Oqaluuserisassani immikkoortoq 112 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiut aqqaneq pingajuat, ataatsinngorneq 24. marts 2003, nal. 14:44.
Anthon
Frederiksen, siunnersuuteqartoq,
Kattusseqatigiit.
Inatsisartut
Suleriaasianni § 35 naapertorlugu apeqquteqaat aallaavigalugu oqallisissiaq
imaattoq matumuuna saqqummiuppara.
Tassa
siulittaasup qulequtaa atuareermagu atuaqqissanngilara. Tunngavilersuulli
imaattoq,
taamatut siunnersuuteqarninnut
tunngavigaakka; naluneqanngimmat sanaartugassat iluarsaatassallu ukiumiit
ukiumut naammassineqanngitsoortartut amerlaqimmata.
Naluneqanngitsutullu
taamatut kinguaattoortarnerit ilaatigut aamma marloqiusamik allaffissornermik
patsiseqartarput, ilami allaat allaffissornerpassuit ilaatigut
aqqusaaqqaarlugit suliassat ilaatigut kinguaattoorlutik aatsaat
aallartinneqartarput.
Qujanartumillu
aamma Naalakkersuisooqatigiit anguniagaannut ilaavoq qeqqaniit aqutsinerup
annikillisikkiartuaartinneqarnissaa. Siunnersuuteqartutut qularutiginngilara
sanaartugassat iluarsaatassallu illoqarfinni suliarineqarfissaanni
aqunneqalerlutillu isumagineqartalernerisigut suliassat pilertornerusumik
naammassineqartalersinnaanerat periarfissaqarnerulissasoq.
Tassunga
ilanngullugu Nunatsinni sanaartornerup akikinnerulersinneqarnissaa anguniarlugu
sanaartugassat, soorlu assersuutigalugu pisortanit inissialiarineqartussat
titartagartaat assigiit illoqarfinniit
illoqarfinnut atorneqarsinnaaneri naliliiffigineqartariaqartut, aammalu
illoqarfiit tulleriiaarlugit inissialiortiternermi sanaartugassanik
annertunerusunik sanaartorfigineqartalernissaat ilanngullugu
oqallisigeqqunarpoq, tassa ilaatigut maannakkut periuserineqartutuut
takuneqarsinnaammat illoqarfiit ilaanni sanaartorneq annikittuinnarmik
ingerlanneqartartoq, soorlu assersuutigalugu illoqarfiit tallimat
inissaaleqisoqarfiunerpaat inissianik ukiuni marlunni pingasuniluunniit
sanaartorfigineqarnerussasut eqqarsaatigineqarsinnnaavoq, soorunami
sanaartugassat allat illoqarfinni allani ingerlanneqartussat
ingerlaannassapput.
Sanaartornermi
oqartussaaffiit akisussaaffiillu kommunenut siammarneqarnerisigut suliassat
pilertornerusumik akikinnerusumillu ingerlanneqalersinnaanerat
takorloorneqarsinnaannginnerluni? - taamaaliornikkummi allaffippassuit
pisortaqarfiillu arlariit aqqusaarneqaqqaanngikkaluarlutik suliassat
pilertornerusurnik ingerlanneqartalersinnaanerat anguneqarsinnaammat.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taava massakkut
Attaveqarnermut, Avatangiisinut Ineqarnermullu Naalakkersuisoq.
Mikael
Petersen,
Attaveqarnermut, Avatangiisinut Ineqarnermullu Naalakkersuisoq, Siumut.
Qujanaq.
Naalakkersuisut sanaartugassanik suliassani annertoorujussuarmik
kinguaattooruteqarrtarnerit ilisimaaraat, aaqqiissuteqarnissarlumi
pitsaanerusoq aamma Naalakkersuisut anguniarpaat.
Tamanna
anguniarlugu Naalakkersuisut assigiinngitsunik suliniuteqarput:
Tassa
siullermik, sanaartugassanik suliassat aningaasanut inatsimmut
ilanngunneqartarnerannut suleriaaseq nutaaq atulersinneqarpoq.
Siornatigut
kinguaattoornernik pisoqartarsimavoq, suliassat aalajangersimasunik
tunngaveqarnerani aningaasanut inatsimmut ilanngullugit suliarineqartarmata,
tamannalu kinguaattoornernik kinguneqartarluni suliassat ilimagisaminngarnit
akisuneruleraangata, tassami Naalakkersuisut aningaasaliissutinik
aaqqiissuteqarniarlutik Inatsisartunut Inatsisartulluunniit Aningaasaqarnermut
Ataatsimiititaliaannut saaffiginneqqittarmata.
Suleriaatsimi
tassani nutaami suliassaq pilersaarusiorneqatassaaq, tamatumani
missingersuusiat B-nik taaneqartartut suliarineqarlutik, taamatullu suliassap
ingerlanneqarnerata kingunerisassai assigiinngitsut nassuiarneqartassallutik.
Tamatuma kingorna aatsaat Naalakkersuisut aalajangissavaat suliassaq ukiumut
tullermut aningaasanut inatsisissamut ilanngullugu suliarineqassanersoq.
Tamatumani aningaasaliissutigineqarsimasut amigarnerat pissutigalugu
kinguartooruteqarnissat annikinnerpaanngortinnissaat qulakkeerneqartassaaq.
Aappassaanik,
Attaveqaqatigiinnermut Ineqarnermullu Pisortaqarfimmi suleqatigiissitaq
pilersinneqarpoq sanaartornermik suliassat aningaasanut inatsimmut
ilanngunneqartarnerannut atatillugu eqaannerusumik siunertamullu
naleqqunnerusumik suleriaaseqarnissamut siunnersuusiortussaq.
Suleqatigiissitaq
taanna sanaartornermik inuussutissarsiutilinnik, KANUKOKA-meersunik
Namminersornerullutillu Oqartussat pisortaqarfiineersunik inuttaqarpoq.
Suleqatigiissitap junimi siunnersuutitut tusarniaassut nassiussuuunnissaa
naatsorsuutigaa, tamatumalu kingoma politikkikkut suliarineqarsinnaassalluni.
Pingajussaanik,
2004-mut ataatsimoortumik tapiissutissat pillugit KANUKOKA-mik ataatsimoortumik
tapiissutit isumaqatigiinniutigineqarnerannut atatillugu suleqatigiissitamik
pilersitsisoqassasoq illuatungeriinnit isumaqatigiissutigineqarpoq, tassa
sanaartugassatut isumaqatigiissutit pillugit malittarisassanut
siunnersuusiortussamik.
Sisamassaanik,
inissianik sanaartornermik suliassaqarfimmi allannguutissat
siunnersuutigineqarput, tamatumalu kingunerissallugu Namminersornerullutik
Oqartussat kommunini inissianik attartortittakkanik sanaartornermut 60%-imik
tapiissuteqartarnerannik qimakkiartuaarinninnissatsinnik. Tamatumunnga kommunip
naammassiartuaakkani aalajangersimasuni sanaartornermut akigititassanit
tapiissutit 60%-iannik pissarsisarneranut taarsiullugu kommuni kvadratmeterimut
ataatsimut aalajangersimasumut tapiissutisisinnaanngorpoq, tamatumalu kingoma
kommunip nammineq sanaartornermut akigitinneqartup sapinngisamik akikinnerpaap
qulakkeernissaa aalajangersinnaanngussallugu.
Tamanna kommunip
akisussaassuseqarnerulerneranik aammalu arlalitsigut
kiffaanngissuseqalerneranik kinguneqassaaq. Tamatuma peqatigisaanik tamanna
aammattaaq allaffissornerup annikinnerulerneranik kinguneqassaaq taamalu
kvadratmeterimut akigitinneqartut akikinnerulemerannut aqqutissiuussilluni.
Naalakkersuisooqatigiinnissamik
isumaqatigiissut malillugu Naalakkersuisut pilersaaruteqar put sanaartugassanut
nunap immikkoortukkuutaartumik tapiissuteqartalernissamik. Taava nunap
immikkoortuani illoqarfiit peqatigiillutik tassa kommunit peqatigiillutik
sanaartugassanut aningaasaliissutit agguataarneqarnissaat
isumaqatigiissutigisassavaat, atugassiissutit pissarsiviunerpaamik
atorneqarnissaat siunertaralugu.
Taamatuttaaq Naalakkersuisut
sanaartugassanut nutaanut ukiunut tallimanut iluarsaassinissanullu ukiunut
qulinut pilersaarusiortarsinnaanernut periarfissat oqaluuserisimavaat.
Periarfissat taakku nalilersornerat taamaalilluni aamma suleqatigiissitap
siuliani taaneqartup suliassaanut ilaavoq.
Taamaalilluni
suliniuteqarnerit arlaqartut aallartinneqarput allaffissornermut eqaannerusumut
aqqutissiuussisussat, tamatumalu peqatigisaanik kommunit sanaartugassatut
suliassani akisussaanerat aningaasatigullu peqataatinneqarnerat annertusineqassaaq.
Sanaartugassanut
suliassaqarfik taamatut pisoqarpat ullumikkornit siunertanut naleqqunnerusumik
aaqqissuunneqarsinnaassaaq, Naalakkersuisulli aammattaaq sanaartugassanut
aningaasaliissutit ataatsimoortumik qitiusumillu tulleriiaarneqartarnissaasa
aalajangiusimanissaat pingaartuusoraat sanaartugassanut aningaasaliissutit
inuiaqatigiit aningaasaqarniarneranni siunertanut naleqquttuunissaat
qulakkeerumallugu kiisalu pisortat aningaasaliisarfiata annertuup
allanngortinneqannginnissaa qulakkeerniarlugu.
Naggataatigut
oqaatigineqassaaq ataatsimoortumik tapiissutit kommuninut
isumaqatigiinniutiginerannut atatillugu aalajangersakkat atulersinneqarmata,
tamatumalu kingorna kommunit Namminersornerullutik Oqartussat sanaartugassanik
suliassaataanni maannakkorninngarnit annertunerusumik
peqataatinneqalissallutik.
Taamaalilluni
isumaqatigiissummi takuneqarsinnaavoq ?kommunit kommunini sanaartugassanut
nammaqataanissaminni pilersaarusiornermut aningaasaliinissamullu
akisussaassuseqarnerunissamik tigusisinnaasut tiguserusuttullu
sanaartornermik
suliassaqarfiup iluani pingaarutilinnik isumaqatigiissuteqarsinnaasut kommunimi
pineqartumi soorlu inissialiortiternermut pisortat aningaasaliissutaasa
amerlinissaat erseqqissumik siunertaralugu?.
Taamatut oqaaseqarlunga
ataatsimiittarfimmi maani pissanganartumik oqallittoqarnissaa qilanaaraara.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taava massakkut
partiit oqaaseqartuinut siulliussaaq Kalistat Lund, Siumut.
Kalistat
Lund, Siumup
oqaaseqartua.
Inatsisartunut
Ilaasortap Anthon Frederiksenip saqqummiussaa Siumumiit ima
oqaaseqafiginiarparput.
Siullermik
Siumumiit oqaatigissavarput sanaartornerup inissaqarniarnerullu iluani
ajornartorsiutaasunik Naalakkersuisut eqiingaffiginnillutik aaqqiiniuteqarnerat
tamakkiisumik taperseripput. Isumaqarpugut Naalakkersuisooqatigiit
isumaqatigiissumminni anguniagassamissut siunniussimasaat sanaartornerup
inissaqarniarnerullu tungaasigut ajornartorsiutitoqanngorsimasunik
aaqqiiartuaalernissaannut aallaaviussasut.
Naalakkersuisooqatigiit
siunniussaasa ilaagimmassuk sanaartugassanik agguaasarnerit nunap
immikkoortukkuutaarnerinik aallaavilerlugit aaqqissuunneqartalerumaassasut
pilersaarut isumalluarnarpoq. Kommunimmi akunnerminni suleqatigiinnerulernissaanik
siunniussisimanermut tamanna naapertuuppoq. Aammalu sanaartornerit
oqartussaaffigineqarnerisa kommunini aallaaveqarnissaasa
tikikkiartuaalernerinut aallaaviussalluni.
Ukiuni
tallimanut agguakkamik sanaartornerit ingerlanneqarsinnaanerisa periarfissaalernissaannik
Naalakkersuisut sulissuteqarnerat Siumumiit isumalluarfigaarput periarfissanik
eqaallisitsiinnarani aamma aningaasatigut artukkiissutaannginnerusumik
sanaartorneq ingerlanneqarsinnaalissammat.
Sanaartugassanut
kinguartooruteqartarnernut aaqqiissutaasinnaasunik Naalakkersuisut
sulissutiginninnerat isumalluarfigaarput isumaqarpugut ajornartorsiutit
sumiinnerannik ilisimannileriartorneq aallaaviulluassasoq naapertuunnerusumik
ingerlasoqalernissaanut. Aningaasaleeriaatsinik naapertuunnerusunngortitsiniaanerit
suleqatigiissitatigoortumillu KANUKOKA-mik suleqateqarluni
aaqqissuussiniarnerit tamarmik siunnerfigaat sanaartortitseriaatsip
naleqqunnerulernissaa. Taamaammat Siumumiit sulissutigineqartut taperserpagut.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tulliuppoq
Johan Lund Olsen Inuit Ataqatigiit.
Johan
Lund Olsen, Inuit
Ataqatigiit oqaaseqartuat.
Qujanaq.
Pisortat ingerlatsinerisa nutartertariaqarnera aningaasanillu aqutsinerup
pitsaanerusariaqarnera tamatta isumaqatigiissutigisinnaajunnarsivarput,
pingaartumik Nunatsinni sanaartornermi ullumikkut pissusiulersimasut
eqqarsaatigalugit.
Sanaartugassanik
pilersaarusiortarneq ingerlatsinerlu pitsaanerususariaqartoq
oqallissaarisutuulli taamaattumik aamma anguniassagipput Inuit Ataqatigiit
isumaqarpugut, sanaartornermi ullumikkut tassaavoq aalisarnermut tulliulluni
nunatsinni aningaasarsiornermut suliffissaqartitsinermullu
pingaaruteqarnerpaaq.
1999-imi
missingersuusiortarneq pillugu inatsit atortuulersinneqarnissaa suliarigatsigu
taamani aamma sanaartornermut iluarsartuussinernullu aningaataaseqarfik
pilersipparput sanaartornerup kinguaattoorfiuallaarani ingerlaavartumik aamma
ingerlalersinnaanissaa tamatta neriuutigigatsigu. Ukiup nikinneranili sanaartornermut
iluarsartuussinermullu aningaasaateqarfimmi uninngasuutigineqartut milliartit
affaat maanna missiliulereerpaat, pissutissaqarluarpugullu aaqqiiniutissanik
ujartuinissatsinnut.
Sanaartugassat
aqunneqarnerat pillugu Naalakkersuisut assigiinngitsunik suliniuteqarnerarlutik
akissuteqarput, apeqqutaalersorli tassaavoq taakku naammannersut.
Aningaasanik
isumatusaarnersumik atuissagutta pisortallu ingerlatsinerat sapinngisamik
eqaatsumik aaqqissuunneqassappat aamma suut ajornaquteqanngitsumik
siammartiterneqarsinnaanersut eqqarsaatigisariaqarsoraagut.
Taamaammat
Inuit Ataqatigiit aamma isumaliutigeqqussavarput sanaartornermut oqartussaaneq
sapinngisamik kommunenut aamma siammarniameqassasoq. Ullumikkummi
Namminersornerullutik Oqartussat kommunillu akornanni saqitsaattuarneq
qaangerniarneqartariaqalerpoq, kommunillu namminneq sanaartugassaminnut
tamakkiisumik akisussaalertariaqarlutik. Sanaartornermut aningaasaliissutit
ullumikkutut avillugit akisusaaffigineqarnerat utaqqeqattaannermik
naammasisaqanngitsoornermillu kingu-neqarajuppoq, taamaammallu Naalakkersuisut
kaammattorumavagut tamanna qaangerniarumallugu qanoq aamma
iliuuseqarniaqqullugit.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tulliuppoq
Jensine Berthelsen, Atassut.
Jensine
Berthelsen,
Atassutip oqaaseqartua.
Inatsisartuni
ilaasortap Kuupik Kleistip taanna uteqqittoorpara kisianni iluarsissavara
Inatsisartuni ilaasortap Kuupik Kleist-ip apeqquteqaat aallaavigalugu
oqallisissiaani sanaartornermut tunngasut pillugit ATASSUT-mit oqaaserisavut
innersuussutigeriarlugit Inatsisartuni ilaasortap Anthon Frederiksen-ip
apeqquteqaat aallaavigalugu oqallisissiaanut, tassalu sanaartornerit
kommuneqarfinnit ingerlatassanngortinneqarsinnaanerinut tunngaasumut
ATASSUT-mit imatut oqaaseqassaagut:
Sanaartornerup
kinguaattoortarneranut ilaatigut
marloqisusamik allaffissorneq Anthon Frederiksen-ip pissutaaqataasarnerarpaa,
taamaammallu sanaartugassat iluarsaatassallu illoqarfinni suliarineqarfissaanni
aqunneqarlutillu isumagineqartalernerisigut suliassat pilertornerusumik
periarfissaqarnerussanerarlugit.
Ilumoorpoq
sanaartugassanut tunngatillugu ullumikkumit pisariinnerusumik piffissamillu
eqquiffiginerusumik aaqqissuussisoqartariaqarpoq.
Tamannalu
iluarsiniarlugu Naalakkersuisut sanaartugassanut nutaanut tunngatillugu ukiunut
tallimanut iluarsartuussassanullu tunngatillugu ukiunut qulinut
pilersaarusiortalersinnaanissamik oqaluuserinninnerat ATASSUT-mit
iluarisimaarparput.
Ukiunummi
arlalikkaanut pilersaarusiortoqartarneratigut kommunet piffissarujussuaq
atorlugu piffissamiit piffissamut qinnuteqaqattaaratik nalussanngimmassuk
sanaartugassat iluarsartuussassallu qanoq tulleriiaarneqassanersut,
pilersaarusiornernilu kommunet peqataalluinnartarnissaat pingaaruteqarpoq,
nalornisiginngilarpullu kommunit kattufiat aqqugialugu kommunit
peqataatinneqarluinnartassasut.
Tamanna
aqqutigalugu sanaartornerup ingerlanneqarnera ukiunut arlalinnut
pilersaarusiortarneratigut aalaakkaanerulissasoq ATASSUT-mit
qularutiginngilarput.
Sanaartugassat
iluarsartuussassallu pillugit pilersaarusiortarnermi suleriaatsip
allangortinneqarneratigut piviusorsiorneruliinnarani aningaasatigut
ullumikkumit illersorneqarnerusinnaangaartumik tunngaveqalissasut ATASSUT-mit
nalornissutiginngilarput.
Mannami
tikillugu tunngavilersorluarneqanngitsut akuersissutigineqarnerisigut
kinguaattoornerit akitsorsaanerillu imaannaanngitsut nunatta
aningaasaqarneranut ajorseriaateqartitsisut arlalissupput.
Taamaammat
missingersuusiat B-it, aningaasartuutissanik missingersuutit aammalu suliap
qaqugu naammassineqarnissaanut missingersuutit, suliassallu ingerlanneqarnerata
nassatarisassai assigiinngitsut nassuiarneqarsimallutik
qinnuteqaasiortalernikkut aningaasaliiffigisassat isumannaatsumik
tunngaveqarluni aalajangersarneqartarnissaannut tunngaviulluinnassapput,
ATASSUT-millu suleriaaseq nutaaq isumalluarfigaarput.
Taamatuttaaq
sanaartugassat Inatsisartut Aningaasanut Inatsisaannut ilanngunneqartarnerannut
atatillugu eqaannerusumik siunertamullu naleqqunnerusumik suleriaaseqalernissamut
siunnersuisuusioqatigiit juni-mi naammassisassaat ATASSUT-mit qilanaarluta
utaqqissavarput.
Periarfissaq
manna iluatsillugu Naalakkersuisunut misissoqqunarpoq KANUKOKA-mit
Namminersornerullutillu Oqartussanit inuttalikkamik sanaartornermut iluarsartuussinermullu
aningaasaateqarfik sutigut nukittorsarneqarsinnaanersoq misissoqqullugu,
assersuutigalugu qinnuteqarnermi missingersuusiornissamut siunnersortit,
sanaartukkat iluarsartuussallu killiffiannut nakkutilliisut, sanaartukkat
pitsaassusaannik nakkutilliisut qitiusumit siammarlugilluunniit qanoq
ataqatigiissarneqarsinnaanersut misissoqqullugu.
Kommunet
inissianik sanaartornerannut tapeeriaatsip allanngortinneqarnissaanut
siunniussaq, tassalu kvadratmeterimut ataatsimut aalajangersimasumut tapiissutisisinnaalersitsinerup
kingunerisaanik inissianut sanaartukkanut akit nakkutigineqarnerulissapput
piffissaliussarlu sapinngisamik eqquutsinneqarnerusalissaaq. Taamaammat
tapeeriaaseq taanna ATASSUT-mit ilassilluarparput.
Taamatulli
oqareerluta paasinarsissappat kommunet aningaasatigut ingerlaniapiloornerusut
artukkerneqartut, taava aalajangersimasumik piffissaliilluni immikkut
aaqqissuussiffigineqarsinnaanersut ATASSUT-mit Naalakkersuisunut
misissoqquarput imaluunniit misissoqqunarpoq.
Anthon
Frederiksenittaaq naliliiffigeqquaa sanaartugassat titartagartaasa,
assersuutigalugu inissialiarineqartut assigiissaartumik
atorneqartalersinnaanersut. Periuseq atorneqartareersoq nalunanngilaq,
assersuutigiinnarlugumi Sisimiuni Kussangasup ilaani inissiat maanilu Nuup
Nuussuartaani Paarnani inissiat assigeeqqissaarput.
Aaqqissugaanerusumilli
sanaartornissaminnik neqerooruteqartartut neqeroorutaat ataatsimut
katersorlugit vidensbankitut ittumik KANUKOKA Namminersornerullutillu
Oqartussat pilersitseqatigiissinnaanersut suleqatigiissitanut misissoqqunarpoq,
qularutissaanngilarmi pitsaassuseq piinnarnagu aammali kvadratmeterimut akit
nakkutigineqarnerulersinnaasut.
Sanaartugassanut
nunap immikkoortortakkaartumik tapiissuteqartoqartalerpat illoqarfiit
peqatigiillutik sanaartugassanut aningaasaliissutit
agguataarneqartalernissaannut isumaqatigiinniartalersussaapput, tassungalu
tunngatillugu kommunit akunnerminni tamanut naapertuuttumik
isumaqatigiissusiortalernissaminnut nukitik atorluassagaat ATASSUT-mit
kaammattuutigaarput. Eqqumaffigineqartariaqartutullu taarusupparput kommunet
periarfissamik atuiniartut isumaqatigiinneq ajulernerisigut sanaartugassat
kinguarsarneqannginnissaat qulakkeersimaarneqartariaqartoq.
Naggataatigullu
ATASSUT-mit oqaatigissavarput sanaartugassanut iluarsartuussassanullu
aningaasaliissutit ataatsimoortumik qitiusumillu tulleriiaarneqartarnerisa
aalajangiusimanissaannik Naalakkersuisut pingaartitsinerat ATASSUT-mit
ippinnartoqartinnginnatsigu.
Imaanngilaq
kommunit tatiginnginnatsigit ? naamik ? suliassarpassuit aningaasarpassuillu
matumani eqqartorpavut, taamaammat sanaartugassanut aningaasaliissutit
Naalakkersuisut oqarnerattut inuiaqatigiit aningaasarsiorneranni siunertanut
naleqquttuunissaannik qulakkeerinninniarneq ataatsimut aqunneqartariaqartoq
ATASSUT-mit isumaqarpugut.
Anthon
Frederiksenip oqallisissiaa ATASSUT-mit taamatut isummersorfigaarput.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq Palle Christiansen Demokratit.
Palle Christiansen, Demokratit oqaaseqartuat.
Demokratini isumaqarpugut siunnersuut
soqutiginartortaqartoq. Kommuninut akisussaaneq ilaannut tunniunneqarsinnaavoq.
Taamannak iliorutta ajornartorsiut siulleq naammattuussavarput. Kalaallit
Nunaanni kommunit tamarmik piginnaasaqalersimanngillat akisussaanissaminnut
tigusinissaminnut. Aamma suli
taamatut piginnaasaqalissagunaratik.
Tamanna
peqquteqarpoq kommunit angissusaasa assigiinnginnerannik aamma
ilinniarluarsimasunik naleqquttunillu sulisussaaleqineranut.
Demokratit isumaqarput
sulianut taakkununnga ingammik kommunit annerit kivitsisinnaassasut.
Ataatsimiinnermili matumani ersersinneqarpoq Kalaallit Nunaanni kommuneqartoq
ingerlatsinerminnik ajornartorsiuteqartunik.
Demokratinit
siunnersuut tapersersorumavarput siunniunneqassappat naqqa tikillugu
missueqqissaartoqassasoq. Kommunini aamma Namminersornerullutik Oqartussani
ingerlatseriaatsit pillugit. Qulaarneqartariaqarpoq suliat sumi
katersuutiinnartariaqassanersut. Tassungalu killiinnarpunga angumerinnginnakku.
Isak Davidsen, ataatsimiinnermi aqutsisoq, sinniisussaq
siulleq, Atassut.
Tullinnguuppoq
Anthon Frederiksen siunnersuuteqartoq Kattusseqatigiit.
Anthon
Frederiksen,
siunnersuuteqartoq, Kattusseqatigiit.
Siullermik
Naalakkersuisut akissuteqaataannut qujarusuppunga aammalu partiit
oqaaseqaataannut. Manna siunnersuut paasisakka naapertorlugit
tusaasinnaasakkalu naapertorlugit annertuumik isumaqatigiiffiuvoq.
Tassa
sanaartornermi kinguaatoortarnerit aammalu akikillisaasinnaaneq
minnerunngitsumillu aamma kommuninut akisussaaffinnik annerusumik
tunniussisinnaanermut periarfiissutut oqaatigineqarsinnaalluni.
Minnerunngitsumik aamma Naalakkersuisut akissuteqarnerminni suliniutigisaat
assigiinngitsut uani oqallisigisami paasinnittumik aaqqiiniarnermik
sammititaqarmata assut oqartariaqarpunga iluarisimaarlugu.
Tassami aamma
partiit assigiinngitsut oqaaseqarnerminni annertuumik ullumikkut
ajornartorsiutaasut kinguuaatoorutaasartullu aamma arajutsisimanagit
saqqummiussuummatigit.
Taamaammat
isumalluarnarpoq aaqqissuussinermi nutaami sanaartornermut
kinguaatoorutaasartut aammalu sanaartornerup eqaannerusumik immaqalu
pilertornerusumik ingerlanneqartalernissaa taamaalilluni
anguneqarsinnaassammat.
Siumup
oqaaseqartuata oqaatigisai annertunerusumik Naalakkersuisut akissuteqarneranni
attuumassuteqarmata qujassuteqarfigiinnarlugit, Inuit Ataqatigiit
oqaaseqaatigisaannut tunngasut aamma maluginiakkama ilagivaat sanaartornerup
kinguaattoorfigineqartarneranut tunngatillugu ullumikkut imaluunniit siorna
ukiakkut sanaartornermi iluarsaaqqinnermullu aningaasaateqarfimmi Inatsisartuni
paasissutissiissutigineqartut tunngavigalugit taamanikkut aningaasat 420 mio.
tassani sanaartornermut iluarsaasarnermullu aningaasaateqarfimmiittut
ilisimatinneqarnikuuvugut.
Taamaattumik
ilumut sanaartornerup 1999-mi Inatsisartuni missingersuusiortarnermi inatsisit
akuersissutigineqarneratigut naatsorsuutigineqaraluarmat sanaartornerup
kinguaattoorfiuvallaarani ingerlanneqarnissaa Inatsisartuni tamanit
isumaqatigiissutigineqarnikuummat.
Kisiannili tassa
ajoraluartumik sanaartornerup maannamut taamak annertutisumik
kinguuaattoorfigineqarnera aappaatigut oqarsinnaavugut immaqa milliardit
affangajai sulisinneqartussaagaluit kommuneqarfinni assigiinngitsuni
sulisinneqanngitsoormata. Taanna uggornarpoq.
Kisianni
taamaakkaluartoq sanaartornermut aningaasaliissutigineqartartut aamma ukiuni
kingullerni qiviarutsigit takusinnaavarput ukioq naatsorsuuteqarfiusoq
kingulleq tassani sanaartornermut aningaasartuutit amerlanerpaat aatsaat taamak
amerlatigisut atorneqarsimammata aamma isumaqarpunga ilorraap tungaanut tassani
aallariartoqalaarsimagaluartoq taamaattoq. Aningaasat sulisinneqarnissaat
pitsaanerusumik taanna anguartuaarneqassasoq tamatta isumaqatigiissutigigipput
uani oqaaseqaatini assigiinngitsuni ersersinneqartoq isumaqarpunga.
Tassami aamma
Atassutip oqaluttuata oqarneratuut ilumoorpoq sanaartugassanut tunngatillugu
ullumikkumiit pisariinnerusumik piffissamillu eqquiffiginerusumik
aaqqissuussisoqartariaqarnera taanna avaqqukkuminaatsorujussuuvoq.
Aammalu
pingaaruteqartoq tassaavoq aamma kommuneqarfiit kattuffiata taamatut
aaqqissuussinermi nutaami qanimut peqataatinneqarnissaa aamma
Atassumminngaaniit oqaatigineqartoq taanna avaqqukkuminaatsorujussuussooq.
Kiisalu aamma
Atassutip oqaluttuata oqaatigisaa soqutiginarluinnartoq tassaavoq ilisimasanik
katersivimmik immaqa pilersitsisoqarsinnaappat taamaalilluni ajornartorsiutit
assigiinngitsut aammalu kinguaattoortarnermut pissutaasut assigiinngitsut qanoq
ilillugit anigorniarneqarsinnaanerat tassuunaarluta immaqa anigorneqarsinnaasoq
aamma naatsorsuutigineqarsinnaasoq takuneqarsinnaassammat.
Isumaqarpunga
aamma taanna soqutiginarluinnartoq KANUKOKA peqatigalugu Namminersornerullutik
Oqartussat taamaattumik katersuivimmik vidensbankemik Atassutikkormiutoorlugu,
utoqqatserpunga oqaatigineqartumik pilersitsisoqarsinnaappat ilisimasanik
katersivimmik aamma qularnanngilaq iluaqutaasussaassooq sanaartornerup
aaqqiiffigineqarsinnaanera tassuunaarlugu immaqa ikiorsiivigineqarsinnaammat.
Soorunami
aaqqissuusseqqinnermi nutaami aamma oqaluttut ilaaniit oqaatigineqarneqartoq
tassaasoq pingaaruteqartoq isumaqarpunga sanaartornerup pisariinnerusumik
aammalu kinguuaatoorfiuallaanngitsumik aaqqissuuteqqinneqarsinnaanera arlaanut
kinguuaattoorfiunngitsumik aaqqiinissaq taanna ujartorneqartariaqarmat taanna
eqqumaffigineqartariaqartoq.
Demokratit aamma
tunngaviusumik tapersiinerat aamma qujassuteqarfigaara. Kisiannili tassani
maluginiarlugu nalornerpalaalaartumik immaq aammalu kommuneqarfinni assigiinngitsuni
atorfillit assigiinngitsut ilisimasaat ilinniartitaanikkullu
angummassinnaanerat apeqquserneqartoq ilaatigut oqaatigineqarpoq.
Kisiannili
paasinnissinaanera naapertorlugu sillimaniarneq tassani ajutoortoqannginnissaa
aamma qulakkerusullugu taamatut arlaatigut tappiffeqarnissaq taanna
eqqumaffigeqquneqarmat aamma qujassutigaara.
Taamatut
naatsumik oqaaseqarlunga qujavunga oqaluuserisap soqutigineqarluni aamma
paasissutissanik assigiinngitsunik pissarsiffigineqarnera. Qujanaq tamassinnut.
Isak Davidsen, ataatsimiinnermi aqutsisoq, sinniisussaq
siulleq, Atassut.
Tulliulluni
oqaaseqassaaq Attaveqarnermut, Avatangiisinut Ineqarnermullu Naalakkersuisoq.
Mikael
Petersen,
Attaveqarnermut, Avatangiisinut Ineqarnermullu Naalakkersuisoq, Siumut.
Qujanaq.
Isumaqarpunga tamatigut pissanganartuaannartoq aamma sanaartornermut tunngasut
Inatsisartuni eqqartorneqaraangata. Tassami periarfissat assigiinngitsorpassuit
qaqilerneqartarmat ukiumulluunniit arlaleriarluta Inatsisartuni sanaartorneq
pillugu oqallikkaluaraangatta tamatigungajak aamma
nutaarsiassaqalaartuaannartarmat.
Ukiumulluunniit
arlaleriarluta Inatsisartuni sanaartorneq pillugu oqallikkaluaraangatta
tamatigungajak aamma nutaarsiassaqalaartuaannartarmat.
Isumaqarpunga
isumaqatigiittorujussuusut partiit assigiinngitsut. Taamaattumik
immikkuualutsillugit oqaaseqarfiginianngilakka. Ataatsimulli
oqaaseqarfigilaavinnassallugit ataasiakkaannguit taamaallaat.
Tassa
paasinarpoq, uangattaaq qujassutigissavara Naalakkersuisuninngaaniit akissuteqaaterput
isumalluarfigineqarmat. Taamaalilluni isumaqarpunga takuneqarsinnaasoq
annertuumik isumaqataaffigineqartoq tamanit. Kisianni soorunami
naalakkersuinikkut siunnerfivut piviusunngortissagutsigit aamma pisariaqarpoq
Inatsisartunit Inatsisartut ataatsimiititaliaannit kommuninit
suleqateqarluarnissarput. Taakkuinnaanngitsut aamma sanaartornermik
ingerlataqartut kattuffiit allallu. Tassa inuiaqatigiinni susassaqartut
suleqatigiilluarnissarput tamatumani pisariaqarpoq sanaartornikkut suliassanik pilersaarutinillu
naamassissaqarfiusumik suliaqartassagutta.
Tassami
ilumoorluinnarmat aningaasarparujorujussuit inuiaqatigiinni sanaartornerup
tungaatigut ingerlanneqarput. Naatsorsuutigissavarput milliardit ukiumut
pallillugit pilersaarutaasartut iluini immaqa affaannai naammassineqartarput.
Tassa Namminersornerullutik Oqartussat aningaasaliissutaat kisiisa
eqqarsaatiginagit aamma selskabit ingerlatseqatigiiffiissuit
aningaasaliissutaat sanaartornerup iluani kiisalu aamma namminersortut aamma
aningaasaliissutigisartagaat eqqarsaatigalugit.
Tassa
tamakkorpassuupput nalilersuinermi maani aamma
eqqarsaatitsinniitittariaqakkagut. Ilaatigut oqaatigineqartut uku
minnerunngitsumik Atassutip tungaaninngaaniit aamma paasinarmat
isumaqataaffigineqartut partiinit allaninngaaniit tassa pingaarnerutillugu
soorlu aamma siunnersuuteqartup taatsiaraa sanaartornerup iluani
ilisimalikkanik katersuiffimmik peqarnissaq. Tassa tamanna ataasialinngilagut
aamma eqqartortarlugu. Eqqaamaniarpara aamma ukiut arlallit aamma matuma
siornatigut qaqinneqartarsimavoq arlaleriarluni partiinit assigiinngitsuniit.
Tassa
misissussavara neriorsuissaanga misissussagakku taassuma suliassap
Inatsisartuni eqqaaneqartartup qanoq ingerlanneqarnera.
Tassa
nassuerutigissavara taanna pillugu suli Naalakkersuisuni eqqartuisimannginnatta
uagut Naalakkersuisut massakkut atuuttut. Kisianni periarfissaqarsorinarpoq.
Uanga massakkorpiaq takusinnaasakka naapertorlugit soorlu Sisimiuni
aktiskteknologimik ingerlatsineq periarfissatsialaasinnaavoq aamma suleqatigalugu
tamakku sanaartornerup iluani ilisimalikkanik katersuiffimmik
pilersitsisoqarsinnaanera.
Immaqa
sanaartornerinnarmut tunnganngitsunik kisianni teknikkikkut ingerlatsineq aamma
tamaat eqqarsaatigalugu pissanganassooq ingerlatsisoqarsinnaanera taamatut.
Taanna misissoqqissaarumaarparput Naalakkersuisunit.
Kiisalu aamma
pilersaarusiortarnermut tunngatillugu qujarusuppunga tassa Naalakkersuisut
ukiuni tallimakkaartumik sanaartugassanut nutaanut pilersaarusiortarnissamik
anguniagaqarnerput. Kiisalu aamma iluarsagassanut ukiunut qulinut
pilersaarusiortarnissamik siunnerfeqarnerput ukua Inatsisartunit tamanit
taperserneqarmata. Taamaalilluta Naalakkersuisunit tunuliaquttavut
paaseqatigilluinnarlugit suliassami tamatumani aallartitsisinnaanngoratta maannangaaq.
Tassa
neriussuugut taamatut pilersaarusiortarnissamik siunnerfeqarneq soorlu
oqaatigigipput suleqatigiissitat kommunit peqatigalugit aammalu sanaartornermut
ingerlataqartut peqatigalugit ingerlanneqartut taakkua aqqutigalugit
pilersaarusiornerit taakkua naammassineqarsinnaajumaartut.
Erseqqissaatigilaarusuppara
ilanngullugu soorunami nuna immikkoortukkuutaartumik sanaartornerup tungaatigut
akisussaaffilersuineq annertunerusumik pissappat aamma qulakkeertariaqarmat
kommunit teknikkikkut ingerlatsisinnaanerisa qulakkeerneqarnissaat.
Naammassisaqarsinnaassutsip aammalu tatiginartumik suliassanik
ingerlataqarsinnaassutsip qulakkeerneqarnissaa. Kiisalu aamma kommunit aamma
aningaasaqarnikkut soorunami inissisimanerata aamma qulakkeerneqarnissaa.
Taamaattumik
pssusissamisuussaaq kommunit ullumikkut taakkunannga naammassinnissimasutut
taaneqarsinnaasut tassa aningaasatigut inissisimanikkut ammalu sulissanik
naammassisaqarsinnaassutsikkut tutsuiginarsinnaasut. Immaqa aamma
misiliffigineqarsinnaanerat tamanna Naalakkersuisuni nalilersussavarput.
Tassa
maannangaaq kommunini iluarsaaqqinneq utaqqiinnarnagu kommunit ullumikkut
ilaatigut aallartereeratsigit aamma isumaqatigiissuteqarfigeertarlugit allaat
namminneq nakkutilliisutut inissisimalersarput massakkut isumaqatigiissutit
aqqutigalugit. Aammalu sanaartorneq tamaat nakkutigalugu ingerlattalereerlugu.
Tassa tamakku
massakkut naapitassaalereerput. Tassa kingulleq kommuni
isumaqatigiissuteqarfigisara tassaavoq Aasiaat kommuniat, Aasiaat kommuniani
soorlu illuliassat pingasut nammineq nakkutigalugit aamma
ingerlattussanngorpaat. Tassa kommunit sapinngikkaangamik aammalu
periarfissaqartillutik sanaartukkanik ingerlatsinermut nakkutilliisutut allaat
inissisimasarnissaat ajornarunnaareerpoq.
Tamanna pisariillisaataasorujussuuvoq
tapiissutitigut taamaalilluni kommunini aamma isumaqatigiissutit naapertorlugit
tassa tunniuttarlutigit.
Soorlu tamakku
periarfissat atuutilereersut saniatigut aamma eqqaamassavarput massakkut
illuliortiternermi tapiissuteqartarneq pillugu inatsisissap matumani
suliarineqarnerani aamma ilaatinneqarmat taamatut kommuninut
isumaqatigiissuteqartarsinnaanissamik periarfissiineq. Tassa 6040-mik
aaqqissuussineq aqqutigalugu imaluunniit qimakkiartuaarlugu taanna oqaaseq
ilaatigut ippigineqartaraluartoq. Qanoq iliuutsit ingerlanneqartarneranni 60
%-ti angullugu Namminersornerullutik Oqartussat kommuninut
tapiissuteqartarneranni aamma isumaqatigiissuteqartalersinnaagatta
sanaartugassanut tunngatillugu inissialiortiternermi isumagisassat kommunit
tamaasa isumagissagaat. Taamaalilluta pisariillisaaneq annertooq aamma
angusinnaalissavarput.
Taakkua
taasaqarfigalugit siunnersuuteqartumut qujarusuppunga, qujassuunga taamatut qulequtaq
annikitsunnguusaagaluaq ilaatigut naalakkersuinikkut Inatsisartuni
Naalakkersuisunilu siunnerfiit ersarissut aamma isumaqarpunga
oqallisigineqartut matumani taamaalillugit tunngavissinneqarmata
toqqissisimalluta anguniagassat ersarissut sulissutiginissaannut
suliaqarsinnaaleratta. Qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taamaalilluta
oqaluuserisassaq ullormut 112 naammassivarput.