Oqaluuserisassani immikkoortoq 111 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut 21-at, marlunngorneq 8. april 2003, nal. ?
Athon Frederiksen, siunnersuuteqartoq, Kattusseqatigiit.
Tassa una naqinnerlutaasimagunarmat naqqiissutigilaarniarpara, oqaaseq una nutserfigineqarnissaat, tassa isumaavoq soorunami illoqarfiit mikinerit taakkununnga suliffeqarfiit Nuummiittut nutserneqarsinnaanerat.
Taamatut siunnersuuteqarninnut tunngavingaakka illoqarfiit mikinerit, soorlu assersuutigalugu Qasigiannguit, Paamiut allallu ukiuni kingullerni inuerukkiartortut, aammalu ilaatigut aningaasaqarniarnikkut ajornartorsiuteqartartut, suliffeqarfinnik nuutitsinikkut ikiorserneqarsinnaammata. Tassani pivakka Namminersornerullutik Oqartussat suliffeqarfiutaat.
Aamma taamaaliornikkut maani illoqarfissuarmi inissaaleqineq annikillisinneqassammat, tassami aamma nalunngilarput maani illoqarfissuarmi allaat sanaartorfissaaleqineq ajornartorsiutaalernera aamma ilisimaneqarmat.
Nammaqatigiilluni ineriartortitsinissamik tamatta oqaluttarpugut, taamaattumik illoqarfiit mikinerit ilaatigut allaat sanaartornermut iluarsaassinissanullu annikitsuinnarmik aningaasaliiffigineqartartut ineriartortitsinermi missukutarineqartutut misigisimasarnerat arajutsisimaneqanngilaq.
Taamaaliornikkut illut inissiallu ilaasa atorneerullutik napaannalersut aamma atorluarneqarsinnaammata. Aammalu nammaqatigiinnerup aqqani illoqarfiit mikinerit taamaaliornikkut ikiorserneqarsinnaammata.
Allarpassuillu iluaqutaasinnaasut taakkartorneqarsinnaapput, qularinngilaralu oqallinnermi matumani inatsisartut aamma ilaatigut ajunngilluinnartunik saqqummiussaqarumaartut.
Taamatut oqaaseqarlunga oqallilluarnissassinnik kissaappassi.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Maanna oqaaseqassaaq Aningaasaqarnermut Naalakkersuisoq.
Augusta Salling, Aningaasarsiornermut Naalakkersuisoq, Atassut.
Qujanaq.
Illoqarfiit ilaasa inuerukkiartornerat ingerlatseqatigiiffiit sulisuisalu Nuummiit nutserfigitinnerisigut illuatungilerneqarnissaa Anthon Frederiksenip kissaatigaa.
Namminersornerullutik Oqartussat ingerlatseqatigiiffiutaat illoqarfinni inuiaqatigiinnut ingerlatseqatigiiffinnullu aningaasarsiornikkut iluaqutaanerpaamik inissisimasariaqartut tamanut tunngatillugu Naalakkersuisut isumaqarput.
Aktiaateqarluni ingerlatseqatigiiffiit 1990-ikkunni pilersiortorneqarnerinut atatillugu ingerlatseqatigiiffit amerlanersaasa, qullersaqarfiisa maani Nuummi inissinneqarnissaat pissussamisoorsimavoq. Ingerlatseqatigiiffiit inissisimaffii taamanikkumiilli akuttunngitsumik oqallisigineqartarpoq.
Tassunga atillugu assersuutitut taassavara Tele Greenland ingerlatseqatigiiffimmut maani Nuummi qullersaqarfeqaraluarluni illoqarfinni allani aamma pingaarutilinnik ingerlataqartoq. Taamaalilluni TELE/POST Greenland Qasigiannguani Tasiilamilu ingerlatami ilaanik inissiisimavoq.
Aamma taaneqarsinnaavoq KNI Pilersuisup ikummatissanut immikkoortortaa, taanna naluneqanngitsutut Nuup Kommuneani Kangerluarsorutsimi pingaarnertut peqqumaasiveqarpoq, qullersaqarfiali Maniitsumiilluni. KNI Pilersuisup sinnera Sisimiuni qullersaqarfeqarpoq Aasiannili pingaarutilimmik immikkoortortaqarluni.
Royal Greenland pisariillisaanerminut ilaatillugu allaffissornerminik annikillisaarujussuarsimavoq. Tamatumunnga pingaartumik Nuummi qullersaqarfik eqqorneqarsimavoq, tassani sulisut ima ikilisimatigillutik qullersaqarfiup ilarujussua suliffeqarfinnut allanut attartugaritilertariaqarsimalluni.
Ingerlatseqatigiiffiit tamarmik immikkuutaarlutik pissutissaqartumik maannakkut sumiiffigisaminniipput. Ingerlatseqatigiiffiit ataasiakkaat immikkut pissutigisaasa eqqartornissaat ingasappallaassaq. Kingunerusussat pitsaasut pitsaanngitsullu pillugit ingerlatseqatigiiffinni aqutsisut qanimut oqaloqatigisaqaqqaartinnagit ingerlatseqatigiiffiup qullersaqarfianik nuutsitsinissaq pitsaasumik kinguneqarnavianngilaq.
Ineqarnermut tunngasuni ajornartorsiutit eqqarsaatigalugit illoqarfiit ilaanni annertuumik inissaaleqineqaraluartoq, illoqarfiit ilaanni illunik inissianillu atorneeruttunik peqarnera ajuusaarnartuummat Anthon Frederiksen ilumoorpoq.
Inissaaleqineq eqqarsaatigalugu, Nuumiinnaanngitsoq aammali illoqarfinni allani Namminersornerullutik Oqartussat ingerlatseqatigiiffeqarfigisaanni, 2000-imili Naalakkersuisut erseqqissumik isummiussimavaat, ingerlatseqatigiiffiit sulisuminnut pisariaqartitsineq malillugu inissaqartitsinissamut pisussaaffik ingerlatseqatigiiffiit tigussagaat, ingerlatseqatigiiffiillu taamaaliulereerput.
Ingerlatseqatigiiffiit pisortat inissiaataannik atuisinnaanerminnut ullumikkut akiliuteqartareerput. Ingerlatseqatigiiffiit inissialiornissaminnut suli kajuminnerulersinniarlugit, tamatumuunalu pisortat inissiaataannik inissarsiorlutik utaqqisutut allatsissimasunut atuisinnaalersitsillutik.
2003-mut aningaasanut inatsisissatut siunnersuummi Naalakkersuisut siunnersuutigaat pisortat inissiaataannik atuinissamut ingerlatseqatigiiffiit Nunatta Karsianut akiliutigisartagaat qaffassasut, qaffaatillu amerlanersaat maani Nuummi pissasut. Kiisalu ingerlatseqatigiiffiit nalunaarfigineqarsimapput kingusinnerpaamik 2010-mi pisortat inissiaataannik atuiunnaarluinnarsimassasut.
Naggasiullugu oqaatigerusuppara suliffeqarfinnik nutsertitsinerinnakkut siuariartortitsinermik pilersitsisoqarsinnaanngitsoq. Siuariartortitsineq pilersinneqarsinnaavoq aningaasarsiornikkut nammineerfiusumik inuussutissarsiornerup ineriartortitsivigineratigut, kommunenimi mikinerni inuussutissarsiornerup ineriartortitsivigineqarnissaa aamma periarfissaqarpoq.
Sanaartornermut iluarsaassinnissanullu pisortat aningaasaliissutaasa agguaanneqartarnerat pisarpoq aningaasanut inatsimmi Inatsisartut pingaarnersiuillutik tulleriiaarinerisigut. Akileraarutitigut isertitat nammaqatigiiffiusumik agguarneqarnissaat qularnaarneqartarpoq kommunenut ataatsimoortumik tapiissutitigut, aamma kommuneni akileraarutinik nalimmassaanikkut. Taamaattumik kommunet arlaannaataluunniit missukutarineqarnerannik oqartoqarsinnaanngitsoq isumaqarpunga.
Taamatut oqaaseqarlunga Inatsisartut oqallinnissaat qilanaaraara.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq
Ole Thorleifsen, Siumut.
Ole
Thorleifsen, Siumup
oqaaseqartua.
Inatsisartunut
ilaasortap Anthon Frederiksenip Namminersornerullutik Oqartussat
ingerlatsiveqarfiisa ilaasa, Nuummiit illoqarfinnut mikinernut
nuunneqarnissaannik apeqquteqaataa aallaavigalugu Siumumiit oqallinnissamut
qilanaarpugut.
Maannamut
Namminersornerullutik Oqartussat ingerlatsiveqarfiisa ilai sinerissamut siammaqqapput,
taamaattumillu Siumumiit Naalakkersuisut akissutaat iluaraarput.
Siumumiit
pingaartikkatsigu erseqqissarusupparput nunatsinni tamani, inuussutissarsiutit
ineriartortinneqarnissaat,
tamannalu ersarilluinnartumik Inatsisartut aningaasaqarnermut inatsisissaata
oqallisiginerani oqariartuutigisaqattaarparput.
Isumaqarpugut
illoqarfiit mikinerit allaffeqarfinnik nuussivigineqarnerisigut,
ajornartorsiutaannik qaangiisinnaanngitsugut. Kisiannili ajornartorsiummik
innersuussineratut ittut Siumup iluani oqallisigisareerpagut, tamatumalu
kingunerisaanik inuussutissarsiornermik siuarsaanissamik pimoorussinissamik
Naalakkersuisunut oqariartuuteqaqattaarpugut.
Upperigatsigu
illoqarfiit minnerusut inuussutissarsiornikkut siuarsaavigineqarnerisigut ajornartorsiummik
qaangiisinnaaneq. Siumumiit inuussutissarsiornikkut pilersaarusiortarnerat
nunap immikkoortukkuutaarlugu agguartaarneqarnissaa, suli
kaammattuutigissavarput.
Taamaalilluni
nunap immikkoortuini susassaqartut qitiusumit akuleruffigineqaratik inuussutissarsiornikkut
kommunet peqatigalugit siuarsaanissamut pilersaarusiorsinnaassammata.
Inuiaqatigiinni
tamani inuussutissarsiutitigut ilaquttanik atugarissaartitineq
ornigunartinneqartarpoq, taamaattumillu pingaarluinnarpoq, Siumup siunnerfiata,
inuussutissarsiutinik siuarsaanissap pimoorunneqarnissaa. Inuiaqatigiinni
ilaqutariit toqqissisimasut inooqataanissaat Siumup anguniartuarpaa, sulili
annertunerusumik aamma sulissutigerusuppaa.
Ilanngulluguli
erseqqissarusupparput Siumumiit Naalakkersuisunut kaammattuutigigatsigu
saneqqunneqarsinnaangitsutullu
isigalugu, sulisut ilinniarsimanngitsut allallu sumiiffimmiit sumiiffimmut,
noorusuttarnerat aningaasaliiffigissagaat. Tassami ilinniarsimasut kisimik
periarfissinneqartariaqanngimmata suliffissaminnik akiliutsillutik
nuuttarsinnaanerat.
Tassani
maluginiartariaqarpoq illoqarfinnut annernut nuussinnaaneq kisimi
pineqanngimmat, aamma illoqarfinnut minnernut, nunaqarfinnulluunniit
suliffissaqarfiusunut inissaqarfiusunullu nuunniarsinnaaneq aamma tassani
ilanngunneqarmat.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Johan Lund Olsen, Inuit Ataqatigiit.
Johan
Lund Olsen, Inuit
Ataqatigiit oqaaseqartuat.
Ja,
qujanaq.
Inatsisartuni
ilaasortap Anthon Frederiksenip oqallisaarusiaa soqutiginartoq Inuit
Ataqatigiinnut takornartaanngilaq, ukiunimi kingullerni inissaaleqinerujussuaq
Nuummi annertusiartuinnartoq ilutigalugu oqallissaarisup kissaatigisaanut
naapertuuttumik aamma siunnersuuteqartarsimavugut.
Miserratigineqarsinnaanngilarmi
Nuuk illoqarfittut sutigut tamatigut eqiteruffiuvallaalersimammat
namminersornerulerneq ukiut 24-it siornatigut eqqunneqarmalli ingerlatsiviillu
assigiinngitsorpassuit maanga Nuummut eqiterutilermata.
Nuuk
tassaalersimavormi Nunatta Inatsisartuisa Naalakkersuisuisalu
angerlarsimaffiat, danskit naalagaaffiata siornatigut akisussaaffigisimasaasa
Nunatsinnut nussorneqarnerat ilutigalugu aamma suliffeqarfiit assigiinngitsut
angerlarsimaffigilersimasaat.
Assersuutigiinnarlugumi
ullumikkut Nuummiipput ingerlatsiviit assigiinngitsorpassuit:
Namminersornerullutik Oqartussat allaffeqarfissuat, biskoppeqarfik, Nunatta
eqqartuussivia, Dronning Ingridip napparsimavissua, Nunatta atuagaasivia,
Katersugaasivissuarput toqqorsivittalik, Pinngortitaleriffik, kulturip illorsua
Katuaq, Namminersornerullutik Oqartussat aktiaateqarluni ingerlatsiveqarfii
assigiinngitsut: Royal Arctic Line A/S, Royal Arctic Bygdeservice A/S, Arctic
Umiaq Line A/S, takornariartitseqatigiiffik GT A/S allallu suliffiit Nunatsinnut pingaarutillit taakku
ilai eqqaaginnarlugit.
Ilinniartitaanikkut
Nuuk qitiusumik aamma inissisimavoq, maaniillutik Ilisimatusarfik,
Ilinniarfissuaq, Niuernermik ilinniarfik, Peqqissaasut ilinniarfiat, allarpassuillu
ilinniagaqarniartunit sinerissamit ukiut tamaviisa ornigarneqartuartut.
Angallannikkut
imaluunniit assartuinikkut, niuernikkut, tusagassiutitigut,
nalunaarasuartaatitigut, tassa allatut oqaatigalugu attaveqarnermi Nuuk aamma
qitiulluni illoqarfiit pingaarnersaattut maanna inissisimalersimavoq.
Allatut
oqaatigeqqiinnarlugu, Nuuk piorsaaffigineqarsimaqaaq nutserfigineqarsimaqaarlu,
maannalu Nuuk 15.000-it pallillugit inoqalersimavoq, Nunatsinni innuttaasut 25
%-t missaat maaniilersimallutik.
Suliffeqarfippassuit
akissarsiarissaarfiusut iluaqutigalugit Nuuk taamaattumik akileraarfiulluaqaaq,
kommunellu karsianit isigalugu qanganngoreerunarpoq kommune aningaasatigut
amikkisaartoq kingullermik aamma tusaratsigu.
Illussaqartitsiniarnerulli
tungaatigut illoqarfik Nuuk ajornartorsiorfioqisoq kikkunnit tamanit
ilisimaneqarpoq, naluneqanngilarlu initaarniarnissamut utaqqisorpassuit ukiut
13-it angullugit allaat maannakkut utaqqisinneqartariaqartariaqartarnerat, naak
qanittukkut oqaluuserisassani immikkoortup 31-p eqqartorneqarnerani,
Attaveqaqatiginnermut Ineqarnermullu ima nipeqartinniaraluaraa maani Nuummi
inissiarpassuaqartorooq maannakkut najugaqarfigineqanngitsunik.
Tamanna
eqqunngilluinnarpoq pissutissaqarluarpugullu periarfissaq manna iluatsillugu
tamanna pillugu aamma Naalakkersuisumut taamak oqaluttumut
avoqqaarliutigissallugu.
Oqaluuserisatta
uumap siuliani, tassa immikkoortoq 84-imi, Inuit Ataqatigiit pingaaruteqartutut
oqaatigisatta ilagivaat inuiaat namminersuleriartortut aqqutissatuarigaat
oqartussaaqatigiinneq nammaqatigiinnerlu, amerlanerilli misigisimasaat
tassaasoq pissaanerup eqiterukkiartuinnarnera, qitiusumiillu aqutsinerup
sakkortusiartuinnarnera.
1994-imi
Inuit Ataqatigiit pissutsit taamaalereernerat ilisimaarilluarlugu KNI-p allanngortiterneqarnissaa
iluatsillugu taamaattumik, taamanili Inatsisartunit ilalersorneqarluta
Namminersornerullutik Oqartussat Nuummi suliffeqarfiutaasa ilaat,
sineriatsinnut siammartiterneqarnissaat akuersissutigitipparput.
Taamaalilluni
ilaatigut Perorsaasunngorniat Ilinniarfiat Ilulissanut nuutsinneqarpoq, KNI-p
qitiusumik qullersaqarfii Maniitsumut Sisimiunullu nuuttussanngortinneqarlutik,
KNI-p immikkoortortai allat siullermik Ilulissanut Qasigiannguanullu
nuutinneqarlutik, INI A/S-illu taamani qullersaqarfissaa pinngitsoorani aamma
Nuummiittariaqarunnaarsinneqarluni.
Ukiuni
kingullerpaani Inuit Ataqatigiit ilungersuutigalugu
aqqutissiusseqataaffigisarput alla tassaavoq, Paamiuni eqqarsartaatsimikkut
innarluutilinnut angerlarsimaffeqalernissaq. Suliaq taanna ingerlavoq,
eqqaarsaatilli taamaattut suliffeqarfiillu assigiinngitsut pinngitsooratik
Nuummi angerlarsimaffeqartariaqarnerannik siunnerfeqartut suli
aalluttariaqarpavut.
Taamaattumik
siunnersuuteqartup oqallisissiaa manna soqutiginarlunilu iluatinnartortaqarpoq,
ukiuni aggersuni timitalersuiffigissallugu suli alloriaqqiffissaqarsinnaasoq.
Aningaasarsiornermut
Naalakkersuisup akissuteqaataa taamaattumik aamma pakatsinarlunilu sullunarpoq,
sammineqarnerusummi tassaapput Namminersornerullutik Oqartussat aktiaateqarluni
ingerlatseqatigiiffii, soorlumi namminersornerusut allanik
suliffeqarfiuteqanngitsut.
Soorunami
Namminersornerullutik Oqartussat aktiaateqarluni ingerlatseqatigiiffii illoqarfinni
inuiaqatigiinnut ingerlatseqatigiiffinnullu aningaasarsiornikkut
iluaqutaanerpaamik inissisimasariaqarput.
Tamanna
assortorumanngilarput kisiannili takussutissaqareerpoq tamanna aamma ajornarneq
ajortoq, ingerlatseqatifiiffiit Nuup avataanut aamma inissikkaluaraanniluuniit.
Kisiannili oqaatigeriikkattut Namminersornerullutik Oqartussat taakku kisimik
suliffeqarfiutiginngilai, periarfissaqarsorinarporlu suli
siammartiterisinnaanermut.
Pisortammi
aqutsineranni periarfissat Inatsisartullu aalajangiiffigisinnaasaat tassaapput
ingerlatanik aningaasalersuineq, oqartussaaffinnillu eqiterineq imaluunniit
siammarterineq. Inuit Ataqatigiit isumaqarpugut periarfissat tamakku tamarmik
atorneqartariaqartut, siullermilli
siammarteriniartariaqarpugut kommunet inukilliartorfiusut akileraarutitigut
isertitaqarnerulerlutik inuussutissarsiornikkut ineriartortitsinissaminnut
aamma taama iliornikkut tunngavissinneqarsinnaammata.
Taamaattumik
Naalakkersuisoq isumaqatiginngilarput naggasiilluni ima aamma oqaaseqarmat:
suliffeqarfinnik nutsertitsinerinnakkut siuariartortitsinermik
pilersitsisoqarsinnaanngitsoq, aammalu isumaqarmat kommunet arlaannaalluunnit
ataaseq ullumikkutut akileraarutitigut nalimmassaariffigineqartarnerisigut
missukutarineqanngitsut.
Illoqarfiit
mikinerit taamaattumik immikkut aamma isiginiartariaqarpavut.
Naalakkersuinikkut piumassuseq tamatumani apeqqutaaginnarpoq, paasivarpulli
tamatumani Naalakkersuisut piumassuseqarnerat takorluugaqarnerallu
amigaataalluinnartoq.
Taamatullu
oqaaseqarluta siunnersuuteqartoq tunngaviatigut isumaqatigigipput
nalunaarutigivarput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Otto Jeremiassen, Atassut.
Otto
Jeremiassen,
Atassutip oqaaseqartua.
Inatsisartunut ilaasortap Anthon
Frederiksenip Kattusseqatigiinniit oqallinnissamik siunnersuutaanut imaattumik
Atassummiit oqaaseqarfigissavarput.
Illoqarfiit ilaasa
inuerukkiartornerat ingerlatseqatigiiffiillu Nuummiit nutserfigitinnerisigut,
illuatungilerneqarnissaanut Anthon Frederiksen kissaateqarpoq.
Aktiateqarluni
ingerlatseqatigiiffiit 1990-ikkunni pilersiortorneqarnerannut atatillugu
ingerlatseqatigiiffiit amerlanersaasa, maani Nuummi inissinneqarnissaat
pissusissamisoortutut Atassummiit isumaqarfigaagut. Tamatumalu kingunerisaanik
ingerlatseqatigiiffiit inissisimaffii akuttunngitsunik oqallisingineqartarlutik
ullumikkumut nalilersuiffigineqartartut Naalakkersuisuniit maluginiarparput.
Atssummiit ingerlatseqatigiiffiit assigiinngitsut
maanna illoqarfinnut assigiinngitsunut immikkoortortaqarfeqarlutik
siammarterneqarsimasut, takussutissaqartoq oqaatigiumavarput, soorlu makkuusut:
Tele Greenland, Tele/Post Greenland, KNI Pilersuisoq Royal Greenland-ilu.
Ineqarnermullu tunngatillungu
ajornartorsiutit illoqarfiit ilaanni annertuumik inissaaleqineqaraluartoq, illoqarfiilli ilaanni illunik
inissianillu atorneeruttunik peqarnera ajuusaarnartuummat Anthon Frederiksen
ilumoornerassavarput.
Inissaaleqinerlu eqqarsaatigalugu
ingerlatseqatigiiffinnut 2000-mili Naalakkersuisunik piumasarineqarsimavoq
ingerlatseqatigiiffiit sulisuminnut pisariaqartitsineq malillugu,
inissaqartitsinissamut pisussaaffik tigussagaat kissaataasimasoq
oqaatigiumavarput.
Atassummiillu isumaqarpugut Aningaasarsiornermut
Naalakkersuisup akissuteqaammini akissuteqaammini oqaatsit ilumoortut oqarami,
suliffeqarfinni nutsertitsinerinnakkut siuariartortitsinermik
pilersitsisisoqarsinnaanngitsoq, siuariartortitsinermimi
pilersinneqarsinnaammat aningaasarsiornikkut nammineerfiusumik
inuussutissarsiornerup ineriartortitsivigineratigut, kommunenenilu
mikinerusuni inuutissarsiornerup
ineriartortitsivigineqarnissaanut aamma periarfissaqartoq oqaatigiumavarput.
Taamatut Atassummiit oqaaseqarluta
maanna oqallinnissamik siunnersuut Anthon Frederiksen Kattusseqatigiinneersumik
taamatut Atassummit oqaaseqarfigalugu, Naalakkersuisut akissuteqataa
tusaatissatut tiguarput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Marie Fleischer,
Demokraatit.
Marie Fleischer, Demokraatit oqaaseqartuat.
Aap.
Nunatta
isorartussusia eqqarsaatigalugu, Demokraatinit isumaqarpugut, inuiaqatigiinni
siuarsaanissaq pigaanni avaqqunneqarsinnaanavianngitsoq, imminut
akilersinnaasumik ingerlatsitsiniarnissamut atatillugu nukersorneq
annertunerpaaq illoqarfinni piukkunnartuni ingerlanniarneqartariaqassammat.
Nunatta
aaqqissuunneqarnissaanik pilersaarut, siulittaasumit akuerineqarsinnaaguma
issuaafigilaarusuppara:
Issuaaneq
allartippoq:
Killeqartumik
tuniniaaviusinnaasoq assigiinngitsutigut tamakkiissumut sunniuteqartarpoq.
Siullermik
killilerneqartarpoq suliffeqarfiup allisinnaanera aammalu atuilluarnermik
tunngaveqartumik ingerlatsisinnaanera, taamallu unammillersinnaasuseqartumik inissisimalersinnaanera.
Saniatigullu
pilersinneqartariaqarput akit qaffasissut taamallu ingerlatsinermi
aningaasartuutit annertuut, inuussutissarsiornermi aammalu pisortat
pilersuinermik ingerlatsiviini.
Issuaaneq
naavoq.
Taamaammat nalilersorluartariaqartut
amerlapput, suliffeqarfimnik sinerissamut nuussuiniarsinnaaneq
pilersinniarneqalertinnagu. Nunatsinnimi ullutsinni ajornartorsiutaareerpoq
sulisunik ilinniarsimasunik piukkunnartunillu tigumminninniartarneq.
Suli tamanna
ajornarnerulissannginnerluni suliffeqarfiit illoqarfinnut minnerusunut,
ulluinnarni neqeroorutissaaleqinerusunut nuunneqarpata?
Suliffeqarfinni
sulisuusut ilaquttat ikinngutillu qimallugit suliffeqarfitsik nuunneqarpat
malinanarusussanerpat?
Kiisalu
eqqarsaatigigutsigu suliffeqarfinnik nuussinissat namminneq qanoq
akeqassanersut?
Oqareernittummi
nuussinermi sulisut piginnaaneqarluartut tigummiinnarsinnaaneri
ajornartorsiutaalersussaassaaq. Taamalu ilisimasat erlinnaqisut allatut
taallugit know how, nunatsinnit anialersinnaapput, taava sussaagut?
Naqqaniit
aallarteqqissaagut?
Namminiileriartornissaq
ujartunnginnatsigu?
Demokraatit
tungaannit ernumassutigaarput nuussuineq nunatta isasoorsinaaneranut
aqqutissiuiinnarsinnaassasoq.
Ilami
kingunerusinnaasorpassuit qulaajaartariaqarput.
Oqallisissamik
qaqitsisoq isumaqarpoq taaneqartutut iliorneq illoqarfinnut
inissaaleqiffiusunut oqilisaassissasoq. Tamanna Demokraatinit
isumaqatiginngilarput.
Suliffeqarfiimmi
saaffigigaanni paasinarpoq maanna tamakku sumiiffimminni namminneq
inissialiortitilereersut aammalu suli sanaartortut.
Taamaattumik
Demokraatiniit Naalakkersuisut isumaqatigaagut siunnerfianni, tassalu
suliffeqarfiit ukioq 2010 angutinnagu, namminneq sulisuminnut
inissaqartitsilersimassasut taamallu inissatigut pisortanut
nanertuisooqataajunnaassasut.
Naggataatigut
oqallissaaruteqartoq Hr. Athon Frederiksen, inussiarnersumik suleriaasissamik
tikkuussivigerusuppara:,
Siunnersuuteqartinnak
samminiakkamut akisinnaasut kingunissaat pillugit paasiniaavigeqqaartakkit.
Taava piffissarujussuaq sipaassavarput aammalu atituumik tunngaveqartumik
oqallissinnaalissalluta.
Taamatut
Demokraatiniit oqaaseqarluta oqallilluarnissatsinnik kissaassivugut.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Maannakkut
oqaaseqassaaq Anthon Frederiksen, Kattusseqatigiit.
Anthon
Frederiksen, siunnersuuteqartoq,
Kattusseqatigiit.
Qujanaq.
Naalakkersuisut
akissuteqaataannut aammalu partiit akissuteqaataannut qujarusuppunga. Manna
siunnersuut oqallissaarusiaq soqutigalugu oqaaseqarfigineqarmat, soorunami
aamma oqaaseqartut oqaaseqarfigilaanngitsoorusunngilakka.
Siullermik aamma
uanga Inuit Ataqatigiittulli oqarusuppunga, Naalakkersuisut akissuteqaataat
naammagivinnginnakku. Tassa suliffeqarfiit Namminersornerullutik Oqartussanit
pigineqartut ingerlanneqartullu, arlalissuit maani Nuummi
illoqarferujussuarmiimmata.
Aammalu
siunnersuutiga paasilluarneqarsimaguni, aammalu pissutsit piviusut
ilisimaneqarsimappata minnerunngitsumik Demokraatininngaanniit, paasinarpoq
Demokraatit pissutsinik piviusunik uani oqallissaarummi
paasinnilluarsimanngitsut. Tassa isumaqaramik una siunnersuutigisara
ajornartorsiutinik pilersitsiinnassasoq.
Pissutsit
piviusut imaapput, Demokraatit, Nuuk ullumikkut nunatsinni
inissaaleqiffiunerpaajuvoq tupinnanngitsumik.
Aamma pissutsit
piviusut imaapput Nuummi sanaartornissaq eqqarsaatigalugu maannamut Nuup
pilersaarutaa qiviaraanni, Qinngorput amigalereerpoq sanaartorfigissallugu.
Taava eqqartorneqarput Nuup Avannaani, sanaartornissaq imaluunniit Nuup suli
kujataanut sanaartornissaq ingerlateqqinneqarsinnaasoq.
Uanga
siunnersuutigisara piviusunngortinneqarsinnaappat, eqqarsaatigineqarsinnaavoq
takuneqarsinnaallunilu Nuummi Namminersornerullutik Oqartussat
suliffeqarfippassuisa ilaasa, nuutinneqarnerisigut Nuummi
inissaaleqinerujussuup annikillisinneqarsinnaanera, tassuuna
anguneqarsinnaasoq.
Aammalu soorlu
Inuit Ataqatigiit oqarnerattuut pissaanerup oqartussaaffiup aammalu
akisussaaffiit siammarterneqarnerisigut, illoqarfiit allat taamaalillutik aamma
iluaquserneqarsinnaanerat tassuuna anguneqarsinnaasoq kialluunniit
takunnissinnaasup takunngitsuusaaginnarnagu, paasillugu
tigusinnaasariaqassagaluarmagu.
Demokraatit
oqaaseqarnerminni ilaatigut oqaatigaat taamatut nutsertitsisoqassagaluarpat
sulisoqarniarnikkut ajornartorsiutaasinnaasut assigiinngitsut pilersinnaaneri
aarleqqutigineqartariaqartoq.
Takulaariartigu Tele/Posti
Grønland allallu nuutsinneqarsimasut ullumikkut ukiuni kingullerni, qanoq
sulisoqarnikkut ajornartorsiuteqarneri inuiaqatigiinni ajornartorsiutaanersut,
qanoq uppernarsaatissaqartinneqarpat?
Nalunngilara
taamanikkut nuutsitsinissamik oqalunneq aallartimmat assorujussuaq taassuma
ajornartorsiutigineqarsinnaanera, eqqartorneqartoq. Kisianni piffissami
sivitsuinnarmi malinnaanerput naapertorlugu takusinnaavarput
ajornartorsiutaasareertoq aallaqqaataani. Kisianni piffissap ingerlanerani
taanna ajornartorsiut qaangerneqarpoq. Aamma sunaluunniit pilersinniagaq
nutaaq, tamatigut ajornartorsiuteqanngivissortumik aallartinneqarneq ajorpoq,
tamatta inuiaqatigiinni malinnaasimagutta tamanna qularnanngitsumik
ilisimaneqassagaluarpoq. Minnerunngitsumik Demokraatininngaanniit.
Tupigusuutiginngilara
Demokraatit nutaajugamik pissutsinik assigiinngitsunik
arajutsisimasaqarsimasinnaanerat, taanna assortorneqarsinnaanngilaq. Aamma
isornartorsiorusunngilakka Demokraatit pissutsinik malinnaasimassanngippata,
imaluunniit ilisimasat tungaasigut pissutsinik inuiaqatigiit akornani
tussapittumik inissisimassappata. Taanna tupinnartuliaanngilaq.
Taamaammat uani
pakatsisutigiinnarpara, illoqarfiup ajornartorsiuteqareersup, annertuumik
ajornartorsiuteqareersup ajornartorsiutaasa ilaasa anigorneqarnissaanik
suliniuteqarnermi, Demokraatit akuersaanngilluinnartutut oqariartuuteqarnerat
maluginiarakku, taanna kisimi.
Taassumap
saniatigut Siumut aamma Atassutip oqaaseqaatai annerusumik oqartariaqarpunga,
Naalakkersuisut akissuteqaataat annerusumik tunngavigalugu akissuteqarnerat
aallaaveqarmat.
Tassami Siumup
ilaatigut oqaatigivaa aamma, inuiaqatigiinni ilaqutariit toqqissisimasut
inooqataanissaat Siumup anguniarpaa. Ilumut taamaattariaqarpoq aamma taanna
anguniagaavoq pingaaruteqartoq inuiaqatigiinni. Inuiaqatigiit toqqissisimasut
ilaqutariillu toqqissisimasut anguniassagutsigit, inissaaleqineq pimoorullugu
qaangerniartariaqarparput nunatsinni inuit ataatsimut katersuutsiinnarnagit,
taamalu inissaaleqisut amerliartortiinnarnagit.
Taamaattumik
inissaaleqinerup qaangerniarneqarnissaanut suliniutit alloriarfiusinnaasut
aamma malinnaaffigalugillu eqqumaffigilluarnissaat isumaqarpunga
pingaaruteqartorujussuusoq.
Taamaattumik
aamma Siumup akissuteqaataanut tassuunakkut pakatsilaarlunga oqartariaqarpunga,
naak oqariartuutinik allanik ajornartorsiutinik qaangiisinnaanngitsumik
imaluunniit qaangiisinnaanngitsutut aamma una siunnersuut taaneqarnera, aamma
tassani isumaqarpunga eqqortuunngitsoq.
Tassami suli
illoqarfik Nuuk nutserfigitikkaluttuinnarneqassappat, taannalumi
pinngitsaaliissutaanngilaq, kikkut inuit sumut nuunniarunik nuussinnaanerat
tamatta nalunngilarput. Kisianni nalunngilarput aamma nunatta karsia
akissaqanngitsoq Nuummi inissaqanngitsorpassuit tamaasa inissialiornissaannut.
Oqaluttuarpugut
maani inimi aamma pioreersunik atorluaanissarput anguneqartariaqartoq.
Qanoq ililluta
pioreersunik atorluaasinnaavugut, illoqarfinni mikinerni
inissialiortiteriarluta taava arlaanut inuit politikkikkut nutsertitsineq
taanna arajutsisimaneqanngilaq aamma. Tassa imaakkajuttarmat suliffeqarfiit
ilai matuneqaraangata, inuit soorunami suliffissaqarfiusunut nuukkusunnertik
taanna kissaatigisarmassuk.
Qasigiannguit
Paamiullu assersuutitut taasimavakka, tassani ersarilluinnarmat aamma
inuussutissarsiornikkut illoqarfinni taakkunani periarfissani, qanoq ittuuneri,
pingaartumik ukiuni kingullerni inuussutissarsiornikkut politikkikkut ilaatigut
aalajangernerit tunngavigalugit inuussutissarsiuutitigut
annikillilerisoqarsimavoq tassani illoqarfinni.
Tamatumallu
kingunerivaa aamma inuit tassani najugaqartut allanut nuuttariaqalersimaneri.
Taamaammat
oqaaseq pinngitsaaliineq nuanniikkaluartoq, kisiannili inatsisartut
Naalakkersuisullu oqartussaaffiisa iluini, suliffeqarfiit
piginnittuninngaanniit ingerlanneqarneri aqunneqarnerilu eqqarsaatigalugit,
taakkua isumaqarpunga periarfissatsialaasut nunatsinni inissaaleqinerup
ajornartorsiutaaqisup annertuup qaangerneqarnissaanik periarfissat qanoq
ittusut qimerloorluarlugit aamma oqallisiginissaat.
Demokraatit
saqqummiussaat isumaqatiginngilluinnarpara, pissutsinik misissueqqaarnani
siunnersuuteqarnerarlunga oqartoqarmat, taamaanngilluinnarmammi.
Piffissaq
tamaanga killeqartinneqarmat nipangiinnarallarpunga ajoqaaq.
Jonathan
Motzfeldt, ataatsimiinnermi
aqutsisoq, Inatsisartut Siulittaasuat, Siumut.
Tulliuppoq Per Berthelsen, Demokraatit.
Per Berthelsen, Demokraatit.
Ja, qujanaq.
Tassa paasisinnaavarput ajoraluartumik Hr. Anthon Frederiksen assorsuaq mamiatsatsissimallugu, taanna sumilluunniit siunertaanngilaq. Kisianni siunnersuut kingusinnerusukkut oqaatsikka tusarukkit immaqa paasisinnaassavat, uani inequnarnersarput sassartillugu qungujutsillugu inussiarnersumik saqqummiussisipparput. Sumilluunniit ajortumik isumaqanngimmat.
Kisianni tassa imatut nassuiarniarsarissavara, uani Nuuk kisiat pinngilarput. Kisiannili nunarput atituumik isigalugu, aammalu nunat allat aqqusaartukkamikkut takussutissiissutigisaat, ilinniutiginiarsaralugit eqqarsarluta.
Naatsuarannguamik oqaatigissagukku inuit oqariallaqqissut ilaat oqarnikuusoq eqqaamavara, pisuunerulernavianngilagut piitsuunerunerup nussorneratigut. Taamatut-una naggasiinitsinnut peqqutaalaartoq eqqarsaatigilluaraanni, pissutsillu piviusut paasilluarsimagaanni, ataqatigiinngimmat ima iliorniarneq, siullermik uani eqqarsaatigisat Nuuk kisiat eqqarsaatiginngilluinnarparput uani, illoqarfiit ineriartorfiusut taakkua eqqarsaatigaagut.
Suliffeqarfimmik nuussigutta, taava
nuussivitsinninngaanniit inissiat inuerutitagut amerlasoorpassuanngussapput. Taakkua kikkunnit immersussavagut?
Immersorutsigillu taava sunik suliassaqartinniassavagut suliffissammi
nuutsiternikuugatsigit.
Taannaana
ammalortuusannguaq imminut pamiumigut kiisoq aallaavigalugu ilaatigut taama
oqariartuutigalugu oqariartuuteqartuuteqarluta oqaatigeqqissavara,
mamiatsaatitigineqassanngimmat inussiarnersumik saqqummiukkatsigu. Unami
imminut kiivoq. Itinerusumik eqqarsaatigigaani pissutsillu piviusut
nalilersorsinnaallugillu piviusorsiortumik eqqarsaatigisinnaaganni.
Taamaattumik
Demokraatit piviusorsiunngitsutut uparuarneqarnerat una, aammalu pissutsinik
piviusunik ilisimasaqannginnerat uparuartuineq, isumaqarpunga tulluutinngitsoq
tassa aallaaveqarmat misilittakkanik assigiinngitsunik aallerfiusinnaasunik.
Atituumik misiginnikkutta isumaqarpunga nunatsinni pissutsit allanut
sanilliullugit allaangaanngitsut. Taamaattumik aamma allani nunani
misilittakkat ilinniarfigisinnaalluarpagut.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Maannakkut
Attaveqatigiinnermut, Ineqarnermut, Avatangiisinullu Naalakkersuisoq.
Mikael
Petersen, Attaveqarnermut,
Avatangiisinut Ineqarnermullu Naalakkersuisoq, Siumut.
Qujanaq.
Tassa
nunatta aaqqissugaaneranut tunngatillugu oqallinnermi siuliani immikkoortumi
oqallinneqartumi una aamma soorunami attuumassuteqarluinnarmat, tupinnanngilaq
taakkua immikkoortut tulleriisillugit Inatsisartuni oqallisigineqarmata.
Tassa
pissanganartorujussuaq-una nunatta aaqqisugaanera pillugu oqallilluni. Aamma
isummersorluni tamanna naalakkersuinikkut suliaqartup kialluunniit nalunngilaa.
Aamma tamanna aaqqissugaanikkut pissutsit naalakkersiunikkut suliaqarluni
aallaaviulluinnartuummata naalakkersuinikkut sulinermi.
Naalakkersuisut
Aningaasaqarnermut Naalakkersuisup akissuteqaataanut ilanngullugu
erseqqissaatigilaassavara, soorunami siunnersuuteqartup uani oqallissaarisup
oqallisissiaani inissaqarniarnermut annertoorujussuarmik aamma attorneqarmata.
Aamma avaqqunneqarsinnaanngilluinnarmat, taakku ilanngullugit aamma
oqaaseqarfigissallugit oqaloqataaffigissallugillu. Soorlu aamma
taamaaliortoqartoq partiit assigiinngitsut Kattusseqatigiillu aamma
siunnersuuteqartortaata oqaaseqarneratigut.
Siullermik
erseqqissaatigilaarusuppara ullumikkorpiaq inissaqarniarnikkut ajornartorsiutit
taakkartorneqartut, ilaatigut tassa illoqarfissuarni anginerni kisimi
inngimmata. Tassa kisitsinik naatsorsueqqissaartarfiup nalunaarusiaa kingulliit
inissaqarniarnermut tunngasut aammalu inissaqarnikkut pisariaqartitsineq
nalilersorneqarsimavoq. Tassanilu erseqqilluinnartumik pisariaqartitsineq
ullumikkut annertunerpaaq isorliunerusuniippoq. Ilaatigut taanna
tupigineqarsinnaavoq, naak illuatungaatigut illoqarfissuit
eqqartorneqartaraluartut annertunerpaamik inissaaleqiffigineqarfiusutut.
Kisianni
tassa inissanik pisariaqartitsineq annertunerpaaq inuttussutsimut
naleqqiullugu, isorliunerusuniippoq Qaanaakkunni, Upernavikkunni,
Ammassalikkunni tassa Tasiilakkunni. Aammalu taakkunani nunaqarfinni.
Tamakkua
paasissutissat ilumoortuupput soorunami, uanga upperilluinnarpakka.
Naatsorsueqqissaartarfiup pisariaqartitsinermik nalilersueqqissaarnini
tunngavigalugu nalunaarusiarimmagit.
Taakkununnga
tulliullutik tassa takkupput Sisimiukkut, Nuukkut, Ilulissakkut tassa inissaaleqiffiunerpaatut
taakkartorneqartut. Taamaattumik ilaatigut eqqarsariaallannarpoq tamakku
paasissutissat ersarilluinnartut pissarsiarereerlugit, siunnerfissat
inissialiortiternermut tunngatillugu siunnerfissat eqqartorneqartillugit
ilaatigut allarluinnarmik sammisumik oqallittoqaleraangat.
Aamma uani
oqallinnermi aallarnisaataasumik oqallisilernermi taaneqartut Qasigiannguit
Paamiullu, tassa tamatta nalunngilarput taakkua innuttaminnit
qimararneqarsimasut minnerunngitsumik aalisarnerup aalisarnermik
inuussutissarsiuuteqarnerup taakkunani ajornartorsiutaalernera pissutaalluni,
aammalu rejerniarnerup saarullinniarnerullu taakkua annikillineri
pissutaallutik. Taakkununga illoqarfinni.
Tamanna
tupinnanngilaq, kisianni imaanngilaq tassa taakkua inuerukkiartuinnartut
ullumikkut. Taakkua inuerukkiartornerat unissimavoq, taanna
erseqqissaatigissavara. Tassa Qasigiannguani univissimavoq massakkut
qujanartumik. Illuatungaanillu Paamiuni aamma inuttusiartoqqinneq
aallarteqqissimalluni.
Tassuuna
takuneqarsinnaavoq pissutsit aamma inuussutissarsiornikkut allanngorarneri
naapertorlugit, aammalu aalisarnikkut periarfissat periarfissaalersartut
naapertorlugit aningaasarsiorfissallu pilertarneri naapertorlugit, qanoq inuit
innuttaasut nunatsinni malersuitigisut. Tamanna
pissusissamisoorluinnaqqissaarpoq.
Taamaattumik
inuiaqatigiit tamaasa ataatsimut isigalugit oqallissaarisoq soorunami
ilumoorpoq, uani ilumoornerartariaqarpara inissianik atorluaanerunissarput
siunertarigaanni taava millionerpassuit atorlugit, soorunami illut inissiallu
sanaartorneqarsimasut aamma naapertorlugit, inussutissarsiuutitigut aamma
eqqarsarsinnaaneq ingerlatissallugu ajoqutissaqanngilluinnartoq.
Isumaqarpunga
aaqqissugaaneq pillugu oqallinnermi siulinnguani aamma taakkartorneqartut uunga
tunngalluinnaqqissaartut, inatsisartuni siunnerfissatut tikkuartorneqartut
attuumassuteqarluinnarmata, uanga massakkut annertunerusumik
pulaffigissanngilakka.
Kisianni
erseqqissaatigissallugu soorunami Naalakkersuisuni inissialiortiternermut
aammalu illunik sanaartornermut pilersaarusiornermi,
isiginngitsuusaarsinnaanngilluinnaratsigit pisariaqartitsiviunerpaasut
ullumikkut. Taamaalilluta aamma ulluinnarni inuunermi atugarisatigut,
peqqissutsikkut, isumaginninnikkut aningaasartuuterparujussuit atorneqartartut
aamma annikillisarneqarsinnaammata. Taanna nalunngilluinnarparput.
Aamma uani
siunnersuuteqartup taasaa tassa inissianik pioreersunik atorluaanissaq. Taanna
tassunga attuumassuteqarluinnartoq erseqqissaatigissara, tamanna
Naalakkersuisuninngaanniit assortunngilluinnaratsigu. Aamma taanna
oqaatigisareerparput. Illunik inissianillu atorluaanissarput taanna aamma
sulissutigisariaqarparput. Ilami aningaasarpassuarnik nalillit
asiutiinnarsinnaanngilagut napatiinnarlugit.
Taamaattumik
aamma erseqqissaatigisimavara maani inimi Naalakkersuisuni siunertarigipput,
illorpassuit sinerissami inissiarpassuillu inoqanngitsut atorluarnerunissaat
sinerissami. Tassa imaappoq inissaqarniarnikkut naalakkersuinikkut
ingerlatsinermi aaqqissuussinerit apeqqutaalluinnarput, qanoq ittuuneri
atorluaanissaq piviusunngortissagaanni.
Ullumikkut
isorliunerusuni aammalu illoqarfinni akunnattumik angissusilinni, boligstøttemi
illuutitoqarsuit inoqanngitsut amerlaqaat, taanna isertugassaanngilaq. Aammalu
taassuma saniatigut allaat illoqarfinni anginerusuni ilaatigut inigisat
qimanneqaraangata iluarsaassisarnikkut aammalu aaqqissuussinertigut immaqa
periuutsit kigaalavallaarneri pissutigalugit, ilaatigut sivisuumik inissiat
illullu inoqartanngillat. Taanna arajutsisimanngilarput aamma ajornartorsiutitut
taakkartortuartarparput.
Soorlu
Nuummi, taanna ilanngullugu taasaqarfigisimavara Inuit Ataqatigiit uani
uparuagaat oqaaseqarnerminni, imaluunniit Inuit Ataqatigiit oqaaseqartuata uparuagaa,
tassa inissianik atorluaanerunissarput sulissutigissagutsigu aamma
sulissutigisariaqaripput inissiat ilaatigut sivisuallaamik inoqartannginnerisa
piaarnerpaamik aaqqiivigineqartarnissaat.
Inuit
Ataqatigiit oqaluttuata qanorluunniit assortortigigaluarpagu kialluunniit
nalunngilaa aamma maani Nuummi inissiarpassuit inoqartanngimmata. Isumaqarpunga
taamatut uparuaaniaannarluni uparuaaneq aasinaasiit takugipput. Pissusiviusut
uparuartorniaatigalugit inunnik ataasiakkaanik pisuutitsiniaqattaarnersuaq
ingerlanneqartoq. Tamakku inuit tamarmik tusaavaat, nalunngilaat.
Ataatsimilluunniit uagut aalleqqutissaqanngilagut tassani. Suliniartugununa
atorluaaniarluta, aamma periarfissat soorunami naapertorlugit atorluaanissamik
aqutsinissarput ingerlanniarparput.
Ilanngullugu
pinngitsoorusunngilanga taasaqarfigilaassallugu siunnersuuteqartup
siunnersuutimini una siunertarisaa ingerlatseqatigiiffiit assigiinngitsut
nuunneqarsinnaaneri illoqarfinnut naleqquttumik ingerlatsiviusinnaasunut.
Isumaqarpunga taanna aamma Naalakkersuisunit akerlilerneqanngitsoq. Kisianni
nassuiaassutigineqarpoq ersarilluinnartumik Aningaasaqarnermut
Naalakkersuisuminngaanniit pissutsit. Soorunami kialluunniit
assortorsinnaanavianngilaa selskabit assigiinngitsut ingerlatseqatigiiffiit isumaqarpata
uani piffimmi oqartussaaffiup annertunerusumik ingerlatilernissaa
sulissutiginiarparput, soorlu illoqarfimmiuni mikinerusuni. Selskabit
ingerlatseqatigiiffiit namminneq taamaaliorniarpata Naalakkersuisuninngaanniit
isumaqarpunga taanna killilersorneqarnavianngitsoq.
Aamma
Nuummiititsiniaannavilluni Nuummiititsiniartoqanngilaq. Taanna
eqqaamassavarput. Aamma kommunet namminneq periarfissiisarnermikkut,
suleqataanermikkut, ingerlatseqatigiiffinnut oqilisaassinermikkut,
inissaqarniarnertigut allatigullu, meeqqanut paaqqinnittarfeqarnikkut
allatigullu atugassaqarititaasutigut nammineq qanoq iliuuseqarnertik
naapertorlugu aamma kajumissaarisarput suliffinnik tiguserisullutik.
Isumaqarpunga taamaaliortarneq takornartaanngitsoq aamma kommuneni massakkut ingerlatsiviusuni
annertunerusumik.
Taamaattumik
tamakku periarfissat pinngitsoorsinnaanngilagut aamma nalilersorlugillu
atussallugit. Ataatsimut isigalugu inissaqarniarnikkut periarfissarititaasut
ullumikkut periarfissiissutaareersut inatsisitigut aammalu
aningaasalersueriaatsitigut pituttuinngilluinnarput illoqarfimmi sumi nunallu
immikkoortuani sumi atorneqarnissaminnut. Taanna erseqqissaassutigissavara.
Taamaattumik taassuma tungaatigut naalakkersuinikkut aamma
noqitsinavianngilagut.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Johan Lund
Olsen, Inuit Ataqatigiit.
Johan
Lund Olsen, Inuit
Ataqatigiit oqaaseqartuat.
Qujanaq.
Suminngaanniit aallartissanerpunga, kisianni immaqa oqaaseqartumit
kingullerminngaanniit aallartittuuguma pitsaaneruvoq.
Una
miserratigineqarsinnaanngitsoq tassaavoq maani Nuummi annertoorujussuarmik
inissaaleqiffiummat. Taanna tupinnaqaaq Ineqarnermut Naalakkersuisup
arajutsisimassappagu. Maani A/S Inissiaatileqatigiiffiup allaffeqarfianut,
tassa filialkontorianut saaffiginnikkaanni initaarniarlunilu saaffiginnikkaanni
kalerrinneqarajuttarput utaqqisut ukiut 13-it qaangiuppata aatsaat
initaartinneqarsinnaavutit. Illoqarfimmi angalaaraluaraanni inissiat
misissoraannilu qassit inoqanngitsut, taava ikittuaraannannguusut taakku
naammattuugassaasarput. Taamaammat taanna eqqunngilluinnarpoq, aamma Inuit
Ataqatigiinninngaanniit soorunami oqaatigisarput aalajangiusimavarput.
Ilumuunngilaq maani Nuummi inerpassuaqarmat inoqanngitsuninngooq. Taanna
ilumunngilluinnarpoq, taamaattumik taanna soorunami utertittariaqarpoq
Naalakkersuisumut taamatut isumaqarniartumut.
Taamatullu
oqareerlunga uteqqiinnarumaarpara una siunnersuuteqartup oqallissaarusiaa uagut
Inuit Ataqatigiinninngaanniit tunngaviatigut isumaqatigilluinnarparput, tassami
siammartiteriniartariaqarpugut aamma kommunet inukilliartorfiusut
akileraarutitigut taamaalillutik aamma isertitaqarnerulernissaat aamma
aqqutissiuussinnaassagatsigu. Akileraarutitigut isertaqarnerulersinnaanissaat
aqqutissiuussinnaasuugutsigu taava inuutissarsiornikkut
ineriartortitsinissaminnut pitsaanerusumik aamma
periarfississinnaanngussagaluarpagut. Taamaattumik aamma illoqarfinni
inissaaleqiffiusuni oqilisaassiutigaluta periarfissat tamakkua aamma
ammatittariaqarpagut. Taamaattumik neriuutigaarput periarfissat tamakkua
siammartiterinissamik aamma siunertaqartut, naalakkersuisooqatigiit aamma
pingaartinniartarmassuk, pingaartumik Naalakkersuisut maannakkut
siulittaasoriligarput, ilaatigummi Siumut ataatsimeersuarnerani siuliani kingullermilu
aamma siammartiterinissaq qineqqusaarutigisarsimavaa. Nuup
eqiteruffiuallaarnera taanna qineqqusaarutigineqarpoq aamma Inatsisartunut
maanna qinigaaffimmi atuuttumi aamma qineqqusaarnermi Siumuminngaanniit taanna
annertoorujussuarmik aamma qineqqusaarutigineqarpoq. Taamaattumik pakatsinartua
tassaniippoq, periarfissaqaleraannilu taava piumassuseq maani tammavilluni
tammartarpoq. Taamaammat taanna soorunami uggorisinnaavarput, kisianni tassa
paasiinnartarparput taamatut pisoqaraangat qineqqusaarnermi oqaaserineqartut
oqaasiinnaviusarsimasut. Taamaattumik maani illoqarfimmi, illoqarfissuarmi
Nuummi inissaqartitsiniarnikkut ajornartorsiorneq ima annertutigereermat,
taamaammat siunnersuuteqartup siunnerfigisaatut iliuuseqarnissaq
eqqarsaatitsinnut aamma ilaatinniartariaqarparput pinngitsoorata. Tassanilu
aamma Namminersornerullutik Oqartussat aktiaateqarluni ingerlatseqatigiiffissui
kisiisa isigisariaqanngilagut, maanimi Nuummiippoq suliffeqarfippassuit
amerlasoorujussuit allat aktiaateqarluni ingerlatseqatigiiffittut
aaqqissuussiffigineqarsimanngitsut.
Taakkua
saqqummiusseqqaarninni taagoreerakkit uteqqissanngilakka, tassa taakkuukua
aamma ukiuni aggersuni misissorneqarsinnaasut uagut ujartuiffigigigut
siunnersuuteqartoq tassani aamma isumaqatigigatsigu.
Taava
Demokratit oqaaseqartuannut una oqaatigilaassavara una oqaatigimmagu, tassami
nalilersorneqartuartariaqartoq sinerissamut nussuiniartoqalertinnagu
oqaatigigamikku issuarluaannarlugu: ?Nunatsinnimi ullutsinni
ajornartorsiutaareerpoq sulisunik ilinniarsimasunik piukkunnartunillu
tigumminninniartarneq. Suli tamanna ajornarnerulissannginnerluni suliffeqarfiit
illoqarfinnut minnerusunut ulluinnarni neqeroorutissaaleqinerusunut
nuunneqarpata?? Tassa taamatut Demokratit oqaaseqartuat oqaaseqarpoq. Ila, taamaareerpoq.
Pingaartumik maani Nuummi. Nuummi oqaatigeriikkattuut inissaaleqinerujussuaq
pissutaalluni taamaareerpoq. Tamanna suli annertuseriartussaavoq, qanittukkumi
maani Inatsisartuni amerlanerussuteqarluartut, tassa Siumut Atassullu,
imaluunniit amerlanerussuteqalaartut, initaarniartilluni innersuunneqarnissamut
malittarisassat sukaterneqarujussuarput ilinniarluarsimasunik
pissarsiniarsinnaanissatsinnut akornuseerujussuarsinnaasumik. Taanna
sukatiterineq tassa ininik attartorneq pillugu peqqussutip allanngortinneqarneratigut
pivoq, taamaammat tassani eqqumiilaarpoq Demokratit oqaaseqartuata tamanna
eqqaamasimanngimmagu, tassami Demokratit ataatsimiititaliami tassani
ilaasortaatitaat peqatigalugu ilungersorsimaqaagut maani, tassami ininik
attartorneq pillugu peqqussutip allanngortinneqarneratigut
ilinniarluarsimasunik atorfissaqartitsinerput akornuserneqarujussuarnissaa
aalleqqutigigatsigu. Taamaammat tassani imminut assortornera
paasiuminaatsilaarparput.
Taava
aamma Demokratit siuttuannut una oqaatigilaassavara, tassa oqarmat unagooq
oqallissaarut imminut assortortutut pissuseqartoq oqaaseqarfigaa, tassami
oqarami taakkua ineqareersut sinerissamut nuunneqassappata taava
suliffissaqartinniarnissaat kiap qulakkeerniassavaa? Kisiannimi tassa
eqqaamasariaqagarput unaavoq maani Nuummi inissaaleqinerujussuaq ima
annertutigaaq oqaatigeriikkattuut ukiut 13-it angullugit initaarnissamut
utaqqisorpassuit amerlaqaat. Ukiut 13-it initaarnissamut utaqqisorpassuit
qularnanngitsumik amerlanerit suliffeqareerput. Suliffeqareerput, kisiannili
ineqanngiinnarput. Taakkua initaarsinnaanngulissapput sukkanerusumik
suliffeqarfiit ilaat maani Nuummiittut sinerissamut nuunneqarnerat ilutigalugu
taamaalilluni init taakkua inissaaleqisunit aamma
nuuffigineqarsinnaanngussagaluarput.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq Palle Christiansen, Demokratit.
Palle Christiansen, Demokratit.
Anthon
Frederiksenimut Kattuseqatigiinneersumut. Oqallinnermi matumani soorlulusooq init
pineqartut, tassa Qasigiannguani, Paamiuni, Uummannami Upernavimmilu taakkua
iserterfigeriaannaasut. Taamaattoqanngilaq. Illut amerlanerpaat inoqanngitsut
massakkut ineqarfigineqarsinnaanngillat, taakkulu ineqarfigineqarsinnaassappata
aningaasarpassuit millionerpassuit atorneqartariaqarput iluarsarnissaannut.
Tamanna takuneqarsinnaavoq aningaasanut inatsimmi, tassa tassani
siunnersuutigineqarpoq 200 mio. kronit sinnerlugit iluarsaanernut
atorneqassasut, illut taama massakkut aserfallatsigisimapput. Tassa aningaasat
massakkut immikkoortinneqarsimasut naammanngillalluunniit
aserfallatsaaliinermut. Inissiat tamarmik iluarsaanneqassappata 2,4 milliard
kronit atorneqassapput, taamaattumillu iluaqutissarsiaasinnaagaluartoq soorlu
ingerlatseqatigiiffiit sinerissamut nuunneqarneratigut
pissarsiarineqarnaviarani.
Ingerlatseqatigiiffiit
illoqarfinnut mikinerusut nuussagaluarutsigit ajornartorsiuteqalissaagut
assigiinngitsunik. Sulisussanik ilinniarluarsimasunik amigaateqalissaagut,
tassami aamma amigaatigijuarpagut sulisussat taamaattut.
Isumaqatigigaanni
soorlu Namminersornerullutik Oqartussat suliffeqarfiutaat sinerissamut
siammarneqassasut, taava sinerissami pisariaqartitsisoqalissaaq aamma
atuarfiit, meeqqeriviit kulturikkullu illoqarfiit assigiinngitsut annertusarneqarnissaannut.
Taamalu aamma naalakkersuinerup taperuutissagaluarpaatit?? tamatumunnga
akissaqanngitsunut.
Eqqarsaatigullu
ingerlateqqikkutsigit taava suna tulliutissava? Immaqa aamma illoqarfiit
taakkua mittarfittaartariaqassapput, umiarsualiviit annertusartariaqalerlutik.
Tamatuma kinguneriinnassavaa nunarput aqunniarlugu akisuneruliinnassammat.
Taamaattumik Anthon Frederiksenip siunnersuutaa tamakkiisumik malinneqassappat
inuiaqatigiit aqutsinermut aningaasartuutaat annertuseriaannassapput.
Kisianni tassa
inuiaqatigiit aaqqissugaanerat pillugu iliuuseq pilersaarut aallaavigisigu,
taannalu aallaaviginera pisariaqarpallu iluarsisarlugu. Isumaqarpunga taanna
tunngavigigutsigu angusassarput annerungaassasoq inuiaqatigiinnullu tamanut
iluaqutaanerulluni.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq
Anthon Frederiksen, siunnersuuteqartoq, Kattusseqatigiit. Tullinnguukkumaarpoq
Kalistat Lund, Siumut.
Anthon
Frederiksen,
siunnersuuteqartoq, Kattusseqatigiit.
Siullermik
Attaveqaqatigiinnermut Ineqarnermullu Naalakkersuisumut aamma qujarusuppunga,
aamma oqaluttunut kingullernut soorunami.
Naalakkersuisup
kingullermik Ineqarnermut Attaveqaqatigiinnermullu Naalakkersuisup
oqaaseqarnermini oqaatigisai maluginiarluarpakka, aamma
Naalakkersuisuninngaanniit matoqqaffigineqanngimmat selskabit suulluunniit
qanoq nuussinnaanerinut tunngasut. Taanna isumaqarpunga periarfissaq
matoqqavissutut inissisimaneqanngimmat aamma naalakkersuisooqatigiit
anguniagaat qiviaraanni tassani periarfissaqartinneqartoq takuneqarsinnaasoq
soorunami pissusissamisoorpoq.
Uani
siunnersuuteqarninni soorunami minnerpaamilluunniit ataqqinartoq Inatsisartunut
ilaasortaq Per Berthelsen Demokratilluunniit ajuallatsinnissaat allatulluunniit
pinissaat siunertarinngilluinnarpara. Aamma uanga
naatsorsuutiginngilluinnarpara una siunnersuut saqqummiukkakku aamma uanga
nammineq ajuallannissara. Minnerpaarpaamilluunniit ajuallaatiginngilara.
Sungiusimavara aammalu partiit kikkulluunniit isummersinnaatitaanerat,
qanorluunniit isummersinnaatitaanerat ataqqivara.
Uani
ajuallattoqarsimassappat utoqqatsissaanga assorujussuaq, tamanna
siunertarinngilluinnarakku. Kisianni oqaannarusuppunga aamma Inatsisartunut
ilaasortamut Palle Christiansenimut, inissiat Qasigiannguani Paamiunilu
ilaatigut pineqartut aserfallassimangaarmata nuuffigineqarsinnaanngitsumik
oqalunnera pissutsinut piviusunut tamatigut naapertuutinngimmat, tassa
pissutsit piviusut imaammata inissiat illullu inuerussimasut ilai aamma
ajunngilluinnartunik ilaqarmata. Tamavissuarmik aserfallassimasuunngillat,
taamaattumillu iluarsaassisoqassappat iluarsaassinissamut soorunami
apeqqutaassaaq qanoq naleqarumaarnersoq. Kisianni ilimaginngilara nutaanik
sanaartornissamiit imaluunniit Nuup nutaamik illoqarfiliornissaaninngaanniit
akisunerunissaa. Taamaattuminguna una siunnersuut saqqummiukkiga
inuiaqatigiinnut oqilisaassisinnaasutut takorloorakku.
Demokratit
sulisussaqarniarnermut aarlerinerat aappaatigut paasiuminaatsilaarpara
pissutigalugu ilaatigut ippassaanikkunni oqallinnitsinni kalaallit
sulisorineqartut pingaartumik eqqarsaatigalugit ilinniarluarsimasut
ilinniagaqartullu uani oqaluttarfimminngaanniit Naalakkersuisut siulittaasuata
oqaatigaa maani allaffissuarmi Namminersornerullutik Oqartussat suliffeqarfiutaani
ilinniagaqarluarsimasut tikisitat 125-t missaanni sulisuusut, taakkunanngalu
taamaallaat ajoraluartumik 20-t missaanni kalaaliusut imaluunniit Kalaallit
Nunatsinni peroriartorsimasut. Taamaattumik pissutsit piviusut tamaapput. Aamma
nunaqarfinni illoqarfinnilu taamaapput. Taamaammat isumaqarpunga ernumanissamik
pissutissaqanngitsoq taamatut nuutsitsisoqassagaluarpat. Aamma suliffeqarfiit
Namminersornerullutik Oqartussat pigisaat nuutinneqareersimasut
siusinnerusukkulli maannakkut sulisussaqarniarnerup tungaatigut aamma
Nuummiinngikkaluarlutik aamma ajornartorsiuteqanngitsut ilisimaneqarpoq.
Taamaattumik illoqarfiit tamaasa mittarfilersornissaannik oqalunneq
silaannarmiippoq. Aamma uani siunnersuuteqarninni minnerpaamilluunniit
illoqarfiit mikinerit mittarfilersorneqarnissaat pillugu oqaatsimik
qanorluunniit mikitigisumik oqaaseqanngilanga. Taanna isumaqarpunga
qungujullunga oqaatigisinnaallugu.
Paasiuminaalaarpoq
taamatut soorunami Demokratit isummersornerat, kisianni una suliassaq
aalajangiiffiusussaanngimmat aammalu Inatsisartut qanoq isummernerannik
paasiniaanerummat soorunami Naalakkersuisullu qanoq isummernerannik
paasiniaanerummat isummasi ataqqillugit minnerpaamilluunniit ajuallaatiginagit
politikkikkut politikeritut inersimasutut tigorusuppakka imatut
ajuallatsitseqattaarnermik allamilluunniit minnerpaamik
siunertaqanngilluinnarama taanna erseqqissaassutigiutigalugu. Kisianni
qujarusuppunga Inuit Ataqatigiit paasinnilluarlutik tapersiinerannut.
Qujanarujussuaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Kalistat Lund, Siumut. Tullinnguutissaaq Per Berthelsen, Demokratit.
Kalistat
Lund, Siumut.
Ingerlatseqatigiiffiit
suliffeqarfiit taamatut sinerissamut nuussinnaanerat uanga iluatinnaateqartutut
isigaara. Isumaqarpunga maannangaaq nangaaffigissallugu patsisissaqanngitsugut,
aammalu nuannaarutigaara tamanit, aamma Naalakkersuisuninngaaniit tamanna
periarfissaq ammatinneqartutut oqaatigineqarmat. Nunani allani pissutsit aamma
taakkartorneqartut ilagimmassuk, misilittakkat ilaatigut soorlu
sanilliuttarparput Islandimi. Islandimi tamakku aamma misilittagaqarfigaat
illoqarfissuarmi Reykjavikimi suliffeqarfissuit Islandip sinneranut
nuunneqarnermikkut qanoq nuunneqarneranni nassatarisaasimasut.
Uani inissaqarniarnikkut ajornartorsiutaasinnaasut imaluunniit iluaqutaasinnaasut taakkartorneqarmata taakku pinngikkaluarlugit, kisianni sulisoqarniarnikkut, sulisoqarnikkut pissutsit pitsaasumik misilittagaqarfigineqarput illoqarfissuarminngaanniit illoqarfinnut minnerusunut imaluunniit piffinnut minnerusunut nuutitsisoqarsimaneranut. Tamakkua misilittakkat pigineqarput. Nalunngilarput maani nunatsinni suliffeqarfiit annertuut ilaatigut ukiut marluk inorlugilluunniit agguaqatigiillutik sulisoqartartut. Inupparujussuarnik assersuutigalugu 80-nik sulisullit ukiut marluk inorlugit sulisoqartarsimappata takusinnaavarput inuiaqatigiinnut taanna aamma akisoorujussuusoq. Misilittakkat aallaavigalugit imaappoq allaat sulisorisat ukiuni tallimani sivitsorneqarsinnaanerat misilittagaavoq, taamaalilluni tamakkua isumaqarpunga nunatsinni periarfissat aamma misissorlugit ingerlattariaqarivut. Una illussaaleqilersinnaanerit imaluunniit meeqqerivinnik sanaartornissat assigiinngitsullu tamakkua uniffiginiarnissaat uanga patsisissaqarsorinngilara. Taamatut pilersaarusiussagaanni imaluunniit siunertaqassagaanni pilersaarusiorluarnikkut tamakkua ingerlanneqartussaapput aammalu ukiumiit ukiumut taamatut pisoqarnissaa naatsorsuutigissanngilarput, inuiaqatigiit kalaallit ukiuni 100-lipparujussuarni ingerlaqqittussaagatta. Isumaqarpunga maani isummerniartarnitsinni ukiut tallimat quliinnaat eqqarsaatigivallaarlugit suliniartarnitsinni nangaassuteqarpallaartartugut. Taamaammat ukiut amerlanerusut siunissarput eqqarsaatigalugu eqqarsartarnissaq pisariaqarpoq.
Uagut Siumuminngaanniit nuannaarutigaarput siusinnerusukkut suliffeqarfiit aamma suleqataaffigalugit nuunneqartarsimasut. SULISA Maniitsumut nuunneqarmat tamatta nuannaarutigeqaarput, ulloq manna tikillugu suli taamaappugut. Taamammat siunissami aamma taamatut periarfissat ingerlanneqarsinnaanerat uanga ammaffigineqarnera assut nuannaarutigaara. Aamma isumaqarpunga tamanna suliniutigineqartariaqartoq.
Ilinniarluarsimasut inigisamikkut ajornartorsiuteqalersinnaanerat Inuit Ataqatigiinninngaanniit Johan Lund Olsenip taammagu aamma taanna oqaaseqarfigilaassavara. Tassa taanna qanittukkut immikkoortoq allanngortitsivigineqarneratigut periarfissaaruttutut taakkua taaneqarnerat ilumuunngilaq. Maannakkut tassani inatsimmi periarfissaqartinneqarput suli ilinniarsimasut, imaluunniit kattuffiit isumaqatigiinniarnerminni immikkut isigineqarsinnaanerminnut angusaqarsinnaanerat. Tassuunakkullu immikkut pisariaqartitsisimagaanni isumaqatigiinniarnermi taanna suli maannamut anguneqarsinnaavoq. Taamaammat mattussivissortoqarsimanngilaq aammalu oqareernittuut ilinniarluarsimasut imaluunniit ilinniarsimasut kikkulluunniit pisariaqartitsinertik naapertorlugu isumaqatigiinniarnermikkut suli taanna periarfissaq angusinnaavaat.
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguuppoq Per Berthelsen, Demokratit. Tullinnguukkumaarpoq Doris Jakobsen, Siumut.
Per Berthelsen, Demokratit.
Tassunga immaqa suut tamarmik unitsinneqarsinnaagaluarput siunnersuuteqartormi nuannaarpoq, taamaammallu Demokratit nuannaaqataavugut. Kisianni tassa allattoriikkakka ukua taalaassavakka, uanimi eqqartorneqartoq ilaatigut tassa soorlu nunarsuaq mumikannerlugu pisoqalersoq. Eqqartuilissaagut nunaqarfimminngaanniit pinngitsaaliilluta nuussiumanngilluinnarluta. Massakkut killormorluinnaq akuersaarparput illoqarfinninngaanniit nunaqarfinnut nuussuinissaq imaluunniit minnerusunut nuussuinissaq akuersaarlugu.
Paasiuminaalaarsinnaasarpoq, ilaatigummi uani pigatsigit suliffeqarfiit immaqa imminut akilersinnaasumik ingerlasut allanut nuunneqassasut, nalilersorsinnaanagulu tassani aamma imminut akilersinnaalluartumik aammalu pitsaasumik ingerlasinnaassanersut. Aamma taannartaa pigatsigu oqaaseqarpugut. Soorunami suut tamaasa oqallissutigisinnaavagut aamma tunngaviatigut sorpassuit isumaqatigiissutigalugillu isumaqataaffigisinnaavagut, kisianni tassa aamma allaassutigaarput uani eqqarsarnartui nipangiukkumannginnatsigit. Tassami oqaqqissaanga, siunnerfiusoq paasiuminaatsitarput unaavoq: Aalajangersimasuminngaanniit suliffeqarfinnik nuussiniarneq, taamaalillunilu pineqartuni aningaasatigut tunngaviusut sanngiillisarneqarnissaat, tassa uani ilaatigut akileraarutit isertitaasartut piiarnerisigut taassumap nuussivigineqartup aningaasaqarniarnera sanngiillisarneqassaaq.
Inissiat
ineerutsinneqartut pinngortinneqassapput. Aamma taanna siunnerfiusumut, tassalu
inissianik atuilluarnissamik tunngasoq aamma equngassuteqartutut isigigatsigu
uparualaarparput. Taava allat nuutsinniarpagut taakkununnga inissianut inissaaleqinerujussuaq
annertummat, kisianni taava taakkua apeqqutiga taava, taava qanoq ililluta
qulakkiissavarput taakkua suliffissaqarsinnaanissaat suliffeqarfinnik
nuussuitigigutta? Taamaaliornitsigummi uagut tungitsinninngaanniit isigalugu
imatut isiginarmat pisussutinik aammalu inuiaqatigiinni aningaasaqarniarnermut
ingerlatsiviusunik siammartiterineq aningaasartuutitalerujussuarmik,
taamaattumillu ukiorparpassuarni aatsaat ingerlanikkut immaqa imminut
napatikkiartuaaqqilersinnaasumik. Tamanna uagut eqqarsarnartipparput
aningaasaqarniarnerput taamak sanngiitsigisoq nalunnginnatsigu. Ingallunilu
ajornartorsiut allisussaasutut isumaqarfigaarput politikkikkut siunnerfiusutut
taaneqartartutut iliortoqassappat, tassalu akit assigiissarneqartuunerat taanna
peerneqarpat, taava aamma sanngiillisaaneq tassani pisussaassammat.
Isumaqarpugummi
uagut sumiiffiit illoqarfiit ataasiakkaat tunngaveqanngitsumik alliartorneq
ajortut aammalu illua-tungaatigut illoqarfiit tunngavissaqanngitsumik
peqquteqanngitsumilluunniit qimagarneqarneq ajortut. Taamaattumik uagut
tungitsinninngaanniit naggataarutaasumik oqaaseqaqqikkunnannginnatta
oqaatigiinnassavarput siunissaq eqqarsaatigalugu tulleriiaarisa tassanilu
salliutillugu pisariaqartitsiviusunik amerlanerusunik inissialiorneq.
Isumaqarpugut una oqallisaasoq nunatsinni suli annertunerusumik uivilernermik
kalitaqaannassasoq.
Tassa
oqaatigiumasagut. Isummersuutit assigiinngitsut tusaavagut,
qisuariaateqarpugut, kisianni soorunami nalunngilarput amerlanerussuteqartut
aalajangiisussanngorutta taamaalluta uaniunngitsoq aalajangerumaaraat, taannalu
ataqqissavarput. Kisianni oqanngitsoorumanngilagut suut mianersorfissatut
piukkullugit.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Doris Jakobsen,
Siumut. Tulliutissaaq
Agathe Fontain, Inuit Ataqatigiit.
Doris
Jakobsen, Siumut.
Qujanaq.
Isumaqarpunga illoqarfiit mikinerit inuerukkiartortut inissaaleqiffiunngitsullu
Namminersornerullutik Oqartussat ingerlatsiveqarfiisa ilaasa iluaqutissartalimmik
Nuummit nutserfigineqarnissaat pillugu Aantuup oqallissaarutitut siunnersuutaa
soqutiginartoq. Ilaatigut ilumoorpoq illoqarfiit ilaat inuerukkiartormata.
Ilaatigut ilumoorpoq inuit ilinniarsimasut nunaqarfinninngaanniit illoqarfinnut
nutserarmata, taavalu aamma illoqarfinninngaanniit illoqarfiit
pingaarnersaannut inuit nutserarmata, taavalu aamma illoqarfiit
pingaarnersaaninngaanniit nunatta avataanut nutserartoqarmat.
Isumaqarpunga
innuttaasut ilinniarluarsimasut ilinniarsimanngitsullu tassani
periarfissagissaarnerunissaminnik kissaateqarlutik aamma taamatut
nutserartartut. Taamaattumik pingaaruteqarpoq aamma uani taamatut
nutsertitsilissagutta Nuumminngaanniit illoqarfinnut allanut mikinerusunut
inissaaleqiffiunngitsunut, taava aamma taakkua soqutiginarsartariaqarivut
ilinniarsimasunut, tassami taakku nutserartut suna tunngavigalugu nutserarnerat
aamma paasisariaqaratsigu, taamaattumik pingaaruteqarluinnarpoq illoqarfiit
inissaaleqiffiunngitsut nutserfigineqassappata aamma taakkua periarfissatigut
siuarsarneqarnissaat. Taanna eqqarsaatissiissutissaannaavoq.
Naggataatigut
oqaatigerusuppara aamma isumaqarlunga soqutiginartorujussuusoq massakkut
ilinniartunut kollegialiorniarnitsinni aamma eqqarsaatigisariaqarigut makkua
Paamiuni inissiarsuit aamma atorneqanngitsut taakkua qanoq pinerpoq aamma
misissuiffigineqarsinnaanerat uungarpiaq tunngassuteqanngikkaluartoq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Agathe
Fontain, Inuit Ataqatigiit. Tulliutissaaq Aningaasarsiornermut Naalakkersuisoq.
Agathe
Fontain, Inuit
Ataqatigiit.
Kommuneni
akileraarutitigut annertunerusuni kommunenut imminut akilersinnaanngitsunut
taaneqartartunik annertunerusumik akileraarutinik isaatitsisoqaleraangat
imminut ikiorsinnaanngortinniarnissaat tassuunakkut periarfissinneqarsinnaavoq.
Assersuutigiinnarlugu Simon Olsen borgmesteriutillugu tamaviaarpugut INI
A/S-ikkut, KNI-kkut Sisimiunut pisinnissaat. Tassuunakkut
periarfissarissaarnerulissagatta kommunemi. Aamma Ruth Heilmann borgmesteriulluni
Maniitsumi aamma tamaviaarpoq aamma nalunnginnamiuk tassani
periarfissarissaarnerulissalluni. Imminut taanna oqaluttuartorujussuuvoq. Hjælp
til selvhjælp taanna tunngavigalugu akileraarutit amerlanerusut kommunenut
isersinnaappata inuussutissarsiutitigut siuarsaanissamut piorsaanissamut
akissaqarnialissagatta. Takorloortarpakka uanga kommunet
siuarsaarusukkaluarlutik akileraarutitigut isertitaat ima annikittangaarmata
siuarsaanissamilluunniit periarfissinneqanngitsoortartunik.
Pingaaruteqartorujussuuvoq
imminut ikioqqinnissamut alloriarnissamut tunisissinnaaneq. Soorlu
assersuutigalugu aalisarnerinnarmik piniarnerinnarmillu
inuussutissarsiuteqarnerusut akileraarutit naatsorsuutigineqartut taakkua
nikerartorujussuuneri pilersaarusiorsinnaanermut ungasinnerusumut aamma
aporfiliisarmata. Kisiannili aalajangersimasunut nalunagu qaammatit tamaasa
akissarsisussat amerlasuutigullu akissarsiakkaanik nalunagulu taakkua
akileraarutaat amerlanerusut pinngitsooratik isertussaasut. Taamaalilluta
imminut ikiorniarutsigit kommunet tamarmik inuutissarsiutitigut
piorsaasinnaanngortinniarlugit taamaalilluni alloriarnissaannik
periarfissittariaqarpagut periarfissinngikkutsigit ikiornissaat suli
annertusigaluttuinnartussaammata.
Eqqarsaatigiinnarlugu
soorlu Nuuk ima annertutigilersimavoq ajornartorsiutigaat
paaqqinnittarfissaaleqipput, atuarfissaaleqipput, napparsimmavimmut utaqqisut
tamakkulu eqqarsaatigalugit. Taakkua isigiinnarlugit taama annertutigisumik
inuttusiartortissimanngikkaluarutsigu ajornartorsiutit taakkua
pinngitsoorsimasinnaagaluarpagut.
Assersuutigalugu
1998-imi Nuup skatteprocentia 17,6 mio.-nik naleqarmat, Qaanaami 360.000, qanoq
nikingatiginera. Ilamineerannguanilluunniimmi Qaanaaq tunigaluarutsigu imminut
ikiorsinnaanngorlugu taavalu Nuummi taakkua Per Berthelsenip oqarneratigut
annikinnerusunik akileraarutisigut isertittussanngorlugu Nuummi, taava Nuuk
pisariaqartitsiunnaassaguni meeqqerivinnik sanaartornissanik, atuarfinnik
sanaartornissamut piorsaanissaminullu tassuunakkut illua-tungiminnut imminut
akilertutut taaneqarsinnaavoq.
Taavalu
suna akilersinnaanerussava? Soorlu Nuuk tattoqereersoq ullumikkut,
illua-tungaani ikaartarfiliorlutik imaluunniit sullutik nuutsitsinissaq
imaluunniit timmillutik, ok, suna akikinnerussava Kalaallit Nunatsinnut? Illoqarfiit
allat imminut akilersinnaanngortinniarlugit unittoortitsinaveersaarneq
siunertarigaanni imaluuniit taanna allamut qiviarnaveersaarluni
ingerlanniaraanni. Soorunami qanoq iliornissaq pilersaarusiorluarnissaq
pingaaruteqartorujussuuvoq. Pilersaarusiorluartoqassaaq imminut
akilersinnaasunngortillugu taamatut ingerlaneq. Aamma taanna ujartorneqartoq
miljø, taanna aamma pilersinneqarnissaa aamma pingaartorujussuuvoq, taannalu
pinngitsoorneqarsinnaanngilaq.
Taavalu
aamma ?quujagiinnarlugu? ullumikkut maaniilernitsinni Nuummi arlaleriarlugu
tusartagaq ilinniarluarsimasuninngaanniit aperiganni: ?Maniillunimi qanoq
ippa?? ?Aa, ajunngikkaluarpoq, kisianni qallunarninnermik maaniilluni?.
Illoqarfiit allat avataaninngaanniit tikinniaraangamik Kalaallit Nunaat
misigerusullugu taava allanut aamma ornigukkusukutsuussapput.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Aningaasarsiornermut
Naalakkersuisoq.
Augusta
Salling,
Aningaasarsiornermut Naalakkersuisoq, Atassut.
Qujanaq.
Oqallinneq annertuumik ingerlanneqarpoq aamma soorunami oqallisigineqartut
siusinnerusukkut aamma annertuumik tikinneqartarnikuupput. Suliffeqarfiit
sinerissamut nussorlugit immaqa kommuneqarfiit ilaanni
ingerlalluarnerusoqalersinnaaneranik kinguneqarsinnaanerat takorloorneqarluni
aammalu arlaanni inissiat amerlavallaartut atorneqanngitsut
atorluarneqarnerusinnaanerat ilaatigut tunngavilersuutigineqartarluni. Aamma
tamannarpiaq massakkut siunnersuuteqartup ilaatigut tunngavilersuutigaa.
Naalakkersuisuninngaanniit
oqanngilagut suliffeqarfinnik avammut nuutitsisoqassanngilaq, kisianni
Naalakkersuisuninngaanniit oqarpugut suliffeqarfiit nuussagunik soorunami
nalilersugassaraat ingerlatsinermut qanoq sunniuteqartussaanersoq.
Naalakkersuisuninngaanniit uagut isumaqanngilagut suliffeqarfiit
ingerlatsineranut qanoq kinguneqarsinnaanersoq misissoqqaarnagu maanngaanniit
oqariartuuteqassasugut illoqarfiit inuerukkiartortut aaqqiiviginiarlugit
Namminersornerullutik Oqartussat suliffeqarfiutaasa ilaat nuunneqassasut.
Pingaartorujussuuvoq suliffeqarfiit pitsaasumik aamma aningaasarsiornikkut
ingerlanissaasa aamma qulakkeerneqarnissaat. Taanna aamma maani
oqaluttarfimminngaanniit oqaatigineqaqattaartarpoq. Taamaattumik tamakku
ilanngullugit aamma nalilersuutini ilaatinneqartariaqarput.
Kisianni
aajuna qularnanngitsoq, soorunami suliffeqarfik takkuppat oqarlunilu: Ima
pilersaaruteqarpugut, isumaqarpugut ingerlatsinerput pitsaanerusumik uunga
nuukkutta ingerlassinnaallugu. Taava Naalakkersuisuninngaanniit aammalu akilersinnaasut,
aningaasatigut imminut ingerlatatsinnut akilersinnaasoq takusinnaagutsigu,
taava tamanna akerlilersornavianngilluinnaqqissaarparput. Imaappoq soorunami
Naalakkersuisuninngaanniit aamma pingaartitassaraarput selskabit ingerlatatta
aningaasarsiornikkut pitsaasumik ingerlanissaat, tassami amigartooruteqarlutik
ingerlagaangata Namminersornerullutik Oqartussaninngaanniit
aningaasalersortariaqartarpagut suliat ingerlaqqinnissaat, unittuunnginnissaat
taanna qulakkeerniarlugu. Taamaattumik tamakku tamaasa isigalugit
pingaaruteqarpoq aalajangiusimassallugu suliffeqarfiit inissisimaffissaat
tassaasariaqarmat ingerlataminni pitsaanerpaamik sullissinermik pitsaanerpaamik
tunniussinissaminnut aallaaveqarfissaat, taavalu aamma aningaasatigut
ingerlatsinerminni pitsaasumik toqqammaveqarnissaminnut periarfissaqarfiat.
Uani
oqanngilanga pinngitsoornani massakkut inissisimaffitsik naassaanngitsumik
najortuagassarissagaat, kisianni maangaanniit aamma oqarsinnaanngilagut
illoqarfiit unittoorsimasut annaanniarlugit taakkununnga nuuttoqartariaqartoq.
Imaassinnaavoq suliffeqarfiit arlaat illoqarfimmut allamut aamma
ingerlalluareersumut nuuttariaqartoq tassani ingerlataminik pitsaanerusumik
ingerlatsisinnaassagami. Taamaattumik Naalakkersuisuninngaanniit oqarpugut suliffeqarfinni
akisussaasut, tassalu siulersuisut taakkuusariaqarput misissuinermi,
imaluunniit naliliisussat suliffeqarfik sumi pitsaanerpaarpaamik
inissisimasinnaanersoq.
Kisianni
aajuna Naalakkersuisuninngaanniit pingaartitarput soorunami pitsaasumik aamma
ineriartornissaq kommuneni assigiinngitsuni, kommunet aningaasarsiornikkut
ilaatigut ingerlanerliorput naak immaqa aamma inuutissarsiornikkut
ajunngitsumik isaasitsisinnaanermi pitsaasumik periarfissaqaraluarlutik.
Taamaattumik aamma kommunet peqatigalugit aningaasartuutikillisaanerit
suliassat taakkua ingerlanneqalernikuupput, aamma suliassat ingerlallutik
aallartinnikuupput.
Uani aamma
oqaatigineqartoq sukaterineq ininik attartortitsinermut tunngatillugu
Naalakkersuisut aammalu maani Inatsisartuni sukaterinermut suliaq tamanna
immaqa ilinniarsimasunik sulisussaqarniarnermut annertuumik
eqquinerluttussaassasoq. Uani eqqaamaqqussavara massakkut atugarisagut
ilaatigut imannak kinguneqartarmata atorfinittut periarfissaqartitaanertik
tunngavigalugu inimik tigusisinnaanerminni narrusinnaanertik tunngavigalugu
ilaanni allaat ukiuni pingasuni narroqattaarlutik nuttarsinnaasarmata
inigisaminnut akiliissanatik, tamannalu assorujussuaq nunatta
aningaasaqarneranut aamma oqimaatsorsiuutaavoq. Ilaatigut inigisassat nuuffigineqarsinnaasut
ajunngilluinnaqqissaartut isikkiviit imaluunniit inissiat
aalajangersimasumiittut perusutat tunngavigalugit narrusinnaatitaanik taanna
nunatta aningaasaqarneranut aamma artukkersuisunut ilaalluinnarmat,
taamaattumik allannguisariaqarneq taanna pisariaqarsimavoq. Taanna
eqqaatsiarpara oqaaseqartut ilaannit uparuaatigineqarmat ilinniarsimasunik
sulisussarsiornermi immaqa tamanna ajornartorsiutaalersinnaasoq, kisianni aamma
isumaqarpunga akisussaaffigigipput ajornartorsiutit isigisinnaasagut annertuut
taakkua aaqqiiffiginiarnissaat, tamannalu aamma pisimavoq.
Uani
Naalakkersuisuninngaanniit oqaatigaarput illoqarfiit ineriartornermi
massakkuugallartoq immaqa unittoorallarsimasut taakkua suliffeqarfimmik
pioreersumik nuussiffigiinnarnerisigut ajornartorsiutit qaangerneqarsinnaanerat
Naalakkersuisuninngaanniit naatsorsuutiginnginnatsigu, kisiannili kommunet
taamatut atugaqartut soorunami ineriartornerup ingerlaqqinnissaanut aamma
suleqatigalugit aqqutissiuussinissaq pisussaavoq. Kisianni suliffeqarfinnik
nuutsisoqassappat, nuuttoqassappat suliffeqarfimmik tamanna suliffeqarfiup
imminik ingerlalluarnerunissaanut tunngaveqartussaasariaqartoq Naalakkersuisut
oqariartuutigaarput. Tamanna aamma nunatta Karsianut annertuumik
kinguneqartartoq nalunnginnatsigu.
Aamma
massakkut namminersortunngorsaaneq assut eqqartorneqartarpoq ukiuni
ingerlasuni, suliffeqarfiit ingerlasut namminersortunngorsarneqassapput,
tamanna amerlasuunit oqaatigineqartarpoq, aamma tamanna eqqarsaatigalugu
ilaannilu aamma suliffeqarfiit ataatsimut piginneqatigiiffiit
Namminersornerullutik Oqartussanit pigineqartut kattutsinneqarnissaat aamma
eqqartorneqartarpoq, taamaattumik sumut assigiinngitsumut aamma
siammartitereersimagutsigit suliassap tamatuma aamma ingerlanneqarneqarnissaanut
ajornartorsiummut aamma pulasimassaagut.
Suliffeqarfinnik
nuutsiterigaangatta assigiinngitsunik aamma malitsigisassai soorunami
aaqqinneqareertussaassammata, soorlu assersuutigalugu innarluutillit
illoqarfimmut aalajangersimasumut nuutinniarutsigit, taava aamma
malitsigisassai soorunami aaqqeqqaartussaavagut. Tamanna
avaqqunneqarsinnaanngilaq. Aamma napparsimmaveqarnikkut, atuarfeqarnikkut,
allatigut tamatigut malitsigisassai aaqqinniarneqartussaapput. Taamaattumik
suliffeqarfimmik nutsiniaraanni aamma kingunissai assigiinngitsut tamaasa
peqataatinniarneqartariaqarput, aammalu massakkut tusaasinnaasakka
najoqqutaralugit Naalakkersuisut akissuteqaataat amerlanerusunit
taperserneqarmat taanna tusaatissatut tiguarput qujarullugulu.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Attaveqaqatigiinnermut, Avatangiisinut Ineqarnermullu Naalakkersuisoq.
Mikael
Petersen, Attaveqaqatigiinnermut, Avatangiisinut
Ineqarnermullu Naalakkersuisoq, Siumut.
Qujanaq.
Uangattaaq pinngitsoorusunngilanga erseqqissaateqalaassallunga ilaatigut aamma
Inuit Ataqatigiit oqaluttuata oqaaseqarnermini Siumumut tunngatillugu
oqaaserisaanut.
Nalunngilluinnaqqissaarpaat
aamma Inuit Ataqatigiit aammalu naalakkersuinermik suliaqartut Siumut
ataatsimeersuarmat 2001-mi nunap immikkoortuini ineriartortitsinissaq pillugu
oqallisissiamit ataatsimeersuarnerminngaanniit saqqummiisoqarmat. Aammalu
taanna oqallisissiaq maani Inatsisartuni ilaatigut uanga nammineerlunga
naalakkersuinikkut oqaaseqartartutut aamma Inatsisartunut saqqummiussininni
ilanngunnikuuara. Taamanikkut 2001-mi taanna saqqummiukkatsigu oqaatigissavara
Inuit Ataqatigiinninngaanniit akerlilerneqarmat. Oqallinneq annertooq
taamanikkut ingerlapparput, kisianni aanna nuannaarutiga, ukioq manna allaallu
aamma siorna 2002-mi Inuit Ataqatigiit taannarpiaq isumaqatigilersimallugu
ersarissorujussuarmik aamma ataatsimeersuarnerminni oqariartuutigimmassuk.
Soorunami
isummat qalliartortarput, oqaloqatigiinnerit oqallinnerillu pilersitsisarput
paaseqatigiinnermik, aamma matumani nuannaarutigilluinnarpara paaseqatigiinneq
aallartimmat. Tassa nuna immikkoortukkuutaarlugit ineriartortitsiviunissaannik
isumarput taanna Inuit Ataqatigiit aamma imminni tigusimavaat, qujanassusia.
Tamatut nuna
immikkoortukkuutaartumik ineriartortitsinissamik pisariaqartitsinerput
oqaatigiuarparput, aap. Tamatumani aamma eqqumaffigisassaq matumani
oqallinnermi avaqqunneqarsinnaanngitsoq aamma aajuna, nunatsinni ullumikkut
inuit, tassa 56.000-t missaaniittugut oqartarpugut, aamma taanna ilumoorpoq,
tassalu taakkunannga 25.000-t tassaapput inuiaqatigiinni pilersuisutut sulisut
25.000-t missaat. Tassa kisimik pilersuisutut, aningaasalersuisutut,soorunami
naalagaaffiup tapiissutaasa saniatigut aningaasanik pilersitsiviusumik taakkua
iluini sulisut taamaallaat 47%-iupput. Tassa erloqinartuisa ilaat. 25.000-t missaaniittut suliffeqartut 47%-ersui,
tassa 11.000-t missaat sulipput taakkua kiffartuussiviusuni, tassa aningaasanik
pilersitsiviunngitsuni. Tassa sulisinnaasut affanngui sinnilaalaarlugit
inuiaqatigiinni, oqarsinnaavugut aningaasarsiornermik pilersitsiviusuni
sulivugut inuiaqatigiit tamaasa ataatsimut isigigutsigit. Taamaattumik
erloqinartoq taanna avaqqussinnaanngilarput aamma isiginiassallugu.
Nunatta aaqqissugaanerata
oqallisiginerani ullumikkut taakkartorneqartut tamakkuninnga
aallaavilerujussuupput, qujanassusia. Taamaattumik illoqarfinni
assigiinngitsuni tunisassiornermik, nioqqutissiornermik, imminut
pilersornerunissamik, avammut tunisassiornerunissamik suliffeqarfiit
ingerlatsiviusut pilersinneqassappata soorunami sulisussat naammattut
pigineqartariaqarput. Taanna avaqqunneqarsinnaanngilaq. Aamma taannaavoq
eqqumaffigisassarput. Taamaattumik Naalakkersuisuni pilersaarusiornermi
matumani tamakku ilanngullugit eqqumaffigeqqissaarlugit ingerlatsinissarput
naatsorsuutigineqassaaq. Ilami ilumoorluinnarmat suna tamarmi ajornanngitsutut
oqallisigineqarsinnaanngilaq. Tassa naalakkersuineq taamaappoq, kisianni
aporfissat assigiinngitsut aaqqinniarlugit naalakkersuinikkut sulineq tassaavoq
sakkussaq, aamma taamaaliussaagut.
Ilaatigut aamma
oqaatigineqarpoq ilinniagaqarluarsimasuninngooq sulisoqarnissamut massakkut
inissaqarniarnikkut inatsisiliornerput killilersuilersoq. Ila, tupinnassusia.
Tamakkua killilersuutaasinnaasut assigiinngitsut pilersinnaveersaarlugit
inuiaqatigiinnilu pitsaanerpaamik ingerlatsinissaq siunertaralugu
inatsisiliortut inatsisiliorput. Aamma amerlanerussuteqartut Inatsisartuni
tamanna aallaavigalugu isummersorput. Aamma tamatta eqqaamassavarput
suliffeqarfiit, soorlu Aningaasarsiornermut Naalakkersuisut erseqqissumik
oqaatigigaa suliffeqarfiit aamma namminneq soorunami pisussaaffeqarput
Inatsisartuni inatsisiliorneq utaqqinngikkaluarlugu inissianik nammineq
pilersitsinissamut. Aamma sulisuminnut naammattunik naleqquttunik
ineqartitsinissamut. Aamma taamaaliorlutik aallartereerput, tamanna
qujanassusia. Siunissami qularutigissanngilarput suliffeqarfippassuit namminneq
sulisussaminnut pisariaqartitsinertik naapertorlugu ilinniagaqarsimasunik aamma
sulisussaminnut inissaqartitsissasut.
Suna tamarmi
maanngaanniit naammassineqarsinnaanngilaq. Inatsisartut suliassaraat
inatsisitigut killiliussat naammassiniassallugit, Naalakkersuisut aamma
suliassaraat killiliussat aallaavigalugit piginnaatitaanertik naapertorlugu
inuiaqatigiinnik sullississallutik, aamma taamaapput. Qulaanninngaanniit
soorunami naalakkiisariaqalersinnaasarneq pisariaqartarpoq, kisianni
sapinngisamik taanna aamma pinngitsoorniagassaasarpoq.
Inuit nammineq
sumut nuukkusunnerat, kiffaanngissuseqarnerat aamma ataqqisassaavoq. Taanna
eqqaamassavarput. Nuummut nuukkusuppata, Ilulissanut nuukkusuppata imaluunniit
nunaqarfimmut nuukkusuppata taanna killilersugassarinngilarput uagut. Namminneq inuit taanna
aalajangigassaraat. Tamakku tamaasa ataatsimut isigalugit isumaqarpunga
ilusilersuineq ingerlanneqassasoq, aamma Naalakkersuisut tamanna erseqqissumik
oqaatigaarput.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuttut
oqaluttussat marluk, nerippunga naatsumik, tassa arfininngoreermat.
Tullinnguuppoq Palle Christiansen, Demokoratit.
Palle
Christiansen,
Demokratit.
Aalajangiissagutta
suliffeqarfinnik sinerissami illoqarfinnut allanut nuussinissamut, taava
pitsaasinnaavoq aamma kingumut qivialaartarnissaq. Tassa siusinnerusukkut
aalajangiisoqartareernikuuvoq suliffeqarfiit ilaannik nuussinissamut.
Assersuutigalugu Kalistat Lundip Siumuminngaanniit oqaatigaa SULISA A/S
Maniitsoq A/S-imut (?) nuunneqarsimavoq, tassa iluatsinngitsutut uanga taanna
isumaqarfigaara, tassami SULISA Maniitsumut nuunneqarmat
sulissutigineqarsimavoq tassanngaanniit nuutinneqarnissaa, pissutigalugu
sulisut ataavartinneqarsinnaanngimmata taamaattumillu taarsersortuarlutik.
Taamaattumik isumaqanngilanga SULISA-p Maniitsumut nuunneqarnera
iluatsitsinerusoq.
Taava INI
A/S, KNI Pilersuisorlu taakkua nuunneri iluatsissimapput, pissutigalugu
Sisimiut illoqarfiummat ineriartorfiusoq, taamaattumik taakkua
iluatsissimapput.
Paamiuni
Imarsiornermut Ilinniarfik aamma assersuutissaavoq nuussinertut
iluatsissimanngitsutut, tassa pissutigalugu Paamiut ineriartorfiunnginnerat.
Kinguneraa ilinniartorpassuit ilinniarnerminnik unitsitsiinnartarmata
Paamiuniikkusunnginnertik pissutigalugu.
Sinerissami
siarmarterineq tamatigut iluaqutaaneq ajorpoq, aamma ajoqutaasarsimavoq.
Massakkut pissutsit imaapput ingerlatseqatigiiffiit suliffeqarfiillu nammineq
aalajangertariaqarlugu nuunniarnerlutik, kisianni naggataatigut Demokratinit
oqaatigissavarput nuannaarutigigatsigu oqallinnermi ineriartortitaqarfiusumut peqataasinnaasimagatta.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq
Anthon Frederiksen, Kattusseqatigiit.
Anthon
Frederiksen,
siunnersuuteqartoq, Kattusseqatigiit.
Qujanaq.
Aamma uanga nuannaarutigaara oqallinneq manna soqutigineqarluarluni
ingerlanneqarmat, aammami pingaaruteqaqigami.
Unaana
naqqiissuteqarfigilaaginnarniarlugu, tassa ilaatigut Demokratininngaanniit
aamma oqaatigineqartoq, soormi nunaqarfinninngaanniit nutsertitsineq akerlerigaanni
aamma illoqarfissuarmiit illua-tungaanut nutsertitsineq akerlerineqassava?
Isumaqarpunga uani pineqartut assigiinngilluinnartut. Nunaqarfimmiut
pinngitsaalillugit nuutsinneqarsinnaanngitsut nalunngilarput. Aamma
taamaaliorutta aamma pinngitsoorata ajorineqarujussuassaagut. Uani pineqarpoq
Namminersornerullutik Oqartussat susassaqarfiisa ataaniittut. Soorunami
misilittakkat taakkua pisariaqarluinnarpoq aamma qiviassallugit, ilumoorpoq
taanna. Assersuutigisinnaavara inunnik isumaginnittunngorniarluni ilinniarfik
Nuummiit Ilulissanut nuunneqarmat taassuma kingunerisai misilittakkat
ajunngitsut ilinniartut naammassisartut amerlaninngorujussuarneri ajunngitsumik
takutitsipput taamatut nuussinermi. Soorunami taakkuinnaanngillat, kisianni
aamma soorunami ilai aamma misilittakkat pitsaasuinnaanngitsut taanna aamma
nassuerutigineqartariaqarpoq. Kisianni tassa ilaatigut inissiat sumut
atorneqarnissaannut apeqqut isumaqarpunga piffissaajaataannaasorluunniit
akissallugu, pissutigalugu ullumikkut Namminersornerullutik
Oqartussaannaalluunniit qiviarutsigit inissaaleqinerujussuaq imannak
annertutigimmat allaat inissiigallartarnermut Namminersornerullutik Oqartussani
aningaasat qanoq amerlatigisut atorneqartartut aamma taakku
isigineqartariaqartunut ilaapput. Vakantinut aningaasat qanoq amerlatigisut
atorneqartarpat inissaaleqineq pissutigalugu. Ullumikkullu inissaaleqisut qanoq
amerlatigisut aamma naluneqanngilaq.
Soorunami
suliffeqarfiit nammineerlutik sulisuminnut inissialiorsinnaanerat taanna
malinnaaffigalugulu arajutsisimanngilarput. Kisianni Nuuk, Nuuppiaq
eqqarsaatigalugu sumi sanaartornissaq ajornartorsiutaavoq annertooq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq
Johan Lund Olsen, Inuit Ataqatigiit. 2 minutsit.
Johan
Lund Olsen, Inuit
Ataqatigiit oqaaseqartuat.
Qujanaq.
Tassa naatsuliorniarsarissaanga.
Sulisut
narrusaqattaarlutik inuiaqatigiinnut akitsorsaataasinnaanerat taanna
qaangerneqarsinnaavoq soorunami amerlanernik inissialiortitsinikkut, utaqqiisaagallartumik
ineqartitsisariaqarneq pisariaqarunnaarsillugu. Taama ajornanngitsigivoq.
Kisianniuna tassa ukiuni makkunanerpiaq sanaartorneq, pingaartumik inissianik
sanaartorneq unittuuilluni unittuungaqqangajattoq maani Nuummi. Maani
pingaartumik Nuummi inissialiortitsineq unittooqqavoq, taamaammat aamma
immikkut tassuuna iliuuseqarniartariaqarpugut, taanna utoqqatsissutipalaatut
atorniarneqartoq, tassa sulisunngooq narrusaqattaaginnarlutik inuiaqatigiinnut
akitsorsaataaginnarnerat aamma pinaveersimaniarusukkutsigu. Ilami Nuummi
inissaaleqisut amerlaqaat, taanna oqaatigisareerpara. Suliffeqarfiit
ataasiinnannguarluunniit Namminersornerullutik Oqartussat suliffeqarfiutigisaat
20-iinnarnik sulisoqartoq tassa aktiaateqarluni
ingerlatseqatigiiffiusariaqanngilaq. Taannaana oqaatigisaqattaaripput.
Suliffeqarfippassuugamik maaniittut aktiaateqarluni ingerlatseqatigiiffittut
ingerlanneqanngitsut, kisianni Namminersornerullutik Oqartussanit tamakkiisumik
tapiissutinik ingerlanneqartut. 20-iinnarnilluunniit sulisulik ataaseq
sinerissamut arlaannut nuunneqartuuppat soorunami maani Nuummi
inissaaleqisorpassuit akornanni inissaaleqisut ikinnerpaamik 20-it, 20-inik
amerlassusillit taakkua initaartinneqarsinnaassagaluarput. Taanna aamma
eqqarsaatissaavoq.
Taava
aamma naggaterpiaatigut una oqaatiginngitsoorusunngilarput nunap immikkoortuini
ineriartortitsinissamut Inuit Ataqatigiit akerliunngisaannarsimavugut, aamma
taamani Ineqarnermut maannakkut Naalakkersuisuusoq maani Inatsisartuni
saqqummiusseqqaarmalli apeqqusigarput uaniippoq taamani, aqutsiveqarfimmik
pilersitsiinnassannginnatta taamaaliornikkut, soorlumi Danmarkimi
aqutsiveqarfissuarnik amtsråditut ittunik taamatut pilersitsisoqartarsimasoq.
Taannaana pinaveersimatikkusukkipput apeqquserippullu, kisianni akerlerinngilluinnarparput
nunap immikkoortuini ineriartortitsinissaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Neriussaanga oqaluffissaq naagaangat siulittaasorlu nikuikkaangat tamatigut ataqqineqartassasoq nipangernissaq. Taava kingulliulluni nappaasoq Per Berthelsen, Demokratit. 2 minutsit.
Per Berthelsen, Demokratit.
Qujanaq. Ataqqilluinnassavara. Isumaqarpunga oqallinneq nuannersumik naasoq. Siunnersuuteqartup nassuerutigaa assersuusiornermigut, tassalu isumaginninnermik ilinniarfik iluatsilluartumik nuunneqartoq sooq illoqarfimmut ineriartortumut nuunneqarami, Ilulissanut.
Isak Davidsen, ataatsimiinnermi aqutsisoq, sinniisussaq siulleq, Atassut.
Tassa taamaalilluta oqaluuserisaq 111 naammassivarput, aamma
ullumikkut ataatsimiinneq tamaanga naavoq.