Oqaluuserisassani immikkoortoq 117 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aqqaneq tallimaat,
sisamanngorneq 27. marts 2003 nal. 15:00.
Athon
Frederiksen, siunnersuuteqartoq,
Kattusseqatigiit.
Taamatut siunnersuuteqarninnut ilaatigut tunngavigaakka
sinerissap ilaani palasissaaleqineq aammaluajoqissaaleqineq
annertuumik
ajornartorsiutaammata. Nalunngilarpummi ilaatigut palasissaaleqineq
ilaatigut ima ajornartorsiutaalersimatigisoq, allaat
palasit soraarninngoreeraluartut sulitinneqaqqittariaqartartut.
Soorunami sulerusuttut sulisinnaasullu sulisinnaanerat isornartorsiornianngilara,
kisianni ajornartorsiut ima annertutigilersillugu,
allaat nunaqarfiit illoqarfiillumi ilaanni
palasissaaleqineq ajoqissaaleqinerlu pissutigalugit sapaatit ilaanni ilagiit
naalagianngitsoortariaqartalersimappata, tassa naalakkersuinikkut
aaqqiissuteqarnissaq avaqqunneqarsinnaanngilaq.
Oqaatigineqartarpoq uagut kalaallit siulitsinnut
naleqqiulluta ilaatigut anersaakkut
sanngiinnerulersimasugut, qularnanngilaq tamanna immaqa ilumoortortaqarsinnaavoq,
taamaalinitsinnilu avatitsinniik allanik immaqa sunneruminarninngorsinnaalluta.
Tamannalumi aamma nunaqarfiit ilaanni uppernarsineqarpoq,
ilagiinni sulisussaaleqiffiusut ilaanni.
Maanna ilaatigut anersaapilussiornerit allaat allaffeqarfissuup matuma ilaani
eqqartorneqartalerput,
soorunami inuit upperisarsiornerup tungaatigut aamma
kiffaanngissuseqarnerat nalunngilara, kisianni ilagiinni
upperisamik ajunngitsumik qangaaniilli
ingerlatsinerup nakussassaqqinnissaa isumaqarpunga uatsinnut
aamma pisariaqarlunilu pingaaruteqarluinnartoq.
Tassa soorunami
siunnersuutip una ukiorli allanneqarsimanerani aamma ilaatigut
anersaapilussiornerit uani ilanngunneqarsimapput.
Neriuppunga
oqallilluassasusi.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Kultureqarnermut, Ilinniartitaanermut, Ilisimatusarnermut Ilageeqarnermullu
Naalakkersuisoq, takanna.
Arkalo
Abelsen, Akissuteqassaaq
Kultureqarnermut, Ilinniartitaanermut, Ilisimatusarnermut Ilageeqarnermullu
Naalakkersuisoq, Atassut.
Qujanaq.
Inatsisartunut
ilaasortap Anthon Frederiksenip nunatsinni ilageeqarnermut pissutsinut
tunngasunik, ilaatigut oqaluffimmi sulisussanik ilinniarsimasunik
amigaateqartoqarnera inuiaqatigiillu iluanni anersaakkut piitsunngoriartorneq
annertusiartuinnartoq pillugu uparuartuuteqarsimavoq. Anthon Frederiksenip
oqallissaarummini pissutsit assigiinngitsut naammaginanngilluinnartutut
taakkartorpai. Naalakkersuisut naammaginanngilluinnartumik oqarluni
nalilersuineq isumaqatiginngilaat.
Taamaammat
Naalakkersuisut oqallinneq pissusiviusut tunngavigalugit ingerlanneqaqqullugu
pissutsit piviusut nassuiaateqarfigissavaat.
Palaseqarniarneq:
Ilagiinni
kalaallini atorfiit 32‑iupput, kiisalu biskoppitut atorfik ataaseq.
Atorfinnit 32‑usunit taakkunannga atorfik ataaseq domprovstitut,
atorfiit marluk provstitut atorfiillu pingasut ilagiinnut danskisut oqaluttunut
provsteqarfinni pingasuusuni najugaqartunut palasitut atorfiupput, taakkunanngalu
palasitut atorfiit 26‑t ilagiinni kalaallini kalaallisut oqaluttunut
provsteqarfinni tamani najugalinnut agguataagaallutik.
Ullumikkut
palasitut atorfiit tallimat inuttaqanngillat tamannalu soorunami
palaseqarfinnut palaseqanngitsunut akornutaavoq. Palaseqarfiit pingasut
palaseqanngillat kisianni palaseqarfinni marlunni palasitut atorfiit
soraarninngorsimasunik taartaagallartunik inuttaqartinneqarput.
Ilisimatusarfimmi
upperisalerinermi bachelorinik ilinniartitsiviusumi ilinniartut
ilinniarnerminnik ingerlatsisut tallimaapput. Ataatsip ilinniarnini ukioq manna
naammassilerpaa. Ilinniagaqartut marluk ilinniarnertik 2004‑mi
naammassissavaat. Ilinniagaqartup ataatsip cand. theol.-itut ilinniarnini
ukioq manna Danmarkimi naammassissavaa. Ilinniagaqartunit taakkunannga pingasut
kingusinnerpaamik 2004‑ip naanerani atorfissarsiornissaat ilimanartutut
isigineqarpoq.
Naalakkersuisut
teologi-mi allagartartaarniarluni ilinniartitsineq Ilisimatusarfimmi pisussaq
suliniutigalugu aallartisarsimavaat taannalu septemberimi 2003-mi
aallartissaaq. Tamanna 2003-mut aningaasanut inatsimmut aamma
ikkunneqarsimavoq. Ilinniagaqartussat arfineq pingasut aqqaneq marlullu
akornanniissasut naatsorsuutigineqarpoq, ilinniartitsinerlu immikkoortunut
agguataagaasoq palasinngorniartut seminariamiinnertaa ilanngullugu ukiunik
marlunnik sivisussusilerneqarsimavoq.
Tamatuma
saniatigut periarfissaavoq pilersaarutaagallartumik teolog-inik palasinillu
nunatta avataani ilinniarsimasunik atorfininnissamut kajumissaarisoqarnissaa.
Taakku atorfinitsinneqarneri atorfimminnillu ingerlatsineri
pilersaarutaagallartutut ima aaqqinneqarsinnaapput, palasitut ilinniarsimasut
kalaallisut oqaasillit teologimik ilinniarnermik kingorna atorfininnissaannut
akornusersuinngitsumik atorfinitsittarlugit.
Ajoqeqarniarneq:
Ajoqit
eqqarsaatigalugit qassiusariaqarnerat pillugu najoqqutassianik erseqqivissunik
peqanngilaq.
2003‑ip
aallartinnerani sinerissami ilagiinni ajoqitut sulisut 80‑iupput.
Taakkunannga 45‑t ajoqinngorniarluni tunngaviusunik ilinniartitaaneq
naammassisimavaat, 35‑llu atuaasutut sulisinneqarlutik. Nunaqarfiit
sisamat tallimallu akornanniittut ajoqeqanngillat atuaasoqaratillu. Najukkani
atuaasoqarfiunngitsuni, ajoqeqanngitsuni palaseqanngitsuniluunniit sapaammi
naalagiarnerit ilagiit sinniisaannut ilaasortamit imaluunniit ilagiit
sinniisaannit taamatut sulinissamut toqqagaasumit ingerlanneqartarput.
Ajoqinngornianik
ilinniartitsineq pikkorissartitsinikkut ingerlasarpoq. Septemberimi 2001-imi
ajoqitut kursus-ertut 21-iullutik aallartipput. Ajoqit kursusimik tamatuminnga
oktober 2003-mi naammassisussatut naatsorsuutigineqartut maanna martsip
15-iani 2003-mi katillutik 15-inngorsimapput. 2003-mi ukiakkut pikkorissartussat
nutaat 15‑20‑nik amerlassusillit pikkorissarlutik aallartinnissaat
naatsorsuutigineqarpoq taakkulu 2005‑imi naammassissangatinneqarput.
Tassani nunaqarfinni ilagiit tamarmik ajoqitut ilinniarsimasunik
sulisoqalernissaat pingaarnertut anguniagaavoq soorunami aamma illoqarfinni
taamatut pisariaqartitsiviusut eqqarsaatigineqarput.
Pattattartut
? organistit:
Aningaasartuutissat
pisariaqartitat nassaarineqarsinnaassappata, aggustusimi 2003-mi pattattunngorniat
arfineq marluk arfineq pingasullu akornanniittut aallartittussaapput.
Ilinniartitaanissamut pilersaarut nutarteqqammisoq naapertorlugu taakku
januarip 31-iani 2004-mi naammassisussatut naatsorsuutigineqarput.
Ilagiit:
Maannakkut
pissusiusut eqqarsaatigalugit, piffinni ataasiakkaani naalagiarneq aqqutigalugu
ilagiilluunniit ilimagisaat naapertorlugit pisussaagaluit pilersaarutaasut
naapertorlugit pinngitsooratarsinnaasarput. Tamakku ilaannikkut
pissuteqartarput naalagiarnissamut atatillugu kissaateqartarnerit, soorlu katikkumanerit,
ajoqimut palasimulluunniit kingusippallaartumik nalunaarutigineqartarmata.
Naalakkersuisut
ilisimasaat naapertorlugit, nunatsinni inoqarfinni 30‑t sinnerlugit
inoqarfiusuni, taamaallaat pingasuni akulikitsumik naalagiartoqartanngilaq.
Taakku iluanni marluk innuttaasa namminneq takutissimanngilaat sapaatit tamaasa
naalagiartoqartassasoq soqutigalugu.
Ulluinnarni
upperisarsiornikkut inuuneq, inuiaqatigiinnit kalaallinit oqaluuserineqarlunilu
ingerlanneqartoq eqqarsaatigalugu, innuttaasut inuiaqatigiillu akornanni
anersaakkut piitsuunerulersimaneqarnera Naalakkersuisut naliliinerat
naapertorlugu eqqortuusorineqanngilaq. Nunatsinniliuna allanngortoqarsimasoq,
siusinnerusumut sanilliutissagaanni nalitsinni inuit uppertut ujaasisullu annertunerujussuarmik
upperisassaminnik namminneq inuttut toqqaaniartalersimapput.
Tassa Nunatsinni
1953-imi tunngaviusumik inatsisip eqqunneqarneranut atatillugu qanorluunniit
upperisaqarnissamut kiffaanngissuseqartoqassasoq eqqunneqassasoq
nalunaarutigineqarmalli, nalerput tikillugu malunnartumik allanngortoqarsimavoq.
Kalaallit
Nunaani ajoqersuiniarnerit ilaasortassassiornerillu inunnut ataasiakkaanut
innimiilliorninnguunnginnissaat, inuiaqatigiinniluunniit
salloqittaasunngunnginnissaat qanoq ilillugu qulakkeersinnaaneripput
Naalakkersuisuni isumaliutersuutigisinnaavarput. Kisiannili taama
sakkortutigisumik alloriarneq inuiaqatigiit sukumiisumik oqallisereernerisigut
aatsaat pisinnaavoq.
Matumani
upperisarsiornikkut assigiinngisitsiniarneq pineqanngilaq pineqartorli
tassaalluni inoqatinik ataqqinninneq tunngavigalugu annertunerujussuarmik
paasinnissinnaassuseqarneq.
Inuiaqatigiit
arlalinnik upperisarsiorfiusut.
Kiffaanngissuseqartumik
upperisarsiorsinnaatitaaneq innuttaasut tamarmik tunngaviusumik inatsisikkut
qulakkeerneqartumik pisinnaatitaaffigaat. Pisinnaatitaaffillu taanna maanna
nalagaaffeqatigiinnitsinni siunissamilu Kalaallit Nunaata namminersoq
atornerullugu aqunneqarnerani aalajangiusimassavarput.
Taamaalillutik
Naalakkersuisut matumuuna nunatsinni uppersisarsiornermut tunngatillugu
tunngaviusumik isumaasoq erseqqissassavaat. Ilagiit kalaallit atermikkut
sunniuteqarnermikkullu ilagiiussapput, ilagiit inuiaqatigiinnit aallaaveqartut,
taaamaattoq tamanna allanut upperisarsiornikkut aalajangiussimasartik pillugu
ataatsimoorfiliorniartunut periarfissaannik mattussisuussanngilaq.
Uagut qinikkatut
upperisarsiornermii ilagiinnilu susassaqarfinnut akuliuttussaanngilagut,
killiliussalli aningaasaqarnikkut inatsiseqarnikkullu qulakkiigaasut
pissarsiarineqarnerinut peqataasussaavugut. Inuit upperisarsiornerminnik,
anersaakkutinuunerminnik upperisaqarnerminnillu imminnut nuannaarutaasumik
peqatigiillutik ataqatigiillutillu allatullu upperisaqartunik akuerinnillutik
ingerlatsisinnaaqqullugit.
Soorlu
akissuteqaatip ersersikkaa Naalakkersuisut palasissaaleqineq allatigullu
oqaluffimmut tunngassutilinni atorfeqartussanik amigaateqarneq,
nalinginnartigullu oqaluffiup iluani iluarsartuussinissaq tunngaviusumik
iliuuseqarfiginiarlugu suliniuteqarpoq.
Suliap tamatuma
Naalakkersuisut ukiuni aggersuni ingerlatiinnarnissaa pilersaarutigaat.
Naalakkersuisut tamakkiisumik ilagiinnut tunngassutillit tamaasa oqaluffimmilu
atorfillit atugaat pillugit qulaagaanissaq immikkut pingaartillugu qanimut
malinnaaffiginiarpaat.
Suliniutit
qulaani taaneqartut innersuussutigalugit Naalakkersuisut isumaqarput
ajornartorsiutaasut aaqqinneqarnissaannut iliuusissat aallartisarneqarsimasut.
Alisinnerusoq
isigalugu aamma ilinniarneq tamanna qanoq annerusumik
kajumernarsarneqarsinnaanersoq Naalakkersuisut misissorniarpaat. Tassami
ingammik aamma eqqarsaatigalugit. Oqaatsit taakku anillugit atorlugit
Naalakkersuisuniit ataasimiittarfimmi maani oqallinnissaq soqutiginartoq
peqataaffigissallugu qilanaaraarput.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Taavalu
partiinit oqaaseqartussaq siulleq Siumuminngaanniit Doris Jakobsen, takanna.
Doris
Jakobsen, Siumup
oqaaseqartua.
Inatsisartuni
ilaasortap Anthon Frederiksenip Kattusseqatigiit sinnerlugit nunatsinni
ilageeqarnermi pissutsit aallaavigalugit apeqquteqaataa aallaavigalugu
oqallinnissamik siunnersuut Siumumiit imatut oqaaseqarfigissavarput.
Siumumi
nuannaarutigaarput Naalakkersuisuni ilaasortap akissuteqaataani
nassuiaatigineqarmat, ullumikkut palasit ajoqillu amerliartortut, taamatullu
suli ilinniartitsineq aqqutigalugu amerlisaaneq suliniutigineqartoq.
Uani
oqallissaarummi pattattut eqqaaneqanngikkaluartut nuannaarutigaarput
Naalakkersuisuni ilaasortap ilanngullugu eqqaammagu, pattattut
ilinniartitaanerat ukioq manna aamma aallarteqqissasoq aningaasat
pisariaqartitat nassaarineqassappata.
Siumumi
isumaqarpugt soorunami ilagiinni sullissineq sullissisullu atugarisaat
pitsanngorsarneqartuartariaqartut soqutinarsarneqartuartariaqartullu.
Ullumikkut
ilagiinni sullissineq nukuttuujuvoq siuariartortutullu oqaatigisariaqarluni.
Illoqarfiit ilaanni ilagiinnik nukorrotsaalluni immikkut suliniuteqartoqarpoq,
allaat qaammatit tamaasa radiokkut oqallitsitsisoqartalersimalluni.
Siornatigut
inuusuttunik ilageeqarneq pillugu oqallitsitsisarneq soqutigineqarluaraluartoq
inuusuttunut soqutiginartumik aaqqissuunneqaqqissinnaavoq, soorunami ilagiit
sinniisaat ilagiinnillu qullersaasut suleqatigilluinnarlugit.
Siumumiit
Naalakkersuisup akissuteqaatai naammagisimaarlugit, isumaqarpugut ilagiinnik
sullissinerput maannakkut siuariartorluni ingerlareersoq
nukittorsarneqartuartariaqartoq soqutiginarsarneqartuartariaqarlunilu,
tassaniimmat uagut kalaallit nukittuffigalugulu aggulunnata ataatsimoorfipput.
Siumumiit
taamatut oqaaseqarluta oqallissaarutip oqallisiginissaa ilqanaaralugu
nalunaartutigissavarput.
Qujan.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Tulliupporlu
Atassumminngaanniit oqaaseqartussaq Isak Davidsen.
Takanna.
Isak
Davidsen, Atassutip
oqaaseqartua.
Qujanaq.
Inatsisartunut
ilaasortap Anthon Frederiksenp oqallisissisiaanut Atassummiit imaattumik
oqaaseqassaagut.
Oqallinnissamik
kissaateqarnermi ilaatigut taakkartorneqarsimavoq sinerissap ilaani
palasissaaleqineq, Anthon Frederiksenilu Atassummiit ilumoornerassavarput
ilaatigut sinerissap ilaani palasissaaleqineq pissutigalugu, palasit
soraarninngorsimasut aamma atugaammata.
Oqallisissiami
eqqorluinnartumik taakkartorneqarsimapput ilagiinni sulisussaaleqineq
ajornartorsiutaasoq, tamannalu Atassummit ilumoornerassavarput. Pissutsit
ilungersunarsilluinnarsimapput aaqqiiniarnerlu assut
ajornartorsiorfiulersimavoq.
Naalakkersuisut
akissuteqaataanni palasissanik ilinniartitsinissaq eqqaaneqarsimavoq, tamannalu
Atassummit nuannaarutigaarput, eqqaanngitsuussanngilarpullu ilagiinni
suleqataasussat ajoqinngorniarlutik maannamut pikkorissartut 15-iusut, ukioq
manna naammassissasut oqaatigineqarmata. Tamanna ilageeqarnermi
pisuunnguallannermik kinguneqartussaavoq.
Atassummit
ilaatigut eqqaanngitsoorumanngilarput
palasinik amigaateqarnermi ilaatigut misissugassaqqimmat palasit illoqarfimmi
ataatsimi qassiunissaannik agguaassisarneq. Isumaqarattami palasinik
amigaateqarnermi palaseqarfiit ilaasa palasissaaleqineranni
aaqqiisoqarsinnaagaluartoq, ilaatigut marlunnik palaseqarfiusuni ataasiinnarmik
palaseqartitsigallarnikkut, palasissanik atuartitsereernermi
aaqqiisoqarsinnaammat.
Atassummit isumaqarluinnarpugut nunatsinni illoqarfinni
nunaqarfinnilu pattattoqarniarnermi ajornartorsiortoqartoq
anigoruminaatsitatsinnik. Naalakkersuisunut inassutigiumavarput pattattut
ilinniartsinneqartarneranni provsteqarfikkaartumik aaqqissuussisinnaaneq
misissorneqarsinnaanersoq. Isumaqaratta pattattunik ilinniartsitinermi nunarput
tamakkerlugu ilinniartitsinermik aaqqissussinermit provsteqarfikkaartumik
ilinniartitsineq imminut akilersinnaanerusoq.
Atassummiilli
aamma eqqaanngitsoorumanngilarput pattattutut ilinniarsimasut atugassarititaat
misissorneqartariaqartut, ilaatigummi pattattut ataasiinnaanngitsut
illoqarfimmi ataatsimi pigineqartarput.
Pissutilli
atugassarititaasullu pattattunut pitsaannginnerisigut nuutsitsisinnaaneq
ajornarluinnartutut isikkoqarpoq, ingammik inissamik
pissarsiuunneqarsinnaanerat tamatumani ajornartorsiutit ilagaat, kiisalu
nuunnermut akiliunneqarsinnaannginnerat aamma ajornartorsiutaasarluni.
Atassummit
oqaatigissavarput Anthon Frederiksenip oqallisissiamini annertuumik ilagiinni
sulisunut pitsanngorsaanissamik ujartuinera isumaqatigigatsigu, Atassummiillu
isumaqartuaratta nunatsinni ilageeqarnermi sulisunut pitsaasumik
aaqqissuussinissat ujartortariaqartut, atugassaritaasullu sukumiisumik
misissuiffigineqartariaqartut.
Atassummit
naggataagut oqaatigiumavarput Ilagiinni suleqataalersussanik ilinniartitsinerit
ingerlanneqarmata, ilinniartitsinissallu piareersarneqarlutik.
Taamaakkaluartorli palasinut tunngatillugu misissuisoqarnissaanik,
oqaatigisarput isumaqarpugut qaangiinnaruminaatsut, palaseqarfiimmi ilaanni
palasissaaleqiffiusuni eqaatsumik aaqqiipallatoqarsinnaanera Atassummiit
upperigatsigu. Palaseqarfiilli palasissaaleqiffiusut tamarmik
palasilerneqarnissaat soorunami ajornakusuussaaq.
Naggataagut
Atassummit Naalakkersuisut akissuteqaataat tusaatissatut tiguarput
misissuippallannissamullu kissaateqarluta.
Neriuutigaarput oqallisissiaq
manna uummaarissumik oqalliffiujumaartoq. Atassummit peqataassaagut
ilageeqarnerup siuarsarnissaanut aaqqiiniaqataanermut.
Utoqqaterpunga
nipangersamaleraluarama.
Per
Berthelsen, ataatsimiinnermi
aqutsisoq, sinniisussat sisamaat, Demokraatit.
Tulliuppoq
Demokraatinit oqaaseqartussaq. Marie Fleischer, takanna.
Takanna.
Marie
Fleischer, Demokraatit
oqaaseqartuat.
Qujanaq.
Aallaqqaammut
inatsisit tunngaviusut issuaavigerusuppakka, kapitali 7, inatsit tunngavoiusoq
1953-imeersoq § 67.
Issuaalaarlara?
Qujanaq.
Issuaaneq
aallartippoq.
Innuttaasut
akornusersorneqaratik ilagiittut peqatigiissitersinnaapput, pingaartitsinertik
najoqqutaralugu Guutisioqatigiinniarlutik. Kisiannili assuarnaatsumik
inuunermut eqqissisimallunilu inooqatigiinnissamut akerliusumik
ajoqersuisoqaranilu ilinniartoqassanngilaq.
Issuaaneq
naavoq.
?
issuaaffigisara naapertorlugu qanorluunniit upperisaqarsinnaatitaaneq
innuttaasunut tamanut inatsisitigut tunngaviusutigut
aalajaallisaavigineqarsimavoq.
Demokraatit
tungaaniit inuit ataasiakkaat kiffaanngissuseqarnissaat sakkortuumik
tapersersugarigatsigu, nuannaarutigaarput Naalakkersuisut akissuteqaamminni
erseqqissarsimammassuk piginnaatitaaffiup taassuma, massakkut
naalagaaffeqatigiinnitsinni siunissamilu aalajangiusimaannarneqarnissaa.
Oqallissaarisup
Anthon Frederiksenip tusarsimammagu siulitsinnut naleqqiulluta anersaakkut
piitsuunerulersimasugut, Demokraatinit tamanna isumaqatiginngilarput.
Tassami allarpassuit
peqatigalugit ilisimaarivarput anersaakkut inuuneq ukiorpassuit ingerlaneranni
inuiaqatigiillu ineriartorneranni assigiinngiiaarnerulersimasoq. Tamanna
aallaaveqarpoq inuit upperisaqaqatigiinnik assigiinngitsunik
qaammaassinerulersimanerannik.
Aammalu sorlerni
ingeerlasserusunnerminni namminneq paasisimalluarlugu toqqaasalersimanerannik.
Soorunami uggornartuuvoq sinerissami sumiiffiit ilaanni
palasissaaleqineqarlunilu ajoqissaaleqineqartarnera.
Kisiannili
Naalakkersuisut akissuteqaataanni aamma takusinnaagatsigu suliniutinik
aallartitsisoqareersimasoq, tamanna Demokraatiniit itinerusumik
iserfiginianngilarput.
Taamatut
oqaaseqarluta tamakkerluta oqallilluarnissarput neriuutigaarput.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Tulliupporlu
siunnersuuteqartoq Anthon Frederiksen, Kattusseqatigiit.
Takanna.
Anthon
Frederiksen,
siunnersuuteqartoq, Kattusseqatigiit.
Siullermik
qujaniarpunga akissuteqaatinut tamanut aamma minnerunngitsumik Naalakkersuisut
akissuteqaataannut.
Tassa ersarippoq
aamma soorunami maani inatsisartuni oqaaseqartunit tamanit upperisarsiornermut
tunngasut pingaartinneqartut.
Naalakkersuisut
siullermik akissuteqaataat annikitsunnguamik oqaaseqarfigilaassavara, tassa
Naalakkersuisut ilaatigut oqallisissiama ilaanik isumaqatiginninnginnerinut
tunnganerutillugu, tassani uanga oqaannassaanga taamatut isumaqatiginnginninneq
ilaatigut Naalakkersuisut akissuteqaatiminni, imminnut akerlilerlutik
nassuiaatini assigiinngitsuni oqaatigimmassuk taanna isumaqarpunga
nassuerutigiinnartariaqartoq ilumoornera.
Aamma
minnerunngitsumik Atassutip oqaaseqarnermini ersersitaa tassalu ilumut
palaseqarniarnerup tungaatigut aammalu ajoqeqarniarnerup tungaatigut ullumikkut
ajornartorsiuteqarpugut. Taanna assortuussutiginagu isumaqarpunga
nassuerutigiinnartariaqaripput tamatta.
Tassami
Naalakkersuisut uppernarsareerpaat illoqarfiit ilaanni kommuneqarfiit ilaanni
ilaatigut palaseqanngivissortoq. Aamma nunaqarfiit ilaanni nunaqarfiit pingasut
sisamat imaluunniit ajoqit sisamat tallimat aamma amigaatigineqartut aamma
uppernarsarneqarpoq.
Isumaqarpunga
oqallinneq manna paaseqatigiiffigalugu aamma minnerunngitsumik Naalakkersuisut
aallartissimasaat palasissanik ilinniartitsineq aammalu ajoqissanik ilinniartitsineq
ingerlasasut taakkua isumalluarnarput soorunami.
Aamma
Demokraatit oqaaseqarnerminni ersersinniarpaat ilaatigut oqallissaarutinni
oqartunga anersaakkut siulitsinnut naleqqiulluta sanngiinnerulersimasugut.
Demokraatinut malugeqquinnassavara taamatut oqariarlunga oqaatsit uku
ilaliullugit atorakkit, qularnanngilaq tamanna immaqa ilumoortortaqarsinnaavoq.
Tassa aalajangivillugu oqaatigineqanngilaq siulitsinnut naleqqiulluta
anersaakkut sanngiinnerulersimasugut.
Taamaammat aamma
oqaaseqartarnerni oqaaseqatigiit tamakkiisumik paasinissaat tassani
isumaqarpunga pingaaruteqartoq, aalajangersimavissumik oqariartunnginnermi.
Soorunami
Kattusseqatigiinni uagut pingaartilluinnarparput aamma inatsisini tunngaviusuni
inuup kialluunniit kiffaanngissuseqarluni inissisimanera.
Upperisarsiornerinnaanngitsumi kisiannili sutigut tamatigut inuit tamat
oqartussaaqataanerat tunngavigalugu, inatsisit tunngaviusut 1953-imeersut
taakkua naalagaaffeqatigiinnerup iluani inuit tamatta sukkulluunniit qanoq
isummersinnaanerput, taanna killilersorneqanngimmat aamma upperisarsiornerup
tungaatigut.
Una
oqallissaarininni ersersinniaannarpara aamma paasivara oqaluttut tamarmik
paasilluarsimagaat, minnerunngitsumik Atassutip oqaluttuata assorujussuaq
ajornartorsiutit takuneqarsinnaasut sukumiisumik eqqartormagit, taanna assut
nuannaarutigivara aammami qularnanngilaq nammineq atugaralugit
nalunannginnerpaajusarmata suut pissutsit qanoq ittuunersut.
Kisianni
taamaakkaluartoq aamma, aamma Siumup oqalunnermini naak oqallissaarutiga
annerusumik tikinngikkaluarlugu Naalakkersuisut akissuteqaataa annerusumik
taanna oqaaseqarfigimmagu soorunami paasivara aamma Siumut upperisarsiornermut
tunngasut taakku aamma pingaartikkaat. Aammalu iluarisimaarlugu suliaq
Naalakkersuisuninngaanniit suliniutigineqartut maannakkut aamma ilumoorpoq
pattattut aamma, aamma taakkua uanga oqallissaarininni tikinngikkaluakkakka
Naalakkersuisut aamma akissuteqarnerminni oqaatigimmatigit ilaatigut aamma
iluarsisariaqartoqarpoq tassani.
Kisianni tassa
soorunami ajornartorsiut sunaluunniit tamakkiisumik aaqqiiviginiassagaanni
aamma tunngaviusutut aallaaviusut paasilluarnissaat tassani pisariaqartoq
qularnanngilaq tamatta ilisimavarput. Tassalu aamma aningaasanut inatsit
eqqartorneqartillugu ilagiinnut aningaasaliuunneqartartut assigiinngitsutigut
aamma ilageeqarnermi ingerlatsinermi assorujussuaq pingaaruteqartarmata.
Tassami
nalunngisatsitut aningaasanut inatsit qiviarutsigu ilagiinnut
aningaasaliunneqartartut ukiuni arlalissuarni ajoraluartumik annertunerusumik
qaffariaateqartarsimanngillat. Taannalu isumaqarpunga aamma
ajornartorsiutaasunut qaangiiniarnermi maluginiartariaqartoq.
Nuannaarutigivara
Naalakkersuisup pissutsit piviusut nassuiaaffigimmagit, nassuiaateqarfigimmagit
nassuiaateqarfigimmagit. Aammalu suliniutit maannakkut ingerlanneqartut aammalu
ukiamut ilaatigut ajoqit ilinniarnerminni naammassisussat aamma qilanaarluta
utaqqissavagut. Neriuppungalu aamma palaseqarnermut tunngasut aamma
pitsaanerulerumaartut, tassami ullumikkut pissutsit piviusut qiviassagutsigit
aamma siutigut isigullu ammammata arajutsineq ajorpagut sumik sunilu
ajornartorsiutit ilaatigut taakkartorneqartut.
Qujavunga
akissuteqaatinut tamanut.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Taavalu
Kultureqarnermut,
Ilinniartitaanermut, Ilisimatusarnermullu aammalu Ilageeqarnermut
Naalakkersuisoq.
Takanna.
Arkalo
Abelsen, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisoq,
Atassut.
Qujanaq.
Qujanaq partiininngaanniik
aammalu siunnersuuteqartuminngaanniit Kattusseqatigiinninngaannit
oqaatigineqartunut.
Uani
akissutigisannut ilassuteqalaarniarpunga. Isumaqarpunga tamatta
isumaqatigisinnaagipput, inuk timimigut peqqissoq aammalu anersaakkut
peqqissoq, tassa ilivitsuusoq.
Soorunami
taannartaa ukiup ingerlanerani allanngoriartorsimavoq. Anersaakkut
piitsunngorsimanersugut imaluunniit pisuunngorsimanersugut taanna
eqqartorneqarsinnaavoq. Kisianni aana qularnaatsoq allanngortoqarsimavoq
taassuma tungaatigut.
Kisianni
soorunami uniinnarluta tamakku isiginnaassanngilagut. Assigiinngitsutigut
isumagissavarput meerartatta aammalu innuttaasut tamarmik anersaakkut aamma
nakussassarnissaat.
Tassami
inuk anersaakkut piitsuulluni ingerlaguni timikkuinnaq peqqilluni, taava
tusiattumik ingerlassaaq.
Taava
ataasiakkaannguit eqqaalaassavakka erseqqissaateqarfigalugit. Tassa Anthon
Frederiksenip oqarnera una naliliisimanera ajuissutut pissutsit
ajuinnerarlugit, uagut taanna Naalakkersuisunit imannak taavarput piffinni assigiinngitsuni
ilaatigut naammaginanngitsunik atugassaqartoqarmat. Taakkua atorfiit
inuttaqanngitsut eqqarsaatigalugit.
Isumaqarpunga
tassani oqaatsit assigiinngitsut atorneqartut kisiisa eqqartuinnarigut.
Kisianni
nalunngilluinnarparput ilagiinni sulisut ilaat tassani eqqarsaatigalugit
ajoqit, pattattut aammalu oqaluffimmi sianertartut imaluunniit kiffatut
taaneqarsinnaasut aammalu asaasut. Taakkua piffinni assigiinngitsuni tiiminik
ikittunnguani sapaatip akunnerani suliffissaqartarput inuussutaasinnaanngitsunik.
Taamaattumikuna
aamma oqaluffimmi ilagiinniluunniit sulinissaq immaqa inuppassuarni
soqutigisinnaagaluarlugu tunuarsimaarfigineqartartoq. Tamatumalu kinguneramik
aamma inuttaasartut taarsigaattorujussuullutik.
Kisianni
aana aamma aana eqqortoq piffinni ataasiakkaani, pissutsit
assigiinngitsorujussuupput. Imaassinnaavoq piffiit ilaanni
inuussutaasinnaasumik tiimeqarluni suliffissatut peqartoq. Kisianni
piffippassuaqarpoq ilagiinni sulineq imannak annikitsigisoq, sapaatip
akunneranut 40 tiimit suliffissatut inuttalerneqarsinnaanani. Taamaattumik
piffinni assigiinngitsuni eqaatsumik aaqqiiniarnissaq ujartortariaqarpoq.
Kommuneqarfinni
assigiinngitsuni eqqarsaatigineqalaartariaqarpoq napparsimaveqarfinni,
atuarfinni kommunemi allamiluunniit sulisut tiimissatik
ulikkaanngikkaangamikkit katitigaalaartunnguanilluunniit sulisinnaasassasut
sapaatip akunneranut uumassutaasinnaasunik inuussutaasinnaasunik
aningaasarsiaqarlutik.
Aamma
eqqaalaarusuppara ukua akissuteqaatinni taaneqareersut saniatigut ataatsimiititaliarsuaqarpoq
pisortaqarfitsinninngaanniit aammalu biskoppeqarfimminngaanniit
kirkeministerieqarfimminngaanniillu katitigaasunik. Taakkulu suliassat
ingerlappaat tassa aamma ilagiinni pissutsit qulaajarlugit
paasiniaqqissaarnissaat. Pisariaqarnerluni immikkut allatut aaqqissuussinissaq.
Taakkununnga
ilaalluinnarpoq oqaaseqartut ilaatigut tikitaat, tassa atorfiit
aalajangersimasut qassit atorfiit piffinni assigiinngitsuni ullumikkut piusut.
Taakkua naleqqunnersut ilaatigut aamma nalilersorneqassaaq. Kisianni aamma
taakkua saniatigut oqaatigissavara aprilip aallartilaarnerani provstit
pingasuusut maani Nuummi ataatsimeeqatigineqartussaapput
pisortaqarfinninngaanniik. Tassani aamma ilaatigut eqqartorneqassaaq ullumikkut
inissisimanitsinni provsteqarfiit allat erliguunnagit, aamma naligiinnerusumik
ilagiinnut sullissisussat agguataarneqarsinnaanissaat, immaqa
utaqqiisaagallartumik.
Nalunngilluinnarpara
palasitut atorfiit ataasiakkaat inuttassarsiuinikkut inuttalerneqartussaasut, kisianni
eqaatsumik aaqqiisoqarsinnaasariaqarpoq nunarput ataatsimut isigalugu.
Aatsaaginnannguaq
oqarpunga pattattartunik ilinniartitsinissaq aningaasassarsissussimallutigu.
Kisiannili aatsaat taanna pivoq ilinniartitaanermik allaninngaanniit
ikililerilluta aningaasassarsiorsimavarput, aallartinnissaa
pisariaqartikkatsigu pisortaqarfitsinninngaanniit.
Kisianni
2004 aammalu ukiut aggersut eqqarsaatigalugit ilagiinni sulineq, uanga aamma
isumaga malillugu kinguaattooqqasoq aningaasalersorneqarnermigut. Taanna
aaqqiiffigineqartariaqarpoq, taannalu tassa inatsisartuni ilaasortat
akisussaaffigivaat annertooq.
Neriuppunga
oqaasigineqartut ullumikkut aallaavigalugit partiinit assiginngitsuninngaak
Kattusseqatigiinninngaanniillu tigussaasunik saqqummertoqarpat, pissusiviusut
aallaavigalugit assiliaq taanna saqqummersinneqartussaassammat ilaa, ukua
misissuinerit eqqaasakka naammassippata.
Taava
taakkununnga tulluuttunik aningaasaliinissaq inatsisartut piumassuseqarfigalugu
akuersaarumaaraat.
Tassa
qujanaq.
Per Berthelsen, ataatsimiinnermi aqutsisoq,
sinniisussat sisamaat, Demokraatit.
Qujanaq.
Marluk
nappaanikuupput, siulliuvoq Siumuminngaanniit oqaaseqartuusoq aappassaaneerluni
Doris Jakobsen. Tulliutissaarlu Jakob Sivertsen, Atassut, oqaaseqartut
avataatigut, minutsit tallimat killigalugit oqaaseqarsinnaatitaalluni.
Doris
Jakobsen, Siumup
oqaaseqartua.
Siullermik
Siumut sinnerlugu nuannaarutigaara ilageeqarnerup iluani ajornartorsiutaannaat
eqqartorneqaratik aamma ilageeqarnerup iluani pitsanngorsaataasinnaasunik
nutaanik taakkartuisoqarmat.
Soorunami
Naalakkersuisup akissuteqaataani siuariartorneq aamma nuannaarutigisariaqarpoq.
Isumaqarpunga
partiit pitsanngorsaatissatut maannakkut ilaattut saqqummiussaat aamma
soqutiginaateqartorujussuusut, soorlu uagut aamma Siumuminngaanniit eqqaagipput
inuusuttut taakkua oqallitsinneqartarnissaat aamma pisariaqartoq ilageeqarneq
pillugu. Tassani ilageeqarnermut qullersai suleqatigilluinnarlugit.
Aamma uani
soqutiginaateqartippara Atassutikkut saqqummiussaani eqqaaneqarmat palasit
aamma taakkua illoqarfimmi ataatsimi palasit arlaqartartut, taakkua
aggulunneqarnerusinnaanerat atorluarneqarnerusinnaanerat sinerissami allami,
taavalu aamma pattattartut allallu taakkua eqqaasai. Isumaqarpunga taakkua
soqutiginaateqartut taavalu aamma misissuiffigineqartariaqartut.
Taamaatut
naggataatigut oqaaseqarluta naggataatigut oqaatigissavara, nuannaarutigalugu
Naalakkersuisut maannakkut oqaatigimmagu pattattartut ilinniartitaanissaat
aallartinneqarniartoq, naak ilinniarfiit ilaanninngaannit aningaasanik
millilerilluni imaa taamatut ilinniartitsineq aallartissasut. Kisianni tassa
nuannaarutiginarpoq assorsuaq taama pattattartut amerlisarneqarniarmata.
Qujanaq.
Per
Berthelsen, ataatsimiinnermi
aqutsisoq, sinniisussat sisamaat, Demokraatit.
Ja nappaasunilu
kingulleq tassa Jakob Sivertsen, Atassut.
Jakob
Sivertsen, Atassut.
Qujanaq,
naatsunnguamik. Tassaana nunatsinni upperisarsioqatigiit assigiinngitsut aamma
uagut upperisarput Lutherikkuussuseq ataatsimut, taakkua immikkoortinnagit
maani oqaatigineqarmata erseqqissaateqalaarniarlunga.
Tassa
inatsisinik tunngaviusuni § 4-mi aalajangersarneqarpoq inuiaqatigiit
upperisarsiorneranni Lutherikkuussuseq, tassa nunatsinni tunngavigineqassasoq.
Naalagaaffimmilu tapersersorneqarluni. Taamaalilluni Lutherikkuussuseq immikkut
isigineqarpoq upperisarsioqatigiinnut allanut sanilliullugu.
Tassa imaappoq
uagut immikut Lutherikkuussusermik upperisaqarnerput allanut
upperisarsioqatigiinnut immikkooruteqarpoq naalagaaffimmit, tassa
kunngeqarfimmit tapersersorneqarami. Tassa taanna pingaartua.
Taavalu
aamma isumaqarpunga nunatsinni ilagiit sinniisoqarnerat assut aamma
pingaaruteqartoq. Taakku sapinngisamik annertunerpaamik ilagiit sulinerannut annertuumik
ikorfartuisarput. Taamaattumik aamma taakkua sulilluarnerat aammalu ullumikkut
ajoqinik amigaateqarnermik ilaatigut aamma misilittagaqanngikkaluarlutik,
atuaasutut ingerlassisarnerat nersortariaqartoq.
Aammalu
tassunga ilanngullugu oqaatigissavara ajoqinik amigaateqarneq nunatsinni
soorunami ajornartorsiutaavoq, kisianni pattattoqarniarneq ajornartorsiutip
annertunerpaartarivaa. Ajuusaarnaqisumik. Tassa Lutherikkuussusermik
upperisaqartugut tussiaraangatta pattagiaq sapinngisamik aamma atorneqarnissaa
assut pingaartumik utoqqaanerusunit pingaartinneqarmat.
Taamaattumik
Naalakkersuisup akissuteqarnermini pattattussanik aamma ilinniartitsinermik
ilanngussisimanera assut aamma taanna Atassummit qujarullugu tigugatsigu.
Qujanaq.
Per
Berthelsen, ataatsimiinnermi
aqutsisoq, sinniisussat sisamaat, Demokraatit.
Tulliullunilu
oqaaseqarumavoq Isak Davidsen, Atassut.
Takanna.
Isak
Davidsen, Atassutip
oqaaseqartua.
Tassa una
oqallinneq soorunami aalajangiiffigisassatut aalajangiisoqarnavianngilaq uani oqallinnermi,
kisianni uani organistit ilinniartitaasarneranni uanga nuannarivallaanngilara
inuit arfineq pingasuinnaat aallartisinneqassappata organistitut
ilinniartillugit.
Kisianni
assersuutigeriarutsigu Qaqortumi suni tamanit peqarpugut organistinik illoqarfinni,
taava nunaqarfimmiunaasiit minitaassapput.
Isumaqarpunga
Kalaallit Nunaanni organistinik ilinniartitsinermi pigisagut organistit
atortariaqarigut taamaattumikuna oqartugut provsteqarfikkaartumik
pikkorissartitsinerit ingerlanneqarniarlik.
Aamma
organistivissuartut naammassitillugit ilinniartinneqartariaqanngillat
nunaqarfinni aamma pattattuusussat. Piginnaanilinnik peqarpugut kisianni
ilinniaqqilaarunik annikitsuarannguamik ikorfartorneqarunik, ilinniakkamik
pitsaalluinnartumik ilagiinni aamma sullisseqataasinnaasut.
Una
oqaatigilaassavara organistit imaluunniit pattattut ilagiinni aamma
sulisuupput, ajoqitulli pingaartigisut palasitullu, taakkumi erinarsornermik
oqaluffimmi tussiarnernik ingerlassisuupput. Tassaapput aamma ilagiinni suleqatigut.
Kisianni
aamma una aamma oqaatigilaarusuppata anersaakkut piitsuunerulersimanermik
oqarniartoqartarnera uanga nammineq palasitut upperinngilluaasarpara. Kisianni
tassuunga piitsuunerulerata kisianni maannakkut naalagiartarneq
inuusuttorparpassuarnik akoqalernikuuvoq.
Taamaattumik
anersaakkut kristumiuussutsimi piitsuunerulersimanngilagut, naak allanik
healerisartunik allatullu upperisalinnik akuugaalersimagaluaqaluta. Kisianni
suliniarneq sukaterneqartariaqarpoq upperisarsiornerup Lutherikkuussutsip
iluani.
Aamma
assut pinngitsoornanga qujarusuppunga Anthonimut siunnersuuteqartumut
oqallisissiarinnittumut. Assut nuannaraara taamatut ilageeqarneq aamma
Lutherikkuussuseq maani suliniarneq sakkortusarumallugu oqallisissamik
taamattumik pilersitsigavit qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Ja,
maannalu oqaaseqaqqikkumanikuuvoq Kultureqarnermut, Ilinniartitaanermut,
Ilimatusarnermut Ilageeqarnermullu Naalakkersuisoq, Arkalo Abelsen.
Takanna.
Arkalo
Abelsen, Kultureqarnermut,
Ilinniartitaanermut, Ilimatusarnermut Ilageeqarnermullu Naalakkersuisoq,
Atassut.
Qujanaq.
Tassa
siullermik oqaaseqaqqaarama partiit aammalu Kattusseqatigiit oqaasiinut
qujagama partiit ataasiakkaat siunnersuutaat pullaviginngilakka. Kisianni tassa
aamma massakkut taamaaliussanngilanga mikisuarsuttai tamaasa ilanngussuullugit.
Tamassi pitsaasunik siunnersuuteqarpusi nakussassaataasinnaasunik.
Unali
taalaarusuppara oqaaseqarninni siusinnerusukkut oqaatigivara, organistitut
pattattartutut arfineq pingasut missaaniipput taakku ilinniarnerat
aallartinneqassasoq. Tassani eqqarsaatigalugit tassa pattagiarsuarsornissamut.
Tassalu
taakkua qitiusumi ingerlanneqassapput, kisianni harmonorgelit tassa pattagiannguit
nalunngisat nunaqarfinni atorneqartut, taakkunannga ilinniartitsinerit taakkua
piffinni assigiinngitsuni ingerlanneqakutsoorsinnaapput. Soorlu
provsteqarfikkaartuni. Taakkua tasiorlutik ingerlaassaapput sanileriillutik
tassami aamma ilumoorpoq Isak Davidseni aatsaannguaq oqarami, piginnaanillit
pattagiarsuarsornermik ilinniartinngikkaluarlugit kisianni pattagiannguanik
pattagiaqarlutik pattattuusinnaasut, aamma taakkua eqqarsaatigineqarluinnarput
uani.
Taava
aamma ilanngutilaarusuppara aatsaannguaq qimattuulaagara, soorunami ilagiinni
sulisut eqqartortillugit aamma eqqaaneqanngitsoorsinnaanngilaq ilagiit
sinniisaattut qinerneqarsimasut. Taakkua piffinni assigiinngitsuni aamma
suliniarnerminni assigiinngitsunik aporfeqartarput.
Isumaqarluinnarpunga
ataatsimiititaliarsuup siuliani taasama aammalu uanga pisortaqarfinni
qulaajaanermi, aamma taakku ilagiit sinniisaattut sulinerit aamma ilanngullugit
misissuiffigeqqissaartariaqarput nalilersuiffigalugillu.
Tassami
tupinnanngitsumik ilaatigut ilagiinni suliniaraluartut misigisimasarput allanut
qinikkanut sanilliullutik pitsaavallaanngitsumik atugassaqartinneqarlutik.
Isumaqarpunga ilagiinni sinniisut sulisut suliamik annertuumik ingerlataqartut
aammalu nersortariaqartorujussuusut, kisiannili pisariaqartippaat aamma
immikkut qanoq iliuuseqarfigineqarnissartik. Taanna uanga
pisortaqarfinninngaanniit eqqummaariffigaarput aammalu qulaajagassanut
ilaatilluinnarlugu.
Qujanaq.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Ja,
nappaanikullu kingullersaat maanna Athno Frederiksen, siunnersuuteqartoq.
Aappassaaneerluni
takanna.
Anthon
Frederiksen,
siunnersuuteqartoq, Kattusseqatigiit.
Tassa
nuannaarutigivara oqallisissiaq soqutigineqarluarluni oqallisigineqarmat,
aammalu ilaatigut arajutsisimaneqanngitsut assigiinngitsut eqqaaneqarmata aamma
Naalakkersuisup sulinitissatut siunniussimasai aamma nuannaarutigingaarpakka.
Qularutiginngilara taamatut siunniussaqarsimaneq ilagiinni sullissinermi
pitsanngoriaatinik kinguneqarumaartoq.
Qujavunga.
Per
Berthelsen,
ataatsimiinnermi aqutsisoq, sinniisussat sisamaat, Demokraatit.
Qujanaq.
Allanillu
nappaasoqarnikuunngilaq, taamallu ililluta oqaluuserisassaq 117
naammassivarput.