpasinngimmat.
Taamattumik
Naalakkersuisunut kaammattuutitigissavara Naalakkersuisut Utoqqaat Nipaannik
ataatsimeeqateqarsimatillutik
ataatsimiinnerni paasissutissat tunniunneqartartut
Naalakkersuisoqarfimmiit utoqqaat peqatigiiffiinnut tamanut
saqqummiuttaqqullugit, taamaaliornikkut utoqqaat peqatigiiffii tamarmik
assigiimmik paasissutissinneqartaqqullugit susoqarneranik
ilisimatinneqartarniassammata.
Naggataatigut
oqaatigissavara Kattusseqatigiit tungitsinniit orniginartinnerugatsigu Utoqqaat
allallu sulisinnaajunnaarsimasut tikillugit pissutsit piviusut aallaavigalugit
siunnersorneqartarnissaat ingerlanneqarpat pissusissamisoornerussasoq. Soorlumi
aamma kommunit ilaanni tamanna ingerlanneqartoq, taamaattumik Naalakkersuisunut
kaammattuutigorusuppara utoqqarnut siunnersortinik kommunini tamani
atorfinitsitsisoqarsinnaaneranut KANUKOKA suleqatigalugu aaqqiiniartoqarnissaa
sulissutigeqqullugu.
Taamatut
oqaaseqarlunga Naalakkersuisut akissuteqaataat tusaatissatut tiguara.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Maannalu oqaaseqassaaq siunnesuuteqartoq Enos Lyberth, Siumut, takanna.
Enos Lyberth, siunnersuuteqartoq, Siumut.
Qujanaq.
Siullermik siunnersuutima ilaatigut akissuteqarfigineqarnerani
nuannaarutigaakka ilaatigut tamakkiisumik taperserneqarmat, aammalu ilaatigut isumaa
paasilluaraluarlugu immaqa affaannarmik taperserneqarluni.
Kisianni tassa
Naalakkersuisut akissutaannut paasilluarsinnaavara, taanna suliaq aamma
soqutigineqarmat aammalu ilaatigut kommunit, kommuninut taamatut immaqa
atorfinitsitsisinnaaneq suli Naalakkersuisutigoortumik immaqa pitsaanerusumik
inassutigineqarsinnaanera aamma pisariaqartinneqarmat, tamatumani aamma
nuannaarutigaara.
Kisianni tassa
ilaatigut Atassutip aamma taasaa, tassalu Kattuffik Utoqqaat Nipaat ukiumut
tapiiffigineqartartoq, tassa taakkualu aningaasat paasititsiniaanernut utoqqaat
peqatigiiffeqarnerannut aamma inatsisitigut ilaalu ilanngullugit immaqa
atorneqartariaqartut, imaqanngikkaluartoq. Soorunami taanna
ajornartorsiutiginngilarput, kisianni una pivara siunnersuuteqarninni kattuffik
imaalereersoq, tamatta utoqqaagatta aamma ilisimasagut killeqarmata
siunnersuisinnaanerput killilerujussuuvoq, taanna miserratiginagu
oqaatigissavara, imaanngilaq pikkorlunnermik taamaattugut, kisianni utoqqat
peqatigiiffii allatuulli sunngiffimmi peqatigiiffiuvoq, taamaattumik taamatut
pisussaaffilerniarlugulusooq iliorneq isumaqarpunga tulluanngitsoq. Kisianni
suleqatigiilluarpugut, aamma utoqqaat taanna kattuffiat suleqaaq ? taamak
oqarsinnaavugut, maannakkut nunatsinni utoqqaqarunnaarluni uanga oqartarpunga,
utoqqaqarunnaarnikuuvoq, utoqqaat qiimmannikuupput, nuannaalernikuupput aammalu
siumut isigalutik neriuuteqalernikuupput.
Taamaattumik
tamakku tunngavigalugit utoqqaat peqatigiiffiat allartissimasarput, kattuffillu
aallartissimasarput ulloq manna tikillugu sulinera tassani eqqaalaaginnarpara.
Kisianni tassa
aamma Kattusseqatigiit aamma assinganik utoqqaat kattuffia aamma maanngaanniit
qitiusuminngaanniit tapiiffigineqartartoq taanna eqqaavat, taanna ilumoorpoq.
Kisianni taakku aningaasat soorunami ilaatigut atorniartarpagut aamma
højskolertinnerannut, tassani annertoorujussuarmik ilaatigut angallannermut
soorlu Qaanaaminngaanniit Tunu ilanngullugu peqataasut inuit 50 eqqaani,
taakkununnga aningaasat atorneqartarput. Allaffeqarniaraluarpugut kisianni
tassa taakku aningaasat aamma allaffisornermut atugassatut
tapiiffigineqartarput, kisianni soorlu oqartunga amerlanerpaat højskolernermut
akisoqisumut atorneqartarlutik.
Taamaattumik
taakku aamma immaqa aningaasat qanorsuaq eqqartorneqarsinnaagaluartut
tuppallersaatiginiaannarlugillusooq eqqaaneqarsinnanngillat.
Kisianni tassa
kommunini maannakkut aamma immikkoortortaqarfippassuarni paasiniaanerni
erseqqivissumik aana paasinartoq, allaat malittarisassat, peqqussutit
kommunimiit kommunimut allaallumi ilaanni kommunit iluani, pingaartumik
kommunini nunaqarfiit qassiugaangata allaat allatut paasineqarlutik
atortinneqartarnerat. Tassaana tassani erseqqilluinartumik paasinarpoq
siunnersorteqarnikkut qanoq kommunit amigaateqartigisut.
Taamaattumik
taanna apeqqut arlaatigut aamma tikeqqikkumaarakku maannakkut taamatut
tusaatissatut tiguara, kisianni tassa soorlu oqartunga taanna apeqqut
arlaatigut aamma qinigaaffiup iluani uteqqikkumaarakku naatsorsuutigaara.
Aammalu naatsorsuutigigakku aasaq manna ajunngeriarutta sineriak
angallavigigutsigu, tassani aamma paasiniagassat utoqqaat peqatigiiffianni
paasiniagassat tassani aamma tikikkumaarakkit.
Taamaalillunga
tusaatissatut tigussavar, kisianni aamma Inuit Ataqatigiit
qujassuteqarfigissavakka aamma minissinnaanngilakka qutsavigissallugit, taamak
kusanartigisumik apeqqummut soqutiginninnerat, taamaattumik taakkua immikkut
Inuit Ataqatigiit aamma qutsavigissagakkit tupigineqarsinnaanngilaq.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Tulliupporlu Ilaqutariinnermut Naalakkersuisoq, takanna.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Qujanaq. Tassa
siullermik qujassutigaara siunnersuuteqartoq taamatut aamma paasinnilluni
nassuiaateqarnera pingaartumik nammineq Utoqqaat Nipaanni ukiorpassuarni
soorunami siulittaasutut misigisimasani aamma uani oqaatigimmagit, utoqqarnut
suliniarnini qanoq angusaqarfigisimallugu, allaat utoqqaat imminnut utoqqartut
isigiunnaarsimanerat taanna aamma Enosip nammineerluni angusarimmagu,
taamaattumik tassuunakkut aamma nersualaartariaqartutut isumaqarfigaara uanga.
Aamma qujavunga
Naalakkersuisut akissuteqaataat Siumumit, Atassummit aamma Kattusseqatigiinnit
isumaqatigineqarmat. Ilumoorpoq aamma Inuit Ataqatigiit oqaaseqarnerminni uanga
Isumaginninnermi Iluarsaaqqinnermi Ataatsimiititaliarsuarmi siulittaasutut
aamma taanna ilungersuutigisarlugu oqaatigisarakku, pingaartumik aamma
ataatsimiititaliamiinninni. Kisiannilu massakkut soorunami killiffiusoq
eqqarsaatigalugu aammalu kommunini siammarterineq, kiisalu ullumikkut aamma
suleqatigisagut Atassut aamma Siumullu uani suleqatiginissaminnut
isumaqatigiissutaanni ersarilluinnartumik aamma oqaatigineqarmat, utoqqarnut
siunnersuisoqarnerup kommunini tamani nukittorsarneqarluni
ingerlanneqarluarnissaa Utoqqaat Nipaat peqatigalugu Naalakkersuisooqatigiit
sulissutiginiarpaat.
Soorunami taanna
aallaavigalugu aammalu massakkut paasisat kingulliit eqqarsaatigalugit qitiusumik
utoqqarnik siunnersorteqarnerup qimakkiartuaarnissaa taanna
siunnerfigineqarsimavoq. Nalunngilara Naalakkersuisut assigiinngitsut sisamat
immaqa ingerlaneranni taanna Utoqqaat Nipaata qaqittarsimagaa,
Naalakkersuisunik oqaloqatiginnittarnerminni ilaatigullu
neriorsorneqapajaartutut aamma taamatut Utoqqaat Nipaata oqaaseqartarnermini
aamma taassumap piviusunngortinnissaa isumalluarfigalugu aamma
inissittarsimasoq.
Kisianni
allaffeqarfimmi aamma pisortaqarfimmi, kommunillu oqaloqatigisarnerini una
massakkut siunnerfiusoq, uanga aamma akissuteqarninni unaavoq kommunini
utoqqaat siunnersorteqarnissaat taanna orniginartinneqarnerusoq. Aamma
Nanortalimmi misilittagaasut tassani aamma takutippaat, pitsaasumik qanimut
utoqqaat tassani siunnersorneqarnerat ingerlanneqartoq, taassumallu
maligassiuinera aamma kommuninut allanut eqqarsaatigalugu nuannaarutigaara.
Aamma uani Siumut oqaaseqarnermini, taamatut siunnersuisut
nukittorsarneqarnissaat aammalu pikkorissartinneqarnissaannut aamma
siunnerfilimmik. Aamma Naalakkersuisunut oqariartuuteqarmat, tassani
siunnersuuteqarlutik kommunini utoqqarnut siunnersortit immaqa ataatsimut
katillutik aamma pikkorissaqatigiillutik nukittorsarneqartarnissaat taanna
inatsisit tunngaviusut aamma pikkorissarfigalugit ingerlasoqalernissaat, taanna
isumaqarpunga naleqqunnerpaasoq aamma uanga nammineq taanna maannakut
isumagaara.
Taamaattumik
qitiusumik siunnersorteqalernissamik oqalunneq taanna aamma uanga nammineq
oqaatigisarsimasara qimassimavara, aammalu paasinnillunga kommunit nammineq
aamma pisussaaffeqarmata utoqqarnik annertuumik aammalu qitiusumik taamatut
siunnersortimik siusinnerusukkut atorfeqartitsisoqarnikuuvoq, tassanilu aamma
misilittagaasut aallaavigalugit qimanniarneqarnikuulluni utoqqarnik qitiusumik
siunnersorteqarnermik. Taamaattumik tassuunakkut isumaqarpunga
paaseqatigiissuteqarsinnaasugut soorlu uani Atassut, Siumut, Kattusseqatigiillu
oqaaseqarnerminni taanna aamma taamatut isumaqatigiissutigigaat uani aamma
oqaaseqarnerminni.
Utoqqaat Nipaat
qanimut qanittukkut aamma ataatsimeeqatigivakka, soorlu Kattusseqatigiit
oqaaseqarnerminni aamma maannakkut Utoqqaat Nipaat allamik
siulittaasortaarnikuuvoq, naak uani oqaraluartoq, massakkut Enos
siulittaasuusutit, kisianni massakkut Jens Larsen siulittaasunngornikuuvoq
aamalu qanittukku Utoqqat Nipaat oqaloqatigineranni, aamma assigiinngitsut
tamakku eqqartorpavut aammalu paasilluarsorivara uagutsinninningaanniit aamma
oqaatigineqartut massakkut oqaatigineqartut assingi, tassa kommunini
siunnersortit pilersikkiartuaarneqassasut aamma peqarfiunngitsuni,
tassuunakkullu aamma pikkorissartitsinerit, siunnersuinerillu
ingerlanneqarsinnaasut. Kommunini, kommunit KANUKOKA-lu aamma suleqatigalugit
taakkua nukittorsarneqarsinnaasut.
Taamaattumik
isumaqarpunga Utoqqaat Nipaat peqatigiiffiup aamma nammineq tassani
peqatigiiffeqarnermikkut soorunami kattuffiullunilu pimmat aamma nammineq qanoq
maani oqaloqateqarsimanertik Naalakkersuisumut aamma siammartertussaavaat,
qularnanngilaq siulersuisut aqqutigalugit.
Aammalu qanittukkut
Pilutaq-imi utoqqaat højskolertinneqarmata Nuummi, Nuummi najugaqartut, Nuup
Kommuniani najugaqartut aamma annertuumik tamakku pillugit eqqartuinerat
rapportiliaminni massakkut nassiussaminni aamma siammarneqartussami aamma
atuarneqarsinnaapput. Taamaatumik isumaqarpunga uani akissuteqarnerput taamatut
amerlanerussuteqartunik paasineqarluni aamma tusaatissatut tiguneqartoq uanga
Naalakkersuisut sinnerlugit nuannaarutigaara, taamatut naaperiarfeqarnerput.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliullunilu
oqaaseqarumavoq Inuit Ataqatigiinni oqaaseqartuusoq Asii Chemnitz Narup,
aappassaaneerluni.
Asii Chemnitz
Narup, Inuit Ataqatigiit
oqaaseqartuat.
Qujanaq.
Killuulluta Inuit Ataqatigiinninngaanniit siunnersuuteqartoq sinnerlugu
aliasungaarpugut itigartinneqarmat, uanga tupiginngilara Naalakkersuisoq
oqaaseqaqqikkami siunnersuuteqartumut qujammut, tassami siunnersuuteqartup
aappassaanik oqaaseqarami maniguuppaluttorujussuarmik nipeqarpoq Naalakkersuisunut.
Tupigilluinnarparput unaana siunnersuut pitsarujussuaq ilungersuussassaq
parteeqatigigaluaraanniluunniit Naalakkersuisut, utoqqaat sinnerlugit
pakatsivunga, utoqqaat sinnerlugit ajuusaarpunga, utoqqartagut sinnerlugit
aliasuppunga. Isumaqarpunga tunngavilersuutit ikkappallaarujorujussuartut
Naalakkersuisup tungaaninngaanniit, aamma Naalakkersooqatigiit partiivisa
oqaaseqartuisa tunngavilersuutaat atorsinnaanngillat.
Tunngavilersuinissinni
kaputartuuppasi susassaqarfiit assingiingitsut pingasut, Utoqqaat Nipaat
kattuffiuvoq ? aap ? taamaattumik kattuffittut Landskarsikkut
tapiiffigineqarnissaat pissusissamisoorluinnarpoq, soorlu kattuffippassuit
allat aamma tapiiffigineqartartut, tassani kattuffittut suliassanut tapiissutit
atorneqatussaapput, imaanngilaq kattuffiit pisortat suliaannik
oqilisaassillutillusooq suliakkerneqartartussanngormata. Kattuffeqarneq
immikkut isumaqarpoq kattuffiit peqatigiiffimminni assigiinngitsunik
suliassaqartinneqarlutik taakkunanngalu naammassinninnissaminnut tapiiffigineqartarput.
Aap, taava
kommunit ataasiakkaat qujanartumik utoqqarnut siunnersorteqalersimapput,
tamanna qujarutissaavoq, aamma paasisassarsiorluni angalanermi
naapikkaangatsigit paasinarpoq, paasivarput suliassaat ukiuni makkunanerpiaq
annertusiartuinnartut.
Aamma
nuannaarlutik sulisut malunnartarpoq, kisiannili ujartuisarput taanna aamma
paatsuugassaanngiivissumik apuuttarpaat oqaloqatigisarnerini. Qitiusumi inummik
aalajangersimasumik misilittakkatsinnik aporfiusartakkatsinnik
apuussiffigisinnaasatsinnik amigaateqarpugut, tassaavoq qitiusumik
allaffeqarfiit Namminersornerullutik Oqartussat allaffeqarfiisa pisussaaffiat,
taanna qimarratigineqarsinnaanngilaq Inuit Ataqatigiit isumarput malillugu.
Aamma qaammatit
amerlasoorsuunngillat matuma siornagut qineqqusaaratta, partiit
qalleraatiinnarlutillusooq utoqqaat atugaannik pitsanngorsaaniarlutik
eqqartuipput, piffissanngormat naak timitaleerusuttut? Tamanna utoqqarnik
ataqqinninneruva?
Taava Naalakkersuisup
aamma Naalakkersuisooqatigiit partiit taakkua marluk oqaaseqartuisa
tunngavilersuutiminni tassa uterfigivaat, kommunit ataasiakkaat utoqqarnik
sullissineq isumassuinissaq akisussaaffigimmatigit, taava pisariaqanngitsoq
qitiusuminngaanniit siunnersorteqalernissaq. Taava meeqqanik sullissineq aamma
kommunit akisussaaffigivaat, taava aamma pisariaarutissava katsornannguaq
qitiusuminngaanniit meeqqat pillugit immikkut sullississunik
atorfinitsitsinissaq? sumununa ingerlasugut?
Nunarput angeqaaq
inoqarfiit isorartoqaat, siammaseqaat taamaattumik aamma inuuniarnikkut atukkat
assigiinngitsorujussuupput, sumiiiffimmiit sumiiffimmut. Tamanna pisuussutitut
isigivarput uagut Inuit Ataqatigiinni. Kisianni aamma pisussaaffiuvoq immikkut
ittumik misilittakkat, ilisimasat tamakkua ajornartorsiutaappata imaluunniit
ajunngitsuuppata. Arlaanni qitiusumut apuunneqartariaqartarput, aatsaat
tassuunakkut qitiusumik malittarisassiornermi taava
tunngavissarissaartoqarsinnaalissammat.
Taamaattumik
akisussaaffiit siammasissuunissaat suliassallu siammasissuunissaat
tunngaviatigut tapersersortuarparput, kisianni aamma pingaartittarparput
qitiusumik tamakkua apuunneqartarnissaat. Taamaattumik isumaqartuarsinnarpugut
Inuit Ataqatigiinni Enos Lyberth-ip siunnersuutaa kikkunnit tamanit
tapersersorneqartariaqaraluartoq.
Nalunngilara
Naalakkersuisooqatigiit oqartarput allaffisornikkut sipaarniarnissaq taanna
pisariaqartorujussuusoq, taanna peqqutaasimappat taava taanna tunngavilersuut
unneqqarissumik saqqummiunniarsiuk, oqarnasi kommunit ataasiakkaat
akisussaaffigimmatigik utoqqartami sullinnerat taava qitiusumiit
susoqassanngilaq.
Siumuminngaanniit
Doris Jakobsen oqaatigivaa utoqqaat namminneq peqatigalugit suliniutit
assigiinngitsut ingerlanneqartariaqartut. Aap, taanna Utoqqaat Nipaat
aqqutigalugu ingerlanneqassooq, qanorluunniit utoqqaat qanimut
peqatigitigigaluarutsigilluunniit aamma peqatigiiffiit kattuffeqarnerallu
aqqutigalugu suleqatigiittoqartigigaluarpat, taava pisortat tungaaninngaanniit
aamma pisussaaffeqarpugut. Utoqqaallu atorfissaqartitsisut isumalluuteqarput
pisortanit amerliartortillugit, taava pisussaaffiliivoq aamma pisortanit
ingerlatsisunut taanna avaqqunneqarsinnaanngilaq.
Allaat
oqarusunnarpoq utoqqaqanngippallaaqaasi Inatsisartuni. Ullumikkut ulloq
quarsaarnarpoq allatut oqartoqarsinnaanngilaq.
Aamma
ilisimaaraarput pingaarnersiuilluni tulleriissaarisaq sumiluunniit
pisariaqartuarmat aamma Naalakkersuinikkut sulinermi. Una siunnersuummik
itigartitsineq imatutut paasisariaqarparput uagut Inuit Ataqatigiit
tungaaninngaanniit, Naalakkersuisooqatigiit pingaarnersiuillutik
tulleriissaarinermi utoqqartagut pingaarnerunngitsutut massakkut
inississimagaat, tamanna aamma ajuusaarnarpoq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Suli tallimat
nappaareernikuupput, tulliupporlu Ellen Christoffersen, Atassut.
Ellen
Christoffersen, Atassutip
oqaaseqartua.
Qujanaq. Tassa
Atassumminngaanniit isumaqarpugut pingaaruteqarluinnartoq aamma
erseqqissaatigissalugu kingumut, aap soorunami pisariaqarpoq utoqqaat
atugarisaasa pitsanngorsartuarneqarnissaat aammalu eqqumaffigiuarnissaat qanoq
pisariaqartitsisoqartiginersoq. Taamaattumik qanimut utoqqaat
ikiorsiiffigineqarnissaat pisariaqarluinnarpoq tassuunakkut ? aap ?
Ilaqutariinnermut Naalakkersuisup eqqaareerpaa KANUKOKA-mi qanimut
suleqateqarnissaq, taanna aamma Atasumminngaanniit pingaartilluinnaqqissaarlugu
aamma kingumut kajumissaarutigeqqissavarput, taamatut utoqqaat atugarisaasa
KANUKOKA-mi utoqqaat siunnersorteqarnera atorluarlugu aamma suliassat
ingerlatseqqinneqarsinnaaneri.
Qaleriiaartumik
sullissineq pissanngippat, qanigisamiit siunnersorneqarnissaq
ingerlanneqartariaqarsorivarput Atassummiit. Imatut aamma
pisarissersuisariaqanngilagut utoqqarnut, utoqqarnut ataqqinniluta Atassummi
aamma isumaqarpugut, taamaattumik pisarissersuerusunngilagut taamak
utoqqarnnut, naak immaqa Enos oqaraluartoq ullummikkunngooq utoqqaqanngitsoq,
utoqqaat qiimmallutik eqeersimaaleruttortut.
Kisianni
taamaakkaluartorluunniit sapinngisamik inuiaqatigiinni kiffartuussineq
annertooq eqaannerusorlu anguniarumalugu pisariinnerpaaq innuttaasunut
anguniarumavarput, utoqqaappata, inuusuttuuppata, inersimasuuppata, arnaappata
angutaappataluunniit.
Aamma taamatut
marloqiusamik saaffiginnittarfinnik pilersitsissagutta taava qanoq aamma
pisoqariataarsinnaava, tassa paatsiveerunnermik allat aamma
pilersitsisoqarsinnaavoq. Tamakkua aamma pinngitsoorniarneqartariaqarput
paatsiveerussaarisariaqanngilaq inuiaqatigiit akornanni saaffiginniffissat
arlaqartunngortinneratigut.
Utoqqaat Nipaat
aningaasaliiffigineqartarneranut tunngatillugu, aap immaqa aningaasat
naammannerpaasarsimanngitsutut nalilerneqarsinnaapput Utoqqaat Nipaata
tungaaninngaanniit, aamma taanna maalaarutigineqarsimappat
paasilluarsinnaavara, soorunami peqatigiiffilerineq imaluunniit kattuffilerineq
oqitsuaannartuunngilaq. Kisianni taamaakkaluarpalluunniit Naalakkersuisut
nassuiaateqarnerminut ilaatigut aamma erseqqissaatigivaa taamatut
tapiissuteqarnermi ilaatigut siunertarineqartoq paasititsiniaaneq,
siunnersuinerlu suliarineqassasoq taava kattuffimminngaanniit aningaasat taakku
atorlugit.
Taakku
naammassimassanngippata taava kaammattuutigiinnassavara Utoqqaat Nipaannut,
aamma Naalakkersuisut naapeqatigisarnerani tamakkua erseqqissumik aamma oqaatigineqartarnissaat,
minnerunngitsumillu aamma tusaaniarneqartarnissaat.
Minnerunngitsumik
aamma takusinnaavarput pingaaruteqarluinnaqqissaartoq Atassumminngaannit
taamatut Utoqqaat Nipaata Naalakkersuisunit naapeqateqartarnermigut
pilersaarusiorsinnaanerit immaqa aamma qanimut
ingerlaqatigiinniarsinneqarsinnaasut. Kisianni tassa kingumut
Atassumminngaanniit oqaatigissavarput pingaaruteqarsorivarput, tassa
sinerissamut agguataarlugit taamatut siunersuisoqartarsinnaaneq utoqqarnut
pisariaqarnasorivarput, pisariillisaaneq taavalu minnerunngitsumik aamma
paatsiveerutinnginnissaq qulakkeerneqartariaqarmat.
Tassunga aamma
ilanngullugu ilaatigut Inuit Ataqatigiit oqaaseqartuata oqaatigivaa, utoqqaat
sinnerlugit ajuusaarluni, tamatut itigartitsisoqarnera peqqutigalugu.
Utoqqaat tamaasa
taamatut sinnerlugit ajuusaarsimassappat oqaatigiinnassavara, utoqqaat ilaanik
uanga nammineq oqaloqateqartarninni erseqqissaatigineqartarmat sinerissami
utoqqaat siunnersorteqarunik pitsaanerpaasoq, imatut qitiusuminngaanniit
paatsiveerussaarisutut inornartutullu allaat inissittoqannginnissaa
kissaatiginarnerutittarmassuk.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Doris Jakobsen, Siumut aappassaaneerluni. Taassumalu kingorna
siunnersuuteqartoq Enos Lyberth.
Doris
Jakobsen, Siumup
oqaaseqartua.
Siullermik
Siumuminngaanniit oqaatigissavara, uagut aamma Siumumi utoqqaat
pingaartilluinnarlugit sullinniaratsigit, apeqquserneqartariaqanngilaq una
siunnersuut tunngavigalugu tunngavilersuinerput, taanna tunngavigiinnarlugu
utoqqarnik sumiginnaasugut ? taamaattoqanngilluinnarpoq. Sapinngisarput tamaat
utoqqaat pitsaanerpaamik atugaqarnissaat Siumuminngaaanniit sulissutigivarput.
Uani
siunnersuummi tunngavilersuutigut paasineqartariaqarput aamma. Utoqqaat
Kattuffiat oqaatigineqarpoq Utoqqaat Kattuffiat ukiumut minnerpaamik
Naalakkersuisunik naapeqate-qartartoq, ataatsimeeqateqartartoq Naalakkersuisut
naalakkersuisoqarfiit pisussaaffeqarnertik naapertorlugu kommuneni sulisuni
ilitsersuisartut. Aammalu pisariaqarfiisigut pikkorissaasar-lutik,
innuttaasunik paasititsiniaasarlutik aamma inatsisit nutaat aallaavigalugit.
Taamaattumik
aamma taakkua eqqummaariffigisariaqarpagut, uagullu Siumuminngaanniit
oqaatigivarput, taamatut paasititsiniaasarneq qitiusuminngaanniit
amigarsimappat taava pitsaanerusariaqarpoq.
Inuit
Ataqatigiit oqaaseqartuata eqqaavaa, ilisimasat nutaat
katersorneqartariaqartut. Aamma qularinngilluinnarpara Ilaqutariinnermut
Peqqissutsimullu naalakkersuisoqarfimminngaanniit ilisimasat nutaat
eqqummaariffigineqarluinnartut.
Taamaattumik
immikkut Siumuminngaanniit uagut taamatut siunnersuisartussamik
pilersitsi-nissaq isumaqatiginngilarput isumaqatiginngilarput, isumaqaratta
maannakkut kommunet ingerlataat taakkua naammareersut. Taakkualu aamma
pitsanngorsaqqinneqartariaqartut.
Taamatut
oqaaseqarlunga oqaatigeqqissavara Siumuminngaanniit uagut utoqqaat
ajattunngil-luinnaratsigit.
Ja, qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Maannalu
siunnersuuteqartoq Enos Lyberth, Siumut, aappassaaneerluni tulliutissaarlu
Ilaquta-riinnermut Naalakkersuisoq.
Enos Lyberth,
siunnersuuteqartoq, Siumut
Qujanaq.
Naatsorsuutiginngilara
Inuit Ataqatigiit sinnerlugit qiassasut.
Uanga naamik qianissannik
aamma narrujuumminissannik eqqarsaateqanngilanga, tassami qinigaaffik aatsaat
siulleq qaammatialunnguit qaangiupput.
Taamaattumik
nuannaarutigilluinnarpara aamma Ilaqutariinnermut Naalakkersuisup ilaatigut
kommunet immaqa annerusumik pisussaaffilerneqarsinnaanerannik, tassa
pisussaaffiliinerup aamma nassatarisartagai nalunngilagut aningaasat ilaalu
ilanngullugit. Taanna aamma periarfik isigimmagu aammalu tassa taanna uagut
immikkoortoqarfinni sulinitsinni peqatigiif-feqarnitsinni aamma kattuffeqarnitsinni
assorujussuaq maqaasisarparput.
Taamaattumik
taassuma Ilaqutariinnermut Naalakkersuisup aamma eqqaammagu uanga nuannaraara,
tassa taamaalilluni periarfissaq aamma annerusumik isigineqarsinnaammat.
Taavalu aamma
tapiisarneq ilaatigut Atassumminngaanniit eqqaaneqartoq, ilaatigut imaattoq
oqaaseq atormagu immaqa paatsiverusaanermik, taanna isumaqarpunga aamma
ingasappal-laartoq oqaatigissallugu.
Tassa qitiusumik
siunnersorteqarneq aammalu kommunemi siunnersorteqarneq ukiorpassuar-ni
misilittagaqarfigaarput. Taannalu ajornartorsiutaanngilaq.
Taamaattorpassuaqarpoq soorlu qiviaannaraanni ilaqutariinnermik pisortaqarfimmi
siunnersorterpassuit. Taanna neriuutigaara aamma paatsiveerusaarinermik
oqalunneq aamma ingasappallaalaartoq.
Kisianni aamma Ilaqutariinnermut
Naalakkersuisup taasaa ilaatigut sulisunik pikkorissaasar-neq, aamma taanna
kattuffimminngaaniit ukiorpassuit pimoorullugu suliniutigisarsimasarput aamma
taanna eqqaammagu assorujussuaq aamma nuannaarutigaara.
Naatsumik
oqaatigalugu naatsorsuutigaara taanna suliassaq maannamut unissanngitsoq aamma
taamaatissanngitsoq. Soorlu aamma oqartunga aasamut angalaartussaavugut,
angalaartussaavunga ilaatigut. Taannalu aamma apeqqut
tikeqqinneqanngitsoornavianngilaq. Taamaalillunga aamma ajunngeriarutta
qinigaaffiup iluani aamma qaqeqqinneqarsinnaanera naatsorsuutigissavarsi.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Ja,
ilisimatitsissutigilaassavara tassa nalinnginnaasumik ataatsimiinnermut
unittarfipput maanna arfineq tikikkatsigu, kisianni tassa suli tallimat
nappaanikuupput. Tulliupporlu Ilaqutariinnermut Naalakkersuisoq. Takanna.
Tulliutissaarlu
Anthon Frederiksen, Kattusseqatigiit.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Qujanaq.
Tassa
isumaqatigilluinnarpara Inuit Ataqatigiit oqaaseqartuat Asii oqarmat, nunarput
aningi-suuvoq aamma siammasissuulluni. Taamaattumillu qitiusumik taamatut siunnersorteqassa-gaanni
angujuminaatsorujussuussaaq soorunami aamma siunnersortaasunut. Taamaattumik
Naalakkersuisut pingaartippaat kommuneni siunnersuisut nukittorsarneqarnissaat,
aammalu pikkorissartinneqarnissaat taanna aamma aallartissallugu suliniutigissallugulu.
Taamaattumik
tassuunakkut aamma nukittorsaanitsigut pikkorissaasarnertigullu ilaatigut
Siumut oqaaseqarnermini allaat, ukiut tamaasa taamatut pikkorissaasarnerit
nukittorsaasarne-rillu ingerlanneqarnissaannik siunertaqartumik.
Taanna ilassilluarusunnarpoq
aamma pisorta-qarfimminngaaniit massakkut Ilaqutariissutsi-mut
Pisortaqarfimminngaanniit, aamma tassani utoqqarnut assigiinngitsutigut, aamma
utoq-qaat nammineq apeqqutissaqaraangamik aamma periarfissaqarput arlaatigut
ikiorserneqartar-nissaminnik.
Taamaattumik
isumaqarpunga uani taamatorujussuaq aliasuutissaanngitsoq, massakkut uagut
Naalakkersuisuni siunnerfipput allaat immaqa
nuannaarutigiinnarneqarsinnaasariaqartoq tassa massakkut utoqqarnut
siunnersorteqarnerup, immaqa kommuneni arlalinni ingerlanneqartup suli
annertusarlugu aammalu pikkorissuseqarnerusumik ullumikkornit soorlu Utoqqaat
Nipaa-ta kissaatigaat taanna. Ingerlanneqarnissaa massakkut pikkorissaanerit
aqqutigalugit ingerlan-neqarsinnaanngussammat.
Uani
utoqqaqanngippallaarasimik oqalunneq isumaqarpunga partiit tamarmik utoqqaat
ajunngtsumik atugaqarnissaat aamma ukiorpassuarni maani tamanna
anguniarneqarmat. Aammalu massakkut killiffiusoq eqqarsaatigalugit siunissarlu
aamma eqqarsaatigalugu, suli annertunerusumik utoqqaat pitsaasumik
atugaqarnissaat tamarmik partiit aamma Kattusseqati-giit taanna kissaatigivaat.
Taamaattumik
taamatut Inuit Ataqatigiit Asii oqaaseqartoralugu taamatut
utoqqaqanngippal-laarneragaanerput uanga akuerisinnaanngilara.
Qitiusumik uagut
suliassaraarput kommunet nukittorsassallugit tassuunakkut. Taamaattumillu
taanna isumaqarpunga KANUKOKA peqatigalugu suliarissaqqaarparput, aammalu
pilerinar-poq suliassat taamaattut ingerlatissallugit.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Oqareernittut
tulliuppoq Anthon Frederiksen, Kattusseqatigiit.
Taassumap
kingorna Jens Napaattooq, Siumut. Siumup oqaaseqartuata avataatigut.
Takanna.
Anthon
Frederiksen,
Kattusseqatigiit.
Tassa Kattusseqatigiit
sinnerlugit saqqummiussinermi oqarpunga siunnersuut tunngaviatigut
isumaqatigilluinnartillugu.
Kisiannili
soorunami Naalakkersuisut akissuteqataat aamma isumaqarpunga paasilluarlugu.
Naalakkersuisut akissuteqaataat tusaatissatut tigullugu.
Minnerunngitsumik
suliassat agguataarneqartarnerat soorunami tamatta aamma qularnanngit-sumik
ilisimasaqarfigilaarunarparput. Suliassat suut kommunenit suliarineqassanersut,
aammalu suut Namminersornerullutik Oqartussani suliarineqassanersut.
Uani Naalakkersuisut
akissuteqaataat uanga oqaaseqarninni ilaatigut tunngavigisimavara
kaammattuutigalugu Naalakkersuisunut siunnersuisarneq kommuneniippat taanna
utoqqaat qanimut tikillugit tassani pitsaanerutillugu.
Ilaatigut
Naalakkersuisut akissuteqarnermini imatut allammata, issuaalaarpunga,
Utoqqarnik
kiffaartuussineq, siunnersuineq, ilitsersuinerlu kommunet susassaqarfiisa
oqartus-saaffiisalu iluaniippoq.
Tassa taakkua
saqqummiussaqarniarninni ilaatigut tunngavigisimavakka naatsorsuutigigakku
susassaqartut assigiinngitsut tamarmik paaseqatigiillutik, taakkua
oqartussaaffiit taamaatut aaqqinneqarsimaneri Naalakkersuisuniit
saqqummiunneqarmat.
Taamaammat Inuit
Ataqatigiit oqaaseqartuata oqarnera, tassa utoqqaqannginnera qanormaa
utoqqatserpunga, utoqqaqanngippallaartugut inatsisartuni. Uanga taanna
illuatungilerusuppara ilumuunngimmat.
Utoqqaqannginnermik
isumaqarpunga patsisigissallugu taamatut oqarneq tunngavissaqarpian-ngitsoq.
Tassami
naatsorsuutigisariaqarpara uanga Naalakkersuisut akissuteqaamminni sallunatik
eqqortumik oqarsimassasut. Suliassat agguataarneqartarnerat eqqarsaatigalugu.
Taanna susassaqarfik kommuneniinnerarneqarmat. Taamaattumik-una saqqummiussininni oqartunga Naalakkersuisut, utoqqarnik siunnersuisarneq kommuneni KANUKOKA peqatiga-lugu aaqqissuussisariaqartut. Taamaalilluni kommunet akissaqanngitsut akissaqannginnerusut aamma eqqarsaatigalugit taperserneqarsinnaanerat tassuuna anguneqarsinnaappat, utoqqaat tikillugit kiffartuunneqarsinnaanerat qitiusuminngaanniit kiffartuussinermik isumaqarama pitsaanerusoq.
Tassami utoqqaat aamma uagut, aamma uanga oqaloqatigisaqaakka imaanngitsoq utoqqaqan-nginnama soqutiginngilluinnarikka, aamma utoqqaat qujanartumik uannut saaffiginnittartut arlalissuusarput.
Taamaammat utoqqaqannginnermik oqalunneq taanna pakatsissutigilaarpara, kisianni neriup-punga aamma tamatta utoqqaqarluta ingerlaqqissasugut.
Per Berthelsen, ataatsimiinnermi aqutsisoq, sinniisussat sisamaat, Demokraatit.
Maannalu oqaaseqassaaq Jens Napaattooq, Siumut. Tassa Siumup oqaaseqartuata avataatigut siullermeerluni.
Tulliutissaarlu Asii Chemnitz Narup pingajussaarluni.
Jens
Napaattooq, Siumut.
Ajuusaarpunga
pakatseqalungalu taama ajortigisumik nalilersuinnaratta.
Suna tamarmi ajortoq.
Kisianni pissutsit
taamaavinngillat. Inuiaqatigiit akornitsinni aamma utoqqartaqarpugut
inger-lalluartunik. Inuiaqatigiinnilu allaat aamma suleqataasunik.
Uani
utoqqaqannginnitsinnik oqariatortoqarneq partiit allanut adresselerlugu
isumaqarpunga pissusissamisuunngitsoq. Unami Inuit Ataqatigiit
oqariartornermini immaqa eqqarsaatigin-ngitsoorsimannguatsiarpaat naluara.
Uagut siunnersuuteqartortarput Siumut sinnerlugu nammineq Siumuummat.
Taamaattumik
ilaatigut aamma tassuunatigut ersiinnarpoq utoqqartaqarnitsinnut utoqqaat
atugaat pillugit illersuisortaqartugut. Kisiannilu uani politikkikkut killiffik
eqqarsaatigalugu qitiusuminngaanniit aqutsinerujussuaq qimakkiartornissaanut
oqaluutigalugu, kisianni qitiusu-mik allaffissornikkut annertunerusumik
alloriaqqinnissamik illuatungaatigut meerujulluta vavavaarutigissagutsigit
imminnut ataqatigiinngilluinnaqqissaarput taakkua.
Aamma
kommunet bloktilskudit agguaasseqqittarneranut tunngasumik
isumaqatigiinniartar-nerminni tunngatillugu, utoqqaat amerlassusaat qanoq
amerlatiginersut utoqqaat kommuneni kisinneqartarput.
Taannalu
aallaavigalugu utoqqarnut tapiissutigineqartartut aamma inissinneqartarlutik.
Assersuutigiinnarlugu utoqqalinersiutit tunniunneqartarneranni aamma
qitiusuminngaaniit 90%-imik akiliisoqartarpoq, kommunet taamaallaat 10 %-i
akilertarpaat.
Taamaattumik
qitiusuminngaannit politikkikkut asuli utoqqaqanngitsutut
inissisimasoqaan-nanngilaq. Aamma 2001-imi utoqqaat atugaat aningaasatigut
misissuiffigineqarsimapput qitiusuminngaaniit. Tassuunatigut ersersinneqarpoq
inuiaqatiinni Kalaallit Nunatsinni isorar-toqisumik kommuneqarfimminngaaniit
kommuneqarfimmut, utoqqaat atugaat assigiinngeqi-sutigut
assigiinngissuteqartut.
Taamaattumik
aamma politikkikkut qitiusuminngaannit suusupagineqanngitsut tassuunatigut takuneqarsinnaavoq,
qulaajarneqarsimammat siunissamut politikkikkut alloriaqqinnissamut
qitiusuminngaanniit qanoq inissisimasoqarnera paasineqarluni maannakkut
sakkussaqalersi-natsinnik killiffeqaratta.
Taamaattumik
qitiusuminngaanniit aqutsisoqarunnaarluni uani kommunet
nukittorsaqqittaria-qarnerannik ersarilluinnartumik
paatsoorneqarsinnaanngitsumik naalakkersuisooqatigiit partii sinnerlugit
oqariartuuteqarput. Taanna akisussaaffik kommuneqarfimmiittoq Naalakkersuisut
taanna aamma oqariartuutaat taperserlutigut.
Aamma
ilaatigut Siumuminngaanniit uagut saqqummiisutta ersarissarpaa, tamanna
nukittor-sarneqaqqittariaqartoq. Pisariaqassappat ukiumoortumik aallaat
siunnersorneqarnerat annertuumik tikinneqarsinnaalluni.
Taamaattumik
puupassaarutigaluni paatsoorsarneqassanngilaq utoqqaqannginnerarluta
oqari-artuutigineqarluni.
Uanga
nammineq aanakkunni aatakkunni utoqqarni peroriartorsimavunga, taamaattumik
aamma utoqqaat atugaat nammineq qanimut misigisaqarfiginikuusimavakka. Kisianni
aamma nalunngilluinnaqqeqqissaarpara maannakkut utoqqaat pisinnaatitaaffitsik
ilikkariartorpaat, inuiaqatigiinni ineriartornitsinni allatuulli.
Aamma
ilisimalersimavarput maannakkut kattuffik ingerlanerminni annertuumik
ilisimasaqa-lersimasoq. Tamannalu ilaatigut aamma qitiusumik oqariartornermik
kingunerisaanik tamatu-ma peqalersimaneranik aqqutissiuisimalluni.
Taamaattumik
utoqqaat tamarmik ajortuinnaanngillat. Ajunngitsumik ingerlasortaqarput.
Utoqqaat tamarmik suusupagiinnanngilagut, soorunami utoqqaat ilungersortut
ilaat nalunngi-larput avatangiiserarlugit.
Aamma
taakku saqqummiinermi siuliani eqqartorneqartut siunnerfigineqartut
ersarilluinnartu-mik oqariartuutigineqarput partiininnganniit.
Suusupagineqanngilluinnaqqissaarput
naamerluinnaq.
Per
Berthelsen, ataatsimiinnermi
aqutsisoq, sinniisussat sisamaat, Demokraatit.
Tulliupporlu
Asii Chemnitz Narup, pingajussaaneerami Inuit Ataqatigiit pingajussaanerami
minutsit marlut killigalugit.
Tulliutissaarlu
Ane Hansen, Inuit Ataqatigiit.
Asii
Chemnitz Narup, Inuit
Ataqatigiit oqaaseqartuat.
Taamaappat
akulikitsuararsuarmik oqaluttariaqassaanga.
Uani
qitiusuminngaannit aqutsineq pineqanngilluinnarpoq. Uani pineqarami
qitiusumin-ngaanniit siunnersorneqarnissaq, taanna allarujorujussuuvoq.
Taamaattumik
kommuneni atorfillit pisariaqartittarpaat utoqqarnik sullissinerminni aamma
qitiusuminngaanniit siunnersorneqarnissartik. Taanna allarujussuuvoq
aqutsinerminngaanniit.
Taanna
paasillaqquvara.
Aamma
Inuit Ataqatigiit isumaat malillugu utoqqarnik sullissineq pitsaasoq
pingasoqiusanik niuloqarpoq. Utoqqaat Nipaat aap kattuffittut sullissivoq,
kommunet ataasiakkaat kommunet oqartussaaffitsik naapertorlugu
atorfinitsitsisarput, aap qanimut sullissipput. Pingajuattut qitiusumik
Namminersornerullutik Oqartussat aamma peqataasariaqarput, oqareernitsituut
pitsaasut ilisimasat katersorsinnaanissaannut toqqaannartumik
aqqutissiuussinissaq taanna pingaaruteqarmat.
Assorujussuaq
piuminarpoq massakkut inissisimaffipput. Inuit Ataqatigiinninngaanniit
siunnersuut pitsageruttoratsigu siunnersuuteqartoq sinnerlugulusooq
ilungersuutigalugu taper-sersungaarparput. Aappaatigut eqqarsarnartorujussuuvoq
apererusunnarlunilu, soormitaavaa-na Enos Lyberthip taanna siunnersuutigivaa
killissaa tikillugu illersornianngikkuniuk, taanna uanga tupigisorujussuuvara.
Aamma
isumalluarsinnaavoq soorunami Enos Lyberthi qinigaaffiup ingerlanerani
qaqeqqin-neqarsinnaasoq ilaalu ilanngullugit. Kisianni itigartinneqareerpoq
taava paasivarput 95-imilu 97-imut ataatsimiititaliarsuup sulinerani inassutit
assigiinngitsut timitalerneqartussanngoraa-ngata, itigartinneqartussanngortut.
Immaqa
siunnersuuteqartoq parteeqatiminilluunniit Naalakkersuisunilluunniit
tapersersorne-qarnani oqallitsitsivoq, immaqaluunniit
piffissaajaatigiinnarparput.
Per
Berthelsen, ataatsimiinnermi
aqutsisoq, sinniisussat sisamaat, Demokraatit.
Qujanaq,
tulliupporlu Ane Hansen, Inuit Ataqatigiit. Inuit Ataqatigiit sinnerlugit
saqqummius-sisup pingajussaareersup avataatigut.
Ane Hansen, Inuit Ataqatigiit.
Tassa kommuneni aamma uagut utoqqaat sinnerlugit pakatsivunga soorunami una periarfis-sarsuaq qangali amigaatisartagarput akuerineqassanngippat, imaluunniit soqutiginartutut isigineqarluni sulissutigineqaqqissanngippat.
Tassami Naalakkersuisuni immaqa oqitsuararsuup pisariinnerujussuullunilu kommunet susassaqarfiisa taanna illuartillugu, kommuneni aningaasartuutissatut inissillugu tikkuutiin-nassagaanni.
Tassa uagut Aasiaat kommuneat assersuutigilaarusuppara, utoqqarnut ataqqinnittutut politik-kikkut anguniagassaliorsimasutut tunaartassiorsimasutut misilittagaqarfigigatsigu, kommune-mi utoqqarnik siunnersorteqarneq ukiut arlallit massakkut atorfik piusoq piutillugu. Aammalu massakkut utoqqarnut siunnersortitta misilittagai aallaavigalugit assorujorujussuaq amigaati-gineqartarpoq qitiusuminngaanniit siunnersortimik saaffissaaleqineq.
Aamma qanittumi imaluunniit Utoqqaat Kattuffiata suliaritissimasaa utoqqaat atugaanik aningaasatigut inissisimanerup takutippaa, qanoq kommunemiit kommunemut utoqqaat atuk-kaminnik qanoq annertutigisumik nikingasut, assigiinngitsumik inissisimaffeqartut.
Taamaattumik tassa una periarfissaq siunnersuuteqartuminnganniit tunuarterfigineqassappat assut uggorissavara, pissutigalugu taanna siunnersortitut siunnersuutigisavit aamma ilaatigut suliassarissagaluarmagu, sapinngisamik kommunemi utoqqaat atugaanni assigiissaarinissamik siunnersuillunilu suliaqarnissaq.
Tassa Enosi uani siunnersuutigisat illersortuugukku tusaasinnaasakka malillugit amerlanerus-suteqaraluarput ilinnut illersuisut, illit ilanngullutit. Tassa Inuit Ataqatigiit, Demokraatit Kattusseqatigiillu.
Per Berthelsen, ataatsimiinnermi aqutsisoq, sinniisussat sisamaat, Demokraatit.
Tassa oqaatigilaassavara amerlanerussuteqartut siunnersuutip itigartinneqarnissaa nalunaaruti-gimmassuk.
Kisianni tassa suli marluk nappaanikuupput. Tulliuppoq Ilaqutariinnermut Naalakkersuisoq.
Maannamullu nappaasut kingullersaat naggataariniartussaassalluni, tassalu Agathe Fontain naggataarisussaajunnaareerpoq.
Ilaqutariinnermut Naalakkersuisoq takanna.
Ruth Heilmann, Ilaqutariinnermut Peqqissutsimullu Naalakkersuisoq, Siumut.
Ja, qujanaq.
Tassa soorunami utoqqaat susassaqarfigiuartussaavagut aamma kommuneniluunniit utoqqar-nik siunnersorteqaraluarpat. Tassa susassaqarfipput uaniippoq kommuneni siunnersortit pik-korissartinneqartassammata qitiusuminngaanniit.
Taanna isumaqarpunga pingaaruteqartoq uninngannginnatta inatsisiliortuartaratta allanngorar-tuartunik, taamaattumik aamma pingaaruteqarpoq inatsisiliatta aamma tassuunakkut malittari-neqarnissaat sinerissami siunnersortit kommuneniittut eqqarsaatigalugit.
Aamma Aasiaat ilumoorpoq aamma tassuunakkut utoqqarnut qanoq politikkeqarnermigut aamma maligassiuisuuvoq. Tassani aamma utoqqarni siunnersuisoqatigiinnit nammineq imminermi kommuneni peqarmat. Taamaattumik aamma malitassaqqippoq kommuneni allani aamma taamatut iliornissaq.
Taamaattumik oqartussaaffik kommuneniippoq uanilu
isumaqarpunga qitiusumik taamatut konsulentimik pilersitsisoqaraluarpat
angalanerparujorujussuit allallu immaqa suliassarpassuit
angunngitsuugassarpassuit eqqarsaatigalugit, pingaarnerpaavoq aamma partiit
Kattusseqatiillu amerlanerussuteqartut oqarnerat naapertorlugu,
pingaarnerpaavoq qanimut utoqqaat tikissin-naallugit ulluinnarni najorlugit
aamma siunnersorneqartarnissaat nakussussarneqarnissaa. Taanna pingaarnerpaatut isigisariaqarpoq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Agathe Fontain, Inuit Ataqatigiit, oqaaseqartup avataatigut siullermeerluni,
tulliutissaarlu Jens Napaattooq, Siumut .
Agathe
Fontain, Inuit
Ataqatigiit.
Ja,
utoqqaat illersorlugit oqaloriarluni taava oqaasiinnakkut illersoraanni,
qanorlu ilioriarfis-samik saqqummiiffigineqarluni itigartillugulu. Tassa
oqaluinnarneq.
Massakkut-una
oqaluinnarata qanoq iliuuseqarnissamik siunnersuuteqartoq illersorlugu
taper-sersoripput, siunnersuutaa ilumoorluni ullumikkut utoqqaat
amerligaluttuinnartut atugarisaat allanngoraluttuinnartut, utoqqarni nappaatit
eqqarsaatigiinnarlugu puiguttortornerit soorlu eqqaaginnarlugit qanoq
annertusiartortigisut, taakkulu paarinissaat aamma ilisimasalinnin-ngaanniit
malinnaaffigilluarneqarnissaat aamma imaattorneqarnikuupput,
eqqaamaqquneqar-nikuupput.
Naluara
sorliit siunnersortit paatsiveerussaasuunersut ilinni. Uanga siunnersortinik
ilisimasa-qanngilanga Namminersornerullutik Oqartussat iluanni atorfeqartunik
paatsiveerussaajartorlu-tik kommunenukartartunik.
Taamaakkami suliap suunissaanik nalunngikkaanni, sunalu siunnersorlugit suliarineqartus-saalluni taava soorunami paatsiveerussaasoqarnavianngilaq. Aamma kommunet tamarmik utoqqarnut siunnersorteqanngillat. Kommunet qassit peqarpat? Maannganniit kommunet naalakkerniarpaguut, pinngitsoorasi tamassi utoqqarnik siunnersortinik atorfinitsitsigitsi, uagut qeqqaninngaanniit atorfinitsitsiniannginnatta.
Massakkut taamatut nipeqarpoq. Taavalu utoqqalinersiutuit 90%-ii kommunet 10%-iinnaa akilertaraa, inuussutissaanukua taakkua. Utoqqaat siunnersortaanut kaputartuunneqartariaqan-ngitsut.
Siumup iluani Siumukkormiortaqaramik siunnersuuteqartoqarpoq utoqqarnut siunnersortimik atorfinitsitseqqullugu, ataaseq tapersersuimmat Siumukkut tanngassimaarutigissavaat? Sinnerisalu itigartillugu.
Taamaakkami ilumut oqaasiinnarnik oqaasiinnaanngitsunik piviusunillu aalajangiiffissanik siunnersuuteqartoqaraangat, taava tapersersornissaa pingaaruteqartorujussuuvoq.
Qaammatialuinnannguit atareeraluarluta kisianni massakkut itigartikkaanni ukioq ataaseq qaqeqqinneqarpat, massakkullu oqalullutik kommunenut tunniunneqarniarami taamanikkor-nissaanut taava suna tunngavilersuutigissavaa, mimillugu isummerniarunik?
Per Berthelsen, ataatsimiinnermi aqutsisoq, sinniisussat sisamaat, Demokraatit.
Tulliupporlu Jens Napaattooq, Siumut. Siumup oqaaseqartup avataatigut aappassaaneerluni.
Taavalu maannamut nappasoq kingulleq tassa tulliutissaaq Doris Jakobsen, Siumut, oqaase-qartuusoq pingajussaarami minutsit marluinnaat periarfissarissallugit.
Takanna Jens
Napaattooq.
Jens
Napaattooq, Siumut.
Qujanaq.
Uani
illersuilluni Inuit Ataqatigiinninngaaniit oqariartuutigineqarmat,
piffissaajaatigiinnarpar-put eqqartorneqartariaqanngikkaluarporluunniit.
Kisianni
taamatut oqariartussalluni ajuusaarnassaaq. Annertuumik illersorsinnarlugu
politik-kikkut siunnerfeqarsinnaaneq. Uagut amerlanerussuteqarluta
ersarilluinnartumik innersuussu-teqareeraluartuta tusarnaarpatsigit
ikinnerussuteqartusi. Ilaatigut oqariartuutigineqarumaartut
toqqammavilersorluakkamik uani oqaluttarfiup pingaarnersaaninngaanniit
ilaatigut ersarissu-mik toqqammavilersorlugit akissuteqarfigisarlugit.
Uani 90/10-mut
ilumoorpoq aningaasartuutissanik tassani tunniunneqartartut assersuutigaakka
peqqutigalugu qitiusuminngaanniit sumiginnagaanermik ilaatigut nipeqartumik
oqariartorto-qarmat, taamaattoqanngilluaasartoq uani ersersinniarlugu.
Uani
erseqqissaatigilaarlara qitiusuminngaanniit aqutsineq qimakkiartorusupparput,
kommu-net nammineq aamma suaarutigivaat. Nammineq ataasiaratik erseqqissaavissuuvoq
paatsoor-neqarsinnaanngitsumik oqariartuutaat akisussaaffimmik annertunerusumik
tigusiartorusullu-tik, aamma regionikkaartumik tigusiartornissaq maannakkut
aamma oqaluuserineqarluni ingerlanneqarpoq.
Taamaattumik
suliassat tassunga tunngasuteqartut utoqqarnut qularnanngitsumik aamma
ilaapput. Oqareernitsituut utoqqaat namminneq pisinnaatitaaffitsik kattuffik
aqqutigalugu ili-imaarinninnerat annertusiartorpoq. Taannalu aqqutigalug aamma
ingerlanneqarluni.
Kommunemut
immikkut imatut siunnersortinik atorfinitsitsiortornissaq uani
eqqartorneqan-ngilaq, kisianni kommunet nammineq peqataallutik
ineriartornissaanut aamma utoqqartanik kiffartuussinissaannut oqariartuut
ersarilluinnartoq paatsoorniarneqassanngilaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Doris Jakobsen, tassa Siumut sinnerlugu oqaaseqartuusoq, pingajussaaneerami
tassa minutsit marluk piffissarivai.
Tulliutissaarlu
Aqqaluk Lynge, Inuit Ataqatigiit, Inuit Ataqatigiit oqaaseqartuata avataatigut
oqaaseqarniartoq siullermeerluni.
Takanna.
Doris
Jakobsen, Siumup
oqaaseqartua.
Qujanaq.
Tassa siullermik
oqaatigineqarpoq, oqaatigineqarnikuummat kattuffilerinermut tunngatillugu, isumaqarpunga
kattuffilerisarsimagaanni aamma ilisimasariaqartoq kattuffiup iluani
malin-naatitsiuarnissaq, taavalu aamma paasissutissanik tunniussiuarnissaq
kattuffiup aamma pisus-saaffigigaa.
Taamaattumik
tamanna aamma eqqaamaneqartariaqarpoq. Uani allaffissornermi taavalu aamma
højskoleni aningaasarpassuit atorneqartarsimappata, taava aamma taakku
allaffissor-nernut aningaasat atorneqartartut taavalu aamma højskoleni
katerisitsisarnerit taakkua aamma paasititsiniaanermut atorluarneqarsinnaapput.
Tassa uani
kialluunniit kattuffilerisartup nalussanngilaa, suni tamani katersuutsitsinerni
paa-sissutissat nutaat pinngitsoorani saqqummiutissallugit. Taamaattumik
taakkua ja, aamma eqqaamassavarput utoqqaat kommuneninngaanniit ilarpassui
taperneqartarmata. Aningaasat aamma taakkua kommuneninngaanniit
tapiisoqartarpoq. Qitiusuminngaanniit siunnersuineq tassa kommuneni utoqqarnut
siunnersuisartut qitiusuminngaanniit amigaatigineqarsimappata, taava
kommunalbestyrelse nammineerluni aamma akisussaaffigivaa, taakkununnga
nammi-neq iluminni iluarsiissuteqassallutik.
Tassa imaappoq
uanga nammineq siunnersuutigiinnassagaluarpara kommunalbestyrelsemi taakkua
pioreersut siunnersuisartut atorluarneqaqqullugit.
Ja.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Inuit Ataqatigiinniit oqaatigisariaqarparput maani suleqatigiinneq pingaartikkatsigut assut partiit akornanni. Naalakkersuisooqatigiikkaanni naalakkersuisooqatigiinngikkaanniluunniit aammalu pingaartittorujussuusimavarput uani ataatsimiinnissamut tunngatillugut, inatsisartut ataasiakkaat saqqummiussaasa pimoorullugit suliarineqarnissaat.
Tamanna ajoraluartumik uatsinnut pakatsinartumik kinguneqarsimavoq.
Uagut pakatsissutiginngilarput imatut annertunerusumik uagut siunnersuutitta illuatungiliut-tuugatta naaggaanneqartarnera.
Kisianni takusinnaasarput misissukkagullu malillugit Naalakkersuisut partiiutitaqartut ilaasor-taasa ataasiakkaat saqqummiussai, manna tikillugu tamavimmik partiivinik illersorneqaratik naaggaartorneqartarsimapput.
Per Rosing Petersernip manna tikillugu saqqummiussai sisamat tamarmik naaggaarneqarput, partiivisa naaggaarmatigit.
Jørgen Wæver Johansenip saqqummiussaa ataaseq tullissaalu tamarmik naaggaarneqarput partiianik Naalakkersuisunit.
Otto Jeremiassenip saqqummiussai sisamat partiiainik Naalakkersuisunillu naaggaarneqarput.
Isak Davidsenip saqqummiussai marluk partiianik Naalakkersuisunillu naaggaarneqarput.
Aamma Enos Lyberthip Siumut sinnerlugu saqqummiussai, Siumuminngaanniit naaggaarne-qarput marluk utoqqarnut tunngassuteqartut.
Taamaattumik maani suleriarnermi kaammattutigissavara Siulittaasoqarfimmi iluamik misis-sorneqartariaqartoq maani asuli uagut piffissaajannginnersugut. Makkua suliassat taamak pingaaruteqartigisut pimoorullugit suliarissagaanni, taava allaffissornerminngaanniik iluamik piffissaqarluni suliarineqarsimasariaqaraluarput. Aammalu allaffissornermi pisortarqarfinnilu suliat naammanngippata Naalakkersuisut oqarsinnaatitaapput oqarlutillu, una suli isummerfi-ginnginnatsigu taamaattumik kinguartikkallarparput imaluunniit suliarinissaa allatut aaqqik-kusupparput.
Inatsisartut ataasiakkaat taamarsuaq partiillu taamarsuaq sulisut ulloq naallugu, isumaqarpu-nga pineqartarnerat uani kusanarpallaanngitsoq. Ajuusaarpunga piffissaq taamaattoq oqaatigi-sinnaagatsigut ilaatigut ajoraluartumik piffissaajaatitut.
Kisianni kaammattuutigissavara sule-riaatsimi una massakkut Naalakkersuisut aamma qinnu-igissavakka suliamik politikkikkut isummerfigiumanngisaminnik taava oqartaqqullugu unneq-qarissumik, politikkikkut isummerfiginngikkallarparput, aamma aappassaanik allaffissornik-kut direktorati iluamik misissuiseq-qaarlu aatsaat uterfigeqqikkumaarparput.
Taamaattumik matuma sulinerup pitsaassusaa eqqarsaatigalugu Inuit Ataqatigiinniit kaam-mattuivugut partiit ataasiakkaat ilaasortat, ataasiakkaat aamma pineqarnerat manna maannak-kut takusinnaagatsigut uaguinnaanngitsoq kisiannili ilaasortat ataasiakkaat tamarmik saqqum-miussaat taama suliarineqarsimanera assorujussuaq uagut avoqqaarliuutigerusupparput matu-muuna.
Per Berthelsen, ataatsimiinnermi aqutsisoq, sinniisussat sisamaat, Demokraatit.
Ja tassa oqaaseqarnisi ingerlateqqitsinnagu tassa nalunaarutigilaassavara, oqaluuserisaq una amerlanerussuteqartut itigartinneqassasoq nalunaarutiginikuummassuk.
Aammalu Hr. Aqqaluk Lyngep saqqummiussaanut atatillugu tassa eqqaamassavarput uani oqallisaasoq qimannaveersaartariaqassagatsigu. Kisianni soorunami oqaatigineqartut ukua naalaarneqarlutik qularnanngitsumik aamma nalilersorneqarumaarput.
Tulliulluni oqaaseqassaaq imatut paasigaluarakku
Ilaqutariinnermut Naalakkersuisoq kingulli-ulluni oqaaseqarusussimasoq. Suli tassa pingasut nappaanikuupput.
Taamaattumillu utaqqi-gallassavigit taakkua?
Aaa,
massakkut Ilaqutariinnermut Naalakkersuisoq takanna.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Tassa
siulittaasup oqarneratuut soorunami amerlanerussuteqartut isumaat
najoqqutaralugu maani ingerlavugut.
Aamma Enos
Lyberthip siunnersuutaa taamatut maannakkut aamma tiguneqarpoq.
Amerlane-russuteqartut itigartippaat, taannalu aamma isumaqarpunga Inuit
Ataqatigiit ataqqisariaqaraat.
Tassa isumaqarpugut
pitsaanerpaaq anguniarlugu utoqqarnut pitsaanerusussaq anguniarlugu taamatut
aamma akissuteqaatitsinni aamma oqaaseqarpugut. Utoqqaat qanimut
siunnersorne-qarnissaat taanna nukittorsarniarparput. Isumaqarpunga aamma
taanna pingaaruteqartorujus-suusoq, naak aamma Agathe Fontainip
oqaaseqarnermini oqaraluartoq kommunet tamarmik siunnersorteqanngillat. Aap
kommunet tamarmik siunnersorteqanngillat, kisianni kommuneni utoqqarnut aamma
sullissineq ingerlanneqarpoq.
Taamaattumillu
siunnersorteqarsimannginnera eqqarsaatigalugu pikkorissarnermikkut kom-munet
tassani utoqqarnut sullissisut, aamma pitsaanerusumik utoqqarnut
sullissilernissaat aamma anguneqartussaavoq. ?
Tassalu
uani siunnersuummik Enos Lyberthip siunnersuutaanut itigartitaagaluarluni angusaa
pitsaasoq aamma Inuit Atatigiit taanna isumaqarpunga paasisariaqaraat.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Astrid Fleischer Rex, Demokraatit, aappassaaneerluni. Taavalu Astridip
kingor-na Naalakkersuisut Siulittaasuat.
Astrid
Fleischer Rex,
Demokraatit oqaaseqartuat.
Qujanaq.
Siullermik
oqaaseqarama oqarpunga Demokraatininngaanniit siunnersuuteqartoq
misiginne-qatigingajalluguluunniit.
Maannakkut
taamatut oqallinneq tusarnaareerlugu misiginneqatigeqaatsigit,
tupinnaannartu-mik taama kusanartigisumik utoqqaat sinnerlugit
siunnersuuteqarnerit nakuingaarmat, uanga Inuit Ataqatigiit taperserusuppakka
oqarlunga, tupigusuppunga siunnersuutigineqarsimammat taama nakuitsigisumik.
Taamalu pingaartigisoq.
Maani
inimi utoqqarnik nalunnginninnerpaartaaq tassa illit. Taamaammat tusaallutit
siunner-suutit oqaluuserilluareerlugu taperserparput Demokraatininngaannniit.
Illit oqaravit malittari-sassat nutaat utoqqarnut tunngasut, peqqussutit nutaat
utoqqarnut tunngasut, nalusarpasi ilaanni paasisinnaasanngilasi, kina taava
saaffigissavisiuk. Tusareerparput kommunet ikittua-raarannguit kisimik
utoqqarnut siunnersorteqartut.
Taamaattumik
utoqqaat naligiittumik pissagutsigit qitiusuminngaanniit aamma aperisassaqar-tariaqaraluarpusi.
Eqqaatigullu taanna qitiusumik atorfinitsitaq aamma atorsinnaagaluarparput
kommunenit siunnersortit taakkua, naluara qassiunersut immaqa tallimat, sisamat
tallimat immaqa naluara. Taakkua misigisimasatik misilittakkatik tassunga qitiusumik
nalunaarutigi-sarsinnaagaluarpaat, suli sulissunneqarnissarsi
kusanarneroqqullugu.
Arlaannit
aamma eqqaaneqarpoq marloqiusaminngooq sulissussineq taanna
paatsiveerussaa-ginnassammat. Uanga imatut paasivara marloqiusaanngilaq,
nammaqatigiinneq kommunet assigiinngitsut qitiusumut nalunaartarlutik uagut uku
uku ukualu misilittagaraavut, taava ingerlateqqinneqartassapput.
Ingerlateqqinneqartassappatalu
qitiusuminngaanniit ingerlateqqinneqartariaqarput kommune-nut assigiinngitsunut
soorunami siunnersuisarfilinnut.
Kisianni
siunnersuisarfeqanngikkunik taava utoqqaat immikkut
saaffigineqartariaqartassapput qitiusuminngaanniit sumut allamut
saaffiginnissagamik?
Tupigeqaara
uanga taanna aamma tapersersorneqanngimmat, qitiusumik siunnersorti
utoqqar-nut.
Taamalu
maangali iseratta illersorneqartigisut utoqqaat ataqqineqartigisullu, aap
tamatta ataq-qivagut taava aamma takutinniartigu ataqqillugit ikiorusullugillu.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Naalakkersuisut Siulittaasuat. Naalakkersuisut Siulittaasuata kingorna Jensine
Berthelsen, Atassut, siullermeerluni.
Hans Enoksen, Naalakkersuisut Siulittaasuat, Siumut.
Aap naatsunnguamik.
Tassa uani annertuumik akerleriissutigineqartoq siunnersorteqalernissamut tunngasoq, ilaati-gullu oqariartuutigineqarluni Naalakkersuisooqatigiit tapersersuinngilluinnaqqissaartut.
Taamatut oqariartorusuttut oqariartorniarlik aamma namminneq maani oqalussinnaatitaanerat ataqqivarput.
Kisianni pissutsit piviusut taamaanngillat.
Sapinngisamik utoqqaat pitsaasumik atugaqarnissaat siunnerfigalugu tamatta maani suliniar-sarivugut, aammalu qitiusumik ingerlatsinerup akitsoriartuinnartup qimakkiartornissaa aallaa-vigalugu uani aallarteqqaaratta ullormut oqaluuserisarput, tassalu immikkoortoq 81-i, pisortat ingerlatsineranni pisussaaffinnik akisussaaffinnillu Namminersornerullutik Oqartussat, kom-munet nunaqarfinnilu aqutsisut akornanni agguaasseqqinnissamut pisariinnerusumillu akikin-nerusumillu ingerlatsilernissamik anguniagaqarnissaq, taanna isumaqatigiissutigaarput aallaa-vigalugu sulisoqassasoq.
Uanilu qitiusuminngaanniit qineqqusaarnermi tamatta oqariartuutigaarput qimakkiartorneqas-sasoq aammalu sumiiffimmi kommunet aqutsinerulertariaqartut. Aamma kommunet nammin-neq arlaleriarlutik oqariartuutigisareerpaat qitiusuminngaanniit aqutsineq imminerminnut ilu-ngersunartoq, taanna qimanneqartariaqartoq.
Soorunami utoqqaat siunnersorneqarnissaat taanna isertugaatsumik oqaatigineqartoq tamatta tapersersorparput, aamma imaanngilaq kommunemukarunik utoqqaat siunnersorteqanngippa-ta tassa siunnersorneqarnavianngitsut. Innuttaasutulli allatut aamma piginnaatitaaffeqarput utoqqaagaluarunilluunniit siunnersortinik atuinissaminnut.
Soorunami una qitiusumik saaffigisaqartarnissaq pingaartinneqartoq malugisinnaavara, aamma qularinngilara qitiusumik saaffiginnittoqarpat, pingaartumik kommunet siunnersortai pisariaqartitsippata saaffiginnippata aamma ikiorneqassasut, aamma ikiorneqartareerput.
Uanilu isumaqarpunga assortuussutiginagu aningaasartuutikillisaanissaq aamma oqariartuuti-gigatsigu kommunet peqatigalugit pitsaasumik aaqqinniarniartigu, uani ajugaaniutigiinnaralu-arutsigu ataasiakkaarluta angusaqarnavianngilagut.
Taamaammat inassutigerusunnarpoq pitsaasumik aaqqiisoqassappat kommunet paaseqatigalu-git aamma kommunet namminneq kissaatigereermassuk, qitiusumik aqutsinermik namminneq oqartussaanerulernissartik aammalu uani ataatsimiinnerup aallartinnerani taanna oqariartuuti-gineqarpoq. Kommunet agguaassiffigineqartariaqartut isumaqarpungalu aamma kommunet piumassuseqartut suleqataanissaminnut pingaartumik aamma utoqqaat eqqarsaatigalugit.
Qujanaq.
Per Berthelsen, ataatsimiinnermi aqutsisoq, sinniisussat sisamaat, Demokraatit.
Qujanaq. Tulliupporlu Jensine Berthelsen, Atassut, oqaaseqartuusup avataatigut siullermeer-luni.
Tulliutissaarlu Josef Motzfeldt, Inuit Ataqatigiit, aamma siullermeerluni.
Jensine Berthelsen, Atassut
Qujanaq.
Utoqqaat Ilaqutariinnut Naalakkersuisoqarfik killeqanngitsumik atorsinnaagaat tusareerpar-put. Utoqqaat Nipaata Ilaqutariinnermut Naalakkersuisoqarfik atorluaqigaat allaat ukiumoor-tumik ataatsimeeqatigiittartut utoqqaat atugarisaat pillugit tassani paasissutisseeqatigiittarlutik aamma tusareerparput.
Sunaana
pigipput aperisariaqalerpugut.
Tassuuna
Utoqqaat Nipaata nammineerluni aamma suliniuteqarnermigut Ilaqutariinnermut
Naalakkersuisoqarfimmik siunissami aamma atorluaanissaa qularutissaanngilaq.
Sunaana
pigipput?
Oqaatigineqarpoq
aamma siunnersuuteqartup tunngavilersuutigisaani ilaatigut oqaatigineqar-poq,
inatsisiliortoqartillugu peqqussutit allallu allanngorneqartillugit, utoqqaat
malinnaanissa-minnut periarfissaat annikitsuinnaasoq.
Tassani
aamma Namminersornerullutik Oqartussat paasissutissiiviat aamma
atorluarneqakut-soorsinnaasoq qularutiginngilara, aammalu qularutiginngilara
Naalakkersuisut atussagaat innuttaasut pineqartut inatsisitigut atugassarisaat
pillugit paasissutissiinissat pingaartinneqar-put Namminersornerullutik
Oqartussaninngaanniit.
Kommunet
siunnersorteqanngitsut pillugit Namminersornerullutik Oqartussat KANUKOKA-llu
aaqqissuusseqatigiinnermikkut naalakkersuisooqatigiinnermi isumaqatigiissut
tunngaviga-lugu, aaqqiissutissarsiornissaat aamma qularutigineqassanngilaq.
Assortuunniarsariinnarsin-naanngilagut aaqqissutissanik Naalakkersuisut
erseqqissumik siunniussamik oqaaseqareersut.
Taamaattumik
malartaaserluta taamatut pissusilersorluta allaat utoqqaqanngitsutut
pasisaaner-put minnerpaamilluunniit akuersaarneqarsinnaanngilaq. Suliniutit
amerlasuut pitsaasut inger-lapput, taamaattumik utoqqarnik
sullissisoqannginneranik oqalunneq taamatut Inuit Ataqati-giit
tungaaninngaanniit sakkortunerpaamik inuttaanut utertinneqartariaqarpoq
partiimut tassu-nga.
Taamatuttaaq
aamma pinngitsoorusunngilanga Aqqaluk Lyngep Inuit Ataqatigiinneersoq
generaliusumik tassa tamakkiisumik oqaatigimmagu, partiip
naalakkersuisooqatigiikkaluarlu-tinngooq partiimik inatsisartunut ilaasortat
ataasiakkat siunnersuutaat itigartinneqaqattaartar-tut. Itigartinniaanngarlugit
itigartinneqarneq ajortut nalunngilarsi aamma ilissi. Suliat ingerla-reersut
pissutigalugit siunnersuuteqartut siunnersuutaat taamatut iluseqarlutik
itigartinneqarta-riaqartartut aamma nalunngilarsi.
Taassumap aamma
takutiinnarpaa ullumi siusinnerusukkut oqaaluuserisarput, tassalu
inatsi-sartuni sulinerup pitsaanerulernissaanik ujartuinerput qanoq
tunngavissaqartiginersoq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Taavalu tulliuppoq
Josef Motzfeldt, Inuit Ataqatigiit.
Josef
Motzfeldt, Inuit
Ataqatigiit.
Siullermik
siunnersuuteqartoq ilaasortaq Enos Lyberth. Inuit Ataqatigiinninngaanniit
Utoqqaat Nipaanni sullissisimanerani maluginiarluakkatsinnik sunniuteqarsimasoq
siulittaa-sutut kattuffiup siulittaasuatut tunuarnissami tungaanut asuliinnaq
siunnersuuteqanngitsutut matuminnga saqqummiimmat qutsavigerusupparput.
Taamaakkaluartorlu
oqaatigineqareersutut oqaluuserisap ingerlanerani aliikkutassiaannanga-jattut
ilaatigut isikkoqalersillugu nalilermagu, taanna ajuusaarutigaarput.
Sullissilluarsimane-rata kingorna massakkut Utoqqaat Nipaat taama
ersaritsigisumik nipaqarunnaarpoq. Taamaat-tumik pisariaqarpasissutut uagut
isigisimagaluarparput, siunnersuuteqartup siunnersuutaata timitaliivigineqarnissaa.
Oqartoqarsinnaanngilaq
sapinngisamik sapinngisarput tamaat utoqqaat kiffartuulluarniarpagut una
saperlugu isigineqarpat, ilaatigut oqalulluni qitiusumik aqutsineq
qimakkiartorneqarpoq aqutsiniartoqanngilaq.
Allaffissorneq
annikillileriffiginiarneqarpoq una allaffissornermik annikillileriniutaassaaq
ilaatigut oqartoqarneratut kommunet ataasiakkaat tamarmik
siunnersorteqalernissaannin-ngaanniit, qitiusumik ataatsimut siunnersorteqarneq
isumatusaarnerummat.
Ullumi
oqaluuserisaq siulleq Naalakkersuisut Siulittaasuata innersuussutigaa. Tassani
siun-nersuutigineqartoq tassaavoq suliassat ilaat qitiusumik ingerlanneqarlik,
suliassat ilaat sineris-samut kommuneqarfinnilu immikkoortuinullu nuunneqarlik.
Paatsuuisuusaarnerit
taamaattut qatsunnarput assut.
Ukiumoortumik
ataatsimiinnissamut saaffiginnissutit ukiup ingerlanerani takkuttartut,
ukiu-moortumik ataatsimiinnissamut utaqqissunneqartassappata, sumut
iluaqutaassava?
Taava
aamma oqaaseqartup kingullioqqooqaaq oqarneratut pasitsaatiinnarlugit immaqa
aaq-qinniassaqqaarpaat Naalakkersuisooqatigiit kommunet kattuffiat
peqatigalugu.
Pasitsaatiinnarlugit
ilimagisat ilimagisinnaasat maani inimi oqalunnermi tunngaviusinnaan-ngillat.
Pilersaarutinik takusaqartariaqarpugut oqaluussaqassagutta.
Taavalu
naggaterpiaatigut, suut tamarmik saqqummiunneqarsinnaappunngooq
oqaluuserisas-sanngortinneqarsinnaapput.
Isumaqarpunga
inatsisartuni sulineq isumatuumik ingerlanneqassappat, partiillu
tunuliaquta-ralugit siunnersuuteqarniaraanni saqqummiussisoqartariaqartoq.
Inuttut ataasiakkaarluta maa-niinngilagut, partiinik tunuliaqutaqarpugut.
Oqartoqartarpoq oqarniartarpugut maani inimi innuttaasut tunuliaqutaralugit
sulissaagut innuttaasut peqatigalugit. Kisianni ilaasortat ataasi-akkaat
parteertilluunniit tunuliaqutarinagu oqaluuserisassanngortitsisassappata,
taannaana tassa apeqquserneqarujussuartariaqartoq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tassalu
taamaalilluta nappaanikut naammassivagut.
Eqikkaallunga
nalunaarutigissavara tassa immikkoortoq 100, Namminersornerullutik Oqartussat
qitiusumik allaffeqarfianni utoqqarnut siunnersortimik atorfinitsitsinissamik
Naalakkersuisut peqquneqarnissaat pillugu inatsisartut
aalajangiiffigisassaattut siunnersuut. Annertuumik oqallisigineqareerluni
amerlanerussuteqartunik aalajangerneqarpoq itigartinne-qassasoq.
Nalunngikkaluarpara
siunnersuuteqartup immikkoortup tullia aamma ullumikkut
naammasse-rusukkaluaraa. Kisianni Siulittaasoqarfik sinnerlugu nalilerpara
aamma taanna taanna oqallis-sutaarujorujussuarsinnaasoq. Taamaattumik
isumaqarpunga pissusissamisoortoq aamma pivi-usorsiornerussasoq taanna ulluni
aggersuni ullormut oqaluuserisassanut ilanngullugu
oqaluu-serisassanngortikkutsigu.