Oqaluuserisassani immikkoortoq 115 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aqqaneq tallimaat,
sisamanngorneq 27. marts 2003 nal. 16:12.
Anthon
Frederiksen, siunnersuuteqartoq,
Kattusseqatigiit.
Tassa angajoqqaat
erninermut atatillugu sulinngiffeqartarnerisa suli pitsaanerusumik
periarfissinneqarnissaa pillugu apeqquteqaat allaavigalugu oqallinnissamik
imaattumik siunnersuuteqarpunga:
Taamatut siunnersuuteqarninnut tunngavigisakka arlaqarput,
ilaatigut periarfissamik
atuisinnaatitaanngitsut, tassa ilaqutariit aalisartukkormiut piniartukkormiullu aamma
periarfissaqalernissaat anguniarlugu inatsisartut oqaluuserisariaqaraat matumuuna
siunnersuutinnut ilaapput.
Naluneqanngitsutut meeqqerivinni suli ilinniarsimasunik amingaateqarpugut aammalu
tamanit
ilisimaneqarpoq meeqqap merlertuunerminiit ilittorilernermini
anaanamik/angajoqqaanik pisariaqartitsinera qanoq annertutigisoq, taamaattumik erninermut
atatillugu
sulinngiffeqartarnermut atasumik meeqqap angajoqqaavisa arlaata piffissami
aalajangersimasumi akissarsiaqaatigalugu paasisalernissaa siunnersuutigaara.
Eqqarsaatigineqarsinnaavoq ullumikkut meeqqerivinni inissaaleqineq ilinniarsimasunillu
sulisussaaleqineq pioreerput, taassumallu saniatigut suliffissaaleqineq aamma
takornartaanngilaq,
soorunami aaqqissuussinerup aamma atornerlunneqannginnissaa
anguniarlugu kommune-t suleqatigilluarlugit aaqqissuusinerit ingerlanneqarsinnaaput,
aamma tamatumani suliffeqarfiit paaseqatigalugit aaqqissuussineq ingerlanneqarsinnaalluni.
Taamaaliornikut meeqqerivinni
ingerlatsinermut aningaasartuutit ungasinnerusoq isigalugi
annikillisinneqarsinnaanerat takorloorneqarsinnaammat.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Akissuteqartuussaarlu
Ilaqutariinnermut Naalakkersuisoq, takanna.
Ruth
Heilmann, Ilaqutariinnut
Peqqissutsimullu Naalakkersuisoq, Siumut.
Erninermut
atatillugu sulinngiffeqartarnermut tunngasuni allannguinerit kingulliit pipput
2001-imi januaarip aallaqqaataanit atuutilersumik. Sulinngiffeqartarneq il.il.
pillugit aaqqissuussineq atuuttoq malillugu anaanaasoq naatsorsuutigineqartutut
erniffissani sapaatit akunnerinik marlunnik sioqqullugu aammalu ernereernermi
kingorna sapaatit akunnerini 15-ini sulinngiffeqarsinnaatitaavoq ataatsikkullu
marlunnik arlalinnilluunniit erninermi anaanaasoq sapaatit akunnerini 19-ini
sulinngiffeqarsinnaatitaalluni. Meeqqap inuuneranit sapaatit akunnerisa 15-it
aamma 19-it siulliit iluanni ataataasoq sapaatit akunnerini pingasuni
sulinngiffeqarsinnaatitaavoq. Tamatuma saniatigut anaanaasup
sulinngiffeqarnerata qaangiunnerani meeqqamik ataatsimik erninermi sapaatit
akunneri arfinillit ataatsikkullu marlunnik arlaqarnerusunilluunniit erninermi
sapaatit akunneri qulit angajoqqaat akunnerminni agguartaarlugit
sulinngiffeqarsinnaatitaapput.
Sulinngiffeqartarneq
il.il. pillugit inatsisit atuuttut malillugit aamma immikkut malittarisassaqarpoq
ullormusiaqarluni immikkut ittumik sulinngiffeqarsinnaanermut meeraq/meeqqat
napparsimmavimmut unitsinneqartillugit imaluunniit napparsimalluni
ernisoqartillugu, inortumik ernisoqartillugu imaluunniit meeraq
inunngornermini oqippallaarpat. Sulinngiffeqarneq sivisunerpaamik sapaatit
akunnerinik 13-inik sivitsorneqarsinnaavoq.
Sulinngiffeqartarneq
il.il. pillugit Inatsisartut peqqussutaata kingullermik oqaluuseralugu
allanngortinneqarnerani anaanaasup ataataasullu sulinngiffeqartarnerat sapaatit
akunneranik ataatsimik ilaneqarpoq erninermi sulinngiffeqartarnerup
sivitsorneratigut ilaqutariit meerartallit meeqqap inoorlaap meeqqalluunniit
inoorlaat piffissami sivisunerusumi ilaginissaannut angajoqqaat
periarfiissinneqarnerisigut sapinngisamik pitsaasumik tunngavissinnissaat siunertarineqarluni.
Tamatumunnga
peqatigitillugu erninermut il.il. atatillugu akissarsianut imaluunniit
ullormusianut aningaasartuutit agguataarneqarneri pillugit
misissuisitsisoqassasoq Inatsisartut akuersissutigaat. Ukiut 2001 aamma 2002 misissuiffiussallutik.
Misissuineq
tunngavigalugu sulinngiffeqartarnermut tunngasunut inatsisit atuuttut
allanngortinneqarnissaannut siunnersuuteqarnissaq eqqarsaatigineqassaaq.
Namminersorlutik
inuussutissarsiutillit namminersorluni inuussutissarsiummik ingerlataqartut,
soorlu assassorluni suliffeqarfiutillit, niuertarfiutillit, aalisartut,
piniartut, savaatillit, nunalerisut aamma ulluunerani angerlarsimaffimmi
meeqqanik paarsisartut akissarsiallit allat assigalugit sulinngiffeqarnissaminnut
ullormusiaqarnissaminnullu pisinnaatitaapput.
Namminersorlutik
inuussutissarsiutillit, tassunga ilanngullugit aalisartut piniartullu il.il.
ullormusiaqarnissaminnut periarfissaqarput sapaatit akunnerini 13-ini
kingullerni katillugit nalunaaquttap akunnerinut 180-inut aalajangersarlugit
sulinngiffeqarnerup nalaani isertitat appariangaat-siarnissaat
sulinngiffeqartumit uppernarsarneqasinnaanngippat. Imaappoq agguaqatigiisillugu
sapaatit akunneranut SIK-p nalunaaquttap akunnermusiarititaanut minnerpaamut
ullormusiat sapaatit akunneranut nalunaaquttap akunnerinut 14-inut
naleqquttut.
Taamatut
oqaaseqarlunga Inatsisartuni oqallinnissamut pissanganartumut qilanaarpunga.
Qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taava
massakkut partiit oqaaseqartuinut Doris Jakobsen Siumut.
Doris
Jakobsen, Siumup
oqaaseqartua.
Qujanaq.
Inatsisartunut
ilaasortap Anthon Frederiksenip Kattusseqatigiit sinnerlugit angajoqqaat
erninermut tunngatillugu sulinngiffeqartarnerisa suli pitsaanerusumik
periarfissinneqartarnissaat pillugu apeqquteqaat aallaavigalugu oqallinnissamik
siunnersuutaa Siumumiit imatut oqaaseqarfigissavarput.
Siullermik
Siumumiit oqallissaarutip qulequtaa pissanganartutut tiguarput, sammineqartulli
imarisaata tunngavia namminersorlutik inuussutissarsiuteqartunut tunnganerusoq
paasivarput.
Taamaattumik
oqallissaarisup tunngavilersuutaa tunngavigalugu Siumumiit
isummersorfigissavarput.
Tassani
pineqarmata namminersorlutik inuussutissarsiutillit soorlu piniartut
aalisartullu erninermut atatillugu sulinngiffeqartarnerisa
aaqqiivigineqarnissaat pisariaqartoq.
Tassani
tunngavilersuutigalugu meeqqerivinni sulisut ilinniarsimasut amigaataanerat.
Meeraaqqap inunngortup angajoqqaaminik pisariaqartitsisarnera meeqqerivinni
inissaaleqineq suliffissaaleqineq il.il.
Naalakkersuisup
akissuteqaammini eqqaavaa maannakkut namminersorlutik inuussutissarsiuteqartut
inatsisitigut illersugaallutik erninermut atatillugu,
ullormusiaqartinneqarlutik sulinngiffeqarnissaminnut sapaatit akunnerini13-ni
periarfissaqartut.
Taamatullu
pisariaqartitsivinneq tunngavigalugu immikkut ittumik erninermi
sulinngiffeqarneq sivitsorneqarsinnaasoq.
Tassa
imatut paasillugu sulinngiffeqartarnermut nalinginnaasumik sanilliullugu
sapaatit akunnerini marlunnik sivikinnerusumik namminersorlutik
inuussutissasiuteqartut sulinngiffeqarsinnaatitaapput.
Tassani
apeqqutaatillugu meerartaarnermi ataatsikkut marlunnik arlalinnilluunniit
meerartaarsinnaaneq.
Ukiuni
kingullerni erninermut atatillugu peqqussutini allannguisoqarsimavoq,
taasumallu malitsigisimavaa sapaatip akunneranut ataatsimik sivisunerusumik
sulinngiffeqarsinnaaneq.
Erninermi
sulinngiffeqartarnermi aningaasatigullu atugassarititaasut ilanngullugit
misissuiffigineqarnissaat 2001-2002-milu siunniunneqarsimavoq. Ukiakkullu
ataatsimiinnissami 2003-mi misissukkat saqqummiunneqarnissaat
pilersaarutaallutik.
Maannakkumut
anguneqarsimasut sulilu allat pitsanngorsartariaqartut eqqarsaatigalugit
Siumumiit siunnersuutigissavarput apeqqut taanna ilaatillugu Naalakkersuisut
saqqummiinisaannut eqqumaffigiumaaraat.
Siumumiit
taamatut oqaaseqarluta oqallissaarutip oqallisiginissaa qilanaaralugu
nalunaarutigivarput.
Qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguuppoq
Ellen Christoffernsen, Atassut.
Ellen
Christoffernsen,
Atassutip oqaaseqartua.
Qujanaq.
Inatsisartuni
ilaasortap Anthon Frederiksenip oqallinnissamik siusinnerusukkut ullumikkut
eqqartorneqareersumi, tassalu oqaluuserisassat immikkoortoq 113-imi meeqqat
annertuumik innarluutillit angajoqqaamik arlaannit ulloq tamaat
akissarsiaqaatigalugu paarineqartalernissaannik
neqeroorfigineqarsinnaalernissaat pillugu apeqquteqaataanut atatillugu
oqaaserisimasagut innersuussutigissavagut ? annertuumik tunngaviatigut
siunnersuuteqartup uani pineqartumi tunngavilersuutai tapersernarmata.
Ilumoorpormi
ullutsinni meeraaqqerivinnut, meeqqerivinnut ullukkullu meeqqanut paaqqinnittartunut kommuneniit inissamik
innersuussiniartarneq ajornakusoortartoq, utaqqisutut allatsissimasut allaat
ilaatigut ukioq ilivitsoq tikillugu ilaatigullu sinnerlugu
utaqqisariaqartarmata.
Pissutsit
taamatut ittut annertuumik kingunerisarpaat angajoqqaat sulileqqinnissaminnut atatillugu
kommunet aaqqissuussinerata avataatigut, ilaatigut akisungaatsiaqisumik
ullukkut meeqqanik paaqqinnittussarsiortariaqartarnerat (?sort? dagpleje) ?
taamaaliortariaqarnerni angajoqqaat inatsisinik
unioqqutitsisunngortinneqartarput, paaqqinnittumullu akiliutigineqartut
ilumut akileraarutigineqarnerat
qulakkeerneqavissinnaanani!
ATASSUT-mit
maluginiarparput Ilaqutariinnermut Naalakkersuisup erseqqissaatigigaa
akissuteqarnerminni angajoqqaat erninermut atatillugu sulinngiffeqartarnerup
januarip aallaqqaataani ukioq 2001-imi peqqussutip allanngortinneqarneranut
atatillugu Inatsisartut akuersissutigisimagaat akissarsianut imaluunniit
ullormusianut aningaasartuutit agguataarneqarneri pillugit ukiut 2001 aamma
2002 misissuiffigineqarnissaat.
Ilaqutariinnermut
Naalakkersuisup ilanngullugu eqqaavaa misissuineq tunngavigalugu inatsisit
atuuttut allanngortinneqarnissaannut siunnersuuteqarnissaq eqqarsaatigineqartoq
? taamaattumik apererusunnarpoq misissuinerit taakku tamarmik
naammassereersimanersut?
Ilanngullugu
ATASSUT-mit paaserusukkaluarparput nunatta nunanut avannarlernut sanilliullugu
erninermut atatillugu sulinngiffeqarsinnaasarnermut atugassarititaasut qanoq
nikingatigineri?
Ilaqutariinnermut
Naalakkersuisup akissuteqaammini oqaatigai namminersorlutik inuutissarsiutillit
ullormusiaqarnissamut periarfissaqareernerat, tassanilu aamma aalisartut,
piniartut il.il. periarfissaqarnerat erseqqissaatigai ? taamakkaluartorli
annertugisassaagunanngillat. ATASSUT-mili misissuinerit qanoq
nalilerneqarsimanissaat pissanngatigaarput qilanaaraarpullu misissuinerit
inernerisa pitsanngorsaataasinnaasunik suleqataaffiginissaannut.
Taamaalilluta
Anthon Frederiksenip oqallinnissamut siunnersuutaa naatsumik ATASSUT-mit tunngaviatigut taperserlugu
oqaaseqarfigarput.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Tullinnguulluni
oqaaseqassaaq Astrid Fleischer Rex, Demokraatit.
Astrid
Fleischer Rex,
Demokraatit oqaaseqartuat.
Qujanaq.
Anthon
Frederiksenip Kattusseqatigiinninngaanniit erninermut atatillugu
sulinngiffeqartarnissamut apeqqutissatut siunnersuutaa Demokraatininngaanniit
imatut oqaaseqarfigiumavarput.
Pitsanngoriaatissatut
anguneqarnissaa eqqarsaatigalugu misissuisoqarnissaannik apeqqut Demokraatinit
ilalernartipparput.
Assersuutigalugu
misissuiffigineqartariaqarpoq ilaqutariit qassit pineqarnersut, aammalu
pitsanngoriaataajumaartut qaqugu atuutsinneqalersinnaajumaarnersut.
Erninermut
atatillugu sulinngiffeqarneq kikkkut tamarmik pisinnaatitaaffigisariaqarpaat.
Angajoqqaat qanoq ittunilluunniit inuutissarsiuteqaraluarpata, meeraq inoorlaaq
angajoqqaaminit najorneqarsinnaasariaqarpoq.
Antuup
siunnersuutaa Demokraatiniit isumaqatiginartikkatsigu Naalakkersuisut
kajumissaassavagut suliassaq ingerlateqqullugu, aningaasartuutissallu siunnersuummit
nassatarineqartussat ersarillisaqqullugit.
Qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Anthon
Frederiksen siunnersuuteqartoq.
Anthon
Frederiksen,
siunnersuuteqartoq, Kattusseqatigiit.
Siullermik Naalakkersuisup
akissuteqaataanut qujanaq, aammalu partiit oqaaseqaataannut aamma
qujarusuppunga. Tassa takusinnaagakku siunnersuut tamanit ilalerneqartoq,
Aammalu Naalakkersuisut akissuteqaatiminni oqaatigimmassuk misissuititsinerit
aamma suliniutiginiarneqarnissaat aallartinneqareertut, taamaattumik
isumalluarlunga. Aammalu erseqqissaavigineqarmat una assorujussuaq
nuannaarutigivara tassa aalisarnermut piniarnermullu inuutissarsiuteqartut,
savaatillit allallu aamma periarfissamik tassannga atuisinnaanerat aamma
inatsisitigut tunngavissaqareertoq erseqqissaatigineqareermat.
Tassami
taamaareeraluartoq ilaatigut kommuneqarfiit ilaanni atuumasoqartarsimammat,
allaat aalisartut periarfissamik tamatuminnga ilaatigut
atuitinngittoorneqartarlutik.
Taamaammat assorujussuaq
nuannaarutigivara taanna aamma erseqqissarneqarluni inatsisitigut
tunngavissaqartoq oqaatigineqarmat.
Tamassinnut
qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Ilaqutariinnermut
Naalakkersuisoq.
Ruth Heilmann, Ilaqutariinnut Peqqissutsimullu
Naalakkersuisoq, Siumut.
Qujanaq.
Tassa
apeqquteqaat aallaavigalugu siunnersuuteqartup oqallinnissamut
siunnersuuteqartup akissutit naammaagisimaarmagit aamma uanga qujassutigaara.
Aammalu partiit Kattusseqatigiillu siunnersuuteqartoq aammalu soqutiginnilluni
taamatut siunnersuuteqarsimamat pingaartumik aamma angajoqqaat erinerminnut
tunngatillu sulinngiffeqartarnissaannik pitsanngorsaatissanik taamatut
eqqarsaateqarsuuteqarluni.
Ilumoorpoq
2001-mi aamma 2002-p ingerlanerani erninermut atatillugu sulinngiffeqartarnerup
pingaartumik aamma pisortaqarfinni aammalu suliffeqarfinni qanoq isigineqarnera
ilaatigut misissuiffigalugu ingerlanneqarsimavoq. Taannalu
nassuiaatigiumaarparput Inatsisartunut ukiamut Inatsisartut ataatsimiinnerat
ilutigalugu.
Uani Siumup
oqaaseqarnermini ullormusiaqarlutik tassa sulinngiffeqarsinnaanermut sap.ak.
13-nit periarfissaqarnerannut oqaaseqarnera taanna naqqilaassavara tassa
sulinngiffeqarsinnaaneq tamanut tunngavoq. Taannalu sap.ak. 15-ullutik. Aamma
uani 13-nut, sap.ak. 13-nit kingulliit suliffigineqartut taakkua
ullormusiaqarnissamut ullormusiaqarnissamut naatsorsuiffittut isigineqartarput.
Naatsorsuiffissamut aallaavissat taanna erseqqissaatigilaarpara.
Massakkut taamatut
oqallitsitsisoq imaluunniit siunnersuuteqartoq oqallisissamik
naammagisimaarpallaaqimmagu akissuterput immaqa allanut pulavallaarnanga
tassunga killittariaqarpunga soorunami arlaatigut apeqqutissaqartoqarpat
akisinnaassavara.
Aqqaluk
Lynge, ataatsimiinnermi
aqutsisoq, sinniisussat pingajuat, Atassut.
Allamik
apeqqutissaqartoqanngilaq. Taamaalilluta immikkoortoq naammassivarput.