Oqaluuserisassani immikkoortoq 114 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aqqaneq tallimaat, sisamanngorneq 27. marts 2003 nal. 13:54.
Athon Frederiksen, siunnersuuteqartoq, Kattusseqatigiit.
Apeqquteqaat aallaavigalugu inatsisartut oqallinnissaat pisariaqartoq isumaqarpunga, tassa Nunatta inuutissarsiornikkut, angallannikkut, takornariaqarnikkut aningaasarsiornikkullu imminut akilersinnaasumik ingerlatsinissaq assorujussuaq pisariaqartimmagu.
Nalunngilara mittarfiliortiterniaannarluni, imaluunniit mittarfinnik pioreersunik tallileriniaannarluni sanaartorneq Nunatta akissaqartinngikkaa, kisianni oqartariaqarpungut ukiuni makkunani Nunatta akissaqartinngilaa mittarfiit, angallannikkut imminut akilersinnaasumik ingerlasut uninngatiinnassallugit, tassalu Nuup aamma Ilulissat mittarfiisa 1199 meter-inut tallineqarnissaat.
Aamma nalunngilara aningaasat Nunatsinni inunnik isumaginninnermut, atuarfiit iluarsaanneqarnissaannut, allarpassuarnullu atorfissaqartinneqartut, taamaattumik oqartoqarsinnaavoq timmisartunut suluusalinnut mittarfiit ilaasa tallineqarnissaannut akissaqanngitsugut, aap taama oqartoqarsinnaavoq, kisianni isumatuumik eqqarsarluarnissaq matumani pisariaqarpoq, tassa pisariaqarluinnarmat Nunatsinni aningaasat inunnik isumaginninnermut, atuarfiit iluarsaanneqarnissaannut, allarpassuarnullu atungassaangaluartut amingaatigineqartullu inuutissarsiornikkut, angallannikkut, takornariaqarnikkullu siuarsaanikkut ilaatigut Nunatta avataaniit isaatinneqarnerulernissaannut annertunerusunik naalakkersuinikkut periarfissarsiornissaq.
Isumaqarpunga mittarfiit imminut akilersinnaasumik ingerlasut Nunatsinni inuutissarsiutitigut, takornariaqarnikkut aningaasarsiornikkullu ineriartortitsinermi iluaqutaasussat tallineqarnissaat avaqqukkuminaassasoq.
Isak Davidsen, ataatsimiinnermi aqutsisoq, sinniisussaq siulleq, Atassut.
Taava massakkut partiit oqaaseqartuinut nuuppugut. Kalistat Lund Siumut. A? utoqqatserpunga,
taanna apeqquteqaataavoq. Attaveqaqatigiinnermut, Avatangiisinut Ineqarnermullu
Naalakkersuisoq akissuteqaqqaassaaq.
Mikael
Petersen, Attaveqaqatigiinnermut,
Avatangiisinut Ineqarnermullu Naalakkersuisoq, Siumut.
Qujanaq.
Takornariartitsinermut
aammattaaq inuussutissarsiuteqartunut allanut siunissaq ungasinnerusoq
eqqarsaatigalugu atorneqarsinnaasunik aalajangiisoqartarnissaa
pingaarutilerujussuuvoq. Tamatuma peqatigisaanik atukkat patajaatsut tutsuiginartullu
pilersinneqartarput aningaasaliissuteqarsinnaasunut eqqissiallannermik
misigititsisumik.
Qularutigineqassanngilaq
illoqarfiit ataasiakkaat timmisartuussinissamik pisariaqartitsinerat
assigiinngissuteqaqimmat. Taamaattorli ullumikkut assigiinngissutit tamakkua
eqqarsaatigineqarneq ajorput. Tamanna timmisartuussiviit amerlanerpaat
tapiissuteqarfigineqarnerannik kinguneqartarpoq.
Timmisartuusseriaaseq
pissutsinut piviusunut naleqqussartariaqarpoq. Kinami oqarpa timmisartup Dash 7-ip
50-inik ilaasoqarsinnaasup mitsinnissaa pisariaqartoq, assersuutigalugu ilaasut
taamaallaat 12-it ikisimappata. Mittarfiit ilaasa ullumikkut
sungiusimasatsinnit timmisartunut minnerusunut miffiusinnaanngorlugit
annikillilernerisigut Mittarfeqarfiit sipaarniutiminnik aallertassappata
tamanna piareersimaffigisariaqarparput.
Taamatut
allannguuteqartitsinerit aammattaaq eqqarsaatigineqartariaqarpoq tamatumani
mittarfiit allineqarnissaannut millionit pingasunik kisitsisitalinnik
aningaasartallit aningaasaliissuteqarfiginissaaat pisariaqassammat,
timmisartunik 50-inik ilaasoqarsinnaasunik timmisartuussisarneq
ingerlaannassappat. Tamanna pissuteqarpoq ukiualuit qaangiuppata Dash 7-it
atorunnaassammata timmisartullu nutaaliaasut taamatut amerlatigisunik ilaasoqarsinnaasut
nunap immikkoortuani mittarfippassuarnut 799 meteriusunut
timmisartuussisinnaanngimmata.
Tamatumunnga
assingusumik timmisartukkut ornitassanut allanut timmisartut maannakkut Dash
7-ininngarnit ilaasoqarnerusinnaasut atorneqalernissaat pisariaqartinneqarsinnaavoq.
Misissueqqissaarnerit takutippaat pissusiviusut tunngavigalugit
timmisartuusseriaaseq iluatsittumik naleqqussarneqarsinnaasoq. Tamannaliuna
pissutigalugu aammattaaq Naalakkersuisut Nuummi Ilulissanilu mittarfiit 1199
meterinut tallineqarnissaannik suliap ingerlateqqinnissaanik tapersersuisut.
Timmisartukkut ornitassani taakkunani ilaasut amerlassusissaattut tunngavissat
ima annertutigipput ornitassanut timmisartut akunnattumik sivisussusilimmik
timmisinnaasut nutaaliat iluatsittumik atorneqalersinnaasut.
Tallilerinerni
Dash 7-it pisoqalisuulersut timmisartunik nutaaliaasunik
ingerlanneqarnermikkullu aningaasartuuteqarfiunnginnerusunik
taarserneqarnissaat periarfissinneqassaaq. Taamaaliornikkut taamaallaat
akikinnerusumik timmisartuussisalernissamut naatsorsuutigeqqaagassat
pilersinneqarsinnaapput. Tallilerinissap saniatigut aammattaaq
eqqarsaatigineqartariaqarpoq Dash 7-it atorneqaannarnerisigut, Air Greenland
A/S malillugu, aserfallatsaaliinermut aningaasartuutit amerliartuinnarnerat
taamalu timmisartunut billettit akisunerulernerat
naatsorsuutigineqarsinnaammat.
Aammattaaq
Ilulissani Nuummilu mittarfinnik tallilerineq Amerikamut avannarlermut
Islandimullu Kalaallit Nunaanni timmisartunut ornitassanit annerpaanit
marluusuniit toqqaannartumik timmisartuussinerit aallartinneqarnerannik
kinguneqassaaq. Tamanna inuussutissarsiutinik takornariartitsinermillu
ineriartortitsinermik taamaallaat kinguneqassanngilaq, aammattaarli Kalaallit
Nunaata nunanut tamalaanut atasumik ilisarineqarnerulernissaanik
kinguneqassalluni.
Pingaarnerpaarli
taamaattoq tassaavoq siunissami timmisartuussisarnissap aaqqissuunneqarnissaata
politikkikkut piaarnerpaamik aalajangiivigineqarnissaa. Aalajangernissanik
kinguartitseqattaartuarnerit inuussutissarsiuteqartut ilaasa
nammassinnaasaannit ajornerupput, piffissaq sivisooq eqqarsaatigalugu
atorunnaarsitsisarnerit inuussutissarsiuteqartunut aammalu
aningaasaliissuteqarsinnaasunut attuumassuteqarsinnaasumik.
Taamaattumik
Naalakkersuisut ukiaru ataatsimiinnissaminni angallanneq pillugu nalunaarusiaq
saqqummiutissamaarpaat Ilulissani Nuummilu mittarfiit tallineqarnissaanni
kingunerisassat nassuiarneqarnissaat siunertaralugu. Tamatuma saniatigut
mittarfiit minnerusut annikillisarnissaanni sullissinikkut aningaasaqarnikkullu
kingunerisassat Naalakkersuisut nassuiaateqarfiginiarpaat. Angallanneq pillugu
nalunaarusiaq kommunit, innuttaasut angallasseqatigiiffiillu peqataatillugit
suliarineqarsinnaassaaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taava massakkut
partiit oqaaseqartuinut Kalistat Lund Siumut.
Kalistat
Lund, Siumup
oqaaseqartua.
Inatsisartunut
ilaasortap Anthon Frederiksenip oqallisissiaa Siumumiit ima oqaaseqarfigaarput.
Sammisaq
nutaarsiassaanngikkaluartoq isumaqarpugut nalilersueqatigiinnissarput
ajunngitsoq, naak qularnaatsumik siunnerfeqarnissaq suli
periarfissaqarfiginngikkaluaripput,
paasissutissat
tamakkiisumik tunngaviusussat pigineqanngimmata.
Qularnaatsumillu
ullumikkut ilisimavarput Nuup Ilulissallu annertuumik angallavigineqarmata,
tamannalu patsisigalugu mittarfiisa tallineqarsinnaanerat
nalilersorneqartariaqartoq.
Isumaqarpugut
nanap immikkoortuini angallannermik aaqqissuussiniarnerit aallaavigalugit
mittarfiit tallilerneqarsinnaaneri naalilersinneqarneriluunniit
aalajangiiffigineqartariaqartut.
Nunarujussuarmi
ikinnguttuulluta najugaqarfigisatsinni tamatta naatsorsuutigisinnaanngilarput
piffiit tamaasa mittarfiliorfiginissaat.
Nunattali
immikkoortuini aalajangersimasuni timmisartunit annerumaanit miffigineqarsinnaasunik
siunniussisoqarnissaa pisariaqassaaq.
Eqqarsaatigineqartariaqarpoq
nunap immikkoortuini aalajangersimasumi mittarfiit tallinerisigut, talliffiusup
nunap immikkoortuani qitiuffittut inissimalerneratigut. Nunatsinni timmisartut
pisariaqartinneqartussat siunertamut naleqquttut toqqaruminarnerulissasut.
Naalakkersuisut
isumaqatigigaagut siunissami timmisartuussisarnissap aaqqissuunneqarnissaa
Naalakkersuinikkut piaartumik aalajangiivigineqarnissaa pisariaqartoq.
Taamaattumik
Naalakkersuisut ukiamut angallanneq pillugu nalunaarusiaat saqqummiunneqarpat
Nuup Ilulissallu mittarfiisa tallilerneqarsinnaaneri Siumumiit
uterfigiumaarpavut.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taava massakkut
akissuteqassaaq Palle Christiansen Demokraatit.
Palle
Christiansen, Demokraatit
oqaaseqartuat.
Nuummi
Ilulissanilu mittarfiit tallineqarneqarnerisa ? isigalugu Kalaallit Nunaanni
aningaasatigut iluaqutaanissaanik Kattusseqatigiit Anthon Frederiksenip isumaa
Demokraatinit tapersersorparput.
Demokraatit
isumaqarput siunnersuut sanaartornermut aningaasartuutitassaasa ilaa mittarfiit
taakkua akilersinnaanerusumik ..iffigilertarneqarnerisigut
utertinneqaqqissinnaajumaartoq.
Tamatuma
saniatigut Demokraatit isumaqarput mittarfinnut akilersinnaanngitsumik
ingerlasunut timmisarnerat ikilisinneqarpata aningasarpassuit
sipaarneqarsinnaassagaluartut.
Demokraatit
isumaqarput Kalaallit Nunaanni timmisartuussisarnermi tunngavissaatitaasussaq
taasariaqartoq ?Pisariaqartitsivinneq?. Ornitassat ilaat
timmiffigineqartariaqanngillat, timmiffiginissaat pissutigalugu.
Mittarfiit
tallineqarnissaat timmisarneq akulikilli..sa allanngortinneqarnissaat
timmisartunik nutaanik pisinissaq il.il. ataatsimoornissami
eqqarsaatigineqartariaqarput.
Taamaattumik
ukiamut ataatsimiinnissamut Naalakkersuisoq angallanneq pillugu nassuermat
saqqummiussimmat tamanna Demokraatinit qilanaarissavarput.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Siunnersuuteqartoq
Anthon Frederiksen.
Athon
Frederiksen, siunnersuuteqartoq,
Kattusseqatigiit.
Tassa soorunami
Naalakkersuisut akissuteqaataannut qujavunga, aammalu Siumup Demokraatillu
aamma oqaaseqaataannut aamma qujallunga.
Uggoraara soorunami
Inuit Ataqatigiit aammmalu Atassutip maanga siunnersuummut isumminnginnerat,
kisianni tassa taamaakkaluartoq aamma Naalakkersuisup akissuteqarnermini
oqaatigereerpaat angallanneq pillugu Inatsisartut ukiamut
saqqummiivigineqartussaasut nalunaarusiamik, aammalu tassani
qularnanngilluinnarpoq oqallinneq annertooq ingerlanneqarumaartoq.
Kisianni
qujanarujussuaq Naalakkersuisupakissuteqaataannut, aamma Siumup aamma
Demokraatillu oqaaseqaataannut qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Jakob Sivertsen
Atassut.
Jakob
Sivertsen, Atassutip
oqaaseqartua.
Oqaluuserisassamik
saqqummiussaqartup isumminnginnitsinni oqarnera ilumuunngikkaluarpoq. Tassaana
oqaasissagut teknik-ikkut ajutoorsimagamik.
Kisianni
soorunami siunnersuut una saqqummiunneqartoq Atassummit soqutigalugu
misissoqqissaarsimavarput, aammalu Naalakkersuisup oqarnerattut ukiamut
silaannakkut angallanneq tamakkiisumik nalilersorneqalerpat, taava taanna
ilanngullugu aamma nalilersueqataassasugut.
Aamma
eqqaamaneqassaaq siornaak ukiakkut angallannermut tunngasunik nassuiaateqarmat
suliat taakku ingerlareersut, aamma oqaluuserisassami saqqummiunneqartup
saqqummiussaa ilanngullugu siornaa sammineqarput.
Taamaattumik
ukiamut tamakkiisumik saqqummiussaqarpat isummersornissarput aamma Atassummit
qularutigineqassanngilaq.
Qujanaq.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Attaveqaqatigiinnermut,
Avatangiisinut Ineqarnermullu Naalakkersuisoq.
Mikael
Petersen, Attaveqaqatigiinnermut,
Avatangiisinut Ineqarnermullu Naalakkersuisoq, Siumut.
Tassa uaguttaaq
Naalakkersuisut sinnerlugit oqaaseqartunut qujavunga.
Una
erseqqissaatigissavara ilaatigut Siumup oqaaseqartuata oqaaseqarnermini taasaqarfigimmagu
mittarfiit naalilerneqarsinnaanerat. Tassa tamanna uagut akissuteqaatitsinni
pineqanngitsoq erseqqissaatigissavara. Mittarfiit pioreersut taakkua
naalilerlugit sulisoqarnavianngilaq, kisianni ingerlatsinikkut
annikillisaanerit tunngavigalugit ammalu timmisartut mikinerusut
mittarnissaannut, sulisussatigut, isumagissassatigut nakkutigisassatigullu
piumasaqaatit annikillisinneqarnissaat tamanna ilanngullugu
misissorneqarniarmat. Taanna erseqqissaatigaara.
Tassa mittarfiit
pioreersut naalisarneqassanngillat taamaallaalli pisussaaffitsigut
akisusaaffitsigut piumasaqaatit assigiinngitsut taakkua timmisartunik
mikinerusunik ingerlatsisoqalissappat taava naleqqussaasoqassaaq.
Aamma
pinngitsoorusunngilanga Demokraatinut qujarusullunga, tassa Demokraatit
tungaaninngaanniit oqaatsit atorneqartut ersarilluinnaqqissaartut,
isumaqarpunga qujassutigisariaqarigut. Tassami ullumikkut nunatsinni
timmisartumik angallanneq eqqarsaatigalugu agguaqatigiissitsigaanni
ilaasinnaasut, aammalu ilaasartut Kalaallit Nunaat ataatsimut isigalugu
sipporujorujorujussuarlugit timmisartutigut Dash-7 atornerisigut
angallatsisoqarpoq.
Taamaattumik
tupinnanngilaq annertoorujussuarmik ingerlatsisut aningaasartuuteqartarmata.
Naalakkersuisunit
isumaqarpugut naleqqussaalluarnikkut aammalu kiffartuutassanut
naleqquusaalluarnikkut akikillisaanerit annertuumik pilersinnaajumaartut.
Aamma
neriuutigilluinnarparput soorunami aningaasanut inatsisissap
suliarineqarneranut atammata ilaatigut Nuummi Ilulissanilu mittarfiit
tallineqarnissaat pillugu misissueqqaarnissat, nalilersueqqissaarnissat aamma
Naalakkersuisunit aningaasaliiffiginiarsarigatsigit, tamakkut Inatsisartunit
akuersinneqariarpata. Taava suli ersarinnerulissaaq Ilulissani Nuummilu
mittarfiit tallineqarsinnaanerat, taamaalillutillu suli amerlanerusunik aamma
ilaasoqarsinnaasunik timmisartunik atuilernissarput
aqqutissiunneqarsinnaaqqullugu.
Aamma
erseqqissaatigeqqissavara akissuteqaatitsinni maluginiaqqussagakku, tassa
ilaatigut Ilulissaninngaanniit aammalu Nuumminngaanniit nunanut allanut
toqqaannartumik attaveqarsinnaanerit tassani periarfissineqartussaassammata
timmisartut akunnattumik sivisussusilimmik immaqa taama oqarluni,
timmisinnaasut taakkua atulerpata.
Akunnattumik
timmisinnaasumik oqarnitsinni, tassa isumagaarput nunatta iluinnaata pinnani,
kisianni aamma ungasinnerusumut timmisinnaasut, timmisartut taakkua
eqqarsaatigigatsigit.
Oqaaserineqartunut
qujavunga, aamma takusinnaasakka naapertorlugit Atassumminngaanniit
oqaaseqartup erseqqissaatigimmagu suliat suliassatut Naalakkersuisuninngaanniit
saqqummiussavut ilalersorneqartut, aammalu ukiamut nassuiaat tamakkiinerusoq
saqqummiunneqariarpat aamma isummersoqataanissamik oqariartuuteqartut.
Isak
Davidsen,
ataatsimiinnermi aqutsisoq, sinniisussaq siulleq, Atassut.
Taamaalilluta
oqaluuserisaq naammassivarput.