Oqaluuserisassani immikkoortoq 110-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut qulingat, pingasunngorneq 19. marts 2003, nal. 14:15.
Anthon
Frederiksen,
siunnersuuteqartoq, Kattusseqatigiit.
Inatsisartut
Suleriaasianni § 32 naapertorlugu aalajangiiffigisassatut
siunnersuuteqarpunga imaattumik.
Utoqqaat,
innarluutillit siusinaartumillu sulisinnaajunnaarnersiutillit ineqarnermut
akiliutaasa aaqqissuuteqqinneqarnissaat pillugu misissuisitsisoqarnissaa
pillugu Naalakkersuisut peqquneqarnissaannik Inatsisartut
aalajangiiffigisassaattut siunnersuut.
Taamatut
siunnersuuteqarninnut soorunami utoqqarnik, innarluutilinnik siusinaartumillu
sulisinnaajunnaarnersiutillit ilaannit saaffigineqartarnikka tinngavigalugit
siunnersuut saqqummiuppara.
Saaffiginnittut
ilaasa kissaatigaat utoqqaat, innarluutillit sulisinnaajunnaarnersiutillillu
aningaasanut tigusartakkaminnut naleqqiullugit ineqarnermut
akiliutigisartakkatik naapertuutinngimmata iluarsineqarnissaat
naalakkersuinikkut sulissutigineqartariaqartut.
Aamma
taakkua isumaqarput ineqarnermut akiliutit qaffakkiartortarnerannut
utoqqalinersiutit, sulisinnaajunnaanersiutillillu qaffakkiartortarnerat
akissarsianut allanut naleqqiullugit nikingasorujussuusut
iluarsisariaqarlutillu, tassami utoqqalinersiutillit
sulisinnaajunnaarnersiutillillu tigusartagaat aningaasarsialinnut allanut
naleqqiullugit qaffaaffigineqanngisaannangajattut ineqarnermut akiliutit
nalinginnaasumik qaffanneqartarneranni utoqqaat sulisinnaajunnaarnersiutillillu
malinnaasinnaajunnaartarnerat annertusigaluttuinnartoq
aaqqiivigineqartariaqarmat.
Nalunngilara
kikkulluunniit isertitakinnerusut ineqarnermut tapiiffigineqarsinnaanermut
periarfissaqartut, kisianni utoqqaat, innarluutillit sulisinnaajunnaarnersiutillillu
periarfissamik tamatuminnga aamma ilaat atuigaluartut, taamaattoq utoqqaat,
innarluutillit sulisinnaajunnaarnersiutillillu immikkut ineqarnermut
akiliutigisartagaat pillugit misissuiffigineqartariaqarnerat
pisariaqarsorinarpoq, inunnut taakkununnga toqqissisimasumik pisortaqarfinnullu
?qinnuuloorfiuvallaanngitsumik? aaqqiinissaq anguniarlugu.
Neriuppunga
oqallilluassasusi.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tamatumunnga
akissuteqassaaq ilaqutariinnermut Naalakkersuisoq.
Ruth
Heilmann,
Ilaqutariinnut Peqqissutsimullu Naalakkersuisoq, Siumut.
Qujanaq.
Ineqarnermut akiliutit iluarsaqqinneqarnerannut atatillugu ineqarnermut
akiliutit ineqamermullu tapiissutit allanngortinneqarput januarip
aallaqqaataani 2002-miit atulersumik.
Ineqarnermut
akiliutit iluarsaqqinneqarnerata sunniutai misissorneqarsimapput ineqarnermut
akiliutit iluarsaqqinneqarnerat sioqqullugu aammalu iluarsaaqqereernermi inuit
iniminni nikissimanngitsut ineqarnermut akiliutaat tamakkiisut aammalu
ineqarnermut tapiissuteqareernermi ineqarnermut akiliutaasa annertussusaat
pillugit paasissutissat A/S
Inissiaatileqatigiit INI-miit pissarsiaralugit.
Misissuinermi
inoqutigiit 8.352-it ilaatinneqarput ineqarnermut akiliutit ineqarnermullu
tapiissutit allanngortinneqarnerat sioqqullugu iluarsaaqqereernermilu iniminni
nikigatik ineqarsimasut. Taamaattumik imaaliallaannaq imminnut
sanilliunneqarsinnaasimapput.
Ineqarnermut
akiliutinik iluarsaaqqinnerup kingunerinik missueqqissaarnerup takutippaa
inoqutigiit ilai 100.000 kr.-it inorlugit isertitaqartartut iluarsaaqqinnermi
siunertarineqanngitsumik ineqarnermut akiliutaat qaffassimasut.
Taamaattumik
Naalakkersuisut siunniuppaat ineqarnermi nammineq akiligassat qanoq annertutiginissaannut
isertitanut killigititat inunnut 100.000 kr.-it inorlugit isertitaqartartunut
tunngatillugu allanngortinneqassasut, pineqartut ullumikkut aaqqissuussinermit
annerusumik ineqarnermut tapiiffigineqartartussanngorlugit.
Tamanna
pisinnaavoq Naalakkersuisut piginnaatitaanerat naapertorlugu nalunaarutip
allanngortinneratigut. Tamatumanili piumasaqaataavoq allanngortitsinermi
aningaasartuutit Aningaasanut inatsimmiissasut.
Ineqarnermut
tapiissutini pineqarput ininik attartortut pisortat namminersortullu
inissiaataanni attartortittakkani najugaqartut, tassalu inissiani
Namminersornerullutik Oqartussanit kommuninillu pigineqartuni najugaqartut,
kiisalu namminersortut inissiataanni ineqartut.
Ineqarnermut
tapiissutit tunniunneqartarneranni apeqqutaanngilaq soraarnerussutisiaqarneq
innarluuteqarnerluunniit, taamaallaat inoqutigiit qanoq amerlatigisunik
meerartaqarnerat tunngavigalugu inoqutigiit isertitaqartarnerat
isigineqartarpoq.
Naalakkersuisut
isumaqarput assersuutigalugit utoqqalineq pissutigalugu pensionisiaqartut
inatsisit taakkununnga pineqartut aqqutigalugit qulakkeerivigineqartariaqartut.
Taamaattumik pensionisialinnut tunngatillugu atuuttuuvoq pensionisiallit
nammineerlutik inigisaminni ineqarnissaminnut akissaqanngitsut inummut tapiutinik
qinnuteqarsinnaallutik inuit ataasiakkaat pisariaqartitsinerannik naliliinikkut
pisortanit pensionisiat pillugit inatsisit naapertorlugit tunniunneqartussanik.
Siusinaartumik
pensionisiallit utoqqalinerlu pissutigalugu pensionisiaqalersut inummut tapiutit
aqqutigalugit inuttut atugarisatik attatiinnarsinnaassavaat pensionisiaqartup
ulluinnarni pisariaqartitaminut inuunermini atugarisimasaanut najukkamilu
pissutsinut naapertuuttumik naleqquttunik aningaasaateqarnissaa
qulakkeerniarneqassalluni.
Innarluutillit
amerlasuut siusinaartumik pensionisiaqalernissamut akuerineqarsimapput
taakkualu aamma soorunami inummut tapiutinik qinnuteqarsinnaapput.
Aammattaaq
innarluutillit namminneq isertitaqartartut isertitaqartarnertik allanngorpat
pisortanit ikiorserneqaqqusinnaapput. Taamaattumik Naalakkersuisut
isumaqarluinnarput aalajangiiffigisassatut siunnersuummi pineqartut
aningaasatigut periarfissinneqarsimasut.
Aammattaaq
nalunaarsuisarneq pillugu inatsimmut akerliuvoq attartortut inuttut
atugarisaat, timikkut tarnikkulluunniit akornuteqarnerat tunngavigalugit
attartortitsisup nalunaarsussappagit, taamaattumillu pineqartut atugarpiaat
ineqarnermik akiliutinik nalunaarsuinerit aqqutigalugit
misissorneqarsinnaanissaat periarfissaqanngilaq.
Naggataatigut
Naalakkersuisut siunnersuuteqartoq ilumoornerassavaat inoqutigiit 100.000
kr.-it inorlugit isertitallit ineqarnermut akiliutit ineqarnermullu tapiissutit
allanngortinneranni naapertuutinngitsumik eqqorneqarsimammata, tamannali
iluarsiniarneqassaaq ukioq manna juulip aallaqqaataanit atulersumik.
Taamatut
oqaaseqarluta Naalakkersuisunit inassutigaarput Inatsisartunut ilaasortap
Anthon Frederiksenip siunnersuutaa akuerineqassanngitsoq. Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Partiit
oqaaseqartuinut siulliulluni oqaaseqassaaq Enos Lyberth Siumut.
Enos
Lyberth, Siumup
oqaaseqartua.
Qujanaq.
Inatsisartunut ilaasortap Anthon Frederiksenip, Kattusseqatigiit, Utoqqaat,
Innarluutillit, siusinaarlutillu sulisinnaajunnaarnersiutillit ineqarnermut
akiliutaasa aaqqissuuteqqinnissaannik misissuisoqarnissaa pillugu
Naalakkersuisut peqquneqarnissaannik Inatsisartut aalajangiiffigissassaattut
siunnersuutaa pillugu imatut Siumumiit oqaaseqarfigissavarput.
Inatsisartunut
ilaasortap Anthon Frederiksenip siunnersuutaa soqutiginarpoq, Naalakkersuisulli
akissuteqaataanni erseqqissumik paasitinneqarpugut Utoqqaat, Innarluutillit
siusinaarlutillu sulisinnaajunnaarnersiutillit, ukiumut kr. 100.000 ataallugit
pisartagallit ukioq manna juulip aallaqqaataaniit aallartittumik
aaqqiviginiarneqartut, taakkulu aningaasanut inatsimmiilernissaat
Naalakkersuisunit siunnerfigineqartoq, Siumumiit tamakkiisumik
tapersersorumaaratsigu matumani nalunaarutigissavarput.
Siumumiit
nuannaarutigaarput utoqqaat, innarluutillit siusinaarlutillu
sulisinnaajunnaarnersiutillit Naalakkersuisunit aaqqiivigineqarnissaat
aningaasanut inatsisikkoorlugu aaqqiiviginiaqarmat.
Taamaattumik
Siumumiit naalakkersuisut nalunaarutaat tamakkiisumik taperserlugu
nalunaarutigaarput.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq
Asii Chemnitz Narup Inuit Ataqatigiit.
Asii
Chemnitz Narup,
Inuit Ataqatigiit oqaaseqartuat.
Qujanaq.
Ineqarnermut akiliutit ineqarnermullu tapiissutit 1. januar 2002
aallarnerfigalugu allanngortinneqareersimatsiartulli tutsiuttalerpoq
inoqutigiit 100.000,- koruunit ataallugit isertitaqartut
siunertarineqanngitsumik ineqarnermut akiliutigisartagaat qaffassimasut.
Taamaalillunilu
aaqqissuusseqqinnerup siunertaa sanioqqullugu eqqornerlugaasoqartoq
oqaatigisariaqarluni.
Eqqornerlugaasunut
ilaapput Inatsisartunut ilaasortap Anthon Frederiksen-ip ullumi
oqaluuserisassanngortitamini eqqartugai; utoqqalinersiallit, innarluutillit
siusinaartumillu sulisinnaajuimaarnersiutillit 100.000,- koruunit inorlugit
isertitallit.
Inuit
Ataqatigiit siornali Naalakkersuisunut saaffiginnippugut siunertarinngisamik
eqqornerlugaasimasut aaqqiissuteqarfigineqapallannissaat sulissutigeqqullugu.
Taamaammat nuannaarutigaarput Naalakkersuisut akissuteqaamminni
nalunaarutigimmaassuk julip aallaqqaataanit ineqarnermut tapiissutit
allanngortinneqassasut, isertitakitsullu naapertuunnerusumik tapisisarnissaat
qulakkeerneqassasoq.
Naak
iluarsiiniarneq kingusikkaluartoq Inuit Ataqatigiit tungaannit Naalakkersuisut
akissutaat tusaatissatut tiguarput, siunnersuuteqartullu siunnersuutaata
akuersaarneqannginnissaa innersuussutigissallutigu.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq
Otto Jeremiassen, Atassut.
Otto
Jeremiassen,
Atassutip oqaaseqartua.
Siullermik
ATASSUT-miit erseqqissaatigissallugu pingaartipparput; suliat ingerlareersut ataqqillugit
qalleraattumik sulisoqannginnissaa, tamaakkaluartorli piffissap ingerlanerani
ilaatigut erseqqissaaffigineqarsinnaasarneq pisariaqartoq aamma ilisimavarput.
Uani
Inatsisartuni Kattusseqatigiit sinnerlugit ilaasortaasup Anthon Frederiksennip
siunnersuutaani erserpoq utoqqaat, innarluutillit siusinaartumillu
sulisinnaajunnaarnersiutillit ineqarnermut akiliutaasa
aaqqissuuteqqinneqarnissaannut misissuisitsisoqarnissaanik kissaateqamera.
Tassanilu
pineqarput ineqarnermut akiliutit qaffakkiartornerisa utoqqaat, innarluutillit,
siusinaartumillu sulisinnaajunnaarnersiutillit annertuumik eqqorneqarsimaneri.
ATASSUT-miit
Anthon Frederiksenip qisuariaataa paasilluarsinnaavarput, kisiannili
ilaqutaninnermut Naalakkersuisup uunga apeqqummut akissuteqataani erserpoq
siorna januarip aallaqqaataaniit atuutilersumit ineqarnermut akiliutinik
iluarsaaqqinnermi, ineqarnermut akiliutit ineqarnermullu tapiissutit
allanngortinneqarnerinik kinguneqartumik, tamatumalu kingorna misissuinerit
ingerlateqqinneqarsimapput qulakkeerniarlugit allannguinerup sunniutai.
Misissuinermi
ersersimavoq inoqutigiit 100.000,00 koruunit inorlugit isertitallit
siunertarineqanngitsumik iluarsaaqqinnermi ineqarnermut akiliutaannik
qaffaasimanerit, tamatumalu kingoma Naalakkersuisunit siunniunneqarpoq julip
aallaqqaataniit atuutilersumik ukioq tamanna iluarsiiffigineqassasut.
Ilaqutariinnermut
Naalakkersuisup akissuteqaataata ersersimmagu misissuisoqareersimasoq,
minnerunngitsumillu aamma Naalakkersuisunit aaqqiissutissanik iliuuseqarfiginiarneqarnera
ATASSUT-miit iluarisimaarlugu oqaatigissavarput.
Kattusseqatigiit
sinnerlugit Inatsisartuni ilaasortap Anthon Frederiksenip siunnersutaa
ATASSUT-miit tapersernagu oqaatigissavarput suliat pineqartunut
ingerlanneqatereersimammata.
Taamatut ATASSUT-miit
oqaaseqareerluta erseqqissaassutigissavarput kommunet utoqqarnut
innarluutilinnut sulisinnaajunnaarnersiuteqartunullu inummut tapit
aqqutigalugit ineqarnermut assigisaanullu nammineerlutik
tapiissuteqarsinnaanermut pisussaaffeqarmata.
Taamatut
oqaaseqarluta siunnersuut ATASSUT-miit akuersaanngilarput.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq
Astrid Fleischer Rex, Demokratit.
Astrid
Fleischer Rex,
Demokratit oqaaseqartuat.
Qujanaq.
Anthon Frederiksen aalajangiiffigisassatut siunnersuutaa Demokratiniit imatut
oqaaseqarfigerusupparput.
Anthon
Frederiksen isumaqatigilluinnarparput taaneqartut ineqarnerminnut akiuliutinik iluarsaaffigineqartariaqarmata.
Pensionisiallit iniminnut akiliinissaminnut ikiorneqarsinnaapput inummut
tapiutinit kommuniminnut qinnuteqarunik.
Inummulli
tapiissutit amerlassusaat kommunimiit kommunimut allanngorartarput.
Taamaalillutillu inuit pineqartut ilaat aningaasatigut
ikiorserneqannginnerusarlutik. Inummummi tapiissut kommunimi
aningaasaqarniarneq naapertorlugu amerlassusissalerneqartarpoq.
Inatsisartuniillu
kommunit aalajangiiffigisinnaangilagut oqarfigalugit imatut imatullu
amerlassusilinnik tapiissuusi. Ukioq mannamiilli julip aallaqqaataaniit
inoqutigiinnut 100.000 kr-nit inorlugit isertitallit ineqarnermut
tapiissutisiaat naapertuuttunngorsagaassammata ilimanarluinnarpoq qulaani
pineqartut ilaat ikiorserneqarumaartut.
Demokratinit
taamatut oqaaseqarluta siunnersuutip akuerineqannginnissaa inassutigaarput.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliuppoq
siunnersuuteqartoq Anthon Frederiksen Kattusseqatigiit.
Anthon
Frederiksen,
siunnersuuteqartoq, Kattusseqatigiit.
Qujanaq.
tassa partiit akissuteqarneranni erserpoq utoqqaat imaluunniit
siunnersuutigisara akuersaarumaneqanngitsoq tamanit. Kisianni taamaakkaluartoq
Naalakkersuisut akissuteqarneranni takusinnaavara utoqqaat ammalumi allat
100.000-t inorlugit isertitaqartut ineqarnermut akiliutaasa iluarsineqarnissaat
suliniutigineqalersoq.
Tassa
ulloq manna sioqqullugu suliutigineqarnera takujuminaassimavoq. Aamma suliat
ingerlareersut qalleqqerannginnissaannik Atassutip oqaluttua isumaqarpunga
illuatungililaartariaqartoq. Pissutigalugu iluarsiinissamut aningaasanut
inatsimmi suli aaqqiisoqarsimanngimmat.
Maannalu
Naalakkersuisut akissuteqaamminni aningaasanut inatsimmissasut taakkua
piumasaqaatigivaat. Soorunami tupinnanngilaq aamma taakkua aningaasanut
inatsisip inaarsarnerani naatsorsuutigilluinnarpara
akuersissutigineqarumaartut. Aammami taamatut partiit oqaluttui tamarmik
oqarput. Taannartaa nuannerpoq qujanaqaaq, naak itigartitsiniarnermik
oqaluttoqaraluartoq kisianni aaqqiiniartoqarniarmat taanna oqaatigisariaqarpara
iluarisimaariga.
Kisiannili
tamakkiinerusumik aaqqiinissaq taanna isumaqarpunga pisariaqarluinnaraluartoq
tassami naluneqanngitsutut qineqqusaarnerit tamaasa tamatta aamma maani
qineqqusaarsimasugut utoqqaat ineqarnermut iluarsiivigineqarnissaat
pimoorullugu ilungersuutingaarlugu qineqqusaarutigisarparput. Kisiannili
suliassat tiguleraangatsigit aamma ilaasa piumajunnaartarnerat tassani
ersiinnarpoq. Kisianni qujanaq akissutigineqartunut.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Ilaqutariinnermut
Peqqissutsimulu Nalakkersuisoq.
Ruth
Heilmann,
Ilaqutariinnut Peqqissutsimullu Nalakkersuisoq, Siumut.
Qujanaq.
tassa uangattaaq qujavunga Naalakkersuisut akissuteqaataat partiit tamarmik aamma
tapersermassuk. Aammalu minnerunngitsumik siunnersuuteqartoq paasinnilluarluni
aamma taamatut akuersaarmat. Tassa imaappoq ineqarnermut tapiissutit
aaqqissuuteqqinneqarneranni nutarsaanermik Naalakkersuisut 2001-mi
saqqummiussaqarmata aamma isumaginninnermut ataatsimiititaliaq isumaqarpunga
aammalu ineqarnermut ataatsimiititaliaq ataatsimoorlutik piareersaqataanerminni
eqqumaffigiarneqarsimavoq. Aammalu inatsisissaq imaannaanngimmat aamma ukiup
ataatsip ingerlanerani kingunerisassai uterfigineqassasut. Taamaattumik
tassuunakkut aamma Naalakkersuisut immaqa eqqumaniarlutik taamatut
iliorsimanerat aamma eqqarsaatigalugit soorunami utoqqaat innarluutillit
aammalu siusinaartumik sulisinnaajunnaarnersiutillit eqqarsaatigalugit
minnerunngitsumillu 100.000 ataallugit isertitaqartartut eqqarsaatigalugit.
Ineqarnermut tapiissutikkut aamma tassuunakkut
iluarsartuussiffiginiarneqarnerat tassani pineqarmat.
Taannalu
nuannaarutigaara aamma tamaginnit aamma tapersersorneqarmat taannalu aningaasanut
inatsisisamut massakkut akuersaarneqaruni tassa julip aallaqqaataani
atuutilertussaavoq. Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Tulliulluni
oqaaseqassaaq Enos Lyberth, Siumut.
Enos
Lyberth, Siumup
oqaaseqartua.
Siunnersuuteqartumut
una oqaaseq atormagu utoqqaat qineqqusaarutigeriarlugit taamatut uanga
paasigakku. Utoqqat qineqqusaarutigeriarlugit taava piffissanngormat qanoq
iliortoqanngitsoq. Isumaqarpunga tusangiasaarinerit maani oqaluttarfimmi
mianersuuttariaqartut. Silami taamatut iliortoqarsinnaavoq. Kisianni aana
paasisariaqartoq uagut Siumumi oqanngilagut itigartillugu.
Kisianni
oqarpugut siunnersuut soqutigaarput itigartitsineq toqqaannartumik oqaatsimik
ataatsimilluunniit Siumumit atorneqanngilaq.
Kisianni
tassa imaappoq aatsaat landstingip ukiua siulleq qaammatialunnguit marlussuit
aatsaat atuuppoq. Naatsorsuutigissavat inuiaqatigiit tamattalumi
ajunngeriarutta pisinnaatitaariaruttalu ukiut ukua sisamat ingerlanerini
assigiinngitsorpassuarnik utoqqarnut tunngasunik maani oqaluttarfimmi
oqaaseqartarumaarnerput naatsorsuutigissagaat. Taamaattumik una uanga Anthon
Frederiksenip uagut Siumumit siunnersuutaa ilaminiinnannguatut isigaarput.
Taamaattumik annerusumik pimoorussimanngilarput. Tassa aamma nalunnginnatsigut
Naalakkersuisut tamanna suliaralugu aallartereersut. Aammalu
erseqqilluinnartumik oqaatigimmassuk julip aallaqqaataani pitsanngoriaatit
siulliit utoqqarnut innarluutilinnut il.il. 100.000 ?t ataallugit ukiumut
isertitalinnut malunnartumik aamma malugineqarumaartut.
Taavalu
aamma kukkussutaartoqarsimassappat taannalu aamma ilaatigut ersersinneqarmat
taava aamma taakkua iluarsiiffigineqarnissaat aamma naatsorsuutigalugu.
Taamaattumik tamakkua Siumumit erseqqissumik taperserumavagut.
Kisianni
utoqqalinersiutit tamakkiisumik isigalugit taakkua allatorluinnaq uagut
Siumumit qineqqusaarnerup imaluunniit qinersinerup atuuttup taassuma
ingerlanerani siunnersuutigineqarnissaat maani oqaluttarfimmi
naatsorsuutigineqassaaq. Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Anthon
Frederiksen.
Anthon
Frederiksen,
siunnersuuteqartoq, Kattusseqatigiit.
Tassa
Siumup oqaluttuata tusangiasaarutitut tigusimassappagu soorunami taamatut tiguniarliuk
oqaaserisara. Kisianni itigartitsisimannginnerminik oqarnera
ilumooqqissaannginnami. Tassa Naalakkersuisut akissuteqarnerminni imannak
allapput. ?Taamatut oqaaseqarluta Naalakkersuisunit inassutigaarput
Inatsisartunut Ilaasortap Anthon Frederiksenip siunnersuutaa
akuerineqassanngitsoq.? taavalu Siumup oqaaseqartuata oqaatsini imatut
naggaserpai. ?Taamaattumik Siumumiit Naalakkersuisut nalunaarutaat
tamakkiisumik taperserlugu nalunaarutigaarput.?
Tassa
akuersinermut, itigartitsinermut tapersiilluni oqaatsip naqissusernera
tassaniippoq. Taamaammat taanna erseqqissaassutigilaavinnarpara
itigartitsinermik imaqarmat. Kisiannili tmaatta isumaqatigiilluinnarpugut
nuannaarutigalugulu julip aallaqqaataaninngaaniit taakkua pissakinnerpaatut
oqaatigineqartartut aamma ikiorsiiviginiarneqarmata ineqarnerup tungaatigut.
Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Enos
Lyberth Siumut naatsumik.
Enos
Lyberth, Siumup
oqaaseqartua.
Anthon Frederiksenip
Kattusseqatigiit taamak oqarmata soorlu Siumup oqaasertuatut tassunga Anthon
Frederiksenimut tapersiinngitsunga toqqaannartumik. Kisianni tassa imaappoq
Naalakkersuisut akissutaat Siumuminngaaneersuunngilaq. Tassa imaappoq
Naalakkersuisut taanna tamakkiisumik taanna akissutigaat. Siumup partip
kisimiilluni akissutiginngisaa. Tassa taanna allaassutaa.
Aammalu
soorlu oqartugut naatsorsuutigissavat aamma neriuutigissavara tassuuna
arlaatigut isumaqatigiikkummartugut tamatta utoqqaat innarluutillillu
ajunnginnerpaamik maani inooqataanissaat suleqataaffigerusukkatsigu tassa
taanna erseqqissassavara. Taamaattumik neriuutigissavara tusarnaartoqassappat
tamanna utoqqarnut aamma innarluutilinnullu pututitsiniutigineqassanngitsoq.
Maannakkorpiaq akuersaanngikkaluarluta tuluttut nipilimmik Anthon Frederiksenip
oqarneratuut kisianni julip aallaaqqaataani pitsanngoriaatissat siulliit
takkukkumaartut taanna upperaarput. Qujanaq.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Oqallinneq
ingerlaqqitsinnagu oqaatigissavara oqaaseqartut tamarmik julip aallaqqaataanik
aaqqiinissaq Siumut, Inuit Ataqatigiit, Naalakkersuisut, akissutaanni julip
aallaqqaataani ineqarnermut aamma tapiissutit allanngortinneqarnissaat aamma
taavaat Atassutip julip aallaqqaataani atuutilersumik ukioq manna tamanna
iluarsiiffigineqarnissaa kiisalu aamma Demokratit ukioq manna julip
aallaqqaataani inoqutigiinnut 100.000-t inorlugit ineqarnermut tapiissutisiat
taakku aaqqiivigineqarnissaat Inatsisartunit oqaseqartunit tamanit
naatsorsuutigineqarpoq.
Jensine
Berthelsen Atassut.
Jensine
Berthelsen,
Atassut.
Naatsukullannguamik
assortuunnerujussuit pisaqattaartarmata pisariaqanngitsumik paasereerlutigut
Naalakkersuinikkut aaqqiissutissanik ingerlatsisoqareersoq taamaammat assut
eqqarsaatigillaqquara siunnersuutit allaffissornikkut
akisariaqaraluartulluunniit maani apuunneqartarneri
eqqarsaatigineqartariaqartoq Siulittaasoqarfimminngaaniit.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Taamaalilluni
oqaluuserisassaq taanna 110 naammassivoq.