Oqaluuserisassani immikkoortoq 125 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Isak
Davidsen, Ataatsimiititaliap
Siulittaasua, Atassut.
Qujan.
Ombudsmandip
2001-imi nalunaarutaa pillugu inatsisartut inatsisit atortinneqarnerannut
ataatsimiititaliaata isumaliuutissiissutaa, inatsisartut inatsisit
atortinneqarnerannut ataatsimitsitaliaat suliarinninnermini ukuninnga
inuttaqarpoq:
Inatsisartuni
ilaasortaq Isak Davidsen, Atassut, siulittaasoq
Inatsisartuni
ilaasortaq Ole Dorph, Siumut, siulittaasup tullia
Inatsisartuni
ilaasortaq Enos Lyberth, Siumut
Inatsisartuni
ilaasortaq Ane Hansen, Inuit Ataqatigiit
Inatsisartuni
ilaasortaq Astrid Fleischer Rex, Demokraatit
Siullermik
Ombudsmandip ukiumoortumik nalunaarutaa Ombudsmandip sulinera pillugu
Aalajangersakkat Nalinginnaasuni 9 malillugu, 2002-mi ukiakkut
ataatsimiinnermi Inatsisartut ilasortat agguaanneqarsimasoq.
Inatsisartut
Inatsisit Atortinneqarnerannut Ataatsimiititaliaata oqaatigissavaa,
qinersisoqarnissaanik nalunaaruteqartoqarnera pissutigalugu ukiumoortumik
nalunaarut ataatsimiinnermi maani aatsaat suliarineqarsinnaasimavoq.
Ukiumoortumik nalunaarut Inatsisartut nutaat inissitsitereernerini
Inatsisartuni ilaasortanut agguaateqqinneqarsimavoq.
Inatsisartut
Inatsisit Atortinneqarnerannut Ataatsimiititaliaata tassunga ilanngullugu
Ombudsmandi qutsaviginiarpaa qinersivimmi qangiuttumi annertuumik suliaqarsimammat.
Allaffissornikkut
suliaqartut inatsisit killissarititaasa iluini, aamma ingerlatsinermut
maleruagassat maleruagassatut alajangigaanngikkaluartut malillugit sulinersut,
Inatsisartut inatsisiliornermik suliaqarfittut Ombudsmandimut nakkutigisassanngortissimavaat.
Taamaalilluni
Ombudsmandi Naalakkersuisunik inatsisinillu atortitsinernik nakkutilliinermut
Inatsisartut atorpaat, taannali aamma nunatsinni innuttat inatsisitigut
illersugaanerannik qulakkeerinnitsitsisussaavoq.
Taamaalilluni
Ombudsmandi ataatsikkut inatsisartunut innuttanullu Ombudsmanditut
atuuppoq. Taamatut atuunneq ombudsmandip sulineranik ataqqinninnissamik
innimiginninnissamillu kinguneqartariaqarpoq.
Taamatut
oqaaseqarluni Inatsisit Atortinneqarnerannut Ataatsimiititaliap isumaqatigiittup
inassutigaa Inatsisartut Ombudsmandiata ukiumoortumik 2001‑imut
nalunaarutaa Inatsisartut tusaatissatut tigussagaat.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Partiit
oqaaseqartuinut Enos Lyberth, Siumut.
Enos
Lyberth, Siumup
oqaaseqartua.
Qujanaq.
Ombudsmandip
nalunaarutaa Inatsiseqarnermut ataatsimiititaliap tusaatissatut tugusimasaa,
Siumumiit isumaqatigaarput.
Nalunaarusiaq
pisarnermisut soqutiginartumik imaqarpoq. Ombudmandeqarneq nunatsinni
nutaajugaluartoq, taamaattoq Siumumiit takusinnaavarput taamatut saaffeqarneq
imaluunniit saaffeqartarneq atorluarneqartarsimasoq. Paasissutissat pineqartut
kommunemeerpata Namminersornerusuneerpatalu allanilluunniit
saaffiginnissutaasimappata.
Nunatsinni
pisortatigut sullissineq annertoqaaq, Namminersornerusuni kommunenilu
minnerunngitsumik kingulliit eqqarsaatigalugit, pisariaqarpoq kommuneni
sullissinerup iluani suliat tamarmik peqissaartumik inuuttaasunullu
naammaginartumik ingerlasimanera qularnaassallugu. Soorlumi aamma
Namminersornerusuni allanilu tamanna pisariaqartinneqartoq.
Taama
oqaaseqarluta Siumumiit Ombudmandeqarfiup imaluunniit Ombudsmandeqarfik
qutsaviginiarparput nalunaarusiaa erseqqissoq pillugu. Nalunaarusiaq aamma
uagut Siumuminngaanniit tusaatissatut tiguarput.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Ane Hansen, Inuit Ataqatigiit.
Ane Hansen, Inuit Ataqatigiit oqaaseqartuat.
Siullermik Inatsisartut Ombudmandiata suleqataasalu suleqataalu qutsavigerusuppagut ukioq 2001-imi nalunaarusiartik sukumiisumik peqqissaartumillu suliarisimammassuk.
Inuit Ataqatigiinnit ukiut siuliitulli inatsisartut Ombudsmandiata ukiumoortumik nalunaarutaa sukumiisumik misissuataarsimavarput.
Inatsisartut Ombudsmandiata nalunaarusiarisartagai ukiumut ukiut marlussuit kingumut qiviaraanni maluginiagassaavoq, inatsisartut inatsisaasa atortinniarneqarneri kommuneni ajornartorsiutaanerusartut ajornartorsiorfiunerusartut.
Kommunet suli amerlavallaat innuttaasunik sullissinermi, inuttaasut pisinnaatitaaffiinik paasissutissiisarnerat amigaateqarpoq.
Ombudsmandip nalunaarusiarisartagaani akuttunngitsunik naammattuugassaasarput kommuneni innuttaasut sullinneqarnerminni naammaginanngitsumik sullinneqartutut misigisimagunik maalaarfigisinnaasaanik ilitsersuunneqarnerit amerlavallaanni amigaateqartartut.
Taamaattumik Inuit Ataqatigiinni piffissaq manna iluatsillugu ajornartorsiutip anigorniarnissaa siunertaralugu, KANUKOKA kajumissaarusupparput kommunemi innuttaasut sullinneqarnerminni sullissinermi sullinneqarneq naammaginngikkaangamikku, sulianik ingerlatitseqqiffiusinnaasut pillugit pisinnaatitaaffiit kommuneni tamani assigiinnerusumik periaaseqarfigilernissaa siunertaralugu iliuuseqarfigeqqullugu.
Inuit Ataqatigiinni aamma maluginiarparput ukiuni kingullerni Ombudsmandimut suliakkiutigineqartartut, Ombudsmandillu sulianik aallartittagaanni Namminersornerullutik Oqartussat aammalumi kommuneni sulianut tunngatillugu apeqquteqarfigineqaraangamik, akiumaataartarnerat suliamik suliat sivitsorsarneqarneranik aamma suliat inaarneqarnissaannut kinguarsaataasartut amerlavallaartut.
Tamanna ilanngullugu pitsanngorsaavigineqartariaqartoq Inuit Ataqatigiinninngaanniit inassutigerusupparput.
Ajornartorsiut alla maluginiagarput tassaavoq inatsisartut inatsisiliornerminni tunngavissiisarnermi amerlavallaatigut qallunaat nunaanni inatsisinik isumasassarsiorpallaarneq ajornartorsiutigisaraat.
Tunngavissiorluni inatsisiliortarneq arlalissuartigut tunngavissiorluni isumassarsiortarneq arlalissuartigut ajunngikkaluartoq, taamaattoq inassutigerusunnarpoq isumassarsiornermi isumassarsiat nunatsinnut naleqqussarnissaat pingaaruteqarmat eqqumaffigeqqullugu.
Naggataatigut eqqarsaatissiissutigerusupparput siunissami inatsisartut inatsisilioraangatta inuit tamat, tassa ilinniagartuujugunik, sulisartuugunik, piniartuugunilluunniit paasisinnaasaannik paasiuminartunik siunissami inatsisilioriaaseqalernissarput eqqarsaatigeqqullugu.
Taamatut oqaaseqarluta inatsisartut Ombudsmandiata ukiumoortumik 2001-imi nalunaarusiaa tusaatissatut tiguarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Otto Jeremiassen, Atassut.
Otto Jeremiassen, Atassutip oqaaseqartua.
Ukiumoortumik Ombudsmandip 2001-mut nalunaarutaa Atassummiit misissoreerlutigu imaattumik oqaaseqaateqassaagut.
Atassummit Ombusmandip 2001-mut nalunaarutaa misissoraanni takuneq ajornanngilaq annertuutigut aamma Ombudsmandi suliaqartartoq 2001-imi.
Atassummit pingaarnerusutut isigaarput Ombusmandip suliarisarsimasaani 2001-imut tunngasuni suliat assigiinngitsut politikkikkut sulinitsinnut annertuumik attuumassuteqarnerat. Tamatumani annertuumik eqqarsaatigaarput paasissutissanik suliap uummap aallerfiusinnaaneranik aamma akoqarnera.
Atassummiit aamma malugaarput Inatsisartut Inatsisit atortinneqarnerannut Ataatsimiititaliaata nalunaarusiaq pitsaasutut nalilerlugu inassutigimmagu, Inatsisartullu tusaatissatut tigussagaat innersuussutigalugu.
Atassummiillu Inatsisartut Ombudsmandia ukioq 2001-imut nalunaarusiaa, aammalu Inatsisartut Inatsisit atortsinneqarnerannut Ataatsimiititaliaata tapersiinerat ilanngullugu nalunaarusiaq qujassutigalugu Atassummiit tusaatissatut tiguarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Astrid Fleischer Rex, Demokraatit.
Astrid Fleischer Rex, Demokraatit oqaaseqartuat.
Inatsisartut Ombudsmandiata ukiumoortumik 2001-imut nalunaarutaa, Demokraatinit qimerloorluareerlutigu Ombudmandi qutsavigerusupparput suleqataalu annertuumik suliaqarsimanerannut.
Taamatut naatsumik oqaaseqarluta Ombudsmandip 2001-imut nalunaarutaa tusaatissatut tiguarput.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Anthon Frederiksen, Kattusseqatigiit.
Anthon Frederiksen, Kattusseqatigiit.
Inatsisartut Ombudsmandiata ukiumoortumik arfineq aappassannik nalunaarutaa imartooq arlalippassuarnillu inuiaqatigiinnut tamanut soqutiginartunik imalik, inatsisartut Ombudsmandiat pillugu Inatsisartut inatsisaat nr. 7, 13. juni 1994-imeersup § 10, immikkoortoq 2 naapertorlugu aammalu tamatuma kingorna, Inatsisartut Ombudmandiata inatsisartunut nalunaaruteqartarnissaa pillugu aalajangersakkat malillugit, Inatsisartut aappassaannik ileqquusumik ataatsimiinneranni nalunaarutip tunniunneqartarnissaa pillugu aalajangersakkat naapertorlugit, Inatsisartut siorna ukiakkut ataatsimiinneranni oqaluuserineqartussaagaluaq, naluneqanngitsutut inatsisartut ukiakkut 2002-mi ataatsimiinnerata ikerinnakkut taamaatiinneqarnera pissutigalugu, nalunaarusiaq naammassillugu suliarineqanngitsoorpoq.
Taamaattumik maannakkut kingusinaaraluartumik saqqummiunneqarnera Kattusseqatigiit sinnerlugit qassiiliuutiginagu tamakkiisumik akuersaarlugu imaattumik oqaaseqarfigissavara.
Siullermik Kattusseqatigiit sinnerlugit Ombusmandi suleqataalu suliarpassuarnik annertuunik inuiaqatigiinnullu pingaaruteqartunik suliaqarnera nersorlugit qujassuteqarfiginiarpakka. Tassa Ombudmandip sulinermini nunatsinni inuit tamat oqartussaaqataanerannut aamma annertuumik sunniuteqartumillu suliaqarmat.
Tamanna Kattusseqatigiinnit assut nuannaarutigalugu tapersersortuassavarput.
Ukiumi nalunaaruteqarfiusumik suliat 93-it
aallarnerneqarsimapput, kiisalu Ombudsmandip nammineerluni 11-t aamma
misissuinermini aallartissimagai ilaatigut nalunaarusiami takuneqarsinnaapput. Aamma ilitsersuinerit 53-t aamma
suliarineqarsimallutik.
Isumaqarpunga
aamma maluginiartariaqartoq maji qaammat tassaasimammat
naammatigittaalliutiinik amerlanerpaanik tigusaqarfiusimasoq.
Suliarpassuit
assigiinngitsut aamma soorunami ukiup siuliinili ingerlanneqareersut ataatsimut
tamaasa qiviarlugit naliliiffigissaganni, Ombudsmandip suleqataasalu sulinerat
oqareernittuut nersortariaqarluinnarpoq.
Suliat
inuiaqatigiinnut soqutiginartut arlalippassuit ilaatigut aamma ukiup
nalunaaruteqarfiusup nalaani, suli naammassineqarsimanngitsut ilagaat Inissiaatileqatigiiffiup
2001-imi tusagassiuutitigut ineqartunnut nalunaarutigisimasaa. Tassalu
ineqarnermut akiligassat naafferartumik akilersorneqarsinnaanerisa januarip
aallaqqaataaniit 2002-miit taamaatinneqarnissaanut tunngasoq pillugu suliaq.
Taassuma suliap
soorunami naammassineqarluni nalunaarutigineqarnissaa aamma
Kattusseqatigiinniit alapernaasissavarput, soorunami oqareernittut aamma suliat
allarpassuit soqutiginartut malinnaavigiumaarpagut.
Taamatut
oqaaseqarlunga nalunaarut tusaatissatut tiguara akuersaarlugulu.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Inatsisit
atortinneqarneranut ataatsimiititaliap isumaqatigiittut Inatsisartut
Ombudsmandiata 2001-imi ukiumoortumik nalunaarutaat tusaatissatut tiguneqassasoq.
Oqaatigineqareersutut
isumaliutissiissummi inassutigaa.
Tamanna
ilassilluarneqartoq inimi maani oqaatigisinnaavarput, maanilu oqaaserineqartut
Ombudsmandeqarfimmut tamarmik ingerlatinneqarumaarput.
Taamaalilluni
Inatsisartut Ombudsmandiata 2001-imi ukiumoortumik nalunaarutaa inatsisartunit
tusaatissatut tiguneqarpoq.
Taamaalilluni
oqaluuserisaq naammassivoq.